மும்பையில் இரவு முழுவதும் கொட்டித்தீர்த்த கனமழை: நிலச்சரிவால் வீடுகள் இடிந்து 15 பேர் உயிரிழப்பு!

மும்பையில் சனிக்கிழமை இரவிலிருந்து ஞயிற்றுக்கிழமை அதிகாலை வரை கனமழை கொட்டித்தீர்த்தது. இதில் 6 மணி நேரத்தில் 156 மிமீ அளவுக்கு மழை கொட்டித்தீர்த்தது. சாந்தாகுரூசில் அதிகபட்சமாக 200 மிமீ அளவுக்கு மழை பெய்தது. இதனால் சுன்னாப்பட்டி, சயான், தாதர், அந்தேரி, மலாடு, போரிவலி, காந்திவலி, ஹிந்த்மாதா, செம்பூர், குர்லா போன்ற பகுதியில் தாழ்வான பகுதிகளில் சாலைகளில் தண்ணீர் தேங்கியது. இதனால் வாகனப்போக்குவரத்து நிறுத்தப்பட்டதோடு மும்பையின் உயிர்நாடியாகக் கருதப்படும் புறநகர் ரயில் சேவையும் நிறுத்தப்பட்டது. தாதர், பரேல், மாட்டுங்க, சயான் , குர்லா மற்றும் மாட்டுங்கா பகுதியில் உள்ள ரயில் தண்டவாளங்களில் தண்ணீர் நிரம்பியது.ரயில் நிலையத்தில் தேங்கிய தண்ணீர் Also Read: இந்திய மாநிலங்களின் வரலாறு: பிரிட்டிஷ் ஆட்சிக் காலத்திலேயே பிரிக்கப்பட்ட மொழிவாரி மாநிலம்?!|பகுதி-3 இரவு நேரத்தில் புறப்பட வேண்டிய பல நீண்ட தூர ரயில்கள் குறிப்பிட்ட நேரத்தில் புறப்படுவதில் தாமதம் ஏற்பட்டது. மத்திய ரயில்வே மட்டுமல்லாது மேற்கு ரயில்வேயிலும் ரயில் போக்குவரத்து பாதிக்கப்பட்டது. இரவு நேரத்தில் புறநகர் ரயில்கள் ஆங்காங்கே நிறுத்தப்பட்டதால் பயணிகள் பல மணி நேரம் புறநகர் ரயிலில் இருக்கவேண்டிய நிலை ஏற்பட்டது. போரிவலி பகுதியில் மழை நீர் கார் ஒன்றை அடித்துச் சென்றது. மும்பையில் இரண்டு இடங்களில் கனமழையால் நிலச்சரிவு ஏற்பட்டு 15 பேர் வரை உயிரிழந்துள்ளனர். பலர் இடிபாடுகளில் சிக்கியுள்ளனர். செம்பூர் பாரத் நகரில் நிலச்சரிவு ஏற்பட்டு ஏராளமான குடிசை வீடுகள் சேதமடைந்தன. இதில் பொதுமக்கள் பல இடிபாடுகளில் சிக்கிக்கொண்டனர். தேசிய பேரிடர் மேலாண்மை படையினர் சம்பவ இடத்திற்கு விரைந்து சென்று மீட்புப்பணியில் ஈடுபட்டு வருகின்றனர். பொதுமக்களே மீட்பு பணியில் ஈடுபட்டு 10 பேரின் உடல்களை மீட்டனர். பேரிடர் மேலாண்மை படையினர் 2 பேரின் உடல்களை மீட்டனர். இடிபாடுகளில் மேலும் 8 பேர் சிக்கி இருக்கலாம் என்று அஞ்சப்படுகிறது. அங்கு தொடர்ந்து மீட்புப்பணிகள் நடந்து வருகிறது. 15 பேர் மீட்கப்பட்டுள்ளதாக மாநகராட்சி அதிகாரிகள் தெரிவித்துள்ளனர். இதேபோன்று விக்ரோலியிலும் நிலச்சரிவு ஏற்பட்டு 3 பேர் உயிரிழந்துள்ளனர். 