India-China standoff: `சந்தேகம் வேண்டாம்... நமது எல்லைகளைப் பாதுகாப்பது உறுதி!’ - ராஜ்நாத் சிங்

இந்திய - சீன எல்லைப் பகுதியில் கடந்த ஏப்ரல் மாதம் முதல் தொடர்ந்து பதற்றம் நிலவிவருகிறது. டோக்லாம் தொடங்கி கல்வான் பள்ளத்தாக்கு மோதல் வரை பல்வேறு இடங்களில் சீனாவின் அத்துமீறலை இந்தியா தொடர்ந்து முறியடித்ததோடு, கிழக்கு லடாக்கின் பாங்கோங் சோ ஏரியைச் சுற்றியிருக்கும் முக்கியமான பகுதிகளையும் கைப்பற்றியது. இது தொடர்பாக மாஸ்கோவில் நடைபெற்ற ஷாங்காய் ஒத்துழைப்பு மாநாட்டின்போது இரு நாட்டு பாதுகாப்பு மற்றும் வெளியுறவுத்துறை அமைச்சர்கள் ஜெய்சங்கரும், வாங் யீ-யும் நேரில் சந்தித்து ஆலோசனை நடத்தினார்கள். அந்தச் சந்திப்பின்போது எல்லையில் படைகளைத் திரும்பப் பெறுவது தொடர்பான ஐந்து அம்சத் திட்டத்துக்கு ஒப்புதல் அளிக்கப்பட்டது. இந்நிலையில், நாடாளுமன்ற மழைக்கால கூட்டத்தொடர் திங்கட்கிழமை டெல்லியில் தொடங்கியது. இந்தக் கூட்டத்தொடரில், லடாக் எல்லை நிலவரம் குறித்து மக்களவையில் விவாதம் நடத்த வேண்டும் என்று காங்கிரஸ் தரப்பில் வலியுறுத்தப்பட்டு அனுமதி மறுக்கப்பட்டதால், காங்கிரஸ் எம்.பி-க்கள் வெளிநடப்பு செய்தனர். இது குறித்து மக்களவை காங்கிரஸ் தலைவர் ஆதிர் ரஞ்சன் சௌத்ரி, ``கடந்த 1962 போரின்போது மக்களவையில் விவாதம் நடத்த வாஜ்பாய் வலியுறுத்தியதை நேரு ஏற்றுக்கொண்டார். ஆனால், தற்போது நரேந்திர மோடி அரசு விவாதத்துக்கு அஞ்சுகிறது’’ என்றார்.எல்லையில் படை இதற்கு பதிலளிக்கும்விதமாக, மழைக்கால கூட்டத்தொடரின் இரண்டாவது நாளான செவ்வாய்க் கிழமையன்று பேசிய மத்திய பாதுகாப்புத்துறை அமைச்சர் ராஜ்நாத் சிங், ``எல்லையில் நிலவும் அமைதியைக் குலைக்கும் வகையில் கடந்த மே மற்றும் ஜூன் மாதங்களில் சீனா நடந்துகொண்டது. அதற்கு இந்திய ராணுவமும் உரிய பதிலடி கொடுத்தது. `இது போன்ற சம்பவங்களை ஏற்றுக்கொள்ள முடியாது’ என்று சீனாவிடம் நாம் தெரிவித்துவிட்டோம். இருப்பினும் எல்லைப் பகுதிகளில் சீனா தொடர்ந்து அத்துமீறல் சம்பவங்களில் ஈடுபட்டுவருகிறது. Also Read: `லடாக் எல்லையில் பஞ்சாபிப் பாடல்களை ஒலிக்கவிடும் சீன ராணுவம்!’ - ஏன் தெரியுமா? யூனியன் பிரதேசமான லடாக்கில் 38,000 சதுர கி.மீ பகுதியை சீனா தன்னுடையது என்கிறது. அதேபோல், அருணாச்சலப்பிரதேசத்தில் இந்திய - சீன எல்லைப் பகுதியின் கிழக்குப் பகுதியிலுள்ள 90,000 சதுர கி.மீ பகுதியைச் சொந்தம் கொண்டாடிவருகிறது. இதற்கு ஆதாரமாக 1993-ம் ஆண்டு கையொப்பமான சீனா-பாகிஸ்தான் உடன்படிக்கையை அந்த நாடு சொல்லிவருகிறது. ஆனால், அந்தப் பகுதிகள் நம்முடைய ஆளுகைக்குட்பட்டவை. இந்தியா - சீனா இடையிலான பாரம்பர்ய எல்லைக் கட்டுப்பாட்டுப் பகுதி தொடர்பான ஆவணங்களை ஏற்க சீனா தொடர்ந்து மறுத்துவருகிறது. எல்லைப் பிரச்னை முழுமையாகத் தீர்க்கப்படாத நிலையில், எந்தச் சூழலையும் சமாளிக்கும் வகையில் ராணுவம் மற்றும் பாதுகாப்புப் படைகள் தயார்நிலையில் இருக்கின்றன’’ என்றார். மக்களவை அலுவலில் பங்கேற்காத