`வீரப்பன் மட்டும் இருந்திருந்தால்..!' - கர்நாடக அத்துமீறல்களை விவரிக்கும் விவசாயிகள் சங்கத் தலைவர்

மார்கண்டேய நதியின் குறுக்கே `யார்கோள்’ என்ற இடத்தில், பிரமாண்ட தண்ணீர் சேமிப்புக் கிடங்கைக் கட்டியிருப்பதன் மூலம் அடுத்து மேக்கேதாட்டூ அணையையும் கட்டி முடிப்போம் என்று சவால் விடுத்திருக்கிறது, கர்நாடக அரசு. குடிசை வீடு வேயப்படுவதைப்போல், ஓரிரு நாளில், யார்கோள் அணை கட்டி முடிக்கப்படவில்லை. இந்த விவகாரத்தில், கடந்த பத்து ஆண்டுகளாகத் தமிழக ஆட்சியாளர்கள் கண்டுகொள்ளாமல் இருந்ததன் விளைவே கர்நாடகா அத்துமீறுவதற்குக் காரணம் என்று கொந்தளிக்கிறார்கள், தமிழக விவசாய சங்க பிரதிநிதிகள். மார்கண்டேய நதியில், கர்நாடக அரசு ரகசியமாக அணை கட்டுமானப் பணிகளைத் தொடங்கியபோதே, முதல் போராட்டம் நடத்தியவர், தமிழக விவசாயிகள் சங்கத் தலைவரும் கிருஷ்ணகிரி மாவட்டத்தைச் சேர்ந்தவருமான ராமகவுண்டர் என்பவர்தான்.யார்கோள் அணை Also Read: தென்பெண்ணை ஆற்றில் 162 அடி உயர அணை, அத்துமீறிய கர்நாடகா; அதிர்ச்சியில் தமிழகம்! அணை கட்டியதன் பின்னணியில் கர்நாடகாவின் திட்டம் குறித்து ராமகவுண்டரிடம் பேசினோம். ``மார்கண்டேய நதியிலிருந்து தென்பெண்ணையாற்றுக்குப் பாய்ந்துவரும் தண்ணீரை நம்பிதான் தமிழகத்திலுள்ள கிருஷ்ணகிரி, தர்மபுரி, திருவண்ணாமலை, கள்ளக்குறிச்சி, விழுப்புரம், கடலூர் ஆகிய 6 மாவட்டங்களும் பாசனம் பெறுகின்றன. கர்நாடகாவின் அத்துமீறலால், 6 மாவட்டங்களிலும் விவசாயம் கடுமையாகப் பாதிக்கும் நிலை ஏற்பட்டிருக்கிறது. இது, அணை கிடையாது. நீர் சேமிப்புக் கிடங்கு அல்லது ராட்சச தடுப்பணை என்றுதான் சொல்ல வேண்டும். அணை என்றால் மதகு இருக்கும். இதில், எதுவுமே இல்லை. பிரமாண்ட தடுப்புச்சுவரைப்போல் கட்டி எழுப்பியிருக்கிறார்கள். 2011-ம் ஆண்டு அடித்தளம் போட்டபோதே அப்போதைய கிருஷ்ணகிரி மாவட்ட ஆட்சியரிடம் மனு கொடுத்தோம். இதனால், தென்பெண்ணை ஆறு வறண்டுப் போகும். அதில், புல் முளைக்கும். தமிழகத்திலுள்ள 6 மாவட்ட விவசாயிகளின் வாழ்வாதாரம் பாதிக்கப்படும். இதற்கெல்லாம் காரணம், தமிழக அரசியல் கட்சிகள்தான். தடுப்பணைப் பணிகள் நடைபெற்றபோது, ஒருவரும் வாய் திறக்கவில்லை. இப்போது, அறிக்கைக்கு மேல் அறிக்கை விடுகிறார்கள். இவையெல்லாம் தமிழக மக்களையும், விவசாயிகளையும் ஏமாற்றுவதற்கான நாடகம். இதுதொடர்பாகவும், தமிழக நீர்வளத்துறை அமைச்சர் துரைமுருகன் மத்திய அமைச்சரைச் சந்தித்துப் பேசியிருக்கிறார். நடுவர் மன்றம் அமைக்கப்பட்டாலும், தடுப்பணையை இடிக்கப் போவதில்லை. இந்நேரம் வீரப்பன் மட்டும் இருந்திருந்தால் நடப்பதே வேறு. இவ்வளவு பெரிய தடுப்பணையைக் கட்டுவதற்கு யோசித்துக்கூட இருக்காது, கர்நாடகா அரசு. அப்படியே முடிவெடுத்திருந்தாலும், பின்வாங்கும் சூழல் ஏற்பட்டிருக்கும்.வீரப்பன் Also Read: `விவசாயிகள் இல்லாமல் மேக்கேதாட்டூ ஆலோசனை கூட்டமா?' - வலுக்கும் ஆதங்க குரல்கள்! வீரப்பன் உயிருடன் இருந்தபோது, தமிழகத்தின்மேல் கர்நாடகாவுக்குப் பயமிருந்தது என்ற பேச்சு இன்றளவிலும் விவசாயிகள் மத்தியில் உள்ளது. கன்னட நடிகர் ராஜ்குமாரை வீரப்பன் கடத்தியபோது அவர் வைத்த கோரிக்கைகளில் காவிரியில் தண்ணீர் திறந்துவிடணும் என்பதுவும் ஒன்று. ஒகேனக்கல், பாலாறு, மாதேஸ்வரன் மலை, மேக்கேதாட்டூ பகுதிகளில் வீரப்பனின் நடமாட்டம் காரணமாக கர்நாடகாவினர் எல்லைப் பகுதியில் அதிகம் அத்துமீறியதில்லை. காட்டையே கோட்டையாக வைத்திருந்த வீரப்பன் இறந்த பின்னர்தான், காட்டுக்குள்ளேயே ரோடு போட்டு மரம் வெட்டிக்கொண்டு செல்கிறார்கள். மேக்கேதாட்டூ விவகாரத்திலாவது, தமிழக ஆட்சியாளர்கள் விழிப்புடன் இருக்க வேண்டும்’’ என்கிறார். மேலும், ``காட்டுப்பகுதி என்பதால் அரசு அதிகாரிகள் ஆய்வுக்குச் செல்லவில்லை. அதன்பிறகு நானே, விவசாய சங்க நிர்வாகிகளுடன் தடுப்பணைக் கட்டப்பட்டுள்ள இடத்துக்குச் சென்று போட்டோ எடுத்து ஆவணத்துடன் புகார் தெரிவித்தேன். அந்த போட்டோ ஆல்பத்தை ஆதாரமாக வைத்துதான் சுப்ரீம் கோர்ட்டில் தமிழக அரசாங்கம் வழக்கு தொடர்ந்தது. தென்பெண்ணையாற்றின் பெரும் பகுதி தமிழகத்திலிருந்தாலும், நீர்ப்பிடிப்புப் பகுதி முழுவதும் கர்நாடகாவிலிருக்கிறது. இதனால், 164 அடி உயரத்துக்குத் தடுப்பணையைக் கட்டி தண்ணீரைச் சேமிக்க திட்டமிட்டிருக்கிறது, கர்நாடக அரசாங்கம்.ராமகவுண்டர் Also Read: ஒருபக்கம் மேக்கேதாட்டு.. மறுபக்கம் தென்பெண்ணை! - அடங்காத கர்நாடகா; தடுக்குமா தமிழக அரசு? தடுப்பணைப் பகுதியிலேயே ஜல்லி அரவை இயந்திரங்கள் அமைத்து கற்களைக் கொண்டுவந்து உடைத்து பணிகளைச் செய்து முடித்திருக்கிறார்கள். கடந்த அ.தி.மு.க ஆட்சியில், முக்கிய பதவியிலிருந்த நபரின் பினாமிகள் மூலமாகவே மணல் விநியோகம் நடந்திருக்கிறது. அதுவும், தமிழகத்திலிருந்து மணலை லோடு, லோடாக அள்ளிச் சென்று கட்டுமானப் பணிகளுக்கு உதவியிருக்கிறார்கள். தற்சமயம், பைப்லைனையும் போட்டுவிட்டார்கள். இனிமேல், மார்கண்டேய நதியின் தண்ணீரை மொத்தமாக சேமித்து வைப்பார்கள். உபரி நீரை பைப்லைன் மூலம் எடுத்து வேறு இடத்தில் ஸ்டாக் வைத்துவிடுவார்கள்." என்கிறார் ராமகவுண்டர்.
http://dlvr.it/S3dRyh

