தலைமைச் செயலகத்தில் அதிகாரிகளுடன் முதல்வர் 7 மணி நேரம் ஆலோசனை

தலைமைச் செயலகத்துக்கு திங்கள்கிழமை வந்த முதல்வர் ஓ.பன்னீர்செல்வம் ஏழு மணி நேரம் இருந்தார். தலைமைச் செயலாளர் கிரிஜா வைத்தியநாதன், காவல் துறை இயக்குநர் டி.கே.ராஜேந்திரன் உள்ளிட்ட அதிகாரிகளுடன் ஆலோசனை நடத்தினார்.
கடந்த 5-ஆம் தேதி முதல்வர் பதவியை அவர் ராஜிநாமா செய்தார். இதன்பின், கடந்த 7 ஆம் தேதியன்று தன்னிடம் கட்டாயப்படுத்தப்பட்டு ராஜிநாமா கடிதம் பெறப்பட்டதாக புகார் தெரிவித்தார்.
இந்தப் புகார் கூறியதற்குப் பிறகு அவர் தலைமைச் செயலகம் வரவில்லை. கடந்த சில தினங்களாக தமிழகத்தில் பெரும் அரசியல் புயல் கிளம்பி வரும் சூழ்நிலையில் அவர் திங்கள்கிழமை பிற்பகல் தலைமைச் செயலகத்துக்கு வந்தார்.

தலைமைச் செயலக சங்கத்தினரிடம் அவர் ஆலோசனை நடத்தினார். மேலும், மரணம் அடைந்த சிறுமி ஹாசினி குடும்பத்துக்கு நிவாரண நிதி உதவியை அறிவித்தார்.

சட்டம்-ஒழுங்கு பாதுகாப்பு உள்ளிட்ட பல்வேறு முக்கிய விஷயங்கள் குறித்து உயரதிகாரிகளிடம் அவர் ஆலோசித்தார்.

இரவு 8 மணிக்கு...: 

பிற்பகல் 1.05 மணிக்கு தலைமைச் செயலகம் வந்த அவர் இரவு 8 மணிக்கு புறப்பட்டுச் சென்றார். செய்தியாளர்கள் சந்திப்புக்கு ஏற்பாடு செய்யப்பட்டிருந்தும் அவர் அதைத் தவிர்த்துவிட்டு புறப்பட்டுச் சென்றார்.

இரவு 8.30 மணியளவில், மதுரை எம்.பி. கோபாலகிருஷ்ணன், எம்.எல்.ஏ., சரவணன் ஆகியோர் முதல்வர் ஓ.பன்னீர்செல்வத்தை அவரது இல்லத்தில் சந்தித்து அவருக்கு தங்களது ஆதரவைத் தெரிவித்தனர்.

-- நன்றி தினமணி

Read More

எம்.எல்.ஏ-வின் உறவினர் மரணத்துக்கு கூட நோ லீவ்..! இது சசிகலாவின் கெடுபிடி..!

திருவண்ணாமலை வடக்கு மாவட்டச் செயலாளரும், செய்யாறு தொகுதி அ.தி.மு.க., எம்.எல்.ஏ-வுமான துசி.கே.மோகன் அவர்களின் மாமா குப்புசாமி, நேற்று காலை இயற்கை எய்தினார். அவரது இறுதிச் சடங்கில் பங்கேற்க மருமகனான மோகனுக்கு தகவல் அனுப்ப வீட்டில் உள்ளவர்கள் முயற்சித்தனர். ஆனால், அ.தி.மு.க., எம்.எல்.ஏ-க்கள் அனைவரும் தங்கவைக்கப்பட்டிருக்கும் 'கோல்டன் பே' ரிசார்டில் ஜாமர்கள் பொருத்தப்பட்டிருப்பதால்,எம்.எல்.ஏ., மோகனை தொடர்புகொள்வதில் குடும்பத்தினருக்கு சிக்கல் இருந்தது.

பின், ஒருவழியாக தகவல் அனுப்பப்பட்டு, மதியம் 3 மணியில் இருப்பதுபோல் சொந்த ஊருக்குப்போனார், எம்.எல்.ஏ., மோகன். அங்கு அவருக்கு 40 நிமிடங்களுக்குமேல் இறுதிமரியாதை செலுத்த அனுமதி தரவில்லை சசிகலா தரப்பினர். இதனால் செம அப்செட்டில் இருக்கிறார்கள். எம்.எல்.ஏ. மோகனும், அவரது உறவுக்காரர்களும்.

-- நன்றி விகடன்

Read More

"என்ன தீர்ப்பு வந்தாலும் அதை இன்முகத்தோடு ஏற்றுக்கொள்வோம்" சசிகலா பகீர் பேட்டி.

பரபரப்பான சூழ்நிலையில் நேற்று இரவு தனியார் தொலைக்காட்சிக்கு பேட்டி கொடுத்திருந்தார் சசிகலா. அதில் முக்கியமாக, சொத்துகுவிப்பு வழக்கு தீர்ப்பு எப்படி வெளியாகும் என்ற கேள்விக்கு, "என்ன தீர்ப்பு வந்தாலும் அதை நாங்கள் இன்முகத்தோடு ஏற்றுக்கொள்வோம்." என பதில் கொடுத்திருந்தார்.  இந்த பேட்டி அப்படியே இங்கே...

"நீங்கள் தொடர்ந்து ஆளுநரிடம் வலியுறுத்தியும், இந்த  காலதாமதத்திற்கு என்ன காரணம்?"

"எங்களிடம் 129 சட்டமன்ற உறுப்பினர்கள் இருக்காங்க. இந்த லிஸ்ட்டை ஆளுநரிடம் கொடுத்து உரிமை கேட்டோம். ஆனால், இதுவரை அவர்களிடம் இருந்து எந்த அழைப்பும் இல்லை. என்னைப் பொறுத்தவரை இத்தனை நாட்கள் பொறுத்துவிட்டோம். இனியும் என்ன தான் செய்கிறார்கள் என்று பார்ப்போம்."

"ஆளுநரின் இந்த காலதாமதத்திற்கு காரணம் பா.ஜ.க-வும் தி.மு.க-வும்-னு நீங்க ஏற்கனவே சொல்லி இருந்தீங்க..."

குறுக்கிடுகிறார், "இந்த கருத்தை வெளியில் உள்ளவங்கதான் பேசிட்டு இருக்காங்க. இதை எல்லாம் நான் கூர்ந்து கவனிச்சு இருக்கேன். அதுதான்."

"ஓ.பன்னீர்செல்வம் 2012-ம் ஆண்டிற்கு பிறகு உங்களை சந்திக்கவே இல்லை. ஜெயலலிதா மருத்துவமனையில் இருந்தபோது மட்டும்தான் பேசினேன் என சொல்லி இருக்கிறாரே?"

"இது இங்குள்ள அமைச்சர்களுக்கே தெரியுமே. அவர் பேசினாரா இல்லையானு. இப்ப அவர் எதுவுமே தெரியாத மாதிரிதான பேசிட்டு இருக்கார். அப்படி இருக்கும்போது இதை எப்படி அவர் ஒத்துக்குவார்? இப்ப அவர்  எங்கிருந்தோ வானத்தில் இருந்து குதிச்சுவந்த பன்னீர்செல்வம் மாதிரிதான் எங்களுக்குத் தெரியுது. ஆனால், கோபாலபுரத்தில் இருந்து குதிச்சாரா? என்பது எங்களுக்குத் தெரியாது." சிரிக்கிறார்.

