எப்போது வீடு திரும்புவது என்பதை முதலமைச்சரே முடிவு செய்வார்.. பிரதாப் ரெட்டி

அப்போலோ மருத்துவமனையிலிருந்து எப்போது வீடு திரும்புவது என்பதை முதலமைச்சர் ஜெயலலிதாவே முடிவு செய்வார் என அப்போலோ மருத்துவமனைத் தலைவர் பிரதாப் ரெட்டி தெரிவித்துள்ளார்.

தமிழக முதலமைச்சர் ஜெயலலிதா கடந்த செப்டம்பர் மாதம் 22-ம் தேதி திடீர் உடல் நலக் குறைவால் சென்னை கிரீம்ஸ் சாலையில் உள்ள அப்போலோ மருத்துவமனையில் அனுமதிக்கப்பட்டார். கிட்டத்தட்ட 40 நாட்களுக்கும் மேலாக மருத்துவமனையில் உள்ள முதலமைச்சர் ஜெயலலிதாவின் உடல்நிலை குறித்து விசாரிக்க பல்வேறு அரசியல் கட்சித் தலைவர்கள் மற்றும் சினிமா பிரபலங்கள் அப்போலோ சென்று வருகின்றனர். அவர் விரைவில் உடல் நலம்பெற வேண்டிஅதிமுகவினர் மட்டுமின்றி பொதுமக்களும் மதவேறுபாடின்றி வழிபாடுகளும் நடத்தி வருகின்றனர்.

இந்நிலையில் இன்று செய்தியாளர்களிடம் பேசிய அப்போலோ குழுமத்தின் தலைவர் பிரதாப் ரெட்டி, முதலமைச்சர் ஜெயலலிதா வேகமாக குணமடைந்தது வருவதாகவும் அது தமக்கு மகிழ்ச்சி அளிப்பதாகவும் தெரிவித்துள்ளார். மேலும் தம்மைச் சுற்றி நடப்பதை முதலமைச்சர் ஜெயலலிதா நன்கு உணர்ந்து வருவதாகவும் மருத்துவமனையில் இருந்து எப்போது வீடு திரும்புவது என்பதை அவரே முடிவு செய்வார் எனவும் கூறியுள்ளார்.

Read More

இந்திய தூதரக அதிகாரிகளை உளவாளிகளாக சித்தரிக்கும் பாக்... என்ன நடந்தது?..எப்படி நடந்தது?..

இஸ்லாமாபாத்தில் உள்ள இந்திய தூதரகத்தில் பணியாற்றும் 8 அதிகாரிகள் உளவாளிகளாகச் செயல்பட்டதாக பாகிஸ்தான் குற்றம்சாட்டியுள்ளது.

டெல்லியில் உள்ள பாகிஸ்தான் தூதரகத்தில் பணிபுரிந்து வந்த மெஹ்மூத் அக்தர் என்பவர் இந்தியப் பாதுகாப்பு விவகாரங்கள் குறித்து உளவு பார்த்ததாக குற்றம்சாட்டப்பட்டார். டெல்லி சாணக்யபுரி போலீசாரால் கைது செய்யப்பட்ட அவர், தூதரக உறவு காரணமாக விடுவிக்கப்பட்டார்.

இதன்காரணமாக அவர் உள்பட பாகிஸ்தான் தூதரகத்தில் பணியாற்றிய 6 பேர் கடந்த புதன்கிழமை வெளியேறினர். மேலும், பாகிஸ்தானுக்காக உளவு பார்த்ததாக ராஜஸ்தானைச் சேர்ந்த 2 பேரும் கைது செய்யப்பட்டனர். இந்த சம்பவத்தை அடுத்து இந்தியத் தூதரகத்தில் பணிபுரிந்து வந்த சுர்ஜீத் சிங் என்ற அதிகாரியை பாகிஸ்தானுக்கு எதிராக செயல்பட்டதாகக் கூறி அந்நாட்டு அரசு வெளியேற்றியது.

