'ஓட்டுன்னு போட்டா ரஜினிக்குதான்' - நேற்று ட்ரெண்டிங்.. இன்று போஸ்டர்..!

சமூக ஊடகங்களில் நடிகர் ரஜினிகாந்த் பெயரில் ஒரு கடிதம் பரவியது. அதில் ரஜினியின் உடல்நலம் குறித்தும், தற்போதைய கொரோனா காலத்தில் ரஜினி மக்களை சந்தித்து அரசியல் பணிகளில் ஈடுபடுவதை தவிர்க்க வேண்டும் என மருத்துவர்கள் வலியுறுத்தியதாகவும் தெரிவிக்கப்பட்டு இருந்தது. அதனால், அரசியல் கட்சி தொடங்கும் முன்பே ரஜினி அதனை கைவிட திட்டமிட்டுள்ளது போன்ற கருத்து பரவியது. இது ரஜினி ரசிகர்கள் மத்தியில் அதிர்ச்சியை ஏற்படுத்தியது. இந்த நிலையில் ரஜினிகாந்த் தனது ட்விட்டர் பக்கத்தில் விளக்கம் அளித்தார். அதாவது, “என் அறிக்கை போல ஒரு கடிதம் சமூக வலைத்தளங்களிலும் ஊடகங்களிலும் தீவிரமாகப் பரவிக் கொண்டு வருகிறது. அது என்னுடைய அறிக்கை அல்ல என்பது அனைவருக்கும் தெரியும். இருப்பினும் அதில் வந்திருக்கும் என் உடல்நிலை மற்றும் எனக்கு மருத்துவர்கள் அளித்த அறிவுரைகள் குறித்த தகவல்கள் அனைத்தும் உண்மை. இதைப்பற்றி தகுந்த நேரத்தில் மக்கள் மன்ற நிர்வாகிகளோடு கலந்தாலோசித்து எனது அரசியல் நிலைப்பாட்டை மக்களுக்குத் தெரிவிப்பேன்” என்று தெரிவித்திருந்தார். இதற்கு அரசியல் விமர்சகர்கள் கடும் விமர்சனங்களை முன் வைத்து வருகின்றனர். அரசியலுக்கு வருவதற்கு ரஜினிக்கு விருப்பம் இல்லை எனவும் அதிலிருந்து நழுவுவதற்கே முற்பட்டு வருகிறார் எனவும் கருத்துகளை முன்வைத்து வருகின்றனர். அதேவேளையில் ரஜினிக்கு ஆதரவாகவும் இணையத்தில் பலரும் கருத்து தெரிவித்தனர். 'ஓட்டுன்னு போட்டா ரஜினிக்குதான்' என்ற ஹேஷ்டேக் ட்விட்டரில் இந்திய அளவில் ட்ரெண்டானது. இந்நிலையில் அதேவாசகத்துடன் 'நீங்க வாங்க ரஜினி எங்கள் ஆதரவு உங்களுக்குத்தான்' என எழுதப்பட்ட போஸ்டர்கள் சென்னை நகரில் ஒட்டப்பட்டுள்ளன. இப்படிக்கு மாற்றத்தை விரும்பும் மக்கள் என போஸ்டரில் குறிப்பிடப்பட்டுள்ளது.
http://dlvr.it/RkdqBX

