கொரோனா கால மகத்துவர்: தாயின் உயிரை காப்பாற்றிய அரசு மருத்துவமனையில் மகன் இலவச மருத்துவம்

கொரோனா தொற்றில் பாதிக்கப்பட்டு அவதிப்பட்டு வந்த தாயின் உயிரை காப்பாற்றியதற்காக, தாய்க்கு சிகிச்சையளித்த அதே அரசு மருத்துவமனையில் இலவச சேவை புரிகிறார் இளம் மருத்துவரொருவர். இவரின் செயல் பலரையும் நெகிழவைத்துள்ளது.  தற்போதைய உலகை இயக்கும் இயங்கு சக்தி, தன்னலமற்ற சேவைகள் தான். கொரோனா என்னும் கொடிய அரக்கனை எதிர்த்து போராடும் இன்றைய உலகத்துக்கு உறுதுணையாக பலர் சேவைகள் செய்துவருவதை நாம் பார்த்து வருகிறோம். அந்தவகையில் தன்னுடைய சேவையால் பலரின் மனங்களை நெகிழவைத்து வருகிறார் கர்நாடகாவை சேர்ந்த இளம் மருத்துவர் ஒருவர். அவர் பெயர் மருத்துவர் ஹர்ஷா. கர்நாடகாவின் நெற்களஞ்சியமான மாண்டியா அருகே உள்ள மத்தூர்தான் இவரின் சொந்த ஊர். பாரம்பரிய விவசாய குடும்பத்தைச் சேர்ந்தவர் என்றாலும் சண்டிகரில் உள்ள புகழ்பெற்ற பிஜிஐஎம்ஆரில் கதிரியக்க நோயறிதல் படிப்பில் முதுகலைப் படிப்பை முடித்து சத்தீஸ்கர் மருத்துவமனையில் கைநிறைய சம்பளத்துடன் வேலை பார்த்து வருகிறார். இதற்கிடையே, 15 நாட்களுக்கு முன்புஇவரின் தாய் ராஜலட்சுமிக்கு கொரோனா பாதிப்பு இருப்பது உறுதிசெய்யப்பட்டது. ராஜலட்சுமி மாண்டியாவில் இருப்பதால் மருத்துவமனையில் 10 நாட்கள் விடுமுறை எடுத்துக்கொண்டு மாண்டியா விரைந்தார் ஹர்ஷா. அப்போது கடுமையான மூச்சுத்திணறல் காரணமாக அவதிப்பட்ட அவரின் தாய் ராஜலட்சுமிக்கு ஐசியூ வார்டில் சேர்த்து சிகிச்சை அளிக்க வேண்டிய நிலை ஏற்பட்டுள்ளது. தனக்கு இருந்த தொடர்புகள் மூலம் பல்வேறு மருத்துவமனைகளில் படுக்கை வசதிபெற முயற்சித்துள்ளார் ஹர்ஷா. ஆனால் அனைத்தும் தோல்வியில் முடிந்துள்ளது. தாய் ராஜலட்சுமியின் நிலையை சோதித்து பார்த்தவர்கள், அவருக்கு சிகிச்சை அளிக்க முடியாத நிலையில் உள்ளார் என்றுக் கூறி கைவிரித்துள்ளனர். ஒரு மருத்துவராக இருந்துகொண்டு தனது தாய்க்கே சிகிச்சை அளிக்க முடியாத விரக்தியில் இருந்து மருத்துவர் ஹர்ஷா, இறுதியாக மாவட்ட அரசு மருத்துவமனை மூத்த மருத்துவர் ராஜேஸ்வரியை தொடர்புகொண்டு விஷயத்தை பகிர்ந்துகொள்ள, இறுதியில் அரசு மருத்துவமனையில் தாய் ராஜலட்சுமியை சேர்த்துள்ளார். அங்கு 10 நாட்கள் சிகிச்சை பெற்றுவந்துள்ளார் அவர். ஒவ்வொரு நாளும் சிகிச்சையில் நல்ல முன்னேற்றம் இருந்துள்ளது. குறிப்பாக ஆக்சிஜன் அளவு மேம்பட்டு இறக்கும் தருவாயில் இருந்த ராஜலட்சுமியின் உயிர் காப்பற்றப்பட்டுள்ளது. ஆபத்தான நிலையிலிருந்த அவரை காப்பாற்ற உதவியிருக்கிறார்கள் அந்த அரசு மருத்துவமனையின் சுகாதாரப் பணியாளர்கள். அவர்களின் பணிக்கு நன்றி செலுத்தும் வகையில் இந்த 10 நாட்களும் மருத்துவர்களுடன் இணைந்து மருத்துவ பணியை இலவசமாக பார்த்து வருகிறார் மருத்துவர் ஹர்ஷா. இதற்கு இன்னொரு காரணமும் இருக்கிறது. அந்த மருத்துவமனையில் சில நாட்களாக நோயாளிகளின் எண்ணிக்கை அதிகரித்து வந்துள்ளது. ஆனால் சுகாதார பணியாளர்களின் எண்ணிக்கை குறைவாகவே இருந்துள்ளது. மேலும் ஊழியர்களை வேலைக்கு எடுக்க நேர்காணலுக்கு அழைப்பு விடுத்தும் கொரோனா மருத்துவமனையில் பணிபுரிய யாரும் முன்வரவில்லை. இதனால் அங்கிருக்கும் மருத்துவர்கள் கூடுதல் நேரம் பணியாற்றும் நிலைக்கு ஆளாகி இருக்கின்றனர். இந்த தகவலை கேள்விப்பட்ட மருத்துவர் ஹர்ஷா, தன் தாயை காப்பாற்றிய சுகாதார பணியாளர்களுக்கு உதவும் நோக்கில் தான் வேலை பார்க்கும் சத்தீஸ்கர் மருத்துவமனையில் கூடுதலாக விடுமுறை எடுத்துக்கொண்டு இங்கு பணியாற்றி வருகிறார். இது குறித்து பேசிய மருத்துவர் ஹர்ஷா, "இந்த அரசு மருத்துவமனையில் நல்ல அடிப்படை கட்டமைப்புகள் இருக்கின்றன. ஆனால் சில நாட்களாக நோயாளிகளின் எண்ணிக்கை அதிகரித்து வருவதால் சுகாதார பணியாளர்கள் வேலைப்பளுவை சந்தித்து வருகின்றனர். அவர்களுக்கு உதவும் வகையில் நான் இங்கே இருக்கிறேன். தற்போது நான் சத்தீஸ்கர் மருத்துவமனையில் பணியாற்றி வருகிறேன். அங்கும் எனது பங்களிப்பு தேவைப்படுகிறது. எனினும் எனது நன்றியை செலுத்த அங்கு விடுமுறை எடுத்துக்கொண்டு இங்கே தன்னார்வலராக பணியாற்றிக் கொண்டிருக்கிறேன்" என்றார். எந்தவித எதிர்பார்ப்பும் இல்லாமல் தனது நன்றிக்கடனை செலுத்த இலவசமாக பணியாற்றி வரும் மருத்துவர் ஹர்ஷாவின் செயல் பலரை நெகிழவைத்து வருகிறது.
http://dlvr.it/RzxNj6

