மும்பை: இசையமைப்பாளர் குல்ஷன்குமார் கொலை வழக்கு.. தாவூத் கூட்டாளிக்கு ஆயுள்!

இந்தி மற்றும் ஆன்மீக இசையமைப்பாளரும், டி சீரியஸ் கேசட் உரிமையாளருமான குல்ஷன் குமார் கடந்த 1997ம் ஆண்டு ஆகஸ்ட் மாதம் 12-ம் தேதி தொழில் போட்டி காரணமாக மும்பை அந்தேரி ஜுகுவில் கோயிலுக்கு சென்றுவிட்டு வெளியில் வந்த போது 3 பேர் கொண்ட கும்பபால் சுட்டுக்கொலை செய்யப்பட்டார். குல்ஷன் குமார் உடலில் 16 துப்பாக்கி குண்டுகள் பாய்ந்திருந்தது. பெரும் பரபரப்பை ஏற்படுத்திய இக்கொலையில் தொடர்புடையவராக கருதப்பட்ட இசையமைப்பாளர் நதீம் அக்தர் கைது நடவடிக்கையில் இருந்து தப்பிக்க இங்கிலாந்துக்கு தப்பி சென்றுவிட்டார். Gulshan kumar தொழில் போட்டி காரணமாக பணம் கொடுத்து இக்கொலை செய்யப்பட்டது போலீஸ் விசாரணையில் தெரிய வந்தது. டிப்ஸ் இண்டஸ்ட்ரீஸ் உரிமையாளர் ரமேஷ் தொரானி கொலை தொடர்பாக கைது செய்யப்பட்டார். இவர் குல்ஷல் குமாரை கொலை செய்ய தாவூத் இப்ராகிம் கூட்டாளி அபு சலேமிற்கு 25 லட்சம் கொடுத்ததாக குற்றம் சாட்டப்பட்டது. இக்கொலையில் ஈடுபட்ட அப்துல் ரஃப் மெர்ச்சண்ட் 2001ம் ஆண்டு கொல்கத்தாவில் கைது செய்யப்பட்டான். மொத்தம் இக்கொலை தொடர்பாக 18 பேர் கைது செய்யப்பட்டனர். 26 பேர் மீது குற்றம் சாட்டப்பட்டது. இவ்வழக்கை விசாரித்த நீதிமன்றம் அப்துல் ரஃப்பிற்கு மட்டும் ஆயுள் தண்டனை வழங்கியது. டிப்ஸ் கேசட் உரிமையாளர் ரமேஷ் தொரானி, இசையமைப்பாளர் நதீம் , அப்துல் சகோதரர் அப்துல் ரஷீத் உட்பட அனைவரும் விடுவிக்கப்பட்டனர். இத்தீர்ப்பை எதிர்த்து மும்பை உயர் நீதிமன்றத்தில் மாநில அரசு மேல்முறையீடு செய்தது. குறிப்பாக ரமேஷ் தொரானி மற்றும் அப்துல் ரஷீத் ஆகியோர் விடுவிக்கப்பட்டதை எதிர்த்து மாநில அரசு முறையீடு செய்திருந்தது. மும்பை உயர்நீதிமன்றம் இவ்வழக்கை விசாரித்த உயர் நீதிமன்ற நீதிபதிகள் ஜாதவ் மற்றும் போர்க்கர் ஆகியோர் அடங்கிய டிவிஷன் பெஞ்ச், அப்துல் ரஃப்பிற்கு விதிக்கப்பட்ட ஆயுள் தண்டனையை உறுதி செய்தனர். மேலும் ரமேஷ் தொரானி விடுதலை செய்யப்பட்டதையும் நீதிபதிகள் உறுதி செய்தனர். ஆனால் தாவூத் இப்ராகிம் கூட்டாளியாக கருதப்படும் அப்துல் ரஃப் சகோதரர் அப்துல் ரஷீத்திற்கும் இக்கொலை வழக்கில் ஆயுள் தண்டனை வழங்கி நீதிபதிகள் உத்தரவிட்டனர். தண்டனை பெற்றுள்ளவர்கள் ஒரு வாரத்தில் சரணடைய உத்தரவிடப்பட்டுள்ளது. கொலை நடந்து 24 ஆண்டுகள் கழித்து இவ்வழக்கில் இறுதி தீர்ப்பு வந்துள்ளது. குல்ஷன் குமார் கொலை செய்யப்பட்ட நேரத்தில் மும்பையில் மாபியாக்களின் ஆதிக்கம் ஓங்கி இருந்தது. இவ்வழக்கில் இது வரை 18 பேர் விடுவிக்கப்பட்டுள்ளனர்.
http://dlvr.it/S2rBPY

