ஜெயலலிதாவின் மறைவிற்குப் பின் அரசியல்களம் கண்ட பரபரப்பு... அதிமுக கடந்து வந்த பாதை!

ஒன்றரை கோடி தொண்டர்களை கொண்ட இயக்கத்தின் உயிர் மூச்சாகவும், அதிமுக தொண்டர்களால் அன்போடு அழைக்கப்பட்ட ஜெயலலிதா மானுட வாழ்வில் இருந்து தம்மை விடுவித்துக்கொண்ட தினம் இன்று அனுசரிக்கப்படுகிறது. இந்நாளில் ஜெயலலிதா மறைவிற்கு பின் அதிமுக கட்சி கடந்து வந்த பாதையை இந்தச் செய்தித்தொகுப்பில் பார்க்கலாம். 2016ம் ஆண்டு செப்டம்பர் 22 ஆம் தேதி இரவு, திடீர் உடல்நலக்குறைவால் சென்னை அப்பல்லோ மருத்துவமனையில் அனுமதிக்கப்பட்ட ஜெயலலிதா, 75 நாட்கள் தொடர் சிகிச்சையில் பலன் எட்டாமல் டிசம்பர் 5 ஆம் தேதி மறைந்தார். அவரது மறைவிற்கு பிறகு அதிமுகவில் பல்வேறு மாற்றங்கள் நிகழத்தொடங்கின. ஜெயலலிதா மறைவிற்குபின் உட்கட்சி பிரச்னை பூதாகரமாக வெடித்ததால், மூன்றே மாதங்களில் தன்னுடைய முதலமைச்சர் பதவியையும் ராஜினாமா செய்தார் ஓ.பன்னீர்செல்வம். அதிமுக நிர்வாகிகளால் பொதுக்குழு கூட்டப்பட்டு சசிகலா கட்சியின் பொதுச்செயலாளர் ஆனார். பின்னர் அதிமுக இரண்டாக ஆக உடைந்தது. ஓபிஎஸ் தலைமையில் ஒரு அணியும், சசிகலா தலைமையில் ஒரு அணியும் பிரிந்தது. இரட்டை இலையும் முடக்கப்பட்டது. இது ஒருபுறம் இருக்க ஜெயலலிதாவின் அண்ணன் மகள் தீபா தனி இயக்கம் தொடங்கி நாள்தோறும் தொண்டர்களை சந்தித்து வந்தார். அதன் பின்னர் ஓபிஎஸ் ராஜினாமாவைத் தொடர்ந்து சசிகலா முதலமைச்சராக பதவியேற்பார் என்றிருந்த சூழ்நிலையில் கூவத்தூரில் எம்.எல்.ஏ.க்கள் தங்க வைக்கப்பட்டனர். இதனிடையே சொத்துக்குவிப்பு வழக்கில், நீதிமன்ற தீர்ப்பில் சசிகலா சிறைசெல்ல வேண்டிய சூழலில் யாரும் எதிர்பாராத வண்ணம் முதலமைச்சராக எடப்பாடி பழனிசாமி பதவியேற்றுக்கொண்டார். சட்டப் பேரவையில் கொண்டுவரப்பட்ட நம்பிக்கைகோரும் தீர்மானத்தில் வெற்றிபெற்று பதவியை தக்க வைத்துக்கொண்டார். ஜெயலலிதாவின் 36 ஆண்டுகால அரசியல் வாழ்வில் நிகழாத காட்சிகள் எல்லாம் அவர் மறைந்த 3 மாதங்களில் அதிமுகவில் அரங்கேறின. இரண்டாக உடைந்த அதிமுக மீண்டும் ஒன்றாகி அதிமுகவின் ஒருங்கிணைப்பாளராகவும், துணை முதலமைச்சராகவும் ஓபிஎஸ் பொறுப்பேற்றார். இரட்டை இலையும் மீட்கப்பட்டது. ஜெயலலிதா மறைவுக்குப் பின் தமிழக அரசியல் களத்தில் கட்சிகளின் காட்சி மாற்றத்தோடு 2019 ஆம் ஆண்டு நாடாளுமன்றத் தேர்தல் மற்றும் 22 தொகுதிகளுக்கான இடைத்தேர்தலை தமிழகம் சந்தித்தது. அந்த தேர்தலில் அதிமுக கூட்டணியில் பாஜக, தேமுதிக, பாமக ஆகிய கட்சிகள் இடம்பெற்றிருந்தன. மக்களவைத் தேர்தலில் ஒரு இடத்தில் மட்டுமே வெற்றி பெற்ற அதிமுக, 22 தொகுதிகளுக்கான இடைத்தேர்தலில் ஒன்பது தொகுதிகளில் வெற்றி கண்டு ஆட்சியை தக்கவைத்துக்கொண்டது. ஓராண்டுகால அமைதிக்குபிறகு கடந்த ஆகஸ்ட் 15ஆம் தேதி அதிமுகவின் முதலமைச்சர் வேட்பாளர் யார் என்ற சர்ச்சை கிளம்பியது. ஒரு மாதம் நீடித்த சர்ச்சைக்கு முதலமைச்சர் வேட்பாளர் எடப்பாடி பழனிசாமி தான் என்று கூறி முற்றுப்புள்ளி வைத்தார் ஓ.பி.எஸ். ஜெயலலிதா மறைவிற்கு பின் பல்வேறு ஏற்ற இறக்கங்களை அதிமுக சந்தித்துள்ளது. எடப்பாடி பழனிசாமி தலைமையில் 4 ஆண்டுகளாக ஆட்சி செயல்பட்டு வரும் நிலையில், அவரை முன்னிறுத்தியே அடுத்த ஆண்டிற்கான சட்டப்பேரவை பொதுத்தேர்லை சந்திக்க இருக்கிறது அதிமுக. - செய்தியாளர் ஸ்டாலின் 
http://dlvr.it/Rn23q4

Read More

புயல் வலுவிழந்தாலும் தமிழகத்தில் தொடர் மழைக்கு காரணம் என்ன?

