போயஸ் தோட்டத்தை விடக் கூடாது; தினகரனுக்கு சசிகலா அறிவுறுத்தல்

ஜெயலலிதாவுக்குப் பின், அவர் வசித்த போயஸ் தோட்டத்தை நிர்வகித்து கொண்டிருந்தார் சசிகலா. தற்போது அவர் ஜெயிலுக்குப் போய்விட்ட சூழ்நிலையில், போயஸ் தோட்டத்தை நிர்வகிப்பது யார் என்ற கேள்வி எழுந்துள்ளது.

யாருக்கு செல்லும்?

இது குறித்து போயஸ் தோட்டத்து வட்டாரங்களில் கூறியதாவது:

ஜெயலலிதா பெயரில் இருக்கும் போயஸ் தோட்டம் இல்ல பராமரிப்பை, இது நாள் வரையில் சசிகலா கவனித்து வந்தார். ஜெயலலிதா இறந்து போன நிலையில், போயஸ் தோட்டம் இல்லம் யாருக்கு செல்லும் என்ற எதிர்பார்ப்பு, அ.தி.மு.க., வட்டாரத்திலும், பொது மக்களிடம் இருந்தும் எழுந்துள்ளது.

அச்சத்தில் சசிகலா தரப்பினர்:

இதற்கிடையில், ஜெயலலிதாவின் அண்ணன் மகள் தீபாவும், போயஸ் தோட்டம் இல்லம் குறித்தெல்லாம் கேள்வி எழுப்ப, அவரது ஆதரவாளர்கள், திடீரென, போயஸ் தோட்டத்தை முற்றுகையிட்டு, அதை கைப்பற்ற முயற்சிக்கலாம் என, சசிகலா தரப்பினர் அச்சம் கொள்ள ஆரம்பித்தனர். இதனால், வழக்கமாக இல்லாத அளவுக்கு, பிரைவேட் செக்யூரிட்டிகளும், கட்சிக்காரர்களும் போயஸ் தோட்டத்தில் குவிக்கப்பட்டனர். 24 மணி நேரமும், போயஸ் தோட்டம் இல்லத்தை பாதுகாத்து வருகின்றனர்.

சசியின் உறவினர்கள்:

ஜெயலலிதா இறந்து போனது முதல், சசிகலாவின் அனைத்து உறவினர்களும், போயஸ் தோட்டம் இல்லம் வந்து விட்டனர். அவர்களில், தினகரன், வெங்கடேஷ் இருவரை மட்டும், காலை முதல் மாலை வரை போயஸ் தோட்டத்திலேயே தங்கி, தீவிர அரசியலில் ஈடுபட வைத்தார் சசிகலா. அவ்வப்போது, சசிகலாவின் கணவர் நடராஜனும் இங்கு வந்து போனார். ஆனால், அவர், நிரந்தரமாக இருக்கவில்லை.

நினைவிடம் ஆகுமா:

இதற்கிடையில், சசிகலா ஜெயிலுக்குப் போய்விட, கட்சியின் துணைப் பொதுச் செயலர் ஆக்கப்பட்டிருக்கும் டி.டி.வி.தினகரனை, போயஸ் தோட்டத்திலேயே தங்கச் சொல்லியிருக்கிறார் சசிகலா. ஏற்கனவே, போயஸ் தோட்டத்தை, ஜெயலலிதா நினைவிடமாக்கும் முயற்சியில் முதல்வர் பன்னீர்செல்வம் தீவிரமாக இருப்பதால், அப்படியொரு அறிவிப்போ, அல்லது பொதுமக்கள், சசிகலா அதிருப்தி அ.தி.மு.க.,வினர் மூலம் போயஸ் தோட்டத்தை முற்றுகையிடக் கூடும் என அச்சம் இருப்பதால், அதை எதிர்கொள்வது குறித்தும், தினகரனுக்கு, சில யோசனைகளை சசிகலா சொல்லியுள்ளார்.

