உலக சைக்கிள் தினம் : இந்தியாவிற்குள் சைக்கிள் பயணித்து வந்த கதை!

ஆதிகாலத்தில் வாழ்ந்த மூத்த குடிமக்கள் உணவுக்காக ஒரு இடத்திலிருந்து வேறொரு இடத்திற்கு நாடோடியாக நடை பயணம் மேற்கொண்டார்கள் என சொல்வதுண்டு. மனித நாகரிகம் மெல்ல வளர்ந்த பிறகு அந்த நடைப்பயணம் வாழ்வாதாரத்திற்காகவும், பொருளுக்காகவும் மாறியுள்ளது. இன்றைய டிஜிட்டல் உலகில் வாழ்ந்து வரும் மக்கள் ஒரு கோளிலிருந்து மற்றொரு கோளுக்கு எதிராக பயணிக்கின்றனர். இப்படி மனிதர்களின் பயணத்தை துரிதப்படுத்த பல வாகனங்கள் வந்திருந்தாலும் சைக்கிள்களுக்கு இருக்கும் மவுசு என்றும் குறையவில்லை. அதிலும் சைக்கிள் மீது உலக மக்கள் கொண்டுள்ள மோகம் கொரோனா முதல் அலைக்கு பிறகு அதிகரித்த வண்ணம் உள்ளது என்ற தகவலும் கிடைத்துள்ளது. சிலர் உடல் ஆரோக்கியத்திற்காகவும், சிலர் சுற்றுச்சூழலை காக்கும் நோக்கிலும், சிலர் நிதி சிக்கலை சமாளிப்பதற்காகவும் மிதிவண்டியை மிதித்தபடி நம் ஊர்களின் சாலைகளில் பயணிக்கின்றனர். இன்று உலக சைக்கிள் தினம். இந்த இனிய நாளில் இந்தியாவிற்குள் சைக்கிள் எப்படி பயணித்து வந்தது என்ற கதையை பார்ப்போம்.  19-ஆம் நூற்றாண்டின் தொடக்கத்தில்தான் சைக்கிள் உலகிற்கு அறிமுகமாகியுள்ளது. ஜெர்மன் நாட்டை சேர்ந்த ‘கார்ல் வான் டிராய்ஸ்’ என்பவர்தான் முதல் இரு சக்கர வாகனத்தை வடிவமைத்தது. முழுவதும் மரத்தினாலான அதனை Dandy horse என சொல்லியுள்ளனர். அதற்கு காப்புரிமையும் அவர் பெற்றதாக சொல்லப்படுகிறது. தொடர்ந்து அடுத்தடுத்த ஆண்டுகளில் வடிவமைப்பில் மாற்றம் பெற்ற சைக்கிளில் இறுதியாக ‘பெடல்’ பொருத்தப்பட்டுள்ளது. அதன் பின்னர் பெருமளவில் வணிக நோக்கத்துடன் சைக்கிள் உருவாக்கப்பட்டு, சந்தைபடுத்தப்பட்டுள்ளது.  சைக்கிள் இந்தியாவிற்குள் என்ட்ரியானது எப்படி? காலனி ஆதிக்கத்தில் இருந்த இந்தியாவில் 1890களில் சைக்கிள் இறக்குமதி செய்யப்பட்டு விற்பனையாகி உள்ளது. 1910 துவங்கி 1946 வரை சுமார் 2.5 பில்லியன் சைக்கிள்கள் இந்தியாவில் இறக்குமதியாகி உள்ளன.  ராலி, பி.எஸ்.ஏ, ரட்ஜ், ஹம்பர் என பிரிட்டன் மற்றும் ஐரோப்பிய நாடுகளின் சைக்கிள் உற்பத்தி நிறுவனங்களின் ஆதிக்கம் இந்தியாவில் அதிகமாக இருந்தது. 1940களில் இறக்குமதி பொருட்களின் மீதான வரி உயர்த்தப்பட்டதை தொடர்ந்து இந்தியாவிலிருந்த தொழில் முனைவோர்கள், மேல் நாட்டு நிறுவனங்கள் உடன் கூட்டு சேர்ந்து இந்தியாவிலேயே சைக்கிள் உற்பத்தி செய்யும் பணியில் இறங்கினர். அதற்கு மக்களிடையே கிடைத்த வரவேற்பை கூர்ந்து கவனித்த இந்தியாவை சேர்ந்த தொழிலதிபர்கள் நேரடியாக சைக்கிள் உற்பத்தி பணியை தொடங்கினர். அதற்கு இந்தியா சுதந்திரம் பெற்றதும் மிக முக்கிய காரணமாக அமைந்தது. ஹீரோ, ஏவான், ஹெர்குலஸ், TI சைக்கிள்ஸ் ஆப் இந்தியா மாதிரியான நிறுவனங்கள் இந்தியாவில் பல ஆண்டுகளாக சைக்கிள் உற்பத்தி தொழிலை மேற்கொண்டு வருகின்றன. அதுதவிர அட்லஸ் சைக்கிள் நிறுவனம் உற்பத்தியை நிறுத்திக் கொண்டுள்ளது.  1970கள் தொடங்கி 2000 வரையில் இந்திய சாலைகளில் அதிகம் றெக்கை கட்டி பறந்தது சைக்கிள்கள்தான். வீட்டுக்கு ஒரு சைக்கிள் இருப்பதே தனி அந்தஸ்தாக பார்க்கப்பட்டது. சைக்கிளில் பொருத்தப்பட்டிருக்கும் டைனமோ அதன் முகப்பில் பொருத்தப்பட்டிருக்கும் விளக்குகள் ஒளிர்வதற்கான மின் சக்தியை உருவாக்கி கொடுத்தன. இப்படி இந்திய சாலையில் இளையோர் முதல் அனைத்து வயதினரையும் கவர்ந்திருந்த சைக்கிள் மோட்டார் வாகனங்களின் படையெடுப்பால் தனது மவுசை இழந்தது.  பள்ளி செல்லும் மாணவர்கள், உடல் ஆரோக்கியத்தில் அக்கறை செலுத்துபவர்கள் மட்டுமே சைக்கிளை பயன்படுத்தும் நிலை உருவானது. அதனால் சைக்கிள் உற்பத்தி நிறுவனங்கள் திகைத்தன. மெல்ல தனது சந்தை வாய்ப்பை சைக்கிள் இழந்தது. இந்த நிலையில் தான் கடந்த சில ஆண்டுகளாக தனது மகத்துவத்தை மீண்டும் பெறத் தொடங்கியது சைக்கிள்.  சைக்கிள் பயணத்தை ஊக்குவித்த ஊரடங்கு! கொரோனா முதல் அலைக்கு பிறகு இந்தியாவில் சைக்கிளில் பயணம் செய்ய பெரும்பாலான மக்கள் ஆர்வம் காட்ட தொடங்கி உள்ளதாக புள்ளிவிவரங்கள் சொல்கின்றன. பெரும்பாலும் இறக்குமதி செய்யப்பட்ட சைக்கிள்களுக்கு தான் இப்போது அதிக டிமெண்ட் இருப்பதாக சொல்லப்படுகிறது. அதற்கு காரணம் நண்பர்களுடன் ஓய்வு நேரங்களில் பொழுதை ஆரோக்கியத்திற்காக செலவிட வேண்டுமென ஏற்பட்டுள்ள மனமாற்றம். அதனால் இப்போது மீண்டும் இந்திய சாலைகளில் றெக்கை கட்டி பறக்க தொடங்கியுள்ளது சைக்கிள். 
http://dlvr.it/S0yYlY