Read More

“20 பொறியியல் கல்லூரிகளில் ஒருஇடம் கூட நிரம்பவில்லை” - வெளியான அதிர்ச்சி தகவல்

தமிழகத்தில் 20 பொறியியல் கல்லூரிகளில் ஒரு இடம் கூட நிரம்பவில்லை என்ற அதிர்ச்சி தகவல் வெளியாகியுள்ளது. தமிழகத்தில் 461 பொறியியல் கல்லூரிகளில் உள்ள ஒரு லட்சத்து 63,154 இடங்களை நிரப்புவதற்கான இணைய வழி கலந்தாய்வு, கடந்த அக்டோபர் ஒன்றாம் தேதி முதல் நடைபெற்று வந்தது. நேற்று வரை இறுதி கட்ட கலந்தாய்வு நடைபெற்றது. மொத்த கலந்தாய்வுக்கான இடங்கள் - 1,63,154கலந்தாய்வு மூலம் ஒதுக்கீடு செய்யப்பட்ட இடங்கள் - 69,752 (62.9%)கலந்தாய்வை புறக்கணித்தவர்கள் - 41,084 (37.3%) பொது கலந்தாய்வில் பங்கேற்காதவர்களின் எண்ணிக்கை கடந்த வருடத்தை விட 12 சதவீதம் அதிகரித்துள்ளது. 12 அரசு பொறியியல் கல்லூரிகள், ஒரு அரசு உதவி பெறும் பொறியியல் கல்லூரி மற்றும் ஒரு தனியார் பொறியியல் கல்லூரியில் மட்டுமே 100 சதவீதம் இடங்கள் நிரம்பியுள்ளன. இதில், கிண்டி பொறியியல் கல்லூரி, அழகப்பா பொறியியல் கல்லூரி, குரோம்பேட்டை மெட்ராஸ் தொழில்நுட்ப நிறுவனம் உள்ளிட்டவை அடங்கும். தமிழகத்தில் 20 பொறியியல் கல்லூரிகளில் ஒரு இடம் கூட நிரம்பவில்லை என்ற அதிர்ச்சி தகவல் வெளியாகியுள்ளது. கடந்த வருடம் 16 பொறியியல் கல்லூரிகளில் ஒரு இடம் கூட நிரம்பவில்லை. பொதுக் கலந்தாய்விற்கு பிறகும் 461 பொறியியல் கல்லூரிகலில் உள்ள 56.4 சதவீதம் இடங்கள் காலியாகவே உள்ளன. பொதுக்கலந்தாய்வில் கலந்து கொள்ள 1,10,836 பேருக்கு அழைப்பு விடுக்கப்பட்டது. ஆனால், நான்கு கட்டங்களாக நடத்தப்பட்ட கலந்தாய்வில் 69,752 இடங்களுக்கு மட்டுமே மாணவர்கள் சேர்க்கப்பட்டுள்ளனர். ராணுவம், விளையாட்டு உள்ளிட்ட சிறப்பு பிரிவுகளில் 1,443 இடங்கள் ஒதுக்கீடு செய்யப்பட்டுள்ளன. ஒட்டுமொத்தமாக உள்ள 1,63,154 இடங்களில் 71,195 இடங்கள் மட்டுமே நிரம்பியுள்ளன. அதாவது, 43.6 சதவீதம் இடங்கள் மட்டும் நிரம்பியுள்ளன. மீதமுள்ள 56.4 சதவீதம் அதாவது 91,959 இடங்கள் காலியாக உள்ளன. கடந்த ஆண்டு 48.2 சதவீதம் இடங்கள் கலந்தாய்வு மூலம் நிரம்பியிருந்தன. இந்தாண்டு 4.6 சதவீதம் குறைந்துள்ளது. நிரம்பிய இடங்கள்: 13 கல்லூரிகளில் 100 சதவீதம்26 கல்லூரிகளில் 90-99 சதவீதம்100 கல்லூரிகளில் 50-89 சதவீதம்128 கல்லூரிகளில் 25-49 சதவீதம்91 கல்லூரிகளில் 10-24 சதவீதம்83 கல்லூரிகளில் 1-9 சதவீதம்20 கல்லூரிகளில் 0 சதவீதம் கொரோனா நோய் தொற்றின் தாக்கம் காரணமாக கடந்த ஆண்டினை காட்டிலும் 5 சதவீதம் அளவிற்கு மாணவர் சேர்க்கை குறைந்துள்ளன. இருப்பினும் முக்கியமான கல்லூரிகளில் பெருவாரியான இடங்களில் நிரம்பியுள்ளன. மோசமான, அடிப்படை வசதிகள் இல்லாத காரணத்தினாலேயே பல கல்லூரிகளை மாணவர்களும், பெற்றோர்களும் புறக்கணித்துள்ளதாகவும் கூறப்படுகிறது.
http://dlvr.it/RkcyMm

Read More

நாட்டில் முதல் முறையாக காய்கறிகளுக்கும் ஆதார விலை... கேரளாவின் `பலே' அறிவிப்பு!

