பள்ளிகளை திறக்கலாமா? பெற்றோர்களிடம் கருத்து கேட்கும் அரசு.. அடுத்தக்கட்ட நடவடிக்கை என்ன?

பள்ளி திறப்பு தொடர்பாக 10 மற்றும் 12ஆம் வகுப்பு மாணவர்களின் பெற்றோர்களிடம் கருத்து கேட்கும் கூட்டம் 2ஆவது முறையாக நடைபெற உள்ளது கொரோனா பொதுமுடக்கத்தால் 2019ஆம் ஆண்டு மார்ச் மாதம் மூடப்பட்ட பள்ளிகள், 9 மாதங்கள் ஆகியும் இன்னும் திறக்கப்படாமலே உள்ளன. அதனால், கல்வித் தொலைக்காட்சி, ஆன்லைன் கல்வி என புதிய முறைகளைக் கொண்டு வந்த பள்ளி கல்வித்துறை, இதர நடவடிக்கைககளையும் மேற்கொண்டது. பள்ளிகளைத் திறக்கலாமா? வேண்டாமா? என்பது குறித்து, கடந்த நவம்பர் 9ஆம் தேதி பெற்றோரிடம் கருத்து கேட்கப்பட்டது. அதில் எதிர்ப்பு எழுந்ததன் காரணமாக பள்ளி திறப்பு ஒத்தி வைக்கப்பட்டது. பொதுத்தேர்வு நெருங்கி வருவதால்,10,11,12 ஆம் வகுப்பு மாணவர்களுக்கு, பொங்கல் பண்டிகைக்குப்பின் பள்ளிகளைத் திறக்கலாம் என்ற பேச்சு எழுந்துள்ளது. அதனால், இதுகுறித்து பெற்றோரிடம் கருத்து கேட்கும் பணியைத் தொடங்க உத்தரவிட்டிருக்கிறது தமிழக அரசு. அதற்காக, சென்னை எம்.ஜி.ஆர்.நகரில் உள்ள அரசு மேல்நிலைப் பள்ளியில், பள்ளிக்கல்வித்துறை இயக்குநர் கண்ணப்பன் ஆய்வு மேற்கொண்டார். பெற்றோர் தெரிவிக்கும் கருத்துகளின் அடிப்படையிலேயே, பள்ளிகள் திறப்பு குறித்து முடிவு செய்யப்படும் என்றார் பெற்றோரின் கருத்தை கேட்க தமிழகம் முழுவதும் அரசு, தனியார் சிபிஎஸ்இ என, சுமார் 12 ஆயிரம் பள்ளிகளில் பிரத்யேக ஏற்பாடுகள் செய்யப்பட்டுள்ளன. இன்று முதல் 8ஆம் தேதி வரை நடைபெறும் கூட்டத்தில், நாள் ஒன்றுக்கு 100 பெற்றோர்களுக்கு மட்டுமே அனுமதி அளிக்கப்படும். பெருந்தொற்று காலத்தில் மாணவர்களால் சமூகப் பரவல் ஏற்பட்டுவிடாமல் இருக்க, அரசு கவனமாக முடிவெடுக்க வேண்டும் என்கின்றனர், ஆசிரியர் சங்கத்தினர். இந்த ஆண்டு பூஜ்ஜியம் கல்வியாண்டாக அறிவிக்கப்படாது என பள்ளிக்கல்வித்துறை அமைச்சர் செங்கோட்டையன் ஏற்கனவே அறித்திருந்தார். பெற்றோர் மீண்டும் எதிர்ப்பு தெரிவித்தால் பள்ளிகள் திறக்கமுடியாத சூழல் ஏற்பட்டால் கல்வி விவகாரத்தில் அரசின் நடவடிக்கை என்னவாக இருக்கும் என்ற எதிர்பார்ப்பு எழுந்துள்ளது.
http://dlvr.it/Rq0Ld2