9 பேர் மீட்கப்பட்டு மருத்துவமனையில் சேர்க்கப்பட்டுள்ளனர். மேலும் 6 பேர் இடிபாடுகளில் சிக்கியிருக்கலாம் என்று எதிர்பார்க்கப்படுகிறது. நள்ளிரவில் கனமழை பெய்ததால் மீட்புப்பணியை மேற்கொள்வதில் தாமதம் ஏற்பட்டுள்ளது. செம்பூரில் மட்டும் இடிபாடுகளில் சிக்கி உயிரிழந்த 12 பேர் உடல்கள் ராஜாவாடி மருத்துவமனைக்குக் கொண்டு வரப்பட்டுள்ளதாக மாநகராட்சியின் பேரிடர் மேலாண்மை கட்டுப்பாட்டு அறை தகவல் வெளியிட்டுள்ளது. இது தவிர விக்ரோலியில் 3 பேர் மற்றும் செம்பூர் மற்றும் விக்ரோலியில் சுவர் இடிந்து 15 பேர் உயிரிழந்துள்ளனர். மேலும் சிலர் இடிபாடுகளில் சிக்கியிருப்பதால் பலி எண்ணிக்கை மேலும் அதிகரிக்கும் என்று எதிர்பார்க்கப்படுகிறது. மும்பை விமான நிலையத்தின் ஓடுதளத்தில் தண்ணீர் தேங்கியதால் சிறிது நேரம் விமானப் போக்குவரத்து பாதிக்கப்பட்டது. ஏற்கனவே மும்பையில் கனமழை பெய்யும் என்று வானிலை ஆய்வு மையம் தெரிவித்திருந்ததால் புனேயில் இருந்து தேசிய பேரிடர் மேலாண்மை குழுவினர் மும்பையில் வந்து முகாமிட்டு இருந்தனர். மும்பையில் அடுத்த சில நாட்களுக்கு கனமழை பெய்யும் என்று கூறி வானிலை ஆய்வு மையம் சிவப்பு எச்சரிக்கை விடுத்துள்ளது. இடிபாடுகளில் சிக்கி உயிரிழந்தவர்கள் குடும்பத்திற்கு பிரதமர் நிவாரண நிதியில் இருந்து தலா 2 லட்சம் ரூபாயும், காயமடைந்தவர்களுக்கு ரூ.50 ஆயிரமும் வழங்கப்படும் என்று பிரதமர் அலுவலகம் வெளியிட்டுள்ள செய்தியில் குறிப்பிடப்பட்டுள்ளது. மும்பையில் கடந்த சில நாட்களாகவே தொடர்ந்து மழை விட்டுவிட்டு பெய்து வருகிறது. வெள்ளிக்கிழமை காலையில் பெய்த கனமழையால் மத்திய ரயில்வேயில் புறநகர் ரயில் சேவை பாதிக்கப்பட்டது.
http://dlvr.it/S3y3ll

Read More

எலெக்ட்ரிக் வாகனங்களின் தேவை, விற்பனை உயர்வு... காரணம் என்ன? - ஓர் 'அப்டேட்' நிலவரம்

கடந்த சில வாரங்களாக பெட்ரோல் விலை தொடர்ந்து அதிகரித்துக் கொண்டே இருக்கிறது. 102 ரூபாயைத் தாண்டி விற்பனையாகிவரும் சூழலில், எலெக்ட்ரிக் வாகனங்களுக்கான தேவை உயர்ந்திருக்கிறது. கடந்த சில வாரங்களாகவே எலெக்ட்ரிக் வாகனங்களின் விற்பனை உயர்ந்து வருகிறது. இதற்கு எலெக்ட்ரிக் வாகனங்களுக்கு வழங்கப்படும் மானியம் உயர்த்தப்பட்டிருப்பதும் மறைமுக காரணமாகும். இரு சக்கர வாகனங்களுக்கு மத்திய அரசு மானியம் 5,000 ரூபாயில் இருந்து 15,000 ரூபாயாக (ஒரு kWh-க்கு) உயர்த்தப்பட்டிருக்கிறது. இது