விவசாயிகள் உற்பத்தி செய்யும் விளைபொருள்களுக்கு ஏற்ற அடிப்படை ஆதார விலை கிடைக்காததுதான் விவசாயம் நலிவடைய காரணம். இதைப் பல முன்னோடி விவசாயிகளும், விவசாய அமைப்புகளும் அடிக்கடி கூறி வந்தும் அதை அரசு கண்டுகொள்ளவில்லை. இந்த நிலையில் இந்தியாவில் முதன்முறையாக 16 விதமான காய்கறிகளுக்கு அடிப்படை ஆதார விலையை நிர்ணயம் செய்யும் திட்டத்தை கேரள அரசு அறிமுகப்படுத்தியுள்ளது. இந்தத் திட்டம் குறித்து கேரள முதல்வர் பினராயி விஜயன் கூறுகையில், ``கேரள மாநிலத்தில் உற்பத்தி செய்யும் காய்கறிகளுக்கு ஆதார விலை நிர்ணயம் செய்கிறோம். இந்தியாவில் முதன்முதலில் ஒரு மாநிலம் காய்கறி விவசாயிகளுக்கு ஆசுவாசத்தை ஏற்படுத்தும் விதமாகக் குறைந்தபட்ச விலை நிர்ணயம் செய்கிறது. வருடக்கணக்கில் விவசாயத்தை மட்டும் நம்பி வாழ்க்கை நடத்துபவர்களுக்கு அக்கறையுடன் இந்த நடவடிக்கை எடுக்கப்பட்டுள்ளது. நாட்டில் விவசாயிகள் மிகவும் அதிருப்தியில் இருக்கும் காலகட்டம் இது. அதன் அடிப்படையில் பல போராட்டங்களை நாடு முழுவதும் விவசாயிகள் நடத்தி வருகின்றனர். விவசாயிகளை முன்னிலைப்படுத்தி பல நடவடிக்கைகளை கேரள அரசு எடுத்துள்ளது. அதில் குறிப்பிட்ட ஒரு மைல்கல்தான் இந்த ஆதார விலை நிர்ணயம்.காய்கறிகள் 16 வகையான காய்கறிகளுக்கு முதன்முதலில் அடிப்படை விலை நிர்ணயம் செய்யப்படுகிறது. மரவள்ளிக்கிழங்கு, அன்னாசிப் பழம், நேந்திரம் வாழைப்பழம், வெள்ளரிக்காய், பாகற்காய், புடலை, தக்காளி, பீன்ஸ் என நம் மாநிலத்தில் உற்பத்தி செய்கிற எல்லா காய்கறிகளையும் இந்த விலை நிர்ணயத்தில் உட்படுத்தியுள்ளோம். இந்தக் காய்கறிகளுக்கு உற்பத்திக்கு ஆகும் தொகையை விட 20 சதவிகிதம் அதிக விலை வழங்கப்படும். மார்க்கெட்டில் காய்கறி விலை குறைந்தாலும் அடிப்படை ஆதார விலை விவசாயிகளின் அக்கவுன்டில் செலுத்தப்படும். அடிக்கடி காய்கறிகளின் விலைகளை மாற்றி அமைக்கவும் நடவடிக்கை எடுக்கப்பட்டுள்ளது. காய்கறிகளுக்கான விலைகளை உள்ளாட்சி அமைப்புகள் நிர்ணயம் செய்துகொள்ளும். உள்ளாட்சி அமைப்புகளுக்கு முக்கிய பொறுப்பு அளிக்கப்பட்டுள்ளது. ஒரு விவசாயி ஒரு சீஸனில் 15 ஏக்கர் நிலத்தில் விவசாயம் செய்யும் காய்கறிகளை விற்பனை செய்யும் விதத்தில் திட்டம் வகுக்கப்பட்டுள்ளது. தங்கள் விவசாய