காலில் விழவைக்கும் கலாசாரம் அருவருக்கவில்லையா?: ஒட்டனந்தல் சம்பவத்திற்கு கமல் கண்டனம்

விழுப்புரம் மாவட்டம் ஒட்டனந்தலில் பட்டியல் சமூகத்தினரை காலில் விழுந்து மன்னிப்பு கேட்க வைத்த சம்பவத்திற்கு மக்கள் நீதி மய்யம் தலைவர் கமல்ஹாசன் கண்டனம் தெரிவித்துள்ளார். இவ்விவகாரத்தில் 8 பேர் மீது வன்கொடுமை தடுப்புச் சட்டத்தில் வழக்குப் பதிவு செய்யப்பட்டுள்ள நிலையில், அதில் இருவர் கைது செய்யப்பட்டுள்ளனர். திருவெண்ணெய்நல்லூர் காவல் எல்லைக்குட்பட்ட பகுதியில் ஒட்டனந்தல் என்ற கிராமம் உள்ளது. அங்கு வசிக்கும் பட்டியலின மக்கள் கடந்த 12ஆம் தேதி கோயில் திருவிழா நடத்த ஏற்பாடு செய்துள்ளனர். இதுகுறித்த புகாரில் விசாரணை நடத்திய காவல்துறையினர், பொதுமுடக்க காலத்தில் திருவிழா நடத்த அனுமதி மறுத்தனர். இதுதொடர்பாக காவல்நிலையத்தில் மன்னிப்பு கடிதம் எழுதிக்கொடுத்துவிட்டு பட்டியலின மக்கள் ஊர் திரும்பியுள்ளனர். அப்போது, கூட்டப்பட்ட கிராம பஞ்சாயத்தில், விதிகளை மீறியதாக பட்டியலின மக்கள்மீது குற்றச்சாட்டு முன்வைக்கப்பட்டுள்ளது. அதில், மூன்று பேரை அழைத்து பிற சமூக மக்கள் முன்னிலையில் காலில் விழவைத்து மன்னிப்பு கேட்க வைத்த சம்பவம் அதிர்ச்சியை ஏற்படுத்தியுள்ளது. இதுதொடர்பாக நடத்தப்பட்ட விசாரணையில், சம்பந்தப்பட்ட 8 பேர் மீது வன்கொடுமை தடுப்புச் சட்டம் உள்ளிட்ட 4 பிரிவுகளில் வழக்குப் பதிவு செய்யப்பட்டுள்ளது. அதில் இருவர் கைது செய்யப்பட்டுள்ள நிலையில், எஞ்சிய 6 பேரை காவல்துறையினர் தேடி வருகின்றனர். இந்த சம்பவத்திற்கு மக்கள் நீதி மய்யம் கட்சியின் தலைவர் கமல்ஹாசன் கண்டனம் தெரிவித்துள்ளார். அவர் தனது டிவிட்டர் பக்கத்தில், ’’இந்தியர் யாவரும் என் உடன்பிறந்தோர் என்று உறுதிமொழி எடுக்கும், குலத் தாழ்ச்சி உயர்ச்சி சொல்லல் பாவம் என்று மனப்பாடப் பாட்டு கற்பிக்கும் தமிழகத்துக்குள்தான் விழுப்புரம் ஒட்டனேந்தல் இருக்கிறதா? திருவிழா கொண்டாடியதற்காக சக மனிதரைக் காலில் விழவைக்கும் கலாச்சாரம் அருவருக்க வைக்கவில்லையா? இம்முறையே இறுதி முறையாக இருக்கட்டும். அரசின் தலையீடு வலுவானதாக அமையட்டும்’’ என்று பதிவிட்டுள்ளார்.   திருவிழா கொண்டாடியதற்காக சக மனிதரைக் காலில் விழவைக்கும் கலாச்சாரம் அருவருக்க வைக்கவில்லையா? இம்முறையே இறுதி முறையாக இருக்கட்டும். அரசின் தலையீடு வலுவானதாக அமையட்டும். (2/2) — Kamal Haasan (@ikamalhaasan) May 16, 2021
http://dlvr.it/RznTcs

Read More

காபி ஆர்ட் மூலம் பெண்மையின் சிறப்பை விளக்கும் ஓவியம் - மதுரை மாணவிக்கு குவியும் பாராட்டு!

