உதவி கேட்ட கொரோனா நோயாளி.. `செத்துப் போ’ என்று இணைப்பைத் துண்டித்த அரசு ஊழியர்! - உ.பி அதிர்ச்சி

இந்தியாவில் கொரோனா நோய்த் தொற்றின் தாக்கம் நாளுக்கு நாள் அதிகரித்துவருகிறது. நோய்த்தொற்று பாதிப்பை கட்டுக்குள் கொண்டுவர மத்திய, மாநில அரசுகள் போராடிக்கொண்டிருக்கின்றன. நோய்த் தொற்றின் தாக்கம் மிகவும் அதிகமாக இருக்கும் மாநிலங்களில் உத்தரப்பிரதேசமும் ஒன்று. உத்தரப்பிரதேசத்தில் நோய்த் தொற்று பாதிப்பு எண்ணிக்கை நாளுக்கு நாள் புது உச்சம் தொட்டுவருகிறது. நேற்றைய தினம் மட்டும் அந்த மாநிலத்தில் 30,000-க்கும் அதிகமானோருக்கு பாதிப்பு உறுதி செய்யப்பட்டுள்ளது. அதிலும், தலைநகர் லக்னோவில் உடல்களைத் தகனம் செய்யக் காத்திருக்கும் சூழல் நிலவிவருகிறது. கொரோனா நிலையைக் கட்டுக்குள் கொண்டுவர உத்தரப்பிரதேச அரசு கொரோனா கட்டுப்பாடுகளைக் கடுமையாக்கியிருக்கிறது. முதல்வர் யோகி ஆதித்யநாத், கொரோனா பாதிப்பு உறுதி செய்யப்பட்டு வீட்டுக் கண்காணிப்பில் உள்ளவர்களுக்கு உதவுவதற்காக, பிரத்யேகச் செயலி ஒன்றை வெளியிட்டிருக்கிறார். சுகாதாரத்துறை அதிகாரிகள் கொரோனா பாதிப்பு உறுதி செய்யப்படுபவர்களுக்கு அந்தச் செயலியை தங்கள் மொபைலில் பதிவிறக்கம் செய்துகொள்ளுமாறு அறிவுறுத்திவருகின்றனர். மேலும், மாநில அரசு தனிக்குழு ஒன்றை அமைத்து கொரோனா நோயாளிகளுக்குத் தேவையான வழிகாட்டுதல்களை வழங்கவும், அவர்களுக்கு மருந்துகள் சரியான நேரத்தில் வழங்கப்படுவதற்காகவும் 24 மணி நேர ஹெல்ப் லைன் நம்பர் ஒன்றையும் வெளியிட்டிருக்கிறது. இந்தநிலையில், தலைநகர் லக்னோவிலிருந்து இளைஞர் ஒருவர் மாநில அரசின் ஹெல்ப் லைன் எண்ணுக்குத் தொடர்புகொண்டு உதவி கேட்டிருக்கிறார். மறுமுனையில் பேசிய கொரோனா கட்டுப்பாட்டு அறை ஊழியரின் பதில் அனைவரையும் அதிர்ச்சிக்குள்ளாக்கியிருக்கிறது. நோயாளியிடம் அரசு ஊழியர் கூறிய அலட்சிய பதில் ஆடியோ பதிவாக வெளியாகி, தற்போது இணையத்தில் வைரலாகப் பகிரப்பட்டுவருகிறது. லக்னோவைச் சேர்ந்த சந்தோஷ் குமார் என்ற இளைஞருக்கும், அவரின் மனைவிக்கும் கடந்த சில தினங்களுக்கு முன் கொரோனா தொற்றின் அறிகுறிகள் தென்பட்டிருக்கின்றன. அதையடுத்து இருவரும் கடந்த 10-ம் தேதி கொரோனா பரிசோதனை மேற்கொண்டிருக்கின்றனர். கடுமையான காய்ச்சலும் தொண்டைவலியும் ஏற்பட்டதால் தம்பதியர் தாங்களாகவே தங்களைத் தனிமைப்படுத்திக் கொண்டிருந்திருக்கிறார்கள். 