கொரோனாவால் இறக்கும் சடலங்களை கண்ணியத்துடன் கையாள வேண்டும்: மனித உரிமைகள் ஆணையம்

'கொரோனாவால் இறப்பவர்களின் உடல்களை கண்ணியமாக கையாளுங்கள்' என மத்திய மாநில அரசுகளுக்கு தேசிய மனித உரிமைகள் ஆணையம் அறிவுறுத்தல்களை வழங்கியுள்ளது. உத்தரபிரதேச மாநிலத்தின் பல்வேறு பகுதிகளிலும், கொரோனா பாதிக்கப்பட்டு உயிரிழப்பவர்களின் உடல்கள் கங்கை யமுனை உள்ளிட்ட ஆறுகளில் வீசப்படுவது சம்பந்தமான செய்திகளும் வீடியோ காட்சிகளும் புகைப்படங்களும் வெளியாகி நாடு முழுவதும் மிகப் பெரிய அதிர்ச்சியை ஏற்படுத்தியது. அதைத் தொடர்ந்து டெல்லி உள்ளிட்ட பல மாநிலங்களில் எரிப்பதற்கு போதிய இடங்கள் இல்லாமல் உடல்கள் ஒன்றாக குவிக்கப்பட்டு இருப்பதும் சாலைகள் பூங்காக்களில் எரிக்கப்பட்டு வந்த சம்பவங்களும் நாடு முழுவதும் நிகழ்ந்தது. தொடர்ச்சியான இப்படியான சம்பவங்களை தொடர்ந்து, தேசிய மனித உரிமைகள் ஆணையம் இதில் தற்பொழுது கவனம் செலுத்தியுள்ளது. அதன் தொடர்ச்சியாக, உடல்களை எவ்வாறு கையாள வேண்டும் என்பது தொடர்பாக பல்வேறு வழிகாட்டு நெறிமுறைகளை வழங்கியுள்ளது தேசிய மனித உரிமைகள் ஆணையம். அதில்,  * சடலங்கள் வரிசையாக காத்திருப்பதை தடுக்க தாற்காலிக தகன மேடை அமைக்க வேண்டும். * இடுகாடு /எரியூட்டும் மேடையில் பணிபுரியும் ஊழியர்களுக்கு கொரொனாவால் இறந்தவரின் சடலங்களை கையாள்வது தொடர்பாக விழிப்புணர்வு ஏற்படுத்தப்பட வேண்டும். * சடலங்களை தொடாமல் நடைபெறும் மதசடங்குகளை நடத்த அனுமதி அளிக்கலாம். மத நூல்களில் இருந்து வசனம் வாசிக்கவும், புனித நீர் தெளிக்கவும் அனுமதிக்கலாம். * இறந்தவரின் உறவினர்கள் இறுதி சடங்கு செய்ய முடியாதபோது அவரின் மத, கலாச்சார அம்சங்களை கருத்தில் கொண்டு மாநில/ உள்ளாட்சி நிர்வாகங்கள் அதனை மேற்கொள்ள வேண்டும். * மின்மயானங்களை அதிகரிக்க நடவடிக்கை எடுக்க வேண்டும். முடிந்தவரை புகை இல்லாத வகையில் உடல்களை எரிக்கும் முறையை பின்பற்ற வேண்டும். இதன் மூலமாக புகையின் மூலமாக ஏற்படும் பிரச்சனைகள் தீர்வு காணப்படும். * இறந்தவரின் கண்ணியத்தை மீறும் வகையில் மொத்தமாக சடலங்களை அடக்கம் / எரியுட்டல் செய்யக்கூடாது. * இறந்தவரின் அடையாளம் மற்றும் தகவல்களை சேகரிக்க வேண்டும். * சடலங்களை எடுத்து செல்லும் ஆம்புலன்ஸ் வாகனங்களுக்கு அதிக கட்டணம் வசூலிக்காமல் இருக்க அரசு நடவடிக்கை எடுக்க வேண்டும். * மயானத்தில் பணி புரிபவர்களுக்கு உரிய ஊதியம் வழங்க வேண்டும். மேலும், தடுப்பூசி போடுவதில் அவர்களுக்கு முன்னுரிமை அளிக்க வேண்டும். * இறந்து போனவர்களின் சடலங்களின் புகைப்படத்தை நேரடியாக காண்பிக்க்கூடாத என்ற தேசிய மனித உரிமைகள் ஆணையம் சார்பில் விதிக்கப்பட்டுள்ள ஊடகங்களுக்கான கட்டுப்பாடுகள் தளர்கிறது. அப்புகைப்படங்களை, மங்கலாக பதிவு செய்தபின் அதை பயன்படுத்திக் கொள்ளலாம் என்று தேசிய மனித உரிமைகள் ஆணையம் கூறியுள்ளது. உடன், இந்த வழிகாட்டு நெறிமுறைகள் முறையாக பின்பற்றப்படுகிறதா என்பதை அடுத்த நான்கு வாரங்களுக்கு அறிக்கையாக தயாரித்து தாக்கல் செய்ய வேண்டும் எனவும் மத்திய மாநில அரசுகளுக்கு தேசிய மனித உரிமைகள் ஆணையம் நோட்டீஸ் பிறப்பித்துள்ளது. - நிரஞ்சன் குமார்.
http://dlvr.it/RzgssL

