சொத்துக்குவிப்பு வழக்கில் இன்று தீர்ப்பு : முன்னெச்சரிக்கையாக கூவத்தூரில் போலீஸ் குவிப்பு

கூவத்தூரில் சசிகலா மற்றும் அதிமுக எம்.எல்.ஏக்கள் தங்கியுள்ள ரிசார்ட் முன்பு காவல்துறையினர் குவிக்கபட்டுள்ளனர். இன்று சசிகலா மீதான சொத்துக்குவிப்பு மேல்முறையீட்டு வழக்கின் தீர்ப்பு வரவுள்ள நிலையில், முன்னெச்சரிக்கை நடவடிக்கையாக சசிகலா தற்போது தங்கியுள்ள இடத்தில் போலீஸ் பாதுகாப்பு பலப்படுத்தப்பட்டுள்ளது.

இந்நிலையில், எம்எல்ஏக்களுடன் கூவத்தூர் ரிசார்ட்டில் தங்கியுள்ள அதிமுக பொதுச்செயலாளர் சசிகலாவை சந்திக்க மக்களவை துணை சபாநாயகர் தம்பிதுரை சென்றுள்ளார்.

-- நன்றி விகடன்

Read More

கூவத்தூர் விரைந்தார் ஜெயலலிதாவின் அண்ணன் மகன் தீபக்

அதிமுக பொதுச்செயலாளர் சசிகலா தங்கியுள்ள கூவத்தூர் ரிசார்ட்டுக்கு ஜெயலலிதாவின் அண்ணன் மகன் தீபக் சென்றுக் கொண்டிருப்பதாக தகவல் வெளியாகி உள்ளது.

சசிகலா மற்றும் ஜெயலலிதா, சுதாகரன், இளவரசி ஆகியோர் மீதான சொத்து குவிப்பு வழக்கின் தீர்ப்பு இன்று வர உள்ள நிலையில்  தீபாவின் அண்ணன் தீபக் சசிகலாவை சந்திக்க உள்ளது ஏன்? என்று கேள்வி எழும்பியுள்ளது.

ஓ.பன்னீர்செல்வம், ஜெயலலிதா அண்ணன் மகளான தீபா மீது மரியாதை உள்ளதாகவும், அவருடன் இணைந்து பணியாற்ற தயாராக இருப்பதாகவும் தெரிவித்தார். அதற்கு தீபா தரப்பில் எந்த பதிலும் வரவில்லை. மேலும், ஜெ., பிறந்த நாளன்று அரசியல் பிரவேசம் குறித்து அறிவிக்க போவதாக தீபா தெரிவித்திருந்தார்.

இந்த குழப்பமான சூழலில், தீபாவின் அண்ணன் தீபக் சசிகலாவை சந்திக்க கூவத்தூர் விரைந்துள்ளது, சசிகலாவுக்கு ஆதரவு தெரிவிப்பதற்காக இருக்கலாம் என எதிர்பார்க்கப்படுகிறது.

-- நன்றி விகடன்

Read More

ஓ.பன்னீர்செல்வத்துக்கு மேலும் ஒரு எம்.எல்.ஏ ஆதரவு! #OPSVsSasikala

தமிழகத்தில் அ.தி.மு.க தற்போது இரண்டாகப் பிளவுபட்டு நிற்கிறது. ஜெயலலிதா மரணம் அடைந்ததைத் தொடர்ந்து, அ.தி.மு.க-வில் நீடித்து வந்த மௌனத்தை, ஒரே இரவில் கலைத்தார் முதல்வர் ஓ.பன்னீர் செல்வம்.

கடந்த 7-ம் தேதி மெரினாவில் உள்ள ஜெயலலிதாவின் நினைவிடத்தில் 40 நிமிட தியானத்துக்குப் பின்னர் செய்தியாளர்களிடம் பேசிய ஓ.பன்னீர்செல்வம், அ.தி.மு.க பொதுச் செயலாளர் சசிகலா மீது அடுக்கடுக்கான புகார்களை எடுத்து வைத்தார். இதையடுத்து, கட்சிக்குத் துரோகம் இழைத்துவிட்டார் என்று கூறி, ஓ.பி.எஸ்ஸை கட்சியின் பொருளாளர் பதவியில் இருந்து நீக்கினார் சசிகலா.