"ஓ.பன்னீர்செல்வம் தியானத்தில் அமர்ந்தபின் தான், உங்க மீது குற்றச்சாட்டு எல்லாம் வைச்சாரே... அவர் அங்க போக போகிறார் என்பது உங்களுக்கு முன்கூட்டியே தெரியுமா?"

"நான் கேள்விபட்டது. அவர் கூட சில டைரக்டர்கள் இருக்காங்களாம்.  அவங்க என்ன சொல்லுறாரோ... அதுபடிதான் அவர் செய்வதாக சொல்லுறாங்க. (சிரிப்பு) எனக்கு தெரிஞ்சு அங்க போய் உட்கார்ந்த காரணம் என்னென்னு நான் நினைக்கறேன்னா... கொஞ்சம் நேரம் உட்கார்ந்திருந்தால்... என்னமோ ஏதோனு நீங்க எல்லாம் (மீடியாக்காரங்க) போய்டுவீங்கல்ல. அதுக்காக பண்ண மாதிரிதான் தெரியுது."

"எம்.எல்.ஏ-க்கள் எல்லாரையும் கூவத்தூரில் அடைத்து வைத்து உள்ளதாக குற்றாச்சாட்டு எழுகிறதே..." குறுக்கிடுகிறார்.

"என்ன சொல்லிறீங்க? புரியலையே...." என்றதும், மீண்டும் கேள்வியை கேட்கிறார் செய்தியாளர்.

"இல்லைங்க. சட்டமன்ற உறுப்பினர்கள் அனைவரும் அவங்க தொகுதிக்கு சென்று மக்கள் கருத்தை அறிந்தபிறகு, இங்கு வரட்டும், உங்களுக்கு ஆதரவு தெரிவிக்கட்டும்'னு பலரும் சொல்லுறாங்களே.."

"ஏங்க ஒண்ணா சேர்ந்து, இருக்குற இடத்துலேயே அவரு  (ஓ.பி.எஸ்) ஆளை தூக்கிட்டுப் போய்டுவோம்னு சொல்லுறாரே... இவங்க எல்லாரும் ஒற்றுமையாக, இங்க சுதந்திரமாகத்தான் இருக்காங்க. இதில் ஒன்றும் தவறு இல்லையே...."

 "தீர்ப்பு வெளிவரப்போகுது. எப்படி வரும்னு நினைக்கறீங்க?"

"என்னைப் பொறுத்தவரை.. என்ன தீர்ப்பு வந்தாலும் அதை நாங்க இன்முகத்தோடு ஏற்றுக்கொள்வோம்."

"சரி, இந்தப் பிரச்னை எல்லாம் முடிந்து. நீங்கள் முதல்வராக பதவியேற்றால்... முதல் கையெழுத்தை எதற்கு போடுவீர்கள்?"

-- நன்றி விகடன்

Read More

சசிகலா ஆதரவு எம்.எல்.ஏக்களால் கோல்டன் பே ரிசார்ட்டுக்கு வந்த சோகம்!

கூவத்தூரில் இருக்கும் கோல்டன் பே ரிசார்ட் மீது தான் தற்போது தமிழகத்தில் அனைவரின் கவனமும் உள்ளது. முதலில் சசிகலா ஆதரவு எம்.எல்.ஏக்கள் அடைத்து வைக்கப்பட்டிருக்கிறார்கள் என்ற புகார். அடுத்து இங்கு செய்தி சேகரிக்கச் சென்ற பத்திரிகையாளர்கள் மீது தாக்குதல் என்ற புகார். நேற்று சசிகலா இங்கு யாரையும் அடைத்து வைக்கவில்லை என பேச தமிழகம் முழுவதும் ரிசார்ட்டை சுற்றியே உள்ளது.

டாக் ஆஃப்தி டவுனாக இருக்கும் இந்த விடுதி எப்படி இருக்கும். உள்ளே எம்.எல்.ஏக்கள் எப்படி  இருக்கிறார்கள், அவர்களுக்கான ஒருநாள் செலவு என பல செய்திகள் வந்தாலும் தற்போது மோசமான பாதிப்பு ஒன்று ரிசார்ட்டுக்கு வந்துள்ளது. இந்த ஆபத்து கூகுள் மூலம் வந்துள்ளது தான் ஆச்சர்யம். கூகுள் மேப்ஸில் பதியப்பட்டிருக்கும் இந்த ரிசார்ட் அங்கு தங்குபவர்களின் ரிவியூக்களால் கெத்தாக இருந்தது. சராசரியாக 4 ஸ்டார் என்ற அளவில் இருந்த ரிசார்ட்டின் ரேட்டிங் கடந்த ஒரு வாரத்தில் வெகுவாக குறைந்து 3.4 என்ற மோசமான ரேட்டிங்கில் உள்ளது. கடந்த வாரத்தில் மட்டும் 50-க்கும் மேற்பட்ட 1 ஸ்டார் ரிவியூக்களால் மதிப்பை இழந்துள்ளது

அதில் வந்திருக்கும் கமென்ட்டுகள் எம்.எல்.ஏக்களுக்கு ஏன் ஆதரவு தருகிறது, மொத்த தமிழகமும் இங்கு தான் முடங்கியுள்ளது. எம்.எல்.ஏக்கள் ஒளிந்து கொள்ள ஏற்ற இடமாக இது உள்ளது. என 50-க்கும் மேற்பட்ட ரிவியூக்களை அள்ளி வழங்கியதோடு மோசமான கமென்ட்டுகளை குவித்துள்ளனர்.

இதற்காக சில ரிசார்ட்காரர்களும் சமீபத்தில் 5 ஸ்டார் ரேட்டிங் கொடுத்து இந்த சரிவை சரிசெய்யப்பார்த்துள்ளனர். ஆனாலும்  ரேட்டிங் இறங்குமுகத்திலேயே உள்ளது. இதனை மக்கள் செய்வது இது முதல் முறையல்ல பிக் பில்லியன் டேக்களின்போது பொருட்கள் கிடைக்காத மக்கள் ஃப்ளிப்கார்ட் நிறுவனத்துக்கு 1 ஸ்டார் ரேட்டிங்களை அள்ளி வழங்கினர்.

தனிப்பட்ட ஒரு நிறுவனமாக இருந்தாலும் மக்கள் விருப்பத்துக்கு எதிராக இருந்தால் ஸ்டார் ரேட்டிங்கில் கீழ் இறக்குவது மக்களின் ஆன்லைன் மனநிலையாக உள்ளது. இதே விஷயம் தான் கோல்டன் பே ரிசார்ட்டுக்கும் நடந்துள்ளது. நாளையே எம்.எல்.ஏக்கள் இந்த ரிசார்ட்டை விட்டுச் சென்றாலும் இந்த ரேட்டிங் மாறாது. வெளிநாட்டு பயணிகளுக்கு இங்கு நடக்கும் அரசியல் சூழலால் இந்த ரேட்டிங் குறைந்துள்ளது என்றும் தெரியாது. அவர்கள் பார்வையில் குறைவான ரேட்டிங் கொண்டது என்பதே இருக்கும்.  இதனால் அதன் வர்த்தகமும் பாதிப்படையும்.

