ஜெ., மரணம்: அப்பல்லோ பதில் மனு

சென்னை: மறைந்த முதல்வர் ஜெயலலிதாவின் மரணம் நடந்தது எப்படி என்பதை ஓய்வு பெற்ற சுப்ரீம் கோர்ட் நீதிபதிகள் மூலம் விசாரிக்க வேண்டும் என கோரி சென்னை உயர்நீதிமன்றத்தில் தாக்கல் செய்யப்பட்ட மனு, மார்ச், 13ம் தேதிக்கு ஒத்திவைக்கப்பட்டது.

அ.தி.மு.க., தொண்டரான சென்னை, அரும்பாக்கத்தை சேர்ந்த ஜோசப் என்பவர் சென்னை உயர்நீதிமன்றத்தில் ஒரு மனு தாக்கல் செய்தார். அதில், ‛ஜெயலலிதா மரணம் நடந்தது எப்படி என்பது குறித்து ஓய்வு பெற்ற சுப்ரீம் கோர்ட் நீதிபதிகள் மூலம் விசாரிக்க உத்தரவிட வேண்டும்' என கோரியிருந்தார். இது குறித்து தமிழக அரசு மற்றும் அப்பல்லோ மருத்துவமனை பதில் மனு தாக்கல் செய்ய வேண்டும் என நீதிபதிகள் உத்தரவிட்டனர்.

இச்சூழ்நிலையில் அப்பல்லோ மருத்துவமனை சார்பில், இன்று பதில் மனு தாக்கல் செய்யப்பட்டது. அதில், ‛ இந்திய மருத்துவ கவுன்சிலின் விதிகளின்படியே, ஜெயலலிதாவின் சிகிச்சை விவரங்களை வெளியிடவில்லை. ஜெயலலிதா கேட்டுக் கொண்டதால் தான், அவரது புகைப்படத்தை வெளியிடவில்லை' என கூறப்பட்டுள்ளது.

இந்த மனு மீதான விசாரணை மார்ச், 13ம் தேதிக்கு ஒத்திவைக்கப்பட்டது

Read More

சசியை எதிர்த்த எம்.எல்.ஏ.,வுக்கு வரவேற்பு

மதுரை: சசி தேர்வுக்கு எதிர்ப்பு தெரிவித்து ஓ.பி.எஸ்.,சுக்கு ஆதரவு அளித்த மதுரை தெற்கு தொகுதி அதிமுக எம்.எல்.ஏ., சரவணன், மதுரை வந்த போது , அவருக்கு அரசமரம் பிள்ளையார் கோவில் பகுதியில் பொதுமக்கள் அமோக வரவேற்பு அளித்தனர். மாலை அணிவித்தும், பட்டாசு வெடித்தும் தங்களின் ஆதரவை வெளிப்படுத்தினர். 

இவர் வீதி ,வீதியாக சுற்றி பின்னர் எம்.எல்.ஏ.,அலுவலகம் சென்றார். பின்னர் அவர் நிருபர்களிடம் பேசுகையில் ; மக்கள் விருப்பத்தை நிறைவேற்றுவதே எனது பணி. மக்கள் ஆதரவு அளித்தததால் நானும் ஓ.பி.எஸ்.,சுக்கு ஆதரவு அளித்தேன். இடைப்பாடி அரசு நீடிக்குமா என்பது குறித்து எனக்கு எதுவும் தெரியாது. தொடர்ந்து மக்கள் பணியாற்றுவேன் என்றார். தங்களுக்கு மிரட்டல் ஏதும் வருகிறதா என நிருபர்கள் கேட்டதற்கு அப்படி ஏதுமில்லை என பதில் அளித்தார். 

மாறு வேடத்தில் தப்பியவர்:

கூவத்தூர் ரிசார்ட்டில் அதிமுக எம்எல்ஏ.,க்கள் தங்க வைக்கப்பட்டிருந்த போது சரவணன் எம்எல்ஏ., மாறு வேடத்தில் தப்பித்து சென்னை வந்தார் என்பது குறிப்பிடத்தக்கது. 

Read More

மகாராஷ்டிரா உள்ளாட்சி தேர்தல் ஓட்டு எண்ணிக்கை

மும்பை: மும்பை மாநகராட்சி உள்ளிட்ட மகாராஷ்டிரா மாநில உள்ளாட்சி தேர்தலின் ஓட்டு எண்ணிக்கை, இன்று காலை துவங்கியது. அனைவரும் மும்பை மாநகராட்சி முடிவுகளை எதிர்பார்த்து உள்ளனர்.

மகாராஷ்டிராவில் பாஜ., சிவசேனா கூட்டணி கட்சிகளாக உள்ளன. இருப்பினும், உள்ளாட்சி தேர்தலில் தனித்து போட்டியிட்டன.மும்பை உள்ளிட்ட, 10 மாநகராட்சிகள், 25 ஜில்லா பரிஷத், 283 பஞ்சாயத்து சமிதிகளுக்கு கடந்த செவ்வாய்கிழமை ஓட்டுப்பதிவு நடந்தது. சராசரியாக, 56 சதவீத ஓட்டுக்கள் பதிவாகின. மும்பை மாநகராட்சியில், 227 வார்டுகள் உள்ளன. மொத்தம், 5,777 இடங்களுக்கு 21 ஆயிரத்து 620 வேட்பாளர்கள் போட்டியிடுகின்றனர். மும்பையில், 2,275 வேட்பாளர்கள் களத்தில் உள்ளனர்.