Read More

‘கோட்டையில்லை, கொடியுமில்லை எப்பவும் நீ ராஜா’ : இளையராஜா பிறந்தநாள் இன்று.!

தமிழர்கள் மட்டுமின்றி இந்திய சினிமா ரசிகர்களின் இதய சிம்மாசனத்தில் இசை அரசனாக வீற்றிருக்கும் இளையராஜாவின் பிறந்தநாள் இன்று..! ‘அவனின்றி ஓரணுவும் அசையாது’ என்பதுபோல, அவரின் இசையின்றி தமிழர்களின் ஒரு நாளும் நகராது. அரை நூற்றாண்டுகாலமாக தமிழர்களின் நாடி, நரம்பு, மூச்சு, பேச்சு, இரத்தம் எல்லாவற்றிலும் இரண்டற கலந்தது இவரின் இசை என்றால் அது மிகையான புகழ்ச்சியல்ல. இந்திப்பாடல்கள் தமிழக வீடுகளில் பிரபலமடைய தொடங்கிய 70 களின் இறுதியில் “வராது வந்த மாமணியாய்” வந்து வீடுதோறும், தமிழ்மக்களின் இதயம்தோறும் நிறைந்தவர்  ‘இசைஞானி’ இளையராஜா. தனது அண்ணன் பாவலர் வரதராஜனுடன் மேடைகளில், நாடகங்களில் இசை மீட்டிக்கொண்டிருந்த ராசையாவின் திரையிசை அவதாரம் 1976ஆம் ஆண்டில்  ‘அன்னக்கிளி’ திரைப்படம் மூலமாக தமிழ்சினிமாவில் தடம்பதித்தது. மேற்கத்திய இசையும், தமிழர்களின் பாரம்பரிய இசையும் கலந்த அன்னக்கிளி படத்தின் பாடல்கள் தமிழ்சினிமாவையே ஸ்தம்பிக்கவைத்தது, யார் இந்த ராசையா என அனைவரையும் புருவம் சுருக்கி பார்க்க வைத்தது. 1976 இல் தமிழ்த்திரையிசையின் ராஜாவாக முடிசூடிக்கொண்ட இளைராஜாவின் இசை ஆட்சி இன்னமும் தமிழ்நிலத்தை ஆண்டுகொண்டேதான் இருக்கிறது. 1943 ஆம் ஆண்டு ஜூன் 2ஆம் தேதி தேனி மாவட்டம் பண்ணைப்புரத்தில் ராமசாமி-சின்னதாயம்மாளுக்கு மகனாக பிறந்த ராசைய்யா, தனது அண்ணன்கள் பாவலர் வரதராஜன், ஆர்.டி,பாஸ்கர் மூலமாக இசைமேடையில் அறிமுகமானார். அன்னக்கிளி மூலமாக இளையராஜாவை தமிழ்சினிமாவில் அறிமுகம் செய்தது பிரபல தயாரிப்பாளர் பஞ்சு அருணாச்சலம். அன்னக்கிளி படத்திற்கு பின்னர் பாரதிராஜா இயக்கிய ’16 வயதினிலே’ படம் இளையராஜாவை புகழின் உச்சியில் அமர வைத்தது, அதன்பின்னர் இளையராஜா தொட்டதெல்லாம் வெற்றிதான். தமிழ் மட்டுமின்றி தெலுங்கு, மலையாளம், கன்னடம், இந்தியிலும் இவரின் பாடல்கள் பெரிய வரவேற்பைபெற்றன.  நாட்டுப்புற இசையில் பயணத்தை தொடங்கிய இளையராஜா, ஆகச்சிறந்த கர்நாடக இசைப்பாடல்களையும், மேற்கத்திய பாணி பாடல்களையும் உருவாக்கியவர். லண்டன் டிரினிட்டி மியூசிக் தொலைதூர கற்றலில் கிளாசிகல் கிதார் வாசிப்பில் தங்கப்பதக்கம் வென்றவர் இளையராஜா, லண்டன் ராயல் ஃபில்ஹார்மானிக் ஆர்கெஸ்ட்ராவில் சிம்பொனிக்கு இசையமைத்த ஆசியாவின் முதல் இசையமைப்பாளர் என்ற சிறப்பை பெற்றவரும் இவர்தான், இதனால்தான் இவர் மேஸ்ட்ரோ என்றும் புகழப்படுகிறார். திருவாசகத்துக்கு இவர் உருவாக்கிய சிம்பொனி அனைவரின் பாராட்டையும் பெற்றது. 2013 ஆம் ஆண்டில் இந்திய சினிமாவின் 100 வது ஆண்டை கொண்டாடும் சிஎன்என்-ஐபிஎன் கருத்துக்கணிப்பில் இந்தியாவின் மிகச்சிறந்த இசையமைப்பாளராக தேர்ந்தெடுக்கப்பட்டார் இவர், அதுபோல அமெரிக்க உலக சினிமா போர்ட்டல் ‘டேஸ்ட் ஆஃப் சினிமா’ பட்டியலிட்ட 25 சிறந்த இசையமைப்பாளர்களில் உலக அளவில் 9 ஆவது இடம் பிடித்தார் இளையராஜா. ஆயிரத்துக்கும் மேற்பட்ட திரைப்படங்களுக்கும், ஐயாயிரத்துக்கும் மேற்பட்ட பாடல்களுக்கும் இசையமைத்துள்ள இளையராஜாவின் பின்னணி இசைக்கோர்வை உயிர்த்துவம் மிக்கது. இவரின் பின்னணி இசைக்காகவும், திரைப்பாடல்களுக்காகவுமே பல படங்கள் ஹிட் அடித்திருக்கின்றன என்பது உண்மை. இளையராஜாவுக்கு நாட்டின் உயரியவிருதுகளான பத்மவிபூஷன்(2018) மற்றும் பத்மபூஷன்(2010) விருதுகள் வழங்கி கெளரவிக்கப்பட்டுள்ளன.  இவர் இதுவரை இரண்டு தமிழ், இரண்டு தெலுங்கு, ஒரு மலையாளம் என மொத்தம் ஐந்து படங்களுக்காக தேசிய விருதை வென்றுள்ளார். இதுதவிர தமிழ்நாடு, ஆந்திரா, கேரளா, மத்திய பிரதேச அரசின் பல விருதுகளையும், இரண்டு கெளரவ டாக்டர் பட்டங்களையும் வென்றுள்ளார் இளையராஜா. தமிழ்நாட்டை சுற்றிய மற்ற மாநிலங்களில் 70 களில் தொடங்கி இப்போதுவரை இந்தி பாடல்கள் மிக பிரபலமாகவே உள்ளது. ஆனால் மற்ற மொழி பாடல்களை நோக்கி மனமே செல்லாத வகையில், தமிழர்களின் காதுகளில் தேன் சொட்ட சொட்ட தமிழை புகுத்திய பெருமை இளையராஜாவையே சேரும். -வீரமணி சுந்தரசோழன்
http://dlvr.it/S0xMTn

