நம்பர் இல்லாத நோட்டு; ம.பி., மக்கள் கலக்கம்

போபால்: மத்திய பிரதேசத்தில் உள்ள, ஏ.டி.எம்.,ல் இருந்து எடுக்கப்பட்ட ரூபாய் நோட்டுகளில், வரிசை எண் இல்லாமல் இருந்தது, பரபரப்பை ஏற்படுத்தி உள்ளது.

கறுப்புப் பணம், கள்ள நோட்டுகளை ஒழிக்கும் வகையில், செல்லாத ரூபாய் நோட்டு அறிவிப்பு வெளியானது. இந்த நிலையில், புதிதாக அறிமுகம் செய்யப்பட்ட, 2,000 ரூபாய் கள்ள நோட்டுகள், பல்வேறு இடங்களில் சிக்கின. இதற்கிடையில், டில்லியில் உள்ள, ஏ.டி.எம்.,ல், பணம் எடுத்தவர்களுக்கு 2,000 ரூபாய்க்கு பதிலாக, அதே நிறத்தில், வடிவத்தில் இருக்கும் குழந்தைகள் விளையாடும் ரூபாய் நோட்டுகள் கிடைத்தன.

இந்த பரபரப்பு அடங்குவதற்குள், முதல்வர், சிவராஜ் சிங் சவுகான் தலைமையிலான, பா.ஜ., ஆட்சி அமைந்துள்ள மத்திய பிரதேசத்தின் தாமோ பகுதியில் உள்ள எஸ்.பி.ஐ., - ஏ.டி.எம்., சென்ற பள்ளி ஆசிரியர், 1,000 ரூபாயை எடுத்துள்ளார். தனக்கு கிடைத்த, இரண்டு, 500 ரூபாய் நோட்டுகளை பார்த்தபோது, அதில், வரிசை எண்கள் இல்லாமல் இருந்ததை பார்த்து அதிர்ச்சி அடைந்தார். வரிசையில் காத்திருந்தவர்களிடம் இது குறித்து விவாதித்து கொண்டிருந்தார்.

இதனிடையில், அவருக்கு பின்னால் நின்றிருந்தவருக்கு கிடைத்த பணத்திலும், வரிசை எண்கள் இல்லாமல் இருந்தது. இது தொடர்பாக வங்கியில் புகார் கொடுத்துள்ளார். ஆனால், உடனடியாக பணத்தை மாற்றித் தர முடியாதென, வங்கி கூறியுள்ளது.

என்ன செய்யலாம்?

இது குறித்து வங்கி அதிகாரிகள் கூறியதாவது: இதுபோன்று ஏ.டி.எம்.,களில் பணம் எடுக்கும்போது, கள்ள நோட்டுகள், வரிசை எண் இல்லாத நோட்டு போன்ற பிரச்னைக்குரிய நோட்டுகள் கிடைத்தால், உடனடியாக அந்த ஏ.டி.எம்.,க்கு சொந்தமான வங்கிக் கிளையை அணுகி, எழுத்து மூலம் புகார் அளிக்க வேண்டும்.வங்கி அதிகாரிகள் சரியான பதில் அளிக்காவிட்டால், அருகில் உள்ள போலீஸ் ஸ்டேஷனில் புகார் அளிக்கலாம். அதனடிப்படையில் விசாரணை நடக்கும். இவ்வாறு அதிகாரிகள் கூறினர்.

Read More

கார்கில் தியாகி மகளுக்கு மிரட்டல்; போராட்டத்தில் இருந்து விலகினார்

புதுடில்லி: கார்கில் போரில் உயிர் நீத்த ராணுவ வீரரின் மகள், தனக்கு பாலியல் பலாத்கார மிரட்டல் வந்ததாக கூறியுள்ளார். இதையடுத்து, அடையாளம் தெரியாத மர்ம நபர்களுக்கு எதிராக, எப்.ஐ.ஆர்., பதிவு செய்யப்பட்டுள்ளது. இதற்கிடையே, ஏ.பி.வி.பி., அமைப்பினருக்கு எதிரான போராட்டத்தில் இருந்து விலகுவதாகவும், அந்த பெண் அறிவித்துள்ளார்.

