G செய்திகள்- Tamil News Paper, No.1 Tamil website in the world,Breaking News Headlines,India News

2022-ம் ஆண்டு தொடக்கத்தில் இந்தியாவின் ஐந்து மாநிலங்களில் சட்டமன்றத் தேர்தல்கள் நடைபெறவிருக்கின்றன. அந்த ஐந்து மாநிலங்களில், உ.பி தேர்தல் களம்தான் ஹைலைட். இந்தியாவிலேயே அதிக சட்டமன்றத் தொகுதிகளைக் கொண்ட உ.பி-யில் பா.ஜ.க, சமாஜ்வாடி, காங்கிரஸ், பகுஜன் சமாஜ் என்று நான்கு கட்சிகள் மோதிக் கொள்கின்றன. சமீபகாலமாக, மேடைப் பிரசாரத்தில் சமாஜ்வாடியும், பா.ஜ.க-வும் மாறி மாறி மோதிக் கொண்டிருந்தன. இந்த நிலையில், சட்டமன்றத்திலேயே சமாஜ்வாடியை சரமாரியாகத் தாக்கி பேசியிருக்கிறார் உ.பி முதல்வர் யோகி ஆதித்யநாத்.யோகி ஆதித்யநாத் Also Read: மோடியுடன் யோகி: `புதிய இந்தியா' கவிதை! - வைரல் புகைப்படங்களின் பின்னணி? தற்போதைய உ.பி அரசின் கடைசி சட்டமன்றக் கூட்டத் தொடர் நடைபெற்றுவருகிறது. அதில், நேற்று (டிச.16), இடைக்கால பட்ஜெட்டை தாக்கல் செய்தது யோகி அரசு. இதைத் தொடர்ந்து பேசிய உ.பி முதல்வர் யோகி ஆதித்யநாத், ``சோஷியலிஸம் என்பது மிகப் பெரிய மாயை. இந்தியாவுக்குத் தேவை சோஷியலிஸமோ, கம்யூனிஸமோ அல்ல; ராம ராஜ்ஜியம்தான்! உ.பி-க்கும் ராம ராஜ்ஜியம்தான் தேவை. ராம ராஜ்ஜியம் என்பது நிரந்தரமானது, சூழ்நிலைகளுக்காக மாறாதது. மொத்த பிரபஞ்சத்துக்குமானது'' என்று பேசினார். மேலும் பேசிய அவர், ``சோஷியலிஸத்தின் உண்மையான மதிப்புகளை உணர்ந்த பிரதமர் மோடி, மக்களுக்குக் கழிவறைகளைக் கட்டிக் கொடுத்திருக்கிறார். சமாஜ்வாடி செய்த குடும்ப அரசியல், ஊழல் காரணமாக உ.பி வளர்ச்சியடைவேயில்லை. இல்லையென்றால் உ.பிதான் பொருளாதாரத்தில், இந்தியாவிலேயே நம்பர் 1 மாநிலமாக இருந்திருக்கும்'' என்று கூறினார். சமாஜ்வாடி எம்.எல்.ஏ-வும் சட்டமன்ற எதிர்க்கட்சித் தலைவருமான ராம் கோவிந்த் செளத்ரியை கைகாட்டி, ``அவர் சோஷியலிஸ்டாக இருந்தவர். ஆனால், இப்போது குடும்ப அரசியல் செய்யும் நிறுவனத்தில் இருந்துவருகிறார்'' என்று கூறியதோடு, பா.ஜ.க-வில் இணைந்துகொள்ளுமாறு ராம் கோவிந்துக்கு அழைப்பும் விடுத்தார் யோகி.ராம் கோவிந்த் செளத்ரி Also Read: Fact Check: `உ.பி பந்தேல்கண்ட் பகுதியில் புதிய அணை' - பாஜக தலைவர்கள் பகிர்ந்த புகைப்படம் உண்மையா?! இது குறித்து ராம் கோவிந்த் செளத்ரி, ``பா.ஜ.க, பொய் சொல்வதில் தேர்ந்த கட்சி. நான் என் வாழ்நாள் முழுவதும் அகிலேஷ் யாதவோடு சமாஜ்வாடி கட்சியிலேயே இருப்பேன்'' என்று கூறியிருக்கிறார்.
http://dlvr.it/SFYgkF

பொதுப் போக்குவரத்து வாகனங்களுக்கான ஆவணங்களின் காலாவதி தேதி டிச.31 வரை நீட்டிப்பு

பொதுப் போக்குவரத்து வாகனங்களுக்கான தகுதி சான்றுகள் புதுப்பித்தல், அனுமதிச்சீட்டு, ஓட்டுநர் உரிமம், வாகனப்பதிவு ஆகிய ஆவணங்களின் செல்லுபடி கால அளவினை டிசம்பர் 31ம் தேதி வரை கால நீட்டிப்பு செய்து தமிழ்நாடு அரசு அரசாணை வெளியிட்டுள்ளது. கொரோனா நோய்த்தொற்று காரணமாக, பொது போக்குவரத்திற்கான இந்த சான்றிதழ்கள் செல்லுபடியாகும் கால நீட்டிப்பு செய்யப்பட்டுள்ளது. ஏற்கெனவே அக்டோபர் 31ம் தேதி வரை இந்த கால அளவை நீட்டித்து தமிழ்நாடு அரசு உத்தரவு பிறப்பித்திருந்தது. இருப்பினும், மேற்கு வங்கம் மற்றும் டெல்லி மாநிலங்களில் பொதுப் போக்குவரத்து வாகனங்களுக்கு ஆவணங்கள் செல்லுபடியாகும் காலத்தை முறையே டிசம்பர் 31 மற்றும் நவம்பர் 30 வரை நீட்டிப்பு செய்து அவகாசம் வழங்கியது போல், தமிழகத்திலும் பொது போக்குவரத்து வாகனங்களின் ஆவணங்கள் செல்லுபடியாகும் கால அளவினை டிசம்பர் 31ம் தேதி வரை கால நீட்டிப்பு செய்து தருமாறு தமிழக அரசுக்கு கோரிக்கைகள் வைக்கப்பட்டது. அந்த கோரிக்கைகளின் அடிப்படையில், கொரோனா நோய் தொற்றால் ஏற்பட்டுள்ள பொருளாதார நெருக்கடிகளை கருத்தில் கொண்டும், பாதிக்கப்பட்ட பொதுமக்களின் நலன் கருதியும், வாகனத்தின் அனைத்து ஆவணங்களின் தகுதி சான்று புதுப்பித்தல், அனுமதிச்சீட்டு, ஓட்டுநர் உரிமம், வாகனப்பதிவு செல்லுபடியாகும் கால அளவினை டிசம்பர் 31ம் தேதி வரை நீட்டித்து தமிழ்நாடு அரசு உத்தரவு பிறப்பித்துள்ளது. இதுவே கடைசி நீட்டிப்பு வழங்கலாக இருக்க வேண்டும் என்ற நிபந்தனையுடன் ஆணையிடப்படுவதாகவும் அரசாணையில் குறிப்பிடப்பட்டுள்ளது. இதையும் படிங்க... ஓட்டுனர் பயிற்சிப் பள்ளி வாகனங்கள் மாற்றுவது தொடர்பான அரசின் சுற்றறிக்கை : இடைக்காலத் தடை
http://dlvr.it/SFY6M9

கேமராவில் பதிவான கழுத்தில் காயத்துடன் சுற்றும் புலி; ஊர் மக்களை எச்சரிக்கும் வயநாடு வனத்துறை!

நீலகிரி மாவட்டம் தமிழக எல்லையில் அமைந்திருக்கும் கேரள மாநிலத்தின் வயநாடு குருக்கன் மூலா சுற்றுவட்டாரப் பகுதிகளில் புலி ஒன்று கடந்த ஒரு மாதமாக கால்நடைகளை வேட்டையாடி வருகிறது. கடந்த ஒரு மாதத்தில் 15-க்கும் அதிகமான கால்நடைகளை தாக்கியிருப்பதாக உள்ளூர் மக்கள் தெரிவித்துள்ளனர். மேலும், மனிதர்களை தாக்கும் அபாயம் இருப்பதால், அந்த புலியை கண்காணிக்கும் பணியில் கேரள வனத்துறையினர் களமிறங்கியுள்ளனர்.காயத்துடன் உலவும் புலி அந்த புலியின் நடமாட்டம் இருப்பதாக சொல்லப்படும் இடங்களில் கண்காணிப்பு கேமராக்களை பொருத்தியுள்ளனர். மேலும் 5 இடங்களில் ரகசியமாக கூண்டுகளையும் பொறுத்தி கண்காணித்து வருகின்றனர். கூண்டு பொருத்தப்பட்டிருக்கும் பகுதிகளை அந்த புலி தவிர்த்துச் செல்வதால், புலியை கண்டறிய இரண்டு கும்கி யானைகளை வரவழைத்து கும்கிகளின் உதவியுடன் புலியை தேடும் பணியில் ஈடுபட்டு வருகின்றனர். இந்த நிலையில், கேரள வனத்துறையினர் பொருத்தியிருந்த கண்காணிப்பு கேமரா ஒன்றில் குறிப்பிட்ட அந்த புலியின் உருவம் பதிவாகியுள்ளது. மேலும் அந்த புலியின் கழுத்தில் கடுமையான காயம் இருப்பதும் உறுதி செய்யப்பட்டுள்ளது. காயம் காரணமாகவே வன விலங்குகளை வேட்டையாட முடியாத அந்த புலி கால்நடைகளை தாக்கி வருவதையும் உறுதி செய்துள்ளனர்.காயத்துடன் உலவும் புலி Also Read: அழிவின் விளிம்பில் `காவிரி புலி' மஹஸீர் மீன்; காப்பாற்றக் கோரும் உயிரியலாளர்கள்! காயப்பட்ட புலி குறித்து பேசிய கேரள வனத்துறையினர், ``முதல் முறையாக கேமராவில் பதிவாகியுள்ள இந்த புலியின் வரிகளை அடிப்படையாகக் கொண்டு வயது பாலினம் போன்றவற்றை கண்டறியும் பணியில் ஈடுபட்டு வருகிறோம். மேலும் அந்த புலியின் குழுத்தைச் சுற்றி ஆழமான காயம் இருக்கிறது. சட்டவிரோத வேட்டைக்காக வைக்கப்பட்டிருந்த சுருக்கு கம்பியில் சிக்கி தப்பியதால் இந்த காயம் ஏற்பட்டுள்ளதா அல்லது வேறு ஏதாவது காரணத்தால் காயம் ஏற்பட்டிருக்கிறதா என்பது குறித்தும் விசாரணை மேற்கொண்டு வருகிறோம். உள்ளூர் மக்கள் பாதுகாப்பாக இருக்க அறிவுரை வழங்கி வருகிறோம்" என்றனர்.
http://dlvr.it/SFY61V

கைவிலங்கை துண்டித்து தப்பியோடிய வழக்கு: ஊராட்சி மன்றத் தலைவர் வீட்டில் போலீசார் சோதனை

திருப்பத்தூர் மாவட்டம் ஆம்பூர் அருகே ஊராட்சி மன்றத் தலைவர் வீட்டில் 3 மணி நேரம் சோதனை நடைபெற்றது. துத்திப்பட்டு ஊராட்சி மன்றத் தலைவர் சுவேதாவின் கணவர் கணேசன் மீது, கோவை மாவட்டம் குனியமுத்தூர் மற்றும் போத்தனூர் காவல் நிலையங்களில் 4 கொள்ளை வழக்குகள் நிலுவையில் உள்ளன. இந்த நிலையில் கடந்த அக்டோபர் மாதம் குனியமுத்தூரில் மூதாட்டியிடம் கொள்ளையடித்த புகாரில், கணேசனை கைது செய்ய காவல்துறையினர் வந்தனர். அப்போது, சுவேதா, ஊராட்சி மன்ற துணைத் தலைவர் விஜய் உட்பட 17 பேர் குனியமுத்தூர் காவல்துறையினரை தாக்கி கைவிலங்கை வெல்டிங் பட்டறைக்கு கொண்டு சென்று வெட்டி எடுத்துவிட்டு தப்பிக்க வைத்தனர். இவ்விவகாரம் தொடர்பாக, உமராபாத் காவல் நிலையத்தில் குனியமுத்தூர் உதவி ஆய்வாளர் ஞானப்பிரகாசம் அளித்த புகாரின்பேரில், 17 பேரில் 11 பேர் கைது செய்யப்பட்டனர். 6 பேர் தலைமறைவாக உள்ள நிலையில் துத்திப்பட்டு ஊராட்சி மன்றத் தலைவர் சுவேதா வீட்டில் காவல்துறையினர் 3 மணிநேரத்திற்கு மேலாக சோதனை செய்தனர். சோதனையில் முக்கிய ஆவணங்கள் கைப்பற்றப்பட்டுள்ளதாக காவல்துறையினர் கூறினர். இதையும் படிக்க: 16 டன் முந்திரி பருப்பு கடத்தல் வழக்கு - முன்னாள் அமைச்சரின் மகன் மீது குண்டர் சட்டம்
http://dlvr.it/SFXfwd

கேரள பறவை காய்ச்சல் பதற்றம் - கால்நடை மருத்துவர்கள் பற்றாக்குறையால் திணறும் நீலகிரி!

கேரள மாநிலம் ஆலப்புழா மற்றும் அதன் சுற்றுவட்டார பகுதிகளில் சில வளர்ப்பு பறவைகளுக்கு பறவை காய்ச்சல் பாதிப்பு இருப்பது கண்டறியப்பட்டிருக்கிறது. தடுப்பு நடவடிக்கையாக 55 ஆயிரம் வாத்துகளை கொல்ல கேரள அரசு உத்தரவிட்டிருக்கிறது. இதனைத் தொடர்ந்து, மூன்று மாநில எல்லைகளில் பறவை காய்ச்சல் தடுப்பு நடவடிக்கைகள் முடுக்கிவிடப்பட்டிருக்கின்றன. அண்டை மாநிலங்களான கேரளா மற்றும் கர்நாடகவிலிருந்து கோழி மற்றும் பறவைகள் நீலகிரி மாவட்டத்துக்கு கொண்டு வர தடை விதிக்கப்பட்டிருக்கிறது. முன்னெச்சரிக்கை நடவடிக்கையாக தற்போது கேரளா - தமிழக எல்லைகளான, சோலாடி, பூலக்குண்ணு, நாடுகாணி, தாளூர் உள்ளிட்ட 6 சோதனை சாவடிகளிலும், கர்நாடக மாநில எல்லையான கக்கநல்லாவிலும் கால்நடை பராமரித்துறையினர் பணியில் ஈடுபட்டு வருகின்றனர்.பறவை காய்ச்சல் பதற்றம் இந்த இரு மாநிலங்களில் இருந்து கோழி, வாத்து மற்றும் காடை உள்ளிட்ட பறவைகள் ஏற்றி வரும் வாகனங்கள் நீலகிரி மாவட்டத்துக்குள் நுழைய அனுமதி மறுக்கப்பட்டு திருப்பி அனுப்பி வைக்கப்பட்டு வருகின்றன. மேலும், கேரளா மற்றும் கர்நாடக மாநிலங்களிலிருந்து நீலகிரி மாவட்டத்துக்குள் நுழையும் சரக்கு வாகனங்கள் அனைத்தும் கிரிமி நாசினி தெளித்த பின்னரே மாவட்ட எல்லைக்குள் நுழைய அனுமதிக்க வேண்டும் என மாவட்ட நிர்வாகம் உத்தரவிட்டிருக்கிறது. எல்லை ஓரத்தில் இருக்கும் 8 சோதனை சாவடிகளிலும் கால்நடை பராமரிப்புத்துறை அதிகாரிகள் மற்றும் ஊழியர்கள் கொண்ட குழுவினர் எந்நேரமும் கிரிமி நாசினி தெளிக்கும் பணியில் ஈடுபட வேண்டும் எனவும் மாவட்ட நிர்வாகம் அறிவுறுத்தியிருக்கிறது. ஆனால், தற்போது நீலகிரியில் கால்நடை மருத்துவர்கள் பற்றாக்குறை காரணமாக பறவை காய்ச்சல் கண்காணிப்பு பணியில் தொய்வு ஏற்பட்டிருப்பதாக புகார்கள் எழுந்திருக்கின்றன. இந்த விவகாரம் குறித்து நீலகிரி கால்நடை பராமரிப்புதுறை மண்டல இணை இயக்குநர் பகவத் சிங்கிடம் பேசினோம், ``கேரளாவைத் தொடர்ந்து அண்டை மாநிலமான தமிழகத்தில் பறவை காய்ச்சல் பரவாமல் தடுக்கும் பணிகள் தீவிரமாக மேற்கொள்ளப்பட்டு வருகிறது. முன்னெச்சரிக்கை நடவடிக்கைகளை தற்போது தொடங்கியிருக்கிறோம். கால்நடை மருத்துவர்கள் பற்றாக்குறை இருப்பது உண்மைதான்.பறவை காய்ச்சல் பதற்றம் 21 கால்நடை மருத்துவர்கள் இருக்க வேண்டிய இடத்தில் மிகவும் குறைந்த அளவிலேயே கால்நடை மருத்துவர்கள் இருக்கிறார்கள். சுழற்சி முறையில் பணியாற்ற நடவடிக்கை எடுத்து வருகிறோம். அருகில் இருக்கும் மாவட்டங்களில் இருந்து கால்நடை மருத்துவர்களை நீலகிரிக்கு அனுப்பச் சொல்லி அரசின் கவனத்துக்கு கொண்டு சென்றிருக்கிறோம்" என்றார். Also Read: நீலகிரி குறும்பட திருவிழா: 32 நாடுகள்; 120 ஷார்ட் ஃபிலிம்கள்; களைகட்டிய ஊட்டி!
http://dlvr.it/SFVbPp

மதுரை மீனாட்சியம்மன் கோவிலில் குடும்பத்தினருடன் ஆளுநர் ஆர்.என்.ரவி சாமி தரிசனம்

மதுரை மீனாட்சியம்மன் கோவிலில் தமிழக ஆளுநர் ஆர்என்.ரவி குடும்பத்தினருடன் சாமி தரிசனம் செய்தார். மதுரையில் இன்று நடைபெறவுள்ள அன்னை தெரசா பல்கலைக்கழக பட்டமளிப்பு விழாவில் கலந்து கொள்வதற்காக நேற்று மாலை மதுரை வந்த தமிழக ஆளுநர் ஆர்.என்.ரவி, இன்று காலை மதுரை மீனாட்சியம்மன் கோவிலில் தனது குடும்பத்தினருடன் சென்று சாமி தரிசனம் செய்தார். கோவிலுக்கு வருகை தந்த ஆளுநருக்கு கோவில் நிர்வாகத்தின் சார்பில் பூரண கும்ப மரியாதை அளிக்கப்பட்டது. கோவிலுக்குச் சென்று சுவாமி, அம்மன் சன்னதிகளில் தரிசனம் செய்த பின்னர் கோவில்களின் விழாக்கள் மற்றும் பெருமைகள் குறித்தும் கட்டிடக் கலைகள் குறித்து பார்த்தும் கேட்டும் அறிந்தார். இதனிடையே, எழுவர் விடுதலையை நிறைவேற்றக் கோரி ஆளுநரை சந்தித்து எழுவர் விடுதலை அமைப்பினர் மனு அளிக்க உள்ளதாக தகவல் வெளியானதால் ஆளுநர் செல்லும் வழியெங்கும் காவல் துறையினர் பலத்த பாதுகாப்பு பணியில் ஈடுபடுத்தப்பட்டனர்.
http://dlvr.it/SFV2PQ

லக்கிம்பூர் சம்பவம்: விசாரணைக் குழுவின் அறிக்கையால் வலுக்கும் வழக்கு - நீக்கப்படுவாரா அஜய் மிஸ்ரா?

