2 டோஸ் தடுப்பூசிக்கு பிறகும் தாக்குகிறதா டெல்டா வகை கொரோனா? - ஆராய்ச்சிகள் சொல்வதென்ன?

கொரோனாத் தொற்று உலகம் முழுவதும் பரவி தற்போது உருமாற்றமடைந்து முதல், இரண்டாம் மற்றும் மூன்றாம் அலைகளாக பரவிவருகின்றன. முதல் அலையைவிட இரண்டாம் அலையின் தாக்கம் உலகம் முழுவதுமே அதிகமாக இருக்கிறது. உருமாற்றமடைந்த வைரஸுகளின் பரவும் வேகம் மற்றும் பாதிக்கும் தன்மையை வைத்து உலக சுகாதார நிறுவனம் அவற்றை ஆல்பா, பீட்டா, காமா மற்றும் டெல்டா என 4 வகைகளாகப் பிரித்தது. அதில் இந்தியாவில் இரண்டாம் அலையில் அதிகளவில் தாக்கத்தை ஏற்படுத்திக் கொண்டிருப்பது டெல்டா  வகைதான் என சமீபத்திய ஆய்வுகள் தெரிவிக்கின்றன. கொரோனா தடுப்பூசி செலுத்திக்கொண்டால் இனி தொற்று நம்மை நெருங்காது என்பவர்களுக்கும், ஒருமுறை கொரோனா தொற்று ஏற்பட்டுவிட்டால் மீண்டும் வராது என்பவர்களுக்கும் அச்சத்தைக் கொடுக்கக்கூடியது இந்த வகை வைரஸ் என்கின்றனர் ஆராய்ச்சியாளர்கள். 2 டோஸ் தடுப்பூசி செலுத்தியவர்களுக்கும் டெல்டா பாதிப்பு மேற்குவங்கம் உள்ளிட்ட 8 மாவட்டங்களில் பாதிக்கப்பட்டவர்களில் 50%க்கும் அதிகமானோர் டெல்டா வைரஸால்தான் பாதிக்கப்பட்டிருப்பதாகவும், மேலும் தடுப்பூசி செலுத்தியும் கொரோனா தொற்று உறுதியானவர்களுக்கும் டெல்டா வகைதான் அதிகளவில் தாக்கியுள்ளதாகவும் ஆராய்ச்சியாளர்கள் கூறுகின்றனர். இதில் குறிப்பாக தடுப்பூசி செலுத்தியபிறகும் டெல்லியைச் சேர்ந்த 3 மருத்துவமனைகளைச் சேர்ந்த சுகாதாரப் பணியாளர்கள் அதிகம் பாதிக்கப்பட்டுள்ளனர். இரண்டு டோஸ் தடுப்பூசிகளும் செலுத்தியவர்களுக்கு கொரோனா தொற்று தாக்கும் வாய்ப்புகள் மிகவும் அரிது என்றாலும், தடுப்பூசி செலுத்திய பலரும் டெல்டா வைரஸால் பாதிக்கப்பட்டிருப்பது கருத்தில் கொள்ளத்தக்கது என்கின்றனர் இந்தியா மற்றும் பிரிட்டனைச் சேர்ந்த ஆராய்ச்சியாளர்கள் பலர். மேலும் இந்த டெல்டா வகையானது மிகவேகமாக பரவக்கூடியது என்றும், நோயெதிர்ப்பு மண்டலத்தையும் விரைவில் தாக்கி ஊடுருவக்கூடியது என்றும், இதுதவிர கொரோனா தொற்றால் பாதிக்கப்பட்டு குணமடைந்தபிறகு உண்டாகியிருக்கும் நோயெதிர்ப்பு சக்தியையும்கூட 20 முதல் 55 சதவிகிதம் வரை அழிக்கக்கூடிய வலிமை படைத்தது என்கின்றனர் ஆராய்ச்சியாளர்கள். மற்ற கொரோனா தடுப்பூசிகளுடன் ஒப்பிடுகையில் கோவிஷீல்டு மற்றும் கோவாக்சின் தடுப்பூசிகளால் உருவாக்கப்பட்ட ஆன்டிபாடிகளின் செயல்திறனானது டெல்டா வைரஸின்மீது சற்றுக் குறைவாகவே இருப்பதாக ஆய்வு முடிவுகள் தெரிவிக்கின்றன. ஆனால், மீதமுள்ள உருமாற்றமடைந்த வகைகளின்மீது தடுப்பூசியின் செயல்பாடு நன்றாகவே இருப்பதாக ஐ.சி.எம்.