பன்னீர் ஆதரவாளர்களுக்கு அ.தி.மு.க., வரிசையில் இடம்

சென்னை : அ.தி.மு.க., - எம்.எல்.ஏ.,க்கள் வரிசையில், முன்னாள் முதல்வர் பன்னீர்செல்வத்திற்கு இடம் ஒதுக்கப்பட்டுள்ளதாக தகவல் வெளியாகி உள்ளது.

சட்டசபை கூட்டம்:

சசிகலாவுக்கு எதிராக, முன்னாள் முதல்வர் பன்னீர்செல்வம் போர்க்கொடி துாக்கினார். அவருக்கு, 10 எம்.எல்.ஏ.,க்கள் ஆதரவு தெரிவித்துள்ளனர். எனவே, புதிய முதல்வராக பொறுப்பேற்ற, இடைப்பாடி பழனிசாமி, பெரும்பான்மையை நிரூபிக்க, இன்று(பிப்.,18) சட்டசபை கூட்டம் நடைபெற உள்ளது.

82வது இடம்:

இக்கூட்டத்தில், முன்னாள் முதல்வர் பன்னீர்செல்வம் மற்றும் அவரது ஆதரவு எம்.எல்.ஏ.,க்களுக்கு, அ.தி.மு.க., - எம்.எல்.ஏ.,க்கள் வரிசையில் இடம் ஒதுக்கப்பட்டுள்ளதாகவும், பன்னீர்செல்வத்திற்கு, மூன்றாவது வரிசையில், முன்னாள் அமைச்சர்களை அடுத்து, 82வது இடம் ஒதுக்கப்பட்டுள்ளதாகவும் தகவல் வெளியானது. இதை, சட்டசபை செயலக அதிகாரிகள் உறுதிப்படுத்த மறுத்து விட்டனர்.

Read More

பழனிச்சாமிக்கு எதிராக காங்., ஓட்டு: முகுல் வாஸ்னிக்

சென்னை: நம்பிக்கை ஓட்டெடுப்பில் காங்., எதிர்த்து ஓட்டளிக்கும் என அக்கட்சியின் தமிழக பொறுப்பாளர் முகுல் வாஸ்னிக் தெரிவித்துள்ளார்.

நம்பிக்கை ஓட்டெடுப்பு:

முதலமைச்சர் இடைப்பாடி பழனிச்சாமி இன்று சட்டசபையில் நம்பிக்கை ஓட்டு கோருகிறார். இதனையடுத்து காங்கிரஸ் எம்.எல்.ஏக்கள் ஆலோசனை கூட்டம், தமிழ்நாடு காங்கிரஸ் கமிட்டியின் தலைமையகமான சத்தியமூர்த்தி பவனில், அக்கட்சியின் மாநில தலைவர் திருநாவுக்கரசர் தலைமையில் நடந்தது. காங்கிரசின் நிலைப்பாடு எப்படி இருக்க வேண்டும் என இக்கூட்டத்தில் ஆலோசிக்கப்பட்டது. முடிவில் நம்பிக்கை ஓட்டெடுப்பில், காங்., நிலைப்பாடு குறித்து இன்று(பிப்.,18) அறிவிக்கப்படும் என தெரிவிக்கப்பட்டது.

ராகுல் உத்தரவு:

இந்நிலையில், இதுகுறித்து, காங்., பொதுச் செயலரும், தமிழக பொறுப்பாளருமான முகல் வாஸ்னிக் கூறியதாவது: இடைப்பாடி பழனிசாமி அரசுக்கு எதிராக ஓட்டுப்போடுமாறு, காங்கிரஸ் எம்.எல்.ஏ.,க்களுக்கு கட்சியின் துணை தலைவர் ராகுல் உத்தரவிட்டுள்ளார். அதனடிப்படையில், காங்கிரஸ் எம்.எல்.ஏ.க்கள் அரசுக்கு எதிராக ஓட்டளிப்பர். இவ்வாறு, முகுல் வாஸ்னிக் கூறினார்.