கடந்த அக்டோபர் 3-ம் தேதி உத்தரப்பிரதேச மாநிலம் லக்கிம்பூர் கேரி மாவட்டத்தில் நடந்த விவசாயிகள் பேரணியின்போது, ஐந்து பேர் கார் ஏற்றிக் கொல்லப்பட்டனர். உயிரிழந்தவர்களில், நான்கு விவசாயிகளும், ஒரு பத்திரிகையாளரும் அடக்கம். இதைத் தொடர்ந்து நடந்த கலவரத்தில், மேலும் நான்கு பேர் உயிரிழந்தனர். லக்கிம்பூர் கேரியில் நடந்த இந்தச் சம்பவம் நாடு முழுவதும் பெரும் அதிர்வலைகளை ஏற்படுத்தியது. இந்தச் சம்பவத்தில், விவசாயிகள்மீது மோதிய மூன்று கார்களும் மத்திய இணை அமைச்சர் அஜய் மிஸ்ராவின் மகன், ஆஷிஷ் மிஸ்ராவுக்குச் சொந்தமானவை. எனவே, இது தொடர்பான வழக்கில் ஆஷிஷ் மிஸ்ரா உட்பட 13 பேர் கைது செய்யப்பட்டனர்.லக்கிம்பூர், உத்தரப்பிரதேசம் இந்த நிலையில், விவசாயிகள் உயிரிழப்பு தொடர்பாகவும், இந்த வழக்கை நீதிமன்றக் கண்காணிப்பில் விசாரணை செய்ய வேண்டும் என்ற கோரிக்கையை முன்வைத்தும் உச்ச நீதிமன்றத்தில் பொதுநல வழக்கு தாக்கல் செய்யப்பட்டது. இந்த வழக்கை விசாரித்த உச்ச நீதிமன்றம், ``லக்கிம்பூர் கேரி வழக்கை விசாரிக்கச் சிறப்புக் குழு அமைக்கப்பட வேண்டும். அந்தக் குழு வழக்கை விசாரித்து, அது தொடர்பான அறிக்கையை விசாரணை நீதிமன்றத்தில் தாக்கல் செய்ய வேண்டும்'' என உத்தரவிட்டிருந்தது. இதன்படி உ.பி அரசு, சிறப்பு விசாரணைக் குழு ஒன்றை அமைத்தது. ஆஷிஷ் மிஸ்ரா Also Read: கறுப்புக்கொடி போராட்டம்... பறிபோன 9 உயிர்கள்... உ.பி லக்கிம்பூர் கலவரத்தில் என்ன நடந்தது? இந்தச் சம்பவத்தில், விவசாயிகள், பத்திரிகையாளர் உட்பட ஐந்து பேர் கொல்லப்பட்டது தொடர்பாக தீவிர விசாரணை நடத்தியது சிறப்பு விசாரணைக் குழு. அறிக்கை சொல்வது என்ன? சிறப்பு விசாரணைக் குழுவின் தலைவர் எஸ்.பி.யாதவ், தனது விசாரணையை முடித்து, அது தொடர்பான அறிக்கையை மாஜிஸ்ட்ரேட் சிந்தா ராம் முன்னிலையில் டிசம்பர் 14-ம் தேதி அன்று தாக்கல் செய்தார். சிறப்பு விசாரணைக் குழு அறிக்கைஅந்த அறிக்கையில் விவசாயிகள், பத்திரிகையாளர் கொல்லப்பட்டது கவனக்குறைவாலோ, அலட்சியத்தாலோ நடந்த ஒன்றல்ல. கொலை செய்யவேண்டுமென்று முன்பே திட்டமிட்டுச் செய்யப்பட்ட சதி இது! மேலும் அந்த அறிக்கையில், ``இந்த வழக்கில், கொலை, கொலை முயற்சி, ஆயுதங்களைப் பயன்படுத்தியது உள்ளிட்ட கடுமையான பிரிவுகள் சேர்க்கப்பட வேண்டும்'' என்றும் குறிப்பிடப்பட்டிருந்தது. இதனை மாவட்ட நீதிமன்றமும் ஏற்றுக்கொண்டிருக்கிறது. எதிர்க்கட்சிகள் முழக்கம்! இந்த அறிக்கை வெளியானதை அடுத்து பா.ஜ.க அரசுக்கு கடும் நெருக்கடி ஏற்பட்டிருக்கிறது. இது குறித்து நாடாளுமன்றத்தில் பேசிய காங்கிரஸ் எம்.பி ராகுல் காந்தி, ``லக்கிம்பூர் சம்பவம் திட்டமிட்ட சதி என்றிருக்கிறது சிறப்பு விசாரணைக் குழு. ஆகையால், மத்திய இணை அமைச்சர் அஜய் மிஸ்ராவை பதவியிலிருந்து நீக்க வேண்டும். பாதிக்கப்பட்ட குடும்பங்களுக்கு நீதி கிடைக்க வேண்டும்'' என்று வலியுறுத்தி, ஒத்திவைப்பு தீர்மானத்தை தாக்கல் செய்திருக்கிறார். இதே கோரிக்கையை காங்கிரஸின் மூத்த தலைவர் ஆதிர் ரஞ்சன் செளத்ரியும் நாடாளுமன்றத்தில் வலியுறுத்தினார். இதையடுத்து இன்று (டிச. 16), காங்கிரஸ், திரிணாமுல் காங்கிரஸ் உள்ளிட்ட எதிர்க்கட்சி எம்.பி-க்கள் பலரும் இதே விஷயத்தை வலியுறுத்தி நாடாளுமன்றத்தில் முழக்கமிட்டனர். அஜய் மிஸ்ரா இந்தச் சம்பவம் நடந்தது முதலே, ``அஜய் மிஸ்ராவை அமைச்சரவையிலிருந்து நீக்க வேண்டும்'' என விவசாயிகள் கோரிக்கை வைத்துவந்தனர். தற்போது விசாரணைக் குழு அறிக்கை வெளியானதை அடுத்து, விவசாயிகள் மத்தியில்,`அமைச்சரவையிலிருந்து அஜய் மிஸ்ரா நீக்கப்பட வேண்டும்' என்ற கோரிக்கை மீண்டும் வலுப்பெற்றிருக்கிறது. இதனால் பெரும் நெருக்கடிக்கு உள்ளாகியிருக்கிறார் மத்திய இணை அமைச்சர் அஜய் மிஸ்ரா. பத்திரிகையாளரின் மைக்கை பறித்த அமைச்சர்! இந்த நெருக்கடியின் விளைவாக மத்திய அமைச்சர் அஜய் மிஸ்ரா, தன் மகன் குறித்துக் கேள்வியெழுப்பிய பத்திரிகையாளரிடம் கடுமையாக நடந்துகொண்டது சர்ச்சையை ஏற்படுத்தியிருக்கிறது. நேற்று லக்கிம்பூர் கேரி மாவட்டத்துச் சென்ற அஜய் மிஸ்ராவிடம் பத்திரிகையாளர் ஒருவர், ``லக்கிம்பூர் சம்பவம் திட்டமிட்ட சதி என்று சிறப்பு விசாரணைக் குழு சொல்லியிருக்கிறதே?'' என்று கேட்டார். ஆத்திரமடைந்த அஜய் மிஸ்ரா, ``இது என்ன முட்டாள்தனமான கேள்வி... உனக்கென்ன பைத்தியமா?'' என்று கேட்டு பத்திரிகையாளரின் மைக்கையும் பறித்துவிட்டார். ஏற்கெனவே, ஹரியானா, உ.பி, பஞ்சாப் உள்ளிட்ட மாநிலங்களில் வேளாண் சட்டங்கள் காரணமாக விவசாயிகள் பலரும் பா.ஜ.க மீது கடுங் கோபத்திலிருந்தனர். பஞ்சாப், உ.பி-யில் இன்னும் சில மாதங்களில் சட்டமன்றத் தேர்தல்கள் நடைபெறவிருக்கின்றன. இதையொட்டி, வேளாண் சட்டங்களை ரத்து செய்து விவசாயிகள் மத்தியில் இழந்த செல்வாக்கை மீட்டெடுக்க நினைத்தது பா.ஜ.க. ஆனால், தற்போது சிறப்பு விசாரணைக் குழுவின் அறிக்கை பா.ஜ.க-வுக்கு கடும் நெருக்கடியை ஏற்படுத்தியிருக்கிறது. #WATCH | MoS Home Ajay Kumar Mishra 'Teni' hurls abuses at a journalist who asked a question related to charges against his son Ashish in the Lakhimpur Kheri violence case. pic.twitter.com/qaBPwZRqSK— ANI UP (@ANINewsUP) December 15, 2021 Also Read: உச்ச நீதிமன்றம் தலையிடாவிட்டால் லக்கிம்பூர் சம்பவ வழக்கின் திசை மாறியிருக்குமா? அஜய் மிஸ்ரா நீக்கப்படுவாரா? ``அதிக சட்டமன்றத் தொகுதிகளைக் கொண்ட உ.பி-யில், அடுத்த ஆண்டு தொடக்கத்தில் சட்டமன்றத் தேர்தல் நடைபெறவிருக்கிறது. அதை மனதில் வைத்துத்தான், புதிய அமைச்சரவையில் உ.பி-யைச் சேர்ந்த ஏழு பேருக்கு இடமளித்தது கட்சித் தலைமை. அதில் ஒருவர்தான் அஜய் மிஸ்ரா. உ.பி-யின் மேற்குப் பகுதியில் அமைந்திருக்கிறது லக்கிம்பூர் கேரி மாவட்டம். உ.பி-யின் மிகப் பெரிய மாவட்டமும் இதுதான். விவசாயிகள் அதிகம் வாழும் மேற்கு உ.பி-யில் வேளாண் சட்டங்களால், ஏற்கெனவே பா.ஜ.க-வுக்கு பின்னடைவு ஏற்பட்டிருந்தது. தற்போது விசாரணைக் குழு அறிக்கை வெளியான பின்னர், மேலும் அந்தப் பகுதியில் பா.ஜ.க-வுக்கு நெருக்கடிகள் அதிகரித்திருக்கின்றன. இந்த நிலையில், மேற்கு உ.பி-யில் செல்வாக்கு பெற்ற அஜய் மிஸ்ராவை அமைச்சரவையிலிருந்து நீக்கினால், அது மேலும் பின்னடைவை ஏற்படுத்துமோ என்கிற எண்ணம் கட்சி மேலிடத்துக்கு இருப்பதாகத் தெரிகிறது. இருந்தும், தற்போதிருக்கும் நெருக்கடிக்கு, அஜய் மிஸ்ரா அமைச்சரவையிலிருந்து நீக்கப்பட்டால்கூட ஆச்சர்யப்படுவதற்கில்லை'' என்கிறார்கள் அரசியல் நோக்கர்கள்.
http://dlvr.it/SFTTx7

புதிய யுக்தி: எல்இடி விளக்குகளை பயன்படுத்தி மலர்ச் செடிகளை வளர்க்கும் விவசாயிகள்

ஓசூரில் பனிக்காலங்களில் மலர்ச் செடிகள் வளர எல்இடி மின் விளக்குகளை பயன்படுத்தி புதிய யுக்தியை விவசாயிகள் கையாண்டு வருகின்றனர். தகுந்த சீதோசன நிலை நிலவி வருவதால் ஓசூர் பகுதி விவசாயிகள் ரோஜா மலர்கள் மட்டுமின்றி செண்டுமல்லி, சாமந்தி போன்ற பல்வேறு வகையான மலர்களை நடவு செய்து பராமரித்து வருகின்றனர். இந்த நிலையில் ஓசூர் அருகே உள்ள மத்தம் கிராமத்தைச் சேர்ந்த கிருஷ்ணா ரெட்டி என்ற விவசாயி தனது ஒரு ஏக்கர் நிலத்தில் சாமந்தி பூ செடி நடவு செய்துள்ளார். இந்த தோட்டத்திற்கு தனியாக மின்சாரம் பெற்று 400-க்கும் மேற்பட்ட எல்இடி விளக்குகளை எரிய விட்டுள்ளார். இதுகுறித்து அவரிடம் கேட்டதற்கு, ''பனிக்காலத்தில் செடிகள் நன்கு வளர்ச்சி பெறாது. எனவே இந்த லைட்டை எரியவிட்டால் செடிகளை நோய் தாக்குவது குறைவாக இருக்கும். அதேசமயம் செடி நன்றாக வளர்ந்து பூ மொட்டுகளும் கருகாமல் பெரிய அளவிலான பூ மலரும்'' என்றார். இந்த லைட்டை 25 முதல் 30 நாட்கள் மட்டுமே பயன்படுத்துவதாக தெரிவித்த விவசாயி, அதன் பின்னர் அடுத்த தோட்டத்திற்கு மாற்றம் செய்து விடுவோம். இதனால் நல்ல பலன் கிடைத்துள்ளதாக தெரிவித்தார்
http://dlvr.it/SFT33d

பாஜக இருக்கட்டும்... தேர்தல் களத்தில் மம்தாவை எப்படி எதிர்கொள்ளப் போகிறது காங்கிரஸ்?

