ஸ்டாலின் அமைச்சரவையில் யாருக்கு எந்த துறை? - உத்தேசப் பட்டியல்

சட்டமன்ற தேர்தலில் திமுக வெற்றிபெற்றதையடுத்து, புதியதாக பொறுப்பேற்க உள்ள அமைச்சர்கள் மற்றும் அதிகாரிகள் குறித்த உத்தேசப் பட்டியல் வெளியாகியுள்ளது.  தமிழகத்தில் சட்டமன்ற தேர்தலில் திமுக, தனித்து 125 இடங்களை பிடித்து, தனிப்பெரும்பான்மையுடன் வெற்றி பெற்றது. அதன்படி நாளை மறுதினம் திமுக தலைவர் மு.க.ஸ்டாலின் பதவியேற்கிறார். இதற்காக இன்று காலை ஆளுநர் பன்வாரிலால் புரோகித்தை சந்தித்து ஆட்சியமைக்க உரிமை கோரினார் ஸ்டாலின். இந்த நிலையில் புதிய அமைச்சர்களாக, அதிகாரிகளாக யார் யார் பொறுப்பேற்பார்கள் என்பது குறித்து தகவல் வெளியாகியுள்ளது.  நெடுஞ்சாலைத்துறை- எ.வ.வேலு சுகாதாரத்துறை - மா.சுப்பிரமணியன் நீர்பாசனத்துறை - துரைமுருகன் உள்ளாட்சித்துறை - கே.என்.நேரு அதிகாரிகள் - உத்தேசப் பட்டியல் தலைமைச்செயலாளர் - இறையன்பு முதல்வரின் தனிச்செயலர் - உதயச்சந்திரன் முதல்வரின் தனிச்செயலர் - உமாநாத் முதல்வரின் தனிச்செயலர் - எஸ்.எஸ். சண்முகம்
http://dlvr.it/Rz5Jdj

Read More

அடுத்தடுத்து வீரர்களுக்கு பரவும் கொரோனா: ஐபிஎல் போட்டித் தொடர் நிறுத்தம்

கொரோனா பரவல் அதிகரிப்பதன் காரணமாக ஐபிஎல் போட்டிகள் தற்காலிகமாக நிறுத்தம் செய்யப்படுவதாக பிசிசிஐயின் துணைத்தலைவர் ராஜீவ் சுக்லா தெரிவித்துள்ளார். ஐபிஎல் 20-20 கிரிக்கெட் தொடர் கடந்த ஏப்ரல் 9ம் தேதி தொடங்கியது. இந்த தொடரில் இதுவரை 29 லீக் ஆட்டங்கள் நிறைவடைந்துள்ளன. இறுதிப்போட்டி மே 30ம் தேதி நடைபெறுவதாக இருந்தது. இதனிடையே ஐபிஎல் வீரர்களுக்கு அடுத்தடுத்து கொரோனா தொற்று உறுதி செய்யப்பட்டு வருகிறது. இதில் டெல்லி அணியின் அமித் மிஸ்ராவுக்கு கொரோனா தொற்று உறுதி செய்யப்பட்டது. இதையடுத்து கொல்கத்தா அணியை சேர்ந்த மேலும் 2 வீரர்களுக்கு இன்று கொரோனா உறுதி செய்யப்பட்டுள்ளது. அந்த அணியின் பந்துவீச்சாளர்கள் வருண் சக்கரவர்த்தி மற்றும் சந்தீப் வாரியர் ஆகியோர் கொரோனாவால் பாதிக்கப்பட்டு தனிமைப்படுத்தப்பட்டுள்ளனர். சென்னை அணியைச் சேர்ந்த பாலாஜி மற்றும் அவரது உதவியாளர் என இருவருக்கு கொரோனா தொற்று உறுதி செய்யப்பட்டது. தற்போது சன்ரைசர்ஸ் ஐதராபாத் அணியின் விரித்திமான் சஹாவிற்கு கொரோனா உறுதி செய்யப்பட்டுள்ளது. அடுத்தடுத்து வீரர்களுக்கு கொரோனா தொற்று பரவத்தொடங்கியத்தையடுத்து தற்காலிமாக ஐபிஎல் போட்டிகள் நிறுத்தம் செய்யப்பட்டுள்ளதாக பிசிசிஐயின் துணைத்தலைவர் ராஜீவ் சுக்லா தெரிவித்துள்ளார்
http://dlvr.it/Rz3Zxr