Read More

கர்நாடகா டூ தமிழ்நாடு: எல்லையை கடக்க இ-பாஸ் அவசியம்

தமிழகத்தில் இருந்து பிற மாநிலங்களுக்குச் செல்லவும், பிற மாநிலங்களில் இருந்து தமிழகத்திற்குள் வரவும் இ-பாஸ் முறை நேற்று முதல் கட்டாயப்படுத்தப் பட்டுள்ளது. இதையடுத்து கிருஷ்ணகிரி மாவட்டம் ஓசூரில் தமிழக கர்நாடகா மாநில எல்லையான ஜுஜுவாடியில் அமைந்துள்ள தற்காலிக சோதனை சாவடியில், கர்நாடகாவில் இருந்து வரக்கூடிய கார், வேன் உள்ளிட்ட வாகனங்களை தீவிர பரிசோதனை செய்த பிறகே அனுமதிக்கப்படுகிறது. இ-பாஸ் இருந்தால் மட்டும் மாநிலத்திற்குள் அனுமதிக்கப்படுகிறார்கள். இ-பாஸ் இல்லை என்றால் எல்லையிலேயே வாகனங்களை தடுத்து நிறுத்தி திருப்பி அனுப்புவதோடு, அவசியம் இன்றி தமிழக எல்லைக்குள் வரவேண்டாம் என அறிவுறுத்தபட்டும் வருகிறார்கள். இதேபோல கர்நாடக மாநில எல்லையில், அத்திப்பள்ளி காவல்நிலைய ஆய்வாளர் தமிழக எல்லையில் மக்கள் நடமாட்டம் எப்படி இருக்கிறது என்று நேரில் பார்வையிட்டார், மேலும் சரக்கு வாகனங்களில் சென்ற மக்களுக்கு முகக்கவசம் வழங்கி பாதுகாப்பாக வீட்டிலேயே இருங்கள் தனி மனித இடைவெளியை கடைப்பிடியுங்கள், தேவையின்றி வெளியே வராதீர்கள், காவல் துறையினருக்கு ஒத்துழைப்பு கொடுங்கள், நீங்கள் ஒத்துழைப்பு கொடுத்தால் தான் கொரோனாவை கட்டுப்படுத்த முடியும் என அறிவுரைகளை வழங்கினர்.
http://dlvr.it/Rzw1gh

Read More

"கொரோனா தடுப்பூசி விநியோகத்தில் ஏற்றத்தாழ்வுகள் உள்ளன" - உலக சுகாதார நிறுவனம் வேதனை