வங்கக்கடலில் உருவாகி இலங்கையில் கரையை கடந்த புரெவி புயல் வலுவிழந்த காற்றழுத்த தாழ்வு மண்டலமாக மையம் கொண்டுள்ளது. புயலாக வந்தது ஏன் வலுவிழந்தது? வலுவிழந்தாலும் ஏன் தமிழகம் முழுவதும் மழை பெய்கிறது? என்பது குறித்து தெரிந்து கொள்வோம். ஒரு புயலை பொருத்தவரை கடலிலேயே நகர்ந்தால்தான் காற்றின் வேகம் அதிகரிக்கும். அப்போதுதான் புயல் என்பது தீவிர புயலாகவோ அதிதீவிர புயலாகவோ மாறும். ஆனால் புரெவி புயல் இலங்கைக்கும் தமிழகத்திற்கு இடையே உள்ள மன்னார்வளைகுடாவிற்கு அருகே மையம் கொண்டுள்ளது. அதை சுற்றிலும் நிலப்பகுதிகள் காணப்படுகிறது. அதன் காரணமாகவும் சற்று காற்று முறிவு ஏற்பட்டதன் காரணமாகவும் அந்த புயல் வலுவிழந்துள்ளது. வலுவிழந்தாலும் தமிழகம் முழுவதும் மழை பெய்வதற்கு காரணம் என்னவென்றால், வடகிழக்கு திசையில் இருந்து காற்று நிலப்பகுதியை சுற்றி அதன்வழியாக ஆழ்ந்த காற்றழுத்த தாழ்வு மண்டலத்தை நோக்கி செல்கிறது. அவ்வாறாக ஈரப்பதத்தையும் மேகக்கூட்டங்களையும் அந்த காற்று கொண்டு வந்து ஆழ்ந்த காற்றழுத்த தாழ்வு மண்டலத்தை அடைகிறது. அதனால்தான் தமிழகத்தில் மழை பெய்கிறது. அந்த ஆழ்ந்த காற்றழுத்த தாழ்வு மண்டலம் அங்கேயே நீடிக்கும் பட்சத்தில் இன்னும் இரண்டு நாட்களுக்கு தமிழகத்தில் மழை பெய்ய வாய்ப்பு உள்ளது என தெரிவிக்கப்பட்டுள்ளது.
http://dlvr.it/Rn00XD

Read More

'நானும் விவசாயி' எடப்பாடிக்கு தெரியுமா?- வேளாண் சட்டங்களை முன்வைத்து ஸ்டாலின் 10 கேள்விகள்