Read More

உப்புத் தண்ணீரில் மகசூல், சத்துகளும் அதிகம்... கேரள `பொக்காளி' நெல் ரகம் பற்றி அறிவோமா?

நன்னீரில் நெல் சாகுபடி பற்றிக் கேள்விப்பட்டிருப்போம். ஆனால், உப்புத் தண்ணீரில் நெல் சாகுபடி பற்றி நாம் அவ்வளவாக அறிந்திருக்க மாட்டோம். கேரளத்தில் உப்புத் தண்ணீரில் சாகுபடி செய்வதற்கென்றே பிரத்யேகமான ஒரு நெல் ரகம் இருக்கிறது. கேரள மாநிலத்தில் எர்ணாகுளம், ஆலப்புழை, திருச்சூர் மாவட்டங்களில் காணப்படும் மூவாயிரம் ஆண்டுகள் பழைமை வாய்ந்த ஒரு நெல் வகை பொக்காளி ஆகும். உப்புத் தண்ணீரில் வளரும் இந்த நெல் வகை சுமார் 6 அடி உயரம் வரை வளரும் தன்மை கொண்டது. சாதாரண நெல் ரகங்களைவிட உயரமாகவும், பல வேறுபாடுகளை உடைய ஒரு நெல் ரகமாகவும் விளங்குகிறது இந்தப் பொக்காளி நெல். மேற்குத் தொடர்ச்சி மலைகளில் மூவாயிரம் ஆண்டுகளுக்கு முன்னர் காட்டு நெற்புல்லாக இருந்து வந்த ஒரு தாவரம், மழை வெள்ளத்தில் கடலோரப் பகுதிக்கு வந்தடைந்தது. பின்னர், அங்கு நிலவும் உப்பு நீர் மற்றும் சூழலை ஏற்று வளரத் தொடங்கியது.ஆட்களால் அறுவடை பின்னர், அதுவே தற்போது சுமார் பன்னிரண்டாயிரம் ஏக்கர் பரப்பளவு கொண்ட பொக்காளி நெல் விவசாயமாக இருந்து வருகிறது. கேரளத்தில் மத்திய பகுதியில் மட்டுமே காணப்படும் இந்த நெல், பிற பகுதிகளில் சிலருக்கு பெயரளவில் கூட அறிமுகம் இல்லை. கேரளத்தை விட்டு வெளி மாநிலங்களில் இதைக் குறித்து யாவரும் அறிந்திருக்க வாய்ப்பு மிகவும் குறைவு. இந்த நெல் மழைக்காலமான ஜூலை முதல் நவம்பர் வரை ஆண்டுக்கு ஒரு முறை மட்டுமே சாகுபடி செய்யப்படுகிறது. 120 நாட்கள் வயது கொண்டது. நெற்பயிர் வளர்ந்து நிற்கும்போது நிலத்தில் தண்ணீர் நின்றால்கூட (பயிர் 5, 6 அடி உயரத்துக்கு இருக்கிறது என்றால் நீர்மட்டம் 4, 5 அடி இருக்கும் நிலையில்கூட) மகசூல் நன்றாகக் கொடுக்கும் தன்மை கொண்டவை. மழைக் காலங்களில் நீரின் உப்புத் தன்மை குறைந்து காணப்படும். எனவே, அந்தக் காலமே இந்த நெல் ரகம் சாகுபடிக்கு ஏற்றதாகக் கருதப்படுகிறது. அதன் பின்னர் டிசம்பர் முதல் ஏப்ரல் வரை இறால் வளர்ப்பு நடைபெறுகிறது. ஏப்ரல் மாதத்தில் ஒரு முறை நீர் வெளியேற்றப்பட்டு, நிலம் காயப்போடப்படுகிறது. இதன் மூலம் நிலத்தில் உள்ள கெட்ட வாயுக்கள் வெளியேறி உப்புத் தன்மை குறைகிறது. பின்னர், நிலம் அடுத்த நெல் சாகுபடிக்கு தயார் செய்யப்படுகிறது. சாகுபடியின்போது எந்த விதமான வேதிப்பொருள்களும் பயன்படுத்தப்படுவதில்லை. அங்கக முறையில் (ஆர்கானிக்) வளர்க்கப்படுகிறது. அறுவடையின்போதும் நீரின் மட்டம் உயர்ந்திருந்தால்கூட விளைச்சல் கொடுக்கும். அறுவடைக்கு இயந்திர தேவை அதிகமாகவே இருந்து வருகிறது. எனினும், குறைந்த இயந்திரங்கள்தான் பயன்பாட்டில் உள்ளன. சாதாரண நெல்லைவிட மாறுபட்டச் சூழலில் இருக்கும் இந்த நெல் சாகுபடியில், வழக்கமான நெல் இயந்திரங்கள் கை கொடுப்பதில்லை. தனி ரகமான இயந்திரங்களே பயன்படுத்தப்பட வேண்டியுள்ளது.