"மதவாத சக்திகளுக்கு தமிழகத்தில் இடமில்லை. இது பெரியாரின் மண்!" - திருமாவளவன்

"தற்போது பாஜகவாக மாறிவிட்டது அதிமுக. மதவாத சக்திகளுக்கு தமிழகத்தில் இடமில்லை. இது பெரியாரின் மண்" என்றார் விடுதலைச் சிறுத்தைகள் கட்சித் தலைவர் திருமாவளவன். நாகப்பட்டினம் சட்டப்பேரவைத் தொகுதி விடுதலை சிறுத்தைகள் கட்சியின் வேட்பாளர் ஆளூர் ஷாநவாஸுக்கு ஆதரவாக அக்கட்சியின் தலைவர் திருமாவளவன் நாகை அவுரிதிடலில் நடந்த பொதுகூட்டத்தில் பரப்புரை மேற்கொண்டார். அப்போது அவர் பேசியதாவது:  "திமுக கூட்டணியில் 6 சட்டப்பேரவைத் தொகுதிகள், விடுதலைச் சிறுத்தைகள் கட்சிக்கு வழங்கப்பட்டது. அதில் 2 பொது தொகுதிகள் கேட்டோம். வெற்றி வாய்ப்பு உள்ள தொகுதி நாகை என தெரிவித்தே ஸ்டாலின் வழங்கினார். அந்த ஆறு தொகுதிகளில் வெற்றி வாய்ப்பு உள்ள வேட்பாளர்களை களம் இறங்கியுள்ளோம். கடந்த கால தேர்தல்போல் இல்லமால் இந்த சட்டப்பேரவைத் தேர்தல் கடினமான தேர்தல். எதிரில் இருப்பவர்கள் அதிமுக, பாமககாரர்கள் மட்டும் இல்லை, பாஜக கட்டுப்பாட்டில் உள்ளவர்கள். தற்போது திமுகவை எதிர்த்து நிற்கும் தகுதியை அதிமுக இழந்துவிட்டது. கடந்த நாடாளுமன்றத் தேர்தலில் மோடியை நேரடியாக எதிர்த்து பிரசாரம் செய்த ஜெயலலிதா, இனி எந்த காலத்திலும் பாஜகவுடன் எந்த உறவும், தொடர்பும் இருக்காது என்று தெரிவித்தார். ஆனால், அவரை குல தெய்வமாக வணங்குவதாக கூறும் எடப்பாடி பழனிசாமியும், ஓ.பன்னீர்செல்வமும் பாஜகவிடம் கூட்டணி வைத்தது, ஜெயலிதாவிற்கும் அதிமுக தொண்டர்களுக்கும் செய்தது தூரோகம் இல்லையா? தற்போது அதிமுக, அதிமுகவாக இல்லை; பாஜகவாக மாறிவிட்டது. நீங்கள் இரட்டை இலைக்கும், மாம்பழத்திற்கும் வாக்களித்தால், அது தாமரைக்கு வாக்களித்ததாகவே அர்த்தம். அதிமுக கூட்டணி கட்சியினரை உறுப்பினராக மக்கள் தேர்வு செய்தால், பாஜக உறுப்பினராகத்தான் வேலை பார்ப்பார்கள். திமுகவை எதிர்த்து அதிமுக, பாமக போட்டியிடவில்லை, பாஜகதான் 234 தொகுதிகளிலும் நிற்கிறது. தமிழகத்தில் அதிமுகவை வீழ்த்தி பாஜக வளர பார்க்கிறது. இந்தியா முழுவதும் பல்வேறு மாநிலங்களில் சொந்தக் கூட்டணி கட்சி உறுப்பினர்களை விலைக்கு வாங்குதுதான் பாஜகவின் கேவலமான வேலை. தமிழகத்தில் பெரிய அரசியலில் திமுகவா, பாஜகவா என்பதை கணக்குப் போட்டு காய் நகர்த்துகிறது பாஜக. சட்டமன்ற தேர்தலுக்கு பின் அதிமுக இருக்குமா என்பது கேள்விக்குறிதான். பாஜக இந்தியாவில் பல்வேறு சட்டங்களை மக்களுக்கு எதிராக கொண்டுவந்து சாதி, மத ரீதியான பிளவை ஏற்படுத்த நினைக்கிறது. இதை உணர்ந்துதான் எந்த நிபந்தனையும் இன்றி திமுகவுக்கு விடுதலைச் சிறுத்தைகள் ஆதரவு அளித்து வருகிறது. இது தெரிந்தே பதவிக்காக பழனிசாமியும், ராமதாஸும் கூட்டணி பாஜக உடன் அமைத்துள்ளனர். பாஜகவால் இந்தியாவில் வீழ்த்த முடியாத கட்சி, விடுதலைச் சிறுத்தைகள் கட்சி. பாஜகவின் சதி முயற்சியை ஒழித்து கட்டதான் திமுகவுடன் கூட்டணி வைத்தோம். 6 சீட்டு என்பது முக்கியம் இல்லை. பாஜகவுக்கு தமிழகத்தில் இடம் இல்லை என்பதுதான் முக்கியம் திமுகவுக்கு விடுதலைச் சிறுத்தையும், விடுதலைச் சிறுத்தைக்கு திமுகவும் உற்ற துணையாக இருக்கும். மதவாத சக்திகளுக்கு தமிழகத்தில் இடம் இல்லை. இது பெரியாரின் மண். தமிழகத்தில் மட்டுமல்ல, பாஜக இந்தியாவில் மீண்டும் ஆட்சியை பிடித்தால் டெல்டா விவசாயிகள் இடம் பெயரும் நிலை ஏற்படும். கொடிய ஆபத்தில் இருந்து தமிழகத்தை காப்பற்ற ஸ்டாலின் முதல்வராக வேண்டும்" என்று திருமாவளவன் பேசினார்.
http://dlvr.it/RwfHl5