நிலத்தை இன்ஷூரன்ஸ் செய்த பிறகு, விவசாயத்துறையில் பெயர் பதிவு செய்பவர்களுக்கு இந்தத் திட்டத்தின் பலன்கள் வழங்கப்படும். நவம்பர் 1-ம் தேதி முதல் இதற்கான முன் பதிவு தொடங்கும். விவசாயிகளிடமிருந்து பெறப்படும் காய்கறிகள் தொடக்க வேளாண்மைக் கூட்டுறவு சங்கங்களின் விற்பனை மையங்கள் மூலம் விற்பனை செய்யப்படும். நம் கிராமங்களில் உள்ள கூட்டுறவு சங்கங்கள் விவசாயிகளுடன் அதிக தொடர்பில் உள்ளன. எனவே, இவற்றின் மூலம் இந்தத் திட்டம் செயல்படுத்தப்படும்.காய்கறிகள் இந்தத் திட்டத்துக்குத் தேவையான அனைத்து உதவிகளையும் விவசாயத்துறை, உள்ளாட்சித்துறை ஆகியவை செய்யும். அதிக அளவில் பொருள்கள் வந்தால் அவை கெட்டுப்போகாமல் பாதுகாக்கவும் நடவடிக்கை எடுக்கப்படும். காய்கறிகளை தேவையான இடங்களுக்குக் கொண்டு செல்ல குளிரூட்டப்பட்ட வாகனங்கள் ஏற்பாடு செய்தல் போன்ற நடவடிக்கைகளும் இதன் தொடர்ச்சியாக எடுக்கப்படும். விவசாயத்துறையில் பெரிய அளவில் மாற்றம் ஏற்படுத்தப்போகிறது இந்தத் திட்டம். சில இடங்களில் அதிக விளைவிளைச்சல் ஏற்பட்டால் அந்தப் பொருள்களை அங்கிருந்து எடுத்து மற்ற பகுதிகளுக்குக் கொண்டு சென்று விற்பனை செய்ய நடவடிக்கை எடுக்கப்படும். அதிக விளைச்சல் வந்தால் நஷ்டம் ஏற்படும் என்ற விவசாயிகளின் அச்சம் இதன் மூலம் அகலும். நாங்கள் ஆட்சிக்கு வந்த பிறகு, கேரளத்தில் தரிசாகக் கிடந்த பல பகுதிகள் விவசாய நிலமாக மாறியுள்ளன. கடந்த நான்கு ஆண்டுகளுக்கு முன்பு 1,96,000 ஹெக்டேர் நெல் விவசாயம் இருந்தது. இப்போது அது இரண்டேகால் லட்சம் ஹெக்டேர் ஆக உயர்ந்துள்ளது. எங்கள் ஆட்சிக்கு முன்பு காய்கறி உற்பத்தி 7 லட்சம் மெட்ரிக் டன் ஆக இருந்தது. இப்போது இரண்டு மடங்கு அதிகரித்து 14.72 மெட்ரிக் டன்னாக காய்கறி உற்பத்தி உயர்ந்துள்ளது. குழந்தைகளும், தாய்மார்களும் விவசாயத்தில் ஆர்வம் காட்டுகிறார்கள். உள்ளாட்சி அமைப்புகளால் விவசாயத்தில் நல்ல மாற்றம் ஏற்பட்டுள்ளது. தொழில் தேடி வெளிநாட்டுக்குச் சென்ற பலரும் இங்கு திரும்பிவந்து விவசாயத்தில் ஈடுபடுகிறார்கள். இந்த ஆண்டு ஒரு லட்சம் மெட்ரிக் டன் காய்கறிகளும், ஒரு லட்சம் மெட்ரிக் டன் கிழங்குகளும் கூடுதலாக உற்பத்தி செய்ய தீர்மானித்துள்ளோம்" என்றார்.
http://dlvr.it/RkcyJ5

