மும்பை:`மாநகராட்சித் தேர்தலில் தனித்து போட்டி!’-காங்கிரஸ் தலைவரின் அறிவிப்பால் கூட்டணியில் குழப்பம்

மும்பை உட்பட மகாராஷ்டிரா முழுவதுமிருக்கும் பெரும்பாலான மாநகராட்சிகளுக்கு அடுத்த ஆண்டு தேர்தல் நடக்கவிருக்கிறது. இந்தத் தேர்தலில் காங்கிரஸ் கட்சி தனித்துப் போட்டியிடுவது குறித்துப் பரிசீலித்துவருகிறது. இது தொடர்பாக அந்தக் கட்சியின் மாநிலத் தலைவர் நானாபட்டோலேயும் கருத்து தெரிவித்திருந்தார். இதை முதல்வர் உத்தவ் தாக்கரே இரண்டு நாள்களுக்கு முன்பு கடும் விமர்சனம் செய்திருந்தார். மகாராஷ்டிராவில் சிவசேனா-தேசியவாத காங்கிரஸ்-காங்கிரஸ் கூட்டணி ஆட்சியில் இருக்கிறது. இதில் காங்கிரஸ் கட்சிக்குத்தான் சட்டமன்றத்தில் குறைவான இடங்கள் இருக்கின்றன. எனவே, வரும் தேர்தலில் இந்தக் கூட்டணியில் நீடித்தால் மேலும் கட்சிக்குப் பின்னடைவு ஏற்படும் என்று கருதி காங்கிரஸ் தனித்துப் போட்டியிட திட்டமிட்டுள்ளது.காங்கிரஸ் - என்.சி.பி- சிவசேனா அதை நிரூபிக்கும் வகையில், இப்போது மும்பை காங்கிரஸ் தலைவர் பாய் ஜக்தாப்பும் `நாங்கள் வரும் மும்பை மாநகராட்சித் தேர்தலில் தனித்துப் போட்டியிடுவோம்’ என்று தெரிவித்து, கூட்டணியில் குழப்பத்தை ஏற்படுத்தியிருக்கிறார். இது தொடர்பாக அவர் அளித்த பேட்டியில், ``நான் மும்பை காங்கிரஸ் தலைவராக பொறுப்பேற்றதிலிருந்து மாநகராட்சித் தேர்தலில் 227 வார்டுகளிலும் தனித்துப் போட்டியிடுவோம் என்று கூறிவருகிறேன். இது போன்று கூறுவது இது முதன்முறையல்ல. 1999-2014-ம் ஆண்டுகளில் தேசியவாத காங்கிரஸ் மற்றும் சமாஜ்வாடி கட்சியுடன் கூட்டணியில் இருந்தாலும், காங்கிரஸ் மாநகராட்சித் தேர்தலில் தனித்தே போட்டியிட்டிருக்கிறது” என்றார். மகாராஷ்டிரா முதல்வர் உத்தவ் தாக்கரே, ``மக்கள் பிரச்னைக்குத் தீர்வு காணாமல், தனித்துப் போட்டியிடுவது பற்றி மட்டும் பேசினால் மக்கள் செருப்பால் அடிப்பார்கள்” என்று காங்கிரஸ் தனித்துப் போட்டியிடப்போவதாக வந்த செய்திக்கு பதிலளித்திருந்தார். உத்தவ் தாக்கரேயின் இந்த செருப்படி குறித்து பாய் ஜக்தாப்பிடம் கேட்டதற்கு, ``உத்தவ் தாக்கரேயின் கருத்து எங்களுக்குத் தனித்துப் போட்டியிட ஊக்கம் அளிப்பதாக இருக்கிறது” என்று தெரிவித்தார். இதற்கு முன்பு மகாராஷ்டிரா காங்கிரஸ் தலைவர் நானாபட்டோலே அளித்திருந்த பேட்டியில், வரும் சட்டமன்றத் தேர்தலில் காங்கிரஸ் கட்சி தனித்துப் போட்டியிடும் என்றும், மகா விகாஷ் அந்தக் கட்சியில் இடம்பெறாது என்றும், தற்போதைய கூட்டணி வெறும் ஐந்து ஆண்டுகளுக்கு மட்டுமே என்றும், அது நிரந்தரம் கிடையாது என்றும் கூறியிருந்தார். பட்டோலேயின் இந்தக் கருத்திலிருந்தே மகாராஷ்டிரா அரசியல் சூடுபிடிக்க ஆரம்பித்துள்ளது. காங்கிரஸ் தனித்துப் போட்டியிட்டால், நாங்கள் சிவசேனாவுடன் கூட்டணி அமைத்து போட்டியிடுவோம் என்று தேசியவாத காங்கிரஸ் தெரிவித்திருந்தது. உத்தவ் தாக்கரே காங்கிரஸ் தனித்துப் போட்டியிடப்போவதாக தெரிவித்திருப்பது குறித்து சிவசேனா செய்தித் தொடர்பாளர் சஞ்சய் ராவத்திடம் கேட்டதற்கு, ``சிவசேனா அரசியல் யுத்தத்தில் தனித்தே களம் காணும். தேர்தலில் தனித்துப் போட்டியிட விரும்புபவர்கள் தாராளமாக தனித்துப் போட்டியிடலாம். மகாவிகாஷ் அகாடி தேர்தலைக் கருத்தில்கொண்டு உருவாக்கப்பட்டது. ஆனால், அரசியல் யுத்தத்தில் தனித்தே போரிடுவோம். மகாராஷ்டிராவின் கௌரவமாக இருந்தாலும், கட்சியின் கௌரவமாக இருந்தாலும் சிவசேனா இரண்டுக்கும் சேர்த்தே பாடுபடும்” என்று குறிப்பிட்டிருந்தார்.
http://dlvr.it/S28k3D

