இந்தியாவில் 'டிஜிட்டல் ஏற்றத்தாழ்வு' விளைவால் தடம் புரளும் 'கோவின்' செயலி!

இந்தியாவில் 'டிஜிட்டல் ஏற்றத்தாழ்வு' நிலவிவருவதன் காரணமாக, 'கோவின்' செயலியின் செயல்பாடுகள் அனைத்தும் தடம்புரள வாய்ப்பிருக்கிறது. இதன் பின்னணியை, இங்கே தெரிந்துக்கொள்வோம். செல்போன் இல்லாமல் செயல்படக்கூடிய 'செயலி' (APP) ஏதேனும் உருவாக்கப்பட்டுள்ளதா? அதாவது, செல்போன் இல்லாமலேயே செயலியை அணுகும் வசதி சாத்தியமா? இதையே வேறு விதமாக கேட்பது என்றால், செல்போன் வைத்திருக்காதவர்கள் செயலியை அணுகச்செய்வது எப்படி? கொரோனா சூழலை மனதில் கொண்டு யோசித்தால், இந்தக் கேள்விகளுக்கான தேவையைப் புரிந்துகொள்ளலாம். கொரோனா தடுப்பூசி போட்டுக்கொள்ள பதிவு செய்வதற்கான 'கோவின்' செயலியையே எடுத்துக்கொள்வோம். இணைய வசதி கொண்ட செல்போன் வைத்திருப்பவர்கள் இந்த செயலி வழியே தடுப்பூசி போட்டுக்கொள்ள பதிவு செய்து கொள்ளலாம். (இவர்களே திண்டாடுவது வேறு விஷயம்). ஆனால், செல்போன் வசதி இல்லாத ஏழை மக்கள், விளிம்பு நிலையில் இருப்பவர்கள், தொழில்நுட்ப வசதி இன்னமும் எட்டிப்பார்க்காத பகுதிகளில் வசிப்பவர்கள் எல்லாம் 'கோவின்' செயலியை எப்படி அணுகுவார்கள்? கொரோனாவுக்கு எதிரான ஒரே பாதுகாப்பு தடுப்பூசி எனும் நிலையில், தகுதி உடைய அனைவரும் எவ்வளவு விரைவாக முடியுமோ அவ்வளவு விரைவாக தடுப்பூசி போட்டுக்கொள்ள வேண்டும் எனும்போது, தடுப்பூசி பற்றிய தகவல்களும், அதற்கு பதிவு செய்து கொள்ளும் வசதியும் எல்லோருக்கும் கிடைக்க வேண்டும் அல்லவா? ஆனால், செல்பேசி வசதி இல்லாதவர்கள், தடுப்பூசி பதிவுக்கான 'கோவின்' செயலியை எப்படி அணுக முடியும்? இந்த இடத்தில்தான், 'கோவின்' செயலியை கேள்விக்குள்ளாக்க வேண்டியிருக்கிறது. ஏனெனில், அனைவருக்கும் தடுப்பூசி எனும் இலக்கை அடைவது 'கோவின்' போன்ற செயலிகள் மூலம் சாத்தியம் இல்லை. இதில் விடுப்பட்டு நிற்பவர்கள் கணிசமாக இருப்பார்கள். இந்தப் பிரசனையைதான், இணைய உலகில் டிஜிட்டல் இடைவெளி அல்லது டிஜிட்டல் பாகுபாடு என்கின்றனர். அதாவது, டிஜிட்டல் வசதிகளை அணுக வாய்ப்புள்ளவர்களுக்கும், அத்தகைய வாய்ப்புள்ளாதவர்களுக்கமான நவீன ஏற்றத்தாழ்வு, கண்ணுக்குத்தெரியாத பெரும் பள்ளமாக அச்சுறுத்திக்கொண்டிருக்கிறது. இந்த டிஜிட்டல் இடைவெளியை கடந்து செயல்படக்கூடிய ஆற்றல் கொண்டதாக கோவின் செயலி இல்லாதபோது, அதன் பலன் யாருக்கானது எனும் கேள்வியை நாம் கேட்கத்தானே வேண்டும். பெரும்பாலும் நகர்புற மக்கள், இணைய வசதியை அணுக கூடியவர்களை மனதில் கொண்டு உருவாக்கப்பட்ட அந்த செயலி அனைவருக்கமானது அல்ல என்பதையும் ஒப்புக்கொள்ள வேண்டும். அதற்காக, கோவின் போன்ற செயலிகளே வீண் என்று புரிந்து கொள்ளக்கூடாது. நிச்சயம், இதுபோன்ற செயலிகள் அவசியமானவை. தகவல்களை அளிக்கவும், சேவைகளை பதிவு செய்யவும் செயலிகள் தேவைதான். ஆனால், இந்தியா போன்ற டிஜிட்டல் ஏற்றத்தாழ்வு நிதர்சனமாக உள்ள நாட்டில், கோவின் போன்ற செயலிகளை உருவாக்குவதோடு அரசு தன் கடமை முடிந்துவிட்டதாக நினைத்து விடுவதுதான் பிரச்சனை. இதையே வேறு வார்த்தைகளில் கூறுவதானால், அனைவருக்கும் தடுப்பூசி அளிப்பதில் உள்ள நடைமுறை சிக்கல்களை கண்டறிந்து செயல்படுவதற்கு பதிலாக, செயலியை உருவாக்கி விட்டோம், தடுப்பூசி போட்டு வருகிறோம் என சொல்வது, பெருந்தொற்று காலத்தில் பெருந்தவறாகும். இந்த இடத்தில் கூடுதலாக இன்னும் சில விஷயங்களையும் பொருத்திப்பார்க்க வேண்டும். தடுப்பூசி பற்றாக்குறையால், கோவின் செயலியில் தடுப்பூசிக்கு பதிவு செய்துகொள்வது நகர்புறத்தில் வசிப்பவர்களுக்கே சவாலாக இருப்பதால், தடுப்பூசி கிடைக்கும்போது தகவல் அளிப்பதற்காக என்றே, கோவின் செயலி சார்ந்த பல்வேறு துணை சேவைகள் உருவாக்கப்பட்டுள்ளன. கோவின் செயலியில் பதிவுசெய்து கொண்ட பிறகு, இந்த சேவைகளிலும் பதிவுசெய்து கொண்டால், தடுப்பூசி எப்போது கிடைக்கத் துவங்குகிறதோ அப்போது, இந்த சேவைகள் தகவல் அளிக்கும். அதுவரை, பயனாளிகள் சார்பில் கோவின் செயலியை இந்த சேவைகள் கண்காணித்துக்கொண்டே இருக்கும். இது பெரிய விஷயம் அல்ல, ஏனெனில், இதற்காக எழுதப்பட்ட புரோகிராம் இந்த வேலையை கச்சிதமாக நிறைவேற்றி விடும். தடுப்பூசி திட்டம் செயல்படுத்தப்படுவதில் தாமதமாகும்போது, பயனர்கள் சார்பில் காத்திருந்து