Read More

மீட்புப்பணியில் பெரும் முன்னேற்றம்; மீண்டும் மிதக்கத் தொடங்கியது ‘எவர் கிவன்’ கப்பல்!

சூயஸ் கால்வாயில் சிக்கிய 400 மீட்டர் நீள சரக்கு கப்பல் மீட்கப்பட்டு மீண்டும் மிதக்கும் நிலைக்கு கொண்டுவரப்பட்டதாக மீட்புக்குழு தகவல் தெரிவித்துள்ளது. தைவான் நாட்டைச் சேர்ந்த உலகின் மிகப்பெரிய கொள்கலன் கப்பல்களில் ஒன்றான ‘எவர் கிவன்’ கப்பல், கடந்த வாரம் எகிப்து நாட்டின் சூயஸ் கால்வாயின் மணலில் சிக்கிக் கொண்டது. சூயஸ் கால்வாய் உலகின் மிக முக்கியமான கடல் வர்த்தகப் பாதையாக திகழ்வதால், அந்த வழித்தடத்தில் கப்பல் போக்குவரத்து முற்றிலும் பாதிக்கப்பட்டுள்ளது. 280-க்கும் அதிகமான கப்பல்கள் சூயஸ் கால்வாயை கடக்க முடியாமல் நடுக்கடலில் நிற்கின்றன. இதன் காரணமாக சர்வதேச வர்த்தகம் பாதிக்கப்பட்டுள்ளது. ஒவ்வொரு நாளும் 9.6 பில்லியன் அமெரிக்க டாலர் (இந்திய மதிப்பில் சுமார் ரூ.70 ஆயிரம் கோடி) மதிப்புள்ள சரக்கு தேங்கும் சூழ்நிலை உருவாகியுள்ளதாக கப்பல் போக்குவரத்து தொடர்பான தரவுகள் தெரிவிக்கின்றன. இந்த நிலையில் கடந்த சில நாட்களாக ராட்சத இயந்திரங்கள் மற்றும் இழுவைப் படகுகளை வைத்து கப்பலை மீட்கும் பணிகள் இரவுப்பகலாக நடந்து வந்தன. நேற்று வரை 18 மீட்டர் ஆழத்தில் 27,000 கியூபிக் மீட்டர் அளவு மணல் தோண்டி எடுக்கப்பட்டுள்ளதாக சூயஸ் கால்வாய் ஆணையம் தெரிவித்திருந்தது. ஒருவாரம் மேற்கொண்ட மீட்புப் பணியின் விளைவாக 'எவர் கிவன்' கப்பல் 80% சரியான திசையில் நிறுத்தப்பட்டுள்ளது. இதனைத் தொடர்ந்து சூயஸ் கால்வாயில் 'எவர் கிவன்' கப்பல் மிதக்கத் தொடங்கியுள்ளது. இதனை எகிப்து அரசு உறுதிப்படுத்தியுள்ளது. இதையடுத்து, சூயஸ் கால்வாயின் இரு முனைகளில் நிற்கும் சரக்குக் கப்பல்கள் விரைவில் இயங்கும் என்று எதிர்பார்க்கப்படுகிறது.
http://dlvr.it/Rwcpg6