சட்ட ஆலோசனை:

இதற்கிடையில், எந்த அறிவிப்பென்றாலும், சட்ட ரீதியில் அதை எதிர்கொள்வது குறித்தும், அவ்வப்போது, சட்ட ஆலோசனையிலும் தினகரன் இறங்கி உள்ளார். எப்படி இருந்தாலும், போயஸ் தோட்டம் இல்லத்தை விட்டுவிடக் கூடாது என்பதில், சசிகலாவும், அவரது உறவினர்களும் உறுதியாக உள்ளனர். இவ்வாறு அவ்வட்டாரங்கள் கூறின.

English summary:

Jayalalitha then, he had lived Shashikala managed Poes Garden. Now he who was
Jayalalitha circumstances, raising the question of who will manage Poes Garden

Read More

கவர்னருடன் முதல்வர் ஓ.பி.எஸ்., அணியினர் சந்திப்பு

சென்னை: முதல்வர் ஓ.பன்னீர்செல்வம் தனது ஆதரவாளர்களுடன் கவர்னரை சந்தித்து பேசினார்.

முதல்வர் ஓ.பன்னீர்செல்வம் தனது ஆதரவாளர்களான அமைச்சர் மாஃபா பாண்டியராஜன், அவை தலைவர் மதுசூதனன், அமைப்பு செயலாளர் பொன்னையன், எம்.பி., மைத்ரேயன், எம்.எல்.ஏ., சரவணன் உள்ளிட்டோருடன் இன்று (பிப்.,15) இரவு 8.45 மணிக்கு கவர்னர் மாளிகைக்கு சென்றார். கவர்னர் வித்யாசாகர் ராவுடனான ஓ.பி.எஸ்., அணியினரின் சந்திப்பு சுமார் 15 நிமிடங்கள் நடந்தது.

முன்னதாக, எடப்பாடி பழனிச்சாமி அணியினர் இன்று (பிப்.,15) இரவு 8 மணிக்கு கவர்னரை சந்தித்தது குறிப்பிடத்தக்கது.

English Summary:

Chennai: Chief o pannirselvam governor met with his supporters.

Read More

பழனிச்சாமியை ஆட்சி அமைக்க அழைப்பார் என நம்புகிறோம்: ஜெயக்குமார்

சென்னை: ‛எடப்பாடி பழனிச்சாமியை ஆட்சி அமைக்க கவர்னர் அழைப்பார் என நம்புகிறோம். நாளைக்குள் நல்ல முடிவு வரும் என எதிர்பார்க்கிறோம்' என அமைச்சர் ஜெயக்குமார் கூறினார்.

அ.தி.மு.க., சட்டசபை குழு தலைவராக தேர்ந்தெடுக்கப்பட்டுள்ள எடப்பாடி பழனிச்சாமி, டி.டி.வி., தினகரன், அமைச்சர்கள் ஜெயகுமார், தங்கமணி, வேலுமணி, எம்.பி., நவநீதகிருஷ்ணன், திண்டுக்கல் சீனிவாசன், செங்கோட்டையன் உள்ளிட்ட 10 பேர் இன்று (பிப்.,15) இரவு 8 மணிக்கு கவர்னர் மாளிகைக்கு சென்றனர்.

அந்த அணியினர் கவர்னர் வித்யாசாகர் ராவை சந்தித்து பழனிச்சாமியை ஆட்சி அமைக்க அழைக்குமாறு மீண்டும் வலியுறுத்தினர். முன்னதாக, அவர்கள் நேற்று (பிப்.,14) கவர்னரை சந்தித்து ஆட்சி அமைக்க உரிமை கோரியது குறிப்பிடத்தக்கது.