தகவல் தெரிவிக்கும் புரோகிராம்களும், சேவைகளும் மிகவும் தேவையானவைதான். ஆக, நாம் உருவாக்கும் துணை சேவைகளும் நகர்புறத்து மக்கள் சார்ந்ததாகவே அமைகின்றன. தடுப்பூசி பற்றி தகவல் கூட தெரிந்து கொள்ள முடியாத ஏழை, எளிய மக்கள் எந்த செயலியில் பதிவு செய்து கொண்டு வரிசையில் வந்து காத்திருப்பார்கள்? இந்த கேள்வி உலுக்கி எடுத்தபோதுதான், செல்போன் இல்லாமலே அணுக கூடிய செயலியை உருவாக்க முடியுமா எனும் கேள்வி எழுந்தது. இணைய யுகத்தில், தகவல்களை அளிக்கவும், சேவைகள் வழங்கவும் செயலிகள் முக்கியமானவை. அந்த வகையில் அரசு தரப்பில் உருவாக்கப்படும் ஆரோக்கிய சேது, கோவின் போன்ற செயலிகளை வரவேற்கவே செய்யலாம். ஆனால், இந்த செயலிகளை அணுக வாய்ப்பில்லாதவர்களுக்கு சேவை அளிப்பது எங்ஙனம்? என நாம் யோசிக்க வேண்டும். இதற்கான பதிலாக தான், செல்போன் இல்லாத செயலி அமைகிறது. அதாவது, ஒரு பயனுள்ள செயலி சாதனம் இல்லாமலும் அணுக கூடியதாக இருக்க வேண்டும். கோவின் செயலியையே எடுத்துக்கொள்ளுங்கள், செல்போன் வைத்திராத ஏழைகளும் அதை அணுக முடிந்தால் எப்படி இருக்கும்? இத்தகைய அற்புதத்தை சாத்தியமாக்கும் தொழில்நுட்பம் இன்னமும் கைகூடவில்லை என்றாலும், முற்றிலும் சாத்தியமில்லை என கூறுவதற்கில்லை. எந்த திரையையும் தொடுதிரையாக மாற்றக்கூடிய தொழில்நுட்பம் மூலம், கிராமவாசிகளின் உள்ளங்கையை கூட ஒரு செயலியை செயல்பட வைக்கலாம். இதைவிட நடைமுறைச்சார்ந்த வழி என்பது, சுகாதார ஊழியர்கள் அல்லது தன்னார்வலர்கள் கோவின் செயலி நிறுவப்பட்ட சாதனங்களோடு கிராமங்களுக்குச்சென்று தடுப்பூசிக்கு பதிவு செய்து கொள்வதாகும். மைக்ரோ ஏடிஎம்களை வைத்துக்கொண்டு குக்கிராமத்தில் உள்ளவர்களுக்கும் பண பரிவர்த்தனை செய்வதை இதற்கான முன்னுதாரணமாக கொள்ளலாம். அல்லது இ-சேவை மையங்கள் போன்ற மையங்களை கிராமங்களில் அமைத்து, ஒரு பொது செல்போனில் கிராம மக்கள் தடுப்பூசிக்கு பதிவு செய்துகொள்ள வைக்கலாம். விஷயம் என்னவென்றால், தடுப்பூசி பதிவு வசதியை நாம் தான் மக்களிடம் கொண்டு செல்ல வேண்டும். தொழில்நுட்பம் பயனுள்ளதாக இருக்க வேண்டும் எனில், அது, அனைவருக்குமானதாக இருக்க வேண்டும். அப்போதுதான், டிஜிட்டல் இடைவெளியால் செயலிகளும், சேவைகளும் எல்லா மக்களுக்கும் கிடைக்காமல் போகும் அவலத்தை மாற்ற முடியும்! இது ஒரு முன்னோடி... தொழில்நுட்பத்தை அனைவருக்கும் கொண்டு செல்வதற்கான மெனக்கெடல் தொடர்பாக ஒரு பழைய உதாரணத்தை இங்கே இணைத்துப்பார்ப்பது பொருத்தமாக இருக்கும். புத்தாயிரமாண்டின் துவக்கத்தில், டி.இ.கே எனும் பெயரில் ஒரு புதுமையான பிரவுசர் அறிமுகமானது. இமெயில் பிரவுசர் என அழைக்கப்பட்ட இந்த சேவையை இமெயில் தேடியந்திரம் என்றும் சொல்லலாம். இந்த டி.இ.கே பிரவுசர் என்ன செய்தது என்றால், இணைய வசதி இல்லாத ஏழை மக்கள் இணையத்தில் தேடி தகவல் பெறும் வசதியை இமெயில் வாயிலாக வழங்கியது. இணைய வசதியை அணுக முடியாதவர்கள், இணையத்தில் தேட விரும்பும் தகவலை கேள்வியாக இந்த பிரவுசர் மூலம் சமர்பிக்கலாம். இதற்கேற்ப இமெயில் வடிவத்தில் இந்த பிரவுசர் அமைந்திருக்கும். இந்த கோரிக்கையை பெறும் சர்வர் அமெரிக்காவின் எம்.ஐ.டி பல்கலையில் அமைக்கப்பட்டிருந்தது. அங்குள்ளவர்கள், இந்த கோரிக்கைக்கான பதிலை தேடியந்திரங்களில் தேடி, பொருத்தமான பதிலை தேர்வு செய்து, அவற்றை இமெயில் வடிவில் அனுப்பி வைப்பார்கள். மறுமுனையில் இருப்பவரின் தேடலுக்கான விடையாக இந்த மெயில் அமையும். ஆக, இணைய வசதி இல்லாதவர்கள் இணைய தேடலை பயன்படுத்திக்கொள்வதற்கான வாய்ப்பாக இந்த இ-மெயில் பிரவுசர் தேடியந்திரம் உருவாக்கப்பட்டது.- http://tek.sourceforge.net/index.shtml ஆரம்ப காலத்தில் பல்வேறு ஆப்பிரிக்க நாடுகளில் ஏழை மாணவர்களுக்கு கைகொடுக்கவும் செய்தது. பின்னர், இணைய இணைப்பு பரவலான ஆண்டுகளில், இந்த இமெயில் தேடல் சேவை கைவிடப்பட்டது. இப்போது திரும்பி பார்க்கும் போது இந்த சேவை சாதாரணமானதாக தோன்றலாம். ஆனால், இணைய வசதியின் பயன்பாடு அனைவருக்கும் கிடைக்க வேண்டும் எனும் நோக்கில் உருவாக்கப்பட்ட சேவை இது என்பதை மறந்துவிடக்கூடாது. இந்த காலத்திலும் சரி இனி வருங்காலத்திலும் சரி இதே போன்ற புதுமையான சேவைகள் தேவை. ஏனெனில், தொழில்நுட்பம் என்பது எப்போதும், எல்லோருக்குமானதாக இருக்க வேண்டும். - சைபர்சிம்மன்
http://dlvr.it/S1G40J

