`ஆர்யாவுக்கு வாழ்த்துகள்; பல ப்ளஸூம், சில மைனஸூம் இருக்கு!’ - முன்னாள் இளம் மேயர் ரேகா பிரியதர்ஷிணி

ஒட்டு மொத்த இந்தியர்களின் கவனத்தையும் தன் வயப்படுத்தி இருக்கிறார் இளம் மேயர் ஆர்யா ராஜேந்திரன். 21 வயது கல்லூரி மாணவியான இவர், கேரளா மாநிலம் திருவனந்தபுரம் மாநகராட்சி தேர்தலில் மார்க்சிஸ்ட் கம்யூனிஸ்ட் கட்சியின் சார்பாக போட்டியிட்டு மேயராகி நாட்டின் இளம் பெண் மேயர் என்ற பெருமையும் பெற்றுள்ளார்.மேயர் ஆர்யா ராஜேந்திரன் கேரளாவுக்கு முன்னோடியாக தமிழகத்தில் 2006-ம் ஆண்டு சேலம் மாநகராட்சி தேர்தலில் தி.மு.க சார்பாக கல்லூரி முடித்து ரிசல்ட்-டிற்காக காத்திருந்த 24 வயது இளம் பெண் ரேகா பிரியதர்ஷிணி போட்டியிட்டு மேயரானார். அப்போது இந்தியாவின் இளம் பெண் மேயர் என்ற பெருமையும் பெற்றார். இதுகுறித்து தற்போது ரேகா பிரியதர்ஷிணியை சந்தித்த பேசிய போது... ''முதலாவதாக தோழர் ஆர்யா ராஜேந்திரன் அவர்களுக்கு என்னுடைய மனமார்ந்த வாழ்த்துகளை தெரிவித்து கொள்கிறேன். அவர் இளம் வயதில் மேயராகி இருப்பது எனக்கு சந்தோஷத்தையும், மகிழ்ச்சியையும் அளிக்கிறது. அவருக்கு பாராட்டுகள் குவிவதைப் போல எனக்கும் பாராட்டுகள் குவிந்து வருகிறது. சமத்துவம், சமூக நீதி, கல்வி, பெண் உரிமை என அனைத்திற்கும் இந்தியாவின் முன்னோடியாகவும், வழிகாட்டியாகவும் திகழ்வது திராவிட முன்னேற்ற கழகம். அதற்கு பல உதாரணங்களை சொல்ல முடியும். 2006-ல் தி.மு.க தலைவர் கலைஞர், தளபதியார், வீரபாண்டியார் எனக்கு வாய்ப்பு வழங்கியதால் நான் 24 வயதில் சேலம் மாநகராட்சி மேயர் ஆனேன். இந்தியாவின் இளம் பெண் மேயர் என்ற பெருமையை பெற்றேன். அப்போது சமூக வலைத்தளங்கள் இல்லாததால் அவ்வளவாக அறியப்படவில்லை. தற்போது ஆர்யா ராஜேந்திரனுக்கு சமூக வலைத்தளத்தில் பாராட்டுகள் குவிந்து வருகிறது. அவருக்கு முன்பாகவே இந்தியாவின் இளம் பெண் மேயராக நான் இருந்திருக்கிறேன். இதற்கு தி.மு.க., முன்னோடியாக இருந்திருக்கிறது. அதனால் எனக்கும், எங்கள் கட்சிக்கும் பாராட்டுகள் குவிந்து வருகிறது.முன்னாள் மேயர் ரேகா பிரியதர்ஷிணி இளம் வயதில் மேயராக பொறுப்பேற்பதில் பல ப்ளஸூம், சில மைனஸூம் இருக்கும். ப்ளஸாக பார்த்தால் ஓடோடி சென்று மக்களுக்கு உற்சாகமாக சேவை செய்ய முடியும். எந்த பணிகளையும், துரித்தமாகவும், துல்லியமாகவும் செய்ய முடியும். தவறுகளை உடனுக்குடன் தடுத்திட முடியும். மைனஸாக பார்த்தால் அனுபவம் வாய்ந்த மூத்த ஐ.ஏ.எஸ்., அதிகாரிகளிடம் திட்டங்கள் குறித்து விவாதிக்கும் போது அவர்களுக்கு ஈகோ வருகிறது. அதை சாதுர்யமாக கையாண்டு பொதுமக்களுக்கு நன்மைகள் செய்யும் போது இளம் தலைமுறைக்கு நாம் ரோல் மாடலாக உயர முடியும்'' என்றார்.
http://dlvr.it/RpWfzz

Read More

கறார் காட்டிய கே.பி.முனுசாமி; 'அமைதி' தலைமைகள்... ஆட்டம் காண்கிறதா அதிமுக - பாஜக கூட்டணி?

