உத்தரப்பிரதேசம்: `சாராய மாஃபியா குறித்து செய்தி; செய்தியாளர் விபத்தில் மரணம்'- வலுக்கும் சந்தேகம்

உத்தரப்பிரதேச மாநிலம், பிரதாப்கர் மாவட்டத்தைச் சேர்ந்தவர் சுலப் ஸ்ரீவஸ்தவா. பத்திரிகையாளரான இவர் ABP செய்தி நிறுவனத்தின் பிரதாப்கர் மாவட்டச் செய்தியாளராக பணியாற்றிவந்தார். புலனாய்வுச் செய்தியாளரான ஸ்ரீவஸ்தவா, மாவட்டத்தில் சட்டவிரோதமாகச் சாராய கடத்தல்களில் ஈடுபட்டுவரும் மாஃபியா கும்பல் தொடர்பாகக் கடந்த சில மாதங்களாகத் தகவல்களைச் சேகரித்து ABP தொலைக்காட்சியின் ப்ரைம் டைம் ஸ்டோரிக்கு 'சாராய மாஃபியா' குறித்துப் புலனாய்வு செய்தி ஒன்றை அனுப்பியிருக்கிறார். ஸ்ரீவஸ்தவாவின் சாராய மாஃபியா குறித்த செய்தி கடந்த சில தினங்களுக்கு முன்பு ABP செய்தி தொலைக்காட்சியில் ஒளிபரப்பாகியிருக்கிறது. பிரதாப்கர் மாவட்டத்தில், சாராயக் கடத்தல் கும்பல்களின் அட்டூழியத்தை அம்பலமாக்கிய ஸ்ரீவஸ்தாவின் செய்தி, மாவட்ட நிர்வாக அதிகாரிகள் வரை அனைவரையும் அலறவைத்திருக்கிறது. ஸ்ரீவஸ்தவாவின் எக்ஸ்க்ளுசிவ் ஸ்டோரி மிகப்பெரிய அளவில் ரீச்சாகவே, அவருக்குப் பாராட்டுகள் குவிந்திருக்கின்றன. ஆனால், பாராட்டுகள் கிடைத்ததைவிடவும் செய்தியாளர் ஸ்ரீவஸ்தவாவுக்கு மிரட்டல்கள்தான் அதிகம் வந்திருக்கின்றன. அதுவரை எந்தப் பத்திரிகையும், தொலைக்காட்சியும் வெளிக்கொண்டு வராத சாராய மாஃபியா விவாகரத்தை ஸ்ரீவஸ்தவா அம்பலமாக்கியதால், பிரதாப்கர் மாவட்டத்தின் முக்கியச் சாராயக் கடத்தல் புள்ளிகள் கொதித்துப்போயிருக்கின்றனர். சாராய மாஃபியா அதையடுத்து, கடந்த சில தினங்களாக ஸ்ரீவஸ்தவாவுக்கு தொலைபேசி வாயிலாகக் கொலை மிரட்டல்கள் வந்தவண்ணமாக இருந்ததாகக் கூறப்படுகிறது. சாராயக் கும்பல் தன்னை மிரட்டுவதைக் கண்டு பயந்துபோன செய்தியாளர் ஸ்ரீவஸ்தவா, அது தொடர்பாக உத்தரப்பிரதேச போலீஸ் உயரதிகாரிகளுக்கு நேற்று முன்தினம் புகார் மனு அளித்திருக்கிறார். அதில், "பிரதாப்கர் மாவட்டத்தின் சாராய மாஃபியாக்கள் குறித்து நான் பணிபுரிந்துவரும் நிறுவனத்துக்குச் செய்தி அனுப்பியிருந்தேன். அந்தச் செய்தி கடந்த 9-ம் தேதி தொலைக்காட்சியில் ஒளிபரப்பானது. அதிலிருந்து, என்னைச் சுற்றி பல்வேறு விஷயங்கள் நடந்துகொண்டிருக்கின்றன. யார் யாரோ என்னை மிரட்டுகின்றனர். வீட்டைவிட்டு வெளியேறினால் யாரோ என்னைப் பின்தொடர்வது போன்ற உணர்வு எனக்கு ஏற்படுகிறது. நான் வெளியிட்ட செய்தியால் சாராயக் கும்பல் என்மீது கடும் கோபத்தில் இருக்கிறது. அவர்கள் எந்த நேரத்திலும் என்னைத் தாக்கலாம். என் குடும்பத்தினரும் பயத்தில் இருக்கின்றனர். என்னுடைய பாதுகாப்பை உறுதி செய்யுமாறு கேட்டுக்கொள்கிறேன்" என்று ஸ்ரீவஸ்தவா குறிப்பிட்டிருந்தார். செய்தியாளர் ஸ்ரீவஸ்தவா நேற்று முன்தினம் போலீஸாரிடம் ஸ்ரீவஸ்தவா புகார் அளித்திருந்த நிலையில், அவர் நேற்றிரவு 11 மணியளவில் பணி முடிந்து இருசக்கர வாகனத்தில் வீடு திரும்பிக்கொண்டிருந்தபோது, செங்கல் சூளை ஒன்றின் அருகே மர்மமான முறையில் விபத்துக்குள்ளாகி வாகனத்திலிருந்து கீழே விழுந்திருக்கிறார். விபத்தில் ரத்த வெள்ளத்தில் சரிந்த