Read More

கொரோனா காலத்திலும் யோகா நம்பிக்கை ஒளியாக இருக்கிறது - பிரதமர் மோடி

சர்வதேச யோகா தினத்தை முன்னிட்டு சிறப்புரை ஆற்றிய பிரதமர் மோடி உலக மக்கள் ஆரோக்கியமாக இருக்க பிரார்த்திப்பதாக கூறினார்.   இன்று இந்தியா உட்பட உலகம் முழுவதும் சர்வதேச யோகா தினம் கொண்டாடப்பட்டு வருகிறது. டெல்லி உள்ளிட்ட இடங்களில் மத்திய அமைச்சர்கள் தங்களது வீடுகளில் யோகாசனங்களை செய்கின்றனர். சர்வதேச யோக தினத்தை முன்னிட்டு பிரதமர் மோடி நாட்டு மக்களுடன் சிறப்புரையாற்றினார். அப்போது பேசிய அவர், ‘’நோய் நாடி நோய்முதல் நாடி அதுதணிக்கும்வாய்நாடி வாய்ப்பச் செயல்’’ என்ற திருக்குறளை சுட்டிக்காட்டினார். தொடர்ந்து பேசிய அவர், கொரோனா பெருந்தொற்றுக் காலத்தில் யோகா நம்பிக்கை ஒளியாக திகழ்கிறது. யோகா செய்யவேண்டும் என்ற உத்வேகம் மட்டும் இன்னும் குறையவில்லை. ஒவ்வொரு நாடும், ஒவ்வொரு நாட்டு மக்களும் ஆரோக்கியமாக இருக்க பிரார்த்திக்கிறேன் என்று கூறினார்.
http://dlvr.it/S27jBg

Read More

`பாஜக-வுடன் கூட்டணி அமைத்து எங்களை காப்பாற்றுங்கள்!’ - உத்தவ் தாக்கரேவுக்கு சிவசேனா எம்.எல்.ஏ கடிதம்