உலக குடும்பத் தினத்தையொட்டி 'காபி ஆர்ட்' மூலம் பெண்மையின் சிறப்பை விளக்கும் வகையில் ஓவியம் வரைந்து வரும் மாணவிக்கு பாராட்டுகள் குவிகிறது. மதுரை மேல அனுப்பானடி பகுதியை சேர்ந்தவர் கீர்த்திகா. இவர் திருப்பூரில் உள்ள தனியார் கல்லூரி ஒன்றில் பேஷன் டெக்னாலஜி துறையில் இறுதியாண்டு பயின்று வருகிறார். இவருடைய தந்தை கண்ணன் மதுரை மாட்டுத்தாவணி காய்கறி சந்தையில் காய்கறி கடை நடத்தி வருகிறார். இச்சூழலில், இன்று உலக குடும்ப தினைத்தையொட்டி குடும்பத்தின் ஆதாரமாக ஆணிவேராக விளங்கக்கூடிய பெண்ணின் சிறப்பை விளக்கும் வகையில் காபித்தூளை மட்டும் பயன்படுத்தி கீர்த்திகா ஒவியம் வரையும் முயற்சியில் ஈடுபட்டுள்ளார். ஒரு குடும்பத்தில் முக்கியமான நபராக தாய் உள்ளதால் அன்றாடம் அவர் செய்யும் பணிகள், ஒரு பெண் இறப்பு முதல் பிறப்பு வரை எப்படி வளர்கிறார், அவர் செய்யும் பணிகள் குறித்து பிரம்மாண்ட ஓவியத்தை வரையும் முயற்சியில் ஈடுபட்டுள்ளார். 160 சதுர அடி வெள்ளை பிளக்ஸில் காலை 8 மணி முதல் வரைய தொடங்கியுள்ளார். முழுவதுமாக இந்த ஓவியத்தை வரைய 12 மணி நேரமாகும் என மாணவி கீர்த்திகா தெரிவிக்கிறார். வண்ண வண்ண நிறங்களில் பலர் ஒவியம் வரைந்து சாதனை படைக்கும் நிலையில், உலக குடும்ப தினத்தில் பெண்மையின் பெருமையை எடுத்து சொல்லும் வகையில் இவர் வரையும் ஒவியம் பலரின் பாராட்டுதலை பெற்றுள்ளது. இந்தியாவிலேயே முதல்முறையாக ஓய்வில்லாமல் தொடர்ச்சியாக தனிநபராக ஓவியம் வரையும் முயற்சியில் ஈடுபட்டுள்ளார். காபி ஆர்ட் குறித்து கொஞ்சமாகவே தெரிந்திருந்தாலும், கடந்த கொரானா முதல் அலையின் போது வீட்டில் வேலையில்லாமல் இருந்த போது தொடர்ந்து வரைய கற்றுக்கொண்டதாக தெரிவித்தார். குடும்பத்தில் முக்கியமானவர் தாய் என்பதாலும், அப்பாவுக்கு மேலே நான் தாயை பார்ப்பதால் இந்த உலக குடும்ப தினத்தில் ஓவியம் வரைவதாகவும், ஒரு பெண் பிறப்பதில் இருந்து கல்யாணம் செய்வது, குழந்தைகளை பெறுவது, குடும்பத்தை வழிநடத்துவது என 11 வித ஓவியங்களை வரைவதாகவும் மாணவி கீர்த்திகா தெரிவித்தார். உலக குடும்ப தினத்தில் பெண்ணின் பெருமையை விளக்கும் வகையில் மாணவி கீர்த்திகா வரைந்த ஓவியம் அனைவரின் பாராட்டுதலையும் பெற்றுள்ளது.
http://dlvr.it/RzmM1H

Read More

இந்தியா: கடந்த 24 மணி நேரத்தில் புதிதாக 3,11,170 பேருக்கு கொரோனா பாதிப்பு!