காங்கிரஸ் கட்சியின் முன்னாள் தலைவர் ராகுல் காந்தி, ராஜ்நாத் சிங் மக்களவையில் தாக்கல் செய்த அறிக்கைக்கு தன் ட்விட்டர் பக்கத்தில் கருத்து தெரிவித்திருந்தார். இதில், ``பாதுகாப்பு அமைச்சரின் அறிக்கையின் மூலம் சீனா அத்துமீறல் விவகாரத்தில் இந்திய நாட்டை பிரதமர் நரேந்திர மோடி தவறாக வழிநடத்தியிருக்கிறார் என்பது தெளிவாகத் தெரிகிறது. மோடி ஜி., நீங்கள் எப்போது சீனாவுக்கு எதிராக நிற்கப்போகிறீர்கள்..? சீனாவின் பெயரைக் குறிப்பிட அஞ்சாதீர்கள்" என்று கருத்து பதிவிட்டிருந்தார்.ராஜ்நாத் சிங் இதையடுத்து, ராஜ்நாத் சிங்கின் நாடாளுமன்ற அறிக்கைக்கு பதிலளித்த சீன வெளியுறவு அமைச்சக செய்தித் தொடர்பாளர் வாங் வென்பின், ``தற்போதைய எல்லை நிலவரங்களுக்குப் பொறுப்பு சீனாவிடத்தில் இல்லை. இப்போதைக்கு மிகவும் அவசரமான காரியம் என்னவெனில் இந்தியா தன் படைகளை வாபஸ் பெற வேண்டும் என்பதே. தன் தவற்றை இந்தியா திருத்திக்கொள்ள வேண்டும். தரைப்படைகளை விலக்கிக்கொள்வதன் மூலம் பதற்றத்தைத் தணிக்க முடியும். இந்தியப் படைகள்தான் உடன்படிக்கைகளை மீறுகின்றன. முதலில் ஊடுருவி, சீனப் படைகள்மீது துப்பாக்கிச்சூடு நடத்தியது இந்தியப்படைகளே. இருநாட்டு வெளியுறவு அமைச்சர்களுக்கிடையே ஏற்பட்ட ஐந்து அம்சத் திட்டத்தை இந்தியா கடைப்பிடிப்பதோடு முந்தைய உடன்படிக்கைகளையும் கடைப்பிடிக்க வேண்டும்" என்று தெரிவித்தார்.இந்தியா - சீனா இந்நிலையில், இன்று மீண்டும் மக்களவையில் பேசிய பாதுகாப்புத்துறை அமைச்சர் ராஜ்நாத் சிங், ``சர்வதேச எல்லையில் அத்துமீறல் முயற்சிகளைக் கைவிடாவிட்டால் எத்தனை வலிமையான, பெரிய நடவடிக்கைகளையும் எடுக்க இந்தியா தயங்காது’’ என்று எச்சரிக்கை விடுத்திருக்கிறார். இந்திய-சீன எல்லைப் பிரச்னை சிக்கலானது என்றும், பொறுமையாகத் தீர்க்கப்பட வேண்டிய ஒன்று என்பதையும் இரு நாடுகளும் நம்புவதாகத் தெரிவித்தார். இந்தியாவும் சீனாவும் பல ஆண்டுகளாக செய்துவந்த பல்வேறு ஒப்பந்தங்களையும், பொதுவான புரிதல்களையும் பட்டியலிட்டுப் பேசிய ராஜ்நாத் சிங், ``2003-ம் ஆண்டுக்குப் பிறகு இந்த ஒப்பந்தங்களை சீனா மதிக்கவில்லை" என்றார்.இந்தியா - சீனா எல்லை இந்தியா-சீனா எல்லைப் பதற்றம் தொடர்பாக எந்தவொரு சூழ்நிலையையும் சமாளிக்க இந்தியா தயாராக இருப்பதாகத் தெரிவித்த ராஜ்நாத் சிங், உண்மையான கட்டுப்பாட்டுக் கோட்டின் (எல்.ஓ.சி) பாரம்பர்ய வழக்கமான சீரமைப்பை சீனா அங்கீகரிக்கவில்லை என்றும், இரு நாடுகளுக்கும் இடையிலான எல்லைப் பிரச்னை தீர்க்கப்படாமல் இருக்கிறது என்றும் கூறினார். ``இந்திய-சீன எல்லைப் பிரச்னைக்கு தீர்வுகாண முயன்றுவருகிறோம், அதேவேளையில், எந்தச் சவாலையும் எதிர்கொள்ளத் தயார்நிலையில் இருக்கிறோம். நாட்டின் எல்லைகளை பாதுகாப்பதற்கான எங்கள் உறுதியைப் பற்றி யாருக்கும் சந்தேகம் இருக்கக் கூடாது’’ என்றும் ராஜ்நாத் சிங் தெரிவித்தார். Also Read: அருணாச்சல பிரதேசம்: 5 இந்தியர்கள் மாயமான விவகாரம்... இந்திய ராணுவத்தினரிடம் ஒப்படைத்த சீனா!
http://dlvr.it/RgpXTt

