"2019 தோல்வியின் காயத்தை இந்த டெஸ்ட் சாம்பியன்ஷிப் கோப்பை ஆற்றும்" - ராஸ் டெய்லர்

2019 உலகக் கோப்பை இறுதிப் போட்டியில் பெற்ற தோல்விக்கான காயத்தை உலக டெஸ்ட் சாம்பியன்ஷிப் வெற்றி சரி செய்யும் என்று நியூசிலாந்து அணியின் மூத்த வீரர் ராஸ் டெய்லர் தெரிவித்துள்ளார். இங்கிலாந்தின் சவுத்தாம்டன் நகரில் நடைபெற்று வந்த உலக டெஸ்ட் சாம்பியன்ஷிப் இறுதிப் போட்டியில் 8 விக்கெட் வித்தியாசத்தில் நியூசிலாந்து வெற்றிப்பெற்று கோப்பையை கைப்பற்றியது. 5 நாள் ஆட்டங்கள் கொண்ட டெஸ்ட் போட்டி மழையின் காரணமாக 6ஆவது நாளான நேற்று ரிசர்வ் நாளில் முடிவுக்கு வந்தது. இதில் இந்திய அணியை மிகவும் எளிதாக தோற்கடித்தது நியூசிலாந்து அணி. இதில் நியூசிலாந்து அணியின் அனுபவ வீரரான ராஸ் டெய்லர் 47 ரன்கள் அடித்து இறுதிவரை ஆட்டமிழக்காமல் இருந்தார். இந்த வெற்றி குறித்து பேசிய ராஸ் டெய்லர் "2019 எங்களுக்கு மிகவும் கடினமாக இருந்தது. அதனை மறக்க இந்த வெற்றி எங்களுக்கு பெரிதும் உதவும். இந்த இரண்டு ஆண்டு காலத்தில் எங்களுக்கு குடும்பத்தினர், நண்பர்கள் என பெரிதும் உற்சாகப்படுத்தினர். இந்த வெற்றி அவர்களுடன் இன்னும் நல்ல உறவுகளை தொடர கைகொடுக்கும். நியூசிலாந்து அணிக்கு கேப்டன் பொறுப்பை ஏற்ற முதல் நாளில் இருந்தே வில்லியம்சனுடன் இருக்கிறேன். கடந்த 2 ஆண்டுகளாக கடினமாக உழைத்துள்ளோம். அதற்கான பரிசுதான் இப்போது உலக சாம்பியன்களாக மாறியிருக்கிறோம்" என்றார். மேலும் பேசிய அவர் "நான் ஆரம்ப காலத்தில் விளையாட தொடங்கிய நாட்களில் எங்களிடம் தரம் இருக்கவில்லை. ஆனால் ஓர் அணியாக ஒன்றாக இருந்தோம். அது வெற்றிக்கு கைக்கொடுத்தது. இப்போது தரமும் ஒற்றுமையும் ஒன்றாக இருப்பதால் வெற்றி வசமாகிறது. இதற்கு ரசிகர்களும் ஓர் காரணம். அவர்கள் எப்போதும் எங்கள் மீது நம்பிக்கை வைத்திருக்கிறார்கள். இப்போது நிச்சயம் இந்த வெற்றியின் மூலம் அவர்கள் பெருமை அடைந்திருப்பார்கள்" என்றார் ராஸ் டெய்லர்.
http://dlvr.it/S2M27L

Read More

விஜய்யின் 'பீஸ்ட்' சர்ச்சை: அதிகரிக்கும் தமிழ் அல்லாத தலைப்புகள்... ஜிஎஸ்டிதான் காரணமா?