12-ம் தேதி வெளியான பரிசோதனை முடிவில் அவர்கள் இருவருக்கும் கொரோனா தொற்று பாதிப்பு இருப்பது உறுதி செய்யப்பட்டது. பெரிய குடும்பம் என்பதால், தம்பதியர் தங்களிடமிருந்து மற்றவர்களுக்கும் நோய்த் தொற்று பரவிவிடுமோ என்று அச்சமடைந்திருக்கின்றனர்.தொலைபேசி உரையாடல் இது தொடர்பாக சந்தோஷ், அரசின் கொரோனா ஹெல்ப் லைனுக்குத் தொடர்புகொண்டு நடந்ததைக் கூறி உதவி கேட்டிருக்கிறார். அப்போது, மறுமுனையில் சந்தோஷின் அழைப்புக்குப் பதிலளித்த ஹெல்ப் லைன் ஊழியர் சுசி என்பவர், சந்தோஷிடம் அரசின் கொரோனா செயலியை மொபைலில் பதிவிறக்கம் செய்துவிட்டீர்களா? என்று கேட்டிருக்கிறார். அதற்கு, சந்தோஷ் அப்படி ஒரு செயலி இருப்பதாக எனக்குத் தெரியாது என்றிருக்கிறார். அதற்கு ஹெல்ப் லைன் ஊழியர், மாவட்ட அதிகாரிகள் நிச்சயம் உங்களுக்கு இது பற்றிக் கூறியிருப்பார்கள் எனக் கூற சந்தோஷ், மருத்துவர்கள், சுகாதாரத்துறையினர் என யாரும் எங்களிடம் இந்தச் செயலி பற்றி எதுவும் கூறவில்லை என்று கூறியிருக்கிறார். சந்தோஷின் பதிலைக் கேட்டு ஆத்திரமடைந்த ஹெல்ப் லைன் ஊழியர் சுசி, `அப்படியானால் செத்துப் போ, கல்வியறிவற்ற முட்டாள்' என்று சந்தோஷைத் திட்டிவிட்டு இணைப்பைத் துண்டித்திருக்கிறார். அரசு ஊழியரின் பதிலைக் கேட்டு அதிர்ச்சியில் உறைந்துபோன சந்தோஷ், தன் மொபைலில் ஆட்டோமேட்டிக் கால் ரெக்கார்டர் மூலம் பதிவாகியிருந்த தொலைபேசி உரையாடலை சமூக வலைதளங்களில் அரசின் 'ஹெல்ப் லைன்' குறித்த விமர்சனங்களுடன் பதிவிட்டார். 54 நொடிகள் நீடிக்கும் அந்த உரையாடல் தற்போது சமூக வலைதளங்களில் அதிக அளவில் பகிரப்பட்டு வருகிறது. இந்த விவகாரம் பூதாகரமாக வெடித்ததை அடுத்து, சம்பந்தப்பட்ட அரசு அதிகாரிகள் சந்தோஷைத் தொடர்புகொண்டு தங்கள் தவறுக்கு மன்னிப்பு கோரியிருக்கின்றனர். ஆனால், மன்னிப்புக் கேட்ட அதிகாரிகள் சந்தோஷுக்கு எந்த உதவியையும் செய்யாததால், அவர் தற்போது முதல்வர் யோகி ஆதித்யநாத்துக்குத் தனக்கு நேர்ந்த கசப்பான அனுபவம் குறித்துக் கடிதம் எழுதியிருக்கிறார். முதல்வருக்குக் கடிதம் அனுப்பியுள்ள இளைஞர் சந்தோஷின் தந்தை பாரதிய ஜனதா கட்சியின் முன்னாள் மாவட்டத் தலைவர் என்பது குறிப்பிடத்தக்கது.யோகி ஆதித்யநாத்துக்கு சந்தோஷ் எழுதியுள்ள கடிதம் கொரோனா பாதிப்பு மிகுதியாக இருக்கும் நேரத்தில் அரசு அதிகாரிகளின் இத்தகைய செயல்பாடுகள் உத்தரப்பிரதேச மக்களைக் கடும் அதிருப்தியில் ஆழ்த்தியிருக்கின்றன.
http://dlvr.it/Rxyzwn