Read More

நடிகை கங்கனா ரனாவத்துடன் மல்லுக்கு நிற்கும் நடிகை ஊர்மிளா

பாலிவுட்டில் தலைவிரித்தாடும் போதை பொருட்கள் பயன்பாடு குறித்து அண்மையில் சர்ச்சை கருத்தை சொல்லியிருந்தார் பாலிவுட் நடிகை கங்கனா ரனாவத்.  மகாராஷ்டிரா மாநில அரசியலில் கங்கனாவின் கருத்து அதிர்வலைகளை எழுப்பிய நிலையில் ‘போதை பொருள் விவகாரத்தில் முதலில் உங்கள் சொந்த மாநிலமான ஹிமாச்சல பிரதேசத்தின் நிலையை பாருங்கள்’ என நடிகை கங்கனாவுடன் மல்லுக்கு நிற்கிறார் நடிகை ஊர்மிளா.  பாலிவுட் நடிகையான அவர் நடிகர் கமலின் இந்தியன் படத்தில் நடித்துள்ளார். தனியார் செய்தி நிறுவனத்துக்கு அவர் பேட்டியளித்தபோது இதனை சொல்லியுள்ளார்.  “போதை பொருள் பயன்பாடு தொடர்பான அச்சுறுத்தல் தேசம் முழுவதுமே எழுந்துள்ளது. ஹிமாச்சல பிரேதசம் தான் போதை பொருட்களின் தாய் வீடு என்பது அவருக்கு தெரியுமா என தெரியவில்லை. மற்ற மாநிலங்களை குறை சொல்வதற்கு முன்னர்,முதல் அவரது சொந்த மாநிலத்திலிருந்து அந்த பணியினை ஆரம்பிக்கலாம்.  சத்தமாக பேசுவதால் ஒரு நபர் உண்மையை தான் பேசுகிறார் என நம்ப வேண்டிய அவசியமில்லை. அனைவரது கவனத்தையும் ஈர்க்க வேண்டுமென விரும்புகின்ற ஒருவர் தான் இப்படி நடந்து கொள்வார்” என அவர் தெரிவித்துள்ளார்.
http://dlvr.it/RgnL7B

Read More

பட்டியலினத்தைச் சேர்ந்தவருக்கு முடிவெட்ட மறுத்த சலூன் – புதிய சலூனை திறந்த அரசு..!

