மும்பை: `இறப்பு சான்றிதழை வாங்கிச் செல்லுங்கள்!‘ - உயிருடன் இருப்பவருக்கு வந்த அதிர்ச்சி போன்கால்

மும்பை காட்கோபரில் உள்ள பள்ளி ஒன்றில் ஆசிரியராக இருப்பவர் சந்திரசேகர் தேசாய். இவரது வீடு அருகில் உள்ள தானேயில் இருக்கிறது. கடந்த ஆண்டு சந்திரசேகருக்கு கொரோனா தொற்று ஏற்பட்டது. இதனால் சில நாட்கள் மாநகராட்சி சார்பாக ஏற்பாடு செய்திருந்த மருத்துவமனையில் சேர்ந்து சிகிச்சை எடுத்துக்கொண்டார். பூரண குணமடைந்து வீட்டிற்கும் திரும்பி விட்டார். ஆனால் அவர் கொரோனா தொற்று காரணமாக இறந்துவிட்டதாக தானே மாநகராட்சி அதிகாரிகள் அவரது பெயரை இறந்தவர்கள் பட்டியலில் சேர்த்துவிட்டனர். சந்திரசேகர் தேசாய் அதோடு விடாமல், அவருக்கு இறப்பு சான்றிதழ் தயாராகிவிட்டது என்றும், உடனே வந்து இறப்பு சான்றிதழை வாங்கிச்செல்லும்படி அவருக்கே போன் செய்து தகவல் கொடுத்தனர். இதனால் அதிர்ச்சியடைந்த சந்திரசேகர், `நான் உயிரோடுதான் இருக்கிறேன்’ என்று தெரிவித்தார். ஆனால் போன் செய்த ஊழியர் அதனை கேட்பதாக இல்லை. `எங்களது ஆவணங்களில் நீங்கள் இறந்துவிட்டதாகத்தான் இருக்கிறது’ என்று அந்த ஊழியர் தெரிவித்தார். உடனே சந்திரசேகர் மாநகராட்சி அலுவலகத்திற்கு சென்று, `நான் இன்னும் உயிரோடுதான் இருக்கிறேன்’ என்று தெரிவித்தார். அவரிடம் அதிகாரிகள் ஆதார் கார்டு போன்ற விபரங்களை வாங்கிப்பார்த்த பிறகு அவர் உயிரோடு இருப்பதை உறுதி செய்தனர். கொரோனாவால் இறந்தவர்கள் பட்டியலை தயாரிக்கும் போது குளறுபடி ஏற்பட்டிருக்க வாய்ப்பு இருக்கிறது என்று தெரிவித்தனர். இது குறித்து சந்திரசேகர் கூறுகையில், ``அதிகாரிகள் இது போன்ற ஒரு செய்தியை எனது 80 வயது தாயார் அல்லது எனது மனைவியிடம் தெரிவித்திருந்தால் என்ன ஆகியிருக்கும்?” என்றார். மாநகராட்சி கூடுதல் கமிஷனர் சந்தீப் இது குறித்து கூறுகையில், ``வழக்கமாக கொரோனா தொற்று ஏற்பட்டு டிஸ்சார்ஜ் செய்யப்பட்டவர்களுக்கு போன் செய்து ஏதாவது அறிகுறி இருக்கிறதா என்றும், குடும்பத்தில் யாராவது கொரோனாவால் இறந்தார்களா என்றும், தொற்று யாருக்காவது இருக்கிறதா என்று கேட்பதுண்டு. சந்திரசேகர் பெயர் இறந்தவர்கள் பட்டியலில் இருந்தது. எனவே தவறுதலாக அவருக்கு போன் செய்துவிட்டார்கள். ஆனால் இறந்தவர்கள் பட்டியலை நாங்கள் தயாரிப்பதில்லை. புனேயில் பட்டியல் தயாரிக்கப்படுகிறது. இனிமேல் முழுமையாக விசாரிக்காமல் யாருக்கும் போன் செய்வதில்லை என்று முடிவு செய்திருக்கிறோம்” என்று தெரிவித்தார்.
http://dlvr.it/S2zSHV

Read More

இ-பாஸ் முறை ரத்து: தமிழ்நாட்டில் எதற்கெல்லாம் கூடுதல் தளர்வுகள்? எதற்கெல்லாம் தடை தொடரும்?

