உ.பி:`கொட்டும் மழையில் பாலத்திலிருந்து ஆற்றில் வீசப்பட்ட கொரோனா நோயாளியின் உடல்'- அதிர்ச்சி வீடியோ!

கடந்த சில வாரங்களுக்கு முன்பு உத்தரப்பிரதேசம் மற்றும் பீகார் மாநிலங்களின் சில பகுதிகளில் கங்கை நதியில் நூற்றுக்கணக்கான சடலங்கள் வீசப்பட்டு மிதந்து கொண்டிருந்தது பெரும் பரபரப்பை ஏற்படுத்தியது. இந்த விவகாரம் பத்திரிகைகளில் தலைப்பு செய்தி ஆனதை அடுத்து இரு மாநில அரசுகளும் ஒன்றை ஒன்று குற்றம் சாட்டிக் கொண்டன. அதனையடுத்து உத்தரப்பிரதேசம் மற்றும் பீகாரில் கங்கை நதிக்கரையில் போலீசார் கண்காணிப்பைத் தீவிரப்படுத்தினர். இந்த சம்பவத்தின் அதிர்வலைகள் அடங்குவதற்குள் தற்போது மீண்டும் உத்தரப்பிரதேசத்தின் ராப்தி ஆற்றில் கொரோனா நோயாளியின் சடலம் வீசப்பட்டுள்ள சம்பவம் அதிர்ச்சியை ஏற்படுத்தியுள்ளது.கங்கையில் மிதந்த சடலங்கள் உத்தரப்பிரதேசத்தில் பாலத்தின் மேலிருந்து இரு நபர்கள் சடலம் ஒன்றினை ஆற்றில் வீசும் 45 நொடி வீடியோ ஒன்று கடந்த சில நாள்களாக அதிகளவில் பகிரப்பட்டு வருகிறது. இணையத்தில் வீடியோ தீயாகப் பரவிப் பரபரப்பை ஏற்படுத்தியதை அடுத்து உத்தரப்பிரதேச போலீசார் வீடியோ குறித்து விசாரித்தனர். அதில் வீடியோ உத்தரப்பிரதேசத்தின் பலராம்பூர் மாவட்டத்தின் ராப்தி ஆற்றின் பாலத்திலிருந்து எடுக்கப்பட்டுள்ளதை கண்டறிந்தனர். இது தொடர்பாக மாவட்ட தலைமை மருத்துவ அதிகாரி விஜய் பகதூர் சிங் தெரிவிக்கையில், "இணையத்தில் வைரலாக பகிரப்பட்டு வரும் வீடியோவில் சித்தார்த் நகர்ப் பகுதியைச் சேர்ந்த பிரேம்நாத் என்பவரின் உடலை அவரது உறவினர்கள் இருவர் ராப்தி ஆற்றில் வீசுகின்றனர். பிரேம்நாத் இம்மாதம் 28-ம் தேதி அன்று மாவட்ட அரசு மருத்துவமனையில் தீவிர தொற்று பாதிப்புடன் சிகிச்சைக்கு அனுமதிக்கப்பட்டார். ஆனால், அவர் 28-ம் தேதி அன்று சிகிச்சை பலனின்றி உயிரிழந்தார். கொரோனா நோயாளியின் சடலத்தை ஆற்றில் வீசும் காட்சி உடலை மருத்துவமனை நிர்வாகம் அவரது உறவினர்களிடம் மயானத்தில் வைத்து ஒப்படைத்தது.ஆனால் பிரேம்நாத்தின் உறவினர்கள் சடலத்தை மயானத்தில் வைத்து தகனம் செய்யாமல் ராப்தி ஆற்றில் கொரோனா கவச உடைகளுடன் சென்று கொட்டும் மழையில் வீசியிருக்கின்றனர்" என்றார். மேலும் சம்பவம் தொடர்பாக பலராம்பூர் காவல்துறையினர் கூறுகையில், "45 நொடிகள் நீடிக்க கூடிய அந்த வீடியோவினை கொட்டும் மழையில் காரில் இருந்தபடி பொதுமக்கள் சிலர் பிரேம்நாத்தின் உறவினர்களுக்குத் தெரியாமல் பதிவு செய்து, அதை இணையத்தில் பகிர்ந்துள்ளனர். அது தற்போது மக்களிடையே பரவி பீதியைக் கிளப்பியிருக்கிறது. மாநிலத்தின் அனைத்து நதிகளிலும் போலீசார் தீவிர கண்காணிப்பு பணியில் ஈடுபட்டுக் கொண்டிருக்கும் வேளையில், இந்த நபர்கள் செய்துள்ள சம்பவம் கண்டிக்கத்தக்கது. நாங்கள் விசாரித்ததில், ஆற்றில் சடலத்தை வீசி சென்றது சஞ்சய் மற்றும் காசிராம் என்பது தெரியவந்துள்ளது. கொரோனா விதிமுறைகளைத் தகர்த்தெறிந்து, மக்களிடையே அச்சத்தை ஏற்படுத்தும் வகையில் செயல்பட்ட அவர்கள் 2 பேர் மீதும் பேரிடர் மேலாண்மை சட்டம் மற்றும் நோய்த் தடுப்பு சட்டத்தின் கீழ் பல்வேறு பிரிவுகளில் வழக்குப் பதிவு செய்திருக்கிறோம்" என்றனர். #Balrampur- पीपीई किट पहने दो युवकों द्वारा राप्ती नदी पुल से नदी में शव फेंकते वायरल वीडियो के सम्बंध में सीएमओ डॉ वीबी सिंह की बाईट @Uppolice @AdgGkr @dgpup @AwasthiAwanishK @CMOfficeUP @InfoDeptUP @myogiadityanath @bstvlive @IndiaToday @News18UP @htTweets @hemantkutiyal pic.twitter.com/ZXGyBnAstm— BALRAMPUR POLICE (@balrampurpolice) May 30, 2021 மருத்துவமனையிலிருந்து தகனம் செய்வதற்காக மயானத்தில் ஒப்படைக்கப்பட்ட கொரோனா நோயாளியின் சடலத்தை உறவினர்கள் ஆற்றில் வீசியுள்ள சம்பவம் பரபரப்பை ஏற்படுத்தியிருக்கிறது.
http://dlvr.it/S0mGDn

Read More

மும்பை: ஃபேஸ்புக் மூலம் அறிமுகம்.. பெண்ணிடம் ரூ.1.7 கோடியை பறிகொடுத்த 82 வயது முதியவர்!

சமீப காலமாக நாட்டில் ஆன்லைன் மோசடிகள் அதிகரித்துவிட்டது. அதோடு சமூக வலைத்தளங்களில் அதிக ஈடுபாடுடன் இருப்பவர்களிடமும் திட்டமிட்டு மோசடியில் ஈடுபடுகின்றனர் சிலர். இது போன்ற மோசடி பேர்வழிகளிடம் முதியோர்கள் அதிக அளவில் ஏமாறுகின்றனர். சில நேரங்களில் படித்தவர்களே இது போன்ற கும்பல்களிடம் சிக்கிக்கொள்கின்றனர். மும்பை மலபார் ஹில் பகுதியை சேர்ந்த சாந்தாராம் பட்டேல்(82). மருந்து வாங்கி விற்பனை செய்யும் தொழில் செய்து வருகிறார். இவருக்கு கடந்த பிப்ரவரி மாதம் லண்டனை சேர்ந்த சமந்தா மேத்யூ என்ற பெண்ணின் அறிமுகம் கிடைத்தது. ஃபேஸ்புக் மூலம் அவர்களுக்குள் அறிமுகம் ஏற்பட்டது. அப்பெண் தன்னை இங்கிலாந்தை சேர்ந்த மருந்து கம்பெனி ஒன்றின் பொருட்கள் கொள்முதல் அதிகாரி என்று அறிமுகம் செய்து கொண்டார். இருவரும் போன் நம்பர்களை மாற்றிக்கொண்டனர். அவர்கள் அடிக்கடி போனில் தொடர்பு கொண்டு பேசினர். அப்பெண் தங்களது மருந்து கம்பெனிக்கு புற்றுநோய் மருந்து தயாரிக்க தேவையான மூலிகைகளை நாகலாந்தில் உள்ள ஒரு கம்பெனியில் இருந்து வாங்குவதாக தெரிவித்தார். அதனை உங்களிடமிருந்து வாங்குவதாக சமந்தா ஆசை வார்த்தை கூறினார். நாகலாந்து கம்பெனியில் இருந்து மூலிகை பொருட்களை வாங்கி எங்களுக்கு சப்ளை செய்யுங்கள் என்று அப்பெண் தெரிவித்தார். சித்தரிப்பு படம் இதையடுத்து சமந்தாவின் கம்பெனிக்கும் சாந்தாராமிற்கும் இடையே ஒப்பந்தம் ஏற்பட்டது. சமந்தாவின் கம்பெனிக்கு தேவையான மூலிகை பொருட்களை சப்ளை செய்ய தேவையான பணியில் சாந்தாராம் ஈடுபட்டார். ஒரு பாக்கெட் ரூ.2 லட்சம் வீதம் ஆரம்பத்தில் 5 பாக்கெட்களை சாம்பிளாக அனுப்புவதாக தெரிவித்தார் சாந்தாராம். ஆனால் சமந்தாவின் கம்பெனியோ குறைந்தது 500 பாக்கெட் வேண்டும் என்று தெரிவித்தது. இதையடுத்து சாந்தாராம் நாகாலாந்து கம்பெனியிடம் ரூ.1.7 கோடி கொடுத்து 500 பாக்கெட் கொள்முதல் செய்தார். அதனை இங்கிலாந்து கம்பெனிக்கு டெலிவரி செய்ய முயன்றார். ஆனால் இங்கிலாந்து கம்பெனி அதனை ஏற்றுக்கொள்ளவில்லை தொடர்ந்து அவர்களை தொடர்பு கொள்ளவும் முடியவில்லை. இதையடுத்து பாதிக்கப்பட்ட சாந்தாரம் மும்பையில் உள்ள கொலாபா போலீஸ் நிலையத்தில் புகார் செய்துள்ளார். போலீஸார் வழக்குப் பதிவு செய்துவிசாரித்து வருகின்றனர். இந்த மோசடியில் இந்தியாவை சேர்ந்த சிலருக்கு தொடர்பு இருக்கும் என்று கருதும் போலீஸார் அது பற்றியும் விசாரித்து வருகின்றனர்.
http://dlvr.it/S0lRbZ

Read More

கர்நாடகா: `ஒரு டோஸ் ரூ.900’ ; தடுப்பூசி விவகார சர்ச்சை! - சிக்கலில் பா.ஜ.க. எம்.பி., எம்.எல்.ஏ.

இந்தியா முழுவதும் பெருகி வரும் கொரோனா தொற்று காரணமாக அந்தந்த மாநிலங்களில் கடும் கட்டுப்பாடுகளுடன் தொடர்ந்து நடைமுறையில் இருந்து வருகிறது. அதேபோல், கர்நாடகாவிலும் வரும் ஜூன் 7ம் தேதி வரை ஊரடங்கானது நீடிக்கப்பட்டுள்ளது. கொரோனாவை முழுமையாக கட்டுப்படுத்துவதற்கு அனைவரும் விரைந்து சென்று தடுப்பூசிகளை செலுத்திக்கொள்வது தான் சிறந்த வழி என பல்வேறு திசைகளிலிருந்தும் விழிப்புணர்வு குரல்கள் எழுந்து வருகிறது. இந்த சூழலில் மக்களின் உயிர் காக்கும் தடுப்பூசியிலும் கர்நாடகாவைச் சேர்ந்த ஒரு சில அரசியல்வாதிகள் வருமானம் பார்த்து வருவதாக குற்றச்சாட்டு எழுந்திருக்கிறது.தடுப்பூசி பெங்களூருவிலுள்ள பசவனகுடியில் வசித்து வரும் சமூக ஆர்வலரான வெங்கடேஷ் என்பவர் தன் மகனுக்கு கொரோனா தடுப்பூசி செலுத்துவதற்காக அங்கு அமைந்துள்ள ஏ.வி. தனியார் மருத்துவமனையில் கடந்த வெள்ளிக்கிழமை (28.05.2021) அன்று மாலை தொலைபேசியின் வாயிலாக அழைத்து விசாரித்துள்ளார். அப்போது இவரிடம் பேசிய மருத்துவமனை ஊழியர் ஒருவர், “ஒரு டோஸ் தடுப்பூசியின் விலை 900 ரூபாய். இதற்கு நீங்கள் முதலில் சென்று பசவனகுடி எம்.எல்.ஏ. அலுவலகம் அல்லது வாசவி மருத்துவமனையில் பதிவு செய்ய வேண்டும்.” என்று தெரிவித்துள்ளார். “மருத்துவமையில் தடுப்பூசியை செலுத்திக் கொள்வதற்கு நான் ஏன் எம்.எல்.ஏ. அலுவலகத்தில் பதிவு செய்ய வேண்டும்?” என்று வெங்கடேஷ் கேள்வி கேட்க, “எம்.எல்.ஏ. அலுவலகத்திலிருந்து தான் எங்களுக்கு தேவையான அளவு தடுப்பூசிகள் கொண்டுவரப்படுகிறது. வாசவி மருத்துவமனை செவிலியர்கள் தான் தடுப்பூசி செலுத்துவதை நிர்வகித்து வருகின்றனர்” என்று கூறியுள்ளார். “இருப்பினும் ஒரு டோஸ் தடுப்பூசிக்கு இவ்வளவு விலையா?” என்று திகைப்புடன் வெங்கடேஷ் கேட்க, “ஆம், இதில் வசூலிக்கப்படும் பணம் அனைத்தும் எம்.எல்.ஏ அலுவலகத்திற்கு தான் சென்று சேரும்” என்று மேலும் திகைப்பூட்டும் பதிலை தெரிவித்துள்ளார். மேலும் இந்த விவகாரத்தில் பசவனகுடி எம்.எல்.ஏ. உட்பட பெங்களூரு தெற்கு தொகுதியின் பா.ஜ.க. நாடாளுமன்ற உறுப்பினரான தேஜஸ்வி சூர்யாவும் தொடர்புபட்டிருப்பது தெரியவந்துள்ளது.தேஜஸ்வி சூர்யா இது தொடர்பாக, பசவனகுடி எம்.எல்.ஏ. ரவி சுப்ரமணியா மீதும், தேஜஸ்வி சூர்யா மீதும் காவல் நிலையத்தில் சமூக ஆர்வலர் வெங்கடேஷ் புகார் அளித்துள்ளார். இதனையடுத்து, இதை மறுத்துள்ள பசவனகுடி எம்.எல்.ஏ. ரவி சுப்ரமணியா, “எனக்கும் அந்த மருத்துவமனை நிர்வாகத்தினருக்கும் எந்தவிதமான தொடர்பும் இல்லை. என் மீதும் பொறாமை கொண்ட சிலர் இது போன்ற பொய்யான குற்றச்சாட்டுகளை என் மீது சுமத்தி வருகின்றனர். இதில் நான் தொடர்புபட்டிருபதாகக் கூறும் அந்த மருத்துவமனை ஊழியர் மீதும், அந்த சமூக ஆர்வலர் மீதும் காவல்துறை உடனடி நடவடிக்கை எடுக்க வேண்டும்” என்று தெரிவித்தார். இந்த விவகாரம் குறித்து கடுமையாக விமர்சித்துள்ள பெங்களூரு காங்கிரஸ் கட்சியின் தலைவர்கள் பவண் கெடா மற்றும் ஸ்ரீனிவாஸ், “இது போன்ற அசாதாரண சூழலில் மக்களுக்கு அவசியமான தடுப்பூசிகளில் கூட வருமானம் ஈட்ட முற்படுகின்றனர். அரசு மருத்துவமனைகளில் திட்டமிட்டு பற்றாக்குறையை ஏற்படுத்தி தனியார் மருத்துவமனைகளின் மூலம் வருவாய் ஈட்டி வருகின்றனர். நகரம் முழுவதும் தேஜஸ்வி அந்த குறிப்பிட்ட மருத்துவமனையில் சென்று தடுப்பூசிகளை போட்டுக்கொள்ள ஊக்குவிக்கும் விதமான பதாகைகளே நிரம்பியுள்ளது. இதிலேயே வெட்ட வெளிச்சமாக தெரிகிறது அவர் தான் இதற்கு முக்கியக் காரணம் என்று. இதில் அவர்கள் இருவருக்கும் தக்க தண்டனை வழங்கப்பட வேண்டும். அதோடு, அவர்களுடைய சட்டமன்ற பொறுப்பு மற்றும் தேஜஸ்வி சூர்யாவின் நாடாளுமன்ற பொறுப்பு உடனடியாக பறிக்கப்பட்டு சிறையில் அடைக்கப்பட வேண்டும்” என்று காரசாரமாக சாடியுள்ளனர்.கொரோனா தடுப்பூசி இதைத் தொடர்ந்து, பா.ஜ.க. எம்.பி-யான தேஜஸ்வி சூர்யா இக்குற்றச்சாட்டை கடுமையாக மறுத்துள்ளார். எனக்கும் அம்மருத்துவமனைக்கும் எந்தவிதமான தொடர்பும் இல்லை. மக்கள் அனைவரும் தடுப்பூசிகளை போட்டுக்கொள்வதற்கு ஊக்குவிக்கும் விதமாகவே அந்த பதாகைகள் வைக்கப்பட்டன. மற்றபடி வேறு எந்த உள்நோக்கமும் அதில் கிடையாது” என்று திட்டவட்டமாக மறுத்துள்ளார். இதைத் தொடர்ந்து பேசிய சமூக ஆர்வலர் வெங்கடேஷ், “காவல்துறை விசாரணையின் போது என் தொலைபேசியை சோதனையிடுகையில் யார் பொய்யாக பேசி வருகிறார்கள் என்று தெரியவரும்” கூறினார்.கர்நாடகா முதல்வர் எடியூரப்பா ஒரு சில தினங்களுக்கு முன்பு தான் தேஜஸ்வி சூர்யா, தனியார் மருத்துவமனைகளுடன் இணைந்து பெங்களூரு ஷாலினி மைதானத்தில் கட்டண தடுப்பூசி முகாம் நடத்தினார். பின்னர், மக்களின் எதிர்ப்பு வலுத்ததால் அது ரத்து செய்யப்பட்டது குறிப்பிடத்தக்கது. இந்த விவகாரத்தில் கர்நாடக மாநில முதல்வர் எடியூரப்பா இது குறித்த கருத்துக்கள் ஏதும் தெரிவிக்காமல் மௌனம் காத்து வருகிறார். விரைவில் அம்மௌனம் கலையும் என்று எதிர்பார்க்கப்படுகிறது.
http://dlvr.it/S0kVCY

Read More

கஷ்டப்பட்டு வளர்த்த கட்சி வீணாவதை பார்த்து கொண்டிருக்க முடியாது - சசிகலா பரபரப்பு ஆடியோ

தனது ஆதரவாளர்களுடன் சசிகலா பேசியதாக இரண்டாவது நாளாக ஆடியோ ஒன்று வெளியாகியுள்ளது. இதில் அவர், கட்சிக்குள் பூசல் நிலவி வருவது குறித்து வருத்தம் தெரிவித்து விரைவில் மீண்டும் அரசியலுக்கு வந்துவிடுவதாக பேசுவதுப்போல் உள்ளது. அந்த ஆடியோவில் சசிகலா பேசியதாவது:- ''இது கொரோனா நேரம், எல்லோரும் ஜாக்கிரதையாக இருங்க. விரைவில் நல்ல முடிவு எடுக்கிறேன். சீக்கிரம் வந்துரலாம். கவலைப்படாதீங்க. அவங்க சண்டை போட்டுக்கிட்டு இருக்கிறத பார்க்குறப்போ ரொம்ப கஷ்டமா இருக்கு. நாங்க ரொம்ப கஷ்டப்பட்டு கட்சிய வளர்த்தோம். அது வீணாகுறத பார்த்துட்டு இருக்க முடியாது. அதனால விரைவில வந்துருவேன். கொரோனா தாக்கம் குறைஞ்சதும் உங்க எல்லாத்தையும் பார்க்குறேன். கட்சிய நல்லா கொண்டு வந்துருவோம். கவலைப்படாதீங்க'' என்று தொண்டரிடம் சசிகலா பேசியதாக வெளியான ஆடியோ பரபரப்பை ஏற்படுத்தியுள்ளது.
http://dlvr.it/S0jNS4

Read More

நீலகிரி: விபத்தில் பேச்சு மூச்சின்றி கிடந்த ஓட்டுநர்; சமயோசிதமாக உயிரைக் காப்பாற்றிய போலீஸார்!