விரைவில் உத்தரப்பிரதேசம், உத்தராகண்ட், பஞ்சாப், மணிப்பூர் மற்றும் கோவா ஆகிய ஐந்து மாநிலங்களில் சட்டமன்றத் தேர்தல் நடைபெறவிருக்கிறது. இந்தத் தேர்தலில் வெற்றிபெற்றே ஆகவேண்டும் என்று பா.ஜ.க-வும், காங்கிரஸும் தற்போதிலிருந்தே தேர்தல் பணிகளை முழு வீச்சில் தொடங்கியிருக்கின்றன. அதிக சட்டமன்றத் தொகுதிகளை மட்டுமின்றி அதிக நாடாளுமன்றத் தொகுதிகளையும் கொண்ட உத்தரப்பிரதேசத்தில் தற்போது யோகி ஆதித்யநாத் தலைமையிலான பா.ஜ.க ஆட்சி நடைபெற்று வருகிறது.உத்தரப்பிரதேசத்தில் பிரியங்கா காந்தி வரவிருக்கும் சட்டமன்றத் தேர்தலில் உத்தரப்பிரதேசத்தில் கண்டிப்பாக வெற்றிபெற்றே ஆகவேண்டும் என்று காங்கிரஸ் கட்சி சார்பில் பிரியங்கா காந்தி கடந்த சில மாதங்களாகவே தேர்தல் வேலைகளைத் தீவிரமாகச் செய்துவருகிறார். அதே நேரத்தில் பா.ஜ.க சார்பிலும் பல முக்கிய பிரமுகர்கள் முகாமிட்டுத் தேர்தல் பணிகளைச் செய்யத் தொடங்கியிருக்கின்றனர். அண்மையில் நடந்து முடிந்த மேற்குவங்க தேர்தலில் திரிணாமுல் காங்கிரஸ் பெரும்பான்மையான இடங்களில் வெற்றிபெற்று மீண்டும் ஆட்சியைப் பிடித்தது. தேர்தல் முடிவுக்கு முன்புவரை பா.ஜ.க தான் வெற்றிபெறும் என்று கூறப்பட்டு வந்த நிலையில் மம்தா மீண்டும் முதல்வராகப் பொறுப்பேற்றார். தேசிய தேர்தல் களத்தில் மம்தா! மம்தாவின் வெற்றி தேசிய அளவில் பெரிதாகக் கவனம் பெற்றது. மேலும், வரும் 2024-ம் ஆண்டு நடைபெறவிருக்கும் நாடாளுமன்றத் தேர்தலுக்கு எதிர்க்கட்சிகளை ஒன்றிணைத்து மூன்றாவது அணியை உருவாக்கும் முயற்சிகளை மம்தா தீவிரமாகச் செய்துவருகிறார். இந்த பணிகள் ஒருபுறமிருக்க மம்தா மேற்கு வங்கத்தைத் தாண்டி, விரைவில் நடைபெறவிருக்கும் ஐந்து மாநில சட்டமன்ற தேர்தல்களிலும் போட்டியிட்டு தனது கட்சியைத் தேசிய அளவில் பெரிதாக்கவேண்டும் என்ற மற்றொரு முயற்சியை முன்னெடுத்திருக்கிறார். மம்தாவின் வருகை பா.ஜ.க, காங்கிரஸ் போன்ற பெரும் கட்சிகளுக்குப் பின்னடைவை ஏற்படுத்துமா என்பது அரசியல் வட்டாரத்தில் பேசுபொருளாகியிருக்கிறது.கோவாவில் மம்தா கோவாவைப் பொறுத்தவரைக் கடந்த 2017-ம் ஆண்டு நடைபெற்ற சட்டமன்ற தேர்தலில் 17 இடங்களைக் கைப்பற்றிய காங்கிரஸில் தற்போது வெறும் நான்கு சட்டமன்ற உறுப்பினர்கள் மட்டுமே இருக்கிறார்கள். மீதமுள்ளவர்கள் பா.ஜ.க-வில் இணைந்துவிட்டனர். ஒரு காலக்கட்டத்தில் கோவாவில் ஆட்சி அதிகாரத்திலிருந்த காங்கிரஸ் தற்போது பலமிழந்து போயிருக்கிறது. விரைவில் வரவிருக்கும் கோவா சட்டமன்றத் தேர்தலில் தாங்கள் இழந்த செல்வாக்கை மீண்டும் கைப்பற்றி, ஆட்சியைப் பிடிக்கத் தீவிர தேர்தல் பணியைச் செய்துவரும் காங்கிரஸுக்குத் தேர்தல் களத்தில் பல்வேறு சிக்கல்கள் ஏற்பட்டிருக்கின்றன. கோவாவில் தற்போதைய சூழலில் கொரோனா பேரிடர் போன்ற பல்வேறு காரணங்களால் ஆளும் பா.ஜ.க அரசின் மீது அதிருப்தி மனநிலை நிலவுகிறது. இந்த சந்தர்ப்பத்தைப் பயன்படுத்தி திரிணாமுல் காங்கிரஸ், ஆம் ஆத்மி போன்ற கட்சிகளும் கோவாவில் கால்பதிக்க வியூகம் வகுத்து வருகின்றன. சமீபத்தில் கோவாவுக்குப் பயணம் மேற்கொண்ட மம்தா அங்கிருக்கும் மாநிலக் கட்சிகளை ஒன்றிணைந்து பணியாற்ற வரவேண்டும் என்று அழைப்பு விடுத்திருந்தார். மேலும், திரிணாமுல் காங்கிரஸ் கட்சியைச் சேர்ந்த மஹுவா மொய்த்ரா, சுகாதா ராய் போன்ற பல்வேறு முக்கிய பிரமுகர்களும் கோவாவில் முகாமிட்டுத் தேர்தல் பணிகளைத் தொடங்கிவிட்டார்கள்.சரத்பவார், மம்தா பானர்ஜி காங்கிரஸைச் சீண்டும் திரிணாமுல் காங்கிரஸ்! சமீபத்தில் மும்பை சென்ற மம்தா பானர்ஜி, தேசியவாத காங்கிரஸ் கட்சியின் தலைவர் சரத்பவாரைச் சந்தித்துப் பேசினார். பின்னர் செய்தியாளர்களைச் சந்தித்த மம்தா பானர்ஜியிடம், `ஐக்கிய முற்போக்குக் கூட்டணிக்கு சரத்பவார் தலைமை வகிப்பாரா' என்ற கேள்வி எழுப்பப்பட்டது. அதற்கு மம்தா, ``ஐக்கிய முற்போக்குக் கூட்டணியா அப்படியென்றால் என்ன? அந்த கூட்டணி இப்போது இல்லை. அது என்ன செய்து கொண்டிருக்கிறது. அரசியலில் தொடர்ந்து செயலாற்றவேண்டியது அவசியம். தொடர்ந்து வெளிநாடுகளிலிருந்தால் என்ன செய்ய முடியும். மாற்றுக் கூட்டணி வலுவாக இருக்க வேண்டும். இதனை என்னால் தனியாகச் செய்ய முடியாது. போராடத் தயாராக இல்லாதவர்களை நாம் என்ன செய்ய முடியும்." என்று பேசினார். தொடர்ந்து பேசியவர், ``அரசியல் ரீதியாக பா.ஜ.க இந்த நாட்டிலிருக்கக் கூடாது என்று நான் போராடுகிறேன். காங்கிரஸ் மேற்கு வங்கத்தில் போட்டியிடலாம் என்றபோது, நாங்கள் ஏன் கோவாவில் போட்டியிடக்கூடாது. மோடியை அதிக பலம் வாய்ந்தவராக மாற்றுவதே காங்கிரஸ் கட்சி தான். பா.ஜ.க-வுக்கு விளம்பரம் தேடித்தரும் செயலை காங்கிரஸ் செய்துகொண்டிருக்கிறது. காங்கிரஸ் கட்சி ஒரு நல்ல தீர்க்கமான முடிவு எடுக்க முடியாததின் காரணமாக இன்று நாடு கஷ்டப்படுகிறது. மேற்கு வங்கத்தில் பா.ஜ.க-வுக்கு எதிராக மோதாமல் என்னோடும், என் கட்சியோடும் மோதினார்கள்" என்று காங்கிரஸ் கட்சியையும், ராகுல் காந்தியையும் கடுமையாக விமர்சித்துப் பேசியிருந்தார்.ராகுல் காந்தி மம்தாவின் இந்த விமர்சனத்துக்குக் காங்கிரஸ் கட்சி உறுப்பினர் ரஞ்சன் சவுத்ரி, ``ஒட்டுமொத்த இந்தியாவும் மம்தா... மம்தா என்று கூக்குரலிடுவது போல் அவர் நினைத்துக்கொண்டிருக்கிறார். ராகுல் காந்தியை விமர்சனம் செய்துவிட்டு எந்த ஒரு தனிக்கட்சியும் பா.ஜ.க-வை எதிர்த்துப் போராட முடியாது. இந்தியாவின் ஜனநாயகத்துக்கும், நாட்டுக்குக் காவல் புரியவும் காங்கிரஸ் கட்சி தான் ஒரே மாற்று" என்று கடுமையாக எதிர்ப்பு தெரிவித்திருந்தார். மேலும், காங்கிரஸ் கட்சி ``ஆழ்ந்த உறைநிலைக்கு போய்விட்டது. இப்போது அந்த வெற்றிடத்தை நிரப்ப எதிர்க்கட்சிகள் மேற்கு வங்க முதல்வர் மம்தாவை எதிர்பார்த்து வருகின்றன'' என்று திரிணாமுல் காங்கிரஸ் கட்சியின் அதிகாரப்பூர்வ நாளேடான ஜாகோ பங்களாவில் ஒரு கட்டுரை வெளியானது. இந்த கட்டுரை அரசியல் வட்டாரத்தில் பெரும் அதிர்வலையை ஏற்படுத்தியது. சில தினங்களுக்கு முன்பு காங்கிரஸ் கட்சியைச் சேர்ந்த மேகாலயாவின் முன்னாள் முதல்வரும், அந்த மாநிலத்தின் தற்போதைய எதிர்க்கட்சித் தலைவருமான முகுல் சங்மா, 12 காங்கிரஸ் சட்டமன்ற உறுப்பினர்களோடு திரிணாமுல் காங்கிரஸில் இணைந்தார். அதற்கு சில வாரங்களுக்கு முன்னர் காங்கிரஸ் கட்சியைச் சேர்ந்த கோவா முன்னாள் முதல்வர் லூய்சின்ஹோ திரிணாமுல் காங்கிரஸில் இணைந்தார். மேலும் பல்வேறு பகுதிகளைச் சேர்ந்த காங்கிரஸ் உறுப்பினர்களும் திரிணாமுல் காங்கிரஸ் கட்சியில் இணைந்து வருகிறார்கள் என்பது குறிப்பிடத்தக்கது.ப.சிதம்பரம் இது போன்ற அரசியல் சுழலில் கடந்த சில தினங்களுக்கு முன்பு கோவாவில் செய்தியாளர்களைச் சந்தித்த காங்கிரஸ் கட்சியின் மூத்த உறுப்பினர் ப.சிதம்பரம், ``மம்தா பானர்ஜி என் நண்பர். கடந்த 25 வருடங்களுக்கும் மேலாக அவரை எனக்குத் தெரியும். காங்கிரஸ் கட்சியின் தலைமையை ஏற்றுக்கொண்டு அனைத்து ஐக்கிய முற்போக்கு கூட்டணிக் கட்சிகளையும் ஒன்றிணைக்க வேண்டும். பா.ஜ.க இல்லாத எதிர்க்கட்சி தேவை என்று சஞ்சய் ராவத் கூறியிருந்தார். அவர் மிகவும் பொறுப்பான கருத்தைக் கூறியிருக்கிறார் என்று நினைக்கிறேன். அவரின் கருத்துக்கு நான் முழுவதுமாக உடன்படுகிறேன். எங்களுக்கு ஒரு வகையான அணுகுமுறை இருக்கிறது. மம்தாவுக்கு வேறு ஒரு வகையான அணுகுமுறை இருக்கிறது. இந்த இரண்டு அணுகுமுறைகளும் ஒன்றிணைந்தால் அது நாட்டுக்கு தான் நல்லது" என்று பேசினார். Also Read: பலமிழந்த காங்கிரஸ்; நெருக்கடியில் பாஜக; கால்பதிக்கும் மம்தா! - கோவா தேர்தல் ரேஸில் முந்துவது யார்? ``தற்போதைய தேர்தல் களநிலவரப்படி கோவா உள்ளிட்ட சில மாநிலங்களில் பா.ஜ.க-வுக்கு எதிரான மனநிலையில் மக்கள் இருக்கிறார்கள். இந்த சூழலைப் பயன்படுத்தி திரிணாமுல் காங்கிரஸ், ஆம் ஆத்மி போன்ற பல்வேறு கட்சிகள் அந்த மாநிலத்தில் தடம் பாதிக்க நினைக்கின்றன. அதனால், வாக்குகள் பல பக்கம் சிதறும் சூழல் தான் உருவாகும். அது காங்கிரஸுக்குப் பாதகமாக அமையும் என்பதைவிட, பா.ஜ.க-வுக்குச் சாதகமாக அமையும் என்பதே உண்மை நிலவரம்" என்கிறார்கள் தேசிய அரசியலை உற்றுநோக்கும் அரசியல் விமர்சகர்கள். தேர்தல் நெருங்கும் சமயத்தில் என்ன மாற்றம் வேண்டுமென்றாலும் நடக்கலாம். என்ன நடக்கும் என்பதைச் சற்று பொறுத்திருந்து தான் பார்க்கவேண்டும்.
http://dlvr.it/SFSj1s

வரும் 17-ஆம் தேதி வங்கக்கடலில் புதிய காற்றழுத்த தாழ்வுப் பகுதி உருவாக வாய்ப்பு

வரும் 17-ஆம் தேதி தென்மேற்கு வங்கக்கடல் மற்றும் அதனை ஒட்டிய பூமத்திய ரேகை பகுதியில் ஒரு புதிய காற்றழுத்த தாழ்வு பகுதி உருவாக வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. காற்றழுத்த தாழ்வுநிலையால் டெல்டா மாவட்டங்கள், காரைக்கால், புதுக்கோட்டை, அதனை ஒட்டிய உள்மாவட்டங்கள் மற்றும் தென் மாவட்டங்களில் ஒருசில இடங்களில் மிதமான மழை பெய்ய வாய்ப்புள்ளதாக தெரிவிக்கப்பட்டுள்ளது. ஏனைய மாவட்டங்களில் பெரும்பாலும் வறண்ட வானிலையும், ஓரிரு இடங்களில் லேசான மழையும் பெய்யக்கூடும் எனவும் குறிப்பிடப்பட்டுள்ளது. நாளை முதல் 19-ஆம் தேதி வரை தென் மாவட்டங்களில் ஓரிரு இடங்களில் லேசானது முதல் மிதமான மழை பெய்ய வாய்ப்புள்ளதாக கூறப்பட்டுள்ளது. சென்னையை பொறுத்தவரை வானம் ஓரளவு மேகமூட்டத்துடன் காணப்படும் எனத் தெரிவிக்கப்பட்டுள்ளது. வரும் 17-ஆம் தேதி தென் மேற்கு வங்கக்கடல் மற்றும் அதனை ஒட்டிய பூமத்திய ரேகை பகுதியில், ஒரு புதிய காற்றழுத்த தாழ்வுப் பகுதி உருவாக வாய்ப்புள்ளதாக தெரிவிக்கப்பட்டுள்ளது. குமரிக்கடல் மற்றும் இலங்கைக்கு தெற்கே பூமத்திய ரேகையை ஒட்டிய பகுதிகளில் பலத்த காற்று வீசக்கூடும் என்பதால் மீனவர்கள் அப்பகுதிகளுக்கு எச்சரிக்கையுடன் செல்ல அறிவுறுத்தப்பட்டுள்ளது. இதனைப்படிக்க...தங்கமணி உறவினர் வீடுகளில் சல்லடைப்போடும் லஞ்ச ஒழிப்பத்துறை
http://dlvr.it/SFQzKb

`ஒவ்வொரு வாரமும் விசாரணைக்கு ஆஜராகத் தேவையில்லை' - ஆர்யன் கானுக்கு நீதிமன்றம் விலக்கு!

நடிகர் ஷாருக் கானின் மகன், ஆர்யன் கான் கடந்த அக்டோபர் தொடக்கத்தில் போதைப்பொருள் பயன்படுத்தியதாக போதைப்பொருள் தடுப்புப் பிரிவு அதிகாரிகளால் கைதுசெய்யப்பட்டார். அவருக்கு மும்பை உயர் நீதிமன்றம் அக்டோபர் இறுதியில் ஜாமீன் வழங்கியது. ஜாமீனில் விடுதலை செய்யப்படும்போது ஆர்யன் கானும், அவருடன் கைது செய்யப்பட்ட அவர் நண்பர்களும் விசாரணைக்கு ஒவ்வொரு வெள்ளிக்கிழமையும் போதைப்பொருள் தடுப்புப் பிரிவு அலுவலகத்தில் ஆஜராக வேண்டும் என்று நீதிபதி சம்ப்ரே நிபந்தனை விதித்திருந்தார். ஆர்யன் கான் ஒவ்வொரு வாரமும் விசாரணைக்கு வரும்போது போதைப்பொருள் தடுப்புப் பிரிவு அலுவலகத்தில் ஏராளமான பத்திரிகையாளர்கள் கூடுவது வாடிக்கையாக இருந்துவந்தது. அதோடு ஏராளமான போலீஸாரும் பாதுகாப்புப் பணியில் ஈடுபடுத்தப்பட்டனர்.ஆர்யன் கான் இதையடுத்து ஒவ்வொரு வெள்ளிக்கிழமையும் போதைப்பொருள் தடுப்புப் பிரிவில் ஆஜராவதிலிருந்து விலக்கு அளிக்க வேண்டும் என்று கோரி, ஆர்யன் கான் தரப்பில் மும்பை உயர் நீதிமன்றத்தில் கடந்த வாரம் மனுத்தாக்கல் செய்யப்பட்டது. இந்த மனு இன்று விசாரணைக்கு வந்தது. ஆர்யன் தரப்பில் ஆஜரான வழக்கறிஞர் அமித்தேசாய், ``என் மனுதாரர் விசாரணைக்கு முழு ஒத்துழைப்பு கொடுத்துவருகிறார். அதிகாரிகள் அழைக்கும் நேரத்தில் ஆஜராகிறார். தற்போது விசாரணையை டெல்லி அதிகாரிகள் நடத்துகின்றனர். அவர்கள் விசாரணைக்காக டெல்லியிலிருந்து மும்பை வந்தால் அவர்கள் முன்பு ஆஜராகத் தயாராக இருக்கிறார். ஒவ்வொரு வெள்ளிக்கிழமையும் போதைப்பொருள் தடுப்புப் பிரிவு அலுவலகத்தில் ஆஜராகும்போது, அதிக அளவில் போலீஸார் பாதுகாப்புப் பணியில் ஈடுபடுத்தப்படுகின்றனர். ஆர்யன் கான் ஒவ்வொரு வெள்ளிக்கிழமையும் விசாரணைக்கு ஆஜராவதிலிருந்து விலக்கு அளிப்பதன் மூலம் ஆர்யன் பாதுகாப்புப் பணியில் ஈடுபடும் போலீஸாருக்கு வேறு பணிகளை ஒதுக்க முடியும்" என்று வாதிட்டார். போதைப்பொருள் தடுப்புப் பிரிவு சார்பாக ஆஜரான வழக்கறிஞர் ஸ்ரீராம், ``ஜாமீன் நிபந்தனையைத் தளர்த்துவதில் எங்களுக்கு எந்தவித ஆட்சேபனையும் இல்லை. ஆனால் விசாரணைக்கு அழைத்தால் ஆஜராக வேண்டும்’’ என்று கேட்டுக்கொண்டார். இதையடுத்து இரு தரப்பு வாதங்களையும் கேட்ட நீதிமன்றம் ஒவ்வொரு வாரமும் ஆர்யன் கான் போதைப்பொருள் தடுப்புப் பிரிவில் விசாரணைக்கு ஆஜராவதிலிருந்து விலக்கு அளித்து உத்தரவிட்டது. Also Read: `ஒவ்வொரு வாரமும் ஆஜராவதிலிருந்து விலக்கு அளிக்க வேண்டும்!’ - ஆர்யன் கான் கோரிக்கை
http://dlvr.it/SFQPHn

பத்பநாபபுரம்: இடிந்து விழுந்த அரண்மனை சுவர்; அழுத்தம் கொடுக்கும் கேரள பாஜக - சீரமைக்கப்படுமா?

கன்னியாகுமரி மாவட்டத்தில் முக்கிய சுற்றுலாத் தலங்களில் ஒன்று பத்மநாபபுரம் அரண்மனை. பத்மநாபபுரம் அரண்மனை சுமார் மூன்றரை ஏக்கர் நிலப்பரப்பில் பிரம்மாண்டமாக அமைந்திருக்கிறது. திருவிதாங்கூர் மன்னர்கள் பத்மநாபபுரத்தை தலைமையகமாகக் கொண்டு ஆட்சி செய்து வந்ததால், இந்த அரண்மனை முக்கியத்துவம் வாய்ந்ததாகக் கருதப்படுகிறது. நாட்டின் பல பகுதிகளிலிருந்தும் சுற்றுலாப் பயணிகள் வருகை புரிகின்றனர். அரண்மனையில் பழமையான மரவேலைப்பாடுகள், மன்னர் காலத்தில் கலைநயத்தோடு அமைக்கப்பட்ட விளக்குகள், மன்னர்கள் பயன்படுத்திய போர்வாள் என ஏராளமான புராதான பொருள்கள் இருக்கின்றன. வெளிநாட்டினர்கூட பத்மநாபபுரம் அரண்மனையை பார்வையிட்டு வருகின்றனர். பத்மநாபபுரம் அரண்மனை கேரள அரசின் கட்டுப்பாட்டில் இருக்கிறது. பத்மநாபபுரம் அரண்மனையை சுற்றி சுமார் 18,000 மீட்டர் நீளத்தில் கோட்டை சுற்றுசுவர் இருக்கிறது. இது 1744-ம் ஆண்டு மார்த்தாண்ட வர்மா மகாராஜா காலத்தில் கட்டப்பட்டது என்கிறார்கள்.உடைந்து விழுந்த பத்மநாபபுரம் கோட்டைச் சுவர் சுமார் 20 அடி உயரம் கொண்ட கோட்டைச் சுவரின் கீழ் பகுதியில் நீளமான கற்களும், மேல் சுவர் கருங்கல்லாலும் கட்டப்பட்டிருக்கின்றன. கோட்டையின் முகப்பில் பெரிய வாசலும், அதை சுற்றி ஒன்பது சிறிய வாசல்களும் அமைக்கப்பட்டிருக்கின்றன. கோட்டைக்குள் நீலகண்ட சுவாமி கோயில், ராமர் கோயில், சரஸ்வதி கோயில் எனப் பல கோயில்களும், அரசுப் பள்ளிக்கூடம், வீடுகள் உள்ளிட்டவை இருக்கின்றன. யானைகளின் உதவியுடன் மனிதர்கள் கட்டிய இந்த கோட்டைச் சுவர் தமிழக அரசின் கட்டுப்பாட்டில் இருக்கிறது. கேரள அரசின் கட்டுப்பாட்டிலிருக்கும் அரண்மனை புதுப்பொலிவுடன் இருக்கும் நிலையில், தமிழக அரசின் கட்டுப்பாட்டிலிருக்கும் கோட்டைச் சுவர் பழைய கம்பீரத்தை இழந்து பரிதாபமாக காட்சியளிக்கிறது. கோட்டைச் சுவரின் பல இடங்களில் மரங்களும், புதர்ச் செடிகளும் வளர்ந்து நிற்கின்றன. இந்த நிலையில், ஆர்.சி தெரு பகுதியில் சுமார் 200 அடி நீளத்துக்கு கோட்டைச் சுவர் கடந்த 5-ம் தேதிவாக்கில் இடிந்து விழுந்தது. இது அந்தப் பகுதி மக்களை அதிர்ச்சிக்குள்ளாக்கியது. உடைந்து விழுந்த கோட்டைச் சுவரை சீரமைத்து மீண்டும் பழமை மாறாமல் புதுப்பிக்க வேண்டும் என்று பொதுமக்கள் கோரிக்கை விடுத்திருக்கின்றனர்.பத்மநாபபுரம் கோட்டை இந்த நிலையில், கேரள மாநில பா.ஜ.க தலைவர் கே.சுரேந்திரன் பத்மநாபபுரம் கோட்டையை பாதுகாக்க வேண்டும் என தமிழக முதல்வர் ஸ்டாலினுக்கு கடிதம் எழுதியிருக்கிறார். அந்த கடிதத்தில் கே.சுரேந்திரன் கூறியிருப்பதாவது, ``திருவிதாங்கூர் சமஸ்தானத்தில் அங்கமாக இருந்த சமயத்தில் கட்டப்பட்டது பத்மநாபபுரம் கோட்டை. தமிழக அரசின் கட்டுப்பாட்டிலிருக்கும் பத்மநாபபுரம் கோட்டை பாதுகாக்கப்பட வேண்டும். 275 வருடம் பழமையான பத்மநாபபுரம் கோட்டை திருவிதாங்கூர் ராணுவத்தின் தந்திரங்களுக்கு எடுத்துக்காட்டாகும். பத்மநாபபுரம் கோட்டை போன்ற பாரம்பரிய கட்டமைப்புகளை எந்த விலை கொடுத்தாவது பாதுகாக்கவேண்டும். கோட்டையை பராமரிக்க தமிழக அரசு ஏற்படுத்திய பணியாளர்கள் பணிநீக்கம் செய்யப்பட்டிருப்பதாகத் தெரியவருகிறது. பத்மநாபபுரம் கோட்டையுடன் கேரளாவுக்கு கலாசார ரீதியான, பண்பாட்டு ரீதியான பந்தம் உண்டு. பத்மநாதபுரம் கோட்டையை பாதுகாக்க தமிழக முதலமைச்சர் நடவடிக்கை எடுக்க வேண்டும்" என அந்த கடிதத்தில் குறிப்பிட்டிருக்கிறார்.அமைச்சர் மனோ தங்கராஜ் இதுகுறித்து பத்மநாபபுரம் தொகுதி எம்.எல்.ஏ-வும், தமிழக தகவல் தொழில்நுட்பவியல் துறை அமைச்சருமான மனோதங்கராஜிடம் பேசினோம், ``பத்மநாபபுரம் கோட்டைச் சுற்றுச்சுவரை பராமரிக்கும் பணி எந்த துறையின் கீழும் இல்லை. அதனால், உடைந்து விழுந்த பகுதியைச் சீரமைக்க எஸ்டிமேட் எடுக்கும்படி பொதுப்பணித்துறையிடம் கூறியிருந்தோம். அவர்கள் முப்பது லட்சம் ரூபாய் செலவாகும் என கூறினார்கள். இது பெரிய தொகை என்பதால் முதல்வரிடம் நிதி கேட்டிருக்கிறோம். மேலும் பத்மநாபபுரம் கோட்டைச் சுவரை பராமரிக்கும் பணியை ஒரு துறையின் கீழ் ஒதுக்கும்படியும் கலெக்டரிடம் கேட்டிருக்கிறோம். பழமை மாறாமல் பத்மநாபபுரம் அரண்மனை புதுப்பிக்கப்படும்" என்றார்.
http://dlvr.it/SFPqq8