Read More

”தி பேமிலி மேன் 2 தொடரை நிறுத்துங்கள் இல்லையேல்..” - இயக்குநர் பாரதிராஜா கண்டனம்

‘தி பேமிலி மேன் 2’ தொடர் ஒளிப்பரப்பை அமேசான் நிறுவனம் தாமாக முன்வந்து நிறுத்த வேண்டும் எனக் கூறி இயக்குநர் பாரதிராஜா அறிக்கை ஒன்றை வெளியிட்டுள்ளார். இது குறித்து அவர் வெளியிட்டு இருக்கும் அறிக்கையில், “ எங்கள் இனத்திற்கு எதிரான ‘தி பேமிலி மேன் 2’ இணையத் தொடரை நிறுத்த தமிழர்களும் தமிழ்நாட்டு அமைச்சர் உள்ளிட்ட அனைவரும் கோரிக்கை வைத்த பிறகும் கூட இந்திய ஒன்றிய அரசு அத்தொடரை நிறுத்த உத்தரவு பிறப்பிக்காமல் மெளனம் காப்பது எங்களுக்கு மிகுந்த மனவேதனை அளிக்கிறது. தமிழீழப் போராளிகளின் விடுதலை போராட்டக்களத்தையும், அவர்களின் வரலாற்றையும் அறியாத தகுதியற்ற நபர்களால், தமிழின விரோதிகளால் இத்தொடர் எடுக்கப்பட்டிருக்கிறது என்பதை தொடரின் காட்சிகள் உணர்த்துகின்றன. அறமும் வீரமும் தன்னலமற்ற ஈகமும் செறிந்த போராட்ட வரலாற்றை கொச்சைப்படுத்தும் நோக்கத்தோடும் தமிழினத்தின் மீது மிகுந்த வன்மத்தோடும் தொடரை உருவாக்கியிருப்பதை வன்மையாக கண்டிக்கிறேன். இத்தொடரை உடனே நிறுத்த மத்திய தகவல் ஒலிபரப்பு அமைச்சர்  திரு.பிரகாஷ் ஜவடேகர் உத்தரவிடவேண்டும். இத்தொடரில் தமிழ், முஸ்லீம்,வங்காளி என குறிப்பிட்ட இனமக்களுக்கு எதிரான மன நிலையோடு தொடர்ச்சியாக எடுக்கப்படுவதை அனைவரும் அறிவீர்கள். தி பேமிலி மேன் 2 தொடரை ஒளிபரப்பும் அமேசான் நிறுவனம் தாமாக முன்வந்து உடனடியாக ஒளிபரப்பை நிறுத்த வேண்டும். எங்கள் வேண்டுகோளை புறக்கணித்து தொடர்ந்து OTT தளத்தில் வெளிவந்தால் அமேசான் நிறுவனத்தின் அனைத்து விதமான வர்த்தகத்தையும் புறக்கணிக்கும் போராட்டத்தில் உலகெங்கிலும் பரந்து வாழும் தமிழர்கள் பங்கெடுப்பதை தவிர்க்கவோ தடுக்கவோ இயலாது என்பதை கோடிட்டுக்காட்ட விரும்புகிறேன்.” என்று குறிப்பிட்டுள்ளார். முன்னதாக,  ‘தி பேமிலி மேன்’ தொடர் வெளியாகி வரவேற்பை பெற்ற நிலையில், தொடர்ந்து அதன் 2 பாகமும் அண்மையில் வெளியானது இதில் பாலிவுட் நடிகர் மனோஜ் பாஜ்பாய், சமந்தா, பிரியாமணி உள்ளிட்ட பல நட்சத்திரங்கள் நடித்துள்ளனர். இந்த நிலையில் இந்தத்தொடரில் இலங்கை தமிழ் போராளிக்குழுக்களை தவறாக சித்தரித்துள்ளதாக சர்ச்சை எழுந்த நிலையில், இந்தத்தொடரை தடை செய்ய வேண்டும் என பல பிரபலங்கள் சமூகவலைதளங்கள் வாயிலாக கூறி வருகின்றனர். 
http://dlvr.it/S1DLJX

