ஆட்சியை அகற்ற போராடுவோம்: ஸ்டாலின்

சென்னை: அதிமுக ஆட்சி அகன்றால் தான் அநியாயம் அகற்றப்படும் என்றால், அதையும் அகற்ற போராடுவோம் என தி.மு.க., செயல் தலைவர் ஸ்டாலின் கூறியுள்ளார்.

இது தொடர்பாக அவர் வெளியிட்ட அறிக்கை: வரும் 13ம் தேதி போராட்ட முழக்கங்கள் ஓங்கி ஒலிக்கட்டும். ரேசன் கடைகளில் நிலவும் அநியாயங்களை அகற்றிட போராடுவோம். இந்த ஆட்சி அகன்றால்தான் அநியாயம் அகற்றப்படும் என்றால் அதையும் அகற்ற போராடுவோம். ரேசன் கடைகள் செயல்பாடுகளை அதிமுக அரசு சீர்குலைத்து விட்டது.
வறுமையில் வாடும் மக்களை பட்டினியில் தள்ளும் நிலை ஏற்பட்டுள்ளது. மக்களின் உணவு தேவையை பூர்த்தி செய்ய நடவடிக்கை எடுக்கவில்லை. ரேசன் கடைகளில் உணவு பொருட்கள் இருப்பதாக அமைச்சர்கள் கூறுவது உண்மைக்கு மாறானது. இவ்வாறு ஸ்டாலின் கூறியுள்ளார்.

English Summary:

Chennai: AIADMK regime were to be removed, but if it's wrong, and he will fight to eliminate the DMK leader MK Stalin said act. 

Read More

ராஜ்யசபா நாள் முழுவதும் ஒத்திவைப்பு; லோக்சபாவில் அ.தி.மு.க., அமளி

புதுடில்லி: பார்லிமென்ட் பட்ஜெட் கூட்டத்தொடரின் 2வது அமர்வு இன்று கூடியது. இன்று கூடியதும் முன்னாள் உறுப்பினர்கள் மறைவுக்கு இரங்கல் தெரிவிக்கப்பட்டது. பின்னர் அவர்களுக்கு அஞ்சலி தெரிவிக்கும் வகையில் ராஜ்யசபா நாள் முழுவதும் ஒத்திவைக்கப்பட்டது.

லோக்சபாவில் தமிழக மீனவர்கள் பிரச்சனை:

லோக்சபா நடைபெற்று வருகிறது. அ.தி.மு.க., உறுப்பினர்கள் லோக்சபாவில் தமிழக மீனவர்கள் மீதான இலங்கை படையினரின் தாக்குதல் குறித்து விவாதிக்க வேண்டும் என குரல் எழுப்பினர்.கேள்வி நேரம் முடிந்த பின்னர் விவாதிக்கலாம் என சபாநாயகர் சுமித்ரா மகாஜன் கூறினார்.

இந்தியர்கள் மீது தாக்குதல்:

அமெரிக்காவில் இந்தியர்கள் மீது இனவெறி தாக்குதல் நடப்பது குறித்து விவாதிக்க வேண்டும் என காங்., உறுப்பினர்கள் எழுப்பினர். முழு விவரம் பெற்று வருகிறோம். அடுத்த வாரத்தில் அறிக்கை தாக்கல் செய்வோம் என உள்துறை அமைச்சர் ராஜ்நாத்சிங் பதில் அளித்தார்.

Read More

இன்று சர்வதேச பெண்கள் தினம்: ஜனாதிபதி பிரணாப் முகர்ஜி வாழ்த்து

மார்ச் : இன்று சர்வதேச பெண்கள் தினத்தையொட்டி ஜனாதிபதி பிரணாப் முகர்ஜி வாழ்த்து தெரிவித்துள்ளார். இந்தியாவின் முன்னேற்றத்திற்கு நாட்டு பெண்கள் அளப்பெரிய தொண்டுகளை புரிந்துள்ளனர் என்று பெண்களை வெகுவாக பாராட்டியுள்ளார்.

