விஜய்யின் செல்ஃபி.. தோனியின் டிவீட்..- டிவிட்டரில் அதிகம் பேசப்பட்ட இந்த வருட லிஸ்ட்!

இந்த ஆண்டு டிவிட்டரில் நடிகர் விஜய் எடுத்த செல்ஃபி அதிகம் ரீட்வீட் செய்யப்பட்ட டிவிட்டாக உள்ளது. கிரிக்கெட் வீரர் கோலி தனது மனைவி கர்ப்பமாக உள்ளதை அறிவித்த டிவீட் 6.4 லட்சம் பேரால் விரும்பப்பட்டு, அதிக லைக் வாங்கிய ட்வீட்டாக உள்ளது, அதிகம் பேசப்பட்ட படங்களில் ஒன்றாக “சூரரைப்போற்று” உள்ளது என்று டிவிட்டர் நிர்வாகம் தெரிவித்துள்ளது. “2020ஆம் ஆண்டு மிகவும் அசாதாரணமானது மற்றும் தனித்துவமானது. நாம் உடல் ரீதியாக தொலைதூரத்தில் இருந்ததால், நம்மை டிஜிட்டலாக இணைக்க வேண்டிய அவசியம் இருந்தது. தற்போது மக்கள் தொடர்பை வெளிப்படுத்த டிஜிட்டல் மிக முக்கியமான வழியாக மாறியுள்ளது”என்று ட்விட்டர் இந்தியாவின் நிர்வாக இயக்குனர் மனீஷ் மகேஸ்வரி கூறினார் . இந்த ஆண்டின் டிவிட்டர் டிரெண்டிங் பற்றி பேசிய அவர் “ பிப்ரவரி மாதம் விஜய்  ரசிகர்களுடன் எடுத்துக்கொண்ட  செல்ஃபி, 2020 ஆம் ஆண்டில் அதிகமாக ரீட்வீட் செய்யப்பட்ட ட்வீட் ஆகும், அதேபோல கிரிக்கெட் வீரர் விராட் கோலி தனது  மனைவி நடிகை அனுஷ்கா ஷர்மா கர்ப்பமாக இருப்பதை அறிவித்த டிவீட் இந்த ஆண்டின் மிகவும் விரும்பப்பட்ட டிவீட் ஆகும். அரசியல் டிவீட்களை பொறுத்தமட்டில் பிரதமர் நரேந்திர மோடியின் இல்லத்தில் விளக்குகள் ஏற்றுவது குறித்து டிவீட்டானது அதிகமாக மறு டிவீட் செய்யப்பட்டன. அதேபோல விளையாட்டு தொடர்பான டிவீட்டில் முன்னாள் இந்திய கிரிக்கெட் கேப்டன் எம்.எஸ். தோனி, திரு. மோடியின் பாராட்டு கடிதத்திற்கு நன்றியைத் தெரிவித்துக் கொண்டது டிவீட் அதிகம் விரும்பப்பட்டது. அதுபோல ஐபிஎல் 2020 மற்றும் தில் பெச்சாரா ஆகியவை சிறந்த விளையாட்டு மற்றும் திரைப்பட ஹேஷ்டேக்குகளாக இருந்தன, ‘பினோட்’ நினைவுச்சின்னம் குறித்து அதிகம் டிவீட் செய்யப்பட்டது. நடப்பு விவகாரங்கள் பற்றிய தலைப்புகள் பட்டியலில் கோவிட்-19 முதலிடத்தில் உள்ளது,  இதைத் தொடர்ந்து மறைந்த நடிகர் சுஷாந்த் சிங் ராஜ்புத் மரணம் மற்றும் ஹத்ராஸ் கூட்டு பாலியல் வன்கொடுமை ஆகியவை அதிகம் உரையாடிய தலைப்புகளாக உள்ளது ”என்றும் அவர் கூறினார். உலகளவில் இந்த ஆண்டு டிவி மற்றும் திரைப்படங்களைப் பற்றி நிமிடத்திற்கு சுமார் 7,000 டிவீட்டுகள் வெளியிடப்பட்டன. இந்தியாவில் இந்தி திரைப்படமான தில் பெச்சாரா இந்த ஆண்டு அதிகம் டிவீட் செய்யப்பட்ட படமாகும், அதனையடுத்து தமிழ் திரைப்படமான சூரரைப்போற்று மற்றும் தெலுங்கு திரைப்படம் சரிலேரு நீகேவரு ஆகியவை உள்ளன எனவும் தெரிவித்தார்
http://dlvr.it/RnDSxw