மகாராஷ்டிராவில் உள்ள சிவசேனா கூட்டணி ஆட்சியை கவிழ்க்க வேண்டும் என்பதற்காக பா.ஜ.க அரசு, மத்திய விசாரணை ஏஜென்சிகள் மூலம் பல்வேறு நெருக்கடிகளை கொடுத்து வருவதாக குற்றச்சாட்டு எழுந்துள்ளது. ஆனாலும் பாஜகவால் காங்கிரஸ், சிவசேனா, தேசியவாத காங்கிரஸ் கூட்டணியில் உள்ள எம்.எல்.ஏ.க்களை தங்கள் பக்கம் இழுக்க முடியவில்லை. தானே சிவசேனா எம்.எல்.ஏ, பிரதாப் சர்நாயக் மீது நேஷனல் ஸ்பாட் எக்ஸ்சேஞ்ச் லிமிடெட்டில் நடந்த ரூ.5,600 கோடி மோசடி தொடர்பாக அமலாக்கப்பிரிவு விசாரணை நடத்தி வருகிறது. இது தொடர்பாக சர்நாயக் மீது மட்டுமல்லாது அவரது குடும்பத்தினரையும் அமலாக்கப்பிரிவு குறி வைத்துள்ளது. சர்நாயக்கிற்கு சொந்தமான 112 நிலங்களை அமலாக்கப்பிரிவு கையகப்படுத்தி இருக்கிறது. அதோடு அவரது வீட்டிலும் ரெய்டு நடத்தி சர்நாயக்கிற்கு நெருக்கடி கொடுத்தது. தற்போது பிரதாப் சர்நாயக் மகாராஷ்டிரா முதல்வர் உத்தவ் தாக்கரேவுக்கு கடிதம் எழுதியிருக்கிறார். உத்தவ் தாக்கரே அதில், பா.ஜ.க கூட்டணியில் சேரும்படி கேட்டுக்கொண்டுள்ளார். அக்கடிதத்தில் எழுதியிருப்பதாவது, ``பிரதமர் நரேந்திர மோடியுடன் கூட்டணி சேருவது நல்லது. பிரதாப் சர்நாயக், அனில் பரப், ரவி வாய்க்கர் போன்ற தலைவர்கள், அவரது நண்பர்கள், உறவினர்கள் தேவையில்லாமல் துன்புறுத்தப்படுவது தடுக்கப்படும் என்று தொண்டர்கள் கருதுகின்றனர். எந்த வித குற்றமும் செய்யாத நிலையில் தேவையில்லாமல் மத்திய விசாரணை ஏஜென்சிகளால் துன்புறுத்தப்பட்டு வருகிறோம். ஒரு வழக்கில் ஜாமீன் கிடைத்தால் உடனே வேண்டுமென்றே வேறு ஒரு வழக்கில் சிக்க வைக்கின்றனர். போரில் அபிமன்யூ போன்று அல்லாமல் அர்ச்சுனன் போன்று போரிடவேண்டும். கடந்த 7 மாதங்களாக என் மீதும் எனது குடும்பத்தின் மீதான சட்டப்போராட்டத்தை தனியாக யவரின் துணையும் இன்றி எதிர்கொண்டு வருகிறேன். அடுத்த ஆண்டு மும்பை, தானே உட்பட மாநிலம் முழுவதும் மாநகராட்சிகளுக்கு தேர்தல் நடக்க இருக்கிறது. மகாராஷ்டிராவில் பா.ஜ.