யார் வேண்டுமானாலும் ஆட்சி அமைக்கலாம். ஆனால் சமீபகாலமாக அ.தி.மு.க-வின் செயல்பாடுகள் சில நிறுவனங்களின் ரேட்டிங்கை குறைத்துள்ளது. இதே விஷயம் தான் அப்போலோ மருத்துவமனை விவகாரத்திலும் நடந்துள்ளது என்பது குறிப்பிடத்தக்கது.

-- நன்றி விகடன்

Read More

இந்த வாரம்... தமிழனை வச்சு செய்த வாரம்!

 தமிழக அரசியல் களத்தில் கடந்த ஒரு வாரம் எக்கச்சக்கத் திருப்பங்கள். 'நம்ம ஊருக்கு என்னதான் ஆச்சு... சூழும் அறிக்கைகளும், பிரேக்கிங் நியூஸ்களும்...'னு மொத்தத் தமிழ்நாடே மல்லுக்கட்டிக்கிட்டுக் கிடக்கு. `முதல்வர் பதவிக்காக இந்த ஒருவாரத்தில் அப்படி என்னதான் நடந்துச்சு..?'  இதோ ஒவ்வொரு காட்சியாக பார்க்கலாம் வாங்க...

முதல்வர் ஓ.பி.எஸ் தனது முதல்வர் பதவியை ராஜினாமா செய்வதாக, ஆளுநரிடம் கடிதம் கொடுத்ததும், 'சின்னம்மா' முதல்வராவதற்கான தீர்மானம் நிறைவேற்றப்படுகிறது. செய்தியைக் கேள்விப்பட்டதும் மக்கள், 'என்னடா இது தமிழ்நாட்டுக்கு வந்த சோதனை'ன்னு பொங்க ஆரம்பிக்கிறார்கள்.

சொத்துக்குவிப்பு வழக்கில் தீர்ப்பு அடுத்த வாரம் வெளியாகும் எனத் தகவல் வெளியாகிறது. ஆளுநர் தமிழகத்துக்கு வரமுடியாத சூழல் நிலவுகிறது. ரெண்டு பக்கமும் அடி விழ, 'சின்னம்மா'வின் பதவியேற்பு தள்ளிப் போகிறது.
பிறகுதான் தொடங்குகின்றன ரணகள ட்விஸ்ட் காட்சிகள். திடீரென, அன்று இரவு அம்மா சமாதிக்குச் சென்று தியானம் செய்கிறார் ஓ.பி.எஸ். தன் ஞானக் கண்களைத் திறந்து விழித்ததும், ' ' சசிகலா என்னைக் கட்டாயப்படுத்தி கையெழுத்து வாங்கினார்'... அம்மா' ஆன்மாவின் உத்தரவுப்படி செயல்படுவேன். மக்கள் விரும்பினால் முதல்வராவேன்!'' என ஜென் துறவியாய் தியானம் செய்தவர் ஜெட்லீ போல பாய்ந்து பாய்ந்து அட்டாக் கொடுத்து போயஸ் கார்டனை கிடுகிடுக்க வைக்கிறார்.
'மிக்ஸர்' பன்னீர் மாஸ் காட்டிட்டார் எனப் பலவாறாகப் புல்லரிக்கிறார்கள் நெட்டிஸன்ஸ். ஓவர்நைட்டிலேயே #WeSupportOPS டேக்கில் பன்னீருக்கு பாராட்டுகள் தெறிக்கின்றன.

வெலவெலத்துப்போன அமைச்சர்கள் போட்டது போட்ட இடத்திலேயே கிடக்க,  போயஸ் தோட்டத்துக்கு விரைகிறார்கள். போகும் வழியிலேயே ஓ.பி.எஸ்ஸைத் தாக்கிப் பேட்டி தட்டுகிறார்கள்.
ஃபுல் மேக்கப்போடு கேட்டுக்கு வெளியே வந்த 'சின்னம்மா', ''ஸ்டாலினும் ஓ.பி.எஸ் ஸும் சிரிச்சுக்கிட்டாங்க. அப்பவே எனக்கு சந்தேகம்..'' எனச் சின்னப்புள்ளைத் தனமாக அள்ளிப் போடுகிறார்.
பொருளாளர் பதவியில் இருந்து ஓ.பி.எஸ்ஸை நீக்குவதாக அறிவிக்கிறார் சசிகலா. `'சிரிக்கிறதுலாம் ஒரு குத்தமாம்மா..? என்னை நீக்குறதுக்கு சசிகலாவுக்கு எந்த உரிமையும் இல்லை. அது 'அம்மா' கொடுத்த பதவி'' என ஓ.பி.எஸ் சரவெடியாய்த் தகிக்க உக்கிரமாகிறது அரசியல் களம்.
ஓ.பி.எஸ்-ஸுக்கு பரிதி இளம்வழுதி, மைத்ரேயன் உள்ளிட்ட சில அ.தி.மு.க பிரமுகர்களின் ஆதரவும் கிடைக்கத் தொடங்குகிறது. 'ஜெயலலிதா மரணம் குறித்த விசாரணைக் கமிஷன் அமைக்கப்படும்' என உறுதி அளித்து எரியும் கொள்ளியில் கொஞ்சூண்டு பெட்ரோலையும் தெளிக்கிறார் பன்னீர்.