Read More

ஸ்ரீநகர் என்கவுன்டர்: `மூவரையும் சரணடையச் சொன்னோம்!’ - வீடியோ வெளியிட்ட ராணுவம்

ஜம்மு காஷ்மீரில் ஊடுருவும் பயங்கரவாதிகளை அழிப்பதற்கு, இந்திய ராணுவம் மற்றும் காவல்துறை அடங்கிய கூட்டுக்குழுவினர் தீவிரம் காட்டி வருகின்றனர். தேடுதல் வேட்டையின்போது சரணடைய மறுக்கும் பயங்கரவாதிகள் சுட்டுக் கொல்லப்பட்டும் வருகின்றனர். கடந்த டிசம்பர் 29-ம் தேதி, ஸ்ரீநகரின் புறநகர்ப் பகுதியான உம்பராபாத் லாயாபோரா பகுதியில் ஸ்ரீநகர்- பாராமுல்லா தேசிய நெடுஞ்சாலை அருகே உள்ள ஒரு வீட்டில் பயங்கரவாதிகள் பதுங்கியிருப்பதாகப் பாதுகாப்புப் படையினருக்கு ரகசியத் தகவல் கிடைத்தது. இதையடுத்து, அன்று மாலை பாதுகாப்புப் படையினர் மற்றும் கா‌‌ஷ்மீர் சிறப்பு போலீஸ் படை, மத்திய ரிசர்வ் போலீஸ் படையினர் அங்குச் சென்று பயங்கரவாதிகள் பதுங்கி இருந்த வீட்டைச் சுற்றி வளைத்துள்ளனர்.ராணுவம் வீட்டுக்குள் பதுங்கியிருந்த பயங்கரவாதிகளைச் சரணடையும்படி பாதுகாப்புப் படையினர் எச்சரித்துள்ளனர். ஆனால், பயங்கரவாதிகள் பாதுகாப்புப் படையினரை நோக்கி துப்பாக்கியால் சுட்டும், கையெறி குண்டுகளை வீசியும் பயங்கரத் தாக்குதலில் ஈடுபட்டதால், பாதுகாப்புப் படையினரும் பதில் தாக்குதல் நடத்தியதாகக் கூறப்படுகிறது. இரவு நேரத்தில் தாக்குதல் நிறுத்தப்பட்டு பயங்கரவாதிகள் பதுங்கி இருந்த வீட்டைச் சுற்றி மின்விளக்குகள் அமைத்து தீவிரமாக போலீஸார் கண்காணித்து வந்தனர். டிசம்பர் 30-ம் தேதி காலை மீண்டும் பாதுகாப்புப் படையினருடன் இணைந்து பயங்கரவாதிகளுடன் துப்பாக்கிச் சண்டையில் ஈடுபட்டனர். அப்போது, பாதுகாப்புப் படையினர் நடத்திய பதில் தாக்குதலில், வீட்டிலிருந்த 3 பயங்கரவாதிகளும் சுட்டுக் கொல்லப்பட்டனர். இச்சம்பவம் குறித்து அறிக்கை வெளியிட்ட ராணுவ அதிகாரி ஹெச்.எஸ்.சாஹி (H.S.Shahi), ``பயங்கரவாதிகள் ஸ்ரீநகர் - பாரமுல்லா நெடுஞ்சாலையில் பெரிய அளவில் தாக்குதல் நடத்தத் திட்டமிட்டிருந்தது தெரியவந்தது. பயங்கரவாதிகளைச் சரணடையச் சொன்னபோது, ​​அவர்கள் துப்பாக்கிச் சூடு நடத்தினர். ராணுவம் பின்னர், காவல்துறை மற்றும் சி.ஆர்.பி.