உலக சுகாதார நிறுவனத்தின் இயக்குநர் டெட்ரோஸ் அதோனாம், “கொரோனா தடுப்பூசி விநியோகத்தில் உலகம் முழுவதும், நிறவெறி அபாயமும் - பொருளாதார ஏற்றத்தாழ்வுகளும் எழுந்துள்ளது” எனக்கூறி வருத்தமும் வேதனையும் தெரிவித்து எச்சரித்துள்ளார். பொருளாதார ரீதியாக முன்னோக்கி இருக்கும் நாடுகள் மற்றும் ஏழை மற்றும் மிகவும் பின்தங்கிய பொருளாதாரம் கொண்டிருக்கும் நாடுகளுக்கான தடுப்பூசி விநியோகம் பற்றி பேசுகையில் அவர் இதை தெரிவித்துள்ளார். இதுபற்றி அவர் விரிவாக பேசும்போது, “நிறவெறி மற்றும் பொருளாதார ஏற்றத்தாழ்வுகளினால் தடுப்பூசி விநியோகம் உலகளவில் பாதிக்கப்பட்டுள்ளது. உலகம் அப்படியானவொரு மோசமான நிலைப்பாட்டில் இருக்கிறது. தரவுகளுடன் சொல்லவேண்டுமென்றால், உலகில் தயாரிக்கப்பட்டிருக்கும் தடுப்பூசிகளில், 45 சதவிகித தடுப்பூசியை உலகில் 15 சதவிகித மக்களை மட்டுமே தன்னகத்தே கொண்டிருக்கும் பணக்கார நாடுகள் வைத்துள்ளன. மக்கள் தொகையில் 50 சதவிகித மக்களைகொண்டிருக்கும் ஏழை மற்றும் மிகவும் பின்தங்கிய பொருளாதாரம் கொண்டிருக்கும் நாடுகளுக்கு 17 சதவிகித தடுப்பூசிகளே கிடைத்துள்ளது" எனக்கூறியுள்ளார். இந்த பேதங்களுக்கான காரணமாக 'தடுப்பூசியை பிற நாடுகளுடன் பகிர்ந்துக்கொள்ளாமல் பணக்கார நாடுகள் செயல்படுகின்றன' என உலக சுகாதார நிறுவனத்தினர் தெரிவித்துள்ளனர். தடுப்பூசி பகிர்ந்துக்கொள்வதை காட்டிலும், அதை உற்பத்தி செய்யும் நிறுவனங்களுக்கு நிதி வழங்குவது, தேவையான வசதிகளை ஏற்படுத்திக் கொடுப்பது, தொழில்நுட்ப உதவிகள் வழங்குவது போன்றவை நல்ல தீர்வை தீர்வை தருமென சொல்லியுள்ளனர். “நிறைய பணக்கார நாடுகள், தங்களின் நாட்டிலுள்ள குழந்தைகள், பருவ வயதினருக்கு தடுப்பூசி விநியோகிக்க தொடங்கிவிட்டது. ஆனால் பல ஏழை – பின்தங்கிய நடுத்தர வர்க்க நாடுகள், தங்கள் நாட்டில் கொரோனா ஆபத்து அதிகமிருக்கும் நபர்களான முன்களப் பணியாளர்கள், வயதானவர்கள், இணை நோய் உள்ளவர்களுக்குக்கூட தடுப்பூசி விநியோகிக்காமல் இருக்கிறது. இப்படி நாடுகளுக்கு இடையே நிலவும் தடுப்பூசி வேறுபாடு, வேதனை தருகிறது” எனக் கூறியுள்ளார் டெட்ராஸ் அதேனாம். இந்தளவுக்கு உலக சுகாதார நிறுவனம் பணக்கார நாடுகளின் மீது அதிருப்தி தெரிவித்திருக்கும் நிலையில், அடுத்த ஆறு வாரத்தில் 80 மில்லியன் கொரோனா தடுப்பூசியை உலக்க நாடுகளோடு பகிர்ந்துக்கொள்ள வேண்டுமென அமெரிக்க அதிபர் பைடன் இன்று அறிவித்துள்ளார். அமெரிக்காவில் தயாரிக்கப்படும் பைசர், மாடர்னா, ஜான்சன் & ஜான்சன் தடுப்பூசிகள் பகிரப்படும் என சொல்லப்பட்டுள்ளது.
http://dlvr.it/Rzw1W5

Read More

இந்தியாவில் கொரோனா தடுப்பூசியால் அரிதினும் அரிதாகவே பக்க விளைவுகள்: AEFI ஆய்வு

இந்தியாவில் கொரோனா தடுப்பூசி செலுத்திக் கொண்டோருக்கு ரத்தக்கசிவு, ரத்தம் உறைதல் போன்ற பக்கவிளைவுகள் அரிதினும் அரிதாகவே மிகக் குறைந்த அளவில்தான் ஏற்படுகிறது என்று நோய்த் தடுப்புக்குப் பிந்தைய பக்கவிளைவுகளுக்கான தேசிய ஆய்வுக்குழு (AEFI) தெரிவித்துள்ளது. இந்தியாவில் 753 மாவட்டங்களில் சுமார் 10 லட்சம் பேரிடம் மேற்கொண்ட ஆய்வில் 0.61 சதவிகிதம் பேருக்கு மட்டுமே பக்கவிளைவு ஏற்பட்டுள்ளதாக தெரிகிறது. அதாவது, 10 லட்சம் பேரில் 6100 பேர் மட்டுமே என்கிறது அந்தக் குழு. உலக அளவில் பயன்படுத்தப்படும் அஸ்டாசென்கா - ஆக்ஸ்போர்டு தடுப்பூசி, இந்தியாவின் கோவிஷீல்ட் தடுப்பூசிகளை செலுத்திக்கொண்டு அதற்குப் பிறகு பயனாளர்களுக்கு ரத்தக்கசிவு, ரத்தம் உறைதல் போன்றவை ஏற்படுவதாக சில நாடுகளில் குற்றச்சாட்டுகள் எழுந்தன. எனவே இந்த தடுப்பூசிகளை பயன்படுத்துவதில் கவனத்துடன் செயல்பட வேண்டும் எனவும் சில நாடுகள் எச்சரிக்கை விடுத்திருந்தன. இதனையடுத்து, இந்தியாவில் தடுப்பூசிகளை செலுத்திக்கொண்டவர்களுக்கு ஏதேனும் பக்க விளைவுகள் ஏற்படுகிறதா என்பதை ஆய்வு செய்வதற்காக முடிவெடுக்கப்பட்டு, அதற்கான பணிகள் முடுக்கி விடப்பட்டது. இதற்கான பணியினை தடுப்பூசி செலுத்திக் கொண்டதற்கு பிந்தைய பக்கவிளைவுகளுக்கான தேசிய ஆய்வுக் குழு, நாட்டில் உள்ள 753 மாவட்டங்களில் மேற்கொண்ட ஆய்வுகளில், 10 லட்சம் பேரில் 0.61 சதவீதம் பேருக்கே இந்த ரத்தம் உறைதல், ரத்த கசிவு ஏற்பட்டதாக தெரிவித்துள்ளது. இவை அனைத்தும் கோவிஷீல்ட் தடுப்பூசி எடுத்துக்கொண்டவர்களுக்கு மட்டுமே ஏற்பட்டுள்ளது. ஆனால், இந்த பாதிப்பு என்பது பிரிட்டன், ஜெர்மனி போன்ற நாடுகளில் பதிவான எண்ணிக்கையை விட மிக மிகக் குறைவு எனவும் தெரிவிக்கப்பட்டுள்ளது. அதேவேளையில், கோவாக்சின் தடுப்பூசியால் ரத்தம் உறைதல், ரத்தக் கசிவு உள்ளிட்ட பிரச்சனைகள் பதிவாகவில்லை எனவும் ஆய்வில் கண்டறியப்பட்டுள்ளது. இந்த ஆய்வறிக்கை மத்திய சுகாதாரத்துறை அமைச்சகம் வெளியிட்டுள்ளது.
http://dlvr.it/RzsP7z

Read More

ஓடிடி திரைப் பார்வை: 'பாரம்' - அதிரவைக்கும் 'தலைக்கூத்தல்' சடங்கு தரும் தாக்கம்!

