கேரளா: காரின் பின்புறம் வளர்ப்பு நாயைக் கட்டி இழுத்த கொடூரம்! - வைரல் வீடியோவால் ஓனர் கைது

கேரள மாநிலம் கொச்சியை அடுத்த நெடும்பாசேரி பகுதியில் நாயின் கழுத்தில் கயிற்றை கட்டி அதன் மறுமுனையை காரின் பின்பகுதியில் கட்டி காரை ஓட்டிச் சென்றிருக்கிறார் ஒருவர். காரின் பின்னால் ஓடிச் சென்ற நாய், ஒரு கட்டத்தில் ஓட முடியாமல் ரோட்டில் விழுந்தது. அப்போதும் கார் வேகமாக சென்றுகொண்டிருந்தது. சாலையில் உரசியபடியே சென்றதால் நாய்க்கு காயம் ஏற்பட்டு ரத்தம் சொட்டியது. அப்போது பைக்கில் சென்ற அகில் என்ற இளைஞர், இந்த கொடூர செயலை காரின் பின்னால் சென்றபடி மொபைல் போனில் வீடியோ எடுத்தார். பின்னர், காரை மறித்து நிறுத்தியவர் கார் ஓட்டிச் சென்றவரிடம் எதற்காக இப்படி செய்கிறார் என கேட்டுள்ளார். அதற்கு கார் ஓட்டிச் சென்ற யூஸப் என்பவர் "நாய் செத்தால் உனக்கு என்னடா" எனக்கேட்டு தகராறு செய்துள்ளார். பின்னர் அந்த நாயை அவிழ்த்து விட்டுவிட்டு அவர் அங்கிருந்து சென்றுவிட்டார்.வைரலான வீடியோ அகில், அந்த நாயை மீட்டு முதலுதவி சிகிச்சை அளித்திருக்கிறார். அகில் எடுத்த வீடியோவை சமூக வலைதளத்தில் பகிர்ந்தார். அந்த வீடியோ வைரலானது. இதுகுறித்து அகில் கூறுகையில், ``அந்த நாய் அவரது வீட்டில் வளர்த்தது என தெரியவந்துள்ளது. வீட்டில் உள்ளவர்களுக்கு பிடிக்காததால், அதை எங்காவது விட்டுவிட வேண்டும் என்பதற்காக காரின் பின்புறம் கயிற்றால் கட்டி இந்த கொடுமை செய்திருக்கிறார். நான் மருத்துவமனைக்குச் சென்றுவிட்டு திரும்பி வந்தபோதுதான் இந்த கொடுமையைப் பார்த்தேன். தொலைவில் இருந்து பார்த்தபோது நாய் காரை துரத்திக்கொண்டு ஓடுவதுபோன்று தெரிந்தது. அருகில் சென்றபோதுதான் காரில் நாய் கட்டப்பட்டிருப்பது தெரியவந்தது. ஒருகட்டத்தில் நாய் ரோட்டில் விழுந்து, சாலையில் இழுத்துக்கொண்டே சென்றதால், நான் காரை நிறுத்தினேன். இப்போது நாய்க்கு முதலுதவி சிகிச்சை அளிக்கப்படுள்ளது. அந்த நால் எளிதில் மனிதர்களிடம் பழகுகிறது. நாயை கொடுமை செய்ய எப்படிதான் மனது வந்ததோ" என்றார்.மீட்கப்பட்ட நாய் இந்த சம்பவத்திற்கு பல முக்கிய பிரமுகர்கள் கண்டனம் தெரிவித்துள்ளனர். மேலும் செங்கமநாடு காவல் நிலையத்தில் இது சம்பந்தமாக வழக்கு பதிவு செய்து, காரை ஓட்டிச் சென்ற நெடும்பாசேரி சாலாக்க பகுதியைச் சேர்ந்த யூஸப் என்பவரை போலீஸார் கைது செய்தனர். குடும்பத்தின ர் நாயை விரும்பாததால் அதை எங்காவது விட்டுவிடுவதற்கு இப்படி செய்ததாக யூஸப் ஒப்புக்கொண்டிருக்கிறார். மோட்டார் வாகன சட்டப்படியும் யூஸப் மீது வழக்குப்பதிவு செய்யப்பட்டுள்ளது. அவரது கார் பறிமுதல் செய்யப்பட்டதுடன், லைசென்ஸ் ரத்துச் செய்யப்பட உள்ளதாகவும் கூறப்படுகிறது.
http://dlvr.it/RnXbsx