இன்று உலகம் முழுவதும் பெண்கள் சர்வதேச தினம் கொண்டாடப்படுகிறது. இதனையொட்டி ஜனாதிபதி பிரணாப் முகர்ஜி வாழ்த்து செய்தியை வெளியிட்டுள்ளார். அந்த வாழ்த்து செய்தியில் இந்தியாவின் முன்னேற்றத்திற்கு நமது நாட்டு பெண்கள் அளப்பெரிய தொண்டுகளை புரிந்ததோடு தங்களை அர்ப்பணித்துள்ளனர் என்று தெரிவித்துள்ளார்.

வாழ்த்துக்கள்: 

இன்று சர்வதேச பெண்கள் தினத்தையொட்டி இந்திய பெண்மணிகளுக்கும் வெளிநாட்டு பெண்களுக்கும் எனது வாழ்த்துக்களை மனமாற தெரிவித்துக்கொள்கிறேன். பெண்கள் அதிகாரம் பெறுவதற்கும் நாட்டை முன்னேற்றம் அடையச் செய்வதிலும் பெண்கள் அதிக அளவு பங்கு பெறுவதற்கு வழிவகை செய்யும் வகையில் நாட்டில்   சட்டத்திருத்தங்கள் செய்யப்பட்டுள்ளதோடு சட்டங்களும் இயற்றப்பட்டுள்ளன. பெண்கள் தங்களுடைய ஆசைபாசைகளை நிறைவேற்றிக்கொள்வதற்கும் அவர்கள் பாதுகாப்புக்காகவும் நாம் அனைத்து உதவிகளையும் செய்ய வேண்டும். சமுதாயத்தில் பெண்கள் கன்னியமாகவும் சமுத்துவமாகவும் வாழ்வது அவர்களது உரிமையாகும்.

நாட்டில் பெண் குழந்தையாக இருந்தால் கருவிலேயே அழிப்பதை அடியோடு தடுத்து நிறுத்த வேண்டும். மேலும் பெண் குழந்தைகள்  கல்வி பெற அனைத்து வசதிகளையும் செய்து கொடுக்க வேண்டும். இந்திய நாட்டு பெண்கள் தங்களுடைய ஈவு இரக்கத்தாலும் கடுமையான உழைப்பாலும் பொறுமையாலும் நாட்டின் முன்னேற்றத்திற்கும் வளர்ச்சிக்கும் பெரும் பங்காற்றி வருகிறார்கள். பெண்களுக்கு சமத்துவம் அளிப்பதிலும் அதிகாரம் அளிப்பதிலும் இந்திய மக்கள் மீண்டும் உறுதி செய்ய வேண்டும். இவ்வாறு அந்த வாழ்த்து செய்தியில் ஜனாதிபதி பிரணாப் முகர்ஜி தெரிவித்துள்ளார். 

Read More

மத்திய அரசை வளைக்க ஜெயேந்திரரை சந்தித்த தினகரன்

சென்னை: நேற்று மாலை, திடீரென காஞ்சிபுரம் சென்ற அ.தி.மு.க., துணைப் பொதுச் செயலர் தினகரன், சங்கர மடத்தில் ஜெயேந்திரர் மற்றும் விஜயேந்திரரை சந்தித்தார்.

இது குறித்து, அ.தி.மு.க., வட்டாரங்கள் கூறியதாவது: அ.தி.மு.க.,வின் துணைப் பொதுச் செயலராக நியமிக்கப்பட்டிருக்கும் தினகரனுக்கு, சிக்கல் மேல் சிக்கல் வந்து கொண்டே இருக்கிறது. சசிகலா, பொதுச் செயலராக நியமிக்கப்பட்டதற்கு எதிர்ப்புத் தெரிவித்து தேர்தல் கமிஷனில், பன்னீர்செல்வம் தரப்பினர் கொடுத்த மனுவுக்கு, விளக்கம் கேட்டு, நோட்டீஸ் அனுப்பினர். அந்த நோட்டீசுக்கு, தான் பதில் அளித்தால் போதும் என்று தினகரன் நினைத்தார். ஆனால், அதை ஏற்க மறுத்து விட்டது தேர்தல் கமிஷன். எனவே, சசிகலா தேர்வையும் செல்லாது என தேர்தல் கமிஷன் அறிவிக்கவே வாய்ப்புள்ளது என தினகரன் நினைக்கிறார்.