தமிழகத்தின் சில பகுதிகளில் பெண்சிசுக் கொலை குறித்த இன்றளவும் அவ்வப்போது செய்திகள் வரத்தான் செய்கிறது. அதேபோல முதுமையின் காரணமாக உடல் செயலற்றுக் கிடக்கும் முதியவர்களை 'தலைக்கூத்தல்' எனும் முறைப்படி கொலை செய்கிற வழக்கமும் திரைமறைவாக உண்டு. கரிசல்காட்டு எழுத்தாளர் கி.ராஜநாராயணன் இதுகுறித்து நிறைய பதிவு செய்திருக்கிறார். இதனை அவர் 'பஞ்சுப்பால் கொடுத்தல்' என்கிறார். தென் தமிழகத்தில் மட்டுமல்ல; வடதமிழக பகுதிகளிலும் 'தலைக்கூத்தல்' முறையில் முதியவர்களை கொலை செய்யும் வழக்கம் இருப்பதாக சொல்லப்படுகிறது. “பெருசு இழுத்துகிருக்கு மனசுல என்ன கிடக்கோ... மண்ணோ பொண்ணோ தெரியல” என சாவு வீட்டில் ஒரு குரல் எழும். “சரி அவர் வாழ்ந்த வீட்டு மண்ணக் கரச்சு கொஞ்சம் நாக்குல ஊத்துங்கப்பா” என இன்னொரு குரல் எழும். இப்படியாக முதியவர்கள் வாழ்ந்த வீட்டு மண்ணை கரைத்து வாயில் ஊற்றுவது, அவர்கள் வேலை செய்த வயல் வெளி மண்ணை கரைத்து வாயில் ஊற்றுவது, நாணயத்தை மண்சட்டியில் தேய்த்து அந்த சிறு மணலை கரைத்து ஊற்றுவது, தங்கத்தை தரையில் தேய்த்து நாக்கில் வைப்பது என இந்த 'தலைக்கூத்தல்' எனும் கொலையினை செய்கிறவர்கள் தெரிந்தோ தெரியாமலோ பல வழிமுறைகளில் செய்து கொண்டிருக்கிறார்கள். நேரடியாக ஊசி போட்டுக்கொல்வதும் உண்டு. இந்தக் கருவை மையமாக வைத்து 2018-ஆம் ஆண்டு வெளியான தமிழ் சினிமாதான் ‘பாரம்’. தேசிய விருது பெற்ற இந்தத் திரைப்படம் 'தலைக்குத்தல்' கொடுமையினை வட தமிழக மொழி வாசனையுடன் ஆழமாக பதிவு செய்தது. ஒரு கட்டடத்தின் காவலாளியாக வேலை செய்யும் கருப்பசாமி எனும் கதாபாத்திரம்தான் கதையின் ஆன்மா. அந்த கருப்பசாமியின் மூச்சு 'தலைக்கூத்தல்' முறைப்படி நிறுத்தப்பட்ட சோகத்தைத்தான் டாக்கு - டிராமா வடிவில் பேசுகிறது 'பாரம்'. கருப்பசாமிக்கு தன் தங்கை மற்றும் தங்கை மகன்கள் மீது கொள்ளைப் பிரியம். வேலை முடிந்த பிறகு தங்கை வீட்டுக்கு ஒரு எட்டு போகாமல் அவரது கால்கள் தன் வீட்டுக்கு போவதில்லை. தங்கையின் மகன்களில் கடைசி மகன் வீரா என்றால் கருப்பசாமிக்கு கூடுதல் பிரியம். வீராவுக்கும் தாய்மாமன் என்றால் அத்தனை அன்பு. தொழிற்சங்கவாதியான வீரா ஊரில் இல்லாத சமயத்தில்தான் கருப்பசாமி 'தலைக்கூத்தல்' முறையில் கொல்லப்படுகிறார். உண்மையில் அவர் விஷ ஊசி போட்டு கொல்லப்படுகிறார். ஒரு விபத்தில் முதுகுத் தண்டில் காயம் ஏற்பட்டு படுத்த படுக்கையாகிப் போகும் கருப்பசாமிக்கு செலவு செய்து வைத்தியம் பார்க்க மகன் செந்தில் விரும்பவில்லை. அதனால் அவ்வூரில் மருத்துவ உதவியாளராக வேலை செய்யும் ஒரு பெண்ணை வைத்து கருப்பசாமி விஷ ஊசி போட்டு கொலை செய்யப்படுகிறார். 'தலைக்கூத்தல்' சடங்கினை இப்படத்தின் மூலம் பதிவு செய்ய முயன்றிருக்கும் இயக்குநர் ப்ரியா கிருஷ்ணசாமி இங்குதான் தனது தடத்தில் இருந்து தவறுகிறார் என நினைக்கத் தோன்றுகிறது. கருப்பசாமியின் மகன் செந்தில் தன் தந்தைக்காக செலவு செய்ய விரும்பவில்லை என்பதால்தான் அந்தக் கொலை நடக்கிறதே தவிர, வாழ்ந்து முடித்த முதியவர் அவர் என்பதால் அல்ல. உண்மையில் கிராமங்களில் பெரும்பாலும் முதுமையால் கடைசி நாட்களை எண்ணிக் கொண்டிருக்கும் பெரியவர்களுக்குத்தான் இந்த 'தலைக்கூத்தல்' செய்வார்கள். விபத்தில் பாதிக்கப்பட்டவர்களை கூடுமானவரை காப்பாற்றவே முயல்வார்கள், என்றாலும் 'தலைக்கூத்தல்' கருவை கையில் எடுத்து பேசியதற்காக இயக்குநர் ப்ரியா கிருஷ்ணசாமிக்கு பாராட்டுகள். விஷ ஊசி போட்டு கொலை செய்யப்படும் கருப்பசாமியின் உடல் மறுநாள் காலை எந்த சலனமும் இன்றி வழக்கமான உள்ளூர் சாவு சடங்குகளும் நிறைவேற்றப்பட்டு அடக்கம் செய்யப்படுகிறது. தங்கை மகன் வீரா தாய்மாமன் சாவுக்கு நீதி கேட்டு காவல் துறையினை நாடினாலும் அது பலன் தரவில்லை. இது அவ்வளவு பெரிய குற்றம் இல்லை. இதெல்லாம் கிராமத்தில் ஒரு வழக்கம் என்றளவில் முடிக்கப்படுகிறது கதை. 