Read More

கேரளா தங்கம் கடத்தல்: ஸ்வப்னாவுடன் சிக்கிய ஐ.ஏ.எஸ் அதிகாரி சிவசங்கரன் கைது!

கேரள மாநிலம், திருவனந்தபுரத்திலுள்ள யுனைடெட் அரபு அமீரக (யு.ஏ.இ) தூதரக பார்சல் மூலம் தங்கம் கடத்திய வழக்கில் முக்கியக் குற்றவாளியாக இருப்பவர் ஸ்வப்னா சுரேஷ். இவருடன் நெருங்கிய நட்பில் இருந்தவர் ஐ.ஏ.எஸ் அதிகாரி சிவசங்கரன். கேரள முதல்வர் பினராயி விஜயனின் முதன்மைச் செயலாளராகவும், ஐ.டி துறைச் செயலாளராகவும் இருந்தவர் சிவசங்கரன். தங்கம் கடத்தல் வழக்கில் சிக்கிய ஸ்வப்னா சுரேஷ் கைதுசெய்யப்பட்டதைத் தொடர்ந்து ஐ.ஏ.எஸ் அதிகாரி சிவசங்கரனிடமும் என்.ஐ.ஏ., அமலாக்கத்துறை, சுங்கத்துறை உள்ளிட்ட மத்திய அரசு ஏஜென்சிகள் விசாரணை நடத்தின. இதையடுத்து சிவசங்கரனை சஸ்பெண்ட் செய்தது கேரள அரசு. சிவசங்கரனிடம் மட்டும் சுமார் 100 மணி நேரத்துக்கும் மேல் விசாரணை நடத்தப்பட்டது. விசாரணையில் ஸ்வப்னா சுரேஷ் மற்றும் சகாக்களுடன் ஆலோசனை நடத்துவதற்காக திருவனந்தபுரத்தில் சிவசங்கரன் தனி பிளாட் எடுத்திருந்தது தெரியவந்தது. மேலும், ஸ்வப்னா சுரேஷ் வங்கி லாக்கரில் பணம் மற்றும் தங்க நகைகளைப் பதுக்கிவைத்திருப்பதாகவும் சிவசங்கரன் தகவல் தெரிவித்திருக்கிறார். இதையடுத்து ஸ்வப்னாவின் வங்கி லாக்கர்களிலிருந்து சுமார் ஒன்றரைக் கோடி ரூபாய், ஒரு கிலோ தங்கம் ஆகியவை கைப்பற்றப்பட்டன.