Read More

விவசாயியும் மாஸ்க் போடுங்க’: தத்ரூபமாக நடித்துக்காட்டி விழிப்புணர்வு செய்த நாகை காவலர்

விவசாயி உள்ளிட்ட அனைவரும் மாஸ்க் அணிய வேண்டும் என்பதை வலியுறுத்தி பொதுமக்களிடம் தத்ரூபமாக நடித்து காட்டி விழிப்புணர்வு ஏற்படுத்திய நாகை காவல் ஆய்வாளர். கொரோனா 2,வது அலையில் தமிழக கிராமங்கள் அதிக பாதிப்பை சந்தித்து வருகின்றன. குறிப்பாக கொரோனா எனும் கொடிய நோய் ஆயிரக்கணக்கான மக்களை கொத்துக்கொத்தாக கொன்று குவித்து வருகிறது. இந்த தொற்றிலிருந்து ஒவ்வொருவரும் தங்களை தற்காத்துக்கொள்ள மாஸ்க் அணிவது கட்டாயம் என அரசு அறிவுறுத்தினாலும் அதனை பொதுமக்கள் சரிவர கடைபிடிப்பதில்லை. இதுபோன்ற அறிவுறுத்தல்களை கடைபிடிக்க வேண்டும் என்பதை வலியுறுத்தி நாகை நகர காவல் நிலையத்தில் பணியாற்றும் ஆய்வாளர் பெரியசாமி நாகையில் பொதுமக்களிடம் விழிப்புணர்வு ஏற்படுத்தினார். அப்போது காக்கி சட்டையை கழற்றிவிட்டு விவசாயி வேடத்தில் விழிப்புணர்வு ஏற்படுத்திய ஆய்வாளர் பெரியசாமி, மாஸ்க் அணியாதபோது கொரோனா நம்மை எவ்வாறு கவ்விக் கொள்கிறது என தரையில் விழுந்து தத்துரூபமாக பொதுமக்கள் மத்தியில் நடித்து காட்டினார். கொரோனா விழிப்புணர்வு பாடலுடன் தத்துரூபமாக, ஆய்வாளர் நடித்துக் காட்டிய போது, இறந்து போகும் காட்சி அனைவரையும் ஒருசில நிமிடம் அதிர்ச்சியில் ஆழ்த்தியது. காவலர் என்றால் கடுமை காட்டுபவர் என்ற கூற்றை உடைத்தெறிந்து, மக்களின் உயிர் காக்க தன்னலம் பாராமல் சமூக அக்கறையுடன் ஆய்வாளர் பெரியசாமி நடத்திய விழிப்புணர்வு நிகழ்ச்சியை கண்டு பொதுமக்கள், தாங்கள் அனைவரும் கண்டிப்புடன் ஊரடங்கை கடைபிடிப்போம் எனக் கூறி அவரை பாராட்டிச் சென்றனர்.
http://dlvr.it/S0vbml

Read More

`லட்சத்தீவு மக்களின் வாழ்வாதாரத்தையே அழித்துவிடும்!' - புதிய விதிமுறைகளை எதிர்க்கும் சூழலியலாளர்கள்