Read More

“முதல்வரிடம் நான் மனம் திறந்து மன்னிப்பு கோருகிறேன்” - ஆ.ராசா பேட்டி

முதல்வர் பழனிசாமி குறித்த விமர்சனத்திற்காக மனம் திறந்து மன்னிப்பு கோருவதாக திமுக எம்.பி ஆ.ராசா கூறியுள்ளார். இன்று நீலகிரியில் செய்தியாளர்களை சந்தித்த அவர் கூறும் போது,“ எனது பேச்சால் முதல்வர் காயப்பட்டு கலங்கினார் என்ற செய்தியை செய்திதாள்கள் வழியாக கேட்டு மிகுந்த மனவேதனை அடைகிறேன். இடப்பொருத்தமற்று சித்தரிக்கப்பட்டு தவறாக புரிந்துகொள்ளப்பட்ட எனது பேச்சிற்காக எனது அடிமனதின் ஆழத்திலிருந்து வருத்தத்தை தெரிவித்துக்கொள்கிறேன். இன்னும் ஒரு படி மேலே போய் சொல்ல வேண்டுமென்றால், முதல்வர் பழனிசாமி அரசியலுக்கு அல்லாமல், உள்ள படியே காயப்பட்டிருப்பதாக உணர்வாரேயானால் என மனம் திறந்த மன்னிப்பை கோருவதில் எனக்கு சிறிதும் தயக்கமில்லை. எனது பேச்சு இரண்டு தலைவர்களை பற்றிய தனிமனித விமர்சனம் அல்ல. பொதுவாழ்வில் இரண்டு அரசியல் ஆளுமைகள் குறித்த மதிப்பீடும் ஒப்பீடும்தான்.” என்றார்.   முன்னதாக, திமுக துணை பொதுச்செயலாளரும், நீலகிரி நாடாளுமன்ற உறுப்பினருமான ஆ. ராசா முதல்வரின் தாயார் குறித்து பேசிய பேச்சு சர்ச்சைக்குள்ளானது. அதனைத்தொடர்ந்து அதிமுக சார்பில் அளிக்கப்பட்ட புகாரில் திமுக எம்.பி. ஆ.ராசா மீது 3 பிரிவுகளின் கீழ் மத்திய குற்றப்பிரிவு போலீசார் வழக்குப்பதிவு செய்தனர். ஆ.ராசாவின் பேச்சுக்கு ஸ்டாலின், கனிமொழி உள்ளிட்ட தலைவர்கள் கண்டனம் தெரிவித்த நிலையில், ஆ.ராசாவும் தான் பேசிய பேச்சுக்கு வருத்தம் தெரிவித்தார். இந்த நிலையில் நேற்று திருவொற்றியூரில் பரப்புரை மேற்கொண்ட முதல்வர் எடப்பாடி பழனிசாமி ஆ.ராசாவின் விமர்சனம் குறித்து பேசிய போது நா தழுதழுக்க கண்கலங்கினார். 
http://dlvr.it/RwcpfS

Read More

கொரோனா அச்சுறுத்தலுக்கு மத்தியில் வட மாநிலங்களில் ஹோலி பண்டிகை உற்சாகக் கொண்டாட்டம்!

