தங்கம் கடத்திய காங்., தலைவர் கைது

சென்னை: ராமநாதபுரம் மாவட்ட காங்., தலைவர் ‛குட்லக்' ராஜேந்திரனை, தங்கம் கடத்திய விவகாரத்தில், மத்திய வருவாய் புலனாய்வு துறை அதிகாரிகள் கைது செய்தனர்.ராமநாதபுரம் மாவட்ட காங்., தலைவராக இருப்பவர் குட்லக் ராஜேந்திரன். திருச்சி - புதுக்கோட்டைக்கு இடையே லட்சுமணப்பட்டி சுங்கசாவடியில், சென்னை நோக்கி வந்து கொண்டிருந்த குட்லக் ராஜேந்திரனுக்கு சொந்தமான டிஎன் 07 பிக்யூ 8485 என்ற பதிவு எண் கொண்ட நிசான் மைக்ரா காரை மத்திய வருவாய் புலனாய்வு துறை அதிகாரிகள் கடந்த, 22ம் தேதி சோதனை செய்தனர்.

12 கிலோ தங்கம்:

அதில் மறைத்து வைக்கப்பட்டிருந்த 3.50 கோடி ரூபாய் மதிப்புள்ள, 12 கிலோ தங்கத்தை கைப்பற்றினர். இந்த தங்கம் குட்லக் ராஜேந்திரனுடையது என பிடிபட்ட காரின் டிரைவர் ஒப்புதல் வாக்குமூலம் அளித்தார். அதன்பேரில் குட்லக் ராஜேந்திரனின் சென்னை ராயப்பேட்டையில் இருக்கும் வீடு சோதனையிடப்பட்டது.

அதிகாரிகள் விசாரணைக்கு அழைத்துச் செல்லும் போது, குட்லக் ராஜேந்திரன் அவர் வீட்டு எதிரிலேயே தப்பி ஓடி, தடுக்கி விழுந்து இடது கையை முறித்துக் கொண்டார். அவருக்கு ராயப்பேட்டை மருத்துவமனையில் சிகிச்சை அளிக்கப்பட்டு மாவுக் கட்டு போடப்பட்டது.

பின்னர் அவர் கைது செய்யப்பட்டு புழல் சிறையில் அடைக்கப்பட்டார்.

Read More

கண்ணீர் அஞ்சலி போஸ்டர்: கருணாஸ் கதறல்

சென்னை: ‛ நான் இறந்து விட்டதாக, ‛வாட்ஸ் ஆப்'பில் கண்ணீர் அஞ்சலி போஸ்டரை வெளியிட்டு அவதூறு பரப்புகின்றனர்' என, நடிகர் கருணாஸ் சென்னை போலீஸ் கமிஷனர் அலுவலகத்தில் புகார் அளித்துள்ளார்.

அ.தி.மு.க.,வில் சசிகலா தலைமையிலான அணிக்கு ஆதரவு தெரிவித்து வரும் நடிகர் கருணாஸ், திருவாடானை தொகுதியில், இரட்டை இலை சின்னத்தில் போட்டியிட்டு வெற்றி பெற்றவர்.முக்குலத்தோர் புரட்சி படை என்ற கட்சியையும் நடத்தி வருகிறார். தமிழகத்தில், சசி அணிக்கு ஆதரவு தெரிவித்த எம்.எல்.ஏ.,க்களுக்கு மக்களிடம் கடும் எதிர்ப்பு காணப்படுகிறது. இந்த சூழ்நிலையில், நடிகர் கருணாஸ் சென்னை போலீஸ் கமிஷனர் அலுவலகத்தில், இன்று அளித்த புகார்:

அரசியல் மட்டும் சினிமா துறையில் என் வளர்ச்சியை கண்டு பொறாமை அடைந்துள்ளவர்கள் சமூக வலைதளங்கில் என்னை பற்றி அவதூறு தகவல்களை வெளியிட்டு வருகின்றனர். கடந்த பிப்., 22ம் தேதி எனது பிறந்த நாள். அன்று ‛வாட்ஸ் ஆப்'பில் ஒரு தகவல் பரவியது. நான் திடீரென இறந்து விட்டதாக கூறி, கண்ணீர் அஞ்சலி போஸ்டரை அதில் வெளியிட்டுள்ளனர். அதை பார்த்து என் மனைவி கடும் வேதனை அடைந்தார். அவருக்கு மாரடைப்பு ஏற்பட்டு அதற்கு உரிய சிகிச்சையும் பெற்று உள்ளார். என்னை பற்றி அவதூறு தகவல்களை வெளியிட்டு வருபவர்களை கண்டுபிடித்து நடவடிக்கை எடுக்க வேண்டும். இவ்வாறு கருணாஸ் புகாரில் கூறியுள்ளார்.

