அதிமுக எம்.எல்.ஏ.,க்கள் வீடுகளுக்கு பலத்த பாதுகாப்பு

சென்னை : தமிழகம் முழுவதிலும் அதிமுக எம்.எல்.ஏ.,க்களின் வீடுகள் மற்றும் அலுவலகங்களுக்கு கூடுதல் போலீஸ் பாதுகாப்பு போடப்பட்டுள்ளது.

பலத்த பாதுகாப்பு :

சட்டசபையில் பிப்ரவரி 18 ம் தேதி நடந்த அரசு மீதான நம்பிக்கை ஓட்டெடுப்பில், முதல்வர் இடைப்பாடி பழனிசாமி தலைமையிலான அரசுக்கு ஆதரவாக 122 அதிமுக எம்.எல்.ஏ.,க்கள் ஓட்டளித்தனர். அரசுக்கு ஆதரவாக ஓட்டளித்த எம்.எல்.ஏ.,க்களுக்கு எதிராக தமிழகத்தின் பல்வேறு பகுதிகளிலும் மக்கள் போராட்டம் நடத்தி வருகின்றனர். இதன் காரணமாக முன்னெச்சரிக்கை நடவடிக்கையாக எம்.எல்.ஏ.,க்கள் வீடுகள் மற்றும் அலுவலகங்களில் வழக்கத்தை விட அதிகமாக பாதுகாப்பு போடப்பட்டுள்ளது.
மதுரையில் உள்ள அமைச்சர்கள் செல்லூர் ராஜூ, ஆர்.பி.உதயகுமார், ஈரோடு புதுப்பாளையத்தில் உள்ள அமைச்சர் செங்கோட்டையன் ஆகியோரின் வீடு மற்றும் அலுவலகங்களில் பலத்த பாதுகாப்பு போடப்பட்டுள்ளது

Read More

கிருஷ்ணா நதி நீரும் குறைப்பு: சென்னையில் குடிநீர் தட்டுப்பாடு அபாயம்

சென்னை : சென்னைக்கு குடிநீர் விநியோகம் செய்யப்படும் வழிகள் அனைத்தும் தடைபட்டு வருகின்றன. இதனால் சென்னையில் கடும் குடிநீர் தட்டுப்பாடு ஏற்படும் அபாய நிலை ஏற்பட்டுள்ளது.
சென்னையின் முக்கிய குடிநீர் ஆதாரமாக விளங்கும் வீராணம் ஏரி வறண்ட விட்டதால், ஏரியில் இருந்து சென்னைக்கு திறந்து விடப்படும் நீர் முற்றிலுமாக நிறுத்தப்பட்டுள்ளதாக அதிகாரிகள் தெரிவித்துள்ளனர். இந்நிலையில் கண்டேறு அணையில் இருந்து சென்னையின் குடிநீர் தேவைக்காக திறந்து விடப்படும் கிருஷ்ணா நதிநீரின் அளவும் குறைக்கப்பட்டுள்ளது. 1500 கனஅடி நீர் திறக்கப்பட்டு வந்த நிலையில், தற்போது திறக்கப்படும் நீரின் அளவு 1300 கனஅடியாக குறைக்கப்பட்டுள்ளது. கோடை காலம் துவங்குவதற்கு முன்னதாகவே சென்னையில் கடும் குடிநீர் தட்டுப்பாடு ஏற்படும் நிலை உருவாகி உள்ளது பலரையும் கவலையடைய வைத்துள்ளது.

Read More

வறண்டது வீராணம் ஏரி : சென்னைக்கு குடிநீர் நிறுத்தம்

சென்னை : வீராணம் ஏரியில் இருந்து சென்னைக்கு குடிநீருக்காக திறந்து விடப்படும் நீர் முற்றிலுமாக நிறுத்தப்பட்டுள்ளது.
வீராணம் ஏரி வறண்டது விட்டதால் சென்னைக்கு குடிநீர் தேவைக்காக ஏரியில் இருந்து திறந்து விடப்படும் நீர் நிறுத்தப்பட்டுள்ளதாக அதிகாரிகள் தெரிவித்துள்ளனர். மாற்று ஏற்பாடாக என்எல்சி சுரங்க நீர், போர் மூலம் பெறப்படும் நிலத்தடி நீர் சென்னைக்கு கொண்டு வரப்படும் என தெரிவிக்கப்பட்டுள்ளது.