உப்புத் தண்ணீர் இயந்திரம் இல்லாத காரணத்தாலும், தொழில் மயமாதல், பறவைகளின் தாக்குதல், மீன் வளர்ப்பு ஆகிய காரணங்களாலும் பொக்காளி நெல் சாகுபடி குறைந்து காணப்படுகிறது. அரசாங்கமும், வேளாண் துறையும், தொண்டு நிறுவனங்களும் பொக்காளி நெல் சாகுபடியை அதிகப்படுத்த இயன்ற முயற்சிகளை எடுத்து வருகின்றன. பொக்காளி நெல்லிலிருந்து வரும் அரிசியின் சுவையும் மணமும் அந்தப் பகுதி மக்களால் பெரிதும் நினைவுகூரப்படுகிறது. இந்த நெல்லில் கிடைக்கும் அரிசியில் உள்ள புரதச்சத்து மிகவும் முக்கியத்துவம் வாய்ந்தது. நம்ம ஊர் மாப்பிள்ளைச் சம்பாவுக்கு இணையானது. மேலும் பல சத்துகளை உடைய உணவாகவும் விளங்குகிறது. அறுவடை முடிந்த சில காலங்களே இது பொது மக்கள் வாங்க சந்தையில் கிடைக்கிறது. விளைச்சல் குறைவின் காரணமாகவும், தேவையின் காரணமாகவும் பற்றாக்குறையே நிலவுகிறது. எனவே, விவசாயிகள் இதைச் சாகுபடி செய்தால் நல்ல வருமானம் பார்க்க முடியும். உப்புத்தன்மை கொண்ட நீரிலும் சாகுபடி செய்ய பாரம்பர்ய நெல் ரகங்கள் இருக்கின்றன என்பதை சுட்டிக் காட்டுவதற்காகவே இந்த நெல் ரகம் பற்றியான தகவலைச் சொல்லி இருக்கிறேன். கடல் நீர் உட்புகுதல், இயற்கை விவசாயம், சுழற்சி முறை சாகுபடி ஆகிய விஷயங்கள் நமக்கும் பொதுவானவை. இதிலிருந்து நாம் என்ன கற்றுக்கொள்ள இயலும் என்று சிந்திப்பதே மேலான காரியம். இது போல நாட்டின் பல பகுதிகளில், தமிழகத்திலும் கூட பாரம்பர்ய நெல் சாகுபடி இருந்து வருகிறது.சாகுபடி வயல் இந்தப் பொக்காளி நெல் ரகம் குறித்து கேரளாவின் தணல் அமைப்பின் திட்ட இயக்குநர் ஶ்ரீதரனிடம் பேசியபோது, ``உப்பு தண்ணீரில் விளையும் நெல் ரகம் என்பதற்காக இதை உப்புத் தண்ணீர் இருக்கும் எல்லா இடங்களிலும் விளைவித்து விட முடியாது. கொச்சி, எர்ணாகுளம் போன்ற பகுதிகளில் கடல் நீர் உள்ளே நுழையும் இடங்களில் மட்டுமே சாகுபடி செய்யப்படுகிறது. இந்த விவசாய முறைக்கே பொக்காளி முறை என்றுதான் பெயர். அந்தப் பெயரிலேயே நெல் ரகமும் அழைக்கப்படுகிறது. இந்தப் பயிர் வளர்ந்தால் தண்ணீருக்கு மேல் கதிர்கள் வெளியே தெரியும். படகில் சென்று அறுவடை செய்வதும் உண்டு. பிராக்கிஷ் வாட்டர் (brackish water) என்றழைக்கப்படும் உவர் நீர் உள்ள பகுதிகளில் சாகுபடி செய்ய ஏற்றது” என்றார். - சி.ரத்தினவேல் முதுகலை தொழில்நுட்ப மாணவர் (எம்.டெக்), பண்ணை இயந்திரவியல் மற்றும் ஆற்றல் பொறியியல் துறை, கேரள வேளாண்மைப் பல்கலைக்கழகம், மலப்புரம், கேரள மாநிலம்.
http://dlvr.it/Rz3Zw1