இந்தியாவில் கடந்த 24 மணி நேரத்தில் புதிதாக 3,11,170 பேருக்கு கொரோனா பாதிப்பு கண்டறியப்பட்டுள்ளது.   மத்திய சுகாதாரத்துறை இன்று வெளியிட்டுள்ள அறிக்கையில், நாட்டில் கடந்த 24 மணிநேரத்தில் 3 லட்சத்து 11 ஆயிரத்து 170 பேர் கொரோனா பாதிப்புக்குள்ளாகியுள்ளனர். இதனால் மொத்த கொரோனா பாதிப்பு எண்ணிக்கை 2 கோடியே 46 லட்சத்து 84 ஆயிரத்து 77 ஆக அதிகரித்துள்ளது. கடந்த 24 மணிநேரத்தில் கொரோனா பாதிப்பால் நாட்டில் 4,077 பேர் உயிரிழந்து உள்ளனர். இதனால் மொத்த உயிரிழப்பு எண்ணிக்கை 2,70,284 ஆக உயர்ந்து உள்ளது. மேலும் நேற்று ஒரே நாளில் 3 லட்சத்து 62 ஆயிரத்து 437 பேர் குணமடைந்து வீடு திரும்பியுள்ளனர். இதனால் மொத்த குணமடைந்தோர் எண்ணிக்கை 2 கோடியே 07 லட்சத்து 95 ஆயிரத்து 335 ஆக உயர்வடைந்து உள்ளது. தற்போது 36 லட்சத்து 18 ஆயிரத்து 458 பேர் கொரோனாவுக்கு சிகிச்சை பெற்று வருகின்றனர். இதுவரை நாடு முழுவதும் 18 கோடியே 22 லட்சத்து 20 ஆயிரத்து 164 பேருக்கு கொரோனா தடுப்பூசி செலுத்தப்பட்டுள்ளது.
http://dlvr.it/RzmLs4

Read More

கொரோனா 2வது அலையில் அதிகம் பாதிக்கப்படும் கர்ப்பிணிகள்! - மருத்துவர்கள் சொல்வதென்ன?