Read More

நடுவானில் தொடர்பு துண்டான இந்திய விமானம்

புதுடில்லி: மும்பையிலிருந்து லண்டன் சென்ற ஜெட் ஏர்வேஸ் விமானம், கட்டுப்பாட்டு அறையுடனான தொடர்பை இழந்ததால் பதற்றம் ஏற்பட்டது. பின் ஜெர்மன் போர் விமானங்கள் பாதுகாப்பாக அழைத்து சென்றது. அந்த வீடியோ தற்போது வெளியாகியுள்ளது.

அச்சம்:

கடந்த 16ம் தேதி(வியாழக்கிழமை) மும்பையில் இருந்து ஜெட் ஏர்வேஸ் விமானம் லண்டன் புறப்பட்டு சென்றது. இதில் 330 பயணிகளும், 15 விமான ஊழியர்கள் பயணம் செய்தனர். விமானம் ஜெர்மனியின் கலோன் நகருக்கு மேல் பறந்து கொண்டிருந்தபோது, கட்டுப்பாட்டு அறையுடனான தொடர்பு திடீரென துண்டிக்கப்பட்டது. இதனையடுத்து விமானம் கடத்தப்பட்டிருக்கலாம் என்ற அச்சம் உருவானது.

போர் விமானங்கள் துணையுடன்..:

இதனையடுத்து ஜெர்மனியின் போர் விமானங்கள் ஜெட் ஏர்வேஸ் விமானத்தை நோக்கி விரைந்து, அதனைச் சுற்றி வளைத்தன. சில நிமிடங்களுக்கு பின் கட்டுப்பாட்டு அறையுடன் விமான தொடர்ப்பு கிடைத்தது. இருப்பினும் விமானத்தை பாதுகாப்பாக ஜெர்மன் போர் விமானங்கள் அழைத்து சென்றுள்ளன. போர் விமானங்களின் துணையுடன், இந்திய விமானம் பயணிக்கும் வீடியோ தற்போது வெளியாகி பரபரப்பை ஏற்படுத்து உள்ளது. சமூக வலைதளங்களிலும் இந்த வீடியோ வேகமாக பரவி வருகிறது.

Read More

கவர்னர் நடவடிக்கை என்ன..?

நம்பிக்கை ஓட்டெடுப்பு குறித்து, சபாநாயகரும், சட்டசபை செயலரும் அறிக்கை தாக்கல் செய்த பின், கவர்னர் இறுதி முடிவு எடுக்க உள்ளார்.

முதல்வர் இடைப்பாடி பழனிசாமி தலைமையிலான அரசின் மீது, நேற்று முன்தினம்(பிப்.,18), சட்டசபையில், நம்பிக்கை ஓட்டெடுப்பு நடந்தது. இதில், சட்டசபையில் பெரும் அமளி ஏற்பட்டது. தி.மு.க., - எம்.எல்.ஏ.,க்கள் வெளியேற்றப்பட்ட பின், நம்பிக்கை ஓட்டெடுப்பு நடந்தது. அதில், முதல்வர் பழனிசாமி தலைமையிலான அரசு வெற்றி பெற்றது.

இந்நிலையில், நம்பிக்கை ஓட்டெடுப்பு தீர்மானம் செல்லாது என அறிவிக்க கோரி, தி.மு.க.,வும், முன்னாள் முதல்வர் பன்னீர்செல்வம் அணியினரும், நேற்று கவர்னர் வித்யாசாகர் ராவை சந்தித்து, புகார் அளித்தனர். இவற்றின் மீது, கவர்னர் விசாரணையை துவக்கி உள்ளார்.

ஓட்டெடுப்பு நடந்தது குறித்த முழு விபரங்களை, சபாநாயகரும், சட்டசபை செயலரும், முறைப்படி கவர்னரிடம் அறிக்கை தாக்கல் செய்ய வேண்டும். இந்த அறிக்கை தாக்கலானதும், அதன் விபரங்களை, கவர்னர் ஆய்வு செய்வார். அதன் பின், ஓட்டெடுப்பு தீர்மானம் செல்லுமா, செல்லாதா என்பது குறித்து, இறுதி முடிவு எடுப்பார் என, கவர்னர் அலுவலக வட்டாரங்கள் தெரிவித்துள்ளன.