Read More

நீட் தேர்வு தேதி அறிவிப்பு: அரசின் முடிவு மாணவர் நலனுக்கு எதிரானதா?- கல்வியாளர்கள் கருத்து

நீட் நுழைவுத் தேர்வு, செப்டம்பர் 12ம் தேதி நடக்கவிருப்பதாக மத்திய கல்வித்துறை அமைச்சர் தர்மேந்திர பிரதான் அறிவித்துள்ளார். இதுபற்றிய கல்வியாளர்கள் கருத்தை கேட்டோம். நீட் தேர்வு குறித்து கல்வியாளர் ஜெயப்பிரகாஷ் காந்தி கூறுகையில், “ஜெ.இ.இ. நுழைவுத்தேர்வு ஆகஸ்ட் 1ம் தேதி என ஏற்கெனவே அறிவிக்கப்பட்டிருப்பதால், விரைவில் நீட் தேர்வுக்கான தேதியும் அறிவிக்கப்படும் என எதிர்ப்பார்த்துதான் இருந்தோம். கண்டிப்பாக செப்டம்பர் வரை தள்ளிப்போகும் என்றே நினைத்தோம். அந்தவகையில் இது எதிர்ப்பார்க்கப்பட்ட ஓர் அறிவிப்புதான். இப்போதைக்கு மாணவர்கள் அரசியல் காரணங்களை மனதில் கொள்ளாமல் தேர்வுக்கு மனதளவிலும் செயலளவிலும் தயாராக வேண்டுமென்பதே நான் சொல்ல விரும்புவது. தேர்வு நடக்கிறது, நடக்கவில்லை என்ற குழப்பங்களையெல்லாம் புறந்தள்ளிவிட்டு நீட் தேர்வுக்கு அப்ளை செய்து, தேர்வுக்கு தயாராவதே இப்போதைக்கு நல்லது. இனி நடக்கும் விஷயங்களை, இப்போது மாணவர்கள் கணிக்கவோ யோசிக்கவோ வேண்டாம்” என்றார். கல்வியாளர் பிரின்ஸ் கஜேந்திர பாபு இதுபற்றி பேசுகையில், “இன்றைய சூழலில் பன்னிரெண்டாம் வகுப்பு பொதுத்தேர்வை ஒரு சராசரி மாணவனால், தான் படித்த பள்ளியிலோ அல்லது தனக்கு மிக அருகில் உள்ள ஒரு மையத்திலோ நேரடியாக சென்று எழுதமுடியும். ஆனால் நீட் நுழைவுத்தேர்வு அப்படியல்ல. எந்த மையத்தை அரசு ஒதுக்குகிறதோ, அங்கு சென்றுதான் எழுதவேண்டும் என்பது நீட் தேர்வாளர்களுக்கான விதி. இங்கே, பன்னிரெண்டாம் வகுப்பு தேர்வை எழுத மாணவர்கள் நேரில் செல்வது உகந்ததல்ல / சிரமப்படுவர் என அரசுக்கு புரிகிறது; அதனால் அதை ரத்து செய்தது. ஆனால் நீட் தேர்வில் மாணவர்கள் எதிர்கொள்ளும் சிக்கல் அரசுக்கு புரியவில்லை. இதை நாங்கள் எப்படி புரிந்துக்கொள்வது? இப்போது நீட் தேர்வை நடத்தவேண்டிய அவசியம் அரசுக்கு எங்கிருந்து வருகிறது? எந்த அடிப்படையில் இந்த முடிவை அரசு எடுத்தது என தெரியவில்லை. ‘பொதுத்தேர்வென்றால் ஐந்து லட்சம்பேர் எழுதுவர் – அப்போது கொரோனா பரவும்; நீட் என்றால் 1 லட்சம்பேர்தான் எழுதுவர் – அப்போது கொரோனா பரவாது’ என்று பேசப்போகிறீர்களா என்றும் தெரியவில்லை. கொரோனா, எத்தனை பேரென்றாலும் பரவும்தானே! ஒரு உயிரென்றாலும், அதுவும் உயிர்தானே… அந்தவகையில் மாணவர் நலன் சார்ந்த அறிவிப்பாக இதை நாங்கள் பார்க்கவில்லை. மத்திய அரசு, தங்களின் இந்த அறிவிப்பில் எங்கு மாணவர் நலன் உள்ளதென்பதை கூற வேண்டும். மனிதாபிமானத்தோடு இயங்கும் எந்தவொரு அரசிடமும் மக்கள் இதை எதிர்ப்பார்க்க மாட்டார்கள்” எனக்கூறினார்.
http://dlvr.it/S3c4VQ