அடுத்தடுத்து அரங்கேறிய அரசியல் நாடகங்களின் உச்சக்கட்டமாக அ.தி.மு.க சட்டமன்ற உறுப்பினர்கள் நூற்றுக்கும் மேற்பட்டோர் மகாபலிபுரம் அருகேயுள்ள கூவத்தூரில் தனியார் விடுதியில் தங்க வைக்கப்பட்டனர். அவர்கள், ஓ.பி.எஸ் பக்கம் சென்றுவிடக்கூடாது என்ற அச்சத்தில், சசிகலா, தினமும் கூவத்தூர் சென்று நம்பிக்கையூட்டி வருகிறார். என்றாலும், 30-க்கும் மேற்பட்ட எம்.எல்.ஏ-க்கள் ஓ.பன்னீர் செல்வத்தை ஆதரிக்கும் மனநிலையிலேயே உள்ளனர் என்று தெரிகிறது.

ஒருபானை சோற்றுக்கு ஒருசோறு பதம் என்பது போல, மதுரை தெற்கு தொகுதி எம்.எல்.ஏ-வான சரவணன், கடந்த 5 நாட்களாக கூவத்தூர் விடுதியில் சசிகலா ஆதரவு சட்டமன்ற உறுப்பினர்களுடன் தங்கியிருந்தார். அவர், இன்று பிற்பகல் அங்கிருந்து வெளியேறி ஓ.பன்னீர் செல்வத்துக்கு ஆதரவு தெரிவித்துள்ளார். ஓ.பன்னீர்செல்வத்துக்கு ஆதரவு அளிப்பது தொடர்பாக அவர் நமது செய்தியாளரிடம் கூறும்போது, "கட்சியும், ஆட்சியும் காப்பாற்றப்பட வேண்டும். ஒரு குடும்பத்தினரின் கையில் புரட்சித்தலைவி அம்மா ஏற்படுத்திய ஆட்சி சென்று விடக்கூடாது என்பதால், ஓ.பி.எஸ்ஸை ஆதரிக்க முன்வந்தேன்" என்று தெரிவித்தார்.

ஓ.பன்னீர்செல்வத்துக்கு ஏற்கெனவே 11 எம்.பிக்கள் மற்றும் 7 எம்.எல்.ஏக்கள் ஆதரவு தெரிவித்துள்ள நிலையில், தற்போது மேலும் ஒரு எம்.எல்.ஏ ஆதரவு அளித்திருப்பதுடன், வேறு சிலரும் ஓ.பி.எஸ். பக்கம் செல்லக்கூடும் என்பதால். சசிகலா தரப்பு மிகுந்த கலக்கத்தில் உள்ளது.

-- நன்றி விகடன் 

Read More

தமிழ்நாட்டின் எதிர்காலம் யார் கையில்? ஓ.பன்னீர்செல்வம் Vs சசிகலா! (Video)

தமிழ்நாட்டில் தற்போது எழுந்த அரசியல் சிக்கலுக்கு இன்னமும் முடிவு எட்டப்படாமல் உள்ளது. 120-க்கும் மேற்பட்ட அ.தி.மு.க சட்டமன்ற உறுப்பினர்களின் ஆதரவு தனக்கு இருப்பதாகவும், தன்னை சட்டமன்றக் கட்சித் தலைவராக எம்.எல்.ஏக்கள் தேர்வு செய்திருப்பதாகவும் தெரிவித்துள்ள சசிகலா, இதனால் தன்னை ஆளுநர் ஆட்சியமைக்க அழைப்பு விட வேண்டும் என்று வலியுறுத்தியுள்ளார். ஆனால், ஓ.பன்னீர்செல்வமோ, தான் கட்டாயப்படுத்தி ராஜினாமா செய்ய வைக்கப்பட்டேன் என்றும், தனக்கு உள்ள பெரும்பான்மையை நிரூபிக்க கால அவகாசம் வேண்டும் என்றும் ஆளுநரிடம் கேட்டுக் கொண்டுள்ளார்.

இந்த நிலையில் சசிகலாவுக்கு எதிரான உச்ச நீதிமன்றத் தீர்ப்பு விரைவில் வெளியாக உள்ளது. ஒருவேளை சசிகலாவை ஆட்சியமைக்க அழைப்பு விடுத்து, அவர் முதல்வராகப் பதவியேற்ற பின்னர், தீர்ப்பு சசிகலாவுக்கு பாதகமாக வரும்பட்சத்தில், மீண்டும் ஒருவரை முதல்வர் பதவியில் அமர்த்தியாக வேண்டும் என்பதால், ஆளுநர் தாமதிக்கிறாரோ என்ற எண்ணமும் தோன்றுகிறது. முதல்வராக இருந்த ஜெயலலிதா, பிரதமர் மோடிக்கு கடும் சவாலாக இருந்து வந்தார். ஆனால் அவர் மறைவுக்குப் பின்னர் அ.தி.மு.க-வுக்கு குடைச்சல் கொடுக்க வேண்டும் என்ற எண்ணத்தில் மோடி செயல்படக்கூடும் என்றும் பரவலான கருத்து நிலவுகிறது. இதுபோன்ற சூழ்நிலையில், தனக்கு ஆதரவு தெரிவிக்கும் எம்.எல்.ஏக்களை கூவத்தூரில் தங்க வைத்துள்ளார் சசிகலா. அடுத்த சில நாட்களில் ஆளுநர் எடுக்கப்போகும் முடிவு என்ன? என்பதை அறிய இந்த வீடியோவைப் பார்க்கவும்..



