தொழிலதிபர் to அரசியல் பணி - அர்ஜூன மூர்த்தியின் பின்னணி என்ன?

ஜனவரியில் புதிய கட்சி தொடங்குவதாகவும், புதிய கட்சி தொடங்குவதற்கான தேதி டிசம்பர் 31ல் அறிவிக்கப்படும் என்றும் ரஜினி தனது ட்விட்டரில் பதிவிட்டு இருந்தார். அத்துடன், வரும் சட்டமன்றத் தேர்தலில் வெற்றிப் பெற்று தமிழகத்தில் ஆன்மீக அரசியல் உருவாகுவது நிச்சயம் எனவும் தமிழகத்தில் ஊழலற்ற, ஜாதி மதச் சார்பற்ற ஆன்மீக அரசியல் உருவாகும் எனவும் குறிப்பிட்டிருந்த ரஜினி, அற்புதம் அதிசயம் நிகழும் எனவும் பதிவிட்டிருந்தார். பின்னர் செய்தியாளர்களிடம் பேசியபோது, கட்சிப் பணிகளை மேற்கொள்ள தமிழருவி மணியனை மேற்பார்வையாளராகவும், அர்ஜூன மூர்த்தியை தலைமை ஒருங்கிணைப்பாளராகவும் நியமித்திருப்பதாக ரஜினிகாந்த் அறிவித்தார். தமிழக பாஜகவின் அறிவுசார் பிரிவு தலைவராக இருந்த அர்ஜுன மூர்த்தி தன்னுடைய பதவியை ராஜினிமா செய்வதாக கட்சிக்கு கடிதம் அனுப்பினார். அர்ஜுன மூர்த்தியின் ராஜினாமாவை ஏற்றுக்கொண்டுள்ளதாக தமிழக பாஜக அறிவித்தது. ரஜினி தொடங்க இருக்கும் கட்சியின் தலைமை ஒருங்கிணைப்பாளராக நியமிக்கப்பட்டுள்ள அர்ஜூன மூர்த்தியின் பின்னணி குறித்துப் பார்க்கலாம். அர்ஜூன மூர்த்தி 1960ஆம் ஆண்டு புதுக்கோட்டை மாவட்டத்தில் பிறந்தார். இவரது தந்தை ராமசாமி மிகப்பெரிய தொழிலதிபர். சுதந்திர போராட்டவீரரான இவரது தந்தை போக்குவரத்து தொழில் தொடங்கி அதன் பின்னர் புதுக்கோட்டை நகராட்சி தலைவராகவும் பதவி வகித்தவர். அதேபோல், அர்ஜூன மூர்த்தியும் தொழிலதிபராக இருந்து அரசியல் களத்திற்கு வந்தவர். இளநிலை வேதியியல், முதுநிலை சமூக அறிவியல் படிப்பை முடித்த அர்ஜூன மூர்த்தி அதன்பிறகு பேரி நிறுவனத்தில் பணியாற்றினார். அதனைத் தொடர்ந்து உணவு தயாரிப்பு நிறுவனத்தை தொடங்கி நடத்திவந்த அவர், பாஜக நிர்வாகிகளுடன் நெருங்கி பழகினார். தமிழகம் மட்டுமல்லாமல் டெல்லியில் உள்ள பாஜக நிர்வாகிகளுடனும் இவருக்கு அறிமுகம் கிடைத்தது. உணவு தயாரிப்பு நிறுவனத்துக்கு பிறகு தகவல் தொழில்நுட்ப துறையில் கால்பதித்தார். தகவல் தொழில்நுட்பத் துறையில் 35 ஆண்டுகள் அனுபவம் வாய்ந்தவர் அர்ஜூன மூர்த்தி. தொழில்நுட்பத் துறையில் அனுபவம் இருந்ததால் பாஜக அரசின் டிஜிட்டல் இந்தியா, பணமில்லா பரிவர்த்தனை, பண மதிப்பிழப்பு ஆகிய திட்டங்களுக்கு ஆலோசகராக இருந்தார். இவருக்கு தமிழகத்தின் திராவிட கட்சிகள்மீது விமர்சனம் உண்டு. கடந்த 50 ஆண்டுகளாக இரண்டு கட்சிகளும் மாநிலத்தை சீரழித்துவிட்டதாக கருதிய அர்ஜூன மூர்த்தி, 2019இல் பாஜகவில் தன்னை இணைத்துக் கொண்டு அரசியல் பயணத்தை தொடங்கினார். பாஜக மாநில தலைவராக எல்.முருகன் நியமிக்கப்பட்ட பிறகு, அறிவுசார் பிரிவில் இவருக்கு பொறுப்பு கொடுக்கப்பட்டது. இந்நிலையில் ரஜினி தொடங்க உள்ள புதிய கட்சியின் தலைமை ஒருங்கிணைப்பாளராக அர்ஜூன மூர்த்தி அறிவிக்கப்பட்டுள்ளார்.
http://dlvr.it/RmyWpD