அந்தப்பக்கம் சசிகலா டீம் கலவரமாகிறது. அவசர அவசரமாக எம்.எல்.ஏ க்கள் கூட்டத்தைக் கூட்டுகிறார்கள். அந்தக் கூட்டத்தில் மணப்பாறை எம்.எல்.ஏ நகர்ந்து டீ கடைக்குப் போக `ஆஹா... தப்பிச்சிட்டாரோ..?' எனத் தேடுதல் வேட்டையில் இறங்குகிறார்கள். போனவர் சாவகாசமாக வந்து 'ஒரு டீ குடிக்கப் போனது ஒரு குத்தமாய்யா...' எனப் பம்முகிறார்.
சசிகலா சீக்கிரம் பதவியேற்க வேண்டும் என 'சொந்தக்கருத்து' சுப்ரமணியன் சுவாமி ட்வீட் போட்டு அவர் பங்குக்கு டன் டன்னாக மண்ணள்ளிப் போட்டுக் கொண்டிருந்தார். இவர் ஆட்டத்தில் 'ஜோக்கர்' எனத் தெரியாமலேயே எல்லா சீனிலும் வருவார் என்பதால் கண்டுக்காம அப்படியே கடந்து போய்டுங்க...
`இவிங்களை எல்லாம் இப்படியே விட்டா எஸ்கேப்பாய்டுவாய்ங்களே..?!' என எடக்குமடக்காக யோசித்தபின் ஆரம்பிக்கிறது ஷங்கர்  பட க்ளைமாக்ஸ் அத்தியாயம்.
எல்லா எம்.எல்.ஏ க்களையும் இரண்டு பஸ்களில் ஏற்றி ஏரியாவைச் சுத்திக் காட்டுகிறார்கள். 'ஊட்டிக்கு டூர் போகும் ரேஞ்சில் படம் பார்த்துக்கொண்டு ஜாலியாக சென்னையைச் சுற்றித் திரிகிறார்கள் எம்.எல்.ஏ க்கள். நேரம் ஆக ஆக லேசாகத் தொண்டையைக் கவ்வத் தொடங்குகிறது.
மக்கள் ஓ.பி.எஸ் ஸுக்கு ஆதரவாகச் செயல்படத் தொடங்குகிறார்கள். கட்சித் தொண்டர்கள் மத்தியில் காட்சிகள் மாறுகின்றன. சேம் மொமெண்ட்டில், ஓ.பி.எஸ்ஸுக்கு ஆதரவு தருபவர்களை எல்லாம் அடுத்த நிமிடமே பதவியில் இருந்து தூக்கி அடிக்கிறார் சசிகலா. `இப்படியே போனா நாம இருபது பேர்தான் இருப்போம்' எனத் தனக்குத் தானே கலாய்த்துக் கூலாகிக் கொள்கிறார்கள் குடும்ப உறுப்பினர்கள்.
இந்தக் களேபரங்களுக்கு மத்தியில் இன்னொரு கேரக்டர் இருக்குமே... அதான் தீபா.  வழக்கம்போல 'சிவனேனு' உட்கார்ந்து டி.வி நியூஸ் பார்த்து கலகலப்பாகிறார். 'பின்னால் அதிரடியாய் அறிவிப்பேன்!' என்று சொன்னவரின் பின்னால் வெட்டவெளியைப்பார்த்து சோகமாகிறான் தீபாவில் அம்மாவைப் பார்த்த அப்பாவி கழகத் தொண்டன்!
ஒருபக்கம் சசி உருவபொம்மை, இன்னொரு பக்கம் ஓ.பி.எஸ் உருவபொம்மைகள் என மாற்றி மாற்றி மண்ணெண்ணெய் ஊத்திக் கொளுத்தி விளையாடுகிறார்கள். எப்போவும் போல நம்ம கமல் தெள்ளுநடைத் தமிழில் ட்வீட்களைப் போட்டுப் பொளக்கிறார். அதைக் காப்பி பண்ணி ட்ரான்ஸ்லேட்டரில் போட்டுப் படிக்கிறான் தமிழன்.
அன்னிக்குப் பூராம், ஒவ்வொரு டி.வி கம்பெனியாப் போய் 'எக்ஸ்க்ளுசிவ்' பேட்டி தட்டுகிறார் பன்னீர். மக்கள் மத்தியில் பன்னீர் கெத்து காட்ட சசிகலாவும் மீடியா முன் வரவேண்டிய கட்டாயம் ஏற்படுகிறது. அன்று இரவே டி.வி. யில் வந்து கண்கலங்குகிறார் சசி. ``இது தி.மு.க சதி!'' எனவும் குற்றம் சாட்டுகிறார். 'ஏன்யா... இம்புட்டுநேரம் நல்லாத்தானே போச்சு.. உங்க பஞ்சாயத்துல எங்களை ஏன் இழுத்து விடுறீங்க' என குழம்பினார்கள் உடன்பிறப்புகள்.

சசிகலா அணியும், பன்னீர் அணியும் மட்டுமல்லாமல் ஒட்டுமொத்தத் தமிழகமும் ஆளுநருக்காகக் காத்திருந்தது. `இந்தா வாறேன்... அந்தா வாறேன்' என இழுத்தடித்து ஒரு வழியாக அடுத்த நாள் மாலை சென்னை வந்து சேர்ந்தார் ஆளுநர்.
அதற்குள் பஸ்ஸில் குண்டுக்கட்டாக ஏற்றப்பட்ட மொத்த எம்.எல்.ஏ க்களும் கூவத்தூரில் இருக்கும் கோல்டன் பே ரிசார்ட்டில் குதூகலமாகத் தங்கவைக்கப் பட்டனர். குனிந்து குனிந்து ட்ரெய்ன் ஆகியிருந்த எம்.எல்.ஏ க்களில் ஒருவர் அப்படியே அண்டர்க்ரவுண்டிலேயே தவழ்ந்தபடி எஸ்ஸாகி எதிரணியில் தஞ்சம் புகுந்தார்.
எம்.எல்.ஏ -க்கள் மொத்தமாகப் பதுக்கப்பட, தி.மு.க செயல் தலைவர் ஸ்டாலின் முதல் தொகுதி மக்கள் வரை... எம்.எல்.ஏ க்கள் கடத்தப்பட்டதாகவும், பிணைக்கைதிகளாக அடைத்து வைக்கப்பட்டிருப்பதாகவும் 'கண்டுபிடிச்சுத் தாங்க... நாங்க வெச்சு செஞ்சிக்கிறோம்...' எனக் கொந்தளித்து கமிஷனர் ஆபிஸில் கம்ப்ளெயின்ட்களைக் கொட்டினார்கள்.
இப்படி ஒருபக்கம் எம்.எல்.ஏ க்களைத் தேடிக் கொண்டிருக்க, ரிசார்ட் வட்டாரத்தில் `ஜெயக்குமாரைக் காணோம்' என வலைவீசித் தேடினார்கள். 'எங்க போயிடப்போறோம்... இந்தா உங்க பொடணிக்குப் பின்னாடிதான் நிக்கிறோம். ஓவர் ஓவர்!' எனக் குரல் கொடுத்தது ஜெயகுமார் தரப்பு.
'சின்னம்மா'வுக்கு சிந்துபாடிய 'பெரியக்கா' வளர்மதி, 'எம்.எல்.ஏ க்களுக்கு பன்னீர் தரப்பு போனில் மிரட்டல் விடுப்பதால்தான் சுவிட்ச் ஆஃப் பண்ணி வெச்சுருக்காங்க' என வகைதொகை இல்லாமல் அள்ளி வீச, 'ஏம்மா... நீ வாய வெச்சுக்கிட்டு சும்மாவாச்சும் இரும்மா..' என கார்டன் தரப்பே கொந்தளித்தது.
இது ஒருபக்கம் நடக்க, மதுசூதனனும் ஓ.பி.எஸ் பக்கம் ஜம்ப் அடித்தார். உடனே சின்னம்மா, 'மதுசூதனை கட்சியிலிருந்து நீக்கிவிட்டதாக அறிக்கை தட்ட, கொந்தளித்த மதுசூதனன், 'நீ என்ன என்னைத் தூக்குறது? அந்தம்மாவ நான் தூக்கிட்டேன்' என கிளைமாக்ஸ் வில்லன்போல் ரீ-ட்வீட் போட்டுக் கொந்தளித்தார்.
அடுத்தடுத்த நாட்களில் அரங்கேறியதெல்லாம் உச்சபட்ச ஸ்டன்ட். ``எம்.எ.ஏ-க்களை யாரும் கடத்தி வைக்கவில்லை. அவர்கள் விருப்பத்தோடுதான் ஹோட்டலில் தங்கியுள்ளனர். பன்னீர்செல்வம் ஆதாரமில்லாமல் குற்றம் சாட்டுகிறார்'' என முந்தைய நாள் பேசிய மாஃபா.பாண்டியராஜன் அடுத்த நாள் ஆப்பொனன்ட் டீமுக்கு ஆதரவாக 'அவுட்' காட்டினார். 'இருக்கின்ற மேடையிலேயே கட்சி தாவும் துணிச்சலும் தைரியமும் அண்ணன் ஒருவருக்குத்தான் உண்டு...' என ரவுண்டுகட்டிக் கலாய்த்தார்கள் நெட்டிஸன்கள்.

