நாகாலாந்தில் 'கூவத்தூர் பாணி'யில் 40 எம்.எல்.ஏ.,க்கள் சிறைபிடிப்பு

கோஹிமா: தமிழகத்தின் கூவத்துார் பாணியில், வடகிழக்கு மாநிலமான நாகாலாந்திலும், எம்.எல்.ஏ.,க்கள், ஆடம்பர விடுதியில் சிறை பிடிக்கப்பட்டுள்ளது, பெரும் பரபரப்பை ஏற்படுத்தி உள்ளது.

வடகிழக்கு மாநிலமான நாகாலாந்தில், முதல்வர், டி.ஆர். ஜெலியாங் தலைமையிலான நாகாலாந்து மக்கள் முன்னணி ஆட்சி அமைந்துள்ளது.

உள்ளாட்சி தேர்தலில், பெண்களுக்கு, 33 சதவீதம் இட ஒதுக்கீடு அளித்து பிறப்பித்த உத்தரவுக்கு, பழங்குடியினர் அமைப்புகள் எதிர்ப்பு தெரிவித்து, போராட்டங்களை நடத்தி வருகின்றன.
முதல்வர் பதவியில் இருந்து ஜெலியாங் விலக வேண்டும் என்று போராட்டக்காரர்கள் வலியுறுத்தி வருகின்றனர். அதைத் தொடர்ந்து, பதவி விலக, ஜெலியாங் முன்வந்தார். நாகாலாந்தில் ஆளும், நாகாலாந்து ஜனநாயகக் கூட்டணியின் புதிய முதல்வரை தேர்ந்தெடுக்க, கடும் போட்டி நிலவி வருகிறது.

சட்டசபையில் மொத்தம் உள்ள, 60 தொகுதிகளில், 48 எம்.எல்.ஏ.,க்களை உடைய நாகாலாந்து மக்கள் முன்னணி, நான்கு எம்.எல்.ஏ.,க்கள் உள்ள பா.ஜ., மற்றும் எட்டு சுயேச்சைகள், கூட்டணியில் உள்ளன.

நாகாலாந்து மக்கள் முன்னணி கட்சியின் தலைவர் ஷுர்ஹோசிலி லேஜேட்சுவை முதல்வராக்குவதற்கான முயற்சிகள் மேற்கொள்ளப்பட்டன; அவருக்கு, 34 எம்.எல்.ஏ.,க்கள் ஆதரவு அளித்து வந்தனர்.

இதனிடையில், முன்னாள் முதல்வரான நீபியூ ரியோவும், முதல்வர் போட்டியில் களமிறங்கினார். அவருக்கு, 40 எம்.எல்.ஏ.,க்கள் ஆதரவு உள்ளதாக கூறப்படுகிறது. கடந்த ஒரு வாரமாக, யார் அடுத்த முதல்வர் என்று பரபரப்பாக விவாதிக்கப்பட்டு வருகிறது.இதனிடையில், ரியோவுக்கு ஆதரவு அளிக்கும், 40 எம்.எல்.ஏ.,க்கள், அசாம் மாநிலம் காஜிரங்காவில் உள்ள ஒரு ஆடம்பர விடுதிக்கு நேற்று காலை அழைத்து செல்லப்பட்டு, சிறை வைக்கப்பட்டுள்ளனர்.

டில்லி சென்றுள்ள முதல்வர் ஜெலியாங் உள்ளிட்ட தலைவர்களும், கவர்னர் ஆச்சாரியாவும் நாளை (பிப்.,20) அல்லது நாளை மறுநாள், நாகாலாந்து திரும்புவர் என, எதிர்பார்க்கப்படுகிறது. அதுவரை, இந்த, எம்.எல்.ஏ.,க்கள், ஆடம்பர விடுதியிலேயே இருப்பர் என, அறிவிக்கப்பட்டுள்ளது. இதற்கிடையே, முதல்வர் ஜெலியாங் ராஜினாமா கடிதத்தை கவர்னரிடம் இன்று (பிப்.,19) அளித்தார்.