Read More

“தமிழகம் முழுவதும் ஏப்.20 முதல் இரவுநேர ஊரடங்கு அமல்” - தமிழக அரசு

இந்தியாவில் கொரோனா தொற்றின் இரண்டாவது அலை தீவிரம் அடைந்து வரும் நிலையில் தமிழகம் முழுவதும் இரவு நேர ஊரடங்கு அமல் செய்யப்படுவதாக தமிழக அரசு அறிவிப்பு வெளியிட்டுள்ளது. அதன்படி இரவு 10 மணி முதல் காலை 4 மணி வரை இரவு நேர ஊரடங்கு அமலில் இருக்கும் எனத் தெரிவிக்கபட்டுள்ளது. ஊரடங்கு அமலில் இருக்கும் நிலையில் அத்தியாவசிய பணிகள், மருத்துவம், ஊடகம் மாதிரியான துறையினருக்கும் இந்த ஊரடங்கு பொருந்தாது என்ற அறிவிப்பும் வெளியாகி உள்ளது.  அதுமட்டுமல்லாது ஞாயிற்றுக்கிழமைகளில் முழு ஊரடங்கு அமலுக்கு வருவதாகவும் அரசு தெரிவித்துள்ளது. இதனை மீறுபவர்கள் மீது நடவடிக்கை எடுக்கப்படும் எனவும் எச்சரிக்கை விடுக்கப்பட்டுள்ளது.  வரும் 20-ஆம் தேதி முதல் இந்த உத்தரவு அமலுக்கு வருவதாகவும் அரசு தெரிவித்துள்ளது. இரவுநேர ஊரடங்கின்போது போக்குவரத்துக்கு தடை என அறிவிப்பு வெளியாகியுள்ளது. முழு ஊரடங்கு அமலில் இருக்கும் நாட்களில் உணவகங்களில் பார்சல் சேவைக்கு மட்டும் அனுமதி எனவும் அரசு தெரிவித்துள்ளது. இரவு 9 மணி வரை மட்டுமே கடைகள் செயல்பட அனுமதி வழங்கப்பட்டுள்ளது.
http://dlvr.it/RxxSr3

Read More

மேக்ஸ்வெல்-டிவில்லியர்ஸ் அதிரடி! கொல்கத்தாவுக்கு 205 ரன்கள் இலக்கு நிர்ணயித்தது பெங்களூரு!

சென்னை - சேப்பாக்கம் மைதானத்தில் நடப்பு ஐபிஎல் சீசனின் பத்தாவது லீக் போட்டியில் ராயல் சேலஞ்சர்ஸ் பெங்களூரு மற்றும் கொல்கத்தா நைட் ரைடர்ஸ் அணிகள் விளையாடி வருகின்றன. டாஸ் வென்ற பெங்களூரு அணி கேப்டன் கோலி பேட்டிங் தேர்வு செய்தார். இருபது ஓவர் முடிவில் 4 விக்கெட் இழப்பிற்கு 204 ரன்கள் குவித்தது பெங்களூர்.  What a start this is for #KKR.@chakaravarthy29 picks up two big wickets in his first over.Virat Kohli and Patidar depart in quick succession.Live - https://t.co/sgj6gqp6tS #RCBvKKR #VIVOIPL pic.twitter.com/cujexjQZ4A — IndianPremierLeague (@IPL) April 18, 2021 அந்த அணிக்காக தேவ்தத் படிக்கல் மற்றும் விராட் கோலி இன்னிங்ஸை ஓப்பன் செய்தனர். ஆட்டத்தின் இரண்டாவது ஓவரிலேயே கோலி மற்றும் ராஜாத் பட்டிதார் விக்கெட்டுகளை இழந்து தடுமாறியது பெங்களூரு. அந்த ஓவரை வருண் சக்கரவர்த்தி வீசி இருந்தார். பின்னர் வந்த மேக்ஸ்வெல், படிக்கலுடன் 86 ரன்களுக்கு பார்ட்னர்ஷிப் அமைத்தார். இருப்பினும் படிக்கல் 28 பந்துகளுக்கு 25 ரன்களில் அவுட்டானார். அவரை பிரசித் கிருஷ்ணா வீழ்த்தி இருந்தார்.  தொடர்ந்து 360 டிகிரி பேட்ஸ்மேன் டிவில்லியர்ஸ் களத்திற்கு வந்தார். மேக்ஸ்வெல் - டிவில்லியர்ஸ் இணையர் 53 ரன்களுக்கு பார்ட்னர்ஷிப் அமைத்தனர். மேக்ஸ்வெல் 49 பந்துகளில் 78 ரன்களை குவித்து அவுட்டானார். அவரது இன்னிங்க்ஸில் 9 பவுண்டரி மற்றும் 3 சிக்ஸர்கள் அடங்கும். கம்மின்ஸ் அவரை வீழ்த்தி இருந்தார்.   #RCB lose two wickets in the powerplay with 45 runs on the board.Live - https://t.co/sgj6gqp6tS #RCBvKKR #VIVOIPL pic.twitter.com/1nQEzBy8p8 — IndianPremierLeague (@IPL) April 18, 2021 பின்னர் ஜேமிசன் களத்திற்கு வந்தார். டிவில்லியர்ஸ் அதிரடியாக விளையாடி 34 பந்துகளில் 76 ரன்களை குவித்து இறுதி வரை நாட் அவுட் பேட்ஸ்மேனாக இருந்தார். அதில் 9 பவுண்டரிகள் மற்றும் 3 சிக்ஸர்கள் அடங்கும். அதோடு ஜேமிசன் - டிவில்லியர்ஸ் 56 ரன்களுக்கு பார்ட்னர்ஷிப் அமைத்திருந்தனர்.    இதையடுத்து கொல்கத்தா அணி 205 ரன்களை எடுத்தால் வெற்றி என்ற இலக்கை விரட்டி வருகிறது. 
http://dlvr.it/RxxSpL