க-வுடன் சிவசேனாவின் உறவு முறிந்துவிட்டாலும் தனிப்பட்ட முறையில் இரு கட்சி தலைவர்களிடையே இன்னும் சுமூக நட்பு இருந்து கொண்டுதான் இருக்கிறது. எனவே உறவை புதுப்பிப்பதில் எந்த வித பிரச்னையும் இருக்காது. வரும் தேர்தலில் பா.ஜ.க-வுடன் கூட்டணி வைத்தால் மிகவும் நல்லது. மத்திய விசாரணை ஏஜென்சிகளிடமிருந்து எங்களைப்போன்ற தலைவர்களை காப்பாற்ற இனியும் தாமதிக்காமல் பா.ஜ.க-வுடன் கூட்டணி வைக்கவேண்டும். காங்கிரஸும், தேசியவாத காங்கிரஸ் கட்சியும் சேர்ந்து சிவசேனாவில் பிளவை ஏற்படுத்தி பலவீனப்படுத்துகின்றன. உத்தவ் தாக்கரே காங்கிரஸ் மற்றும் தேசியவாத காங்கிரஸ் எம்.எல்.ஏ.க்களின் பணிகள் மட்டுமே நடப்பதாக சிவசேனா எம்.எல்.ஏ.க்கள் கருதுகின்றனர். காங்கிரஸ் மற்றும் தேசியவாத காங்கிரஸ் வளரத்தான் பாஜக கூட்டணி உடைக்கப்பட்டதோ என்று சிவசேனா எம்.எல்.ஏ.க்கள் சந்தேகப்படுகின்றனர். முதல்வராகிய நீங்கள் கொரோனா ஒழிப்பிலும், அரசியல் நடவடிக்கையில் ஈடுபடாமலும் இருக்கின்றீர்கள். ஆனால் காங்கிரஸ் தேர்தலில் தனித்து போட்டியிடுவது குறித்து பேசிக்கொண்டிருக்கிறது. சிவசேனாவை உடைப்பதில் தேசியவாத காங்கிரஸ் தீவிரமாக இருக்கிறது” என்று அதில் குறிப்பிட்டுள்ளார். இது குறித்து சிவசேனா செய்தி தொடர்பாளர் சஞ்சய் ராவுத்திடம் கேட்டதற்கு, ``விசாரணை அமைப்புக்கள் தேவையில்லாமல் துன்புறுத்துவதாக சர்நாயக் முக்கியமான ஒன்றை தனது கடிதத்தில் குறிப்பிட்டுள்ளார். யார் துன்புறுத்துவது என்பதுதான் இப்போது கேள்வி” என்று தெரிவித்தார். மாநில காங்கிரஸ் தலைவர் நானாபட்டோலேயிடம் இது குறித்து கேட்டதற்கு, சிவசேனாவின் உள்கட்சி விவகாரம் என்றும், அடுத்த கட்சிகளின் உள்கட்சி விவகாரம் குறித்து கருத்து தெரிவிக்க மாட்டோம் என்று குறிப்பிட்டார். பா.ஜ.க மாநில தலைவர் சந்திரகாந்த் பாட்டீல் இது குறித்து கூறுகையில்,` `கடந்த 18 மாதமாக நாங்கள் சொல்வதைத்தான் சர்நாயக் இப்போது தெரிவித்துள்ளார்” என்று குறிப்பிட்டுள்ளார்.
http://dlvr.it/S27Gmd