அ.தி.மு.க.,வைச் சேர்ந்த எம்.எல்.ஏ.,க்கள், சென்னைக்கு அருகேயுள்ள கூவத்துார் ஆடம்பர விடுதியில் சிறை வைக்கப்பட்ட சம்பவத்தை போலவே, நாகாலாந்திலும், எம்.எல்.ஏ.,க்கள் சிறை வைக்கப்பட்டுள்ளது, அங்கு பரபரப்பை ஏற்படுத்தியுள்ளது.

Read More

உ.பி., 3-ம் கட்ட தேர்தல்: 61 சதவீத ஓட்டுப்பதிவு

லக்னோ: உத்தரபிரதேச மாநிலத்தில் இன்று(பிப்.,19) நடந்த 3வது கட்ட சட்டசபை தேர்தலில் மாலை 5 மணி நிலவரப்படி 61.16 சதவீத ஓட்டுப்பதிவு பதிவானது.

உத்தரப்பிரதேசத்தில் மொத்தம் உள்ள 403 சட்டசபை தொகுதிகளுக்கு 7 கட்டமாக தேர்தல் நடக்கிறது. இதில், கடந்த பிப்., 11, 15-ம் தேதிகளில் முதல் மற்றும் இரண்டாம் கட்ட தேர்தல் நடந்தது. மொத்தம் 140 தொகுதிகளுக்கு தேர்தல் நடந்து முடிந்துள்ளது.

61 சதவீத ஓட்டுப்பதிவு:

இந்நிலையில், 11 மாவட்டங்களில் 69 தொகுதிகளுக்கான 3வது கட்ட தேர்தல் இன்று (பிப்.,19) நடந்தது. இதில், 826 வேட்பாளர்கள் போட்டியிட்டனர். மாலை 5 மணி நிலவரப்படி 61.16 சதவீதம் ஓட்டுப்பதிவானதாக உ.பி., மாநில தலைமை தேர்தல் அதிகாரி வெங்கடேஷன் தெரிவித்தார். அமைதி முடிந்த தேர்தல், இறுதி நிலவரப்படி 63 சதவீதமாக உயரும் என எதிர்பார்ப்பதாக அவர் தெரவித்தார்.

Read More

‛பினாமி' முதல்வரின் வெற்றி செல்லாது: ஸ்டாலின்

சென்னை: எதிர்க்கட்சிகளே இல்லாத சபையில், பெங்களூரு சிறையில் உள்ள ஊழல் குற்றவாளியின் 'பினாமி' முதல்வர் வெற்றி பெற்றதாக சபாநாயகர் அறிவித்திருப்பது வெட்கக்கேடான செயல். நம்பிக்கை ஓட்டெடுப்பில் முதல்வர் பழனிசாமி வெற்றி பெற்றது செல்லாது என்று எதிர்க்கட்சித் தலைவர் ஸ்டாலின் கூறியுள்ளார்.

இது தொடர்பாக, அவர் இன்று (பிப்.,19) வெளியிட்ட அறிக்கையில் கூறியுள்ளதாவது:

பினாமி ஆட்சி:

ஜனநாயகத்தில் மக்களின் குரலே மதிப்பு மிக்கது. அவர்களின் தீர்ப்பே மகத்தானது. 'தமிழகத்தில் நடைபெறும் குற்றவாளியின் பினாமி ஆட்சியைத் தடுத்து நிறுத்துங்கள்' என்பதே தமிழக மக்களின் இன்றைய ஒரே குரல் - ஒற்றை நோக்கம்.


ஜனநாயகம் செத்த மன்றம்:

மக்களின் குரலை எதிரொலிப்பதற்கான இடம்தான் சட்டசபை. அந்த சட்டமன்றத்தை 'ஜனநாயகம் செத்த மன்றமாக', பிப்., 18ம் தேதி நடைபெற்ற நம்பிக்கை கோரும் தீர்மானத்தின்போது ஆக்கிவிட்டார் ஆளுங்கட்சியின் சபாநாயகர்.