Read More

கொரோனா: மும்பையில் 1,100 கட்டடங்களுக்கு சீல் ; `பிரதமர் தேர்தலில் பிஸி’- உத்தவ் தாக்கரே காட்டம்

மகாராஷ்டிராவில் கொரோனா தொற்றின் வேகம் நாளுக்கு நாள் அதிகரித்துக்கொண்டே செல்கிறது. புதிய கட்டுப்பாடுகளால் குறையும் என்று எதிர்பார்க்கப்பட்ட நிலையில் தொடர்ந்து அதிகரித்துக்கொண்டேதான் இருக்கிறது. கொரானாவுக்கு மகாராஷ்டிராவில் மட்டும் இதுவரை 60 ஆயிரம் பேர் வரை இறந்துவிட்டனர். இதனால் மும்பையில் கொரோனாவை கட்டுப்படுத்த மும்பை போலீஸாரும் புதிய நடவடிக்கையை எடுக்க ஆரம்பித்துள்ளனர். எவ்வளவுதான் கட்டுப்பாடுகள் விதித்தாலும் மக்கள் வெளியில் வந்து கொண்டுதான் இருக்கின்றனர். அதுவும் வாகனங்கள் அதிக அளவில் வெளியில் வருகிறது. Commissioner Hemant Nagrale இதனால் அவசர மற்றும் அத்தியாவசியப்பணிக்கு செல்பவர்களின் வாகனங்கள் போக்குவரத்து நெருக்கடியில் சிக்கிக்கொள்கிறது. இதையடுத்து இதற்கு தீர்வு காண் போலீஸார் சிவப்பு, பச்சை, மஞ்சள் கலர் ஸ்டிக்கர் ஒட்ட முடிவு செய்துள்ளனர். டாக்டர்கள், நர்ஸ்கள், சுகாதார பணியாளர்கள் செல்லும் வாகனங்கள், மருந்து எடுத்து செல்லும் வாகனங்கள், ஆம்புலன்ஸ் போன்றவற்றிற்கு சிவப்பு கலர் ஸ்டிக்கர் ஒட்டப்படும். பால், காய்கறிகள், பேக்கரி பொருட்கள், பழங்கள் எடுத்துச்செல்லும் வாகங்களில் பச்சை கலர் ஸ்டிக்கர் ஒட்டப்படும். மாநகராட்சி ஊழியர்கள், டெலிபோன் மற்றும் மருந்து கடைகளில் பணியாற்றும் பணியாளர்கள் செல்லும் வாகனங்களுக்கு மஞ்சள் கலர் ஸ்டிக்கர் ஒட்டப்படும். இந்த ஸ்டிக்கர்களை உள்ளுர் போலீஸ் நிலையத்தில் இலவசமாக வாங்கிக்கொள்ளலாம். இது போன்ற வாகனங்களில் போக்குவரத்து நெருக்கடியில் சிக்கிக்கொள்வதை தவிர்க்க இம்முடிவு எடுக்கப்பட்டுள்ளது என்று மும்பை போலீஸ் கமிஷனர் ஹேமந்த் தெரிவித்துள்ளார். இதற்கிடையே மும்பையில் கொரோனா அதிகமாக இருக்கும் கட்டடங்களுக்கு மாநகராட்சி அதிகாரிகள் சீல் வைத்து வருகின்றனர். கொரோனா பாதித்த நோயாளிகளில் 80 சதவீதம் பேர் வீட்டில் தனிமைப்படுத்திக்கொண்டுள்ளனர். இதனால் குடியிருப்பு கட்டடங்களில் அதிக அளவில் கொரோனா நோயாளிகள் இருக்கின்றனர். அது போன்ற கட்டடங்களை கண்டுபிடித்து சீல் வைக்கப்பட்டு வருகிறது. இதுவரை 1,169 கட்டடங்களுக்கு சீல் வைக்கப்பட்டுள்ளது. இது இம்மாத தொடக்கத்தில் 650 ஆக இருந்தது. ஆனால் சில நாட்களில் இந்த எண்ணிக்கை அதிகரித்துவிட்டது. ஒரு கட்டடத்தில் 5 கொரோனா நோயாளிகள் இருந்தால் அக்கட்டடத்தை தனிமைப்படுத்தி சீல் வைத்து வருகின்றனர். அந்தேரி, மலபார்ஹில், கிர்காவ் போன்ற பகுதியில் தான் அதிகப்படியான கட்டடங்கள் சீல் வைக்கப்பட்டுள்ளது. இதனால் மும்பை முழுவதும் மொத்தம் 1.57 லட்சம் வீடுகள் சீல் வைக்கப்பட்டு தனிமைப்படுத்தும் முகாம்களாக மாற்றப்பட்டுள்ளது. இதில் 5.9 லட்சம் மக்கள் பாதிக்கப்பட்டுள்ளனர். முதல்வர் உத்தவ் தாக்கரே இது தவிர மும்பையில் 97க்கும் மேற்பட்ட குடிசைப்பகுதிகளும் தனிமைப்படுத்தப்பட்ட பகுதியாக அறிவிக்கப்பட்டுள்ளது. இதில் 4.5 லட்சம் மக்கள் இருக்கின்றனர். இதற்கிடையே கொரோனா பரவலை கட்டுப்படுத்த நடவடிக்கை எடுக்காமல் பிரதமர், மேற்கு வங்க தேர்தலில் கவனம் செலுத்துவதாகவும், அவரை தொடர்பு கொள்ள முடியவில்லை என்று மகாராஷ்டிரா முதல்வர் உத்தவ் தாக்கரே தெரிவித்துள்ளார். இரண்டு முறை ஆக்சிஜன் தட்டுப்பாடு தொடர்பாக பேச பிரதமருக்கு தொடர்பு கொள்ள முயன்றதாகவும், ஆனால் பிரதமர் தேர்தல் வேலையில் பிஸியாக இருப்பதாகவும் தெரிவிக்கப்பட்டது என்று உத்தவ் தாக்கரே குற்றம்சாட்டியுள்ளார்.
http://dlvr.it/Rxvvzb