கொரோனா தொற்று பரவலை கருத்தில் கொண்டு தமிழ்நாட்டில் கூடுதல் தளர்வுகளுடன் ஜூலை 12 வரை ஊரடங்கை நீட்டித்து உத்தரவிட்டுள்ளார் முதலமைச்சர் மு.க.ஸ்டாலின்.  மாநிலத்தின் அனைத்து மாவட்டங்களிலும் ஒரே மாதிரியான தளர்வுகளை அமல் செய்துள்ளது தமிழ்நாடு அரசு.  எவற்றுக்கெல்லாம் அனுமதி மற்றும் கூடுதல் தளர்வுகள்! >தமிழகம் முழுவதும் கடைகள் இரவு 8 மணி வரை திறந்திருக்க அனுமதி.  >ஹோட்டல்கள் 50% வாடிக்கையாளர்களுடன் காலை 6 முதல் இரவு 8 மணி வரை செயல்பட அனுமதி.  >ஹோட்டல்களில் வாடிக்கையாளர்கள் அமர்ந்து உணவு உண்ண அனுமதி.  >தேநீர் கடைகளிலும் வாடிக்கையாளர்கள் அமர்ந்து தேநீர் அருந்த அனுமதி.  >இரவு 7 மணி வரை செயல்பட்டு வரும் கடைகள் அனைத்துக்கும் நேரம் இரவு 8 மணி வரை நீட்டிப்பு. >திருமண நிகழ்வுக்கு 50 பேரும், இறுதிச் சடங்கு நிகழ்வுக்கு 20 பேரும் மட்டுமே பங்கேற்க அனுமதி.  >அனைத்து மாவட்டங்களிலும் மாவட்டத்துக்கு உள்ளேயும் வெளியேயும் பேருந்து போக்குவரத்துக்கு அனுமதி.  >உடற்பயிற்சி கூடங்கள் 50 சதவிகித வாடிக்கையாளர்களுடன் செயல்பட அனுமதி.  >வழிபாட்டுத் தலங்கள் வழிகாட்டு நெறிமுறைகளை பின்பற்றி செயல்பட அனுமதி.  எவற்றுக்கெல்லாம் தடை தொடரும்? >பள்ளி, கல்லூரிகள், உயிரியல் பூங்காக்கள், பொழுதுபோக்கு, விளையாட்டு, கலாசார நிகழ்வுகளுக்கு தடை.  >திரையரங்குகள், மதுக்கூடங்கள், நீச்சல் குளங்கள், அரசியல் கூட்டங்களுக்கு தடை நீடிக்கிறது.  >மாநிலங்கள் இடையே தனியார், அரசுப் போக்குவரத்துக்கு தடை நீடிக்கிறது. >உள்துறையால் அனுமதிக்கப்பட்ட வழித்தடங்கள் தவிர, சர்வதேச விமானப் போக்குவரத்துக்கு தடை. இ-பாஸ், இ-பதிவு முறை ரத்து >மாவட்டங்களுக்கு இடையே பயணிக்க இ-பாஸ் மற்றும் இ-பதிவு முறை ரத்து செய்யப்படுகிறது.
http://dlvr.it/S2ykJy

Read More

தனியார் மருத்துவமனைகளில் மீதமாகி வீணாகும் தடுப்பூசிகள்.... அரசு செய்ய வேண்டியது என்ன?