ஆர் தெரிவிக்கிறது. மேலும், தடுப்பூசியானது ஆன்டிபாடிகள் மேல் மட்டுமல்லாமல் நோயெதிர்ப்பு மண்டலத்தின் மற்ற செயல்பாடுகள்மீதும் நன்றாகவே வேலைசெய்வதாகக் கூறுகிறது. மொத்த பாதிப்பில் 50%க்கும் அதிகமாக டெல்டா வகையின் தாக்கம் கேம்ப்ரிட்ஜ் பல்கலைக்கழகம், இந்திய தேசிய நோய் கட்டுப்பாட்டு மையம், ஜீனோமிக்ஸ் மற்றும் ஒருங்கிணைந்த உயிரியல் நிறுவனம், டெல்லி மருத்துவனைகள் இணைந்து நடத்திய புதிய ஆய்வானது கொரோனா இரண்டாம் அலையில் டெல்டா வைரஸின் தாக்கம் குறித்து மிகத்தெளிவான விளக்கத்தை அளிக்கிறது. மேலும் சில உயிரணு சோதனைகளில் டெல்டா வைரஸானது சுவாசப்பாதை செல்களை எவ்வாறு தாக்கி உடலில் வேகமாக பரவுகிறது என்பதையும் விளக்குகிறது. இந்திய தேசிய நோய் கட்டுப்பாட்டு மையத்தின் இயக்குநர் சுஜீத் சிங் கூறுகையில், இந்தியாவில் கொரோனா இரண்டாம் அலை பரவத் தொடங்கிய டிசம்பர் 2020-இல் ஒரு மாவட்டத்தில் பரவிய டெல்டா வகை, மார்ச் 2021-இல் 52 மாவட்டங்களில் பரவியது. அதுவே ஜூன் மாதத்தில் 174 மாவட்டங்களில் பரவி பாதிப்பை ஏற்படுத்தியிருக்கிறது. இதன்மூலம் டெல்டா வகையின் தீவிரத்தை நம்மால் உணரமுடியும் என்கிறார். குறிப்பாக ஆந்திரா, மேற்குவங்கம், டெல்லி, ஹரியானா, கேரளா, மகாராஷ்டிரா, பஞ்சாப் மற்றும் தெலங்கானா போன்ற எட்டு மாவட்டங்களில் எடுக்கப்பட்ட பரிசோதனைகளில் கண்டறியப்பட்ட உருமாற்றமடைந்த கொரோனா வைரஸுகளில் 50%க்கும் அதிகமானோரை இந்த டெல்டா வகை வைரஸ் தாக்கியிருப்பது தெரியவந்துள்ளது என சிங் கூறுகிறார். அதேசமயம், கொரோனாவில் பல்வேறு வகைகள் பரவினாலும் ஆரம்பத்தில் எடுக்கப்பட்ட பரிசோதனை, சிகிச்சை, கண்காணித்தல், மாஸ்க் அணிதல், சமூக இடைவெளியைக் கடைபிடித்தல் மற்றும் தடுப்பூசி போன்ற அனைத்து முன்னெச்சரிக்கை நடவடிக்கைகளும் முறையாக கடைபிடிக்கப்பட்டு வருகின்றன என்கிறார் அவர். தடுப்பூசியை சமரசம் செய்கிறதா டெல்டா? டெல்டா வகை வைரஸை தடுப்பூசியின் செயல்திறன் சமரசம் செய்வதால் ஏற்கெனவே தடுப்பூசி செலுத்தப்பட்ட சுகாதாரப் பணியாளர்களிடையே பாதிப்பின் தாக்கம் குறைந்திருப்பதாக மற்றொரு இந்திய - பிரிட்டன் ஆராய்ச்சி கூறுகிறது. டெல்லியிலுள்ள ஒரு மருத்துவமனையில் தடுப்பூசி செலுத்தப்பட்ட 3,800 ஊழியர்களில் 30 பேரை மட்டுமே கொரோனா வைரஸ் தாக்கியுள்ளது எனவும், அவர்களை தாக்கியது டெல்டா வகைதான் எனவும் கண்டறியப்பட்டுள்ளது. அதேபோல் மற்ற இரண்டு மருத்துவமனைகளில் பாதிக்கப்பட்டவர்களிலும் டெல்டா வகைதான் அதிகம் கண்டறியப்பட்டுள்ளதாகவும் அந்த ஆராய்ச்சி கூறுகிறது. அதேசமயம் ஏப்ரல் மற்றும் மே மாதங்களில் இரண்டு டோஸ் தடுப்பூசியும் செலுத்தப்பட்ட சுகாதாரப் பணியாளர்களை 10 குழுக்களாக பிரித்து கவனித்ததில் அவர்களில் தொற்று உறுதியானவர்களைத் தாக்கியது டெல்டாவகைதான் எனவும், ஆனால் அவர்களிடையே வைரஸின் தாக்கம் அதிகமாக இல்லை; அதாவது அவர்களுக்கு ஆக்சிஜன் உதவி மட்டுமே தேவைப்பட்டிருக்கிறது. ஆனால் வெண்டிலேஷன் உதவி தேவைப்படவில்லை எனவும் அந்த ஆராய்ச்சி முடிவில் தெரியவந்துள்ளது. அதேநேரத்தில், கொரோனா வைரஸானது மிகவேகமாக உருமாற்றமடைந்து வருவதால் அது நோயெதிர்ப்பு மண்டலத்தை எந்த வகையிலும் பாதிக்கும் எனவும், எனவே அதற்கேற்றாற்போல், தடுப்பூசியை மாற்றியமைக்க வேண்டும் எனவும் வேறு சில ஆய்வுகள் கூறுகின்றன. இதுகுறித்து ஐ.சி.எம்.ஆரின் இயக்குநர் பல்ராம் பார்கவா கூறுகையில், தடுப்பூசி மாற்றியமைப்பது ஒரு வழிதான் என்றாலும், எதிர்காலத்தில் தேவைப்பட்டால் மட்டுமே மாற்றியமைக்கப்படும் என்கிறார்.
http://dlvr.it/S2gJDc

