கொரோனா பரவல்: ஏப்.8இல் அனைத்து மாநில முதல்வர்களுடன் பிரதமர் ஆலோசனை!

கொரோனா தொற்று அதிகரித்து வரும் நிலையில் , ஏப்ரல் 8இல் அனைத்து மாநில முதல்வர்களுடன் பிரதமர் மோடி ஆலோசனை நடத்தவுள்ளார். கொரோனா பரவல் குறித்தும், கொரோனா பரவை கட்டுப்படுத்துவதற்கான நடவடிக்கைகள் குறித்தும் தமிழகம், மகாராஷ்டிரா, கேரளா உள்ளிட்ட அனைத்து மாநிலங்களின் முதல்வர்களுடன் ஆலோசனை செய்யப்படவுள்ளது. இந்தியாவில் கடந்த ஆண்டு இறுதியில் படிப்படியாக குறைந்த கொரோனா பாதிப்பு அண்மை காலமாக மீண்டும் அதிகரித்து வருகிறது. அந்த வகையில் கடந்த 24 மணி நேரத்தில் மட்டும் ஒரு லட்சத்து 3 ஆயிரத்து 558 பேருக்கு வைரஸ் தொற்று கண்டறியப்பட்டுள்ளது. இதன் மூலம் உலகளவில் தினசரி கொரோனா பாதிப்பில் இந்தியா தொடர்ந்து முதலிடத்தில் உள்ளது. இந்தியாவில் கடந்த ஆண்டு கொரோனா முதல் அலையின்போது அதிகபட்சமாக செப்டம்பர் 17ஆம் தேதி 98 ஆயிரத்து 795 பேர் பாதிக்கப்பட்டனர். நாடு முழுவதும் இதுவரை ஒரு கோடியே 25 லட்சத்து 89 ஆயிரத்து 67 பேருக்கு கொரோனா தொற்று ஏற்பட்டுள்ளது. கடந்த 24 மணி நேரத்தில் ஒருலட்சத்திற்கும் அதிகமானோருக்கு பாதிப்பு ஏற்பட்டிருக்கும் வேளையில் 52 ஆயிரத்து 847 பேர் மட்டுமே குணமடைந்துள்ளனர். கொரோனாவால் உயிரிழந்தோர் எண்ணிக்கை 478 ஆக உள்ளது. இது ஒருபுறமிருக்க தடுப்பூசி போடும் பணியும் நாடு முழுவதும் தீவிரப்படுத்தப்பட்டுள்ளது. இது வரை 7 கோடியே 91 லட்சத்து 5 ஆயிரத்து 163 பேருக்கு கொரோனா தடுப்பூசி போடப்பட்டுள்ளது.
http://dlvr.it/Rx3lpT

Read More

மகாராஷ்டிரா: உள்துறை அமைச்சர் ராஜினாமா! - லஞ்ச புகார் குறித்து சி.பி.ஐ விசாரிக்க நீதிமன்றம் உத்தரவு