தவிர, ஒவ்வொரு மாநில அரசுகளும் கூடுதலாக சில சலுகைகளை வழங்குகின்றன. எரிபொருள் செலவு உயரந்திருப்பது மற்றும் எலெக்ட்ரிக் வாகனங்களுக்கு மானியம் உயர்ந்திருப்பது ஆகிய காரணங்களால் எலெக்ட்ரிக் வாகனங்களின் விற்பனையில் தற்போது முன்னேற்றம் நிலவுகிறது. இந்தியாவில் கடந்த நிதி ஆண்டில் 1.86 கோடி வாகனங்கள் விற்பனையாகி இருக்கிறன. இவற்றில் 1.3 சதவீதம் மட்டுமே, அதாவது 2.3 லட்சம் வாகனங்கள் மட்டுமே எலெக்ட்ரிக் வாகனங்கள். ஆனால், அடுத்த நிதி ஆண்டில் எலெக்ட்ரிக் வாகனங்களின் பங்கு கணிசமாக உயர்ந்திருக்கும் என எதிர்பார்க்கப்படுகிறது. தற்போது உற்பத்தியை விட சந்தையில் தேவை அதிகமாக இருக்கிறது என ஹீரோ எலெக்ட்ரிக் நிர்வாக இயக்குநர் நவீன் முஞ்சால் தெரிவித்திருக்கிறார். ஒரு நாளைக்கு 30 முதல் 40 கிலோ மீட்டர் இரு சக்கர வாகனத்தில் பயணம் செய்பவருக்கு ரூ.100 செலவாகிறது. ஆனால், எலெக்ட்ரிக் இரு சக்கர வாகனத்தில் அதிகபட்சம் இரு யூனிட் செலவாகும். இதற்கு சுமார் ரூ.15 செலவாகும். எனவே, 85 ரூபாய் மிச்சம் என்பது மிகப்பெரிய தொகை என்பதால் எலெக்ட்ரிக் வாகனங்கள் மீது பொதுமக்களின் கவனம் திரும்பி இருக்கிறது. எலெக்ட்ரிக் வாகனக் கொள்கை: மத்திய அரசு மட்டுமல்லாமல் 13 மாநில அரசுகள் எலெக்ட்ரிக் வாகனக் கொள்கையை அறிவித்திருக்கின்றன. டெல்லி, குஜராத், மகாராஷ்டிரா ஆகிய மாநிலங்கள் கூடுதல் சலுகை வழங்குகின்றன. இதனால் ஐசி என்ஜின் வாகனத்துக்கு ஆகும் செலவில் இந்த மாநிலங்களில் எலெக்ட்ரிக் வாகனங்கள் வாங்கலாம். நாட்டிலே மகாராஷ்டிராவில்தான் அதிக சலுகை வழங்கப்படுகிறது. இது தவிர பழைய எலெக்ட்ரிக் வாகனத்தை அழித்துவிட்டு புதிய வாகனம் வாங்கும்பட்சத்தில் கூடுதலாக ரூ.7000 சலுகை கிடைக்கும். மேலும், மகாராஷ்டிராவில் எலெக்ட்ரிக் ஸ்கூட்டர் வாங்கும்பட்சத்தில் பேட்டரிக்கு 5 ஆண்டு வாரன்டி கிடைக்கும். குஜராத்தை எடுத்துகொண்டால் இரு சக்கர வாகனத்துக்கு அதிகபட்சம் ரூ.20,000 சலுகை கிடைக்கும். இது தவிர ஒவ்வொரு மாநிலமும் எலெக்ட்ரிக் வாகனத்துக்கு ஒவ்வொருவிதமான சலுகையை வழங்குகிறது. ரூ.499-க்கு புக்கிங் ரூ.499 செலுத்தி முன்பதிவு செய்யும் பட்சத்தில் ஓலா எலெக்ட்ரிக் வாகனத்துக்கு முன்னுரிமை வழங்கப்படும் என நிறுவனம் தெரிவித்திருக்கிறது. இன்னும் சில நாட்களில் விலை மற்றும் வாகனத்தின் சிறப்பு அம்சம் உள்ளிட்ட தகவலை வெளியிடுவோம் என ஓலா தெரிவித்திருக்கிறது. டிவிஎஸ் ரூ.1000 கோடி முதலீடு எலெக்ட்ரிக் வாகன துறையில் போட்டி அதிகரித்து வருவதைப் பார்த்து டிவிஎஸ் கவலைப்படவில்லை. 