Read More

மின்னல் தோன்றுவது எதனால்? மின்னல் நிலத்தை தாக்குவது எப்படி? - விரிவான அலசல்

இந்தியாவில் கடந்த ஓராண்டில் மட்டும் இடி மின்னல் தாக்கி 1619 பேர் உயிரிழந்துள்ளதாக புள்ளி விவரங்களில் தெரிய வந்துள்ளது. ராஜஸ்தான் தலைநகர் ஜெய்ப்பூரை அடுத்துள்ள ஆம்பர் கோட்டை அருகே மலைப்பகுதியில் சுற்றுலாப்பயணிகள் கூடியிருந்தபோது மின்னல் தாக்கியது. இதில் 11 பேர் உயிரிழந்தனர். இதேபோன்று கோடா, ஜலாவர், தோல்பூர் ஆகிய மாவட்டங்களிலும் மின்னல் தாக்கி 7 பேர் பலியாகியுள்ளனர். ராஜஸ்தானில் 20 பேர் வரை உயிரிழந்த நிலையில், இறந்தவர்களின் குடும்பத்தினருக்கு தலா 5 லட்சம் ரூபாய் இழப்பீடு வழங்கப்படும் என முதலமைச்சர் அசோக் கெலாட் தெரிவித்துள்ளார். இதேபோல, உத்தரப் பிரதேச மாநிலத்திலும் மின்னல் தாக்கியதில் 40 பேர் உயிரிழந்துள்ளனர். உயிரிழந்தோர் குடும்பத்துக்கு, பிரதமர் நரேந்திர மோடி இரங்கல் தெரிவித்துள்ளார். கடந்த 24 மணி நேரத்தில் மட்டும் இடி மின்னல் தாக்கி இதுவரை 70 பேர் உயிரிழந்துள்ளனர். இது நாடு முழுவதும் பெரும் சோகத்தை ஏற்படுத்தியிருக்கிறது. ஒவ்வொரு ஆண்டும் இயற்கை சீற்றங்களில் மிக முக்கியமாக இடி மின்னல் தாக்குலதில் 35.3 சதவிம் பேர் உயிரிழப்பதாக தேசிய குற்ற ஆவண காப்பக புள்ளி விவரங்கள் தெரிவிக்கிறது. இதில் கடந்த ஏப்ரல் 1, 2020 ஆம் ஆண்டு தொடங்கி மார்ச் 31, 2021 தேதி முடிய இந்தியாவில் இடி மின்னல் தாக்கியதால் 1,619 பேர் உயிரிழந்திருப்பதாக புள்ளி விவரங்கள் தெரிவிக்கின்றன. இதில் பீகார் மாநிலத்தில் 401 பேரும், உத்தரப் பிரதேசத்தில் 238 பேரும், மத்திய பிரதேசத்தில் 228 பேரும் பலியாகி இருக்கிறார்கள். மொத்த மரணத்தில் 53 சதவிதம் இந்த மூன்று மாநிலங்களில் ஏற்பட்டிருப்பது கவலையை ஏற்படுத்தியிருக்கிறது. அதேபோல இடி மின்னல் ஏற்படுவதும் கடந்த ஓராண்டில் 34 சதவிதம் அதிகரித்திருப்பதாக கூறப்படுகிறது. 2019 - 2020 ஆம் ஆண்டில் 138,00,000 முறை மின்னல் தாக்கியிருக்கிறது. அதேவேளையில் 2020- 2021 ஆம் ஆண்டு காலத்தில் 185,44,367 முறை மின்னல் ஏற்பட்டிருக்கிறது. இதில் ஒடிசா, மத்தியப் பிரதேசம், சத்தீஸ்கர், மேற்கு வங்கம், ஜார்காண்ட் மாநிலத்தில் மின்னல் அதிக முறை தாக்கியிருக்கிறது. அதில் அதிகபட்சமாக ஒடிசாவை 14.20 லட்சம் முறை மின்னல் தாக்கியிருக்கிறது. மொத்தம் 207 பேர் பலியாகி இருக்கிறார்கள். மின்னல் தோன்றுவது எதனால்? மேகங்கள் ஒன்றுடன் ஒன்று உரசும்போதோ, வேறு பல காரணங்களாலோ மின்னூட்டம் பெற்றுவிடும். எதிரெதிர் மின்னூட்டம் பெற்ற மேகங்கள் அருகருகே வரும்போது காற்றின் வழியாக மின் பரிமாற்றம் ஏற்படும். அப்போது ஏற்படுகிற ஒளிக்கீற்றுதான் மின்னல். இடியும் மின்னலும் ஒருங்கிணைந்த நிகழ்வுகள் என்றாலும் ஒலியைவிட ஒளியின் வேகம் அதிகம் என்பதால் முதலில் மின்னல் நம் கண்களுக்குத் தெரிகிறது. இடிச்சத்தம் அதற்குப் பிறகுதான் நம் காதுகளை அடைகிறது. மின்னல் நிலத்தை தாக்குவது எப்படி? வானில் தோன்றும் மின்னல் மரங்களின் வழியே நிலத்தில் பாய்ந்துவிடும். விலங்குகளும், மனிதர்களும்கூட மின்னல் தாக்கி இறக்க நேரிடுகிறது. மின்னல் ஏற்படும் பகுதியைவிட உயரத்தில் விமானங்கள் பரப்பதால், அவை மின்னலால் பாதிப்படைவதில்லை. இருந்தாலும் சில சமயம் ஆகாய விமானங்களும் மின்னல் தாக்குதலுக்கு உள்ளாகின்றன. வட இந்தியாவில் பருவக் காலங்களின்போது அதிகமான மின்னல்கள் தோன்றி நிலத்தை தாக்குகிறது. அப்போது விவசாயிகள் நிலத்தில் வேலையில் ஈடுபடும்போது அவை தாக்கி உயிரிழப்பதாக கூறப்படுகிறது. மின்னலின் வகைகள் மேகத்திற்கு உள்ளே உண்டாகும் மின்னல் (Inter-cloud): ஒரே மேகத்திற்குள் உள்ள நேர்மின் அயனி மற்றும் எதிர்மின் அயனி கவர்தலினால் மின்னல் ஏற்படலாம். இதனை மேகத்திற்கு உள்ளே உண்டாகும் மின்னல் எனப்படுகிறது. வெவ்வேறு மேகத்திற்கு இடையே ஏற்படும் மின்னல் (Intra-cloud): ஒரு மேகத்தில் உள்ள நேர்மின்அயனி அருகில் இருக்கும் மற்றொரு மேகத்தின் எதிர்மின் அயனியை கவர்தலினால் ஏற்படும் மின்னல் வெவ்வேறு மேகத்திற்கு இடையே ஏற்படும் மின்னல் என்கிறோம். மேகத்திற்கும், பூமிக்கும் இடையே ஏற்படும் மின்னல் (Cloud-to-ground): மேகத்தின் அடிப்பகுதியில் இருக்கும் எதிர்மின் அயனியானது புவியில் இருக்கும் நேர்மின் அயனியை கவர்ந்திழுக்கும்போது ஏற்படும் மின்னல் மேகத்திற்கும், பூமிக்கும் இடையே ஏற்படும் மின்னல் ஆகும். இதுவே மிகவும் ஆபத்தானது. இவ்வகை மின்னலே பூமியில் இருக்கும் மரம், கட்டடம் உட்பட்ட உயரமான இடங்களை தாக்கி, சில நேரங்களில் மனிதனையும் பலி வாங்குகிறது.
http://dlvr.it/S3bMlQ