மும்பையில் போலீஸ் கமிஷனராக இருந்த பரம்பீர்சிங் சமீபத்தில் மகாராஷ்டிராவில் உள்துறை அமைச்சராக இருக்கும் அனில் தேஷ்முக் மீது மிகப்பெரிய லஞ்ச ஊழல் புகாரை சுமத்தி இருந்தார். இப்புகார் குறித்து சி.பி.ஐ.விசாரிக்க உத்தரவிடவேண்டும் என்று கோரி சுப்ரீம் கோர்ட்டில் மனுத்தாக்கல் செய்தார். இம்மனுவை விசாரிக்க மறுத்த சுப்ரீம் கோர்ட், இது குறித்து மும்பை உயர் நீதிமன்றத்தை அணுகும்படி சுப்ரீம் கோர்ட் கேட்டுக்கொண்டது. மும்பை ஐகோர்ட் அதன் அடிப்படையில் பரம்பீர் சிங் கடந்த மாதம் 25ம் தேதி மும்பை உயர்நீதிமன்றத்தில் இது தொடர்பாக மனுத்தாக்கல் செய்தார். அம்மனுவில், ``மும்பையில் குற்றப்பிரிவு போலீஸ் அதிகாரியாக பணியாற்றி வந்த சச்சின் வாஸ் என்பவரிடம் ஒவ்வொரு மாதமும் மும்பை பீர் பார், ரெஸ்டாரண்ட்களில் லஞ்சமாக வசூலித்து தன்னிடம் 100 கோடி கொடுக்கவேண்டும் என்று அனில் தேஷ்முக் கேட்டுக்கொண்டார். இது தொடர்பாக சச்சின் வாஸ் என்னை சந்தித்த போது தெரிவித்தார். இது தவிர போலீஸ் உயர் அதிகாரிகளையும் தனது அலுவலகத்திற்கு அழைத்து லஞ்சம் வசூலித்து கொடுக்கும்படி அனில் தேஷ்முக் தெரிவித்தார். போலீஸ் அதிகாரிகளின் இட ஒதுக்கீடிலும் அரசியல் தலையீடுகள் இருந்தது. எனவே இக்குற்றச்சாட்டு குறித்து சி.பி.ஐ.விசாரணைக்கு உத்தரவிடவேண்டும். என்னை இடமாற்றம் செய்து பிறப்பித்த உத்தரவை ரத்து செய்யவேண்டும்” என்றும் தெரிவித்திருந்தார். இம்மனு மீதான விசாரணை தலைமை நீதிபதி தின்பகர் தத்தா தலைமையிலான அமர்வு முன்பு கடந்த 31ம் தேதி விசாரணை நடைபெற்று முடிந்து தீர்ப்பு ஒத்திவைக்கப்பட்டது. பரம்பீர் சிங் மட்டுமல்லாது, வழக்கறிஞர் ஜெய்ஸ்ரீபாட்டீல் மற்றும் ஆசிரியர் மோகன் ஆகியோரும் பரம்பீர் சிங் புகார் குறித்து