மேலும், இஸ்லாமாபாத்தில் உள்ள இந்திய தூதரகத்தில் பணியாற்றும் 8 அலுவலர்கள் இந்திய உளவு அமைப்பான ’ரா’ மற்றும் புலனாய்வுத் துறைக்காக உளவு பார்த்ததாக பாகிஸ்தான் குற்றம்சாட்டியதாக அந்நாட்டு ஊடகங்கள் செய்தி வெளியானது. வியன்னா ஒப்பந்தத்தை மீறி இந்தியா செயல்படுவதாகவும் குற்றம்சாட்டியுள்ள பாகிஸ்தான், இந்திய தூதரக அதிகாரிகள் 8 பேரின் புகைப்படங்களை, அவர்களின் பெயர்களோடு அந்நாட்டு ஊடகங்கள் வெளியிட்டன. குறிப்பாக, வர்த்தகப் பிரிவு செயலாளராக பதவி வகித்த ராஜேஷ் குமார் அக்னிகோத்ரி, ‘ரா’ அமைப்பின் இஸ்லாமாபாத் பிரிவு தலைவராக செயல்பட்டு வந்ததாக பாகிஸ்தான் வெளியுறவு அமைச்சகம் தெரிவித்ததாக பாகிஸ்தானின் டான் பத்திரிகை செய்தி வெளியிட்டுள்ளது. இந்த தகவல்களை பாகிஸ்தான் அரசு அதிகாரப்பூர்வமாக அறிவிக்கவில்லை.

இந்த குற்றச்சாட்டுகளை மறுத்துள்ள இந்தியா, பாகிஸ்தானின் குற்றச்சாட்டுகள் அடிப்படை ஆதாரமற்றது என்று தெரிவித்துள்ளது. இதுதொடர்பாக செய்தியாளர்களிடம் பேசிய இந்திய வெளியுறவுத் துறை செய்தி தொடர்பாளர் விகாஸ் ஸ்வரூப், தூதரக அதிகாரிகளின் பெயரை வெளியிட்டது கடும் கண்டனத்துக்குரியது என்று தெரிவித்தார். இந்தநிலையில், இஸ்லாமாபாத்தில் பணியாற்றும் 8 தூதர்களை, அவர்களின் பாதுகாப்பு கருதி திரும்பப்பெற இந்தியா முடிவு செய்துள்ளதாகத் தகவல்கள் வெளியாகியுள்ளன.

Read More

கரும்பு விவசாயிகளை தமிழக அரசு இனியும் வஞ்சிக்க வேண்டாம் : மு.க.ஸ்டாலின்

சென்னை: கரும்பு விவசாயிகளை இனியும் வஞ்சிக்காமல் உடனடியாக கரும்பு நிலுவை தொகையை தமிழக அரசு வழங்க வேண்டும் என எதிர்கட்சி தலைவர் மு.க.ஸ்டாலின் வலியுறுத்தியுள்ளார். தனியார் சர்க்கரை ஆலைகளில் ரூ.1,650 கோடியும், கூட்டுறவு சர்க்கரை ஆலைகளில் ரூ.200 கோடியும் விவசாயிகளுக்கு நிலுவை வைக்கப்பட்டுள்ளதை சுட்டிக்காட்டி அவர் அறிக்கை வெளியிட்டுள்ளார். நிலுவை தெகையை பெற்றுத்தர 3-ம் தேதி பேச்சுவார்த்தை நடத்தப்படும் என்று அதிமுக அரசு, கரும்பு விவசாயிகளுக்கு உத்தரவாதம் அளித்ததாக ஸ்டாலின் கூறியுள்ளார்.

நல்ல முடிவு கிடைக்கும் என்ற எதிர்பார்ப்புக்கு மாறாக பேச்சுவார்த்தை திடீரென தள்ளி வைக்கப்பட்டுள்ளதை அவர் சுட்டிக் காட்டியுள்ளார். மேலும் பேச்சுவார்த்தை எப்போது நடக்கும் என அறிவிக்கவில்லை என்றும் அவர் தெரிவித்துள்ளார்.