அவரை செங்கல் சூளை பணியாளர்கள் மீட்டு மாவட்ட அரசு தலைமை மருத்துவமனைக்கு அனுப்பிவைத்திருக்கின்றனர். ஆனால், மருத்துவமனைக்குச் செல்லும் வழியிலேயே ஸ்ரீவஸ்தவா பரிதாபமாக உயிரிழந்துவிட்டார். சாராய மாஃபியாக்கள் குறித்துச் செய்தி வெளியான அடுத்த சில நாள்களில், செய்தி வெளியிட்ட செய்தியாளர் ஸ்ரீவஸ்தவா மர்மமான முறையில் உயிரிழந்தது சக பத்திரிகையாளர்களை அதிர்ச்சியில் ஆழ்த்தியது. அதைத் தொடர்ந்து, மரணத்தில் சந்தேகம் உள்ளதாகப் பலரும் மாவட்ட காவல்துறை அதிகாரிகளுக்கு அழுத்தம் கொடுத்துள்ளனர். ஆனால், காவல்துறை தரப்பில் ஸ்ரீவஸ்தவா வாகன விபத்தில்தான் உயிரிழந்ததாக உறுதியாகக் கூறப்பட்டிருக்கிறது. செய்தியாளரின் மரணம் தொடர்பாக மாவட்ட காவல்துறை உயரதிகாரி சுரேந்திர திவேதி கூறுகையில், "செய்தியாளர் ஸ்ரீவஸ்தவா சாலை விபத்தில்தான் உயிரிழந்திருக்கிறார் என்பது முதற்கட்ட விசாரணையில் உறுதியாகியிருக்கிறது. சாலையில் வேகமாக வந்துகொண்டிருக்கும்போது அவரது வாகனம் சாலையோர தண்ணீர்க் குழாய் ஒன்றில் பலமாக மோதியிருக்கிறது. அதில் நிலைதடுமாறி அவர் கீழே விழுந்து காயங்கள் ஏற்பட்டு உயிரிழந்திருக்கிறார். இருப்பினும், நாங்கள் வேறு கோணத்திலும் விசாரித்துவருகிறோம். முன்னதாக சாராயக் கும்பல் மிரட்டுவதாக அவர் புகார் அளித்தபோது, அவரைப் பின்தொடர்ந்து அவருக்கு பாதுகாப்பளிக்குமாறு உள்ளூர் போலீஸாரை வலியுறுத்தியிருந்தோம்" என்றார்.பிரியங்கா காந்தி - யோகி ஆதித்யநாத் போலீஸார் செய்தியாளரின் இறப்பு இயற்கையானதுதான் என்று சான்றளித்தாலும், சம்பவ இடத்தில் எடுக்கப்பட்ட புகைப்படங்கள் சந்தேகத்தைத் தூண்டுகின்றன. சட்டை கிழிக்கப்பட்டு, முகத்தில் மோதல் காயங்கள் பலமாக இருந்ததாகக் கூறும் செய்தியாளர்கள், ஸ்ரீவஸ்தவாவின் மரணம் இயற்கையானது அல்ல என்று சந்தேகித்துக் கேள்விகளை எழுப்புகின்றனர். சாராய மாஃபியா குறித்துச் செய்தி வெளியிட்ட சில நாள்களில் செய்தியாளர் மர்மமான முறையில் உயிரிழந்த விவகாரம் தீயாகப் பரவி, பெரும் பரபரப்பை ஏற்படுத்தியிருக்கிறது. இந்தநிலையில், செய்தியாளர் மரணம் குறித்து கண்டனம் தெரிவித்துள்ள காங்கிரஸ் கட்சியின் பொதுச்செயலாளர் பிரியங்கா காந்தி, "உ.பி-யில் சாராயக் கும்பல்களின் அட்டூழியம் நாளுக்கு நாள் அதிகரித்துக்கொண்டிருக்கிறது. ஆனால், மாநில அரசு மௌனம் சாதித்துக்கொண்டிருக்கிறது. பத்திரிகையாளர்கள் உண்மைகளை வெளிக்கொண்டு வர ஆபத்தான கேள்விகளைக் கேட்கவும், முயற்சிகளை மேற்கொள்ளவும் செய்கிறார்கள். ஆனால், அரசாங்கம் தூங்கிக்கொண்டிருக்கிறது. காட்டு அரசின் (Jungle Raj) தலைமையிலான உத்தரப்பிரதேச அரசிடம் செய்தியாளர் ஸ்ரீவஸ்தவாவை இழந்து வாடும் குடும்பத்தினருக்கு ஆறுதல் சொல்ல ஏதேனும் பதில் இருக்கிறதா?" என்று ட்விட்டரில் தனது கருத்தைப் பதிவிட்டுள்ளார். செய்தியாளர் ஸ்ரீவஸ்தவாவின் மரணம் குறித்து உயர்மட்ட விசாரணை அமைக்கப்பட்டு, சாராய மாஃபியா கும்பல்களின் அராஜகத்தைச் சட்டரீதியாக அடக்க, நடவடிக்கைகள் மேற்கொள்ள வேண்டும் என்பதே அனைவரின் எதிர்பார்ப்பாக உள்ளது.
http://dlvr.it/S1hjyc