விசாரிக்க வேண்டும் என்று கூறி மனுத்தாக்கல் செய்திருந்தனர். இம்மனுக்கள் மீதான விசாரணையின் போது மாநில அரசு தரப்பில் ஆஜரான வழக்கறிஞர், பரம்பீர் சிங்கின் குற்றச்சாட்டில் உண்மை இல்லை என்றும் இடமாற்றம் செய்யப்பட்டதால் இது போன்று புகார் செய்துள்ளார் என்று தெரிவிக்கப்பட்டது. மூன்று மனுக்களையும் ஒன்றாக விசாரித்த நீதிபதிமன்றம், இதில் 5ம் தேதி தீர்ப்பளித்தது. பரம்பீர் சிங் மீதான குற்றச்சாட்டு குறித்து சி.பி.ஐ.விசாரணைக்கு உத்தரவிட்ட நீதிபதிகள், ஆரம்பக்கட்ட விசாரணையை 15 நாட்களில் நடத்தும் படியும், விசாரணையில் குற்றச்சாட்டுக்கு பூர்வாங்க ஆதாரம் இருந்தால் வழக்குப் பதிவு செய்யும்படியும் சி.பி.ஐ.அதிகாரிகளுக்கு உத்தரவிட்டனர். அனில் தேஷ்முக் மாநில உள்துறை அமைச்சராக இருப்பதால் மாநில போலீஸாரைக்கொண்டு விசாரிப்பது பாரபட்சமற்றதாக இருக்காது. எனவேதான் சி.பி.ஐ.விசாரணைக்கு உத்தரவிடப்படுகிறது என்றும் நீதிபதிகள் தெரிவித்தனர். நீதிமன்றத்தின் இத்தீர்ப்பு அனில் தேஷ்முக்கிற்கு பின்னடைவாக அமைந்துள்ளது. சச்சின் வாஸ் உயர்நீதிமன்றத்தின் இந்த உத்தரவை தொடர்ந்து அமைச்சர் அனில் தேஷ்முக் தனது அமைச்சர் பதவியை ராஜினாமா செய்தார். ராஜினாமா கடிதத்தை முதல்வர் உத்தவ் தாக்கரேயிடம் கொடுத்துள்ளார். உயர் நீதிமன்றத்தின் இத்தீர்ப்புக்கு பரம்பீர் சிங் மற்றும் முன்னாள் முதல்வர் தேவேந்திர பட்நவிஸ் ஆகியோர் வரவேற்பு தெரிவித்துள்ளனர். அதேசமயம் இக்குற்றச்சாட்டு வெளியான புதிதில் சிவசேனா கூட்டணி அரசை கவிழ்க்கவேண்டும் என்ற நோக்கத்தில் பாஜக சில போலீஸ் அதிகாரிகளின் துணையோடு செயல்படுவதாக சிவசேனா, தேசியவாத காங்கிரஸ் கட்சிகள் குற்றம் சாட்டியிருந்தது குறிப்பிடத்தகது.
http://dlvr.it/Rx3lkH