'தலைக்கூத்தல்' தொடர்பாக வீரா அக்கிராமத்தில் சிலரை சந்தித்துப் பேசுகிறார். அதில் ஒரு பெண் “நான் பலபேருக்கு தலைக் கூத்தியிருக்கேன். உடம்பு முடியாத ஆளுக வீட்ல இருந்தா அந்த வீட்டு ஆளுங்க என்னைய கூப்பிடுவாங்க. நான் எண்ணெய் சீயக்கா சேச்சு ஊத்தி நல்லா நாலு எளனிய சீவி குடிக்க குடுப்பேன், முடியாதவுக போய் சேர வேண்டிய இடத்துக்கு போய் சேந்திருவாக” என்கிறார். “இதுக்கு எவ்ளோ கூலி வாங்கிறீங்க..?” என்ற வீராவின் கேள்விக்கு “அட காசு எல்லாம் வாங்க மாட்டேன். இத ஒரு புண்ணியத்துக்காக பண்றேன்” என்பார். எப்படிப் பாருங்கள்... நகர மனிதர்கள் மரணத்தை உள்வாங்கும் விதமும் கிராம மனிதர்கள் மரணத்தை உள்வாங்கியிருக்கும் விதமும் எத்தனை வித்யாசமானது, விசித்திரமானது. மாமன் சாவுக்கு நீதி கிடைக்க போராடும் வீராவின் குடும்பத்தை அக்கிராமம் வெறுத்து ஒதுக்குவதாக பதிவு செய்கிறார் இயக்குநர். இது அதிர்ச்சியின் அடர்த்தியை மேலும் அதிகரிக்கிறது. நம் வீடுகளில் ஒருவர் இயற்கையாக இறந்த பிறகு நடக்கும் சடங்குகளை இந்த தலைக்கூத்தலுடன் கொஞ்சம் ஒப்பிட்டுப் பார்த்தால் புரியும். ஒருவர் இறந்த பிறகு நீர்மாலை எடுத்தல் என்ற வழக்கம் உண்டு இல்லையா. ஆண் இறந்தால் அவரது பங்காளிகளும் பெண் இறந்தால் அவரது கணவர் வீட்டாரும் இந்த நீர்மலை எடுக்கும் சடங்கை செய்வார்கள். இந்த முறை காலகாலமாக நடைமுறையில் உள்ளது. இதன் பின்னணி 'தலைக்கூத்தல்' எனும் சடங்கு தான் எனலாம். படுத்த படுக்கையில் உயிருடன் இருக்கும் முதியவர்களின் தலையில் குடம் குடமாக தண்ணீர் ஊற்றி மூச்சு திணறடித்து கொலை செய்வதும், ஜன்னியினை உருவாக்கும் அளவில் அதிகமாக இளநீர் கொடுத்து அவர்களது உயிரை முடக்குவதும் என இந்த வழக்கம் ஆதிகாலம் தொட்டே இருந்திருக்க வேண்டும். அதன் தொடர்சியாகத்தான் இன்று இயல்பாக இயற்கையாக இறந்து போகும் மனிதர்களின் சாவு சடங்குகளிலும் நீர்மாலை எடுத்தல், இளநீர் ஊற்றுதல் போன்ற வழக்கங்கள் அப்படியே தங்கியிருக்கிறன. எல்லா சடங்கு சம்பிரதாயங்களுக்கும் ஒரு பின்னணி இருக்கும் இல்லையா அப்படியாக 'தலைக்கூத்தல்' சடங்கின் தொடர்ச்சியாகவே இந்த நீர்மாலை எடுத்தலை பார்க்க வேண்டியிருக்கிறது. 'பாரம்' திரைப்பட இயக்குநர் ப்ரியா கிருஷ்ணசாமி மாற்று சினிமா தளத்தை கையாள்வதில் ஆர்வமும் திறமையும் கொண்டவர். இவர் இயக்கத்தில் இந்தி மற்றும் மராத்தி மொழியில் வெளியான 'கங்கோபாய்', 'பெர்சி' ஆகிய படங்கள் முக்கியமானவை. மாற்று சினிமாக்கள் எல்லாம் எப்போதும் தேர்ந்த சினிமா மொழியில் இருந்து விலகியே நிற்கின்றன என்ற குற்றச்சாட்டு நெடுநாட்களாகவே உள்ளது. 'பாரம்' படம் மீதும் இந்தக் குற்றச்சாட்டு உண்டு. உண்மையில் 'பாரம்' திரைப்படத்தின் யதார்த்த பாணி ஒளிப்பதிவுதான் இந்த கதையின் பாரத்தை வெகுமக்கள் மனதிற்கு எளிதாக கடத்த உதவியிருக்கிறது என்று சொல்லலாம். ஜெயந்த் சேது மாதவனின் ஒளிப்பதிவில் இருந்த யதார்த்தம் இக்திரைப்படத்தின் பலம். ஜெயந்த் சேது மாதவன் பார்வையாளனின் கரங்களை இறுக பற்றி தனது ஒளிப்பதிவின் மூலம் நம்மை அந்த கிராமத்திற்குள் அழைத்துச் செல்கிறார். பார்வையாளன் ஒரு கொலைக் களத்திற்குள் அச்சமின்றியும், பதற்றத்துடனும் பயணிக்க அவரது ஒளிப்பதிவு உதவியிருக்கிறது. 'பாரம்' திரைப்படத்தில் கருப்பசாமியாக நடித்திருப்பவர் புதுச்சேரி பல்கலைக்கழகத்தின் நாடகத் துறை தலைவர் ராஜு. இவர் தலைமையில் அத்துறையில் பயிற்சி பெற்ற கலைஞர்கள் மட்டுமே இப்படத்தின் அனைத்து கதாபாத்திரங்களிலும் நடித்துள்ளனர். இப்படம் இயல்பாக அமைய இதுவும் ஒரு முக்கியக் காரணம். 66-வது தேசியவிருது வழங்கும் விழாவில் 'பாரம்' திரைப்படம் தேசிய விருதினைப் பெற்றது. இயக்குநர் வெற்றிமாறன் இப்படத்தை வெளியிட்டார். நல்ல விமர்சனமும் வரவேற்பும் கிடைத்தபோதும் வசூல் ரீதியாக மாற்று சினிமாக்கள் சந்திக்கும் அதே பிரச்னையைத் தான் பாரமும் சந்தித்தது. என்றாலும் தமிழ் சினிமா இனி முன்னெடுத்து பயணிக்க வேண்டிய பாதையினை தீர்மானிக்கும் படைப்புகளில் பாரமும் ஒன்றாக இணைந்து கொண்டது. நம்பிக்கை தரும் இந்தப் படைப்பு தற்போது அமேசான் ப்ரைமில் கிடைக்கிறது. பிறப்பைப் போலவே இறப்பையும் வாழ்வின் யதார்த்தமானதொரு நிகழ்வாக கருதும் கிராமிய மனோபாவம் வியப்புக்குறியது. முதியவர்களை கொலை செய்யும் 'தலைக்கூத்தல்' சடங்கினை தங்களது பண்பாட்டுக் கூறுகளில் ஒன்றாக நினைக்கும் எளிய மனிதர்களை இன்றளவும் தாங்கி இயங்குகின்றன இந்தியக் கிராமங்கள் என்றும் நினைக்கத் தோணுது 'பாரம்' பார்த்து முடித்தன்பின்.  - சத்யா சுப்ரமணி முந்தைய ஓடிடி திரைப் பார்வை: Cinema Bandi- சினிமா பின்புலத்தில் மன அழுத்தம் போக்கும் கலகல படைப்பு
http://dlvr.it/Rzr2F6