கூவத்தூர் விடுதி எனும் சிறைக்குள் அடைக்கப்பட்டிருந்த அ.தி.மு.க எம்.எல்.ஏக்கள் வேறு பக்கம் தாவி விடக்கூடாது என்பதற்காகவும், அவர்களின் மனசாட்சிப்படி சுயசிந்தனையோடும், சுதந்திரமாகவும் வாக்களித்து விடக்கூடாது என்பதற்காகவும், அமைச்சர்களின் கார்களில் திணிக்கப்பட்டு சட்டசபைக்கு அழைத்து வரப்பட்டார்கள்.

தமிழக மக்களின் நம்பிக்கையை, எதிர்பார்ப்பை நிறைவேற்றுவதற்கான வாய்ப்பு நியாயமான முறையில் கிடைக்க வேண்டும் என்பதைப் பேரவையில் வலியுறுத்த முயன்றோம்.


குற்றவாளி மனதை குளிர்விக்க:

சபாநாயகரோ எப்படியாவது இந்த அரசைக் காப்பாற்றி, பெங்களூரு சிறையில் உள்ள சொத்து குவிப்பு ஊழல் குற்றவாளியின் மனதை குளிர்விக்க வேண்டும் என்று முன்கூட்டியே தீட்டப்பட்ட திட்டத்தை நிறைவேற்றுவதில் அவசரம் காட்டினார்.

குற்றவாளியின் வழிகாட்டுதல்படி, பினாமி ஆட்சி நடத்தும் இடைப்பாடி பழனிச்சாமி அவர்களும், கூண்டுப் பறவைகளான எம்.எல்.ஏக்களும் பறந்து விடுவதற்கு முன் ஆட்சியைத் தக்க வைத்துக் கொள்வதில் ஆர்வமாக இருந்தார்.

பினாமி முதல்வர் இடைப்பாடி பழனிச்சாமியின் பக்கம் இருப்பவர்கள் உண்மையாகவே ஆதரிக்கிறார்களா, நிர்பந்தத்தால் அந்தப் பக்கம் இருக்கிறார்களா என்ற கேள்வி எங்களுக்கு மட்டுமல்ல, அவர்களுடன் இத்தனை காலம் இருந்த ஒ.பன்னீர்செல்வம் தரப்புக்கும் இருந்தது.


பெங்களூரு சிறையல்ல:

இந்தப் பேரவை என்பது பெங்களூரு சிறைச்சாலை அல்ல என்பதை சுட்டிக்காட்டி, ரகசிய வாக்கெடுப்பு நடத்த வேண்டும் என்றும் இல்லையென்றால், வாக்கெடுப்பை இன்னொரு நாளில் நடத்த வேண்டும் என்றும் சபாநாயகரிடம் எதிர்க்கட்சித் தலைவர் என்ற முறையில் வலியுறுத்தினேன்.
சட்சபையில் விரும்பத்தகாத சில நிகழ்வுகள் நடைபெற்றன என்பதை நான் ஒப்புகொள்கிறேன். அதற்காக, நான் சபாநாயகரை சந்தித்து வருத்தம் தெரிவித்தேன்.


மாறுவேடத்தில் போலீஸ்:

வழக்கத்திற்கு மாறாக, அவைக் காவலர்கள் அதிக அளவில் இருந்தனர். பேரவை பணியில் இல்லாத பிற பணிகளில் உள்ள காவல்துறை அதிகாரிகள் உள்ளிட்டோர் தங்களின் காக்கி சீருடைக்குப் பதில் சபைக்காவலர்களின் வெள்ளை உடையில் மாறுவேடத்தில் வரவழைக்கப்பட்டிருந்தனர்.

பேரவைக்குள் தர்ணாவில் ஈடுபட்டிருந்த எங்களை சபைக் காவலர்களும், அவர்களின் உடையில் உள்ளே அனுப்பப்பட்டிருந்த காவல்துறையினரும் மிக மோசமான முறையில் செயல்பட்டு, பிடித்து இழுத்து, சட்டையைக் கிழித்து, தாக்குதல் நடத்தி, ஷூ காலில் மிதித்து வெளியே தூக்கிப் போட்டார்கள். இந்த அராஜகத்தை தலைமைச் செயலக வளாகத்தில் இருந்த ஊடகத்தினரின் முன் நான் அம்பலப்படுத்த வேண்டியதாயிற்று.