ஸ்வப்னா சுரேஷ் விசாரணையின் இறுதிக்கட்டமாக சிவசங்கரனை கஸ்டடியில் எடுத்து விசாரணை நடத்த அமலாக்கத்துறை முயன்றது. அந்தச் சமயத்தில் நெஞ்சுவலி என்றும் உடல்நிலை மோசமாக இருப்பதாக சிவசங்கரன் கூறினார். மேலும், திருவனந்தபுரத்தில் ஓர் ஆயுர்வேத மருத்துவமனையில் சிகிச்சைக்காகச் சேர்ந்தார் சிவசங்கரன். தொடர்ந்து சிகிச்சையில் இருந்துவந்த சிவசங்கரன், அங்கிருந்தபடியே கேரள உயர் நீதிமன்றத்தில் முன்ஜாமீன் மனுத்தாக்கல் செய்தார். Also Read: `ஸ்வப்னாவுடன் நட்பில் இருந்த சிவசங்கரன் ஐ.ஏ.எஸ் சஸ்பெண்ட்!’ - பினராயி விஜயன் அதிரடி முதற்கட்ட விசாரணை நடத்திய நீதிமன்றம் அவரை கைதுசெய்யக் கூடாது எனக் கூறியது. மேலும், இந்த வழக்கின் இறுதி விசாரணை நேற்று நடந்தது. விசாரணை முடிவில் சிவசங்கரனின் ஜாமீன் மனு தள்ளுபடி செய்யப்பட்டது. அவரைக் கைதுசெய்ய, தடை எதுவும் இல்லை என்றும் நீதிமன்றம் தெரிவித்திருந்தது. சிவசங்கரனின் ஜாமீன் மனு தள்ளுபடி செய்யப்பட்ட அடுத்த நிமிடம் அமலாக்கத்துறை அதிகாரிகள் சிவசங்கரன் சிகிச்சைக்காக சேர்ந்த ஆயுர்வேத மருத்துவமனைக்குச் சென்றனர்.கைது செய்யப்பட்ட ஐ.ஏ.எஸ் அதிகாரி சிவசங்கரன் தொடர்ந்து சிவசங்கரனை கஸ்டடியில் எடுத்த அமலாக்கத்துறை அதிகாரிகள் அவரை கொச்சிக்கு அழைத்துச் சென்றனர். கொச்சியிலுள்ள அமலாக்கத்துறை அலுவலகத்தில் சுமார் ஆறு மணி நேரம் அவரிடம் விசாரணை நடத்தப்பட்டது. கறுப்புப் பணத்தை வெள்ளையாக மாற்றியதாக ஏற்கெனவே சிவசங்கரன் மீது அமலாக்கத்துறை வழக்கு பதிவு செய்திருந்தது. இதையடுத்து நேற்று இரவு சிவசங்கரன் கைதுசெய்யப்பட்டார். கேரள முதல்வர் பினராயி விஜயனின் நம்பிக்கைக்குப் பாத்திரமான ஐ.ஏ.எஸ் அதிகாரி சிவசங்கரன் கைதுசெய்யப்பட்ட சம்பவம் அம்மாநில அரசியலிலும் புயலைக் கிளப்பியிருக்கிறது.
http://dlvr.it/RkZ76M