நீலகிரி மாவட்டம் கூடலூரிலிருந்து கேரளாவை நோக்கி பிக்கப் வாகனம் ஒன்று நாடுகாணி - வழிக் கடவு மலைப்பாதையில் சென்று கொண்டிருந்தது. திடீரென ஓட்டுநரின் கட்டுப்பாட்டை இழந்த அந்த வாகனம் சாலையோர தடுப்பு சுவரின் மோதி கவிழ்ந்துள்ளது. இதில் வாகன ஓட்டுநர் தூக்கி எறியப்பட்டு உடலில் காயங்களுடன் சுய நினைவை இழந்து பேச்சு மூச்சின்றி கிடந்துள்ளார். அசைவின்றி கிடந்த ஓடுநரைப் பார்த்த மக்கள், அவர் இறந்துவிட்டதாக எண்ணி அருகில் செல்லாமல் வேடிக்கை பார்த்தபடி நின்றுள்ளனர். விபத்தில் உயிர் பிழைத்த ஓட்டுநர் வழக்கமான ரோந்து பணிக்காக அந்த வழியாகச் சென்ற நீலகிரி மாவட்ட க்யூ பிரிவு இன்ஸ்பெக்டர் சத்யமூர்த்தி மற்றும் சப் இன்ஸ்பெக்டர் மரக்கார் ஆகிய இருவரும் மக்கள் கூடியருப்பதைக் கண்டு வாகனத்தை நிறுத்தி கள நிலவரத்தைக் கேட்டறிந்துள்ளனர். பேச்சு மூச்சின்றி கிடந்த ஓட்டுனரின் உடலை தொட்டுப்பார்த்து உடல் சூடு இருப்பதைக் உணர்ந்து, துரிதமாகச் செயல்பட்டு ஓட்டுநரின் மார்பில் கைகளால் அழுத்தம் கொடுத்துக் கொடுத்து, சி.பி.ஆர் (CardioPulmonary Resucsitation(CPR) உயிர்காப்பு முறையில் அவரது உயிரைக் காப்பாற்ற முயற்சி மேற்கொண்டுள்ளனர். தொடர்ந்து அவரது கை மற்றும் கால்களை தேய்த்து, மார்பில் அழுத்தம் கொடுத்துள்ளனர். கர்நாடகாவைச் சேர்ந்த ஓட்டுநர் ஒருவரும் உதவி செய்துள்ளார். இந்த முதலுதவிகளால் ஓட்டுநரின் சுவாசம் மெல்ல சீராகி கண்களை திறந்து பார்த்துள்ளார். உடனடியாக அவரை மருத்துவமனைக்கு அனுப்பி வைத்தனர். தற்போது அந்த ஓட்டுநர் நல்லமுறையில் உள்ளார். விபத்தில் உயிரிழந்தாக மக்கள் நம்பிய நபரை, சமயோசிதமாகச் செயல்பட்டு உயிர்காத்த காவலர்களுக்குப் பாராட்டுகள் குவிகின்றன. விபத்தில் உயிர் பிழைத்த ஓட்டுநர் இந்த நெகிழ்ச்சி சம்பவம் குறித்து நம்மிடம் பேசிய காவலர் ஒருவர், ``இந்த வாகனத்தை ஓட்டி வந்தது கேரளா கொழிஞ்ஞம்பாறை பகுதியைச் சேர்ந்த அபிலாஷ் என்ற ஓட்டுநர். விபத்தில் ஏற்பட்ட காயத்தால் சுயநினைவின்றி கிடந்தார். நம் காவலர்களின் சாதுர்யத்தால் உயிர் பிழைத்துள்ளார். கேரளாவில் உள்ள பூக்கோட்டும் பாடம் காவல்துறையினருக்குத் தகவல் அளித்துள்ளோம்" என்றார். துரிதமாகச் செயல்பட்டு ஓட்டுநரின் உயிரைக் காத்த இந்த நெகிழ்ச்சி வீடியோ தற்போது சமூக வலைத்தளங்களில் வைரலாகி வருகிறது. தமிழக காவல்துறையினரை கேரள நெட்டிசன்கள் கொண்டாடி வருகின்றனர்.
http://dlvr.it/S0gxt8

Read More

லட்சத்தீவு: `பஞ்சாயத்து ஒழுங்குமுறை சட்டம்’ மூலம் கைமாறிய அதிகாரங்கள்! - தொடரும் சர்ச்சை

லட்சத்தீவு குறித்து தினமும் புதுப்புது தகவல்கள் வெளியே வந்தவண்ணம் உள்ளன. கடந்த டிசம்பர் மாதம் பொறுப்பேற்ற புதிய ஆட்சியாளர்/ நிர்வாகி பிரஃபுல் கோடா பட்டேல் பல புதிய விதிகளை லட்சத்தீவில் அரங்கேற்றியுள்ளார். பிரஃபுல் கோடா பட்டேல்லட்சத்தீவில் தங்கியிருந்தது சிலநாட்கள்தான் என்றும், அதன்பிறகு அவர் டாமன் தீவுக்கு சென்றுவிட்டார் என்று கூறுகின்றனர் தீவுவாசிகள். டாமன் தீவில் இருந்தபடிதான் புதிய சட்ட விதிகளை பிறப்பித்துக் கொண்டிருப்பதாகவும் கூறுகின்றனர். பிரஃபுல் பட்டேல் கொண்டுவந்த சட்ட விதிகளில் ஒன்றுதான் மாவட்ட பஞ்சாயத்தின் அதிகார குறைப்பு. மாவட்ட பஞ்சாயத்தின் அதிகாரங்கள் அட்மினிஸ்டேட்டரின்(பிரஃபுல் கோடா பட்டேல்) வரம்புக்குள் கொண்டுவரப்பட்டுள்ளன. லட்சத்தீவில் இந்தியாவின் பிற மாநிலங்களைப் போல சட்டசபை இல்லை. எனவே அங்குள்ள உயர்ந்த அதிகாரம் மாவட்ட பஞ்சாயத்து மட்டுமே. பஞ்சாயத்து ரெகுலேஷன் ஆக்ட் என்ற சட்டத்தை கொண்டுவந்து மாவட்ட பஞ்சாயத்தின் அதிகாரத்தில் கைவைத்துள்ளார் பிரஃபுல் பட்டேல்.தென்னை மரங்களில் காவி பெயிண்ட் லட்சத்திவு கல்வித்துறை, கால்நடை பராமரிப்புத் துறை, விவசாயம், சுகாதாரத்துறை, மீன்வளத்துறை ஆகிய துறைகள் எல்லாம் முன்பு மாவட்ட பஞ்சாயத்தின் அதிகாரத்தின் கீழ் இருந்தன. மீன்பிடி படகுகள் வாங்குவதற்கான மானியம் வழங்குவது உள்ளிட்ட பல திட்டங்கள் மாவட்ட பஞ்சாயத்தின் அதிகாரத்திற்கு உட்பட்டே இருந்தது. இவை அனைத்தையும் அட்மினிஸ்டேட்டரின் அதிகார வரம்பிற்குள் மாற்றியுள்ளார் பிரஃபுல் கோடா பட்டேல். அதுமட்டுமல்லாது லட்சத்தீவில் சாலை ஓரங்களில் உள்ள அனைத்து தென்னை மரங்களிலும் காவி வண்ணம் பூச வேண்டும் என வாய்மொழியாக உத்தரவிடப்பட்டுள்ளதாகவும் குற்றச்சாட்டு எழுந்துள்ளது. சுமார் 40 ஆண்டுகளாக கிரிமினல் குற்ற வழக்குகளில் பெரிய அளவில் யாரும் சிறைக்குச் சென்றதில்லை. சைக்கிளில் லைட் இல்லாமல் சென்றது, பைக்கில் மூன்றுபேர் பயணித்தது போன்ற வழக்குகள்தான் அங்குள்ள கோர்ட்டில் பதிவாகியுள்ளதாக கூறுகின்றனர் தீவு வாசிகள். ஆனால், அட்மினிஸ்டேட்டரை எதிர்ப்பவர்களை கைது செய்வதற்காக குண்டாஸ் ஆக்ட் கொண்டுவரப்பட்டுள்ளதாக தீவுவாசிகள் அச்சம் தெரிவித்துள்ளனர்.பிரபுல் கோடா பட்டேல் இதற்கிடையில் கேரள மாநிலத்தில் பா.ஜ.க தவிர மற்ற அரசியல் கட்சிகள் அனைத்தும் லட்சத்தீவை காப்பாற்றுவோம் என்ற தலைப்பில் தங்கள் எதிர்ப்பை பதிவு செய்து வருகின்றன. காங்கிரஸ் தலைமையிலான யு.டி.எஃப் எம்.பி-க்கள் அனைவரும் லட்சத்தீவில் சென்று ஆய்வுசெய்யும் நடவடிக்கையில் இறங்கியுள்ளதாக கேரள எதிர்கட்சி தலைவர் வீ.டி.சதீசன் தெரிவித்திருக்கிறார். லட்சத்தீவு பிரச்னை தொடர்ந்து விஸ்வரூபம் எடுத்து வருகிறது.
http://dlvr.it/S0gxqP

Read More

`இனி கேரளாவின் வயநாட்டிலும் முதலமைச்சர் காப்பீட்டுத் திட்டம் செல்லும்!' - தமிழக அரசு அறிவிப்பு

உயர் மருத்துவ சிகிச்சை வசதிகள் குறைவாக உள்ள நீலகிரி மாவட்ட மக்கள் பெரும்பாலும் கர்நாடகாவின் மைசூரு, கேரளாவின் வயநாடு மற்றும் அருகில் உள்ள கோவை மாவட்டத்தையே மருத்துவத் தேவைக்கு நம்பி உள்ளனர். தற்போது நீலகிரியில் அரசு மருத்துவக்கல்லூரி மருத்துவமனை கட்டப்பட்டு வருகிறது.ஊட்டி அரசு மருத்துவமனை இந்நிலையில், நீலகிரி மாவட்டம் கூடலூர் மற்றும் பந்தலூர் பகுதி மக்கள் கேரள மாநிலம் வயநாட்டில் உள்ள தனியார் மருத்துவமனைகளில் தமிழக அரசு முதலமைச்சரின் விரிவான காப்பீட்டுத் திட்டத்தின் கீழ் கொரோனா சிகிச்சை பெற முதன்முறையாக ஏற்பாடு செய்யப்பட்டுள்ளது. இந்த சிறப்பு ஏற்பாடு குறித்து நீலகிரி மாவட்ட ஆட்சியர் இன்னசென்ட் திவ்யாவிடம் பேசினோம். ``நீலகிரி மாவட்டத்தில் கொரோனா தொற்று அதிகரித்து வருவதைக் கருத்தில் கொண்டு தொற்று பாதித்தவர்களுக்கு உதவிடும் வகையில் நீலகிரி மாவட்டத்திலும், மாவட்ட எல்லைகளில் உள்ள கேரளா மாநிலத்திலும் சேர்த்து 9 தனியார் மருத்துவமனைகளில் 656 படுக்கைகள் தயார் நிலையில் உள்ளன. கூடலூர், பந்தலூர் பகுதிகளில் வசிக்கக்கூடிய பொதுமக்கள் கேரளாவில் உள்ள இரு மருத்துவமனைகளில் காப்பீட்டுத் திட்டத்தின் கீழ் சிகிச்சை பெற வசதி செய்யப்பட்டுள்ளது. இதன்படி கேரளாவின் வயநாட்டில் உள்ள வயநாடு இன்ஸ்டிடியூட் ஆஃப் மெடிக்கல் சயின்ஸ் மருத்துவமனையில் 360 படுக்கைகள் உள்ளன. இங்கு சிகிச்சை பெற சாஜித்- 9048115044 என்ற எண்ணில் தொடர்புகொள்ளலாம். வயநாடு விநாயகா மருத்துவமனையில் 100 படுக்கைகள் உள்ளன, இங்கு சிகிச்சை பெற விஷ்ணு மோகன்- 9787304403 என்ற எண்ணில் தொடர்பு கொண்டு படுக்கை வசதிகள் குறித்து அறிந்து கொரோனா சிகிச்சை பெற்றுக்கொள்ளலாம்.நீலகிரி மாவட்ட ஆட்சியர் இன்னசென்ட் திவ்யா இந்த 9 தனியார் மருத்துவமனைகளிலும் முதலமைச்சரின் விரிவான காப்பீடு திட்டத்தின் கீழ் கொரோனா சிகிச்சை இலவசமாக வழங்கப்படும். இதுகுறித்து சந்தேகம் இருந்தால் நீலகிரி மாவட்ட திட்ட அலுவலரை 7373004241 என்ற எண்ணில் தொடர்பு கொள்ளலாம்" எனத் தெரிவித்துள்ளார். இத்தகைய இக்கட்டான சூழலில் மக்களின் நலனுக்காக கேரளாவிலும் தமிழக அரசின் காப்பீட்டுத் திட்டத்தில் இலவசமாக சிகிச்சை பெற்றுக்கொள்ள அரசு சிறப்பு ஏற்பாடுகள் செய்தது மக்களிடம் பெரும் வரவேற்பைப் பெற்றுள்ளது.
http://dlvr.it/S0fpr0

Read More

வைரமுத்துவுக்கு விருது அறிவிக்கப்பட்டது மறுபரிசீலனை செய்யப்படும் - ஓஎன்வி மையம் அறிவிப்பு

வைரமுத்துவுக்கு ஓ.என்.வி விருது வழங்க சின்மயி, பார்வதி எதிர்ப்பு தெரிவித்திருந்த நிலையில், அவருக்கு விருது அறிவிக்கப்பட்டது மறுபரிசீலனை செய்யப்படும் என்று ஓஎன்வி கலாச்சார மையம் அறிவித்துள்ளது. இந்தியாவில் இலக்கியத்திற்கு வழங்கப்படும் உயரிய விருதான ஞானபீட விருது விருது பெற்ற கேரளாவின் பிரபல இயலக்கியவாதியும் தேசிய விருது பெற்ற பாடலாசிரியருமான ஓ.என்.வி குறுப் பெயரில் கடந்த 2017 ஆம் ஆண்டு முதல் இலக்கியத்திற்காக சிறந்த பங்களிப்பை செய்து வருபவர்களுக்கு ஓ.என்.வி விருது வழங்கப்பட்டு வருகிறது. அந்த வகையில், இந்த ஆண்டுக்கான விருதுக்கு கவிஞர் வைரமுத்து தேர்ந்தெடுக்கப்பட்டதாக கடந்த 26 ஆம் தேதி அறிவிக்கப்பட்டார். பாலியல் குற்றச்சாட்டு உள்ள  நபருக்கு கேரளாவின் உயரிய ஓஎன்வி விருது வழங்கப்படுவதா? என்று பாடகி சின்மயி, நடிகை பார்வதி, பெண்ணியவாதிகள் பலரும் கண்டனக் குரல் எழுப்பினர். குறிப்பாக நடிகை பார்வதி “ஓ.என்.வி சார் நமது பெருமை. ஒரு கவிஞராகவும் பாடலாசிரியராகவும் அவரது பங்களிப்பு ஈடு செய்ய முடியாதது. நம் கலாச்சாரத்தையும் வளர்த்தது. அவரது இலக்கிய பணியால் நம் இதயங்கள் பயனடைந்துள்ளன. பாலியல் புகார்கள் பல சுமத்தப்பட்டிருக்கும் ஒருவருக்கு அவர் பெயரில் விருது வழங்குவது பெரும் அவமரியாதை” என்று பாடலாசிரியர் வைரமுத்து ஓ.என்.வி விருதுக்கு தேர்வு செய்யப்பட்டதற்கு கண்டனம் தெரிவித்ததோடு ஓ.என்.வி கலாச்சார மையத்தின் தலைவர்  இயக்குநர் அடூர் கோபாலகிருஷ்ணனிடம் கேள்வி எழுப்பியிருந்தார். இது சமூக வலைதளங்களில் வைரலானது. இந்நிலையில், இன்று அடூர் கோபால கிருஷ்ணன், ”வைரமுத்துவின் சிறந்த எழுத்துக்காக மட்டும்தான் நடுவர்கள் விருதுக்காக தேர்வு செய்தார்கள். அவரின் தனிப்பட்ட நடவடிக்கைகளுக்காக அல்ல. இதுதொடர்பாக விரைவில் கூட்டம் நடத்தி மறுபரிசீலனை செய்யப்படும்” என்று தெரிவித்துள்ளார். அதோடு, அறிக்கையும் வெளியிட்டுள்ளார்.
http://dlvr.it/S0d2mK

Read More

மும்பை: கொரோனாவால் உயிரிழந்த தாய்; இணையம் மூலம் பச்சிளங்குழந்தைக்குக் கிடைத்த தாய்ப்பால் உதவி!

மும்பை அருகில் உள்ள தானேயில் வசிப்பவர் சேதன். இவரின் மனைவி மீனல். மீனல் தனியார் நிறுவனம் ஒன்றில் பணியாற்றி வந்தார். நாக்பூரில் உள்ள தன் பெற்றோர் வீட்டுக்குப் பிரசவத்துக்காகச் சென்றிருந்தார் மீனலுக்கு, 32 வார கர்ப்பமாக இருந்தபோது கொரோனா தொற்று ஏற்பட்டது. அவர் அவசர சிகிச்சைப் பிரிவில் சேர்க்கப்பட்டார். மீனலைக் காப்பாற்ற முடியாது என்ற ஒரு சூழ்நிலை வந்தபோது, சிசேரியன் மூலம் குழந்தை குறை பிரசவத்தில் வெளியில் எடுக்கப்பட்டது. குழந்தைக்குத் தாய்ப்பால் தேவைப்பட்டது. உடனே அங்குள்ள நல்லுள்ளம் கொண்ட தாய்மார்கள், தாய்ப்பால் கொடுத்து குழந்தையைக் காப்பாற்றி வந்தனர். இந்நிலையில் குழந்தை டிஸ்சார்ஜ் செய்யப்பட்டது. குழந்தை தன் தந்தையுடன் தானே வர, அக்குழந்தைக்குத் தொடர்ந்து தாய்ப்பால் தேவைப்பட்டது. யாராவது தாய்ப்பால் தானம் கொடுப்பார்களா என்று சேதன் தேட ஆரம்பித்தார். இது தொடர்பாக சேதனுக்கு தெரிந்த ஒருவர், ட்விட்டரில் பதிவிட்டார். தாய்ப்பால் - Representational Image உடனே, தாய்ப்பாலுக்கு உதவுவதாக ஏராளமானோர் சேதனுக்கு போன் செய்தனர். காப்பீட்டு நிறுவன ஊழியர் நயா பேடி என்பவர், `சேதனின் குறைப்பிரசவ குழந்தைக்கு தாய்ப்பால் தேவை' என்று கூறி ட்விட்டரில் பதிவிட்டார். அடுத்த சில நிமிடங்களில் 100 பேர் தாய்ப்பால் கிடைக்க உதவுவதாகக் கூறிப் பதிவிட்டனர். இது குறித்து நயா பேடி கூறுகையில், ``டெல்லியைச் சேர்ந்த ஒருவர்தான் எனக்கு போன் செய்து, குறைப்பிரசவத்தில் பிறந்து, தாயை இழந்த குழந்தைக்குத் தாய்ப்பால் தேவைப்படுவதாகத் தெரிவித்தார். உடனே இது தொடர்பாக நான் ட்விட்டரில் பதிவிட்டேன். உடனடியாக 100-க்கும் மேற்பட்டவர்கள் தாய்ப்பால் கிடைக்க உதவுவதாகப் பதிவிட்டு இருந்தனர்" என்றார். ``குழந்தை நாக்பூரில் இருந்தபோது, சுனித் நாராயண் என்பவர்தான் ஒரு மாதமாகத் தாய்ப்பால் தானம் செய்த தாய்மார்களிடமிருந்து தாய்ப்பாலை வாங்கி வந்து குழந்தைக்குக் கொடுத்துக் கொண்டிருந்தார். வழக்கறிஞர் பூமிகா, ஆசி குப்தா, ஐஸ்வரி, நிதி ஆகியோர் கொரோனா காலத்திலும் தங்களது பாதுகாப்பைப் பற்றி கவலைப்படாமல் குழந்தைக்குத் தாய்ப்பால் கொடுத்து உதவினர். இதை ஒருபோதும் மறக்க மாட்டோம்" என்று சேதனின் சகோதரி ஷானு பிரசாத் தெரிவித்தார். தாய்ப்பால் - Representational Image பிறக்கும்போதே தாயைக் கொரோனாவுக்குப் பறிகொடுத்த தன் குழந்தைக்கு, சேதன் மும்பை, தானே பகுதியில் உள்ள நல்லுள்ளம் கொண்ட தாய்மார்களிடமிருந்து தொடர்ந்து தாய்ப்பால் வாங்கிக் கொடுத்து வருகிறார். மும்பையில் உள்ள மாகிம், போரிவலி, ஜோகேஸ்வரி போன்ற பகுதியைச் சேர்ந்த தாய்மார்கள் சேதனின் குழந்தைக்குத் தாய்ப்பாலை அனுப்பி வருகின்றனர். இதற்கிடையே, மும்பையில் 500-க்கும் அதிகமான தாய்மார்கள் தடுப்பூசி போட்டுக்கொண்டுள்ளனர் என்பது குறிப்பிடத்தக்கது.
http://dlvr.it/S0d2Kh

Read More

லட்சத்தீவு விவகாரத்தில் பிரதமர் மோடி தலையிட வேண்டும் - ராகுல் காந்தி கடிதம்

லட்சத்தீவில் மக்களுக்கு எதிராக எடுத்துவரும் கொள்கை விவகாரங்களில் பிரதமர் நரேந்திர மோடி தலையிட வேண்டும் என காங்கிரஸ் எம்.பி. ராகுல் காந்தி கேட்டுக்கொண்டுள்ளார். லட்சத்தீவின் நிர்வாகியாக நியமிக்கப்பட்ட பிரஃபுல் கோடா படேல், மாட்டிறைச்சிக்கு தடை விதிப்பது, மதுபான பார்களை திறக்க அனுமதிப்பது, வளர்ச்சிக்காக பொதுமக்கள் நிலங்களை அரசு கையகப்படுத்துவது, குண்டர் சட்டத்தை அமல்படுத்துவது என பல்வேறு சீர்திருத்தங்களை கொண்டு வந்துள்ளார். இதற்கு லட்சத்தீவு மக்கள் எதிர்ப்பு தெரிவித்து போராடி வருவதால், அங்கு அமைதியற்ற சூழல் நிலவி வருகிறது. இந்நிலையில் பிரதமர் மோடிக்கு கடிதம் எழுதியிருக்கும் ராகுல் காந்தி, லட்சத்தீவில் புதிதாக அமல்படுத்தப்பட்ட விதிகளை திரும்ப பெறவேண்டும் என்றும், இந்த விவகாரத்தில் பிரதமர் மோடி தலையிட வேண்டும் என்றும் கேட்டுக் கொண்டுள்ளார். லட்சத்தீவு நிர்வாகி தேர்ந்தெடுக்கப்பட்ட பிரதிநிதிகளிடமோ, மக்களிடமோ கருத்துகளை கேட்காமல் தன்னிச்சையாக முடிவெடுத்ததால், மக்கள் போராட்டம் நடத்தி வருவதாக கூறியுள்ளார். கேரள அரசும் லட்சத்தீவு மக்களுக்காக சட்டப்பேரவையில் தீர்மானம் கொண்டு வரப்போவதாக அறிவித்துள்ளது. தமிழக முதலமைச்சர் மு.க.ஸ்டாலினும் பிரஃபுல் கோடா படேலை மத்திய அரசு திரும்ப பெறவேண்டும் என வலியுறுத்தியுள்ளார். ஆனால், பிரஃபுல் படேல் மாலத்தீவை போல, லட்சத்தீவை மாற்றவே இந்த சீர்திருத்தங்களை கொண்டு வந்திருப்பதாக தெரிவித்துள்ளார்.
http://dlvr.it/S0bGVL

Read More

`மேக்கேதாட்டுக்கு உடனே வல்லுநர் குழுவை அனுப்ப வேண்டும்!’ - முதல்வருக்கு பெ.மணியரசன் கோரிக்கை