Read More

'பிறருக்கு கொரோனா தொற்றாமல் காத்திட வாய் சுகாதாரமும் முக்கியம்' - மருத்துவர் வழிகாட்டுதல்

கொரோனா வைரஸ் பாதிப்பில் படுக்கை வசதி தட்டுப்பாடை குறைக்க, பெரும்பாலானோருக்கு வீட்டிலிருந்தே சிகிச்சை எடுத்துக்கொள்ள மருத்துவர்கள் அறிவுறுத்தி வருகின்றனர். மிக மோசமான பாதிப்பு என்றால் மட்டும், மருத்துவமனையை நாடுங்கள் என கூறப்பட்டு வருகிறது. இப்படி வீட்டுத் தனிமையில் இருப்பவர்கள், நோயிலிருந்து தங்களை மீட்டெடுக்கும் நோக்கத்தில் செயல்படுவதோடு சேர்த்து, மேற்கொண்டு நோயை பரப்பாமல் இருக்கவும் என்னவெல்லாம் செய்ய வேண்டுமென்பது பற்றியும் தொடர்ச்சியாக அறிவுறுத்தப்பட்டு வருகின்றன. அதன்படி, வீட்டுக்குள்ளும் கட்டாய முகக் கவசம், கைகளை அடிக்கடி சோப்பு போட்டுக் கழுவுவது ஆகியவை பற்றி நிறைய அறிவுரைகள் இதுவரை வழங்கப்பட்டுள்ளன்ன. இவற்றோடு சேர்த்து நோய் பரவலை தடுக்கும் நோக்கத்தில் வாய் சுகாதாரம் பற்றிய விழிப்புணர்வை அதிகப்படுத்த வேண்டுமென அறிவுறுத்துகின்றனர் மருத்துவர்கள். இதுபற்றி விரிவாக சொல்கிறார் மருத்துவர் அர்ஷத் அகில். "கொரோனா தொற்று என்பது தொற்று ஏற்பட்ட நபரின் இருமல், தும்மல், பேசுதல் போன்ற செயல்பாடுகளால் அவர்களின் வாயிலிருந்து வெளிப்படும் சிறு துளிகளின் மூலம் வைரஸ் அருகிலிருப்பவருக்கு நேரடியாக பரவும். இவற்றோடு சேர்த்து, தொற்று ஏற்பட்டிருக்கும் நபர் உபயோகிக்கும் பொருள்களின் மூலமாக மறைமுகமாகவும் வைரஸ் பரவல் இருக்கும். இப்படி மறைமுகமாக பரவும் போது, சாப்பாடு தட்டு - வாஷ்பேஷின் போன்ற நோயாளியின் எச்சில் படும் இடம் வழியாகத்தான் வேகமாக பரவுமென்பது குறிப்பிடத்தக்கது. பாக்டீரியா, வைரஸ் போன்ற கிருமிகள் மனித உடலில் அதிகம் இருக்கும் இடம் வாய்தான். அதனால்தான் கொரோனா வைரஸூம் அடிப்படையில் வாயிலிருந்து அதிகமாக வெளிப்படுகிறது. வைரஸ் வெளிப்பட்ட பிறகு காற்றில் சிறிது நேரம் தங்குகிறது. பிறகுதான் வேறொரு நபருக்குத் தொற்றுகிறது. இதைத்தடுக்கத்தான், வாய்ச்சுகாதாரம் முக்கியமானதாக ஆகிறது. தனிமைப்படுத்தலில் இருக்கும் நபர், தன்னுடைய வாய் சுகாதாரத்தில் பல் துலக்கி (tooth brush) மற்றும் நாக்கு வழிப்பான் (tongue cleaner) ஆகியவற்றை சுத்தமாக வைத்துக்கொள்வது, இப்போதைக்கு முதன்மை பெற்றிருக்கின்றன. இவை இரண்டின் சுத்தத்தையும் நன்கு உறுதிபடுத்திக்கொள்ள