Read More

மும்பை: காவலர்கள் தாக்கியதில் வாலிபர் உயிரிழந்தாரா? - 3 ஆண்டுகளுக்கு பிறகு மீண்டும் பிரேத பரிசோதனை

மும்பை தாராவியில் உள்ள ராஜீவ்காந்தி நகரில் வசித்து வந்தவர் சச்சின் ஜெய்ஸ்வர்(17). கடந்த 2018ம் ஆண்டு ஜூலை மாதம் 12ம் தேதி சாதாரண உடையில் சச்சின் வீட்டிற்கு வந்த போலீஸார் சச்சின் எங்கே என்று கேட்டுள்ளனர். வீட்டில் சச்சின் பிறந்தநாள் கொண்டாடிக் கொண்டிருந்தார். எதற்காக கேட்கிறீர்கள் என்று போலீஸாரிடம் கேட்டதற்கு, மொபைல் போன் திருட்டு தொடர்பாக விசாரிக்க வேண்டும் என்று தெரிவித்துள்ளனர். மறுநாள் போலீஸார் மீண்டும் வந்து சச்சினை விசாரிக்கவேண்டும் என்று கூறி அழைத்து சென்றனர். போலீஸார் அழைத்து சென்ற மறுநாள் சச்சின் திரும்ப வந்தார். அவர் தனது உடல் கடுமையாக வலிப்பதாக தெரிவித்தார். உடல் வலி அதிகரிக்கவே அவரை சயான் மாநகராட்சி மருத்துவமனைக்கு கொண்டு சென்றனர். அங்கு சிகிச்சை பெற்று வந்த சச்சின் 21ம் தேதி இறந்து போனார். தங்களது மகனை போலீஸார் கொடூரமாக அடித்து உதைத்ததால்தான் இறந்து போனதாக கூறி சச்சின் உடலை வாங்க மறுத்தனர். சச்சின் இது குறித்து விசாரிக்க வேண்டும் என்று கூறினர். இதையடுத்து குற்றப்பிரிவு போலீஸார் விசாரணைக்கு உத்தரவிடப்பட்டது. விசாரணையில் சச்சினை போலீஸார் துன்புறுத்தவில்லை என்று தெரிவிக்கப்பட்டது. ஆனால் அதனை சச்சின் பெற்றோர் ஏற்கவில்லை. உடலை பெற்றுக் கொள்ளாமல் இது தொடர்பாக மும்பை உயர்நீதிமன்றத்தில் வழக்கு தொடர்ந்தனர். நீதிபதி மணீஷ் தலைமையிலான அமர்வு விசாரித்தது. விசாரணையில் சச்சின் குடும்பத்தினர் மற்றும் அரசு வழக்கறிஞர் தரப்பினரின் கருத்தை கேட்ட பிறகு சச்சின் உடலை மீண்டும் இரண்டாவது முறையாக பிரேதபரிசோதனைக்கு உத்தரவிட்டனர். மேலும் இரண்டாவது பிரேத பரிசோதனைக்கு பிறகு உடலை பெற்று இறுதிச்சடங்குகளை செய்வதாக சச்சின் பெற்றோர் தரப்பில் தெரிவிக்கப்பட்டது. மரணம் 3 நாட்களில் பிரேத பரிசோதனை நடத்தவேண்டும் என்றும் ஏற்கனவே பிரேத பரிசோதனை நடத்தியவர்கள் இரண்டாவது பிரேத பரிசோதனையில் இடம் பெறக்கூடாது என்றும் நீதிபதிகள் உத்தரவிட்டனர். இது குறித்து சச்சின் தந்தை ரவீந்திர ஜெய்ஸ்வர் கூறுகையில், ``இரண்டரை ஆண்டுகள் போராடிய எங்களுக்கு நீதி கிடைக்கும் என்ற நம்பிக்கை இப்போது ஏற்பட்டு இருக்கிறது” என்று தெரிவித்தார்.
http://dlvr.it/Rx1mHK