வேளாண் திருத்தச் சட்டங்களை தவறாகப் புரிந்துகொண்டு திமுக போராட்டம் அறிவித்திருப்பதாக முதல்வர் பழனிசாமி கூறியிருப்பதற்கு திமுக தலைவர் மு.க.ஸ்டாலின் பதிலளித்துள்ளார். 'நானும் விவசாயி' எடப்பாடிக்குத் தெரியுமா? என்று குறிப்பிட்டு, அவர் 10 கேள்விகளையும் அடுக்கியுள்ளார். இதுதொடர்பாக கட்சியினருக்கு அவர் எழுதியுள்ள கடித வடிவிலான அறிக்கை: "விவசாயிகளின் வாழ்வுரிமையைப் பறிக்கும் மத்திய பா.ஜ.க அரசின் வேளாண் திருத்தச் சட்டங்களைத் திரும்பப்பெற வலியுறுத்தி, திமுக தொடர்ந்து போராடி வருகிறது. கொரோனா பேரிடர் காலத்தில் எவ்வித சேதாரமும் இன்றி மக்களைப் பாதுகாப்பதற்கான மருத்துவப் பணிகளை மேற்கொள்ள வேண்டிய மத்திய பா.ஜ.க அரசு, வேளாண் சட்டத் திருத்த மசோதாக்களை அவசரம் அவசரமாக நாடாளுமன்றத்தின் இரு அவைகளிலும் நிறைவேற்றியது. நீண்டகால விளைவுகளை உள்ளடக்கிய மசோதாக்களை மிகக் குறுகிய கால இடைவெளியில் நிறைவேற்றியது. ஜனநாயகம் எனும் நாணயத்தின் மற்றொரு பக்கமான எதிர்க்கட்சிகளின் குரலைக் கிஞ்சித்தும் செவிமடுக்காமல், எதிர்க்கட்சியினரின் கோரிக்கையைப் புறக்கணித்து, அவர்களை வெளியேறச் செய்து, தீர்மானங்களை நிறைவேற்றிச் சட்டமாக்கிய ஜனநாயக விரோதப் போக்கையும் சேர்த்தே நிறைவேற்றிக் கொண்டது பிரதமர் மோடி தலைமையிலான மத்திய பா.ஜ.க அரசு. இந்த வேளாண் திருத்தச் சட்டங்களை எதிர்த்து, அவை வாழ்வையும் வாழ்வாதாரத்தையும் பெரிதும் பாதிப்புக்கு உள்ளாக்கும் என்பதால், நாடு முழுவதும் விவசாயிகள் போராட்டங்களை நடத்தினர். அவர்களின் காயம் பட்ட நெஞ்சத்தைப் புரிந்துகொண்ட எதிர்க்கட்சிகள் ஆளும் மாநிலங்கள் பலவற்றில், மத்திய அரசின் இந்தத் திருத்தச் சட்டங்களை ஏற்கமாட்டோம் எனச் சட்டமன்றத் தீர்மானங்கள் இயற்றப்பட்டன. தமிழ்நாட்டிலோ மத்திய ஆட்சியாளர்களின் கண்ணசைவில் நடைபெறும் அடிமை ஆட்சியாளர்கள், 'தவிடு தின்னும் ராஜாவுக்கு முறம் பிடிக்கும் மந்திரியைப் போல', மோடி அரசின் குரலையே எதிரொலித்து, விவசாயிகளை வஞ்சிக்கும் வேளாண் திருத்தச் சட்டங்களுக்கு ஆதரவு தெரிவித்து, அவற்றை நிறைவேற்றிக் கொடுத்து விவசாயிகளுக்குத் துரோகம் செய்தனர். ஆட்சியில் இல்லாவிட்டாலும் மக்களின் மனதை ஆளும் பேரியக்கமான தி.மு.க சார்பில் இந்தத் திருத்தச் சட்டங்களை எதிர்த்து உச்ச நீதிமன்றத்தில் வழக்குத் தொடரப்பட்டுள்ளது. நீதியையும் ஜனநாயகத்தையும் அவமதிக்கும் போக்கினைத் தொடர்ந்து மேற்கொண்டு வரும் மோடி அரசு, விவசாயிகள் நலன் குறித்துக் கவலைப்படாமல் இந்தச் சட்டங்களை நடைமுறைப்படுத்தி, தங்கள் ஆட்சியை வழிநடத்தும் கார்ப்பரேட் நிறுவனங்களுக்கு விளைநிலங்களைத் தாரை வார்க்கும் நடவடிக்கையை மேற்கொள்வதிலேயே குறியாக இருக்கிறது. பா.ஜ.க தலைமையிலான தேசிய ஜனநாயகக் கூட்டணியில் இடம்பெற்றிருந்த சிரோமணி அகாலிதளம் கட்சியின் நாடாளுமன்ற உறுப்பினர் தனது எதிர்ப்பை அவையிலேயே பதிவு செய்ததுடன், அந்தக் கட்சியும் தேசிய ஜனநாயகக் கூட்டணியிலிருந்து விலகியது. தோழமைக் குரலுக்கும் மதிப்பில்லை; எதிர்க்கட்சிகள் குரலையும் கேட்பதில்லை என்கிற பெரும்பான்மை அகம்பாவமும் ஆணவமும் கொண்ட மத்திய அரசின் போக்கினை உணர்ந்த பஞ்சாப், ஹரியானா மாநில விவசாயிகள் இந்திய ஒன்றியத்தின் தலைநகரை முற்றுகையிடும் வகையில், 'டெல்லி சலோ' என்ற பேரணியை நடத்தி, லட்சக்கணக்கான வாகனங்களில் கோடிக்கணக்கான எண்ணிக்கையில் திரண்டு, இந்தியத் தலைநகரில் தொடர் முற்றுகைப் போராட்டதை கடுங்குளிரிலும் மேற்கொண்டு வருகிறார்கள். தங்கள் கோரிக்கை நிறைவேறி, வாழ்வுரிமையை மீட்கும்வரை டெல்லியை விட்டுச் செல்ல மாட்டோம் என முகாமிட்டு அங்கேயே சமைத்துச் சாப்பிட்டு ஆண்களும் பெண்களுமாகக் குழந்தைகளுடன் சேர்ந்து போராட்டத்தை நடத்துவதை நாடே