வேண்டும். வீட்டில் எல்லோரும் ஒரே கழிப்பறை, குளியலறையைப் பயன்படுத்தும் சூழல் இருந்தால், பல்துலக்கிகளும் ஒன்றாகவே இருக்கும். அந்த சூழலை தவிர்த்துவிட்டு, பிறரின் டூத் ப்ரஷ் இருக்கும் இடத்தோடு, பொதுவாக வைக்காமல் இருக்கவும். கை கழுவும் பழக்கத்தை ஏற்படுத்திக் கொள்வதை போல, மௌத்வாஷ் மூலம் வாய் கொப்பளிக்கும் பழக்கத்தையும் ஏற்படுத்திக்கொள்ளலாம். தினமும் மூன்று முறையாவது இதை செய்யலாம். இரவு தூங்கப்போகும் முன் கட்டாயம் வாய்க்கொப்பளிப்பது நல்லது. உப்பு நீரில் வாய்க்கொப்பளிப்பது, மௌத்வாஷ் உபயோகிப்பதை விட நல்லதுதான். அவரவர் வசதிக்கேற்ப எதைவேண்டுமானாலும் பயன்படுத்தலாம். வாய் சுகாதாரம் என்பதுமட்டுமே நோக்கம். கொரோனாவால் பாதிக்கப்பட்டு சிகிச்சை பெற்றவர்கள், அதிலிருந்து மீண்ட பிறகு அடுத்த சில நாள்களுக்கு வீட்டுத்தனிமையில் இருப்பவர்களுக்கும் இது பொருந்தும். இப்படி மருத்துவமனையிலிருந்து வந்தபிறகு வீட்டுத்தனிமையில் இருப்போர், புதிய பல்துலக்கியையும், நாக்கு வழிப்பானை உபயோகிப்பது நல்லது. இயல்பு நிலை திரும்பிய பின், மீண்டுமொரு முறை புதிய டூத் ப்ரஷ், துலக்கி உபயோகப்படுத்தவும். வாய் சார்ந்த செயல்பாடுகளில், நாம் சாப்பிடும் உணவு உள்ளே போய்விடுகிறது. தட்டுகளையும் பாதுகாப்பாக தனிமைப்படுத்திக்கொள்ளும் அறையிலேயே வைத்துக்கொள்ளலாம். ஆனால், பல் துலக்கும்போது, துலக்கி முடித்த பிறகுப் பல் துலக்கியும், நாக்கு வழிப்பானும் வெளியே தான் இருக்கின்றன. சாதாரண நேரத்தில் கூட, பல் துலக்கி முடித்து சிறிது நேரம் கழித்து டூத் ப்ரஷ்ஷை முகர்ந்து பார்த்தால் அதில் ஒருவகை நாற்றம் இருக்கும். அது பாக்டீரியாவினால் ஏற்படும் நாற்றம்தான். இவை மட்டுமன்றி கோவிட் 19 ஏற்படுத்தும் நுரையீரல் நோய்களில், தொடக்கத்தில் நுரையீரலின் ரத்த நாளங்கள் பாதிக்கப்படுகின்றன என்பதற்கான சான்றுகள் கிடைத்துள்ளதாக ஆய்வொன்று சொல்லியிருக்கிறது. உமிழ்நீரில் வைரஸின் அதிக செறிவு ஏற்படுவதால், அவை மூலமாக சம்பந்தப்பட்ட நபருக்கு கொரோனாவின் தீவிரம் அதிகரிக்கலாம் என்றும் சொல்லப்படுகிறது. ஆக, நம்மையும் நம் குடும்பத்தையும் கொரோனா ஆபத்திலிருந்து காக்க, வாய் சுகாதாரம் மிக மிக முக்கியம்" என்றார்.
http://dlvr.it/RzfTdG

Read More

ஓடிடி திரைப் பார்வை: நவீன ஜிப்ஸிக்களின் வாழ்வைப் பேசும் ‘Nomadland’