Read More

ரேஷன் கடைகளில் இன்று முதல் மீண்டும் கைவிரல் ரேகை பதிவுமுறை அமல்

ரேஷன் கடைகளில் இன்று முதல் கைவிரல் ரேகை பதிவுமுறை மீண்டும் அமல்படுத்தப்படுவதாக தமிழ்நாடு அரசு அறிவித்துள்ளது. இதுதொடர்பாக அரசு வெளியிட்டுள்ள அறிக்கையில், கொரோனா நிவாரணத் தொகை மற்றும் 14 மளிகைப் பொருட்கள் விநியோகத்தை முன்னிட்டு ரேஷன் கடைகளில் கைவிரல் ரேகை பதிவு முறை நிறுத்தப்பட்டிருந்ததாக தெரிவிக்கப்பட்டுள்ளது. இந்நிலையில், இந்த மாத இறுதிக்குள் முழுவதுமாக விநியோகம் முடிக்கப்படும் நிலை உள்ளதால், கைவிரல் ரேகை பதிவுமுறை மீண்டும் இன்று அமலுக்கு வருவதாக அறிவிக்கப்பட்டுள்ளது. மேலும், புதிய குடும்ப அட்டைக்கு ஒப்புதல் அளிக்கும் சேவையும் மீண்டும் தொடங்கப்படும் என தமிழ்நாடு அரசு அந்த அறிக்கையில் குறிப்பிட்டுள்ளது.
http://dlvr.it/S2q8KC

Read More

மும்பை: குடும்பச் சண்டை; உயிரிழந்த குழந்தை; தந்தையே ஐஸ்கிரீமில் விஷம் கலந்த கொடூரம்!

குடும்பத்தில் கணவன் மனைவி இடையே ஏற்படும் சண்டையில் பெரிதும் பாதிக்கப்படுவது குழந்தைகள்தான். மும்பை மான்கூர்டு பகுதியில் வசிப்பவர் மொகமத் அலி நவுசித். இவருக்கு திருமணமாகி மூன்று குழந்தைகள் உள்ளனர் . கணவன் மனைவி இடையே அடிக்கடி சண்டை ஏற்படுவதுண்டு. சித்தரிப்பு காட்சி இரண்டு நாட்களுக்கு முன் மொகமத்திற்கும் அவரது மனைவிக்கும் இடையே கடுமையான சண்டை ஏற்பட்டது. இந்த சண்டையால் கடும் ஆத்திரம் அடைந்த மொகமத் தனது குழந்தைகளை கொலை செய்யத் திட்டமிட்டார். இதற்காக வீட்டிற்கு ஐஸ்கிரீம் வாங்கி வந்தார். அந்த ஐஸ்கிரீமில் எலி மருந்தை கலந்து குழந்தைகள் சாப்பிடுவதற்காக கொடுத்துவிட்டார். ஏதும் அறியாத அப்பாவி குழந்தைகள் அப்பா ஐஸ்கிரீம் வாங்கி கொடுத்திருக்கிறார் என்று ஆசையுடன் சாப்பிட்டனர். ஆனால் சாப்பிட்ட சிறிது நேரத்தில் குழந்தைகள் உடல் நலம் பாதிக்கப்பட்டது. அவர்கள் மூன்று பேரும் மருத்துமனையில் சேர்க்கப்பட்டனர். மூன்று பேரில் 5 வயது அலிஷன் அலி பரிதாபமாக உயிரிழந்துவிட்டான். 7 மற்றும் இரண்டு வயது குழந்தைகள் மருத்துவமனையில் ஆபத்தான நிலையில் சிகிச்சை பெற்று வருகின்றனர். இது குறித்து குழந்தைகளின் தாயார் கொடுத்த புகாரின் பேரில் போலீஸார் வழக்கு பதிவு செய்து மொகமத் அலியை கைது செய்து விசாரித்து வருகின்றனர். நாக்பூரில் கடந்த 25-ம் தேதி இது போன்ற ஒரு சம்பவம் நடந்தது. அலோக் மதுக்கர் என்பவர் தனது குடும்பத்தினர் 5 பேரை கொலை செய்து தானும் தற்கொலை செய்து கொண்டார். தனது மனைவி மற்றும் 14 வயது மகளை கழுத்தை அறுத்து கொலை செய்த அலோக் தனது 12 வயது மகனை கழுத்தை நெரித்து கொலை செய்தார். பின்னர் பக்கத்து வீட்டிற்கு சென்று அங்கு இருந்த தனது அத்தை மற்றும் மைத்துனியையும் கழுத்தை அறுத்து கொலை செய்தார். பின்னர் அவர் தற்கொலை செய்து கொண்டார்.
http://dlvr.it/S2mshL