Read More

ஆஸி.,பவுலரின் தலையை தாக்கிய பந்து.. பேட்டை வீசிவிட்டு ஓடிச்சென்று உதவிய சிராஜ்!

இந்திய கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு கிரிக்கெட் விளையாடி வருகிறது. ஒருநாள் தொடரை ஆஸ்திரேலியாவும், டி20 தொடரை இந்தியாவும் கைப்பற்றிய நிலையில் வரும் 17 ஆம் தேதி முதல் டெஸ்ட் கிரிக்கெட் போட்டி ஆரம்பமாக உள்ளது. அதற்கு இந்திய அணி வீரர்கள் ஆயத்தமாகும் வகையில் பயிற்சி ஆட்டத்தில் ஆஸ்திரேலிய ஏ அணியுடன் விளையாடி வருகிறது. முதல் பயிற்சி ஆட்டம் சமனில் முடிந்த நிலையில் தற்போது இரண்டாவது பயிற்சி ஆட்டம் நடைபெற்று வருகிறது.  முதல் நாளான நேற்று இந்திய அணி 194 ரன்களும், ஆஸ்திரேலிய ஏ அணி 108 ரன்களும் எடுத்திருந்தன. இந்தியா பேட்டிங் செய்த போது கேமரூன் க்ரீன் வீசிய 45 ஓவரின் முதல் பந்தை ஸ்ட்ரைட் திசையில் ஓங்கி அடித்தார் ஸ்ட்ரைக்கில் இருந்த பும்ரா. அந்த பந்து நேரடியாக பவுலர் க்ரீனின் தலையை நோக்கி செல்ல அதை தடுக்க தவறியதால் பந்து தலையில் பட்டது. இதனை நான்-ஸ்ட்ரைக்கர் எண்டில் நின்று கொண்டிருந்த சிராஜ் கவனித்ததும் உடனடியாக பேட்டை கீழே போட்டுவிட்டு வேகவேகமாக ஓடி சென்று க்ரீனுக்கு உதவியதோடு, காயத்தின் நிலையையும் அறிந்தார்.  Siraj just ran to Green when he was hit , Siraj one awesome guy with awesome gesture : pic.twitter.com/Dw1yAofK9d — Sai (@akakrcb6) December 11, 2020 மாற்று அணி வீரர் என்றும் பாராமல் க்ரீன் அடிபட்டவுடன் சிராஜ் அவருக்கு உதவியது பலரது இதயத்தையும் வென்றுள்ளது. அவரது செயல் கிரிக்கெட் ஒரு ஜென்டில்மேன் கேம் என்பதையும் நிரூபித்துள்ளது.
http://dlvr.it/RnW04l

Read More

முதல்வர் பழனிசாமியை விமர்சித்த புகாரில் ஆ.ராசா மீது வழக்குப்பதிவு!