Read More

பொதுமக்கள் பயமின்றி வாக்களிக்க அனைத்து ஏற்பாடுகளும் தயார் - சென்னை கமிஷனர் மகேஷ்குமார்

தேர்தல் பாதுகாப்பு பணியில் துணை ராணுவத்தினருடன் சேர்ந்து 30 ஆயிரம் போலீசார் சென்னையில் ஈடுபட உள்ளதாகவும், விதிகளை மீறி சமூக வலைதளங்களில் தேர்தல் பரப்புரையில் யாராவது ஈடுபடுகிறார்களா? என்பதனை சைபர் கிரைம் போலீசார் கண்காணித்து வருவதாகவும் சென்னை காவல் ஆணையர் மகேஷ் குமார் அகர்வால் தெரிவித்துள்ளார். சட்டமன்ற தேர்தல் 2021 பாதுகாப்பு நடவடிக்கைகள் குறித்து சென்னை காவல் ஆணையர் மகேஷ்குமார் அகர்வால் செய்தியாளர்களை சந்தித்தார். அப்போது அவர் பேசும்போது, "சென்னை காவல்துறைக்குட்பட்ட பகுதிகளில் 30 சட்டமன்ற தொகுதிகள் உள்ளது. இதில், 2083 வாக்குப்பதிவு இடங்களும், 11872 வாக்குச்சாவடிகளும் உள்ளது. அதில், 327 பதற்றமான வாக்குப்பதிவு இடங்களில் 1349 வாக்குச்சாவடி மையங்களும், 10 மிகவும் பதற்றமான வாக்குப்பதிவு இடங்களில் 30 வாக்குச்சாவடி மையங்களும் அமைந்துள்ளன. அனைத்து வாக்குச்சாவடிகளிலும் ஒரு காவலர் மற்றும் சிறப்பு காவலர்களால் பாதுகாப்பு பணி மேற்கொள்ளப்படும். மிகவும் பதற்றமான வாக்குச்சாவடிகளில் 50 சதவீதம் துணை ராணுவத்தினரும் காவலர்களும், பதற்றமான வாக்குச்சாவடிகளில் 50 சதவீதம் துணை ராணுவத்தினரும் போலீசாரும் வாக்குப்பதிவு இடங்களில் பாதுகாப்பு பணியில் இருப்பார்கள். லயோலா கல்லூரி, ராணிமேரி கல்லூரி, அண்ணா பல்கலைக்கழகம் மற்றும் தாம்பரம் கிறிஸ்துவ கல்லூரி ஆகிய 4 இடங்களில் வாக்கு எண்ணும் மையங்கள் அமைந்துள்ளன. இங்குள்ள வாக்குப்பதிவு எந்திரங்கள் பாதுகாப்பு அறைகளுக்கு துணை ராணுவத்தினர், காவலர்களால் பாதுகாப்பு மேற்கொள்ளப்படுவதோடு; 3 அடுக்கு போலீஸ் பாதுகாப்பு போடப்பட உள்ளது. சென்னை முழுவதும் தேர்தல் நடத்தை விதிமுறைகளை மீறியதாக 371 வழக்குகளும், தேர்தலுக்கு முந்தைய நாட்களில் நடைபெற்ற சம்பவங்கள் குறித்து 18 வழக்குகளும், பொது இடங்களில் சுவரொட்டிகள் ஒட்டியதாக 605 வழக்குகளும் பதிவு செய்யப்பட்டுள்ளது. வாகன தணிக்கையின் போது சுமார் 44.11 கோடி ரூபாயும், சுமார் 50 கிலோ தங்கநகைகள், சுமார் 119 கிலோ வெள்ளி நகைகள் சுமார் 8.5 சென்டு வைர நகைகள் மற்றும் 2889 லிட்டர் மதுபானங்கள் கைப்பற்றப்பட்டுள்ளன. வாக்காளர்களுக்கு பணம் பட்டுவாடா செய்த புகாரில் 9 வழக்குகள் பதிவு செய்யப்பட்டு நடவடிக்கைகள் மேற்கொள்ளப்பட்டு வருகிறது. சென்னை மாநகர காவல்துறையில் உள்ளூர் காவல்துறை, ஆயுதப்படை காவலர்கள் உள்பட சுமார் 23,500 காவல் துறையினரும், 18 மத்திய படையினரும், 10 சிறப்பு காவல் படையினரும், 3000 சென்னை ஊர்க்காவல் படையினரும், 1800 கர்நாடக மாநிலத்தை சேர்ந்த ஊர்க்காவல் படையினரும், 700 ஓய்வுபெற்ற காவலர்கள் மற்றும் இராணுவத்தினரும் தேர்தல் பாதுகாப்பு பணியில் ஈடுபடுத்தப்பட்டு