Read More

உலக அளவில் 30 லட்சத்தை தாண்டிய கொரோனா உயிரிழப்பு!

உலகம் முழுவதும் கொரோனா தொற்றால் உயிரிழந்தோரின் எண்ணிக்கை 30 லட்சத்தை கடந்தது. இதில் அதிகபட்சமாக அமெரிக்காவில் 5 லட்சத்து 66 ஆயிரத்து 224 (5,66,224) பேர் கொரோனாவுக்கு உயிரிழந்துள்ளனர். இரண்டாவதாக பிரேசில் நாட்டில் 3 லட்சத்து 68 ஆயிரத்து 749 பேரும், மூன்றாவதாக மெக்ஸிகோ நாட்டில் 2 லட்சத்து 11 ஆயிரத்து 693 பேரும் கொரோனாவுக்கு உயிரிழந்துள்ளனர்.  கொரோனா இரண்டாவது அலை தீவிரமாக பரவி வரும் நிலையில், கொரோனா தொற்றால் உயிரிழப்போரின் எண்ணிக்கை மீண்டும் உயரத் தொடங்கியுள்ளது. நாள் தோறும் 12 ஆயிரத்திற்கும் மேற்பட்டோர் உயிரிழந்து வருகின்றனர். கடந்த ஒரு வாரமாக நாள்தோறும் 14,500 பேர் உயிரிழந்து வருகின்றனர். பிரேசில் நாட்டில் நாள் தோறும் 3000 நபர்கள் உயிரிழந்து வருகின்றனர். இதுவரை 14 கோடி பேர் கொரோனா தொற்றினால் பாதிக்கப்பட்டுள்ளனர். 7.95 கோடி பேர் கொரோனா தொற்றில் இருந்து மீண்டு வந்துள்ளனர். இந்தியாவைப் பொறுத்தவரை ஒரு கோடியே 45 லட்சம் பேர் இதுவரை கொரோனா நோய் தொற்றால் பாதிக்கப்பட்டுள்ளனர்.1 கோடியே 27 லட்சம் அதில் இருந்து மீண்டு வந்துள்ள நிலையில், ஒரு லட்சத்து 76 ஆயிரம் பேர் உயிரிழந்துள்ளனர்.
http://dlvr.it/Rxtj9t

Read More

மும்பை: படுக்கை, ஆக்ஸிஜன் பற்றாக்குறை; தந்தை-மகன் பலி... பெண் தற்கொலை! - உச்சத்தில் கொரோனா