Read More

ஐக்கிய அரபு அமீரகத்தில் டி20 உலக கோப்பை தொடர் - பிசிசிஐ

ஐக்கிய அரபு அமீரகத்தில் 2021 டி20 உலக கோப்பை தொடர் நடத்தப்படும் என இந்திய கிரிக்கெட் வாரிய செயலாளர் ஜெய் ஷா தெரிவித்துள்ளார். இந்தியாவில் நிலவும் கொரோனா தொற்று பரவலை கருத்தில் கொண்டு இந்த மாற்றம் மேற்கொள்ளப்பட்டுள்ளதாக கூறப்படுகிறது. இந்த தகவலை சர்வதேச கிரிக்கெட் கவுன்சிலிடம் இன்று பிசிசிஐ தெரிவித்துள்ளது. பிசிசிஐ தலைவர் சவுரவ் கங்குலியும் இந்த தகவலை தெரிவித்துள்ளார். இந்த தொடரை எப்போது நடத்துவது என்ற முடிவை ஐசிசி எடுக்கும் என அவர் தெரிவித்துள்ளார். உத்தேசமாக அக்டோபர் முதல் நவம்பருக்குள் உலக கோப்பை தொடர் நடத்தப்படும் என எதிர்பார்க்கப்படுகிறது. அதற்கு முன்னதாக ஐபிஎல் 2021 சீசனில் விடுபட்டுள்ள போட்டிகளையும் நடத்த பிசிசிஐ முடிவு செய்துள்ளது.  #BREAKING | டி20 உலகக் கோப்பை கிரிக்கெட் போட்டி ஐக்கிய அரபு அமீரகத்திற்கு மாற்றம்இன்றைய லைவ் அப்டேட்ஸ் > https://t.co/rGNG6tTZP1#T20WorldCup | #SouravGanguly | #BCCI pic.twitter.com/JOhLfuWFze — PuthiyathalaimuraiTV (@PTTVOnlineNews) June 28, 2021 உலக கோப்பை தொடரை அமீரகத்தில் நடைபெற்றாலும் இந்த தொடரை ஹோஸ்ட் செய்வது இந்தியாதான் என ஐசிசி முன்னதாக அறிவித்திருந்ததும் குறிப்பிடத்தக்கது. அதனால் இந்திய கிரிக்கெட் அணி தொடரை நடத்தும் அணியாக களம் இறங்குகிறது. 
http://dlvr.it/S2d5Pq