Read More

மும்பை: ரயில் தண்டவாளத்தில் இறங்கிப்படுத்த பெண்; உயிர் தப்பிய ஆச்சர்யம்!

மும்பை முலுண்டில் வசிக்கும் ஸ்ருதி விஷால் சற்று மனநிலை பாதிக்கப்பட்டவர். இதற்காக அவர் சிகிச்சை எடுத்து வருகிறார். மாத்திரைகளை சரியாக எடுத்துக்கொள்ளவில்லையெனில் அவரது நடவடிக்கையில் மாற்றம் ஏற்பட்டு விடும். திருமணாகி மூன்று குழந்தைகள் இருக்கும் ஸ்ருதி தனது குடும்பத்துடன் தனியாக வசித்து வந்தார். அருகில் அவரின் மாமியார் வேறு ஒரு வீட்டில் வசித்து வந்தார். ஸ்ருதியின் கணவர் இரண்டு குழந்தைகளை அழைத்துக்கொண்டு தனது பெற்றோரை பார்க்க சென்றார். ஸ்ருதி(இடதுபுறம்) வீட்டில் ஒரு குழந்தையுடன் ஸ்ருதி இருந்தார். இரவில் ஸ்ருதி மாத்திரை எடுத்துக்கொள்ள மறந்துவிட்டார். இதனால் அவருக்கு அதிகாலை 2 மணிக்கு மனநிலை பாதிக்கப்பட்டு வீட்டை விட்டு வெளியில் வந்தார். அப்படியே ரயில் நிலையத்திற்கு வந்த ஸ்ருதி புறநகர் ரயிலில் ஏறி பத்லாப்பூரில் இருக்கும் தனது பெற்றோரை பார்க்க சென்றுவிட்டார். பத்லாப்பூரில் உள்ள தனது பெற்றோர் வீட்டிற்கு அதிகாலை 6 மணிக்கு சென்றுவிட்டார். ஆனால் சிறிது நேரத்தில் வீட்டில் யாரிடமும் சொல்லாமல் கிளம்பி சென்றுவிட்டார். உடனே அவரது தாயார் பிரமிளா தனது மகளை காணாது அக்கம் பக்கம் தேடினார். எங்கும் கிடைக்கவில்லை. இதனால் ரயில் நிலையம் வரை கூட சென்று பார்த்து வந்தனர். ஆனால் கிடைக்கவில்லை. ரயில் தண்டவாளத்தில் இருந்து 200 மீட்டர் தூரத்தில் ஸ்ருதி நின்று கொண்டிருந்தார். அவர் ரயில் தண்டவாளத்தின் மத்தியில் படுத்துவிட்டார். ரயில்வே ஊழியர்கள் அவரை பார்த்து அங்கிருந்து அகற்றும் முன்பாக அந்த வழியாக உதயன் எக்ஸ்பிரஸ் ரயில் வந்துவிட்டது. ரயில் மோட்டார்மெனும் அருகில் வந்த பிறகுதான் தண்டவாளத்தில் பெண் படுத்திருப்பதை பார்த்தார். உடனே அவர் அவசர பிரேக் போட்டார். ஆனால் ரயில் அவர் படுத்திருந்த இடத்தை கடந்து சென்றுவிட்டது. மோட்டார்மென் கட்டுப்பாட்டு அறைக்கு தகவல் கொடுத்தார். ரயில்வே ஊழியர்கள் விரைந்து வந்து அப்பெண்ணை மீட்டனர். அவர் அதிர்ச்சியில் இருந்தார். அவருக்கு லேசான காயம் இருந்தது. மற்ற படி எந்த வித பாதிப்பும் இல்லாமல் தப்பிவிட்டார். அவருக்கு குடிக்க தண்ணீர் கொடுத்து அச்சத்தில் இருந்து அவரை சகஜ நிலைக்கு கொண்டு வந்தனர். அதன் பிறகு அவர் யார் என்று கேட்டபோது தனது பெற்றோர் பத்லாப்பூரில் இருப்பதாக தெரிவித்தார். இதையடுத்து ஸ்ருதியை அவரது பெற்றோரிடம் ஒப்படைத்தனர். இது குறித்து ஸ்ருதியின் தாயார் பிரமிளா கூறுகையில், ஸ்ருதி வழக்கமாக எடுத்துக்கொள்ளும் மருந்தை எடுத்துக்கொள்ளவில்லையெனில் அவரது மனநிலையில் மாற்றம் ஏற்பட்டுவிடும். சம்பவம் நடந்த அன்றும் அவர் மருந்தை எடுத்துக்கொள்ள மறந்துவிட்டார் என்று தெரிவித்தார். அடுத்த இரண்டு நாள் கழித்தும் ஸ்ருதி உறக்கத்தில் வெளியில் எழுந்து சென்றுவிட்டார். அதன் பிறகு அவரை மீட்டுக்கொண்டு வந்தனர்.
http://dlvr.it/S25bdr

Read More

கேரளா: 'கத்தியை யாரும் பார்த்தது இல்லையா!' அதிரும் பினராயி விஜயன் - கே.சுதாகரன் வார்த்தைப்போர்!