மகாராஷ்டிராவில் கொரோனா அதிகரித்துவருவதால், மருத்துவக் கட்டமைப்பு வசதிக்குப் பற்றாக்குறை ஏற்பட்டுள்ளது. போதிய அளவு மருத்துவமனையில் படுக்கை வசதி, ஆக்ஸிஜன், கொரோனா சிகிச்சைக்கான மருந்துகளுக்குப் பற்றாக்குறை ஏற்பட்டுள்ளது. மகாராஷ்டிராவில் மும்பை, புனே, நாசிக், நாக்பூர் போன்ற நகரங்களில் அதிக அளவு கொரோனாவின் தாக்கம் இருக்கிறது. போதிய அளவுக்குப் படுக்கை வசதி இல்லாமல் இருப்பதால் நோயாளிகளைப் பல கிலோமீட்டர் தூரத்துக்கு அழைத்துச் செல்ல வேண்டிய நிலை ஏற்பட்டுள்ளது. மும்பை அருகிலுள்ள கல்யாணில் வசித்துவந்த நாகேந்திர மிஸ்ராவும், அவரின் மகன் சூரஜ் மிஸ்ராவும் டாக்டர்களாக இருந்தனர். இவர்களுக்கும் நாகேந்திர மிஸ்ரா மனைவிக்கும் கொரோனா தொற்று ஏற்பட்டது. அருகிலுள்ள மருத்துவமனையில் சேர்க்க வென்டிலேட்டர் வசதியுடன்கூடிய படுக்கை வசதி இல்லாமல் இருந்தது. இதனால் மூன்று பேரும் வேறு வேறு இடங்களிலுள்ள மருத்துவமனைகளில் சிகிச்சைக்காகச் சேர்க்கப்பட்டனர். கொரோனா டாக்டர் நாகேந்திரா தானேயிலுள்ள ஒரு மருத்துவமனையிலும், அவர் மகன் சூரஜ் மும்பை மேற்கு புறநகரில் இருக்கும் கோரேகாவ் மருத்துவமனையிலும், நாகேந்திரா மனைவி மும்பையிலிருந்து 50 கிலோமீட்டர் தொலைவிலுள்ள வசாய் மருத்துவமனையிலும் சிகிச்சைக்காகச் சேர்க்கப்பட்டனர். ஆக்ஸிஜன் அளவு மூவருக்கும் குறைவாக இருந்தது. மிஸ்ராவும் அவர் மகனும் தனித்தனியாக மருத்துவமனை நடத்திவந்தாலும், கொரோனாவுக்குச் சிகிச்சை பெற வேறு மருத்துவமனையில் சேர்க்கப்பட்டனர். ஆனால், சிகிசை பலனலிக்காமல் நாகேந்திரா தான் பிறந்த தினத்திலேயே பரிதாபமாக உயிரிழந்துவிட்டார். அவர் இறந்த அடுத்த சில மணி நேரத்தில் அவர் மகன் சூரஜும் சிகிச்சை பலனலிக்காமல் இறந்துபோனார். தந்தையும் மகனும் சிகிச்சை பலனலிக்காமல் அடுத்தடுத்து இறந்திருப்பது அனைவருக்கும் சோகத்தை ஏற்படுத்தியிருக்கிறது. நாகேந்திராவின் மனைவிக்கு ஆபத்தான நிலையில் சிகிச்சையளிக்கப்பட்டுவருகிறது. நாகேந்திராவின் மற்றொரு மகனும் டாக்டராக இருக்கிறார். இறந்துபோன இரண்டு பேருக்கும் கடந்த ஆறு நாள்களுக்கு முன்பு கொரோனா தொற்று ஏற்பட்டது. அதிலிருந்து அவர்களின் நிலைமை மோசமாகிக்கொண்டேதான் வந்தது. இதில் சூரஜ் கடந்த ஆண்டு, நவம்பர் மாதம்தான் திருமணம் செய்தார் என்பது குறிப்பிடத்தக்கது. புனேயிலும் படுக்கைக்குத் தட்டுப்பாடு ஏற்பட்டுள்ளது.