Read More

கேரள உள்ளாட்சித் தேர்தல்: கட்டாய மாஸ்க்; தனி பேனா! - கொரோனா விதிமுறைகளுடன் முதற்கட்ட வாக்குப்பதிவு

கேரள மாநிலத்தில் உள்ளாட்சித் தேர்தல் மூன்றுகட்டங்களாக நடக்கிறது. முதற்கட்ட வாக்குப்பதிவு இன்று நடக்கிறது. திருவனந்தபுரம், கொல்லம், ஆலப்புழா, பந்தனம்திட்டா, இடுக்கி உள்ளிட்ட ஐந்து மாவட்டங்களில் இன்று காலை 7 மணிக்கு வாக்குப்பதிவு தொடங்கி நடந்துவருகிறது. கொரோனா விதிமுறைகளைக் கருத்தில்கொண்டு சுகாதாரத்துறை வழிகாட்டுதல்படி, இந்தத் தேர்தல் நடக்கிறது. `கொரோனா காலத்தில் நடக்கும் முதல் தேர்தல் என்பதால், அனைவரும் விழிப்புணர்வுடன் வாக்களிக்கச் செல்ல வேண்டும்’ என்று கேரள சுகாதாரத்துறை அறிவுறுத்தியிருக்கிறது. தேர்தல் கமிஷனும் கொரோனா முன்னெச்சரிக்கை நடவடிக்கைகளைக் கருத்தில்கொண்டு ஏற்பாடுகளைச் செய்திருக்கிறது. தேர்தல் சம்பந்தமாக கேரள சுகாதாரத்துறை வெளியிட்டிருக்கும் அறிவிப்பில், ``பொதுமக்களும், அதிகாரிகளும், அரசியல் கட்சியைச் சேர்ந்தவர்களும் என எல்லோரும் ஒரே மாதிரியான முன்னெச்சரிக்கை நடவடிக்கைகளைக் கடைப்பிடிக்க வேண்டும். எல்லோரும் தங்களுடைய ஆரோக்கியத்தையும், மற்றவர்களின் ஆரோக்கியத்தையும் கவனத்தில்கொள்ள வேண்டும். ஓட்டுப் போடுவதற்காக வீட்டிலிருந்து புறப்பட்டு, மீண்டும் வீடு திரும்பும் வரை வாய், மூக்கு ஆகியவற்றை மறைக்கும்படி மாஸ்க் கட்டாயம் அணிய வேண்டும். தெரிந்தவர்களைக் கண்டால் பேசுவதற்காக மாஸ்கைக் கீழே இறக்கக் கூடாது. யாராவது உங்களிடம் மாஸ்கை இறக்கிப் பேசினால், மாஸ்க்கைச் சரியாக அணிந்துகொண்டு பேசச் சொல்லுங்கள்.உள்ளாட்சித் தேர்தலில் வாக்களிக்கும் அமைச்சர் கடகம்பள்ளி சுரேந்திரன் குழந்தைகளை ஓட்டுச்சாவடிக்கு அழைத்து வரக் கூடாது. ரெஜிஸ்டரில் கையெழுத்து போடுவதற்கான பேனா கொண்டுவர வேண்டும். வரிசையில் நிற்கும்போதும், மற்ற சமயங்களிலும் சமூக இடைவெளியைக் கடைப்பிடிக்க வேண்டும். வக்குச்சாவடிக்குள் செல்லும்போதும், வெளியே வந்ததும் சானிடைசர் பயன்படுத்த வேண்டும். ஒரே சமயத்தில் மூன்று பேர்தான் பூத்துக்குக் செல்ல வேண்டும். சந்தேகத்தின்பேரில் முகத்தைக் காட்ட வேண்டிய நிலை ஏற்பட்டால் மட்டுமே மாஸ்கைக் கழற்ற வேண்டும். வாக்குப்பதிவுக்கு பத்து நாள்களுக்கு முன்னரும் முதல், முந்தினநாள் 3 மணிவரை கொரோனா பாசிட்டிவ் ஆனவர்கள் வாக்களிக்க பூத்துக்குச் செல்ல வேண்டாம். அவர்கள், சிறப்பு தபால் ஓட்டு போட்டுக்கொள்ளலாம். ஏதாவது சந்தேகம் என்றால் 1056 என்ற எண்ணுக்கு அழைக்க வேண்டும்" இவ்வாறு கேரள சுகாதாரத்துறை வழிகாட்டியிருக்கிறது. காலை 7 மணி முதல் வாக்காளர்கள் சமூக இடைவெளியுடன் வரிசையில் நின்று வாக்களித்துவருகின்றனர்.மாஸ்க் அணிந்து ஓட்டுப் போடும் வாக்காளர் காலை 11:30 மணி நிலவரப்படி ஐந்து மாவட்டங்களிலும் 34.67 சதவிகிதம் வாக்குகள் பதிவாகியிருக்கின்றன. திருவனந்தபுரம் மாவட்டத்தில் 34.35 சதவிகிதமும், கொல்லம் மாவட்டத்தில் 31.9, பந்தனம்திட்டா 35.92, ஆலப்புழா 36.59, இடுக்கி மாவட்டத்தில் 34.59 சதவிகிதம் வாக்குகளும் பதிவாகியிருக்கின்றன. ஐந்து மாவட்டங்களிலும் 385 உள்ளாட்சிகளில், 6,911 பதவிகளுக்காக 24,584 பேர் தேர்தலில் போட்டியிடுகிறார்கள். இரண்டாம்கட்ட வாக்குப்பதிவு வரும் 10-ம் தேதியும், மூன்றாம்கட்ட வாக்குப்பதிவு வரும் 14-ம் தேதியும் நடக்கிறது. வரும் 16-ம் தேதி வாக்குகள் எண்ணப்பட்டு முடிவுகள் அறிவிக்கப்படவிருக்கின்றன.
http://dlvr.it/RnDSr1