எதிர்ப்பு:

டில்லி, ஜே.என்.யு., பல்கலை மாணவர், உமர் காலித், ஷெஹ்லா ரஷித் ஆகியோருக்கு, கருத்தரங்கு ஒன்றில் பங்கேற்க வரும்படி, ராம்ஜாஸ் கல்லுாரி அழைப்பு விடுத்தது. அதற்கு, ஏ.பி.வி.பி., எனப்படும், அகில பாரதிய வித்யார்த்தி பரிஷத் அமைப்பினர் கடும் எதிர்ப்பு தெரிவித்தனர்.

ஆர்பாட்டம்:

இதையடுத்து, உமர் காலித், ரஷித் ஆகியோருக்கு விடுக்கப்பட்ட அழைப்பு, வாபஸ் பெறப்பட்டது. இதை கண்டித்து, ராம்ஜாஸ் கல்லுாரி மாணவர்கள் ஆர்ப்பாட்டத்தில் ஈடுபட்டனர். அவர்கள் மீது, ஏ.பி.வி.பி., தொண்டர்கள் கல்லெறிந்து தாக்குதல் நடத்தியதில், பலர் காயமடைந்தனர். இந்த சம்பவத்திற்கு பலதரப்பில் கண்டனம் எழுந்தது.

கார்கில் தியாகி மகள்:

கார்கில் போரில் உயிர் நீத்த ராணுவ வீரரின் மகளும், லேடி ஸ்ரீராம் கல்லுாரி மாணவியுமான, குர்மெஹர் கவுர், 20, ஏ.பி.வி.பி., அமைப்பினருக்கு எதிராக, சமூக வலைதளத்தில் தெரிவித்த கருத்திற்கு ஏராளமானோர் ஆதரவு தெரிவித்தனர்.

விலகல்:

இந்நிலையில், ஏ.பி.வி.பி., அமைப்பை சேர்ந்த சிலர், தனக்கு, பாலியல் பலாத்கார மிரட்டல் விடுத்துள்ளதாக தெரிவித்த, குர்மெஹர் கவுர், இனி, அந்த அமைப்பினருக்கு எதிரான போராட்டத்தில் இருந்து விலகிக் கொள்வதாகவும் கூறினார். இந்நிலையில், குர்மெஹருக்கு மிரட்டல் விடுத்தது தொடர்பாக.அடையாளம் தெரியாத மர்ம நபர்களுக்கு எதிராக, போலீசார், எப்.ஐ.ஆர்., பதிவு செய்துள்ளனர்.

Read More

பல்வேறு திட்டங்களை நிறைவேற்ற பிரதமரிடம் கோரிக்கை: பழனிசாமி

சென்னை: ‛தமிழகத்தில் பல்வேறு திட்டங்களை நிறைவேற்ற பிரதமரிடம் கோரிக்கை விடுக்கப்பட்டது' என முதல்வர் பழனிசாமி தெரிவித்தார்.

கோரிக்கை:

டில்லி சென்று பிரதமர் மோடியை சந்தித்த பழனிசாமி, சென்னை திரும்பினார். சென்னை விமான நிலையத்தில் செய்தியாளர்களிடம் அவர் தெரிவித்ததாவது: தமிழகத்தில் பல்வேறு திட்டங்களை நிறைவேற்ற பிரதமரிடம் கோரிக்கை விடுத்தேன். இலங்கை சிறையிலுள்ள மீனவர்கள், படகுகளை விடுவிக்க வலியுறுத்தினேன். இலங்கை கடற்படையால் தமிழக மீனவர்கள் தாக்கப்படுவதை தடுக்க வலியுறுத்தினேன். வறட்சி நிவாரணம், வர்தா புயல் நிவாரண நிதி வழங்குமாறு கோரியுள்ளேன்.

நெடுவாசல்..

ஜல்லிக்கட்டுக்கு விலக்கு அளித்த பிரதமருக்கு நன்றி தெரிவிக்கப்பட்டது. நீட் தேர்விலிருந்து விலக்களிக்க கோரிக்கை விடப்பட்டது. நெடுவாசல் ஹைட்ரோ கார்பன் திட்டத்தை கைவிட மத்திய அரசிடம் கோரிக்கை விடப்பட்டது. காவிரி மேலாண்மை வாரியத்தை விரைவில் அமைக்க வலியுறுத்தினேன். தஞ்சையில் எய்ம்ஸ் மருத்துவமனை அமைக்க பிரதமரிடம் கோரிக்கை வைக்கப்பட்டுள்ளது. தாம்பரம்-செங்கல்பட்டு சாலையை விரிவாக்க கோரிக்கை வைக்கப்பட்டது.