இந்த சந்திப்புக்கு பிறகு மீன்வளத் துறை அமைச்சர் ஜெயக்குமார் அளித்த பேட்டி:

அ.தி.மு.க., சட்டசபை குழு தலைவராக தேர்ந்தெடுக்கப்பட்டுள்ள எடப்பாடி பழனிச்சாமிக்கு ஆட்சி அமைப்பதற்கு தேவையான எம்.எல்.ஏ.,க்களின் ஆதரவு உள்ளது.கவர்னரிடம் 124 எம்.எல்.ஏ.,க்கள் ஆதரவு பட்டியலை கொடுத்துள்ளோம். உரிய ஆவணம் செய்வதாக கவர்னர் கூறினார். பழனிச்சாமியை ஆட்சி அமைக்க கவர்னர் அழைப்பார் என நம்புகிறோம். நாளைக்குள் அவர் நல்ல முடிவு எடுப்பார் என எதிர்பார்க்கிறோம்.இவ்வாறு அவர் கூறினார்.

Read More

சிறையில் சசிக்கு என்ன மெனு?

பெங்களூரு: பரப்பன அக்ரஹாரா சிறையில் குற்றவாளிகள் சசிகலாவும் இளவரசியும் ஒரே அறையில் அடைக்கப்பட்டுள்ளனர்.

அவர்களுக்கு காலை 7 மணி, பகல் 11 மணி மற்றும் மாலை 5 மணி என மூன்று வேளை சிறை உணவு வழங்கப்படும்.

உணவு விவரங்கள்:

காலை 7 மணி - 2 சப்பாத்தி, கால் லிட்டர் சாம்பார், 100 மி.லி காபி., 200 மி.லி., மோர்
பகல் 11 மணி - 400 கிராம் சாதம், 400 கிராம் கேழ்வரகு களி உருண்டை, சாம்பார்
மாலை 5 மணி - கலவை சாதம்

சசி, இளவரசி இருவருக்கு தலா ஒரு போர்வை வழங்கப்படும். சிறப்பு வசதிகள் செய்து தர சிறை நிர்வாகம் மறுத்துவிட்டது.

Read More

சுதாகரன் பெங்களூரு சிறையில் அடைப்பு

பெங்களூரு: சொத்துகுவிப்பு வழக்கில் தண்டனை பெற்றுள்ள குற்றவாளிகளில் ஒருவரான சுதாகரன் பெங்களூரு பரப்பன அக்ரஹாரா சிறையில் அடைக்கப்பட்டார்.

உடல்நிலை சரியில்லை என காரணம் கூறி சரண் அடைவதற்கு சுதாகரன் கால அவகாசம் கேட்டிருந்தார். அவரின் கோரிக்கையை பரப்பன அக்ரஹாரா கோர்ட் நிராகரித்தது. மேலும், உடனடியாக இன்றே (பிப்.,15) சரண் அடைய வேண்டும் என உத்தரவிட்டது.

இதையடுத்து, சுதாகரன் மாலை 6.37 மணிக்கு பெங்களூரு கோர்ட்டில் சரண் அடைந்தார். அவர் நீதிபதி முன் ஆஜர்படுத்தப்பட்டு பின்னர் பரப்பன அக்ராஹாரா சிறையில் அடைக்கப்பட்டார்.
. 

Read More

எடப்பாடி பழனிச்சாமி அடுத்த முதலமைச்சராக அதிமுக எம்எல்ஏக்கள் கூட்டத்தில் தேர்வு!

தமிழக முதலமைச்சராக சசிகலாவும், ஒ.பன்னீர்செல்வமும் மோதிக்கொண்டிருந்த வேளையில் சசிகலா சொத்துக்குவிப்பு வழக்கில் குற்றவாளி என அறிவிக்கப்பட்டுள்ளதால் அவரது முதல்வர் கனவு தகர்ந்துள்ளது.

இதனையடுத்து கூவத்தூரில் சசிகலா தலைமையில் அதிமுக எம்எல்ஏக்கள் கூட்டம் இன்று நடைபெற்றது. இந்த கூட்டத்தில் அதிமுக சட்டமன்ற கட்சி தலைவராக எடப்பாடி பழனிச்சாமி தேர்ந்தெடுக்கப்பட்டுள்ளார்.