இந்தியத் தேர்தல் களமும், கூட்டணியும் எப்போதும் பல விசித்திரங்களை கொண்டவை. எந்தக் கட்சி யாருடன் கூட்டணி வைக்கும் என்று எப்போதும் எளிதில் கணிக்க முடியாது. மாறி மாறி வசைபாடிக்கொண்டிருந்த தலைவர்கள், கூட்டணியின்போது கைகோத்து போட்டோவுக்கு போஸ் கொடுப்பது வாடிக்கைதான். 1991-ஆம் ஆண்டு முதல்முறையாக தமிழகத்தின் முதல்வராக பதவியேற்ற ஜெயலலிதா, 1998-ஆம் ஆண்டு தேர்தலில் தோல்வியை சந்தித்தார். இதனையடுத்து 1998 நாடாளுமன்றத் தேர்தலில் புதிய வியூகத்தை கையில் எடுத்தார். அதாவது, அந்தத் தேர்தலில் பாஜக, பாமக, மதிமுகவுடன் ஒரு புதிய கூட்டணியை அறிவித்தார் ஜெயலலிதா. இது அப்போது பெரும் பேசுபொருளானது. மேலும் பாஜகவுக்கு தமிழகத்தில் பலமாகவும் அமைந்தது. ஜெயலலிதாவின் அந்த முடிவுதான் 1998 தேர்தலில் 20-க்கும் அதிகமான சிறிய கட்சிகளை இணைத்து வாஜ்பாய் ஆட்சி அமைக்க துணைபுரிந்தது. ஆனால், அது நிலைக்கவில்லை. 13 மாதங்களில் வாஜ்பாய் தலைமையிலான ஆட்சியைக் கவிழ்த்தார் ஜெயலலிதா. தொடர்ந்து பாஜக - திமுக கூட்டணி ஏற்பட்டு, நிலையான ஆட்சியை கொடுத்தது பாஜக. கொள்கை அளவில் பாஜகவும் திமுகவும் நேரெதிர். ஆனால், அதிமுகவும் பாஜகவும் அப்படி அல்ல. ஜெயலலிதாவின் சித்தாந்தங்கள் பெரும்பாலும் பாஜகவோடு ஒத்துபோகும் என்பது அரசியல் நோக்கர்களின் பார்வை. ஆனாலும், அப்போது மத்திய பாஜக அரசில் அங்கம் வகித்தது திமுகதான். தொடர்ந்து 2004 நாடாளுமன்றத் தேர்தலில் பாஜக கூட்டணியில் இருந்து விலகி திமுக, காங்கிரஸூடன் இணைந்தது. இதனையடுத்து அதிமுகவுடன் கூட்டணி வைத்தது பாஜக. ஆனால், அதிமுக - பாஜக கூட்டணி படுதோல்வியை சந்தித்தது. தொடர்ந்து மதமாற்ற தடை சட்டத்தை திரும்ப பெறுதல், காஞ்சி மடாதிபதி ஜெயேந்திரர் கைது போன்ற ஜெயலலிதாவின் நடவடிக்கைகளின் எதிரொலியால் பாஜக - அதிமுக இடையே விரிசல் விழுந்தது. 2014 தேர்தலிலும் அதிமுகவுடன் பாஜக கூட்டணி வைக்கும் என எதிர்பார்க்கப்பட்டது. பிரதமர் வேட்பாளராக மோடி அறிவிக்கப்பட்டதும் ஜெயலலிதாவின் போயஸ் தோட்ட இல்லத்துக்கு வந்து சந்தித்துவிட்டுச் சென்றார். ஆனாலும், 39 தொகுதிகளிலும் தனித்து வேட்பாளர்களை களமிறக்கினார் ஜெயலலிதா. தேர்தல் பிரசாரத்தில்கூட "மோடியா இந்த லேடியா" என கேட்டார் ஜெயலலிதா. அதில் 37 தொகுதிகளில் அதிமுக வெற்றிப் பெற்றது. அதிமுகவின் முகமாக இருந்தவர், மறைந்த முன்னாள் முதல்வர் ஜெயலலிதா. அவர் இப்போது இல்லை. அதேபோல், திமுகவில் மறைந்த முன்னாள் முதல்வர் கருணாநிதி இப்போது இல்லை. இந்தச் சூழ்நிலையை பயன்படுத்தி எப்படியாவது தமிழகத்தில் அழுத்தமாக கால்பதிக்க வேண்டும் என்ற நிலையில் பாஜக இருக்கிறது என்பது அரசியல் பார்வையாளர்களின் கருத்து. மோடி தலைமையிலான மத்திய அரசு கொண்டுவரும் ஒவ்வொரு திட்டங்களுக்கும் எடப்பாடி பழனிசாமி தலைமையிலான அரசு ஆதரவு தெரிவித்தே வருகிறது. வேளாண் சட்டங்களுக்கான ஆதரவு வரை இது தொடர்கிறது. இதற்கு காரணம், அப்போதுதான் நலத்திட்டங்களை பெற