கேரள மாநிலம் இடுக்கி மாவட்டத்தில் உள்ள வட்டவடா பஞ்சாயத்துக்கு உட்பட்ட பகுதிகளில் பட்டியலினத்தைச் சேர்ந்தவர்களுக்கு முடிவெட்ட சலூன் கடைகள் மறுப்பதாக புகார்கள் எழுந்தன. இது கேரள அரசு வரை சென்றது. இதுதொடர்பாக மார்க்சிஸ்ட் கம்யூனிஸ்ட் கட்சியைச் சேர்ந்தவரும், வட்டவடா பஞ்சாயத்து தலைவருமான ராமராஜ் விசாரணை மேற்கொண்டார். பின்னர், சலூன் கடைக்காரர்களுக்கு பஞ்சாயத்து சார்பில் வழங்கப்பட்ட உரிமம் ரத்து செய்யப்பட்டதுடன், கடைகளை அடைக்கவும் அவர் உத்தரவிட்டார்.  இதனையடுத்து, பஞ்சாயத்து சார்பில் கோவிலூர் பகுதியில் புதிய சலூன் கடை திறக்கப்பட்டுள்ளது. புதிய சலூன் கடையை, தேவிகுளம் சட்டமன்ற உறுப்பினர் எஸ்.ராஜேந்திரன் அண்மையில் திறந்து வைத்தார். கடை திறக்கப்பட்ட போது அங்கு 13 பேர் வாடிக்கையாளர்களாக இருந்தனர். அதில் 8 பேர் பிற்படுத்தப்பட்ட சமுதாயத்தைச் சேர்ந்தவர்கள், 5 பேர் பட்டியலின சமுதாயத்தைச் சேர்ந்தவர்கள். இங்கு எந்தவித பேதமில்லாமல் அனைவருக்கும் முடி வெட்டப்படும் என்றும், மற்ற சலூனில் வசூலிக்கப்படும் கட்டணமே வாங்கப்படும் என தெரிவிக்கப்பட்டுள்ளது. இந்த சம்பவம் இடுக்கி மாவட்டத்தில் பெரும் வரவேற்பை பெற்றுள்ளது.  
http://dlvr.it/RglDFM

Read More

இறுதி செமஸ்டருக்கு முன் முதுகலை மாணவர் சேர்க்கை நடத்தினால் நடவடிக்கை!

தமிழகத்தில் அரசு மற்றும் தனியார் கல்லூரிகளில் மாணவர் சேர்க்கை நடத்தப்பட்டு வருகிறது. கொரோனா பரவல் காரணமாக கல்லூரிகளில் பருவத் தேர்வுகள் ரத்து செய்யப்பட்டன. இறுதி செமஸ்டர் தேர்வுகள் மட்டும் நடத்தப்படவுள்ளன. இந்த நிலையில், இளநிலைப் படிப்புகளின் ஐந்தாவது செமஸ்டர் தேர்வை கணக்கில் கொண்டு முதுகலை பட்டப் படிப்புகளுக்கான மாணவர் சேர்க்கையை நடத்திவருவதாக புகார் எழுந்துள்ளது. இறுதி செமஸ்டர் தேர்வு முடிவதற்கு முன்பே, முதுகலை மாணவர் சேர்க்கை நடத்தினால் சம்பந்தப்பட்ட கல்லூரிகள் மீது நடவடிக்கை எடுக்கப்படும் என கல்லூரிக் கல்வி இயக்குனர் சார்பில் தெரிவிக்கப்பட்டுள்ளது. குறிப்பாக கலை, அறிவியல் கல்லூரிகளில் இளநிலைப் பட்டப்படிப்புப் படித்து வரும் மாணவர்களுக்கு இன்னும் இறுதியாண்டு இறுதி செமஸ்டர் தேர்வு நடத்தப்படவில்லை. எனவே முதுகலை மாணவர் சேர்க்கை பற்றி கல்லூரிகளுக்கு கல்லூரிக் கல்வி இயக்குனரகம் எச்சரிக்கை விடுத்துள்ளது.
http://dlvr.it/RgkbwM