Read More

ராஜஸ்தான், உ.பி.. செல்ஃபி எடுத்த 11 பேர்; மொத்தத்தில் 70 பேர்! - ஒரே நாளில் மின்னல் தாக்கி பலி

கோரதாண்டவமாடி இந்திய மக்களைப் பலி கொண்ட கொரோனா இரண்டாம் அலையின் தாக்கம் சற்று குறைந்திருக்கும் இவ்வேளையில், ஒரே நாளில் 70-க்கும் அதிகமானோரின் உயிரைப் பறித்திருக்கிறது மின்னல்! உத்தரப் பிரதேசம், ராஜஸ்தான், மத்தியப் பிரதேசம் ஆகிய மாநிலங்களில் கடந்த ஞாயிற்றுக்கிழமை (11.7.2021) அன்று சுமார் 70 பேர் மின்னல் தாக்கி உயிரிழந்திருக்கின்றனர். இந்த மூன்று மாநிலங்களிலும் தென்மேற்கு பருவமழை வெளுத்து வாங்கிக் கொண்டிருக்கிறது.குடியிருப்பு பகுதிகளில் ஒளி கீற்றுகளுடன் தோன்றிய மின்னல் Also Read: புதுக்கோட்டை: கல்குவாரியில் மின்னல் தாக்கி விபத்து; மழைக்கு ஒதுங்கி நின்றவர்களுக்கு நேர்ந்த சோகம்! உத்தரப் பிரதேசம் உத்தரப் பிரதேசத்தின் 16 மாவட்டங்களில், இதுவரை 41 பேர் மின்னல் தாக்கியதால் உயிரிழந்திருப்பது கண்டறியப்பட்டிருக்கிறது. இதில் 14 பேர் பிரக்யாராஜ் நகரைச் சேர்ந்தவர்கள். 30-க்கும் மேற்பட்டோருக்குக் காயம் ஏற்பட்டிருப்பதாகவும் உ.பி அரசு தெரிவித்திருக்கிறது. மின்னல் தாக்கியதில் 250 விலங்குகள் உயிரிழந்திருப்பதாகவும், 20-க்கும் மேற்பட்ட விலங்குகள் காயமடைந்திருப்பதாகவும் உத்தரப் பிரதேச நிவாரண ஆணையம் தகவல் தெரிவித்திருக்கிறது. ராஜஸ்தான் ராஜஸ்தானில் மின்னல் தாக்கி 23 பேர் உயிரிழந்திருப்பதாகவும், 25 பேருக்கு அதிகமானோர் காயமடைந்திருப்பதாகவும் அந்த மாநிலத்தின் பேரிடர் மேலாண்மைத் துறை தகவல் வெளியிட்டிருக்கிறது. ராஜஸ்தானின் புகழ்பெற்ற சுற்றுலாத்தலமான அமீர் கோட்டையில் செல்ஃபி எடுத்துக் கொண்டிருந்த 11 பேரை மின்னல் பலி கொண்டதாகச் சொல்லப்படுகிறது. இந்தச் சம்பவம் நடந்தபோது, அமீர் கோட்டையிலுள்ள வாட்ச் டவரின் மீது 27 சுற்றுலாப் பயணிகள் நின்று புகைப்படங்கள் எடுத்துக் கொண்டிருந்ததாகத் தெரிகிறது. அப்போது திடீரென மின்னல் தாக்கியதில் சிலர் உயிரிழந்திருக்கின்றனர். இன்னும் சிலர், மின்னல் தாக்கத்தால் ஏற்பட்ட பயத்தில் டவரின் மீதிருந்து குதித்திருக்கின்றனர். குதித்தவர்களில், சிலர் உயிரிழந்துவிட்டதாகவும், சிலர் காயங்களுடன் உயிர் தப்பியதாகவும் செய்திகள் வெளியாகியிருக்கின்றன. ராஜஸ்தான், உ.பி மட்டுமல்லாது மத்தியப் பிரதேசத்திலும் மின்னல் தாக்கி 7 பேர் உயிரிழந்திருக்கின்றனர்.modi Also Read: உ.பி -7, குஜராத் - 3, 11 பெண்கள், 8 பழங்குடியினர் - மோடி அமைச்சரவை 2.0 -வில் மொத்தம் எத்தனை பேர்?! இழப்பீடு! மின்னல் தாக்கி உயிரிழந்தவர்களுக்கு இழப்பீட்டுத் தொகையாக 5 லட்சம் ரூபாயை அறிவித்திருக்கின்றன ராஜஸ்தான், உ.பி அரசுகள். மின்னல் தாக்கி உயிரிழந்தவர்களுக்கு வருத்தம் தெரிவித்ததோடு, பிரதமரின் தேசிய நிவாரண நிதியிலிருந்து 2 லட்ச ரூபாய் இழப்பீட்டையும் அறிவித்திருக்கிறார் பிரதமர் மோடி. மேலும், காயமடைந்தவர்களுக்கு 50,000 ரூபாயை இழப்பீட்டுத் தொகையாக அறிவித்திருக்கிறார் மோடி.இந்தியாவில், ஒவ்வொரு வருடமும் சராசரியாக 2,000 பேர் மின்னல் தாக்கி பலியாவதாகப் புள்ளிவிவரங்கள் சொல்கின்றன. இந்த நிலையில், ஒரே நாளில் மூன்று மாநிலங்களைச் சேர்ந்த 70-க்கும் மேற்பட்டோர் மின்னல் தாக்கி உயிரிழந்திருக்கும் சம்பவம் இந்திய மக்களிடையே பேரதிர்ச்சியை ஏற்படுத்தியிருக்கிறது!
http://dlvr.it/S3Ymv4

Read More

`காவிரி அரசியல்'-1991-ல் கர்நாடகாவில் வெடித்த கலவரம் முதல் இறுதித் தீர்ப்பு வரை நடந்தது என்ன? பாகம்2