5kWh முதல் 25kWh வரையிலான எலெக்ட்ரிக் வானங்களை தயாரிக்க டிவிஎஸ் திட்டமிட்டுள்ளது. இரு சக்கரம் மற்றும் மூன்று சக்கர வாகனங்களை தயாரிக்க திட்டமிட்டுள்ளோம். அடுத்த 24 மாதத்தில் நிறுவனத்தின் தயாரிப்புகள் வெளியாகும் என டிவிஎஸ் மோட்டார்ஸ் நிறுவனத்தின் இணை நிர்வாக இயக்குநர் சுதர்ஷன் வேணு தெரிவித்துள்ளார். இதற்காக 600-க்கும் மேற்பட்ட பணியாளர்கள் பணியாற்றி வருகின்றன. இந்திய சந்தைக்கும் மட்டுமல்லாமல் வெளிநாட்டு சந்தைக்கும் ஏற்ற வகையில் இந்த வாகனம் இருக்கும் என டிவிஎஸ் தெரிவித்துள்ளது. எலெக்ட்ரிக் வாகனத்துறையின் ஏற்றம் இப்போது தொடங்கி இருக்கிறது. இன்னும் சில ஆண்டுகளில் இந்த எலெக்ட்ரிக் வாகன சந்தையில் பெரிய ஏற்றம் இருக்கும் என பல நிறுவனங்களும் கணிப்புகளை வெளியிட்டுள்ளன. - வாசு கார்த்தி
http://dlvr.it/S3xVJy

Read More

வரதட்சணைக் கொடுமை: 5 ஆண்டுகளில் 66 பெண்கள் தற்கொலை; மாவட்டந்தோறும் அதிகாரிகளை நியமித்த கேரளா!

கல்வி அறிவில் மிகைபெற்ற மாநிலமான கேரளத்தில் வரதட்சணைக் கொடுமை படு மோசமாக உள்ளது. நன்கு படித்த பெண்களாக இருந்தாலும் வரதட்சணை கொடுமைக்கு உள்ளாகி தற்கொலை வரை செல்லும் அவல நிலை உள்ளது. அதுமட்டுமல்லாது தற்கொலைக்குத் தூண்டி உயிரைக் காவு வாங்கும் சம்பவங்களும் அரங்கேறுகின்றன. கடந்த சில மாதங்களில் கொல்லம் மாவட்டத்தில் மட்டும் நாட்டை அதிர்ச்சியடையச் செய்த இரண்டு சம்பவங்கள் அரங்கேறின. கொல்லம், அஞ்சல் பகுதியைச் சேர்ந்த 25 வயது பெண்ணான உத்ராவை பத்தணம்திட்டா மாவட்டம் பறக்கோடு பகுதியைச் சேர்ந்த சூரஜ் 2018-ம் ஆண்டு திருமணம் செய்துகொண்டார். திருமணத்தின்போது 112 பவுன் நகை, மாருதி ஸுசுகி பெலினோ (Baleno) கார் எனப் பலமான வரதட்சணை கொடுத்திருக்கிறார்கள். ஆனால், அந்த வரதட்சணைகள் போதாது என மாதம்தோறும் பெண் வீட்டாரிடம் இருந்து பணம் வாங்கியுள்ளார் சூரஜ். அதிலும் திருப்தி அடையாத சூரஜ், மனைவியைக் கொலை செய்துவிட்டு வேறு திருமணம் செய்யத் திட்டமிட்டார். முதலில் தனது வீட்டில் வைத்து ஒரு பாம்பை விட்டு மனைவியைக் கடிக்க வைத்தார். அதில் அவர் உயிர் தப்பிவிட்டார்.