கர்நாடக அரசு, காவிரியின் குறுக்கே மேக்கேத்தாட்டுப் பகுதியில், சட்டவிரோதமாக அணைக்கட்டும் முயற்சியை தற்போது தீவிரப்படுத்தியுள்ளது. இதனை தடுத்து நிறுத்த, தமிழக அரசு உடனடியாக, மேக்கேத்தாட்டு பகுதிக்கு வல்லுநர் குழுவை அனுப்ப வேண்டும் எனவும், இது தொடர்பாக உச்ச நீதிமன்றத்தில் தொடரப்பட்டுள்ள வழக்கை உயிர்ப்பிக்க வேண்டும் என தமிழக முதல்வர் மு.க.ஸ்டாலினுக்கு, காவிரி உரிமை மீட்புக்குழு ஒருங்கிணைப்பாளரும், தமிழ்த் தேசியப் பேரியக்க தலைவருமான பெ.மணியரசன் அவசர கோரிக்கை விடுத்துள்ளார்.பெ.மணியரசன் இதுகுறித்து நம்மிடம் விரிவாகப் பேசிய பெ.மணியரசன், ‘’மத்திய அரசின் சூழலியல் துறை, வனத்துறை ஆகியவற்றின் அனுமதியைப் பெறாமல், சட்ட விரோதமாக மேக்கேத்தாட்டில் காவிரியின் குறுக்கே அணைகட்டும் பணிகளைக் கர்நாடக அரசு தொடங்கியுள்ளதாக தற்போது தகவல் வெளியாகியுள்ளது. இதனை அடிப்படையாகக் கொண்டு, தேசியப் பசுமைத் தீர்ப்பாயத் தென் மண்டலப் பிரிவு, தானே முன்வந்து வழக்குப்பதிவு செய்து விசாரணைக் குழு அமைத்துள்ளது. தமிழக அரசின் உளவுத்துறை மற்றும் நீர்வளத்துறை, சட்டத்துறை ஆகிய எதுவும் கர்நாடக அரசின் சட்டவிரோத அணைகட்டும் பணிகளைக் முன்கூட்டியே கண்டறியவில்லை என்பது வருத்தமளிக்கிறது. வெள்ளக் காலத்தில் கர்நாடக அணைகளில் தேக்க முடியாத காவிரி நீரையும் கூட மேக்கேத்தாட்டுவில் தேக்கி வைத்துக் கொண்டு, தமிழ்நாட்டிற்கு ஒரு சொட்டு தண்ணீர் கூடப் போகாமல் தடுக்க வேண்டும் என்ற சதி நோக்குடன்தான் கர்நாடகம் அந்த அணையைக் கட்ட முயல்கிறது.. மேக்கேத்தாட்டு அணைத் திட்டம், உச்ச நீதிமன்றத்தின் காவிரித் தீர்ப்புக்கு எதிரானது என காவிரி உரிமை மீட்புக் குழு எதிர்ப்புத் தெரிவித்து வருகிறது. மேக்கேதாட்டு கட்டுமானப் பணிகளைத் தடுப்பதற்காக 07.03.2015 அன்று கர்நாடகம்-தமிழகம் எல்லையான தேன்கனிக்கோட்டையிலிருந்து காவிரி உரிமை மீட்புக் குழுவினர் 5,000 பேர் நடைபயணம் புறப்பட்டுக் கைதானோம். மேக்கேதாட்டு அணை கட்டும் கர்நாடக அரசின் சட்டவிரோத முயற்சிக்குத் தடை கோரித் தமிழ்நாடு அரசு கடந்த 2018 நவம்பரில் உச்ச நீதிமன்றத்தில் வழக்குப் போட்டுள்ளது. அந்த வழக்கை உச்ச நீதிமன்றம் கிடப்பில் போட்டுவிட்டது. தமிழ்நாடு அரசும் அவ்வழக்கை உயிர்ப்பித்து, விரைந்து நடத்த உரிய சட்ட நடவடிக்கைகளை எடுக்கவில்லை. இப்பொழுது, ஏதோ ஓர் செய்தி ஊடகத்தில் மேக்கேதாட்டு அணைகட்டும் பணிகள் நடப்பதாக செய்தி வர, அது நம்பகமான செய்தியாகத் தெரிவதால், வனப்பாதுகாப்பு, சூழல் பாதுகாப்பு கருதி, தானே முன்வந்து வழக்குப்பதிவு செய்து நடவடிக்கை எடுத்துள்ளதாக தீர்ப்பாய நீதிபதி தெரிவித்துள்ளார். தமிழ்நாடு அரசு, வல்லுநர் குழு அமைத்து, மேக்கேதாட்டில் அணை கட்டுவதற்கான அடிப்படைப் பணிகள் நடந்துள்ளனவா என்று கண்டறிந்து அறிக்கை தரக் கர்நாடகத்திற்கு அனுப்பி வைக்க வேண்டும். அத்துடன், உச்ச நீதிமன்றத்தில் கிடப்பில் போடப்பட்டுள்ள மேக்கேதாட்டு அணை தடுப்புக்கான வழக்கை உயிர்ப்பித்து, உடனடியாக விசாரணை நடக்கத் தமிழ்நாடு அரசு விரைந்து நடவடிக்கை எடுக்க வேண்டும். மேக்கேதாட்டு அணை கட்ட திட்ட மதிப்பீட்டு அறிக்கை அனுப்புமாறு கர்நாடக அரசைக் கோரி இந்திய அரசின் நீர்வளத்துறை கொடுத்த மறைமுக அனுமதியை திரும்பப் பெறுமாறு நரேந்திர மோடியை தமிழ்நாடு முதலமைச்சர் சந்தித்து வலியுறுத்த வேண்டும். மேற்கண்ட மூன்று கோரிக்கைகள் மீதும் தமிழ்நாடு முதலமைச்சர் ஸ்டாலின் கவனம் செலுத்தி, போர்க்கால அவசரத்துடன் நடவடிக்கை எடுக்குமாறு காவிரி உரிமை மீட்புக் குழு சார்பில் கனிவுடன் கேட்டுக் கொள்கிறேன்’’ என தெரிவித்தார்.
http://dlvr.it/S0YCPS

Read More

கொரோனா: `மும்பை மாடலை மற்ற மாநகராட்சிகள் ஏன் பின்பற்றவில்லை?!’ - மும்பை உயர் நீதிமன்றம் காட்டம்

மகாராஷ்டிராவில் இம்மாத தொடக்கத்தில் தினமும் 60 ஆயிரம் பேருக்கும் மேல் கொரோனா தொற்று இருந்தது. ஆனால் இப்போது 25 ஆயிரத்திற்கும் கீழே வந்துள்ளது. மும்பையில் கொரோனாவை கட்டுப்படுத்த எடுத்த நடவடிக்கைகள் நாட்டின் மற்ற பகுதிகளுக்கு முன் மாதிரியாக இருக்கிறது. மிகவும் மக்கள் தொகை மிகுந்த மும்பை நகரில் கொரோனா கட்டுப்படுத்தப்பட்டதை உச்ச நீதிமன்றமே பாராட்டியிருந்தது. தற்போது மும்பை உயர் நீதிமன்றமும் மும்பை மாநகராட்சியை பாராட்டி இருக்கிறது. மும்பை இது தொடர்பான வழக்கு ஒன்று உயர் நீதிமன்றத்தில் விசாரணைக்கு வந்தது. இதில் கருத்து தெரிவித்த நீதிபதிகள், ``கொரோனாவை கட்டுப்படுத்துவதில் மும்பை மாநகராட்சி எடுத்த நடவடிக்கைகள் மிகவும் சிறப்பானவை. மும்பை மாடலை மாநிலத்தில் உள்ள நாசிக் மற்றும் புனே நகரங்களில் ஏன் அமல்படுத்தவில்லை” என்று நீதிபதிகள் கேள்வி எழுப்பினர். ``மகாராஷ்டிராவில் உள்ள மற்ற மாநகராட்சி கமிஷனர்களுடன் மும்பை மாநகராட்சி கமிஷனர் ஏன் வீடியோ கான்பெரன்ஸ் மூலம் மும்பை மாடலை பகிர்ந்து கொள்ளவில்லை?” என்று மாநில அரசிடம் நீதிபதிகள் கேள்வி எழுப்பினர். `மும்பையில் வெற்றிகரமாக அமல்படுத்தப்பட்ட திட்டத்தை மகாராஷ்டிராவின் மற்ற மாநகராட்சிகளிலும் அமல்படுத்தவேண்டும் என்பதே எங்களது விருப்பமாகும்’ என்று தெரிவித்தனர். Also Read: மும்பை: பொதுமுடக்கத்தால் வருமானம் இல்லை... 5 மாதக் குழந்தையை விற்க முயன்ற ஆட்டோ ஓட்டுநர்! இதற்கிடையே மகாராஷ்டிராவில் ஒரு வாரத்திற்கு பிறகு, கொரோனா பாதிப்பால் சிகிச்சை முடிந்து டிஸ்சார்ஜ் செய்யப்படுபவர்களின் எண்ணிக்கை, கொரோனாவால் புதிதாக பாதிக்கப்படுபவர்களின் எண்ணிக்கையை விட குறைவாக இருந்தது. அதாவது கடந்த 24 மணி நேரத்தில் தினத்தொற்று 24,752 ஆக இருந்தது. ஆனால் டிஸ்சார்ஜ் செய்யப்பட்டவர்களின் எண்ணிக்கை 23,065. மும்பையில் 1,352 பேர் கொரோனாவால் புதிதாக பாதிக்கப்பட்டனர். குடிசைகள் அதிகமுள்ள தாராவியில் தினத்தொற்று 24 மணி நேரத்தில் 3 ஆக இருந்தது. கொரோனா இதற்கிடையே மும்பை உயர் நீதிமன்றத்தில் சீரம் இன்ஸ்டிடியூட் ஆப் இந்தியாவின் தலைமை நிர்வாக அதிகாரி அடார் பூனாவாலாவுக்கு இசட் பிளஸ் பாதுகாப்பு கொடுப்பது குறித்து பதிலளிக்கும் படி மகாராஷ்டிரா அரசுக்கு உத்தரவிட்டுள்ளது. அடார் பூனாவாலாவுக்கு அச்சுறுத்தல் ஏற்பட்டு இருப்பதாக கூறி மத்திய அரசு ஒய் பிரிவு பாதுகாப்பு கொடுத்திருக்கிறது. ஆனால் இது போதாது என்றும் இசட் பிளஸ் பாதுகாப்பு கொடுக்க உத்தரவிடவேண்டும் என்று கோரி வழக்கறிஞர் தத்தா மானே மும்பை உயர்நீதிமன்றத்தில் மனுத்தாக்கல் செய்திருந்தார். இம்மனுவை விசாரித்த நீதிபதிகள் எஸ்.ஷிண்டே, போர்கே ஆகியோர், அதார் பூனாவாலாவுக்கு இசட் பிளஸ் பாதுகாப்பு கொடுப்பது குறித்து பதிலளிக்கும் படி மாநில அரசை கேட்டுக்கொண்டது. நாட்டில் தற்போது இரண்டு நிறுவனங்கள் மட்டுமே கொரோனா தடுப்பூசி தயாரிக்கின்றன என்பது குறிப்பிடத்தக்கது.
http://dlvr.it/S0YCMp

Read More

மும்பை: `பரம்பீர் சிங் ரூ.10 கோடி கேட்டார்’ - தொடரும் புகார்கள்.. கைது செய்ய மாநில அரசு தீவிரம்?

மகாராஷ்டிரா உள்துறை அமைச்சராக இருந்த அனில் தேஷ்முக் பதவி பறிப்புக்கு காரணமாக இருந்த மும்பை முன்னாள் போலீஸ் கமிஷனர், இப்போது பல்வேறு புதிய சிக்கல்களில் மாட்டி வருகிறார். அனில் தேஷ்முக் மும்பையில் உள்ள பீர் பார் மற்றும் ஹோட்டல் உரிமையாளர்களிடம் ஒவ்வொரு மாதமும் ரூ.100 கோடி மாமூல் வாங்கி கொடுக்கும் படி குற்றப்பிரிவு போலீஸ் அதிகாரி சச்சின் வாஸ் என்பவரிடம் கேட்டுக்கொண்டதாக மும்பை முன்னாள் போலீஸ் கமிஷனர் பரம்பீர் சிங் முதல்வர் உத்தவ் தாக்கரேவுக்கு கடிதம் எழுதினார். இக்கடிதத்தை தொடர்ந்து இது குறித்து சி.பி.ஐ.விசாரணை நடத்த மும்பை உயர் நீதிமன்றம் உத்தரவிட்டது.அனில் தேஷ்முக், பரம்பீர் சிங் இதனால் அனில் தேஷ்முக் தனது பதவியை இழந்தார். பரம்பீர் சிங் கமிஷனர் பதவியில் இருந்து இடமாற்றம் செய்யப்பட்ட பிறகு அவர் மீது அடுக்கடுக்கான புகார்கள் வந்து கொண்டிருக்கிறது. தானே போலீஸ் அதிகாரி பீம்ராவ் கொடுத்த லஞ்ச ஊழல் புகார் தொடர்பாக பரம்பீர் சிங் மீது போலீஸார் வழக்கும் பதிவு செய்துள்ளனர். விரார் பகுதியை சேர்ந்த பில்டர் ஒருவரும் தன்னிடம் பரம்பீர் சிங் மிரட்டி பணம் பறித்தார் என்று புகார் செய்துள்ளார். அது குறித்தும் போலீஸார் வழக்குப்பதிவு செய்துள்ளனர். ஆனால் இவ்வழக்குகளில் பரம்பீர் சிங்கை கைது செய்ய மும்பை உயர் நீதிமன்றம் தற்காலிக தடை விதித்துள்ளது. பரம்பீர் சிங், போலீஸ் அதிகாரி பிரதீப் சர்மா, ராஜ்குமார் ஆகியோர் மீதான மிரட்டி பணம் பறித்தல் புகாரை சி.ஐ.டி.போலீஸார் விசாரித்து வருகின்றனர். மற்றொரு புறம் தன் மீதான வழக்குகளை சி.பி.ஐ.க்கு மாற்றவேண்டும் என்று கோரி பரம்பீர் சிங் சுப்ரீம் கோர்ட்டில் மனுத்தாக்கல் செய்துள்ளார். முன்னாள் உள்துறை அமைச்சர் அனில் தேஷ்முக்கிற்கு எதிராக லஞ்ச ஊழல் புகார் தெரிவித்ததால் பழிவாங்கும் நோக்கில் தன் மீது வழக்குப்பதிவு செய்யப்பட்டுள்ளதாகவும் குறிப்பிட்டுள்ளார். இந்நிலையில் பிரபல கிரிக்கெட் சூதாட்டக்காரர் சோனு ஜலான் மகாராஷ்டிரா டிஜிபி சஞ்சய் பாண்டேயிக்கு எழுதிய கடிதத்தில் தன்னிடம் பரம்பீர் சிங் 10 கோடி ரூபாய் கேட்டதாக கடிதம் எழுதியிருந்தார். அக்கடிதத்தை தொடர்ந்து சோனு ஜலானை அழைத்து சி.ஐ.டி.போலீஸார் வாக்குமூலம் வாங்கியிருக்கின்றனர். அதில் 2018-ம் ஆண்டு மே மாதம் என்னை மிரட்டி பணம் பறித்தல் தடுப்பு பிரிவு போலீஸார் கிரிக்கெட் சூதாட்டபுகார் தொடர்பாக கைது செய்தனர். அப்போது தானே போலீஸ் கமிஷனராக இருந்த பரம்பீர் சிங்கிடம் என்னை அழைத்து சென்றனர். பரம்பீர் சிங் என்னிடம் இந்தியாவில் உள்ள கிரிக்கெட் சூதாட்டக்காரர்கள் குறித்த விபரங்களை கேட்டார். பரம்பீர் சிங் அதோடு என்னையும் எனது குடும்பத்தினரையும் பெரிய வழக்கில் சிக்கவைத்துவிடுவேன் என்று மிரட்டினார். இதிலிருந்து தப்பிக்க வேண்டுமானால் பிரதீப் சர்மாவிடம் ரூ.10 கோடி கொடுக்கவேண்டும் என்று பரம்பீர் சிங் தெரிவித்தார் என்று சோனு ஜலான் சி.ஐ.டி.போலீசாரிடம் வாக்குமூலம் கொடுத்துள்ளார். இந்த புதிய குற்றச்சாட்டு பரம்பீர் சிங்கிற்கு மேலும் சிக்கலை ஏற்படுத்ததி இருக்கிறது. ஏற்கனவே மாநில அரசுடன் மோதல் போக்கை கடைப்பிடித்திருக்கும் பரம்பீர் சிங்கை கைது செய்ய மாநில அரசு துடித்துக்கொண்டிருக்கிறது. ஆனால் உயர்நீதிமன்றம் அவரை கைது செய்ய தற்காலிக தடை விதித்திருக்கிறது. இதனால் மாநில அரசு எதுவும் செய்ய முடியாமல் கையை பிசைந்து கொண்டிருக்கிறது. நாளுக்கு நாள் இந்த வழக்கு சூடுபிடித்துக்கொண்டே செல்கிறது.
http://dlvr.it/S0WMlg

Read More

20 கிராம மக்களுக்கு முதல் டோஸ் கோவிஷீல்டு; இரண்டாவது கோவாக்சின்! - உத்தரப்பிரதேச அவலம்

உத்தரப்பிரதேச மாநிலத்தில் உள்ள 20-க்கும் மேற்பட்ட கிராமங்களில் உள்ள மக்களுக்கு, முதல் மற்றும் இரண்டாம் டோஸ் கொரோனா வைரஸ் தடுப்பூசிகளில், கோவாக்சின் மற்றும் கோவிஷேல்டு ஆகிய இரண்டும் கலந்து போடப்பட்டுள்ளது எனத் தெரியவந்துள்ளது. ஊடங்களில் இந்த விஷயம் தெரிய வரும்வரை, சுகாதாரத் துறை அதிகாரிகள் யாரும் அந்த கிராம மக்களை அணுகவில்லை என்ற தகவலும் வெளிவந்துள்ளது மக்களை அதிர்ச்சிக்குள்ளாக்கியுள்ளது.கொரோனா தடுப்பூசி உத்தரப்பிரதேச மாநிலத்தில் சித்தார்த் நகர் மாவட்டத்தில் உள்ள 20 கிராமங்களில் உள்ள மக்களுக்கு, கடந்த ஏப்ரல் மாதம் கொரோனா தடுப்பூசியின் முதல் தவணையில் கோவிஷீல்டு தடுப்பூசி போடப்பட்டது. பின் மே 14-ம் தேதி போடப்பட்ட இரண்டாம் தவணையில் கோவாக்ஸின் தடுப்பூசி போடப்பட்டுள்ளது. உபி தலைநகர் லக்னோவில் இருந்து 270 கிலோமீட்டர் மட்டுமே தள்ளி இருக்கும் ஊரக மாவட்டமான சித்தார்த் நகரில் நடந்துள்ள இந்தக் குளறுபடி மக்களை அதிர்ச்சிக்குள்ளாக்கியுள்ளது. தடுப்பூசி செலுத்திக்கொண்ட மக்களுக்கு பெரியளவில் பாதிப்பு ஏதும் ஏற்படவில்லை என்றாலும், உலக அளவில் இரண்டு வகையான தடுப்பூசிகளை காக்டெயிலாகச் செலுத்திக்கொள்வதால் நேரும் பாதிப்புகள் குறித்த ஆராய்ச்சி முடிவுகள் இன்னும் கிடைக்கப்பெறவில்லை. நடந்த இந்த சம்பவம் குறித்து சித்தார்த்நகர் தலைமை மருத்துவ அதிகாரி சந்தீப் சௌதிரி கூறுகையில், `நிச்சயமாக இது மிகப் பெரிய தவறு' என்றிருக்கிறார். மேலும் அவர், `இதுகுறித்து கிராமத்தில் உள்ள அரசு ஆரம்ப சுகாதார நிலைய அதிகாரிகளிடம் விளக்கம் கேட்டுள்ளோம். குற்றவாளிகள் யாராகினும் உரிய நடவடிக்கை எடுக்கப்படும். எங்கள் அதிகாரிகள் இரண்டாவது டோஸ் மாற்றிப் போடப்பட்டுள்ள மக்களை சந்தித்துள்ளனர். அவர்கள் ஆரோக்கியமாகவே உள்ளனர். மேற்கொண்டு அவர்கள் அதிகாரிகளின் கண்காணிப்பிலேயே உள்ளனர்' என்றார். கிராமத்தைச் சேர்ந்த மக்கள், `இரண்டாம் டோஸ் தடுப்பூசி போடச் சென்றபோது, முதல் டோஸ் பற்றி யாரும் கேட்கவில்லை. மருத்துவர் ஒருவர், `உங்களுக்குத் தடுப்பூசி மாற்றிப் போடப்பட்டுள்ளது' என்று கூறியபின்தான், தவறு நடந்தது எங்களுக்குத் தெரிந்தது. அதன் பின்னும் யாரும் எங்களை பரிசோதிக்கவில்லை, கண்காணிக்கவில்லை. நாங்கள் மிகவும் பயத்தில் உள்ளோம்' என்று தெரிவித்துள்ளனர். Vaccine உத்தரப்பிரதேச மாநிலத்தில் தடுப்பூசி போடும் வேகம் மிகக் குறைவாக உள்ளது. மொத்த மக்கள்தொகையில் 1.4% பேருக்கு மட்டுமே தடுப்பூசி போடப்பட்டுள்ளது என்பது குறிப்பிடத்தக்கது.
http://dlvr.it/S0THv7

Read More

`கொரோனா பிரச்னையில் இந்தியாவை விமர்சிப்பதை நிறுத்துங்கள்!' - ஆனந்த் மஹிந்த்ரா காட்டம்