Read More

மும்பை: பட்டப்பகலில் நகைக்கடையில் துப்பாக்கிச்சூடு; உரிமையாளரை கொன்றுவிட்டு துணிகர கொள்ளை!

மும்பை தகிசர் கிழக்கு பகுதியில் உள்ள காவ்டே நகரில் இருக்கும் ஓம் சாய்ராஜ் நகைக்கடைக்குள் காலையில் 10.30 மணிக்கு கொள்ளையர்கள் மூன்று பேர் திடீரென புகுந்தனர். அவர்கள் மூன்று பேரும் ஒரே ஸ்கூட்டரில் கடைக்கு வந்தனர். கடை உரிமையாளர் சைலேந்திர பாண்டே பூஜை போட்டு வியாபாரத்திற்கு தயாராக லாக்கரில் இருந்த தங்க நகைகள் அனைத்தையும் பார்வைக்கு வைத்திருந்தார். சைலேந்திர பாண்டே கொள்ளையர்கள் உள்ளே நுழைந்தவுடன் துப்பாக்கியை காட்டி மிரட்டி கடையில் பார்வைக்கு வைத்திருந்த நகைகள் அனைத்தையும் இரண்டு பேக்களில் எடுத்து போட்டனர். அதோடு பணப்பெட்டியில் இருந்த பணத்தையும் எடுத்தனர். விகாஸ் பாண்டே நகைகளை எடுக்க கடும் எதிர்ப்பு தெரிவித்தார். உடனே கொள்கையளர் தங்களிடம் இருந்த துப்பாக்கியால் பாண்டேயின் தலையில் சுட்டுக்கொலை செய்துவிட்டு மீண்டும் கடையில் இருந்த நகைகள் அனைத்தையும் இரண்டு பேக்களில் எடுத்துக்கொண்டு ஸ்கூட்டரில் மூன்று பேரும் தப்பி சென்றனர். கொள்ளை நடந்த கடைக்கு விரைந்து வந்த போலீஸார் அங்கு பொருத்தப்பட்டு இருந்த கண்காணிப்பு கேமரா உதவியுடன் குற்றவாளிகளை அடையாளம் காணும் பணியில் ஈடுபட்டுள்ளனர். கண்காணிப்பு கேமராவில் கொள்ளையர்களின் புகைப்படங்கள் தெளிவாக இருக்கிறது. எனவே விரைவில் குற்றவாளிகளை விரைவில் பிடித்துவிடுவோம் என்று போலீஸார் நம்பிக்கை தெரிவித்துள்ளனர். பட்டப்பகலில் நடந்த இச்சம்பவம் பெரும் அதிர்ச்சியை ஏற்படுத்தி இருக்கிறது. கொள்ளையடிக்கப்பட்ட தங்க நகைகளின் அளவு தெரிய வில்லை. அதனை போலீஸார் மதிப்பிட்டு வருகின்றனர்.
http://dlvr.it/S2mFKp

Read More

கேரளாவில் இருந்து குமரிக்கு கொண்டு வரப்பட்ட மண்ணுளி பாம்பு! -வனத்துறையினரிடம் சிக்கியது எப்படி?