வெட்கேடான செயல்:

அதன்பிறகு, எதிர்க்கட்சிகளே இல்லாத சபையில், ஆளுங்கட்சியின் இரண்டு அணிகள் மட்டுமே இருந்த நிலையில், வாக்கெடுப்பு என்ற ஓரங்க நாடகம் நடத்தி, அதில் பெங்களூரு சிறையில் உள்ள ஊழல் குற்றவாளியின் பினாமி முதல்வர் வெற்றி பெற்றதாக சபாநாயகர் அறிவித்திருப்பது வெட்கக்கேடான செயலாகும்.


நம்பிக்கை ஓட்டெடுப்பு செல்லாது:

சட்டப்பேரவை விதிகளின்படி, ஒரு முறை நம்பிக்கை கோரும் தீர்மானம் முன்மொழியப்பட்டு, அதன் மீது வாக்கெடுப்பு நடத்தமுடியாமல் ஒத்திவைக்கப்பட்டால், மீண்டும் அதனை முன்மொழிய 6 மாதகால அவகாசம் வேண்டும். ஆனால், பிப்ரவரி 18 ஆம் தேதி சட்டமன்றத்தில் ஜனநாயகம் படுகொலை செய்யப்பட்டபோது, இரண்டு முறை அந்தத் தீர்மானத்தை பினாமி முதல்வர் முன்மொழிந்தார். இதுவே சட்டமீறலாகும். பேரவை விதிகளின்படி, இந்தத் தீர்மானம் செல்லாது. செல்லாத தீர்மானத்தின் மீதான வாக்கெடுப்பும் ஏற்கத்தக்கத்தல்ல.
இவ்வாறு அந்த அறிக்கையில் கூறப்பட்டுள்ளது.

Read More

இன்று (20ம்தேதி) சிக்கும் அரசியல்வாதி யார் ?

புதுடில்லி: பரபரப்புக்கு சொந்தக்காரரான சுப்பிரமணியன் சாமி, இன்று(பிப்.,20) ஒரு முக்கிய தகவலை வெளியிட உள்ளதாக டுவிட்டரில் நேற்று தெரிவித்திருந்தார். அது யாராக இருக்கும் என்ற பீதி அரசியல்வாதிகளிடம் ஏற்பட்டுள்ளது.


சாமி கூறியிருப்பதாவது: நான்,, நாளை (இன்று) ஒரு விஷயத்தை வெளிக்கொணர இருக்கிறேன். அது ஒரு அரசியல்வாதியாக இருக்க கூடும். அவர் மீதான விசாரணைக்கு பின்னர் மேலும் ஒருவரை கையில் எடுக்க உள்ளேன். ஒரே நேரத்தில் இது நடக்கும். இவ்வாறு சாமி கூறியுள்ளார்.


இவரது டுவிட் அரசியல்வாதிகளிடம் கிலியை ஏற்படுத்தியிருக்கிறது.

Read More

ஜனநாயகத்திற்கு இழுக்கு: வெங்கையா

புதுடில்லி: தமிழக சட்டசபையில் நடந்த வன்செயல், அமளி போன்றவை ஜனநாயகத்திற்கு பங்கம் விழைக்கக்கூடியதாக உள்ளது. இது குறித்து நான் வேதனைப்படுகிறேன். எதிர்காலத்தில் இது போன்ற செயல்கள் நடவாமல் இருக்க வேண்டும். இது தொடர்பாக அனைவரும் சிந்திக்க வேண்டும் இவ்வாறு வெங்கையா நாயுடு கூறியுள்ளார்.