தனியார் மருத்துவமனைகளில் பல லட்சம் தடுப்பூசிகள் மீதமாகி வரும் நிலையில், அரசு மையங்கள் அனைத்தும் போதியளவு தடுப்பூசி கிடைக்காமல் திணறுகின்றன. இதன் பின்னணி என்ன, தனியார் மையங்களில் மட்டும் தடுப்பூசி மீதமாவது ஏன், இதை எப்படி சரிசெய்வது, தடுப்பூசி மீதமாவதை தடுக்க அரசு என்ன செய்ய வேண்டும் என்பதை, சில தரவுகளுடன் இங்கே தெரிந்துக்கொள்வோம்.  தடுப்பூசி பற்றாக்குறை, இந்தியாவில் மறுபடியும் தலைதூக்க தொடங்கியுள்ளது. இதற்கு முன்னரும் தடுப்பூசி பற்றாக்குறை ஏற்பட்டுள்ளது என்றாலும்கூட, அப்போதெல்லாம் ‘மாநில அரசுகள் தடுப்பூசியை கொள்முதல் செய்யும்போதுதான் இப்படியான பற்றாக்குறை பிரச்னை அதிகமாக இருக்கிறது, மத்திய அரசு இவ்விவகாரத்தை கையில் எடுத்து பணியாற்றினால் சிக்கல் குறையும்’ என மாநில அரசுகள் கூறின. மாநில அரசின் தொடர்ச்சியான அந்த வலியுறுத்தலின்பேரில், ‘மத்திய அரசே நாடு முழுவது தடுப்பூசி கொள்முதல் மற்றும் விநியோகத்தை கையில் எடுக்கும்’ என்ற அறிவிப்பு வெளியானது. அதன் தொடர்ச்சியாக, ‘புதிய தடுப்பூசி கொள்கை’யை அமலாக்கியது மத்திய அரசு. ஆனால் இப்போதும் தடுப்பூசி மீதான பற்றாக்குறை நீடித்துக்கொண்டே இருக்கிறது. மத்திய அரசின் அறிவிப்பின்படி, கடந்த ஜூன் 21ம் தேதியிலிருந்து தடுப்பூசிக்கான புதிய தடுப்பூசி கொள்கைகள் அமலுக்கு வந்தன. அந்த திட்டத்தின் அமலாக்கப்பட்டதை தொடர்ந்து, ‘அன்றாடம் குறைந்தது 1 கோடி பேருக்காவது இந்தியாவில் தடுப்பூசி போடப்படும்’ என்ற மத்திய அரசு தனக்கான இலக்கொன்றை நிர்ணயித்தது. ஆனால் இப்போதும் 40 - 50 லட்சத்தையொட்டியே அன்றாடம் இந்தியாவில் தடுப்பூசி போடப்பட்டு வருகிறது.  இதன் பின்னணியை ஆராயும்போது, தனியார் மருத்துவமனைகளுக்கு  ஒதுக்கப்படும் தடுப்பூசிகளில், பாதிக்கும் மேற்பட்ட தடுப்பூசி உபயோகிக்கப்படாமல் இருப்பது தெரியவந்துள்ளது. ஒருவேளை அவை முழுமையாக உபயோகப்படுத்தப்பட்டால், இந்த எண்ணிக்கை கணிசமாக நிச்சயம் உயரும் என சொல்லப்படுகிறது.  உதாரணத்துக்கு, கடந்த மே மாதத்தில், 4.9 லட்ச டோஸ் தடுப்பூசிகள் தனியார் மருத்துவமனைகளுக்கு ஒதுக்கப்பட்டிருந்தது. அதில், 1.36 லட்சம் மட்டுமே உபயோகப்படுத்தப்பட்டிருந்தது. ஜூன் மாதத்தில், 23 ம் தேதி வரையிலான தகவலின்படி பார்க்கும்போது, 9 லட்சத்துக்கும் மேல் தடுப்பூசி பெறப்பட்டு, அவற்றில் 4.8 மட்டுமே உபயோகப்படுத்தப்பட்டிருந்தது. மொத்தமாக பார்த்தால், 13.91 லட்ச தடுப்பூசிகள் பெறப்பட்டு, அவற்றில் 5.9 லட்ச தடுப்பூசிகள் மட்டுமே அந்த காலகட்டத்துக்குள் பயன்படுத்தப்பட்டிருந்திருக்கின்றன. மே - ஜூனை போலவே ஜூலையிலும் நிலைமை இருக்கும் என கணிக்கப்பட்டு வரும் நிலையில், அனைத்து சர்ச்சைக்கும் மத்தியிலும், ஜூலை மாதத்தில் தமிழகத்துக்கு 71.5  லட்ச டோஸ் தடுப்பூசி தரப்பட திட்டமிட்டிருப்பதாகவும்; அவற்றில் 17.75 லட்ச டோஸ் தடுப்பூசி தனியார் மருத்துவமனைக்கு தர  திட்டமிட்டிருப்பதாகவும் மத்திய அரசு அறிவித்துள்ளது. தமிழகத்தில் மட்டும் இந்த நிலையென நினைக்க வேண்டாம். மத்திய அரசு தெரிவித்த தகவலின்படி, இந்தியாவில் தனியார் மருத்துவமனைகளுக்கு தரப்பட்ட தடுப்பூசிகளில் வெறும் 7.8% தடுப்பூசிகள் மட்டுமே உபயோகப்படுத்தப்பட்டுள்ளது என்பது தெரியவந்துள்ளது. இந்தளவுக்கு தனியார் மருத்துவமனைகளில் தடுப்பூசி குறைவாக  பயன்படுத்தப்படும் நிலையிலும், 25% தடுப்பூசியை ஒவ்வொரு மாதமும் தனியார் மருத்துவமனைக்கு ஒதுக்குகிறது மத்திய அரசு. மத்திய அரசின் இந்த முடிவு, தடுப்பூசி பற்றாக்குறையை அரசு மையங்களில் இன்னும் அதிகரிக்கும் என பொது சுகாதார நிபுணர்கள் எச்சரிக்கின்றனர். மேலும், ’அடுத்த கொரோனா அலை வருவதற்குள், நம்மால் முடிந்தவரை அதிக  மக்களை கொரோனாவுக்கு எதிராக மாற்ற வேண்டும். அதற்கு நாம் அவர்களுக்கு தடுப்பூசி போட வேண்டும். ஆனால், தனியார் மருத்துவமனையில் இவ்வளவு சேமித்துவைப்பது சிக்கலை இன்னும் அதிகப்படுத்தும். தீர்வை நோக்கி நாம் செல்ல, முட்டுக்கட்டையாக அமையும்’ எனக்கூறுகின்றனர். தேசிய பொதுசுகாதார ஆராய்ச்சி கழகத்தின் முன்னாள் இயக்குநர் சுந்தரராமன், இதுபற்றி பத்திரிகையொன்றில் பேசுகையில், “அரசு மையங்களில்தான், தடுப்பூசிக்கான தேவை அதிகம் இருக்கிறது. அப்படியிருக்கும்போது, மத்திய அரசு தனியார் மையங்களுக்கு அதிகம் ஒதுக்குவது ஏன்? தேவையிருப்போருக்கு ஒதுக்குவதுதானே சரியாக இருக்கும்...! ‘மாநிலங்களுக்கு என்ன அடிப்படையில் கொரோனா தடுப்பூசி விநியோகம் செய்கின்றீர்கள்’ எனக்கேட்டால், அவர்கள் சராசரியாக போடும் தடுப்பூசி விநியோகத்தை வைத்து தருகிறோம் என்கிறது மத்திய அரசு. ஆனால், இந்த விதி ஏன் தனியார் மருத்துவமனைகளுக்கு பொருந்தவில்லை என தெரியவில்லை” எனக்கூறியுள்ளார். தமிழகத்தின் எதிர்க்கட்சியான அதிமுகவின் ஒருங்கினைப்பாளர் ஓ.