முதல்வர் பழனிசாமியை அவதூறாக விமர்சித்த புகாரில் திமுக எம்.பி ஆ.ராசா மீது போலீசார் வழக்குப்பதிவு செய்துள்ளனர். முதலமைச்சர் எடப்பாடி பழனிசாமியை திமுக எம்.பி ஆ.ராசா அவதூறாக பேசியதாக அதிமுக வழக்கறிஞர் பிரிவு இணைச்செயலாளர் திருமாறன், செல்வக்குமார் ஆகியோர் காவல்நிலையத்தில் புகார் அளித்தனர். அந்த புகாரின் பேரில் 153, (505)(1)பி பிரிவுகளின் கீழ் சென்னை மத்திய குற்றப்பிரிவு போலீசார் வழக்குப்பதிவு செய்து விசாரணை மேற்கொண்டு வருகின்றனர். ஆதாரமற்ற குற்றச்சாட்டுகளை பரப்பி ஆதாயம் தேடுதல், குற்றச்செயல்களில் ஈடுபட தூண்டுதல் பிரிவுகளில் வழக்குப்பதிவு செய்யப்பட்டுள்ளது
http://dlvr.it/RnW03p

Read More

"பள்ளிகள் திறப்பதற்கு இதுவே சரியான நேரம்" - உலக சுகாதார நிறுவனத்தின் தலைமை விஞ்ஞானி

பள்ளிகளை திறப்பதற்கு இதுவே சரியான நேரம் என உலக சுகாதார நிறுவனத்தின் தலைமை விஞ்ஞானி சவுமியா சுவாமிநாதன் தெரிவித்துள்ளார். தமிழகம் கொரோனாவில் இருந்து மீண்டும் வரும் நிலையில், 'துளிர்க்கும் நம்பிக்கை' என்ற தலைப்பில் புதிய தலைமுறை மற்றும் பேஸ்புக் நிறுவனம் இணைந்து சிறப்பு நிகழ்ச்சி நடத்தியது. நிர்வாக ஆசிரியர் கார்த்திகைச் செல்வன் நெறியாள்கையில் நடந்த இந்த நிகழ்ச்சியில் தமிழக முதலமைச்சர் எடப்பாடி பழனிசாமி, உலக சுகாதார நிறுவனத்தின் தலைமை விஞ்ஞானி சவுமியா சுவாமிநாதன், தெலங்கானா ஆளுநர் தமிழிசை சவுந்தர்ராஜன், தமிழக சுகாதாரத்துறை அமைச்சர் விஜயபாஸ்கர், தமிழக சுகாதாரத்துறை செயலாளர் ராதாகிருஷ்ணன் ஆகியோருடன் தியாகராயர் குழும தலைவர் கருமுத்துக்கண்ணன், ZOHO சி.இ.ஓ ஸ்ரீதர் வேம்பு, KISSFLOW சி.இ.ஓ சுரேஷ் சம்பந்தம், பிஜிபி குழுமத் தலைவர் பழனி ஜி.பெரியசாமி உள்ளிட்டோர் பங்கேற்றனர். இதில் பேசிய உலக சுகாதார நிறுவனத்தின் தலைமை விஞ்ஞானி செளமியா சுவாமிநாதன் “கொரோனா தொற்று குறைந்து வருவதால், பள்ளிகள் திறப்பதற்கு இதுவே சரியான நேரம். பள்ளிகளை படிப்படியாக திறக்கலாம். ஆன்லைன் வகுப்புகள் எங்கு முடியுமோ அங்கு அதை செய்யலாம். உலகம் முழுவதும் 2021ஆம் ஆண்டுக்குள் 20 சதவீதம் பேருக்கு கொரோனா தடுப்பூசி செலுத்த இலக்கு நிர்ணயிக்கப்பட்டுள்ளது” எனத் தெரிவித்துள்ளார். தொடர்ந்து பேசிய புதுச்சேரி முதலமைச்சர் நாராயணசாமி, “புதுச்சேரியில் ஜனவரியில் பள்ளிகள் திறக்க நடவடிக்கை எடுக்கப்பட்டுள்ளன. கல்லூரிகளை இந்த மாதமே திறக்கிறோம். இந்த கொரோனா தடுப்பூசியை மத்திய அரசு எல்லா மாநிலங்களுக்கு கொடுப்பதாக கூறியுள்ளது. அவ்வாறு கொடுக்கவில்லை என்றால், அதற்காக காலம் தாழ்த்தாமல் மாநில அரசே அதற்கான நிதியை உருவாக்கி கண்டிப்பாக மக்களுக்கு கொடுக்கும்” எனத் தெரிவித்துள்ளார். கொரோனா பாதிப்பு குறைந்துவந்தாலும், மக்கள் அஜாக்கிரதையாக இருக்காமல், நோய்த் தொற்று தொடர்பாக அரசு கூறும் வழிமுறைகளை கண்டிப்பாக கடைப்பிடிக்க வேண்டும் என தெலங்கானா ஆளுநர் தமிழிசை உள்ளிட்டோர் அறிவுறுத்தினர்.
http://dlvr.it/RnTxjv