Read More

வெற்றியை யாராலும் தடுக்க முடியாது: செங்கோட்டையன்

காஞ்சிபுரம்: ‛சட்டசபையில் நாளை (பிப்.,18) நடக்கும் நம்பிக்கை ஓட்டெடுப்பில் எங்களின் வெற்றியை யாராலும் தடுக்க முடியாது' என பள்ளி கல்வித் துறை அமைச்சர் செங்கோட்டையன் கூறினார்.
இதுகுறித்து, கூவத்துாரில் செங்கோட்டையன் அளித்த பேட்டியில் கூறியதாவது: முதல்வர் இடைப்பாடி பழனிச்சாமிக்கு பெரும்பான்மையை நிரூபிக்க தேவையான எம்.எல்.ஏ.,க்களின் ஆதரவு உள்ளது. சட்டசபையில் நாளை (பிப்.,18) நடக்கும் நம்பிக்கை ஓட்டெடுப்பில் எங்களின் வெற்றியை யாராலும் தடுக்க முடியாது.
அ.தி.மு.க., எம்.எல்.ஏ.,க்கள் அனைவரும் இடைப்பாடி பழனிச்சாமிக்கு ஆதரவாக ஓட்டளிக்க கட்சி தலைமை உத்தரவிட்டுள்ளது. கட்சிக்கு எதிராக பன்னீர்செல்வத்தின் அணியில் உள்ள எம்.எல்.ஏ.,க்கள் மீது நாளை மறுநாள் (பிப்.,19) நடவடிக்கை எடுக்கப்படும்.

அ.தி.மு.க., சட்ட விதிகளுக்கு உட்பட்டு பொதுக்குழு உறுப்பினர்களால், சசிகலா பொதுச்செயலாளராக நியமிக்கப்பட்டுள்ளார். சசிகலாவை பொதுச்செயலாளராக பன்னீர்செல்வம் முன்மொழிந்தார். மதுசூதனனும் ஆதரவு தெரிவித்தார். தற்போது, நான் தான் கட்சியின் அவை தலைவர். சசிகலா நியமனம் தொடர்பாக, தேர்தல் ஆணையத்தின் நோட்டீசுக்கு விளக்கம் அளிக்க தயாராக உள்ளோம். இவ்வாறு அவர் கூறினார்.

Read More

எம்.எல்.ஏ.,க்கு ரூ.2 லட்சம் சம்பளமா: மத்திய அரசு அதிர்ச்சி

புதுடில்லி: டில்லி சட்டசபை, எம்.எல்.ஏ.,க்களின் சம்பளத்தை, 400 சதவீதம் உயர்த்தும் வகையில் கொண்டு வரப்பட்ட மசோதாவை, மத்திய அரசு திருப்பி அனுப்பியது.

சம்பள உயர்வு மசோதா:

டில்லியில், முதல்வர் அரவிந்த் கெஜ்ரிவால் தலைமையிலான ஆம் ஆத்மி கட்சி ஆட்சி அமைந்துள்ளது. சட்ட சபையின், மொத்தமுள்ள, 70 உறுப்பினர்களில், 67 பேர் ஆம் ஆத்மி கட்சியைச் சேர்ந்தவர்கள். எம்.எல்.ஏ.,க்களின் சம்பளத்தை, 400 சதவீதம் உயர்த்தும் வகையில், சட்டசபையில், 2015ல் மசோதா நிறைவேற்றப்பட்டு, மத்திய அரசின் ஒப்புதலுக்கு அனுப்பப்பட்டுள்ளது.

எம்.எல்.ஏ.,க்களின் மாதாந்திர சம்பளத்தை, 88 ஆயிரம் ரூபாயில் இருந்து, 2.10 லட்சம் ரூபாயாகவும், அதேபோல் அனைத்து படிகளையும் பல மடங்கு உயர்த்த பரிந்துரைக்கப்பட்டுள்ளது. இதை கண்டு அதிர்ச்சி அடைந்த மத்திய உள்துறை அமைச்சகம், விளக்கம் கேட்டு, ஏற்கனவே, கோப்புகளை திருப்பி அனுப்பியிருந்தது.