பி.எஸ்., இவ்விவகாரம் பற்றி சில தினங்களுக்கு முன்பு அறிக்கையொன்றை வெளியிட்டிருந்தார். அந்த அறிக்கையின் சிறப்பம்சமாக, இந்த பிரச்னைக்கு தீர்வொன்றை பகிர்ந்திருந்தார் அவர். அந்த விவரம் இங்கே...: “தமிழகத்தில் அனைவருக்கும் இரு டோஸ் கொரோனா தடுப்பூசி போடப்பட, 16 கோடி தடுப்பூசி மருந்துகள் தேவைப்படுகின்றன. ஜூன் 26 நிலவரப்படி, ஒன்றரை கோடி தடுப்பூசிகள், அதாவது 10 சதவிகிதத்துக்கும் குறைவாகத்தான் தமிழகத்தில் தடுப்பூசி போடப்பட்டுள்ளது. ஆக, அரசுக்கு தடுப்பூசியின் தேவை அதிகமாக இருக்கிறது. அப்படியிருக்கும்போது, ஏற்கெனவே பல லட்ச தடுப்பூசியை உபயோகப்படுத்தப்படுத்தாமல் இருக்கும் தனியார் மருத்துவமனைகளுக்கு, அரசு இன்னும் 17.75 தடுப்பூசி வழங்க திட்டமிட்டிருக்கிறது. இப்படி செய்வதால், 25 லட்சத்துக்கும் மேற்பட்ட தடுப்பூசி, தனியார் மருத்துவமனையின் வசம் செல்லும். அங்கு மீண்டும் மீதமாகும் தடுப்பூசி அளவு அதிகமாகும்.  ஏற்கெனவே பெரும்பாலான மக்கள், அரசு மையங்களையே அதிகமாக நாடுகின்றனர். காரணம் அங்குதான் இலவசமாக தடுப்பூசி போடப்படுகிறது. தனியார் மருத்துவமனைகளில், 850 ரூபாய் முதல் 1,500 ரூபாய் வரை பணம் செலுத்தவேண்டிய நிலை உள்ளது. இதுதவிர, முன்பதிவு அவசியம் என்ற நிலையும் உள்ளது. மேலும் பெரும்பாலான இடங்களில் தனியார் மருத்துவமனைகளுக்கு வெகுதூரம் பயணிக்க வேண்டியுள்ளது. இக்காரணங்களால், மக்கள் பலரும், அரசு மையங்களையே நாடுகின்றனர். இதன்விளைவாக தனியார் மருத்துவமனைகளில் தடுப்பூசிகள் இன்னும் தேங்கும். ஆக, மேலும் மேலும் தனியார் மருத்துவமனைகளில் தடுப்பூசி மீதமாகிக்கொண்டே இருக்கும். இதை தடுக்க, அரசு விரைந்து உடனடியாக நடவடிக்கை எடுக்க வேண்டும். அதனொரு நடவடிக்கையாக, அம்மருந்துகளை அரசு பயன்படுத்திக்கொள்ள உரிய வழிகளை அரசு மேற்கொள்ள வேண்டும். அப்படிசெய்தால், தமிழ்நாட்டின் தடுப்பூசி தேவை, விரைவில் பூர்த்தியாகக்கூடும்” இவற்றை வைத்து பார்க்கும்போது, இந்தியாவில் தடுப்பூசி விநியோகத்தை அதிகப்படுத்த மத்திய அரசு இரண்டு விஷயங்களை உடனடியாக மேற்கொள்ள வேண்டும். அவை, * தனியார் மருத்துவமனைகளில் மீதமாகும் தடுப்பூசிகளை, குறிப்பிட்ட காலத்துக்குப் பிறகு அரசு மையங்களுக்கு அனுப்புவதற்கான வழிகளை ஆலோசித்து, அதன்மீது நடவடிக்கை எடுப்பது. இங்கு ஒரு சிக்கலும் இருக்கிறது. அது, தனியார் மருத்துவமனைகளில், கட்டணம் பெறப்பட்ட பின்னரே தடுப்பூசிகள் வழங்கப்படுகின்றன என்பதால், அவற்றை திரும்ப பெற்றால், அதற்கான தொகையை திருப்பி செலுத்த வேண்டிய நிலை உருவாகும். அரசு, இதை கையாள்வதிலுள்ள சிக்கலும் அதுதான். ஆனால், அதற்காக தனியார் மருத்துவமனைகளில் உபயோகப்படுத்தாமலும் தடுப்பூசி இருந்துவிட்டு போகட்டும் என்று அரசு இருந்துவிட முடியாது. அப்படி இருந்தால், அது தடுப்பூசி பதுக்கல் என்றே பார்க்கப்படும். இந்தியா போன்ற அதிக மக்கள் தொகை கொண்ட ஒரு நாட்டில், இப்படி பல லட்ச தடுப்பூசிகள் உபயோகப்படுத்தப்படாமல் பதுக்கப்படுவது, அடுத்தடுத்த கொரோனா அலைகளில் சிக்கலை அதிகமாக்கும். இந்த இடத்தில், மேற்கூறிய சிக்கல் உருவாகாமல் இருக்க, கூடுதல் நடவடிக்கையொன்றை அரசு முன்னெடுக்கலாம். அது, * தனியார் மருத்துவமனைகளுக்கு, தேவை எந்தளவுக்கு இருக்கிறது - சராசரியாக ஒரு மருத்துவமனையில் எவ்வளவு தடுப்பூசி போடப்படுகிறது என்பதை அடிப்படையாக வைத்து, அடுத்த முறை அங்கு எவ்வளவு தடுப்பூசி போடப்படும் என்பதை கணித்து - அதற்கேற்ப தடுப்பூசி ஒதுக்கீடு செய்ய வேண்டும்.  இவை இரண்டையும் அரசு செய்யும்பட்சத்தில், தடுப்பூசி மீதம் ஆவதை பெருமளவு குறைக்கவும், தடுக்கவும் முடியும். தற்போதைக்கு, இந்தியாவில் 34 கோடி தடுப்பூசிகள், போடப்பட்டுள்ளன. இது உடனடியாக அதிகமானால் மட்டுமே, அடுத்த அலை கொரோனாவின் தாக்கத்தை, நம்மால் தடுக்க முடியும். தகவல் உறுதுணை: TOI
http://dlvr.it/S2xF9J