Read More

`தமிழகம் - தமிழ்நாடு - இந்திய ஒன்றியம்..' - வி.சி.க. எம்.பி. ரவிக்குமார் சொல்வதென்ன?

ஸ்டாலின் தலைமையிலான தமிழ்நாடு அரசு பொறுப்பேற்று ஒரு மாத காலம் நிறைவேற போகும் சூழலில், கொரோனா பரவல் காரணமாக அவர் கடுமையான நெருக்கடிகளையும் சவால்களையும் எதிர்கொள்ள வேண்டி இருக்கிறது. புதிய அரசுக்கு தற்போது கண்முன் இருக்கும் சாவால்களின் ஆழம் குறித்தும், மக்களின் மனநிலையை வாழ்க்கை நிலையை புரிந்து ஆட்சி நடக்கிறதா என விடுதலை சிறுத்தைகள் கட்சி எம்.பி ரவிகுமாரிடம் கேட்டு அறிந்தோம்... ``இந்திய ஒன்றியம், தமிழகம் - தமிழ்நாடு இந்த சொல்லாடல்களை எப்படி பார்க்கிறீர்கள்?” ``இந்திய அரசியல் அமைப்புச் சட்டத்தில் 'இந்திய ஒன்றியம்' என்றுதான் இருக்கிறது. இதன் மூலம் இந்தியாவில் நடைபெறுவது கூட்டரசு என சட்டம் உறுதிப்படுத்துகிறது. மத்திய அரசு தான் மையம் என நாம் புரிந்து வைத்துள்ளதால் மத்தியில் இருப்பவர்கள் அதிகாரத்தை குவித்து கொண்டாலும், நம் அதிகாரத்தை நம்மிடமிருந்து எடுத்துக்கொண்டாலும், அது பற்றி பெரிதாக எதிர்ப்பு வராமல் போகிறது. இந்தியா மாநிலங்களின் கூட்டரசு என்கிற எண்ணம் தொடர்ந்து நம் மனதில் இருக்கவேண்டும். அப்போதுதான் நம் மாநில உரிமைகள் பறிக்கப்படும்போது, நாம் எதிர்த்து குரல்கொடுக்க முடியும். அதற்கான மொழியையும் உருவாக்கிக்கொள்ள வேண்டிய அவசியம் உள்ளது. அதனால் ஒன்றியம் என்பதே சரி! மேலும் தமிழகம் என்பதை விட தமிழ்நாடு என்று சொல்வதை வரவேற்கிறேன்.”நாடாளுமன்றம் ``கேரளாவின் அறநிலையத்துறை அமைச்சராக ராதாகிருஷ்ணனை தேர்ந்தெடுத்து உள்ளார்கள்.. அதிகார ரீதியாக தமிழகத்தில் எம்மாதிரியான மாற்றங்கள் வர வேண்டும்?" ``காமராஜர் ஆட்சி காலத்திலேயே பரமேஸ்வரனை அறநிலையத்துறை அமைச்சராக நியமித்தனர். மீன்பிடி சமூகத்தைச் சேர்ந்தவர் மீன்வள துறையில் நியமிப்பதும்..., சிறுபான்மை சமூகத்தை சேர்ந்தவரை சிறுபான்மையினர் நலத்துறையில் நியமிப்பதும் சரியான செயல்முறை அல்ல. திறமை உடைய ஒவ்வொருவருக்கும் திறமைக்கு ஏற்ற பதவி வழங்க வேண்டும். அந்த விதத்தில் கேரளா மட்டுமின்றி பல மாநிலங்கள் சிறப்பாக செயல்படுகின்றன. தமிழ்நாட்டில் 50 ஆண்டுகளுக்கு முன்னதாகவே திறமைக்கு ஏற்ற பதவிகள் வழங்கப்பட்டது குறிப்பிடத்தக்கது."கொரோனா ``தமிழ்நாடு அரசு கொரோனாவை வெல்ல உடனடியாக செய்ய வேண்டியது என்னென்ன?" ``புதிய அரசு மேற்கொண்டு வரும் நடவடிக்கைகள் பாராட்டுக்குரியது. குறிப்பாக ஆக்ஸிஜன் தேவையைவிட மூன்று மடங்கு அதிக கையிருப்பு வைத்துள்ளனர். கொரோனா பரவலைக் கட்டுக்குள் வைத்துள்ளனர். மேலும் பொருளாதார ரீதியாக மக்கள் பாதிக்கப்படாமல் இருக்க நிவாரண நிதியுடன் ஊரடங்கை அமல்படுத்தியுள்ளனர். நமது மருத்துவ கட்டமைப்பு வசதியை பெரிய அளவு உயர்த்தி உள்ளனர். ஆக, கொரோனா தடுப்பு நடவடிக்கையில் தமிழ்நாடு பெரிய சாதனையை செய்துவருகிறது. வைரஸ் பரவலை நிரந்தரமாக கட்டுப்படுத்த மக்கள் அனைவருக்கும் தடுப்பூசி போட வேண்டியது அவசியம். தடுப்பூசி எடுத்துக்கொள்ளும் வரை முகக்கவசம் சமூக இடைவெளியும் தான் மக்களுக்கு