வியப்புடனும் வேதனையுடனும் கவனித்துக் கொண்டிருக்கிறது. கோரிக்கைகளைப் புறக்கணித்து, பேச்சுவார்த்தை என்ற பெயரிலான மத்திய அரசின் திசை திருப்பல்களையும் போராட்டக் களத்தில் உள்ள விவசாயிகள் ஏற்கவில்லை. எதிர்க்கட்சிகள் மீது பழியைப் போட்டு, மதச்சாயம் பூசிப் போராட்டத்தை நசுக்கலாம் என்கிற ஆட்சியாளர்களின் சதித்திட்டமும் எடுபடவில்லை. நாளுக்கு நாள் வலிமை பெற்றுவரும் விவசாயிகளின் போராட்டங்களுக்கு நாட்டின் பல மாநிலங்களிலிருந்தும் ஆதரவு பெருகுகிறது. தென்னிந்திய மாநிலங்களைச் சேர்ந்த விவசாயிகளும் போராட்டக் களத்தில் இறங்கிவிட்டனர். 'விவசாயிகளின் வாழ்வைப் பறிக்கும் மத்திய அரசின் திருத்தச் சட்டங்களை எதிர்த்து நாடு முழுவதும் நடைபெறும் போராட்டங்களில் தி.மு.க-வின் பங்களிப்பு என்பது முக்கியமானது. வேளாண் திருத்தச் சட்டங்களை எதிர்த்து ஏற்கெனவே தி.மு.க.வும் தோழமைக் கட்சியினரும் கொரோனா பேரிடர் கால நெறிமுறைகளுக்குட்பட்டு பெருந்திரள் ஆர்ப்பாட்டம் நடத்தினர். தற்போது இந்திய ஒன்றியத் தலைநகர் டெல்லியில் இரவு - பகல் பாராது, குளிர் - வெயில் - மழை பாராது போராடும் விவசாயிகளுக்கு உணர்வுபூர்வமான ஆதரவு தெரிவிக்கும் வகையில் தி.மு.க களம் காண்பது குறித்து, நேற்று (டிசம்பர் 3) மாவட்டக் கழகச் செயலாளர்களுடன் காணொலி வாயிலாக ஆலோசனைக் கூட்டம் நடைபெற்றது. அதில் எடுக்கப்பட்ட முடிவின்படி, நாளை (டிசம்பர் 5) காலை 10 மணியளவில் தமிழ்நாட்டின் அனைத்து மாவட்டத் தலைநகரங்களிலும் கழகத்தின் சார்பில், கொரோனா கால முன்னெச்சரிக்கை ஏற்பாடுகளைக் கடைப்பிடித்து, அறவழியில், ஜனநாயக முறையில் மத்திய-மாநில அரசுகளின் நடவடிக்கைகளுக்கு எதிர்ப்பு தெரிவிக்கும் வகையில் கருப்புக்கொடி ஆர்ப்பாட்டம் நடத்துவது என ஒரு மனதாக தீர்மானம் நிறைவேற்றப்பட்டது. தி.மு.க நடத்துகிற அறப்போராட்டங்கள் மக்களிடம் இந்த ஆட்சியாளர்களை அம்பலப்படுத்துவதுடன், பொதுமக்களின் பங்கேற்புடன் நடைபெறுவது வழக்கமாக இருக்கிறது. அனைத்து மக்களின் உயிர் காக்கும் விவசாயப் பெருங்குடி மக்களுக்கான போராட்டம் என்கிறபோது அது எத்தகைய தாக்கத்தினை ஏற்படுத்தும் என்பதை உளவுத்துறையினர் நிச்சயமாக அறிக்கை தயாரித்து, காவல்துறைக்கும் பொறுப்பு வகிக்கும் முதலமைச்சரின் கைகளில் சேர்த்திருப்பார்கள். அந்த அறிக்கை ஏற்படுத்திய பதற்றமோ என்னவோ, டிசம்பர் 3 அன்று சேலத்தில் செய்தியாளர்களைச் சந்தித்த எடப்பாடி பழனிசாமி, தி.மு.க-வை எதிர்ப்பதாக நினைத்து, விவசாயிகளுக்கு எதிரான குரலில் உளறிக் கொட்டியிருக்கிறார். மத்திய பா.ஜ.க அரசின் வேளாண் திருத்தச் சட்டங்கள் பற்றி தி.மு.க.வுக்குப் புரியவில்லையாம். தவறாகப் புரிந்துகொண்டு போராட்டம் அறிவித்திருக்கிறோமாம். யார் சொன்னது தெரியுமா? கோடிக்கணக்கான விவசாயிகள் தங்கள் உயிரைப் பற்றிக் கவலைப்படாமல் குடும்பம் குடும்பமாக இந்திய ஒன்றியத் தலைநகரில் போராடிக் கொண்டிருக்கும் நிலையில், 'நானும் விவசாயி' என்று வேடம் போட்டு ஏமாற்றுகின்ற போலி விவசாயி எடப்பாடி பழனிசாமி சொல்கிறார். * பா.ஜ.க. அரசு கொண்டு வந்துள்ள வேளாண் திருத்தச் சட்டங்கள் மூன்றிலும் எங்கேயாவது ஓரிடத்திலேனும், விவசாயிகள் உற்பத்தி செய்யும் பொருட்களுக்கு குறைந்தபட்ச ஆதார விலை பற்றிக் குறிப்பிடப்பட்டிருக்கிறது என்று 'நானும் விவசாயி' என்கிற எடப்பாடி பழனிசாமி எடுத்துக்காட்டுவாரா? * விவசாயிகள் என்ன விளைவிக்கலாம், யாருக்கு விற்கலாம், என்ன விலைக்கு விற்கலாம் என்பதைத் தீர்மானிக்கும் உரிமையையும் சுதந்திரத்தையும் கார்ப்பரேட் நிறுவனங்களுக்கு இந்தச் சட்டங்கள் அள்ளிக் கொடுப்பதை 'டெண்டர் விவசாயி' எடப்பாடி அறிவாரா? * தரகர்களை ஒழிக்கிறோம் என்று சொல்லி, பெரிய வியாபாரிகள் - பெரிய கிடங்குகள் வைத்திருக்கும் நிறுவனங்கள், பன்னாட்டு ஏற்றுமதியாளர்களுக்கு இந்திய