விஜய் நடிப்பில் தயாராகும் 'பீஸ்ட்' படத்தின் தலைப்பு விவாதத்திற்கு உள்ளாகியுள்ளது. ஆங்கிலத்தில் தலைப்பு வைக்கப்பட்டுள்ளதாக பலரும் எதிர்ப்பு தெரிவித்துள்ளனர். 'மாஸ்டர்' படத்தின் வெற்றியைத் தொடர்ந்து நெல்சன் திலீப் குமார் இயக்கும் படத்தில் விஜய் நடிக்கிறார். தலைப்பு வைக்காமல் தொடங்கப்பட்ட இந்தப் படத்தில் விஜய் உடன் பூஜா ஹெக்டே, யோகி பாபு உள்ளிட்டோர் இடம்பெற்றுள்ளனர். முதற்கட்ட படப்பிடிப்பு ஜார்ஜியா நாட்டில் நடந்து முடிந்த நிலையில் இரண்டாம் கட்ட படப்பிடிப்பிற்கு படக்குழுனர் தயாராகி வருகின்றனர். இந்த நிலையில் விஜய்யின் பிறந்தநாளை முன்னிட்டு 'பீஸ்ட்' என்ற தலைப்பை தயாரிப்பு நிறுவனம் அறிவித்து. இந்த தலைப்பை விஜய் ரசிகர்கள் கொண்டாடி வருகின்றனர் . மேலும் ட்விட்டர் உள்ளிட்ட சமூக வலைதளங்களில் விஜய் பட தலைப்பு ட்ரெண்டானது. ஆனால் அந்த தலைப்பே தற்போது விவாதத்தை ஏற்படுத்தியுள்ளது. தமிழ் திரைப்படங்களுக்கு தமிழில் பெயர் வைத்தால் கேளிக்கை வரி ரத்து என்று 2006ஆம் ஆண்டு ஜூன் 22ஆம் தேதி அப்போதைய முதல்வர் கருணாநிதி அறிவித்தார். அதன்படி தமிழில் பெயர் வைக்கப்பட்ட படங்களுக்கு கேளிக்கை வரி விலக்கு அளிக்கப்பட்டன. குறிப்பாக அந்த சமயத்தில் வேறு மொழி தலைப்பு வைந்திருந்தவர்களும் தலைப்பை மாற்றி வரி விலக்கு பெற்றனர். இதைத்தொடர்ந்து 2011ஆம் ஆண்டு ஜெயலலிதா தலைமையிலான ஆட்சி தமிழகத்தில் அமைந்த போது கேளிக்கை வரி விலக்கிற்கு கூடுதல் விதிகளை வகுக்கப்பட்டது. 27.6.2011 அன்று வெளியிடப்பட்ட ஆணையில் திரைப்படத்தின் தலைப்பு தமிழில் இருக்க வேண்டும், தணிக்கையில் U சான்றிதழ் பெற்றிருக்க வேண்டும், கதைக்கரு தமிழ் மொழி மற்றும் பண்பாட்டின் வளர்ச்சிக்கு உகந்ததாக இருக்க வேண்டும், ஆபாசம் மற்றும் வன்முறை காட்சிகள் அதிகம் இடம்பெற கூடாது எனக் கூறியது. அதை உறுதி செய்து கேளிக்கை வரி விலக்கு அளிக்க புதிய குழுவும் அமைக்கப்பட்டது. சுமார் 10 ஆண்டுகள் தமிழ் திரைப்படங்களுக்கு கேளிக்கை வரி விலக்கு அளிக்கப்பட்டு வந்தன. அதன் முழு சலுகைகளும் தயாரிப்பாளர்கள், விநியோகஸ்தர்கள், திரையரங்கு உரிமையாளர்கள் என மூன்று தரப்பினருக்கும் சென்றடைந்தது. ஆனால் ஜி.எஸ்.டி வரி அமல்படுத்தப்பட்ட பிறகு கேளிக்கை வரி விளக்கிற்கு இடம் இல்லாமல் போனது. இதன்பின் கடந்த சில ஆண்டுகளாக தமிழ் இயக்குனர்கள் திரைப்படங்களுக்கு தமிழ் அல்லாத மொழிகளிலும் தலைப்பு வைத்து வருகின்றனர். இதை இவ்வளவு நாள் யாரும் பெரிதாக எடுத்துக்கொள்ளவில்லை. ஆனால் தற்போது விஜய் படத்திற்கு வைக்கப்பட்டுள்ள பீஸ்ட் என்ற தலைப்பு விவாதத்தை தொடக்கியுள்ளது. குறிப்பாக இதற்கு முன் விஜய் நடித்த சர்கார், பிகில், மாஸ்டர் ஆகிய படங்களுக்கும் தமிழ் அல்லாத மொழியில் தலைப்பு வைத்துள்ளானர் என பொது தளத்தில் உள்ளவர்களும், ரசிகர்கள் அல்லாத நடுநிலையாளர்களும் சுட்டிக்காட்டுகின்றனர். மேலும் இந்த விவகாரத்தில் விஜய் தலையிட்டு தலைப்பை தமிழில் வைக்க வலியுறுத்த வேண்டும் என்றும் அவர்கள் கோரிக்கை வைக்கின்றனர். விஜய் படம் தவிர சிவகார்த்திகேயன் நடிக்கும் டாக்டர், டான், விக்ரம் நடிக்கும் கோப்ரா உள்ளிட்ட பல படங்களுக்கும் தமிழ் அல்லாத மொழிகளில் தலைப்பு வைத்துள்ளனர். அதையும் மாற்ற வேண்டுமென்று கோரிக்கை எழுந்துள்ளது. அதேசமயம் தன்னுடைய கதைக்கு என்ன தலைப்பு வைக்க வேண்டும், வசனம் வைக்க வேண்டும் என்பது படைப்பாளிகளின் கருத்து சுதந்திரம். அதில் தலையிட்டு தலைப்பை மாற்ற சொல்வது, காட்சிகளை நீக்க சொல்வது கருத்து சுதந்திரத்தை நெரிக்கும் செயல் என்று சினிமா துறையினர் கூறுகின்றனர். தமிழ் சினிமாவில் அஜித், சூர்யா உள்ளிட்ட நடிகர்களின் படங்களுக்கு முடிந்த வரை தமிழ் பெயர்களை தலைப்பாக வைக்கப்படுகிறது. இதை அனைத்து படக்குழுவினரும் பின்பற்ற வேண்டும் என்று பலரும் வேண்டுகோள் வைக்கின்றனர். -செந்தில் ராஜா
http://dlvr.it/S2LZDm