தமிழகத்தில் கொரோனா 2ஆவது அலை கோரத் தாண்டவம் ஆடி வருகிறது. சிறார்கள், இளம் வயதினர், பெரியவர்கள், இணைநோய் இல்லாதவர்கள் என அனைத்து தரப்பினரையும் தாக்கும் இந்த கொரோனா, கர்ப்பிணிகளை மட்டும் விட்டு வைத்ததா என்ன, தினந்தோறும் மருத்துவமனைக்கு வரும் கொரோனா நோயாளிகளில் கர்ப்பிணிகளும் அடங்குவர்.  இதுவரை கொரோனா தொற்றுக்கு மதுரையை சேர்ந்த மருத்துவர் சண்முகப் பிரியா உட்பட 2க்கும் மேற்பட்ட கர்ப்பிணிகள் உயிரிழந்துள்ளதாக மருத்துவர்கள் கூறுகின்றனர். குறிப்பாக, கொரோனா முதல் அலையை விட இரண்டாவது அலையில் அதிக கர்ப்பிணிகள் பாதிக்கப்படுகிறார்கள். முதல் அலையின் போது 21 கர்ப்பிணிகளுக்கு பரிசோதனை செய்தால், அதில் 1 அல்லது 2 பேருக்கு மட்டுமே தொற்று உறுதியானது. அதுவே இரண்டாவது அலையில், 6 பேருக்கு தொற்று உறுதியாவதாக, மருத்துவர்கள் கூறுகின்றனர். அதுவும் சிலர் மூச்சுத்திணறலுடன் மருத்துவமனைக்கு வருவதாகவும் கூறப்படுகிறது.  இதில், வேதனைக்குரிய விஷயம் என்னவென்றால், கர்ப்பிணிகளுக்கு கொரோனா தொற்று இருந்தால், அது குழந்தைகளையும் பாதிக்கிறது என்பது தான். கர்ப்பிணிகளும் கொரோனா தடுப்பூசி போட்டுக்கொள்ளலாம் என அரசு அறிவுறுத்தி இருந்தாலும், அதற்கான முறையான வழிகாட்டு நெறிமுறைகள் இல்லாததால், தடுப்பூசி போடுவதிலும் குழப்பம் நீடிக்கிறது. இந்நிலையில், தொற்று பாதிப்பு ஏற்படும் கர்ப்பிணிகளுக்கு மருத்துவர்கள் பெரும்பாலும் வீட்டு தனிமையையே பரிந்துரைக்கிறார்கள். பாதிப்பு அதிகம் ஏற்படும் பட்சத்தில், மருத்துவமனையில் அவர்களுக்காக அமைக்கப்பட்டுள்ள வார்டுகளில் வைத்து சிகிச்சை வழங்கப்படுகிறது.  பொதுவாக கர்ப்பிணிகள் வீட்டை விட்டு வெளியெ செல்லாமல் இருப்பது, வீட்டில் இருப்பவர்களுடன் கூட தனிமனித இடைவெளியை பின்பற்றுவது, சத்தான மற்றும் சூடான ஆகாரங்களை உட்கொள்வது, வீட்டில் யாருக்கேனும் தொற்று பாதிப்பு ஏற்பட்டிருந்தால் கர்ப்பிணிகள் தன்னை தானே தனிமைப்படுத்திக் கொள்வது உள்ளிட்டவை தொற்றில் இருந்து தற்காத்து கொள்ள உதவும் என மருத்துவர்கள் கூறுகின்றனர். 
http://dlvr.it/RzkhNh