Read More

மோடி குறிப்பிட்ட நாய்... முழு மரியாதையுடன் இறுதி சடங்கு செய்த காவல்படையினர்!

உத்திர பிரதேச மாநிலத்தில், உயிரிழந்த ஒரு நாய்க்கு முறையான சடங்குகளோடு இறுதி மரியாதையை செய்து வழியனுப்பியிருக்கிறார்கள் 'PAC' காவல்படையினர். ராகேஷ் என்ற அந்த நாய், பிரதமர் மோடியின் உரையில் இடம்பெற்றதால் ஏற்கெனவே தேசிய பிரபலம்.மன் கி பாத் பிரதமர் மோடி தனது ‘மன் கி பாத்’ உரையில் பல மனிதர்கள் பற்றியும் பல நிகழ்வுகள் பற்றியும் பேசி வருகிறார். அப்படியொரு உரையில்தான் மோடி ‘ராகேஷ்’ என்ற நாயைப் பற்றியும் பேசினார். கொரோனா காலத்தில் நாம் சந்தித்த பிரச்னைகள் ஏராளம். பிரச்னைகளிலிருந்து விலங்குகளும் தப்பவில்லை. நாய்கள் உட்பட பல விலங்குகள் கொரொனா காலத்தில் சரியான உணவு கிடைக்காமலும் தங்கள் எஜமானர்களைத் தொலைத்தும் தவித்திருக்கின்றன. ராகேஷும் அதில் ஒன்று. ராகேஷை, உத்தர பிரதேச மாநிலம் மீரட் நகரைட் சேர்ந்த ஒரு டீக்கடை உரிமையாளர் வளர்த்து வந்தார். லாக்டெளனில் அவரின் கடை மூடப்பட வேண்டியிருந்ததால், அவர் சொந்த ஊருக்கே திரும்பிட்டார். ஆனால், ராகேஷை உடன் அழைத்துச் செல்ல முடியவில்லை. எஜமானரும் இல்லாத சோகம், உணவும் சரிவர கிடைக்காமல் கஷ்டப்பட்டிருக்கிறது அந்த வாயில்லா ஜீவன். அதைப் பார்த்த பேக் (Provincial Armed Constabulary) உதவி ஆய்வாளர் உமேஷ் சின்ஹா, அந்த நாயை எடுத்து வளர்த்திருக்கிறார். அவரோடு அந்த சிறப்பு காவல் படையின் அனைத்து காவலர்களும் அந்த நாயின் மீது அன்பு செலுத்த துவங்கியிருக்கிறார்கள். அதன் பெயர் என்னவென தெரியாததால், புதுப்பெயர் வைக்க யோசித்து, அதன் உரிமையாளரான ராகேஷ் என்பவரது பெயரையே வைத்துவிட்டார்கள். ராகேஷும் உமேஷின் கண்காணிப்பில் வளர்ந்து வந்தது. ராகேஷுக்கும் உமேஷுக்கும் நல்ல பிணைப்பு ஏற்பட்டது. அந்தத் தகவல் தெரிந்துதான் பிரதமர் மோடி மன் கி பாத் உரையில், இந்த சம்பவத்தை சுட்டிக்காட்டி PAC காவலர்களுக்கு பாராட்டு தெரிவித்திருந்தார். இதேபோல எல்லோரையும் விலங்குகளுக்கு உதவுங்கள் எனவும் கேட்டிருந்தார்.நாய்க்கு இறுதி சடங்கு செய்த உபி சிறப்பு காவல்படை இந்நிலையில் ஐந்து வயதான ராகேஷுக்கு சிறுநீரகம் மற்றும் கல்லீரலில் தொற்று ஏற்பட்டது. இந்த உடல்நலக் கோளாறுகளுக்கு முறையாக வைத்தியம் தரப்பட்டது. ஆனால், அவை உதவாமல் டிசம்பர் 2ம் தேதி ராகேஷ் உயிரிழந்தது. இதனால் கலங்கிய PAC காவல்படை, ஒரு மனிதனுக்கு செய்வது போலவே ராகேஷின் உடலுக்கு முழு மரியாதயுடன் இறுதிச் சடங்கு நடத்தி அடக்கம் செய்திருக்கிறார்கள்.
http://dlvr.it/RmwGJX