கொரோனாவைக் கட்டுப்படுத்த இந்தியா சரியான நடவடிக்கை எடுக்கவில்லை என உலகின் பிரபல பத்திரிகைகள் பலவும் கடுமையாக விமர்சனம் செய்து வருகின்றன. எதிர்க்கட்சிகளும் மத்திய அரசு கொரோனாவைக் கட்டுப்படுத்த தவறிவிட்டதாகக் கடுமையாக விமர்சனம் செய்து வருகின்றன. இந்த விமர்சனங்கள் குறித்து மஹிந்த்ரா குழுமத்தின் தலைவர் ஆனந்த் மஹிந்த்ரா தனது ட்விட்டர் பக்கத்தில் கருத்து தெரிவித்துள்ளார். அந்தப் பதிவில், ``ஜப்பானில் உள்ள ஒசாகா நகரில் புதிதாக கொரோனா தொற்று பரவ ஆரம்பித்துள்ளது. அங்கு படுக்கைகள் மற்றும் வென்டிலேட்டருக்குத் தட்டுப்பாடு ஏற்பட்டுள்ளது. ஜப்பான் கொரோனாவைக் கட்டுப்படுத்துவதில் மும்பை மாடலைப் பின்பற்ற வேண்டும்.ஆனந்த் மஹிந்த்ரா உலகில் உள்ள அனைவரும் ஒருங்கிணைந்து செயல்பட்டால் மட்டுமே கொரோனாவைக் கட்டுப்படுத்த முடியும் என்பதை ஒவ்வொருவரும் புரிந்துகொள்ள வேண்டும். இதில் மக்கள் இந்தியாவை விமர்சனம் செய்வதை நிறுத்த வேண்டும். இவ்வாறு விமர்சனம் செய்வதால் கொரோனாவுக்கு எதிரான போரில் எந்தவிதமான பயனும் ஏற்படப்போவதில்லை'' என்று தெரிவித்துள்ளார். இதற்கு முன்பு கடந்த மார்ச் மாத இறுதியில் ஆனந்த் மஹிந்த்ரா வெளியிட்டிருந்த ட்விட்டர் பதிவில், ``மகாராஷ்டிரா அரசு பொதுமுடக்கத்தை அமல்படுத்துவதை விட்டுவிட்டு மருத்துவ கட்டமைப்பு வசதிகளை மேம்படுத்துவதில் கவனம் செலுத்த வேண்டும்'' என்றும், ``பொதுமுடக்கத்தால் புலம்பெயர்ந்த தொழிலாளர்கள் மற்றும் சிறுதொழில்களும் கடுமையாகப் பாதிக்கப்படும்'' என்று குறிப்பிட்டு இருந்தார். இப்படி ஆனந்த் மஹிந்த்ரா தற்போது வெளியிட்டுள்ள கருத்துக்கு சிலர் கடுமையாக எதிர்ப்பு தெரிவித்துள்ளனர். கொரோனா விவகாரத்தில் அரசை விமர்சிப்பது இந்தியாவை விமர்சிப்பதாக அமையாது என்றும் தெரிவித்துள்ளனர். சுவேதா சர்மா என்பவர் ஆனந்த் மஹிந்த்ராவின் ட்விட்டர் பதிவுக்கு அளித்துள்ள பதிலில், ``சார், நீங்கள் இந்தியாவுடன் அரசை ஒப்பிடுகிறீர்கள். இந்தியா தற்போதுள்ள அரசாங்கத்துக்கு சமமானது கிடையாது. அரசு கொரோனா பரவலை சரியாகக் கையாளவில்லை என்றுதான் விமர்சிக்கிறோம். இந்தியாவை விமர்சிக்கவில்லை'' என்று தெரிவித்துள்ளார்.COVID-19 வேறு சிலர் ஆனந்த் மஹிந்த்ராவின் கருத்துக்கு வரவேற்பு தெரிவித்துள்ளனர். கொரோனாவைக் கட்டுப்படுத்த தேவையான ஆலோசனைகளைத் தெரிவிப்பதை விட்டுவிட்டு அரசை மட்டும் சிலர் விமர்சிக்கின்றனர் என்று அவர்கள் தெரிவித்துள்ளனர். மும்பை மாநகராட்சி நிர்வாகம் கொரோனா முதல் அலையின் போது பாடம் கற்றுக்கொண்டு, அதற்கேற்ப மருத்துவக் கட்டமைப்பு வசதிகளை மேம்படுத்தியது. அத்துடன் படுக்கை ஒதுக்கீட்டையும் ஒழுங்குபடுத்தியது. ஏப்ரல் தொடக்கத்தில் மும்பையில் கொரோனா தொற்று 11,000-க்கும் அதிகமாக இருந்தது. ஆனால் இப்போது 1,100-க்கும் குறைவாகவே பதிவாகிவருகிறது.
http://dlvr.it/S0THpG

Read More

’’தேவைப்பட்டால் நீட்டிக்கப்படும்’’ - ஊரடங்கு குறித்து முதல்வர் பேட்டி

’’தேவைப்பட்டால் நீட்டிக்கப்படும்’’ என ஊரடங்கு குறித்து முதல்வர் மு.க.ஸ்டாலின் பேட்டியில் தெரிவித்துள்ளார்.  கொரோனா தடுப்புப் பணிகள் குறித்து முதல்வர் மு.க. ஸ்டாலின் ஆய்வு மேற்கொண்டு வருகிறார். திருவள்ளூரில் நேமம் வட்டார அரசு ஆரம்ப சுகாதார நிலையத்தை ஆய்வு செய்தபிறகு பத்திரிகையாளர்களை சந்தித்த அவர் ஊரடங்கு மற்றும் கொரோனா தடுப்பு நடவடிக்கைகள் குறித்து பகிர்ந்துகொண்டார். அப்போது பேசிய அவர், ’’தளர்வில்லா ஊரடங்கால் கடந்த 2 நாட்களாக நல்ல பலன் கிடைத்து வருகிறது. முழு ஊரடங்கின் பலன் அடுத்த 2,3 நாட்களில் தெரியத் தொடங்கும். கொரோனா பரவல் சங்கிலியை உடைக்கவே முழு ஊரடங்கு அமல்படுத்தப்பட்டுள்ளது. மக்கள் அனைவரும் முழு ஊரடங்கை கடைபிடித்து வீட்டிலேயே இருக்கவேண்டும். கொரோனா தொற்றை தடுக்கும் பணியில் தமிழக அரசு முழு மூச்சாக செயல்படுகிறது. ஆக்சிஜன் தட்டுப்பாடு இல்லாத நிலையை அரசு உருவாக்கியுள்ளது. இதுவரை இல்லாத அளவாக நேற்று ஒரேநாளில் 2,24,544 பேருக்கு கொரோனா தடுப்பூசிகள் போடப்பட்டுள்ளன. திமுக ஆட்சிக்கு வந்தபிறகு தமிழகத்தில் தடுப்பூசி போடும் சராசரி விகிதம் உயர்ந்திருக்கிறது. தடுப்பூசிதான் நமது காவல்காரனாக விளங்குகிறது என்பதால் மக்கள் தடுப்பூசி போட்டுக்கொள்ள வேண்டும். தினசரி பரிசோதனை சராசரியாக 1.64 லட்சமாக உள்ளது. அதேபோல் கோவையிலும் கொரோனா பரவலைக் குறைக்க அரசு நடவடிக்கை எடுத்துவருகிறது’’ என்று கூறினார். மேலும் முழு ஊரடங்கு நீட்டிக்கப்படுமா என்ற கேள்விக்கு ‘தேவைப்பட்டால் நீட்டிக்கப்படும்’ என்று முதல்வர் சூசகமாக பதிலளித்துள்ளார்.
http://dlvr.it/S0RSPV

Read More

கோவை கொரோனா நிலவரம்: ஜீரோ வார்டும் நிரம்பியது; ஆம்புலன்சிலேயே கிசிச்சை

கோவை மாவட்டத்தில் கொரோனா தடுப்பூசி செலுத்தும் பணிகள் நிறுத்தப்பட்டுள்ளதால், கொரோனா தடுப்புப் பணிகளில் பாதிப்பு ஏற்பட்டுள்ளது. மேலும் ஆக்சிஜன் படுக்கைகளின் தேவையும் அதிகரித்திருப்பதால் நிலைமை சிக்கலாகி இருக்கிறது. கோவை மாவட்டத்தில் கொரோனா தடுப்பூசிகள் உள்ளனவா? இல்லையா? கோவையில் மே 19-ல் 51,000 கொரோனா தடுப்பூசிகள் இருப்பு இருந்தன. கோவையில் கடந்த 19 ஆம் தேதி, 44 ஆயிரம் கோவிஷீல்டு, ஏழாயிரம் கோவாக்சின் என 51 ஆயிரம் கொரோனா தடுப்பூசிகள் கையிருப்பில் உள்ளதாக மாவட்ட நிர்வாகம் அறிவித்தது. 45 வயதுக்கு மேற்பட்டோருக்கு வரதராஜபுரம் மாநகராட்சி பள்ளி, அரசு கலைக்கல்லூரி உள்ளிட்ட இடங்களிலும், மருத்துவமனைகளிலும் தடுப்பூசி போடப்பட்டது. அவர்கள் பற்றிய தகவல்கள், தடுப்பூசிகளின் இருப்பு விபரங்களை வெளியிட்டு வந்த மாவட்ட நிர்வாகம் திடீரென அதனை நிறுத்தி வைத்துள்ளது.  தடுப்பூசிகளை செலுத்த அரசுத் தரப்பிலிருந்து வழிகாட்டு நெறிமுறைகள் வரவில்லை என சுகாதாரத்துறையினர் கூறுகின்றனர். கோவை மாவட்டத்தில் கொரோனா தொற்று அதிகரித்து வரும் நிலையில், தடுப்பூசி செலுத்திக் கொள்ள முன்வருவோர், எங்கு சென்று தடுப்பூசி போடுவது என தெரியாமல் குழப்பத்தில் உள்ளனர். கோவை மாவட்டத்தைப் பொறுத்தவரை ஒரே நாளின் கொரோனா பாதிப்பு 4,200-ஐ தாண்டிவிட்டது. மாவட்டம் முழுவதும் அரசு மற்றும் தனியார் மருத்துவமனைகளில் உள்ள 3,957 ஆக்சிஜன் படுக்கைகளும் நிரம்பி விட்டன. நிலைமையை சமாளிக்க கோவை அரசு மருத்துவமனையில் ஜீரோ வார்டு ஏற்படுத்தப்பட்டது. இந்த ஜீரோ வார்டில் ஆம்புலன்சில் வரும் நோயாளிகளுக்கு வார்டில் படுக்கை ஒதுக்கப்படும் வரை முதலுதவி அளிக்கப்படும். ஆனால் இங்கிருந்தும் சிகிச்சை வார்டுக்கு செல்ல 12 மணி நேரத்துக்கு மேலாக காத்திருக்க வேண்டியுள்ளது.  ஜீரோ வார்டும் தற்போது நிரம்பியுள்ளது. தடுப்பூசி குழப்பம், ஆக்சிஜன் படுக்கை பற்றாக்குறை என கோவை மாவட்டத்தில் கொரோனா தடுப்புப் பணிகளில் பெரும் பின்னடைவு காணப்படுகிறது. இதுகுறித்து கேட்டபோது, சுகாதாரத் துறையினரிடம் கேட்டுக் கொள்ளுமாறு கோவை மாவட்ட ஆட்சியர் நாகராஜன் கூறிவிட்டார்.
http://dlvr.it/S0PQ63

Read More

நிறங்களின் அடிப்படையில் பூஞ்சை தொற்றுகளை வகைப்படுத்த வேண்டாம்: எய்ம்ஸ் இயக்குநர் கருத்து

கொரோனா தொற்று ஏற்பட்டிருக்கும் நபர்களுக்கு, கடந்த சில வாரங்களாக கருப்பு பூஞ்சை தொற்று பரவலாக உறுதிசெய்யப்பட்டு வருகிறது. இந்தத் தொற்று முகார்மைக்கோஸிஸ் என சொல்லப்பட்டாலும்கூட, பெயரளவில் இது கருப்பு பூஞ்சை தொற்று என்றே அதிகம் பேரால் குறிப்பிடப்படுகிறது. இதேபோல கேன்டிடியா என்ற பூஞ்சைத் தொற்றால் ஏற்படும் பாதிப்பு வகையை, வெள்ளை பூஞ்சை தொற்று என குறிப்பிடப்படுகின்றனர். கருப்பு – வெள்ளை பூஞ்சைகளைத் தொடர்ந்து, மஞ்சள் தொற்று என்றொன்றும் நேற்றைய தினம் நோயாளி ஒருவருக்கு கண்டறியப்பட்டிருப்பதாக செய்திகள் வெளியாகின. இப்படி வெவ்வேறு நிறங்களை கொண்டு தொற்று பாதிப்புகளை குறிப்பிடுவது, மக்களிடையே தொற்று பற்றிய குழப்பத்தை ஏற்படுத்தும் எனக்கூறி, 'தொற்றை அதன் பெயரால் குறிப்பிடவும்’ என கூறியுள்ளார் எய்ம்ஸ் இயக்குநர் ரன்தீப் கலீரியா. அந்தவகையில், கருப்பு பூஞ்சை தொற்று என்ற வார்த்தைக்கு பதிலாக, முகார்மைகோஸிஸ் என்று அதை குறிப்பிட வேண்டும் என அவர் கேட்டுக்கொண்டுள்ளார். “பூஞ்சை தொற்றுகளில், கேன்டிடா – அஸ்பெர்ஜிலோஸிஸ்  - க்ரிப்டோகோக்கஸ் - ஹிஸ்டோப்ளஸ்மோஸிஸ் மற்றும் காசிடியோமைக்கோஸிஸ் என பல வகைகள் இருக்கின்றன. இவற்றில் முகார்மைக்கோஸிஸ், கேன்டிடா மற்றும் அஸ்பெர்ஜிலோஸிஸ்  வகை பாதிப்புகள் நோய் எதிர்ப்பு திறன் குறைவாக இருக்கும் நபர்களின் உடலில் கண்டறியப்படுகிறது. இவைதான் கருப்பு, வெள்ளை, மஞ்சள் நிற பூஞ்சைகள் என குறிப்பிடப்படுகின்றன. இப்படி நிறைய வகை பூஞ்சை தொற்றுகளில், ஒவ்வொரு தொற்றும், அது பாதிப்பு ஏற்படுத்தும் பகுதிக்கேற்ப நிறத்தை மாற்றி மாற்றி வெளிப்படுத்தும். அப்படியிருக்கும்போது நோயை, அதன் பாதிப்புகளின் வழியாக பிரித்து கூறுவதே சரியாக இருக்கும். அதற்கு அதன் நிறத்தை குறிப்பிடாமல் இருப்பது அவசியம். இல்லையென்றால், வீண் குழப்பமும் வதந்திகளும் ஏற்படக்கூடும்” எனக்கூறியுள்ளனர். The colour of fungus can be seen differently if it develops in different areas. Fungal infection is not a communicable disease: Dr. Randeep Guleria, Director, Delhi AIIMS pic.twitter.com/HHYTR4XCOD — ANI (@ANI) May 24, 2021 இதைத்தொடர்ந்து நோய் பாதிப்புகள் பற்றி அவர் கூறுகையில், “இவற்றில் முகார்மைக்கோஸிஸ் வகை பூஞ்சை தொற்றால் பாதிக்கப்படும் நபர்கள் ஒப்பீட்டளவில் அதிகமாக உள்ளனர். எனினும் இந்த பூஞ்சை பாதிப்பு, கோவிட் போல தொற்றுநோய் கிடையாது. ஒருவரிடமிருந்து இன்னொருவருக்கு இது பரவுவதில்லை. அதேபோல கொரோனா பாதித்தோருக்கு அளிக்கப்படும் ஆக்சிஜன் தெரபிக்கும் இந்த தொற்றுக்கும் எந்தவொரு தொடர்பும் இல்லை. இந்த முகார்மைகோஸிஸால் பாதிக்கப்பட்டவர்களில், 90 முதல் 95 சதவிகிதம் பேர், சர்க்கரை நோயாளிகளாகவோ ஸ்டீராய்டு மருந்து உட்கொண்டவர்களாகவோ இருக்கின்றனர். இவை இரண்டும் இல்லாதவர்களுக்கு, முகார்மைக்கோஸிஸ் பாதிப்புக்கான வாய்ப்பு மிக மிக குறைவாக இருக்கிறது. பிற பாதிப்புகளான கேன்டிடா, ஆஸ்பெர்கிலோஸிஸ் பாதிப்புகளும் சர்க்கரை நோயாளிகளுக்கும், ஸ்டீராய்டு அதிகப்படியாக எடுப்பவர்களுக்குமே கண்டறியப்பட்டு வருகிறது. முகார்மைக்கோஸ்கான அறிகுறிகளாக, ஒருபக்க முகம் மட்டும் வீங்குதல் – தலைவலி – மூக்கு அல்லது சைனஸ் பகுதியில் வலி, வாயின் மேற்பகுதி அல்லது மூக்குப்பகுதியில் கருப்பு நிறத்தில் அடுத்தடுத்து புண், காய்ச்சல் போன்றவை உள்ளன. அதேபோல முகார்மைக்கோஸ், நுரையீரல், கண்கள், இரைப்பை, குடல், மூளை போன்ற பகுதிகளை பாதிக்கும். இந்த முகார்மைக்கோஸிஸ் பாதிப்பு பல உடல் உறுப்புகளை பாதிக்கிறது என்றபோதிலும், எந்தப் பகுதியை இது பாதிக்கிறது என்பதை அடிப்படையாக வைத்து, அது பிரிக்கப்படுகிறது. அதன்படி, ரைனோ ஆர்பிட்டல் செரிபரல், பல்மனரி முகோர்மைக்கோஸிஸ் என பிரிக்கப்படுகிறது. கேன்டிடா பாதிப்பு ஏற்பட்டவர்களுக்கு, வாய், நாக்கு, வாய் துவாரங்களில் வெள்ளை திட்டுகள் அறிகுறிகளாக ஏற்படும். இது பிறப்புறுப்பில் பாதிப்பை ஏற்படுத்தும். உடலின் ரத்தத்திலும் பாதிப்பை ஏற்படுத்தும் வாய்ப்புள்ளது. பிறப்புறுப்பு, ரத்தத்தில் பாதிப்பு ஏற்பட்டால், அது மிக தீவிர பாதிப்பாக மாறும். அப்போது, கருப்பு நிற பூஞ்சை தொற்றைவிட இது ஆபத்தானதாக மாறும்” எனக்கூறியுள்ளார். தகவல் உறுதுணை : News 18
http://dlvr.it/S0PQ08

Read More

மும்பை: பொதுமுடக்கத்தால் வருமானம் இல்லை.. 5 மாத குழந்தையை விற்க முயன்ற ஆட்டோ ஓட்டுநர்!

கொரோனா பொதுமுடக்கத்தால் நாட்டில் லட்சக்கணக்கானோர் வேலை வாய்ப்புக்களை இழந்து வருமானத்திற்கு வழியில்லாமல் திண்டாடிக்கொண்டிருக்கின்றனர். வேலை இருப்பவர்களும் குறைவான சம்பளத்தில் வேலை செய்ய வேண்டிய நிலைக்குத் தள்ளப்பட்டுள்ளனர். மும்பை அருகில் ஆட்டோ டிரைவர் ஒருவர் போதிய வருமானம் இல்லாமல் தனது குழந்தையை விற்கும் நிலைக்குத் தள்ளப்பட்டார். மும்பை அருகில் உள்ள 'கல்யாண் சாஹாட்' என்ற இடத்தில் வசிப்பவர் சாய்நாத் போயர். இவரது மனைவி பல்லவி. சாய்நாத் ஆட்டோ ஓட்டுகிறார். இத்தம்பதிக்கு ஏற்கனவே 5 குழந்தைகள் இருக்கின்றன.பச்சிளம் குழந்தை சமீபத்தில் அதாவது 5 மாதங்களுக்கு முன்பு மேலும் ஒரு குழந்தை பிறந்தது. ஆறு குழந்தைகளுக்கு இத்தம்பதியால் சாப்பாடு போட முடியவில்லை. சாய்நாத்திற்கு ஆட்டோ மூலம் போதிய வருமானம் கிடைக்கவில்லை. பொது முடக்கம் அமல்படுத்தப்பட்டு இருப்பதால் ஆட்டோவை பெரிய அளவில் இயக்க முடியவில்லை. ஒரு முறை சாய்நாத் அங்குள்ள மருத்துவமனைக்கு சென்ற போது மான்சி ஜாதவ் என்ற பெண்ணின் அறிமுகம் கிடைத்தது. அவர் ஒரு தொண்டு நிறுவனத்தில் பணியாற்றியவர். அவரிடம் சாய்நாத் தனது கதையை கூறியுள்ளார். உடனே வேண்டுமானால் ஒரு குழந்தையை யாருக்காவது தத்து கொடுத்துவிடுங்கள் என்று மான்சி தெரிவித்தார். அதோடு அப்படி தத்து கொடுப்பதால் பணமும் கிடைக்கும் என்று ஆசைவார்த்தைகள் கூறினார். இதை சாய்நாத் ஏற்றுக்கொண்டார். தனது மனைவியிடம் கலந்து ஆலோசித்துவிட்டு சொல்வதாக தெரிவித்தார். அதன் படி சாய்நாத் தனது மனைவியிடம் பேசி குழந்தையை விற்றுவிட முடிவு செய்தார். சாய்நாத்திற்கு மான்சி ரூ.90 ஆயிரம் கொடுப்பதாக தெரிவித்திருந்தார். ஆனால் மான்சி அக்குழந்தையை வேறு ஒரு தம்பதியிடம் விற்க முயற்சி செய்து கொண்டிருந்தார். இது குறித்து போலீஸாருக்கு தெரிய வந்தது. எனவே போலீஸாரே போலி வாடிக்கையாளர் ஒருவரை அனுப்பி மான்சியிடம் குழந்தையை விலைக்கு வாங்க பேரம் பேசும்படி கேட்டுக்கொண்டனர். போலி வாடிக்கையாளரும் மான்சியிடம் பேசி 1.70 லட்சத்திற்கு குழந்தையை வாங்கிக்கொள்வதாக தெரிவித்தார். குழந்தையை கல்யான் கோர்ட்டில் பெற்றுக்கொள்வதாக போலி வாடிக்கையாளர் தெரிவித்தார். மான்சி தான் குழந்தையுடன் அங்கு வந்துவிடுவதாக தெரிவித்திருந்தார். உடனே போலீஸார் அங்கு சாதாரண உடையில் கண்காணிப்பில் ஈடுபட்டனர். Representation pic போலி வாடிக்கையாளர் சாட்சிக்கு ஒரு ஆளை அழைத்து வந்திருந்தார். அவர்கள் கோர்ட்டில் சந்தித்துக்கொண்டு அங்குள்ள ஓட்டலுக்கு சென்றனர். அங்கு மான்சி தன்னிடம் இருந்த குழந்தையை போலி வாடிக்கையாளருடன் வந்திருந்த மற்றொரு நபரிடம் கொடுத்தார். அதை தொடர்ந்து போலி வாடிக்கையாளர் மான்சியிடம் பணத்தை கொடுத்தார். உடனே மறைந்திருந்த போலீஸார் உள்ளே வந்து குழந்தையையும் பணத்தையும் பறிமுதல் செய்தனர். குழந்தையின் பெற்றோர் அருகில் ஆட்டோவில் இருந்தனர். அவர்களையும் கைது செய்தனர். மான்சி இதற்கு முன்பு இது போன்று சட்டவிரோதமாக குழந்தைகளை வாங்கி யாருக்காவது கொடுத்திருக்கிறாரா என்பது குறித்து விசாரித்து வருகின்றனர்.
http://dlvr.it/S0MZD2

Read More

`கார்டு மேலே இருக்கும் 4 நம்பர் சொல்லுங்க' - ஆன்லைனில் உடை வாங்கிய பெண்ணிடம் ரூ.2 லட்சம் மோசடி!