தனியார் சர்க்கரை ஆலைகளிடம் நிலுவைத் தொகையை பெற்றுத்தருவதுடன் கூட்டுறவு சர்க்கரை ஆலைகளில் உள்ள பாக்கித் தொகை வழங்க வேண்டிய பொறுப்பும் தமிழக அரசுக்கு உள்ளதாக ஸ்டாலின் குறிப்பிட்டுள்ளார். எனவே உடனடியாக பேச்சுவார்த்தையை நடத்தி நிலுவைத் தொகையை பெற்றுத்தர அவசர நடவடிக்கைகள் மேற்கொள்ள வேண்டும் என அவர் கேட்டுக் கொண்டுள்ளார்.

Read More

ராணுவத்தினரையும், விவசாயிகளையும் மத்தியில் ஆளும் பா.ஜ.க அரசு மதிக்கவில்லை : ராகுல் குற்றச்சாட்டு

டெல்லி: ஒரே பதவி ஒரே ஓய்வூதியம் என்பது பணம் மட்டுமல்ல, நீதி சம்பந்தப்பட்டது என காங்கிரஸ் துணைத் தலைவர் ராகுல் காந்தி தெரிவித்துள்ளார். டெல்லியில் முன்னாள் ராணுவ வீரர்களை சந்தித்து பேசிய பின் செய்தியாளர்களிடம் பேசிய அவர் இவ்வாறு கூறினார். ராணுவத்தினரையும், விவசாயிகளையும் மத்தியில் ஆளும் மோடி தலைமையிலான பாரதிய ஜனதா அரசு மதிக்கவில்லை என கடுமையாக சாடியுள்ளார். முன்னாள் ராணுவத்தினருக்கு நியாயமாக கிடைக்க வேண்டியதை அரசு கொடுக்கவில்லை என்றார்.

மேலும் பேசிய அவர் தற்கொலை செய்து கொண்ட ஓய்வு பெற்ற ராணுவ வீரரின் குடும்பத்தினரை சந்திக்க சென்றதற்காக, தம்மை கைது செய்தது பற்றி கவலைப்படவில்லை என்றார். ஒரே பதவி ஒரே ஓய்வூதியம் திட்டம் குறித்து மேலும் மேலும் பொய் சொல்வதை பிரதமா் மோடி நிறுத்திக் கொள்ள வேண்டும் என ராகுல் கூறினார். மேலும் தற்கொலை செய்து கொண்ட முன்னாள் ராணுவ வீரர் ராம்கிஷன் குடும்பத்திடம் மத்திய அரசு மன்னிப்பு கேட்க வேண்டும் என்றார்.

இவ்விகாரம் குறித்து பேசிய மற்றொரு காங்கிரஸ் தலைவரான ஏ.கே.அந்தோணி ஒரே பதவிக்கு ஒரே ஓய்வூதியம் என்ற வாக்குறுதியை செயல்படுத்த மத்திய அரசு தவறிவிட்டதாக சாடினார். முன்னாள் படை வீரர்களின் ஓய்வூதிய பிரச்சனையை தீர்ப்பதாக காங்கிரஸ் அரசு வாக்குறுதி அளித்திருந்தது. இதனால் அதை நிறைவேற்ற வேண்டிய கட்டாயம் தற்போதைய பாரதிய ஜனதா அரசுக்கு ஏற்பட்டது. ஆனால் முறையாக திட்டத்தை செயல்படுத்தாத காரணத்தால் முன்னாள் படை வீரர்களை மத்திய அரசு ஏமாற்றிவிட்டதாக குற்றம்சாட்டியுள்ளார்.

Read More

பெண்களை பன்றிகள் என்பவர் நமக்கு அதிபராக வேண்டாம்: டிரம்ப் மீது ஒபாமா பாய்ச்சல்

வாஷிங்டன்: நமக்கு நல்ல அதிபர் வர வேண்டும். பெண்களை பன்றிகள் என்று சொல்பவர் அல்ல என அமெரிக்க அதிபர் பாரக் ஒபாமா டிரம்ப் பற்றி தெரிவித்துள்ளார்.