தென்னாப்பிரிக்க ஒருநாள் தொடரிலிருந்து விலகும் கோலியின் முடிவு: கோரிக்கை விடுத்த பிசிசிஐ

தென்னாப்பிரிக்காவுக்கு எதிரான ஒருநாள் தொடரிலிருந்து விலகும் முடிவை மறுபரிசீலனை செய்யுமாறு விராட் கோலியிடம் பிசிசிஐ வலியுறுத்தியுள்ளதாக தகவல் வெளியாகியுள்ளது. இந்திய கிரிக்கெட் அணி தென்னாப்பிரிக்காவுக்கு சுற்றுப்பயணம் செய்து 3 டெஸ்ட், 3 ஒருநாள் ஆட்டங்களில் விளையாடுகிறது. டெஸ்ட் தொடர் டிசம்பர் 26 அன்றும் ஒருநாள் தொடர் ஜனவரி 19 அன்றும் தொடங்குகின்றன. இதில் டெஸ்ட் போட்டிக்கு கேப்டனாக விராட் கோலி தொடர்கிறார். ஆனால், ஒருநாள் தொடருக்கு கேப்டனாக கோலி நீக்கப்பட்டு, ரோஹித் சர்மா நியமிக்கப்பட்டார். மும்பையில் பயிற்சியில் ஈடுபட்டிருந்தபோது, தொடைப் பகுதியில் காயம் காரணமாக தென் ஆப்பிரிக்காவுக்கு எதிரான டெஸ்ட் தொடரிலிருந்து ரோஹித் சர்மா விலகுவதாக பிசிசிஐ முறைப்படி அறிவித்தது. இதனிடையே தென்னாப்பிரிக்காவுக்கு எதிரான ஒருநாள் தொடரிலிருந்து விராட் கோலி விலகவுள்ளதாக தகவல்கள் வெளியாகின. தனது மகள் வாமிகாவின் முதல் பிறந்த நாள் கொண்டாட்டத்தில் கலந்துக் கொள்வதற்காக இந்தியாவுக்குத் திரும்பவுள்ளதால் ஒருநாள் தொடரிலிருந்து விலகும் முடிவை கோலி எடுத்துள்ளதாகத் தெரிகிறது. தவிர, ஒருநாள் போட்டிக்கான கேப்டன் பதவியில் இருந்து நீக்கப்பட்டதால் விராட் கோலி அதிருப்தியுடன் இருப்பதாகவும் செய்தி கசிந்தது. இந்த நிலையில், தென்னாப்பிரிக்காவுக்கு எதிரான ஒருநாள் தொடரிலிருந்து விலகும் முடிவை மறுபரிசீலனை செய்யுமாறு விராட் கோலியிடம் பிசிசிஐ வலியுறுத்தியுள்ளதாக தகவல் வெளியாகியுள்ளது. இன்று மெய்நிகர் செய்தியாளர் சந்திப்பு நிகழ்ச்சி ஒன்றில் விராட் கோலி பங்கேற்க உள்ளார். இக்கூட்டத்தில் தென்னாப்பிரிக்காவுக்கு எதிரான ஒருநாள் தொடரிலிருந்து விலகுகிறாரா இல்லையா என்பதுகுறித்து கோலி தெளிவுபடுத்துவார் என்று எதிர்பார்க்கப்படுகிறது. இதையும் படிக்க: தென்னாப்பிரிக்கவுக்கு எதிரான ஒருநாள் கிரிக்கெட் தொடரை கோலி மிஸ் செய்யப்போகிறாரா?
http://dlvr.it/SFPMY5

மகாராஷ்டிராவில் மேலும் 8 பேருக்கு ஒமைக்ரான் பாதிப்பு

மகாராஷ்டிரா மற்றும் டெல்லியில் மேலும் பலருக்கு ஒமைக்ரான் பாதிப்பு கண்டறியப்பட்டுள்ள நிலையில், இந்தியாவில் பாதிக்கப்பட்டவர்களின் எண்ணிக்கை 61 ஆக அதிகரித்துள்ளது. தென்னாப்பிரிக்கா, இங்கிலாந்தில் ஒமைக்ரான் தொற்று அதிகவேகமாக பரவி வரும் நிலையில் இந்தியாவிலும் அத்தொற்று மெல்ல அதிகரித்து வருகிறது. டெல்லியில் மேலும் 4 பேருக்கு ஒமைக்ரான் உறுதியாகியுள்ள நிலையில் அங்கு அத்தொற்று ஏற்பட்டுள்ளவர்களின் எண்ணிக்கை 6 ஆக அதிகரித்துள்ளது. பாதிக்கப்பட்ட 6 பேரும் வெளிநாடுகளில் இருந்து வந்தவர்கள் என குறிப்பிட்ட டெல்லி சுகாதாரத்துறை அமைச்சர் சத்யேந்திர ஜெயின், இவர்களில் ஒருவர் தொற்றிலிருந்து குணமடைந்து வீடு திரும்பிவிட்டதாக தெரிவித்தார். இதையும் படிக்க: 90 நிமிடங்களில் ஒமைக்ரான் தொற்றை கண்டறிய கிட்: டெல்லி ஐஐடி கண்டுபிடிப்பு மகாராஷ்டிராவில் மேலும் 8 பேருக்கு ஒமைக்ரான் பாதிப்பு கண்டறியப்பட்டுள்ளது. இதனையடுத்து அம்மாநிலத்தில் பாதிக்கப்பட்டோர் எண்ணிக்கை 28 ஆக உயர்ந்துள்ளது. இதற்கு அடுத்தப்படியாக ராஜஸ்தானில் 17 பேரும், குஜராத்தில் 4 பேரும், கர்நாடகாவில் 3 பேரும் ஒமைக்ரான் தொற்றால் பாதிக்கப்பட்டுள்ளனர். கேரளா, ஆந்திரா, சண்டிகரில் தலா ஒருவர் ஒமைக்ரான் வைரஸ் தொற்று ஏற்பட்டுள்ளது. இதையும் படிக்க: தமிழகத்தில் ஒமைக்ரான் பாதிப்பு உறுதியானதா? - மருத்துவத்துறை அமைச்சர் விளக்கம்
http://dlvr.it/SFP151

ஒமைக்ரான் கட்டுப்படுத்துவதில் சிறந்து விளங்குகிறது ஃபைசர் தடுப்பூசி: ஆய்வாளர்கள் நம்பிக்கை

ஃபைசர் தடுப்பூசி ஒமைக்ரான் வகை கொரோனாவை 70 சதவிகிதம் கட்டுப்படுத்துவதாக தென்னாப்ரிக்க ஆய்வில் தெரியவந்துள்ளது. தென்னாப்ரிக்காவில் முதலில் கண்டறியப்பட்ட ஒமைக்ரான், தற்போது பல்வேறு நாடுகளில் பரவியுள்ளது. ஒமைக்ரான் தொற்றின் பாதிப்பு குறித்து மருத்துவ வல்லுநர்கள் தொடர் ஆய்வில் ஈடுபட்டுள்ளனர். இந்த நிலையில், ஃபைசர் தடுப்பூசி ஒமைக்ரான் வகை கொரோனாவுக்கு எதிராக சிறந்து செயல்படுவதாக தென்னாப்ரிக்க மருத்துவ ஆராய்ச்சி கவுன்சில் நடத்திய ஆய்வில் தெரியவந்துள்ளது. ஒமைக்ரான் உறுதி செய்யப்பட்டவர்களில், இரண்டு தவணை ஃபைசர் தடுப்பூசி செலுத்தியிருந்த 70 சதவிகிதம் பேரை மருத்துவமனையில் அனுமதிக்க வேண்டிய நிலை ஏற்படவில்லை என ஆய்வாளர்கள் தெரிவித்துள்ளனர். அந்த அளவுக்கு பாதிப்பை இந்த தடுப்பூசி தடுப்பதாக தெரிவிக்கப்பட்டுள்ளது. மேலும் 33 சதவிகிதம் தொற்றே ஏற்படாமல் தடுப்பதாகவும் ஆய்வில் தெரிவிக்கப்பட்டள்ளது. தடுப்பூசி செயல்பாட்டில், வயது அடிப்படையில் சிறிது மாறுபாடு இருப்பதாகவும் கண்டறியப்பட்டுள்ளது. தென்னாப்ரிக்காவில் ஒமைக்ரானை கட்டுப்படுத்துவதில், ஃபைசர் தடுப்பூசி பெரிதும் உதவும் என மருத்துவர்கள் நம்பிக்கை தெரிவிக்கின்றனர். தொடர்புடைய செய்தி: இந்தியாவில் ஒமைக்ரான் பாதிப்பு 49 ஆக உயர்வு - டெல்லியில் மேலும் 4 பேருக்கு தொற்று
http://dlvr.it/SFMDjF

கோவை மாணவி பாலியல் வழக்கு - ஆசிரியர் மிதுன் சக்கரவர்த்தி மீது குண்டர் சட்டம்

கோவை மாணவியை பாலியல் ரீதியாக துன்புறுத்திய புகாரில் ஆசிரியர் மிதுன் சக்கரவர்த்தி மீது குண்டர் சட்டத்தின்கீழ் நடவடிக்கை எடுக்கப்பட்டுள்ளது. கோவையில் தனியார் பள்ளியில் பயின்றுவந்த 17 வயது மாணவிக்கு ஆசிரியர் பாலியல் தொல்லை கொடுத்ததால் மாணவி தூக்கிட்டு தற்கொலை செய்துகொண்டதாக புகார் எழுந்தது. இதில் தனியார் பள்ளியின் ஆசிரியர் போக்சோ சட்டத்தின்கீழ் கைதுசெய்யப்பட்டார். பள்ளியின் முதல்வர்மீதும் போக்சோ சட்டத்தின்கீழ வழக்குப்பதிவு செய்யப்பட்டது. தலைமறைவாகியிருந்த பள்ளி முதல்வர் மீரா ஜாக்சனை பெங்களூருவில் காவல்துறை கைது செய்தது. இந்நிலையில், கோவை மாணவியை பாலியல்ரீதியாக துன்புறுத்திய புகாரில் ஆசிரியர் மிதுன் சக்கரவர்த்தி மீது குண்டர் சட்டத்தின்கீழ் நடவடிக்கை எடுக்கப்பட்டுள்ளது. பள்ளி மாணவி தற்கொலை வழக்கில் ஆசிரியர் மிதுன் சக்கரவர்த்தி ஏற்கனவே சிறையில் அடைக்கப்பட்டுள்ளார் என்பது குறிப்பிடத்தக்கது.
http://dlvr.it/SFLdDy

உத்தரப்பிரதேசம்: மோடியின் வாரணாசி விசிட்... `பூர்வாஞ்சல்’ கணக்கு?! - ஒரு அரசியல் பார்வை

உத்தரப்பிரததேச மாநிலம் வாரணாசியில் உள்ள காசி விஸ்வநாதர் கோயில் அமைந்துள்ள பகுதி விழா கோலம் பூண்டிருந்தது. பிரதமர் மோடியின் உச்சக்கட்ட பாதுகாப்பை மீறி சாமானியர் அணிவித்த தலை பாகை,தொழிலாளர்கள் உடன் மதிய உணவு, அகவர்களுடனே குழு புகைப்படம் என பிரதமரின் பல செயல்பாடுகள் பேசு பொருளாக மாறியிருக்கிறது. இந்தியாவில் பெரிய மாநிலங்களில் ஒன்றான உத்தரப்பிரதேசத்தில் அடுத்த ஆண்டு சட்டமன்ற தேர்தல் நடக்க இருக்கிறது. ஆளும் பாஜக , காங்கிரஸ், சமாஜ்வாதி கட்சி , பகுஜன் சமாஜ் உள்ளிட்ட பல்வேறு கட்சிகள் பிரசாரத்தை தொடங்கி விட்டனர். நாடாளுமன்ற குளிர்கால கூட்டத்தொடர் நடந்து வரும் நிலையில், பிரதமர் மோடி உத்தரப்பிரதேசத்தில் சுற்றுப்பயணம் மேற்கொண்டு வருகிறார். கடந்த ஒரு வாரத்தில் மட்டும் உபி-யில் 3 புதிய திட்டங்களை தொடங்கி வைத்து இருக்கிறார். காசியில் பிரதமர் மோடி அதில் ஒன்று வாரணாசியில் புனரமைக்கப்பட்ட காசி விஸ்வநாதர் கோயில் வளாகமாகும். கங்கை நதியிலிருந்து காசி விஸ்வநாதர் கோவிலுக்குள் பக்தர் நேரடியாக செல்ல வேண்டும் என்பதற்காக 2019 -ம் ஆண்டு 600 கோடி செலவில் புனரமைக்கும் திட்டத்தை பிரதமர் மோடி தொடங்கி வைத்தார். இந்த திட்டத்தின் முதல் கட்ட பணிகள் முடிவடைந்த நிலையில் 5 லட்சம் சதுர அடி பரப்பளவில் 23 கட்டடங்கள் 339 கோடி செலவில் புனரமைக்கப்பட்டு இருக்கிறது. இந்த திட்டத்திற்காக 300 பேரின் சொத்துக்கள் கையகப்படுத்தப்பட்டு, 1400 கடைக்காரர்கள், வீட்டின் உரிமையாளர்களுக்கு மாற்று இடம் வழங்கப்பட்டதாகவும், 40 பழைமையான கோவில்கள் இந்த புனரமைப்பு திட்டத்தின் போது கண்டுபிடிக்கப்பட்டு பழமை மாறாமல் புதுப்பிக்கப்பட்டதாகவும் பிரதமர் அலுவலகம் தெரிவித்துள்ளது. ஜனவரி மாத முதல் வாரத்தில் தேர்தல் அறிவிக்கப்பட்டு விடும் என்பதால் உத்தரப்பிரதேசத்தை மையப்படுத்தி திட்டங்கள் தொடங்கப்பட்டும் வருகிறது என்கிறார்கள் அரசியல் பார்வையாளர்கள். குறிப்பாக பிரதமரின் தொகுதியான வாரணாசியில் அதிகப்படியான திட்டங்கள் தொடக்கப்பட்டு வருகிறது. கிழக்கு உத்தரப்பிரதேச பகுதியில் அமைந்துள்ள பூர்வாஞ்சல் பகுதியை குறிவைத்து பிரதமர் மோடி தொடங்கி, மத்திய அமைச்சர்கள், முதல்வர் யோகி வரை அதிகப்படியான கூட்டங்கள், திட்டங்களை அறிவித்து வருகிறார்கள். பூர்வாஞ்சல் பகுதியில் அதிக தொகுதியை கைப்பற்றுவதன் மூலம் ஆட்சியை கைப்பற்றி விடலாம் என்ற கணக்கு அம்மாநில அரசியல் வட்டாரத்தில் பேச்சு இருக்கிறது. காசியில் பிரதமர் மோடி 28 மாவட்டங்கள் கொண்ட பூர்வாஞ்சல் பகுதியில், 156 சட்டமன்ற தொகுதிகள் இருக்கிறது. 2017 -ம் ஆண்டு தேர்தலில் 106 இடங்களை பாஜக கைப்பற்றியது, 2012 ஆம் ஆண்டு சமாஜ்வாதி 85 இடங்களையும், 2007 -ம் ஆண்டு பகுஜன் சமாஜ் 70 இடங்களை கைப்பற்றி கடந்த காலங்களில் ஆட்சியை பிடித்தனர். 2017 தேர்தலின் போது கிழக்கு உ.பி-யில் அதிகப்படியான இடங்கள் பாஜக கைப்பற்ற காரணமாக இருந்தது ஓம் பிரகாஷ் ராஜ்பரின் சுஹேல்தேவ் பாரதிய சமாஜ் கட்சி. ஆனால் தற்போது சுஹேல்தேவ் பாரதிய சமாஜ் கட்சி உள்ளிட்ட முக்கிய கட்சிகள் சமாஜ்வாதி கட்சியுடன் கூட்டணி அமைத்து தேர்தலை சந்திக்கிறது. Also Read: Tamil News Today: புனரமைக்கப்பட்ட காசி விஸ்வநாதர் கோயில் வளாகத்தைத் திறந்துவைத்தார் பிரதமர் மோடி! இந்த பூர்வாஞ்சல் பகுதியில் ராஜ்பர் சமூக வாக்குகள் 18 முதல் 20 சதவீதம் வரை இருப்பதால் வாரணாசி, கோரக்பூர் மற்றும் அசம்கர் உட்பட 125 தொகுதிகளில் வெற்றி வாய்ப்பை தீர்மானிப்பவர்களாக இருக்கிறார்கள். 2017-ம் ஆண்டு தேர்தலில் 4 இடங்களை மட்டுமே வெற்றி பெற்ற ஓம் பிரகாஷ் ராஜ்பருக்கு மாநில அமைச்சரவையில் அமைச்சர் பதவியை பாஜக வழங்கி இருந்தது குறிப்பிடத்தக்கது. ஒரு பக்கம் பாஜக பூர்வாஞ்சலை குறித்து வைத்து வேலை செய்து வரும் நிலையில் மறுபக்கம் பாஜக, பகுஜன் சமாஜ் கட்சியிலிருந்து எம்எல்ஏ மற்றும் முக்கிய தலைவர்களை சமாஜ்வாதி தங்கள் பக்கம் இழுத்து வருகிறது. பகுஜன் சமாஜ் கட்சியின் எம்.எல்.ஏ வினய் ஷங்கர் திவாரி மற்றும் முன்னாள் எம்.பி குஷால் திவாரி சமாஜ்வாதி கட்சிக்கு தாவியுள்ளனர். அதே போல பாஜக முக்கிய தலைவர்களாக பார்க்கப்படும் முக்தார் அன்சாரி மற்றும் ஹரி சங்கர் திவாய் ஆகியரை அகிலேஷ் யாதவ் தரப்பு தங்கள் பக்கம் கொண்டுவந்துள்ளது. இது தவிர ஆளும் பாஜகவின் 9 எம்எல்ஏ-கள் கட்சி தாவயிருப்பதாகவும் கூறப்படுகிறது.காசியில் பிரதமர் மோடி காசி கோவிலை சுற்றி 2022 சட்டமன்ற தேர்தல் கணக்குகள் ஒரு புறம் இருக்க, மறுபுறம் 2015 ஆம் ஆண்டு அகிலேஷ் யாதவ் தலைமையிலான சமாஜ்வாதி ஆட்சியில் இருந்த காலகட்டத்தில் காசி விஸ்வநாதர் கோவிலை புனரமைக்க அமைச்சரை முடிவு செய்து நிதி ஒதுக்கீடு செய்ததாக அகிலேஷ் யாதவ் தெரிவித்துள்ளார். கோவிலை சுற்றி பல தலைமுறைகளாக வாழ்ந்து வரும் ஆர்எஸ்எஸ் மற்றும் பாஜகவினரே புனரமைப்பு பணிக்காக கட்டடங்கள் இடிக்கப்படுவதற்கு 2019 முதல் எதிர்ப்பு தெரிவித்து இருக்கிறார்கள். புனரமைப்பு பணியின் போது பல கோவில்கள் சிலைகள் இடிக்கப்பட்டதாகவும் அங்கு வாழும் மக்கள் குற்றம் சாட்டுகிறார்கள்.காசியில் பிரதமர் மோடி ஆனால் அங்குள்ள அதிகாரிகள் தரப்பு அதை மறுத்துள்ளது.17,18,19 ஆம் நூற்றாண்டுகளில் கட்டப்பட்ட 3 முதல் 5 அடுக்கு கட்டடங்கள் இடிக்கப்பட்டதாகவும் பல தலைமுறைகளாக வாழ்ந்தவர்கள் தற்போது மாற்று இடம் கொடுக்கப்பட்டு வெளியேற்றப்பட்டதாகவும் கூறப்படுகிறது. காசி கோவிலுக்கு 100 மீட்டரில் இருந்த 200 ஆண்டு பழமைவாய்ந்த மாணவர் விடுதியும் இடிக்கப்பட்டு இருக்கிறது. சமஸ்கிருதம் கற்று கொள்ள காசி வரும் மாணவர்கள் இங்கு தங்கி பயிற்சி பெற்று வந்திருக்கிறார்கள். முன்பு இது காசி கோவில் தலைமை குருக்கள் மேற்பார்வையில் நிர்வகிக்கப்பட்டு வந்திருக்கிறது. 1983 ஆம் ஆண்டு அரசின் கட்டுப்பாட்டில் வருவதற்கு முன்னதாக இறுதியாக தலைமை குருக்களாக இருந்த ராஜேந்திர திவாரி இந்த புனரமைப்பு பணிகளுக்கு எதிர்ப்பு தெரிவித்து இருக்கிறார். காசி கோவில் புனரமைப்பு பணிகள் மேற்க்கொள்ள இருப்பதாக 2019 -ல் பணி தொடங்கியதும் கோவிலுக்கு பத்து மீட்டர் தொலைவில் அமைந்துள்ள ஞானவாபி மசூதி குறித்து பேச்சுக்கள் வந்து சென்றதும் அரசியலில் கவனிக்கப்பட்டது. காசியில் பிரதமர் மோடி காசி விஸ்வநாதர் கோவில் புனரமைப்பு, அதை ஒட்டிய நிகழ்ச்சிகள் பிரதமர் மோடியின் பயணம் பாஜகவின் வாக்கு வங்கி அரசியலுக்கு நிச்சயம் உதவும் என பாஜக நம்புகிறது , அந்த அரசியல் கணக்கை முறியடிக்கும் வேலையை சமாஜ்வாதி கட்சி தொடங்கி விட்டது. ``என்னை பொறுத்தவரை மக்களே எனது தெய்வங்கள்" என பிரதமர் மோடியின் பேச்சு தேர்தலில் எடுபடுமா என்பதை பொறுத்து இருந்து தான் பார்க்க வேண்டும்! Also Read: காசி மாநகர் அற்புதங்கள்: 600 கோடி செலவில் 239 ஆண்டுகளுக்குப் பின் மிளிரும் விஸ்வநாதர் ஆலய வளாகம்!
http://dlvr.it/SFL4KV