36 தீவுகளின் தொகுப்பான ஒரு தீவுக்கூட்டம்தான் லட்சத்தீவு. அங்கு தற்போது புதிய நிர்வாகியாகப் பதவி ஏற்றுள்ள பிரபுல் கோடா படேல் கொண்டு வந்துள்ள பல விதிமுறைகள் அங்கு வாழும் மக்களிடையே அதிருப்தியை ஏற்படுத்தியுள்ளன. மாட்டுக் கறிக்கு தடை விதித்தது முதல் மது விற்பனையை ஊக்குவிப்பது வரை பல விதிமுறைகளை, குறிப்பாக இஸ்லாமிய மக்கள் தொகை அதிகம் இருக்கும் பகுதியில் கொண்டு வந்திருப்பது, அங்குள்ள மக்களின் கலாசார அடையாளத்தையே சிதைப்பதாக இருக்கிறதென்று லட்சத்தீவு மக்கள் எதிர்த்து வருகின்றனர். மேலும், தற்போது புதிதாகக் கொண்டுவரப்பட்டுள்ள சட்டங்கள் பல தலைமுறைகளாக அங்கு வாழ்ந்துவரும் மக்களுடைய வாழ்வியலைச் சிதைப்பதாக இருப்பதாகவும் சொல்லப்படுகிறது. லட்சத்தீவு வாழ் மக்கள், இதனால் அவர்களுடைய கலாசாரமே முற்றிலுமாக மாற்றப்படும் என்று அஞ்சுகிறார்கள்.லட்சத்தீவு லட்சத்தீவின் லோக் சபா பிரதிநிதியான முகமத் ஃபைசல், ``லட்சத்தீவின் இப்போதைய நிர்வாகி, உள்ளூர் மக்களுடைய நில உரிமை மீது நேரடித் தாக்குதலைத் தொடுக்கிறார். லட்சத்தீவு வளர்ச்சி ஆணைய ஒழுங்குமுறைக்கான வரைவின்படி உள்ளூர் மக்கள், அவர்களுடைய வீடுகளிலிருந்து, நிலத்திலிருந்து, நகரத் திட்டமிடுதல் மற்றும் இதர வளர்ச்சி நடவடிக்கைகளுக்காக வெளியேற்றப்படுவார்கள். அவர் இதைச் செய்தால், இங்குள்ள மீனவச் சமூகங்களின் வாழ்வாதாரம் முற்றிலுமாகப் பறிக்கப்படும். இப்போது நடந்துகொண்டிருப்பது, இப்பகுதியின் உள்ளூர் மக்களுடைய பல தலைமுறைகளாக வளர்ந்து வந்த வாழ்வியலை மாற்றியமைப்பதற்காகத் திட்டமிட்டுச் செய்யப்படுகிறது" என்று கூறியுள்ளார். படேல் ஏற்கெனவே, பள்ளிகளின் மதிய உணவிலும் அரசு நிர்வகிக்கும் விடுதிகளிலும் மாணவர்களுக்கு வழங்கப்படும் அசைவ உணவுப் பண்டங்களை நிறுத்திவிட்டார். மேலும், மாடுகளை உணவுக்காக வெட்டுவது, மற்ற இடங்களுக்குக் கொண்டு செல்வது, விற்பது, வாங்குவது போன்ற செயல்பாடுகளையும் தடை செய்வதாக அறிவிக்கப்பட்டுள்ளது. லட்சத்தீவு விலங்குப் பாதுகாப்புக்கான புதிய சட்ட வரைவும் சர்ச்சையைக் கிளப்பியுள்ளது. அந்தச் சட்ட வரைவின்படி, அங்கு மாட்டுக் கறியை விற்பதும் தடை செய்யப்படுகிறது. மேலும், பள்ளி மாணவர்களுக்குக்கூட மதிய உணவு மற்றும் விடுதிகளில் வழங்கப்படும் உணவுகளில் அசைவ உணவு தடை செய்யப்படுகிறது. இது அங்கு வாழும் பெரும்பான்மை சமூகமான இஸ்லாமிய மக்களின் உணவுமுறையில் வேண்டுமென்றே கை வைப்பதைப்போல் இருப்பதாக கல்வியாளர் ஸ்மித்தா குமார் கூறியுள்ளார். இதன்விளைவாக, கால்நடைகளை பாலுக்காகவும் இறைச்சிக்காகவும் வளர்க்கும் மக்கள் பாதிக்கப்படுவார்கள்.Praful Patel இதுமட்டுமன்றி, தற்போது லட்சத்தீவில் பாலுக்காகவும் இறைச்சிக்காகவும் மக்கள் மாடு வளர்ப்பதைத் தடுப்பதற்கான வேலைகளும் நடைபெறுவதாக அப்பகுதி மக்கள் குற்றம் சாட்டுகிறார்கள். ``உள்ளூர் மக்கள் சமூகங்களின் ஆன்மிக மற்றும் கலாசார அடிப்படையில், இந்தத் தீவுக்கூட்டத்தில் மது விற்பனை தடை செய்யப்பட்டிருந்தது. ஆனால், தற்போது சுற்றுலாவை ஊக்குவிப்பதற்காக நான்கு தீவுகளில் மது விற்பனைக்கு அனுமதி வழங்கப்பட்டுள்ளது. ஏற்கெனவே உள்ள பஞ்சாயத்து சட்டங்களிலும் திருத்தங்கள் கொண்டு வரப்படுகின்றன. அந்தத் திருத்தங்களிபடி, இரண்டு குழந்தைகளுக்கும் அதிகமாக இருக்கும் குடும்பத்தைச் சேர்ந்தவர்கள் தேர்தலில் பங்கெடுப்பது தடை செய்யப்படும். இவற்றோடு, கேரளாவுடன் லட்சத்தீவுக்கு இருக்கும் தொடர்பையும் துண்டிப்பதற்கான வேலைகள் நடக்கின்றன. இந்தத் தீவிலிருந்து புறப்படும் கப்பல்கள், கோழிக்கோட்டில் அமைந்துள்ள பெய்போர் துறைமுகத்திலிருந்து சரக்குகளை ஏற்றி வரும். அதைத் தற்போது, கர்நாடகாவிலுள்ள மங்களூர் துறைமுகத்துக்கு மாற்றிக் கொள்ளுமாறு உத்தரவிடப்பட்டுள்ளது" என்று கூறியுள்ளார் முகமத் ஃபைசல். பிரபுல் கோடா படேல் குஜராத்தின் உள்துறை அமைச்சராக, 2012-ம் ஆண்டில் நரேந்திர மோடியின் ஆட்சிக் காலத்தில் இருந்தார். இதற்கு முன்னர், அரசு அதிகாரிகளே லட்சத்தீவின் நிர்வாகியாக நியமிக்கப்பட்டனர். ஆனால், 1947-ம் ஆண்டிலிருந்து இப்போது வரையில், ஒரு அரசியல்வாதியை நிர்வாகியாக நியமித்திருப்பது இதுவே முதல்முறை.Lakshadweep மாட்டுக்கறியைத் தடை செய்தது, பஞ்சாயத்து சட்டத்திருத்தம் போன்றவை எந்தளவுக்கு அப்பகுதி மக்களின் கலாசாரத்தை சிதைக்குமோ, அதே அளவுக்கு லட்சத்தீவு வளர்ச்சி ஆணைய ஒழுங்கு முறைக்கான புதிய வரைவு அப்பகுதி மக்களுடைய நில உரிமையை அபாயத்துக்கு உள்ளாக்குகிறது. இதன்மூலம், வளர்ச்சிக்காக லட்சத்தீவு மக்களிடமிருந்து நிலங்களைக் கையகப்படுத்துவது, மாற்றியமைப்பது போன்ற வேலைகளை எளிதில் மேற்கொள்ள முடியும். லட்சத்தீவில் நீண்டகாலமாக கல்வியாளராகவும் எழுத்தாளராகவும் செயல்பட்டு வரும் ஸ்மித்தா.