உள்ளனர். இன்று இரவு 7 மணிக்கு பிறகு வெளியாட்கள் சென்னைக்குள் தங்கியிருக்கக் கூடாது. இதனை கண்காணிக்கவும் சோதனை செய்யவும் அந்தந்த காவல் நிலையங்களுக்கு உத்தரவிடப்பட்டுள்ளது. அதனை மீறி தங்கியிருந்தால் சட்டப்படி நடவடிக்கை எடுக்கப்படும். மதுபானங்களை சட்டவிரோதமாக பதுக்கி வைத்தல், விற்கப்படுவதை காவல்துறை தீவிரமாக கண்டறிந்து நடவடிக்கை மேற்கொள்ளும். இதனை மீறி செயல்பட்டால் நடவடிக்கை எடுக்கப்படும். அமைதியான முறையில் தேர்தல் நடத்த சென்னை காவல்துறையில் கட்டுப்பாட்டு அறை திறக்கப்பட்டுள்ளது. தேர்தல் சம்பந்தமான புகார்களை தெரிவிக்க சென்னை, வேப்பேரி, சென்னை மாநகர காவல் ஆணையாளர் அலுவலகத்தில் தேர்தல் பிரிவு உருவாக்கப்பட்டு 24 மணி நேரமும் தொடர்ந்து பணிபுரிந்து வருகிறார்கள். தேர்தல் சம்பந்தமான புகார்களை 044-23452437, 9498181239 என்ற எண்ணில் தெரிவிக்கலாம். சென்னையில் உள்ள 792 மொபைல் பார்ட்டிகளையும் மின்னணு இயந்திரங்களை பாதுகாப்பு அறைகளிலிருந்து வாக்குச்சாவடிகளுக்கு கொண்டு சென்று பின்னர் வாக்குப்பதிவு முடிந்தவுடன் சம்பந்தப்பட்ட வாக்கு எண்ணும் மையங்களுக்கு கொண்டு செல்வதை கண்காணிக்க மொபைல் செயலி உருவாக்கப்பட்டு கண்காணிக்கப்படுகிறது. தேர்தல் பரப்புரை முடிந்த பிறகு வெளிஆட்கள் யாரும் தொகுதிக்குள் இருக்க கூடாது. அதனை மீறியும் இருந்தால் அவர்கள் மீது நடவடிக்கை எடுக்கப்படும். சென்னையில் உள்ள தங்கும் விடுதிகள், திருமண மண்டபங்கள் உள்பட பல்வேறு இடங்களில் காவல்துறையினர் கண்காணிப்பு பணியில் ஈடுபட்டுள்ளனர். வாக்குப்பதிவு மையங்களுக்குள் யாரும் செல்போன்களை கொண்டு செல்லக்கூடாது. தேர்தல் பரப்புரைக்கான காலம் முடிந்த பிறகு சமூக வலைதளங்கள் மூலம் யாரும் தேர்தல் பரப்புரையில் ஈடுபடக்கூடாது. சமூக வலைதளங்கள் மூலம் யாராவது தேர்தல் பரப்புரைகளில் ஈடுபடுகிறார்களா? என்பதனை சைபர் கிரைம் போலீசார் கண்காணித்து வருகின்றனர். அமைதியான முறையில் தேர்தல் நடத்த அனைத்து பாதுகாப்பு ஏற்பாடுகளையும் செய்துள்ளோம். பொதுமக்கள் பயமில்லாமல் சுதந்திரமாக வந்து தங்கள் வாக்குகளை பதிவு செய்ய அனைத்து பாதுகாப்பு ஏற்பாடுகளையும் காவல்துறை செய்துள்ளது. வாக்குப்பதிவு எந்திரங்கள் வைக்குப்படும் மையங்களில் சிசிடிவி கேமராக்கள் பொருத்தப்பட்டு முழுமையாக கண்காணிப்பு வளையத்திற்குள் வந்துவிடும். வாக்குப்பதிவு நடைபெறும் மையங்களில் சுமார் 3 ஆயிரம் சிசிடிவிகள் பொருத்தப்பட்டுள்ளது. தேர்தல் அதிகாரிகள் அதற்கான ஏற்பாடுகளை செய்துள்ளனர். அவர்களுடன் சேர்ந்து காவல் துறையினரும் ஆய்வு செய்வார்கள். வாக்குகள் எண்ணுவதற்கு ஒரு மாத கால அவகாசம் இருப்பதால் பாதுகாப்பை தீவிரப்படுத்துவோம். தேவைப்பட்டால் கூடுதலாக்குவோம்" என்று சென்னை காவல்துறை ஆணையர் மகேஷ் குமார் அகர்வால் கூறியுள்ளார்.
http://dlvr.it/Rx0V09