அமெரிக்க அதிபர் தேர்தலில் குடியரசுக் கட்சி சார்பில் களத்தில் உள்ள டொனால்ட் டிரம்ப் மீது ஏகப்பட்ட பாலியல் புகார்கள் எழுந்துள்ளன. இந்நிலையில் டெம்பியில் நடந்த பேரணியில் கலந்து கொண்ட ஜனநாயக கட்சி அதிபர் வேட்பாளரான ஹில்லாரி கிளிண்டன் கூறுகையில், டிரம்ப் அதிபராகிவிட்டார் என்று கற்பனை செய்யுங்கள். அவர் அதிபராகி உங்கள் வாழ்க்கையை பாதிக்கும் முடிவுகளை எடுக்கிறார் என்று வைத்துக் கொள்வோம். அவர் ட்விட்டர் போருக்கு பதிலாக உண்மையான போரையே துவங்குவார் என்றார்.


டிரம்ப் பெண்களை அவமதிப்பவர் என்று தொடர்ந்து கூறி வருகிறார் ஹில்லாரி. இந்நிலையில் வடக்கு கரோலினாவில் உள்ள ராலேவில் நடந்த பேரணியில் பேசிய ஒபாமா கூறுகையில், குடியரசுக் கட்சி வேட்பாளர் ஏமாற்றுபவர். அதிபர் மாளிகைக்கு வர தகுதியில்லாதவர். அமெரிக்கா மக்களை கொடுமைப்படுத்த வேண்டும் என்று யோசனை சொல்பவர் அதிபர் ஆகக் கூடாது. பிரபலமாக இருக்கும் காரணத்தால் பாலியல் தொல்லைகள் கொடுத்துவிட்டு தப்பிப்பவரின் குரலை கேட்க விரும்புகிறீர்களா? பெண்களை பன்றிகள், நாய்கள் என்று யார் கூறுவார்கள்? அந்த குரல் அமெரிக்காவில் குரல் அல்ல. அமெரிக்காவுக்காக தனது வாழ்வை அர்ப்பணித்தவர் ஹில்லாரி. அவர் தான் அடுத்த அதிபராக வேண்டும். அவர் தான் சரியான நபர் என்றார்.

நமக்கு நல்ல அதிபர் வர வேண்டும். பெண்களை பன்றிகள் என்று சொல்பவர் அல்ல என அமெரிக்க அதிபர் பாரக் ஒபாமா டிரம்ப் பற்றி தெரிவித்துள்ளார். அமெரிக்க அதிபர் தேர்தலில் குடியரசுக் கட்சி சார்பில் களத்தில் உள்ள டொனால்ட் டிரம்ப் மீது ஏகப்பட்ட பாலியல் புகார்கள் எழுந்துள்ளன.

Read More

கொட்டும் மழையில் வேட்பாளர்கள் பிரச்சாரம்... பணமழையில் நனையும் வாக்காளர்கள்

மதுரை: சட்டசபை தேர்தலில் பணப்பட்டுவாடா செய்யப்படுவதாக எழுந்த புகாரினால் ரத்தான அரவக்குறிச்சி, தஞ்சாவூர் தொகுதிகளுக்கும் காலியாக உள்ள திருப்பரங்குன்றம் தொகுதிக்கும் நவம்பர் 19ம் தேதி தேர்தல் நடைபெறுகிறது. இதற்கான வேட்புமனு தாக்கல் முடிந்து பரிசீலனையும் முடிந்து விட்டது.

3 தொகுதிகளிலும் அதிமுக, திமுக, தேமுதிக, பாஜக, பாமக, நாம் தமிழர்கட்சி என 6 கட்சிகள் போட்டியிடுகின்றன. வேட்புமனு பரிசீலனைக்குப்பிறகு தஞ்சை, அரவக்குறிச்சி, திருப்பரங்குன்றம் ஆகிய 3 தொகுதிகளிலும் திமுக, அதிமுக வேட்பாளர்களின் மனுக்கள் ஏற்றுக்கொள்ளப்பட்டன. வேட்புமனு பரிசீலனையில் 3 தொகுதிகளையும் சேர்த்து மொத்தம் 48 மனுக்கள் நிராகரிக்கப்பட்டன.