சட்டசபை ஆளும் கட்சி தலைவர் தான் முதலமைச்சராக இருப்பார். எடப்பாடி பழனிச்சாமியை முதல்வராக பதவியேற்க வைக்குமாறு தமிழக ஆளுநருக்கு கூவத்தூரில் உள்ள எம்எல்ஏக்களின் ஒப்புதல் பெறப்பட்ட கடிதம் அனுப்பப்படும். ஏற்கனவே ஓபிஎஸ் ராஜினாமா கடிதம் சர்ச்சையில் இருக்கும் போது இந்த புதிய முதலமைச்சருக்கான எம்எல்ஏக்கள் ஒப்புதல் பெறப்பட்ட கடிதத்தை ஆளுநர் எப்படி பரிசீலிப்பார் என்பதை பொறுத்திருந்து தான் பார்க்க வேண்டும்.

முன்னதாகவே சசிகலாவின் தேர்வு எடப்பாடி பழனிச்சாமியாகவே இருந்தது. ஜெயலலிதா மருத்துமனையில் இருந்த போது கூட காவிரி விவகாரத்தில் முதல்வருக்கு பதிலாக எடப்பாடி பழனிச்சாமியே டெல்லிக்கு அனுப்பி வைக்கப்பட்டிருந்தார்.

பெரும்பாலும் ஆளுநர் சிறப்பு சட்டசபையை கூட்டி ஓ.பன்னீசெல்வத்தை பெரும்பான்மையையே நிரூபிக்க சொல்வார் என எதிர்பார்க்கப்படுகிறது. இந்த சூழலில் முதல்வர் ஓ.பன்னீர்செல்வத்தை அதிமுக கட்சியின் அடிப்படை உறுப்பினர் பொறுப்பில் இருந்து நீக்கியுள்ளார் சசிகலா.

Read More

சிறையில் சசிகலாவுக்கு எந்த சலுகையும் கிடையாது: நீதிபதிகள் அதிரடி!

ஒட்டு மொத்த நாடே எதிர்பார்த்துக் கொண்டிருந்த சொத்துக்குவிப்பு வழக்கின் மேல் முறையீடு மனுவின் தீர்ப்பை உச்ச நீதிமன்றம் இன்று வழங்கியது. இதில் சசிகலா உள்ளிட்ட 3 பேரும் குற்றவாளிகள் என அறிவித்து குன்ஹாவின் தீர்ப்பை உறுதி செய்தார்கள் உச்ச நீதிமன்ற நீதிபதிகள்.

500 பக்கத்தில் இந்த வழக்கின் தீர்ப்பை வழக்கினர் நீதிபதிகள். இந்த வழக்கில் தொடர்புடைய அனைத்து சொத்துக்களையும் பறிமுதல் செய்ய அதிரடி உத்தரவிட்ட உச்ச நீதிமன்றம் சிறையில் சசிகலா உள்ளிட்ட 3 பேருக்கும் எந்த விசேஷ சலுகையும் காட்டகூடாது என கண்டிப்புடன் கூறியுள்ளது.

சென்ற முறை ஜெயலலிதா சிறையில் இருந்த போது A பிரிவு வசதி கொண்ட சிறை அறை வழங்கப்பட்டது. ஆனால் இந்த முறை இவர்களுக்கு எந்த விசேஷ சலுகையும் கொடுக்க கூடாது என நீதிபதிகள் கூறியுள்ளதால் இவர்களுக்கு சாதரண சிறை அறையே அளிக்கப்படும்.

இந்த தீர்ப்பில் நீதிபதிகள் குற்றவாளிகளை மக்களின் நம்பிக்கையை கொன்றவர்கள் கடுமையான வார்த்தைகளை பயன்படுத்தியுள்ளார். இவர்களை பரப்பன அக்ரஹார சிறையில் அடைக்கவும் உத்தரவிடப்பட்டுள்ளது.

பெங்களூரு நீதிமன்றத்தில் சரணடைந்த பின்னர் சசிகலா, இளவரசி, சுதாகரன் ஆகியோருக்கான சிறை அறைகள் தயாராகின்றன.

Read More