சிவசேனா கட்சி அமோகம் :

தற்போதைய நிலவரப்படி சிவசேனா, பா.ஜ., கட்சியினர் அதிக இடங்களில் முன்னிலை வகித்து வருகின்றனர். காங்கிரஸ் 3 வது இடத்திலும், தேசியவாத காங்கிரஸ் 4 வது இடத்திலும், நவநிர்மாண் கட்சி 5 வது இடத்திலும் இருந்து வருகிறது. மும்பை மாநகராட்சியை சிவசேனா கைப்பற்றும் என தெரிகிறது.

Read More

தர்மபுரி இளவரசன் மரணம் தற்கொலை தான்

சென்னை: சில ஆண்டுகளுக்கு முன் பரபரப்பை ஏற்படுத்திய தர்மபுரி இளவரசன் மரணம் தொடர்பான வழக்கு முடிவுக்கு வந்துள்ளது. அவர் தற்கொலை செய்து கொண்டதாக, சி.பி.சி.ஐ.டி., போலீசார் சென்னை உயர்நீதிமன்றத்தில் அறிக்கை தாக்கல் செய்தனர். இதை ஏற்று நீதிமன்றம் வழக்கை முடித்து வைத்தது.

நடந்தது என்ன?

தர்மபுரி மாவட்டம், நத்தம் காலனியை சேர்ந்த இளவரசன், வேறு சமூகத்தை சேர்ந்த இளம்பெண் திவ்யாவை காதலித்து திருமணம் செய்து கொண்டார். திவ்யா இளவரசனை பிரிந்து, தாயுடன் சென்ற நிலையில், கடந்த, 2013 ஜூலை, 4ல், தர்மபுரி அரசு கலைக்கல்லூரி பின்னால் உள்ள ரயில்வே தண்டவாளத்தில் இளவரசன் இறந்து கிடந்தார்.

இந்த வழக்கை சி.பி.சி.ஐ.டி., போலீசார் விசாரித்து வந்தனர். சென்னை உயர்நீதிமன்றத்தில், இன்று இந்த வழக்கு விசாரணைக்கு வந்த போது, இளவரசன் தற்கொலை செய்து கொண்டதாக, சி.பி.சி.ஐ.டி., போலீசார் அறிக்கை தாக்கல் செய்தனர். அதை ஏற்று, இந்த வழக்கை சென்னை உயர்நீதிமன்றம் முடித்து வைத்தது.

Read More

சபாநாயகர் மீது நம்பிக்கையில்லா தீர்மானம்: ஸ்டாலின்

சென்னை: ‛தமிழக சட்டசபையின் அடுத்த கூட்டத்தொடரில் சபாநாயகர் தனபால் மீது தி.மு.க., நம்பிக்கை இல்லா தீர்மானம் கொண்டு வரும்' என தி.மு.க., செயல் தலைவர் ஸ்டாலின் கூறினார்.

இதுகுறித்து, அவர் அளித்த பேட்டியில் கூறியதாவது:

இடைப்பாடி பழனிசாமி அரசு மீது நடந்த நம்பிக்கை ஓட்டெடுப்பின் போது சபாநாயகர் தனபால் முறையாக நடந்து கொள்ளவில்லை. அவர் சசிகலாவின் பினாமி ஆட்சியை காப்பாற்றும் நோக்குடன் செயல்பட்டார். சட்டசபை விதிகளின்படி, எதிர்கட்சியினர் அனைவரையும் ஒட்டுமொத்தமாக வெளியேற்ற முடியாது. சட்டசபை ல் அடுத்த கூட்டத்தொடரில் சபாநாயகர் தனபால் மீது தி.மு.க., நம்பிக்கை இல்லா தீர்மானம் கொண்டு வரும்.

கருணாநிதிக்கு பேச்சு பயிற்சி:

தி.மு.க., தலைவர் கருணாநிதிக்கு வயது முதிர்வு காரணமாக சில உடல்நல குறைவு ஏற்பட்டுள்ளது. அவருக்கு ட்ரக்யோஸ்டோமி சிகிச்சை அளிக்கப்படுகிறது. மேலும், பேச்சு பயிற்சியும் அளிக்கப்படுகிறது. விரைவில் நலம் பெறுவார்.

உள் காயம்:

சட்டசபையில் சபை காவலர்கள் என்னை குண்டுகட்டாகி துாக்கி வெளியேற்றினர். அதனால், உடல்நிலை சற்று பாதிக்கப்பட்டுள்ளது. வெளி காயம் எதுவும் இல்லை. உள்காயம் இருக்கிறது. தோள்பட்டையில் வலி ஏற்பட்டுள்ளது. மருத்துவனைக்கு சென்று ஸ்கேன் எடுத்து பார்க்க உள்ளேன்.