இவற்றில் சுயேச்சைகளின் வேட்புமனுக்களும் அடக்கம். ஏற்றுக் கொள்ளப்பட்ட வேட்புமனுவை வாபஸ்பெற வரும் 5ஆம் தேதி இறுதி நாளாகும். தஞ்சை தொகுதியில் திமுக வேட்பாளராக டாக்டர் அஞ்சுகம் பூபதியும் அதிமுக வேட்பாளராக ரெங்கசாமியும் அரவக்குறிச்சி தொகுதியில் திமுக வேட்பாளராக கே.சி.பழனிச்சாமியும் அதிமுக வேட்பாளராக

செந்தில்பாலாஜியும் திருப்பரங்குன்றம் தொகுதியில் திமுக வேட்பாளராக டாக்டர் சரவணனும் அதிமுக வேட்பாளராக ஏ.கே.போஸும் வேட்பாளராக வேட்புமனு தாக்கல் செய்திருந்தனர். இவர்கள் அனைவரது மனுக்களும் பரிசீலனைக்குப் பிறகு ஏற்கப்பட்டன. அரவக்குறிச்சி தொகுதியில் மட்டும் அதிமுக, திமுக வேட்பாளர்களின் மனுவை ஏற்க எதிர்ப்பு தெரிவிக்கப்பட்டது. அதிகாரிகளுடன் வாக்குவாதம் செய்யப்பட்டது. பேச்சுவார்த்தைக்குப் பிறகு அதிமுக, திமுக வேட்பாளர்களின் மனு ஏற்கப்பட்டது.

இடைத்தேர்தல் களம் வேட்புமனுக்களை தாக்கல் செய்த கையோடு பிரச்சாரமும் களை கட்டிவிட்டது. அதிமுக, திமுக மாவட்ட செயலாளர்கள், அமைச்சர்கள், தேர்தல் பணிக்குழு பொருப்பாளர்கள் என இடைத்தேர்தல் நடைபெறும் தொகுதிகளில் மக்கள் நடமாட்டம் அதிகரித்து விட்டது. டீக்கடை, பெட்டிக்கடைகளில் 500, 1000 ரூபாய் கரன்சிகளின் புழக்கம் அதிகரித்து விட்டது. கொட்டும் மழையில் பிரச்சாரம் கொட்டும் மழையிலும் பிரச்சாரத்தில் ஈடுபட்டுள்ளனர் வேட்பாளர்கள். ஒருபக்கம் வருணபகவானின் கருணையினால் மழை பெய்ய மறுபக்கம் வேட்பாளர்களின் கருணையினால் பணமழை கொட்டுகிறதாம்.

ஒரு ஓட்டுக்கு இத்தனை ஆயிரம் என்று மாறி மாறி பேரம் பேசப்படுவதாகவும் தகவல்கள் தெரிவிக்கின்றன. என்னதான் பணப்பட்டுவாடாவை தடுக்க பல டோல்கேட்டுகளை போட்டு பறக்கும் படையினர் பறிமுதல் செய்தாலும் கைக்கும் கைக்கும் இடையே யாருக்கும் தெரியாமல் பணப்பட்டுவாடா நடைபெறுகிறதாம். தஞ்சை வைத்திலிங்கம் தஞ்சாவூர் தொகுதியில் அதிமுக வேட்பாளர் ரெங்கசாமி, வடக்கு மாவட்டசெயலாளராக இருந்த போதும், வைத்திலிங்கம்தான் தஞ்சையை தன் கண்ட்ரோலில் வைத்திருக்கிறார்.

எப்படியாவது ஜெயித்தே ஆகவேண்டும் என்று முடிவோடு தன் முழு பலத்தையும் இறக்கியிருக்கிறாராம் ரெங்கசாமி. அதே பலத்தோடு திமுக வேட்பாளர் அஞ்சுகம் பூபதியும் களமிறக்கியிருக்கிறாராம். இந்த தொகுதியில் ஜெயித்தே ஆகவேண்டும் என்பது திமுகவின் கவுரவப் பிரச்சினை என்பதால் முழு வீச்சில் வைட்டமின் 'ப' வாக்காளர்களுக்கு அளிக்கப்படுகிறதாம். அரவக்குறிச்சியில் இணைந்த கைகள் அரவக்குறிச்சியில் செந்தில் பாலாஜியும், விஜயபாஸ்கரும் இணைந்த கைகளாக மாறி வாக்கு சேகரித்து வருவதை ஆச்சரியத்துடன் பார்க்கின்றனர். எப்படியும் ஜெயித்தே ஆக வேண்டும் என்பது செந்தில் பாலாஜியின் டார்க்கெட் இதற்கான வழிமுறைகளை கரெக்டாக கடைபிடித்து பிரச்சாரம் செய்கிறாராம்.