முடியும் என்பதாகவே இருக்கிறது அதிமுக தலைமைகளின் பேச்சு. கடந்த 2019 நாடாளுமன்றத் தேர்தலில் அதிமுக, பாஜக உள்ளிட்ட கட்சிகள் இணைந்து தேசிய ஜனநாயக கூட்டணி சார்பிலும், மத சார்பற்ற கட்சிகள் என்ற பெயரில் திமுக, காங்கிரஸ் உள்ளிட்ட கட்சிகளை உள்ளடக்கிய கூட்டணியும் களம் கண்டன. அதில் அதிமுக கூட்டணி பலத்த அடி வாங்கியது. ஒபிஎஸ் மகனான ரவீந்திரநாத் மட்டுமே அதிமுக கூட்டணியின் ஒற்றை எம்.பி.யாக தேர்ந்தெடுக்கப்பட்டார். ஆனால், திமுக கூட்டணி மற்ற அனைத்து தொகுதிகளிலும் அமோக வெற்றி பெற்றது. தற்போது தமிழகத்தில் சட்டமன்றத் தேர்தல் நெருங்கி வருகிறது. இதிலும், தேசிய ஜனநாயக கூட்டணி என்றே இருக்க வேண்டும் என பாஜக நினைக்கிறது. அதனால், தமிழக பாஜக தலைவர்கள் கூட்டணி குறித்து சரமாரியாக பேசிவருகின்றனர். ஆனால், அதற்கு முன்னதாகவே சுதாரித்துக்கொண்ட அதிமுக தலைமை, அமித் ஷா வருகையின்போதே கூட்டணி குறித்து அறிவித்துவிட்டது. அமித் ஷா நெருக்கம் காட்டினாலும், அமைதியையே பதிலாக தந்து வந்தார். சென்னைப் பயணத்தை முடித்துக்கொண்டு அமித் ஷா டெல்லி சென்றபின்தான் தமிழக பாஜக தலைவர்களின் குரல் அழுத்தமாக எழும்ப தொடங்கியது. எல்.முருகன், பொன்.ராதாகிருஷ்ணன், அண்ணாமலை, வானதி ஸ்ரீனிவாசன் உள்ளிட்டோர் பாஜகவை முன்னிலைப்படுத்துவதோடு, அதிகப்படியான சீட்டுக்களும், எம்.எல்.ஏ, அமைச்சர் போன்ற பதவிகளையும் முன்வைத்தே பேசி வருகின்றனர். அதிமுகவின் முதல்வர் வேட்பாளர் எடப்பாடி பழனிசாமிதான் என்று அந்தக் கட்சி அறிவித்துள்ள நிலையில், தேசிய ஜனநாயக கூட்டணியின் முதல்வரை பாஜக தலைமை அறிவிக்கும் எனக் கூறி, அவ்வப்போது கூட்டணியில் சலசலப்பை ஏற்படுத்தி வருகிறது தமிழக பாஜக. ஆனாலும், தற்போது அதிமுடன் கூட்டணியில் இருப்பதாக அவர்கள் சொல்லத் தவறுவதில்லை. சில நாட்களுக்கு முன்பு பேசிய தமிழக பாஜகவின் துணைத் தலைவர் அண்ணாமலை, "ஹெச்.ராஜாவை அமைச்சராக்குவோம்" என்றார். அண்மையில் அரியலூரியில் செய்தியாளர்களிடம் பேசிய தமிழக பாஜக தலைவர் எல்.முருகன், "யார் முதல்வர் வேட்பாளர் என்பதை பாஜக தலைமைதான் முடிவு செய்யும். முதல்வர் வேட்பாளர் அதிமுக தலைவராக இருப்பினும், அது குறித்தான அறிவிப்பை பாஜக தலைமையே அறிவிக்கும்" எனத் தெரிவித்தார். இவை அனைத்தையும் பார்க்கும்போது அதிமுக - பாஜக இடையே மோதல் போக்கு நாளுக்கு நாள் அதிகரித்து வருவதே கண்கூடாகத் தெரிகிறது. இந்த நிலையில்தான் நேற்று அதிமுகவின் தேர்தல் பரப்புரை தொடக்க பொதுக்கூட்டம் நடைபெற்றது. இதில் கூட்டணி கருத்து மோதல் குறித்தோ, தேசிய கட்சிகள் குறித்தோ அதிமுகவின் ஒருங்கிணைப்பாளர் பன்னீர்செல்வம் மற்றும் இணை ஒருங்கிணைப்பாளரும் முதல்வருமான எடப்பாடி பழனிசாமி ஆகியோர் பேசவில்லை என்பது சற்று வியப்பை ஏற்படுத்தியது. ஆனாலும், எல்லோருக்கும் வியப்பை ஏற்படுத்தும் அளவிற்கு அதிமுகவின் துணை ஒருங்கிணைப்பாளர் முனுசாமி தேசிய கட்சிகளை கடுமையாக சாடினார். அவரின் அனல்பறக்கும் பேச்சுக்களால் அதிமுக தனது பலத்தை நிரூபிக்க முயன்று வருவதாகவே பார்க்கப்படுகிறது. நேற்று மேடையில் பேசிய கே.