போலீஸாரின் கண்ணை உறுத்திய கண்ணாடி; ஏ.சி வசதியுடன் ரகசிய அறை! -பீர்பாரிலிருந்து 17 பெண்கள் மீட்பு

மும்பையில் 1990-களில் டான்ஸ் பீர் பார்கள் பிரபலமாக விளங்கியது. இந்த டான்ஸ் பார்கள் கிரிமினல்களின் கூடாரமாக விளங்கியது. இதையடுத்து மகாராஷ்டிரா அரசு டான்ஸ் பார்களுக்கு தடை விதித்தது. ஆனாலும் அத்தடையை மீறி மும்பையில் ஆங்காங்கே சட்டவிரோதமாக டான்ஸ் பார்கள் செயல்பட்டுக் கொண்டுதான் இருக்கிறது. தற்போது பீர் பார்களில் பெண்கள் சப்ளையர்களாகவும், பாடல் பாடுபவர்களாகவும் பணியாற்ற அனுமதிக்கப்பட்டுள்ளது. ஆனால் இதனை பயன்படுத்தி பார் நிர்வாகம் பெண்களை டான்ஸ் ஆட வைக்கிறது. மும்பை அந்தேரியில் உள்ள தீபா பாரில் பெண்கள் சட்டவிரோதமாக நடனமாட வைக்கப்படுவதாக போலீஸாருக்கு தகவல் கிடைத்தது. ரகசிய அறை உடனே இரவு 11.30 மணிக்கு போலீஸார் அந்த பாரில் அதிரடி ரெய்டு நடத்தினர். இந்த ரெய்டில் பெண்கள் யாரும் பாரில் இருந்ததாக தெரியவில்லை. ஆனால் போலீஸாருக்கு நம்பத்தகுந்த தகவல்கள் கிடைத்திருந்தது. இதனால் பெண்களை மறைத்து வைக்க பயன்படும் சமையல் அறை, பாத்ரூம், பொருட்களை வைக்கும் ரூம், அலங்கார அறைகளில் சோதனை நடத்தினர். ஆனால் பெண்கள் யாரும் இல்லை. போலீஸார் பார் ஊழியர்களிடம் விசாரணை நடத்தியதில் பெண்கள் யாரும் இல்லை என்று தொடர்ந்து கூறிக்கொண்டிருந்தனர். ஆனாலும் போலீஸாருக்கு சந்தேகம் போகவில்லை. விடிய விடிய விசாரணை நடத்தினர். காலையில் அலங்கார அறை உட்பட அனைத்து அறையிலும் மீண்டும் சோதனை நடத்தினர். இதில் அலங்கார அறையில் பிரம்மாண்ட கண்ணாடி ஒன்று இருந்தது. அதன் மீது போலீஸாருக்கு சந்தேகம் ஏற்பட்டது. அக்கண்ணாடியை அகற்ற முயன்ற போது முடியவில்லை. இதனால் கண்ணாடியை சுத்தியலால் போலீஸார் உடைத்தனர். உள்ளே மிகவும் சிறிய ஸ்விட்ச் ஒன்று இருந்தது. அதனை ஆன் செய்த போது சிறிய கதவு திறந்தது. உள்ளே மிகவும் சிறிய குகை போன்ற ஒரு அறை இருந்தது. அந்த அறைக்குள் இருந்து ஈசல் போன்று பெண்கள் ஒவ்வொருவராக வெளியில் வர ஆரம்பித்தனர். கைது ரகசிய அறைக்கு செல்ல ரிமோட் கண்ட்ரோல் பயன்படுத்தி இருந்தது கண்டுபிடிக்கப்பட்டது. அந்த ரிமோட் கண்ட்ரோல் யாரிடம் இருக்கிறது என்பது குறித்து போலீஸார் விசாரணை நடத்தி வருகின்றனர். ரகசிய அறையில் இருந்த 17 பெண்கள் மீட்கப்பட்டனர். அந்த ரகசிய அறையில் குளிர்சாதன வசதி, உணவு பொருட்கள், காற்றோட்ட வசதி, படுக்கை வசதி போன்றவை இருந்தது. 15 மணி நேரத்திற்கு பிறகு இப்பெண்கள் ரகசிய அறையில் இருந்து வெளியில் எடுக்கப்பட்டனர். பெண்களை உள்ளே அனுப்பினால் அவர்கள் பல மணி நேரம் எந்த வித பிரச்னையும் இல்லாமல் இருக்கவேண்டும் என்பதற்காக இந்த வசதிகள் செய்யப்பட்டு இருந்ததாக போலீஸார் தெரிவித்தனர். பார் மேலாளர் உட்பட மொத்தம் 20 பேர் பிடிபட்டுள்ளனர். பாருக்கு சீல் வைக்கப்பட்டு விசாரிக்கப்பட்டு வருகிறது.
http://dlvr.it/SFKcHq

‘மிஸ் யூனிவர்ஸ்’ ஹர்னாஸ் சாந்து அணிந்திருந்த ஆடையை வடிவமைத்த திருநங்கை

நடப்பு ஆண்டுக்கான ‘மிஸ் யூனிவர்ஸ்’ பட்டத்தை வென்று அசத்தியுள்ளார் இந்தியாவின் ஹர்னாஸ் சாந்து. இதன் மூலம் லாரா தத்தகாவுக்கு பிறகு சுமார் 21 ஆண்டுகள் கழித்து இந்திய அழகி ஒருவர் மிஸ் யூனிவர்ஸ் பட்டத்தை வென்று அசத்தியுள்ளார். இந்த நிலையில் இந்த ‘மிஸ் யூனிவர்ஸ்’ போட்டியில் அவர் அணிந்திருந்த ‘தகதகவென’ மின்னும் வகையிலான அந்த கவுனை வடிவமைத்தது சாயிஷா ஷிண்டே என்ற திருநங்கை என தெரியவந்துள்ளது. ஆடை வடிவமைப்பாளரான சாயிஷா வடிவமைத்த ஆடையை அணிந்திருந்த ஹர்னாஸ், அழகு பதுமை போலவே காட்சி அளித்தார் என்பதை மறுக்க முடியாது. ஹர்னாஸின் உடலை அணைத்தபடி இருந்த அந்த ஆடை ‘V’ நெக் (கழுத்து) வடிவில் அசத்தலாக இருந்தது. அதோடு அந்த கவுன் மிக நீளமாக இருக்கும் வகையில் நேர்த்தியாக வடிவமைத்திருந்தார் சாயிஷா. அந்த கவுனுடன் கல் வைத்த தொங்கும் வகையிலான கம்மல், பார்ப்பதற்கு ஈரப்பசையுடன் இருக்கும் வகையிலான Dewy பேஸ் மேக்-அப், அதில் அவரது கன்னங்களுக்கு மட்டுமே பிங்க் நிறத்தில் பிளஷ் கொடுக்கப்பட்டு இருந்தது. மேலும் நியூட் லிப்ஸ்டிக் ஷேட் மற்றும் கண்களுக்கு போல்டான் மேக்-அப் செய்து இறுதிப் போட்டியில் பங்கேற்றிருந்தார். சாயிஷா, பாலிவுட் நடிகைகள் கரீனா கபூர், ஷ்ரத்தா கபூர் மற்றும் அனுஷ்கா ஷர்மாவுக்கு ஸ்டைலிஸ்டாக உள்ளார். பேஷன் என்ற படத்தில் காஸ்ட்யூம் டிசைனராககவும் பணியாற்றி உள்ளார்.
http://dlvr.it/SFHbJf

வாரணாசி கங்கையில் பிரதமர் மோடி புனித நீராடி வழிபாடு

உத்தரப் பிரதேசம் மாநிலம் காசியில் உள்ள கங்கையாற்றில் பிரதமர் மோடி புனித நீராடினார். இரண்டு நாள் பயணமாக தனது சொந்த தொகுதியான வாரணாசிக்கு பிரதமர் நரேந்திர மோடி சென்றடைந்தார். அவரை அம்மாநில ஆளுநர் ஆனந்தி பென் படேல், மற்றும் முதலமைச்சர் யோகி ஆதித்யநாத் ஆகியோர் வரவேற்றனர். தொடர்ந்து, அங்கிருக்கும் கால பைரவர் கோயிலில் சிறப்பு வழிபாடு நடத்தி பிரதமர் மோடி, அங்கிருந்து இரண்டடுக்கு படகில் பயணம் மேற்கொண்டார். #WATCH | PM Narendra Modi offers prayers, takes a holy dip in Ganga river in VaranasiThe PM is scheduled to visit Kashi Vishwanath Temple and inaugurate the Kashi Vishwanath Corridor project later today(Video: DD) pic.twitter.com/esu5Y6EFEg — ANI UP (@ANINewsUP) December 13, 2021 தொடர்ச்சியாக தற்போது, உலகப்புகழ்பெற்ற காசி விஸ்வநாதன் ஆலயத்திற்கு வருகை தந்த மோடி, புன்னிய நதியான காசி நதியில் புனித நீராடி வழிபாடு நடத்தினார். தொடர்ந்து காசி விஸ்வாநாதர் கோயிலுக்குச் சென்று சிறப்பு வழிபாடுகளை நடத்த உள்ளார். இதில் உத்தரப் பிரதேச மாநில முதலைமச்சர் யோகி ஆதித்யநாத் கலந்துகொள்ள உள்ளார். 339 கோடி மதிப்பில் புதிதாக புனரமைக்கபட்டுள்ள காசி விஸ்வநாதர் கோயில் வளாகத்தை பிரதமர் மோடி திறந்து வைக்க உள்ளார்.
http://dlvr.it/SFH0sr

லாட்ஜில் தங்கிய பெண் தலை துண்டித்துக் கொலை - ஆண் நண்பருக்கு போலீஸ் வலை!

மகாராஷ்டிரா மாநிலம் மும்பை அருகிலிருக்கிறது மாதேரன் மலைப்பகுதி. சுற்றுலாத் தலமான மாதேரனுக்கு தினமும் ஆயிரக்கணக்கான மக்கள் வந்து செல்கின்றனர். இதனால் ஏராளமான தங்கும் விடுதிகளும் இந்த மலைப்பகுதியில் இயங்கி வருகின்றன. இந்த நிலையில், அங்கிருக்கும் விடுதி ஒன்றுக்கு பூனம் பால் (30) என்ற பெண், தன் நண்பருடன் வந்து தங்கியிருந்திருக்கிறார். மறுநாள் காலை லாட்ஜ் ஊழியர், பூனம் தங்கியிருந்த அறைக்குச் சென்றபோது பூனம் கொலை செய்யப்பட்டு தலையில்லாமல் நிர்வாணமாகக் கிடந்தார். உடனே லாட்ஜ் உரிமையாளர் இது குறித்து போலீஸாருக்குத் தகவல் கொடுத்தார். போலீஸார் விரைந்து வந்து உடலை மீட்டு பிரேத பரிசோதனைக்கு அனுப்பி வைத்தனர். கொலைசெய்யப்பட்ட பெண் கொலையாளி கொலை செய்யப்பட்ட பெண்ணின் அடையாளத்தை மறைப்பதற்காக அவரின் தலை, ஆடைகள் மற்றும் உடைமைகளை எடுத்து சென்று விட்டதாகக் கூறப்படுகிறது. இது குறித்து இந்த வழக்கை விசாரிக்கும் போலீஸ் அதிகாரி கூறுகையில், ``கொலை செய்யப்பட்ட பெண்ணும் அவருடன் வந்தவரும் முகக்கவசம் அணிந்திருந்ததால் அவர்களை அடையாளம் காணமுடியவில்லை. ஆனால் அவர்கள் இருவரின் முகம் வேறு ஒரு இடத்தில் பொருத்தப்பட்டிருந்த கண்காணிப்பு கேமராவில் பதிவாகி இருக்கிறது. குற்றவாளி பெண்ணின் அடையாளத்தை மறைக்கத் தலையை வெட்டி எடுத்துச் சென்றுவிட்டான். குற்றவாளியையும், கொலை செய்யப்பட்ட பெண்ணின் தலையையும் கண்டுபிடிப்பதற்காக 5 தனிப்படைகள் அமைக்கப்பட்டிருக்கின்றன. மூன்று படைகள் மும்பை போலீஸாருடன் இணைந்து குற்றவாளியைத் தேடி வருகின்றனர். இரண்டு தனிப்படையினர் மாதேரன் மலைப்பகுதியில் கொலை செய்யப்பட்ட பெண்ணின் தலையைத் தேடி வருகின்றனர். கொலை நடந்த இடத்திலிருந்து பேக் ஒன்று பறிமுதல் செய்யப்பட்டிருக்கிறது. இரண்டு பேரும் லாட்ஜில் தங்குவதற்கு ஆதார் கார்டு போன்ற முகவரி ஆவணங்கள் எதையும் கொடுக்கவில்லை என்று தெரிவித்திருக்கிறார். தொடர்ந்து தீவிரமாக விசாரணை மேற்கொண்டு வருகிறோம்" என்றார். Also Read: `விவாகரத்தான பெண்கள் தான் டார்கெட்!' - மும்பை பெண்ணை ஏமாற்றி பணம் பறித்த நபர் கைது!
http://dlvr.it/SFGR1P

'இந்தியா இந்துக்களின் நாடு, இந்துத்வவாதிகளுக்கான நாடு அல்ல' - ராகுல் காந்தி

இந்திய அரசியலில் தற்போது இந்து, இந்துத்வவாதி என்ற இரு வார்த்தைகளுக்கு இடையே தான் போட்டி ஏற்பட்டிருப்பதாக காங்கிரஸ் எம்.பி. ராகுல் காந்தி தெரிவித்துள்ளார். ராஜஸ்தான் மாநிலம் ஜெய்ப்பூரில் நடந்த கட்சியின் மாநாட்டில் பங்கேற்று பேசிய ராகுல் காந்தி, இந்து, இந்துத்வவாதி என்ற இரு சொற்களும் வெவ்வேறான அர்த்தம் கொண்டவை என குறிப்பிட்டார். தான் இந்து என்றும், ஆனால், இந்துத்வவாதி அல்ல என்றும் பேசினார். மகாத்மா காந்தி இந்து, ஆனால் அவரை சுட்ட கோட்சே இந்துத்வவாதி. அதிகாரத்தில் நீடிக்க வேண்டும் என்ற தேடலிலேயே இந்துத்வவாதி தனது முழு வாழ்நாளையும் செலவிடுவதாகவும், அதிகாரத்தை தவிர, வேறு எதன் மீதும் அவர்களுக்கு பற்று இல்லை என்றும் கூறினார். இந்தியா இந்துக்களின் நாடு, ஆனால், இந்துத்வவாதிகளுக்கான நாடு அல்ல. அதிகாரத்தை மட்டுமே விரும்பும் இந்துத்வவாதிகளை ஆட்சியில் இருந்து அகற்றிவிட்டு, இந்துக்களை மக்கள் அமர வைக்க வேண்டும் என்று கேட்டுக் கொண்டார். யாரையும் அச்சுறுத்தாமல், அனைத்து மதத்தினருக்கும் உரிய மரியாதை தருபவரே உண்மையான இந்து என்றும் ராகுல் பேசினார். பிரதமர் நரேந்திர மோடி விவசாயிகளின் நெஞ்சில் குத்தாமல் முதுகில் குத்தியிருக்கிறார். அதற்கு காரணம் அவர் ஒரு இந்துத்வவாதி. கடந்த 7 ஆண்டுகளாக நான்கு தொழிலதிபர்களுடன் கைகோர்த்து பிரதமர் மோடி இந்த தேசத்தை பாழாக்கிவிட்டார் என்றும் ராகுல்காந்தி குற்றம்சாட்டினார். இதையும் படிக்க: முடிவுக்கு வந்த விவசாயிகள் போராட்டம்: ஏழை மக்களுக்கு பசி தீர்க்க போவது யார்?
http://dlvr.it/SFG0Sw