தமிழகத்திற்கு கூடங்குளம் மின்சாரம்:

கூடங்குளத்தில் 3வது அணு உலையில் உற்பத்தியாகும் மின்சாரத்தை தமிழகத்திற்கு வழங்க வேண்டும் எனவும் கோரிக்கை விடுக்கப்பட்டுள்ளது. மேலும் நெடுவாசலில் போராட்ட குழுவினர் இன்று (மார்ச் 1) என்னை சந்திக்கவுள்ளனர். இவ்வாறு அவர் தெரிவித்தார்

Read More

சென்னை புறப்பட்டது நெடுவாசல் போராட்டக்குழு

புதுக்கோட்டை: முதல்வர் பழனிசாமியை சந்தித்து பேசுவதற்காக நெடுவாசல் போராட்டக்குழுவினர் சென்னை புறப்பட்டனர். அவர்கள் இன்ற (மார்ச் - 1) தலைமைசெயலகத்தில் முதல்வரை சந்தித்து கோரிக்கைகளை தெரிவிக்க உள்ளனர்.
புதுக்கோட்டை மாவட்டம் நெடுவாசல் பகுதியில் ஹைட்ரோ கார்பன் திட்டத்திற்கு விவசாயிகள் எதிர்ப்பு தெரிவித்து போராட்டம் நடத்தி வருகின்றனர். கடந்த 10 நாட்களுக்கும் மேலாக போராட்டம் நடந்து வரும் நிலையில் போராட்டக்காரர்களுக்கு மாணவர்களும் ஆதரவளித்துள்ளனர்.

சென்னை புறப்பட்டனர்:

இந்நிலையில் போரட்டக்குழுவை சேர்ந்த ஒன்பது பேர் இன்று(மார்ச் -1) காலை 10 மணியளவில் முதல்வரை சந்தித்து பேச உள்ளனர். முன்னதாக ஆலங்குடி தாலுகா அலுவலகத்தில் மாவட்ட கலெக்டர் கணேஷ் மற்றும் மாவட்ட எஸ்.பி, மற்றும் போராட்ட குழு உறுப்பினர் ஒன்பது பேர் கலந்து கொண்ட ஆலோசனை கூட்டம் நடைபெற்றது. பின்னர், போராட்டக்குழுவினர் சென்னை புறப்பட்டனர்.

Read More

இலவச 'லேப் - டாப்' இந்த ஆண்டில் இல்லை

பள்ளி மாணவர்களுக்கு, இந்த ஆண்டு இலவச, 'லேப் - டாப்' கிடைக்காது. அரசு மற்றும் அரசு உதவி பெறும் பள்ளிகள்; அரசு மற்றும் அரசு உதவி பெறும் பாலிடெக்னிக்குகளில் பயின்ற, 40 லட்சம் மாணவ, மாணவியருக்கு, இதுவரை இலவச, லேப் - டாப்கள் வழங்கப்பட்டுள்ளன. இதற்காக, 4,331 கோடி ரூபாய் செலவிடப்பட்டுள்ளது.

தமிழக அரசு துவங்கிய, இந்த முன்னோடி திட்டத்தை, பல மாநிலங் கள் பின்பற்ற துவங்கியுள்ளன. மீண்டும் ஆட்சிப் பொறுப்பேற்றதும், இலவச லேப் - டாப் திட்டத்தைத் தொடரப் போவதாக, அ.தி.மு.க., அரசு தெரிவித்தது; சட்டசபையிலும் அறிவிக்கப்பட்டது.

கோடை விடுமுறை:

ஆனால், தகவல் தொழில்நுட்பத் துறை செயலருக்கு, மற்ற துறைகளின் பொறுப்பு தரப்பட்டதால், லேப் - டாப் வழங்கும் பணியில், அவர் தீவிரம் காட்டவில்லை.
பள்ளி தேர்வுகள் முடிவதற்குள், லேப் - டாப் தந்துவிட்டால், அது, கோடை விடுமுறையை பயனுள்ள முறையில் கழிக்க உதவியாக இருக்கும் என, மாணவர்களும், பெற்றோரும்
எதிர்பார்க்கின்றனர். ஆனால், அது சாத்தியம் இல்லை என, தற்போது தெரிய வந்துள்ளது.