பி.குமார், ``படேலின் திட்டங்கள், சுற்றுலாத் துறையை வளர்ப்பதோடு நின்றுவிடாது. குறிப்பிடத்தக்க தனியார் முதலீடு மற்றும் கட்டுப்பாடற்ற பன்னாட்டு நிறுவனங்களின் வேலைகளுக்கு வழிவிடுவதன் மூலம், இந்தத் தீவுக்கூட்டத்துடைய சுற்றுச்சூழல் மற்றும் இந்த மக்களின் வாழ்வாதாரத்தின் மீது மோசமான விளைவுகளைக் கொண்டுவரும்" என்று கூறியுள்ளார். லட்சத்தீவில் புதிதாகத் திட்டமிடப்பட்டுள்ள கடலோர கட்டுமானங்கள், அதிகளவிலான கப்பல் போக்குவரத்து, சுற்றுலாவுக்கான கடலோர ரிசார்ட் கட்டுமானங்கள் போன்ற திட்டங்கள் கடலோர மீனவச் சமூகங்களின் வாழ்வாதாரத்தைப் பெரியளவில் பாதிக்கும். இந்தத் தீவுக்கூட்டத்தில் இதுவரை பொறுப்புமிக்க, குறைந்த அளவிலான, அதேநேரம் உள்ளூர் மக்களின் வாழ்வாதாரத்துக்கு உதவக்கூடிய வகையிலான சுற்றுலா செயல்பாடுகள் இருந்து வந்ததாகவும் அதைத் தற்போதைய புதிய திட்டங்கள் சீரழிக்கும் என்றும் லட்சத்தீவு மக்கள் அஞ்சுகின்றனர்.Narendra Modi ஏற்கெனவே, 370 அறைகளைக் கொண்ட நீர் வில்லாக்கள் (Water villas), கடலோர ரிசார்ட்டுகள் போன்றவற்றைக் கட்டமைப்பதற்கான முயற்சிகள் நடந்துகொண்டிருப்பதாகச் சொல்லப் படுகிறது. மேலும், சில கார்ப்பரேட் நிறுவனங்களின் தூண்டுதலால், மத்திய உள்துறை அமைச்சகம் இந்தத் திட்டங்களை நிறைவேற்றுவதாகவும் சூழலியல் ஆர்வலர்கள் குற்றம் சாட்டுகிறார்கள். இந்தத் திட்டங்களால் லட்சத்தீவில் ஏற்படக்கூடிய சுற்றுச்சூழல் சீர்கேடுகளைக் குறிப்பிட்டு, நாடு முழுவதும் உள்ள 30 பல்கலைக்கழகங்கள் மற்றும் ஆராய்ச்சி அமைப்புகளைச் சேர்ந்த 114 ஆராய்ச்சியாளர்கள் லட்சத்தீவு யூனியன் பிரதேச நிர்வாகத்திடம் கேட்டுக்கொண்டனர். இதன்விளைவாக, அந்த நிலப்பகுதியின் எளிதில் பாதிக்கக்கூடிய உவர்நீர் ஏரிகள், கடலோர சூழலியல் அமைப்புகளில் பெரிய பாதிப்புகள் நிகழும் என்றும் எச்சரித்தார்கள். அங்கு நடக்கப்போகும் புதிய கட்டுமானங்கள் மட்டுமன்றி, பெரியளவிலான சுற்றுலா வளர்ச்சி மற்றும் மது விற்பனைக்கு அனுமதித்தல் போன்றவை, மிகப்பெரிய சூழலியல் தாக்கத்தையும் கொண்டுவரும். தீவுக் கூட்டத்தில் நீரின் தரம் சீர்கெடுவதோடு, மோசமான நீர் மாசுபாடுகளைச் சந்திக்க நேரிடும். கூடுதலாக, சுற்றுலா பெருகும்போது கூடவே கழிவுகளும் பெருகும். இதனால், தீவு நிலம் மோசமாக மாசடையக்கூடும். இப்போதுள்ள சுற்றுலா செயல்பாடுகளே, கடல் நீரில் மைக்ரோ பிளாஸ்டிக் மாசுபாட்டை உண்டாக்கி, மீன் வளத்தின் ஆரோக்கியத்தைப் பாதிக்கிறது. இதை இன்னும் பெரியளவில் கொண்டுவருவது பேரழிவாகவே இருக்கும் என்று சூழலியலாளர்கள் எச்சரிக்கின்றனர். கேரளாவிலிருந்து 200 கிலோமீட்டர் தொலைவில், அரபிக் கடலில் அமைந்துள்ள தீவுக் கூட்டத்தில் 16 பவளத் திட்டுக்களும் 32 தீவுகளும் இருக்கின்றன. அதில் 11 தீவுகளில் மட்டுமே மக்கள் வாழ்கிறார்கள். அனைத்துத் தீவுகளின் கரைக்கடலும் மேற்கில் ஆழமற்றவையாகவும் கிழக்கில் செங்குத்தான பவளச் சரிவுகளாகவும் இருக்கின்றன. இந்த தனித்தன்மைகளின் காரணமாக, லட்சத்தீவுக் கூட்டம் சிறப்பான கடல் சார்ந்த தாவர மற்றும் உயிரின வளங்களைக் கொண்டுள்ளது.லட்சத் தீவு Also Read: லட்சத்தீவு மக்கள் கொந்தளிப்பு: காரணமாக இருக்கும் பிரபுல் கோடா படேல் - யார் இவர்? மேலும் கடல்புற்களும் பவளப் பாறைகளும் அங்கு அமைந்திருப்பதால், பல்வேறு வகையான மீன் இனங்களுக்கு, முதுகெலும்பில்லாத உயிரினங்களுக்கு, கடல் ஆமைகளுக்கு, கடல் வாழ் பாலூட்டிகளுக்கு புகலிடமாகவும் இந்தத் தீவுக்கூட்டம் செயல்படுகிறது. இந்நிலையில், தற்போது படேல் தலைமையில் மேற்கொள்ளப்படும் இந்தப் புதிய மாற்றங்கள், லட்சத்தீவு மக்களுடைய வாழ்வியலை முறையில் கை வைப்பதோடு, அவர்களுடைய வாழ்வாதாரத்துக்கு அடிப்படையாக விளங்கும் அதன் சுற்றுச்சூழல் மீதும் மிகப்பெரிய சீர்கேடுகளைக் கொண்டுவரும். இதனால், இந்தத் தீவுக்கூட்டத்தையும் அதைச் சார்ந்து வாழும் மக்களின் வாழ்வையும் ஆபத்தில் சிக்க வைக்கக்கூடிய புதிய திட்டங்களை உடனே ரத்து செய்ய வேண்டும் என்று சமூக, சூழலியல் ஆர்வலர்களும் அங்கு வாழும் மக்களும் வலியுறுத்துகிறார்கள். ஒரு மண்ணின் மக்களுடைய வாழ்வியலையும் வாழ்வாதாரத்தையும் பற்றிச் சிறிதும் சிந்திக்காத ஒரு தலைமை அமைவதைவிட மோசமான பேரிடர் எதுவும் இருக்க முடியாது. அத்தகைய பேரிடரில் சிக்கிவிட்டோமோ என்ற அச்சத்தில் லட்சத்தீவு மக்கள் இருக்கிறார்கள். அப்படியில்லை என்று காட்ட வேண்டியது அதன் நிர்வாகியான பிரபுல் கோடா படேலின் கடமை. அதைச் செய்வாரா?
http://dlvr.it/S0tkKz