நாட்டில் சமீப காலமாக ஆன்லைன் மோசடிகள் அதிக அளவில் நடந்து வருகிறது. மோசடி பேர்வழிகள் அமேஸான் போன்ற ஆன்லைன் வர்த்தக நிறுவனங்களின் வாடிக்கையாளர் சேவை எண்ணுக்கு போன் செய்பவர்களையும் விட்டு வைப்பதில்லை. ஆன்லைன் வர்த்தக நிறுவனங்களின் வாடிக்கையாளர் சேவை எண்ணை ஒத்த, எண்களை மோசடிக்காரர்கள் இணையத்தில் பதிவிடுகின்றனர். இதனை பொதுமக்கள் கவனிக்காமல் அந்த நம்பருக்கு போன் செய்து மோசடி வலையில் சிக்கிக் கொள்கின்றனர். அது போன்ற ஒரு சம்பவம் தான் மும்பையின் வடக்கு பகுதியில் காந்திவலியில் நடந்துள்ளது.ஸ்வேதா-மீனா ஸ்வேதா தலால் என்ற பெண் ஆன்லைனில் ஆர்டர் செய்து சில உடைகளை வாங்கினார். அதில் ஒரு உடையை மட்டும் திரும்ப கொடுக்கத் திட்டமிட்டார். இதையடுத்து ஆன்லைனில் அந்த இணையத்தளத்தின் வாடிக்கையாளர் எண் இருக்கிறதா என்று ஸ்வேதா தேடிப்பார்த்தார். அதில் ஒரு நம்பர் இருந்திருக்கிறது. அந்த நம்பரை ஸ்வேதா தொடர்பு கொண்ட போது ராகுல் என்பவர் பேசினார். ராகுல் அப்பெண்ணிடம் நீங்கள் கூகுள்-பே அல்லது ஃபோன்-பே பயன்படுத்துகிறீர்களா என்று கேட்டிருக்கிறார். ஸ்வேதா சுதாரித்துக்கொண்டு இல்லை என்று தெரிவித்துவிட்டார். உடனே ராகுல் `நான் உங்களிடம் ஒன் டைம் பாஸ்வேர்டு எதுவும் கேட்க மாட்டேன். ஆனால் உங்களது வங்கி கணக்கில் உள்ள கடைசி நான்கு எண்களை மட்டும் கூறுங்கள்' என்று தெரிவித்திருக்கிறார். இதில் எதுவும் ஆகிவிடப்போவதில்லை என்று நினைத்து தனது வங்கிக் கணக்கின் கடைசி நான்கு எண்களை மட்டும் தெரிவித்தார். அவர் சொன்ன அடுத்த சில நிமிடங்களில் ஸ்வேதாவின் வங்கி கணக்கில் இருந்து 24,999 ரூபாய் எடுக்கப்பட்டு இருப்பதாக செய்தி வந்தது. இதனால் அதிர்ச்சியான ஸ்வேதா அந்த ஃபோன் நம்பருக்கு மீண்டும் தொடர்பு கொள்ள முயன்றார். ஆனால் முடியவில்லை. Also Read: ஷீர்டி சாய்பாபா கோயில் பெயரில் ஆன்லைன் பண மோசடி-பக்தர்கள் உஷாராக இருக்க கோயில் நிர்வாகம் எச்சரிக்கை! ஸ்வேதா ஆன்லைன் வர்த்தக நிறுவனத்தின் உண்மையான இணையத்தள வாடிக்கையாளர் எண்ணை தேடிக்கொண்டிருந்தார். ஆனால் அதற்குள் மர்ம ஆசாமி 1.99 லட்சத்தை ஸ்வேதாவின் வங்கி கணக்கிலிருந்து எடுத்துவிட்டான். இந்த சம்பவம் முதல் நாள் மாலையில் தொடங்கியது. மறு நாள் காலையில் ஸ்வேதா தனது வங்கிக்கு சென்று புகார் செய்தார். ஆனால் அவர்கள் புகாரை ஏற்க மறுத்து போலீஸில் புகார் செய்யும்படி கேட்டுக்கொண்டனர். உடனே காந்திவலி போலீஸில் புகார் செய்தார். போலீஸார் சைபர் பிரிவில் புகார் செய்யும்படி கேட்டுக்கொண்டனர். அவரும் அதே போன்று புகார் செய்தார். உடனே விரைவாக விசாரணையை தொடங்கிய உதவி போலீஸ் இன்ஸ்பெக்டர் மீனா பகல் தலைமையிலான குழுவினர், ஸ்வேதாவின் வங்கிக்கணக்கில் இருந்து பிடித்தம் செய்யப்பட்ட பணம் இதுவரை சம்பந்தப்பட்ட நபரின் வங்கிக்கணக்கில் சேர்க்கப்படாமல் இருந்ததை கண்டறிந்தனர். உடனே அந்த பரிவர்த்தனை முழுமை பெறாமல் முடக்கினர். சம்பவம் நடந்த 36 மணி நேரத்திற்குள் ஸ்வேதாவிடம் இருந்து சென்ற பணம் மீண்டும் அவரது வங்கிக்கணக்கிற்கே வந்துவிட்டது. இதனால் ஸ்வேதா போலீஸ் அதிகாரிகளை வெகுவாக பாராட்டினார். மோசடி கும்பலை பிடிக்கும் முயற்சியில் போலீஸார் ஈடுபட்டுள்ளனர்.
http://dlvr.it/S0KVyR

Read More

` ஏ.ராஜா ஆகிய நான்..!’ - கேரள சட்டசபையில் தமிழில் உறுதிமொழி கூறி பதவி ஏற்ற எம்.எல்.ஏ

கேரள மாநிலத்தில் கடந்த ஏப்ரல் 6-ம் தேதி சட்டசபை தேர்தல் நடந்துமுடிந்தது. மே 2-ம் தேதி வாக்குகள் எண்ணப்பட்டன. மொத்தமுள்ள 140 சட்டசபை தொகுதிகளில் 99 தொகுதிகளை சி.பி.எம் தலைமையிலான எல்.டி.எஃப் கூட்டணி கைப்பற்றியது. மீதமுள்ள 41 தொகுதிகளை காங்கிரஸ் தலைமையிலான யு.டி.எஃப் கூட்டணி வென்றது. தொடர்ந்து இரண்டாவது முறையாக பினராயி விஜயன் முதல்வர் ஆனார். கடந்த 20-ம் தேதி திருவனந்தபுரம் சென்றல் ஸ்டேடியத்தில் 500 பேருக்கு மட்டுமே அனுமதி அளிக்கப்பட்டு எளிமையான முறையில் முதல்வராக பினராயி விஜயன் பதவி ஏற்றுக்கொண்டார். அவருடன் சேர்த்து மொத்தம் 21 அமைச்சர்களும் பதவி ஏற்றுக்கொண்டனர். இந்த நிலையில் கேரள மாநிலத்தின் 15-வது சட்டப்பேரவையின் எம்.எல்.ஏ-க்கள் சத்திய பிரமாணம் எடுத்துக்கொண்டு பதவி ஏற்கும் நிகழ்வு நடைபெற்றது.கேரள சட்டசபை கூட்டம் திருவனந்தபுரம் சட்டசபை கூட்ட கட்டடத்தில் சமூக இடைவெளி பின்பற்றி இருக்கைகள் போடப்பட்டிருந்தன. இன்று காலை 9 மணிக்கு எம்.எல்.ஏ-க்கள் உறுதிமொழி கூறி பதவி ஏற்றுக்கொண்டனர். மொத்தமுள்ள 140 எம்.எல்.ஏ-க்களில் 136-பேர் பதவி ஏற்றுக்கொண்டனர். இதில் 53 எம்.எல்.ஏ-க்கள் சபைக்கு புதியவர்கள். இரண்டு எம்.எல்.ஏ-க்களைத் தவிர மற்ற அனைத்து எம்.எல்.ஏ-க்களும் மலையாளத்திலும், சிலர் ஆங்கிலத்திலும் உறுதிமொழி ஏற்றுக்கொண்டனர். கர்நாடக மாநில எல்லையான மஞ்சேஸ்வரம் தொகுதி எம்.எல்.ஏ அஷ்ரப் கன்னட மொழியில் உறுதிமொழி ஏற்றுக்கொண்டார். தமிழக எல்லையோர பகுதியான இடுக்கி மாவட்டம் தேவிக்குளம் எம்.எல்.ஏ வழக்கறிஞர் ராஜா, தமிழில் உறுதிமொழி ஏற்றுக்கொண்டார். சி.பி.எம் கட்சியைச் சேர்ந்த வழக்கறிஞர் ராஜா இன்று எம்.எல்.ஏ-வாக பதவி ஏற்பது குறித்து தனது முகநூல் பக்கத்தில் தமிழிலும், மலையாளத்திலும் பேசி வீடியோ வெளியிட்டிருந்தார். இந்த நிலையில் அவர் தமிழில் உறுதிமொழியேற்றது சட்டசபையில் இருந்த எம்.எல்.ஏ-க்களை ஆச்சர்யப்படுத்தியது. தேவிகுளம் தொகுதியில் போட்டியிட்டு முதல் முறையாக எம்.எல்.ஏ ஆகியிருக்கிறார் ராஜா.தேவிகுளம் எம்.எல்.ஏ ராஜா தமிழர்கள் அதிகமாக வசிக்க தொகுதி தேவிகுளம். அங்கு தேயிலைத் தோட்ட தொழிலாளர்களாக அதிக அளவு தமிழ்பேசும் குடும்பங்கள் உள்ளன. இதைத் தொடர்ந்தே எம்.எல்.ஏ ராஜா தமிழில் உறுதிமொழி ஏற்றுக்கொண்டார். தமிழில் உறுதிமொழி ஏற்றுக்கொண்ட எம்.எல்.ஏ ராஜாவுக்கு தமிழக எம்.பி சு.வெங்கடேசன் வாழ்த்து தெரிவித்து ட்விட்டரில் பதிவிட்டுள்ளார். அதில், "கேரள சட்டமன்ற தேர்தலில் இடுக்கி மாவட்டம் தேவிகுளம் சட்டமன்ற தொகுதியில் மார்க்சிஸ்ட் கட்சி சார்பில் போட்டியிட்டு வெற்றிபெற்ற தோழர் வழக்கறிஞர் ஏ.ராஜா அவர்கள் தனது தாய்மொழியான தமிழில் உறுதிமொழி கூறி பதவி ஏற்றார். அவருக்கு எனது நெஞ்சார்ந்த வாழ்த்துகள்" என குறிப்பிட்டுள்ளார். கேரள சட்டமன்றத் தேர்தலில் இடுக்கி மாவட்டம் தேவிகுளம் சட்டமன்றத் தொகுதியில் மார்க்சிஸ்ட் கட்சி சார்பில் போட்டியிட்டு வெற்றி பெற்ற தோழர் வழக்கறிஞர் A.ராஜா அவர்கள் தனது தாய்மொழியான தமிழில் உறுதிமொழி கூறி பதவியேற்றார் . @AdvARaja @CPIMKerala அவருக்கு எனது நெஞ்சார்ந்த வாழ்த்துகள்! pic.twitter.com/G8zhGRIyM5— Su Venkatesan MP (@SuVe4Madurai) May 24, 2021
http://dlvr.it/S0KVrV

Read More

`எட்டாம் வகுப்பில் எழுந்த ஆசை!' - விமான பைலட் ஆன கேரள கடற்கரை கிராமத்துப் பெண்

கடற்கரை கிராமத்தைச் சேர்ந்த முதல் பெண் பைலட் என்ற பெருமையைப் பெற்றிருக்கிறார் கேரள மாநிலம் கோவளம் கொச்சுத்துறையைச் சேர்ந்த ஜெனி ஜெரோம். 23 வயதான ஜெனி ஜெரோம், வயது குறைந்த விமானி என்ற பெருமையையும் பெற்றிருக்கிறார். விமானம் ஓட்டும் பயிற்சியை முடித்து தற்போது முதன்முதலாக விமானத்தையும் இயக்கியுள்ளார் ஜெனி ஜெரோம். கடந்த சனிக்கிழமை இரவு 10.25 மணிக்கு ஷார்ஜாவில் இருந்து திருவனந்தபுரத்துக்கு புறப்பட்டு வந்த ஏர் அரேபியா விமானத்தில் இணை பைலட்டாகச் செயல்பட்டார் ஜெனி ஜெரோம். அரபிக்கடலின் மேல் விமானத்தில் பறந்து தனது சொந்த ஊரான திருவனந்தபுரத்துக்கு வந்திருக்கிறார். விமானியாகியிருக்கும் மீனவ கிராமத்துப் பெண் ஜெனி ஜெரோமை கேரளமே கொண்டாடி வருகிறது. கேரளத்தின் வயது குறைந்த பெண் பைலட் என்ற பெருமையும் ஜெனி ஜெரோமுக்குக் கிடைத்திருக்கிறது.ஜெனி ஜெறோம் இதுகுறித்து ஜெனி ஜெரோம் கூறுகையில், ``நான் எட்டாம் வகுப்புப் படிக்கும்போதே விமானம் ஓட்ட வேண்டும் என்ற ஆசை ஏற்பட்டது. ப்ளஸ் டூ முடித்த பிறகு பெற்றோரிடமும் உறவினர்களிடமும் எனது ஆசையைச் சொன்னேன். `பெண் பிள்ளையான நீ எப்படி பிளேன் ஓட்ட முடியும்' என்பது போன்ற வார்த்தைகள், என்னை சோர்வடையச் செய்யவில்லை. என் அப்பா எனது ஆசைக்கு பெரும் துணையாக நின்றார். கல்லூரிப் படிப்பு முடிந்த பிறகு விமானம் ஓட்டும் பயிற்சிக்கு அனுப்புவதாக அப்பா சொன்னார். அதன்படி சார்ஜா ஆல்ஃபா ஏவியேஷன் அகாடமியில் பயிற்சியில் சேர்ந்தேன். 18 மாதங்கள் பயிற்சி, கொரோனா காரணமாக காலதாமதம் ஆனது. ஒருமுறை பிலிப்பைன்ஸில் விமானப் பயிற்சியின்போது கோளாறு ஏற்பட்டதால் விமானத்தை தரையில் மோதி நிறுத்தும் நிலை ஏற்பட்டது. எனக்கு பெரிய அளவில் காயம் இல்லை. அந்த விபத்தால் நான் தளர்ந்துபோகவில்லை, மேலும் சாதிக்கும் எண்ணமே ஏற்பட்டது.விமான பைலட் ஜெனி ஜெறோம் திருவனந்தபுரம் விமான நிலையத்தில் நான் விமானத்தை இறக்கியபோது என் கண்கள் ஆனந்தக் கண்ணீரால் நிறைந்தன. முதன்முதலில் என் சொந்த ஊருக்கு விமானம் ஓட்டியது மிகவும் மகிழ்ச்சியாக உள்ளது. எவ்வளவு முடியுமோ அவ்வளவு உயரத்துக்கு விமானத்தில் பறக்க வேண்டும். சிறந்த பைலட் என்ற பெயர் எடுக்க வேண்டும் என்பதுதான் என் கனவு" என்றார். எட்டாம் வகுப்பில் மனதில் துளிர்விட்ட ஆசையை விடாது எட்டிப்பிடித்திருக்கும் ஜெனி ஜெரோமிற்கு சமூக வலைதளங்களிலும் பாராட்டுகள் குவிந்து வருகின்றன.
http://dlvr.it/S0Hmbp

Read More

”ஆட்டோவுல வந்த பலருக்கு கொரோனா பாஸிடிவ்” - கேரள ஆட்டோ ஓட்டுநரின் மகத்தான சேவை

கொரோனா தொற்று பரவ ஆரம்பித்த காலத்தில் இருந்து கிட்டத்தட்ட 500 க்கும் மேற்பட்ட கொரோனா அறிகுறிகள் கொண்ட நோயாளிகளுக்கு தனது ஆட்டோவை தந்து உதவிக்கரம் நீட்டியிருக்கிறார் கேரளாவைச் சேர்ந்த ஆட்டோ ஓட்டுநர் பிரேமச்சந்திரன். இந்தியாவில் கொரோனா தொற்று பரவ ஆரம்பித்த காலத்தில் இருந்தே ஊரடங்குக் கட்டுப்பாடுகள் உள்ளிட்ட பல்வேறு நடவடிக்கைகள் மூலம் கொரோனா தொற்று பரவலை கட்டுக்குள் கொண்டு வர அரசுகள் நடவடிக்கை எடுத்து வருகின்றன. அவசர அத்தியாவசிய தேவைகளுக்கு அரசு அனுமதியளித்தாலும், கொரோனா நோயாளிகளுக்கு உதவிக்கரம் நீட்டுவதில் இன்னமும் மக்களிடம் ஒரு நெருடல் இருக்கதான் செய்கிறது. ஆனால் அந்த நெருடலை கருணை உள்ளம் எதிர்கொண்டு கிட்டத்தட்ட 500 க்கும் மேற்பட்ட கொரோனா அறிகுறிகளுடைய நோயாளிகளை தனது ஆட்டோ மூலம் மருத்துவமனைகளுக்கு நேரத்திற்கு கொண்டு சேர்த்துள்ளார் கேரள மாநிலம், கண்ணூர் நகரத்தைச் சேர்ந்த ஆட்டோ ஓட்டுநர் பிரேமச்சந்திரன். கண்ணூர் நகரத்தின் வெல்லூர் அருகே உள்ள பயன்னூர் பிரேமச்சந்திரனுக்கு சொந்த ஊர். கடந்த 15 மாதங்களாக இந்த உதவியை அவர் மக்களுக்கு வழங்கி வருகிறார். இது குறித்து 51 வயதான பிரேமச்சந்திரன் கூறும் போது, “ கடந்த 15 மாதங்களாக நான் இத செஞ்சிட்டு வரேன். பயன்னூர் மற்றும் சுற்றியுள்ள பகுதிகளில் கொரோனா அறிகுறிகள் கொண்ட பல பேரை நான் மருத்துவமனைக்கு கொண்டு சேர்த்துருக்கேன். என் ஆட்டோல கொரோனா அறிகுறிகளோட பயணம் செஞ்ச பல பேருக்கு கொரோனா உறுதியாகிருக்கு. சிலருக்கு நெகட்டிவ்வும் வந்துருக்கு. ஆட்டோவில் வந்த நபருக்கு கொரோனா பாஸிட்டிவ்னு தெரிஞ்சதும் ஆட்டோவ சானிடைசர் போட்டு க்ளீன் பண்ணிருவேன். ஏழை மக்கள்தான் என்னைத் தேடி வராங்க. கொரோனா பரவலுக்கு பயந்து பல ஆட்டோ ட்ரைவர்ஸ் ஆட்டோ ஓட்டுவதை நிறுத்திட்டாங்க. என்னை பொருத்தவரை அது நியாமானது இல்லை.”என்றார்.
http://dlvr.it/S0FyVt

Read More

’நாளொன்றுக்கு 15 மணி நேரம்’- தஞ்சை மாநகராட்சி மயானத்தில் தொடர்ந்து எரியூட்டப்படும் உடல்கள்

தஞ்சையில் கொரோனா தாக்கம் படுமோசமாகியுள்ள நிலையில், உயிரிழந்தோரின் உடல்களை எரியூட்டும் பணிகள் நாளொன்றுக்கு 15 மணி நேரம் வரை நீடிக்கிறது. தஞ்சை மாவட்டத்தில் இதுவரை 38,000 பேர் கொரோனாவால் பாதிக்கப்பட்டுள்ளனர். இவர்களில் 33 ஆயிரம் பேர் குணமடைந்துள்ளனர். கொரோனா உயிரிழப்பு எண்ணிக்கை 450-ஐ எட்டியுள்ளது. நேற்று மட்டும் 5 பேர் உயிரிழந்தனர். தனியார் மருத்துவமனைகளிலும் கொரோனா உயிரிழப்புகள் ஏற்படுகின்றன. இந்நிலையில் ஈஸ்வரி நகரில் உள்ள மாநகராட்சியின் சாந்திவனம் மின்மயானத்தில் கடந்த சில மாதங்களாக ஒருநாளில் அதிகபட்சமாக 10 முதல் 15 உடல்கள் எரியூட்டப்பட்டு வருகின்றன. கொரோனா தொற்றுக்கு முன்னதாக மாதத்துக்கு 15 முதல் 20 உடல்களே தகனம் செய்யப்பட்டு வந்தன. தற்போது இந்த எண்ணிக்கை மோசமாக உயர்ந்து விட்டதால் உடல்களை எரிக்க டோக்கன் முறை பின்பற்றப்பட்டு வருகிறது. ஒரு உடலை தகனம் செய்ய 45 நிமிடங்கள் வரை ஆவதால், எரியூட்டும் பணிகள் இரவு 11 மணி வரை நீடிக்கிறது.
http://dlvr.it/S0FyT8

Read More

நாளை முதல் தளர்வுகளற்ற முழு ஊரடங்கு எதிரொலி: காய்கறிகள் விலை எகிறியது

நாளை முதல் முழு ஊரடங்கு அறிவிக்கப்பட்டுள்ள நிலையில், சென்னையில் உள்ள சந்தைகளில் காய்கறிகளின் விலை கடுமையாக அதிகரித்துள்ளது. அமைந்தகரை பகுதியில் உள்ள சந்தையில் காய்கறிகளை வாங்க காலை முதலே பொதுமக்கள் குவிந்தனர். மக்கள் அனைவரும் கொரோனா தடுப்பு நடவடிக்கைகளை பின்பற்ற காவல்துறையினரும், மாநகராட்சி அதிகாரிகளும் அறிவுறுத்தினர். இதனிடையே முழு ஊரடங்கு காரணமாக கோயம்பேடு சந்தையில் காய்கறிகளின் விலையை பல மடங்கு உயர்த்தியதால், சில்லறை விற்பனையிலும் காய்கறி விலை உயர்ந்துள்ளது. 15 ரூபாய்க்கு விற்பனையான ஒரு கிலோ தக்காளி 60 ரூபாய்க்கு விற்பனை செய்யப்படுகிறது. இதே போல ஒரு கிலோ பீன்ஸ் 200 ரூபாய்க்கும், கத்திரிக்காய் 150 ரூபாய்க்கும் விற்பனை செய்யப்படுகிறது. மேலும் 15 ரூபாய்க்கு விற்பனை செய்யப்பட்ட ஒரு கிலோ காய்கறிகள், தற்போது 40 ஆக அதிகரித்துள்ளது. இதனால் பொதுமக்கள் கடும் சிரமத்திற்கு ஆளாவதாகத் தெரிவித்துள்ளனர்.
http://dlvr.it/S0DnLC

Read More

"மத்திய அரசின் கைகளில்தான் எல்லாம்!" - முதியோருக்கு தடுப்பூசி... கைவிரிக்கும் மும்பை!