Read More

இறுதிகட்ட தேர்தல் பரப்புரையில் ஈடுபட்ட அரசியல் தலைவர்கள்...!

இன்றுடன் பரப்புரை நிறைவடையும் நிலையில், அரசியல் கட்சி தலைவர்கள் மற்றும் வேட்பாளர்கள் இறுதிகட்ட பரப்புரையில் ஈடுபட்டனர். வரும் ஏப்ரல் 6 ஆம் தேதி தமிழகத்தில் ஒரே கட்டமாக சட்டமன்ற தேர்தல் நடைபெறவுள்ளது, இத்தேர்தலுக்கான பரப்புரை இன்று நிறைவடைகிறது. இச்சூழலில் அரசியல் கட்சி தலைவர்கள் மற்றும் வேட்பாளர்கள் இறுதிகட்ட பரப்புரையில் பரபரப்புடன் ஈடுபட்டுள்ளார்கள்.
http://dlvr.it/Rx0TyL

Read More

தலைவர்களின் வாக்குறுதிகள் முதல் அதிகரிக்கும் கொரோனா வரை... முக்கியச் செய்திகள்

தலைவர்களின் வாக்குறுதிகள் முதல் அதிகரிக்கும் கொரோனா வரை என இன்றைய முக்கியச் செய்திகள் தமிழக சட்டப்பேரவைத் தேர்தலுக்கான பரப்புரை இன்று மாலையுடன் ஓய்கிறது. முதலமைச்சர் எடப்பாடியிலும், திமுக தலைவர் ஸ்டாலின் கொளத்தூரிலும் முகாமிட்டுள்ளனர். திமுக ஆட்சியில் மாநிலம் சார்ந்த உரிமைகள் ஒருபோதும் விட்டுக்கொடுக்கப்படாது என சென்னையில் பரப்புரை மேற்கொண்ட திமுக தலைவர் மு.க.ஸ்டாலின் உறுதியளித்தார். தமிழகத்தில் குடும்ப ஆட்சியா அல்லது எம்ஜிஆர் ஆட்சியா என்பதை இந்த தேர்தல் தீர்மானிக்கும் என நெல்லையில் வாக்குசேகரித்த அமித் ஷா கூறினார். பணம் தருபவர்களை செல்போனில் படம் பிடித்து சமூக ஊடகங்களில் பதிவிடுங்கள் என்று கமல்ஹாசன் வேண்டுகோள் விடுத்துள்ளார். கோவில்பட்டியை தலைமையிடமாகக் கொண்டு தனி மாவட்டம் உருவாக்கப்படும் என தேர்தல் பரப்புரையில் அமமுக பொதுச் செயலாளர் டிடிவி தினகரன் உறுதியளித்தார். தேர்தல் தேதி நெருங்கும் நிலையில் மாநிலம் முழுவதும் தேர்தல் பறக்கும் படையினர் சோதனைகளை தீவிரப்படுத்தியுள்ளனர். தேர்தல் பரப்புரையின்போது அவதூறாக பேசியதாக திமுக எம்பிக்கள் ஆ.ராசா, தயாநிதிமாறன் மற்றும் நட்சத்திர பேச்சாளர் லியோனி மீதும் வழக்குப்பதிவு செய்யப்பட்டுள்ளது. ஆயிரம் விளக்கு தொகுதி பாரதிய ஜனதா வேட்பாளர் குஷ்பு மீது வழக்குப்பதிவு செய்யப்பட்டுள்ளது. அறிவுறுத்தலை மீறி வழிபாட்டுத்தலம் முன் பரப்புரை செய்ததாக கூறி காவல்துறை நடவடிக்கை எடுத்துள்ளது. தேர்தலை ஒட்டி இன்று முதல் 3 நாட்களுக்கு டாஸ்மாக் கடைகள் மூடப்படுவதால், இருப்பு வைக்க கடைகளில் மதுக் குடிப்போர் குவிந்தனர். தூத்துக்குடி மாவட்டம் விளாத்திகுளம் அருகே தேர்தல் தொடர்பாக அதிமுக, திமுகவினர் இடையே மோதல் ஏற்பட்டது. அதிமுக நிர்வாகியின் 2 வேன்களுக்கு தீ வைக்கப்பட்டதால் பதற்றம் நிலவியது. தமிழகத்தில் கொரோனா தொற்று தொடர்ந்து 2ஆவது நாளாக 3 ஆயிரத்தை தாண்டியது. தேவைப்படும் பட்சத்தில் கடும் கட்டுப்பாடுகள் கொண்டு வரப்படும் என தலைமைச் செயலாளர் ராஜிவ் ரஞ்சன் தகவல் தெரிவித்துள்ளார். அடுத்த இரண்டு நாட்கள் 27 மாவட்டங்களில் வெயில் 6 டிகிரி செல்சியஸ் வரை உயரும் என சென்னை வானிலை ஆய்வு மையம் எச்சரிக்கை செய்துள்ளது.
http://dlvr.it/Rwz657

Read More

தேர்தல் பார்வையாளருக்கு கொரோனா: முன்னுதாரண செயலால் மக்களை ஈர்த்த மதுரை ஆட்சியர்!