Read More

மகாராஷ்டிரா: சரத்பவாரை சந்தித்த பாஜக-வின் தேவேந்திர பட்னாவிஸ் - மீண்டும் ஆபரேசன் தாமரையா?

மகாராஷ்டிராவில் தற்போது எப்போதும் இல்லாத வகையில் இரு வேறு கொள்கையுடைய கட்சிகளின் கூட்டணி ஆட்சி நடந்து வருகிறது. எப்போதுமே சிவசேனா பா.ஜ.க-வின் கூட்டணி கட்சியாகவே இருந்து வந்துள்ளது. ஆனால் கடந்த சட்டமன்ற தேர்தலுக்கு பிறகு முதல்வர் பதவி தொடர்பாக ஏற்பட்ட கருத்து வேறுபாடு காரணமாக பா.ஜ.க மற்றும் சிவசேனா இடையே மோதல் போக்கு நிலவியது. அதில் இடையில் புகுந்த சரத்பவார் உத்தவ் தாக்கரேவை, தங்கள் பக்கம் இழுத்து அவரை முதல்வராக்க ஆதரவுக் கொடுத்து ஆட்சியில் அமர்த்தியுள்ளார். அவர்களுடன் காங்கிரஸ் கட்சியும் கூட்டணி அமைத்துள்ளது. இது கொள்கையற்ற கூட்டணியாகவே கருதப்படுகிறது. இந்த கூட்டணி ஆட்சியைக் கவிழ்க்க பா.ஜ.க ஆபரேசன் தாமரை என்ற பெயரில் கவிழ்ப்பு முயற்சியில் ஈடுபட்டு மண்ணைக் கவ்வியது.சரத்பவார்-பட்னாவிஸ் சந்திப்பு இந்நிலையில் திடீர் திருப்பமாக தேசியவாத காங்கிரஸ் தலைவர் சரத்பவாரை பா.ஜ.க-வின் முன்னாள் முதல்வர் தேவேந்திர பட்னாவிஸை சந்தித்து பேசினார். இந்த சந்திப்பு அரசியல் வட்டாரத்தில் பெரும் பரபரப்பை ஏற்படுத்தியது. ஏற்கனவே சரத்பவாரை தங்களது பக்கம் இழுத்து மகாராஷ்டிராவில் ஆட்சியை அமைக்க பா.ஜ.க இதற்கு முன்பு மேற்கொண்ட முயற்சிகள் பலனளிக்கவில்லை. தற்போது மீண்டும் சந்தித்திருப்பது அனைவருக்கும் ஆச்சரியத்தை ஏற்படுத்தியிருக்கிறது. இந்த நிலையில் இதற்கு பட்னாவிஸ் விளக்கம் அளித்திருக்கிறார். தனது டிவிட்டர் பக்கத்தில் இது தொடர்பாக கொடுத்துள்ள விளக்கத்தில், சரத்பவாருக்கு சமீபத்தில் ஆபரேசன் செய்யப்பட்டது. அதனால் அவரை சந்தித்து உடல் நலம் விசாரித்தேன், என்று குறிப்பிட்டு இருவரும் சந்தித்த படத்தையும் பதிவிட்டுள்ளார். Also Read: `ஒரு திட்டம் அறிவித்துவிட்டால் போதும், அது நிறைவேறும் வரை மோடி உறங்கமாட்டார்' - கலகலத்த பட்நாவிஸ்! இச்சந்திப்பு குறித்து சிவசேனா செய்தி தொடர்பாளர் சஞ்சய் ராவுத் கூறுகையில், `சரத்பவார் எப்படி எதிர்க்கட்சி தலைவராக செயல்பட வேண்டும் என்பது குறித்து, தேவேந்திர பட்னாவிஸுக்கு ஆலோசனை கொடுத்திருப்பார்' என்று தெரிவித்தார். மேலும்,` இந்த சந்திப்பில் எந்த வித அரசியலும் இல்லை. ஆபரேசன் தாமரையை மறந்துவிடுங்கள். அது இங்கேயோ அல்லது மேற்கு வங்கத்திலோ எடுபடாது. அப்படி இருக்கும் போது ஏன் ஒவ்வொரு சந்திப்பையும் அரசியலாக்குகிறீர்கள்' என்றும் அவர் தெரிவித்தார். தேவேந்திர பட்னாவிஸே இது மரியாதை நிமித்தமான சந்திப்பு என்று தெரிவித்துள்ளதையும் சஞ்சய் ராவுத் சுட்டிக்காட்டினார். Also Read: மகாராஷ்டிரா: சரத் பவார் கலந்துகொண்ட விவசாயிகள் பேரணி; புறக்கணித்த உத்தவ் தாக்கரே! - என்ன நடந்தது? மகாராஷ்டிரா அரசு மராத்தா இன மக்களுக்கு 13 சதவீத இட ஒதுக்கீடு வழங்கி சட்டம் இயற்றி இருந்தது. ஆனால் அதனை சட்டவிரோதம் என்று கூறி சுப்ரீம் கோர்ட் ரத்து செய்துவிட்டது. அதனால் பொருளாதார ரீதியில் பின் தங்கியவர்களுக்கான 10 சதவீத இட ஒதுக்கீட்டில் மராத்தாக்களுக்கு கல்வி மற்றும் வேலை வாய்ப்பில் ஒதுக்கீடு வழங்க மகாராஷ்டிரா அரசு முடிவு செய்துள்ளது. அதேசமயம் மராத்தா இட ஒதுக்கீடு பிரச்னையை மகாராஷ்டிரா அரசு சரியாக கையாளவில்லை என்று கூறி பா.ஜ.க வரும் 5-ம் தேதி மாநிலம் தழுவிய அளவில் போராட்டத்திற்கு அழைப்பு விடுத்துள்ளது. இது குறித்தும் சரத்பவாருடன் பட்னாவிஸ் ஆலோசனை நடத்தி இருக்கலாம் என்று யூகிக்கப்படுகிறது.
http://dlvr.it/S0sYFq