Read More

உ.பி: கால்வாயில் குதித்த பெண்ணை காப்பாற்றிய கான்ஸ்டபிள்; குவியும் பாராட்டுகள்!

கணவனிடம் சண்டையிட்டு கால்வாயில் விழுந்து தற்கொலை செய்துகொள்ள முயன்ற பெண்ணை காப்பாற்றிய போலீஸ் கான்ஸ்டபிளுக்கு பாராட்டுகள் குவிந்துவருகிறது. தற்போது விவசாயிகள் போராட்டம் நடந்துவரும் சூழலில், உத்தரபிரதேச மாநிலம் நொய்டாவில் உள்ள கால்வாய் பகுதியில், மக்கள் மற்றும் வாகனங்கள் போக்குவரத்து குறித்து கண்காணிக்கும் பணியில் போலீஸார் ஈடுப்பட்டிருந்தனர். வெள்ளிக்கிழமை மதியம் 1.30 மணியளவில் ஒரு பெண் கால்வாயில் குதித்துள்ளார். அவர் மூழ்குவதைப் பார்த்த அருகிலிருந்த இளைஞர்கள் கண்காணிப்பு பணியில் ஈடுபட்டிருந்த போலீஸாருக்கு தகவல் கொடுத்தனர். 18-20 அடி ஆழமுள்ள கால்வாயில் வெள்ளப்பெருக்கு ஏற்பட்டுள்ள போதிலும், பெண் மூழ்குவதைப் பார்த்த கான்ஸ்டபிள் இர்ஃபான் அலி சற்றும் யோசிக்காமல், உடனே கால்வாயில் குதித்து சுமார் 100 மீட்டர் நீந்திச்சென்று அந்த பெண்ணை மீட்டுள்ளார். கரைக்கு வருவதற்குமுன் அந்த பெண் மயக்கமடைந்ததால், அருகிலிருந்த பெண்களை அழைத்து, மயக்கமடைந்த பெண்ணுக்கு முதலுதவியும் செய்துள்ளார். கான்ஸ்டபிள் அலியின் கடமையை பாராட்டிய கமிஷ்னர் அலோக் சிங், அவருக்கு ரூ.20000 வெகுமதி அளித்து பாராட்டியுள்ளார்.
http://dlvr.it/RnRqtY

Read More

பார்த்தீவ் படேலுக்கு மும்பை இந்தியன்ஸில் புதிய பொறுப்பு!