கொரோனா அச்சுறுத்தலுக்கு மத்தியிலும் வட மாநிலங்களில் ஹோலி பண்டிகை வழக்கமான உற்சாகத்துடன் கொண்டாடப்பட்டது. வண்ணங்களின் பண்டிகை என்று அழைக்கப்படும் ஹோலி பண்டிகை நாடு முழுவதும் இன்று கொண்டாடப்படுகிறது. வடமாநிலங்களில் மக்கள் உற்சாகமாக ஒருவர் மீது ஒருவர் வண்ணப்பொடிகளை வீசி மகிழ்ச்சியை வெளிப்படுத்தி வருகின்றனர். குறிப்பாக உத்திரபிரதேச மாநிலம் பிருந்தாவனத்தில் ஹோலி பண்டிகை களைகட்டியுள்ளது. ஆயிரக்கணக்கான பக்தர்கள் பிருந்தாவனத்தில் உள்ள BANKE BIHARI கோயிலில் ஒன்று திரண்டு மிகுந்த உற்சாகத்துடன் பண்டிகையை கொண்டாடி மகிழ்ந்து வருகின்றனர். இதனால் அந்த பகுதியே வண்ணமயமாக காட்சி அளிக்கிறது. இதே போல பல்வேறு மாநிலங்களில் மக்கள் ஹோலியை கொண்டாடுகின்றனர். எனினும் கொரோனா தொற்று பரவல் அதிகம் உள்ள மகாராஷ்டிராவில் ஹோலி கொண்டாட்டத்திற்கு முற்றிலும் தடை விதிக்கப்பட்டுள்ளது. டெல்லி, ராஜஸ்தான் , பீகார் ஆகிய மாநிலங்களில் பொது இடங்களில் மக்கள் கொண்டாட்டத்திற்கு தடை விதிக்கப்பட்டுள்ளது.
http://dlvr.it/RwZfG5

Read More

தற்போதைய அதிமுகவை ஆர்எஸ்எஸ்-பாஜக இயக்குகிறது : ராகுல்காந்தி கடும் குற்றச்சாட்டு

தற்போது இருப்பது பழைய அதிமுக இல்லை, இப்போது அதிமுகவை ஆர்.எஸ்.எஸ் – பாஜகதான் இயக்குகிறது, அதிமுக என்ற முகமூடியுடன் ஆர்.எஸ்.எஸ்-பாஜகதான் தற்போது இயங்குகிறது என்று காங்கிரஸ் எம்.பி ராகுல் காந்தி தெரிவித்தார் சேலத்தில் திமுக கூட்டணி கட்சி தலைவர்கள் பங்கேற்கும் மாநாட்டில் பேசிவரும் காங்கிரஸ் எம்.பி ராகுல்காந்தி “தற்போது இருப்பது பழைய அதிமுக இல்லை, இப்போது உள்ளது ஆர்.எஸ்.எஸ் – பாஜகவால் இயக்கப்படும் அதிமுகவே. அதிமுக என்ற முகமூடியுடன் ஆர்.எஸ்.எஸ்-பாஜகதான் தற்போது இயங்குகிறது. ஒரு தமிழர் கூட மோடி, அமித்ஷா, மோகன் பகவத் காலில் விழ விரும்பவில்லை, அப்படியிருக்கையில் தமிழக முதல்வர் எடப்பாடி பழனிசாமி மற்றும் அதிமுகவினர் அப்படி செய்கின்றனர். புலனாய்வுத்துறை மத்திய அரசின் வசம் இருப்பதால்தான், தவறு செய்த தமிழக முதல்வர் தலைகுனிய நேரிடுகிறது. பல்வேறு சிறிய, பெரிய பொருட்களை உருவாக்கி, இந்த நாட்டின் உற்பத்தி தலைநகராக விளங்குவது தமிழகம். இந்த நாடே நீங்கள் அனுமதித்த காரணத்தால்தான் இயங்கிக்கொண்டிருக்கிறது. ஆனால், மத்திய அரசின் பணமதிப்பிழப்பு மற்றும் ஜிஎஸ்டி காரணமாக பல இலட்சம் பேர் வேலைவாய்ப்பை இழந்தனர், அதுபற்றி அதிமுக முதல்வர் பேசவே மாட்டார். விவசாயிகளை பாதிக்கும் சட்டங்களை ஏன் உருவாக்குகிறீர்கள் என்று அதிமுக முதல்வர், பிரதமரிடம் கேள்வி கேட்க மாட்டார். புதிய கல்விக்கொள்கை, நீட் என்று எதை செய்தாலும், தமிழக முதல்வர் கேள்வியே கேட்கமாட்டார். தமிழ் மொழி, கலாசாரம் , பண்பாட்டுக்காக மட்டும் நான் பேசவில்லை. எல்லா மொழிகளுக்குமாக நிற்கிறேன். தமிழர்களின் வரலாறும், பண்பாடும் சிறந்தது, தமிழர்களுக்கு நிகராக யாரும் இருக்க முடியாது என்பதை உணரலாம். தமிழ் கலாச்சாரம், மொழி, வரலாற்றின் மீது முழுமையான தாக்குதலை சந்தித்துக்கொண்டிருக்கிறோம். இந்த தாக்குதலை முறியடிப்பதற்கான தேர்தல் இது” என தெரிவித்தார்  
http://dlvr.it/RwYJJH