Read More

அராஜக கூட்டத்திடமிருந்து காப்பாற்றுவேன்: தீபா பரபரப்பு பேச்சு

சென்னை: தமிழக மக்களையும், அ.தி.மு.க.,வையும் அராஜக கூட்டத்திடம் இருந்து காப்பாற்றுவதே தன் ஒரே லட்சியம் என ஜெ., அண்ணன் மகள் தீபா தெரிவித்தார்.

தமிழகத்தின் பல்வேறு மாவட்டங்களிலிருந்து தன்னை சந்திக்க வந்த ஆதரவாளர்கள் மத்தியில் அவர் பேசியதாவது: எனக்கு தொடர்ந்து ஆதரவு அளித்து வருவதற்காக நன்றியை தெரிவித்துக் கொள்கிறேன். தமிழகத்தில் இப்போது மக்கள் விரோத ஆட்சி நடந்து வருகிறது. இதனை நான் வன்மையாக கண்டிக்கிறேன். ஜெ., வழியில் மீண்டும் நல்லாட்சி மலரும் நம்பிக்கையில் தொடர்ந்து பணி செய்வோம்.

தமிழக மக்களையும், அதிமுகவையும் அராஜக கூட்டத்திடம் இருந்து காப்பாற்றுவது தான் எனது ஒரே லட்சியம். அதற்காக அனைவரும் ஒன்றிணைந்து பணியாற்றுவோம். என்னை நம்பி வந்தவர்களை காப்பாற்றுவேன். ஜெ., வழியில் நடப்பேன். உங்களுக்காக நான் இருக்கிறேன். இவ்வாறு அவர் பேசினார்.

Read More

'பழனிசாமி பதவி வாடகை சேர் தான்': பொன் ராதாகிருஷ்ணன்

துாத்துக்குடி:‛‛தமிழக முதல்வராக பதவியேற்ற இடைப்பாடி பழனிசாமி பதவி வாடகை சேர் போன்றது'' என, மத்திய அமைச்சர் பொன்ராதாகிருஷ்ணன் தெரிவித்தார்.

மக்கள் வெறுப்பு:

துாத்துக்குடி மாவட்டம் கோவில்பட்டியில் நடந்த நிகழ்ச்சி ஒன்றில் கலந்து கொண்ட மத்திய அமைச்சர் பொன் ராதாகிருஷ்ணன் தெரிவித்ததாவது: சட்டசபையில் இது வரை ரகசிய வாக்கெடுப்பு நடந்ததில்லை. தமிழக சட்டசபையில் நடந்த சம்பவத்திற்கு, சபாநாயகரும் தி.மு.க.,வும் தான் பொறுப்பு. இது தமிழகத்திற்கு தலைக்குனிவை ஏற்படுத்தியுள்ளது. அ.தி.மு.க., தி.மு.க., வின் செயல்களால், மக்கள் வெறுப்புடன் உள்ளனர்.

வாடகை சேர்:

தமிழக முதல்வராக பதவியேற்றுள்ள இடைப்பாடி பழனிசாமி பதவி, வாடகை சேர் போன்றது. சட்டசபையில், ஸ்டாலின் தாக்கப்பட்டது குறித்து, விசாரணை கமிஷன் அமைக்க வேண்டும். தமிழகத்தில், 'நீட்' தேர்வு குறித்தோ, மாணவர்கள் நலன் குறித்தோ, கழகங்களுக்கு அக்கறையில்லை. அரசு பள்ளிகளை மூடிவிட்டு, தனியாருக்கு தாரை வார்க்கும் நிலை உள்ளது. ஜாதி, மதம், மாநிலம் என்ற பெயரில் அரசியல் செய்வதை மாற்ற வேண்டும். நமக்கு தேவை நல்ல தலைவர்கள் தான் தவிர, எண்ணிக்கை கிடையாது. இவ்வாறு அவர் தெரிவித்தார்.

Read More