ஆத்தூர் அருகே விபத்து; 3 பேர் பலி

ஆத்தூர்: ஆத்தூர் அருகே கூடமலை ஒத்தாலக்காடு அருகே மினி சரக்கு ஆட்டோ, சாலையோரம் நின்ற டிராக்டரில் மோதி விபத்துக்குள்ளானதில் 3 பேர் சம்பவ இடத்திலேயே பலியாயினர்.

கெங்கவல்லி ஊரை சேர்ந்த சிலர், மினி சரக்கு ஆட்டோவில் கொல்லிமலையிலுள்ள கோவிலுக்கு சென்று திரும்புகையில், எதிர்பாராத விதமாக சாலையோரம் நின்ற டிராக்டரில் மோதி விபத்துக்குள்ளானது. இவ்விபத்தில், பெரியண்ணன் (45), அய்யாவு (60), கோவிந்தன் (60) ஆகிய 3 பேர் சம்பவ இடத்திலேயே பலியாயினர். 17 பேர் படுகாயம் அடைந்தனர். காயமடைந்தவர்கள் சேலம் அரசு மருத்துவமனைக்கு கொண்டு செல்லப்பட்டனர். டிரைவர் தூக்க கலக்கத்தில் இருந்ததே விபத்துக்கு காரணம் என முதற்கட்ட விசாரணையில் தெ
ரியவந்துள்ளது.

Read More

அமெரிக்கா அதிரடி தாக்குதல்: அல் - குவைதா தலைவன் பலி

வாஷிங்டன்: அண்டை நாடான ஆப்கானிஸ்தானில், தலிபான், அல் - குவைதா பயங்கரவாதிகளுக்கு எதிராக, அமெரிக்க படைகள் தாக்குதல் நடத்தி வருகின்றன. இந்நிலையில், கடந்த 19ம் தேதி, அமெரிக்க ராணுவம் நடத்திய வான்வழி தாக்குதலில், அல் - குவைதா பயங்கரவாத அமைப்பின், மூத்த தலைவர்களின் ஒருவனான, காரி யாசின் கொல்லப்பட்டதாக, அமெரிக்க ராணுவ தலைமையகம் தெரிவித்துள்ளது.

அமெரிக்க ராணுவம் வெளியிட்டுள்ள அறிக்கை: பாகிஸ்தான் தலைநகர் இஸ்லாமாபாத்தில், 2008ல், ஓட்டலில் நடந்த குண்டு வெடிப்பில், அமெரிக்காவின் இரண்டு ராணுவ அதிகாரிகள் இறந்தனர். லாகூரில், 2009ல், இலங்கை கிரிக்கெட் வீரர்கள் சென்ற பஸ் மீது பயங்கரவாதிகள் தாக்குதல் நடத்தினர். இதில், ஆறு போலீசார், இரண்டு குழந்தைகள் இறந்தனர். இந்த இரண்டு தாக்குதலுக்கும் மூளையாக செயல்பட்டவன், காரி யாசின். இவ்வாறு கூறப்பட்டுள்ளது. காரி யாசின் இறந்ததை, அல் - குவைதா அமைப்பும் உறுதி செய்துள்ளது.

Read More

'பசுக்களை கொலை செய்தால் கை, கால்களை உடைப்பேன்!'

முசாபர்நகர் : உ.பி.,யில், பசுக்களை கொன்றாலோ, அவமரியாதை செய்தாலோ, அவர்களின் கை, கால்களை உடைத்து விடுவதாக, பா.ஜ., - எம்.எல்.ஏ., மிரட்டிய சம்பவம் பரபரப்பை ஏற்படுத்தி உள்ளது.

உ.பி.,யில், பா.ஜ.,வை சேர்ந்த, யோகி ஆதித்யநாத், சமீபத்தில் முதல்வராக பதவியேற்றார். இந்த மாநிலத்தின் முசாபர்நகர் மாவட்டத்தில் நேற்று முன்தினம், மாநில அமைச்சர் சுரேஷ் ராணாவை பாராட்டும் நிகழ்ச்சி நடந்தது;

அதில் பங்கேற்று பேசிய, பா.ஜ., - எம்.எல்.ஏ., விக்ரம் சைனி கூறியதாவது: பசுக்களை அனைவரும், தாயாக மதிக்க வேண்டும். பசுக்களை கொன்றாலோ, அவமரியாதை செய்தாலோ, அவர்களின் கை, கால்களை உடைப்பேன்.