ஒவ்வொருத்தராக எதிர் முகாமுக்குத் தாவ, செய்வதறியாமல் கலங்கிப் போன சசிகலா, அன்னைக்கு மத்தியானமே வண்டியைக் கூவத்தூருக்குக் கிளப்பினார். கொஞ்சம் ஆவேசமான 'சின்னம்மா' ஆளுநரையும் வம்பிழுக்க, 'ஹைய்யா... சின்னம்மா பயந்திடுச்சு...' என நிமிர்ந்து அமர்ந்தார்கள் எதிரணியினர்.
'சின்னம்மாவை ஶ்ரீராம் சிட்ஃஃபன்ட்ஸ்ல நாமினியா நியமிச்சிருக்காங்க... சின்னம்மாதான் அடுத்த வாரிசு' என 'அம்மா' சமாதியிலேயே வலுவான 'ஆதாரங்களோடு' அடித்துப் பேசிய பொன்னையன் அந்தர் பல்டி அடித்து, பன்னீர் வண்டியில் லிஃப்ட் கேட்க, 'இந்த பீஸையெல்லாம் இனி அடிச்சு என்ன ஆகப் போவுது..?' என வழிவிட்டு ஏற்றிக் கொண்டது பன்னீர் தரப்பு!
'பன்னீருக்கு பா.ஜ.க சப்போர்ட் இருக்கு...' என சசிகலா தரப்பு குமுறிக் கொண்டிருக்க, 'ஆமா... இப்போ அதுக்கு என்னான்ற..?' என ஓப்பன் டாக் கொடுத்தார் தமிழிசை.
ஒவ்வொரு நாளும் மாறும் காட்சிகளைப் பார்த்து 'சுர்ரென' ஏறிய சசிகலா, ``எல்லாத்துக்கும் ஒரு எல்லை இருக்கு. ஓரளவுக்குத்தான் பொறுமை. நாங்க செய்யவேண்டியதைச் செய்வோம்''னு வாய்தவறிச் சொல்லிவிட... 'ஆஹகா' என உற்சாகமாகி  'செய்... செய்'யெனச் செய்து ட்ரெண்டாக்கினார்கள் சோஷியல் மீடியா நெட்டிசன்ஸ்.
ஓ.பி.எஸ் - சசிகலா பஞ்சாயத்துகளுக்கு மத்தியில், ஒரு க்ராஸ் டாக் (Talk) குறுக்கால புகுந்து ஓடிக்கொண்டிருந்தது. இதில் உச்சமாக 'ஆளுநர் மீது வழக்குப் போடுவேன்' என அள்ளி விட, 'மொத்த மேட்டரையும் இந்தாளு திருப்பி விட்ருவாரு போலயே'ன்னு 'சுப்ரமணியன் சுவாமியின் கருத்துக்கும் பா.ஜ.கவுக்கும் சம்பந்தம் இல்லை' என அழாத குறையாக விம்மினார் தமிழிசை.
'இவரை நீங்க முதல்வராக்கலாமே ப்ரெண்ட்ச்...' என எகிடுதகிடாக ஆர்.நட்ராஜை முன்மொழிந்தார் முன்னாள் உச்சநீதிமன்ற நீதிபதி கட்ஜு. 'நான் கேட்டேனா முருகேசா...' கணக்காக நட்ராஜ் அவரைப் பார்த்து முறைக்க, அதுவும் போகிறபோக்கில் நடக்கிற காமெடியாகக் கடந்தனர் தமிழக ஜனங்கள்.
பார்க்க நிழல்கள் ரவி போலவே இருப்பதாலோ என்னவோ நல்லவரா கெட்டவரா என குழப்பத்தை உண்டு பண்ணுகிறார் நம் ஆளுநர் வித்யாசாகர் ராவ்.  'யார் வந்தாலும் அரைமணிநேரம்!' என கோட்டா ஒதுக்கி போஸ் கொடுத்து மர்மத்தை நீட்டிப்பதெல்லாம் நீ...ட்...டு!
இதற்கிடையே, எம்.எல்.ஏ க்கள் ஓ.பி.எஸ் பக்கம் தாவுவதைத் தடுக்க, பொறுமையாகப் போயஸுக்கும், கூவத்தூருக்கும் மாறிமாறி அலைந்து கொண்டும், காருக்குள் உட்கார்ந்தபடி வின்டோ சீட் பேட்டி தட்டிக் கொண்டும் பொழுதைப் போக்குகிறார் `மாண்புமிகு' சின்னம்மா!
``வந்தவங்களுக்கு எல்லாம் சாப்பாடு இருக்கு... சாப்பிட்டப்புறம் வரக்காப்பி இருக்கு... பின்னாடி கொல்லை இருக்கு!'' என ஊரிலிருந்து வந்தவர்களை உபசரித்தபடி  டயர்டாகாமல் பேட்டி தட்டிக் கொண்டிருக்கிறார் முதல்வர் ஓ.பி.எஸ்!

-- நன்றி விகடன்

Read More

'ஜெயலலிதா ஆக நினைத்து வளர்மதி ஆகிக் கொண்டிருக்கிறீர்கள்!' சசிகலாவுக்கு தமிழக பெண்களின் சார்பாக ஒரு கடிதம்!

''தலைவரு இறந்தபோது... அம்மாவ என்ன பாடு படுத்துனாங்க? ஒரு விஷயம் முக்கியமா கவனிக்கணும். ஒரு பெண்ணு... பெண்ணு எப்படி கட்சியில வந்து வர்றது... அப்படீங்கிறத வந்து காமிச்சாங்க. இப்பயும் அதே தோரணதான். அன்னைக்கு எந்தக் கூட்டம் அம்மாவ எதிர்த்துச்சோ... அதே கூட்டம்தான் இன்னைக்கும் செய்யுது'' ஞாயிறு இரவு கூவத்தூரில் நீங்கள் பேசிய பேச்சு இது சசிகலா.

பொட்டு, பிளவுஸில் தொடங்கி உங்கள் பேச்சு வரை அனைத்திலும் உங்களை நீங்கள் ஜெயலலிதாவுக்கான மாற்றாக நிறுவத் துடிக்கிறீர்கள். 30 ஆண்டுகளாக தமிழக அரசியலில் ஆதிக்கம் செலுத்திய ஆளுமைப் பெண் ஜெயலலிதாவுக்கு மாற்றாக, ஒன்றரை மாத அரசியல்வாதியான நீங்கள் உங்களை ஏற்றுக்கொள்ளச் சொல்லிக் கேட்கிறீர்கள். 'முடியாது' என்பது தமிழகத்தின் பதில். குறிப்பாக, அரசியல் பேச்சுகளில் பெரும்பாலும் ஒதுங்கி இருக்கும் நாங்கள்கூட, இப்போது முழுநேரம் செய்தி சேனல்களை பார்த்தபடி இருக்கிறோம். 'சசிகலா வேண்டாம்' என்ற உறுதி எங்களுக்குள் இறங்கியிருக்கிறது. உபயம், நீங்களேதான் திருமிகு சசிகலா.