தடுப்பூசி என மருத்துவர்கள் கூறுகின்றனர். மீண்டும் தளர்வுகள் அறிவிக்கும் பொது மக்கள் அதிக கூட்டமாகக் கூடுவதைத் தவிர்க்கவேண்டும். கிராமங்களில் சுகாதார கட்டமைப்பு வசதிகளை மேம்படுத்த வேண்டும். மாஸ்க் நம் வாழ்வில் ஒரு அங்கமாக மாறிய நிலையில், அதற்காக மாதம் தோறும் கணிசமான தொகையை செலவிடும் நிலை உள்ளதால் அரசு மகளிர் சுய உதவி குழு மூலம் மாஸ்க் தயாரித்து வழங்கலாம். இதனால் மகளிர் சுய உதவி குழுக்களும் பயன் பெரும், இதனை நிரந்தர திட்டமாக கொண்டுவரலாம்.” ``ஏழாம் தேதிக்கு பின்னும் ஊரடங்கு நீட்டிப்பு குறித்து?!” நோய்த்தொற்றின் எண்ணிக்கை குறையத் தொடங்கி உள்ளது. ஆனால் நாம் இயல்பு நிலைக்கு வர பல நாட்கள் ஆகலாம். அதுவரை தளர்வுகளுடன் கூடிய ஊரடங்கு நீடித்தாலும் விழிப்புணர்வுடன் இருக்க வேண்டும்.ஊரடங்கு - மூடப்பட்ட கன்னியாகுமரி சுற்றுலாத்தலங்கள் ``எழுவர் விடுதலை குறித்து தமிழக அரசு ஜனாதிபதிக்கு கடிதம் எழுதி உள்ளது. ஆனால், பல தரப்பினர் "முதல்வர் கையில் விடுதலை செய்யும் பொறுப்பு இருக்க... ஜனாதிபதியை வேண்டுவது ஏன்" என எதிர்க்குரல் எழுப்பி வருகிறார்களே?” ``தமிழக ஆளுநர் எழுவர் விடுதலை குறித்த கடிதத்தை குடியரசுத் தலைவருக்கு அனுப்பியுள்ளார். அது தற்போது கிடப்பில் உள்ளது. இந்நிலையில் முதல்வர், குடியரசு தலைவர் விரைந்து நடவடிக்கை எடுக்குமாறு கடிதம் அனுப்பியுள்ளார். தண்டனை குறைப்பு அதிகாரம் என்பது மாநில அரசுக்கு வழங்கப்பட்டுள்ளது. தண்டனை குறிப்பு அதிகாரம் என்பது அரசியலமைப்புச் சட்டத்தில் art 161ல் மாநில அரசுக்கு வழங்கப்பட்டுள்ளது. ஆர்டிகல் 72ல் குடியரசுத் தலைவருக்கு என்ன அதிகாரம் உள்ளதோ, அதே அதிகாரம் ஆர்டிகள் 161ல் ஆளுநருக்கு கொடுக்கப்பட்டுள்ளது. ஆளுநருக்கு முழு அதிகாரம் இருக்கும்போது குடியரசுத் தலைவருக்கு அனுப்பி வைத்தது தவறு. அவர் செய்த தவறை நியாயப்படுத்த முடியாது. ” ``இலங்கையில் சீனாவுக்கு கொடுக்கப்பட்டுள்ள துறைமுக நகரத்துக்கான அனுமதி மற்றும் இந்திய மத்திய அரசு மௌனம் குறித்த உங்கள் கருத்து?” ``இதனால் சீனாவின் ஆதிக்கம் இங்கு அதிகமாக உள்ளது என உணர முடிகிறது. வங்காள விரிகுடா மற்றும் இந்திய பெருங்கடல் பகுதி யுத்த மற்றும் வணீக ரீதியாக முக்கியத்துவம் வாய்ந்தது. சீனா, வளைகுடா பகுதி வாயிலாக தான் எரிபொருட்களை கொண்டு செல்கிறது. இந்நிலையில் தனது கடல் பாதையில் சிக்கல் வராமல் இருக்க சீனா இலங்கையைப் பயன்படுத்திக்கொண்டு தன் இருப்பை நிலைநாட்டும் முயற்சியில் ஈடுபட்டுள்ளது. துறைமுக நகரத்தில் தன் இருப்பை நிலைநாட்டுவதனை வணிக ரீதியாக மட்டும் இன்றி இராணுவ ரீதியாகவும் சீனா பயன்படுத்திக்கொள்ள கூடும். தொடர்ச்சியாக சீனாவின் அணு நீர்மூழ்கி கப்பல்கள் இந்திய பெருங்கடல் பகுதியில் தென்படவும் பின்னர் செய்தி வெளியானதும் மறைவதுமாக இருந்து வருகிறது. இவை அனைத்தும் இந்தியாவின் பாதுகாப்பிற்கான அச்சுறுத்தலாக பார்க்கப்படுகிறது.”
http://dlvr.it/S1CrQS

Read More

கொரோனா கால மகத்துவர்: வீடற்ற ஆதரவற்றோருக்கு உணவு வழங்கும் 'உதவிடத்தான் பிறந்தோம்' குழு