Read More

தமிழ்நாட்டின் புதிய டிஜிபி யார்? டெல்லியில் இன்று முக்கிய ஆலோசனை கூட்டம்

தமிழ்நாட்டின் புதிய டிஜிபியை முடிவு செய்வதற்கான முக்கிய ஆலோசனைக் கூட்டம் டெல்லியில் இன்று நடைபெறுகிறது. இதற்காக தலைமைச் செயலாளர் இறையன்பு உள்ளிட்ட உயரதிகாரிகள் டெல்லி புறப்பட்டு சென்றனர். தமிழக டிஜிபி திரிபாதி, வரும் 30 ஆம் தேதி பணியில் இருந்து ஒய்வு பெறுகிறார். இதனால் புதிய டிஜிபியை தேர்ந்தெடுப்பதற்கான பட்டியல், மத்திய அரசுக்கு அனுப்பப்பட்டது. டெல்லி யூபிஎஸ்சி அலுவலகத்தில் இன்று நடக்கும் கூட்டத்தில், உள்துறை அமைச்சக மூத்த அதிகாரிகள், தமிழக தலைமைச் செயலாளர் இறையன்பு, உள்துறை செயலாளர் பிரபாகர், டிஜிபி திரிபாதி உள்ளிட்டோர் கலந்து கொள்கின்றனர். இதற்காக இறையன்பு உள்ளிட்ட அதிகாரிகள் விமானம் மூலம் டெல்லி புறப்பட்டுச் சென்றனர். தமிழ்நாட்டின் 30 ஆவது டிஜிபி யார்? யாருக்கெல்லாம் வாய்ப்பு? சீனியாரிட்டி அடிப்படையில்தான் டிஜிபி தேர்ந்தெடுக்கப்பட வேண்டும் என்பது விதி. அதன்படி திரிபாதிக்கு அடுத்த சீனியாரிட்டி பட்டியலில் 1987-ம் ஆண்டு பேட்ச் ஐபிஎஸ் அதிகாரிகளாக எம்.கே. ஜா, சைலேந்திரபாபு, கரன்சின்ஹா, பிரதிப் வி பிலிப் ஆகியோர் உள்ளனர். இவர்களில் 60 வயதை எட்டியதால் எம்கே ஜா ஜுலை மாதமும், பிரதீப் பிலிப் செப்டம்பர் மாதமும் ஓய்வு பெறுகின்றனர். சைலேந்திரபாபு, கரன்சின்ஹா அடுத்த ஆண்டு ஓய்வு பெறுகின்றனர். அந்த வகையில் இந்த இருவரும் சீனியாரிட்டி பட்டியலில் முதலிடத்தில் உள்ளனர். சஞ்சய் அரோரா 1988-ம் ஆண்டு பணியில் சேர்ந்தவர். சென்னையில் உயர் பதவிகளை வகித்த சஞ்சய் அரோரா தற்போது மத்திய ரிசர்வ் போலீஸ் பிரிவில் சிறப்பு டி.ஜி.பி.யாக காஷ்மீரில் பணிபுரிந்து வருகிறார். தற்போதைய சூழலில், ரயில்வே டிஜிபி சைலேந்திரபாபு, தீயணைப்புத்துறை டிஜிபி கரன் சின்ஹா, சஞ்சய் அரோரா ஆகிய 3 பேரில் ஒருவர் தமிழ்நாடு புதிய டிஜிபியாக நியமிக்கப்பட வாய்ப்புள்ளதாக தகவல் வெளியாகி உள்ளது.
http://dlvr.it/S2cTG9