Read More

கேலரிக்குள் புகுந்து எதிரணி ரசிகர்களை பந்தாடிய கால்பந்தாட்ட வீரர் !

ஜெர்மன் நாட்டை சேர்ந்த கால்பந்தாட்ட வீரர் டோனி லெஸ்னர் உள்ளூரில் தற்போது நடைபெற்று வரும் ஜெர்மன் கோப்பைக்கான தொடரில் ஹாம்பர்க் அணிக்காக தடுப்பாட்டக்காரராக விளையாடி வருகிறார். கொரோனா அச்சுறுத்தலுக்கு மத்தியிலும் பார்வையாளர்கள் போட்டியை காண  இந்த தொடரில் அனுமதிக்கப்பட்டுள்ளனர். டைனோமோ அணியுடனான போட்டியில் 1-4 என்ற கோல் வித்தியாசத்தில் டோனியின் அணி தோல்வியை தழுவியது.  ஆட்டம் முடிந்த பிறகு தோல்விக்கான காரணம் குறித்து அவர் ஊடகத்திடம் விவரித்து கொண்டிருந்தார். அப்போது அவர் திடீரென ஆவேசம் அடைந்து கேலரிக்குள் புகுந்து டைனமோ அணியின் ரசிகர்களுடன் மோதலில் இறங்கினார். பாதுகாப்பு பணியிலிருந்த காவலர்கள் இருதரப்புக்கும் இடையிலான மோதலை தடுத்து நிறுத்தியுள்ளனர்.  ‘போட்டி முடிந்த பிறகு என்னை வார்த்தை ரீதியாக கேலரியில் இருந்தவர்கள் கடுமையாக சாடினர். கால்பந்தாட்ட களத்தில் இது சாதாரண விஷயம் என்றாலும் எனது மனைவியையும், மகளையும் அவர்கள் என் காதுபடவே திட்டியதால் நான் ஆவேசமானேன்’ என இன்ஸ்டாகிராமில் டோனி தெரிவித்துள்ளார். 
http://dlvr.it/RgjPqw

Read More

செல்ஃபி மோகத்தில் இருந்த தாய் - கடல் அலையில் அடித்துச் செல்லப்பட்டக் குழந்தை!!

கேரளா மாநிலம் பாலக்காடு மாவட்டத்தைச் சேர்ந்தவர்கள் லக்‌ஷ்மணன் - அனிதாமொழி தம்பதியினர். இவர்களுக்கு இரண்டு குழந்தைகள் உள்ளனர். இவர்கள் ஞாயிற்றுக்கிழமை ஆலப்புழாவில் உள்ள தனது உறவினராக பினு என்பவர் வீட்டிற்கு ஒரு திருமண நிகழ்ச்சிக்காக சென்றுள்ளனர். திருமணம் முடிந்த பிறகு, ஞாயிறு மாலை அனிதாமொழியின் இரண்டு குழந்தைகள் மற்றும் பினுவின் மகனோடு கடற்கரைக்குச் சென்றிருக்கின்றனர். கடல் சீற்றம் சற்று அதிகமாக இருந்ததால் போலீஸார் கடற்கரையின் முன்பகுதியில் உள்ளே செல்ல அனுமதி கொடுக்கவில்லை. எனவே அங்குள்ள இ.எஸ்.ஐ மருத்துவமனைக்கு அருகிலுள்ள பகுதிக்குச் சென்றிருக்கின்றனர். பினு காரை நிறுத்தச் சென்றபிறகு, அனிதாமொழி மூன்று குழந்தைகளுடன் செல்ஃபி எடுத்துள்ளார். திடீரென வேகமாக எழும்பிய ராட்சத அலையால் அனிதாமொழி தடுமாறி விழுந்துள்ளார். பினு மற்ற இரண்டு குழந்தைகளையும் இழுத்துப் பிடித்துள்ளார். ஆனால் அனிதாமொழியின் கையிலிருந்த இரண்டரை வயது மகன் ஆதிகிருஷ்ணா கடலலையில் அடித்துச்செல்லப்பட்டான் என டைம்ஸ் ஆஃப் இந்தியாவிற்கு போலீஸார் கொடுத்த அறிக்கையில் தெரிவித்துள்ளனர். இதனால் மாவட்ட குழந்தைகள் நலவாரியம், குழந்தைகளை கடற்கரைக்கு அழைத்துச் சென்றதற்காக அவர்கள்மீது வழக்குப்பதிவு செய்யுமாறு வலியுறுத்தியுள்ளனர்.    
http://dlvr.it/RggLc9