Read More

மும்பை: `சாலை விரிவாக்கம்; நடிகர் அமிதாப் பச்சன் வீட்டுச் சுவரை மாநகராட்சி இடிக்க முடிவு?!'

பாலிவுட் நடிகர் அமிதாப் பச்சன் மும்பை ஜுகுவில் வசித்து வருகிறார். அவரது வீடான பிரதீக்‌ஷா இருக்கும் சாலையில் அடிக்கடி போக்குவரத்து நெருக்கடி ஏற்பட்டு வந்தது. இதையடுத்து 2017-ஆம் ஆண்டு இச்சாலையை 45 அடியில் இருந்து 60 அடியாக விரிவுபடுத்த மாநகராட்சி நிர்வாகம் முடிவு செய்தது. இச்சாலை விரிவாக்க பணிகளுக்கு நடிகர் அமிதாப்பச்சன் வீடு உட்பட சில வீடுகளின் தடுப்பு சுவர்கள் இடையூறாக இருந்தது. இதையடுத்து சம்பந்தப்பட்ட வீட்டு உரிமையாளர்களுக்கு சாலை விரிவாக்க பணிகளுக்கு குறிப்பிட்ட அளவு நிலம் கொடுக்கும்படி கேட்டு மாநகராட்சி நோட்டீஸ் அனுப்பியது. இதற்கு வீட்டு உரிமையாளர்கள் மத்தியில் கடும் எதிர்ப்பு கிளம்பியது. இதையடுத்து இத்திட்டம் கிடப்பில் இருந்தது. ஆனால் 2019-ஆம் ஆண்டு அமிதாப் பச்சன் வீட்டுத் தடுப்புச் சுவர் தவிர்த்து பிற வீடுகளின் தடுப்புச் சுவரை இடித்து சாலையை மாநகராட்சி நிர்வாகம் விரிவுபடுத்தத் தொடங்கியது. Amithabh bachchan சாலை விரிவாக்க பணி முடிவுக்கு வர இருக்கிறது. ஆனால் அமிதாப் பச்சன் வீட்டு தடுப்பு சுவர் மட்டும் இடிக்கப்படாமல் அந்த இடத்தில் மட்டும் சாலை விரிவாக்கம் செய்யப்படாமல் இருந்தது. சமீபத்தில் காங்கிரஸ் கவுன்சிலர் துலிப் மிராண்டா இது குறித்து உள்ளூர் மாநகராட்சி அதிகாரிகளிடம் பிரச்னையைக் கிளப்பினார். திட்டமிட்டு அமிதாப் பச்சன் வீட்டு தடுப்புச் சுவரை மட்டும் இடிக்காமல் இருப்பதாக தெரிவித்த கவுன்சிலர், "இதனால் சாலை விரிவாக்க பணி முடியாமல் இருப்பதாக தெரிவித்தார். அமிதாப் பச்சன் வீட்டுக்கு அருகில் உள்ள வீடுகளில் தேவைப்படும் நிலத்தை எடுத்துக்கொண்ட பிறகு இதில் மட்டும் ஏன் நிலத்தை எடுக்காமல் இருக்கிறீர்கள் " என்று கேட்ட கவுன்சிலர் "இதில் விரைந்து நடவடிக்கை எடுக்கவில்லையெனில் லோக் ஆயுக்தாவில் புகார் செய்வேன் " என்று தெரிவித்திருந்தார். இதையடுத்து மாநகராட்சி நிர்வாகம் கவுன்சிலர் மிரண்டாவிற்கு கடிதம் எழுதியிருக்கிறது. அக்கடிதத்தில், 'பிரதிக்‌ஷா இல்லத்தில் எடுக்க வேண்டிய நிலத்தை சர்வே அதிகாரிகள் அளந்து எல்லையை குறித்துக் கொடுத்தவுடன் நிலம் கையகப்படுத்தப்படும். 2019-ஆம் ஆண்டே சர்வே நடத்த விண்ணப்பித்து அதற்கு பணமும் செலுத்திவிட்டோம். 2021-ஆம் ஆண்டு பிப்ரவரி மாதம் மாநகராட்சியும், சர்வே துறையும் இணைந்து அளந்து இடிக்க வேண்டிய பகுதியைக் கோடிட்டு காட்டியது. ஆனால் வரைபடத்தில் சில குளறுபடிகள் இருப்பதாக சர்வே அதிகாரிகள் தெரிவித்துள்ளனர். அவற்றை தெளிவுபடுத்திக் கொள்வதற்காக அனைத்து ஆவணங்களும் தாக்கல் செய்யப்பட்டு இருக்கிறது' என்று அக்கடிதத்தில் தெரிவிக்கப்பட்டுள்ளது. இப்பணிகள் முடிந்து சர்வேயர் அறிக்கை தாக்கல் செய்துவிட்டால் உடனே அமிதாப்பச்சன் வீட்டுத் தடுப்புச் சுவரை இடித்து சாலை விரிவாக்கப் பணியை நிறைவு செய்வோம் என்று மாநகராட்சி அதிகாரிகள் தெரிவித்தனர். மாநகராட்சி அதிகாரிகள் இது தொடர்பாக மும்பை புறநகர் மாவட்ட ஆட்சி தலைவர் மிலிந்த் போர்கருக்கு கடிதமும் எழுதியிருக்கின்றனர். அக்கடிதத்தில், 'சாலை விரிவாக்கத்திற்கு சர்வே அதிகாரிகள் விரைந்து பிரக்திக்‌ஷா எல்லையை அளந்து கொடுக்க உத்தரவிடவேண்டும்' என்று அதில் கேட்டுக்கொண்டுள்ளனர். ஆனால் இது குறித்து அமிதாப் பச்சன் கருத்து தெரிவிக்க மறுத்துவிட்டார். ஏற்கனவே நடிகை கங்கனா ரணாவத் இல்லத்தில் சட்டவிரோதமாக கட்டப்பட்ட பகுதியை மாநகராட்சி அதிகாரிகள் திடீரென இடித்து கோர்ட்டின் கண்டனத்திற்கு ஆளானார்கள். இப்போது அது போன்ற ஒரு நிலை வரக்கூடாது என்பதற்காக மாநகராட்சி அதிகாரிகள் இவ்விவகாரத்தில் நிதானமாக செயல்பட்டு வருகின்றனர்.
http://dlvr.it/S2w4Zs

Read More

ஜம்மு காஷ்மீரில் தொடர்ந்து தென்படும் ட்ரோன்கள்... என்ன நடக்கிறது அங்கே?