Read More

1,212 செவிலியர்கள் நிரந்தரப் பணிக்கு மாற்றம் - தமிழக அரசு அறிவிப்பு

தமிழகத்தில் ஒப்பந்த அடிப்படையில் பணிபுரிந்து வரும் 1,212 செவிலியர்கள் நிரந்தரப் பணிக்கு மாற்றப்பட்டுள்ளனர்.  1,212 செவிலியர்களுக்கான ஒப்பந்தம் நாளையுடன் முடியவிருந்த நிலையில் தமிழக அரசு இந்த அறிவிப்பை வெளியிட்டுள்ளது. பணி நிரந்தரம் செய்யப்பட்டதால் 1,212 செவிலியர்களுக்கான மாத ஊதியம் ரூ.15 ஆயிரத்திலிருந்து ரூ.40 ஆயிரமாக அதிகரிக்கும். 2015-2016 இல் எம்ஆர்பி தேர்வில் தேர்ச்சிப் பெற்று பதிவு செய்தவர்களுக்கு பணி நிரந்தரம் செய்யப்பட்டுள்ளது. 10-ம் தேதிக்கு முன்னதாக 1,212 செவிலியர்களும் சென்னையில் பணியில் சேர வேண்டும் என்றும் பின்னர் 1,212 பேரும் மாவட்டங்களுக்கு அனுப்பி வைக்கப்படுவார்கள் எனவும் தமிழக அரசு தெரிவித்துள்ளது. 
http://dlvr.it/Rz1K4v

Read More

அந்த 17-வது சுற்று... - மம்தாவின் நந்திகிராம் தொகுதியில் நடந்தது என்ன?