மண்ணுளிப் பாம்பு மருத்துவ குணம் மிகுந்தது, பல கோடி ரூபாய் வரை விற்பனை ஆகும் என்று சில கும்பல் வேட்டையில் ஈடுபட்டு வருகிறது. மண்ணுளிப் பாம்பை வைத்து ஏமாற்றும் காட்சிகள் சதுரங்க வேட்டை திரைப்படத்தில் காட்சியாக்கப்பட்டிருக்கும். ஆனாலும் மண்ணுளிப் பாம்பு புற்றுநோயை குணமாக்கும், ஹைச்.ஐ.வி-க்கு மருந்து என அதற்காக கள்ளச்சந்தை நெட்வொர்க் செயல்பட்டு வருகிறது. இருதலை மணியன் என அழைக்கப்படும் விஷத்தன்மையற்ற மண்ணுளி பாம்பைத் தேடி பல கும்பல்கள் அலைந்து வருகின்றன. அதில் ஒரு கும்பல் கன்னியாகுமரி மாவட்ட வனத்துறையிடம் சிக்கியது. பூதப்பாண்டி வனச்சரகத்திற்குட்பட்ட நாகர்கோவில் பகுதியில் சொகுசு காரில் மண்ணுளி பாம்பு கடத்தப்படுவதாக பூதப்பாண்டி வனச்சரக அலுவலர் திலீபனுக்கு ரகசிய தகவல் கிடைத்தது. அதன் அடிப்படையில் வனச்சரகர் திலீபன் தலைமையில் வனவர்கள், வனக்காப்பாளர்கள், மற்றும் வேட்டை தடுப்பு காவலர்கள் வடசேரி பகுதியில் சொகுசு காரை நிறுத்தி சோதனை செய்தனர். காரில் மண்ணுளி பாம்பு இருப்பதை வனத்துறையினர் கண்டுபிடித்தனர்.மண்ணுளிப் பாம்பு மண்ணுளிப் பாம்பை காரில் கடத்தி வந்த கேரள மாநிலம் கொல்லத்தைச் சேர்ந்த பிரசாந்த், திருவனந்தபுரத்தைச் சேர்ந்த சதீஷ் சந்திரன் நாயர், கன்னியாகுமரி மாவட்டம் சூழல் பகுதியைச் சேர்ந்த ஜோஸ் வில்பிரட் ஆகியோரை வனத்துறையினர் கைது செய்தனர். பின்னர் அவர்களிடம் நடத்திய விசாரணையில் கேரளா மாநிலத்தில் சட்டவிரோதமாக மண்ணுளி பாம்பை பிடித்து கன்னியாகுமரி மாவட்டம் நாகர்கோவில் பகுதியில் விற்பனை செய்ய கொண்டுவந்தது தெரியவந்தது. மண்ணுளி பாம்பு சுமார் மூன்று அடி நீளமும், 2,600 கிராம் எடையும் இருந்தது. லாக்டெளன் காரணமாக கேரளத்தில் இருந்து கன்னியாகுமரிக்கு வந்த பிறகு சூழல் பகுதியில் சொகுசு காரை வாடகைக்கு எடுத்து மண்ணுளி பாம்பை கடத்தியுள்ளனர். வன விலங்குகளை வைத்திருப்பதும் விற்பனை செய்வதும் 1972 வன உயிரின பாதுகாப்பு சட்டத்தின் படி குற்றம் என்பதால, கைது செய்யப்பட்ட மூவருக்கும் தலா 75,000 ரூபாய் வீதம் ரூ.2.25 லட்சம் அபராதம் விதிக்கப்பட்டது.மண்ணுளிப் பாம்பை மீட்ட வனத்துறையினர் கொரோனா காலம் எனதால் கைது செய்யப்பட்டவர்களை சிறையில் அடைக்காமல் அபராத தொகையை வாங்கிக்கொண்டு விடுவித்தனர். மீட்கப்பட்ட மண்ணுளி பாம்பு குமரி மாவட்டத்தின் அடர்ந்த வனப்பகுதிக்குள் விடப்பட்டது. மண்ணுளி பாம்பு கடத்தி வருவது குறித்து அந்த கும்பலைச் சேர்ந்த ஒருவரே வனத்துறைக்கு தகவல் அளித்ததாக கூறப்படுகிறது. மண்ணுளி பாம்பை விலைக்கு வாங்க முயன்ற நபர் குறித்தும் விசாரணை நடைபெற்று வருகிறது.
http://dlvr.it/S2lDLR

Read More

பைசர் - அஸ்ட்ரா ஜெனிகா 'மிக்ஸ்ட் வேக்சின்' நோயெதிர்ப்பு திறனை அதிக வலுவாக்கும்: ஆய்வு