Read More

கச்சிதமாக முடித்த கவர்னர் ராவ்; வேலை முடிந்தது; மும்பை கிளம்பினார்

சென்னை: ஜெயலலிதா ஆஸ்பத்திரியில் சேர்ந்தது முதல் தமிழகம் முழுவதும் பல்வேறு அரசியல் பரபரப்பு ஏற்பட்டது. பல மாநில முதல்வர்கள், முக்கிய அரசியல் பிரமுகர்கள் முதல் பிரதமர் வரை தமிழகம் வந்து சென்றனர். ஜெ.,மறைவு , மர்மம் ஒரு பக்கம், அடுத்த முதல்வர் யார் என்ற செய்திகள் பரவிட கவர்னர் தமிழகத்தின் முழு பணியில் இறங்க வேண்டியதாயிற்று.

ஓ.பி.எஸ்., போர்க்கொடி :

தமிழக அரசியலில் அடுத்து சசி முதல்வராக வேண்டும் என காய் நகர்த்தி அவர் அதிமுக சட்டசபை தலைவராக தேர்வு செய்யப்பட்டார். கவர்னர் அப்போது மாநிலத்தில் இல்லை. அவர் வருவாரா, என்ற எதிர்பார்ப்பில் இருந்த போது கவர்னர் கடந்த 9ம் தேதி மும்பையிலிருந்து சென்னை வந்தார். சசி பொறுப்பேற்கவிருந்த நேரத்தில் ஓ.பி.எஸ்., சசிக்கு எதிராக போர்க்கொடி தூக்கினார். இதனையடுத்து தமிழகம் முழுவதும் மேலும் பரபரப்பு தொற்றியது. அந்த நாள் முதல் கவர்னர் மாளிகை எப்போதும் பரபரப்பாகவும், பிஸியாகவும் இருந்தது. காலை, மாலை, மதியம் என ஓ.பி.எஸ்., ஸ்டாலின், சசிகலா, சுப்பிரமணிய சுவாமி, இடைப்பாடி பழனிசாமி, தலைமைசெயலர், காவல் துறை உயர் அதிகாரிகள் ஆகியோர் சந்தித்து முக்கிய பேச்சு நடத்தினர்.

கவர்னர் மாளிகை நோக்கி கவனம்:

தொடர்ந்து, அடுத்து யார் ஆட்சியமைக்க கவர்னர் அழைப்பார் என்ற பரபரப்பு ஏற்பட்டது. ஆனால் கவர்னர், சசி ஆட்சி அமைக்க உரிமை கோரியும் அவரை அழைக்கவில்லை. பொறுமையாக இருந்தார். சட்ட நிபுணர்களுடன் ஆலோசனை நடத்தினார். மேலும் எம்.எல்.ஏ.,க்கள் கூவத்தூர் ரிசார்ட்டில் அடைத்து வைக்கப்பட்டதாக புகார் எழுந்தது. இது குறித்து கவர்னர் நடவடிக்கை எடுக்க வேண்டும் என்ற கோரிக்கை எழுந்தது. இதனால் அனைவரது கவனமும் கவர்னர் மாளிகை நோக்கி திரும்பியது. சுப்ரமணியன்சாமி முதல் பலர் கவர்னரை விமர்சிக்க துவங்கினர். கவர்னர் எடுத்த முடிவு சரியானது என்றும், மறு தரப்பினர் தவறானது என்றும் கருத்து தெரிவித்தனர்.

சிறைக்கு சென்ற சசிகலா :