விவசாயிகளை அடிமையாக ஆக்குகிறது என்பதை அடிமை ஆட்சி நடத்தும் தலைமை அடிமையான பழனிசாமி எப்படி அறிவார்? * விவசாயிகளின் உற்பத்திப் பொருட்களுக்குப் பாதுகாப்பானதாக உருவாக்கப்பட்ட இந்திய உணவுக்கழகம், ஒழுங்குமுறை விற்பனைக் கூடங்கள், நேரடி கொள்முதல் நிலையங்கள் ஆகியவை இனி இருக்குமா என்பதையே கேள்விக்குறியாக்கியுள்ள இந்தத் திருத்தச் சட்டங்களை எந்த அடிப்படையில் பழனிசாமி ஆதரிக்கிறார்? * விவசாயிகள் உள்ளிட்ட அனைத்து மக்களுக்கான உணவுப் பாதுகாப்பும், பொதுவிநியோகத் திட்டத்தின் வாயிலாக அத்தியாவசிய உணவுப்பொருள் விநியோகமும் இனி தொடருமா என்ற கேள்விக்கு எடப்பாடி பழனிசாமி என்ன பதில் வைத்திருக்கிறார்? * இந்தியாவுக்கே முன்னோடியாகத் தமிழகத்தில் தலைவர் கருணாநிதி ஆட்சியில் உருவாக்கப்பட்ட உழவர் சந்தைகளுக்கு மூடு விழா நடத்துவதுதான் இந்தத் திருத்தச் சட்டங்களின் நோக்கம். "நாங்களே அவற்றுக்கு மூடுவிழா நடத்திவிட்டோம். இனி மத்திய அரசு எப்படி மூட முடியும்?" என்று பதில் சொல்லப் போகிறாரா முதலமைச்சர் பழனிசாமி? * இந்தியாவில் உள்ள விவசாயிகளில் 95 சதவீதம் பேர் சிறு - குறு விவசாயிகள்தான். இவர்கள் விளைவிக்கும் உணவு தானியங்கள் – பழங்கள் - காய்கறிகளுக்குக் குளிர்பதனக் கிடங்கு கிடையாது. குளிர்பதனக் கிடங்கு வைத்துள்ள கார்ப்பரேட் நிறுவனங்களின் கைகளுக்கு விவசாயம் செல்லும் வகையில் வேளாண் திருத்தச் சட்டம் உள்ளது என்பதாவது உறைக்கக்கூடிய அளவில் எடப்பாடி பழனிசாமி இருக்கிறாரா? அல்லது பதவி சுகத்தில் உணர்விழந்து உறைந்து போய்க் கிடக்கிறாரா? * விவசாயிகளுக்கும் வணிக நிறுவனங்களுக்கும் ஒப்பந்தம் என்கிற திருத்தச் சட்டத்தின் அம்சம் நடைமுறைக்கு எந்த வகையில் சாத்தியம் என்பதை எடப்பாடி பழனிசாமி விளக்குவாரா? * கரும்பு ஆலைகளுடன் ஒப்பந்தம் போட்டு, விளைந்த கரும்பைக் கொடுத்துவிட்டு ஆண்டுக்கணக்கில் காத்திருக்கும் உண்மையான விவசாயிகளுக்குரிய நிலுவைத் தொகையைக் கிடைக்கச் செய்தாரா, 'நானும் விவசாயி' என்கிற முதலமைச்சர்? * வேளாண்மை என்பது மாநில அரசின் பட்டியலில் உள்ள நிலையில், அது குறித்து கொரோனா காலத்தில் அவசர அவசரமாகத் திருத்தச் சட்டம் கொண்டு வந்துள்ளது மத்திய அரசு என்பதாவது, மாநில உரிமைகளை அடமானம் வைத்து ஆட்சி நடத்தும் எடப்பாடி பழனிசாமிக்குத் தெரியுமா? எந்த லட்சணத்தில் மத்திய பா.ஜ.க அரசின் வேளாண் திருத்தச் சட்டங்களை எடப்பாடி பழனிசாமி ஆதரிக்கிறார்? போகிற இடத்தில் எல்லாம் 'நான் விவசாயி' என்று அவர் சொல்வதே, தன் வேடம் கலைந்துவிடக்கூடாது என்ற பதற்றத்தில்தான்! ஏனென்றால், அவர் உண்மையான விவசாயி அல்ல; இடைத்தரகர்தான். அதையேதான் அரசியலிலும் செய்து பதவி சுகம் அனுபவித்து, கஜானாவைக் கொள்ளையடித்து வருகிறார். அதற்கான வெகுமக்களின் தீர்ப்பும் தண்டனையும் நெருங்கி வருகிறது. அவற்றைத் தமிழக வாக்காளர்கள் கைகளில் ஒப்படைத்துள்ள தி.மு.க, மக்கள் நலனுக்கான அறப்போர்க் களங்களில் தொடர்ந்து பங்கேற்று வருகிறது. டெல்லியில் போராடும் விவசாயிகளுக்கும், தமிழ்நாட்டில் உள்ள விவசாயிகளின் நலன்களுக்கும் தார்மீக ஆதரவு தரும் வகையில் திமுக நடத்தும் கருப்புக் கொடி அறப்போராட்டத்தில் சேலத்தில் உங்களில் ஒருவனான நான் பங்கேற்கிறேன். அனைத்து மாவட்டத் தலைநகரங்களிலும் திமுக செயலாளர்கள் முன்னெடுப்பில் ஒன்றிய, நகர, பேரூர், கிளைக் கழக நிர்வாகிகள் பங்கேற்புடன் விவசாயிகளின் உரிமை காக்கும் பெருந்திரள் ஆர்ப்பாட்டம் வெற்றிகாணட்டும்! விவசாயி வேடம் போட்டு, பசுமை தழைக்கத் தடைபோடும் ஆட்சியாளர்களின் வேடத்தைக் கலைத்திட, கருப்புக் கொடிகள் உயரட்டும்! தமிழகமே கருப்புக் கடல் ஆகட்டும்! டெல்லி போல குலுங்கட்டும் தமிழகம்!" என்று அந்தக் கடிதத்தில் ஸ்டாலின் கூறியுள்ளார்.
http://dlvr.it/Rn00RV