-- நன்றி விகடன் 

Read More

ஜனாதிபதியை சந்திக்க சசிகலா திட்டம்?

சென்னை : அதிமுக பொதுச் செயலாளர் சசிகலா, ஆட்சி அமைக்க உரிமை கோரும் கடிதம் அளித்து ஒரு வார காலம் ஆன பிறகும் கவர்னர் இதுவரை அவருக்கு எந்த பதிலும் சொல்லவில்லை. இந்நிலையில் நேற்று முன்தினம், உடனடியாக தனக்கு நேரம் ஒதுக்கி சந்திக்க வேண்டும் என கவர்னருக்கு சசிகலா கடிதம் எழுதி இருந்தார். இருப்பினும் கவர்னர் அவரை சந்திக்க நேரம் ஒதுக்கவில்லை. அதேசமயம், ஓ.பன்னீர்செல்வத்தின் ஆதரவாளராக இருக்கும் எம்.பி., மைத்ரேயனுக்கு நேரம் ஒதுக்கி, அவரை சந்தித்தார்.
இதனால் இன்று (பிப்ரவரி 13) கவர்னர் வித்யாசாகர் ராவை சந்திக்க மீண்டும் சசிகலா நேரம் கேட்டுள்ளார். இன்றும் கவர்னர் தனக்கு நேரம் ஒதுக்கவில்லை என்றால், நேரடியாக ஜனாதிபதி பிரணாப் முகர்ஜியை சந்திக்க சசிகலா திட்டமிட்டுள்ளதாக தகவல் வெளியாகி உள்ளது.

Read More

சசிகலாவை ஆட்சி அமைக்கும்படி அழைக்க முடியாது !!! -- கவர்னர்

'தற்போதுள்ள சூழ்நிலையில், சசிகலாவை ஆட்சி அமைக்கும்படி அழைக்க முடியாது' என, மத்திய உள்துறை அமைச்சகத்துக்கு கவர்னர் அறிக்கை அனுப்பியதாக, நேற்றிரவு பரபரப்பு தகவல் வெளியானது. ஆனால், 'அப்படிப்பட்ட அறிக்கை எதையும் அனுப்பவில்லை' என, கவர்னர் அலுவலகம் மறுத்துள்ளது.
முதல்வர் பதவியை ராஜினாமா செய்த, பன்னீர்செல்வம், தன்னை மிரட்டி ராஜினாமா கடிதம் பெற்றதாக, சசிகலா மீது குற்றம் சாட்டி, சட்டசபையில் பெரும்பான்மையை நிரூபிக்க, தனக்கு வாய்ப்பு வழங்க வேண்டும் என, நேற்று முன்தினம் கவர்னர் வித்யாசாகர் ராவை சந்தித்து கோரிக்கை வைத்தார்.

கோரிக்கை:

அதேநேரம் பெரும்பான்மை, எம்.எல்.ஏ.,க்கள் ஆதரவுடன், சட்டசபை கட்சி தலைவராக, தேர்வு செய்யப்பட்டுள்ள தன்னையே, ஆட்சி அமைக்க அழைக்க வேண்டும் என, சசிகலாவும் கவர்னரிடம் கோரிக்கை வைத்தார். இரு தரப்பினரிடமும் பேசியதுடன், நேற்று அரசு அதிகாரிகளையும் அழைத்து, கவர்னர் ஆலோசித்தார்.

எதிர்க்கட்சி தலைவர் ஸ்டாலினும், கவர்னரை சந்தித்தார். அனைவரும் அளித்த தகவல் அடிப்படையில், மத்திய உள்துறை அமைச்சகத்துக்கு, கவர்னர் வித்யாசாகர் ராவ், மூன்று பக்க அறிக்கை அனுப்பியுள்ளதாக, நேற்றிரவு பரபரப்பு தகவல் வெளியானது. அதேபோல, அந்த அறிக்கையில், கவர்னர் கூறியுள்ளதாக, சில தகவல்களும் வெளியாகின.