கொரோனா தடுப்பூசி டோஸ்களில், இருவேறு தடுப்பூசிகளை எடுத்துக்கொள்ளும் ‘கலப்பு தடுப்பூசி’ (மிக்ஸ்ட் வேக்சின்) வழிமுறை பற்றிய ஆய்வுகள், உலகம் முழுவதும் பல ஆய்வகங்களில் நடந்து வருகின்றன. யு.கே.வின் ஆக்ஸ்ஃபோர்டு பல்கலைக்கழகத்தின் மருத்துவ குழுவும், அப்படியான ஒரு ஆய்வை முன்னெடுத்திருந்தது. அதன் முடிவில், பைசர் தடுப்பூசி மற்றும் அஸ்ட்ரா ஜெனிகா ஆகிய தடுப்பூசிகளை இரு டோஸ்களாக எடுத்துக்கொள்வோருக்கு, கோவிட் 19 கொரோனாவுக்கு எதிரான நோய் எதிர்ப்புத்திறன் வலுவாக இருப்பதாக நிரூபணமாகியுள்ளது. 4 வார இடைவெளியில், இவ்விரண்டு டோஸ்களையும் எடுத்துக்கொண்டால், இப்பலன் கிடைப்பதாக இந்த ஆய்வுக்குழுவினர் தெரிவித்துள்ளனர். அஸ்ட்ராஜெனிகா இரு டோஸ் எடுப்பவர்களை காட்டிலும், இவர்களுக்கு கூடுதல் நோய் எதிர்ப்பு திறன் கிடைப்பது உறுதியாகியுள்ளது. பொருளாதார ரீதியாக பின்தங்கிய மற்றும் நடுத்தர வர்க்க நாடுகள் பலவற்றில், மருத்துவர்களும் பொது சுகாதார அதிகாரிகளும் தடுப்பூசி பற்றாக்குறை குறித்து தொடர்ச்சியாக கவலை தெரிவித்து வரும் நிலையில், ‘இருவேறு தடுப்பூசிகளை அடுத்தடுத்த டோஸ்களாக எடுத்துக்கொண்டால் நோயெதிர்ப்பு திறன் அதிகரிக்கும்’ என்ற இந்த ஆய்வு முடிவு, பலருக்கும் நம்பிக்கை அளித்துள்ளது. இதன்மூலம், தடுப்பூசி மீதான பற்றாக்குறையை தடுக்க முடியும் என பலரும் நம்பிக்கை தெரிவித்து வருகின்றனர். இதில், முதலில் பைசர் தடுப்பூசியும், பின்னர் அஸ்ட்ராஜெனிகாவின் தடுப்பூசியும் எடுத்துக்கொள்பவர்களுக்கு, அஸ்ட்ராஜெனிகா தடுப்பூசி முதலிலும் – பைசர் தடுப்பூசி அடுத்ததாகவும் எடுப்பவர்களைவிட கூடுதல் பலனிருப்பதாக ஆய்வாளர்கள் கூறியுள்ளனர். ­ஆய்வாளர்களில் ஒருவரான பேராசிரியர் மாத்யூ பேசுகையில், “இப்படி இருவேறு டோஸ் அளிப்பது, தடுப்பூசி பற்றாக்குறையை நீக்குவதோடு தடுப்பூசி விநியோகத்தில் ஒரு நெகிழ்வுத்தன்மையையும் உண்டாக்கும்” எனக்கூறியுள்ளார். இந்த ஆய்வில், 50 வயதுக்கு