Read More

உத்தரப் பிரதேச சட்டப்பேரவைத் தேர்தலில் 100 தொகுதிகளில் போட்டி: ஓவைசி அறிவிப்பு

உத்தரப் பிரதேச சட்டப்பேரவைத் தேர்தலில் 100 தொகுதிகளில் தங்கள் கட்சி போட்டியிடும் என்று அசாதுதின் ஓவைசி தெரிவித்துள்ளார்.   உத்தரப் பிரதேச மாநிலத்தில் யோகி ஆதித்யநாத் தலைமையிலான பாஜக ஆட்சி நடைபெறுகிறது. 403 தொகுதிகளை கொண்ட இம்மாநிலத்தில் அடுத்தாண்டு சட்டப்பேரவைத் தேர்தல் நடைபெற உள்ளது. இதையடுத்து, தேர்தல் பணிகளை காங்கிரஸ் - பாஜக - சமாஜ்வாதி - பகுஜன் சமாஜ் உள்ளிட்ட கட்சிகள் தொடங்கி உள்ளன.   இந்த நிலையில், உத்தரப் பிரதேச சட்டப்பேரவைத் தேர்தலில் 100 தொகுதிகளில் தங்கள் கட்சி போட்டியிடும் என்று ஹைதராபாத் தொகுதியின் நாடாளுமன்ற உறுப்பினர் அசாதுதின் ஓவைசி தெரிவித்துள்ளார். ஏ.ஐ.எம்.ஐ.எம். கட்சியின் தலைவரான அசாதுதின் ஓவைசி தனது ட்விட்டர் பக்கத்தில் இந்தத் தகவலை தெரிவித்துள்ளார். மேலும், தேர்தல் தொடர்பாக வேறு எந்த கட்சியுடனும் நாங்கள் ஆலோசனை நடத்தவில்லை என்றும் ஓவைசி தெரிவித்துள்ளார்.   முன்னதாக, மாயாவதியின், பகுஜன் சமாஜ் கட்சியும், அசாதுதீன் ஓவைசியின் ஏ.ஐ.எம்.ஐ.எம். கட்சியும் கூட்டணி அமைத்து போட்டியிட உள்ளதாக தகவல் வெளியானது. ஆனால், இந்தத் தகவலை இரு கட்சிகளுமே திட்டவட்டமாக மறுத்துள்ளன. 
http://dlvr.it/S2bV1T