கேரள மாநில காங்கிரஸ் தலைவர் கே.சுதாகரன் ஒரு பத்திரிகைக்கு அளித்த பேட்டியில், "நான் கல்லூரியில் படிக்கும்போது கேரள முதல்வர் பினராயி விஜயனை ஓட ஓட விரட்டியிருக்கிறேன். நான் காங்கிரஸ் மாணவர் அமைப்பான கே.எஸ்.யூ-வில் இருந்தேன். அப்போது எஸ்.எஃப்.ஐ சார்பில் போராட்டம் நடத்த வந்த பினராயி விஜயன் மற்றும் அவருடன் வந்தவர்களை அடித்து விரட்டினோம்" என்றார். மேலும், "கே.எஸ்.யூ அமைப்பைச் சேர்ந்த பிரான்சிஸ் என்பவர் எப்போதும் கத்தி மறைத்து வைத்திருப்பார். ஒரு மேடையில் பேசிய பினராயி விஜயன் 'பேராம்பிறை பகுதியில் இருந்து வரும் ஒரு கே.எஸ்.யூ அமைப்பைச் சேர்ந்த ஒருவன் இடுப்பில் கத்தி மறைத்து வைத்திருக்கிறான்' எனப் பேசினார். இதனால் சீறி எழுந்த பிரான்சிஸ், வேட்டியை மடித்துக் கட்டிக்கொண்டு ஸ்டேஜில் ஏறி மைக்கை எடுத்து பினராயி விஜயனின் தலையை நோக்கி ஓங்கி அடித்தார். பினராயி விஜயன் விலகாமல் இருந்திருந்தால் அன்று அவரது மண்டை பிளந்திருக்கும்" என கூறியிருந்தார் கே.சுதாகரன்.கேரள மாநில காங்கிரஸ் தலைவர் கே.சுதாகரன் இந்த பேட்டி குறித்து பதிலளித்த பினராயி விஜயன், "கே.சுதாகரன் எதற்காக பொய் பேசிக்கொண்டிருக்கிறார் எனத் தெரியவில்லை. என்னை இதுவரை யாரும் நெருங்கி வந்து தொட்டதில்லை. என் குழந்தைகளை அவர் கடத்த முயன்றதாக எனக்கு ஒருவர் தகவல் சொன்னார். என் குழந்தைகளை கையைப் பிடித்து என் மனைவி ஸ்கூலுக்கு அழைத்துச் சென்ற காலம் அது. கே.சுதாகரனின் நண்பர் ஒருவர் என்னிடம் அந்த தகவலைச் சொன்னார். நான் அதுபற்றி என் மனைவியிடம் கூட சொல்லவில்லை. வரட்டும்பார்க்கலாம் என தைரியமாக இருந்தேன். பிரான்சிஸ் என்பவர் கத்தியை வைத்துக்கொண்டு நடந்ததாக கே.சுதாகரன் கூறுகிறார். கத்தியை யாரும் பார்த்தது இல்லையா! கே.சுதாகரன் கனவில் நடந்ததைக் கூறுகிறார் என நினைக்கிறேன்" என்றார். இதுகுறித்து பா.ஜ.க-வைச் சேர்ந்த மத்திய அமைச்சர் வி.முரளிதரன் கூறுகையில், "கேரளத்தில் வனத்தில் மரம் முறித்த வழக்கு, கொரோனா தடுப்பு நடவடிக்கையில் தோல்வி ஆகியவற்றை திசைதிருப்புவதற்காகவே எதிர்கட்சியுடன் இணைந்து முதல்வர் பினராயி விஜயன் இந்த விவாதத்தை கிளப்பியிருக்கிறார்.மத்திய அமைச்சர் வி.முரளிதரன் முதலமைச்சர் பினராயி விஜயனும், கேரள மாநில காங்கிரஸ் தலைவர் கே.சுதாகரனும் அடிப்படையில் நாங்கள் ரவுடிகளாக்கும் என்பதை கேரள மக்களுக்கு சொல்ல வருகிறார்கள். முதல்வரும், காங்கிரஸ் தலைவரும் செய்தியாளர் சந்திப்பின்போது அக்கிரம கதைகளை சொல்லுவதும், மோதலுக்காக அழைப்பதும் திட்டமிட்ட செயல். மரம் கடத்தப்பட்ட வழக்கு, மற்றும் கொரோனா தடுப்பில் அரசின் வீழ்ச்சி ஆகியவற்றை திசை திருப்ப எதிர்கட்சி உதவுகிறது. சிறப்பாக கல்வி வழங்கும் வட கேரளத்தில் உள்ள கல்வி நிலையங்களை கேவலம் ரவுடிகள் மற்றும் கிரிமினல்களின் கேந்திரம் என்ற ரீதியில் முதல்வரும், காங்கிரஸ் தலைவரும் சித்திரிக்கிறார்கள்" என்றார்.
http://dlvr.it/S24yHs