இத்துடன், உறவினர்கள் அனைவரும் தனக்கு எதிராக நிற்பது ; முதல்வர் இடைப்பாடி பழனிச்சாமிக்கு, மத்திய அரசு முழு ஒத்துழைப்பு தராதது; அன்னிய செலாவணி மோசடி வழக்கில், தனக்கு 28 கோடி ரூபாய் அபராதம் விதிக்கப்பட்டது என பல பிரச்னைகளை தினகரன் சந்தித்து வருகிறார். இதற்காக, தமிழக பா.ஜ., தலைவர்கள் சிலர் மூலம் மத்திய அரசை வளைக்க தினகரன் முயற்சித்தார். ஆனால், முடியவில்லை.

எனவே, காஞ்சி சங்கராச்சாரியார் ஜெயேந்திரரை சந்தித்து பேச திட்டமிட்டார். நேற்று மாலை, தினகரனுக்கு அப்பாயின்மென்ட் கொடுக்கப்பட்டது. அதன் அடிப்படையில், தினகரன், காஞ்சிபுரம் சென்று, ஜெயேந்திரரையும், விஜயேந்திரரையும் சந்தித்துப் பேசினார். காஞ்சி காமாட்சியம்மன் கோவில் கும்பாபிஷேகத்துக்கு சசிகலாவுக்கு அழைப்பு அனுப்பியதற்கு, தினகரன் நன்றி கூறினார். ஜெயேந்திரர் மற்றும் விஜயேந்திரர் இருவரையும் சிறையில் இருக்கும் சசிகலா விசாரித்ததாகவும் தினகரன் கூறினார். தினகரன் வைத்த கோரிக்கைகளை பா.ஜ., தலைமைக்கு கொண்டு செல்வதாக ஜெயேந்திரரும்; விஜயேந்திரரும் கூறியுள்ளனர்.
இவ்வாறு அக்கட்சி வட்டாரங்கள் கூறின.

Read More

சுப்ரீம் கோர்ட்டில் மன்னிப்பு கேட்டார் அனுராக் தாகூர்!

புதுடெல்லி  - சர்வதேச கிரிக்கெட் கவுன்சிலுக்கு எழுதிய கடிதத்தில் இடம் பெற்றுள்ள தகவல்களை மறைத்து பொய்யான தகவலை தெரிவித்ததற்காக அனுராக் தாகூர் கோர்ட்டில் மன்னிப்பு கேட்டார்.

சுப்ரீம் கோர்ட் கேள்வி:

லோதா கமிட்டி சிபாரிசுகளை அமல்படுத்த காலதாமதம் செய்ததால் இந்திய கிரிக்கெட் வாரிய தலைவர் அனுராக் தாகூர், செயலாளர் அஜய் ஷிர்கே ஆகியோரை சுப்ரீம் கோர்ட்டு அதிரடியாக பதவியில் இருந்து நீக்கியது.  அத்துடன் தலைவர் அனுராக் தாகூர் கோர்ட்டில் தாக்கல் செய்த பிரமாணபத்திரத்தில் சர்வதேச கிரிக்கெட் கவுன்சிலுக்கு எழுதிய கடிதத்தில் இடம் பெற்றுள்ள தகவல்களை மறைத்து பொய்யான தகவலை தெரிவித்ததற்காக ஏன்? கோர்ட்டு அவமதிப்பு நடவடிக்கை எடுக்கக்கூடாது என்று விளக்கம் கேட்டு நோட்டீசு அனுப்பப்பட்டு இருந்தது.