Read More

புதுச்சேரி அமைச்சரவை பதவியேற்பு விழா: பதவிப் பிரமாணம் செய்து வைத்த தமிழிசை

புதுச்சேரி அமைச்சரவை பதவியேற்பு விழாவில் துணைநிலை ஆளுநர் தமிழிசை, அமைச்சர்களுக்கு பதவிப் பிரமாணமும், ரகசிய காப்பு பிரமாணமும் செய்து வைத்தார்.   புதுச்சேரி யூனியன் பிரதேசத்தில் என்.ஆர். காங்கிரஸ் - பாஜக தலைமையிலான தேசிய ஜனநாயகக் கூட்டணி ஆட்சி அமைத்துள்ளது. முதலமைச்சராக என்.ஆர். காங்கிரஸ் தலைவர் ரங்கசாமி பொறுப்பேற்றார். நீண்ட இழுபறிக்குப் பின்னர் என்.ஆர். காங்கிரஸுக்கு 3 அமைச்சர்களும், பாஜகவுக்கு 2 அமைச்சர்களும் என அமைச்சர் பதவிகளுக்கான பங்கீடு முடிந்து, பெயர் பட்டியலை முதல்வர் ரங்கசாமி கடந்த 23-ம் தேதி துணைநிலை ஆளுநர் தமிழிசையிடம் வழங்கினார்.   அதைத் தொடர்ந்து பதவியேற்பு விழா இன்று பிற்பகல் 2.30 மணிக்கு தொடங்கி எளிமையாக நடைபெற்று வருகிறது. துணைநிலை ஆளுநர் தமிழிசை சவுந்தரராஜன் பங்கேற்று புதிதாக பொறுப்பேற்கும் அமைச்சர்களுக்கு பதவிப் பிரமாணமும், ரகசிய காப்பு பிரமாணமும் செய்து வைத்தார். என்.ஆர். காங்கிரஸ் சார்பில் லட்சுமி நாராயணன், தேனீ ஜெயக்குமார், சந்திர பிரியங்கா ஆகியோரும், பாஜக சார்பில் நமச்சிவாயம், ஊசுடு தொகுதி எம்எல்ஏ சாய் ஜெ.சரவணக்குமார் ஆகியோரும் அமைச்சர்களாக பதவியேற்றுக் கொண்டனர். புதிய அமைச்சர்களுக்கான துறைகளும் ஒதுக்கீடு செய்யப்பட்டுள்ளன.   முதல்வர் ரங்கசாமி, பேரவைத் தலைவர் செல்வம், எம்எல்ஏக்கள், நியமன எம்எல்ஏக்கள், அரசியல் கட்சித் தலைவர்கள், உயர் அதிகாரிகள் என சுமார் 100 பேர் விழாவில் கலந்து கொண்டுள்ளனர்.
http://dlvr.it/S2YlkM

Read More

புதுச்சேரி: 50 நாட்களுக்குப் பிறகு அமைச்சரவை இன்று பதவியேற்பு

புதுச்சேரியில் புதிய ஆட்சி அமைந்து 50 நாட்களுக்குப் பிறகு தேசிய ஜனநாயக கூட்டணியின் அமைச்சரவை இன்று பதவியேற்கிறது. 40 ஆண்டுகளுக்குப் பின் பெண் எம்எல்ஏ ஒருவர் அமைச்சராக பொறுப்பேற்க உள்ளார். என்.ஆர்.காங்கிரஸ், பாஜக இணைந்த தேசிய ஜனநாயக கூட்டணி புதுச்சேரியின் 15ஆவது சட்டப்பேரவைக்கான தேர்தலில் வெற்றி பெற்றது. புதுச்சேரியில் ஆட்சியமைந்தபின் நீண்ட இழுபறிக்கு இடையே 5 பேர் கொண்ட அமைச்சரவை இன்று பதவியேற்கிறது. என்.ஆர்.காங்கிரஸ் கட்சியில் இருந்து விலகி, பாஜகவில் இணைந்து வெற்றி பெற்ற முன்னாள் அமைச்சர் நமச்சிவாயத்துக்கு மீண்டும் அமைச்சர் பதவி வழங்கப்பட்டுள்ளது. பாரதிய ஜனதா கட்சி சார்பில் தனி தொகுதியில் இருந்து தேர்வு செய்யப்பட்ட சாய் சரவணகுமாரும் அமைச்சராக பொறுப்பேற்க உள்ளார். என்.ஆர்.காங்கிரஸ் சார்பில், முன்னாள் அமைச்சர்கள் லட்சுமி நாராயணன், தேனி ஜெயக்குமார் ஆகியோரும் அமைச்சர்களாகின்றனர். முன்னாள் அமைச்சர் சந்திரகாசுவின் மகளான சந்திர பிரியங்கா, 40 ஆண்டுகளுக்கு பிறகு அமைச்சரவையில் இடம்பெறும் பெண் அமைச்சர் என்ற பெருமைக்குரியவராகிறார்.
http://dlvr.it/S2YNWp

Read More

டோக்கியோ ஒலிம்பிக் போட்டிக்கு தகுதி பெற்றுள்ள தமிழக வீரர்கள் யார் யார்?