Read More

பிரதமரிடம் 4, 5 முறை நீட் வேண்டாம் என வலியுறுத்தினேன் - முதல்வர் மு.க.ஸ்டாலின்

பிரதமர் மோடியை நேரில் சந்தித்த போது நீட் தேர்வு வேண்டாம் என 4,5 முறை வலியுறுத்தியதாக முதல்வர் மு.க.ஸ்டாலின் தெரிவித்துள்ளார். சட்டப்பேரவை கூட்டத்தில் இன்று பேசிய எதிர்க்கட்சி தலைவர் எடப்பாடி பழனிசாமி நீட் தேர்வு நடைபெறுமா, இல்லையா என தெளிவுபடுத்த வேண்டும் என்றும் மாணவர்கள் குளப்பத்தில் உள்ளார்கள் என்றும் கூறினார். அதற்கு பதில் அளித்து பேசிய முதல்வர் ஸ்டாலின், “பிரதமர் மோடியை நேரில் சந்தித்த போது நீட் தேர்வு வேண்டாம் என 4,5 முறை வலியுறுத்தினேன். 2010ல் விரும்புகின்ற மாநிலங்கள் மட்டும் நீட் தேர்வில் பங்கேற்கலாம் என்ற நிலைமை இருந்தது. தற்போது அனைத்து மாநிலங்களுக்கும் நீட் கட்டாயம் என்ற நிலை உருவாகியுள்ளது. நீட் தேர்வில் இருந்து விலக்கு பெற போராடுவோம்; வெற்றி பெறுவோம். அதிமுகவும் துணை நிற்க வேண்டும். நீட் தேர்வை ரத்து செய்வோம் என்ற நம்பிக்கை உள்ளது. நீதிபதி ராஜன் தலைமையிலான குழு அளிக்கும் அறிக்கையின் அடிப்படையில் சட்ட ரீதியான நடவடிக்கையை அரசு மேற்கொள்ளும்” என்றார். இதனையடுத்து பேசிய எடப்பாடி பழனிசாமி நீட் தேர்வு விவகாரத்தில் அதிமுக நிச்சயம் துணைநிற்கும் என்று உறுதி அளித்தார். இதனிடையே, “காங்கிரஸ் - திமுக கூட்டணி மத்தியில் ஆட்சியில் இருக்கும் போதுதான் நீட் வந்தது என்பது உண்மைதான். ஆனால், அது தமிழகத்தில் வரவில்லை. ஜெயலலிதா இருக்கும் வரை நீட் தேர்வு நடைபெறவில்லை. எடப்பாடி பழனிசாமி ஆட்சிக்கு வந்த பிறகுதான் நீட் தமிழத்திற்கு வந்தது” என்றார் மருத்துவத்துறை அமைச்சர் மா.சுப்ரமணியன் கூறினார்.
http://dlvr.it/S2JKG2

Read More

கேரளா: வரதட்சணையாக கொடுத்த காரின் மதிப்பு குறைவு; இறந்துகிடந்த மனைவி; நடந்தது என்ன?