அண்மையில் சர்வதேச கிரிக்கெட் போட்டியிலிருந்து ஓய்வுப்பெற்ற விக்கெட் கீப்பர் பார்த்தீவ் படேலுக்கு மும்பை இந்தியன்ஸ் அணியில் பொறுப்பு வழங்கப்பட்டுள்ளது. 17 வயதில் சர்வதேச கிரிக்கெட்டுக்கு இங்கிலாந்துக்கு எதிரான டெஸ்ட் தொடரில் அறிமுகமானார் பார்த்தீவ் படேல். தோனியின் வருகைக்கு முன்பு வரை பார்த்தீவ் படேல் அவ்வப்போது இந்திய அணிக்காக தேர்வு செய்யப்பட்டு இருந்தார். தோனி வருகைக்கு பின்பு பார்த்தீவ் படேல் இந்திய அணிக்கு தேர்வாவது குறைந்தது. ஒருகட்டத்தில் இந்திய அணிக்காக தொடர்ந்து விளையாட முடியாமல் போனது. ஆனால், ஐபிஎல் தொடர்களில் தொடர்ந்து விளையாடி வந்தார் பார்த்தீவ் படேல். இந்நிலையில் அனைத்து வகையான சர்வதேசப் போட்டிகளிலிருந்து ஓய்வு பெறுவதாக பார்த்தீவ் படேல் அறிவித்தார். சிஎஸ்கே அணி 2010-ல் மற்றும் மும்பை அணி 2015, 2017 ஆகிய ஆண்டுகளில் ஐபிஎல் பட்டங்கள் வென்றபோது அந்த அணிகளில் பார்த்தீவ் படேல் இடம்பெற்றிருந்தார். 2017-ல் மும்பை அணியில் அதிக ரன்கள் (395) எடுத்தார். ஐபிஎல் போட்டியில் ஆறு அணிகளில் விளையாடியுள்ளார். இந்த வருட ஐபிஎல் போட்டியில் ஆர்சிபி அணியில் இடம்பெற்றிருந்தபோதும் ஓர் ஆட்டத்திலும் விளையாட வாய்ப்பு கிடைக்கவில்லை. இந்நிலையில், ஓய்வு பெற்றுள்ள பார்திவ் படேல், மும்பை இந்தியன்ஸ் அணியில் தற்போது இணைந்துள்ளார். திறமைகளைக் கண்டறியும் குழுவில் ஒருவராக பார்த்தீவ் படேல் நியமிக்கப்பட்டுள்ளார். முதல்தர கிரிக்கெட்டில் 11,240 ரன்கள் எடுத்துள்ள பார்த்தீவ் படேலுக்கு உள்ளூர் கிரிக்கெட்டில் ஏராளமான அனுபவம் உண்டு. இதனால் திறமையான உள்ளூர் கிரிக்கெட் வீரர்களைக் கண்டறிந்து தேர்வு செய்யும் பொறுப்பு அவருக்கு வழங்கப்பட்டுள்ளது.
http://dlvr.it/RnRqrW

Read More

'சீரமைப்போம் தமிழகத்தை' - டிச.13 தேதி பிரசாரத்தை தொடங்குகிறார் கமல்ஹாசன்

மக்கள் நீதிமைய கட்சி தலைவர் கமல்ஹாசன் டிசம்பர் 13 ஆம் தேதி தேர்தல் பிரசாரத்தை தொடங்குகிறார். 2021 ஆம் ஆண்டுக்கான சட்டமன்றத் தேர்தல் நடைபெற உள்ள நிலையில் அரசியல் கட்சிகள் அதற்கு தற்போதே தயாராகி வருகின்றனர். அதிமுக - திமுக இடையே இப்போதே வார்த்தை போர் மூண்டுகொண்டிருக்கிறது. ரஜினியும் வரும் ஜனவரி மாதம் கட்சித் தொடங்குதாக அறிவித்துள்ளார். இந்நிலையில் டிசம்பர் 13 ஆம் தேதி முதல் மக்கள் நீதி மைய கட்சி தலைவர் கமல்ஹாசன்  தேர்தல் பிரசாரத்தை தொடங்குகிறார். முதற் கட்டமாக 'சீரமைப்போம் தமிழகத்தை' என்ற பெயரில் மதுரை, தேனி, திண்டுக்கல், விருதுநகர், நெல்லை, தூத்துக்குடி, கன்னியாகுமரி ஆகிய மாவட்டங்களில் தேர்தல் பிரசாரம் மேற்கொள்கிறார்.
http://dlvr.it/RnQMm5

Read More