மேற்கு வங்கத்தில் நடைபெற்ற சட்டப்பேரவைத் தேர்தல் முடிவுகளில் திரிணாமூல் காங்கிரஸ் கட்சி 213 இடங்களிலும், பாஜக 77 இடங்களிலும் வெற்றிபெற்றது. ஆனால் மம்தா பானர்ஜி போட்டியிட்ட நந்திகிராம் தொகுதியில் முதலில் வெற்றி என அறிவிக்கப்பட்டு பின்னர் தோல்வி என அறிவிக்கப்பட்டார். இதனால், நீதிமன்றத்தை நாடப்போவதாக அறிவித்து இருக்கிறார் மம்தா. நந்திகிராமில் என்ன நடந்தது? திரிணாமூல் காங்கிரஸ் கட்சியில் இருந்த சுவேந்து அதிகாரி அண்மையில் பாஜகவில் இணைந்தார். இதையடுத்து 'தைரியம் இருந்தால் நந்திகிராம் தொகுதியில் என்னை எதிர்த்து மம்தா பானர்ஜி போட்டியிடட்டும்' என சுவேந்து அதிகாரி சவால் விடுத்தார். இதனால் வழக்கமாக போட்டியிடும் தொகுதியை விடுத்து நந்திகிராம் தொகுதியில் மம்தா பானர்ஜி சுவேந்து அதிகாரியை எதிர்த்து போட்டியிட்டார் மம்தா. இந்த நிலையில், நந்திகிராமில் வாக்குப்பதிவு ஏப்ரல் 1-ம் தேதி நடைபெற்றது. இங்கு 88 சதவீத வாக்குப்பதிவு பதிவானது. இது 2016-ஐ விட 1 சதவீதம் அதிகம். இதனால் அப்போதே யார் வெற்றிபெற போகிறார்கள் என எதிர்பார்க்கப்பட்டது. இதையடுத்து, வாக்கு எண்ணிக்கை தொடங்கியதும் மம்தா பானர்ஜி மட்டும் ஆரம்பம் முதலே சுவேந்து அதிகாரியை விட பின்தங்கி இருந்தார். 13-வது சுற்று வரை இந்த போக்கு தொடர்ந்தது. பின்னர், திடீரென்று, 14-வது சுற்றில் மம்தா பானர்ஜி முன்னிலை வகிக்க தொடங்கினார். 15-வது சுற்று வரை முன்னிலை வகித்த மம்தா, 16-வது சுற்றில் மீண்டும் பின்தங்க ஆரம்பித்தார். 17-வது சுற்றுதான் இறுதி சுற்று. இதில் அதிகப்படியான வாக்குகள் மம்தாவுக்கு ஆதரவாக விழுந்ததாக கூறப்பட, கடைசி கட்டத்தில் தன்னை விட சொற்ப வாக்குகள் வித்தியாசத்தில் முன்னிலை வகித்து வந்த சுவேந்து அதிகாரியை மம்தா ஒருவழியாக தோற்கடித்தார் என தகவல்கள் வெளியானது. 1,200 வாக்குகள் அதிகம் பெற்று மம்தா பானர்ஜி வீழ்த்தினார் எனக் கூறப்பட்டது. ஆனால், வாக்கு எண்ணிக்கையில் குளறுபடி இருப்பதாக சுவேந்து அதிகாரி அங்கேயே புகார் சொல்ல, கடைசி சுற்று மட்டும் மீண்டும் எண்ணப்பட்டது. இதனால் வாக்கு எண்ணிக்கை முடியவில்லை என்றும், மம்தா பின்தங்கியிருக்கிறார் என்றும் அப்போதே கூறப்பட்டது. அதன்படி, மீண்டும் எண்ணப்பட்ட இறுதி சுற்றில் சுவேந்து அதிகாரியை விட சுமார் 2000 வாக்குகள் மம்தா பின்தங்கி இருக்கிறார் எனக் கூறப்பட்டு, சுவேந்து அதிகாரி வெற்றி பெற்றதாக அறிவிக்கப்பட்டது. இதை எதிர்த்த திரிணாமூல் கட்சியினர் மறுவாக்கு எண்ணிக்கை கேட்டு தேர்தல் ஆணையத்திடம் கோரிக்கை வைத்தனர். இதையடுத்து பேசிய மம்தா, ``நந்திகிராம் பற்றி நான் கவலைப்படப்போவதில்லை. மக்கள் கொடுக்கும் முடிவை ஏற்று, நந்திகிராமில் தோல்வியை ஒப்பு கொள்கிறேன். ஒரு பெரிய போராட்டத்திற்கு செல்லும்போது, நீங்கள் ஏதாவது தியாகம் செய்ய வேண்டும். நந்திகிராமில் வாக்கு எண்ணிக்கையில் சில விஷயங்களை நான் சந்தேகிக்கிறேன். ஆரம்பத்தில், வெற்றி என்று அறிவிக்கப்பட்டது. திடீரென்று அது மாற்றப்பட்டது. முடிவு அறிவிக்கப்பட்டு பிறகு அங்கு சில முறைகேடுகள் நடந்ததாக எனக்கு தகவல் கிடைத்துள்ளன. தேவைப்பட்டால், கள யதார்த்தத்தை அறிய நான் நீதிமன்றத்திற்கு செல்வேன். எண்ணிக்கையை மறுபரிசீலனை செய்ய நீதிமன்றத்திற்குச் செல்வேன்" எனக் கூறியிருந்தார். இந்த நிலையில், இன்று செய்தியாளர்களிடம் பேசிய மம்தா பானர்ஜி, செய்தியாளர்களைச் சந்தித்த அவர், "மேற்கு வங்கத்தில் எனது ஆட்சியை பாஜகவால் தடுக்க முடியவில்லை. நந்திகிராம் தொகுதியில் மறுவாக்கு எண்ணிக்கை நடத்த பாஜக ஏன் பயப்படுகிறது?" என கேள்வி எழுப்பினார்.
http://dlvr.it/RyzcBz