எஃப் படைகள் இணைந்து நடத்திய பதில் தாக்குதலில், சுட்டுக் கொல்லப்பட்ட மூவரும் பயங்கரவாதிகள் என்பது தெரியவந்தது. பயங்கரவாதிகளின் பட்டியலில் அவர்களின் பெயர் இல்லை என்றாலும், அவர்களுக்கு மீண்டும் மீண்டும் சரணடைய வாய்ப்பு வழங்கப்பட்டது. ஆனால், அவர்கள் துப்பாக்கிச் சூடு நடத்தினார்கள். அதனால் பதில் தாக்குதல் நடத்தப்பட்டது. அவர்கள் பயங்கரவாதிகள் என்பதால் அவர்களின் உடலைத் தர முடியாது. மூவரின் உடல்களும் ஒன்றாக அடக்கம் செய்யப்பட்டது" என்று தெரிவிக்கப்பட்டது. சுட்டுக் கொல்லப்பட்ட மூன்று இளைஞர்களில், ஒருவர் தலைமைக் காவலரின் மகன், மற்ற இரண்டு இளைஞர்கள் காவல்துறை அதிகாரிகளின் சகோதரர்கள். அவர்கள் அப்பாவிகள். அவர்கள் தவறுதலாக போலீஸ் துப்பாக்கிச் சூட்டில் கொல்லப்பட்டதாக அவர்களின் குடும்பத்தினர் குற்றம்சாட்டத் தொடங்கினர். இதுகுறித்து காவல்துறை தரப்பில்,``அதர் (Athar), தலைமைக் காவலரின் மகன் அஜாஸ் அஹ்மத் (Ajaz Ahamed) இருவரும் புல்வாமாவைச் சேர்ந்தவர்கள். ஒருவருக்கொருவர் முன் அறிமுகம் இருப்பவர்கள். மூன்றாவது இளைஞரான ஷோபியனைச் சேர்ந்த சுபைர் அகமதுவுக்கும் (Zubair Ahmad) அவர்களுக்கும் பழக்கம் இருந்ததா என்று தெரியவில்லை" என்று தெரிவித்துள்ளது. இந்நிலையில், அஜாஸின் தந்தை முகமது மக்பூல், ``பாதுகாப்புப் படைகள் கூறுவதை நம்ப முடியாது” என்று கூறியுள்ளார். அதரின் தந்தை முஸ்தாக் அகமது (Mushtaq Ahmad), தன் மகனின் உடலை தன் ஊரில் அடக்கம் செய்ய உடலைக் கேட்டதற்கு, ராணுவம் மறுத்தது. இதுகுறித்து பேசிய அகமது,``நான் ஏற்கனவே இறந்துவிட்டேன். என் குழந்தையை எனக்குக் கொடுங்கள் அல்லது என்னையும் அவனுடன் அடக்கம் செய்யுங்கள்" என்று கதறி அழுதுள்ளார். தங்கள் பிள்ளைகளைப் பயங்கரவாதிகள் என்று ஒப்புக்கொள்ள மறுத்த பெற்றோர்களும், அவர்களது குடும்பத்தினரும், நேற்று ஸ்ரீநகரில் ஆர்ப்பாட்டத்தில் ஈடுபட்டனர். அப்போது, கொலைகள் குறித்து விசாரணை நடத்தக் கோரினர். அதரின் தந்தை முஸ்தாக், ``எனது மகனின் மரணத்துக்கு நீதி வேண்டும். எனக்குப் பணம் தேவையில்லை. எனது மகனின் உடல் மட்டுமே எனக்கு வேண்டும். நான் என் உணர்வுகளை வெளிப்படுத்துகிறேன். இந்திய மக்களுக்குக் கேட்கவில்லையா? எனக்கு என் மகன் வேண்டும். அவனுக்கு 16 வயதுதான் ஆகிறது" என்றார்.
http://dlvr.it/Rpy9vm