மேற்பட்ட 820 தன்னார்வலர்கள் ஈடுபடுத்தப்பட்டு இருந்திருக்கின்றனர். அவர்களுக்கும், முதன்முதலாக சீனாவின் வூஹானில் கண்டறியப்பட்ட கொரோனா திரிபுக்கு எதிராக மட்டுமே இந்த ‘கலப்பு தடுப்பூசியின்’ செயல்திறன் கண்டறியப்பட்டுள்ளது. மேற்கொண்டு பிற கொரோனா திரிபுகளுக்கும் எதிரான செயல்பாடுகள் குறித்தும் ஆய்வுகள் செய்யப்பட்டால், வரும் மாதங்களில் அதை அடிப்படையாக வைத்து வெவ்வேறு தடுப்பூசி விநியோகித்தை அதிகப்படுத்தலாம் என்ற அடிப்படையில், அவையும் விரைவில் தொடங்குமென எதிர்ப்பார்க்கப்படுகிறது. அடுத்தக்கட்ட ஆய்வில், மாடர்னா மற்றும் நோவாவாக்ஸ் தடுப்பூசிகள் ஆய்வு செய்யப்படுமென தெரிகிறது. தற்போது, அஸ்ட்ரா ஜெனிகா தடுப்பூசியின் இரு டோஸ்களும் 12 வார இடைவெளியில் தரப்பட்டு வருகிறது. இந்த கால இடைவெளியின் அடிப்படையில், பைசர் - அஸ்ட்ரா ஜெனிகா தடுப்பூசிகளை 12 வார இடைவெளியில் இரு டோஸ்களாக எடுத்துக்கொண்டால், எந்தளவுக்கு பலன் கிடைக்கும் என்பது பற்றி ஆக்ஸ்போர்டு பல்கலைக்கலகம் சார்பில் ஆய்வு செய்யப்பட்டு வருகிறது. அதன் முடிவுகள், இன்னும் சில மாதங்களில் நடைமுறைக்கு வரக்கூடும். இந்த விஷயத்தில், இடைவெளி எந்தளவு அதிகரிக்கிறதோ, அந்தளவுக்கு கூடுதல் பலன் கிடைக்கலாம் என ஆய்வாளர்கள் நம்புகின்றனர். அதிகபட்சம் 10 மாதங்கள் வரை அதிகரிக்கலாம் என்பது அவர்களின் கணிப்பாக இருக்கிறது. தற்போதைக்கு அனைத்தும் ஆய்வு நிலையில் இருப்பதால், அவர்கள் உறுதியாக இதை தெரிவிக்காமல் இருக்கின்றனர். கடந்த மாதத்தில், இதே ஆய்வு தொடக்க நிலையில் இருந்தபோது, பைசர் மற்றும் அஸ்ட்ராஜெனிகா தடுப்பூசிகளை ‘கலப்பு தடுப்பூசி’ முறையின்கீழ் எடுத்துக்கொள்பவர்களுக்கு உடல்சோர்வு மற்றும் தலைவலி போன்ற பக்கவிளைவுகள் அதிகம் ஏற்படுவதாக கூறப்பட்டிருந்தது குறிப்பிடத்தக்கது. இருப்பினும், பலனென்று பார்க்கும்போது, அதில் சிக்கல் ஏதுமில்லை என தற்போது சொல்லப்பட்டுள்ளது.
http://dlvr.it/S2hxvq