Read More

"ஊழல் புத்திரர்களுக்கு... நான் ஏ டீம்!" - திமுக, அதிமுக எதிராக கமல்ஹாசன் கொந்தளிப்பு

'தன் வாழ்க்கையே, தன் செய்தி என வாழ்ந்து காட்டிய காந்திக்குத்தான் நான் பி டீம்' என மக்கள் நீதி மய்யத்தின் தலைவர் கமல்ஹாசன் தெரிவித்துள்ளார். இதுகுறித்து அவர் தனது டிவிட்டர் பக்கத்தில், “தன் வாழ்க்கையே, தன் செய்தி என வாழ்ந்து காட்டிய காந்திக்குத்தான் நான் பி டீம். ஆறு வயதிலிருந்தே நான் ஏ டீம் என்பதை ஏ1 ஊழல் புத்திரர்களுக்கு உறைக்கும்படி சொல்கிறேன். தன் வாழ்க்கையே, தன் செய்தி என வாழ்ந்து காட்டிய காந்திக்குத்தான் நான் பி டீம். ஆறு வயதிலிருந்தே நான் ஏ டீம் என்பதை ஏ1 ஊழல் புத்திரர்களுக்கு உறைக்கும்படி சொல்கிறேன். (2/2)— Kamal Haasan (@ikamalhaasan) December 7, 2020 அறத்தின் பக்கம் நிற்பவனைப் பார்த்து சங்கி, பி டீம் என்கிறவர்களின் நோக்கம் ஊழலைப் போற்றுவது. வாழ்நாள் முழுக்க தமிழகத்தைச் சுரண்டித் தின்பவர்கள், ஊழல் தொழிலுக்கு ஆபத்து வருகையில் ஒன்றிணைந்து கொள்வதில் ஆச்சர்யமில்லை. திஹாரையும் பரப்பன அக்ரஹாரத்தையும் நிரப்பினவர்கள் அல்லவா?” எனத் தெரிவித்துள்ளார். சூரப்பாவுக்கு ஆதரவாக பேசி வீடியோ வெளியிட்டுள்ளதன் எதிரொலியாக, அதிமுக, திமுக உள்ளிட்ட கட்சிகளுடன், பல்வேறு அமைப்புகளும் கமல்ஹாசனுக்கு எதிராக கருத்துகளைப் பதிவு செய்தது. இதற்கு எதிர்வினையாற்றும் விதமாகவே கமல்ஹாசன் கொந்தளிப்புடன் பதிலளித்துள்ளார்.
http://dlvr.it/RnC0bS

Read More

இந்திய விவசாயிகளுக்காக லண்டனில் ஆயிரக்கணக்கானோர் போராட்டம்: கொரோனா விதிமீறலால் நடவடிக்கை!