கேரள மாநிலம் கொல்லம் சாஸ்தாங்கோட்டையைச் சேர்ந்தவர் கிரண்குமார். இவர் மோட்டார் வெகிக்கிள் இன்ஸ்பெக்டராக இருந்துவந்தார். இவருக்கும் கொல்லம் நிலமேடு பகுதியைச் சேர்ந்த விஸ்மயா என்ற பெண்ணுக்கும் கடந்த ஆண்டு மே 31ம் தேதி திருமணம் நடந்தது. இந்த நிலையில் கடந்த திங்கள்கிழமை அதிகாலை நேரத்தில் கணவன் வீட்டில் உள்ள பாத்ரூமில் தூக்கில் தொங்கி இறந்த நிலையில் விஸ்மயாவின் உடல் கண்டுபிடிக்கப்பட்டது. இதுகுறித்து பெண்கள் ஆணையம் தாமாக முன்வந்து வழக்கு பதிவு செய்தது. கிரண்குமாருக்கு வரதட்சணையாக கொடுத்த காரின் விலை மதிப்பு குறைவு என்பதால் அடிக்கடி விஸ்மயாவை டார்ச்சர் செய்ததாக விசாரணையில் தெரியவந்துள்ளது.வரதட்சணை பிரச்னையால் மரணமடைந்த விஸ்மயா விஸ்மயா - கிரண்குமார் திருமணத்தின்போது வரதட்சணையாக நூறு பவுன் நகை, 1.20 ஏக்கர் நிலம், சுமார் பத்துலட்சம் ரூபாய் மதிப்புள்ள கார் ஆகியவை கொடுத்துள்ளனர். கார் வேண்டாம் அதற்கு பதில் பணம் தாருங்கள் என கிரண்குமார் கேட்டதாகக் கூறப்படுகிறது. ஆனால், லோன் எடுத்து வரதட்சணை கொடுத்ததால் பணம் கொடுக்க முடியாத நிலை ஏற்பட்டதாக விஸ்மயாவின் தந்தை திரிவிக்கிரமன் நாயர் தெரிவித்துள்ளார். இதற்கிடையில் விஸ்மயா தனது உறவினர்களுக்கு வாட்ஸ் அப் சாட் மூலம் அனுப்பிய மெசேஜ் வெளியாகியுள்ளது. விஸ்மயா வாட்ஸ் அப் சாட்டில், "கோபம் வந்தால் அவர் என்னை அடிப்பார். அவருக்கு கொடுத்த கார் போதாது என என்னையும், அப்பாவையும் திட்டினார். கொஞ்சம் நேரம் பொறுத்துப்பார்த்தேன், நிறுத்தவிலை. எனவே அறையைவிட்டு வெளியேற முயன்ற என்னை பிடிச்சு இழுத்து பலமுறை தாக்கினார். அடிபொறுக்காமல் கீழே விழுந்த என்னை காலால் மிதித்து, முகத்தில் காலை வைத்து அழுத்தினார்" என அந்த வாட்ஸ் அப் சாட்டில் கூறியிருந்தார். மேலும் அடிபட்டதால் ஏற்பட்ட காயத்தின் புகைப்படத்தையும் வாட்ஸ் அப்பில் பகிர்ந்திருந்தார். harassment கிரண்குமாருக்கு வரதட்சணையாக ஹோண்டா அமேஸ் கார் கொடுத்ததாக கூறப்படுகிறது. அதைவிட உயர்ந்த ரக கார் வேண்டும் அல்லது பணம் வேண்டும் எனக்கூறி டார்ச்சர் செய்யததாக கூறப்படுகிறது. இந்த வழக்கில் கிரண்குமார் கைது செய்யப்பட்டுளார். அவரது பெற்றோரிடமும் விசாரணை நடைபெற்று வருகிறது. கிரண்குமார் கைதைத் தொடர்ந்து மோட்டார் வெகிக்கிள் இன்ஸ்பெக்டர் பதவியில் இருந்து கிரண்குமார் சஸ்பெண்ட் செய்யப்பட்டுள்ளார். கிரண்குமார் பலமுறை விஸ்மயாவை தாக்கியதாக விசாரணையில் தெரியவந்துள்ளது. எனவே வரதட்சணை கொடுமையால் விஸ்மயா இறந்ததாகவும். அவர் கொலை செய்யப்பட்டிருக்கலாம் எனவும் உறவினர்கள் கூறியுள்ளனர். இதுகுறித்து போலீஸார் கூறுகையில், "விஸ்மயாவை அவரது கணவர் தாக்கியதால் அவர் உடலில் காயங்கள் ஏற்பட்டிருந்தன. அதை விஸ்மயா வாட்ஸ் அப் மூலம் உறவினர்களுக்கு அனுப்பிக்கொடுத்திருந்தார். தொடர்ந்து கணவர் தாக்குவதாகத் தெரிவித்திருந்தார். இதுபற்றி கிரண்குமாரிடம் விசாரித்தபோது, கடந்த திங்கட்கிழமை இருவருக்குள்ளும் வாக்குவாதம் நடந்துள்ளதாகத் தெரிவித்தார். மேலும் வாக்குவாதம் முற்றியதால் விஸ்மயா அழுதுகொண்டே பாத்ரூமிற்கு சென்றதாகவும், சாதாரணமாக பாத்ரூமிற்கு போவது போன்று அவர் செல்கிறார் என நினைத்ததாகவும் அவர் கூறினார். ஆனால் 20 நிமிடங்கள் கடந்த பிறகும் அவர் வெளியே வரவில்லை. இதைத்தொடர்ந்து கதவை தட்டியபிறகும் அவர் திறக்கவில்லை. கதவை உடைத்துக்கொண்டு சென்று பார்த்தபோது தூக்கில் தொங்கிக்கொண்டிருந்தார் என கிரண்குமார் தெரிவிக்கிறார். போஸ்ட்மார்ட்டம் ரிப்போர்ட் வந்த பிறகுதான் மரணத்திற்கான முழு விவரமும் கூறமுடியும்" என்றனர். வரதட்சணையாக கொடுத்த காரின் மதிப்பு குறைவு என்பதால் மனைவியை கொடுமைப்படுத்தி, கடைசியில் மரணம் வரை சென்ற சம்பவம் கேரளத்தை உலுக்கியுள்ளது.
http://dlvr.it/S2HC9q