பிமுனுசாமி, "அதிமுக கூட்டணியின் முதல்வர் வேட்பாளர் எடப்பாடி பழனிசாமிதான். தமிழகத்தில் கூட்டணி ஆட்சி என்ற பேச்சுக்கே இடமில்லை. அதிமுக தலைமையில்தான் கூட்டணி. எந்த தேசிய கட்சி இப்படி பேசி கூட்டணிக்கு வந்தாலும், அவர்கள் அதிமுகவுக்கு தேவையில்லை. ஜெயலலிதா, கருணாநிதி என்ற ஆளுமைகள் இல்லாத தமிழகத்தில் இடையில் புகுந்து பலன் பெறலாம் என சிலர் நினைக்கின்றனர். எந்த தேசிய கட்சிகளும் உள்ளே வரவிட முடியாமல் தமிழகத்தை காத்தது திராவிட இயக்கம். தற்போது சில சூழ்ச்சி செய்து உள்ளே வர பார்க்கின்றனர். இதை அனைவரும் புரிந்துகொள்ள வேண்டும்" என காட்டமாக பேசினார். தேசிய ஜனநாயக கூட்டணியின் முதல்வர் வேட்பாளரை பாஜக தலைமை அறிவிக்கும் என பாஜக நிர்வாகிகள் திட்டவட்டமாக தெரிவித்து வரும் நிலையில், 'கூட்டணி ஆட்சி என்ற பேச்சுக்கே இடமில்லை' என கே.பி.முனுசாமி பேசியிருப்பது கவனம் பெற்றுள்ளது. இதுகுறித்து கருத்து தெரிவித்த முன்னாள் மத்திய அமைச்சரும், தமிழக பாஜகவின் மூத்த தலைவருமான பொன்.ராதாகிருஷ்ணன், "அதிமுகவுக்கு ஆபத்து இருப்பது போலவும், அச்சம் இருப்பது போலவும் தோன்றுகிறது. அதிமுக பொதுக்கூட்டத்தில் அமைச்சர்கள், நிர்வாகிகள் பேசியதை பார்க்கும்போது அச்சத்தின் வெளிப்பாடாகவே தெரிகிறது. அதிமுக யாருக்கும் பயப்பட தேவையில்லை. தமிழகத்தில் பாஜக - அதிமுக கூட்டணி நீடித்துக் கொண்டிருக்கிறது. ஒவ்வொரு கட்சியையும் வலுப்படுத்தும் நோக்கில் ஒவ்வொரு கட்சியினரும் செயல்பட்டு வருகிறார்கள். அவர்கள் கட்சித் தொண்டர்களை ஊக்கப்படுத்துவதற்காக சில விஷயங்களைப் பேசுகிறார்கள். இதைக் குற்றம் என்று சொல்ல முடியாது. அதிமுக அமைச்சர்களும் அதுபோல் பேசியிருக்கலாம். அதிமுகவினர் முதல்வர் வேட்பாளரை அறிவிப்பதற்கு அவர்களுக்கு முழு உரிமை உண்டு. அதை ஏற்றுக்கொள்வது குறித்து எங்களது கட்சியின் அகில இந்திய தலைமை முடிவு செய்யும்" என்றார். அதிமுகவின் இருபெரும் தலைமைகளே 'அமைதி' காக்கும் நேரத்தில், அதிமுகவின் துணை ஒருங்கிணைப்பாளர் கே.பி முனுசாமி கறாராகப் பேசியிருப்பது, பாஜகவுடன் கூட்டணி இல்லாமலும் தமிழக சட்டப்பேரவைத் தேர்தல் களம் காணும் முடிவா? அல்லது நாடாளுமன்றத் தேர்தலில் கூட்டணி அமைத்து தோல்வியடைந்ததை கருத்தில்கொண்டு, இந்த சட்டப்பேரவைத் தேர்தலுக்கு பாஜக ஒத்துவராது என எப்படியாவது அந்தக் கூட்டணியிலிருந்து பிரிந்துவரும் திட்டமா? அல்லது முதல்வர் வேட்பாளர் விவகாரத்தில் பாஜக ஏற்படுத்தி வரும் சலசலப்புகளால் அதிமுக ஆத்திரமடைந்துவிட்டதா? - இப்படி பல கேள்விகள் எழாமல் இல்லை. இந்த பரபரப்பான கட்டத்தில் தமிழக பாஜக தலைவர் எல்.முருகன் முதலமைச்சர் எடப்பாடி பழனிசாமியுடன் சந்திப்பு நிகழ்த்தியுள்ளார். இதனால் எழும் கேள்விகள் அனைத்திற்கும் விரைவில் பதில் கிடைக்கும் என்று எதிர்பார்க்கப்படுகிறது.
http://dlvr.it/RpTlHS