டெல்லியில் போராடும் விவசாயிகளுக்கு ஆதரவாக லண்டனில் ஆயிரக்கணக்கானோர் ஆர்ப்பாட்டத்தில் ஈடுபட்டு ஆதரவு தெரிவித்துள்ளனர். கொரோனா விதிமீறல் காரணமாக, அவர்களை போலீசார் அப்புறப்படுத்தினர். கைது நடவடிக்கையிலும் ஈடுபட்டனர். மத்திய அரசு கொண்டு வந்த 3 வேளாண் சட்டங்களை ‌‌‌‌‌‌‌‌‌‌‌‌‌‌‌‌‌ரத்து செய்ய வலியுறுத்தி தலைநகர் டெல்லியில் 12-வது நாளாக விவசாயிகளின் போராட்டம் தொடர்கிறது. பஞ்சாப், ஹரியானா, உத்தரப் பிரதேசம் உள்ளிட்ட மாநிலங்களை சேர்ந்த விவசாயிகள் கடுங்குளிரிலும் எல்லைகளிலேயே தங்கி போராட்டத்தில் ஈடுபட்டு வருகின்றனர். சிறுவர்கள் தொடங்கி வயதானவர்கள் வரை வயது வித்தியாசமின்றி பலரும் இந்தப் போராட்டத்தில் பங்கெடுத்துள்ளனர். போராட்டத்தை முடிவுக்கு கொண்டு வரும் நோக்கில் மத்திய அரசுக்கும் விவசாய அமைப்புகளுக்கும் இடையே இதுவரை நடைபெற்ற 5 சுற்று பேச்சுவார்த்தையும் தோல்வியிலேயே முடிந்தது. இவை தவிர, பல்வேறு மாநில விவசாய சங்கங்களும் நாளை நடைபெறவுள்ள முழு அடைப்பு போராட்டத்துக்கு ஆதரவளித்திருப்பதால் செவ்வாய்கிழமை போராட்டம் மிக தீவிரமாக இருக்கும் என கூறப்படுகிறது. ஒருபுறம் போராட்டம் தீவிரமடைந்து வரும் நிலையில், ஆறு மாதங்களுக்கு தேவையான உணவுப் பொருட்களை கொண்டு வரும் பணியில் பஞ்சாப் மாநில விவசாயிகள் இறங்கி இருக்கிறார்கள் இந்நிலையில், டெல்லி போராட்டத்துக்கு ஆதரவாக வெளிநாடு வாழ் இந்தியர்களும் போராட்டத்தில் குதித்துள்ளனர். லண்டனில் உள்ள இந்தியத் தூதரகம் முன்பு கூடிய ஆயிரக்கணக்கானவர்கள், இந்திய விவசாயிகளுக்கு ஆதரவாக குரல் கொடுத்தனர். அங்கு வந்த போலீசார் உடனடியாக கூட்டத்தைக் கலைத்தனர். ஏற்கெனவே லண்டனில் கொரோனா விதிமுறைகள் இருப்பதால், அனுமதி இல்லாமல் கூடியதாக பலர் கைது செய்யப்பட்டனர். தொடர்ந்து கொரோனா விதிமுறைகள் மீறப்பட்டால் கடுமையான நடவடிக்கைகள் எடுக்கப்படும் என அந்நாட்டு காவல்துறை எச்சரித்துள்ளது. இது குறித்து தெரிவித்துள்ள போலீஸ் அதிகாரி ஒருவர், "ஆல்ட்விச் பகுதியில் மக்கள் கூட்டத்திற்கு தடை விதிக்கப்பட்டுள்ளது. அங்கு கூடியவர்களும் உடனடியாக கலைந்து செல்ல வேண்டும்" என்றார். இது குறித்து தெரிவித்துள்ள தூதரக செய்தித்தொடர்பாளர் ஒருவர், "விவசாயிகள் பிரச்னை தொடர்பாக இந்திய அரசு பேச்சுவார்த்தையில் உள்ளது. இன்னும் தெளிவாக சொல்லவேண்டுமென்றால், இது முழுக்க முழுக்க இந்தியாவின் உள்நாட்டு பிரச்னை" என்றார். இதனிடையே, டெல்லியில் போராடி வரும் இந்திய விவசாயிகளுக்கு ஆதரவாக உலகம் முழுவதும் ஆதரவு பெருகி வருவது கவனிக்கத்தக்கது.
http://dlvr.it/Rn8qZP