Read More

`அப்பூப்பனை கண்டு..!' - பினராயி விஜயன் கொஞ்சிய குழந்தை... இது கேரள `வைரல்'

கொரோனா வேகமாகப் பரவிய ஊரடங்குக் காலத்தில் தினமும் மாலை 6 மணிக்கு கேரள முதல்வர் பினராயி விஜயன் செய்தியாளர்கள் சந்திப்பு நடத்துவது வழக்கம். என்றாவது நேரடியாக மீடியா பேட்டி அளிக்க வாய்ப்பு இல்லாமல் போனால், ஆன்லைன் வீடியோ கான்பரன்ஸ் மூலம் பேசுவதை வழக்கமாகக் கொண்டிருந்தார். அதற்கும் வாய்ப்பு இல்லாமல் இருந்தால், அன்றைய கொரொனா பரவல் குறித்து பிரஸ் ரிலீஸ் மட்டும் வெளியாகும். பினராயி விஜயனின் பேட்டியை கேரளத்தின் அனைத்து மீடியாவும் லைவ் செய்வது வழக்கம். தினமும் மாலை 6 மணியானால், பினராயி விஜயனின் செய்தியாளர் சந்திப்பை பார்ப்பதற்கென்றே டி.வி-யை ஆன் செய்பவர்கள் பலர் உண்டு. அதில், கொல்லம் மாவட்டம் டீசெண்ட் முக்கு பகுதியைச் சேர்ந்த ஆதர்ஷ் - டாக்டர் சுபி தம்பதியின் மூன்று வயது மகள் அவந்திகாவும் ஒருவர். தாயுடன் அவந்திகா மாலை 6-மணி பிரஸ் மீட்டுக்காக பினராயி விஜயன் வந்ததும், 'அப்பூப்பன்(தாத்தா) வந்துவிட்டார்' எனக் குஷி ஆகிவிடுவாராம் அவந்திகா. ஒருநாள் பினராயி விஜயன் டி.வி-யில் பிரஸ் மீட்டுக்காக வராமல் இருந்தாலும் அவந்திகா 'அப்பூப்பாவை காணணும்' என அடம்பிடிப்பாராம். லாக்டெளன் நேரத்தில் முதல்வர் பினராயி விஜயனை டி.வி-யில் பார்த்து தாத்தா என அழைத்து மனதில் இருத்திக்கொண்டார் அவந்திகா. ஒருகட்டத்தில் கொரோனா பரவல் குறைந்த பின்னர் முதல்வரின் தினசரி பிரஸ் மீட்களும் குறைய, பினராயி விஜயனை டி.வி-யில் பார்க்க முடியாமல் இருந்ததால் அவந்திகா அழுது ஊரைக் கூட்டியிருக்கிறாள். இதனால் அவளின் பெற்றோர் தலைமைச் செயலகத்துக்கு போன் செய்து விபரத்தைக் கூறி அவந்திகாவிடம் கொடுத்திருக்கிறார்கள். தொலைபேசியின் எதிர்முனையில், தலைமைச் செயலகத்திலிருந்து பேசிய பெண் ஊழியரிடம் அவந்திகா, 'பினராயி அப்பூப்பா எப்படி இருக்கிறார்' என நலம் விசாரித்திருக்கிறார். அவர்களும் நன்றாக இருப்பதாக பதில் கூறி சிறிது நேரம் கனிவுடன் பேசியிருக்கிறார். இதனால் அவந்திகா சற்று ஆறுதலாகியிருக்கிறார். இந்நிலையில் நிகழ்ச்சி ஒன்றுக்காக கொல்லம் அரசு விருந்தினர் மாளிகைக்கு முதல்வர் பினராயி விஜயன் வர உள்ளதாக அவந்திகாவின் பெற்றோருக்குத் தகவல் கிடைத்துள்ளது.பினராயி விஜயனை சந்திக்க கொல்லம் அரசு விருந்தினர் மாளிகைக்குச் சென்ற அவந்திகா இதையடுத்து கொல்லம் மாவட்ட சி.பி.எம் அலுவலகத்துக்குச் சென்ற அவந்திகாவின் பெற்றோர், பினராயி விஜயன் மீதான தங்கள் மகளின் பாசத்தை கூறி, அவரை சந்திக்க அப்பாயின்ட்மென்ட் கேட்டிருக்கிறார்கள். கொல்லம் மாவட்ட கமிட்டியும் அதற்கான ஏற்பாடுகளைச் செய்துள்ளது. இதையடுத்து கொல்லம் அரசு விருந்தினர் மாளிகைக்குச் சென்ற பினராயி விஜயனை சந்திக்க சிவப்பு நிற உடையுடன், சிவப்பு மாஸ்க், தலையில் சிவப்பு ரீத், பினராயி விஜயனுக்கு அணிவிக்க சிவப்பு ரிப்பன், அவருக்கு வழங்க கையில் சிவப்பு ரோஜா சகிதமாக 'குட்டி சகாவு' ரேஞ்சுக்கு வந்திருந்தார் அவந்திகா. அவந்திகாவை அவரின் அம்மா டாக்டர் சுபியும், பாட்டி சூர்யாவும் அழைத்து வந்திருந்தனர். அவந்திகாவுக்கு ஒதுக்கப்பட்ட நேரம் வந்ததும் அவள் ஷோபாவில் அமர்ந்திருந்த பினராயி விஜயனுக்கு பக்கத்தில் போய் அமர்ந்தாள். கையில் வைத்திருந்த சிவப்பு ரோஜாப் பூவையும், ரிப்பனையும் பினராயி விஜயனுக்குக் கொடுத்தார். ரோஜா பூவை வாங்கிய பினராயி விஜயன், "மோளா இந்த ரோஜாப்பூவை வாங்கின..." எனப் பாசமாகக் கேட்டவர், 'என்ன படிக்கிறாய்...' என்பதுபோன்ற கேள்விகளை கேட்டார். பிளே ஸ்கூலுக்கு போவதாகக் கூறிய அவந்திகா 'அப்பூப்பா' என அழைத்தபடி பினராயி விஜயனை தனது மழலைக்குரலால் வசப்படுத்தினார்.பினராயி விஜயனுடன் உரையாடும் அவந்திகா இதையடுத்து அவந்திகா கொண்டு சென்ற சிவப்பு ரிப்பனை அவளுக்கே அணிவித்து வழியனுப்பி வைத்தார் பினராயி விஜயன். பினராயி விஜயனை சந்தித்த அவந்திகா, "அப்பூப்பனை கண்டு..!" என வெளியில் நின்றவர்களிடம் உற்சாகமாகக் கூறினாள். கேரள முதல்வர் பினராயி விஜயன் மூன்று வயது சிறுமியிடம் பேத்திபோல கொஞ்சிப் பேசும் வீடியோ சமூக வலைதளங்களில் வைரலாகி வருகிறது.
http://dlvr.it/Rpy9nc