ஒலிம்பிக் போட்டிகளில் தங்கப் பதக்கம் வெல்லும் தமிழ்நாட்டு வீரர் - வீராங்கனைகளுக்கு 3 கோடி ரூபாய் பரிசுத் தொகை வழங்கப்படும் என முதலமைச்சர் மு.க.ஸ்டாலின் அறிவித்துள்ளார். தமிழகத்தில் இருந்து ஒலிம்பிக் போட்டிகளில் பங்கேற்கும் வீரர்கள் யார் யார் என பார்ப்போம். டோக்கியோ ஒலிம்பிக் போட்டிக்கு தகுதி பெற்றுள்ள தமிழக வீரர்கள் 1. பவானி தேவி - வாள்சண்டை2. சத்தியன் ஞானசேகரன் - டேபிள் டென்னிஸ்3. சரத் கமல் - டேபிள் டென்னிஸ்4. இளவேனில் வாலறிவன் - துப்பாக்கிச் சுடுதல்5. நேத்ரா குமணன் - பாய்மரப் படகுப்போட்டி6. கணபதி - பாய்மரப் படகுப்போட்டி7. வருண் - பாய்மரப் படகுப்போட்டி ஜப்பான் தலைநகர் டோக்கியோவில் ஜூலை 23 முதல் ஆகஸ்ட் 8 ம் தேதி வரை ஒலிம்பிக் போட்டிகள் நடைபெற உள்ளன. இந்த போட்டிகளில் இந்தியா சார்பில் தமிழகத்தில் இருந்து பங்கேற்கும் வீரர்களின் பட்டியல் இறுதியாகியுள்ளது. இதன்படி வாள் வித்தை பிரிவில் பவானி தேவி, டேபிள் டென்னிஸ் ஆடவர் ஒற்றையர் பிரிவில் சத்தியன் ஞானசேகரன், டேபிள் டென்னிஸில் ஆடவர் ஒற்றையர் மற்றும் கலப்பு இரட்டையர் பிரிவில் சரத் கமல் ஆகியோர் தமிழகத்தில் இருந்து பங்கேற்கின்றனர்.துப்பாக்கி சுடுதல் பிரிவில் இளவேனில் வாலறிவன், பாய்மரப்படகு போட்டியில் மகளிர் பிரிவில் நேத்ரா குமணன் , பாய்மரப்படகு போட்டியில் இணையராக கணபதி, வருண் ஆகியோர் பங்கேற்று விளையாட உள்ளனர். இவர்களை உற்சாகமூட்டும் வகையில் தமிழ்நாடு அரசு சார்பில் தலா 5 லட்சம் ரூபாய் ஊக்கத்தொகை வழங்கும் நிகழ்ச்சி சென்னை நேரு உள்விளையாட்டரங்கில் நடைபெற்றது. முதலமைச்சர் மு.க.ஸ்டாலின் இதில் பங்கேற்று வீரர்களுக்கு ஊக்கத்தொகை வழங்கினார். அப்போது பேசிய அவர் ஒலிம்பிக் போட்டியில் தங்க பதக்கம் வெல்வோருக்கு 3 கோடியும், வெள்ளி பதக்கம் வெல்வோருக்கு 2 கோடியும், வெண்கலப் பதக்கம் வெல்வோருக்கு1 கோடி ரூபாயும் வழங்கப்படும் என அறிவித்தார். ஒலிம்பிக் போட்டிகளில் தங்கம் வெல்வோருக்கு 3 கோடி ரூபாய் பரிசு என்ற அறிவிப்பு ஊக்கமளிப்பதாக கூறுகிறார் டேபிள் டென்னிஸ் பிரிவில் தகுதி பெற்றிருக்கும் சத்தியன் ஞானசேகரன். மிகுந்த எதிர்பார்ப்புகளுடனும் கனவுகளுடனும் ஒட்டுமொத்த இந்தியாவின் நம்பிக்கையை சுமந்து கொண்டு ஒலிம்பிக் பங்கேற்க இருக்கும் இந்த வீரர்கள் ,முதலமைச்சர் வாழ்த்தியதை போல தரணியை வென்று வருவார்கள் என தமிழகமும் வாழ்த்தி நம்பிக்கையுடன் காத்திருக்கிறது.
http://dlvr.it/S2Xl0Q

Read More