ஜம்மு - காஷ்மீர் என்றதுமே பனிப்போர்வை போர்த்திய பகுதி, கண்ணுக்கு விருந்தளிக்கும் சுற்றுலாத் தலம், இயற்கை எழில் கொஞ்சும் அழகுகொண்ட பகுதிதான் ஒரு காலத்தில் நினைவுக்கு வரும். தற்போது ஜம்மு - காஷ்மீர் என்றால் பலருக்கும் நினைவுக்கு வருவது பதற்றம் நிறைந்த சூழல், பயங்கரவாதம், குண்டுவெடிப்பு, துப்பாக்கிச்சூடு, போர்க்களம் என்பதுதான். ஜம்மு காஷ்மீருக்குச் சிறப்பு அந்தஸ்து வழங்கும் பிரிவு 370, கடந்த 2019, ஆகஸ்ட் மாதம் நீக்கப்பட்டது. மேலும், ஜம்மு காஷ்மீர், இரு தனித் தனி யூனியன் பிரதேசமாக மாற்றப்பட்டது.ஜம்மு - காஷ்மீர் சிறப்பு அந்தஸ்து வழங்கும் பிரிவு 370 நீக்கப்பட்ட பின்னர் ஜம்மு காஷ்மீரில் பயங்கரவாதச் செயல்பாடுகள் கணிசமாகக் குறைந்திருப்பதாகக் கூறப்பட்டுவந்தது. இந்தநிலையில், அங்கு ட்ரோன்கள் மூலம் ராணுவத் தளவாடங்கள் மீது தாக்குதல்கள் நடைபெற்றிருப்பது பெரும் பதற்றத்தை ஏற்படுத்தியுள்ளது. இந்தத் தாக்குதலுக்கும் தீவிரவாத அமைப்புகளுக்கும் தொடர்பு இருப்பதாகத் தெரியவந்துள்ளது. இது தொடர்பாக இந்தியாவின் உளவுத்துறை அமைப்பு ரகசிய விசாரணையை தீவிரப்படுத்தியுள்ளது. பாகிஸ்தான் எல்லையிலிருந்து 14 கிலோமீட்டர் தொலைவில் உள்ள ஜம்மு விமான நிலையத்துக்குள் இந்திய விமானப்படைத் தளம் அமைந்துள்ளது. இங்கு கடந்த ஜூன் 27-ம் தேதி அதிகாலை 1:40 மணியளவில் அடையாளம் தெரியாத இரண்டு ட்ரோன்கள் விமானப்படைத் தளப் பகுதிக்கு வந்தது. முதல் ட்ரோன் விமானப்படைத் தளத்தின் தொழில்நுட்ப கட்டடத்தின் மேற்கூரையில் விழுந்து வெடித்தது. சிறிது நேர இடைவெளியில் மற்றொரு ட்ரோனும் கீழே விழுந்து சிதறியது, இந்தத் தாக்குதலில் இரண்டு ராணுவ வீரர்களுக்குக் காயம் ஏற்பட்டது.ஜம்மு விமானப்படை தளம் இந்த ட்ரோன்களில் வீரியம் குறைந்த வெடிபொருள்கள் இருந்ததால் பெரும் அசம்பாவிதம் எதுவும் ஏற்படவில்லை என்று கூறப்படுகிறது. அதேவேளையில், ஜி.பி.எஸ் உதவியுடன் அருகிலுள்ள பகுதிகளிலிருந்துதான் இந்தத் தாக்குதல் நடைபெற்றிருக்கக்கூடும் என்றும் முதற்கட்ட விசாரணையில் தெரியவந்துள்ளது. மேலும், அங்கிருந்த விமானங்களின் மீது தாக்குதல் நடத்தத் திட்டமிட்டிருக்கலாம் என்றும் சந்தேகிக்கப்படுகிறது. இது குறித்து பல்வேறு பிரிவுகளின் கீழ் வழக்கு பதிவு செய்து ஜம்மு-காஷ்மீர் காவல்துறை விசாரணையைத் தீவிரப்படுத்தியுள்ளது. தாக்குதல் நடைபெற்ற அடுத்த நாளிலிருந்து இதுவரை மொத்தம் ஒன்பது முறை ட்ரோன்கள் தென்பட்டதாகத் தகவல்கள் வெளியாகியுள்ளன. இரண்டு முறை காஷ்மீர் பகுதிகளிலும், ஏழு முறை ஜம்மு பகுதிகளிலும் ட்ரோன்கள் தென்பட்டுள்ளன. தொடர்ந்து ட்ரோன்கள் தென்படுவது அந்தப் பகுதிகளில் பதற்றமான சூழலை ஏற்படுத்தியுள்ளது. அதுமட்டுமல்லாமல், ராணுவப் பகுதிகள் மற்றும் எல்லைகளில் பாதுகாப்பும் கண்காணிப்பும் பலப்படுத்தப்பட்டுள்ளன என்று தெரிவிக்கப்பட்டுள்ளது. இந்தச் சம்பவம் தொடர்பாக தேசியப் பாதுகாப்பு முகமை ரகசிய விசாரணையை வேகப்படுத்தியுள்ளது.ட்ரோன் இந்த வகை ட்ரோன்கள் ரிமோட் கொண்டு இயக்கப்படுவது உறுதிசெய்யப்பட்டதால், ஜாமர்கள் கொண்டு ட்ரோன்களைச் செயலிழக்கவைக்கும் நடவடிக்கைகளையும் ராணுவம் எடுத்துவருகிறது. இந்த வகை ட்ரோன்களை பாகிஸ்தான் ராணுவமும் தீவிரவாத அமைப்புகளும் பயன்படுத்திவந்ததாகவும், இவை சீனாவில் தயாரிக்கப்பட்டிருக்க வாய்ப்பிருப்பதாகவும் முதற்கட்ட விசாரணையில் தெரியவந்துள்ளது. மேலும், எல்லைகளில் கடத்தல் செயல்பாடுகளுக்கும் ட்ரோன்களைப் பயன்படுத்திவந்தது வெளிச்சத்துக்கு வந்துள்ளது. பாதுகாப்பு நடவடிக்கையாக ட்ரோன்களுக்கு எதிராகச் செயல்படும் கருவி, ஜம்மு விமான தளத்தில் பொருத்தப்பட்டுள்ளது. இந்தக் கருவி, ட்ரோன் வருவதை அலைவரிசைகள் மூலம் கண்டறியும் தன்மைகொண்டது. மேலும் அதிக திறன்கொண்ட ஜாமர்களும் பொருத்தப்பட்டுள்ளன என்றும் ராணுவ வட்டாரம் தெரிவித்துள்ளது. இந்தியாவில் ட்ரோன்கள் மூலம் தாக்குதல் நடைபெறுவது இதுவே முதன்முறை. இந்தத் தாக்குதலுக்கு எதிர்த் தாக்குதல் நடத்த இந்திய ராணுவம் தயார்நிலையில் இருப்பதாகக் கூறப்படுகிறது.ஜம்மு-காஷ்மீரில் உள்ள ரஜோவ்ரி மாவட்டத்தில் ட்ரோன்களை பறக்கவிடத் தடை விதிக்கப்பட்டுள்ளதாக அந்த மாவட்ட நிர்வாகம் தெரிவித்துள்ளது. இராக் போரின்போது அமெரிக்க ராணுவத்தின் மீது தீவிரவாத அமைப்புகள் ட்ரோன்கள் மூலம் தாக்குதல் நடத்தின. இந்தத் தாக்குதலைத் தடுக்க அந்த ராணுவம் கடும் சிரமப்பட்டது குறிப்பிடத்தக்கது. தற்போது, இந்தியாவின் மீதும் ட்ரோன்கள் மூலம் தாக்குதல் நடைபெறுவது ஜம்மு காஷ்மீர் பகுதிகளில் பதற்றமான சூழலை ஏற்படுத்தியுள்ளது.
http://dlvr.it/S2v3P1