ஊரடங்கு காரணமாக சென்னை, கோவை, திண்டுக்கல், செங்கல்பட்டு, மதுரை, கடலூர், திருவாரூர், சேலம், விருதுநகர், புதுக்கோட்டை உள்ளிட்ட மாவட்டங்களில் உள்ள பேருந்து நிலையம் மற்றும் வீதியோரம் வசிக்கும் வீடற்ற ஆதரவற்றோருக்கு 'உதவிடத்தான் பிறந்தோம்' குழு சார்பில்  தினமும் உணவு வழங்கப்பட்டு வருகிறது. இது மட்டுமின்றி கொரோனா தொற்றால் பாதிக்கப்பட்ட கணவரை இழந்த பெண்கள், பழங்குடியினர், நரிக்குறவர்கள் மற்றும் ஏழை எளிய மக்களுக்கு காய்கறிகள், மளிகை பொருட்கள், மருந்தும் வழங்கி வருகிறது இந்தக் குழு.  இந்த அமைப்பை நிர்வகித்து வருபவர்களில் ஒருவரான விஜய் கூறும்போது, "நாங்களை சென்னை - பெருங்களத்தூரை தலைமையிடமாகக் கொண்டு செயல்படுகிறோம். தமிழகம் முழுவதும் 10 மாவட்டங்களில் எங்களுடைய அமைப்பினர் சுமார் 2,000 பேர் இருக்கிறார்கள். இவர்கள் அனைவருமே தானாக முன்வந்து எங்களுடன் இணைந்தவர்கள். வாட்ஸ் அப்தான் எங்களை இணைக்கும் பாலம். தமிழகம் முழுவதுமே எங்களால் இயன்ற உதவிகளை செய்ய முடியும்; செய்து வருகிறோம். குறிப்பாக, வேலை தேவைப்படுவோருக்கு வேலை வாங்கித் தருவதிலும் அதிக கவனம் செலுத்துகிறோம். எங்களது வாட்ஸ் அப் குழுக்களைப் பொறுத்தவரையில் ஆண்களுக்குத் தனியாகவும், பெண்களுக்குத் தனியாகவும் நிர்வகிக்கப்படுகிறது. எந்த அதிகாரபூர்வ அங்கீகாரத்துடன் இல்லாமல் இருந்த அமைப்பு என்றாலும், முழு ஒழுங்கு மனப்பான்மையுடன் சிறப்பாக செயல்பட்டு, மக்களுக்கு உதவுவதற்கு எங்கள் அமைப்பில் உள்ள தன்னார்வலர்களின் ஈடுபாடே காரணம்" என்றார். மேலும் 'உதவிடத்தான் பிறந்தோம்' குழுவினர் கீழ்க்காணும் சேவைகளையும் வழங்கி வருகின்றனர்.  * தந்தை இழந்து தங்கள் உயர் கல்வியை (கல்லூரி) நிதி பிரச்னையால் பாதியில் நிறுத்தி அல்லது படிக்க முடியாமல் இருக்கும் குழந்தைகளுக்கு அவர்களின் கல்வியை தொடர உதவுகிறது.  * உடல் நிலை பாதிப்பால் மருத்துவம் பார்க்க முடியாமல் தவித்து கொண்டு இருக்கும் ஏழை குடும்பத்திற்கு மருத்துவ செலவுக்கு உதவுகிறது.  * ரத்த தேவைப்பட்டால் ரத்த தானம் கொடுத்து உதவுகிறது.  * ஆதரவற்றோர் இல்லம் மற்றும் ஆதரவற்றோருக்கு உணவு, புது உடை கொடுத்து உதவுகிறது.  * அரசு பள்ளி மாணவர்களுக்கு போட்டிகள் நடத்தி அவர்களுக்கு சான்றிதழ் மற்றும் பரிசுகள் கோப்பைகள் வழங்குகிறது.  * அசுத்தமாக இருக்கும் பள்ளி சுவர் மற்றும் பேருந்து நிலைய சுவர்களை தூய்மைப்படுத்தி விழிப்புணர்வு ஓவியம் வரைகிறது.   'உதவிடத்தான் பிறந்தோம்' குழுவினரை தொடர்புகொள்ள: 97109 72097
http://dlvr.it/S1Bb4H

Read More

தமிழக வளர்ச்சி கொள்கை குழு: துணைத் தலைவராக ஜெ.ஜெயரஞ்சன் நியமனம்

தமிழக வளர்ச்சி கொள்கை குழுவிற்கு புதிய உறுப்பினர்கள் நியமனம் செய்து தமிழக அரசு உத்தரவிட்டுள்ளது. துணைத் தலைவர், முழுநேர உறுப்பினர்கள், பகுதி நேர உறுப்பினர்கள் என 10 பேரை நியமித்து முதலமைச்சர் மு.க.ஸ்டாலின் உத்தரவு‌ பிறப்பித்துள்ளார். தமிழக வளர்ச்சிக் கொள்கை குழுவின் துணைத் தலைவராக பொருளாதார அறிஞர் ஜெ.ஜெயரஞ்சன் நியமனம் செய்யப்பட்டுள்ளார். மாநில வளர்ச்சி கொள்கை குழுவின் உறுப்பினராக இராம. சீனிவாசன், பகுதி நேர உறுப்பினர்களாக ம. விஜயபாஸ்கர், சுல்தான் அகமது இஸ்மாயில், மு.தீனபந்து , மல்லிகா சீனிவாசன், ஜோ. அமலோற்பவ நாதன், சித்த மருத்துவர் கு சிவராமன், நர்த்தகி நடராஜ், மன்னார்குடி திமுக எம்எல்ஏ டிஆர்பி ராஜா உள்ளிட்டோர் நியமனம் செய்யப்பட்டுள்ளனர்.
http://dlvr.it/S19SfT