ஆனால் சொத்து குவிப்பு வழக்கில் சசிகலா சிறைக்கு செல்ல வேண்டும் என சுப்ரீம் கோர்ட் தீர்ப்பு வெளியானதை அடுத்து கவர்னர் முடிவு சரியானது என பொதுமக்களும் கருத்து தெரிவித்தனர். இதனையடுத்து அவசர, அவசரமாக கூவத்தூரில் இடைப்பாடி பழனிசாமி சட்டசபை தலைவராக தேர்வு செய்யப்பட்டார். 15 ம்தேதி சசி சிறையில் அடைக்கப்பட்டார். இதனையடுத்து ஆட்சி அமைக்க இடைப்பாடி உரிமை கோரினார். 16ம் தேதி தமிழக முதல்வராக இடைப்பாடி பழனிசாமிக்கு கவர்னர் பதவிப்பிரமாணம் செய்து வைத்தார். கவர்னரின் உத்தரவுப்படி பழனிசாமி பெரும்பான்மை நிரூபிக்க உத்தரவு பிறப்பித்தார். இதனையடுத்து நேற்று ( 18 ம்தேதி) சட்டசபை சிறப்பு கூட்டம் நடந்தது. இதில் அமளி, ரகளைக்கு மத்தியில் பழனிசாமி பெரும்பான்மை நிரூபிக்கப்பட்டதாக அறிவிக்கப்பட்டது. ஸ்டாலின், சபாநாயகர் மற்றும் எம்.எல்.ஏ.,க்கள் சட்டை கிழிப்பு நடந்தது.

இதனையடுத்து இன்று (19 ம் தேதி ) காலை முதல்வர் இடைப்பாடி பழனிச்சாமி, திமுக மற்றும் ஓ.பி.எஸ்., தனித்தனியாக கவர்னரை சந்தித்து தங்கள் பக்கம் நியாயங்களை எடுத்து கூறினர். இந்த சந்திப்பு முடிந்த பிறகு, கவர்னர் வித்யாசாகர் ராவ் இன்று மதியம் 1 மணிக்கு மும்பை கிளம்பி சென்றார்.

மீண்டும் எப்போது வருவார் ?

எது எப்படியோ ஒரு வாரத்தில் தமிழகத்தின் தலைவிதி, பதட்டம் என எல்லாமே கவர்னர் பக்கமே அதிக பொறுப்பு இருந்தது என்பதை காட்டுகிறது. கவர்னர் ராவ் உள்துறை இணை அமைச்சராக இருந்து பல்வேறு அநுபவங்களை கண்டவர் என்பதால் தமிழக அரசியல் சூழலில் நல்ல முடிவை எடுத்து பிரச்சனைகளை இப்போதைக்கு சுமுகமாக முடித்து வைத்துள்ளார். அவர் மீண்டும் எப்போது வருவாரோ என்று எதிர்பார்ப்பு மக்கள் மத்தியில் இருக்கிறது.

Read More

இந்த அரசு நீடிக்க வேண்டும்: பொன் ராதாகிருஷ்ணன் பேட்டி

சென்னை:‛‛ தமிழகத்தில் இந்த அரசு நீடிக்க வேண்டும் என்றே நாங்கள் விரும்புகிறோம்,'' என, மத்திய அமைச்சர் பொன் ராதாகிருஷ்ணன் கூறியுள்ளார்.

தி.மு.க.,வுக்கு கண்டனம்:

கோவில்பட்டியில், இன்று அவர் நிருபர்களுக்கு அளித்த பேட்டி:

தமிழக சட்டசபையில், சபாநாயகர் தெரிவித்த கருத்துக்கள் தேவையில்லாதது. அதேபோல், தி.மு.க., உறுப்பினர்களின் செயல்களையும் ஏற்க முடியாது. இந்த அரசு நீடிக்க வேண்டும் என்றே நாங்கள் விரும்புகிறோம். மத்திய அரசு ஒத்துழைப்பு தரும். ‛நீட்' தேர்வு குறித்து, கடந்த ஒரு ஆண்டில் சட்டசபையில் என்ன பேசி உள்ளனர் என்று கூற முடியுமா. தேர்வு நடக்கும் போது மட்டும் அதுபற்றி பேச கூடாது. மாணவர்களுக்கு நல்ல கல்வி தராமல் கடந்த, 50 ஆண்டுகளாக ஏமாற்றி வந்துள்ளனர். தமிழகத்தில் அரசு பள்ளிகள் மூடப்படுகின்றன. ஒரு அரசு பள்ளி மூடப்பட்டால், 100 மாணவர்கள் இலவச கல்வி இழப்பர் என்பதை புரிந்து கொள்ள வேண்டும். இவ்வாறு பொன் ராதாகிருஷ்ணன் கூறினார்

Read More