1989-ம் ஆண்டில் தமிழக சட்டசபையில், ஆட்சியில் இருந்த தி.மு.க-வினரால் அவைத் தலைவர் முன்னிலையிலேயே அவமானப்படுத்தப்பட்டார் ஜெயலலிதா. தன் கிழிந்த புடவையுடன் அவையைவிட்டு வெளியேறியபோது, இந்த அரசியல் அவருக்கு உட்சபட்ச கண்ணீரைத் தந்தது. பச்சாதாபம் தேடும் தருணத்திலும், 'கருணாநிதி  முதல்வராக இருக்கும்வரை இந்த அவைக்கு நான் வரமாட்டேன்' என்ற அவரின் சூளுரையில் இருந்து, 'ஜெ.ஜெயலலிதாவாகிய நான்' என்று அவர் ஆறாவது முறை முதல்வராகப் பதவிப் பிரமாணம்செய்துகொண்டது வரை, தமிழக அரசியலில் மட்டுமல்ல, நாட்டின் மூன்றாவது பெரிய கட்சியாக இந்திய அரசியலில் இடம்பிடித்தது வரை, அவரின் ஆளுமை அண்ணாந்து பார்க்கக்கூடியது. எங்கள் அம்மா தலைமுறைப் பெண்களுக்கும், எங்களுக்கும், இப்போது எங்கள் பெண் பிள்ளைகளுக்கும், அரசியல் சார்பு தாண்டியும் அவரைப் பிடிக்க, வரலாற்றில் பல காரணங்களை விட்டுச் சென்றுள்ளார் ஜெயலலிதா. அவரின் இடத்தில் உங்களை ஏற்றுக்கொள்ளச் சொல்கிறீர்களே சசிகலா... உங்களைப் பற்றி இதுவரை நீங்கள் எங்களுக்குத் தந்துள்ள பிம்பம் என்ன தெரியுமா?



'ஜெயலலிதாவின் தோழி சசிகலா. குடும்பமாக போயஸ் கார்டன் இல்லத்துக்குள் நுழைந்தவர். 'வளர்ப்பு மகனின் ஆடம்பர திருமணம்' என்ற அவப்பெயரை அவருக்கு ஏற்படுத்தியவர். ஜெயலலிதாவின் செல்வாக்கை முன்னிறுத்தி பலரின் நிலங்களை அபகரித்தவர். அந்நிய செலாவணி வழக்கு, சாராய ஆலை உரிமையாளர் என குற்றப் பின்னணி கொண்டவர்.'

இவையெல்லாம் நேற்று. இந்தக் காலகட்டங்களில் எல்லாம், நாட்டில் உள்ள அறத்துக்கு எதிரான அடாவடிக்காரர்களில் ஓர்  அடாவடிக்காரராகத்தான்  உங்களை நாங்கள் பார்த்தோம். அதனால் ஏழோடு எட்டாக உங்களையும் கடந்தோம்.

ஆனால், ஜெயலலிதாவின் மரணத்தைச் சூழ்ந்த சந்தேகங்களுக்கு மையப்புள்ளியாக நீங்கள் ஆனபோது, உங்களை தமிழகம் தனித்து கவனிக்க ஆரம்பித்தது. அப்போலோவில் ஜெயலலிதா சிகிச்சையில்(!) இருந்த நாட்களில், 'எங்க அம்மா முகத்தைக் காட்டுங்க' என்று மாரில் அடித்துக்கொண்டு அழுத அடிமட்ட அ.தி.மு.க பெண்கள் முதல், முகம் பார்க்க அனுமதிக்காமல் திருப்பி அனுப்பப்பட்ட ஆளுநர் வரை, பார்த்த காட்சிகள் அனைத்திலும் 'இவர் ஆபத்தானவர்' என்ற பிம்பத்தை  நாங்கள் உங்கள் மேல் கொள்ளச் செய்தீர்கள். ஜெயலலிதா மறைந்தபோது, கட்சி சார்பு தாண்டியும் தமிழகமே அழுதபோதும், அவர் உடல் பூமிக்குள் இறக்கப்படும் தருணத்திலும்கூட சொட்டுக் கண்ணீர் சிந்தாமல் நின்றிருந்த 'உடன் பிறவா சகோதரி'யான உங்களின் மேல், 'இவரையா அந்த இரும்புப் பெண் நம்பினார்?' என்று ஆற்றாமை கொள்ளவைத்தீர்கள்.

ஜெயலலிதா மறைவுக்குப் பின் அ.தி.மு.க கட்சியில் அரங்கேறிய நாடக மாற்றங்களில், குறிப்பாக 'சின்னம்மா' வசனங்களில், எங்களை இன்னும் முகம் சுழிக்க வைத்தீர்கள் சசிகலா. கழுத்தை ஒட்டிய பிளவுஸ், கொண்டை, பொட்டு, மோதிரம், வாட்ச் என்று உங்களின் 'ஜெயலலிதாவாதல்' முயற்சியை, உங்கள் குடும்ப உறுப்பினர்கள் வேண்டுமானால் மாறுவேடப் போட்டியில் பரிசு வென்று வந்த குழந்தையை வரவேற்கும் குதூகலத்துடன் ரசித்திருக்கலாம். ஆனால் எங்களைப் பொறுத்தவரை, நாங்கள் வியந்த அந்த ஆளுமையுடன் உங்களை ஒப்பிட்டு கீழிறக்க வேண்டிய அவசியத்தை, நீங்களேதான் எங்களுக்கு ஏற்படுத்தினீர்கள்.

ஜெயலலிதாவின் உறவுகளை அவர் மரணத்திலும் தள்ளிநிற்கவைத்தது, அவரின் சொத்துகள் அனைத்தையும் அபகரித்தது, அ.தி.மு.க  பொதுச்செயலாளர் பதவியைக் கைப்பற்றியது வரைகூட, படிக்கப் பிடிக்காத மனநிலையுடன்தான் உங்களைப் பற்றிய அந்தச் செய்திகளை நாங்கள் கடந்தோம். ஆனால் உங்களின் அடுத்த காய் நகர்வுகளின் விளைவாக, 'தமிழகத்தின் மூன்றாவது பெண் முதலமைச்சராகிறார் சசிகலா' என்று வந்த செய்தி, ஏற்றுக்கொள்ள முடியாததாக இருந்தது. 'கடைசியா அது நடக்கவே போகுதா?' என்று நிலைகொள்ளாமல் போனது எங்கள் மனம். அப்போது ஓ.பன்னீர்செல்வம் ஜெயலலிதா சமாதியில் 'என்னை மிரட்டி ராஜினாமா கடிதத்தில் கையெழுத்து வாங்கினார்கள்' என்றதும், அந்தத் திருப்பத்தை நாங்கள் திடுக்கிட்டு வரவேற்றோம். 'ஓ.பி.எஸ் வேண்டுமா என்பது அடுத்த பிரச்னை. ஆனால், சசிகலா வேண்டாம்' என்று எங்கள் மனநிலையை மாற்றுக்கருத்துக்கு இடமில்லாமல் உறுதிப்படுத்தியதும், தொடர்ந்த நாட்களில் தமிழகம் பார்த்த உங்களின் செயல்பாடுகளே.