கோவையில் ஹெலிகாப்டர் விபத்தை கொண்டாடியதாக அவதூறு! - கேரள ஊடகம் மீது போலீஸில் புகார்

குன்னூர் ஹெலிகாப்டர் விபத்தில், முப்படை தளபதி பிபின் ராவத் உள்ளிட்ட 13 பேர் உயிரிழந்தனர். இந்நிலையில் பிபின் ராவத் மரணத்தை கோவை பீளமேடு பகுதியில் உள்ள இஸ்லாமிய இளைஞர்கள் கொண்டாடுகின்றனர் என்று சமூகவலைதளங்களில் ஓர் வீடியோ உலாவிக் கொண்டிருந்தது.வைரல் வீடியோ Also Read: ஹெலிகாப்டர் விபத்துகள்... அனுபவங்களைப் பகிரும் முன்னாள் அதிகாரிகள்! அந்த வீடியோவில், இளைஞர்கள் டி.ஜே ஆடுவது போல இருந்தது. இதை கேரளாவில் உள்ள ஓர் இணையதள ஊடகம் செய்தியாகவும் வெளியிட்டிருந்தது. ஆனால், அந்த வீடியோ ஓர் கல்லூரி நிகழ்ச்சியில் எடுக்கப்பட்டது என்று தகவல் வெளியாகியுள்ளது. இதுகுறித்து கோவை நேரு கல்வி நிறுவனம் வெளியிட்டுள்ள செய்தி குறிப்பில், “சமூக வலைதளங்களில் எங்கள் கல்லூரியின் பெயர் மற்றும் மாணவர்கள் குறித்து தவறான தகவல் பரப்பப்பட்டு வருகிறது. அஞ்சலி அது எங்கள் கல்லூரியில் புதிய மாணவர்களை வரவேற்க நடந்த நிகழ்ச்சியில் எடுக்கப்பட்ட வீடியோ. அதுவும், சம்பவம் நடப்பதற்கு ஒரு நாளுக்கு முன்பு எடுக்கப்பட்டதாகும். முப்படை தலைமை தளபதி பிபின் ராவத் உள்ளிட்டோருக்கு, டிசம்பர் 9-ம் தேதி எங்கள் கல்லூரியில் அஞ்சலி செலுத்தியிருக்கிறோம். எங்கள் கல்வி நிறுவனத்தின், நிறுவனர் தாஸ் விமானப்படையில் பணியாற்றி ஓய்வு பெற்றவர். அப்படி இருக்கும்போது, இதுபோன்ற தவறான தகவல்கள் எங்களை காயப்படுத்துகிறது.அஞ்சலி தவறான தகவல்களை பரப்புவோர் மீது சட்டப்படி நடவடிக்கை எடுக்கப்படும்.” என்றனர். மேலும், அந்த கேரள இணையதள ஊடகம் மீது, கல்லூரி நிர்வாகம் சார்பில் போலீஸில் புகாரும் அளிக்கப்பட்டுள்ளது.
http://dlvr.it/SFG0Ll

வேதா இல்லத்தை வாங்குகிறதா அதிமுக? - செல்லூர் ராஜூ பதில்

“மறைந்த முதல்வர் ஜெயலலிதாவின் வேதா இல்லத்தை தீபா, தீபக் தாமாக முன்வந்து நினைவிடமாக மாற்ற அனுமதி அளித்தால் அவர்கள் வரலாற்றில் நிற்பார்கள்” என்று முன்னாள் அமைச்சர் செல்லூர் ராஜு மதுரையில் பேட்டியளித்துள்ளார். மதுரை பெத்தானியபுரத்தில் இலவச மருத்துவ சிகிச்சை முகாமொன்றை முன்னாள் அமைச்சர் செல்லூர் ராஜூ இன்று துவக்கி வைத்து பார்வையிட்டார். அதன்பின் செய்தியாளர்களிடம் பேசிய அவர், “மறைந்த முதல்வர் ஜெயலலிதாவின் வேதா இல்ல விவகாரத்தில் அதிமுக சார்பாக மேல் முறையீடு செய்வோம். கட்சியின் நிதியை பயன்படுத்தி அந்த இடத்தை வாங்குவது குறித்து கட்சியின் தலைமை தான் முடிவு செய்யவேண்டும். ஜெயலலிதா, வாழ்ந்து மறைந்த இடம் அதுதான். அதேபோல அந்த இல்லத்தில் வைத்துதான் அவரை உலகத் தலைவர்கள் அனைவரும், முக்கிய பிரமுகர்கள் பலரும் சந்தித்தனர். எனவே அந்த இடத்தை நினைவு இல்லமாக மாற்றினால், அங்கு வந்து இல்லத்தைச் சுற்றி பார்க்க இந்தியா மட்டுமல்லாமல் உலகளவில் சுற்றுலா பயணிகள் வருவர். இதை கருத்தில் கொண்டு, ஜெயலலிதா அவர்களின் உறவினர் தீபா - தீபகிற்கு நான் வேண்டுகோளொன்றை வைக்க விரும்புகிறேன். அது, அவர்களாக முன்வந்து வேதா இல்லத்தை நினைவு இல்லமாக மாற்ற அனுமதி அளிக்க வேண்டும். அப்படி அவர்கள் செய்தால், வரலாறு அவர்களைப் பற்றி பேசும். அவர்கள் வரலாற்றில் நிலைத்து இருப்பார்கள். வேதா இல்லம் தவிர, மற்ற இடங்களை இருவரும் பயன்படுத்திக் கொள்ளட்டும். அதில் எங்களுக்கு மாற்றுக் கருத்து இல்லை” என்றார். தொடர்ந்து அவரிடம் மதுரை உயர்நீதிமன்றத்தின் ‘தமிழக முதல்வரை பாராட்டாவிட்டாலும் விமர்சனம் செய்ய வேண்டாம்’ என்று கருத்து குறித்து கேட்டதற்கு, “நீதிபதியின் கருத்துக்கு நான் கருத்து கூற விரும்பவில்லை. ஆனால், சமீபத்தில் பெய்த பெருமழையால் உணவில்லாமல் துன்பப்பட்ட மக்களை சந்தித்த பின் நீதியரசர் இந்தக் கருத்தைக் கூறியிருக்கலாம்” எனக்கூறினார் அவர். தொடர்புடைய செய்தி: "எவ்வளவு முடியுமோ அதை விட அதிகமாகவே முதல்வர் வேலை பார்க்கிறார்”- உயர்நீதிமன்ற மதுரை கிளை இதேபோல ‘குன்னூர் ஹெலிகாப்டர் விபத்தில் தமிழ்நாடு அரசு சிறப்பாக செயல்பட்டதாக முதல்வருக்கு விமானப்படை பாராட்டு தெரிவித்தது’ குறித்த கேள்விக்கும் "தமிழக முதல்வரை பாராட்டினால் நல்லது தான். ஆனால், அவர் மெத்தனமாகவே செயல்படுகிறார். மக்களுக்கு கொடுத்த வாக்குறுதிகளை நிறைவேற்றவில்லை” எனக்கூறி குற்றம் சாட்டினர்.
http://dlvr.it/SFDPhW

இன்ஸ்டாகிராம் நண்பரைத் தேடி சுவீடனிலிருந்து மும்பை வந்த சிறுமி; இண்டர்போல் தகவல் மூலம் மீட்பு!

சுவீடன் நாட்டை சேர்ந்த 16 வயது சிறுமி ஒருவர் கடந்த நவம்பர் 17-ம் தேதி காணாமல் போய்விட்டார். இது குறித்து அந்தச் சிறுமியின் தந்தை போலீஸில் புகார் செய்திருந்தார். போலீஸார் நடத்திய விசாரணையில் சிறுமி அதிக நேரம் இன்ஸ்டாகிராம் பயன்படுத்தியதுதெரியவந்ததால், அவர் இன்ஸ்டாங்க்ராம் நண்பர்களின் பட்டியலை அலசியிருக்கின்றனர். அப்போது, அந்தச் சிறுமி மும்பையைச் சேர்ந்த இளைஞர் ஒருவரிடம் அதிக நேரம் சாட்டிங் செய்தது தெரியவந்தது. அதையடுத்து, அவர் மும்பைக்குச் சென்றிருக்கலாம் என்று போலீஸாருக்கு சந்தேகம் எழுந்தது. அதனடிப்படையில், போலீஸார் இண்டர்போல் மஞ்சள் நோட்டீஸ் வெளியிடப்பட்டது. இது குறித்து மும்பை போலீஸாருக்கு தகவல் கிடைத்தது. சுவீடன் நாட்டு போலீஸார் அளித்த தகவல்களின் அடிப்படையில், காணாமல் போன சிறுமியின் இன்ஸ்டாகிராம் கணக்கிலிருந்து அவரின் மும்பை நண்பர் பற்றிய தகவல்களைச் சேகரித்தனர். சைபர் பிரிவு போலீஸார் தீவிர விசாரணை நடத்தி அந்தச் சிறுமியின் இன்ஸ்டாகிராம் நண்பரைக் கண்டுபிடித்தனர்.மீட்கப்பட்ட சிறுமியுடன் போலீஸார் அவரிடம் விசாரணை நடத்தியதில், சிறுமி மும்பை சீத்தாகேம்ப் பகுதியிலிருப்பது தெரியவந்தது. உடனே போலீஸார் விரைந்து செயல்பட்டு அந்தச் சிறுமியை மீட்டு குழந்தைகள் காப்பகத்தில் ஒப்படைத்தனர். அதோடு இது குறித்து டெல்லியிலிருக்கும் சுவீடன்நாட்டுத் தூதரகத்துக்கும் தகவல் கொடுக்கப்பட்டது. சுவீடன் போலீஸார் உடனே ஸ்வீடனில் தன் மகளைக் காணவில்லை என்று புகார் கொடுத்திருந்த தந்தைக்குத் தகவல் கொடுத்தனர். சிறுமியின் தந்தை உடனே மும்பைக்கு விரைந்து வந்தார். மும்பை போலீஸார் வழக்கமான நடைமுறைகளை முடித்த பிறகு சிறுமியை அவர் தந்தையிடம் ஒப்படைத்தனர். இது குறித்து மும்பை குற்றப்பிரிவு இணை போலீஸ் கமிஷனர் மிலிந்த் பராம்பே கூறுகையில், ``சிறுமி காணவில்லை என்று எங்களுக்கு டிசம்பர் 7-ம் தேதி தகவல் கிடைத்தது. உடனே போலீஸ் அதிகாரி மங்கள் சிங் சவான் தலைமையில் தனிப்படை அமைக்கப்பட்டது. முதலில் சிறுமியின் இன்ஸ்டாகிராம் நண்பரைக் கண்டுபிடித்து அதன் மூலம் சிறுமியை மீட்டோம். சிறுமி எப்படி மும்பைக்கு வந்தார் என்று மர்மமாக இருக்கிறது. கடத்தி வரப்பட்டாரா அல்லது ஆசை வார்த்தை கூறி வரவழைக்கப்பட்டாரா என்பது குறித்து அவரின் இன்ஸ்டாகிராம் நண்பரிடம் விசாரித்து வருகிறோம்" என்று தெரிவித்தார்.
http://dlvr.it/SFD3NF

மாஸ்.. ஸ்டைல் தவிர ரஜினியிடம் கவனிக்கப்படாத ஒன்று - காதலும்.. ரஜினியும்..ஏன் ஸ்பெஷல்?

'என்னமோ பேசணும்னு சொன்னீங்க?' என ரஜினி ஆரம்பிப்பார். அதை எப்படி சொல்வது என தெரியாமல் குழப்பத்திலிருக்கும் ஸ்ரீதேவி, மெதுவாக பேசத்தொடங்குவார். 'சுத்தி வளைச்சு பேசத்தெரியாது' என தொடங்கி தன் காதலை வெளிப்படுத்திவிடுவார். 'இத நான் எதிர்பார்க்கல' என அவரது புரோபசலை நிராகரித்துவிடுவார் ரஜினி. உடனே அர்ச்சனா(ஸ்ரீதேவி) கண்களில் கண்ணீர் வந்ததும், அவரை ரஜினி சமாதானம் செய்யும் காட்சிகள் அவ்வளவு அழகாக இருக்கும். ஒரு குழந்தையைப்போல ஸ்ரீதேவியை ஆற்றுப்படுத்துவார். தொடக்கத்திலிருந்த அந்த கறார் முகம் கரைந்து, 'உங்கள நான் மனைவியா ஏத்துக்குறேன்' என குழையும் அந்த காட்சிக்கு இழையும் பசையை பின்னிருந்து ஒட்டியிருப்பார் இளையராஜா..அந்த படம் தான் மகேந்திரன் இயக்கிய ஜானி. உண்மையில் ரஜினிக்கு மாஸ், ஸ்டைல் மட்டுமல்ல ரொமான்டிக்கும் அழகாகவே வரும்! இரண்டு கரும்பு ஜூஸ் க்ளாஸ்களை எடுத்துக்கொண்டு நடந்துவருவார். தடுமாறி ஒரு க்ளாஸிலிருக்கும் கரும்பு ஜூஸ் சிந்திவிடும். சிந்திய க்ளாஸை ஸ்ரீதேவி கேட்கும்போது, அதை கொடுக்க மறுத்து செல்லமாக நடக்கும் போராட்டத்தில் காருக்குள் வைத்திருக்கும் கேமிராவின் வழியே காதல் வழியும். 'நீ வெறும் காதலோட பேசு..மத்தத நான் பாத்துக்குறேன்' என சார்பட்ட பட டெம்ப்ளேட் போல, இளையராஜா இசைக்க டையலாக்கின் வெற்றிடத்தை ரஜினியின் பாவனைகள் நிரப்பும். ஜானி படத்தின் அந்த மாண்டேஜ் காதல் காட்சிகள் யாவும் ஸ்ரீதேவிக்கு டஃப் கொடுத்திருப்பார் ரஜினி. ஸ்ரீதேவிக்கும் ரஜினிக்குமான கெமிஸ்ட்ரி கச்சிதமாக பொருந்தி போகும்.. ஜானி ரஜினியின் காதல் சப்ஜக்ட்டுகளின் மாஸ்டர் பீஸ்! அதேபோல புதுக்கவிதை படத்தில் ரஜினியின் காதல் காட்சிகள் ரசிகர்களுக்கான திரை விருந்து. மீண்டும் தன் பழைய காதலியை சந்திக்கும் காட்சி அது. தன் அண்ணன் குழந்தையை அழைத்துவர பள்ளிக்குச் செல்லும் ரஜினி ஸ்டன்னாகி நிற்பார். படியின் மேலிருந்து ஜோதி அதிர்ச்சியுடன் பார்த்துக்கொண்டிருப்பார். இருவருக்கும் இடையே உள்ள தூரத்தை காதல் கவ்விக்கொள்ளும். ஜோதி ஒவ்வொரு படியாக இறங்க 'வெள்ளைப்புறா ஒன்று' பாடலின் ஹம்மிங் ஒலிக்க அந்த சீன் முழுவதுமே காதல் வழியும். தொடர்ந்து வரும் சீன்களில் ரஜினியும் ஜோதியும் பேசும் உரையாடல்கள், க்ளோசப் ஷாட்களில் முதல் காதலின் நினைவுகளை தேக்கிவைத்த ஆணை அப்படியே உருவகப்படுத்தியிருப்பார். பிரேக் அப் காட்சிகளில் பிச்சி உதறியிருப்பார். தளபதி படத்தில் வரும் அந்த காட்சி க்ளாஸிக்!. 'நானா உன் பின்னாடி சுத்துனேன்.. நானா உன்ன பார்த்து பிடிச்சிருக்குன்னு சொன்னே..நானா உன் தோள்ல சாஞ்சு அழுதேன்.. போடி..போ' என சொல்லி முடித்ததும் ஷோபானா அந்த இடத்தை விட்டு நகர, அத்தனை வலியையும் 15 செகண்டில் கடத்தியிருப்பார் ரஜினி. அந்த காட்சியில் சந்தோஷ் சிவனின் கேமிராவும், இளையராஜாவின் வயலினும், புல்லாங்குழலும், ரஜினியின் நடிப்பும் போட்டி போட்டு ஒன்னுக்கு ஒன்னு சலச்சதில்ல என்பதை நிருபித்திருக்கும். அந்த காதல் காட்சி ரஜினி எனும் மாஸ் ஹீரோவிலிருந்த காதலனை வடிக்கட்டியிருக்கும். ரஜினி ஒரு காதல் மெட்டிரியல். அந்த மெட்டிரியலை சரியாக பயன்படுத்திய இயக்குநர்கள் மிகசிலரே.. அப்படியாக அண்மையில் ரொமான்டிக் ரஜினியை திரையில் பார்த்தது காலா படத்தில் தான்! இருள் சூழ்ந்த வீட்டுக்குள் ஹீமா குரேஷி அமர்ந்திருப்பார். குடும்பத்தாரை பயமுறுத்த நுழையும் ரஜினி பயந்து நிற்பார். உண்மையில் பழைய காதல் பயமுறுத்தக்கூடியது தானே!.. பிரதீப் வாய்ஸ் ஒலிக்க, ரஜினிக்கும், ஹீமாவுக்குமான க்ளோசப் நீண்ட நாட்கள் கழித்து ரஜினியின் காதல் முகத்தை வெளிப்படுத்தியது. 'எப்போ வந்த.. ஏதாவது சாப்டியா?' என அதிர்ச்சியில் திணறி பேசும் ரஜினி வெகுவாக ரசிக்கவைத்திருப்பார். படம் முழுவதுமே இழையோடும் காதல் ரஜினி ஒரு ரொமான்டிக் ஹீரோவாவே நடிக்கலாம் என தோன்ற வைக்கும்.. மழைக்கும் மண்வாசத்துக்குமான உறவைப்போல காதல்காட்சிக்கும் ரஜினிக்குமான கனெக்ஷன் வேறலெவலில் இருக்கும். பேட்ட, தர்பார், சிவாஜி போல மேலோட்டமான காதல்காட்சிகளைக்கடந்து, ஆழமான காதலுக்குள் பொருத்தி ரஜினியை முழுக்க முழுக்க ஒரு ஸ்டைலுடன் கூடிய காதல் ரஜினியை திரைவிருந்தாக்க இயக்குநர்கள் முன்வருவார்களா? என்பது அவரது பிறந்த நாளில் ரசிகர்கள் வைக்கும் கோரிக்கை. ஹாப்பி பர்த்டே காதல் நாயகன் ரஜினி! -கலிலுல்லா
http://dlvr.it/SFCkf0

தங்கத்துக்காக வெட்டப்பட்ட சுரங்கங்களில் சிக்கும் யானைகள்: கூடலூர் வனத்தில் நடப்பது என்ன?