திமுவின் டெக்னிக் திமுக வேட்பாளர் கே.சி. பழனிச்சாமியின் பிரச்சார டெக்னிக் வேறு மாதிரி இருக்கிறதாம். அரவக்குறிச்சி தேர்தல் பொறுப்பாளராக உள்ள ஏ.வ. வேலு, ஓடி ஓடி வேலை செய்கிறாராம். ஆனால் செலவு செய்து களைத்துப் போன கே.சி.பழனிச்சாமி, இம்முறை பணத்தை பதுக்கியே வைத்திருப்பதால் தொண்டர்கள் சற்றே சோர்வடைந்திருக்கிறார்களாம். திருப்பரங்குன்றம் சரவணன் திருப்பரங்குன்றம் தொகுதி திமுக வேட்பாளர் சரவணன் கொட்டும் மழையிலும் தீவிர பிரச்சாரம் செய்தார்.

திமுக ஆட்சியில் நிறைவேற்றப்பட்ட மக்கள் நலத்திட்டங்களை எடுத்து கூறி அவர் வாக்குச்சேகரித்தார். கட்சிக்கு அவர் புதியவர் என்பதால் செலவுதான் பல கோடிகளை தாண்டுகிறதாம். ஆனாலும் சளைக்காமல் பணத்தை களமிறக்குகிறாராம். அதிமுகவின் ஏ.கே.போஸ் அதிமுகவின் ஏ.கே. போஸ், மாவட்ட செயலாளர்கள், அமைச்சர்களை தனியாக கவனிப்பதோடு, வாக்களர்களையும் வகையாக கவனித்து வருகிறாராம். 'திருமங்கலம் பார்முலா' மறைந்து 'திருப்பரங்குன்றம் பார்முலா' என்ற சொல் இடைத்தேர்தல் வரலாற்றில் இடம்பெற்றாலும் ஆச்சரியமில்லை.

எது எப்படியோ? அதிமுகவிலும், திமுகவிலும் எதிரிகள் வெளியில் இல்லை, கட்சிக்கு உள்ளேயாதான் இருக்கின்றனர் என்பதால் உள்குத்து ஜெயிக்குமா? வேட்பாளர்கள் ஜெயிப்பார்களா என்பது நவம்பர் 19ம் தேதி வாக்குப்பதிவு முடிந்த பின்னர் தெரியும்.

Read More

உத்தரகண்டில் ஜீப் பள்ளத்தில் விழுந்து விபத்து: 2 பெண்கள் உள்பட 7 பேர் பலி

டேராடூன்: உத்தரகண்ட் மாநிலத்தில் ஜீப் ஒன்று பள்ளத்தில் விழுந்து விபத்துக்குள்ளானதில் 2 பெண்கள், சிறுமி உள்பட 7 பேர் பலியாகினர்.

உத்தரகண்ட் மாநிலம் தெஹ்ரி கர்வால் மாவட்டத்தில் உள்ள லாசி கிராமத்தை சேர்ந்த 11 பேர் ஜீப் ஒன்றில் பவ்ரி கர்வால் மாவட்டத்தில் உள்ள பைஜ்ரோ கிராமத்திற்கு சென்றனர்.

பைஜ்ரோவில் இருந்து ஜீப் மூலம் வீடு திரும்பினர். மலைப்பகுதியில் வந்த ஜீப் தலிசைன் பிளாக்கில் மதியம் 1 மணிக்கு வந்து கொண்டிருந்தபோது 50 அடி ஆழ பள்ளத்தில் விழுந்து விபத்துக்குள்ளானது. இந்த விபத்தில் 2 பெண்கள், சிறுமி உள்பட 7 பேர் பலியாகினர், 4 பேர் காயம் அடைந்தனர்.

காயம் அடைந்தவர்கள் பைஜ்ரோ மற்றும் காஷிபூரில் உள்ள மருத்துவமனைகளில் அனுமதிக்கப்பட்டுள்ளனர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.

Read More