தேர்தலில் நிற்காமல், மக்களைச் சந்திக்காமல், சட்டமன்ற உறுப்பினர்களை விலைகொடுத்து வாங்கி, ரிசார்ட்டில் அடைத்துவைத்து, 'ஓரளவுக்குதான் பொறுமை' என்று பேட்டி கொடுத்து... 'முதலமைச்சர் நாற்காலிக்காக எதுவும் செய்வேன்' என்கிற ரீதியிலான உங்களின் அணுகுமுறைகள் அனைத்தும் எங்களுக்கு அதிர்ச்சியாக, அச்சமாகக்கூட இருக்கிறது. கூவத்தூரில் எம்.ஏல்.ஏக்களை அவர்களின் வீட்டினரிடம்கூட பேச முடியாத கட்டுப்பாட்டில் அடைத்துவைத்துவிட்டு, அங்கிருந்து நீங்கள் அளித்த பேட்டியில், 'குழந்தைகளை வீட்டில்விட்டு வந்திருக்கும் பெண் சட்டமன்ற உறுப்பினர்கள் இங்கு இருக்கிறார்கள். 'பரவாயில்லம்மா... கட்சிக்காக நாங்க அதை செய்றோம்மா' என்று அவர்கள் என்னிடம் சொன்னார்கள்' என்கிறீர்கள். இதை எப்படி உங்களால் மைக்கின் முன் குற்ற உணர்ச்சி இல்லாமல் பெருமையாகச் சொல்ல முடிகிறது? அதிகாரமிக்க அ.தி.மு.க குடும்பப் பெண்கள், குழந்தைகள் நலனிலேயே உங்கள் அக்கறை இது எனில், பாவப்பட்ட தமிழகப் பெண்கள், குழந்தைகள் நலன் குறித்த உங்கள் நடவடிக்கைகள் எப்படி இருக்கும் என்பதற்கான முன்னோட்டத்தையும் நீங்களே காட்டிவிட்டீர்கள்.

''ஆனா கட்சித் தொண்டன்... ஒவ்வொருத்தரும்... இதவந்து... வேடிக்க பார்த்துகிட்டு சும்மா இருக்க மாட்டாங்க." - கூவத்தூரில் நீங்கள் சொன்ன இந்த வார்த்தைகளில், காவல்துறை தனக்கான குறிப்பை எடுத்துக்கொள்கிறது. நாங்களும் ஒன்றை உணர்ந்தோம். 'ஜெயலலிதாவாதல்' என்ற உங்களின் முயற்சியில் உண்மையில் நீங்கள் இப்போது வளர்மதி வகையறாக்கள் ஆகிக்கொண்டிருக்கிறீர்கள்.


-- நன்றி விகடன்

Read More

பொம்மையைக் காட்டி ஆளுநருடன் விவாதித்த சுப்பிரமணியன் சுவாமி

தமிழக அரசியல் நிலவரம் தமிழகத்தில் மட்டுமல்ல; அகில இந்திய அளவிலும் பிரிவை ஏற்படுத்திவிடும்போல,  நகமும் சதையுமாக இருந்த முதல்வர் ஓ.பன்னீர்செல்வமும், அதிமுக பொதுச் செயலாளர் சசிகலாவும் அதிர்ச்சிகரமாக பிளவுபட்டு நிற்கிறார்கள். இவர்கள் இருவருக்குமிடையேயான பனிப்போர் உச்சகட்டத்தை அடைந்து இப்போது பாஜக, அரசியலமைப்பு சட்டம், கவர்னர் மௌனம் என நாலா திசைகளிலும் விவகாரம் சூடுபிடிக்க ஆரம்பித்திருக்கிறது.

அறுதிப்பெரும்பான்மை எம்.எல்.ஏ-க்கள் தங்களுடன் இருப்பதாக இரண்டு முறை மனு கொடுத்துப் பார்த்தும் இன்றுவரை கவர்னர் அசைந்துகொடுக்கவில்லை. அதேசமயம் ஒவ்வொரு அரைநாளும் சசிகலா அணியிலிருந்து ஒரு எம்.எல்.ஏ, ஓ.பி.எஸ் அணிக்கு ஆதரவு தெரிவித்து வருகின்றனர்.  இந்த எரிச்சலில் 'பொறுமைக்கும் ஓர் எல்லை' உண்டு என சசிகலா பதற்றப்படுகிறார். கவர்னரின் இந்த மௌனத்தின் பின்னணி மத்திய அரசு என நினைக்கிறது சசிதரப்பு. அதை சூசகமாக சொல்லவும் ஆரம்பித்துவிட்டார். இந்த நேரத்தில் சசிகலாவுக்கு ஆதரவான கருத்துக்களுடன் களமிறங்கியிருக்கிறார் பாஜக மூத்த தலைவர் சுப்பிரமணியன் சுவாமி. ஆளுநர் அரசியலமைப்புச்சட்டத்தை பின்பற்றி முடிவெடுக்கவேண்டும் என்று தெரிவித்த கையோடு நேற்றுமுன்தினம் சென்னைக்கு விமானம் ஏறி வந்து ஆளுநரை சந்தித்தார்.

அந்த சந்திப்பில் ஆளுநரிடம் தமிழக நிலவரம் குறித்து அக்கறையுடன் பேசிய சுவாமி, தமிழக அரசியல் நிலவரங்களில் மத்திய அரசுக்கு எந்தவிதமான லாபம் அடையவும் விரும்பலாம். ஆனால் ஒரு ஆளுநராக நீங்கள் அதற்கு ஒத்துப்போய்விடக்கூடாது. மக்களின் மனோபாவம், பொதுக்கருத்து, உள்ளிட்ட பிரச்னைகளை நீங்கள் கருதி முடிவெடுத்தால்அது பின்னாளில் உங்களுக்கே கூட சட்டசிக்கலை ஏற்படுத்திவிடும். அதனால் சசிகலாவை உடனடியாக ஆட்சியமைக்க அழையுங்கள்” என்றவர், தமிழகத்தில் இதற்கு முன் அரசியல் ரீதியான நடவடிக்கையில் ஈடுபட்ட சில முன்னாள் ஆளுநர்களின் பெயர்களை குறிப்பிட்டு, அப்படியான அவப்பெயர் எடுக்கவேண்டாம் எனக் கேட்டுக்கொண்டாராம்.

சுவாமியின் கருத்தை கேட்டுக்கொண்ட ஆளுநர், தான் பாஜகவைச் சேர்ந்தவன் என்றாலும் தனக்கு அரசியல் ரீதியான பார்வையை எப்போதும் வைத்துக்கொள்ளமாட்டேன் எனத் தெரிவித்தவர். தன்னை மிரட்டி ராஜினாமா கடிதம் பெற்றதாக ஒரு முதல்வரே எழுத்துப்பூர்வமாக குறிப்பிட்டு கடிதம் தந்திருக்கிறார். அதன் நம்பகத்தன்மையை உறுதிப்படுத்தாமல் இன்னொரு தரப்பை ஆட்சியமைக்க அழைப்பது சட்ட சிக்கலுக்குள்ளாக்கிவிடும். மேலும் இந்த விவகாரத்தில் இன்னும் பல நுணுக்கமான விஷயங்களையும் கவனிக்கவேண்டியதிருக்கிறது. அதிமுக பொதுச் செயலாளர் தன்னை முதலில் சந்திக்கவந்தபோது எம்.எல்.ஏக்களின் பட்டியலைத்தான் தந்தார். ஆதரவுக்கடிதங்கள் தரப்படவில்லை” என்ற ஆளுநர்,' இதுபற்றியெல்லாம் சட்ட நிபுணர்களிடம் தொடர்ந்து தான் விவாதித்துவருவதாக தெரிவித்தாராம்.