திருப்பி அனுப்பிய மத்திய அரசு:

அதைத் தொடர்ந்து, முதல்வர் அரவிந்த் கெஜ்ரிவா
ல் அளித்த விளக்கம் திருப்திகரமாக இல்லை. எனவே, டில்லி கவர்னர், அனில் பைஜால் மூலம், மசோதாவை மீண்டும் டில்லி அரசுக்கே, மத்திய உள்துறை அமைச்சகம் திருப்பி அனுப்பி உள்ளது. இந்த அளவுக்கு சம்பளம் உயர்த்துவதற்கான காரணம் உள்ளிட்ட சந்தேகங்கள், மத்திய அரசு தரப்பில் எழுப்பப்பட்டுள்ளதாக தெரிகிறது.

Read More

பழனிச்சாமிக்கு எதிராக ஓட்டு போடுங்கள்: ஓ.பி.எஸ்., வேண்டுகோள்

சென்னை: ‛நம்பிக்கை ஓட்டெடுப்பில் இடைப்பாடி பழனிச்சாமிக்கு எதிராக அ.தி.மு.க., எம்.எல்.ஏ.,க்கள் ஓட்டளிக்க வேண்டும்' என ஓ.பன்னீர்செல்வம் வேண்டுகோள் விடுத்துள்ளார்.

இதுகுறித்து, முன்னாள் முதல்வர் ஓ.பன்னீர்செல்வம் அளித்த பேட்டியில் கூறியதாவது:

தமிழகத்தில் குடும்ப ஆட்சி வர கூடாது என செயல்பட்டவர் ஜெயலலிதா. அவர் குடும்ப ஆட்சியை கடுமையாக எதிர்த்தவர். ஜெயலலிதாவால் வெளியேற்றப்பட்ட குடும்பம் தற்போது அ.தி.மு.க.,வை கைக்குள் கொண்டு வந்துள்ளது.

அந்த குடும்பத்திற்கு ஆதரவாக அ.தி.மு.க., எம்.எல்.ஏ.,க்கள் செயல்படுவது ஜெயலலிதாவுக்கு செய்யும் துரோகம். எம்.எல்.ஏ.,க்கள் எவ்வித ஆசை வார்த்தைக்கும் மயங்க கூடாது.
சட்டசபையில் நாளை (பிப்.,18) நடக்க உள்ள நம்பிக்கை ஓட்டெடுப்பில் அ.தி.மு.க., எம்.எல்.ஏ.,க்கள் அரசுக்கு எதிராக ஓட்டளிக்க வேண்டும்.இவ்வாறு அவர் கூறினார்.

Read More

ரகசிய ஓட்டெடுப்பு: ஸ்டாலின் ஆதரவு

சென்னை: ‛சட்டசபையில் ரகசிய ஓட்டெடுப்பு அறிவிக்கப்பட்டால் வரவேற்போம்' என தி.மு.க., செயல் தலைவர் ஸ்டாலின் கூறினார்.
இது தொடர்பாக, சென்னை அண்ணா அறிவாலயத்தில் தி.மு.க., எம்.எல்.ஏ.க்கள் ஆலோசனை கூட்டம் நடந்தது. கூட்டத்திற்கு பின் தி.மு.க.