Read More

"கடவுள்தான் எங்களை..." - கொரோனாவின் கோரப்பிடியில் மோடியின் வாரணாசி தொகுதி?

"பாதுகாப்புக் கவசங்கள் இல்லாமலேயே சடங்களை எரித்து வருகிறோம்" என்கிறார் மயானப் பணியாளர்; "ஓய்வின்றி ஆர்டர்கள் வந்துகொண்டிருக்கின்றன" என்று புலம்பித் தள்ளுகிறார், சடங்களை எரிக்க மரக்கட்டைகள் விற்கும் வியாபார்; "கோரோனா மரணங்கள் 'உண்மை'யில் அதிகம்" என்கிறார்கள் சமூக செயற்பாட்டாளர்கள்... இவை அனைத்தும் பிரதமர் மோடியின் சொந்தத் தொகுதியாக வாரணாசியின் கோவிட் பாதிப்பு நிலவரம். கடந்த வாரத்தில் பீகார் மாநிலத்தில் ஓடும் கங்கை நதியில் வெள்ளைத் துணிகளில் சுற்றப்பட்ட 40-க்கும் மேற்பட்ட சடலங்கள் மிதந்ததை, நம்மால் அவ்வளவு எளிதில் மறக்க முடியாது. பல நாட்களாக நீரில் மிதந்திருந்த காரணத்தால், அந்த சடலங்கள் யாவும் அழுகிய நிலையில் இருந்ததாகவும், வழியில் அவை மிதந்திருந்த வேளையில் நாய்கள் சில அதை குதறியிருந்ததாகவும் அங்கிருந்த ஊடகங்கள் பதிவுசெய்தன. பீகார் – உத்தரப் பிரதேசத்தின் எல்லையில்தான் இந்த சடலங்கள் யாவும் மிதந்தன என்பதால், சடலங்கள் தங்கள் மாநிலத்தை சேர்ந்தவை இல்லை என உத்தரப் பிரதேச - பீகார் மாநில அதிகாரிகள் தெரிவித்து வந்தனர். இங்கே சடலங்கள் எந்த மாநிலத்தை சேர்ந்தவை என்பதுதான் அவர்களின் பிரதான பிரச்னையே தவிர, ஏன் இப்படி சடலங்கள் ஆற்றில் மிதந்தன என்பதல்ல. காரணம், சடலங்கள் கங்கை ஆற்றில் மிதப்பது இவ்விரு மாநில மக்களுக்கும் அதிகாரிகளுக்கும் பழக்கமான ஒன்றுதான். என்றாலும் இந்த முறை குவியல் குவியலாக சடலங்கள் கிடைத்துள்ளதுதால், சற்று அதிர்ச்சியடைந்திருக்கின்றனர். உ.பி. – பீகார் மாநிலங்கள் மட்டும்தான் என்றில்லை, வட இந்தியாவில் நிறைய இடங்களில் இப்படியான அவலநிலை இருக்கிறது. இந்திய நாட்டின் பிரதமர் மோடியின் சொந்த தொகுதியான வாரணாசியிலும் இப்படியான நிலைதான் இருப்பதாக சொல்லப்படுகிறது. வாரணாசியில் கங்கை நதிப்பகுதியில் பாதி எரியூப்பட்ட சடலங்கள்கூட மிதப்பதாக செய்திகள் வெளியாகின்றன. வாரணாசியில் ராம்நகர் பகுதியில் ஏழு சடலங்கள் பாதி எரியூட்டப்பட்டு மிதந்ததாக 'நியூ இந்தியன் எக்ஸ்பிரஸ்' செய்தி ஒன்று தெரிவித்திருந்தது. இதை ராம்நகர் காவல் நிலைய அலுவலர் வேத் ப்ரகாஷ் ராய் உறுதிபடுத்தவும் செய்திருக்கிறார். “மொத்தம் 7 சடலங்கள் இருந்தன. அவை, பாதி அழுகிய நிலையில் சப்ஜாத் என்ற கிராமத்தின் அருகில் கண்டறியப்பட்டன. அனைத்து சடலங்களையும் உரிய பாதுகாப்போடு அடக்கம் செய்திருக்கிறோம்” என அவர் பத்திரிகைகளிடம் கூறியுள்ளார். சப்ஜாத் கிராமத்துக்கு அடுத்து இருக்கும் டோம்ரி கிராமம், பிரதமர் மோடி கடந்த 2018-ம் ஆண்டு நேரடியாக தத்தெடுக்கத்துக்கொண்ட கிராமம். சரி, மோடியின் நேரடி தொகுதி விவகாரத்துக்கு வருவோம். வாரணாசியில், ஏப்ரல் 1 முதல் மே 7 ம் தேதி வரை, அதிகாரபூர்வமாக 227 கொரோனா மரணங்கள் மட்டுமே பதிவாகி