Read More

மேக்கேதாட்டூ அணை: மத்திய அரசுக்கு அழுத்தம் கொடுக்கும் கர்நாடகம்... தடுத்து நிறுத்துமா தமிழகம்?

`மேக்கேதாட்டூவில் கர்நாடகம் அணை கட்டுவதற்கான கூடுதல் விவரங்களுடன் செப்டம்பர் 16 அல்லது 17-ம் தேதி மத்திய சுற்றுச்சூழல் மற்றும் வனத்துறை அமைச்சர் பிரகாஷ் ஜவடேகரைச் சந்திக்க உள்ளார் கர்நாடக அமைச்சர் ரமேஷ் ஜெர்க்கிஹோலி. தொடர்ந்து கர்நாடக முதல்வர் எடியூரப்பாவும் மத்திய அரசுக்கு அழுத்தம் கொடுத்து வருகிறார். 2017-ம் ஆண்டு ராம் நகர் மாவட்டம், கனகபுராவுக்கு அடுத்த மேக்கேதாட்டூவில் காவிரியாற்றின் குறுக்கே 9,000 கோடி பட்ஜெட்டில் பெங்களூரு மாநகரின் குடிநீர் தேவைக்காக அணை கட்டப்பட்டும் என அறிவித்தது கர்நாடக மாநில அரசு. இதற்காக அந்தப் பகுதியில் ஆய்வு செய்து வரைபடம் உள்ளிட்ட தகவல்களுடன் வரைவு திட்ட அறிக்கையை மத்திய நீர்வளத்துறை அமைச்சகத்திடம் அனுமதிக்காக அனுப்பியது. நீர்வளத்துறை அமைச்சகம் கர்நாடக மாநில அரசு அளித்த திட்ட வரைவு அறிக்கையை ஆய்வுக்காக எடுத்துக்கொண்டது. இதையடுத்து கர்நாடகம் மேக்கேதாட்டூவில் அணை கட்டுவதை எதிர்த்து தமிழகம் உச்ச நீதிமன்றத்தில் வழக்கு தொடர்ந்தது. இந்த வழக்கு நிலுவையில் உள்ளது. இந்நிலையில், சமீபத்தில் அணை அமையவிருக்கும் ஒன்டிகுண்ட்லு பகுதியில் ஆய்வு மேற்கொண்டார் கர்நாடக பாசனத்துறை அமைச்சர் ரமேஷ் ஜெர்க்கிஹோலி. அப்போது அவர் பேசும்போது, ``5,051 ஹெக்டேர் வன நிலம் இந்த அணைக்காக கையகப்படுத்தப்பட உள்ளது. இதில் 3,181 ஹெக்டேர் நிலம் காவிரி வனவிலங்கு சரணாலய நிலம், 1,870 ஹெக்டேர் நிலம் காப்புக்காடாகும். இந்த அணை அமையவிருக்கும் இடத்தில் 63 சதவிகிதம் நிலம் வனத்துறை கட்டுப்பாட்டில் உள்ள காவிரி வனவிலங்கு சரணாலயத்தின் கீழ் வருகிறது. இதைக் கையகப்படுத்துவதற்கு மத்திய சுற்றுச்சூழல் மற்றும் வனத்துறை அமைச்சகத்தின் அனுமதிக்காக காத்திருக்கிறோம்.