Read More

நடிகர் சுஷாந்த் சிங் மரணம்: ஓராண்டு ஆகியும் விலகாத மர்மம்!

பாலிவுட் நடிகர் சுஷாந்த் சிங் கடந்த ஆண்டு ஜுன் 14-ம் தேதி மும்பையில் உள்ள பாந்த்ரா இல்லத்தில் தூக்குப் போட்டு தற்கொலை செய்து கொண்டார் என்ற அதிர்ச்சி செய்தி வெளியானது. இந்த தற்கொலை சம்பவம் பாலிவுட் சினிமா உலகம் மட்டுமல்லாது, பீகார் அரசியலிலும் புயலை கிளப்பியது நினைவிருக்கலாம். மும்பையில் நடந்த மரணத்துக்கு, பீகார் போலீஸார் தங்களது மாநிலத்தில் வழக்குப் பதிவு செய்தனர். சுஷாந்த் சிங் ராஜபுத்தின் தோழி ரியா சக்ரபோர்த்தி மற்றும் அவரது குடும்பத்தினர் மீது சுஷாந்த் சிங் தந்தை பீகார் போலீஸில் புகார் செய்தார். அதன் அடிப்படையில் பீகார் போலீஸார் இவ்வழக்கை கையில் எடுத்தனர். ஏற்கனவே இவ்வழக்கை மும்பை போலீஸார் விசாரித்துக் கொண்டிருந்தனர். பிரேத பரிசோதனையின் அடிப்படையில் சுஷாந்த் சிங் தற்கொலை செய்து கொண்டதாக மும்பை போலீஸார் முடிவுக்கு வந்தனர். அதோடு அவர்கள் வழக்கு தொடர்பான ஆவணங்களை பீகார் போலீஸாரிடம் கொடுக்க முடியாது என்றும் தெரிவித்தனர். ரியா சக்ரபோர்த்தி பீகார் சட்டமன்ற தேர்தலை கவனத்தில் கொண்டு பீகார் போலீஸார் இவ்வழக்கிற்கு முக்கியத்துவம் கொடுத்தனர் என்ற குற்றச்சாடும் இருக்கிறது. இப்பிரச்னை சுப்ரீம் கோர்ட் வரை சென்றது. சுப்ரீம் கோர்ட் இதனை விசாரித்து வழக்கை சி.பி.ஐ.க்கு மாற்றி உத்தரவிட்டது. சி.பி.ஐ. இவ்வழக்கை கையில் எடுத்தவுடன் அமலாக்கப்பிரிவும் இதில் சேர்ந்துக்கொண்டது. சுஷாந்த் சிங்கின் பல கோடி பணத்தை அவரது காதலி ரியா சக்ரபோர்த்தி பரித்துவிட்டதாக சுஷாந்த் சிங் தந்தை கொடுத்திருந்த புகாரின் அடிப்படையில் பணம் மோசடி தொடர்பாக விசாரிப்பதாக அமலாக்கப்பிரிவு தெரிவித்தது. ஆனால் கடந்த ஒரு ஆண்டாக இது குறித்து விசாரித்தும், இதுவரை எந்த வித உண்மையும் வெளியில் வரவில்லை என்கிறார்கள் சுஷாந்த் சிங் உறவினர்கள். ரியா சக்ரபோர்த்தி சுஷாந்த் சிங்கிடமிருந்து பணத்தை அபகரித்தாரா என்பதற்கும் இதுவரை விடை கிடைக்கவில்லை. சி.பி.ஐ.யும் இவ்வழக்கை கடந்த ஆகஸ்ட் மாதத்தில் இருந்து விசாரித்துக்கொண்டுதான் இருக்கிறது. அவர்களாலும் இது தற்கொலையா அல்லது கொலையா என்று முடிவுக்கு வரமுடியவில்லை என்று தெரிவித்துள்ளனர். இன்னும் விசாரித்து விசாரித்துக்கொண்டுதான் இருக்கிறோம் என்று மட்டும் சி.பி.ஐ.அதிகாரிகள் தெரிவித்துள்ளனர். சுஷாந்த் சிங் மன அழுத்ததிற்கு சிகிச்சை எடுத்துக்கொண்டாரா என்பது குறித்து கூட சி.பி.ஐ.எதுவும் தெரிவிக்கவில்லை. அதே சமயம், சுஷாந்த் சிங் மரண வழக்கை பதிவு செய்த பாந்த்ரா போலீஸார் தொடர்ந்து இதனை விசாரித்துக்கொண்டுதான் இருக்கின்றனர். போலீஸார் சம்பவம் நடந்த ஒரு வாரத்தில் இது தற்கொலை என்று முடிவுக்கு வந்துவிட்டனர். தொழில் போட்டி காரணமாக கொலை செய்யப்பட்டாரா என்ற கோணத்திலும் மும்பை போலீஸார் இவ்வழக்கை விசாரித்து பார்த்தனர். இதற்காக தயாரிப்பாளர்கள் ஆதித்ய சோப்ரா, மகேஷ் பட், சஞ்சய் லீலா பன்சாலி ஆகியோரிடமும் வாக்குமூலம் வாங்கினர். இதிலும் எந்த வித துப்பும் கிடைக்கவில்லை. சுஷாந்த் சிங் இது குறித்து மும்பை போலீஸ் அதிகாரி ஒருவர் கூறுகையில், ``சுஷாந்த் சிங் தற்கொலை செய்து கொண்டதாக விசாரணையில் தெரிய வந்துள்ளது. ஆனால் இவ்வழக்கை முடிக்க முடியாத அளவுக்கு வழக்கு தொடர்பான ஆவணங்கள் சி.பி.ஐ.வசம் இருக்கிறது. சி.பி.ஐ.யிடமிருந்து ஆவணங்கள் கிடைத்தவுடன் இவ்வழக்கை முடித்துவிடுவோம்” என்று தெரிவித்தார். அமலாக்கப்பிரிவு நடத்திய விசாரணையில் ரியா சக்ரவர்த்தியும், அவரது சகோதரரும் போதைப்பொருள் வாங்குவது தொடர்பாக சாட்டிங் செய்திருப்பதை கண்டுபிடித்தனர். இந்த விபரம் போதைப்பொருள் தடுப்பு பிரிவுக்கு தெரிவிக்கப்பட்டு போதைப்பொருள் தடுப்பு பிரிவினர் ரியா சக்ரவர்த்தியையும் அவரது சகோதரர் சோவிக்கையும் கைது செய்தனர். இவ்வழக்கு தொடர்பாக பாலிவுட் பிரபலங்கள் தீபிகா படுகோனே, சாரா அலிகான், ஸ்ரத்தா கபூர் உட்பட பலரிடம் விசாரித்தனர். ரியா சக்ரபோர்த்தி ஆனால் இதிலும் எந்த வித முன்னேற்றமும் இல்லை. போதைப்பொருள் வியாபாரி ஒருவரை கைது செய்து, அவர் கொடுத்த வாக்குமூலத்தின் அடிப்படையில் தான் ரியா சக்ரவர்த்தியும் அவரது சகோதரரும் கைது செய்யப்பட்டனர். இப்போது அவரும் வெளியில் வந்துவிட்டார். ஆனால் சுஷாந்த் சிங் தற்கொலை செய்தாரா கொலை செய்யப்பட்டாரா என்பது மட்டும் இன்னும் மர்மமாகவே இருக்கிறது. சி.பி.ஐ.இந்த வழக்கையும் ஓரங்கட்டி வைத்துவிட்டது என்ற குற்றச்சாடும் எழுந்திருக்கிறது. Also Read: சுஷாந்த் சிங்... ஒரு பெருங்கனவை நோக்கிய பயணம் பாதியில் முடிந்தது ஏன்?! #SushanthDay இவ்வழக்கில் சி.பி.ஐ.இன்னும் மவுனம் காப்பது ஏன் என்று மும்பை காங்கிரஸ் செய்தி தொடர்பாளர் சச்சின் சாவந்த் கேள்வி எழுப்பியுள்ளார். இது தொடர்பாக அவர் சமூக வலைத்தளத்தில் பதிவிட்டுள்ளவற்றில், ``சி.பி.ஐ., சுஷாந்த் சிங் வழக்கை கையில் எடுத்து 310 நாட்களாகிவிட்டது. எய்ம்ஸ் மருத்துவமனை சுஷாந்த் சிங் தற்கொலை தான் செய்துள்ளார் என்று தெரிவித்து 250 நாட்களாகிவிட்டது. சி.பி.ஐ. எப்போது விசாரணை விபரங்களை தெரிக்கப்போகிறது. ஏன் அமைதியாக இருக்கிறது?” என்று கேள்வி எழுப்பியுள்ளார். சுஷாந்த் சிங் முதலாம் ஆண்டு ஆண்டு நினைவுநாளை ஒட்டி சமூக வலைத்தளத்தில் பாலிவுட் பிரபலங்கள், ரசிகர்கள் உள்ளிட்டோர் சுஷாந்த் சிங்கை நினைவு கூர்ந்து வருகின்றனர்.
http://dlvr.it/S1ggwL