கொரோனா புனே வார்ஜி என்ற இடத்தைச் சேர்ந்த 41 வயது ஷோபா என்ற பெண்ணுக்கு திடீரென மூச்சுவிடுவதில் சிரமம் ஏற்பட்டது. உடனே அவரை உறவினர்கள் மருத்துவமனைக்குக் கொண்டு சென்றனர். அங்கு அவருக்கு கொரோனா சோதனை செய்து பார்த்ததில் கொரோனா இருப்பது தெரியவந்தது. உடனே வென்டிலேட்டர் படுக்கை வசதியுள்ள மருத்துவமனையில் சேர்க்கும்படி அந்த மருத்துவமனையில் தெரிவிக்கப்பட்டது. ஆனால் பல மருத்துவமனைகளுக்குச் சென்றும் மருத்துவமனையில் படுக்கை காலி இல்லை என்று சொல்லிவிட்டனர். இதனால் ஷோபாவை அவரது கணவர் வீட்டுக்கு அழைத்து வந்தார். இரவில் ஷோபா மன அழுத்தம் காரணமாகத் தூக்குப்போட்டு தற்கொலை செய்துகொண்டார். கொரோனா நோயாளிகளுக்கு சிகிச்சையளிக்க ஆக்ஸிஜன் மிகவும் அவசியமாக இருக்கிறது. ஆனால், அதற்கு மும்பையில் மீண்டும் தட்டுப்பாடு ஏற்பட்டுள்ளது. எனவே, ஆக்ஸிஜனை வெளிநாட்டிலிருந்து இறக்குமதி செய்வது குறித்து மகாராஷ்டிரா அரசு பரிசீலித்துவருகிறது. அண்டை மாநிலங்களிலும் ஆக்ஸிஜன் கொடுத்து உதவும்படி மகாராஷ்டிரா அரசு கேட்டுக்கொண்டிருக்கிறது. சமீபத்தில் மும்பை அருகிலுள்ள நாலாசோபாராவில் ஆக்ஸிஜன் பற்றாக்குறையால் ஒன்பது நோயாளிகள் சில மணி நேரத்தில் இறந்துபோனார்கள் என்பது குறிப்பிடத்தக்கது. சோனு சூட் இதற்கிடையே நடிகர் சோனு சூட்டுக்கு கொரோனா தொற்று ஏற்பட்டிருக்கிறது. தமிழ்ப் படங்களில் வில்லன் வேடத்தில் நடித்துள்ள சோனுசூட், கொரோனா காலத்தில் பாதிக்கப்பட்டவர்களுக்கு பல்வேறு நலத்திட்ட உதவிகளைச் செய்து கொடுத்து அனைவரது மனதிலும் நீங்காத இடம் பிடித்திருக்கிறார். ஆனால் இப்போது அவருக்கே கொரோனா தொற்று ஏற்பட்டுள்ளது. இது தொடர்பாக அவர் தனது ட்விட்டர் பக்கத்தில் குறிப்பிட்டுள்ளார். `எனக்கு கொரோனா தொற்று உறுதியாகியிருப்பதால் என்னை நானே தனிமைப்படுத்திக்கொண்டிருக்கிறேன்’ என்று குறிப்பிட்டுள்ளார். இதே போன்று கேத்ரீனா கைஃப், ஆடை வடிவமைப்பாளர் மனீஷ் மல்கோத்ரா உட்பட பாலிவுட் பிரபலங்களுக்குத் தொடர்ந்து கொரோனா தொற்று ஏற்பட்டுவருகிறது.
http://dlvr.it/Rxtj8c