Read More

"இந்தியர்கள் காஷ்மீரில் குடியேறினால் பாலியல் வன்கொடுமை அதிகரிக்கும்" சர்ச்சையான பேச்சு

இந்தியர்கள் அனைவரும் ஜம்மு காஷ்மீரில் நிலம்வாங்கலாம் என்ற சட்டம் நடைமுறைக்கு வந்தால் இங்கு பாலியல் வன்கொடுமை அதிகரிக்கும் என்ற தனது கருத்துக்கு விளக்கமளித்துள்ளார் பிடிபி தலைவர் சுரிந்தர் சவுத்ரி. மத்திய அரசு சட்டங்களைத் திருத்தி நாடு முழுவதும் உள்ள மக்கள் ஜம்மு-காஷ்மீரின் யூனியன் பிரதேசத்தில் நிலம் வாங்க அனுமதியளித்த பிறகு, பிடிபி தலைவரான சுரிந்தர் சவுத்ரி, நாட்டில் உள்ள அனைவரும் ஜம்மு-காஷ்மீரில் நிலம் வாங்கினால் இங்கும் பாலியல் வன்கொடுமைகள் அதிகரிக்கும் என்று சர்ச்சைக்குரிய கருத்தினை கூறினார். இந்த கருத்து குறித்து விமர்சனங்கள் எழுந்த பிறகு விளக்கமளித்த அவர் “ஜம்முவுக்கு உயர்ந்த டோக்ரா கலாச்சாரம் மற்றும் மரபு உள்ளது, நாங்கள் நாட்டிற்காக பல தியாகங்களை செய்துள்ளோம். வெளியாட்கள் இங்கு குடியேற வந்தவுடன் பாலியல் வன்கொடுமை போன்ற குற்றங்களைத் தொடங்குவார்கள் என்று நாங்கள் கூறவில்லை. அஸ்ஸாம் மற்றும் மகாராஷ்டிரா போன்ற மாநிலங்கள் கூறுவதையே நாங்களும் கூறுகிறோம், மக்கள் வெளியில் இருந்து வரக்கூடாது ஏனெனில் அவர்கள் எம் மக்களின் வேலை வாய்ப்புகளை பறிப்பார்கள் என்றே கூறுகிறோம்”என்று சவுத்ரி கூறினார் “இன்று ஜம்மு பகுதி மிகவும் அமைதியானது. இங்கே ஜம்முவில் பெண்கள் படிக்க பல்வேறு கிராமங்களிலிருந்து வருகிறார்கள். ஒரு பெண் சுட்டுக் கொல்லப்பட்ட ஃபரிதாபாத்தில் என்ன நடந்தது என்பதையும், ஹத்ராஸில் என்ன நடந்தது என்பதையும் நீங்கள் காணலாம்.நாட்டில் கற்பழிப்பு வழக்குகள் அதிகரித்து வருகின்றன. இவை அனைத்தும் தேசிய தொலைக்காட்சியில் காண்பிக்கப்படுகின்றன, அதன்பொருட்டே அப்படி கூறினேன்”என்றும் அவர் கூறினார்.  
http://dlvr.it/RkYG4z

Read More

‘சிஎஸ்கே-வை மீட்டுருவாக்கம் செய்வது எப்படி என்பதை தோனி அறிவார்’ அஞ்சூம் சோப்ரா

நடப்பு ஐபிஎல் சீசனில் 12 ஆட்டங்கள் விளையாடி நான்கு வெற்றிகளை பெற்றுள்ளது தோனி தலைமையிலான சென்னை சூப்பர் கிங்ஸ். ஐபிஎல் வரலாற்றில் முதன் முறையாக லீக் சுற்றோடு வெளியேறுகிறது சென்னை.  இந்நிலையில் சென்னையை மீட்டுருவாக்கம் செய்வது எப்படி என்பதை தோனி நன்கு அறிவார் என சொல்லியுள்ளார் முன்னாள் இந்திய மகளிர் கிரிக்கெட் அணியின் கேப்டன் அஞ்சூம் சோப்ரா.  “சென்னை மாதிரியான சாம்பியன் அணிகளும் சறுக்கல்களை சந்திக்கும். அடுத்த ஐபிஎல் சீசனில் அதனை சரி செய்வது எப்படி என்பது மேட்ச் வின்னர் தோனிக்கு தெரியும்.  சீனியர் வீரர்களின் திடீர் விலகல் மற்றும் காயம் மாதிரியான சிக்கல்களை சென்னை எதிர்கொண்ட போது சென்னை பிளான் C-யை கையில் எடுத்திருக்க வேண்டும்.  எனக்கு தெரிந்து தோனி அடுத்த இரண்டு ஆண்டுகளுக்கு சென்னை அணியுடன் இருக்க வாய்ப்புகள் உள்ளன.  அணியின் கூட்டு முயற்சிக்கு பலன் கிடைக்காததால் தான் இந்த சீசனில் சென்னையால் சோபிக்க முடியவில்லை. அதனால் அணியின் தலைவன் மீது பழிபோட்டு விட முடியாது” என தெரிவித்துள்ளார். 
http://dlvr.it/RkYG4V