ஆனால் சுவாமி விடாப்பிடியாக , நீங்கள் இதுபற்றி பலரிடமும் பேசி நேரத்தை வீணடிக்கவேண்டாம். 'எஸ்.ஆர் பொம்மை வழக்கில்’ 9 நீதிபதிகள் கொண்ட குழு வழங்கிய தீர்ப்பில் மாநில ஆளுநருக்கான உரிமைகளும் கடமைகளும் தெளிவாக வரையறுக்கப்பட்டுள்ளன. அதைப்படித்துப்பார்த்து ஒரு முடிவெடுங்கள். தாமதம் செய்ய வேணடாம்” என்று கேட்டுக்கொண்ட சுவாமி, “அதற்கான தேதியை எனக்குத் தெரிவியுங்கள்” என சொன்னதை ஆளுநர் ரசிக்கவில்லையாம். ஏற்கனவே இந்த விவகாரத்தில் தமிழக பாஜகவை வறுத்தெடுத்துக்கொண்டிருக்கும் நிலையில் தேவையின்றி கட்சியின் முக்கியஸ்தர் ஒருவர் தன்னை சந்தித்ததும் ஆளுநருக்கு சங்கடத்தை ஏற்படுத்தியதாக சொல்லப்படுகிறது. இதனால் அந்த சந்திப்பு இருவருக்குமே சுமூகமாக அமையவில்லை என்கிறார்கள்.

எஸ்.ஆர்.பொம்மைஇதன் எதிரொலியாகத்தான் சுவாமி மறுதினம், நாளைக்குள் ஆட்சி அமைக்க அழைக்கவில்லையென்றால் யாராவது நீதிமன்றத்தின் கதவுகளை தட்டலாமே என ட்வீட் செய்திருந்தாராம்.

அதேசமயம், தமிழக அரசியல் விவகாரத்தில் சுப்பிரமணியன் சுவாமியின் தலையீட்டை பாஜக தலைமை விரும்பவில்லை. பிளவுபட்ட இரு அணிகளும் கவர்னரின் முடிவுக்காக காத்திருக்கும் நிலையில் கட்சியின் மூத்த தலைவரான சுப்ரமணியன் சுவாமி கவர்னரை சந்தித்து தேவையற்ற சர்ச்சையை ஏன் கிளப்பவேண்டும் என அவர்கள் நினைக்கின்றனர். வெறுமனே சந்திப்புடன் நிறுத்திக்கொள்ளாமல் வெளிப்படையாக சசிகலாவுக்கு ஆதரவான கருத்து தெரிவித்ததையும்,  ஆளுநரின்  முடிவுக்கு காலக்கெடு விதித்ததையும் பாஜக தலைமை ரசிக்கவில்லையாம். கட்சியில் சுதந்திரமான கருத்துக்களை வெளியிட கட்சி அனுமதித்திருக்கும் சுதந்திரத்தை சுவாமி துஷ்பிரயோகம் செய்வதாக அவர்கள் விமர்சித்தார்களாம்.

ஜெயலலிதாவின் இறுதிக்காலத்தில் அவருடன் சுமூக நட்பு பாராட்டிவந்த தான், சில தனிப்பட்ட காரணங்களுக்காகத்தான் சசிகலாவை எதிர்ப்பது தெரிந்தும் சுப்பிரமணியன் சுவாமி இப்படி நடப்பது பிரதமர் மோடிக்கும் வருத்தமாம். இதுதொடர்பாக இருவருக்குமே தொலைபேசி வழி காரசாரமான ஓர் உரையாடல் நிகழ்ந்ததாக சொல்லப்படுகிறது. “ஜெயலலிதா எனக்கு சொன்ன சில தகவல்களின் அடிப்படையில் தனக்கு சசிகலாவை பிடிக்கவில்லை. அதேசமயம் தான் ஓ.பி.எஸ்ஸையும் ஆதரிக்கவில்லை. அதைப் புரிந்துகொண்டு நீங்களும் நடந்துகொள்ளுங்கள்” என பிரதமர் சுவாமியிடம் சொன்னாராம்.

இந்த விவகாரம் குறித்து சுவாமியின் நண்பர்கள் சிலர், “தேவையில்லாமல் இந்தவிஷயத்தில் நீங்கள் மூக்கை நுழைத்து மோடியிடம் அதிருப்தி அடையவேண்டுமா...உங்கள் மீது கட்சி ரீதியான நடவடிக்கை எடுக்க உத்தரவிட்டால் என்ன ஆகும்” என கேட்டனராம். அதற்கு சத்தமாக சிரித்த சுவாமி, “பாஜகவில் என்னை கட்டுப்படுத்தும் சக்தி யாருக்கும் கிடையாது. தனிப்பட்ட முறையில் எனக்கு சசிகலாவா , பன்னீர்செல்வமா என்பதெல்லாம் எனக்கு முக்கியம் இல்லை. எதிர்காலத்தில் இவர்களிடம் போய் ஆதாயம் பார்க்கவேண்டிய அவசியமும் எனக்கு இல்லை. யாராக இருந்தாலும் அரசியல் அமைப்பு சட்டத்தை துஷ்பிரயோகம் செய்வதை என்னால் பார்த்துக்கொண்டிருக்க முடியாது. இரண்டு தனிமனிதர்களின் லாப நட்டத்தைவிட அரசியலமைப்புச் சட்டத்தின் மாண்பு குறைந்துவிடக்கூடாது என்பதுதான் என் நோக்கம். என் நோக்கத்தை புரிந்துகொள்ளாதவர்கள் நான் சசிகலா ஆதரவு நிலைப்பாட்டை எடுத்திருப்பதாக கூறுவது அவர்களின் அறியாமை. சசிகலா இன்று முதல்வராக முடியாத அளவுக்கு சட்டச் சிக்கலுக்குள்ளாகியிருப்பதற்கு நான் தொடுத்த வழக்கு ஒரு முக்கிய காரணம் என்பதை அவர்கள் புரிந்துகொள்ளவேண்டும்.

நான் இப்படி ஒரு முயற்சி எடுக்கவில்லையென்றால்தான் எதிர்காலத்தில் கட்சிக்குத்தான் நீங்காத அவப்பெயர் ஏற்படும். அந்த நல்ல நோக்கத்தில்தான் ஆளுநரை காணச் சென்றேன். தைரியம் இருந்தால் அது தவறென்று சொல்லி என் மீது கட்சி நடவடிக்கை எடுக்கட்டும்... அப்புறம் பார்க்கலாம்” என சத்தமாக சொல்லி சிரித்தாராம். 

Read More