இருக்கின்றன. மாவட்ட கண்காணிப்பு அதிகாரி, கடந்த ஒரு வருடத்தில் அம்மாவட்டத்திலேயே 650 பேர்தான் இறந்துள்ளதாக கூறியுள்ளார். ஆனால், வாரணாசியின் மணிகர்னிகா கட் பகுதியில், கடந்த ஏப்ரல் 15 – ஏப்ரல் 23-க்கு  உட்பட்ட காலத்தில் மட்டும் ஏறத்தாழ 1,500 சடலங்கள் இறுதி சடங்குக்கு வந்திருப்பதாக கூறுகின்றனர். வாரணாசியில் மொத்தம் 13 மயானங்கள் இருக்கின்றன. இந்தப் பகுதியை சேர்ந்த சமூக ஆர்வலர்கள் கூறும்போது, ஏப்ரல் 1 முதல் மே 7-ம் தேதி வரையிலான காலகட்டத்தில் கொரோனா மரணங்கள் 1,680-க்கு குறைவாக இருக்காது என்று கூறியுள்ளனர். வாரணாசியை பூர்விகமாக கொண்ட தகன சடங்குகள் செய்யும் ஒருவர், ’ஃபர்ஸ்ட் போஸ்ட்’  செய்தித் தளத்துக்கு அளித்த பேட்டியில், “ஏப்ரல் 8 முதல் உயிரிழப்போரின் எண்ணிக்கை மிக வேகமாக அதிகரித்ததை எங்களால் உணரமுடிந்தது. குறிப்பாக, ஏப்ரல் 17 – 21-க்கு உட்பட்ட நாள்களில் மட்டும் 100-க்கும் மேற்பட்ட சடலங்கள் வந்தன. அவற்றில் மூன்றில் ஒரு பங்கு கொரோனாவால் இறந்தோருடையது. நூற்றுக்கும் மேற்பட்டோரின் உடல் வந்ததால், அந்த நேரத்தில் எங்களால் எதுவுமே செய்ய முடியவில்லை. நான் இருந்த பகுதியை சேர்ந்த மயானத்தில், ஒரு நாளில் 15 சடலங்களைத்தான் மின்சாரம் வழியாக அடக்கம் செய்ய முடியும். அதனால் மீதமிருந்த அனைத்து சடலங்களையும் எரிக்கவே செய்தோம். இருந்தபோதிலும், எங்களிடம் பிபிஇ எனப்படும் பாதுகாப்பு கவசமெல்லாம் எதுவுமில்லை. கடவுள்தான் எங்களை காத்தருளினார்” எனக் கூறியுள்ளார். அதிகப்படியான சடலங்கள் எரிக்கப்பட்டதால், அதை எரிக்க உதவிய மரக்கட்டைகள் தட்டுப்பாடு அங்கே நிலவி இருக்கின்றன. வாரணாசியை சேர்ந்த மூங்கில் வியாபாரி ஒருவர் பேசும்போது, “எங்களுக்கு ஒரு நிமிடம் கூட ஓய்விருக்காது. தொடர்ச்சியாக ஆர்டர்கள் வந்த வண்ணம் இருக்கும். எங்க பகுதியிலிருந்து எல்லா கடையிலுமே நிலைமை இதுதான்” எனக் கூறியிருந்தார். இவை மட்டுமன்றி, மருத்துவமனையில் சிகிச்சை எடுத்து வருபவர்களுக்கும் பொருளாதார ரீதியிலான சிக்கல்கள் இருப்பதாகவே சொல்லப்படுகிறது. இன்று (மே 17), வாரணாசியிலுள்ள 14 மருத்துவமனைகளுக்கு அதிக தொகை வசூலித்ததற்காக நோட்டிஸ் அனுப்பியுள்ளது அம்மாவட்ட நிர்வாகம். வாரணாசியில் இதுவரை 70,000-க்கும் மேற்பட்ட கொரோனா தொற்று ஏற்பட்டிருப்பதாகவும், 700-க்கு மேற்பட்டோர் இறந்துவிட்டதாகவும் பதிவு செய்யப்பட்டுள்ளது. பொதுவாகவே கங்கை நதியுடனும் வாரணாசியுடனும் அங்கு வாழும் மக்களுடன் தனக்கு சிறந்த உறவு இருப்பதாக எத்தனையோ இடங்களில் குறிப்பிடுகிறார் மோடி. ஆனால், கொரோனா வைரஸ் மிக மோசமாக ஆகியிருக்கும் சூழலில், மோடி தொகுதிப் பக்கம் வரவே இல்லை என்பது முக்கியமான குற்றச்சாட்டாக இருக்கிறது. தொடர்ச்சியான இந்தக் குற்றச்சாடுகள், வாரணாசியை மட்டுமன்றி இந்தியாவின் நிலையையே மிக மோசமாக படம்பிடித்து காட்டுவதாகவே இருக்கிறது.
http://dlvr.it/Rzr289