வீடுகளுக்கே சென்று தடுப்பூசி வழங்கும் விவகாரத்தில் மெத்தனப் போக்குடன் செயல்படுவதாக மத்திய அரசை மும்பை உயர் நீதிமன்றம் விமர்சித்திருந்த நிலையில், மத்திய அரசின் கைகளிலேயே அனைத்தும் உள்ளது என்று மும்பை மாநகராட்சியும் கைவிரித்துள்ளது. சில தினங்களுக்கு முன், '75 வயதைக் கடந்தவர்கள், நடக்க முடியாத மாற்றுத் திறனாளிகள் மற்றும் படுக்கையில் இருப்பவர்களுக்கு அவர்களின் வீடுகளுக்கேச் சென்று கொரோனா தடுப்பூசி போடும் திட்டத்தை அரசு செயல்படுத்த வேண்டும்' எனக் கோரி துருதி கபாடியா, குனால் திவாரி என்ற இரண்டு வழக்கறிஞர்கள், மும்பை உயர் நீதிமன்றத்தில் பொதுநல மனுக்களைத் தாக்கல் செய்தனர். தற்போதைய சூழ்நிலையில், மும்பையில் கொரோனா தொற்று வெகுவாகக் குறைந்துவிட்டாலும், அங்கு கொரோனா தடுப்பூசிக்குத் தட்டுப்பாடு நிலவி வருகிறது. இதனால், அனைத்து தடுப்பூசி மையங்களிலும் தடுப்பூசி போடவில்லை. தடுப்பூசி போட பதிவு செய்துள்ளவர்கள் அதற்காக பல நாள் காத்திருக்க வேண்டிய நிலை உருவாகி இருக்கிறது. 18 வயது மேற்பட்டவர்களுக்கு மட்டுமல்ல; வயதானவர்களுக்கும் இதே நிலைதான் என்பதால் இந்த இரண்டு வழக்கறிஞர்களும் பொதுநல மனுவை தாக்கல் செய்தனர். மனுவை விசாரித்த மும்பை உயர் நீதிமன்ற தலைமை நீதிபதி திபன்கர் தத்தா, "வயதானவர்களுக்கும் ஊனமுற்றவர்களுக்கும் தடுப்பூசி பெற உரிமை இல்லை என்று மத்திய அரசு சொல்கிறதா? உங்கள் பதில் மூலம் மத்திய அரசு வீட்டில் சென்று தடுப்பூசி போட தயாராக இல்லை என்பது தெரிகிறது. மும்பை மாநகராட்சி, முதியவர்களுக்கும், ஊனமுற்றவர்களுக்கும் வீட்டுக்கேச் சென்று தடுப்பூசி போடத் தயாராக இருக்கும் பட்சத்தில் மத்திய அரசின் அனுமதி வேண்டி காத்திருக்க வேண்டாம். நாங்களே அனுமதி தருகிறோம். மும்பை மாநகராட்சி இதை செய்ய முடியுமா என்பது குறித்து மாநகராட்சி கமிஷனர் இக்பால் பதிலளிக்க வேண்டும்" என்று உத்தரவிட்டார். இந்த உத்தரவின்படி, மும்பை மாநகராட்சி கமிஷனர் இக்பால் இந்த விவகாரத்தில் தனது பதில் மனுவை தாக்கல் செய்துள்ளார். அதில், "ஊனமுற்றோர், முதியோர் போன்றோர்களுக்கு வீட்டில் சென்று தடுப்பூசி செலுத்துவதற்கு மத்திய அரசு நடைமுறைகளை வகுக்க வேண்டும். நடைமுறைகளை வகுத்தால் தான் அவர்களின் வீடுகளுக்கே சென்று, தடுப்பூசி செலுத்த முடியும்" என்று திட்டவட்டமாக கூறிவிட்டது. இதுதொடர்பாக உள்ளூர் ஊடகம் ஒன்றிற்கு பேட்டியளித்த மும்பைவாசி ஒருவர், "இந்தப் பதிலால் முதியவர்களால் மிகவும் அதிருப்தியில் உள்ளனர். ஏனென்றால், தடுப்பூசிக்காக மும்பை முதியவர்கள் அவதியடைந்து வருகின்றனர். தடுப்பூசிக்காக மருத்துவமனைகளில் முதியவர்கள், ஊனமுற்றோர் நீண்ட நேரம் காத்திருக்க வேண்டி இருக்கிறது. அப்படி காத்திருக்கும்போது மயக்கம் போன்ற பல்வேறு பிரச்னைகளால் அவர்கள் அவதியுற்று வருகிறார்கள். அவர்களின் நிலையை எண்ணி இந்த விவகாரத்தில் மத்திய அரசு சீக்கிரமாக முடிவெடுக்க வேண்டும்" என்று கோரிக்கை விடுத்துள்ளார்.
http://dlvr.it/S0CBHs

Read More

கேரளா: எதிர்க்கட்சித் தலைவரானார் வீ.டி.சதீசன்; காங்கிரஸ் ஹைகமாண்டுக்கு ராகுல் கொடுத்த யோசனை!

கேரள மாநிலத்தில் நடந்து முடிந்த சட்டசபைத் தேர்தலில் மொத்தமுள்ள 140 தொகுதிகளில் சி.பி.எம் கூட்டணியான எல்.டி.எஃப் 99 இடங்களிலும், காங்கிரஸ் தலைமையிலான யு.டி.எஃப் கூட்டணி 41 இடங்களிலும் வெற்றிபெற்றன. மே 2-ம் தேதி வாக்கு எண்ணிக்கை முடிந்து தேர்தல் முடிவுகள் வெளியாகிவிட்டன. ஆனாலும் கடந்த 20-ம் தேதிதான் எல்.டி.எஃப் கூட்டணி ஆட்சிப் பொறுப்பை ஏற்றுக்கொண்டது. இரண்டாவது முறையாக முதல்வராக பினராயி விஜயன் பொறுப்பேற்றுக்கொண்டார். கடந்த பினராயி விஜயன் ஆட்சிக்காலத்தில் காங்கிரஸ் எதிர்க்கட்சித் தலைவராக ரமேஷ் சென்னிதலா செயல்பட்டார். இந்தமுறையும் அவர் எதிர்க்கட்சித் தலைவர் பதவிக்காகக் காய்நகர்த்தினார். வழக்கம்போல காங்கிரஸ் கட்சியில் கோஷ்டிப் பிரச்னைகள் தலைதூக்கியதால் எதிர்க்கட்சித் தலைவரைத் தேர்ந்தெடுப்பதில் இழுபறி நீடித்தது. இதனால் டெல்லி ஹைகமாண்ட் இந்த விவகாரத்தைக் கையில் எடுத்தது.ரமேஷ் சென்னிதலா இதையடுத்து இன்று எதிர்க்கட்சித் தலைவராக வீ.டி.சதீசன் நியமிக்கப்பட்டிருப்பதாக டெல்லி தலைமை அறிவித்தது. எதிர்க்கட்சித் தலைவராக வீ.டி.சதீசன் நியமிக்கப்பட்டிருக்கும் தகவலை ஹைகமாண்ட் பிரதிநிதியான மல்லிகார்ஜுன கார்கே கேரள மாநில கமிட்டிக்கு அறிவித்தார். இடது முன்னணி ஆட்சியில் முதல்வர் தவிர மற்ற அனைத்து அமைச்சர்களாகவும் புதியவர்கள் நியமிக்கப்பட்டுள்ளனர். அதுபோல, காங்கிரஸிலும் புதியவர்களுக்கு வாய்ப்பு வழங்க வேண்டும் என ராகுல் காந்தி கூறியதால் இந்த முடிவு எடுக்கப்பட்டுள்ளதாக தகவல் வெளியாகியுள்ளது. எதிர்கட்சித் தலைவராகத் தேர்ந்தெடுக்கப்பட்டுள்ள சதீசன் எர்ணாகுளம் மாவட்டம், பறவூர் தொகுதி எம்.எல்.ஏ-வாக இருக்கிறார். இது குறித்து வீ.டி.சதீசன் கூறுகையில்,"கே.கருணாகரன், ஏ.கே.ஆன்றணி, உம்மன்சாண்டி, ரமேஷ் சென்னிதலா ஆகிய முக்கியத்துவம் வாய்ந்தவர்கள் பொறுப்பு வகித்த எதிர்க்கட்சித் தலைவராக செயல்பட வாய்ப்பு அளித்த நிர்வாகிகளுக்கு நன்றி. எதிர்க்கட்சித் தலைவர் பொறுப்பில் மிகப்பெரிய சவால்கள் உண்டு என்பது எனக்குத் தெரியும். கேரளத்தில் காங்கிரஸின் பாரம்பர்யத்தை மீட்டெடுக்கும் வகையில் செயல்படுவேன். இது மலர் கிரீடம் அல்ல என்பது எனக்குத் தெரியும்.வீ.டி.சதீசன் எல்லா தளத்திலும் உள்ள தலைவர்களுடனும் ஆலோசித்து ஒருங்கிணைந்து செயல்படுவேன். இந்தப் பதவியின் மகத்துவத்தை நிலைநிறுத்திக்கொண்டு, யு.டி.எஃப் நிர்வாகிகளும், மக்களும் விரும்பும் வகையில் கேரளத்தில் யு.டி.எஃப் மற்றும் காங்கிரஸை மீண்டும் கொண்டுவர முடியும் என ஆத்மார்த்தமாக நம்புகிறேன்" என்றார். காங்கிரஸ் எதிர்கட்சித் தலைவராக வீ.டி.சதீசன் நியமிக்கப்பட்டிப்பதற்கு முன்னாள் எதிர்க்கட்சித் தலைவர் ரமேஷ் சென்னிதலா தனது முகநூல் பக்கத்தில் வாழ்த்து தெரிவித்துள்ளார்.
http://dlvr.it/S0C9rV

Read More

24 வாரங்களைக் கடந்த 3 கருக்கள்; வளர்ச்சி குறைபாடு பிரச்னை; கலைக்க மும்பை நீதிமன்றம் அனுமதி!

மும்பையைச் சேர்ந்த 41 வயதாகும் தேவி (பெயர் மாற்றப்பட்டுள்ளது) என்ற பெண் கடந்த சில மாதங்களுக்கு முன்பு கர்ப்பம் அடைந்தார். அவர் மருத்துவமனைக்குச் சென்று ஸ்கேன் செய்து பார்த்தபோது, அவரது வயிற்றில் 3 கருக்கள் உருவாகியிருந்தன. அதில் ஒரு குழந்தை அசாதாரண வளர்ச்சியுடையதாக இருந்தது. அதாவது, அக்குழந்தைக்கு மூளை மற்றும் மண்டை ஓடு போன்ற பகுதிகள் இல்லாமல் இருந்தன. பிறந்தாலும் சில மணி நேரம்கூட உயிரோடு இருக்க வாய்ப்பு இல்லை என்று டாக்டர்கள் தெரிவித்தனர். இதனால், அக்கருவை கலைக்க தேவியும் அவரின் கணவரும் முடிவு செய்தனர். Abortion ஆனால் அதற்குள் வயிற்றில் இருந்த கருக்களின் வளர்ச்சி 20 வாரங்களைக் கடந்துவிட்டது. 20 வாரங்களைக் கடந்த கருவைக் கலைக்க சட்டம் அனுமதிக்காது. என்றாலும், `அசாதாரண நிலையில் இருக்கும் கருவை கலைக்கலாம்' என்று கடந்த மார்ச் 25-ம் தேதி பாராளுமன்றத்தில் சட்டம் இயற்றப்பட்டது. இச்சட்டம் அமலுக்கு வந்த பிறகு மும்பையில் இதுவரை 20 வாரங்களைக் கடந்த கரு அதிகாரபூர்வமாக கலைக்கப்படவில்லை. தேவியின் வயிற்றில் மூன்று கருக்களும் வளர்ந்து கொண்டிருந்த நிலையில், ஏழ்மை நிலையில் இருந்த தேவிக்கு என்ன செய்வது என்று தெரியவில்லை. அதற்குள் கருக்களின் வளர்ச்சி 23 வாரங்களைத் தாண்டிவிட்டது. `வயிற்றில் இருக்கும் அசாதாரணக் கருவைக் கலைக்க அனுமதிக்கவேண்டும்' என்று கோரி மும்பை உயர்நீதிமன்றத்தில் மனுத்தாக்கல் செய்தார் தேவி. மனுவை விசாரித்த நீதிமன்றம், அசாதாரண வளர்ச்சியுடன் இருக்கும் ஒரு கருவை மட்டும் கலைக்க வாய்ப்பு இருக்கிறதா என்று கடந்த 12-ம் தேதி டாக்டர்களிடம் கேட்டு இருந்தது. ஆனால் அதற்கு வாய்ப்பு இல்லை என்று டாக்டர்கள் தெரிவித்தனர். இதையடுத்து புதிய மருத்துவ நிபுணர் குழுவைக் கொண்டு, மூன்று கருக்களையும் கலைக்கலாமா என்பது குறித்து ஆய்வு செய்து அறிக்கை தாக்கல் செய்ய நீதிபதிகள் உத்தரவிட்டனர். அதன் அடிப்படையில் ஜேஜே மருத்துவமனை டாக்டர் டீன் தலைமையிலான குழு அப்பெண்ணின் வயிற்றில் உள்ள கருக்களை ஆய்வு செய்து அறிக்கை தாக்கல் செய்தது. அதன்படி, ஒரு குழந்தை மூளை மற்றும் மண்டை ஓடு இல்லாமல் பிறக்க வாய்ப்பு இருப்பதாகவும், இன்னோரு குழந்தைக்கு மரபணு பிரச்னை இருப்பதாகவும், இரு குழந்தைகளும் பிறந்தாலும் நிரந்த ஊனத்துடன் இருக்கும், அப்படியும் அவை உயிர்பிழைக்க வாய்ப்பு இல்லை என்றும் தெரிவித்தனர். மூன்றாவது குழந்தை மட்டும் ஆரோக்கியமாக இருப்பதாகத் தெரிவித்தனர். mumbai high court கரு வயிற்றில் இருந்தால் தாயின் மனநிலை மிகவும் மோசமாக பாதிக்கப்படும் என்றும், எனவே மூன்று கருக்களையும் கலைப்பதே சரியாக இருக்கும் என்றும் டாக்டர்கள் தெரிவித்தனர். அதனை கோர்ட் ஏற்றுக்கொண்டது. தேவி தரப்பில் ஆஜரான வழக்கறிஞர், `ஏற்கெனவே தேவிக்கு ஒரு குழந்தை இருக்கிறது. அவர்கள் மிகவும் ஏழ்மையான குடும்பத்தைச் சேர்ந்தவர்கள். கருத்தடை சாதனங்களில் ஏற்பட்ட தவற்றால் இந்தக் கருக்கள் உருவாகி இருக்கின்றன' என்று தெரிவித்தார். இதையடுத்து 24 வாரங்களான தேவியின் கருவைக் கலைக்க கோர்ட் உத்தரவிட்டது. மும்பையில் உள்ள வாடியா மருத்துவமனையில் கருக்கலைப்பு செய்யப்படுகிறது. 24 வாரக் கருவை கலைக்க மத்திய அரசு ஒப்புதல் கொடுத்த பிறகு மும்பையில் முதன்முறையாக கருக்கலைப்பு தேவிக்கு நடப்பது குறிப்பிடத்தக்கது.
http://dlvr.it/S09ybC

Read More

`கேரள அறநிலையத்துறை அமைச்சராக பட்டியலினத்தவர்; பாராட்டிய சீமான், திருமா!’ - யார் இந்த ராதாகிருஷ்ணன்?

ராக கேரள மாநிலத்தில் தொடர்ந்து இராண்டாவது முறையாக ஆட்சியைப் பிடித்தது சி.பி.எம் தலைமையிலான எல்.டி.எஃப் கூட்டணி. இதையடுத்து திருவனந்தபுரத்தில் நேற்று மாலை எளிமையாக நடந்த விழாவில் முதல்வராக பினராயி விஜயன் பொறுப்பேற்றுக்கொண்டார். அவருடன் 20 அமைச்சர்களும் பொறுப்பேற்றுக்கொண்டனர். அனைத்து அமைச்சர்களின் துறைகளையும் முதல்வர் பினராயி விஜயன்தான் முடிவு செய்தார். அதன் அடிப்படையில் கேரள இந்து சமய அறநிலையத்துறை அமைச்சராக, பட்டியலினத்தைச் சேர்ந்த ராதாகிருஷ்ணன் நியமிக்கப்பட்டுள்ளார். சபரிமலை உள்ளிட்ட கேரளத்தின் கோயில்களை நிர்வகிக்கும் தேவசம்போர்டு அமைச்சராக பட்டியலினத்தைச் சேர்ந்த ராதாகிருஷ்ணன் நியமிக்கப்பட்டிருப்பது கேரளத்தையும் தாண்டி பிற மாநில மக்களிடையேயும் பாராட்டைப் பெற்றுள்ளது. கேரளத்தில் ஏற்கெனவே பட்டியலினத்தைச் சேர்ந்தவர்கள் தேவசம்போர்டு அமைச்சராக நியமிக்கப்பட்டிருப்பது குறிப்பிடத்தக்கது.பினராயி விஜயன் கேரள தேவசம் போர்டு மற்றும் எஸ்.சி., எஸ்.டி பிரிவு அமைச்சராகியிருக்கும் ராதாகிருஷ்ணன், திருச்சூர் மாவட்டம் சேலக்கரை தொகுதி மக்களால் எம்.எல்.ஏ-வாகத் தேர்ந்தெடுக்கப்பட்டவர். இவர் இப்போது சி.பி.எம் மத்தியக்குழு உறுப்பினராக உள்ளார். கேரளா வர்மா காலேஜில் படிக்கும்போதே எஸ்.எஃப்.ஐ யூனிட் செயலாளராக இருந்தார். சேலக்கரை ஏரியா செயலாளர், திருச்சூர் மாவட்டச் செயலாளர் உள்ளிட்ட பொறுப்புகளை வகித்திருக்கிறார். 1991-ல் மாவட்ட பஞ்சாயத்து உறுப்பினராக மக்களால் தேர்ந்தெடுக்கப்பட்டார். 1996-ல் சேலக்கரை சட்டசபைத் தொகுதியில் முதன்முறையாக போட்டியிட்டு வெற்றிபெற்றார். அன்றைய முதல்வர் இ.கே.நாயனாரின் அமைச்சரவையில் பட்டியல் சாதி மற்றும் பட்டியல் பழங்குடியின நலம் மற்றும் இளைஞர்நல அமைச்சராக இருந்தார். 2001-ல் மீண்டும் சட்டசபை உறுப்பினராகத் தேர்ந்தெடுக்கப்பட்டார். 2006 சட்டசபைத் தேர்தலில் வெற்றிபெற்றவர், சட்டசபை ஸ்பீக்கராக நியமிக்கப்பட்டார். 2011-ல் மீண்டும் சேலக்கரையில் போட்டியிட்டு வெற்றிபெற்றார். 2016-ல் போட்டியிடாமல் கட்சிப் பணிக்காகச் சென்றார்.தேவசம்போர்டு அமைச்சராக பொறுப்பேற்றுக்கொண்ட ராதாகிருஷ்ணன் 2021 தேர்தலில் சீட் வழங்கப்பட்டு 39,400 வாக்குகள் வித்தியாசத்தில் வெற்றிபெற்றவர் இப்போது தேவசம்போர்டு அமைச்சராக ஆகியுள்ளார். இவர் அடிப்படையில் விவசாயி. குத்தகைக்கு எடுத்த ஒன்றரை ஏக்கர் நிலத்தில் விவசாயம் செய்துவருகிறார். இஞ்சி, சேனைக்கிழங்கு, மஞ்சள், மரவள்ளிக்கிழங்கு ஆகிய பயிர்களை விவசாயம் செய்துவருகிறார் அமைச்சர் ராதாகிருஷ்ணன். கடந்த முறை கடகம்பள்ளி சுரேந்திரன் தேவசம்போர்டு அமைச்சராக இருந்தார் என்பது குறிப்பிடத்தக்கது. கேரள முதல்வரின் இந்த முடிவை தமிழக அரசியல் தலைவர்களும் பாராட்டியுள்ளனர். நாம் தமிழர் கட்சியின் தலைமை ஒருங்கிணைப்பாளர் சீமான், ``சமூகநீதியை நிலைநாட்டும் வகையில் தனது புதிய அமைச்சரவையில் ஒடுக்கப்பட்ட சமூகத்தைச் சேர்ந்த மார்க்சிஸ்ட் கம்யூனிஸ்ட் கட்சியின் மூத்த தலைவர்களுள் ஒருவரான கே.ராதாகிருஷ்ணன் அவர்களை தேவசம் வாரிய அமைச்சராக நியமித்தது பாராட்டுதற்குரிய வரலாற்றுச் சிறப்புமிக்க பெருநகர்வாகும்” என்று குறிப்பிட்டுள்ளார். கேரளா இராதாகிருஷ்ணன் #தேவசம்_போர்டு (இந்து அறநிலையத்துறை) அமைச்சராக நியமிக்கப் பட்டுள்ளார். முதல்வர் #பினராயி_விஜயன் அவர்களின் துணிச்சலை #விசிக நெஞ்சார பாராட்டுகிறது. 50ஆண்டுகளுக்கு முன்பு தமிழகத்தில் #பி_ஆர்_பரமேஸ்வரன். இன்று கேரளாவில் #இராதாகிருஷ்ணன்.#வெல்லும்_சமூகநீதி. pic.twitter.com/xDSwud6H7X— Thol. Thirumavalavan (@thirumaofficial) May 20, 2021 தொல் திருமாவளவன், ``ராதாகிருஷ்ணன் கேரளா தேவசம் போர்டு (இந்து அறநிலையத்துறை) அமைச்சராக நியமிக்கப்பட்டுள்ளார். முதல்வர் பினராயி விஜயன் அவர்களின் துணிச்சலை விடுதலை சிறுத்தைகள் கட்சி நெஞ்சார பாராட்டுகிறது. 50 ஆண்டுகளுக்கு முன்பு தமிழகத்தில் பி.ஆர்.பரமேஸ்வரன். இன்று கேரளாவில் ராதாகிருஷ்ணன். வெல்லும் சமூகநீதி” என குறிப்பிட்டிருக்கிறார்.
http://dlvr.it/S0870j

Read More

மகாராஷ்டிரா:`10ம் வகுப்பு தேர்வு ரத்து; கல்விமுறையைக் கடவுள்தான் காப்பாற்ற வேண்டும்’-உயர் நீதிமன்றம்