இதுகுறித்து, தகவல் தொழில்நுட்ப துறை அதிகாரிகள் கூறியதாவது:
இரு வாரங்களுக்கு முன் தான், லேப் - டாப் கொள்முதலுக்கான, 'டெண்டர்' விண்ணப்பங்களை பெறும் தேதி நிறைவடைந்தது. அதை, தற்போது பரிசீலிக்க துவங்கியிருக்கிறோம். இதில், அவசரப்பட்டு முடிவெடுக்க முடியாது. அதனால், தேர்வு துவங்கு வதற்குள், டெண்டரை இறுதி செய்வதற்கு வாய்ப்பு இல்லை.

அவகாசம்:

அதை இறுதி செய்தாலும், கொள்முதல் செய்ய, அவகாசம் தேவை. பின், பள்ளிகளுக்கு அனுப்பி வைக்க வேண்டும்; அதற்கும் கால அவகாசம் வேண்டும். அதனால், இந்த ஆண்டில் லேப் - டாப் வழங்குவது சிரமம்.
இவ்வாறு அவர்கள் தெரிவித்தனர்.

Read More

ஓ.பி.எஸ். உண்ணாவிரதம்: ஸ்டாலின் வரவேற்பு

சென்னை: முன்னாள் முதல்வர் பன்னீர் செல்வத்தின் உண்ணாவிரத போராட்டத்திற்கு ஸ்டாலின் வரவேற்பு தெரிவித்துள்ளார். இது குறித்து தி.மு.க. செயல் தலைவர் ஸ்டாலின் கூறியிருப்பதாவது: பன்னீர் செல்வத்தின் காலம் கடந்த உண்ணா விரத போராட்ட முடிவை வரவேற்கிறேன். முதல்வர் பதவியில் இருந்த போது ஜெயலலிதா மரணம் பற்றி விசாரிக்காதது ஏன்? கைதிகளை பராமரிப்பது அரசு தான். ஆனால் அரசே கை
தியை போல் பார்க்கிறது. என தெரிவித்துள்ளார். 

Read More

செங்கல் அறுக்கும் கருவியை கண்டுபிடித்த அரசுப் பள்ளி மாணவிக்கு 'குருஷேத்ரா' விருது

சென்னை  - செங்கல் அறுக்கும் கருவியை கண்டுபிடித்தற்காக முத்துப்பேட்டை அரசுப் பள்ளி மாணவிக்கு அண்ணா பல்கலைக்கழகம் விருது வழங்கி கவுரவித்துள்ளது.  சென்னை அண்ணா பல்கலைக்கழகம் புதிய கண்டுபிடிப்புகளை உருவாக்கும் தமிழகத்தை சேர்ந்த சாதனையாளர்கள் 5 பேருக்கு ஆண்டுதோறும் ‘குருசேத்ரா’ எனும் விருதை வழங்கி கவுரவிக்கிறது. இந்தாண்டுக்கான விருது வழங்கும் விழா அண்மையில் சென்னை அண்ணா பல்கலைக்கழகத்தில் நடைபெற்றது.

இதில், 2017-ம் ஆண்டு விருதுப் போட்டிக்காக எளியமுறையில் செங்கல் அறுக்கும் கருவியை உருவாக்கிய திருவாரூர் மாவட்டம் முத்துப்பேட்டை புதுத்தெரு ஊராட்சி ஒன்றிய நடுநிலைப் பள்ளியில் பயிலும் 8-ம் வகுப்பு மாணவி இரா.ஆர்த்திக்கு 'குருசேத்ரா' விருது, சான்றிதழ், ரூ.10 ஆயிரம் ரொக்கப்பரிசு வழங்கப்பட்டது. விருது மற்றும் பாராட்டு பெற்ற மாணவி இரா.ஆர்த்திக்கு பள்ளியில் நேற்று நடைபெற்ற நிகழ்ச்சியில் தலைமையாசிரியர் கோதண்டராமன், ஆசிரியர்கள் ஆண்டனி, செல்வசிதம்பரம், கவுதமன், மேகநாதன், ஆசிரியைகள் முத்துலட்சுமி, ஜெயலட்சுமி, அமிர்தம், இந்திரா மற்றும் முத்துப்பேட்டை பகுதி பொதுமக்கள் பெற்றோர்கள் உட்பட பலரும் வாழ்த்து தெரிவித்தனர்.

Read More