1989-ம் ஆண்டு எம்.ஜி.ஆர் மறைவுக்குப் பின்னர் கருணாநிதி தலைமையில் தி.மு.க ஆட்சிப் பொறுப்பில் அமர்ந்தது. அந்த சமயத்தில் கர்நாடகத்தில் ஆட்சி கலைக்கப்பட்டு குடியரசுத் தலைவர் ஆட்சி அமலிலிருந்தது. இருந்தபோதிலும், கர்நாடக ஆளுநரோடு பேச்சுவார்த்தை நடத்தவும், அந்த பேச்சுவார்த்தை சுமுகமாக நடைபெறவில்லை என்றால் மத்திய அரசிடம் முறையிடவும் அனைத்துக்கட்சி கூட்டத்தில் முடிவு செய்யப்பட்டது. அப்போது பிரதமராக இருந்த வி.பி.சிங் கருணாநிதிக்கு மிகவும் நெருக்கமானவர். அப்போதைய பொதுப்பணித்துறை அமைச்சராக இருந்த துரைமுருகன் மற்றும் தமிழக நாடாளுமன்ற உறுப்பினர்கள் கோரிக்கை மனுவை வழங்க முடிவு செய்திருந்தனர். இருந்தபோதிலும், அதிமுக பாராளுமன்ற உறுப்பினர்கள் மட்டும் தனியாகச் சென்று பிரதமரிடம் கோரிக்கை மனுவை வழங்கியிருந்தனர் என்பது குறிப்பிடத்தக்கது. அன்றைய மத்திய அரசுக்கு அழுத்தம் கொடுத்து வழக்கு விசாரணையை விரைவுபடுத்தினர் கருணாநிதி. 1990-ம் ஆண்டு காவிரி நடுவர் மன்றம் அமைக்க உச்ச நீதிமன்றம் உத்தரவிட்டது. அதன் தொடர்ச்சியாகக் காவிரி நடுவர் மன்றமும் அமைக்கப்பட்டது.வி.பி.சிங் கருணாநிதி இந்த நடுவர் மன்றத்திடம் தமிழகம் 566 டி.எம்.சி., கர்நாடக 465 டி.எம்.சி., கேரளா 99.8 டி.எம்.சி., புதுவை 9.3 டி.எம்.சி. தண்ணீரைக் கேட்டிருந்ததது. தீர்ப்பாயத்திடம் தண்ணீர் திறந்துவிடக்கோரி இருந்தது. அந்தக் கோரிக்கை ஏற்கப்படவில்லை என்பதினால், உச்சநீதிமன்றத்தை நாடியது தமிழக அரசு. வழக்கை விசாரித்த நீதிமன்றம் 1980 முதல் 1990 வரை ஒவ்வொரு ஆண்டையும் கணக்கிட்டு கர்நாடக அரசு தமிழகத்திற்கு ஆண்டுக்கு 205 டி.எம்.சி. நீர் வழங்க வேண்டும் என்று இடைக்கால உத்தரவு பிறப்பித்தது. அதுமட்டுமில்லாது கர்நாடக அரசு 11,20,000 ஏக்கருக்கு மேல் பாசனப் பரப்பை விரிவாக்கம் செய்யக்கூடாது என்றும் தெரிவித்திருந்தது. இந்த இடைக்காலத் தீர்ப்பு 1991-ம் ஆண்டு டிசம்பர் மாதம் வெளியானது. வெளியான அந்த சமயத்தில் கர்நாடகாவில் பெரும் கலவரம் வெடித்தது. கர்நாடகாவில் வாழ்ந்த தமிழர்கள் மீது தாக்குதல் நடத்தப்பட்டது. இந்த வன்முறையின்போது 10-க்கும் மேற்பட்ட தமிழர்கள் கொல்லப்பட்டனர். ஆயிரக்கணக்கான தமிழர்கள் அடித்து விரட்டப்பட்டனர். கிட்டத்தட்ட ஒரு மாதம் வரை அசாதாரண சூழலே கர்நாடகாவில் நிலவியது. இந்த தீர்ப்பு வெளியானதும் கர்நாடக அரசு அவசரச் சட்டம் ஒன்றைக் கொண்டுவந்தது, குடியரசுத் தலைவர் கேட்டுக்கொண்டதன் படியும், உச்ச நீதிமன்ற குறுக்கீட்டாலும் அந்த சட்டம் பின்னர் நீக்கப்பட்டது. உச்ச நீதிமன்ற இடைக்கால தீர்ப்புக்கு பிறகும் கர்நாடகம் உரிய தண்ணீரைத் தமிழகத்திற்குத் தர மறுத்து வந்தது. ஜெயலலிதா உண்ணாவிரதம் இந்நிலையில் 1993-ம் ஆண்டு ஜூலை மாதம் அன்றைய முதல்வர் ஜெயலலிதா தமிழகத்திற்குக் கூறிய தண்ணீர் திறந்துவிடக் கோரியும், தீர்ப்பை அரசிதழில் வெளியிடக்கோரியும் உண்ணாவிரதத்தை மேற்கொண்டார். அவர் தொடர்ந்து மூன்று நாட்களாக உண்ணாவிரதத்திலிருந்த நிலையில் சென்னைக்கு விரைந்த அன்றைய மத்திய நீர்வளத்துறை அமைச்சரான சுக்லா, "விரைவில் அரசிதழில் வெளியிடுகிறோம் நீங்கள் உண்ணாவிரதத்தைக் கைவிடுங்கள்!" என்று கேட்டுக்கொண்டதன் பெயரில் ஜெயலலிதா உண்ணாவிரதத்தை முடித்துக்கொண்டார். அதன் தொடர்ச்சியாகத் தீர்ப்பும் அரசிதழில் வெளியானது. அடுத்த இரண்டு ஆண்டுகள் சரியான மழை பொலிவு இருந்ததால் தண்ணீர் திறந்து விடுவதில் எந்த பிரச்சனையும் இல்லாது இருந்தது. 1995-ம் ஆண்டு மழையின் அளவு குறைந்ததால் மீண்டும் தண்ணீர் திறந்துவிடக் கர்நாடகம் மறுப்பு தெரிவித்தது. 1996-ம் ஆண்டு தி.மு.க மீண்டும் ஆட்சிப் பொறுப்பில் அமர்ந்தது. நடுவர் மன்றத்தில் ஆணையைச் செயல்படுத்தவும். திட்டத்தை இறுதி செய்து அரசிதழில் வெளியிடவும் கருணாநிதி பிரதமருக்குக் கடிதம் எழுதினார். அதுமட்டுமில்லாது அன்றைய கர்நாடக முதல்வர் ஜே.எச்.படேலுடன் ஐந்துமுறை நேரடி பேச்சுவார்த்தையையும் நடத்தினர். மேலும், 1997-ம் ஆண்டு நேரில் சந்தித்தும் கோரிக்கை வைத்தார். அதே ஆண்டில் மத்திய அரசு ஆணையைப் பிறப்பிக்க வேண்டி தமிழக அரசு சார்பில் உச்சநீதிமன்றத்தில் மனுவும் தாக்கல் செய்யப்பட்டது. இதன் தொடர்ச்சியாக அந்த ஆண்டே 'இந்திய அரசு காவிரி ஆற்று ஆணையம்' அமைந்தது. இந்த ஆணையத்தில், நான்கு மாநில முதல்வர்களும், பிரதமரும் இடம் பெறுவர். அனைத்து உறுப்பினர்களும் கூடினால் மட்டுமே ஆணையம் கூடமுடியும், அதோடு, அனைவரும் ஒருமனதாக மட்டுமே ஒரு முடிவை எடுக்க முடியும் என்ற நிலையே இருந்தது. பின்னாளில் இந்த ஆணையம் அதிகாரமற்றதாக மாற்றப்பட்ட கதையும் உண்டு.கருணாநிதி 1998-ம் ஆண்டு அன்றைய பிரதமர் வாஜ்பாய் தலைமையில் இரண்டு நாட்கள் கூட்டம் நடைபெற்றது. இந்தக் கூட்டத்தில்தான் இடைக்காலத் தீர்ப்பை நிறைவேற்றுவதற்கான ஒப்பந்தம் முடிவு செய்யப்பட்டது. இந்த ஒப்பந்தத்தின்படி தமிழகத்திற்கு 205 டி.