Read More

"இந்தியாவில் ஜூலை வரை தடுப்பூசி தட்டுப்பாடு நிலவும்" - சீரம் நிறுவன செயல் அதிகாரி

நாடு முழுவதும் கொரோனா தடுப்பூசிக்கான தட்டுப்பாடு நிலவிவரும் சூழலில், மேலும் இரண்டு - மூன்று மாதங்களுக்கு தடுப்பூசி தட்டுப்பாடு நிலவும் என சீரம் நிறுவனத்தின் செயலதிகாரி கூறியிருக்கிறார். இந்தியாவில் 18 முதல் 44 வயதுக்குட்பட்டவர்களுக்கான தடுப்பூசி போடும் பணி, மே 1 ம் தேதி நாடு முழுவதும் தொடங்கும் என அரசு அறிவித்திருந்தது. ஆனால், நிலவிவரும் தட்டுப்பாடு காரணமாக, தமிழகம் உள்பட பல மாநிலங்களில் இன்னமும் தடுப்பூசி விநியோகம் தொடங்கப்படாமல் இருக்கிறது. மகாராஷ்ட்ரா, டெல்லி போன்ற மாநிலங்களிலும் தடுப்பூசி விநியோகம் கடுமையாக பாதிக்கப்பட்டுள்ளது. இதுதொடர்பாக சீரம் நிறுவனத்தின் செயலதிகாரி அதார் பூனவாலா கூறும்போது, "கோவிஷீல்டு தயாரிப்பு பணியில், ஜூலை மாதத்தில்தான் அதிகரிக்கும் என எதிர்ப்பார்க்கப்படுகிறது. மாதத்துக்கு 60 - 70 மில்லியன் தடுப்பூசிகள் தொடங்கி 100 மில்லியன் தடுப்பூசிகள் வரை ஜூலையில் உற்பத்தி செய்யப்படும்" என கூறியுள்ளார். மேலும் பேசியிருக்கும் அவர், "இந்தியாவில் அரசியல்வாதிகள் முதல் சாமானியர்கள் வரை எல்லோருமே இந்தியாவில் கொரோனா மறைந்துக் கொண்டிருக்கிறது என்றுதான் நினைத்தார்கள். திடீரென கொரோனா பரவுமென்றோ, அதை தடுக்க தடுப்பூசி இவ்வளவு தேவைப்படும் என்றோ அங்கு யாருமே எதிர்ப்பார்க்கவில்லை. மட்டுமன்றி, ஜனவரியிலிருந்து அங்கே கொரோனா குறைந்துவந்த காரணத்தால், கொரோனாவிலிருந்து மீண்டுவிட்டோம் என எண்ணி, பெரும்பாலான மக்கள் தடுப்பூசி போட்டுக்கொள்ள முன்வரவில்லை. அதனால் அந்நாட்டு அரசும், தடுப்பூசி தயாரிப்பு பணியை எங்களுக்கு தரவில்லை. அதனால்தான் நாங்கள் குறைவாக தயாரித்திருக்கிறோம். இப்போது மாநில அரசிடமிருந்து தடுப்பூசி ஆர்டர்கள் வருகின்றன. எங்களிடம் ஆர்டர் வரும்பட்சத்தில், நாங்கள் அதை சரியாக கொடுத்துவிடுவோம். ஆகவே தடுப்பூசி பற்றாக்குறை விஷயத்தில், அரசியல்வாதிகளும் விமர்சகர்களும், உற்பத்தி நிறுவனங்களான எங்களை குற்றம் சுமத்துவது ஏற்கத்தக்கதல்ல' எனக்கூறியிருக்கிறார். கடந்த மாதம் அரசு சார்பில் 3,000 கோடி ரூபாய் தடுப்பூசி உற்பத்தியை விரிவாக்க தரப்பட்டதாகவும், அந்த ஆர்டருக்கு ஏற்ப இப்போது தாங்கள் செயல்படுவதாகவும் கூறியிருக்கிறார். "ஏற்கெனவே கடந்த மார்ச் மாத இறுதியில் இந்திய அரசு வெளிநாடுகளுக்கு தடுப்பூசி விநியோகப்பதற்கு எங்களுக்கு தடை போட்டதால், எங்களிடம் ஆர்டர் கொடுத்த நாடுகளுக்கெல்லாம் நாங்கள் தொகையை திருப்பியளித்து வருகிறோம். அடுத்த 2, 3 மாதங்களில், உற்பத்தியில் நாங்கள் ஏற்றத்தை பார்க்கவில்லை என்றால், எங்கள் நிறுவனத்துக்கு சரிவு ஏற்படும். நாங்கள்தான் அதிகம் பாதிக்கப்படுவோம்" எனக் கூறியுள்ளார்.
http://dlvr.it/Ryzc9z