மன்னிப்பு கேட்டார்:

இந்த வழக்கு நீதிபதி தீபக் மிஸ்ரா தலைமையிலான பெஞ்ச் முன்பு நேற்று முன்தினம் விசாரணைக்கு வந்தது. அப்போது அனுராக் தாகூர் நேரில் ஆஜராகி தனது செயலுக்கு நிபந்தனையற்ற மன்னிப்பு கேட்டார். அத்துடன் வேண்டுமென்றே தவறான தகவலை அளிக்கவில்லை என்றும் விளக்கம் அளித்தார். இந்த வழக்கு விசாரணையை ஏப்ரல் 17-ந் தேதிக்கு தள்ளி வைத்த நீதிபதிகள், அன்றைய தினம் அனுராக்தாகூர் கோர்ட்டில் நேரடியாக ஆஜராகுவதற்கும் விலக்கு அளித்து உத்தரவிட்டனர்.

Read More

இந்தியாவுக்கு விரைவில் செல்வேன் : வங்கதேச பிரதமர் ஷேக் ஹசினா பேட்டி

ஜாகர்தா   - இந்தியாவுக்கு விரைவில் செல்வேன் என்று வங்கதேச பிரதமர் ஷேக் ஹசினா தெரிவித்துள்ளார். இந்தியாவுக்கு கடந்தாண்டு டிசம்பர் மாதம் ஷேக் ஹசினா வரவிருந்தார். ஆனால் இந்தியாவில் உயர்மதிப்புள்ள ரூபாய் நோட்டுகள்  செல்லாது என்று அறிவிக்கப்பட்டது உள்பட பல்வேறு காரணங்களால் ஹசினா தனது பயணத்தை ஒத்திவைத்தார். இந்தநிலையில் இந்துமகா சமுத்திரப்பகுதி நாடுகளின் மாநாட்டில் கலந்துகொள்வதற்காக ஹசினா இந்தோனேசியா தலைநகர் ஜாகர்தாவுக்கு வந்துள்ளார். அங்கு அவர் நிருபர்களுக்கு பேட்டி அளித்தார். அப்போது இந்திய பயணம் குறித்த கேட்ட கேள்விக்கு  அவர் பதில் அளிக்கையில்இந்தியாவுக்கு விரைவில் பயணம் செய்வேன் என்றார்.

கடந்த பிப்ரவரி மாதம் இந்திய வெளியுறவுச் செயலாளர் ஜெய்சங்கர் டாக்காவுக்கு சென்றிருந்தார். அப்போது வங்கதேச வெளியுறவு செயலாளர்  பிரதமர் ஹசினாவின் பத்திரிகை உதவி தொடர்பாளர் நஸ்ரூல் இஸ்லாம் நிருபர்களுக்கு பேட்டி அளிக்கையில் வரும் ஏப்ரல் மாதம் இந்தியாவுக்கு பிரதமர் ஹசினா செல்வார் என்றார். கடந்த 2015-ம் ஆண்டு இந்தியாவுக்கு வருமாறு வங்கதேச பிரதமர் ஹசினாவுக்கு பிரதமர் மோடி அழைப்பு விடுத்தார். அதனை ஏற்று கடந்த டிசம்பர் மாதம் இந்தியாவுக்கு ஹசினா வரவிருந்தார். ஆனால் இந்தியாவில் உயர்மதிப்புள்ள ரூபாய் நோட்டுகள் செல்லாது என்று அறிவிக்கப்பட்டதால் பிரதமர் மோடி மற்றும் முக்கிய மத்திய அமைச்சர்களுக்கு பணி அதிகமாக இருந்ததால் ஹசினா தனது இந்திய பயணத்தை ஒத்திவைத்தார். 