Read More

அமைச்சர் ராஜேந்திர பாலாஜி உருவ பொம்மையை எரித்து திமுகவினர் போராட்டம்

விருதுநகர் அருகே அமைச்சர் ராஜேந்திரபாலாஜி உருவ பொம்மையை எரித்து திமுகவினர் சாலை மறியல் போராட்டத்தில் ஈடுபட்டு வருகின்றனர். சேலத்தில் செய்தியாளர்களை சந்தித்த முதலமைச்சர் எடப்பாடி பழனிசாமி, திமுக தேவையற்ற, ஆதாரமற்ற குற்றச்சாட்டுகளை தம் மீது தெரிவிப்பதாக கூறினார். மேலும், 2ஜி ஸ்பெக்ட்ரம் ஊழல் மிகப் பெரிய ஊழல். தமிழ்நாட்டின் பட்ஜெட் அளவுக்கு பெரியது. 1 லட்சத்து 76 ஆயிரம் கோடி அளவில் கொள்ளையடித்த கட்சி தி.மு.க” எனத் தெரிவித்தார். இதற்கு பதில் அளிக்கும் வகையில் செய்தியாளர்களைச் சந்தித்த திமுக எம்.பி ஆ.ராசா, “ஊழல் குற்றச்சாட்டில் திமுகவில் இதுவரை யாரும் தண்டிக்கப்படவில்லை. ஆனால் 2 ஜி உட்பட ஏதாவது ஒரு குற்றச்சாட்டில், குற்றம் நிரூபிக்கப்பட்டிருக்கும் என்றால் நாளையோ, நாளை மறுநாளோ கோட்டையில், எல்லா ஊடகங்கள் முன்னிலையில், 2ஜி, சர்க்காரியா கமிஷன் குறித்து விவாதிக்க நான் தயார். அவர் தயாரா? ” எனக் கேள்வி எழுப்பியிருந்தார். இதற்கு பதிலளித்து பேசிய அமைச்சர் ராஜேந்திர பாலாஜி “முதல்வரை ஏன் கூப்பிடுகிறாய்? எங்கு வரவேண்டும். நான் வருகிறேன். ராசாவுடன் ஆனாலும் சரி, ஸ்டாலினுடன் ஆனாலும் சரி. ஊழல் செய்தாயா இல்லையா? சர்க்காரியா கமிஷனால் குற்றம்சாட்டப்பட்ட கட்சி தானே திமுக.” எனத் தெரிவித்திருந்தார். இந்நிலையில், ராஜேந்திர பாலாஜியை கண்டித்து விருதுநகர் மாவட்டம் அருப்புக்கோட்டை, ஸ்ரீவில்லிபுத்தூர் உள்ளிட்ட பகுதிகளில் அவரின் உருவ பொம்மையை எரித்து திமுகவினர் போராட்டத்தில் ஈடுபட்டு வருகின்றனர். தகவலறிந்து வந்த போலீசார் தீயை அணைத்து அவர்களை அப்புறப்படுத்தும் முயற்சியில் ஈடுபட்டு வருகின்றனர். ஸ்ரீவில்லிபுத்தூரில் உருவ பொம்மையை எரிக்க முயன்ற திமுகவினரை தடுக்க முற்பட்டபோது போலீசாருக்கும் அவர்களுக்கும் இடையே தள்ளுமுள்ளு ஏற்பட்டது.
http://dlvr.it/Rn8qSF

Read More

போராடும் விவசாயிகளுக்கு குளிர்தாங்கும் ஆடைகள்வாங்க 1 கோடி- பாடகர் தில்ஜித் டோசன்ஜ் நன்கொடை