செயல் தலைவர் ஸ்டாலின் அளித்த பேட்டி:

தமிழகத்தில் கடந்த சில நாட்களாக பெரிய குழப்பம் ஏற்பட்டு சட்டம், ஒழுங்கு சீர்கெட்டு வருகிறது. இந்த நிலையில் முதல்வர் இடைப்பாடி பழனிச்சாமி தனது நம்பிக்கை ஓட்டெடுப்பை நாளை கூட உள்ள சட்டசபையில் கோர இருக்கிறார். ஓட்டெடுப்பில் அவரை எதிர்த்து தி.மு.க.,வின் 89 எம்.எல்.ஏ.க்களும் ஓட்டளிக்க உள்ளோம். ரகசிய ஓட்டெடுப்பு நடத்தப்பட்டால் அதை வரவேற்போம்

Read More

இடைப்பாடிக்கு எதிராக ஓட்டளிக்க தி.மு.க., முடிவு

சென்னை: சட்டசபையில் நாளை(பிப்.,18) நடக்கும் நம்பிக்கை ஓட்டெடுப்பில் முதல்வர் இடைப்பாடி பழனிச்சாமிக்கு எதிராக ஓட்டளிக்க தி.மு.க., முடிவு செய்துள்ளது.

இடைப்பாடி பழனிச்சாமி நேற்று தமிழக முதல்வராக பதவி ஏற்றார். அவர் 15 நாட்களுக்குள் தனது பெரும்பான்மை ஆதரவை சட்டசபையில் நிரூபிக்க வேண்டும் என கவர்னர் வித்யாசாகர் ராவ் கூறினார். இதையடுத்து, சட்டசபையில் நாளை(பிப்.,18) நம்பிக்கை ஓட்டெடுப்பு நடக்க உள்ளது.

இடைப்பாடிக்கு எதிராக ஓட்டு:

இந்நிலையில், இதுதொடர்பாக ஆலோசனை நடத்த தி.மு.க., எம்.எல்.ஏ.,க்கள் கூட்டம் இன்று(பிப்.,17) மாலை நடந்தது. இதில், தி.மு.க., எம்.எல்.ஏ.,க்கள் 89 பேரும் சட்டசபையில் நம்பிக்கை ஓட்டெடுப்பில் முதல்வர் இடைப்பாடி பழனிச்சாமிக்கு எதிராக ஓட்டளிக்க முடிவு செய்யப்பட்டது.

காங்., மெளனம்:

இதற்கிடையே தி.மு.க., கூட்டணியில் இடம்பெற்றுள்ள காங்கிரஸ் கட்சியின் எம்.எல்.ஏ.,க்கள் கூட்டம் சத்தியமூர்த்தி பவனில் நடந்தது.

இக்கூட்டத்திற்கு பின், தமிழ்நாடு காங்கிரஸ் கமிட்டி தலைவர் திருநாவுக்கரசர் அளித்த பேட்டியில், "இடைப்பாடி பழனிச்சாமிக்கு எதிராக காங்கிரஸ் எம்.எல்.ஏ.,க்கள் ஓட்டளிப்பார்கள் என வெளியான தகவல் பொய்யானது. எனக்கு டுவிட்டர் பயன்படுத்த தெரியாது. எனது பெயரில் வேறு யாரோ டுவிட்டர் பக்கத்தை பயன்படுத்தி வருகிறார்கள். காங்., எம்.எல்.ஏ.,க்கள் நாளை (பிப்.,18) சட்டசபையில் ஓட்டளிக்கும் போது எங்கள் முடிவை தெரிந்து கொள்ளுங்கள். சட்டசபையில் யாருக்கு ஓட்டு போடுவது என்பது குறித்து தற்போது எதுவும் சொல்ல முடியாது. காங்., தலைமை எடுக்கும் முடிவுக்கு எம்.எல்.ஏ.,க்கள் கட்டுப்படுவார்கள்" என்றார்.

தி.மு.க., கூட்டணியில் இடம்பெற்றுள்ள மற்றொரு கட்சியான இந்திய யூனியன் முஸ்லீம் லீக் கூட்டத்திலும் இடைப்பாடி பழனிச்சாமிக்கு எதிராக ஓட்டளிக்க முடிவு செய்யப்பட்டது. அக்கட்சியில் உள்ள ஒரே ஒரு எம்.எல்.ஏ., எதிராக ஓட்டளிக்க உள்ளார்.

English Summary:

Chennai: Assembly tomorrow (Feb., 18) the confidence vote against Poll, Chief edappadi Palanichany DMK has decided. 

Read More