Read More

மும்பை மாநகராட்சி மருத்துவமனையில் நோயாளியை கடித்து குதறிய எலிகள்! - அதிர்ச்சி சம்பவம்

மும்பையில் மாநகராட்சி நிர்வாகம் காட்கோபரில் ராஜாவாடி என்ற மருத்துவமனையை நடத்தி வருகிறது. இம்மருத்துவமனைக்கு கிழக்கு புறநகர் பகுதியை சேர்ந்த ஏழை நோயாளிகள் அதிக அளவில் வருவதுண்டு. இம்மருத்துவமனையில் குர்லாவை சேர்ந்த ஸ்ரீனிவாஸ் யெல்லப்பா(24) என்ற நோயாளி கல்லீரல் தொடர்பான பிரச்னைக்காக சிகிச்சைக்கு சேர்க்கப்பட்டு இருந்தார். மயக்க நிலையில் இருந்த அவரை ஊழியர்கள் கீழ் தளத்தில் உள்ள அவசர சிகிச்சை பிரிவு வார்டில் சேர்த்திருந்தனர். அவர் மயக்க நிலையில் இருந்த போது உள்ளே வந்த எலிகள் அவரது கண்ணிற்கு கீழே கடித்து குதறின. அதிர்ஷ்டவமாக இதில் எலிகள் கண்ணை கடிக்கவில்லை. கண்ணை கடித்திருந்தால் கண் பார்வையே பறிபோயிருக்கும். எலி கடித்த இடத்தில் டாக்டர்கள் மருந்து வைத்து கட்டி இருந்தனர். நோயாளியின் சகோதரி அதனை பார்த்து, என்ன ஆனது என்று கேட்டபோது, `எலி கடித்திருக்கலாம்’ என்று ஊழியர்கள் சர்வ சாதாரணமாக தெரிவித்ததாக தெரிகிறது. தற்போது நோயாளியின் உடல் நிலை மிகவும் மோசமடைந்துள்ளது. கண்ணிற்கு எந்த வித பாதிப்பும் ஏற்படவில்லை என்று மருத்துவமனையின் டீன் டாக்டர் வித்யா தாக்குர் தெரிவித்தார். ``நோயாளி சேர்க்கப்பட்டு இருந்த வார்டு கீழ் தளத்தில் இருக்கிறது. வார்டுக்கு வெளியில் உள்ள பகுதியில் பொதுமக்கள் குப்பைகளை போட்டுள்ளனர். இதனால் எலிகள் வந்திருக்கலாம்” என்று தெரிவித்தார்.srinivas in hospital இச்சம்பவம் குறித்து மேயர் கிஷோரி அளித்த பேட்டியில், ``எலிகள் கடித்த நோயாளியின் நிலை சரியில்லை. இச்சம்பவம் நடந்திருக்ககூடாது. இது குறித்து விசாரணைக்கு உத்தரவிடப்பட்டுள்ளது. இச்சம்பவத்திற்கு காரணமானவர்கள் மீது கடும் நடவடிக்கை எடுக்க உத்தரவிடப்பட்டுள்ளது” என்று தெரிவித்தார். மருத்துவமனையில் நோயாளியை எலிகள் கடித்து குதறிய சம்பவம் மிகவும் அதிர்ச்சியை ஏற்படுத்தி இருக்கிறது. இதற்கு முன்பு மும்பை காந்திவலியில் உள்ள பாபாசாஹேப் அம்பேத்கர் மருத்துவமனையில் 3 நோயாளிகளை எலிகள் கடித்து குதறின. அவர்கள் ஒவ்வொருவருக்கும் தலா 2 லட்சம் ரூபாய் வழங்க மனித உரிமை கமிஷன் உத்தரவிட்டது. மும்பையில் மாநகராட்சி நிர்வாகம் லோக்மான்ய திலக் மருத்துவமனை, கே.இ.எம். உட்பட சில மருத்துவமனைகளை சொந்தமாக நடந்தி வருகிறது.
http://dlvr.it/S2GlVc