Tracks (2013), intothe wild (2007). The Way Back (2010) என பயணங்களை அடிப்படையாகக் கொண்டு உருவாக்கப்பட்ட திரைப்படங்கள் ஏராளம். கிட்டத்தட்ட அனைத்து பயண திரைப்படங்களுக்கும் இடையே இருக்கும் குறைந்தபட்ச ஒற்றுமை அவற்றில் பலவும் யாரோ ஒரு பயணியின் காலக் குறிப்பிலிருந்து, பயோகிராபியை அடிப்படையாகக் கொண்டு உருவாக்கப்பட்டிருக்கும். காரணம் ஒரு பயணத்தை சினிமாவாக எடுக்க நாம் ஒரு நாடோடியாக இருந்திருக்க வேண்டும் அல்லது ஒரு நாடோடியின் வாழ்வை படித்திருக்க வேண்டும் இவை இரண்டுமற்று கற்பனையில் ஒரு பயண சினிமாவை உருவாக்குதல் என்பது நேர்மையானதாக இருக்காது. இப்போது நாம் அறிந்துகொள்ளவிருக்கும் nomadland (2020) என்ற அமெரிக்க சினிமாவும்கூட Nomadland: Surviving America in the Twenty-First Century என்ற கட்டுரைத்தொகுப்பினை அடிப்படையாகக் கொண்டு உருவாக்கப்பட்டதே. 2017ல் இந்த கட்டுரைத்தொகுப்பினை எழுதியவர் ஜெசிகா ப்ரூடர். பயணங்கள் வசீகரமானவை அதிலும் இலக்கற்ற பயணங்கள் இன்னுமே இதம். அமெரிக்காவில் ஒரு காலகட்டத்தில் ஏற்பட்ட பொருளாதார மந்தநிலை காரணமாக வேலை இழந்த பலரில் நாயகி ஃபெர்ன்னும் ஒருவர். 60 வயதைக் கடந்த ஃபெர்ன் கணவனை இழந்திருந்த நிலையில் கையில் இருக்கும் சிறிய அளவிலான பணத்தைக் கொண்டு தனக்கென ஒரு வேனை வடிவமைத்துக் கொள்கிறாள். அந்த வேன் தான் இனி வாழ்நாள் முழுமைக்குமான அவளது வீடு. அதில் ஏறி அமெரிக்காவின் வெவ்வேறு நிலப்பரப்புகளுக்கு அவள் பயணிக்கிறாள். அவளது வேன் சக்கரம் கட்டிய எந்திரப் பறவை போல சாலையில் அசைந்து செல்கிறது. ஆங்காங்கே கிடைத்த வேலைகளை செய்து கொண்டு தன் நாள்களை வாழ்வதே ஃபெர்ன்னின் இப்போதைய விருப்பம். ஜிப்ஸிக்களின் பாணி அதுதானே. ஃபெர்ன் ஒரு நவீன ஜிப்ஸியாக இந்தக் கதையில் வாழ்கிறாள். அவளுக்கென உறவினர்கள் சிலர் ஊரில் இருந்தாலும் பயணத்தை விரும்பும் அவளது நாடோடி மனது அனைத்திலிருந்தும் தன்னை விடுவித்துக் கொள்கிறது. பயணத்தின் போது ஒரு இடத்தில் அமேசான் நிறுவனத்தில் பேக்கிங் பிரிவில் அவளுக்கு தற்காலிக வேலையொன்று கிடைக்கிறது. பகலில் நிறுவனத்தில் வேலை செய்யும் அவள் இரவில் தனது வேனில் வந்து ஓய்வு எடுத்துக்கொள்வாள். பிறகு அந்த தற்காலிக வேலைக்கான கூலியை வாங்கிக் கொண்டு அடுத்த இடத்திற்கு பயணிக்கிறாள். இப்படியாக அமெரிக்காவின் பல்வேறு வகையான நிலப்பரப்புகளை சாலைவழியே நமக்கு அறிமுகம் செய்கிறார் பெண் இயக்குநர் Chloé Zhao. ஒளிப்பதிவாளர் Joshua James Richards கையில் கேமராவோடு ஒரு ஜிப்ஸியாகவே அலைந்திருக்கிறார். இயக்குநர் Chloé Zhao’ன் முந்தைய சினிமாக்களான ‘the rider’, 'Songs My Brot.hers Taught Me' ஆகியவற்றின் ஒளிப்பதிவாளரும் இவரே ஃபெர்ன்னைப் போலவே நாடோடி வாழ்வை விரும்பும், நாடோடி வாழ்வை வாழ்ந்து