* வைகோ ஒரு அரசியல் ஞானி. அவரின் கருத்துக்கு நான் பதில் கூற விரும்பவில்லை.

சசிக்கு கோபம்:

* சசிகலா எப்படியாவது முதல்வர் ஆகி விட வேண்டும் என்று முயற்சித்தார். ஒரு நாள் முதல்வராக ஆகி இருந்தால் கூட சிறையில் ‛ஏ' வகுப்பு அறை கிடைத்திருக்கும். அப்படி, எதுவும் நடக்கவில்லை. முதல்வர் ஆக முடியாமல் சிறைக்கு போக வேண்டிய நிலை உருவானதால் ஏற்பட்ட கோபத்தை ஜெ., சமாதிக்கு சென்று சபதம் எடுப்பது போல் வெளிப்படுத்தி உள்ளார்.இவ்வாறு ஸ்டாலின் பேட்டியளி்த்தார்.

Read More

பிப். 22-ம் தேதி தி.மு.க. உண்ணாவிரத போராட்டம்: ஸ்டாலின்

சென்னை: இடைப்பாடி பழனிச்சாமியின் பினாமி அரசை கண்டித்து பிப். 22-ம் தேதி தி.மு.க. சார்பில் உண்ணாவிரத போராட்டம் நடத்தப்படும் என தி.மு.க. செயல் தலைவர் ஸ்டாலின் கூறினார்.

தி.மு.க. தலைமை அலுவலகமான அண்ணா அறிவாலயத்தில் தி.மு.க. செயல் தலைவர் ஸ்டாலின் செய்தியாளர்களை சந்தித்தார். அவர் கூறியது.

* கடந்த 9 காலமாக தமிழகத்தில் அ.தி.மு.க. அரசு முழுமையாகசெயல்படவில்லை. ஜெயலலிதாவிற்கு அளித்த சிகிச்சை குறித்து அரசு தரப்பில் முழுமையாக அறிக்கையும் தரவில்லை. அவரது மரணத்தில் குழப்பமான தகவல்கள் தான் வெளி வருகின்றன.

* ஜெயலலிதா மரணத்தில் மர்மம் இன்று வரை நீடிக்கிறது. அண்ணாதுரை மருத்துவமனையில் அனுமதிக்கப்பட்டிருந்த போது தொடர்ந்து மருத்துவ அறிக்கை வெளியிடப்பட்டது.

* தமிழகத்தில் நிலையான ஆட்சி அமைக்க கவர்னரை தொடர்ந்து வலியுறுத்திவோம்.

* சட்டசபையில் ரகசிய வாக்கெடுப்பு வேண்டும் என கோரிக்கை வைத்தோம்.
* கூவத்தூரில் அ.தி.மு.க. எம்.எல்.ஏ.க்கள் பிணைய கைதிகள் போல் வைக்கப்பட்டிருந்தனர்.

* சட்டசபையில் வாக்கெடுப்பு சுதந்திரமாக நடைபெறவில்லை. சட்டசபையில் நடந்த சம்பவங்கள் தொடர்பாக ஜனாதிபதியை சந்தித்து முறையிட உள்ளோம். சந்திக்க நேரம் கேட்டுளோம்

* தற்போது நடக்கும் இடைப்பாடி பழனிச்சாமி ஆட்சியை மக்கள் விரும்பவில்லை. இடைப்பாடி பழனிச்சாமியின் பினாமி ஆட்சியை கண்டித்து தமிழகத்தில் பிப்.22-ம் தேதி உண்ணாவிரத போராட்டம் நடத்தப்படும்.

Read More

கேரளாவில் ஜனாதிபதி ஆட்சி: மேனகா ஆசை

புதுடில்லி: கேரளாவில் சட்டம் ஒழுங்கு கெட்டு போனது இங்கு உடனடியாக ஜனாதிபதி ஆட்சியை கொண்டு வர வேண்டும் என மத்திய அமைச்சரான மேனகா காந்தி கூறியுள்ளார்.

கேரளாவில் திருச்சூர் அருகே நடிகை பாவனா காரில் கடத்தி பாலியல் தொந்தரவுக்குள்ளானார். இது தொடர்பாக பலரும் கண்டனம் தெரிவித்து வருகின்றனர். திருவனந்தபுரத்தில் போராட்டமும் நடந்து வருகிறது.

ஆட்சியை கலையுங்கள்:

இந்நிலையில் மகளிர் மற்றும் குழந்தைகள் நலத்துறை மத்திய அமைச்சர் மேனகா கூறியிருப்பதாவது: கேரளாவில் நடந்த சம்பம் கண்டிக்கத்தக்கது. இங்கு சட்டம் ஒழுங்கு கெட்டு விட்டதையே இது காட்டுகிறது. பினராய் ஆட்சியை கலைத்து ஜனாதிபதி ஆட்சியை கொண்டு வர வேண்டும். இவ்வாறு அவர் கூறியுள்ளார்.

Read More