'வந்தே மாதரம்' எனச் சொல்ல தயங்குபவர்களையும், 'பாரத் மாதாவுக்கு ஜே' எனச் சொல்ல கஷ்டப்படுபவர்களையும், சும்மா விடமாட்டேன். அவர்களின் கை, கால்களையும் உடைப்பேன். தேர்தல் பிரசாரத்தின்போது அளிக்கப்பட்ட வாக்குறுதிகளை நிறைவேற்றத் தயாராக உள்ளோம். பசுக்களுக்கு எதிராக நடப்பவர்கள் மீது நடவடிக்கை எடுக்க, எங்களிடம், இளைஞர்கள் குழு உள்ளது. இவ்வாறு அவர் கூறினார்.

உ.பி.,யில், பசுக்களை கடத்த தடை விதிக்கப்படும் என்றும், சட்ட விரோத மாட்டிறைச்சி கூடங்களுக்கு எதிராக நடவடிக்கை எடுக்கப்படும் என்றும், முதல்வர் ஆதித்யநாத் சமீபத்தில் அறிவித்தார். இந்த நிலையில், விக்ரம் சைனியின் மிரட்டல் பேச்சு, அந்த மாநிலத்தில் பீதியையும், பரபரப்பையும் ஏற்படுத்தி உள்ளது.

Read More

ஜம்மு-காஷ்மீரில் அமைச்சர் வீட்டில் பயங்கரவாதிகள் தாக்குதல்

ஸ்ரீநகர்: ஜம்மு காஷ்மீர் மாநிலம் அனந்த்னாக் மாவட்டத்திலுள்ள பி.டி.பி., கட்சியை சேர்ந்த அமைச்சர் பரூக் அந்த்ராபி வீட்டை குறி வைத்து பயங்கரவாதிகள் இரவில் தாக்குதல் நடத்தினர். இத்தாக்குதலில் பாதுகாப்பு பணியில் ஈடுபட்டிருந்த ஒரு போலீசார் காயமடைந்தார். மேலும் தாக்குதலில் ஈடுபட்ட பயங்கரவாதிகள், 4 ரைபில் துப்பாக்கியையும் திருடிச்சென்றனர். ஜம்மு-காஷ்மீர் முதல்வர் மெகபூபா முக்தியின் நெருங்கிய உறவினரான அமைச்சர் பரூக் அந்த்ராபி, வீட்டில் இல்லாததால் தாக்குதலில் இருந்து தப்பியது குறிப்பிடத்தக்கது.

Read More

ரியல் எஸ்டேட் சட்ட விதிகள்: 42 பேர் கருத்து

நாடு முழுவதும் வீடு, மனை விற்பனையில் நடக்கும் முறைகேடுகளை தடுக்க, ரியல் எஸ்டேட் ஒழுங்குமுறை சட்டத்தை, மத்திய அரசு, 2016ல் நிறைவேற்றியது. இதை அமல்படுத்த விதிகள் வகுக்கப்பட்டு, மாநில அரசுகளுக்கு அனுப்பப்பட்டன.

நீண்ட தாமதத்துக்கு பின், இதை அமலாக்கும் பணிகளை, தமிழக அரசு துவக்கியது. இதற்கான வரைவு விதிகளை, ஜன., 28ல் வெளியிட்ட அரசு, பொதுமக்கள் கருத்து தெரிவிக்க, 21 நாட்கள் அவகாசம் வழங்கியது.

இது குறித்து, நகரமைப்புத் துறை உயரதிகாரி ஒருவர் கூறியதாவது:வரைவு சட்ட விதிகள் குறித்து, ரியல் எஸ்டேட் அமைப்புகள், கட்டுமான நிறுவனங்கள், தொழில்முறை வல்லுனர்கள் உட்பட, 42 பேர் இ - மெயில் வாயிலாக கருத்துகளை தெரிவித்து இருந்தனர்.