Read More

24 ஐஏஎஸ் அதிகாரிகள் அதிரடி இடமாற்றம்: தமிழ்நாடு அரசு உத்தரவு

தமிழ்நாட்டில் முக்கிய ஐஏஎஸ் அதிகாரிகளை மாற்றம் செய்து தலைமைச் செயலாளர் இறையன்பு உத்தரவிட்டுள்ளார். கோவை, விழுப்புரம் உள்ளிட்ட 24 மாவட்ட ஆட்சியர்கள் மாற்றம் செய்யப்பட்டுள்ளனர். நாகை மாவட்ட ஆட்சியராக பணியாற்றி வந்த பிரவீன் நாயர், ஊரக வளர்ச்சி மற்றும் ஊராட்சி இயக்குநராக நியமனம் விழுப்புரம் மாவட்ட ஆட்சியர் அண்ணாதுரை, வேளாண் துறை இயக்குநராக நியமனம் வேலூர் ஆட்சியராக இருந்த சண்முக சுந்தரம், கூட்டுறவுத்துறை பதிவாளராகவும் நியமனம் திருப்பத்தூர் ஆட்சியரான சிவனருள், பதிவுத்துறை ஐ.ஜி.ஆக நியமனம்  திருவள்ளூர் ஆட்சியராக இருந்த பொன்னையா, நகராட்சி நிர்வாக இயக்குநராக நியமனம் சுற்றுலாத்துறை இயக்குநராக திருவண்ணாமலை ஆட்சியர் சந்தீப் நந்தூரி நியமனம் சமூக நலத்துறை இயக்குநராக அரியலூர் ஆட்சியர் ரத்னா நியமனம் ,தமிழ்நாடு குடிசை மாற்று வாரிய மேலாண் இயக்குநராக தஞ்சை ஆட்சியராக இருந்த கோவிந்தராவ் நியமனம் தொழில்கல்வி இயக்குநராக லஷ்மிபிரியா நியமனம் ஆசிரியர் தேர்வு வாரியத் தலைவராக லதா நியமனம் வேளாண் விற்பனை மற்றும் வேளாண் வணிகத்துறை ஆணையாளராக வள்ளலார் நியமனம் ஆவின் மேலாண் இயக்குநராக கந்தசாமி நியமனம் சிஎம்டிஏ உறுப்பினர் செயலராக அன்சுல் மிஸ்ரா நியமனம் மாநில வளர்ச்சி கொள்கை குழு உறுப்பினர் செயலாளராக பாஸ்கர பாண்டியன் நியமனம் நில அளவை மற்றும் நிலவரித்திட்ட இயக்குநராக வினய் நியமனம் மதுவிலக்கு மற்றும் ஆயத்தீர்வை இயக்குநராக ஜெயகாந்தன் நியமனம் என தமிழக அரசு அறிவித்துள்ளது.
http://dlvr.it/S1gJvx

Read More

மும்பை: சாக்கடையை சரியாக தூர்வாராத ஒப்பந்ததாரர் மீது குப்பையைக் கொட்டிய சிவசேனா எம்.எல்.ஏ!

மும்பையில் கடந்த 9ம் தேதியிலிருந்து தொடர்ந்து கனமழை பெய்துவருகிறது. இதனால் நகர் முழுவதும் மழை நீர் தேங்கி மக்களின் இயல்பு வாழ்க்கை பாதிக்கப்பட்டது. புறநகர் ரயில் சேவை, பஸ் சேவையும் துண்டிக்கப்பட்டது. சாக்கடைகள் முழுமையாக தூர்வாரப்பட்டுவிட்டதாக மாநகராட்சி நிர்வாகம் தெரிவித்த நிலையில் முதல் மழைக்கே மும்பை வெள்ளத்தில் சிக்கித்தவித்தது. மும்பை புறநகர் பகுதியான சாந்திவலியில் இது போன்று மழை வெள்ளத்தால் மக்கள் மிகவும் சிரமப்பட்டதால் சிவசேனா எம்.எல்.ஏ. திலிப் லாண்டேயின் தொண்டர்கள் களத்தில் இறங்கி சாக்கடையை தூர்வாரி மழை வெள்ளம் வடிய வகை செய்தனர். திலிப் லாண்டே இப்பணிகளுக்காக நியமிக்கப்பட்டு இருந்த ஒப்பந்ததாரர் பணியை சரியாக செய்யவில்லை என்று திலிப் லாண்டே தெரிவித்தார். அதோடு ஒப்பந்ததாரரை வரவழைத்த திலிப் லாண்டே ஒப்பந்ததாரரை மழை வெள்ளத்தில் உட்கார வைத்ததோடு அவர் மீது தனது கட்சியினர் மற்றும் மாநகராட்சி ஊழியர்களிடம் குப்பையை போடும்படி கேட்டுக்கொண்டார். இதனை சிவசேனாவினர் தங்களது மொபைல் போனில் வீடியோ எடுத்து சமூக வலைத்தளத்தில் வெளியிட்டனர். இது குறித்து திலிப் லாண்டே கூறுகையில், "ஒப்பந்ததாரரை கடந்த 15 நாட்களாக சாக்கடையை தூர்வாரும் படி கேட்டுக்கொண்டிருந்தேன். ஆனால் கேட்கவில்லை. எனவே சிவசேனாவினரே களத்தில் இறங்கி சாக்கடையை சுத்தம் செய்ய ஆரம்பித்தனர். இது குறித்து கேள்விப்பட்டதும் ஒப்பந்ததாரர் விரைந்து வந்தார். அவரிடம் மழை நீர் சாலைகள் மற்றும் குடியிருப்பு பகுதிக்குள் நுழைந்ததற்கு நீ தான் காரணம் என்று சொல்லி மழை நீரில் இருக்கும்படி செய்தேன். வேலையை சரியாக செய்யாததால் அவருக்கு கொடுக்கப்பட்ட தண்டனை சரிதான்" என்று தெரிவித்தார். இந்த வீடியோ சமூக வலைத்தளத்தில் வெளியானதால் பல்வேறு தரப்பினரும் சிவசேனா எம்.எல்.ஏ.வின் செயலை விமர்சனம் செய்துள்ளனர். மும்பை மாநகராட்சியை சிவசேனா கடந்த 25 ஆண்டுகளாக ஆட்சி செய்து கொண்டிருக்கிறது. ஒவ்வொரு ஆண்டும் மழை வெள்ளம் வடிவதற்காக சாக்கடைகள் பல கோடி ரூபாய் செலவில் தூர்வாரப்படுகிறது. ஆனால் ஒரு வருடம்கூட மழை நீர் சரியாக சென்றதில்லை. ஒவ்வொரு ஆண்டும் மழையால் மக்களின் இயல்பு வாழ்க்கை பாதிக்கப்பட்டுக்கொண்டுதான் இருக்கிறது.
http://dlvr.it/S1df4T