Read More

"லாக்டவுன் நடைமுறையால் மிகப் பெரிய பேரழிவு" - ராகுல் பஜாஜ் எச்சரிக்கை

"கொரோனா பரவல் காரணமாக லாக்டவுன் கொண்டுவரப்படுகிறது. ஆனால், லாக்டவுன் கொரோனா பரவலை தடுக்கிறதோ இல்லையோ பொருளாதார மேம்பாட்டை தடுக்கிறது. லாக்டவுனால், பொருளாதாரம் பெரிதும் பாதிக்கப்படுகிறது. குறிப்பாக, ஊரடங்கு நேரத்தில் தொழில்கள் பாதிப்படைவது, வேலை இழப்புகள் அதிகமாவது, அதனால் ஏற்படும் பிற பாதிப்புகள் ஆகியவை, பொருளாதார வளர்ச்சியில் பெரும் பாதிப்பை ஏற்படுத்துகிறது" என பஜாஜ் ஆட்டோ நிறுவனத்தின் ராகுல் பஜாஜ் தெரிவித்திருக்கிறார். பஜாஜ் ஆட்டோ நிறுவனத்தின் தலைவராக ராகுல் பஜாஜ், பங்குதாரர்களுடன் உரையாடுவது இதுவே கடைசியாகும். நிறுவனத்தின் அடுத்தகட்ட தலைமை குறித்து சில மாதங்களுக்கு முன்பே அறிவிக்கப்பட்டது. நீரஜ் பஜாஜ் அடுத்த தலைவராக செயல்படுவார். ராஜீவ் பஜாஜ் நிர்வாக இயக்குநராக செயல்படுவார் என அறிவிக்கப்பட்டிருந்தது. "கடந்த ஆண்டு நாடு முழுவதும் ஆறு வாரங்களுக்கு லாக்டவுன் அறிவிக்கப்பட்டது. இதனால், உற்பத்தி மட்டுமல்லாமல் விற்பனையும் பாதிக்கப்பட்டது. லாக்டவுன் தளர்த்தப்பட்டாலும் கூட 2020-ம் ஆண்டு விழாக் காலத்தில்தான் தேவை உயர்ந்தது. இந்த ஆண்டு இரண்டாம் அலை வேகம் எடுத்ததை அடுத்து, மார்ச் மாதம் முதல் 20-க்கும் மேற்பட்ட மாநிலங்கள் லாக்டவுனை அறிவித்தன. ஏப்ரல் மற்றும் மே மாதத்தை முழுவதும் இழந்துவிட்டோம். ஜூன் மாதத்தின் பாதியில்தான் ஓரளவுக்கு விற்பனை இருந்தது. லாக்டவுன் போதுமான பலனை தரவில்லை என்பதற்கு ஆதாரங்கள் உள்ளன. ஆனால், அரசுகள் லாக்டவுனை அறிவிக்கின்றன. இதனால் நிச்சமற்றத்தன்மை உருவாகி இருக்கிறது. நடுத்தர மற்றும் ஏழைகள் மிகவும் அதிகமாக பாதிக்கப்படுகிறார்கள். இதனால் நகரங்களில் இருந்து மீண்டும் கிராமங்களை நோக்கி செல்பவர்களின் எண்ணிக்கை உயர்கிறது. இது மிகப் பெரிய பேரழிவாக மாறும். விதிமுறைகளை கடுமையாக்குவதுதான் இதற்கு தீர்வு. முகக்கவசம், தனிமனித இடைவெளி, கிருமிநாசினி பயன்படுத்துவதை கட்டாயமாக்கவேண்டும். மேலும், தடுப்பூசியை வேகப்படுத்த வேண்டும். அப்போதுதான் ஏழைகளுக்கு உணவு கிடைக்கும். நாடும் வளர்ச்சி அடைய முடியும்" என்றார் ராகுல் பஜாஜ்.
http://dlvr.it/S2rps2