Read More

பெண் தயாரிப்பாளரைத் துன்புறுத்தினாரா சிவசேனா எம்.பி.சஞ்சய் ராவத்? போலீஸ் விசாரிக்க கோர்ட் உத்தரவு!

கடந்த 10 நாட்களுக்கு முன் மும்பையில் போலி டாக்டர் பட்டம் பெற்றது தொடர்பாக பெண் தயாரிப்பாளரும், மனோதத்துவ நிபுணருமான ஸ்வப்னா பட்கர் கைது செய்யப்பட்டார். அவர் தற்போது தன்னை சிவசேனா எம்.பி. சஞ்சய் ராவத்தும், தனது முன்னாள் கணவரும் சேர்ந்து தன்னை துன்புறுத்துவதாகவும், பின் தொடர்வதாகவும் கூறி மும்பை உயர்நீதிமன்றத்தில் தனது வழக்கறிஞர் அபா சிங் மூலம் மனுத்தாக்கல் செய்தார். ஸ்வப்னா இம்மனு விசாரணைக்கு வந்தபோது வழக்கறிஞர் அபா சிங் ஆஜராகி மனோதத்துவ நிபுணரான தனது கட்சிக்காரர் ஸ்வப்னா போலி பட்டம் பெற்றதாகக் கூறி கைது செய்யப்பட்டு சிறையில் அடைக்கப்பட்டுள்ளார். எனது கட்சிக்காரர் மீது ஒட்டு மொத்த போலீஸ் படையும் கட்டவிழ்த்து விடப்பட்டுள்ளது. இதன் மூலம் பழிவாங்கும் நோக்கத்தில் போலீஸார் இக்காரியத்தில் ஈடுபட்டுள்ளதாகத் தெரிகிறது. எனது கட்சிக்காரரை எம்.பி.சஞ்சய் ராவத்தின் தூண்டுதலால் துன்புறுத்துவதோடு அவரை ஒருவர் பின் தொடர்கின்றார். இது தொடர்பாக தனித்தனியாக மூன்று புகார் மனுக்கள் தாக்கல் செய்யப்பட்டு இருப்பதாக தெரிவித்தார்.ஆனால் அம்மனுக்கள் மீது எந்த வித நடவடிக்கையும் எடுக்கப்படவில்லை. இதற்கு கருத்து தெரிவித்த நீதிபதிகள் சாம்பாஜி ஷிண்டே, ஜமாதார் உங்களது கட்சிக்காரர் கைது செய்யப்பட்டதை எதிர்த்து தனியாக மனுத்தாக்கல் செய்யும்படி கேட்டுக்கொண்டனர். மேலும் துன்புறுத்தல் மற்றும் பின் தொடர்தல் தொடர்பாக மும்பை போலீஸார் விசாரணை நடத்தி வரும் 24ம் தேதி அறிக்கை தாக்கல் செய்யவேண்டும் என்று மும்பை போலீஸ் கமிஷனருக்கு உத்தரவிட்டனர். சஞ்சய் ராவத் தரப்பில் ஆஜரான வழக்கறிஞர் பிரசாத் ஆஜராகி சம்பந்தப்பட்ட பெண் சஞசய் ராவத்தின் குடும்ப நண்பர் அவருக்கு மகளைப்போன்றவர் என்றும் குறிப்பிட்டார். ஸ்வப்னா சிவசேனா தலைவர் பால்தாக்கரே வாழ்க்கை வரலாற்றை சித்தரிக்கும் மராத்தி படத்தை தயாரித்துள்ளார். அவர் போலி பி.எச்.டி. பட்டம் பெற்று அதனைக்கொண்டு மும்பையில் உள்ள மருத்துவமனையில் மனோதத்துவ நிபுணராக பணியாற்றி வந்த போது கைது செய்யப்பட்டார் என்பது குறிப்பிடத்தக்கது.
http://dlvr.it/S2DQn6