Read More

சென்னை: கருப்பு பூஞ்சைக்கான மருந்து கள்ளச்சந்தையில் விற்பனை: 4 பேர் கைது

சென்னையில் கருப்பு பூஞ்சை நோய்க்கு பயன்படுத்தப்படும் Ambisome Liposomal Amphotericin என்ற மருந்தை அதிக விலைக்கு கள்ளச் சந்தையில் விற்ற 2 பெண்கள் உட்பட 4 பேரை காவல்துறையினர் கைது செய்து சிறையில் அடைத்தனர்.   கொரோனா வைரஸ் நோயைத் தொடர்ந்து தமிழகத்தில் கருப்பு பூஞ்சை நோய் ஆங்காங்கே பரவி பலரும் பாதிக்கப்பட்டுள்ளனர். இந்நிலையில் கொரோனா தொற்றுக்கு ரெம்டெசிவிர் மருந்தை கள்ளச் சந்தையில் விற்றதுபோல் கருப்பு பூஞ்சை நோய்க்கு பயன்படுத்தப்படும் மருந்தையும் கள்ளச் சந்தை மூலம் சிலர் அதிக லாபம் பெற எண்ணி விற்பனை செய்து வருகின்றனர். இவர்களைத் தடுக்கும் முயற்சியில் காவல் துறையினர், மருந்து கட்டுப்பாட்டுத்துறையினர், குடிமைப்பொருள் வழங்கல் குற்றப்புலனாய்வு துறையினர் தீவிரமாக செயல்பட்டு நடவடிக்கைகள் மேற்கொண்டு வருகின்றனர்.   குறிப்பாக கள்ளச் சந்தை விற்பனையாளர்களை பிடிக்க சமூக வலைதளங்கள் மூலம் மருந்து தேவைப்படுபவர்கள்போல் செய்தி வெளியிட்டு, அவர்களை தொடர்பு கொள்ளும் கள்ளச் சந்தை விற்பனையாளர்களின் தொடர்பை வைத்து அவர்களை பொறிவைத்து பிடித்து கைது நடவடிக்கைகளை காவல்துறையினர் மேற்கொண்டு வருகின்றனர்.   அந்த வகையில் சென்னை அண்ணா சாலையில் அமைந்துள்ள எல்ஐசி அலுவலகம் அருகே கருப்பு பூஞ்சை நோய்க்கு பயன்படுத்தப்படும் Ambisome Liposomal Amphotericin என்ற மருந்தை கள்ளச் சந்தை மூலம் அதிக விலைக்கு விற்பனை செய்யவிருப்பதாக அண்ணா நகர் போலீசாருக்கு ரகசிய தகவல் கிடைத்தது. அதனடிப்படையில் அண்ணாசாலை காவல் ஆய்வாளர் சந்திரமோகன் தலைமையிலான தனிப்படையினர் மருந்து கட்டுப்பாட்டு அதிகாரி முரளி கிருஷ்ணனுடன் சம்பவ இடத்திற்குச் சென்று மறைந்திருந்து நோட்டமிட்டனர்.   அப்போது கருப்பு பூஞ்சை நோய்க்கு பயன்படுத்தப்படும் மருந்தை விற்க முயன்ற 2 பெண்கள் உட்பட 4 பேரை போலீசார் சுற்றி வளைத்து பிடித்து அவர்களை காவல் நிலையம் அழைத்து வந்து விசாரணை மேற்கொண்டனர். விசாரணையில் அவ்விரு பெண்களும் ஆதம்பாக்கத்தைச் சேர்ந்த உம்மு குல்சம் (26), கானாத்தூரைச் சேர்ந்த பௌசானா (32) என்பதும், அவ்விரு பெண்களின் நண்பர்களான விழுப்புரத்தைச் சேர்ந்த ராஜேஷ் (21), மற்றும் செங்கல்பட்டைச் சேர்ந்த விவேக் (25) என்பதும் தெரியவந்தது.   மேலும், அவர்கள் பெங்களூருவில் இருந்து கருப்பு பூஞ்சை நோய்க்கு பயன்படுத்தப்படும் Ambisome Liposomal Amphotericin மருந்தை 15 ஆயிரம் ரூபாய்க்கு வாங்கி வந்து கள்ளச் சந்தை மூலம் சென்னையில் 40 ஆயிரம் முதல் 50 ஆயிரம் ரூபாய்க்கு விற்பனை செய்து வந்ததும் விசாரணையில் கண்டுபிடிக்கப்பட்டது.   அவர்களிடம் இருந்து 8 Ambisome Liposomal Amphotericin மருந்துக் குப்பிகளையும் காவல் துறையினர் பறிமுதல் செய்துள்ளனர். இதனைத் தொடர்ந்து அவர்கள் மீது வழக்குப்பதிவு செய்த காவல் துறையினர் அவர்களை நீதிமன்றத்தில் ஆஜர்படுத்தி சிறையில் அடைத்தனர்.
http://dlvr.it/S1d0Fs

Read More

தொடரும் ஒழுங்கீனம்... - வங்கதேச கிரிக்கெட் அணியும், ஷகிப் அல் ஹசனும் திருந்துவது எப்போது?