Read More

பாவனா கடத்தல்: முக்கிய குற்றவாளி சுனில்குமார் கைது

எர்ணாகுளம் : நடிகை பாவனா கடத்தி, பாலியல் துன்புறுத்தலுக்கு ஆளாக்கப்பட்ட வழக்கில் முக்கிய குற்றவாளியாக கருதப்படும் பல்சர் சுனில்குமார், எர்ணாகுளம் கோர்ட்டில் சரணடைய வரும்போது கைது செய்யப்பட்டார்.

காரில் கடத்தல் :
தமிழ், தெலுங்கு, மலையாளம் உள்ளிட்ட மொழிகளில் முன்னணி நடிகையாக வலம் வருபவர் நடிகை பாவனா. பாவனா படப்பிடிப்பு ஒன்று திருச்சூரில் நடந்து வருகிறது. இதில் பங்கேற்று விட்டு கொச்சிக்கு காரில் பிப்ரவரி 17 ம் தேதி இரவு 10.30 மணியளவில் திரும்பி கொண்டிருந்தார். கார், அங்கமாலி அருகே சென்றபோது, இன்னொரு காரில் வந்த மர்ம கும்பல், திடீரென பாவனாவின் காரை வழி மறித்து, அவரது காரில் ஏறிக்கொண்டனர். அதோடு காரை நிற்காமல் ஓட்டும்படி டிரைவரை மிரட்டியுள்ளனர். பின்னர் அந்தக்கும்பல் பாவனாவிற்கு பாலியல் தொல்லை கொடுத்துள்ளதோடு, அதை மொபைல்போனில் படமும் பிடித்துள்ளனர்.

பின்னணியில் யார்? :

கார், பாலாரிவட்டம் அருகே வந்தபோது, அந்தக்கும்பல் காரை நிறுத்தி தப்பி ஓடிவிட்டது. என்ன செய்வது என்று தெரியாமல் திகைத்து போன பாவனா, அருகில் இருந்த ஒரு இயக்குநரிடம் தனக்கு நேர்ந்த கொடுமை குறித்து கதறி அழுதார். இதையடுத்து அங்கிருந்தபடியே போலீசாருக்கு தகவல் கொடுக்கப்பட்டது. பாவனா கொடுத்த தகவலின் அடிப்படையில் அவரது முன்னாள் கார் டிரைவர் மார்டின் என்பவர் இந்த சம்பவத்தில் ஈடுபட்டது தெரியவந்தது. இதுதொடர்பாக சிலரை போலீசார் கைது செய்து விசாரித்து வந்தனர். இந்த கடத்தல் பின்னணியில் சினிமா பிரபலங்கள் பலருக்கும் தொடர்பு இருப்பதாக தகவல் பரவியது.

முக்கிய குற்றவாளி சரண் :
பாவனா கடத்தல் விவகாரத்தில் 5 முதல் 7 பேருக்கு தொடர்பு இருக்கலாம் என போலீசார் கூறி வந்தனர். இந்நிலையில் இந்த விவகாரத்தில் முக்கிய குற்றவாளியாக கருதப்பட்டு வந்த பல்சர் சுனில்குமார், இன்று (பிப்ரவரி 23) எர்ணாகுளம் கோர்ட்டில் சரணடைய வந்தான். அப்போது போலீசார் அவனை சுற்றி வளைத்து கைது செய்தனர். பாவனா கடத்தல் சம்பவத்திற்கு பிறகு, சுனில்குமார் கடந்த ஒரு வாரமாக தலைமறைவாக இருந்து வந்தது குறிப்பிடத்தக்கது.

Read More

வரும் 28 ம்தேதி தி.மு.க., ஆலோசனை

சென்னை: தி.மு.க.,வின் மாவட்ட செயலாளர்கள் கூட்டம் வரும், 28 ம் தேதி சென்னையில் நடக்க உள்ளது.சட்டசபையில் நம்பிக்கை ஓட்டெடுப்பு நடந்த பிறகு தி.மு.க., செயல் தலைவர் ஸ்டாலின் அரசியல் பணியில் தீவிரம் காட்டி வருகிறார். அ.தி.மு.க., ஆட்சியை அகற்ற கோரி, டில்லியில் இன்று ஜனாதிபதியை அவர் சந்திக்க உள்ளார்.

தமிழக உள்ளாட்சி தேர்தலை மே 14க்குள் நடத்த வேண்டும் என சென்னை உயர்நீதிமன்றம் மாநில தேர்தல் ஆணையத்திற்கு உத்தரவிட்டுள்ளது. எனவே, உள்ளாட்சி தேர்தல் பணிகளில் கவனம் செலுத்த தி.மு.க., முடிவு செய்துள்ளது. இது குறித்து ஆலோசனை செய்ய வரும், 28 ம் தேதி காலை, 10 மணிக்கு சென்னையில் அண்ணா அறிவாலயத்தில் தி.மு.க., மாவட்ட செயலாளர் கூட்டம் நடைபெற உள்ளது என அக்கட்சியின் பொதுச் செயலாளர் அன்பழகன் தெரிவித்துள்ளார்.