Read More

மக்கள் ஒத்துழைத்தால் ஊரடங்கிற்கு விரைவில் முற்றுப்புள்ளி - முதல்வர் மு.க.ஸ்டாலின் உரை

விரைவில் இரண்டாவது தவணையாக ரூ.2,000 நிவாரணத் தொகை வழங்கப்படும் என முதல்வர் மு.க.ஸ்டாலின் தெரிவித்துள்ளார்.  தமிழ்நாட்டில் கொரோனா பாதிப்பு குறைந்துவரும் சூழலில் முதலமைச்சர் மு.க.ஸ்டாலின் வீடியோ ஒன்றை வெளியிட்டுள்ளார். அந்த வீடியோவில் மு.க.ஸ்டாலின் பேசியதாவது:-  ''கொரோனாவை கட்டுப்பட்டுத்த முழு ஊரடங்கு தவிர வேறு வழியேயில்லை. எனினும் ஊரடங்கை நீட்டித்துக்கொண்டே போக முடியாது. அதற்கு முற்றுப்புள்ளி வைக்க மக்கள் ஒத்துழைக்க வேண்டும். முழு ஊரடங்கு காரணமாக பொதுமக்களுக்கு ஏற்படக்கூடிய பாதிப்புகளை உணர்ந்து பல்வேறு ஏற்பாடுகளை தமிழக அரசு செய்துள்ளது. கொரோனா தடுப்பு விதிகளை கடைப்பிடித்து மக்கள் ஒத்துழைத்தால் ஊரடங்கிற்கு விரைவில் முற்றுப்புள்ளி வைக்கலாம். முழு ஊரடங்கு காரணமாக தமிழகத்தில் கொரோனா தொற்று குறைந்துள்ளது. சென்னை உள்ளிட்ட முக்கிய நகரங்களில் கொரோனா பாதிப்பு படிப்படியாக குறைந்து வருகிறது. சென்னையில் 7 ஆயிரத்தை எட்டிய பாதிப்பு தற்போது 2 ஆயிரமாக குறைந்துள்ளது. இன்னும் சில தினங்களில் இது முழுமையாக குறைந்துவிடும்.  முழு ஊரடங்கு காரணமாக பொதுமக்களில் குறிப்பிட்ட பிரிவினருடைய வாழ்வாதாரம் பாதிக்கப்பட்டிருப்பது உண்மைதான். அதனால்தான் கொரோனா நிவாரண நிதியாக முதல்கட்டமாக நிவாரண நிதியாக ரூ.2,000 வழங்கியுள்ளோம். கூடிய விரைவில் இரண்டாவது தவணையாக ரூ.2,000 நிவாரணத் தொகை வழங்கப்படும். கொரோனா தொற்றால் பாதிக்கப்பட்டவர்களை காக்க ஏராளமான உட்கட்டமைப்பு வசதிகளை கடந்த 3 வாரக்காலத்தில் தமிழக அரசு செய்து கொடுத்துள்ளது. இதன் காரணமாக படுக்கைகள், ஆக்சிஜன் தட்டுப்பாடு என்கிற சூழல் இப்போது இல்லை. கொரோனாவை வென்று விரைவில் வளம் மிகுந்த தமிழ்நாட்டை அமைப்போம்'' இவ்வாறு முதல்வர் மு.க.ஸ்டாலின் பேசியுள்ளார். 
http://dlvr.it/S0qm51

Read More

ஆந்திரா: `மதுக்கொள்கையில் மாற்றம்’ - பூரண மதுவிலக்கிலிருந்து பின்வாங்கிய ஜெகன்மோகன் ரெட்டி