Read More

அமெரிக்காவைத் தொடர்ந்து நியூசிலாந்திலும் இந்தியர்கள் மீது இனவெறி தாக்குதல்

ஆக்லாந்து  - நியூசிலாந்தின் ஆக்லாந்து நகரில் இந்தியர் மீது இனவெறிப் பேச்சு மூலம் தாக்குதல் நடத்தப்பட்டிருப்பதாக அந்நாட்டு ஊடகங்கள் செய்தி வெளியிட்டுள்ளன. கடந்த வாரம் நடைபெற்ற சம்பவம் குறித்து  அந்நாட்டு ஊடகங்கள் செய்தி வெளியிட்டிருக்கிறது. இச்செய்தி தற்போதுதான் மற்ற பகுதிகளுக்கும் பரவி வருகிறது.  இனவெறிப் பேச்சால் பாதிக்கப்பட்ட நரேந்தர்வீர் சிங் என்ற இந்தியர் சம்பவத்தன்று நடந்த நிகழ்வுகளை வாகனத்தின் உள்ளே இருந்தபடி பதிவு செய்துள்ளார். இதுகுறித்து நரேந்தர்வீர் சிங் தனது ஃபேஸ்புக்கில் பதிவிட்டுள்ள வீடியோவில், "சாலையில் நான் அந்த நபருக்கு ஒதுங்கி வழிவிட்டேன். ஆனால் அந்த நபர் என்னை மிரட்டி தவறான வார்த்தைகளால் திட்டினார். என்னை சொந்த நாட்டுக்கு செல்லுமாறு அந்த நபர் கூறினார்" என்று கூறியிருக்கிறார்.

'பஞ்சாபிகளை அவமதித்தனர்' :

இனவெறி பேச்சுக்களுக்கு உள்ளான நரேந்திரவீர் சிங், நியூஸ்ஷப் செய்தி நிறுவனத்திடம் கூறும்போது, "என்னை மிரட்டிய நபர் சாம்பல் நிற உடை அணிந்திருந்தார். அவர் பஞ்சாபிகள் மீது இழிவான வார்த்தைகளைப் பயன்படுத்தினார். இந்த சம்பவம் எனக்கு அதிர்ச்சியை அளித்துள்ளது. அந்த நபர் சென்றபிறகு நான் உண்மையில் அதிர்ச்சியில் இருந்தேன். எனக்கு என்ன செய்வது என்றே தெரியவில்லை. இந்தச் சம்பவம் என்னை மிகவும் காயப்படுத்தியுள்ளது. அவர் என் அருகில் வரும் போது அவர் என்னை ஆயுதத்தால் தாக்க வருகிறார் என்றுதான் நான் முதலில் நினைத்தேன்.

அவர் தனது காரில் கடந்து செல்லும்போது என்னை மீண்டும் இனரீதியாக தாக்கிப் பேசினார்" என்று கூறினார். கடந்தவாரம் நரேந்திர சிங்கின் நண்பர், பிக்ரம்சித் என்ற நபரும் இன ரீதியான தாக்குதலுக்கு உள்ளாக்கப்பட்டதாகவும் தகவல்கள் தெரிவிகின்றன. இத்தாக்குதல் குறித்து நியூசிலாந்து புலம்பெயர்வு தொழிலாளர் சங்க தரப்பில், "நியூசிலாந்தில் சமீபகாலமாக இனரீதியான தாக்குதல்கள் அதிகரித்துள்ளன. இதுபோன்ற சம்பவங்கள் வெளிப்படையாக நடப்பதை நாம் கவனித்து வருகிறோம். இதுபோன்ற சம்பவங்கள் கவலையை ஏற்படுத்தியுள்ளது டொனால்ட் டிரம்ப் அமெரிக்க அதிபராக தேர்ந்தெடுக்கப்பட்ட பிறகு சமுதாயத்தில் சகிப்புதன்மையற்ற நிலை அதிகரித்துள்ளது" " என்று கூறப்பட்டுள்ளது. இனரீதியான தாக்குதலுக்கு உள்ளாக்கப்பட்ட இரு இந்தியர்களும் போலீஸாரில் இதுகுறித்து புகார் அளித்துள்ளனர்.

Read More