Read More

புரெவி: `சபரிமலையில் கட்டுப்பாடு... உள்ளாட்சித் தேர்தல் நடவடிக்கைகளை பாதிக்கும்!’ -பினராயி விஜயன்

வங்கக்கடலில் உருவாகியுள்ள புரெவி புயல், தமிழகத்தின் தென் மாவட்டம் வழியாகக் கேரள மாநிலத்தைக் கடந்து செல்லும் என வானிலை ஆய்வு மையம் கூறியிருக்கிறது. இதைத் தொடர்ந்து கேரள மாநிலம் புயலை எதிர்கொள்ளத் தயாராகிவருகிறது. இது குறித்து கேரள முதல்வர் பினராயி விஜயன் கூறுகையில், ``புரெவி புயல் இலங்கைக்கு கிழக்குப் பகுதி வழியாக தமிழ்நாட்டின் தூத்துக்குடி, திருநெல்வேலி வழியாக வரும் வெள்ளிக்கிழமை திருவனந்தபுரத்தை அடையும் எனக் கூறப்படுகிறது. புரெவி புயல் முன்னெச்சரிக்கை குறித்து பிரதமர் நரேந்திர மோடி தொடர்புகொண்டு பேசியிருந்தார். கேரள மாநிலம் எடுத்திருக்கும் முன்னெச்சரிக்கை நடவடிக்கைகள் குறித்து பிரதமரிடம் கூறினோம். மத்திய வானிலை ஆய்வு மையத்தின் தகவல்படி தெற்கு வங்கக் கடலில் ஏற்பட்டிருக்கும் புயல் டிசம்பர் 4-ம் தேதி திருவனந்தபுரம் வழியாகக் கடந்து போக வாய்ப்பிருக்கிறது. பின்னர் மீண்டும் அது தென் தமிழகத்தை அடையும் என்கிறார்கள். வானிலை மையத்தின் அறிவிப்புப்படி டிசம்பர் 4-ம் தேதி காலையில் தென் தமிழகத்துக்கு வரும் புயல் மதிய நேரத்தில் கேரளத்துக்கு வர வாய்ப்பு உண்டு.பினராயி விஜயன் திருவனந்தபுரம், கொல்லம், கோட்டயம், பத்தணம்திட்டா, ஆலப்புழா, இடுக்கி, எர்ணாகுளம் ஆகிய ஏழு மாவட்டங்களில் கனமழையும், காற்றும் ஏற்படும் என்று முன்னறிவிப்பு வந்திருக்கிறது. வரும் 3-ம் தேதி (இன்று) முதல் 5 வரை இது தொடரும் என்கிறார்கள். கேரளக் கடலில் டிசம்பர் 2-ம் தேதி முதல் 4-ம் தேதி வரை கடல் சீற்றம் காணப்படும். ஒரு செகண்டில் 60 முதல் 108 சென்டிமீட்டர் வரை வேகத்தில் 2 முதல் 5 மீட்டர் உயரத்தில் கடல் அலை ஏற்பட வாய்ப்பிருப்பதாக இந்தியன் நேஷனல் சென்டர் ஃபார் ஓசன் இன்ஃபர்மேஷன் சர்வீஸ் முன்னறிவிப்பு கொடுத்திருக்கிறது. திருவனந்தபுரம், கொல்லம், பத்தணம்திட்டா, ஆலப்புழா கோட்டயம், இடுக்கியின் சில பகுதிகளிலும் ஒரு மணி நேரத்தில் 60 கி.மீ-க்கு மேல் காற்று வீச வாய்ப்பு உண்டு. எர்ணாகுளம் மற்றும் இடுக்கியின் பிற பகுதிகளில் 30 முதல் 40 கிலோமீட்டர் வேகத்தில் காற்று வீசவும், அதி தீவிர மழைக்கும் வாய்ப்பு உள்ளது. தாழ்வான இடத்தில் வெள்ளம் தேங்குதல், மலைப்பகுதியில் மண் இடியவும் சாத்தியக்கூறுகள் உள்ளன. மீன்பிடித் தொழிலாளர்கள் வரும் 5-ம் தேதிவரை மீன் பிடிக்கச் செல்ல வேண்டாம்.மழை டிசம்பர் 3-ல் திருவனந்தபுரம், கொல்லம், பத்தனம்திட்டா, ஆலப்புழா மாவட்டங்களில் ரெட் அலெர்ட்டும், கோட்டயம், எர்ணாகுளம், இடுக்கி மாவட்டங்களுக்கு ஆரெஞ்ச் அலெர்ட்டும், திருச்சூர், பாலக்காடு மாவட்டங்களுக்கு யெல்லோ அலர்ட்டும் பிறப்பிக்கப்பட்டுள்ளது. எட்டு தேசியப் பேரிடர் மீட்ப்புக்குழுக்கள் கேரளா வந்துள்ளன. சில மாவட்டங்களில் அணைகள் திறக்கப்பட்டுள்ளன. மாவட்ட அளவில் அதிகாரிகள் ஆலோசனை நடைபெற்று முடிந்துவிட்டது. 2,849 முகாம்கள் ஏற்படுத்தப்பட்டிருக்கின்றன. இப்போது 13 முகாம்களில் 175 குடும்பங்களைச் சேர்ந்த 690 பேர் தங்கவைக்கப்பட்டிருக்கிறார்கள். அவசரத் தேவைக்கு 1077 என்ற எண்ணுக்கு அழைக்கலாம். பத்தனம்திட்டா மாவட்டத்தில் அதிதீவிர மழைக்கும், கடும் காற்று வீசவும் முன்னறிவிப்பு இருக்கிற்து. எனவே, புயல் கடந்து செல்லும் வரை சபரிமலை பக்தர்களுக்கு கட்டுப்பாடு விதிக்க வேண்டிவரும். இது குறித்து தீர்மானம் எடுக்க பத்தனம்திட்டா மாவட்ட பேரிடர் குழுவுக்கு அதிகாரம் வழங்கப்பட்டுள்ளது. முன்னெச்சரிக்கையுடன் உள்ளாட்சித் தேர்தல் நடவடிக்கைகள் செயல்படுத்தப்படும்" என்றார்.
http://dlvr.it/RmwGDq