எம்.சி. தண்ணீர் திறந்துவிட வேண்டும் என்றும் முடிவு செய்யப்பட்டது. இதனிடையே காவிரி நடுவர் மன்றத்தின் விசாரணையை ஒருபுறம் தொடர்ந்து நடைபெற்றுக்கொண்டு இருந்தது. கிட்டத்தட்ட 16 ஆண்டுகள் தொடர்ந்து நடைபெற்ற விசாரணையில் 2007-ம் ஆண்டு இறுதித் தீர்ப்பை நடுவர் மன்றம் வழங்கியது. அப்போது தமிழகத்தில் கருணாநிதி தலைமையிலான தி.மு.க ஆட்சிப் பொறுப்பிலிருந்தது. Also Read: `காவிரி அரசியல்' - பிரிட்டிஷ் ஆட்சி முதல் எம்.ஜி.ஆர் ஆட்சிவரை நடந்தது என்ன? - பாகம் 01 1000 பக்கம் கொண்ட தீர்ப்பை, காவிரி நடுவர் மன்றம் 2007-ம் ஆண்டு பிப்ரவரி மாதம் வெளியிட்டது. இந்த தீர்ப்பின்படி, மொத்தமாகக் கிடைக்கும் 740 டி.எம்.சி காவிரி நீரைத் தமிழகத்திற்கு 419 டி.எம்.சி-யும், கர்நாடகாவுக்கு 270 டி.எம்.சி-யும், கேரளாவுக்கு 30 டி.எம்.சி-யும், புதுச்சேரிக்கு 7 டி.எம்.சி-யும் பகிர்ந்து கொள்ளவேண்டும் என்று கூறியது. அதோடு, காவிரி மேலாண்மை வாரியத்தையும், காவிரி நீர் முறைப்படுத்தும் குழுவையும் அமைக்க மத்திய அரசுக்கு நடுவர் மன்றம் உத்தரவு பிறப்பித்திருந்தது.காவிரி ஆறு இந்த உத்தரவின் படி, தமிழகத்தின் பாங்கான 419 டி.எம்.சி தண்ணீரில் பெய்யும் மழை அளவை கிடைத்தது போகக் கர்நாடக அரசு கொடுக்க வேண்டியது வெறும் 192 டி.எம்.சி தண்ணீர் தான். அதாவது இதற்கு முன்னர் இருந்த 205 டி.எம்.சி தண்ணீர் இறுதித் தீர்ப்பு பின்னர் 192 டி.எம்.சி-யாக மாறிப்போனது. நடுவர் மன்றத்தின் இறுதித் தீர்ப்புக்கு எதிராகத் தமிழ்நாடு, கர்நாடக, கேரளா அரசு சார்பில் உச்சநீதிமன்றத்தில் மேல்முறையீடு செய்யப்பட்டது. தமிழக அரசு சார்பில் இறுதித் தீர்ப்பை அரசிதழில் வெளியிட கோரி முறையிடப்பட்டது. 2007-ம் ஆண்டு பிப்ரவரி மாதமும் தீர்ப்பை அரசிதழில் வெளியிடக்கோரி அன்றைய எதிர்க்கட்சி தலைவரான ஜெயலலிதா ஒருநாள் அடையாள உண்ணாவிரதம் இருந்தார். 2011-ம் ஆண்டு ஜெயலலிதா தலைமையிலான அரசு ஆட்சிக்கு வந்தது. 2013-ம் ஆண்டு நடுவர் மன்றத்தின் இறுதித்தீர்ப்பை அரசிதழில் வெளியிடவும், காவிரியில் நீர் திறப்பதை மேற்பார்வையிட ஒரு குழுவை அமைக்கவும் உச்சநீதிமன்றம் உத்தரவு பிறப்பித்திருந்தது. இருந்த போதிலும், இறுதித்தீர்ப்பின்படி கர்நாடகத்திடமிருந்து தமிழகம் தண்ணீரைப் பெறமுடியவில்லை. 2016-ம் ஆண்டு, அன்றைய மத்திய நீர்வளத்துறை அமைச்சரான உமாபாரதி முன்னிலையில். தமிழகத்தில் அன்றைய பொதுப்பணித்துறை அமைச்சர் எடப்பாடி பழனிச்சாமி மற்றும் அன்றைய கர்நாடக முதல்வர் சித்தராமய்யாவுடன் பேச்சுவார்த்தையில் ஈடுபட்டனர். அந்த பேச்சுவார்த்தையும் தோல்வியில் தான் முடிந்தது. அதே ஆண்டு, காவிரி மேலாண்மை வாரியம் அமைக்க முடியாது என்றும் இறுதித் தீர்ப்பில் திருத்தும் வேண்டும் என்றும் கர்நாடக அரசு உச்சநீதிமன்றத்தில் மனுவைத் தாக்கல் செய்தது. இந்த மனுவை விசாரித்த நீதிமன்றம், காவிரி பாசனப்பகுதிகளை ஆய்வு செய்ய தொழில்நுட்பக் குழுவை அமைத்தது. இந்த குழுவும் தனது ஆய்வை அறிக்கையாக நீதிமன்றத்தில் சமர்ப்பித்தது. 2017-ம் ஆண்டு நீதிமன்றம் அந்த அறிக்கையை விசாரணை செய்தது. மேலும், தமிழகம், கர்நாடகா, கேரளா மற்றும் புதுச்சேரி தனது வாதங்களை முன்வைத்தது. இதில் தமிழகம் அதிகபட்சமாக 13 நாட்கள் தங்களின் வாதத்தை நீதிமன்றத்தில் முன்வைத்தது குறிப்பிடத்தக்கது.2016-ல் உச்ச நீதிமன்றம் தமிழகத்திற்கு வினாடிக்கு 15,000 கன அடி வீதம் 10 நாட்களுக்குத் தண்ணீர் வழங்க வேண்டும் என்று உத்தரவிட்டது. அதற்கு எதிராகக் கர்நாடகாவில் போராட்டங்களும் வன்முறைகளும் வெடித்தன. கடைசியாக உச்சநீதிமன்றம் 2018-ம் ஆண்டு பிப்ரவரி மாதம் இறுதித் தீர்ப்பை நீதிபதி தீபக் மிஸ்ரா, நீதிபதிகள் அமித்தவா ராய், கான்வில்கர் ஆகியோர் கொண்ட அமர்வால் வசித்தது. இந்த தீர்ப்பில், 2007-ல் நடுவர் மன்றம் தமிழகத்திற்கு வழங்கக் கூறிய 192 டி.எம்.சி. அளவில் 14.75 டி.எம்.சி. குறைந்து 177.25 டி.எம்.சி வழங்கவும். அந்த 14.75 டி.எம்.சி. தண்ணீரைப் பெங்களூரு குடிநீர்த் தேவைக்குப் பயன்படுத்தவும் உத்தரவு பிறப்பித்திருந்தது. கேரளா, புதுச்சேரிக்கு ஒதுக்கப்பட்ட தண்ணீர் அளவு குறைக்கப்படவில்லை. மாதாந்திர அடிப்படையில் கர்நாடக அரசு தண்ணீரைத் திறக்க வேண்டும் என்று கூறியிருந்தது. மேலும், சென்னை மற்றும் மைசூரு மாகாணங்கள் இடையே 1892, 1924 ஆம் ஆண்டுகளின் ஒப்பந்தங்கள் செல்லும் என்றும், இந்த தீர்ப்பின் மூலம் காவிரி தொடர்பான அனைத்து வழக்குகளும் முடிவுக்கு வந்ததாகவும் அறிவிக்கப்பட்டது. மேலும் காவிரி நடுவர் மன்றத் தீர்ப்பு அடுத்த 15 ஆண்டுகளுக்குச் செல்லுபடியாகும் என்றும் கூறப்பட்டது. இந்த தீர்ப்பை அடுத்த ஆறுவரங்களுக்குள் செயல்படுத்தத் திட்டத்தை மத்திய அரசு அமைக்க வேண்டும் என்றும் உத்தரவு பிறப்பித்தது. இந்த உத்தரவு மத்திய அரசிதழில் வெளியானது. தொடரும்…
http://dlvr.it/S3XVKw