Read More

கேரளத்தை அச்சுறுத்தும் பறவைக் காய்ச்சல் - 48,000 வாத்துக்களை அழிக்க நடவடிக்கை!

கேரள மாநிலத்தில் கொரோனா நோய் தொற்று ஒருபக்கம் பரவி வரும் நிலையில், இப்போது பறவைக் காய்ச்சல் பரவி மிரட்டுகிறது. ஆலப்புழா மற்றும் கோட்டயம் மாவட்டங்களில் பறவைக் காய்ச்சல் கண்டறியப்பட்டுள்ளது. ஆலப்புழா மாவட்டம் குட்டநாடு பகுதியிலும், கோட்டயம் மாவட்டத்தில் உள்ள நிண்டூர் பகுதியிலும் பறவைக் காய்ச்சல் பரவுவது கண்டுபிடிக்கப்பட்டுள்ளது. இந்தப் பகுதிகளில் வாத்துக்கள் கூட்டம் கூட்டமாக இறந்து விழுந்தன. அதைத் தொடர்ந்து இறந்த வாத்துக்களின் சாம்பிள்கள் போபாலில் உள்ள ஆய்வுக்கூடத்துக்கு அனுப்பி சோதனை நடத்தப்பட்டது. எட்டு சாம்பிள்களில் ஐந்து சாம்பிள்களில் பறவைக் காய்ச்சல் இருப்பது கண்டறியப்பட்டுள்ளது. கோட்டயத்தில் ஒருவருக்கு சொந்தமான எட்டாயிரம் வாத்துக்களுக்கு பறவைக் காய்ச்சல் ஏற்பட்டுள்ளது. இந்த பறவைகள் அனைத்தையும் அழிப்பதற்கான நடவடிக்கை எடுக்கப்பட்டுள்ளதாகக் கால்நடைத்துறை அறிவித்துள்ளது.வாத்துகள் வாத்துக்களுக்கு பறவை காய்ச்சல் ஏற்பட்டுள்ளது என்றாலும் இதுவரை மனிதர்களுக்குத் தொற்றவில்லை என்று கூறப்படுகிறது. பறவைக் காய்ச்சல் பாதித்த பகுதிகளில் மத்திய அரசின் வழிகாட்டுதல்படி முன்னெச்சரிக்கை நடவடிக்கை எடுக்கப்பட்டுள்ளதாகவும், பிற பகுதிகளில் பரவாமல் இருக்க நடவடிக்கை எடுக்கப்பட்டுள்ளதாகவும் அதிகாரிகள் தெரிவித்துள்ளனர். பறவைக் காய்ச்சல் கண்டறியப்பட்ட ஆலப்புழா மற்றும் கோட்டயம் மாவட்ட கலெக்டர்கள் தலைமையில் தடுப்புப் பணிகள் நடைபெற்று வருகின்றன. இரண்டு மாவட்டங்களிலும் கட்டுப்பாட்டு அறைகள் திறக்கப்பட்டுளன. பறவைக் காய்ச்சல் கண்டறியப்பட்டுள்ள பகுதிகளில் இருந்து ஒரு கிலோமீட்டர் சுற்றளவில் உள்ள அனைத்து பறவைகளையும் அழிப்பதற்கான நடவடிக்கை எடுக்கப்பட்டுள்ளதாக அதிகாரிகள் தெரிவித்தனர். சுமார் 48,000 பறவைகளை அழிக்க உள்ளதாகக் கூறப்படுகிறது.பறவை காய்ச்சல் கேரளத்தில் கடந்த ஆண்டும் பறவைக் காய்ச்சல் ஏற்பட்டது. கோழிக்கோடு மற்றும் மலப்புறம் மாவட்டங்களில் கடந்த ஆண்டு பறவைக் காய்ச்சல் பரவியபோது கோழிகள் அழிக்கப்பட்டன. அதன் மூலம்தான் பறவை காய்ச்சல் கட்டுக்குள் கொண்டுவரப்பட்டது. அதுபோன்று இந்த ஆண்டும் பறவைக் காய்ச்சலை கட்டுப்படுத்த வாத்து மற்றும் கோழிகளை அழிக்க கேரள அரசு முடிவு செய்துள்ளது. கேரளத்தில் வேகமாக பரவிவரும் பறவைக் காய்ச்சலால் மக்கள் பீதி அடைந்துள்ளனர்.
http://dlvr.it/Rpwg0Y