Read More

`மாணவர்கள் அரசியலமைப்பு பற்றித் தெரிந்துகொள்ள வேண்டும்!’ - நாட்டின் இளம் பெண் மேயர் ஆர்யா

கேரள மாநிலத்தில் உள்ளாட்சித் தேர்தல்கள் முடிந்து, கடந்த 16-ம் தேதி முடிவுகள் வெளியாகின. இதில் சி.பி.எம் கூட்டணி கேரளத்தில் அதிக இடங்களைக் கைப்பற்றியது. வெற்றிபெற்ற உறுப்பினர்கள் பதவியேற்ற நிலையில் மாநகராட்சி மேயர், நகராட்சி மற்றும் ஊராட்சித் தலைவர்கள் தேர்வு இன்று நடந்தது. இதில் இந்தியாவின் மிகவும் இளம் வயதுடைய மேயராக, கேரளத் தலைநகரான திருவனந்தபுரம் மாநகராட்சி மேயர் ஆர்யா ராஜேந்திரன் பதவி ஏற்றுக்கொண்டார். ஆல் செயின்ட் கல்லூரியில் பி.எஸ்சி இரண்டாம் ஆண்டு படிக்கும் ஆர்யா ராஜேந்திரன் மேயராகப் பொறுப்பேற்றுக்கொண்டதை தொடர்ந்து சி.பி.எம் கட்சியினர் வாழ்த்து தெரிவித்தனர். நூறு கவுன்சிலர்களைக்கொண்ட திருவனந்தபுரம் மாநகரத்தில் மேயர் தேர்தலில் 99 பேர் வாக்களித்தனர். காங்கிரஸ் கவுன்சிலர் ஒருவர் வாக்களிக்கச் செல்லவில்லை. அவர் கொரோனா குவாரன்டைனில் இருப்பதாகக் கூறப்படுகிறது.மேயர் இருக்கையில் ஆர்யா ராஜேந்திரன் சி.பி.எம் மேயர் வேட்பாளரான ஆர்யா ராஜேந்திரன் 54 வாக்குகளைப் பெற்று, தனிப் பெரும்பான்மையுடன் மேயரானார். பா.ஜ.க சார்பில் போட்டியிட்ட மேயர் வேட்பாளர் 39 வாக்குகள் பெற்றார். காங்கிரஸ் வேட்பாளர் 9 வாக்குகளைப் பெற்றார். ஆர்யா ராஜேந்திரனின் வீடு திருவனந்தபுரம் முடவன்முகல் பகுதியில் இருக்கிறது. அவருடைய தந்தை, வீடுகளுக்கு எலெக்ட்ரீஷியன் பணி செய்து வரும் தொழிலாளி. அவரது அம்மா ஸ்ரீலதா எல்.ஐ.சி ஏஜென்ட்டாக இருக்கிறார். அண்ணன் அரவிந்த் இன்ஜினீயரிங் முடித்துவிட்டு வெளிநாட்டில் வேலை செய்துவருகிறார். இத்தனைக்கும் வாடகை வீட்டில்தான் வசித்துவருகிறது ஆர்யா ராஜேந்திரனின் குடும்பம். Also Read: `நாட்டின் இளம் வயது மேயர்!’ - திருவனந்தபுரம் மாநகராட்சியில் பதவியேற்கும் 21 வயது கல்லூரி மாணவி மேயராகப் பொறுப்பேற்ற ஆர்யா ராஜேந்திரன் கூறுகையில், ``எனக்கு நினைவு தெரிந்த நாள் முதல் அப்பா கட்சி உறுப்பினராக இருக்கிறார். அம்மாவும் கட்சி உறுப்பினர்தான். `லெஃப்ட் இஸ் ரைட்’, அதாவது `இடது முன்னணிதான் சரி’ என்ற எண்ணத்தை எனக்கு அவர்கள் சிறு வயதில் ஏற்படுத்தினர். ஐந்தாம் வகுப்பு படிக்கும்போதே சி.பி.எம் கட்சியின் சிறுவர்கள் அமைப்பான பாலசங்கத்தில் இணைந்தேன். இரண்டு ஆண்டுகளுக்கு முன்னர் பாலசங்கத்தின் மாநிலத் தலைவர் பொறுப்பு வழங்கினார்கள். இப்போது கட்சி வழங்கிய மிகப்பெரிய இந்தப் பொறுப்பில் சிறப்பாகச் செயல்படுவேன்.பெற்றோருடன் ஆர்யா ராஜேந்திரன் ஒரு வருடம் கொரோனாவால் கடந்துபோனது. 2021-ல் எல்லோரும் ஒன்றாக நின்று முன்னேறிச் செல்ல வேண்டும். இளைஞர்களும் மாணவர்களும் அரசியல் அமைப்பு, ஜனநாயகம் குறித்து அறிந்துகொள்ள வேண்டும். அனைத்து மக்களும் அரசியல் அமைப்பின் சாராம்சத்தையாவது தெரிந்திருக்க வேண்டும். மேயராகப் பொறுப்பேற்ற எனக்கு அனைத்து அமைச்சர்களும், முதல்வரும், கட்சி முக்கியஸ்தர்களும், மோகன்லால் உள்ளிட்ட திரைத்துறைப் பிரபலங்களும் வாழ்த்தியது மிகவும் பெருமையாக இருக்கிறது" என்றார்.
http://dlvr.it/RpTlBb