கிரிக்கெட் என்பது 'ஜென்டில்மேன்' விளையாட்டு. ஆனால் ஷகிப் அல் ஹசன் மட்டுமல்லாமல், வங்கதசே வீரர்கள் பலரும் அதனை பின்பற்றியதில்லை. இந்த ஒழுங்கீன வரலாற்றின் சுவடுகளும், சமீபத்திய சர்ச்சைகளும் இதோ... 1977-ஆம் ஆண்டு முதல் சர்வதேச கிரிக்கெட்டில் நுழைந்தது வங்கதேச கிரிக்கெட் அணி. ஆனால், 1996-ஆம் ஆண்டுக்கு பிறகுதான் சர்வதேச கிரிக்கெட் அரங்கில் தங்களது முத்திரைய பதிக்க ஆரம்பித்தது அந்த அணி. பின்பு பல போட்டிகளில் தோல்வியடைந்தாலும் இந்தியா, ஆஸ்திரேலிய போன்ற அணிகளைத் திணறடிக்கும் வீரர்களை மெதுவாக உருவாக்கியது வங்கதேசம். அதன் பலனாக 2000-ஆம் ஆண்டு வங்கதேசத்துக்கு டெஸ்ட் போட்டிகளில் விளையாடும் அங்கீகாரம் கொடுத்தது ஐசிசி. அதன்பின்பு கத்துக்குட்டியாக பார்க்கப்பட்ட வங்கதேசம் விஸ்வரூபம் எடுத்தது. அதுவும் 2007 உலகக் கோப்பையில் இந்தியாவை வீழ்த்தி, தொடரில் இருந்தே வெளியேற்றியது வங்கதேசம். பின்பு 2011-ஆம் ஆண்டு உலகக் கோப்பையை இந்தியாவுடன் இணைந்து நடத்தியது வங்கதேசம். அந்த அணியின் தமீம் இக்பால், முஷ்பிகிர் ரஹீம் ஆகியோர் சிறந்த பேட்ஸ்மேன்களாக உருவானார்கள். அதில் உலகளவில் பல நாடுகளை கவனம் ஈர்த்தவர், ஆல் ரவுண்டரான ஷகிப் அல் ஹசன். வங்கதேச அணியின் 'மேட்ச் வின்னராக' ஆக ஜொலிப்பவர் ஷகிப் அல் ஹசன். ஐசிசி கிரிக்கெட் தரவரிசையில் சில மாதங்கள் ஆல்ரவுண்டர் பட்டியலில் முதலிடத்தையும் பிடித்தார். ஐபிஎல் போட்டிகளிலும் சிகப்புக் கம்பளம் விரித்து வரவேற்றன கொல்கத்தா நைட் ரைடர்ஸ், சன்ரைசர்ஸ் ஐதராபாத் அணிகள். இப்போதும் ஐபிஎல்களில் கொல்கத்தா அணிக்காக விளையாடுகிறார் ஷகிப் அல் ஹசன். 34 வயதாகும் ஷகிப் அல் ஹசன் 2007 ஆம் ஆண்டு இந்தியாவுக்கு எதிரான டெஸ்ட் போட்டியில் அறிமுகமானார். இதுவரை 212 ஒருநாள் போட்டிகளில் விளையாடி 6455 ரன்களை சேர்த்துள்ள வங்கதேசத்தின் ஸ்டார் வீரர். மேலும், 57 டெஸ்ட் போட்டிகளிலும் 76 டெஸ்ட் போட்டிகளிலும் விளையாடி இருக்கிறார். அனைத்துவிதமான கிரிக்கெட் பார்மட்களிலும் ஷகிப் அல் ஹசன் கில்லி. கிரிக்கெட் ரெக்கார்டுகள் சிறப்பாக இருந்தாலும் ஷகிப் அல் ஹசனின் நடவடிக்கைகள்தான் இதுவரை பெரும் சர்ச்சையை ஏற்படுத்தி பரபரப்பாக பேசவைத்திருக்கிறது. இப்போது கூட வங்தேச டி20 கிரிக்கெட் லீகில் அம்பயரிடம் வாக்குவாதம் செய்து, ஒரே போட்டியில் இருமுறை வாக்குவாதம் செய்து, ஸ்டம்புகளை தூக்கி எரிந்துள்ளார். இதனால் ஒட்டுமொத்த கிரிக்கெட் உலகமும் அதிர்ச்சியில் இருந்தாலும், ஷகிப் மீது ஐசிசி நடவடிக்கை எடுக்க வேண்டுமென்ற கோரிக்கையும் எழுந்துள்ளது. சர்ச்சையில் சிக்குவது ஷகிப் அல் ஹசனுக்கு ஒன்றும் புதிததல்ல. இதற்கு முன்பு போட்டியின்போது அவுட்டாகி பெவிலியன் திரும்பிய ஷகிப், தொலைக்காட்சி கேமரா தன்னை படம் பிடித்தபோது அறுவறுப்பான முறையில் செய்கை செய்தார். இதனால் கடுமையான கண்டனங்ளுக்கு ஆளானார். இதற்கு பின்பு கடந்த 2018ஆம் ஆண்டு வங்கதேசம், இலங்கை மற்றும் ஜிம்பாவே இடையே நடைபெற்ற முத்தரப்பு தொடரில் ஷகிபை