Read More

விவசாயிகளின் போராட்டத்தை ஊக்கப்படுத்த போராட்ட களத்திலேயே கபடி விளையாடிய வீராங்கனைகள்!

மத்திய அரசு அமல்படுத்தியுள்ள புதிய வேளாண் சட்டங்களை எதிர்த்து இந்திய தலைநகர் டெல்லியில் நாடு முழுவதுமுள்ள விவசாயிகள் திரண்டு அறவழியில் போராடி வருகின்றனர். அரசுக்கும், விவசாய சங்கங்களுக்கும் இடையேயான பேச்சுவார்த்தை மெகா சீரியலைபோல தொடர்கிறது. இந்நிலையில் போராட்டத்தில் ஈடுபட்டுள்ள விவசாயிகளுக்கு ஊக்கம் கொடுக்கும் வகையில் போராட்ட களத்திலேயே கபடி விளையாடி அசத்தியுள்ளனர் விளையாட்டு வீராங்கனைகள்.  இந்த கபடி போட்டி சிங்கு எல்லையில் நடைபெற்றுள்ளது. இதில் பங்கேற்பதற்காக பஞ்சாப், ஹரியானா, ராஜஸ்தான், உத்தர பிரதேசம் மற்றும் டெல்லியை சேர்ந்த 12 கபடி அணிகளை சேர்ந்த விளையாட்டு வீராங்கனைகள் இதில் கலந்து கொண்டு விளையாடியுள்ளனர். இதற்காக பல நூறு கிலோ மீட்டர் பயணம் செய்து அவர்கள் போராட்ட களத்திற்கு வந்துள்ளனர். அண்டர் 14 மற்றும் அப்பர் ஏஜ் என இரு பிரிவுகளாக கபடி போட்டிகள் நடைபெற்றுள்ளன. ஒவ்வொரு போட்டியும் 40 நிமிடங்கள் வீதம் நடத்தப்பட்டுள்ளது.  இந்த போட்டியில் கலந்து கொண்டு விளையாடிய பெரும்பாலான வீரர்களின் பெற்றோர்கள் விவசாயிகள். அதனால் அவர்களுக்கு தங்களது ஆதரவை தெரிவிக்கவே களத்தில் விளையாடியதாகவும் பங்கேற்றவர்கள் தெரிவித்துள்ளனர். போட்டி நடத்தப்பட்ட போது மழை குறுக்கிட்டுள்ளது. அதை பொருட்படுத்தாமல் வீரர்கள் விளையாடியுள்ளனர். நாங்கள் இங்கு வெற்றி பெறுவதற்காக வரவில்லை, எங்களது ஆதரவை தெரிவிக்கவே விளையாட வந்துள்ளோம் என ஒருமித்த குரலில் உரக்க சொல்கின்றனர் கபடி வீராங்கனைகள்.  “கோரிக்கை நிறைவேறும் வரை, போராட்டத்தை கைவிடாதீர்கள்” என்பதை விடமால் சொல்லிவிட்டு ஊர் திரும்பியுள்ளனர் இந்த சிங்கப்பெண்கள். 
http://dlvr.it/RptYpZ