Read More

'பி.1.617' கொரோனா வகையை தடுக்குமா கோவாக்சின், கோவிஷீல்டு? - ஐசிஎம்ஆர் விளக்கம்

கோவாக்சின், கோவிஷீல்டு தடுப்பூகள் கொரோனா முதல் அலையின்போது உருவாக்கப்பட்டவை. அந்த நேரத்திலிருந்த கொரோனா, இப்போது உருமாறி, தன்மையை  மாற்றிக்கொண்டது. தன்மையை மாற்றிக்கொண்ட இந்த கொரோனாவுக்கு எதிராகவும் கோவாக்சினும் கோவிஷீல்டும் செயல்படுமா? - இதுபற்றி ஆய்வு செய்த ஐ.சி.எம்.ஆர். அதன் பதிலை தற்போது கூறியுள்ளதை விரிவாக பார்ப்போம். இந்தியாவில் தற்போதைக்கு அதிகப்படியான மக்களுக்கு செலுத்தப்பட்டிருக்கும் தடுப்பூசிகள் கோவிஷீல்டும் கோவாக்சினும்தான். இந்த தடுப்பூசிகள் முதல் அலை கொரோனா பாதிப்பு ஏற்பட்டபோது, அதை தடுக்கும் வகையில் உருவாக்கப்பட்டது. ஆனால், கொரோனா வேகமாக உருமாறி, தற்போது இரண்டாம் அலை பாதிப்பை ஏற்படுத்தி வருகிறது. பி.1.617 எனப்படும் இந்த புதிய உருமாறிய கொரோனாவுக்கு எதிராக கோவிஷீல்டும் கோவாக்சினும் எந்த அளவுக்கு செயல்படும் என்பது கேள்விக்குறியாகியது. இதுசார்ந்த சந்தேகங்கள் இருந்துவரும் சூழலிலும், தடுப்பூசி விநியோகத்தை தடுக்க வேண்டாம் என்ற நோக்கத்தில் செயல்படுகிறது அரசு. இதன்மூலம், கொரோனாவுக்கு எதிரான ஆன்டிபாடிகளை மக்களின் உடலுக்குள் அனுப்புவோம் என்பதுதான் இந்த நோக்கத்தின் அடிப்படை. மேற்கொண்டு, இப்போதுள்ள உருமாறிய கொரோனாவுக்கு (பி.1.617 வகை கொரோனா) எதிரான மருந்து மாத்திரைகள் தடுப்பூசி குறித்தும் ஆய்வுகள் நடந்து வருகின்றது. இந்நிலையில், இந்திய மருத்துவ ஆராய்ச்சி மையம் அளித்திருக்கும் தகவலில், கோவாக்சின் மற்றும் கோவிஷீல்டு தடுப்பூசிகள் பி.1.617 வகை உருமாறிய கொரோனாவை 50 சதவிகிதம் தடுப்பதாக கூறப்பட்டுள்ளது. 50 சதவிகிதம் தடுக்கப்படும் என்பதை குறைவாக எண்ண வேண்டாம், இதுவும் இப்போதைக்கு நாம் பரவலை தடுக்க உதவும் பேராயுதமாக இருக்குமென சொல்கின்றனர் வல்லுநர்கள். கடந்த ஜனவரி மாதம், பூனேவிலுள்ள ஐ.சி.எம்.ஆர்.-ன் தேசிய தேசிய வைராலஜி நிறுவனத்தின் (என்.ஐ.வி.) விஞ்ஞானிகள் சார்பில் இதற்கான ஆய்வுகள் நடத்தப்பட்டது. அப்போது இந்தியாவில் பரவும் பி.1.617 வகை உருமாறிய கொரோனா வகை; இதோடு ஒத்துப்போகும் ஐ.நா. வில் பரவில் பி.1.1.7 கொரோனா வகை; தென் ஆப்பிராக்கிவில் பரவிய பி.1.351 கொரோனா வகை; பிரேசிலில் பரவிய பி.2 வகை போன்றவற்றுக்கு எதிராக கோவாக்சினும் கோவிஷீல்டும் எந்த அளவுக்கு செயல்படுகிறது என்று சோதிக்கப்பட்டது. இந்த பி.1.1.7 வகை, பி.1.351 வகை, பி.2 வகை ஆகியவைதான் இப்போது இந்தியாவில் பி.1.617 வகைக்கு அடுத்தபடியாக பரவிவருகிறது என்பது குறிப்பிடத்தக்கது. ஆய்வின் முடிவில், கோவாக்சினும் கோவிஷீல்டும் பி.1.617 வகை கொரோனாவுக்கு எதிராக பி.1 (எ) முந்தைய அலை கொரோனா பாதிப்பை ஏற்படுத்திய கொரோனா வகைக்கு செயல்பட்டதை விடவும் தோராயமாக 55 சதவிகிதம் குறைவாக செயல்படுவது தெரியவந்துள்ளது. அதாவது பி.1 கொரோனா வகையை, கோவாக்சினும் கோவிஷீல்டும் 42.92 சதவிகிதம் செயல்படுகிறதென்றால், பி.1.617-க்கு எதிராக 21.9 சதவிகிதம்தான் செயல்படுகிறது. இதுவே பி.1.1.7 வகைக்கு, 6 சதவிகிதம் குறைவாகும், பி 2 வகைக்கு 50 சதவிகிதம் குறைவாகும் செயல்படுவது தெரியவந்துள்ளது. இந்த ஆய்வுகள் அனைத்தும் குறைவான நபர்களுக்கு மட்டுமே இப்போதைக்கு செய்யப்பட்டிருப்பதால், இந்த சதவிகித கணக்கில் மாற்றங்கள் வருமென்றும் கணிக்கப்படுகிறது. இந்த தடுப்பூசிகள், இனிவரும் காலங்கலில் உருவாகும் கொரோனா வகைகளை தடுக்குமா என்பது தெரியாததால், தடுப்பூசிகள் மீதான கேள்விகளும் அச்சமும் அப்படியே இருக்கிறது. தகவல் உறுதுணை : The Hindu
http://dlvr.it/Rzjbgh