Read More

மேற்கு வங்கம்: முன்னாள் தலைமைச் செயலாளர் மீது மத்திய அரசு ஒழுங்கு நடவடிக்கை

மேற்குவங்க முன்னாள் தலைமைச் செயலாளார் அலபன் பந்தோபாத்யாய் மீது ஒழுங்கு நடவடிக்கையை தொடங்கியுள்ள மத்திய அரசு அவர் மீதான குற்றச்சாட்டுகளுக்கு 30 நாட்களுக்குள் பதிலளிக்கவேண்டும் என உத்தரவிட்டிருக்கிறது. யாஸ் புயல் சேதங்கள் குறித்து பிரதமர் நரேந்திரமோடி கலந்துகொண்ட ஆய்வு கூட்டத்தை மேற்கு வங்க முதல்வர் மம்தா பானர்ஜி தவிர்த்தார். இந்தக் கூட்டத்தில் அப்போது தலைமைச் செயலாளராக இருந்த அலபன் பந்தோபாத்யாயும் கலந்துகொள்ளவில்லை. இதை தொடர்ந்து அவரை மத்திய அரசு பணிக்கு மாற்றி உத்தரவிடப்பட்டது.  ஆனால், அவர் ஓய்வு பெற்றுவிட்டதாக அறிவித்த மேற்கு வங்க முதல்வர் மம்தா பானர்ஜி அவரை தனது ஆலோசகராக நியமித்தார். இந்த நிலையில் மத்திய அரசின் உத்தரவுகளை மதிக்காமல் நடந்ததற்காக அலபன் மீது ஒழுங்கு நடவடிக்கை தொடங்கப்பட்டிருக்கிறது. இந்த நடவடிக்கையின் அடிப்படையில் அவருக்கு வரவேண்டிய ஓய்வூதிய பலன்களை நிறுத்தி வைக்க அரசுக்கு அதிகாரம் உள்ளது. இதனால் அலபன் பந்தோபாத்யாய்க்கு அழுத்தம் அதிகரித்துள்ளது. மேற்குவங்கத்தில் இந்த ஆண்டு ஏப்ரல் மாதம் நடந்து முடிந்த சட்டமன்ற தேர்தலில் திரிணாமுல் காங்கிரஸும், பாஜகவும் கடுமையான பலப்பரீட்சை நடத்தியது. தேர்தலுக்கு சிலவாரங்களுக்கு முன்பு திரிணாமுல் காங்கிரஸை சேர்ந்த பல தலைவர்கள் பாஜகவில் சேர்ந்தனர். கடுமையான மோதலுடன் நடந்து முடிந்த சட்டமன்ற தேர்தலில் திரிணாமுல் காங்கிரஸ் கட்சி 213 இடங்களில் அறுதி பெரும்பான்மையுடன் வெற்றிபெற்றது, பாரதிய ஜனதா கட்சி 77 இடங்களில் வெற்றிபெற்றது. 
http://dlvr.it/S2CNGF

Read More