கொண்டிருக்கும் பலரையும் அவள் தனது பயணத்தில் சந்திக்கிறாள். அவர்களில் பலரும் 60 வயதைக் கடந்தவர்கள். எல்லோருமே ஃபெர்ன்னைப் போல ஒரு வேனை வடிவமைத்துக் கொண்டு அமெரிக்க சாலைகளில் பறந்துகொண்டிருப்பவர்கள். இன்னொரு நாடோடியான ஸ்வாங்கியின் அறிமுகம் ஃபெர்ன்னுக்கு கிடைக்கிறது. இருவரும் ஒருவருக்கொருவர் உதவி செய்துகொள்கிறார்கள். ஸ்வாங்கி அடுத்த சில மாதங்களில் இறந்து போகப் போகும் புற்றுநோயாளி. ஒரு காட்சியில் சக நாடோடிகளுக்கு விடைகொடுத்து விட்டு பிரிந்து செல்லும் ஸ்வாங்கி இறந்தும் போகிறாள். ஸ்வாங்கியின் பயணம் முடிந்தாலும் மற்ற நாடோடிகளின் பயணம் மிச்சமிருக்கிறது. ஸ்வாங்கி கதாபாத்திரத்தில் ச்சார்லன் ஸ்வாங்கி நடித்திருக்கிறார். டேவ் கதாபாத்திரத்தில் டேவிட் ஸ்ட்ராதைரின் நடித்திருக்கிறார். ஃபெர்ன்னுக்கு உற்ற நண்பனாகக் கிடைக்கிறார் டேவ். நாடோடியான அவர் தனக்கு பேரன் பிறந்திருப்பதாக செய்தி வந்திருப்பதை ஃபெர்னுக்கு சொல்லிவிட்டு சொந்த ஊர் புறப்படுகிறார். தொலைவில் செல்லும் டேவிட்டின் வேனை ஃபெர்ன் மவுனமாக பார்த்து நிற்கிறாள். இவ்விருவருக்கும் இடையிலான அன்பு இதம். இன்னொரு நாடோடி ஃபெர்ன்னிடம் “தன் மகனுக்கு இன்று 32 வயது. ஆனால் அவன் 5 வருடங்களுக்கு முன் தன் வாழ்வை முடித்துக் கொண்டான். அவனது நினைவாக மக்களுக்கு சேவை செய்யவே நான் நாடோடியாக அலைகிறேன்.” என்கிறார். இப்படி ஒவ்வொரு நாடோடிக்குப் பின்னேயும் சொல்ல ஒரு அழுத்தமான கதை இருக்கிறது., அவற்றை எல்லாம் காட்சிக் கோர்வையாக்கி நவீன ஜிப்ஸிக்களின் வாழ்வை அற்புதமாக பதிவு செய்திருக்கிறார் இயக்குநர் Chloé Zhao.சீனாவில் உள்ள பெய்ஜிங்கில் பிறந்தவர் Chloé Zhao.Nomadl and'ற்கு முன் ‘the rider’, 'Songs My Brothers Taught Me', 'Daughters' உள்ளிட்ட படங்களை இவர் இயக்கி இருக்கிறார். வெனிஸ் படவிழாவில் விருது வென்ற இப்படம் பிறகு கோல்டன் குளோப் விருதினைப் பெற்றது. 2021ஆம் ஆண்டுக்கான ஆஸ்கர் விழாவில் சிறந்த படத்திற்கான விருது, சிறந்த இயக்குநருக்கான விருதுகளை இப்படம் வென்றது., மேலும் இப்படத்தில் ஃபெர்ன் கதாபாத்திரத்தில் நடித்திருக்கும் ப்ரான்சஸ் மெக்டார்மெண்ட் சிறந்த நடிகைக்கான ஆஸ்கர் விருதுனைப் பெற்றார். இவை மட்டுமல்லாது பல்வேறு சர்வதேச திரைப்பட விருதுகளையும் இந்த சினிமா வாங்கிக் குவித்து வருகிறது. தற்போது இந்த சினிமாவை ஹாட் ஸ்டாரில் பார்க்கலாம். பக்குவப்பட்ட மனது பயணத்தை நேசிக்கும். பயணங்களே மனிதனை பக்குவப்படுத்தும். நீ,நான்,அதிகாரம்,ஆணவம் என அனைத்தையும் ஒரு பயணத்தில் தொலைத்துவிட்டு ஃபெர்னைப் போலொரு பறவையாக கரைந்து போவோம். - சத்யா சுப்ரமணி முந்தைய ஓடிடி திரைப் பார்வை: ‘செஞ்சுரி கவுடா’வின் 'திதி'யும், நமக்கு கிடைக்கும் சேதியும்!
http://dlvr.it/RzfTXr