Read More

எஸ்.ஆர்.எம். குழுமம் ரூ.1.10 கோடி கொரோனா நிதியுதவி

தமிழக முதல்வரின் கொரோனா நிவாரண நிதிக்கு எஸ்.ஆர்.எம் குழுமம் சார்பில் ரூ.1.10 கோடி நிதியுதவி அளிக்கப்பட்டது. தமிழகத்தில் நாளுக்கு நாள் கொரோனா பாதிப்பு அதிகரித்துக்கொண்டே செல்கிறது. இதனால் கொரோனா தடுப்பு பணிகளுக்கு நன்கொடை வழங்க முதல்வர் மு.க.ஸ்டாலின் வேண்டுகோள் விடுத்திருந்தார். அதன்பேரில் தொழில் துறையினர் உள்ளிட்டோர் கொரோனா நிவாரணத்திற்கு நிதியுதவி அளித்து வருகின்றனர். அந்த வகையில், எஸ்.ஆர்.எம் குழுமம் சார்பில் முதல்வரின் நிவாரண நிதிக்கு ரூ.1.10 கோடி நிதியுதவி வழங்கப்பட்டது. எஸ்.ஆர்.எம். கல்வி மற்றும் ஆராய்ச்சி நிறுவன இணைவேந்தர் டாக்டர் சத்தியநாராயணன், எஸ்.ஆர்.எம். ராமாபுரம் கல்வி வளாக தலைவர் டாக்டர் சிவக்குமார், எஸ்.ஆர்.எம். குழுமத்தின் நிரஞ்சன் ஆகியோர் தலைமைச்செயலகத்தில் முதல்வர் மு.க.ஸ்டாலினை சந்தித்து அதற்கான நிதியை அளித்தனர்.
http://dlvr.it/Rzjbb8