Read More

கோவையை நம்பர் 1 ஆக மாற்றுவேன் : கமல்ஹாசன்

கோவையை நம்பர் 1 ஆக மாற்றுவேன் என்று கோவை தெற்கு தொகுதி வேட்பாளர், மக்கள் நீதி மய்யம் கட்சியின் தலைவர் கமல்ஹாசன் தெரிவித்தார். கோயமுத்தூர் தெற்கு தொகுதியில் மநீம கட்சியின் சார்பாக போட்டியிடுகிறார், அக்கட்சியின் தலைவர் கமல்ஹாசன். இத்தொகுதியில் பிரச்சாரத்தில் பேசும்போது “ கோவையை நம்பர் 1 ஆக மாற்றுவேன்” என்று தெரிவித்தார்.
http://dlvr.it/RwYJHd

Read More

அமைச்சர் எம்.சி சம்பத் உறவினர் பள்ளியில் ஐடி சோதனை

அமைச்சர் எம்.சி.சம்பத்தின் சம்மந்தி இளங்கோவன் நடத்தும் பள்ளியில் அதிகாரிகள் சோதனை நடத்தி வருகின்றனர். சட்டமன்ற தேர்தல் நெருங்கிவருதை ஒட்டி, கடந்த சில தினங்களாகவே வருமானவரித் துறையினர் பல இடங்களில் சோதனை நடத்திவருகின்றனர். இன்று ஒருசில கல்வி நிறுவனங்களில் சோதனையானது தொடர்ச்சியாக நடைபெற்று வருகிறது. அந்த வரிசையில், தருமபுரியில் அமைச்சர் எம்.சி.சம்பத்தின் உறவினருக்கு சொந்தமான பள்ளியில் வருமானவரித்துறையினர், தேர்தல் பறக்கும்படையினர் மற்றும் காவல்துறையினர் அனைவரும் சோதனையில் ஈடுப்பட்டுள்ளனர். தமிழக தொழிலாளர் நலத்துறை அமைச்சர் சம்பத்தின் சம்மந்தியான தனியார் பள்ளிக் கூட்டமைப்புகளின் மாநில செயலாளரான இளங்கோவனுக்கு சொந்தமான பள்ளி இது. சோதனை முடிந்தபின்னர்தான் இதுகுறித்த விவரங்கள் தெரியவரும். இதற்குமுன்பு திமுகவைச் சேர்ந்த எ.வ வேலு மற்றும் அதிமுக அமைச்சர் விஜயபாஸ்கரின் உறவினர் வீட்டில் வருமானவரித்துறையினர் சோதனையில் ஈடுபட்டது குறிப்பிடத்தக்கது.
http://dlvr.it/RwWt11

Read More