Read More

2 டோசேஜூக்கும் வெவ்வேறு தடுப்பூசிகள் போட்டுக்கொண்டால் ஆபத்தாகுமா? - ஆய்வில் வெளியான தகவல்

தடுப்பூசி தட்டுப்பாடு காரணமாக, இரு டோசேஜ்ஜின் போதும், இருவேறு தடுப்பூசிகளை சிலர் போட்டுக்கொள்கின்றனர். இது ஆபத்தானதா, இல்லை ஆரோக்கியமானதா என்பதை பற்றிய ஆய்வொன்று வெளியாகியுள்ளது. அதை இங்கு பார்ப்போம். நாடு முழுவதும் கொரோனா வைரஸின் தீவிரம் அதிகரித்துக் கொண்டிருக்கும் இதேநேரத்தில் தடுப்பூசி தட்டுப்பாடும் அதிகமாக உள்ளது. தடுப்பூசி மட்டுமே கொரோனாவுக்கு எதிரான போரில் நம்மை காக்கும் ஒரே ஆயுதம் என்பதால், தடுப்பூசி தட்டுப்பாட்டினால் பாதிக்கப்படாமல் இருக்க எண்ணி மக்களில் சிலர் முதல் டோஸ் ஒரு தடுப்பூசியும், இரண்டாவது டோஸ் வேறொரு தட்டுபூசியும் மக்கள் போட்டுக்கொள்கின்றனர். ஆனால் இப்படி இருவேறு தடுப்பூசிகள் போட்டுக்கொள்வது, அவர்களுக்கு பக்கவிளைவுகள் ஏற்படுவது ஆய்வில் தெரியவந்துள்ளது. பக்கவிளைவுகளில், மிதமாகவும் மோசமாகவும் பக்கவிளைவுகள் ஏற்படுவது உறுதிசெய்யப்பட்டுள்ளது. அந்த விளைவு, காய்ச்சலாகவோ, குளிர் ஜுரமாகவோ, தலைவலியாகவோ பெரும்பாலான நேரம் இருப்பதாகவும் கூறுகின்றனர் மருத்துவர்கள். இதுதொடர்பாக லேன்செட் மருத்துவ பத்திரிகையில் வெளிவந்திருக்கும் மருத்துவ ஆய்வில், முதல் டோசேஜ் போடப்படும் தடுப்பூசியின் தாக்கம்தான் பெரும்பாலும் அடுத்தமுறையும் இருக்கும் என்றும், இருந்தாலும் இரண்டாவது டோசேஜ் எந்தளவுக்கு முந்தைய தடுப்பூசியோடு இணைந்து செயல்படுகிறது என்ற வேகத்தின் அடிப்படையில் ஒரு சில கூடுதல் அறிகறிகள் அதிகமாக தெரியும் என்றும் சொல்லப்பட்டுள்ளது.  ஆக்ஸ்போர்டு பல்கலைக்கழகம் இதற்காக செய்த ஆய்வில், வெவ்வேறு தடுப்பூசிகள் எடுத்துக்கொள்ளும் நபர்களும் 34 சதவிகிதம் காய்ச்சலுக்கான வாய்ப்பு இருப்பது உறுதிசெய்யப்பட்டுள்ளது. இதுபோன்ற பக்கவிளைவுகள்யாவும், தடுப்பூசி போட்டு 48 மணி நேரத்துக்கு பின்னரே தெரிவதாகவும், இந்த விளைவுகள் சம்பந்தப்பட்ட நபரை மருத்துவமனைக்கு அழைத்துச்செல்லும் அளவுக்கு ஆபத்தானதாக இல்லை என்றும் சொல்லப்படுகிறது. இப்போதைக்கு இந்த பக்கவிளைவுகளின் விளைவு எதுவும் உறுதியாக தெரியாததால், மக்கள் இதுபோன்ற ரிஸ்க்கை எடுக்க வேண்டாமென அவர்கள் கேட்டுக்கொண்டுள்ளனர். இருப்பினும், இருவேறு தடுப்பூசிகளை போட்டுக்கொள்ளும்போது அதன் முழு பலன்கள் கிடைப்பதில் கொஞ்சம் சிக்கல் இருப்பது தெரியவந்துள்ளது. எந்தளவுக்கு பலன் இருக்கிறது என்பது தெரியவர, இன்னும் ஒரு சில வாரங்கள் ஆகுமென ஆக்ஸ்போர்டு நிபுணர் குழு தெரிவித்துள்ளது. உலக சுகாதார நிறுவனம், அமெரிக்க நோய்த் தடுப்பு மையம், இந்திய மருத்துவ ஆராய்ச்சி கழகம் என எந்தவொரு அதிகாரவர்க்க மருத்துவ நிபுணர் குழுவும், இப்படி இருவேறு தடுப்பூசிக்கென வழிமுறைகளையோ தடையையோ நிபந்தைனைகளையோ இதுவரை விதிக்கவில்லை. இவர்களின் மௌனம், சம்மதத்துக்கான அறிகுறி இல்லை என்பதை மனதில் கொண்டு, ஒரே வகை தடுப்பூசியை மட்டும் இப்போதைக்கு மக்கள் போட்டுக்கொள்ள வேண்டும் என்கிறார்கள் வல்லுநர்கள் சிலர்.
http://dlvr.it/Rzc9FG