Read More

3 மாவட்டங்களில் கனமழைக்கு வாய்ப்பு - வானிலை ஆய்வு மையம்

நெல்லை, தூத்துக்குடி, ராமநாதபுரம் மாவட்டங்களில் கனமழைக்கு வாய்ப்பு இருப்பதாக வானிலை ஆய்வு மையம் தெரிவித்துள்ளது இது குறித்து இன்று செய்தியாளர்களைச் சந்தித்த வானிலை ஆய்வு மைய இயக்குநர் புவியரசன், ''வடகிழக்கு பருவமழை ஜனவரி 12-வரை நீடிக்கும். தஞ்சை, திருவாரூர், கள்ளக்குறிச்சி உள்ளிட்ட மாவட்டங்களில் நாளை மழைக்கு வாய்ப்பு உள்ளது. அடுத்த 48 மணி நேரத்தில் சென்னை மற்றும் புறநகரின் ஒருசில இடங்களில் லேசான மழைக்கு வாய்ப்பு உள்ளது. நெல்லை, தூத்துக்குடி, ராமநாதபுரம் மாவட்டங்களில் கனமழைக்கு வாய்ப்பு இருக்கிறது'' எனத் தெரிவித்தார்.
http://dlvr.it/RptYmp

Read More

கேரளா: மனைவியுடன் பிரச்னை; 2 மகன்களைக் கொன்றுவிட்டு தற்கொலை செய்த தந்தை! - என்ன நடந்தது?