Read More

தொழிலதிபர் to அரசியல் பணி - அர்ஜூன மூர்த்தியின் பின்னணி என்ன?

ஜனவரியில் புதிய கட்சி தொடங்குவதாகவும், புதிய கட்சி தொடங்குவதற்கான தேதி டிசம்பர் 31ல் அறிவிக்கப்படும் என்றும் ரஜினி தனது ட்விட்டரில் பதிவிட்டு இருந்தார். அத்துடன், வரும் சட்டமன்றத் தேர்தலில் வெற்றிப் பெற்று தமிழகத்தில் ஆன்மீக அரசியல் உருவாகுவது நிச்சயம் எனவும் தமிழகத்தில் ஊழலற்ற, ஜாதி மதச் சார்பற்ற ஆன்மீக அரசியல் உருவாகும் எனவும் குறிப்பிட்டிருந்த ரஜினி, அற்புதம் அதிசயம் நிகழும் எனவும் பதிவிட்டிருந்தார். பின்னர் செய்தியாளர்களிடம் பேசியபோது, கட்சிப் பணிகளை மேற்கொள்ள தமிழருவி மணியனை மேற்பார்வையாளராகவும், அர்ஜூன மூர்த்தியை தலைமை ஒருங்கிணைப்பாளராகவும் நியமித்திருப்பதாக ரஜினிகாந்த் அறிவித்தார். தமிழக பாஜகவின் அறிவுசார் பிரிவு தலைவராக இருந்த அர்ஜுன மூர்த்தி தன்னுடைய பதவியை ராஜினிமா செய்வதாக கட்சிக்கு கடிதம் அனுப்பினார். அர்ஜுன மூர்த்தியின் ராஜினாமாவை ஏற்றுக்கொண்டுள்ளதாக தமிழக பாஜக அறிவித்தது. ரஜினி தொடங்க இருக்கும் கட்சியின் தலைமை ஒருங்கிணைப்பாளராக நியமிக்கப்பட்டுள்ள அர்ஜூன மூர்த்தியின் பின்னணி குறித்துப் பார்க்கலாம். அர்ஜூன மூர்த்தி 1960ஆம் ஆண்டு புதுக்கோட்டை மாவட்டத்தில் பிறந்தார். இவரது தந்தை ராமசாமி மிகப்பெரிய தொழிலதிபர். சுதந்திர போராட்டவீரரான இவரது தந்தை போக்குவரத்து தொழில் தொடங்கி அதன் பின்னர் புதுக்கோட்டை நகராட்சி தலைவராகவும் பதவி வகித்தவர். அதேபோல், அர்ஜூன மூர்த்தியும் தொழிலதிபராக இருந்து அரசியல் களத்திற்கு வந்தவர். இளநிலை வேதியியல், முதுநிலை சமூக அறிவியல் படிப்பை முடித்த அர்ஜூன மூர்த்தி அதன்பிறகு பேரி நிறுவனத்தில் பணியாற்றினார். அதனைத் தொடர்ந்து உணவு தயாரிப்பு நிறுவனத்தை தொடங்கி நடத்திவந்த அவர், பாஜக நிர்வாகிகளுடன் நெருங்கி பழகினார். தமிழகம் மட்டுமல்லாமல் டெல்லியில் உள்ள பாஜக நிர்வாகிகளுடனும் இவருக்கு அறிமுகம் கிடைத்தது. உணவு தயாரிப்பு நிறுவனத்துக்கு பிறகு தகவல் தொழில்நுட்ப துறையில் கால்பதித்தார். தகவல் தொழில்நுட்பத் துறையில் 35 ஆண்டுகள் அனுபவம் வாய்ந்தவர் அர்ஜூன மூர்த்தி. தொழில்நுட்பத் துறையில் அனுபவம் இருந்ததால் பாஜக அரசின் டிஜிட்டல் இந்தியா, பணமில்லா பரிவர்த்தனை, பண மதிப்பிழப்பு ஆகிய திட்டங்களுக்கு ஆலோசகராக இருந்தார். இவருக்கு தமிழகத்தின் திராவிட கட்சிகள்மீது விமர்சனம் உண்டு. கடந்த 50 ஆண்டுகளாக இரண்டு கட்சிகளும் மாநிலத்தை சீரழித்துவிட்டதாக கருதிய அர்ஜூன மூர்த்தி, 2019இல் பாஜகவில் தன்னை இணைத்துக் கொண்டு அரசியல் பயணத்தை தொடங்கினார். பாஜக மாநில தலைவராக எல்.முருகன் நியமிக்கப்பட்ட பிறகு, அறிவுசார் பிரிவில் இவருக்கு பொறுப்பு கொடுக்கப்பட்டது. இந்நிலையில் ரஜினி தொடங்க உள்ள புதிய கட்சியின் தலைமை ஒருங்கிணைப்பாளராக அர்ஜூன மூர்த்தி அறிவிக்கப்பட்டுள்ளார்.
http://dlvr.it/RmyWpD

Read More

மோடி குறிப்பிட்ட நாய்... முழு மரியாதையுடன் இறுதி சடங்கு செய்த காவல்படையினர்!