Read More

தமிழக முதலமைச்சராக வரும் 7-ஆம் தேதி பதவியேற்கிறார் மு.க.ஸ்டாலின்

தமிழக முதலமைச்சராக வரும் 7-ஆம் தேதி பதவியேற்கிறார் திமுக தலைவர் மு.க.ஸ்டாலின். தமிழக சட்டசபை தேர்தலுக்கான வாக்குப்பதிவு கடந்த ஏப்ரல் 6-ம் தேதி நடைபெற்ற நிலையில், இந்த தேர்தலில் பதிவான வாக்குகள் நேற்று எண்ணப்பட்டன. மொத்தமுள்ள 234 தொகுதிகளில் 118 தொகுதிகளில் வெற்றி பெற்றால் ஆட்சி அமைக்கலாம் என்ற நிலையில், திமுக கூட்டணி கட்சி 159 தொகுதிகளில் வெற்றி பெற்று, அறுதிப் பெரும்பான்மையுடன் 10 ஆண்டுகளுக்குப் பின் தமிழகத்தில் திமுக ஆட்சி அமைய உள்ளது. மு.க.ஸ்டாலின் தலைமையில் அமையவுள்ள ஆட்சிக்குப் பல்வேறு அரசியல் கட்சித் தலைவர்கள் வாழ்த்து தெரிவித்து வருகின்றனர். இந்த நிலையில் தமிழக முதலமைச்சராக வரும் 7-ஆம் தேதி திமுக தலைவர் மு.க.ஸ்டாலின் பதவியேற்க உள்ளார். அவருக்கு ஆளுநர் பன்வாரிலால் புரோகித் பதவிப்பிரமாணம் செய்துவைப்பார்.
http://dlvr.it/RyxNfL

Read More