Read More

பக்கா பிளான்... ஊர்மக்களின் சுய கட்டுப்பாடு... - கொரோனா இல்லாத கேரளாவின் ஒரே கிராமம்!

கொரோனா உச்சத்தில் இருக்கும் கேரள மாநிலத்தில் ஒரு கிராமத்தில் ஒருவருக்குகூட கொரோனா பாதிப்பு ஏற்படவில்லை என்பது ஆச்சர்யமளிக்க கூடிய செய்தியாக பேசப்பட்டு வருகிறது. அந்தக் கிராமம் குறித்து பார்ப்போம்! இந்தியாவில் கொரோனா பாதிப்பு அதிகம் இருக்கும் மாநிலங்களில் ஒன்று கேரளா. இங்கு தினசரி பாதிப்பு 40,000-ஐ தொட்டு வருகிறது. அந்த அளவுக்கு அம்மாநிலத்தின் அனைத்து மாவட்டங்களிலும் கொரோனா பாதிப்பு உச்சத்தை தொட்டு வருகிறது. ஆனால் இதே கேரளாவில் ஒரு கிராமத்தில் ஒருவருக்குக்கூட கொரோனா பாதிப்பு ஏற்படவில்லை என்றால் ஆச்சர்யமாக இருக்கிறதல்லவா? பசுமையான இடுக்கி மாவட்டத்தில் உள்ள எடமலக்குடி என்ற பழங்குடி கிராமம் அந்தப் பெருமைக்கு சொந்தமான ஊர். இங்கு இருக்கும் மக்களில் ஒருவருக்குக்கூட தற்போது கொரோனா இல்லை. இதை சாத்தியப்படுத்தியதும் இந்த ஊர் மக்கள் தான். தங்களுக்காகவே சுயமாக லாக் டவுன் விதிப்பது, வெளியாட்கள் கிராமத்திற்குள் நுழைவதைத் தடுப்பது, கிராமத்தில் விளைவித்த உணவுப் பொருட்களை மட்டும் உண்பது ஆகியவற்றுடன் இங்கு தூய்மையான காற்று அதேபோல் இம்மக்களின் எளிய வாழ்க்கை முறை போன்ற காரணிகள் காரணமாக கொரோனா இவர்களை அண்டவில்லை. இது நிச்சயம் வியப்புதரக்கூடிய செய்தி தான். இது தொடர்பாக பேசியிருக்கும் பி கே ஜெயஸ்ரீ என்பவர், ”இந்த பஞ்சாயத்தில் இருந்து ஒரு கொரோனா பாதிப்புகூட பதிவாகவில்லை. மூணாரின் வனப்பிரிவுக்குள் அமைந்துள்ள எடமலக்குடி கிராமம் சுமார் 3,000 பேர் வசிக்கும் முதல் பழங்குடி கிராம பஞ்சாயத்து ஆகும். இந்த கிராமத்துக்கென சாலைகள் இல்லை. கடந்த ஆண்டு ஆகஸ்டில் ஏற்பட்ட நிலச்சரிவு இருந்த இணைப்புகளை துண்டித்துவிட்டது. இதனால் இயற்கையாகவே தனித்துவிடப்பட்டது போல் இந்த கிராமம் அமைந்துவிட்டது. கடந்த ஆண்டு தொற்றுநோய் தொடங்கியபோது, உள்ளூர் பஞ்சாயத்து ஒரு கூட்டம் கூட்டி இப்பகுதியில் தங்களுக்காகவே ஊரடங்கு போட்டுக்கொண்டனர். அதன்படி, வெளிநபர்கள் கிராமத்துக்குள் வராதவாறு கண்காணிக்கப்பட்டனர். அதே நேரத்தில் உள்ளூர்வாசிகள் யாரேனும் வெளியூர் சென்றால் அவர்களுக்கு கட்டாய தனிமைப்படுத்தலில் இருக்க வைக்கப்பட்டனர். இதேபோல் மாஸ்க் மற்றும் சானிடைசர் போன்ற தற்காப்பு பொருட்களும் அவர்கள் மத்தியில் புழக்கத்துக்கு விடப்பட்டன. இதுபோக இங்கு வசிக்கும் பழங்குடியினரின் சைவ உணவு மற்றும் காடுகளின் சுத்தமான ஆகிசிஜன் நிரம்பிய காற்று அவர்களை ஆரோக்கியமாகவும், கொரோனா வராமலும் வைத்திருக்க உதவியது" என்றார். இப்படி புத்திசாலித்தனமாக முன்னரே திட்டமிட்டு, அவசரகால சூழ்நிலையில் பாதுகாப்பாக இருந்தாலும், அம்மாநில சுகாதார அதிகாரிகள் இப்பகுதியில் தடுப்பூசி செலுத்தும் திட்டத்தை நடத்த திட்டமிட்டுள்ளனர் எனக் கூறப்படுகிறது.
http://dlvr.it/RzZhcb