Read More

"முதலில் ரத்து... உங்கள் சார்பில் ஒருவர் மட்டுமே!" - மத்திய அரசுக்கு விவசாயிகள் நிபந்தனை

பேச்சுவார்த்தையை தொடர வேண்டுமானால் 3 வேளாண் சட்டங்களையும் ரத்து செய்ய வேண்டும் என்பன உள்ளிட்ட பல்வேறு நிபந்தனைகளை விவசாயிகள் முன்வைத்துள்ளனர். வேளாண்சட்டங்களுக்கு எதிராக டெல்லியில் விவசாயிகள் நடத்தும் போராட்டம் 7-வது நாளை எட்டியுள்ளது. நேற்றைய தினம் மத்திய அரசுடன் நடந்த பேச்சுவார்த்தையில் உடன்பாடு எட்டப்படாத நிலையில் இன்று விவசாயிகள் தங்கள் போராட்டங்களை பல இடங்களில் தீவிரப்படுத்தியுள்ளனர். இதையடுத்து மத்திய அரசின் சார்பில் நாளைய தினமும் விவசாய சங்க பிரதிநிதிகளுடன் பேச்சுவார்த்தை நடத்த திட்டமிட்டுள்ளது. இதற்காக இன்றைய தினத்திற்குள் விவசாயிகள் தங்கள் கோரிக்கைகளை எழுத்துப்பூர்வமாக அளிக்க வேண்டும் என தெரிவிக்கப்பட்டுள்ளது. இந்நிலையில், பேச்சுவார்த்தையை தொடர விவசாயிகள் நிபந்தனை விதித்துள்ளனர். இதுகுறித்து செய்தியாளர்களை சந்தித்த விவசாய சங்க பிரதிநிதிகள் “3 வேளாண் சட்டங்களையும் அவசர சட்டம் மூலம் ரத்து செய்ய வேண்டும். மூன்று வேளாண் சட்டங்களையும் நிறுத்தி வைக்க 10 நிமிடங்கள் போதும். போராட்டம் தொடர்பாக மத்திய அரசின் சார்பில் ஒருவர் மட்டுமே பேச வேண்டும். பலரும் கருத்து தெரிவிக்கக்கூடாது. தவறினால் பேச்சுவார்த்தையில் ஈடுபட மாட்டோம். பேச்சுவார்த்தை என்ற பெயரில் காலதாமதப்படுத்த வேண்டாம். போராட்டத்தை கொச்சைப்படுத்தும் விதமாக பாஜகவினர் பேசுவதை ஏற்க முடியாது” எனத் தெரிவித்துள்ளனர்.
http://dlvr.it/Rmtngl

Read More

“ஸ்விட்ச் ஹிட்டிங்கை ஐசிசி தடை செய்யவேண்டும்” - இயன் சேப்பல்