Read More

மும்பை: ஆடம்பரக் குடியிருப்பு; மண் இல்லாமல் கஞ்சா வளர்ப்பு! - போலீஸில் சிக்கியது எப்படி?

மும்பை அருகிலுள்ள டோம்பிவலியில், பலவா சிட்டி என்ற ஒர் ஆடம்பரக் குடியிருப்பு வளாகம் இருக்கிறது. இந்தக் குடியிருப்பு வளாகத்திலுள்ள அடுக்குமாடிக் கட்டடத்தில் இரண்டு படுக்கையறைகொண்ட வீட்டில், நவீன தொழில்நுட்பத்தைப் பயன்படுத்தி, மண் இல்லாமல் ஹைட்ரோபோனிக் முறையில் கஞ்சா வளர்ப்பதாக போதைப்பொருள் தடுப்பு பிரிவு அதிகாரிகளுக்குத் தகவல் கிடைத்தது. கடந்த சில நாள்களுக்கு முன்பு மும்பை பரேலில் போதைப்பொருள் வைத்திருந்ததாக கணேஷ், அமீன் ஆகிய இரண்டு பேர் கைதுசெய்யப்பட்டனர். அவர்களிடம் விசாரித்தபோது டோம்பிவலியில் வீட்டில் கஞ்சா வளர்ப்பதாக போலீஸாருக்குத் தெரியவந்தது. ரேஹன் கான் என்பவருக்குச் சொந்தமான இரண்டு படுக்கை அறைகொண்ட வீட்டில் ஜாவேத் ஜஹாங்கிர் ஷேக், அர்ஷத் இருவரும் சேர்ந்து மண்ணில்லாமல் ஹைட்ரோபோனிக் முறையில் யாருக்கும் தெரியாமல் கஞ்சா வளர்த்துவந்தனர். ஜாவேத் இதில் ஷேக்குக்கு ஹைட்ரோபோனிக் முறையில் செடிகளை வளர்க்கத் தெரியும். அர்ஷத் அப்படி வளர்க்கப்பட்ட கஞ்சாவை விற்பனை செய்யும் தொழிலைச் செய்துவந்தார். போலீஸார் திடீரென இவர்களின் வீட்டில் சோதனை நடத்தினர். இதில் வாட்டர் பம்ப், பி.ஹெச்.ரெகுலேட்டர், தாவரங்களுக்கான உணவு போன்ற ஹைட்ரோபோனிக் முறையில் செடிகளை வளர்ப்பதற்குத் தேவையான அனைத்துப் பொருள்களும் இருப்பது கண்டுபிடிக்கப்பட்டு பறிமுதல் செய்யப்பட்டன. கஞ்சா வளர்ப்பதற்குத் தேவையான விதைகளை ஆம்ஸ்டர்டாம் மற்றும் நெதர்லாந்தின் இதர நகரங்களில் ஆன்லைன் மூலம் ஆர்டர் செய்து வாங்கியுள்ளனர். பொதுவாக ஒரு விதை 10 முதல் 15 டாலருக்க்கு கிடைக்கும். ஆனால் இவர்கள் ஒரு விதையை கள்ளச்சந்தையிலிருந்து 15 ஆயிரம் ரூபாய் கொடுத்து வாங்கியிருக்கிறார்கள். இதற்கு பிட்காயின்களையும், அமெரிக்க டாலரையும் கொடுத்துள்ளனர். வீட்டில் விளையும் கஞ்சா செடிகளை சமூக வலைதளம் மூலம் வாடிக்கையாளர்களைத் தேடி விற்பனை செய்துவந்தனர். ஹைட்ரோபோனிக் முறையில் விளைவிக்கபட்ட கஞ்சாவை ஒரு கிராம் 8,000-லிருந்து 10,000-க்கு விற்பனை செய்துள்ளனர். அவர்களது வீட்டிலிருந்து 80 லட்சம் மதிப்பிலான கஞ்சா செடிகள் பறிமுதல் செய்யப்பட்டுள்ளன. இந்தத் தொழிலைக் கடந்த ஒரு வருடமாகச் செய்துவருவதாகத் தெரிவித்துள்ளனர். கொரோனா காலத்தில் வேலை இல்லாததால் வீட்டிலேயே வேலை செய்யலாமென்று கருதி இதைச் செய்துள்ளனர். ரேஹன் கான் சவுதி அரேபியாவில் இருக்கிறார். அவர்தான் இந்தத் தொழிலுக்கு தேவையான நிதியுதவி செய்து வந்திருக்கிறார் என்பது விசாரணையில் தெரியவந்திருக்கிறது. கஞ்சா இதற்கு முன்பு மும்பை செம்பூரில் நிகில் என்பவர் தனது நண்பர்களுடன் சேர்ந்து 2019-ம் ஆண்டு ஹைட்ரோபோனிக் முறையில் வீட்டிலேயே கஞ்சா பயிரிட்டு பிடிபட்டார். அவர் இன்டர்நெட்டில் பார்த்து தனது வீட்டில் கஞ்சா வளர்த்ததாகப் பின்னர் விசாரணையில் தெரியவந்தது. மும்பை இந்தியாவின் பொருளாதாரத் தலைநகரமாக இருப்பதோடு, போதைப்பொருள்களின் பயன்பாடும் அதிகமாக இருக்கிறது. சமீபத்தில் மும்பை டோங்கிரியில் தாவூத் இப்ராஹிம் சகோதரர் அனீஸ் இப்ராஹிம் கூட்டாளி போதைப்பொருள் தொழிற்சாலை நடத்திவந்தது கண்டுபிடிக்கப்பட்டு அழிக்கப்பட்டது குறிப்பிடத்தக்கது. மும்பையில் நடக்கும் பார்ட்டிகளில் சப்ளை செய்வதற்கான போதைப்பொருள் இந்தத் தொழிற்சாலையில் தயாரிக்கப்பட்டது. இதில் இளம்பெண் ஒருவரும் தொடர்புகொண்டிருந்தார். அவரையும் போலீஸார் பொறிவைத்து, கைதுசெய்துள்ளனர். சமீபத்தில் போதைப்பொருள் பயன்படுத்தியது தொடர்பாக பாலிவுட் பிரபலங்கள் பலரும் போதைப்பொருள் தடுப்புப் பிரிவு அதிகாரிகளின் விசாரணையில் ஆஜராகிவருகின்றனர் என்பது குறிப்பிடத்தக்கது.
http://dlvr.it/Rxs75s

Read More