மேட்ச் ஃபிக்சிங் செய்ய இடைத்தரகர்கள் அனுகியுள்ளனர். அதேபோல 2018 ஆம் ஆண்டு நடைபெற்ற ஐபிஎல் தொடரின்போதும் இவரை மேட்ச் ஃபிக்சிங் செய்ய இடைத்தரகர்கள் அனுகியுள்ளனர். இந்த இரண்டு முறையும் இடைத்தரகர்கள் தன்னை அனுகியது தொடர்பாக ஷகிப் அல் ஹசன் ஐசிசிக்கு தெரிவிக்கவில்லை. எனவே ஐசிசியின் ஊழல் தடுப்பு நெறிமுறைகளை ஷகிப் அல் ஹசன் கிரிக்கெட் விளையாட இரண்டு ஆண்டுகள் தடை விதிப்பதாக அறிவித்தது. எனினும், ஷகிப் அல் ஹசன் தனது தவறை ஒப்புக்கொண்டதால் அவரின் தடைக் காலத்தை ஒராண்டாக குறைத்து ஐசிசி உத்தரவிட்டது. இப்படி சர்வதேச கிரிக்கெட்டில் இருந்து ஓராண்டு விளையாடாமல் இருந்தார் ஷகிப் அல் ஹசன். கிரிக்கெட் என்பது "ஜென்டில்மேன்" விளையாட்டு, ஆனால் ஷகிப் மட்டுமல்லாமல் வங்கதசே வீரர்கள் பலரும் அதனை பின்பற்றியதில்லை. வெற்றியோ தோல்வியோ எதிரணியினரை கண்ணியமாக நடத்த வேண்டும்; அதுதான் ஒரு உண்மையான விளையாட்டு அணிக்கான அடையாளம். ஆனால் அதனையும் சரியாக பின்பற்றாத அணியாக வங்கதேசம் கிரிக்கெட் இருந்துள்ளது. 2018 ஆம் ஆண்டு இந்தியா, இலங்கை, வங்கதேசம் பங்கேற்ற டி20 தொடரில் ஒரு போட்டியில் இலங்கையை வென்ற வங்கதேச கிரிக்கெட் அணியினர் "பாம்பு நடனம்" ஆடி இலங்கை வீரர்களை வெறுப்பேற்றினர். மேலும் இலங்கை வீரர்களுடன் தரக்குறைவாகவும் நடந்துக்கொண்டனர். அண்மையில் கூட இலங்கைக்கு எதிரான ஒருநாள் போட்டியில் சதமடித்த முஷ்பிகிர் ரஹீம் மீண்டும் பாம்பு டான்ஸ் ஆடினார். எப்போதும் கிரிக்கெட்டில் கண்ணியமாக நடந்துக்கொள்ளும் இந்திய அணியின் முன்னாள் கேப்டன் கூல் தோனியை கூடடென்ஷன் ஆக்கி வாங்கிக்கட்டி கொண்டார்கள் வங்கதேச வீரர்கள். 2014 ஆம் ஆண்டு நடைபெற்ற போட்டியில் வங்கதேச வேகப்பந்துவீச்சாளர் முஸ்தாபிசுர் தோனி - ரோகித் சர்மா ரன்களை சேர்க்கும்போது அடிக்கடி குறுக்கே வந்துக்கொண்டிருந்தார். இதனை பார்த்த தோனி, முஸ்தாபிசுர் ரஹ்மானை லேசாக தோளில் இடித்தார். இதனை எதிர்பார்க்காத அவர் கீழே விழுந்தார். இதுவும் அப்போது பெரும் பேசுபொருளானது. கிரிக்கெட்டில் வெல்கிறார்களோ இல்லையோ சர்ச்சைக்கும் வங்கதேசத்துக்கும் நன்றாகவே பொருந்திப் போகிறது. சர்வதேசப் போட்டிகள், உள்ளூர் போட்டிகள் என பிரச்னைகள் நீண்டுக்கொண்டே இருக்கிறது. அம்பயரிடம் நடந்துக்கொண்ட விதத்துக்கு எளிதாக மன்னிப்பு கேட்டுவிட்டார் ஷகிப். ஆனால் அவரது மனைவி "ஷகிபை ஊடகங்கள் வில்லன் போல் சித்தரிப்பதாக கூறியுள்ளார். இதனை தட்டிக் கேட்க வேண்டிய வங்கதேச கிரிக்கெட் வாரியம் வாயை மூடிக்கொண்டு இருக்கிறது” என்கிறார். ஓர் அணி வெற்றிப் பெறுவதோ தோல்வியடைவதோ முக்கியமல்ல; ஆட்டத்தின்போது கண்ணியத்தை கடைப்பிடிக்க வேண்டும். அதுவும் ஒட்டுமொத்த வங்கதேசத்துக்கும் ஷகிப் அல் ஹசன் ஒரு இன்ஸ்ரபிரேஷன், அவர் இப்படி செய்வது கவலைக்குரியது. ஷகிபுக்கு மட்டுமல்ல; இப்போது வங்கதேச கிரிக்கெட் அணிக்கு தேவைப்படுவது வெற்றியல்ல; நல்ல ஆலோசனையும் வழிக்காட்டுதலும்தான். - ஆர்.ஜி.ஜெகதீஷ்
http://dlvr.it/S1btqc