Read More

`விவசாயிகள் இல்லாமல் மேக்கேதாட்டூ ஆலோசனை கூட்டமா?' - வலுக்கும் ஆதங்க குரல்கள்!

கர்நாடக அரசு காவிரியின் குறுக்கே மேக்கேதாட்டூவில் அணை கட்டுவதற்கான ஆரம்பக்கட்டப் பணிகளில் தீவிரம் காட்டத் தொடங்கியுள்ளது. இது சட்ட விரோதம் எனவும், மேக்கேதாட்டூவில் அணை கட்டப்பட்டால், வெள்ளக்காலங்களிலும் கூட கர்நாடகம் தமிழ்நாட்டிற்கு தண்ணீர் தராது எனவும் இதனை தடுத்து நிறுத்த தமிழக அரசு, உடனடியாக போர்ர்க்குணத்துடன் செயல்பட வேண்டும் என விவசாயிகள் சங்கத் தலைவர்கள் மற்றும் அரசியல் கட்சியினர் வலியுறுத்தி வருகிறார்கள். இந்நிலையில்தான் இதுகுறித்து விவாதிக்க, ஜூலை 12-ம் தேதி தமிழ்நாடு சட்டமன்ற கட்சிகளின் கூட்டத்திற்கு தமிழக அரசு அழைப்பு விடுத்துள்ளது. இது தொடர்பாக விவசாயிகள் மத்தியில் விமர்சனம் எழுந்துள்ளது. காவிரி உரிமைக்காக உண்மையாக போராடக்கூடியவர்களையும் விவசாயிகள் சங்கப் பிரநிதிகளையும் அழைக்காமல், மேக்கேதாட்டூ பிரச்னைக்காக ஆலோசனை கூட்டம் நடத்துவது ஆக்கப்பூர்வமாக இருக்காது. இது வெறும் கண் துடைப்புக்கான கூட்டமாகத்தான் நாங்கள் பார்க்கிறோம் என விவசாயிகள் ஆதங்கப்படுகிறார்கள்.Tamilnadu Chief minister MK Stalin ``தமிழ்நாட்டில் இதுவரை இல்லாத வகையில், சிறப்பாக ஆட்சி செய்து, மக்களின் மனதில் நிலையாக இடம்பிடிக்க வேண்டும் என்பது தமிழக முதலமைச்சர் மு.க.ஸ்டாலின் பெரும் கனவு என்கிறார்கள் தி.மு.க-வினர். நடுநிலையாளர்கள் மத்தியிலும் இந்த கருத்து நிலவுகிறது. ஆனால் இதற்கு பெரும் சவாலாக, தொட்டுவிடும் தூரத்தில் விஸ்வரூபம் எடுத்து நிற்கிறது மேக்கேதாட்டூ அணை விவகாரம். தமிழ்நாட்டில் திமுக-வுக்கு நெருக்கடி கொடுப்பதற்காகவும், கர்நாடாகாவில் பா.ஜ.க-வை மேலும் வலுப்படுத்தவும், மத்திய அரசு, வேறு சில முக்கிய அனுமதியையும் உடனடியாக அளித்துவிடும். மேக்கேதாட்டூ அணை கட்டுமானப்பணி தடாலடியாக நடைபெறும். தமிழக முதலமைச்சர் ஸ்டாலின் முனைப்புடனும் போர்க்குணத்துடனும் செயல்பட்டால் மட்டுமே, காவிரி உரிமையை காப்பாற்ற முடியும்" என எச்சரிக்கிறார்கள், காவிரி உரிமைக்காக போராடுபவர்கள். மேலும் இது தொடர்பான அடுத்தக்கட்ட நடவடிக்கைகள் குறித்து விவாதிக்க, விவசாயிகள் சங்கப் பிரதிநிதிகள், காவிரி உரிமைக்காக போராட்டக்கூடியவர்கள் மற்றும் அனைத்து அரசியல் கட்சித்தலைவர்களையும் அழைத்து தமிழக அரசு ஆலோசனை நடத்த வேண்டும் என கோரிக்கை எழுந்தது. இந்நிலையில்தான் ஜூலை 12-ம் தேதி நடைபெறும் மேக்கேதாட்டூ ஆலோசனை கூட்டத்திற்கு, தமிழக சட்டமன்றத்தில் இடம்பெற்றுள்ள கட்சிகளுக்கு மட்டும் தமிழக அரசு அழைப்பு விடுத்துள்ளது. இதுகுறித்து நம்மிடம் பேசிய தஞ்சை மாவட்ட காவிரி விவசாயிகள் பாதுகாப்பு சங்கத்தின் செயலாளர் சுவாமிமலை சுந்தர விமலநாதன், ``மேக்கேதாட்டூ பிரச்னை என்பது தமிழக முதலமைச்சர் ஸ்டாலினுக்கு மிகவும் சவாலானது. இதை இவர் எச்சரிக்கையுடன் கையாள வேண்டும். இது தொடர்பான அடுத்தக்கட்ட நடவடிக்கைகளுக்கு எத்தனை அரசியல் கட்சிகளையும் அழைத்தாலும் ஆக்கப்பூர்வமான அக்கறையான ஆலோசனைகள் கிடைக்க வாய்ப்பில்லை. மேக்கேதாட்டூ அணையால் ஏற்படும் இழப்பையும் வலியையும், இதனை உணர்ந்த விவசாயிகளால்தான் வெளிப்படுத்த முடியும். இதில் உண்மையான அக்கறை உள்ளவர்களால்தான் வழிகாட்டவும் முடியும். காவிரி பிரச்னைகளுக்காக, காவிரி உரிமை மீட்புக்குழுவினர் நீண்டகாலமாக போராடி வருகிறார்கள். குறிப்பாக இக்குழுவின் ஒருங்கிணைப்பாளர் பெ.