மகாராஷ்டிரா அரசு கொரோனா பரவலைக் கருத்தில்கொண்டு எஸ்.எஸ்.சி.எனப்படும் 10-ம் வகுப்பு அரசு பொதுத்தேர்வை ரத்து செய்ய முடிவு செய்துள்ளது. கொரோனா எப்போது முடிவுக்கு வரும் என்று தெரியாமல் இருப்பதால் இந்த முடிவு எடுக்கப்பட்டிருப்பதாக அரசு தெரிவித்தது. 12-ம் வகுப்புக்கு பொதுத்தேர்வு மே இறுதியில் அல்லது ஜூன் முதல் வாரத்தில் நடத்தப்படும் என்று அறிவிக்கப்பட்டது. ஆனால் அது தொடர்பாக இதுவரை எந்த அறிவிப்பும் இல்லாமல் இருக்கிறது. இதனால் 12-ம் வகுப்பு பொதுத்தேர்வு நடக்குமா நடக்காதா என்ற குழப்பத்தில் மாணவர்கள் இருக்கின்றனர். அரசு 10-ம் வகுப்பு பொதுத்தேர்வை ரத்து செய்வதை எதிர்த்து மும்பை உயர் நீதிமன்றத்தில் மனுத்தாக்கல் செய்யப்பட்டிருந்தது. 10-ம் வகுப்பு பொதுத்தேர்வு! இந்த மனு நீதிபதி ஷாருக் காதாவாலா தலைமையிலான டிவிஷன் பெஞ்ச் முன்பு விசாரணைக்கு வந்தது. விசாரணையின்போது கருத்து தெரிவித்த நீதிபதிகள், ``10-ம் வகுப்பு பொதுத்தேர்வை ரத்து செய்து ஒட்டுமொத்த கல்வி சிஸ்டத்தையும் கேலிக் கூத்தாக்க வேண்டாம். கொரோனா பரவலைக் காரணம் காட்டி மாணவர்களின் வாழ்க்கையை அழிக்க வேண்டாம்” என்று தெரிவித்தனர். மாநில அரசு தரப்பில் ஆஜரான வழக்கறிஞர் பிரியா பூஷண், 10-ம் வகுப்பு மாணவர்களுக்கு எவ்வாறு மதிப்பெண் வழங்கலாம் என்பது குறித்து மாநில கல்வி ஆராய்ச்சி மற்றும் பயிற்சி கவுன்சிலின் பரிந்துரைக்காகக் காத்திருப்பதாகக் கூறினார். இதைக் கேட்ட நீதிபதிகள், ``10-ம் வகுப்பு மாணவர்களை தேர்வு எழுதாமல் தேர்ச்சி பெற்றதாக அறிவித்தால், நாட்டில் கல்வி முறையை கடவுள்தான் காப்பாற்ற வேண்டும். 10-ம் வகுப்பு தேர்வு பள்ளி வாழ்க்கையில் மிகவும் முக்கியமான தேர்வு. தேர்வு எழுதாமல் தேர்ச்சிபெற்றதாக அறிவித்து, நமது கல்வி முறையை கேலிக்குரியதாக ஆக்குகிறீர்களா? 12-ம் வகுப்புக்கு பொதுத்தேர்வு நடத்தும்போது கொரோனா பரவலைக் காரணம் காட்டாதீர்கள். கொரோனா பரவல் இப்போது குறைந்துவருகிறது. எனவே கொரோனா பரவலைக் காரணம் காட்டி நமது மாணவர்களின் எதிர்காலத்தை அழிக்க வேண்டாம். மும்பை உயர் நீதிமன்றம் 12-ம் வகுப்பு தேர்வை மட்டும் ஏன் நடத்துகிறீர்கள்... ஏன் இந்தப் பாரபட்சம்... இது போன்ற முடிவுகளை யார் எடுத்தது?” என்று சரமாரியாகக் கேட்டனர். மேலும் ``நீங்கள் கல்வி முறையை அழிக்கிறீர்கள். வேறு ஏதாவது மாநிலம் 10-ம் வகுப்பு பொதுத்தேர்வை ரத்து செய்திருக்கிறதா?” என்று நீதிபதிகள் கேட்டனர். உடனே தமிழ்நாட்டில்,10-ம் தேர்வு ரத்து செய்யப்பட்டிருப்பதாக அரசு வழக்கறிஞர் பிரியா தெரிவித்தார். உடனே, ``நீங்கள் மற்ற மாநிலங்களைப் பின்பற்றுவேண்டுமா அல்லது உங்களை மற்ற மாநிலங்கள் பின்பற்றவேண்டுமா? 12-ம் வகுப்புக்கு ஏன் இது போன்ற ஒரு முடிவை எடுக்கவில்லை என்று எங்களுக்குப் புரியவில்லை” என்று நீதிபதிகள் தெரிவித்தனர். இதில் இறுதி முடிவெடுக்க உயர் நீதிமன்றம் கால அவகாசம் கொடுக்க வேண்டுமென்று அரசு வழக்கறிஞர் கேட்டுக்கொண்டார். இதையடுத்து அரசு புதிய அறிக்கை தாக்கல் செய்ய நீதிபதிகள் உத்தரவிட்டனர். ஏற்கெனவே சி.பி.எஸ்.சிபோர்டு 10-ம் பொதுத்தேர்வை ரத்து செய்திருக்கிறது. மேலும் 12-ம் வகுப்பு தேர்வையும் ரத்து செய்யலாமா என்பது குறித்துப் பரிசீலித்துவருகிறது.
http://dlvr.it/S086tb

Read More

'வீடுகளுக்கே சென்று தடுப்பூசி செலுத்த முடியாதா?' - மத்திய அரசை விமர்சித்த மும்பை ஐகோர்ட்

வீடுகளுக்கேச் சென்று தடுப்பூசி வழங்கும் விவகாரத்தில் மெத்தனப் போக்குடன் செயல்படுவதாக மத்திய அரசை மும்பை உயர் நீதிமன்றம் கடுமையாக விமர்சித்துள்ளது. சில தினங்களுக்கு முன், '75 வயதைக் கடந்தவர்கள், நடக்க முடியாத மாற்றுத் திறனாளிகள் மற்றும் படுக்கையில் இருப்பவர்களுக்கு அவர்களின் வீடுகளுக்கேச் சென்று கொரோனா தடுப்பூசி போடும் திட்டத்தை அரசு செயல்படுத்த வேண்டும்' எனக் கோரி துருதி கபாடியா, குனால் திவாரி என்ற இரண்டு வழக்கறிஞர்கள், மும்பை உயர் நீதிமன்றத்தில் பொதுநல மனுக்களைத் தாக்கல் செய்தனர். தற்போதைய சூழ்நிலையில், மும்பையில் கொரோனா தொற்று வெகுவாகக் குறைந்துவிட்டாலும், அங்கு கொரோனா தடுப்பூசிக்குத் தட்டுப்பாடு நிலவி வருகிறது. இதனால், அனைத்து தடுப்பூசி மையங்களிலும் தடுப்பூசி போடவில்லை. தடுப்பூசி போட பதிவு செய்துள்ளவர்கள் அதற்காக பல நாள் காத்திருக்க வேண்டிய நிலை உருவாகி இருக்கிறது. 18 வயது மேற்பட்டவர்களுக்கு மட்டுமல்ல; வயதானவர்களுக்கும் இதே நிலைதான் என்பதால் இந்த இரண்டு வழக்கறிஞர்களும் பொதுநல மனுவை தாக்கல் செய்தனர். மும்பை உயர் நீதிமன்ற தலைமை நீதிபதி திபன்கர் தத்தா முன்னிலையில் இந்த மனு விசாரணைக்கு வந்தபோது, "பொதுமக்களின் வீடுகளுக்கேச் சென்று தடுப்பூசி போடும் வகையில் மத்திய அரசு தங்கள் கொள்கையை மாற்றிக்கொள்ள வாய்ப்பு இருக்கிறதா?" என்று அரசிடம் நீதிபதிகள் கேள்வி எழுப்பியிருந்தனர். இதற்கு பதிலளிக்க உத்தரவிட்டு விசாரணையை ஒத்திவைத்தனர். பின்னர் இந்த வழக்கு மீண்டும் விசாரணைக்கு வந்தபோது, மத்திய அரசு சார்பில் ஆஜரான வழக்கறிஞர் அனில் சிங், ''பொதுமக்களின் வீட்டுக்கே சென்று தடுப்பூசி போடப்படுவது குறித்து ஆய்வு செய்ய அரசு சார்பில் நிபுணர்குழு அமைக்கப்பட்டிருக்கிறது. இந்தக் குழு ஆலோசனை நடத்தியதில் நோயாளிகளைத் தடுப்பூசி போட ஸ்ட்ரெச்சரில் அழைத்துச் செல்வது உட்பட பல்வேறு அம்சங்கள் குறித்து ஆய்வு செய்யப்பட்டது. எனவே, இந்தத் திட்டத்துக்கான வழிமுறைகளை மத்திய அரசு விரைவில் வெளியிடும்" என்று தெரிவித்திருந்தார். அப்போது குறுக்கிட்ட தலைமை நீதிபதி திபன்கர், ''நிபுணர் குழுவில் இடம்பெற்று இருப்பவர்களுக்கு கள நிலவரம் குறித்து தெரிந்திருக்க வாய்ப்பில்லை. நம் நாட்டில் அதிகமான கட்டடங்கள் பெரும்பாலும் குறுகலான தெருக்களில் அமைந்திருக்கும். அங்கிருந்து நோயாளிகளை ஸ்ட்ரெச்சரில் கொண்டு வர வேண்டும் என்பது முடியாத காரியம். நான் பிறந்து வளர்ந்த கொல்கத்தாவில் பல்வேறு குடியிருப்புகள் நெருக்கமான இடங்களிலேயே உள்ளன. அந்தப் பகுதிகளில் ஸ்ட்ரெச்சர் கொண்டு செல்ல முடியாது. முதியோர்கள் அதிகமானோர் இதுபோன்ற குறுகலான தெருக்களில், கட்டிடங்களில் வசிக்கிறார்கள்" என்று பேசியதுடன், ''நிலைமை இப்படி இருக்க வயதானவர்களுக்கும் ஊனமுற்றவர்களுக்கும் தடுப்பூசி பெற உரிமை இல்லை என்று மத்திய அரசு சொல்கிறதா? உங்கள் பதில் மூலம் மத்திய அரசு வீட்டில் சென்று தடுப்பூசி போட தயாராக இல்லை என்பது தெரிகிறது. மும்பை மாநகராட்சி, முதியவர்களுக்கும், ஊனமுற்றவர்களுக்கும் வீட்டுக்கேச் சென்று தடுப்பூசி போடத் தயாராக இருக்கும் பட்சத்தில் மத்திய அரசின் அனுமதி வேண்டி காத்திருக்க வேண்டாம். நாங்களே அனுமதி தருகிறோம். மும்பை மாநகராட்சி இதை செய்ய முடியுமா என்பது குறித்து மாநகராட்சி கமிஷனர் இக்பால் பதிலளிக்க வேண்டும்" என்று உத்தரவிட்டார்.
http://dlvr.it/S05TWz

Read More

"ஒரு நாடாக இணைந்து கொரோனாவை கடப்போம்" - அதிகாரிகளிடம் பேசிய பிரதமர் மோடி

கொரோனா தடுப்பூசியை வீணடிப்பதை கடுமையாக கண்டித்து பேசியிருக்கிறார் பிரதமர் நரேந்திர மோடி. மேலும், மாவட்ட நிர்வாகிகளிடம் கொரோனாவால் பாதிக்கப்பட்டிருக்கும் குழந்தைகள் பற்றிய தரவுகளை தயாரிக்கவும் அறிவுறுத்தியுள்ளார் அவர். இரண்டாவது அலை கொரோனாவில் பலரும் பாதிக்கப்படுவதை தொடர்ந்து, பாதிப்பு அதிகமாக பதிவாகும் மகாராஷ்ட்ரா, கேரளா, உத்தர பிரதேசம், சட்டீஸ்கர், ஹரியானா, ஒடிசா, ராஜஸ்தான், மேற்கு வங்கம், ஆந்திரா, புதுச்சேரி உள்ளிட்ட 11 மாநிலங்களை சேர்ந்த மாவட்ட மாஜிஸ்திரேட்களை வீடியோ வழியாக சந்தித்து பேசினார் பிரதமர் மோடி. “கொரோனா தடுப்பூசி குப்பிகளை கையாளும் அதிகாரிகள் ஒவ்வொருவரும், மிகமிக கவனமாக அவற்றை கையாள வேண்டும். நாம் மிகவும் இக்கட்டான நிலையில் இருக்கிறோம். ஒரு டோஸை கூட வீணடிக்கக்கூடாது. ஒரு டோஸ் வீணடிக்கப்பட்டாலும், அது ஒரு நபரின் உயிருக்கு ஆபத்தை ஏற்படுத்துகிறது என்பதை நீங்கள் உணரவேண்டும். இந்த வைரஸ், அதிவேகமாக தன்னை உருமாற்றிக் கொண்டிருக்கிறது. உருமாறிக் கொண்டே இருக்கும் இதன் தன்மையால், இளம் வயதினரும் குழந்தைகளும் மோசமாக பாதிக்கப்படுகின்றனர். குறிப்பாக இந்த பி.1.617.2 திரிபு உருமாறிய கொரோனா, இளம் தலைமுறையினரை அதிவேகமாக தாக்கி, மோசமான தாக்கத்தை ஏற்படுத்துகிறது. இவர்களை காக்க, அவர்களுக்குள் பரவும் விகிதத்தை நாம் உடனடியாக தடுக்க வேண்டும். அதற்கு அவர்களை நாம் கண்டறிந்து, சிகிச்சையளிக்க வேண்டும். இதற்கு, அவர்களை பற்றிய விவரங்களை இந்தியாவின் அனைத்து மாவட்ட நிர்வாகிகளும் சேகரிக்க வேண்டும். தொடர்ந்து அவற்றை ஆய்வுக்கு உட்படுத்தி தடுப்பு பணிகளை மேற்கொள்ள வேண்டும். கொரோனாவை தடுக்கும் பேராயுதமான தடுப்பூசிகளுக்கு இப்போது தட்டுப்பாடு நிலவுகிறது. தடுப்பூசி விநியோகிக்கும் மருத்துவ அதிகாரிகள், அவை வீணாகாமல் இருப்பதை உறுதிசெய்ய வேண்டும். தடுப்பூசி வீணாவதை தடுப்பது கொஞ்சம் கடினமானதுதான் என்றாலும், அதை உறுதிசெய்ய வேண்டியது உங்களின் கடமைதான். கொரோனா எனும் இந்த உயிர்க்கொல்லி வைரஸை யாரும் குறைத்து மதிப்பிட்டுவிட வேண்டாம். இதை தடுக்க, புதுப்புது வழிகளையும் முறைகளையும் நாம் யோசித்துக்கொண்டே இருக்க வேண்டும். அதற்கேற்றார் போல செயல்பட வேண்டும். கொரோனா பெருந்தொற்றின் போதும் இடைவிடாது சேவையாற்றிய அனைத்து மாவட்ட அதிகாரிகளுக்கும், என் பாராட்டுகள். இந்தக் கொரோனா உங்களின் பணியை அதிகப்படுத்தியுள்ளது. நிறைய சவால்கள் உங்களைக் கொடுத்துள்ளது. சூழ்நிலையை கட்டுப்படுத்த, உங்கள் ஊரில் நிலவும் சூழலை நீங்கள் ஆராய வேண்டும். சிறு நகரங்களிலும் கிராமங்களிலும்தான் கொரோனா அதிகம் பரவுவதை காணமுடிகிறது. அங்கிருக்கும் அதிகாரிகள், கள நிலவரத்தை அறிந்து அதற்கேற்றார்போல செயல்படுங்கள். ஒரு நாடாக இணைந்து, இந்தச் சூழலை நாம் கடக்க வேண்டும்” எனக்கூறியுள்ளார் மோடி.
http://dlvr.it/S046Wl

Read More

தமிழகத்தில் நிரம்பி வழியும் கொரோனா நோயாளிகள் - பணிச்சுமையால் திணறும் மருத்துவர்கள்

தமிழ்நாட்டில் கொரோனா நோயாளிகள் எண்ணிக்கை அதிவேகமாக அதிகரித்து வரும் நிலையில், மருத்துவமனைகள் நிரம்பி வழிகின்றன. ஆம்புலன்ஸ்கள் வரிசை கட்டி நிற்கின்றன. ஆனால், இவர்கள் அனைவருக்கும் சிகிச்சை தரும் அளவுக்கு போதிய மருத்துவர்களும் செவிலியர்களும் இல்லாத நிலை உள்ளது. இதனால் மருத்துவர்களின் பணிச்சுமை அதிகரித்துள்ளது. தமிழகத்தில் 2,42,000 கொரோனா நோயாளிகள் தற்போது சிகிச்சையில் உள்ளனர். இவர்களுக்கு சிகிச்சையளிக்க தேவையான படுக்கைகள், ஆக்சிஜன், மருந்துகள் ஆகிய வசதிகள் ஏற்படுத்தப்பட்டுள்ளன. ஆனால் இவர்களுக்கு சிகிச்சை தர போதிய எண்ணிக்கையில் மருத்துவர்களோ, செவிலியரோ, ஆய்வகப் பணியாளர்களோ, தூய்மைப் பணியாளர்களோ இல்லை என மருத்துவ துறையினர் கவலை தெரிவிக்கின்றனர். கொரோனா நோயாளிகள் எண்ணிக்கைப்படி பார்த்தால் தற்போதுள்ளதை விட 2 மடங்கு மருத்துவ பணியாளர்கள் தேவை என்கிறார் சமூக சமத்துவத்திற்கான மருத்துவர்கள் சங்க பொதுச் செயலாளர் ரவீந்திரநாத். தமிழகத்தில் தற்போதுள்ள 18,000 அரசு மருத்துவர்களின் எண்ணிக்கை போதாது எனவும், மருத்துவப் படிப்பை நிறைவு செய்து காத்திருக்கும் 15,000 மருத்துவர்களுக்கு பணி வழங்கி அவர்களையும் கொரோனா சிகிச்சை பணியில் ஈடுபடுத்த வேண்டும் என்கிறார் ரவீந்திரநாத். முதுநிலை மருத்துவ மாணவர்கள் 12 முதல் 20 மணி நேரம் வரை தொடர் பணி செய்ய வேண்டிய நிலை இருப்பதாகவும், இதனால் அவர்களும் தொற்றில் சிக்குவதாகவும் தகவல்கள் வெளியாகியுள்ளன. இந்நிலையில், மருத்துவர்களின் 5 மடங்கு பணிச்சுமையை குறைக்கவும் தரமான சிகிச்சை வழங்கவும் கூடுதலாக மருத்துவ பணியாளர்கள் நியமிக்கப்படுவது அவசியம் என்கிறார் தமிழ்நாடு அரசு மருத்துவர்கள் மற்றும் பட்ட மேற்படிப்பு மருத்துவர்கள் சங்கத்தின் தலைவர் சாமிநாதன். சென்னையில் மட்டும் 48,000 கொரோனா நோயாளிகளும் இது தவிர புற்றுநோய், விபத்து உள்ளிட்ட வேறு பல நோயாளிகள் ஆயிரக்கணக்கானோரும் மருத்துவமனைகளில் உள்ளனர். ஆனால் இவர்களுக்கு சிகிச்சை தர 4,612 மருத்துவர்கள் மட்டுமே பணியிலிருப்பதாக கூறுகிறது மருத்துவக் கல்வி இயக்குநரகம். மருத்துவத்துறை அமைச்சர் அண்மையில் அறிவித்தபடி 2,000 மருத்துவர்கள், 6,000 செவிலியர்கள், 2,000 ஆய்வக நுட்புனர்கள் என 10,000 மருத்துவப் பணியாளர்கள் நியமனம் போர்க்கால அடிப்படையில் உடனடியாக நடைபெற வேண்டும். இது நடந்தால் மருத்துவத் துறையினரின் பணிச்சுமை ஓரளவாவது குறைவதுடன் சிகிச்சையின் தரமும் உயரும் என்பது நிதர்சனம்
http://dlvr.it/S046FZ

Read More

'அலர்ட்' தந்த கெஜ்ரிவால் மீது சாடல்; சிங்கப்பூருக்கு 'ஆதரவாக' மத்திய அரசு... நடப்பது என்ன?