Read More

ஊரடங்கு: காவலரின் பிரம்படியில் இருந்து தப்பிக்க நூதன வழி தேடிய சைக்கிள் ஓட்டி

இதுவோ ஊரடங்கு காலம். அரசு அனுமதித்துள்ள நேரத்தையும் கடந்து தேவையில்லாமல் கொரோனா கட்டுப்பாட்டு விதிகளை மதிக்காமல் வெளியே சுற்றுபவர்களிடம் அபராதம் வசூலித்தும், வாகனங்களை பறிமுதல் செய்யும் பணிகளிலும் ஈடுபட்டு வருகின்றனர் முன்கள பணியாளர்களான காவலர்கள். சமயங்களில் அவர்கள் கையில் உள்ள பிரம்பை கொண்டு அத்து மீறுபவர்கள் மீது அடிப்பதும் உண்டு.  இந்நிலையில் கர்நாடக மாநிலம் உடுப்பி பகுதியை சேர்ந்த சைக்கிள் ஓட்டி ஒருவர் காவலரின் பிரம்படியில் இருந்து தப்பிக்க நூதன முறையில் யோசித்து தனது சைக்கிள் சீட்டின் பின்புறத்தில் தகர ஷீட் ஒன்றை பொருத்தி உள்ளார். அதோடு தலையில் ஹெல்மெட்டும் அணிந்து கொண்டு சைக்கிள் ஓட்டி செல்கிறார் அவர்.  With many motorists receiving a couple of sharp thwacks of the lathi land on their buttocks, this cyclist in Udupi comes prepared with rear protection, helmet and a mask :) @IndiaToday pic.twitter.com/hoTWV7vBSm — Nolan Pinto (@nolanentreeo) May 11, 2021 அந்த வீடியோ தற்போது சமூக வலைத்தளத்தில் வைரலாகி வருகிறது. சிலர் அந்த வீடியோவை ஆதரித்தும், சிலர் ஊரடங்கை மீறுவது எந்த வகையில் நியாயம் என்றும் கோபத்தில் பொங்கி வருகின்றனர். 
http://dlvr.it/RzZhP6

Read More

தமிழகத்தில் 30,000ஐ தாண்டிய தினசரி பாதிப்பு - கொரோனாவுக்கு 2 ஆண் குழந்தைகள் உயிரிழப்பு

தமிழகத்தில் தினசரி கொரோனா பாதிப்பு 30,000ஐ தாண்டியிருக்கிறது. தமிழகத்தில் ஒரே நாளில் 30,355 பேருக்கு கொரோனா தொற்று கண்டறியப்பட்டுள்ளது. கொரோனாவுக்கு சிகிச்சை பலனின்றி ஒரே நாளில் 293 பேர் உயிரிழந்துள்ளனர் சென்னையில் கடந்த 24 மணி நேரத்தில் 7,564 பேருக்கு கொரோனா தொற்று உறுதியாகியுள்ளது. செங்கல்பட்டு மாவட்டத்தில் 2,670, கோவை மாவட்டத்தில் 2,636 பேர் பாதிக்கப்பட்டுள்ளனர். 12 வயதுக்கு உட்பட்ட 1,091 சிறார்கள் ஒரே நாளில் நோய் தொற்றால் பாதிக்கப்பட்டுள்ளனர். சென்னையை சேர்ந்த இரண்டு ஆண் குழந்தைகள் கொரோனா தொற்றால் உயிரிழந்துள்ளது.
http://dlvr.it/RzXXlP

Read More