மேக்கேதாட்டூ அணை அமையவிருக்கும் இடம் 2019-ம் ஆண்டிலேயே விரிவான திட்ட அறிக்கையை மத்திய அரசிடம் சமர்ப்பித்துள்ளோம். மத்திய நீர் கமிஷனின் கீழ் வரும் இயக்குநரகங்களின் ஆய்வில் இத்திட்டம் இருக்கிறது. விரைவில் இதற்கான பதில் கிடைத்துவிடும். மத்திய நீர்வள அமைச்சகத்தின் அனுமதி கிடைத்தவுடன் அமைச்சரவையின் ஒப்புதல் பெற்று டெண்டர் விட்டுவிடுவோம். 4 டி.எம்.சி தண்ணீர் பெங்களூரு குடிநீர் திட்டத்துக்காக அணையிலிருந்து எடுக்கப்படும். இதனால் தமிழகத்துக்குத் தரவேண்டிய தண்ணீரின் அளவில் எதுவும் பாதிக்கப்படாது” என்று தெரிவித்திருக்கிறார். இதுகுறித்து காவிரி தொழில்நுட்ப குழுவின் தலைவர் ஆர்.சுப்ரமணியனிடம் பேசியபோது, ``கர்நாடகம் எப்போதும் இப்படியேதான் செய்து கொண்டிருக்கிறது. கர்நாடகம் எந்த முயற்சியை எடுத்தாலும் அதைத் தடுத்து நிறுத்த தமிழகம் தயாராக இருக்கிறது. காவிரியாற்று பிரச்னை நூறாண்டு கால பிரச்னை. அவற்றை அவ்வளவு சீக்கிரத்தில் விட்டுக் கொடுக்கமாட்டோம். சின்ன சின்ன திட்டங்களுக்கெல்லாம் மத்திய சுற்றுச்சூழல் மற்றும் வனத்துறை அமைச்சகம் தடை போடுகிறது. 5,051 ஹெக்டேர் நிலம் இத்திட்டத்துக்காக கையகப்படுத்தப்பட உள்ளது. இதைக் கவனத்தில் கொண்டு மத்திய சுற்றுச்சூழல் மற்றும் வனத்துறை அமைச்சகம் இத்திட்டத்தை அனுமதிக்கக் கூடாது” என்றார்.வீரப்பன் தமிழ்நாடு மூத்த பொறியாளர் சங்கத்தைச் சேர்ந்த பொறிஞர் அ.வீரப்பன் பேசியபோது, ``கர்நாடகம் நினைப்பதெல்லாம் நடந்துவிடாது. மத்திய நீர்வளத்துறை கர்நாடகத்தின் திட்ட வரைவை ஆய்வுக்கு எடுத்துக் கொண்டிருக்கிறது என்பதே அனுமதி கொடுப்பதாக ஆகிவிடாது. அந்த அனுமதியெல்லாம் அவ்வளவு எளிதில் கிடைத்துவிடாது. அப்படியே அனுமதி கிடைத்தாலும் மத்திய வனத்துறை அமைச்சகத்திடம் அவ்வளவு எளிதில் அனுமதி பெற்றுவிட முடியாது. எப்போதும் தமிழகத்தைச் சீண்டிக் கொண்டே இருப்பது கர்நாடகத்தின் வேலைகளில் ஒன்றாக ஆகிவிட்டது. அதற்காகத்தான் ஆய்வு, அது இது என்று நாடகமாடி கொண்டிருக்கிறது கர்நாடகம்” என்றார் காட்டமாக.
http://dlvr.it/Rgfjyp

Read More