Read More

ஓடிடி திரைப் பார்வை: 'டூ டிஸ்டன்ட் ஸ்ட்ரேஞ்சர்ஸ்'- ஜார்ஜ் பிளாய்டின் மரணமும் அதிர்வுகளும்!

மக்கள் அரசியலின் கலை வடிவமாகவே சினிமா இருக்க வேண்டும். எக்கால அரசியலையும் துணிந்து அது பேசவேண்டும். அடக்குமுறைகளுக்கு எதிரான விடுதலைக் குரலாக உலகின் காதுகளுக்குள் ஓங்கி அது ஒலிக்க வேண்டும். அவ்வகையில் அமெரிக்க கருப்பின மக்களின் பிரச்னையினை வித்தியாசமான திரைக்கதை பாணியில் பேசியிருக்கிறது கடந்த ஆண்டு வெளியான அமெரிக்க குறும்படம் 'டூ டிஸ்டன்ட் ஸ்ட்ரேஞ்சர்ஸ்' (Two Distant Strangers). கருப்பின இளைஞர் கேர்ட்டர் ஒரு கிராபிக் டிசைனர். அவர் தனது காதலி பெர்ரியுடன் இரவில் 'டேட்' செய்துவிட்டு உறங்குகிறார். ஒரு அதிர்ச்சி கனவு அவரை எழுப்பிவிடுகிறது. கனவின்படி, கேர்ட்டர் தன் காதலியின் வீட்டில் இருந்து கிளம்பி சாலைக்கு வருகிறார். அங்கு வெள்ளை போலீஸ் அதிகாரி ஒருவர் கேர்ட்டரை மறித்து விசாரிக்கிறார். கேர்ட்டர் புகைப்பது கஞ்சாவோ என சந்தேகித்து உக்கிரமாக கேர்ட்டரை தாக்க முயல்கிறார் அந்த அதிகாரி. பின் கருப்பின கேர்ட்டரை தரையில் படுக்கவைத்து தனது முழங்காலால் கழுத்தை அழுத்துகிறார். மூச்சுவிட முடியாமல் துடிக்கும் கேர்ட்டர், “என்னால் சுவாசிக்க முடியவில்லை, என்னால் மூச்சுவிட முடியவில்லை” என சொல்லித் துடித்து இறந்து போகிறார். இப்போது இந்தக் காட்சி எந்த சம்பவத்தை நினைவுபடுத்துகிறது என நான் உங்களுக்கு விளக்கத் தேவை இல்லை. ஆம் மேலே விவரிக்கப்பட்டுள்ள காட்சிகள் ஜார்ஜ் ப்ளாயிடின் மரணத்தைதான் பேசுகின்றன. கடந்த ஆண்டு மே மாதம் அமெரிக்காவில் நடந்த ஜார்ஜ் ஜார்ஜ் பிளாய்டின் கொடூர மரணம் உலகின் மனசாட்சியினை உலுக்கியது. வெள்ளை இனத்தைச் சேர்ந்த அமெரிக்க போலீஸ் அதிகாரி டெரிக் சாவ்வின் விசாரணைக்காக ஜார்ஜ் பிளாய்டை கைது செய்ய வந்திருக்கிறார். காரில் ஏற மறுத்த அவரை போலீஸ் அதிகாரி டெரிக் சாவ்வின் தனது முழங்கால்களால் அழுத்தி கொலை செய்தார். இச்சம்பவத்தைத் தொடர்ந்து உலகம் முழுக்க போராட்டங்கள் வெடித்தன. பிறகு குற்றம் நிரூபிக்கப்பட்டு டெரிக் சாவ்வின் சிறையிலடைக்கப்பட்டார். ‘டூ டிஸ்டண்ட் ஸ்ட்ரேஞ்சர்ஸ்’ என்கிற சினிமா ஜார்ஜ் பிளாய்டின் மரணத்தை மட்டும் பேசுகிறதா என்றால், இல்லை. கதைப்படி கனவில் நாயகன் அதிர்ந்து எழுகிறார் இல்லையா... அந்த கனவு ஒருமுறை வருவதல்ல 99 முறை இந்த சினிமாவில் வருகிறது. ஒவ்வொரு முறையும் அமெரிக்க வெள்ளை அதிகாரியால் என்கவுன்டர் செய்யப்பட்டு கொல்லப்பட்ட ஒரு கருப்பினத்தவரின் கதை சொல்லப்படுகிறது. கொல்லப்படும் ஒவ்வொரு கருப்பினத்தவரின் நகல் வடிவமாக கதையின் நாயகன் கேர்ட்டர் வடிவமைக்கப்பட்டிருக்கிறார். இந்த கதை சொல்லல் பாணியை 'டைம் லூப் ஸ்கிரீன் ப்ளே' என்று சொல்லலாம். ஜார்ஜ் பிளாய்டின் மரணம் உலகம் முழுக்க அதிர்வலைகளை ஏற்படுத்த ஒரு வீடியோ முக்கிய காரணமாக இருந்தது. அதனை எடுத்தவர் 18 வயது அமெரிக்க இளம்பெண் டார்னெல்லா ஃபிரேஸர். அவர் தனது செல்போனில் பதிவு செய்த வீடியோவே ஜார்ஜ் பிளாய்டின் மரணத்திற்கு நீதி பெற்றுத் தந்திருக்கிறது. தற்போது இளம்பெண் டார்னெல்லா ஃபிரேஸரை கவுரவப்படுத்தும் நோக்கில் ஊடகத்துறையின் உயரிய விருதான புலிட்சர் விருது அவருக்கு அறிவிக்கப்பட்டிருக்கிறது. டார்னெல்லா ஃபிரேஸர் ஊடகவியலாளராக இல்லாத போதும் அவர் செய்தது ஒரு நல்ல ஊடகப் பணிதான். எனவே அவருக்கு சிறப்பு 'புலிட்சர்' விருது அறிவிக்கப்பட்டுள்ளது. தற்போது நெட்பிளிக்ஸின் காணக் கிடைக்கும் ‘டூ டிஸ்டண்ட் ஸ்ட்ரேஞ்சர்ஸ்’ எனும் இந்த சினிமா சமகால அரசியலை பேசும் மிக முக்கியமான சினிமா. இதனை ட்ராவோன் ப்ரீ மற்றும் மார்டின் டெஸ்மோண்ட் ரோய் ஆகியோர் இணைந்து இயக்கி இருக்கின்றனர். இவர்களில் இக்கதையின் திரைகக்தையினை எழுதியவர் ட்ராவோன் ப்ரீ. ஜெஸிகா யங் இப்படத்திற்கு ஒளிப்பதிவு செய்திருக்கிறார். கருப்பின இளைஞராக ஜோ பாடாஸும், வெள்ளை போலீஸ் அதிகாரியாக ஆண்ட்ரோ ஹார்வட்டும் நடித்திருக்கின்றனர். சிறந்த லைவ் ஆக்‌ஷன் சினிமாவிற்கான ஆஸ்கர் விருது பெற்ற இந்த சினிமாவுக்கு இசையமைத்திருக்கிறார் ஜேம்ஸ் பாய்சர். மொத்த சினிமாவின் அரசியல் அடர்த்தியை எண்டு கார்டில் ஒலிக்கும் 'The Way it is' எனும் பாடல் வெளிப்படுத்துகிறது. மேலும், இப்படத்தின் எண்டு கார்டில் அமெரிக்க வெள்ளை அதிகாரிகளால் படுகொலை செய்யப்பட்ட நூறு கருப்பினத்தவர்களின் பெயர்கள் பட்டியலிடப்பட்டிருக்கின்றன. அடக்குமுறைக்கு ஆளாகும் கருப்பின மக்களின் விடுதலைக் குரலான ‘டூ டிஸ்டண்ட் ஸ்ட்ரேஞ்சர்ஸ்’ குறும்படம் தற்போது நெட்பிளிக்ஸில் கிடைக்கிறது. - சத்யா சுப்ரமணி முந்தைய ஓடிடி திரைப்பார்வை: ’ஆதாமிண்ட மகன் அபு’- இஸ்லாமிய தம்பதியின் மெக்கா கனவும் அன்பான வாழ்வும்
http://dlvr.it/S1b3Zq

Read More