இயலாது:

அதன் விபரம்: அ.தி.மு.க.,வில் நிலவும் பிரச்னை, உட்கட்சி பிரச்னை தான். தமிழகத்தின்சட்டம் - ஒழுங்கு குறித்து, தமிழக அரசு தலைமை செயலர், டி.ஜி.பி., சென்னை போலீஸ் கமிஷனர் ஆகியோரை அழைத்து விசாரித்தேன். அவர்கள் தெரிவித்த தகவலின்படி, சட்டம் - ஒழுங்கு பிரச்னை எதுவும் இல்லை. ஆட்சி அமைக்க, சசிகலா உரிமை கோரி உள்ளார். அவர், தற்போது சட்டசபை உறுப்பினராக இல்லை. அதனால், அரசியல் சட்டப் பிரிவு, 164 - 1ன் படி, சட்டசபையில் பெரும்பான்மையை நிரூபிக்கும் படி, அவருக்கு அழைப்பு விடுக்க இயலாது. அதேபோல், 18 ஆண்டுகளாக நடந்து வரும், சொத்து குவிப்பு வழக்கில், வரும்

வாரத்தில் தீர்ப்பு வெளியாக உள்ளது. கர்நாடக மூத்த வழக்கறிஞர் துஷ்யந்த் தவே, உச்ச நீதிமன்ற நீதிபதிகளிடம் கேட்டபோது, ஒரு வாரம் காத்திருக்கும்படி, அவர்கள் தெரிவித்துள்ளனர். தற்போது, சட்டசபையில் உறுப்பினராக இல்லாத ஒருவரை, ஆட்சி அமைக்க அழைத்தால், அரசியல் சட்டப்படி, ஆறு மாதங்களுக்குள், தேர்தலை சந்திக்க வேண்டும். அதில் வெற்றி பெற்று, சட்டசபை உறுப்பினராக வர வேண்டும். ஆறு மாதங்களுக்குள் தேர்தலை சந்திக்கா விட்டால், அரசியல் சட்டப் பிரிவு, 164 -4ன் படி தகுதியிழக்க நேரிடும்.சசிகலா விஷயத்தில், நிலுவையில் உள்ள தீர்ப்பு காரணமாக, அவர் சட்டசபை உறுப்பினராவதற்கான வாய்ப்பு குறைவாக இருப்பதாக சந்தேகிக்கப்படுகிறது. காரணம், சசிகலாவுக்கு எதிராக தீர்ப்பு வந்தால், அவர், எம்.எல்.ஏ.,வாக ஆக முடியாது. இந்த சூழ்நிலையில், சசிகலாவை ஆட்சி அமைக்க அழைக்க முடியாது. மேலும், முதல்வர் பன்னீர்செல்வம் ராஜினாமா செய்த உடன், மாற்று அரசு அமையும் வரை, அவரே பதவியில் நீடிக்க அனுமதிக்கப்பட்டுள்ளது. எனவே, அடுத்த முதல்வரை உடனடியாக தேர்வு செய்வதற்கான அவசியமோ, வெற்றிடமோ இல்லை. அ.தி.மு.க., - எம்.எல்.ஏ.,க்கள், சிறை வைக்கப்பட்டு உள்ளதாக வந்துள்ள புகார் குறித்து விசாரிக்கும்படி, டி.ஜி.பி.,க்கு உத்தரவிடப்பட்டு உள்ளது. மிக விரைவில், தெளிவான சூழ்நிலை ஏற்படும் என்ற நம்பிக்கை உள்ளது. இவ்வாறு அதில் கூறப்பட்டுள்ளதாக, தகவல் வெளியானது.
இது, அரசியல் வட்டாரத்தில் திடீர் பரபரப்பை ஏற்படுத்தியதும், கவர்னர் மாளிகையில் இருந்து, உடனடியாக மறுப்பு அறிக்கை வெளியானது. கவர்னரின் முதன்மை செயலர் வெளியிட்ட அந்த அறிக்கையில், 'கவர்னர் சார்பில், எந்த அறிக்கையும் அனுப்பப்படவில்லை' என, தெரிவிக்கப்பட்டு உள்ளது.

Read More

இன்று தலைமை செயலகம் செல்கிறார் ஓபிஎஸ்

சென்னை : நேற்று தனது வீட்டில் செய்தியாளர்களிடம் பேசிய முதல்வர் ஓ.பன்னீர்செல்வம், அரசு பணிகள் குறித்து தலைமை செயலாளர் மற்றும் டிஜிபி உள்ளிட்ட அதிகாரிகளுடன் ஒருநாள் விட்டு ஒருநாள் ஆலோசித்து வருவதாக கூறினார். மேலும் இன்று (பிப்ரவரி 13), பகல், 12 மணிக்கு தான் தலைமை செயலகம் செல்ல உள்ளதாகவும் கூறினார். முதல்வர் பதவியை ராஜினாமா செய்த பிறகு ஓ.பன்னீர்செல்வம் இன்று முதல் முறையாக தலைமை செயலகம் வருகிறார்.

Read More