Read More

மருத்துவமனையிலிருந்து டிஸ்சார்ஜ் ஆனார் ரஜினிகாந்த்

ஹைதராபாத் அப்போலோ மருத்துவமனையிலிருந்து நடிகர் ரஜினிகாந்த் டிஸ்சார்ஜ் செய்யப்பட்டார். ரத்த அழுத்தத்தில் ஏற்பட்ட மாறுபாடு காரணமாக ரஜினிகாந்த் டிச. 25ம் தேதி ஹைதராபாத் அப்போலோ மருத்துவமனையில் அனுமதிக்கப்பட்டிருந்தார். இதுகுறித்து மருத்துவமனை நிர்வாகம் வெளியிட்டிருந்த அறிக்கையில், “ரஜினிகாந்துக்கு கொரோனா பாதிப்பு குறித்த எந்த அறிகுறியும் இல்லை. ரத்த அழுத்தம் சீராகும்வரை ரஜினிகாந்த் மருத்துவர்கள் கண்காணிப்பில் இருப்பார்” எனத் தெரிவித்திருந்தது. அதற்கு பின்பு எடுத்த பரிசோதனைகளில் அவருக்கு கவலைப்படும்படியான பிரச்னைகள் எதுவும் இல்லையென்று மருத்துவமனை கூறியிருந்தது. இந்நிலையில் அவருடைய உடல்நிலையில் நல்ல முன்னேற்றம் ஏற்பட்டதைத் தொடர்ந்து இன்று ரஜினிகாந்த் டிஸ்சார்ஜ் செய்யப்படவுள்ளதாக மருத்துவமனை நிர்வாகம் தெரிவித்திருந்தது. தற்போது ஹைதராபாத் அப்போலோ மருத்துவமனையிலிருந்து நடிகர் ரஜினிகாந்த் டிஸ்சார்ஜ் செய்யப்பட்டார். காரில் இருந்துக்கொண்டு கையசைத்தபடி அவர் சென்றார். ரஜினிகாந்தின் உடல்நிலையைக் கருத்தில்கொண்டு ஒருவாரம் ஓய்வெடுக்கவேண்டும் எனவும், ரத்த அழுத்தத்தை கண்காணிக்கவும், மன அழுத்தமின்றி இலகுவான பணிகளை மட்டுமே மேற்கொள்ளவேண்டும் எனவும் மருத்துவமனை நிர்வாகம் அறிவுறுத்தியிருக்கிறது.
http://dlvr.it/RpSQQX

Read More

''சூழ்ச்சி செய்யும் தேசியக் கட்சிகள்'' - அதிமுக கூட்டத்தில் அதிரடிகாட்டிய முனுசாமி!

அதிமுக பொதுக்கூட்டத்தில் அக்கட்சியின் துணை ஒருங்கிணைப்பாளர் கே.பி.முனுசாமி அதிமுக கூட்டணி குறித்தும், தேசியக் கட்சிகள் குறித்தும் அதிரடியாக பேசினார். சென்னை ராயப்பேட்டை ஒய்.எம்.சி.ஏ மைதானத்தில் அதிமுக தேர்தல் பரப்புரை பணிகளை தொடங்கி வைக்கும் பொதுக்கூட்டம் நடைபெற்று வருகிறது. இதில் அதிமுக ஒருங்கிணைப்பாளர் பன்னீர்செல்வம் மற்றும் இணை ஒருங்கிணைப்பாளர் எடப்பாடி பழனிசாமி, அமைச்சர்கள், அதிமுக மாவட்டச் செயலாளர்கள் அதிமுக நிர்வாகிகள் என பலரும் கலந்துகொண்டுள்ளனர். இந்த கூட்டத்தில் பேசிய அதிமுக துணை ஒருங்கிணைப்பாளர் கே.பி.முனுசாமி அதிமுக கூட்டணி குறித்தும், தேசியக் கட்சிகள் குறித்தும் அதிரடியாக பேசினார். அதில், “அதிமுக கூட்டணியின் முதல்வர் வேட்பாளர் எடப்பாடி பழனிசாமிதான். தமிழகத்தில் கூட்டணி ஆட்சி என்ற பேச்சுக்கே இடமில்லை. அதிமுக தலைமையில்தான் கூட்டணி. எந்த தேசிய கட்சி இப்படி பேசி கூட்டணிக்கு வந்தாலும் அவர்கள் அதிமுகவுக்கு தேவையில்லை. ஜெயலலிதா, கருணாநிதி என்ற ஆளுமைகள் இல்லாத தமிழகத்தில் இடையில் புகுந்து பலன் பெறலாம் என சிலர் நினைக்கின்றனர். எந்த தேசிய கட்சிகளும் உள்ளே வரவிட முடியாமல் தமிழகத்தை காத்தது திராவிட இயக்கம். தற்போது சில சூழ்ச்சி செய்து உள்ளே வர பார்க்கின்றனர். இதை அனைவரும் புரிந்து கொள்ள வேண்டும்”எனத் தெரிவித்தார். தேசியக் கட்சி உடனான பாஜகவுடன் அதிமுக கூட்டணியில் உள்ள நிலையில் முனுசாமியின் இந்த பேச்சு தமிழக அரசியலில் கவனம் பெற்றுள்ளது. முன்னதாக, அதிமுகவின் முதல்வர் வேட்பாளர் எடப்பாடி பழனிசாமி என ஏற்கெனவே அறிவிக்கப்பட்டுள்ள நிலையில் சமீப நாட்களாக முதல்வர் வேட்பாளர் தொடர்பாக அதிமுக – பாஜக இடையே காரசாரமான கருத்து மோதல்கள் எழுந்தன. அண்மையில் அரியலூரியில் செய்தியாளர்களிடம் பேசிய தமிழக பாஜக தலைவர் எல்.முருகன், “யார் முதல்வர் வேட்பாளர் என்பதை பாஜக தலைமை தான் முடிவு செய்யும். முதல்வர் வேட்பாளர் அதிமுக தலைவராக இருப்பினும், அது குறித்தான அறிவிப்பை பாஜக தலைமையே அறிவிக்கும்”எனத் தெரிவித்தார். அவர் கூறிய கருத்து சர்ச்சையை ஏற்படுத்திய நிலையில், இதற்கு பதிலளித்த அதிமுக செய்தித் தொடர்பாளர் புகழேந்தி, “ கூட்டணிக்கு முருகன் குழப்பத்தை ஏற்படுத்துவரானால் பாஜக தலைமை முருகனை நீக்க வேண்டியிருக்கும்” என்று காட்டமாக பதில் அளித்தார். மேலும் அமைச்சர் கடம்பூர் ராஜூ இதுகுறித்து கூறுகையில், ''அதிமுக முதல்வர் வேட்பாளர் எடப்பாடி பழனிசாமிதான். அடுத்தவர்கள் சொல்வதை பற்றி நாங்கள் கவலைப்படப்போவதில்லை'' என தெரிவித்துள்ளார். இந்த காரசார கருத்து மோதல்களுக்கு இடையே கூட்டணி குறித்து பேசிய பாஜக தமிழக தலைவர் முருகன், ''பாஜவுக்கு தனிக்கொள்கை இருந்தாலும் அதிமுகவுடன் கூட்டணியில் தான் இருக்கிறது. திமுக-காங்கிரஸுக்கு தனித்தனி கொள்கை இருப்பது போல அதிமுக-பாஜகவுக்கும் தனித்தனி கொள்கை உண்டு'' என்று தெரிவித்தார்.
http://dlvr.it/RpQt6D