சிங்கப்பூரில் உருமாறிய புதிய வகை கொரோனா வைரஸ் உருவாகி இருப்பதாகவும், அதனால் இந்தியாவிற்கான அந்நாட்டின் விமான சேவையை ரத்து செய்யுமாறும் டெல்லி முதல்வர் அரவிந்த் கெஜ்ரிவால் கோரிக்கை வைத்திருந்தார். ஆனால், தங்கள் நாட்டில் உருமாறிய வைரஸ் எதுவும் இல்லை என சிங்கப்பூர் அரசு தெரிவித்தது. இதன் தொடர்ச்சியாக, 'டெல்லி முதல்வரின் கருத்து, இந்தியாவின் கருத்து அல்ல' என வெளியுறவுத் துறை அமைச்சகம் தெரிவிக்க, உச்ச கட்டமாக குழப்பம் நிலவுகிறது. என்ன நடக்கிறது இந்த விவகாரத்தில்? - விரிவாகப் பார்ப்போம். டெல்லி முதல்வர் அரவிந்த் கெஜ்ரிவால் நேற்றைய தினம் தனது ட்விட்டர் சமூக வலைதளப் பக்கத்தில், சிங்கப்பூரில் உருமாறிய புதிய வகை கொரோனா வைரஸ் உருவாகி இருப்பதாகவும், அது குழந்தைகளை அதிகமாக பாதிப்பதாகவும் கவலை தெரிவித்து, அதை தடுக்க சிங்கப்பூரிலிருந்து இந்தியாவிற்கான விமான சேவைகளை தற்காலிகமாக நிறுத்தி வைக்கவேண்டும் என்று மத்திய அரசுக்கு கோரிக்கை வைத்திருந்தார். ஆனால், இந்த விவகாரம் தொடர்பாக உடனடியாக கருத்து வெளியிட்ட சிங்கப்பூர் அரசு, தங்கள் நாட்டில் உருமாறிய கொரோனா வைரஸ் எதுவும் இல்லை என்றும், B.1.617.2 வகை வைரஸ்தான் தங்கள் நாட்டில் பரவி வருவதாகவும், அது இந்தியாவிலிருந்து உருமாறிய வைரஸ் எனவும் இந்தியாவிற்கான சிங்கப்பூர் தூதரகம் நேரடியாக டெல்லி முதல்வரின் ட்விட்டர் சமூக வலைதள பக்கத்திற்கு பதிலளித்துள்ளது. இந்த விவகாரம் நேற்றைய தினம் பலத்த சர்ச்சையை ஏற்படுத்தியிருந்த நிலையில், இதுகுறித்து பதிலளித்துள்ள இந்திய வெளியுறவுத் துறை அமைச்சகம், டெல்லி முதல்வருக்கு எதிராக கடுமையான வார்த்தைகளை பயன்படுத்தி உள்ளது. வெளியுறவுத்துறை அமைச்சகத்தின் செய்தி தொடர்பாளர், சிங்கப்பூரில் உள்ள இந்திய தூதரகத்தில் உள்ள அதிகாரிகளை சிங்கப்பூர் அரசாங்கம் அழைத்து டெல்லி முதல்வரின பதிவிற்கு கடுமையான மறுப்பினை பதிவு செய்ததாக குறிப்பிட்டிருந்தார். உருமாறிய கொரோனா மற்றும் விமான சேவை உள்ளிட்ட விவகாரங்கள் குறித்து கருத்துகளை வெளியிட டெல்லி முதல்வருக்கு எந்தவிதமான திறனும் இல்லை என்பதை சிங்கப்பூர் அரசிடம் இந்திய தூதர் விளக்கமாக கொடுத்திருப்பதாக வெளியுறவுத் துறை அமைச்சகம் கூறியுள்ளது. அதேபோல இந்த விவகாரம் குறித்து கருத்து தெரிவித்துள்ள வெளியுறவுத்துறை அமைச்சர் ஜெய்சங்கர், கொரோனாவிற்கு எதிரான போரில் இந்தியாவும் சிங்கப்பூரும் இணைந்து சிறப்பாக செயல்பட்டு வருவதாகவும், இந்தியாவிற்கான ஆக்சிஜன் தேவைகளுக்கான உதவிகளை அந்நாடு செய்து வருவதாகவும், அந்நாட்டின் பாதுகாப்புத் துறை விமானங்களை ஆக்ஸிஜன் எடுத்து வருவதற்காக இந்தியாவிற்கு கொடுத்து உதவியதிலிருந்தே இரு நாட்டுக்கும் இடையிலான உறவின் நெருக்கம் தெளிவாக தெரியும் எனவும் குறிப்பிட்டுள்ளார். இருப்பினும் சிலரது பொறுப்பற்ற கருத்துக்கள் இரு நாட்டின் உறவுக்கும் பாதிப்பை ஏற்படுத்தும் எனத் தெரிந்தே அதனை செய்திருப்பதாகவும், டெல்லி முதல்வரின் கருத்து இந்தியாவின் கருத்து அல்ல; அவர் இந்தியாவிற்காக பேசவில்லை என்பதை தான் தெளிவுபடுத்துவதாகவும் கடுமையான வார்த்தைகளைப் பயன்படுத்தி வெளியுறவுத் துறை அமைச்சர் ஜெய்சங்கர் குறிப்பிட்டுள்ளார். சிங்கப்பூர் அரசு தங்கள் நாட்டில் குழந்தைகளுக்கு கொரோனா பாதிப்பு மிக மோசமாக இருந்து வருவதை உணர்ந்து, நாடு முழுவதும் பள்ளிகளை மூட உத்தரவிட்டிருந்தது. மேலும், குழந்தைகளுக்கு தனி கவனம் செலுத்தவும் உத்தரவுகளை பிறப்பித்த நிலையில்தான் டெல்லி முதல்வர் அரவிந்த் கெஜ்ரிவால், மத்திய அரசிற்கு சிங்கப்பூர் உடனான விமான சேவை போக்குவரத்தை தற்காலிகமாக நிறுத்த கோரிக்கை வைத்திருந்தார். ஆனால், சிங்கப்பூர் அரசு அதனை மறுத்த உடன், டெல்லி முதல்வருக்கு மத்திய அரசு கடுமையான வார்த்தைகளை பயன்படுத்தி பதில் கூறுவதும், 'இந்தியாவின் ஒரு மாநிலத்தின் முதல்வரின் கருத்து, இந்தியாவின் கருத்து அல்ல' எனக் கூறுவது எந்த வகையில் ஏற்புடையதாக இருக்கும் என சமூக வலைதளங்களில் பல்வேறு தரப்பிலும் கேள்விகள் எழுப்பப்பட்டு வருகிறது. ஒரு மாநில முதல்வர் வைக்கக்கூடிய ஒரு கோரிக்கையை எந்தவிதமான அடிப்படை தரவுகளும் இல்லாமல் மத்திய அரசு முழுமையாக புறக்கணிப்பது ஏன் எனவும் கேள்விகள் எழுப்பப்பட்டு வருகிறது. இந்தியாவில் இருந்து உருவான உருமாறிய கொரோனா வைரஸ்தான் சிங்கப்பூர் நாட்டில் குழந்தைகளுக்கு பாதிப்பு ஏற்பட்டு வருகிறது என அந்நாடு வெளிப்படையாகக் குற்றம்சாட்டி, அதற்கு இந்திய வெளியுறவுத் துறை அமைச்சகம் எந்த ஒரு பதிலையும் வழங்காமல் இருந்திருக்கிறது என்பதையும் குறிப்பிட்டு கேள்விகள் எழுப்பப்படுகிறது. இந்தக் கேள்விகளுக்கெல்லாம் வெளியுறவுத் துறை அமைச்சகத்திடம் இருக்கக்கூடிய பதில்கள்தான் என்னவோ? - நிரஞ்சன் குமார்
http://dlvr.it/S01P7g

Read More

கேரளா: சைலஜா டீச்சருக்கு பதிலாக சுகாதாரத்துறை அமைச்சராக மீண்டும் ஒரு பெண்? யார் இந்த வீணா ஜார்ஜ்?

முதல்வர் பினராயி விஜயன் தலைமையிலான கேரளத்தின் புதிய அமைச்சரவை நாளை பொறுப்பேற்க உள்ளது. இதற்காக 500 பேர் மட்டுமே அமரும் வகையில் இருக்கைகளுடன் விழா பந்தல் அமைக்கப்பட்டு வருகிறது. 21 அமைச்சர்கள் பதவி ஏற்பார்கள் என ஏற்கனவே கூறப்பட்டிருந்த நிலையில், யார் யாருக்கு என்ன துறை என்பது குறித்து அதிகாரப்பூர்வமாக அறிவிக்கப்படவில்லை. துறைகள் குறித்து முதல்வர் பினராயி விஜயன் முடிவு செய்வார் என எல்.டி.எஃப் கூட்டணி ஒருங்கிணைப்பாளர் விஜயராகவன் அறிவித்திருந்தார். இதற்கிடையில் சுகாதாரத்துறை அமைச்சராக இருந்த கே.கே.சைலஜாவுக்கு மீண்டும் அமைச்சர் பதவி வழங்காதது சர்ச்சையை ஏற்படுத்தியது. இந்த நிலையில் அமைச்சர்களின் துறை குறித்த தகவல் வெளியாகியுள்ளது. உளவுத்துறை மற்றும் விஜிலென்ஸ் துறைகளை முதல்வர் பினராயி விஜயன் தன்வசம் வைத்துள்ளதாக தகவல் வெளியாகியுள்ளது. பினராயி விஜயனின் மருமகன் முகம்மது ரியாசுக்கு பொதுப்பணித்துறை மற்றும் சுற்றுலாத்துறை. நிதி அமைச்சராக கே.என்.பாலகோபாலன் நியமிக்கப்பட உள்ளதாகவும், உயர்கல்வித்துறை அமைச்சராக பிந்து நியமிக்கப்பட்ட உள்ளதாகவும் தகவல் வெளியாகியுள்ளது.கே.கே.சைலஜா கே.கே.சைலஜா டீச்சர் வகித்து வந்த சுகாதாரத்துறை அமைச்சர் பதவி மீண்டும் மகளிருக்கே ஒதுக்கப்பட்டுள்ளதாக தகவல் வெளியாகியுள்ளது. அரசியலுக்கு வருவதற்கு முன் பத்திரிகையாளராக இருந்த வீணா ஜார்ஜ், சுகாதாரத்துறை அமைச்சராக நியமிக்கப்பட உள்ளதாக கூறப்படுகிறது. வீணா ஜார்ஜ் 15 ஆண்டுகளாக பத்திரிகையாளராக பணியாற்றியவர். 2016-ல் ஆறன்முளா தொகுதியில் போட்டியிட்டு சட்டமன்ற உறுப்பினராக வெற்றிபெற்றார். எம்.எல்.ஏ-வாக இருக்கும்போதே 2019 நாடாளுமன்ற தேர்தலில் சி.பி.எம் சார்பில் பத்தணம்திட்டா தொகுதியில் போட்டியிட்டு தோல்வியடைந்தார். இப்போது இரண்டாவது முறையாக ஆறான்முளா தொகுதியில் எம்.எல்.ஏ-வாக வெற்றிபெற்றுள்ளார். வீணா ஜார்ஜ் ஆறன்முளா தொகுதியில் 19,003 வாக்குகள் வித்தியாசத்தில் வெற்றிபெற்றார் என்பது குறிப்பிடத்தக்கது. இவரது கணவர் ஜார்ஜ் ஜோசப்.வீணா ஜார்ஜ் சுகாதாரத்துறை அமைச்சராகப் பதவியேற்க இருப்பது குறித்து வீணா ஜார்ஜிடம் செய்தியாளர்கள் கேட்டதற்கு, ``என்ன துறை என்பது குறித்து இன்னும் எனக்கு அதிகாரப்பூர்வமான அறிவிப்பு கிடைக்கவில்லை. கட்சி வழங்கும் பொறுப்புகளை சிறப்பாக செய்து முடிக்க முயற்சிப்பேன். என்ன துறை என்பது குறித்து கட்சி முடிவு செய்யும்" என்றார். அமைச்சர்களின் துறை குறித்து விரைவில் அதிகாரப்பூர்வ தகவல் வெளியாகும் என திருவனந்தபுரம் தலைமைச் செயலக வட்டாரங்கள் தெரிவிக்கின்றன.
http://dlvr.it/S00148

Read More

மும்பை: 'டவ்தே' புயலில் சிக்கிய 89 ஓ.என்.ஜி.சி ஊழியர்கள்! - தேடுதல் பணியில் 5 கடற்படைக் கப்பல்கள்!

குஜராத்தில் கரையைக் கடந்த டவ்தே புயல் மும்பையில் மிகப்பெரிய சேதத்தை ஏற்படுத்திவிட்டு சென்றிருக்கிறது. புயலால் ஏற்பட்ட சூறாவளிக் காற்றில் ஆயிரக்கணக்கான வீடுகள் பாதிக்கப்பட்டுள்ளன. ஏராளமான மரங்களும் மின் கம்பங்களும் சாய்ந்துள்ளன. மகாராஷ்டிராவில் மழைக்கு 14 பேர் உயிரிழந்துள்ளனர். பலத்த புயல் காரணமாக மும்பையிலிருந்து 70 கிலோமீட்டர் தூரத்திலிருக்கும் ஓ.என்.ஜி.சி-க்குச் சொந்தமான ஹீரா எண்ணெய்க் கிணறு அருகே ஊழியர்கள் தங்குவதற்காக குடியிருப்புப் படகுகள் நிறுத்தப்பட்டிருந்தன.கப்பலைத் தாக்கும் ராட்சத அலைகள் அதில் பி 305 என்ற படகில் 273 பேர் தங்கியிருந்தனர். புயல் காரணமாக வீசிய காற்றில் அந்தப் படகு நங்கூரத்தை இழுத்துக்கொண்டு சென்றது. இதையடுத்து அதில் இருப்பவர்களைக் காப்பாற்ற கடற்படைக் கப்பல்கள் விரைந்தன. படகு, எண்ணெய்க் கிணறு மீது மோதி தண்ணீர் உள்ளே புகுந்து மூழ்கிவிட்டது. படகு மூழ்கும் முன்பாக அதிலிருந்தவர்கள் பாதுகாப்பு கவச உடை அணிந்துகொண்டு கடலில் குதித்துவிட்டனர். அவர்களைக் காப்பாற்ற கடற்படைக் கப்பல்களும், கடலோர பாதுகாப்புப் படையின் ஹெலிகாப்டர்களும் தேடுதல் பணியில் ஈடுபடுத்தப்பட்டுள்ளன. கடந்த இரண்டு நாள்களாகப் போராடி 184 பேர் பத்திரமாக மீட்கப்பட்டுள்ளனர். 89 பேரை இன்னும் காணவில்லை. அவர்களைத் தேடும் பணியில் ஐந்து கடற்படைக் கப்பல்களும் ஹெலிகாப்டர்களும் முடுக்கிவிடப்பட்டுள்ளன. இது தவிர கால் கன்ஸ்ட்ரக்டர் என்ற மற்றொரு படகும் 137 பேருடன் அலைகளால் இழுத்துச் செல்லப்பட்டது. அந்தப் படகு பால்கர் அருகே நிற்பது கண்டுபிடிக்கப்பட்டு அதிலிருந்த அனைவரும் பத்திரமாக மீட்கப்பட்டனர். ஹீரா எண்ணெய்க் கிணறு அருகே நிறுத்தப்பட்டிருந்த மற்றொரு படகில் 200 பேர் இருந்தனர். அந்தப் படகும் காற்றால் இழுத்துச் செல்லப்பட்டது. அதில் இருந்தவர்களையும் கடலோர பாதுகாப்புப் படையினர் பத்திரமாக மீட்டுள்ளனர். கடற்படையினரும், கடலோர பாதுகாப்புப் படையினரும் சேர்ந்து 24 மணி நேரமும் போராடி படகுகளில் இருந்த ஓ.என்.ஜி.சி ஊழியர்களை பத்திரமாக மீட்டுள்ளனர். கடலில் புயல் கரையைக் கடந்த பிறகும் சீற்றம் அதிகமாக இருப்பதால் மீட்புப் பணியில் தொய்வு ஏற்பட்டுள்ளது. காணாமல் போன 89 பேரும் கடலில் எங்காவது மிதந்துகொண்டிருக்க வாய்ப்பு இருப்பதாகக் கருதப்படுகிறது. படகு கவிழும் முன்பாக அனைவரும் பாதுகாப்பு கவச உடை அணிந்துகொள்ளும்படி கேட்டுக்கொள்ளப்பட்டிருந்ததால் 89 பேரும் உயிருடன் இருக்க வாய்ப்பு இருப்பதாகக் கூறப்படுகிறது. இது குறித்து கடற்படை அதிகாரி எம்.எஸ்.பவார் கூறுகையில், "இது மிகவும் சவாலான மீட்புப்பணி. 40 ஆண்டுகளில் இது போன்ற ஒரு மீட்புப் பணியை நான் பார்த்ததில்லை" என்று தெரிவித்தார். ஓ.என்.ஜி.சி ஊழியர்கள் தங்கியிருந்த பார்ஜி எனப்படும் மிகப் பிரமாண்ட படகு ஒரு சிறிய குடியிருப்புப் பகுதியை போன்றதாகும். இதில் 3 முதல் 4 மாடிகள் இருக்கும். இதை நினைத்த நேரத்தில் உடனே சம்பவ இடத்திலிருந்து அப்புறப்படுத்திவிட முடியாது. படகை சம்பவ இடத்திலிருந்து அப்புறப்படுத்த குறைந்தது ஒரு வாரம் பிடிக்கும். ஒவ்வொரு படகிலும் 8 நங்கூரம் இருக்கும். அவற்றையெல்லாம் எடுத்து அப்புறப்படுத்துவதற்கு ஒரு வாரம் பிடிக்கும். ஆனால் அப்படிப்பட்ட படகையே புயல் காற்று நகர்த்திவிட்டது.
http://dlvr.it/S000vD

Read More

கொரோனா கால மகத்துவர்: தாயின் உயிரை காப்பாற்றிய அரசு மருத்துவமனையில் மகன் இலவச மருத்துவம்

கொரோனா தொற்றில் பாதிக்கப்பட்டு அவதிப்பட்டு வந்த தாயின் உயிரை காப்பாற்றியதற்காக, தாய்க்கு சிகிச்சையளித்த அதே அரசு மருத்துவமனையில் இலவச சேவை புரிகிறார் இளம் மருத்துவரொருவர். இவரின் செயல் பலரையும் நெகிழவைத்துள்ளது.  தற்போதைய உலகை இயக்கும் இயங்கு சக்தி, தன்னலமற்ற சேவைகள் தான். கொரோனா என்னும் கொடிய அரக்கனை எதிர்த்து போராடும் இன்றைய உலகத்துக்கு உறுதுணையாக பலர் சேவைகள் செய்துவருவதை நாம் பார்த்து வருகிறோம். அந்தவகையில் தன்னுடைய சேவையால் பலரின் மனங்களை நெகிழவைத்து வருகிறார் கர்நாடகாவை சேர்ந்த இளம் மருத்துவர் ஒருவர். அவர் பெயர் மருத்துவர் ஹர்ஷா. கர்நாடகாவின் நெற்களஞ்சியமான மாண்டியா அருகே உள்ள மத்தூர்தான் இவரின் சொந்த ஊர். பாரம்பரிய விவசாய குடும்பத்தைச் சேர்ந்தவர் என்றாலும் சண்டிகரில் உள்ள புகழ்பெற்ற பிஜிஐஎம்ஆரில் கதிரியக்க நோயறிதல் படிப்பில் முதுகலைப் படிப்பை முடித்து சத்தீஸ்கர் மருத்துவமனையில் கைநிறைய சம்பளத்துடன் வேலை பார்த்து வருகிறார். இதற்கிடையே, 15 நாட்களுக்கு முன்புஇவரின் தாய் ராஜலட்சுமிக்கு கொரோனா பாதிப்பு இருப்பது உறுதிசெய்யப்பட்டது. ராஜலட்சுமி மாண்டியாவில் இருப்பதால் மருத்துவமனையில் 10 நாட்கள் விடுமுறை எடுத்துக்கொண்டு மாண்டியா விரைந்தார் ஹர்ஷா. அப்போது கடுமையான மூச்சுத்திணறல் காரணமாக அவதிப்பட்ட அவரின் தாய் ராஜலட்சுமிக்கு ஐசியூ வார்டில் சேர்த்து சிகிச்சை அளிக்க வேண்டிய நிலை ஏற்பட்டுள்ளது. தனக்கு இருந்த தொடர்புகள் மூலம் பல்வேறு மருத்துவமனைகளில் படுக்கை வசதிபெற முயற்சித்துள்ளார் ஹர்ஷா. ஆனால் அனைத்தும் தோல்வியில் முடிந்துள்ளது. தாய் ராஜலட்சுமியின் நிலையை சோதித்து பார்த்தவர்கள், அவருக்கு சிகிச்சை அளிக்க முடியாத நிலையில் உள்ளார் என்றுக் கூறி கைவிரித்துள்ளனர். ஒரு மருத்துவராக இருந்துகொண்டு தனது தாய்க்கே சிகிச்சை அளிக்க முடியாத விரக்தியில் இருந்து மருத்துவர் ஹர்ஷா, இறுதியாக மாவட்ட அரசு மருத்துவமனை மூத்த மருத்துவர் ராஜேஸ்வரியை தொடர்புகொண்டு விஷயத்தை பகிர்ந்துகொள்ள, இறுதியில் அரசு மருத்துவமனையில் தாய் ராஜலட்சுமியை சேர்த்துள்ளார். அங்கு 10 நாட்கள் சிகிச்சை பெற்றுவந்துள்ளார் அவர். ஒவ்வொரு நாளும் சிகிச்சையில் நல்ல முன்னேற்றம் இருந்துள்ளது. குறிப்பாக ஆக்சிஜன் அளவு மேம்பட்டு இறக்கும் தருவாயில் இருந்த ராஜலட்சுமியின் உயிர் காப்பற்றப்பட்டுள்ளது. ஆபத்தான நிலையிலிருந்த அவரை காப்பாற்ற உதவியிருக்கிறார்கள் அந்த அரசு மருத்துவமனையின் சுகாதாரப் பணியாளர்கள். அவர்களின் பணிக்கு நன்றி செலுத்தும் வகையில் இந்த 10 நாட்களும் மருத்துவர்களுடன் இணைந்து மருத்துவ பணியை இலவசமாக பார்த்து வருகிறார் மருத்துவர் ஹர்ஷா. இதற்கு இன்னொரு காரணமும் இருக்கிறது. அந்த மருத்துவமனையில் சில நாட்களாக நோயாளிகளின் எண்ணிக்கை அதிகரித்து வந்துள்ளது. ஆனால் சுகாதார பணியாளர்களின் எண்ணிக்கை குறைவாகவே இருந்துள்ளது. மேலும் ஊழியர்களை வேலைக்கு எடுக்க நேர்காணலுக்கு அழைப்பு விடுத்தும் கொரோனா மருத்துவமனையில் பணிபுரிய யாரும் முன்வரவில்லை. இதனால் அங்கிருக்கும் மருத்துவர்கள் கூடுதல் நேரம் பணியாற்றும் நிலைக்கு ஆளாகி இருக்கின்றனர். இந்த தகவலை கேள்விப்பட்ட மருத்துவர் ஹர்ஷா, தன் தாயை காப்பாற்றிய சுகாதார பணியாளர்களுக்கு உதவும் நோக்கில் தான் வேலை பார்க்கும் சத்தீஸ்கர் மருத்துவமனையில் கூடுதலாக விடுமுறை எடுத்துக்கொண்டு இங்கு பணியாற்றி வருகிறார். இது குறித்து பேசிய மருத்துவர் ஹர்ஷா, "இந்த அரசு மருத்துவமனையில் நல்ல அடிப்படை கட்டமைப்புகள் இருக்கின்றன. ஆனால் சில நாட்களாக நோயாளிகளின் எண்ணிக்கை அதிகரித்து வருவதால் சுகாதார பணியாளர்கள் வேலைப்பளுவை சந்தித்து வருகின்றனர். அவர்களுக்கு உதவும் வகையில் நான் இங்கே இருக்கிறேன். தற்போது நான் சத்தீஸ்கர் மருத்துவமனையில் பணியாற்றி வருகிறேன். அங்கும் எனது பங்களிப்பு தேவைப்படுகிறது. எனினும் எனது நன்றியை செலுத்த அங்கு விடுமுறை எடுத்துக்கொண்டு இங்கே தன்னார்வலராக பணியாற்றிக் கொண்டிருக்கிறேன்" என்றார். எந்தவித எதிர்பார்ப்பும் இல்லாமல் தனது நன்றிக்கடனை செலுத்த இலவசமாக பணியாற்றி வரும் மருத்துவர் ஹர்ஷாவின் செயல் பலரை நெகிழவைத்து வருகிறது.
http://dlvr.it/RzxNj6

Read More