Read More

`இன்றைய தேவை இயற்கை உணவுதான்!' காஷ்மீரில் அரசே தொடங்கிய இயற்கை வேளாண் சந்தை

இந்தியாவில் பல மாநிலங்களில் இயற்கை விவசாய முறைகள் அந்தந்த அரசுகளால் முன்னெடுக்கப்பட்டு வருகின்றன. இப்போது அந்த வரிசையில் இணைந்திருக்கிறது காஷ்மீர். அந்த மாநில தலைநகரான ஶ்ரீநகரில், காஷ்மீர் வேளாண்துறை சார்பில் முற்றிலும் இயற்கைக் காய்கறிகள் மட்டுமே விற்பனை செய்யும் 'லால் மண்டி' எனும் இயற்கை விவசாய சந்தை தொடங்கப்பட்டுள்ளது. இந்த இயற்கை விவசாய சந்தையில் முழுமையான இயற்கை காய்கறிகள் மட்டுமே விற்பனை செய்யப்படும். அதேபோல, இடைத்தரகர்கள் இல்லாத நேரடி விவசாயிகள் மட்டுமே இச்சந்தையில் விற்பனை செய்யமுடியும்.Organic Market ஏற்கெனவே பல மாநிலங்கள் விவசாயிகளுக்கு இயற்கை விவசாயத்துக்குப் பயிற்சி அளித்து வரும் நிலையில், இயற்கை விவசாயிகளுக்கான சந்தையும் அரசே தொடங்கியுள்ளது, அம்மாநில விவசாயிகளிடையே மிகுந்த வரவேற்பைப் பெற்று வருகிறது. இயற்கை விவசாயப் பயிற்சி அளித்ததோடு நிற்காமல், அதை விற்பனை செய்வதற்கான வழியும் காஷ்மீர் வேளாண்துறை அதிகாரிகள் முன்னெடுத்து வருகிறார்கள். லால் மண்டி இயற்கை சந்தையின் பொறுப்பாளர், முகமது அலி லோன் செய்தியாளர்களிடம் பேசும்போது, "பூச்சிக்கொல்லி மற்றும் பிற ரசாயன உரங்கள் தவிர்த்து இயற்கையாகவே விளைவிக்கும் பொருள்கள் உடலுக்கு மிக நல்லது. இங்கு விற்பனை செய்வது 100 சதவிகிதம் இயற்கையான பொருள்கள்தான். இதை விற்பனை செய்பவர்களும் 100 சதவிகிதம் இயற்கை விவசாயிகள்தாம். இந்த முயற்சி மாநிலம் முழுவதும் இன்றைய தேவையான இயற்கை விவசாயத்தையும் இயற்கை உணவுகளையும் ஊக்குவிக்க ஏதுவாக இருக்கும். இதுபோக இயற்கை விவசாயத்துக்கான சந்தை பெரிய அளவில் இருக்கிறது. அதை விவசாயிகளுக்குச் சொல்லிக் கொடுத்து வருகிறோம். நேரடியாக இயற்கைப் பொருள்கள் கிடைப்பதாலும் நம்பிக்கைக்குரியதாக இயற்கை விவசாய பொருள்கள் இருப்பதாலும், காய்கறிகளை மக்கள் விரும்பி வாங்குகின்றனர். ஆரோக்கியத்துக்கு முன்னுரிமை தரும் நோக்கில் செயல்பட்டு வருகிறோம்" என்றார்.Organic Market உலகெங்கிலும் உள்ள மக்கள் காய்கறிகள் மற்றும் பழங்களில் உரங்கள் மற்றும் பூச்சிக்கொல்லிகளைப் பயன்படுத்துவது குறித்து எச்சரிக்கையாக இருக்கிறார்கள். பெரும்பாலானோர் இயற்கை விவசாயப் பொருள்களை அதிகமாக விரும்புகிறார்கள். இந்நிலையில் காஷ்மீர் வேளாண்மைத்துறை எடுத்துள்ள இந்த நடவடிக்கை குறித்து விவசாயிகள் மகிழ்ச்சியடைந்துள்ளனர்.
http://dlvr.it/RkVMwr

Read More