டெல்லி எல்லைகளில் போராட்டத்தில் ஈடுபட்டுவரும் விவசாயிகளுக்கு குளிர்தாங்கும் ஆடைகளை வாங்க பஞ்சாபி நடிகர், பாடகர் தில்ஜித் டோசன்ஜ் 1 கோடி ரூபாய் நன்கொடை அளித்துள்ளார், இது ‘பெரிய விஷயமில்லை’ என்றும் அவர் தெரிவித்துள்ளார். பஞ்சாபி நடிகர்-பாடகர் தில்ஜித் டோசன்ஜ் சனிக்கிழமை டெல்லி எல்லையில் நடந்த விவசாயிகளின் போராட்டத்தில் கலந்து கொண்டார், மேலும்  அவர் விவசாயிகளின் கோரிக்கைகளை நிறைவேற்றுமாறும் அரசாங்கத்தை வலியுறுத்தினார். அதனுடன் மட்டுமின்றி விவசாயிகளுக்கு குளிர்தாங்கும் ஆடைகளை வாங்க ரூபாய் 1 கோடி நன்கொடை அளித்துள்ளார் சிங்கு எல்லையில் உள்ள விவசாயிகளிடம் உரையாற்றிய அவர் “ விவசாயிகள் அனைவருக்கும் வணக்கம், நீங்கள் ஒரு புதிய வரலாற்றை உருவாக்கியுள்ளீர்கள். இந்த வரலாறு எதிர்கால சந்ததியினருக்கு விவரிக்கப்படும், விவசாயிகளின் பிரச்சினைகள் யாராலும் திசை திருப்பப்படக்கூடாது. ” என்று கூறினார். மேலும் "எங்களுக்கு மத்திய அரசிடம் ஒரே ஒரு கோரிக்கை மட்டுமே உள்ளது, தயவுசெய்து எங்கள் விவசாயிகளின் கோரிக்கைகளை நிறைவேற்றவும். எல்லோரும் இங்கு நிம்மதியாக அமர்ந்திருக்கிறார்கள், நாடு முழுவதிலுமுள்ள விவசாயிகள் இவர்களுடன் இருக்கிறார்கள். இந்த போராட்டம் விவசாயிகளைப் பற்றியது. ட்விட்டரில் விஷயங்கள் திரிக்கப்பட்டன, ஆனால் உண்மை என்னவென்றால், விவசாயிகள் அமைதியாக எதிர்ப்பு தெரிவிக்கின்றனர், இங்கு யாரும் இரத்தக்களரி பற்றி பேசவில்லை. ” எனவும் கூறியுள்ளார். பஞ்சாபி பாடகர் சிங்கா தனது இன்ஸ்டாகிராம் கணக்கில் வெளியிட்டுள்ள வீடியோவில், தில்ஜித் இந்த நோக்கத்திற்காக ரூ .1 கோடியை நன்கொடையாக வழங்கியதாக வெளிப்படுத்தியுள்ளார். இது பற்றி கூறிய சிங்கா “நன்றி தம்பி, விவசாயிகளுக்கு, அவர்களின் குளிர்தாங்கும் ஆடைகளுக்காக ரூ .1 கோடி கொடுத்தீர்கள், யாருக்கும் தெரியாது. நீங்கள் இதைப் பற்றி இடுகையிடவில்லை. இப்போதெல்லாம் ரூ .10 நன்கொடை அளித்தவர்களால் கூட வாயை மூடிக்கொள்ள முடியாது. ”  என கூறியுள்ளார்
http://dlvr.it/Rn7PNc

Read More

சென்னை: பல்வேறு பகுதிகளில் வெளுத்து வாங்கிய மழை

சென்னையின் பல்வேறு பகுதிகளில் அதிகாலை முதல் கனமழை பெய்து வருகிறது. வலுவிழந்த காற்றழுத்த தாழ்வு பகுதி காரணமாக தமிழகத்தில் மழை தொடரும் என வானிலை ஆய்வு மையம் தெரிவித்திருந்தது. அந்த வகையில் சென்னையில் பல இடங்களில் இரவு நேரங்களில் சாரல் மழை பெய்தது. அதைத்தொடர்ந்து, அதிகாலை முதல் அண்ணா நகர், கோயம்பேடு, வடபழனி, கே.கே.நகர், அசோக் நகர், கிண்டி உள்ளிட்ட பகுதிகளில் கனமழை பெய்தது. அதேபோல், புறநகர் பகுதிகளான ஆவடி, அம்பத்தூர் பகுதிகளிலும் கனமழை பெய்து வருகிறது. இதனால் தாழ்வான பகுதிகளில் மழை நீர் தேங்கியுள்ளது.
http://dlvr.it/Rn5kt1

Read More