Read More

காலில் விழவைக்கும் கலாசாரம் அருவருக்கவில்லையா?: ஒட்டனந்தல் சம்பவத்திற்கு கமல் கண்டனம்

விழுப்புரம் மாவட்டம் ஒட்டனந்தலில் பட்டியல் சமூகத்தினரை காலில் விழுந்து மன்னிப்பு கேட்க வைத்த சம்பவத்திற்கு மக்கள் நீதி மய்யம் தலைவர் கமல்ஹாசன் கண்டனம் தெரிவித்துள்ளார். இவ்விவகாரத்தில் 8 பேர் மீது வன்கொடுமை தடுப்புச் சட்டத்தில் வழக்குப் பதிவு செய்யப்பட்டுள்ள நிலையில், அதில் இருவர் கைது செய்யப்பட்டுள்ளனர். திருவெண்ணெய்நல்லூர் காவல் எல்லைக்குட்பட்ட பகுதியில் ஒட்டனந்தல் என்ற கிராமம் உள்ளது. அங்கு வசிக்கும் பட்டியலின மக்கள் கடந்த 12ஆம் தேதி கோயில் திருவிழா நடத்த ஏற்பாடு செய்துள்ளனர். இதுகுறித்த புகாரில் விசாரணை நடத்திய காவல்துறையினர், பொதுமுடக்க காலத்தில் திருவிழா நடத்த அனுமதி மறுத்தனர். இதுதொடர்பாக காவல்நிலையத்தில் மன்னிப்பு கடிதம் எழுதிக்கொடுத்துவிட்டு பட்டியலின மக்கள் ஊர் திரும்பியுள்ளனர். அப்போது, கூட்டப்பட்ட கிராம பஞ்சாயத்தில், விதிகளை மீறியதாக பட்டியலின மக்கள்மீது குற்றச்சாட்டு முன்வைக்கப்பட்டுள்ளது. அதில், மூன்று பேரை அழைத்து பிற சமூக மக்கள் முன்னிலையில் காலில் விழவைத்து மன்னிப்பு கேட்க வைத்த சம்பவம் அதிர்ச்சியை ஏற்படுத்தியுள்ளது. இதுதொடர்பாக நடத்தப்பட்ட விசாரணையில், சம்பந்தப்பட்ட 8 பேர் மீது வன்கொடுமை தடுப்புச் சட்டம் உள்ளிட்ட 4 பிரிவுகளில் வழக்குப் பதிவு செய்யப்பட்டுள்ளது. அதில் இருவர் கைது செய்யப்பட்டுள்ள நிலையில், எஞ்சிய 6 பேரை காவல்துறையினர் தேடி வருகின்றனர். இந்த சம்பவத்திற்கு மக்கள் நீதி மய்யம் கட்சியின் தலைவர் கமல்ஹாசன் கண்டனம் தெரிவித்துள்ளார். அவர் தனது டிவிட்டர் பக்கத்தில், ’’இந்தியர் யாவரும் என் உடன்பிறந்தோர் என்று உறுதிமொழி எடுக்கும், குலத் தாழ்ச்சி உயர்ச்சி சொல்லல் பாவம் என்று மனப்பாடப் பாட்டு கற்பிக்கும் தமிழகத்துக்குள்தான் விழுப்புரம் ஒட்டனேந்தல் இருக்கிறதா? திருவிழா கொண்டாடியதற்காக சக மனிதரைக் காலில் விழவைக்கும் கலாச்சாரம் அருவருக்க வைக்கவில்லையா? இம்முறையே இறுதி முறையாக இருக்கட்டும். அரசின் தலையீடு வலுவானதாக அமையட்டும்’’ என்று பதிவிட்டுள்ளார்.   திருவிழா கொண்டாடியதற்காக சக மனிதரைக் காலில் விழவைக்கும் கலாச்சாரம் அருவருக்க வைக்கவில்லையா? இம்முறையே இறுதி முறையாக இருக்கட்டும். அரசின் தலையீடு வலுவானதாக அமையட்டும். (2/2) — Kamal Haasan (@ikamalhaasan) May 16, 2021
http://dlvr.it/RznTcs

Read More