ஆந்திராவில் ஜெகன்மோகன் ரெட்டி தலைமையிலான ஒய்.எஸ்.ஆர் காங்கிரஸ் ஆட்சி நடைபெற்று வருகிறது. 2019 சட்டப்பேரவைத் தேர்தலில் அமோக வெற்றிபெற்று ஆட்சியை பிடித்த ஜெகன்மோகன் ரெட்டி முதல்வராக பதவியேற்று நேற்றுடன் 2 வருடங்களை நிறைவு செய்திருக்கிறார். நேற்றைய தினம் இரண்டாண்டுகள் நிறைவடைந்ததை முன்னிட்டு ஜெகன்மோகன் ரெட்டி தான் தேர்தல் நேரத்தில் மக்களுக்குக் கொடுத்த வாக்குறுதிகளில் 94.5 சதவிகிதத்தை ஆட்சிக்கு வந்து 2 ஆண்டுகளில் நிறைவேற்றி இருப்பதாக மிகப்பெரிய பட்டியலை வெளியிட்டு பெருமிதம் அடைந்தார். ஜெகன்மோகன் ரெட்டி ஆட்சிக்கு வந்த 2 ஆண்டுகளில் பல்வேறு மக்கள் நலத் திட்டங்களை அறிமுகம் செய்து ஏழை எளிய மக்களின் வாழ்க்கைத் தரத்தை மேம்படுத்தி இருக்கிறார் என்று அனைவரும் மனம் நெகிழ்ந்து போயிருந்த வேளையில், நேற்றைய தினம் ஜெகன்மோகன் ரெட்டி வெளியிட்ட திடீர் அறிவிப்பு ஒன்று சமூக செயற்பாட்டாளர்கள் அனைவரையும் அதிருப்தியில் ஆழ்த்தியிருக்கிறது. ஜெகன்மோகன் ரெட்டி 2019-ம் ஆண்டு ஆந்திர சட்டசபைத் தேர்தலின் போது ஒய்.எஸ்.ஆர் காங்கிரஸ் கட்சி வெளியிட்டிருந்த தேர்தல் அறிக்கையில் பல்வேறு சிறப்பு அம்சங்கள் இருந்த போதிலும், அனைவரையும் உற்று நோக்க வைத்தது 'மதுவிலக்கு' அறிவிப்பு தான். தேர்தல் அறிக்கையின் நவரத்ன அம்சங்களில் மதுவிலக்கும் ஒன்றாக இருந்தது. ஆந்திரத்தில் பூரண மதுவிலக்கு விரைவில் அமல்படுத்தப்படும் என்று ஆட்சிக்கு வந்ததிலிருந்து உறுதியாகக் கூறி வந்த ஒய்.எஸ்.ஆர் காங்கிரஸ் அரசு தற்போது தனது முடிவை மாற்றியிருக்கிறது. 2019-ல் ஆட்சி அமைத்த நேரத்தில் கூடிய விரைவில் மாநிலத்தில் நடைமுறையில் இருக்கும் மதுக்கொள்கையில் மாற்றம் கொண்டுவரப்பட்டு மதுவிலக்கு அமலுக்கு வரும் என்றும், அடுத்த 5 ஆண்டுகளுக்கு மதுவிலக்கு நிச்சயம் நீடிக்கும் என்றும் ஆளும் ஒய்.எஸ்.ஆர் அரசாங்கம் திடமாகத் தெரிவித்தது. அதற்கான செயல்திட்டத்தைத் தயாரிக்கும் பணியினை ஜனசைத்தன்ய வேதிகா என்ற தொண்டு நிறுவனத்திடம் அப்போது முதல்வர் ஜெகன்மோகன் ரெட்டி ஒப்படைத்திருந்தார். அவர்களும் கூடிய விரைவில் நடைமுறைப்படுத்தி விடுவோம் என்று நம்பிக்கையூட்டினார்கள்.மது விற்பனை ஆட்சிக்கு வருவதற்கு முன்பு வரையிலும், மதுக்கடைகளுக்கு எதிராகப் போராட்டங்களை முன்னெடுத்து நடத்திய ஜெகன்மோகன் ரெட்டி, முதல்வராகப் பொறுப்பேற்ற சில நாள்களிலேயே தனியார் நடத்தி வந்த மது விற்பனையை அரசின் கட்டுப்பாட்டுக்குக் கொண்டு வந்தார். தமிழகத்தில் 'டாஸ்மாக்' என்ற பெயரில் மது விற்பனை நடைபெறுவதைப் போல் ஆந்திராவில் 'ஆந்திரப்பிரதேச டிரிங்க்ஸ் கார்ப்பரேஷன் லிமிடெட்' என்பதன் மூலமாக மதுவிற்பனை நடைபெறுவதற்கு வழிவகுத்தார். ஆட்சிக்கு வந்து ஓராண்டுக் காலத்தில் பூரண மதுவிலக்கு அமல்படுத்தப்படும் என்ற ஒய்.எஸ்.ஆர் காங்கிரஸின் அறிவிப்பு காற்றில் எழுதப்பட்ட வாக்கியமானது. Also Read: ஆந்திரா: `2 வருடத்தில் 94.5% வாக்குறுதிகளை நிறைவேற்றி விட்டேன்!' - ஜெகன்மோகன் ரெட்டி மேலும், மதுவிலக்கு தொடர்பாக எதிர்க்கட்சிகள் அழுத்தம் கொடுத்ததன் காரணமாக மாநில அரசு ஆந்திராவில் மதுக்கடைகள் திறக்கும் நேரத்தையும், கடைகளின் எண்ணிக்கையை 4,380-லிருந்து 2,934 ஆகக் குறைத்து நடவடிக்கை மேற்கொண்டது. ஆனால், இன்று வரையிலும் ஆந்திராவில் மதுவிலக்கு அமல்படுத்தப் படவில்லை என்று வேதனை தெரிவிக்கின்றனர் சமூக செயற்பாட்டாளர்கள். நேற்று நிறைவேற்றப்பட்ட வாக்குறுதிகள் குறித்து அறிக்கை வெளியிட்ட கையோடு ஆந்திராவில் மதுவிலக்கு அமலுக்கு வரப்போவதில்லை என்ற அறிவிப்பினையும் ஜெகன்மோகன் ரெட்டி வெளியிட்டிருக்கிறார். 16 பக்க கையேடு ஒன்றினை வெளியிட்டுள்ள முதல்வர் ஜெகன்மோகன் மதுக்கொள்கையில் மாநில அரசு மாற்றத்தைக் கொண்டு வந்திருப்பதாகவும் அறிவித்திருக்கிறார். மதுக்கொள்கை மாற்றம் குறித்து அவர் கூறுகையில், "ஆந்திர மாநில மதுக்கொள்கையில் மாற்றம் கொண்டுவரப்பட்டுள்ளது. அந்த மாற்றங்களின் படி அரசு 'பூரண மதுவிலக்கு' என்பதிலிருந்து 'கட்டுப்பாடுகளுடன் விற்பனை' என்ற முடிவிற்கு அரசு வந்திருக்கிறது. மது என்னும் அரக்கனிடம் இருந்து குடும்பங்களைக் காப்பாற்றக் குறிப்பிட்ட கால அளவில் மிக அதிக கட்டுப்பாடுகள் கொண்டுவரப்படும்" என்றார்.மது விலக்கு இத்தனை ஆண்டுகாலமாகப் பூரண மதுவிலக்கு என்ற நிலைப்பாட்டில் உறுதியாக இருந்து வந்த மாநில அரசு, வருவாய் காரணமாகவே தன்னுடைய முடிவினை மாற்றி இருப்பதாகவும், கடந்த நிதியாண்டில் மட்டும் ஆந்திர அரசுக்கு மதுவிற்பனையின் மூலம் 17,600 கோடி ரூபாய் வருமானம் கிடைத்துள்ளதாகவும், இரண்டு ஆண்டுகளில் மாநிலத்தில் மதுபானங்களின் விலை 125 சதவிகிதம் வரை அரசு உயர்த்தி இருப்பதாகவும் அரசு அதிகாரிகள் தெரிவிக்கின்றனர். குஜராத், பீகார், திரிபுரா, நாகாலாந்து, மிஸோரம் வரிசையில் பூரண மதுவிலக்கு அமலுக்கு வரும் என்று எதிர்பார்த்துக் கிடந்த ஆந்திரப் பிரதேசத்துக்கு மதுவிலக்கிலிருந்து விலக்கு அளித்திருக்கிறது அம்மாநில அரசு.
http://dlvr.it/S0pxTW

Read More