Read More

மும்பை: இசையமைப்பாளர் குல்ஷன்குமார் கொலை வழக்கு.. தாவூத் கூட்டாளிக்கு ஆயுள்!

இந்தி மற்றும் ஆன்மீக இசையமைப்பாளரும், டி சீரியஸ் கேசட் உரிமையாளருமான குல்ஷன் குமார் கடந்த 1997ம் ஆண்டு ஆகஸ்ட் மாதம் 12-ம் தேதி தொழில் போட்டி காரணமாக மும்பை அந்தேரி ஜுகுவில் கோயிலுக்கு சென்றுவிட்டு வெளியில் வந்த போது 3 பேர் கொண்ட கும்பபால் சுட்டுக்கொலை செய்யப்பட்டார். குல்ஷன் குமார் உடலில் 16 துப்பாக்கி குண்டுகள் பாய்ந்திருந்தது. பெரும் பரபரப்பை ஏற்படுத்திய இக்கொலையில் தொடர்புடையவராக கருதப்பட்ட இசையமைப்பாளர் நதீம் அக்தர் கைது நடவடிக்கையில் இருந்து தப்பிக்க இங்கிலாந்துக்கு தப்பி சென்றுவிட்டார். Gulshan kumar தொழில் போட்டி காரணமாக பணம் கொடுத்து இக்கொலை செய்யப்பட்டது போலீஸ் விசாரணையில் தெரிய வந்தது. டிப்ஸ் இண்டஸ்ட்ரீஸ் உரிமையாளர் ரமேஷ் தொரானி கொலை தொடர்பாக கைது செய்யப்பட்டார். இவர் குல்ஷல் குமாரை கொலை செய்ய தாவூத் இப்ராகிம் கூட்டாளி அபு சலேமிற்கு 25 லட்சம் கொடுத்ததாக குற்றம் சாட்டப்பட்டது. இக்கொலையில் ஈடுபட்ட அப்துல் ரஃப் மெர்ச்சண்ட் 2001ம் ஆண்டு கொல்கத்தாவில் கைது செய்யப்பட்டான். மொத்தம் இக்கொலை தொடர்பாக 18 பேர் கைது செய்யப்பட்டனர். 26 பேர் மீது குற்றம் சாட்டப்பட்டது. இவ்வழக்கை விசாரித்த நீதிமன்றம் அப்துல் ரஃப்பிற்கு மட்டும் ஆயுள் தண்டனை வழங்கியது. டிப்ஸ் கேசட் உரிமையாளர் ரமேஷ் தொரானி, இசையமைப்பாளர் நதீம் , அப்துல் சகோதரர் அப்துல் ரஷீத் உட்பட அனைவரும் விடுவிக்கப்பட்டனர். இத்தீர்ப்பை எதிர்த்து மும்பை உயர் நீதிமன்றத்தில் மாநில அரசு மேல்முறையீடு செய்தது. குறிப்பாக ரமேஷ் தொரானி மற்றும் அப்துல் ரஷீத் ஆகியோர் விடுவிக்கப்பட்டதை எதிர்த்து மாநில அரசு முறையீடு செய்திருந்தது. மும்பை உயர்நீதிமன்றம் இவ்வழக்கை விசாரித்த உயர் நீதிமன்ற நீதிபதிகள் ஜாதவ் மற்றும் போர்க்கர் ஆகியோர் அடங்கிய டிவிஷன் பெஞ்ச், அப்துல் ரஃப்பிற்கு விதிக்கப்பட்ட ஆயுள் தண்டனையை உறுதி செய்தனர். மேலும் ரமேஷ் தொரானி விடுதலை செய்யப்பட்டதையும் நீதிபதிகள் உறுதி செய்தனர். ஆனால் தாவூத் இப்ராகிம் கூட்டாளியாக கருதப்படும் அப்துல் ரஃப் சகோதரர் அப்துல் ரஷீத்திற்கும் இக்கொலை வழக்கில் ஆயுள் தண்டனை வழங்கி நீதிபதிகள் உத்தரவிட்டனர். தண்டனை பெற்றுள்ளவர்கள் ஒரு வாரத்தில் சரணடைய உத்தரவிடப்பட்டுள்ளது. கொலை நடந்து 24 ஆண்டுகள் கழித்து இவ்வழக்கில் இறுதி தீர்ப்பு வந்துள்ளது. குல்ஷன் குமார் கொலை செய்யப்பட்ட நேரத்தில் மும்பையில் மாபியாக்களின் ஆதிக்கம் ஓங்கி இருந்தது. இவ்வழக்கில் இது வரை 18 பேர் விடுவிக்கப்பட்டுள்ளனர்.
http://dlvr.it/S2rBPY

Read More