பேட்ஸ்மேன்கள் ஸ்விட்ச் ஹிட்டிங் ஷாட் விளையாடுவதற்கு சர்வதேச கிரிக்கெட் கவுன்சில் தடை விதிக்க வேண்டும் என்று ஆஸ்திரேலிய அணியின் முன்னாள் கேப்டன் இயன் சேப்பல் வலியறுத்தியுள்ளார். இந்திய கிரிக்கெட் அணி, ஆஸ்திரேலியாவில் சுற்றுப்பயணம் மேற்கொண்டு விளையாடி வருகிறது. ஒருநாள் தொடரின் முதல் இரண்டு ஆட்டங்களில் ஆஸ்திரேலிய பேட்ஸ்மேன்களான மேக்ஸ்வெல், வார்னர் ஆகியோர் இந்திய பவுலர்களை ஸ்விட்ச் ஹிட் முறையில் அட்டாக் செய்திருந்தனர். இந்நிலையில், இது பவுலர்களுக்கும், ஃபீல்டிங் செய்கின்ற அணிக்கும் எதிராக நடக்கின்ற அநீதி என சொல்லியிருக்கிறார் இயன் சேப்பல். வலது கை பேட்ஸ்மேன், இடது கை பேட்ஸ்மேனாகவோ அல்லது இடது கை பேட்ஸ்மேன், வலது கை பேட்ஸ்மேனாகவோ மாறி பந்தை அடிப்பதுதான் ஸ்விட்ச் ஹிட். “இந்தியாவுக்கு எதிரான ஒருநாள் தொடரில் ஆஸ்திரேலிய பேட்ஸ்மேன்களின் ஆட்டம் அமர்க்களமாக உள்ளது. குறிப்பாக வார்னர், ஸ்மித், ஃபின்ச் மற்றும் மேக்ஸ்வெல் மாதிரியான பேட்ஸ்மேன்கள் அற்புதமாக விளையாடி தங்களது பேட்டிங் திறனை நிரூபித்துள்ளனர். மாடர்ன் டே கிரிக்கெட்டிற்கு ஏற்ப ஸ்விட்ச் ஹிட் முறையில் பல ஷாட்களை மேக்ஸ்வெல் விளையாடி உள்ளார். இருப்பினும் இது நல்லதற்கு அல்ல.  பவுலர்கள் பந்து வீசுவதற்கு முன்னர் அது குறித்து அம்பயர்களிடம் சொல்லிவிட்டுதான் அதை செய்கிறார்கள். பேட்ஸ்மேனின் லெக் மூவ்மெண்ட்டிற்கு ஏற்ப பந்துகளை வீசுவது பவுலர்களின் வியூகம். ஆனால் பவுலர்கள் பந்தை ரிலீஸ் செய்தவுடன் ஸ்விட்ச் ஹிட் முறையில் கைகளை மாற்றியும், பொசிஷனை பேட்ஸ்மேன்கள் மாற்றுவதும் ஏற்புடையதல்ல. இந்த மாதிரியான ஷாட்களை பேட்ஸ்மேன்கள் ஆட ஐசிசி தடை விதிக்க வேண்டும்” என தெரிவித்துள்ளார் சேப்பல்.  இங்கிலாந்தின் கெவின் பீட்டர்சன், ஆஸ்திரேலியாவின் வார்னர் மற்றும் மேக்ஸ்வெல் இந்த ஷாட்களை ஆடுவதில் வல்லவர்கள் என்பது குறிப்பிடத்தக்கது.
http://dlvr.it/RmrV0M