Read More

தத்து குழந்தையை தம்பதியிடமிருந்து பிரித்த அதிகாரிகள்; மீண்டும் ஒப்படைக்க உத்தரவிட்ட உச்சநீதிமன்றம்!

மும்பையைச் சேர்ந்த கங்காராம் - நிஷா தம்பதி, கடந்த 2019-ம் ஆண்டு வீட்டு வேலை செய்யும் பெண் ஒருவரிடமிருந்து பெண் குழந்தை ஒன்றை தத்து எடுத்து எடுத்தனர். அப்பெண்ணின் கணவர் இறந்ததால், அவரின் பிரசவ செலவுக்கும் இந்தத் தம்பதி நிதியுதவி செய்துள்ளனர். வறுமையின் காரணமாக ஒற்றை பெற்றோராக தன்னால் தன் குழந்தையை கவனிக்க முடியாது என்று, குழந்தையை அப்பெண் தத்துக் கொடுத்துள்ளார். இது தொடர்பாக இரு தரப்பினரும் முறைப்படி எழுதி ஒப்பந்தமும் செய்து கொண்டனர். ஆனால், `இந்த தத்தெடுப்பு சட்டப்படி செல்லாது' என்று கூறி குழந்தைகள் மற்றும் பெண்கள் நலத்துறை அதிகாரிகள் தத்து எடுத்த தம்பதியிடமிருந்து அக்குழந்தையை பெற்றுச் சென்றனர். Baby - Representative Image இதை எதிர்த்து சம்பந்தப்பட்ட தம்பதி மும்பை உயர் நீதிமன்றத்தில் வழக்குத் தொடர்ந்தனர். ஆனால் மும்பை உயர்நீதிமன்றமும் அந்தத் தம்பதியின் கோரிக்கையை நிராகரித்ததோடு, குழந்தை தொடர்ந்து அரசின் பராமரிப்பில் வளரவேண்டும் என்று உத்தரவிட்டது. இதனால் குழந்தை பெற்ற தாயிடமும் இல்லாமல், தத்து எடுத்தவர்களிடமும் இல்லாமல் அரசின் பராமரிப்பில் வளர்ந்து வந்தது. இதையடுத்து அரசுத் தரப்பில் அக்குழந்தையை யாருக்காவது முறைப்படி தத்து கொடுத்துவிடக்கூடும் என்று கருதிய கங்காராம் தம்பதி, இது தொடர்பாக சுப்ரீம் கோர்ட்டில் மனுத்தாக்கல் செய்தனர். குழந்தையின் தாயாரும், அந்தத் தம்பதியிடம் தன் குழந்தையை மீண்டும் ஒப்படைக்க வேண்டும் என்று கோரி சுப்ரீம் கோர்ட்டில் மனுத்தாக்கல் செய்தார். இம்மனு விசாரணைக்கு வந்தபோது கங்காராம் தம்பதி, ``குழந்தையின் தாயார் வீட்டு வேலை செய்து வருகிறார். குழந்தை பிறந்த மாதமே முறைப்படி பதிவு ஆவணங்கள் தயார் செய்து குழந்தையை தத்து எடுத்துக்கொண்டோம். ஆனால் பெண்கள் மற்றும் குழந்தைகள் நலத்துறை அதிகாரிகள் எங்கள் மீது கிரிமினல் வழக்குப் பதிவு செய்து குழந்தையை பிடுங்கிச் சென்றுவிட்டனர். சட்ட நடவடிக்கைகளால் குழந்தை அன்பு மற்றும் அரவணைப்பு கிடைக்காமல் இருக்கிறது" என்று தெரிவித்தனர். Also Read: கொரோனா காலத்தில் குழந்தை தத்தெடுப்பு? வலை விரிக்கும் மோசடிக் கும்பல்... உஷார்! மகாராஷ்டிரா பெண்கள் மற்றும் குழந்தைகள் நலத்துறை அமைச்சக அதிகாரிகள் ஆஜராகி, தத்தெடுப்பு ஆவணங்களை முறையாகப் பதிவு செய்யவில்லை என்று வாதிட்டனர். இருதரப்பு வாதங்களையும் கேட்ட நீதிபதிகள், குழந்தையைத் தத்தெடுத்த தம்பதியிடமே ஒப்படைக்க உத்தரவிட்டனர். ``வழக்கமாக இயற்கை நிகழ்வுகளால்தான் குழந்தைகள் ஆதரவின்றி போகும். ஆனால் இங்கு கோர்ட் உத்தரவால் குழந்தை ஒன்று ஆதரவற்று இருக்கிறது' என்று நீதிபதிகள் தெரிவித்தனர். இவ்வழக்கு தொடர்பாக மகாராஷ்டிரா அரசு அறிக்கை தாக்கல் செய்ய உத்தரவிட்ட நீதிமன்றம் வழக்கை 3 வாரத்திற்கு ஒத்தி வைத்தது. தத்து கொடுக்கப்பட்ட குழந்தைக்கு தற்போது இரண்டரை வயதாகிறது.
http://dlvr.it/S24fj6