Read More

மும்பை மாநகராட்சியில் சிவசேனா முன்னிலை

மும்பை: மகராஷ்ட்டிராவில் நடந்த உள்ளாட்சி தேர்தலில் மும்பை மாநகராட்சியை சிவசேனா கட்சி கைப்பற்றுகிறது. இரண்டாவது இடத்தில் பா.ஜ.க.,வும், காங்கிரஸ் 3 வது இடத்திலும் உள்ளன. மும்பை மாநகராட்சியில், 227 வார்டுகள் உள்ளன. 2 ஆயிரத்து 275 வேட்பாளர்கள் போட்டியிட்டனர். இன்றைய ஓட்டு எண்ணிக்கையில்; சிவசேனா 84 வார்டுகளிலும் , பா.ஜ.,81 வார்டுகளிலும் வெற்றி பெற்றன, காங்கிரஸ் 31 இடங்களில் வெற்றி பெற்றது. தேசியவாத காங்கிரஸ் 9 இடங்களையும் எம்.என்.எஸ். 7 இடங்களிலும் மற்றவை 14 இடங்களை பிடித்தன.

இந்த தேர்தலில் சிவசேனா, பா.ஜ., காங்கிரஸ் தனித்தனியாக போட்டியிட்டன. மும்பையில் மேயர் பதவிக்கு 114 பேர் வெற்றி பெற வேண்டும். பா.ஜ.க., 7 மாநகராட்சிகளையும், சிவசேனா 3 மாநகராட்சிகளையும் கைப்பற்றின. காங்கிரஸ் ஒரு மாநகராட்சியை கூட கைப்பற்றவில்லை.

Read More

உளவுத்துறை ஐ.ஜி., டேவிட்சன் தேவாசீர்வாதம் மாற்றம்

சென்னை: தமிழக உளவுத்துறை ஐ.ஜ., டேவிட்சன் தேவாசீர்வாதம் மாற்றம் செய்யப்பட்டார்.

இவர் சென்னை காவல் துறை நல்வாழ்வு ஐ.ஜி.,யாக நியமிக்கப்பட்டுள்ளார். இவர் கடந்த 11 நாட்களுக்கு முன்னர் தான் உளவுத்துறை ஐ.ஜி.,யாக அவர் நியமிக்கப்பட்டார். அப்போது ஓ.பி.எஸ்., முதல்வராக இருந்தார்.

Read More

து.பொ.செ., ஆனார் தினகரன்

சென்னை: மறைந்த முதல்வர் ஜெயலலிதாவால் கட்சியில் இருந்து நீக்கப்பட்ட சசிகலாவின் அக்கா மகன் தினகரன் அ.தி.மு.க., துணை பொதுச் செயலாளராக, இன்று பொறுப்பேற்றுக் கொண்டார்.ஜெயலலிதாவால் கட்சி பொறுப்பில் நியமிக்கப்பட்டவர் தினகரன். ஆனால், ஒரு கட்டத்தில் ஓரம் கட்டப்பட்டார். 2011ம் ஆண்டு இறுதியில், சசிகலா, தினகரன் உட்பட அவர்களின் குடும்பத்தை சேர்ந்த, 14 பேர் கட்சியில் இருந்து நீக்கப்பட்டனர். சில மாதங்களுக்கு பிறகு சசிகலா மட்டும் மன்னிப்பு கடிதம் கொடுத்த பிறகு கட்சிக்குள், போயஸ் தோட்ட வீட்டுக்குள்ளும் சேர்க்கப்பட்டார்.

அந்த கடிதத்தில், ‛ என் குடும்பத்தினருக்கும் எனக்கும் எந்த தொடர்பும் இல்லை' என, கூறியிருந்தார். ஆனால், ஜெயலலிதா மறைவுக்கு பிறகு நிலைமை தலைகீழாக மாறியது. கட்சியின் தற்காலிக பொதுச் செயலாளராக சசிகலாவே பொறுப்பேற்றுக் கொண்டார். முதல்வர் பதவியை அவர் கைப்பற்ற முயற்சித்த போது, சுப்ரீம் கோர்ட் தீர்ப்பால், சிறைக்கு செல்ல வேண்டியதாயிற்று. ஆனால், சிறைக்கு செல்லும் முன் தன் உறவினர்கள் தினகரன் மற்றும் டாக்டர் வெங்கடேசை கட்சியில் சேர்த்தார். அடுத்த நாளே, துணை பொதுச் செயலாளர் பொறுப்பில் தினகரன் நியமிக்கப்பட்டார்.

இன்று கட்சியின் தலைமை அலுவலகத்திற்கு வந்த அவர், துணை பொதுச் செயலாளராக பொறுப்பேற்றுக் கொண்டார்.

Read More