மண்ணுக்கடியில் தங்கத்தை தேடும் மனிதர்களின் வேட்டை ஒருபுறம். சுரங்கக்குழிகளில் சிக்கி அலைப்புறும் யானைகள் மறுபுறம். நீலகிரி மாவட்டம் கூடலூர் வனப்பகுதியில் நடப்பது என்ன? புதிய தலைமுறையின் பிரத்யேக பயணத்தின் பதிவை பார்க்கலாம். இதையும் படிக்க: காற்று மாசினை கட்டுப்படுத்த நடவடிக்கை எடுக்காத ஆன்லைன் வர்த்தக நிறுவனங்கள்: SOMO ஆய்வு
http://dlvr.it/SFCRjC

`நானும், எனது மனைவியும் மதம் மாறுகிறோம்!' - இயக்குநர் அலி அக்பர் முடிவுக்கு என்ன காரணம்?

மலையாள சினிமாவின் பிரபல இயக்குநராக இருப்பவர் அலி அக்பர். இஸ்லாமிய மதத்தை பின்பற்றிவந்தவர், சமீபத்தில் முகநூலில் ஒரு வீடியோ ஒன்றை பதிவிட்டிருந்தார். அந்த வீடியோவில் பேசிய அலி அக்பர், "எனது ஜென்மத்தில் எனக்கு கிடைத்த சட்டையை நான் இன்று கழற்றி எறிகிறேன். அது இந்தியாவுக்கு எதிராக ஆயிரக்கணக்கான சிரிக்கும் இமோஜிகள் பதிவிட்ட மோசமானவர்களுக்கான எனது பதில் இது. இன்றுமுதல் நானும், எனது குடும்பமும் முஸ்லீம் இல்லை. நாங்கள் தீர்மானித்துவிட்டோம். அந்த மதத்தை இன்றுமுதல் நாங்கள் விட்டுவிட்டோம். இமோஜி பதிவிட்டதற்கு அமைதிகாத்த முஸ்லிம்களின் மதத்தை நான் விட்டுவிட்டேன்" என ஆவேசமாக பேசியிருந்தார்.வீடியோவில் ஆவேசமாக பேசும் அலி அக்பர் முப்படை தளபதி பிபின் ராவத் குன்னூர் ஹெலிகாப்டர் விபத்தில் இறந்த சம்பவம் குறித்து அலி அக்பரின் பதிவுக்கு கீழே சிரிக்கும் இமோஜ்களை பலர் பதிவிட்டதால் அவர் மதம் மாறுவதாக ஃபேஸ்புக் லைவில் அறிவித்திருந்தார். அலி அக்பரின் செயல் கேரளத்தில் அதிர்வலையை ஏற்படுத்தியது. இதற்கிடையே அலி அக்பர் இந்து மதத்துக்கு மாறியதுடன் தனது பெயரை ராம் சிங்கம் என மாற்றிக்கொண்டதாக சமூக வலைத்தளங்களில் தகவல் பரவியது. இதுகுறித்து மீடியாக்களிடம் பேசிய அலி அக்பர், "தண்ணீரில் முழுவதும் விஷம் கலந்துவிட்டதால் சுவாசிக்க முடியாத அவஸ்தையில்தான் மதம் மாறும் முடிவை எடுத்தேன். இனி அதில் இருப்பதில் அர்த்தம் இல்லை என உணர்ந்துகொண்டேன். இதில் சமூக சீர்திருத்தம் செய்ய முடியும் என்ற நம்பிக்கை எனக்கு இல்லை. இந்த நிலையில்தான் நானும் என் மனைவியும் மதம்மாற முடிவு செய்தோம்.மலையாள சினிமா இயக்குநர் அலி அக்பர் இன்னும் புதிய பெயரை நாங்கள் முடிவு செய்யவில்லை. இப்போது நானும் மனைவியும் மட்டும்தான் மதம் மாறியுள்ளோம். எங்கள் பிள்ளைகள் வளந்தபிறகு, அவர்கள் சுயமாக முடிவு செய்யட்டும் என விட்டுவிட்டோம். நாங்கள் மதம் மாறியதில் எந்த அரசியலும் இல்லை. முஸ்லிமாக இருந்தால் எந்த சலுகையும் பா.ஜ.க-வில் இருந்து கிடைக்காது என நான் மதம் மாறியதாக கூறுவது தவறானது. அப்படியானால் நான் முஸ்லிம் லீக்-க்கு அல்லவா சென்றிருக்க வேண்டும்" எனக்கூறினார் அலி அக்பர்.
http://dlvr.it/SFB1DJ

ம.பி: காவல்நிலையத்துக்குள் குட்காவை துப்பிய 4 போலீசார் கைது

மத்திய பிரதேசத்தில் காவல்நிலைய வளாகத்துக்குள் குட்காவை துப்பிய போலீசார் 4 பேர் கைது செய்யப்பட்டுள்ளனர். மத்திய பிரதேசம் மாநிலம் ஷாஹ்தோல் காவல் நிலைய வளாகத்துக்குள் போலீசார் 4 பேர் குட்காவை மென்று துப்பிய குற்றத்திற்காக கைது செய்யப்பட்டுள்ளனர். இதுகுறித்து ஷாஹ்தோல் கூடுதல் காவல் கண்காணிப்பாளர் முகேஷ் வைஷ்யா கூறுகையில், எஸ்.ஐ நந்தகுமார் கச்வாஹா, கூடுதல் எஸ்.ஐ தினேஷ் விவேதி, ஏ.எஸ்.ஐ தேவேந்திர சிங் மற்றும் தலைமை காவலர் பியாரே லால் ஆகிய நான்கு பேரும் காவல்நிலைய வளாகத்துக்குள் குட்காவை மென்று துப்பிய குற்றத்திற்காக கைது செய்யப்பட்டுள்ளனர். காவல் நிலைய வளாகத்தில் ஒழுக்கமின்மை மற்றும் அசுத்தத்தை பரப்பிய குற்றத்திற்காக அவர்கள் கைதுசெய்யப்பட்டுள்ளனர். இதுகுறித்து மேலும் விசாரணை நடத்தப்பட்டு வருகிறது’’ என கூறினார். சேலம் பல்கலைக்கழகத்திற்கு ரூ. 5 கோடி சேவை வரி: உயர் நீதிமன்றம் தடை
http://dlvr.it/SF9dT7

உத்தரப்பிரதேசம்: `பெண்கள், இளைஞர்கள் டார்கெட்’ - வாக்குறுதிகளில் கவனம் ஈர்க்கிறாரா பிரியங்கா காந்தி?

உத்தரப்பிரதேச மாநில சட்டப்பேரவைத் தேர்தல் 2022-ம் ஆண்டு தொடக்கத்தில் நடைபெற உள்ளது. பா.ஜ.க.விடம் இருந்து ஆட்சியைக் கைப்பற்றக் காங்கிரஸ் கட்சி சார்பில் அதன் பொதுச் செயலாளரும், அம்மாநிலப் பொறுப்பாளருமான பிரியங்கா காந்தி மிகத் தீவிரமாகச் செயல்பட்டுவருகிறார். சமாஜ்வாதி, பகுஜன் சமாஜ், ஆம் ஆத்மி உள்ளிட்ட பல்வேறு கட்சிகளும் உத்தரப்பிரதேசத் தேர்தலை ஒட்டி பல்வேறு திட்டங்களை வகுத்துச் செயல்பட்டு வருகின்றன. “உத்தரப்பிரதேச மாநிலத்தில் உள்ள 403 சட்டசபைத் தொகுதிகளிலும் காங்கிரஸ் கட்சி போட்டியிடும். அதற்குக் கட்சி தயாராகவே இருக்கிறது. உத்தரப்பிரதேசத் தேர்தல் பா.ஜ.க.வுக்கு எதிராகக் காங்கிரஸ் கட்சிதான் களத்தில் போராடுகிறது. எனவே, போட்டி நமக்கும் அவர்களுக்கும்தான்” என்பது தொடங்கி, பிரதமர் மோடி, உத்தரப்பிரதேச முதல்வர் யோகி ஆதித்யநாத் என அனைத்து பா.ஜ.க தலைவர்களையும் அவர்களின் திட்டங்களையும் கடுமையாக விமர்சித்து வருகிறார்.பிரியங்கா காந்தி - யோகி ஆதித்யநாத் எதிர்க்கட்சியினரை விமர்சிப்பதோடு மட்டுமல்லாமல் உத்தரப்பிரதேசத்தில் செயல்படுத்த உள்ள திட்டங்களையும் தேர்தல் வாக்குறுதிகளாக அளித்து வருகிறார். பிரியங்கா காந்தி. இவரின் தேர்தல் அறிக்கைகள் இந்தத் தேர்தலில் அவர்களுக்குப் பலனளிக்குமா? அதில் பிரியங்கா காந்தி தேறிவிட்டாரா என்பது பற்றி ஓர் அலசல்... Also Read: பெண் வாக்காளர்களை ஈர்க்கும் பிரியங்கா காந்தி! - உ.பி-யில் காங்கிரஸ் கொடி பறக்குமா?! சுயமரியாதை, தன்னம்பிக்கை, கல்வி, மரியாதை, பாதுகாப்பு, சுகாதாரம் ஆகிய ஆறு முக்கிய அம்சங்களைப் பெண்களுக்குப் பெற்றுத்தரும் வகையில் உத்தரப் பிரதேச மாநிலத்துக்கான தேர்தல் அறிக்கையை வெளியிட்டிருக்கிறார் காங்கிரஸ் பொதுச் செயலாளர் பிரியங்கா காந்தி. இவற்றில் “பெண்களுக்கு 50 சதவிகித பணி வாய்ப்புகளை வழங்கும் நிறுவனங்களுக்கு வரிச் சலுகைகள், 50 சதவிகித ரேஷன் கடைகள் பெண்களால் நடத்தப்படும், 4 சதவிகித வட்டியில் சுய உதவிக் குழுக்கள் மூலம் பெண்களுக்குக் கடன், மாநிலப் பேருந்துகளில் பெண்களுக்கு இலவசப் பயணம், பெண்கள் பெயரில் உள்ள இணைப்புகளுக்கு ஒவ்வோர் ஆண்டும் மூன்று கேஸ் சிலிண்டர்கள் இலவசம் எனப் பெண்களின் பொருளாதார சுதந்திரத்தை மேம்படுத்தும் வகையில் முக்கிய அறிவிப்புகளும் இதில் அடங்கியுள்ளன.பிரியங்கா காந்தி பிரசாரம் தேர்தலில் 40 சதவிகித இடங்கள் பெண்கள் போட்டியிடுவதற்காக ஒதுக்கப்படும், 12-ம் வகுப்பு முடித்த மாணவிகளுக்கு இலவச ஸ்மார்ட்போன்கள், பட்டம் முடித்த மாணவிகளுக்கு இலவச ஸ்கூட்டர் எனப் பெண்களைச் சுற்றியே பல்வேறு வாக்குறுதிகளை அளித்திருக்கிறார் பிரியங்கா காந்தி. உத்தரப்பிரதேசத்தில் உள்ள ஒவ்வொரு மாவட்டத்திலும் தொழில் மையங்கள் ஏற்படுத்தப்படும், 20 லட்சம் பேருக்கு வேலை வாய்ப்புகள் உருவாக்கித் தரப்படும், உத்தரப் பிரதேச அரசு ஆஷா சகோதரிகள் மீது நடத்தும் ஒவ்வொரு தாக்குதலும், அவர்கள் செய்த பணியை அவமதிக்கும் செயலாகும். எனது ஆஷா சகோதரிகள் கொரோனா வைரஸ் காலங்களிலும், பிற சந்தர்ப்பங்களிலும் தங்கள் சேவைகளை விடாமுயற்சியுடன் வழங்கியுள்ளனர். கவுரவம் அவர்களின் உரிமை. அவர்கள் சொல்வதைக் கேட்பது அரசின் கடமை. ஆஷா சகோதரிகளுக்கு உரிய மரியாதை வழங்க வேண்டும். ஆஷா சகோதரிகளின் கவுரவ உரிமை மற்றும் அவர்களின் மரியாதைக்குக் காங்கிரஸ் கட்சி உறுதி ஏற்கும். காங்கிரஸ் ஆட்சி அமைத்ததும், ஆஷா மற்றும் அங்கன்வாடி பணியாளர்களுக்கு மாதம் 10,000 ரூபாய் கவுரவ ஊதியமாக வழங்கப்படும் எனவும் அறிவித்துள்ளார்.பிரசாரத்தில் பிரியங்கா காந்தி மேலும், “கரும்பு விவசாயிகளின் கடன்களைத் தள்ளுபடி செய்ய 4,000 கோடி ரூபாய் இருந்தாலே போதும். ஆனால், மத்திய பா.ஜ.க அர்சு மோடியின் விமானத்துக்காக 8,000 கோடி ரூபாயும் நாடாளுமன்றத்தை அழகுபடுத்த 20,000 கோடி ரூபாயும் செலவிடுகிறார்கள்” என மத்திய, மாநில பா.ஜ.க அரசுகளின் ஒவ்வொரு நடவடிக்கைகளையும் மக்களின் பிரச்னைகளோடு பொருத்திப் பேசி வருகிறார். பொதுக்கூட்டங்களில் பேசும் பிரியங்கா காந்தி “பெண்கள் அரசியலில் ஈடுபட வேண்டும். தங்களுக்கு எதிரான வன்முறைகள், ஒடுக்குமுறைகளை முறியடிக்கும் வகையில் அவர்கள் பலம் பெற வேண்டும். எங்களின் தேர்தல் அறிக்கையின் மூலம் பெண்களுக்கு முக்கியத்துவம் வழங்க வேண்டும் என்ற கட்டாயத்திற்கு மற்ற அரசியல் கட்சியினரும் தள்ளப்படுவர். பெண்கள் மற்றும் வளர்ச்சி குறித்து இனி யார் என்ன அறிவிப்புகள் வெளியிட்டாலும் அவையெல்லாவற்றுக்கும் வித்திட்டது காங்கிரஸாகத்தான் இருக்கும்.” எனவும் பேசி வருகிறார். மற்றெந்த தேர்தலைவிட உத்தரப்பிரதேசத்தேர்தலில் இந்த முறை காங்கிரஸ் கட்சி கூடுதல் கவனம் செலுத்தி வருகிறது. இப்போது பல கட்ட பொதுக்கூட்டங்களை நடத்தித் தேர்தல் பரப்புரையில் ஈடுபடத் தொடங்கிவிட்டது. 1989-ல் நடந்த தேர்தலுக்குப் பிறகு தனிப்பெரும்பான்மையுடன் உத்தரப்பிரதேசத்தில் ஆட்சி அமைக்கும் வாய்ப்பை காங்கிரஸ் பெறவில்லை. இந்த சூழலில் அம்மாநில காங்கிரஸிற்குப் பிரியங்கா மூலம் புது ரத்தம் பாய்ச்சி, இழந்த செல்வாக்கை மீட்பதற்கான அனைத்து நடவடிக்கைகளையும் எடுத்து வருகிறது காங்கிரஸ்.காங்கிரஸ் தேர்தல் பிரசார கூட்டம் உத்தரப்பிரதேசத்தில் காங்கிரஸ் அளித்துள்ள வாக்குறுதிகள் எல்லாம் பெண்கள், இளைஞர்களை மையமிட்டு, மாநில வளர்ச்சியை நோக்கியதாக இருக்குமாறு வடிவமைத்துள்ளது. காங்கிரஸின் இந்த முயற்சிகளுக்கு எந்தளவுக்குப் பலன் இருந்தது என்பதைத் தேர்தல் முடிவுகள்தான் சொல்ல வேண்டும். உத்தரப்பிரதேசம் யாருக்கு என்பதைப் பொறுத்திருந்து பார்க்கலாம்..!
http://dlvr.it/SF9Gvt

மும்பையில் இரு தினங்களுக்கு 144 தடை உத்தரவு: ஒமைக்ரான் கொரோனா பரவலை தடுக்க நடவடிக்கை!

உலகையே அச்சுறுத்திக்கொண்டிருக்கும் ஒமைக்ரான் கொரோனா மகாராஷ்டிராவிலும் பரவி வருகிறது. நாட்டில் வேறு எந்த மாநிலத்திலும் இல்லாத அளவுக்கு மகாராஷ்டிராவில் ஒமைக்ரான் தொற்று அதிகமாக இருக்கிறது. ஆப்பிரிக்க நாடுகளில் இருந்து மும்பை வந்த ஆயிரக்கணக்கானோர் கண்டுபிடிக்க முடியாத அளவுக்கு தலைமறைவாக இருக்கின்றனர் என்கிற அதிர்ச்சி தகவல்களும் வெளியாகியுள்ளது. அவர்கள் மூலம் ஒமைக்ரான் கொரோனா பரவும் அபாயம் இருக்கிறது. மகாராஷ்டிராவில் இதுவரை 17 பேருக்கு ஒமைக்ரான் பரவி இருக்கிறது. ஒரே நாளில் 3 வயது குழந்தை உட்பட 7 பேருக்கு ஒமைக்ரான் தொற்று பரவி இருக்கிறது. மும்பையில் மூன்று பேருக்கும், புனேயில் 4 பேருக்கும் இத்தொற்று பரவியிருக்கிறது. மும்பையில் ஒமைக்ரான் தொற்று பரவிய மூன்று பேரில் இரண்டு பேர் ஆப்பிரிக்க நாடுகளில் இருந்து வந்தவர்கள் ஆவர். இதையடுத்து தொற்று மேற்கொண்டு பரவாமல் இருக்க மும்பையில் இரண்டு நாட்களுக்கு 144 தடை உத்தரவு பிறப்பிக்கப்பட்டுள்ளது. கொரோனா வார்டில் டாக்டர்கள் சனி மற்றும் ஞயிற்றுக்கிழமைகளில் மும்பையில் பொதுக்கூட்டம், பேரணி போன்றவை நடத்த தடை விதிக்கப்படுவதாக அரசு தெரிவித்துள்ளது. ஏற்கனவே கொரோனா தொற்றின் இரண்டாவது அலையின் போதும் மகாராஷ்டிராதான் மிகவும் மோசமாக பாதிக்கப்பட்டது. தற்போது ஒமைக்ரான் கொரோனா தொற்றும் மகாராஷ்டிராவில் வேகமாக பரவ ஆரம்பித்துள்ளது. நாடு முழுவதும் 32 பேருக்கு ஒமைக்ரான் கொரோனா தொற்று பரவியிருக்கிறது. இதில் 17 பேர் மகாராஷ்டிராவை சேர்ந்தவர்களாக இருக்கின்றனர். எனவே புதிய கட்டுப்பாடுகளை கொண்டு வருவது குறித்து அரசு பரிசீலித்து வருகிறது. வரும் 15-ம் தேதியிலிருந்து மகாராஷ்டிராவில் ஒன்று முதல் 7-ம் வகுப்பு வரை பள்ளிகளை திறக்க மகாராஷ்டிரா அரசு திட்டமிட்டு இருந்தது. தற்போது புதிய தொற்று காரணமாக அரசு பள்ளிகளை திறக்கும் முடிவை மறுபரிசீலனை செய்து வருகிறது.
http://dlvr.it/SF8xmq