Read More

நீட் தேர்வை நடத்த முயன்றால் எதிர்த்து போராடுவோம் - அமைச்சர் அன்பில் மகேஷ் உறுதி

தமிழகத்தில் நீட் தேர்வு நடத்தினால் அதை எதிர்த்து போராடுவோம் என்று தெரிவித்துள்ளார் பள்ளிக்கல்வித்துறை அமைச்சர் அன்பில் மகேஷ் பொய்யாமொழி.   தமிழகத்தில் பிளஸ் 2 பொதுத்தேர்வுகள் ரத்து செய்யப்பட்டுள்ளதாக முதல்வர் மு.க ஸ்டாலின் அறிவித்துள்ளார். மேலும் மாணவர்களுக்கு எவ்வாறு மதிப்பெண் வழங்குவது என்பதனை முடிவு செய்ய, பள்ளிக் கல்வித் துறை முதன்மைச் செயலாளர் தலைமையில் குழு அமைக்கப்பட்டு ஆய்வு செய்து அக்குழு அரசுக்கு அறிக்கை சமர்ப்பிக்கும் என்றும் அவர் கூறியுள்ளார். மேலும், நுழைவுத் தேர்வுகள் தொடர்பாக முதல்வர் மு.க.ஸ்டாலின், பிரதமர் மோடிக்கு கடிதம் எழுதி உள்ளார்.   அதில், தமிழகத்தில் நீட் உள்ளிட்ட பல்வேறு நுழைவுத் தேர்வுகளையும் ரத்து செய்ய வேண்டும் என்று கூறி உள்ளார். தமிழகத்தில் நீட் போன்ற நுழைவுத்தேர்வுகள் உகந்ததாக இருக்காது, மாநில கல்வித் திட்டத்தின் அடிப்படையில் உயர்கல்வி சேர்க்கை என்பதில் தமிழக அரசு உறுதியாக உள்ளது என்றும் முதலமைச்சர் ஸ்டாலின் தனது கடிதத்தில் குறிப்பிட்டுள்ளார்.   இதுகுறித்து தமிழக பள்ளிக்கல்வித்துறை அமைச்சர் அன்பில் மகேஷ் பொய்யாமொழி புதிய தலைமுறைக்கு அளித்துள்ள பேட்டியில், ''மாணவர்களின் உடல்நலனை கருத்தில்கொண்டு சிபிஎஸ்இ 12-ஆம் வகுப்பு பொதுத்தேர்வுகள் ரத்து செய்யப்படுவதாக பிரதமர் மோடி அறிவித்திருக்கிறார். நீட் தேர்வு ஒரே ஒரு நாள் நடைபெறும் தேர்வு என்றாலும் அன்றைய நாள் மூலம் மாணவர்கள் கொரோனா பாதிப்புக்குள்ளாகும் அச்சுறுத்தல் உள்ளது. எனவே தமிழகத்தில் நீட் தேர்வு நடத்தினால் அதை எதிர்த்து போராடுவோம்'' என்று தெரிவித்துள்ளார். அன்பில் மகேஷ் அளித்த பேட்டியின் முழு விவரம் இந்த வீடியோ தொகுப்பில்...
http://dlvr.it/S197NN

Read More

ஊரடங்கு தளர்வுகளில் அரசின் முடிவுக்கு முன்பு அமைச்சர் 'அவசரம்' - இது மகாராஷ்ட்ரா குழப்பம்