உத்திர பிரதேச மாநிலத்தில், உயிரிழந்த ஒரு நாய்க்கு முறையான சடங்குகளோடு இறுதி மரியாதையை செய்து வழியனுப்பியிருக்கிறார்கள் 'PAC' காவல்படையினர். ராகேஷ் என்ற அந்த நாய், பிரதமர் மோடியின் உரையில் இடம்பெற்றதால் ஏற்கெனவே தேசிய பிரபலம்.மன் கி பாத் பிரதமர் மோடி தனது ‘மன் கி பாத்’ உரையில் பல மனிதர்கள் பற்றியும் பல நிகழ்வுகள் பற்றியும் பேசி வருகிறார். அப்படியொரு உரையில்தான் மோடி ‘ராகேஷ்’ என்ற நாயைப் பற்றியும் பேசினார். கொரோனா காலத்தில் நாம் சந்தித்த பிரச்னைகள் ஏராளம். பிரச்னைகளிலிருந்து விலங்குகளும் தப்பவில்லை. நாய்கள் உட்பட பல விலங்குகள் கொரொனா காலத்தில் சரியான உணவு கிடைக்காமலும் தங்கள் எஜமானர்களைத் தொலைத்தும் தவித்திருக்கின்றன. ராகேஷும் அதில் ஒன்று. ராகேஷை, உத்தர பிரதேச மாநிலம் மீரட் நகரைட் சேர்ந்த ஒரு டீக்கடை உரிமையாளர் வளர்த்து வந்தார். லாக்டெளனில் அவரின் கடை மூடப்பட வேண்டியிருந்ததால், அவர் சொந்த ஊருக்கே திரும்பிட்டார். ஆனால், ராகேஷை உடன் அழைத்துச் செல்ல முடியவில்லை. எஜமானரும் இல்லாத சோகம், உணவும் சரிவர கிடைக்காமல் கஷ்டப்பட்டிருக்கிறது அந்த வாயில்லா ஜீவன். அதைப் பார்த்த பேக் (Provincial Armed Constabulary) உதவி ஆய்வாளர் உமேஷ் சின்ஹா, அந்த நாயை எடுத்து வளர்த்திருக்கிறார். அவரோடு அந்த சிறப்பு காவல் படையின் அனைத்து காவலர்களும் அந்த நாயின் மீது அன்பு செலுத்த துவங்கியிருக்கிறார்கள். அதன் பெயர் என்னவென தெரியாததால், புதுப்பெயர் வைக்க யோசித்து, அதன் உரிமையாளரான ராகேஷ் என்பவரது பெயரையே வைத்துவிட்டார்கள். ராகேஷும் உமேஷின் கண்காணிப்பில் வளர்ந்து வந்தது. ராகேஷுக்கும் உமேஷுக்கும் நல்ல பிணைப்பு ஏற்பட்டது. அந்தத் தகவல் தெரிந்துதான் பிரதமர் மோடி மன் கி பாத் உரையில், இந்த சம்பவத்தை சுட்டிக்காட்டி PAC காவலர்களுக்கு பாராட்டு தெரிவித்திருந்தார். இதேபோல எல்லோரையும் விலங்குகளுக்கு உதவுங்கள் எனவும் கேட்டிருந்தார்.நாய்க்கு இறுதி சடங்கு செய்த உபி சிறப்பு காவல்படை இந்நிலையில் ஐந்து வயதான ராகேஷுக்கு சிறுநீரகம் மற்றும் கல்லீரலில் தொற்று ஏற்பட்டது. இந்த உடல்நலக் கோளாறுகளுக்கு முறையாக வைத்தியம் தரப்பட்டது. ஆனால், அவை உதவாமல் டிசம்பர் 2ம் தேதி ராகேஷ் உயிரிழந்தது. இதனால் கலங்கிய PAC காவல்படை, ஒரு மனிதனுக்கு செய்வது போலவே ராகேஷின் உடலுக்கு முழு மரியாதயுடன் இறுதிச் சடங்கு நடத்தி அடக்கம் செய்திருக்கிறார்கள்.
http://dlvr.it/RmwGJX

Read More

புரெவி: `சபரிமலையில் கட்டுப்பாடு... உள்ளாட்சித் தேர்தல் நடவடிக்கைகளை பாதிக்கும்!’ -பினராயி விஜயன்