4 ஆண்டுகளுக்கு பின்னர் தீபா, தீபக்கால் திறக்கப்பட்ட ஜெயலலிதாவின் போயஸ் கார்டன் வேதா இல்லம்

முன்னாள் முதலமைச்சர் ஜெயலலிதாவின் போயஸ் கார்டன் வேதா இல்லம் நான்கு வருடங்களுக்கு பிறகு அவரது வாரிசுகளாக அறிவிக்கப்பட்டுள்ள தீபா மற்றும் தீபக் ஆகியோரால் திறக்கப்பட்டுள்ளது. சென்னை மாவட்ட ஆட்சியர் சாவியை ஒப்படைத்து நிலையில் தீபா மற்றும் தீபக் ஆகியோர் வீட்டை திறந்தனர். மறைந்த முதல்வர் ஜெயலலிதா வாழ்ந்த போயஸ் தோட்ட இல்லமான வேதா நிலையம் நினைவு இல்லமாக மாற்றப்படும் என முந்தைய அதிமுக அரசு அறிவித்திருந்தது. அதை செயல்படுத்தும் விதமாக சட்டம் இயற்றப்பட்டு, வேதா நிலையத்தையும் அங்குள்ள அசையும் சொத்துக்களையும் அரசுடமையாக்கப்பட்டது. இந்த சட்டத்தை எதிர்த்து ஜெயலலிதாவின் வாரிசுகளான தீபா, தீபக் ஆகிய இருவரும் சென்னை உயர் நீதிமன்றத்தில் வழக்கு தொடர்ந்திருந்தனர். அதேபோல, வேதா நிலையத்துக்கு 67 கோடியே 90 லட்சம் ரூபாயை இழப்பீடாக நிர்ணயித்து பிறப்பிக்கப்பட்ட உத்தரவை எதிர்த்தும் வழக்கு தொடரப்பட்டிருந்தது. இந்த வழக்குகள் அனைத்தையும் நீதிபதி சேஷசாயி விசாரித்தார். அப்போது, தீபா மற்றும் தீபக் தரப்பில் தனிநபர் சொத்துக்களை கையகப்படுத்துவது தொடர்பாக சட்டம் இயற்ற அரசுக்கு அதிகாரமில்லை எனவும், வேதா நிலையத்தை அரசுடமையாக்கி பிறப்பித்த சட்டத்தை செல்லாது என அறிவிக்க வேண்டும் எனவும், நினைவில்லமாக மாற்ற தடை விதிக்க வேண்டும் எனவும் வாதிடப்பட்டது. வாரிசுகளாக அறிவிக்கப்பட்ட தங்களிடம் ஆலோசிக்காமல் நிலம் கையகப்படுத்தப்பட்டதை, வீட்டிற்கு 67 கோடியே 90 லட்ச ரூபாய் அளவிற்கு இழப்பீடு நிர்ணயித்து, அந்த தொகையை சென்னை மாவட்ட நீதிமன்றத்தில் நிலம் கையகபடுத்துதல் அதிகாரி செலுத்தியது தவறு எனவும் தீபா, தீபக் தரப்பில் வாதங்கள் முன்வைக்கப்பட்டன. ஜெயலலிதா வாழ்ந்த இடத்தை புனிதமாக கருதி முறையாக பராமரிக்க திட்டமிட்டிருந்த நிலையில், தங்களின் கருத்துகளை கேட்காமல் நிலம் கையகப்படுத்தபட்டுள்ளதாகவும், முறையாக மதிப்பீடு செய்யாமல் 68 கோடி ரூபாய் என இழப்பீடு நிர்ணயிக்கப்பட்டுள்ளதாகவும் குற்றம்சாட்டப்பட்டது. தமிழக அரசு தரப்பில், வேதா நிலையத்தை கையகப்படுத்தும் முன்பே அனைத்து தரப்பு கருத்துக்களையும் கேட்டறிந்ததாகவும், பெண்களுக்கு முன்னுதாரணமாக திகழ்ந்த ஜெயலலிதா வாழ்ந்த வேதா நிலையத்தை அரசு கையகப்படுத்தி நினைவு இல்லமாக மாற்ற நடவடிக்கை எடுத்ததாகவும் தெரிவிக்கப்பட்டது. அரசியல் ரீதியாகவும், தனிப்பட்ட விதத்திலும் பல்வேறு பிரச்சினைகளை ஜெயலலிதா எதிர்கொண்டபோது தீபா, தீபக் ஆகியோர் உறுதுணையாக இல்லை எனவும், ஒருவர் குடியிருந்த வீட்டை நினைவில்லமாக மாற்ற சுற்றுச்சூழல் சான்றிதழ் எதுவும் தேவையில்லை எனவும் தெரிவிக்கப்பட்டது. அனைத்து தரப்பு வாதங்களும் முடிவடைந்த நிலையில் தீர்ப்பு வழங்கிய நீதிபதி, வேதா நிலையத்தை அரசுடமையாக்கி பிறப்பிக்கப்பட்ட சட்டத்தை செல்லாது என உத்தரவிட்டார். மேலும், 3 வாரத்துக்குள் வேதா நிலையத்தை வாரிசு தாரர்களான தீபா மற்றும் தீபக்கிடம் ஒப்படைக்க வேண்டும் எனவும், கீழமை நீதிமன்றத்தில் அரசு செலுத்திய ரூ.67.95கோடி இழப்பீடு தொகையை அரசு திரும்ப பெற்றுக்கொள்ள வேண்டும் எனவும் வரி பாக்கியை வசூலிப்பதற்கான நடவடிக்கையை வருமான வரித்துறை மேற்கொள்ளலாம் என நீதிபதி உத்தரவிட்டார். இதனைத் தொடர்ந்து வேதா இல்லத்தின் சாவியை ஒப்படைக்க வேண்டும் என்று தீபா மற்றும் தீபக் சார்பில் சென்னை மாவட்ட ஆட்சியர் விஜயாராணியிடம், சென்னை உயர்நீதிமன்ற உத்தரவின் நகலை இணைத்து மனு அளித்தனர். அதைத் தொடர்ந்து இன்று மதியம் ஒரு மணிக்கு சென்னை மாவட்ட ஆட்சியர் அலுவலகம் சார்பில் தீபக் மற்றும் தீபத்திற்கு வேதா நிலையம் இல்லத்தின் சாவி ஒப்படைக்கப்பட்டது. இதனைத் தொடர்ந்து வருவாய் வட்டாட்சியர் முன்னிலையில் 2 30 மணியளவில் போயஸ் கார்டன் இல்லம் திறக்கப்பட்டது. இதனைப்படிக்க...“பனிமூட்டத்திற்குள் சென்ற அடுத்த நொடியே...”- ஹெலிகாப்டர் விபத்தை வீடியோ எடுத்தவர் பேட்டி
http://dlvr.it/SF8gvq

விடை பெற்றார் வீரத் திருமகன் பிபின் ராவத்: 17 சுற்றுகள் குண்டுகள் முழங்க உடல் தகனம்

முப்படை தலைமை தளபதி பிபின் ராவத் மற்றும் அவரது மனைவியின் உடல்கள் 17 சுற்று குண்டுகள் முழங்க முழு ராணுவ மரியாதையுடன் தகனம் செய்யப்பட்டது. டிசம்பர் 8ஆம் தேதி குன்னூர் அருகே விமானப்படை ஹெலிகாப்டர் விபத்தில் முப்படைகளின் தலைமை தளபதி பிபின் ராவத் மற்றும் அவரது மனைவி உட்பட 13 பேர் உயிரிழந்தனர். டெல்லி கொண்டு செல்லப்பட்ட வீரர்களின் உடல்கள் இன்று அடக்கம் செய்யப்பட்டது. தலைமை தளபதி பிபின் ராவத் மற்றும் அவரது மனைவி மதுலிகாஆகியோரது உடல்கள் காமராஜ் மார்க் வழியாக டெல்லி கன்டோன்மென்ட் மயானத்திற்கு எடுத்துச் செல்லப்பட்டது. அங்கு இசைக்கருவிகளுடன் வீரர்கள் அணிவகுத்து நின்றனர். அப்போது வந்தே மாதரம் என முழக்கமிட்டு மக்கள் அஞ்சலி செலுத்தினர். பிபின் ராவத்தின் சொந்த மாநிலமான உத்தராகண்டில் இருந்து பலர் வருகை தந்தனர். பிபின் ராவத் மற்றும் அவரது மனைவி உடல்களுக்கு மலர் வளையம் வைத்து ராணுவ அஞ்சலி செலுத்தப்பட்டது. பிரிட்டன், பிரான்ஸ் தூதர்கள், இலங்கை, பூடான், நேபாளம் மற்று வங்கதேச ராணுவ தளபதிகள் இறுதி அஞ்சலி செலுத்தினர். பாதுகாப்புத்துறை அமைச்சர் ராஜ்நாத் சிங் அஞ்சலி செலுத்தியபின் வாத்தியங்கள் முழங்க இதய அஞ்சலியும், தொடர்ந்து மவுன அஞ்சலியும் செலுத்தப்பட்டது. பின்னர் ராவத்தின் மகள்கள் மற்றும் குடும்பத்தினர் பிபின் ராவத் மற்றும் மதுலிகாவின் உடலுக்கு இறுதி மரியாதை செலுத்தினர். பின்னர் உடல்கள் தகன மேடைக்கு கொண்டுசெல்லப்பட்டு அங்கு தேசியக்கொடி போர்த்தி மரியாதை செய்யப்பட்டது. பிபின் ராவத்தின் உடல்மீது போர்த்தப்பட்டிருந்த தேசியக்கொடி அவரது மகள்களிடம் ஒப்படைக்கப்பட்டது. பிபின் ராவத் மற்றும் அவரது மனைவின் உடல்கள் ஒரே தகன மேடையில் வைக்கப்பட்டது. பிபின் ராவத் மகள்கள் இறுதிச்சடங்கு செய்தனர். அதன்பின்னர் 17 சுற்று குண்டுகள் முழங்க 800 ராணுவ வீரர்களின் மரியாதையுடன் தகனம் செய்யப்பட்டது.
http://dlvr.it/SF73H0

``கே.ஒய்.சி அப்டேட் பண்ணனும் லிங்க்கை கிளிக் பண்ணுங்க!" - வினோத் காம்ப்ளியிடம் ரூ.1.14 லட்சம் மோசடி!

ஆன்லைன் மோசடிகள் நாளுக்கு நாள் அதிகரித்துக்கொண்டே வருகின்றன. நன்றாகப் படித்தவர்கள் கூட ஆன்லைன் மோசடிப்பேர்வழிகளின் பேச்சில் மயங்கிவிடுகின்றனர். அது போன்ற ஒரு மோசடிதான் முன்னாள் கிரிக்கெட் வீரர் வினோத் காம்ப்ளிக்கும் நடந்திருக்கிறது. மும்பை பாந்த்ராவில் வசிக்கும் வினோத் காம்ப்ளியை மர்ம நபர் ஒருவர் போனில் தொடர்பு கொண்டு பேசியிருக்கிறார். அவர் தான் வினோத் காம்ப்ளி கணக்கு வைத்திருக்கும் வங்கியின் அதிகாரி என்று தன்னை அறிமுகம் செய்து கொண்டார். உங்கள் கே.ஒய்.சி (KYC) விவரங்களை புதுப்பிக்கவேண்டும் என்று கூறிய அந்த நபர், தான் அனுப்பும் லிங்க்கை கிளிக் செய்து விவரங்களை புதுப்பிக்கும் படி கேட்டுக்கொண்டார்.வினோத் காம்ப்ளி வினோத் காம்ப்ளியும் வங்கி அதிகாரிதான் பேசுகிறார் என்று நினைத்துக்கொண்டு, மர்ம நபர் அனுப்பிய லிங்க்கை கிளிக் செய்தார். பின்னர், வினோத் காம்ப்ளி லிங்க்கை கிளிக் செய்த சிறிது நேரத்தில் அவரது வங்கிக்கணக்கிலிருந்து ரூ.1.14 லட்சம் எடுக்கப்பட்டுவிட்டதாக அவருக்கு குறுந்தகவல் வந்திருக்கிறது. அதையடுத்து, வினோத் இது குறித்து உடனே தன் வங்கியின் வாடிக்கையாளர் சேவை மையத்துக்கு தொடர்பு கொண்டு தெரிவித்திருக்கிறார். அதைக் கேட்டு அதிர்ச்சியடைந்த வங்கி அதிகாரிகள், மேற்கொண்டு மோசடி நடக்காமல் தடுத்தனர். அதைத் தொடர்ந்து, வினோத் காம்ப்ளி சைபர் பிரிவு போலீஸில் உடனே புகார் செய்தார். இது குறித்து வினோத் காம்ப்ளி கூறுகையில், ``ஆன்லைன் மோசடிகள் அதிகரித்து வருவது மிகவும் துரதிஷ்டவசமானது. என் பணம் திரும்ப கிடைத்துவிட்டது. ஆனால், இந்த ஆன்லைன் மோசடியால் பாதிக்கப்பட்ட பலர் குற்றவாளி யார் என்பதையே கண்டுபிடிக்க முடியாமல் இருக்கின்றனர். போலீஸார் எனக்கு பணம் திரும்ப கிடைக்க முழு உதவி செய்தனர். ஆன்லைன் மோசடிகள் குறித்து பொது மக்களிடம் விழிப்புணர்வை ஏற்படுத்தவேண்டும்" என்றார்.ஆன்லைன் மோசடி கிரிக்கெட் வீரர் சச்சின் தெண்டுல்கரின் நண்பரான வினோத் காம்ப்ளி மட்டுமல்லாது, பல முக்கிய பிரமுகர்கள் ஆன்லைன் மோசடி பேர்வழிகளிடம் பணத்தை இழந்திருக்கின்றனர். முன் பின் தெரியாதவர்கள் கேட்கும்போது 'ஒ.டி.பி' எண்களை கொடுக்ககூடாது என்றும், லிங்குகைளை கிளிக் செய்யக்கூடாது என்றும் போலீஸார் தெரிவித்தனர். மேலும், மர்ம நபர்கள் அனுப்பும் லிங்க்கோடு சேர்த்து போனை தங்கள் கட்டுப்பாட்டுக்கு கொண்டுவரும் ஆப்பையும் சேர்த்து அனுப்பிவிடுகின்றனர். அதன் மூலம் லிங்க் கிளிக் செய்யப்பட்டவுடன் போனை தங்கள் கட்டுப்பாட்டில் எடுத்து, அதிலிருக்கும் விவரங்களை கொண்டு பணத்தை எடுத்துவிடுகின்றனர் என்றனர். Also Read: டிஜிட்டல் திருட்டு: ஆன்லைன் ஆஃபரால் ₹89,000-ஐ இழந்த நபர்; என்ன நடந்தது?
http://dlvr.it/SF6SmP

நரிக்குறவர்கள் இறக்கிவிடப்பட்ட விவகாரம்: பேருந்து ஓட்டுநர், நடத்துநர் தற்காலிக பணி நீக்கம்

அரசு பேருந்தில் பயணித்த நரிக்குறவர் குடும்பத்தினரை பாதிவழியில் இறக்கிவிட்ட ஓட்டுனர், நடத்துனர் சஸ்பெண்ட் செய்யப்பட்டுள்ளனர். நாகர்கோவில் பேருந்து நிலையத்தில் நாள்தோறும், நரிக்குறவர் சமூகத்தை சேர்ந்த மக்கள் பயணிப்பது வழக்கம். அதன்படி, நாகர்கோவிலில் இருந்து நெல்லைக்கு புறப்பட்ட பேருந்தில் சிறுவன் உட்பட 3 பேர் கொண்ட நரிக்குறவர் குடும்பத்தினர் பயணித்துள்ளனர். அப்போது, பேருந்தின் நடத்துனர் அவர்களை வலுக்கட்டாயமாக பேருந்தில் இருந்து பாதி வழியில் இறக்கி விட்டுள்ளார். முன்னதாக, மீனவ பெண்மணியை பேருந்தில் ஏற்ற மறுத்த சம்பவம் பெரும் சர்ச்சை ஏற்படுத்திய நிலையில், தற்போது வெளியாகி உள்ள வீடியோ மீண்டும் அதிர்ச்சியை ஏற்படுத்தியது. இந்த நிலையில் நரிக்குறவர் சமூகத்தை சேர்ந்தவர்களை பேருந்தில் இருந்து இறக்கிவிட்ட ஓட்டுனர் மற்றும் நடத்துனரை தற்காலிக பணி நீக்கம் செய்து நடவடிக்கை எடுக்கப்பட்டுள்ளது. இதுகுறித்து தமிழ்நாடு அரசு போக்குவரத்து கழகத்தின் நாகர்கோவில் மண்டல பொதுமேலாளர் வெளியிட்ட அறிவிப்பில் கூறியிருப்பதாவது:- ''தமிழ்நாடு அரசு போக்குவரத்துக் கழகம் நாகர்கோவில் மண்டலம் திருவட்டார் கிளை பேருந்து எண் TN74 N1802, டிசம்பர் 9 அன்று மாலை சுமார் 6.30 மணியளவில் வடசேரி பேருந்து நிலையத்தில் இருந்து திருநெல்வேலி புறப்பட்டது. இந்த பேருந்தில் ஓட்டுநர் நெல்சன் மற்றும் நடத்துனர் ஜெயதாஸ் பணியில் உள்ளனர். இந்த பேருந்தில் நரிக்குறவர் சமுதாயத்தை சேர்ந்த ஒரு வயதான ஆண், ஒரு பெண் மற்றும் ஒரு குழந்தை ஏறியுள்ளனர். பேருந்து வடசேரி பேருந்து நிலையத்திலிருந்து வெளியே வந்தபோது மேற்படி பயணிகள் மூவரையும் பேருந்திலிருந்து ஓட்டுநர் மற்றும் நடத்துநர் இறங்கிவிட்டதாக தெரிகிறது. இந்நிகழ்வை அருகில் உள்ள பேருந்து நிலைய காப்பாளர்களிடம் தெரிவிக்காமல் ஓட்டுநர் மற்றும் நடத்துநர் தன்னிச்சையாக செயல்பட்டு உள்ளனர். பேருந்து நிலையத்தின் வெளியே நின்று கொண்டிருந்த ஊடகவியலாளர்கள் இதனை வீடியோ எடுத்து ஒளிபரப்பு செய்த பின்னரே இந்நிகழ்வு நிர்வாகத்திற்கு தெரிய வருகிறது. எனவே பொறுப்பற்ற முறையில் பணி செய்து அரசுக்கு கெட்ட பெயர் ஏற்படுத்திய ஓட்டுனர் மற்றும் நடத்துனர் தற்காலிக பணி நீக்கம் செய்து நடவடிக்கை எடுக்கப்பட்டுள்ளது'' என அதில் தெரிவிக்கப்பட்டுள்ளது. இதையும் படிக்க: போராட்டத்தை கைவிடுவதாக அறிவித்த விவசாயிகள் - வேளாண் சட்டம் வாபஸ்க்கு பிறகு நடந்தது என்ன?
http://dlvr.it/SF5Wkd

சர்வதேச மனித உரிமைகள் தினம்: சமூக செயல்பாட்டாளர் குர்ரம் பர்வேஸ் கைது உணர்த்தும் செய்தி என்ன?