கொரோனா தளர்வுகள் தொடர்பாக அரசின் அறிவிப்பை முதல்வருக்கு முன்பாகவே அறிவித்த அமைச்சரால் மகாராஷ்டிராவில் ஆளும் 'மகா விகாஸ் அகாடி' கூட்டணி ஆட்சியில் குழப்பங்கள் வெடித்துள்ளது. மகாராஷ்ட்ரா மாநிலத்தில் கொரோனா தொற்று பாதிப்பு குறைந்து வருகிறது. இதனால் சில தளர்வுகள் இருக்கும் என்று சில தினங்கள் முன் அம்மாநில முதல்வர் உத்தவ் தாக்கரே அறிவித்து இருந்தார். அதன்படி, 18 மாவட்டங்களில் கொரோனா கட்டுப்பாடுகள் முற்றிலும் தளர்த்தப்படுவதாக அம்மாநில பேரிடர் மேலாண்மைத்துறை அமைச்சர் விஜய் வடேதிவார் நேற்று அறிவித்தார். மேலும், ''இந்த மாவட்டங்களில் பாதிப்பு விகிதம், ஆக்சிஜன் படுக்கைகளை வைத்திருப்பதற்கான நிலை ஆகியவற்றின் அடிப்படையில் மகாராஷ்டிரா அரசு ஐந்து நிலை அன்லாக் பிளான் (five-level unlock plan)-ஐ வைத்துள்ளது" என்றார். இதையடுத்து மக்களும் வியாபாரிகளும் சற்று நிம்மதிமூச்சு விட்டனர். ஆனால், சில மணி நேரங்களில் மாநில அரசு சார்பில், மற்றொரு அறிவிப்பு வெளியானது. அது அமைச்சர் அறிவித்த 18 மாவட்டங்களில் கட்டுப்பாடுகள் தளர்வுகள் இல்லை என்பது தான். இது தொடர்பாக அம்மாநில முதல்வர் அலுவலகம் வெளியிட்ட அறிக்கையில், ''கட்டுப்பாடுகளை நீக்குவது தொடர்பாக பரிசீலித்து வருகிறோம். மாநிலத்தில் கொரோனா பாதிப்பு இன்னும் முழுமையாக குறையவில்லை. கொரோனா சூழ்நிலையின் தீவிரத்தன்மையின் படி, பேரழிவு மேலாண்மைத் துறை இந்த ஐந்து நிலை அன்லாக் பிளான் (five-level unlock plan)-ஐ முடிவு செய்துள்ளது. ஆனால், இந்த விவகாரத்தில் அடுத்த நடவடிக்கை குறித்து விரைவில் அறிவிக்கப்படும்" என்று அமைச்சர் அறிவிப்புக்கு முரணாக அறிவித்தது. முதல்வர் அலுவலக அறிவிப்புக்கு பின் தனது முந்தையை அறிவிப்பில் இருந்து பின்வாங்கி, ''கட்டுப்பாடுகளை நீக்குவதற்கு அரசு சார்பில் கொள்கையளவில் ஒப்புதல் அளிக்கப்பட்டுள்ளதாகவும், எந்த முடிவும் எடுக்கப்படவில்லை. கொள்கை ரீதியான ஒப்புதல் வழங்கப்பட்டாலும், இறுதி முடிவு முதல்வரால் எடுக்கப்படும்" என்றும் கூறினார். தனது அறிவிப்பை பின்வாங்கினாலும், ஒரே அரசின் இரு வேறு அறிவிப்புகள் மக்கள் மத்தியில் குழப்பத்தையும் சலசலப்பையும் ஏற்படுத்தியது. மகாராஷ்டிராவில் தற்போது, காங்கிரஸ், சிவசேனா, தேசியவாத காங்கிரஸின் கூட்டணியாக 'மகா விகாஸ் அகாடி' கூட்டணி ஆட்சி நடைபெறுகிறது. அதன்படி, இந்தக் கூட்டணி ஆட்சியில் பேரிடர் மேலாண்மைத்துறை அமைச்சராக இருக்கும் விஜய் வடேதிவார் காங்கிரஸ் கட்சியைச் சேர்ந்தவர். சமீப மாதங்களாக சிவசேனா - காங்கிரஸ் உறவில் விரிசல் விழுந்து வருகிறது. ஆளுகிறது அவர்களின் கூட்டணி அரசு என்பதை நினைக்காமல் இரு கட்சியைச் சேர்ந்த அமைச்சர்களும், கட்சி நிர்வாகிகளும் மாறி மாறி விமர்சித்து வந்த நிலையில் தற்போது இந்த குளறுபடி சம்பவம் நிகழ்ந்துள்ளது விரிசலை உறுதிப்படுத்துவது போல் அமைந்துள்ளதாக கூறுகிறார்கள் அரசியல் நிபுணர்கள். இந்த நிலையில் இந்த விவகாரத்தை பாஜக தரப்பு கடுமையாக எடுத்துக்கொண்டு அரசியலாக்கி வருகிறது. இது தொடர்பாக பேசியுள்ள மகாராஷ்டிராவின் தற்போதையை எதிர்கட்சித் தலைவரும், முன்னாள் முதல்வருமான தேவேந்திர பட்நாவிஸ், ''மாநிலத்தில் முதல்வர் என உத்தவ் தாக்கரே ஒருவர் தான் இருக்கிறார். ஆனால் அவரை விடுத்து முக்கிய முடிவுகளை அறிவிக்கக்கூடிய சூப்பர் முதல்வர்களாக ஆட்சியில் பலர் இருக்கின்றனர். 18 மாவட்டங்களில் அமைச்சர் அறிவித்த கட்டுப்பாடு நீக்கத்தால் மக்கள் குழம்பி போயுள்ளனர். இதன்மூலம், அமைச்சர்கள் பலரும் தங்களை ஒரு முதல்வராக நினைத்துக்கொண்டு முக்கிய முடிவுகளை அறிவித்து விடுவது வெட்ட வெளிச்சமாகி இருக்கிறது. எந்த அரசிலும் கொள்கை முடிவுகளை முதல்வர் மட்டுமே எடுப்பார். அப்படி அவர் எடுக்கும் முக்கிய முடிவுகளை அறிவிப்பதற்கு அமைச்சர் ஒருவர் தேர்வு செய்யப்படுவது வழக்கம். ஆனால் தற்போதைய மகாராஷ்டிரா அரசில் மட்டுமே முதல்வர் ஒரு திட்டம் குறித்து அறிவிக்கும் முன்பே அமைச்சர்கள் அதனை அறிவித்து விடுகின்றனர். தங்களுக்கு பெயர், புகழ் கிடைக்க ஆசைப்பட்டு அமைச்சர்கள் இப்படி அரசின் முடிவுகளை முன்கூட்டியே அறிவித்து விடுகின்றனர். 'மகா விகாஸ் அகாடி' கூட்டணி ஆட்சியில் இது முதல்முறையாக நடக்கவில்லை. அவர்கள் ஆட்சி பொறுப்பேற்றதில் இருந்ததே இதுபோன்ற சம்பவங்கள் வாடிக்கையாக உள்ளது. இதுபோன்ற முன்கூட்டிய அறிவிப்புகளால் மக்கள் மத்தியில் தேவையில்லாத அச்சம் ஏற்படுகிறது. மக்களின் அச்சததை குறைக்க முக்கியமான முடிவுகளை அறிவிக்கும்போது தெளிவாக அறிவிக்கவேண்டும். மாநிலத்தில், கொரோனா உயிரிழப்புகள் மூடி மறைக்கப்படுகிறது. கொரோனாவில் இறந்தவக்ரளை வேறு நோய் காரணமாக உயிரிழந்ததாக கூறி அரசு மறைத்து விடுகிறது. இதுவரை 40 சதவீத கொரோனா உயிரிழப்புகள் மறைக்கப்பட்டுள்ளது. நகரங்களில் கொரோனா இறப்புகள் மறைக்கப்படுவது அதிகமாக உள்ளது. அதேநேரம், கிராமங்களில் கொரோனா சோதனையே நடத்தப்படுவதில்லை. அங்கு நிலைமை மிக மோசமாக இருக்கிறது" என்று பக்கம் பக்கமாக அரசை விளாசியிருக்கிறார். இந்த விவகாரம், மகாராஷ்ட்ரா அரசியலில் புதிய புயலை கிளப்பி இருக்கிறது.
http://dlvr.it/S180TW

Read More