வங்கக்கடலில் உருவாகியுள்ள புரெவி புயல், தமிழகத்தின் தென் மாவட்டம் வழியாகக் கேரள மாநிலத்தைக் கடந்து செல்லும் என வானிலை ஆய்வு மையம் கூறியிருக்கிறது. இதைத் தொடர்ந்து கேரள மாநிலம் புயலை எதிர்கொள்ளத் தயாராகிவருகிறது. இது குறித்து கேரள முதல்வர் பினராயி விஜயன் கூறுகையில், ``புரெவி புயல் இலங்கைக்கு கிழக்குப் பகுதி வழியாக தமிழ்நாட்டின் தூத்துக்குடி, திருநெல்வேலி வழியாக வரும் வெள்ளிக்கிழமை திருவனந்தபுரத்தை அடையும் எனக் கூறப்படுகிறது. புரெவி புயல் முன்னெச்சரிக்கை குறித்து பிரதமர் நரேந்திர மோடி தொடர்புகொண்டு பேசியிருந்தார். கேரள மாநிலம் எடுத்திருக்கும் முன்னெச்சரிக்கை நடவடிக்கைகள் குறித்து பிரதமரிடம் கூறினோம். மத்திய வானிலை ஆய்வு மையத்தின் தகவல்படி தெற்கு வங்கக் கடலில் ஏற்பட்டிருக்கும் புயல் டிசம்பர் 4-ம் தேதி திருவனந்தபுரம் வழியாகக் கடந்து போக வாய்ப்பிருக்கிறது. பின்னர் மீண்டும் அது தென் தமிழகத்தை அடையும் என்கிறார்கள். வானிலை மையத்தின் அறிவிப்புப்படி டிசம்பர் 4-ம் தேதி காலையில் தென் தமிழகத்துக்கு வரும் புயல் மதிய நேரத்தில் கேரளத்துக்கு வர வாய்ப்பு உண்டு.பினராயி விஜயன் திருவனந்தபுரம், கொல்லம், கோட்டயம், பத்தணம்திட்டா, ஆலப்புழா, இடுக்கி, எர்ணாகுளம் ஆகிய ஏழு மாவட்டங்களில் கனமழையும், காற்றும் ஏற்படும் என்று முன்னறிவிப்பு வந்திருக்கிறது. வரும் 3-ம் தேதி (இன்று) முதல் 5 வரை இது தொடரும் என்கிறார்கள். கேரளக் கடலில் டிசம்பர் 2-ம் தேதி முதல் 4-ம் தேதி வரை கடல் சீற்றம் காணப்படும். ஒரு செகண்டில் 60 முதல் 108 சென்டிமீட்டர் வரை வேகத்தில் 2 முதல் 5 மீட்டர் உயரத்தில் கடல் அலை ஏற்பட வாய்ப்பிருப்பதாக இந்தியன் நேஷனல் சென்டர் ஃபார் ஓசன் இன்ஃபர்மேஷன் சர்வீஸ் முன்னறிவிப்பு கொடுத்திருக்கிறது. திருவனந்தபுரம், கொல்லம், பத்தணம்திட்டா, ஆலப்புழா கோட்டயம், இடுக்கியின் சில பகுதிகளிலும் ஒரு மணி நேரத்தில் 60 கி.மீ-க்கு மேல் காற்று வீச வாய்ப்பு உண்டு. எர்ணாகுளம் மற்றும் இடுக்கியின் பிற பகுதிகளில் 30 முதல் 40 கிலோமீட்டர் வேகத்தில் காற்று வீசவும், அதி தீவிர மழைக்கும் வாய்ப்பு உள்ளது. தாழ்வான இடத்தில் வெள்ளம் தேங்குதல், மலைப்பகுதியில் மண் இடியவும் சாத்தியக்கூறுகள் உள்ளன. மீன்பிடித் தொழிலாளர்கள் வரும் 5-ம் தேதிவரை மீன் பிடிக்கச் செல்ல வேண்டாம்.மழை டிசம்பர் 3-ல் திருவனந்தபுரம், கொல்லம், பத்தனம்திட்டா, ஆலப்புழா மாவட்டங்களில் ரெட் அலெர்ட்டும், கோட்டயம், எர்ணாகுளம், இடுக்கி மாவட்டங்களுக்கு ஆரெஞ்ச் அலெர்ட்டும், திருச்சூர், பாலக்காடு மாவட்டங்களுக்கு யெல்லோ அலர்ட்டும் பிறப்பிக்கப்பட்டுள்ளது. எட்டு தேசியப் பேரிடர் மீட்ப்புக்குழுக்கள் கேரளா வந்துள்ளன. சில மாவட்டங்களில் அணைகள் திறக்கப்பட்டுள்ளன. மாவட்ட அளவில் அதிகாரிகள் ஆலோசனை நடைபெற்று முடிந்துவிட்டது. 2,849 முகாம்கள் ஏற்படுத்தப்பட்டிருக்கின்றன. இப்போது 13 முகாம்களில் 175 குடும்பங்களைச் சேர்ந்த 690 பேர் தங்கவைக்கப்பட்டிருக்கிறார்கள். அவசரத் தேவைக்கு 1077 என்ற எண்ணுக்கு அழைக்கலாம். பத்தனம்திட்டா மாவட்டத்தில் அதிதீவிர மழைக்கும், கடும் காற்று வீசவும் முன்னறிவிப்பு இருக்கிற்து. எனவே, புயல் கடந்து செல்லும் வரை சபரிமலை பக்தர்களுக்கு கட்டுப்பாடு விதிக்க வேண்டிவரும். இது குறித்து தீர்மானம் எடுக்க பத்தனம்திட்டா மாவட்ட பேரிடர் குழுவுக்கு அதிகாரம் வழங்கப்பட்டுள்ளது. முன்னெச்சரிக்கையுடன் உள்ளாட்சித் தேர்தல் நடவடிக்கைகள் செயல்படுத்தப்படும்" என்றார்.
http://dlvr.it/RmwGDq

Read More

"முதலில் ரத்து... உங்கள் சார்பில் ஒருவர் மட்டுமே!" - மத்திய அரசுக்கு விவசாயிகள் நிபந்தனை

பேச்சுவார்த்தையை தொடர வேண்டுமானால் 3 வேளாண் சட்டங்களையும் ரத்து செய்ய வேண்டும் என்பன உள்ளிட்ட பல்வேறு நிபந்தனைகளை விவசாயிகள் முன்வைத்துள்ளனர். வேளாண்சட்டங்களுக்கு எதிராக டெல்லியில் விவசாயிகள் நடத்தும் போராட்டம் 7-வது நாளை எட்டியுள்ளது. நேற்றைய தினம் மத்திய அரசுடன் நடந்த பேச்சுவார்த்தையில் உடன்பாடு எட்டப்படாத நிலையில் இன்று விவசாயிகள் தங்கள் போராட்டங்களை பல இடங்களில் தீவிரப்படுத்தியுள்ளனர். இதையடுத்து மத்திய அரசின் சார்பில் நாளைய தினமும் விவசாய சங்க பிரதிநிதிகளுடன் பேச்சுவார்த்தை நடத்த திட்டமிட்டுள்ளது. இதற்காக இன்றைய தினத்திற்குள் விவசாயிகள் தங்கள் கோரிக்கைகளை எழுத்துப்பூர்வமாக அளிக்க வேண்டும் என தெரிவிக்கப்பட்டுள்ளது. இந்நிலையில், பேச்சுவார்த்தையை தொடர விவசாயிகள் நிபந்தனை விதித்துள்ளனர். இதுகுறித்து செய்தியாளர்களை சந்தித்த விவசாய சங்க பிரதிநிதிகள் “3 வேளாண் சட்டங்களையும் அவசர சட்டம் மூலம் ரத்து செய்ய வேண்டும். மூன்று வேளாண் சட்டங்களையும் நிறுத்தி வைக்க 10 நிமிடங்கள் போதும். போராட்டம் தொடர்பாக மத்திய அரசின் சார்பில் ஒருவர் மட்டுமே பேச வேண்டும். பலரும் கருத்து தெரிவிக்கக்கூடாது. தவறினால் பேச்சுவார்த்தையில் ஈடுபட மாட்டோம். பேச்சுவார்த்தை என்ற பெயரில் காலதாமதப்படுத்த வேண்டாம். போராட்டத்தை கொச்சைப்படுத்தும் விதமாக பாஜகவினர் பேசுவதை ஏற்க முடியாது” எனத் தெரிவித்துள்ளனர்.
http://dlvr.it/Rmtngl

Read More