Read More

மு.க.அழகிரியின் அடுத்த அரசியல் 'இன்னிங்ஸ்' எப்படி இருக்கும்? - ஒரு பார்வை

வருகின்ற சட்டமன்ற தேர்தலில் தனது பங்கும் நிச்சயம் இருக்கும் என முன்னாள் மத்திய அமைச்சர் மு.க.அழகிரி தெரிவித்திருக்கிறார். அவரதுஇந்த திடீர் 'அணுகுமுறை' தமிழக அரசியலில் பல்வேறு வியூகங்களுக்கு வித்திட்டுள்ளது. முன்னாள் மத்திய அமைச்சரும், திமுகவில் முக்கிய பொறுப்பு வகித்து வந்தவருமான மு.க.அழகிரி, கட்சிக் கட்டுப்பாட்டை மீறி நடந்து கொண்டதாகக்கூறி கடந்த 2004-ஆம் ஆண்டு மார்ச் மாதம் திமுகவில் இருந்து நிரந்தரமாக நீக்கப்பட்டார். அதற்கு பின் மு.க.அழகிரியின் அரசியல் நடவடிக்கைகள் சற்று ஓய்ந்திருந்தன. பின்னர் 2018-ஆம் ஆண்டு ஆகஸ்ட் மாதம் கருணாநிதி மறைவுக்குப் பிறகு, சேப்பாக்கத்தில் இருந்து மெரினா வரை ஒரு அமைதிப் பேரணி நடத்தினார். அதன்பின் கடந்த இரண்டு ஆண்டுகளாக அமைதியாக இருந்து வந்த அழகிரி, தற்போது மீண்டும் அரசியல் பரபரப்புக்கு வந்துள்ளார். மதுரையில் நேற்று செய்தியாளர்களை சந்தித்த மு.க.அழகிரி கூறும்போது, “பாஜகவில் நான் இணையப்போவதாக வந்த செய்திகள், அனைத்தும் வதந்திகளே. வரும் சட்டப்பேரவைத் தேர்தலில் எனது பங்கும் இருக்கும்” என்றார். புதியக் கட்சி தொடங்குவது தொடர்பான கேள்வியை எழுப்பியபோது “அது போக போகத்தான் தெரியும். அது சம்பந்தமான முடிவை ஆதரவாளர்களுடன் ஆலோசித்த பிறகு கூறுவேன்” என்று கூறினார். அழகிரியின் இந்த பேட்டி பேசுபொருளான நிலையில், இது குறித்து அரசியல் விமர்சகரும் பத்திரிகையாளருமான தராசு ஷ்யாம் கூறும்போது “கடந்த மூன்று ஆண்டுகளாகவே அவருக்கு அரசியலில் பின்னடைவுதான். குறிப்பாக கருணாநிதி இறப்பு மற்றும் அதன்பின் அழகிரி நடத்திய அமைதிப் பேரணிக்கு பின்னர் அவருக்கான ஆதரவு என்பது காணாமல் போய்விட்டது. அவருக்கு தற்போது இருக்கும் ஒரே அந்தஸ்து அவர் கருணாநிதி மகன் என்பதுதான். பாஜகவில் அவரால் சேர இயலாது. ஒருவேளை சேர்ந்தால் அந்த அந்தஸ்தும் போய்விடும். ஆகையால் மு.க.அழகிரி, தற்போது அரசியலில் தனது இருப்பை காட்டிக்கொள்ள வேண்டும் என்ற நிலையில் இருக்கிறார்” என்றார். இது குறித்து அரசியல் விமர்சகர் கணபதி கூறும்போது “அழகிரியை வெளியேவிட்டால் நிச்சயம் திமுகவிற்கு பாதிப்பு உருவாகும் என்பது அவர்களுக்கு தெரியும். ஆகையால் திமுக தலைவர்கள் அவரை சமாதானப்படுத்தும் முயற்சியில் இறங்குவார்கள். அழகிரியை பொருத்தவரை தனது மகனுக்கு கட்சியில் பொறுப்பை கொடுக்குமாறு நிர்பந்திக்கலாம். பாஜகவில் அவர் சேரமாட்டார் என்றே நான் நினைக்கிறேன். அப்படி ஒருவேளை அவர் இணைவதாக இருந்தால், கடந்த நாடாளுமன்ற தேர்தலின்போதோ அல்லது அதற்கு முன்போ அவர் இணைந்திருக்கலாம். பாஜகவின் ஆதரவில் அவர் தனிக்கட்சி தொடங்குவாரா என்பது கணிக்க முடியாததாக இருக்கிறது. மு.க.அழகிரியின் இந்தப் பேட்டி குறித்து திமுக மூத்த தலைவர்களிடம் கேட்டபோது, அழகிரியை மீண்டும் கட்சியில் சேர்ப்பதற்கு மூத்த நிர்வாகிகளுக்கும், திமுக தலைவர் ஸ்டாலின் குடும்பத்தில் இருப்பவர்களுக்குமே விருப்பமில்லை என தெரிவிக்கின்றனர்.
http://dlvr.it/RmrTxL