மதுரையில் கொரோனா தொற்றால் பாதிக்கப்பட்ட தேர்தல் பார்வையாளரான ஐ.பி.எஸ் அதிகாரியை, தனது சொந்த காரில் ஏற்றி தானே ஓட்டி சென்று மருத்துவமனையில் சேர்த்த மாவட்ட ஆட்சியர் அன்பழகனுக்கு பாராட்டுகள் குவிந்து வருகின்றன. தமிழக சட்டமன்ற தேர்தல் பணிகளுக்கு கண்காணிப்பு அதிகாரிகளாக வெளி மாநிலங்களை சேர்ந்த பல ஐ.ஏ.எஸ் மற்றும் ஐ.பி.எஸ் அதிகாரிகள் நியமிக்கப்பட்டு உள்ளனர். மதுரை மாவட்டத்தில் தேர்தல் பணிகளில் ஈடுபட்டு வரும் காவலர்களை கண்காணிக்க பார்வையாளராக உத்தரப் பிரதேசத்தை சேர்ந்த தரம் வீர் யாதவ் என்கிற ஐ.பி.எஸ் அதிகாரி கடந்த 10 நாள்களாக பணியாற்றி வருகிறார். மதுரை மாநகராட்சி அலுவலகம் எதிரே உள்ள காவல்துறை விடுதியில் தங்கியிருந்த அவருக்கு நேற்று கொரோனா தொற்று உறுதியானது. உடனே தன்னை மருத்துவமனைக்கு அழைத்து செல்லுமாறு, அவருடைய வாகன ஒட்டுநரிடம் கேட்டுள்ளார். மாவட்ட தேர்தல் ஆணையம் சார்பில் நியமிக்கப்பட்டிருந்த அந்த ஓட்டுநர், கொரோனா அச்சம் காரணமாக தன்னால் மருத்துவமனைக்கு வர இயலாது என தெரிவித்ததாக தெரிகிறது. இந்த தகவலை கேள்விப்பட்ட மதுரை மாவட்ட ஆட்சியர் அன்பழகன், உடனே கொரோனா பாதுகாப்பு கவச உடை அணிந்து கொண்டு தன்னுடைய சொந்த காரில் தரம்வீர் யாதவை அழைத்து சென்று அண்ணா பேருந்து நிலையம் அருகில் உள்ள கொரோனா சிறப்பு மருத்துவமனையில் சேர்த்துள்ளார். இது குறித்து தகவலறிந்த அரசு ராஜாஜி மருத்துவமனை டீன் சங்குமணி அவருக்கு தீவிர சிகிச்சை அளிக்க தேவையான ஏற்பாடுகளை செய்தார். இதனை தொடர்ந்து , அவர் தங்கியிருந்த அறையில் கிருமி நாசினி தெளித்து சுத்தம் செய்யப்பட்டு, உடன் பணியாற்றிய நபர்களுக்கும் கொரோனா பரிசோதனை மேற்கொள்ளப்பட்டு அவர்கள் தனிமைப்படுத்தப் பட்டுள்ளனர். மாவட்ட ஆட்சியரின் இந்த பொறுப்பான செயல் மக்கள் மத்தியில் மிகுந்த வரவேற்பை பெற்றுள்ள அதேநேரம், கொரோனா அச்சம் குறித்த விழிப்புணர்வையும் ஏற்படுத்தும் வகையில் அமைந்துள்ளது.
http://dlvr.it/Rwy0nF

Read More