Read More

கொரோனா 3-வது அலையை எதிர்கொள்ள தயாராக இருக்க வேண்டும் - பிரதமர் மோடி

கொரோனா வைரஸின் மூன்றாவது அலையை எதிர்கொள்ள தயாராக இருக்க வேண்டும் என பிரதமர் மோடி அறிவுறுத்தியுள்ளார்.  கொரோனா தடுப்பு பணிகள் குறித்து முன்களப் பணியாளார்களுக்கு வழங்கப்படும் பயிற்சியின் தொடக்க விழாவில் பிரதமர் மோடி பேசினார். அப்போது, வேகமாக உருமாறி புதிய சவால்களை கொடுத்துக் கொண்டிருக்கும் கொரோனாவைத் தடுக்க தயாராக இருக்க வேண்டும் என பிரதமர் குறிப்பிட்டார். கொரோனா வைரஸ் கண்டிப்பாக உருமாற பல வாய்ப்புகள் இருப்பதாக தெரிவித்துள்ள மோடி, அதனை எதிர்கொள்ள தயாராகி வருவதாக தெரிவித்துள்ளார். குறிப்பாக, மருத்துவர்கள் மற்றும் செவிலியர்களின் பணிச்சுமையை குறைக்கும் வகையில், முதல் இரண்டு அலைகளில் கற்றுக்கொண்ட பாடங்களை வைத்து ஒரு லட்சம் முன்களப் பணியாளர்களை தயார்படுத்தி வருவதாகவும் மோடி தெரிவித்துள்ளார். வரும் ஜூன் 21ஆம் தேதி முதல் அனைத்து அரசு மையங்களிலும் 18 வயதுக்கு மேற்பட்டவர்களுக்கும் இலவசமாக தடுப்பூசி செலுத்தப்படும் எனவும் மோடி தெரிவித்துள்ளார்.
http://dlvr.it/S231Ny

Read More