கேரள மாநிலம், திருவனந்தபுரம் - கொல்லம் மாவட்ட எல்லைப் பகுதியான நாவாயிக்குளம் பகுதியைச் சேர்ந்த ஆட்டோ ஓட்டுநர் சபீர் (36 ). இவரின் மனைவி ரெஜீனா. இவர்களுக்கு அல்தாஃப் (12), அன்ஷாத் (9) என இரண்டு மகன்கள் இருந்தனர். அல்தாஃப் ஆறாம் வகுப்பும், அன்ஷாத் நான்காம் வகுப்பும் படித்துவந்தனர். சபீர், தனது மனைவி ரெஜீனாவுடன் ஏற்பட்ட கருத்து வேறுபாடு காரணமாகக் கடந்த சில மாதங்களாகத் தனியாக வசித்துவந்தார். ரெஜீனா இரண்டு மகன்களுடன் தனது சகோதரரின் வீட்டில் வசித்துவருகிறார். கூச்ச சுபாவம் போன்ற காரணங்களால் சபீர் யாரிடமும் அதிகம் பேசுவது இல்லை எனக் கூறப்படுகிறது. அவருக்கு போதைப் பழக்கம் போன்ற எந்த கெட்ட பழக்கங்களும் இல்லை எனவும் கூறப்படுகிறது. இரண்டு மகன்களிடமும் அதிக பாசம் வைத்திருந்த சபீர், மனைவி மற்றும் பிள்ளைகள் பிரிந்து சென்ற பின்பு மிகவும் வருத்தத்தில் இருந்திருக்கிறார். இருப்பினும், தனது மகன்களைக் காண மனைவி தங்கியிருந்த வீட்டுக்கு அடிக்கடி சென்று வந்திருக்கிறார். மேலும், அவர்களுக்குத் தேவையான பொருள்களையும் வாங்கி கொடுத்திருக்கிறார். அதுமட்டுமல்லாமல் தனது ஆட்டோவில் இரண்டு மகன்களை அடிக்கடி வெளியே அழைத்துச் சென்று வருவதும் அவர் வழக்கமாம். மகன்கள் அடிக்கடி தந்தையின் ஆட்டோவில் சுற்றுலா சென்றுவிட்டு வருவது பற்றி அவருடைய மனைவி ரெஜீனா கண்டுகொள்வதில்லை எனக் கூறப்படுகிறது. இந்தநிலையில் ஆங்கிலப் புத்தாண்டான கடந்த வெள்ளிக்கிழமை, சபீர் தனது மனைவி ரெஜீனா வசிக்கும் வீட்டுக்குச் சென்று இரு மகன்களையும் அழைத்து சென்றிருக்கிறார். ஆனால், அன்று இரவு ஆகியும் குழந்தைகளை அவர் வீட்டுக்குத் திருப்பிக் கொண்டு விடவில்லை.மகன்களை கொலை செய்துவிட்டு தற்கொலை செய்த சபீர் இதனால், ரெஜீனாவின் சகோதரர் மொபைல்போனிலிருந்து சபீரை அழைத்திருக்கிறார். சபீர் குழந்தைகளிடம் போனைக் கொடுத்திருக்கிறார். குழந்தைகளோ, தாங்கள் வர்க்கல பீச்சுக்குச் சென்றதாகவும், தந்தை புத்தாடைகள் வாங்கித் தந்ததாகவும், புத்தாடை அணிந்துகொண்டு ஸ்டார் ஓட்டலில் சென்று உணவு சாப்பிட்டதாகவும் சந்தோஷமாகக் கூறியிருக்கிறார்கள். இதைத் தொடர்ந்து சபீரிடம் பேசிய ரெஜீனாவின் சகோதரர், குழந்தைகளைக் காலையில் திரும்பக் கொண்டுவிடும்படி கூறியிருக்கிறார். சபீரும் காலையில் பிள்ளைகளைக் கொண்டுவிடுவதாகத் தெரிவித்திருக்கிறார்.குளத்திலிருந்து உடலை மீட்கும் தீயணைப்பு வீரர்கள் மறுநாள் சபீரின் ஆட்டோ அந்தப் பகுதியிலுள்ள கோயில் குளக் கரையில் நீண்டநேரமாக நின்றிருக்கிறது. அந்தப் பகுதியினர் சந்தேகத்தின் பேரில் ஆட்டோ அருகில் சென்று பார்த்தபோது அதில் ஒரு கடிதம் இருந்தது. அந்தக் கடிதத்தில் 'இளைய மகன் குளத்தில் கிடக்கிறான்' எனத் தெரிவிக்கப்பட்டிருந்தது. இதையடுத்து சிலர் சபீரின் வீட்டுக்குச் சென்று பார்த்தபோது மூத்த மகன் அல்தாஃப் கழுத்து அறுக்கப்பட்ட நிலையில் இறந்து கிடந்திருக்கிறார். இது குறித்து போலீஸுக்குத் தகவல் கொடுக்கப்பட்டது. போலீஸார் அங்கு சென்று விசாரணை நடத்தினர். பின்னர், ஆட்டோ நின்றுகொண்டிருந்த குளத்தில் தீயணைப்பு வீரர்கள் படகில் தேடிப் பார்த்தபோது, அங்கு சபீர் மற்றும் அவரின் இளைய மகன் அன்ஷாத்தின் உடல்கள் மீட்கப்பட்டன. இது குறித்து போலீஸார் கூறுகையில், ``மனைவி பிரிந்ததால் சபீருக்கு மனதளவில் பாதிப்பு ஏற்பட்டிருக்கிறது. உறவினர் ஒருவரின் இறுதிச் சடங்குக்கு வருவதாகச் சொன்ன சபீர், தனது மூத்த மகனைக் கட்டிப்போட்டு, கழுத்தை அறுத்துக் கொலை செய்திருக்கிறார். பின்னர், தனது இளைய மகனைக் குளத்தில் வீசிக் கொலை செய்திருக்கிறார். Also Read: திருச்சி: வீட்டு வாசலில் பால் பாக்கெட்; பெண் ஜவுளி வியாபாரி கொடூரக் கொலை! - நகைக்காக நடந்த கொடூரம் பின்னர் அவரும் குளத்தில் குதித்து தற்கொலை செய்துகொண்டிருக்கிறார். இது குறித்து தொடர்ந்து விசாரணை நடந்துவருகிறது" என்றனர். மனைவி பிரிந்து சென்ற மன உளைச்சல் காரணமாக இரண்டு மகன்களைக் கொடூரமாகக் கொலை செய்துவிட்டு தந்தையும் தற்கொலை செய்துகொண்ட சம்பவம் அதிர்ச்சியை ஏற்படுத்தியிருக்கிறது.
http://dlvr.it/Rps4tm

Read More