Read More

சாதிவாரியான கணக்கெடுப்பு - ஆணையம் அமைக்க முதல்வர் பழனிசாமி உத்தரவு

சாதிவாரியான கணக்கெடுப்பு நடத்தி புள்ளிவிவரங்களை சேகரிப்பதற்கான ஆணையம் அமைக்க முதல்வர் பழனிசாமி உத்தரவிட்டுள்ளார். இட ஒதுக்கீடு தொடர்பான ஆணையம் அமைக்க முதல்வர் பழனிசாமி உத்தரவு ஒன்றை பிறப்பித்துள்ளார். இந்த ஆணையத்தின்கீழ் சாதிவாரியான புள்ளிவிவரங்கள் சேகரிக்கப்பட்டு பிரத்யேகமான அறிக்கை அளிக்கப்படும் எனவும் அவர் அறிக்கை வாயிலாகத் தெரிவித்துள்ளார். தமிழகத்தைப் பொருத்தவரை 69% இட ஒதுக்கீட்டிற்கு அரசியலமைப்பு சட்ட பாதுகாப்பைப் பெற்று, தமிழகம் சமூக நீதி வரலாற்றில் தொடர்ந்து இடம்பெற்றுவருகிறது. மேலும் சாதிவாரியான கணக்கெடுப்பு நடத்தவேண்டும் என பல்வேறு அரசியல் கட்சிகளும் பல்வேறு கால கட்டங்களில் கோரிக்கைகளை வைத்து வருவதாகவும், அரசு பல்வேறு நலத் திட்டங்களை செயல்படுத்தி வருவதாகவும், இதன் பயன் அனைத்து பிரிவினருக்கும் சென்றடைவதை அரசு உறுதி செய்ய வேண்டியுள்ள காரணத்தினால், சாதிவாரியான கணக்கெடுப்பு நடத்தவேண்டிய கட்டாயம் ஏற்பட்டுள்ளதாக அவர் இந்த அறிக்கை வாயிலாகத் தெரிவித்துள்ளார். தற்போது 69% இட ஒதுக்கீடு தொடர்பான வழக்கு உச்ச நீதிமன்றத்தில் நிலுவையில் இருக்கும் நிலையில், அதை எதிர்கொள்ள புள்ளிவிவரங்கள் தேவை எனவும் அதை சேகரிக்க ஆணையம் அமைக்கப்படும் எனவும் முதல்வர் தெரிவித்துள்ளார்.
http://dlvr.it/Rmq1HX

Read More