Read More

மும்பை: பெண் ஒருவருக்கு 15 நிமிட இடைவெளியில் 3 டோஸ் கொரோனா தடுப்பூசிகள்! - அதிர்ச்சி சம்பவம்

கொரோனா தடுப்பூசி போடும் பணி நாட்டில் முழுவேகத்தில் நடந்து வருகிறது. மூன்றாவது கொரோனா அலை அச்சுறுத்தல் காரணமாக மக்கள் தடுப்பூசி போட்டுக்கொள்வதில் ஆர்வம் காட்டி வருகின்றனர். கோவிஷீல்டு தடுப்பூசியை பொறுத்தவரையில் இரண்டு டோஸ் தடுப்பூசிக்கு இடையே முதலில் 45 நாட்கள் இருக்கவேண்டும் என்று முதலில் அறிவிக்கப்பட்டது. பிறகு மத்திய அரசு இரண்டு கொரோனா டோஸ் இடையே 84 நாட்கள் இடைவெளி இருக்கவேண்டும் என்று தெரிவித்துள்ளது. ஆனால் மும்பையில் கவனக்குறைவால் பெண் ஒருவருக்கு 15 நிமிட இடைவெளியில் 3 தடுப்பூசி போடப்பட்டுள்ளது. மும்பை அருகில் உள்ள தானேயில் காசர்வடாவ்லி ஆனந்த் நகரில் நடந்த தடுப்பூசி முகாமில் ரூபாலி(28) என்ற பெண் தடுப்பூசி போட்டுக்கொண்டார். அவர் தடுப்பூசி போட்டுக்கொண்ட பிறகு அங்கு காத்திருந்த போது அவருக்கு அடுத்த 15 நிமிட இடைவெளியில் மேலும் 2 டோஸ் தடுப்பூசி ஊழியர்கள் போட்டுள்ளனர். தடுப்பூசி ரூபாலியின் கையில் 3 தடுப்பூசி போட்டதற்கான அடையாளம் இருக்கிறது. தடுப்பூசியின் நடைமுறைகள் எதுவும் தெரியாது என்பதால் மூன்று தடுப்பூசி போடுவது குறித்து அப்பெண் எதுவும் கேட்கவில்லை. இது குறித்து அப்பெண் தனது கணவரிடம் சென்று தெரிவித்தார். இதனால் அதிர்ச்சியடைந்த அவர், உள்ளூர் பா.ஜ.க கவுன்சிலர் மனோகரிடம் சென்று புகார் செய்தார். கவுன்சிலர் உடனே மாநகராட்சி கமிஷனர் சர்மாவை நேரில் சந்தித்து இது குறித்து விசாரிக்கவேண்டும் என்று கோரி எழுத்து பூர்வமாக மனுக்கொடுத்தார். 3 தடுப்பூசி போடப்பட்டுள்ள பெண்ணிற்கு முழுமையான உடல் பரிசோதனை செய்யவேண்டும் என்றும், அவருக்கு எதாவது உடல் நலக்கோளாறு ஏற்பட்டால் அதற்கான முழு செலவையும் மாநகராட்சி ஏற்கவேண்டும் என்றும் அவர் புகாரில் தெரிவித்துள்ளார். இது குறித்து மனோகர் அளித்த பேட்டியில், ``மருத்துவ ஊழியர்களின் அலட்சியத்தால் இது போன்று நடந்துள்ளது. ஒரே நேரத்தில் 3 தடுப்பூசி போட்டு எப்படி மக்களின் உயிரோடு விளையாடலாம்?” என்று கேள்வி எழுப்பினார். ஆரம்பத்தில் இது போன்ற ஒரு சம்பவமே நடக்கவில்லை என்று மாநகராட்சி சுகாதாரத்துறை அதிகாரி டாக்டர் வைஷாலி தெரிவித்தார். ஆனால் மேயர் நரேஷ், இச்சம்பவம் நடந்ததை உறுதிபடுத்தியளித்தோடு, சம்பந்தப்பட்டவர்கள் மீது கடும் நடவடிக்கை எடுக்கப்படும் என்றும் தெரிவித்தார். இது குறித்து மாநகராட்சி மக்கள் தொடர்பு அதிகாரி சந்தீப்பிடம் கேட்டதற்கு, ``சம்பந்தப்பட்ட பெண்ணிற்கு எந்த வித பிரச்னையும் இல்லை. அவரை மருத்துவர்கள் தொடர்ந்து கண்காணித்து வருகின்றனர்” என்றார். ஒரே நேரத்தில் 3 தடுப்பூசி போடப்பட்ட சம்பவம் மிகவும் அதிர்ச்சியை ஏற்படுத்தியுள்ளது. சான்றிதழுடன் வேதாந்த் இதனிடையே மத்திய பிரதேசத்தில் தடுப்பூசி போடாதவர்களுக்கும் தடுப்பூசி போடப்பட்டதாக சான்றிதழ் வந்து கொண்டிருப்பதாக குற்றச்சாட்டு எழுந்துள்ளது. போபாலில் வசிக்கும் வேதாந்த் என்ற 13 வயது சிறுவனுக்கும் தடுப்பூசிபோடப்பட்டுள்ளதாக அவனது மொபைல் போனில் சான்றிதழ் வந்துள்ளது. ஆனால் அவரின் வயதை 53 என்று சான்றிதழில் குறிப்பிட்டுள்ளனர். இது போன்று அதிகமானோர் தங்களுக்கு தடுப்பூசி போடப்படும் முன்பாகவே சான்றிதழ் வந்துவிட்டதாக குற்றம் சாட்டியுள்ளனர். ஒரு சிலருக்கு தொடர்ச்சியாக வேறு வேறு பெயர்களில் தடுப்பூசி போடப்பட்டதாகவும் செய்திகள் வந்து கொண்டிருக்கிறது. இதனால் மக்கள் மத்தியில் குழப்பம் ஏற்பட்டுள்ளது. ``அதிகம் பேருக்கு தடுப்பூசி போட்டுவிட்டோம் என்று சொல்வதற்காக இது போன்று ஊசி போடாதவர்களுக்கெல்லாம் தடுப்பூசி போட்டதாக அரசு கணக்கு காட்டிக்கொண்டிருக்கிறது” என்று காங்கிரஸ் கட்சி குற்றம் சாட்டியிருக்கிறது.
http://dlvr.it/S2hKH1

Read More