Read More

கேரளா: பணத்துக்காக மூதாட்டியுடன் திருமணம்; நண்பர்கள் கேலி! - மனைவியைக் கொலைசெய்த இளைஞர்

தமிழக -கேரள எல்லை பகுதியான களியக்காவிளை அருகே காரக்கோணம் பகுதியைச் சேர்ந்தவர் சகா குமாரி (51). இவர் காரக்கோணம் பகுதியில் அழகு நிலையம் நடத்தி வருகிறார். இவருக்கு சுமார் பத்து ஏக்கர் விவசாய நிலம் உள்ளது. நல்ல வசதி இருந்தும் திருமணம் செய்யாமலே வாழ்ந்துவந்தார். இந்த நிலையில், தனது வயது முதிர்ந்த தாயை திருவனந்தபுரம் மருத்துவமனையில் சிகிச்சைக்காக அடிக்கடி அழைத்துச் செல்வது வழக்கம். அந்த மருத்துவமனையில் நெய்யாற்றாங்கரை அருகே உள்ள பத்தாங்கல் பகுதியைச் சேர்ந்த அருண் (26) என்பவர் வரவேற்பாளராகப் பணியாற்றி வந்தார். அடிக்கடி மருத்துவமனைக்குச் சென்றுவந்த சகா குமாரிக்கு, அருண் உதவி செய்து வந்துள்ளார். இதனால் அவர்களுக்குள் நட்பு ஏற்பட்டது. சகா குமாரிக்கு பத்து ஏக்கர் நிலம் மற்றும் அழகு நிலையம் மூலம் அதிகப்படியான வருவாய் வருவது அருணுக்கு தெரியவந்துள்ளது. இதனால் சகாவுடனான நட்பை மெல்லக் காதலாக மாற்றியுள்ளார் அருண்.திருமணத்தின் போது எடுக்கப்பட்ட புகைப்படம் வயது முதிர்ந்த பெண் எனத் தெரிந்தும் சகாவைத் தீவிரமாக காதலித்ததுடன் இரண்டு மாதங்களுக்கு திருமணமும் செய்துகொண்டார். இவர்களது திருமணம் அப்பகுதியில் உள்ள தேவாலயம் ஒன்றில் வைத்து நடந்தது. வயது முதிர்ந்த பெண்ணைத் திருமணம் செய்வதற்கு அருணின் பெற்றோர் எதிர்ப்புத் தெரிவித்தனர். மேலும் அவர்கள் திருமணத்துக்குச் செல்லவும் இல்லை. இதையடுத்து, திருமணம் செய்த கையோடு காரக்கோணத்தில் உள்ள சகா குமாரியின் வீட்டில் வீட்டோடு மாப்பிள்ளையாக ஒட்டிக்கொண்டார் அருண். சகாவின் வீட்டில் அவரது தாயார் உடல்நலக்குறைவால் படுக்கையில் உள்ளார். அவருக்கு உதவுவதற்காக ஹோம் நர்ஸ் ஒருவரும் நியமிக்கப்பட்டுள்ளார். இரண்டு மாதங்கள் இவர்களது இல்வாழ்க்கை சுமுகமாகச் சென்றுள்ளது. கடந்த சில தினங்களுக்கு முன் சகா, தனது திருமணத்தின்போது எடுத்துக்கொண்ட புகைப்படங்களை சமூக வலைதளங்களில் பகிர்ந்ததுடன், வாட்ஸ் அப் மூலம் அவரது தோழிகளுக்கும் பகிர்ந்திருக்கிறார். இதைப் பார்த்த அருணின் நண்பர்கள் வயது முதிர்ந்த பெண்ணைத் திருமணம் செய்ததாக கேலி செய்யத் தொடங்கியிருக்கிறார்கள்.கொலை செய்யப்பட்ட சகா குமாரி புகைப்படங்களை வலைதளங்களில் பதிவேற்றம் செய்தது சம்பந்தமாக சகாவிடம் வாக்குவாதத்தில் ஈடுபட்டிருக்கிறார் அருண். இதனால் இருவருக்கும் இடையே அடிக்கடி பிரச்னை ஏற்பட்டிருக்கிறது. நண்பர்களின் கேலி மற்றும் வீட்டில் ஏற்பட்ட பிரச்னையாலும் நெந்துபோன அருண், தனது மனைவியை கொலை செய்யத் திட்டமிட்டிருக்கிறார். இதற்காக கிறிஸ்துமஸ் குடிலுக்குப் பயன்படுத்திய சீரியல் மின் விளக்கு ஒயரில் ஷார்ட் சர்க்கியூட் ஏற்படுத்தி வீட்டு வாசலில் போட்டுள்ளார். Also Read: குமரி: சிறுமி மீது ஒருதலைக் காதல்; மனைவி கொலை - காதல் கடிதத்தால் சிக்கிய கணவர்! சகா வீட்டில் இருந்து வெளியே வந்த சமயத்தில் அந்த ஒயரை மிதித்ததால் மின்சாரம் பாய்ந்து மயங்கியுள்ளார். அவர் இறக்கும்வரை காத்திருந்த அருண், மரணத்தை உறுதி செய்த பிறகு அக்கம்பக்கத்தில் உள்ளவர்களிடம் தகவல் கூறியுள்ளார். மனைவி எப்படி இறந்தார் என்பது தெரியவில்லை என அருண் கூறியுள்ளார். இதை நம்பாத அப்பகுதியினர் வெள்ளறடை காவல் நிலையத்துக்குத் தகவல் கொடுத்துள்ளனர்.வயது முதிர்ந்த சகாவை திருமணம் செய்த அருண் போலீஸார் அங்கு சென்று உடலை மீட்டு திருவனந்தபுரம் மருத்துவக் கல்லூரி மருத்துவமனையில் உடல்கூறு ஆய்வுக்காக அனுப்பி வைத்தனர். அதில், சகா இறந்து நான்கு மணி நேரத்துக்கு மேல் ஆகிறது என மருத்துவர்கள் தெரிவித்துள்ளனர். இதனால் போலீஸார் அருணைப் பிடித்து விசாரணை நடத்தினர். வயது முதிர்ந்த மனைவி சகாவைக் கொலை செய்ததை அருண் ஒப்புக்கொண்டுள்ளார். பணத்துக்கும், சொத்துக்கும் ஆசைப்பட்டு வயது முதிர்ந்த பெண்ணைக் காதலித்து திருமணம் செய்து கொலைசெய்த கேரள இளைஞரின் செயல் அதிர்ச்சியை ஏற்படுத்தியுள்ளது.
http://dlvr.it/RpQt3x