இதன் மீது, நகரமைப்புத் துறை, சென்னை பெருநகர் வளர்ச்சி குழுமமான சி.எம்.டி.ஏ., அதிகாரிகளின் கருத்துரைகள் பெறப்பட்டன. இவை அனைத்தும் பட்டியலாக தொகுக்கப்பட்டு, அரசுக்கு அனுப்பப்பட்டு உள்ளன. இவ்வாறு உயர் அதிகாரிகள் கூறினர்.

Read More

10 மந்திரிகள் ஊழல் பட்டியல் வெளியிடுகிறது பன்னீர் அணி?

ஆர்.கே.நகரில், உச்சகட்ட தேர்தல் பிரசாரத்தின் போது, சசிகலா அணியில் உள்ள, 10 அமைச்சர்களின் ஊழல் பட்டியலை வெளியிட, பன்னீர்செல்வம் அணியினர் முடிவு செய்துள்ளனர்.

ஆர்.கே.நகர் தொகுதியில் போட்டியிடும் மதுசூதனின் வெற்றிக்காக, பன்னீர்செல்வம் ஆதரவாளர்கள், தேர்தல் பிரசாரத்தில், பலவித உத்திகளை கையாண்டு வருகின்றனர். பிரசாரத்தின் உச்ச கட்டத்தில், கடைசி அஸ்திரமாக, முதல்வர் பழனிசாமி அமைச்சரவையின் ஊழல் பட்டியலை வெளியிட திட்டமிட்டுள்ளனர்.

இதற்காக நெடுஞ்சாலைத்துறை உட்பட பல துறைகளில், மாவட்ட வாரியாக பினாமிகள் பெயரில், அமைச்சர்கள் எடுத்த டெண்டர்கள்; மாவட்ட செயலர்கள் மற்றும் எம்.எல்.ஏ.,க்களுக்கு கொடுத்த கமிஷன் விபரங்கள் சேகரிக்கப்படுகின்றன.

மேலும், டாக்டர்கள், துணை வேந்தர்கள் நியமனங்களில் நடந்த முறைகேடு உட்பட, ௧௦ அமைச்சர்களின் துறைகளில் அரங்கேறியுள்ள ஊழல் விபரங்களை, பன்னீர்செல்வம் அணியினர் தயாரித்து வருகின்றனர். இவை, பட்டியலிடப்பட்டு, உச்ச கட்ட பிரசாரத்தின் போது, வெளியிடப்பட உள்ளது.

Read More

நாகர்கோவிலில் இருந்து சென்னைக்கு கூடுதல் ரயில்?

'நாகர்கோவிலில் இருந்து சென்னைக்கு, தினசரி இரவு நேர எக்ஸ்பிரஸ் ரயில்களை இயக்க வேண்டும்' என, கன்னியாகுமரி மாவட்ட ரயில் பயணிகள் சங்கம் வலியுறுத்தி உள்ளது.

ரயில்வே அமைச்சகத்திற்கு, சங்கத்தின் தலைவர் ஸ்ரீராம் அனுப்பியுள்ள மனு:கன்னியாகுமரியில் இருந்து சென்னை எழும்பூருக்கு, கன்னியாகுமரி எக்ஸ்பிரஸ் மட்டுமே இயக்கப்படுகிறது. திருவனந்தபுரத்தில் இருந்து, கன்னியாகுமரி வழியாக, எழும்பூருக்கு அனந்தபுரி எக்ஸ்பிரஸ் இயக்கப்படுகிறது.

இந்த இரு எக்ஸ்பிரஸ் ரயில்களிலும், பயணிகள் கூட்டம் அதிகம் உள்ளது. எனவே, நாகர்கோவிலில் இருந்து, சென்னை எழும்பூர் அல்லது தாம்பரத்திற்கு, இரவு நேர, புதிய எக்ஸ்பிரஸ் ரயில்களை இயக்க, உரிய நடவடிக்கை எடுக்க வேண்டும். இவ்வாறு மனுவில் கோரப்பட்டுள்ளது.

Read More