மணியரசன், இதனை பல ஆண்டுகளாக ஆழமாக உற்று நோக்கி வருகிறார். சுந்தர விமலநாதன் காவிரி உரிமைக்காக பல அர்ப்பணிப்புகளை செய்த காவிரி காப்புக்குழு தலைவர் மறைந்த பி.ஆர்.குப்புசாமியை போலவே, பெ.மணியரசனும் காவிரி பிரச்னையை நுட்பமாக அணுகக்கூடியவர். கடந்த காலங்களில் தமிழக அரசுக்கு ஆக்கப்பூர்வமான ஆலோசனைகளையும் வழங்கியுள்ளார். காவிரி சிக்கலில் இவர் முன் வைத்த சட்ட நுணுக்கங்களையும் கருத்துகளையும், முன்னாள் முதலமைச்சர் ஜெயலலிதா கண்டுணர்ந்து, உச்சநீதிமன்றத்தில் சட்ட நடவடிக்கைகளை மேற்கொண்டு அவ்வபோது வெற்றியும் கண்டார். Also Read: மேக்கேதாட்டூ அணை: `மத்திய அரசை நம்பி மட்டும் தமிழகம் இருந்துவிடக்கூடாது!' - எச்சரிக்கும் விவசாயிகள் மேக்கேதாட்டூ தொடர்பாக தமிழக அரசு தற்போது ஏற்பாடு செய்துள்ள ஆலோசனை கூட்டத்திற்கு பெ.மணியரசனை அவசியம் அழைத்திருக்க வேண்டும். இவர் காவிரி உரிமைக்காக, எந்தவித அரசியல் சார்பும் இன்றி, நடுநிலையுடன் குரல் கொடுக்கக் கூடியவர். விவசாயிகள் சங்க நிர்வாகிகளுக்கும் அழைப்பு விடுத்திருக்க வேண்டும். கர்நாடக அரசு, அங்குள்ள விவசாயிகள் சங்கத் தலைவர்களை அழைக்காமல், காவிரி தொடர்பான ஆலோசனை கூட்டத்தை நடத்தியதே இல்லை. பிரதமரை சந்திக்கும் போதும் விவசாயிகள் இருப்பார்கள். அங்கு எந்தக் கட்சி ஆட்சியில் இருந்தாலும், புட்டனய்யா, பசவராஜ் உள்ளிட்ட விவசாயிகள் சங்கத் தலைவர்களை அழைத்து ஆலோசனை கேட்பார்கள். 2004-ம் ஆண்டு காவிரி பிரச்னை தீவிரமாக இருந்தபோது, அப்போதை முதல்வர் ஜெயலலிதா, இங்குள்ள விவசாயிகள் சங்கத் தலைவர்களையும் அனைத்து அரசியல் கட்சியினரையும் தமிழக அரசின் சார்பில் டில்லி அழைத்துச் சென்று பிரதமரைச் சந்திக்க வைத்தார். 2018-ம் ஆண்டு உச்சநீதிமன்றத்தில் இறுதி தீர்ப்பு வெளியான போது, அடுத்தக்கட்ட நடபடிக்கைகள் குறித்து விவாதிக்க, விவசாயிகள் சங்க நிர்வாகிகளுக்கு அப்போதைய முதல்வர் எடப்பாடி பழனிசாமி அழைப்பு விடுத்தார். தமிழக அரசின் சார்பில் நியமிக்கப்பட்ட பிரதிநிதிகள், விவாயிகள் சங்கத் தலைவர்களின் வீட்டிற்கே நேரில் வந்து அழைப்பு கடிதம் கொடுத்தார்கள். மேக்கேதாட்டூ Also Read: மேக்கேதாட்டூ விவகாரம்: தொடங்கும் போராட்டங்கள்; ஆயத்தமாகும் டெல்டா விவசாயிகள்! எனவே காவிரி உரிமைக்காக உண்மையாக போராடக்கூடியவர்களையும் விவசாயிகள் சங்கப் பிரநிதிகளையும் அழைக்காமல், மேக்கேதாட்டூ பிரச்னைக்காக ஆலோசனை கூட்டம் நடத்துவது ஆக்கப்பூர்வமாக இருக்காது. இது வெறும் கண் துடைப்புக்கான கூட்டமாகதான் நாங்கள் பார்க்கிறோம்’’ என ஆதங்கத்தோடு தெரிவித்தார். இது தொடர்பாக, தமிழக காவிரி விவசாயிகள் சங்கத்தின் தலைவர் பி.ஆர்.பாண்டியனும் தனது ஆதங்கத்தை வெளிப்படுத்தியுள்ளார். ``ஜூலை 12-ம் தேதி சென்னையில் நடைபெறும் அனைத்துக்கட்சி கூட்டத்திற்கு, தமிழக சட்டப் பேரவை கட்சித்தலைவர்களுக்கு மட்டுமே அழைப்பு விடுக்கப்பட்டுள்ளது. விவசாயிகள் இல்லாமல் கூட்டம் நடைபெற்றால், காவிரி பிரச்னைக்கு தீர்வு காண முடியாது’’ எனத் தெரிவித்துள்ளார். நாளை நடைபெறவுள்ள கூட்டத்தை தள்ளி வைத்து, தமிழக முதலமைச்சர் ஸ்டாலின் தனக்கு வசதியான ஒரு நாளை தேர்ந்தெடுத்து, விவசாயிகள் சங்க நிர்வாகிகளையும் அழைத்து இக்கூட்டத்தை நடத்த வேண்டும் எனப் பலரும் கோரிக்கை விடுக்கிறார்கள்.
http://dlvr.it/S3W5qR

Read More

This website has been Hacked

This website has been Hacked
http://dlvr.it/S3TnxN

Read More