Read More

கொரோனாவால் இறக்கும் சடலங்களை கண்ணியத்துடன் கையாள வேண்டும்: மனித உரிமைகள் ஆணையம்

'கொரோனாவால் இறப்பவர்களின் உடல்களை கண்ணியமாக கையாளுங்கள்' என மத்திய மாநில அரசுகளுக்கு தேசிய மனித உரிமைகள் ஆணையம் அறிவுறுத்தல்களை வழங்கியுள்ளது. உத்தரபிரதேச மாநிலத்தின் பல்வேறு பகுதிகளிலும், கொரோனா பாதிக்கப்பட்டு உயிரிழப்பவர்களின் உடல்கள் கங்கை யமுனை உள்ளிட்ட ஆறுகளில் வீசப்படுவது சம்பந்தமான செய்திகளும் வீடியோ காட்சிகளும் புகைப்படங்களும் வெளியாகி நாடு முழுவதும் மிகப் பெரிய அதிர்ச்சியை ஏற்படுத்தியது. அதைத் தொடர்ந்து டெல்லி உள்ளிட்ட பல மாநிலங்களில் எரிப்பதற்கு போதிய இடங்கள் இல்லாமல் உடல்கள் ஒன்றாக குவிக்கப்பட்டு இருப்பதும் சாலைகள் பூங்காக்களில் எரிக்கப்பட்டு வந்த சம்பவங்களும் நாடு முழுவதும் நிகழ்ந்தது. தொடர்ச்சியான இப்படியான சம்பவங்களை தொடர்ந்து, தேசிய மனித உரிமைகள் ஆணையம் இதில் தற்பொழுது கவனம் செலுத்தியுள்ளது. அதன் தொடர்ச்சியாக, உடல்களை எவ்வாறு கையாள வேண்டும் என்பது தொடர்பாக பல்வேறு வழிகாட்டு நெறிமுறைகளை வழங்கியுள்ளது தேசிய மனித உரிமைகள் ஆணையம். அதில்,  * சடலங்கள் வரிசையாக காத்திருப்பதை தடுக்க தாற்காலிக தகன மேடை அமைக்க வேண்டும். * இடுகாடு /எரியூட்டும் மேடையில் பணிபுரியும் ஊழியர்களுக்கு கொரொனாவால் இறந்தவரின் சடலங்களை கையாள்வது தொடர்பாக விழிப்புணர்வு ஏற்படுத்தப்பட வேண்டும். * சடலங்களை தொடாமல் நடைபெறும் மதசடங்குகளை நடத்த அனுமதி அளிக்கலாம். மத நூல்களில் இருந்து வசனம் வாசிக்கவும், புனித நீர் தெளிக்கவும் அனுமதிக்கலாம். * இறந்தவரின் உறவினர்கள் இறுதி சடங்கு செய்ய முடியாதபோது அவரின் மத, கலாச்சார அம்சங்களை கருத்தில் கொண்டு மாநில/ உள்ளாட்சி நிர்வாகங்கள் அதனை மேற்கொள்ள வேண்டும். * மின்மயானங்களை அதிகரிக்க நடவடிக்கை எடுக்க வேண்டும். முடிந்தவரை புகை இல்லாத வகையில் உடல்களை எரிக்கும் முறையை பின்பற்ற வேண்டும். இதன் மூலமாக புகையின் மூலமாக ஏற்படும் பிரச்சனைகள் தீர்வு காணப்படும். * இறந்தவரின் கண்ணியத்தை மீறும் வகையில் மொத்தமாக சடலங்களை அடக்கம் / எரியுட்டல் செய்யக்கூடாது. * இறந்தவரின் அடையாளம் மற்றும் தகவல்களை சேகரிக்க வேண்டும். * சடலங்களை எடுத்து செல்லும் ஆம்புலன்ஸ் வாகனங்களுக்கு அதிக கட்டணம் வசூலிக்காமல் இருக்க அரசு நடவடிக்கை எடுக்க வேண்டும். * மயானத்தில் பணி புரிபவர்களுக்கு உரிய ஊதியம் வழங்க வேண்டும். மேலும், தடுப்பூசி போடுவதில் அவர்களுக்கு முன்னுரிமை அளிக்க வேண்டும். * இறந்து போனவர்களின் சடலங்களின் புகைப்படத்தை நேரடியாக காண்பிக்க்கூடாத என்ற தேசிய மனித உரிமைகள் ஆணையம் சார்பில் விதிக்கப்பட்டுள்ள ஊடகங்களுக்கான கட்டுப்பாடுகள் தளர்கிறது. அப்புகைப்படங்களை, மங்கலாக பதிவு செய்தபின் அதை பயன்படுத்திக் கொள்ளலாம் என்று தேசிய மனித உரிமைகள் ஆணையம் கூறியுள்ளது. உடன், இந்த வழிகாட்டு நெறிமுறைகள் முறையாக பின்பற்றப்படுகிறதா என்பதை அடுத்த நான்கு வாரங்களுக்கு அறிக்கையாக தயாரித்து தாக்கல் செய்ய வேண்டும் எனவும் மத்திய மாநில அரசுகளுக்கு தேசிய மனித உரிமைகள் ஆணையம் நோட்டீஸ் பிறப்பித்துள்ளது. - நிரஞ்சன் குமார்.
http://dlvr.it/RzgssL

Read More