Read More

விருதுநகர்: பஞ்சாலை ஊழியர்களுடன் வந்த தனியார் பேருந்து கவிழ்ந்து விபத்து-இருவர் உயிரிழப்பு

விருதுநகர் அருகே பஞ்சாலை ஊழியர்களை ஏற்றி வந்த பேருந்து நிலை தடுமாறி கவிழ்ந்து விபத்திற்குள்ளானதில் இருவர் உயிரிழந்தனர். விருதுநகர் மாவட்டம் நரிக்குடி அருகே பனையூர், திருச்சுழி சுற்றுவட்டாரப்பகுதியில் இருந்து தனியார் பஞ்சாலைக்கு மினி பேருந்து மூலமாக ஊழியர்கள் ஏற்றி செல்லப்படுவது வழக்கம். அந்த வகையில் இன்று 22 ஊழியர்களை ஏற்றிக்கொண்டு மினி பேருந்து சென்றுகொண்டிருந்தது. அப்போது பனையூர் திருச்சுழிக்கு இடையே வந்துகொண்டிருந்தபோது நிலைதடுமாறு பேருந்து கட்டுப்பாட்டை இழந்து கவிழ்ந்து விபத்துக்குள்ளானது. இதில் சம்பவ இடத்திலேயே இரண்டு பேர் பரிதாபமாக உயிரிழந்தனர். மேலும் 10க்கும் மேற்பட்டோர் படுகாயமடைந்தனர். தகவலறிந்து வந்த போலீசார் சம்பவ இடத்திற்கு விரைந்து வந்து இறந்தவர்களின் உடல்களை மீட்டு பிரேத பரிசோதனைக்காக அனுப்பி வைத்தனர். மேலும், படுகாயமடைந்தவர்களை மீட்டு திருச்சுழி அரசு மருத்துவமனைக்கு சிகிச்சைக்காக அனுப்பி வைத்தனர். விசாரணையில் உயிரிழந்தவர்கள் பூசையா, ஸ்ரீகாந்த் ஆகியோர் என்பது தெரியவந்தது.
http://dlvr.it/RpPvm7

Read More