உத்ரா - சூரஜ் Also Read: `திருமணத்தை வியாபார ஒப்பந்தமாகத் தரம் தாழ்த்தாதீர்கள்!' - இளம்பெண்ணின் மரணம் குறித்து பினராயி விஜயன் பாம்பு கடித்து கொல்லத்தில் உள்ள தனது தாய் வீட்டில் சிகிச்சையில் இருந்த மனைவியைக் காண கருநாகப்பாம்புடன் சென்றார் சூரஜ். அங்கேயும் பாம்பைக் கடிக்க வைத்து மனைவியைக் கொலை செய்த சூரஜ், போலீஸில் வசமாகச் சிக்கி கடந்த ஓர் ஆண்டாக சிறையில் உள்ளார். அதுபோல கடந்த ஜூன் மாதம் 21-ம் தேதி கொல்லம் நிலமேடு பகுதியில் ஆயுர்வேத மருத்துவக்கல்லூரி மாணவி விஸ்மயா, மரணம் மேலும் அதிர்வலையை ஏற்படுத்தியது. கணவன் வீட்டு பாத்ரூமில் சடலமாகத் தொங்கிய விஸ்மயாவை மீட்டு, வீட்டிலிருந்தவர்களிடம் போலீஸார் விசாரணை நடத்தினர் . விஸ்மயாவை அவரின் கணவர் கிரண்குமார் தாக்கிய புகைப்படங்களும், அதுகுறித்து விஸ்மயா தன் உறவினர்களுக்கு அனுப்பிய வாட்ஸஅப் சாட்டிங் ஆவணங்களும் போலீஸில் சிக்கின. இதையடுத்து மோட்டார் வெஹிக்கிள் இன்ஸ்பெக்டராக இருந்த கிரண்குமார் கைது செய்யப்பட்டார். இதெல்லாம் உதாரணங்கள்தான். இதுபோல பல வரதட்சணை மரணங்கள் கேரளத்தில் அரங்கேறியுள்ளன.கிரண்குமார் - விஸ்மயா Also Read: கேரளா: வரதட்சணையாகக் கொடுத்த காரின் மதிப்பு குறைவு; இறந்துகிடந்த மனைவி; நடந்தது என்ன? கேரளத்தில் கடந்த 5 ஆண்டுகளில் வரதட்சணைக் கொடுமையால் கொலை மற்றும் தற்கொலைகளால் 66 பெண்கள் இறந்துள்ளனர். 10 பெண்களுக்குத் திருமணங்கள் நடந்தால் அதில் 7 பெண்கள் வரதட்சணை பிரச்னையை எதிர்கொள்கிறார்கள். 2016 முதல் கடந்த ஏப்ரல் வரை வரதட்சணைக்காகப் பெண்கள் கொடுமைப்படுத்தப்பட்டதாக 15,143 வழக்குகள் கேரளத்தில் பதிவாகியுள்ளதாகக் காவல்துறை புள்ளிவிவரங்கள் தெரிவிக்கின்றன. இதைத் தொடர்ந்து கேரளத்தின் ஒவ்வொரு மாவட்டத்திலும் வரதட்சணை தடுப்பு அதிகாரியை நியமித்து நடவடிக்கை எடுத்துள்ளார் சுகாதாரத்துறை அமைச்சரும், பெண்கள் மற்றும் குழந்தைகள் நலத்துறை அமைச்சருமான வீணா ஜார்ஜ். இதுகுறித்து அமைச்சர் வீணா ஜார்ஜ் வெளியிட்டுள்ள அறிக்கையில், ``மாநிலத்தில் வரதட்சணை தடுப்புச்சட்டத்தில் திருத்தம் கொண்டு வரப்பட்டுள்ளது. இதையடுத்து எல்லா மாவட்டங்களிலும் வரதட்சணை தடுப்பு அதிகாரிகள் நியமிக்கப்பட்டுள்ளனர். இதற்கு முன்பு திருவனந்தபுரம், எர்ணாகுளம், கோழிக்கோடு பகுதிகளில் ஏரியா அலுவலகங்களில் மட்டுமே அதிகாரிகள் இருந்தனர்.கேரள பெண்கள் மற்றும் குழந்தைகள் நலத்துறை அமைச்சர் வீணா ஜார்ஜ் இப்போது 14 மாவட்டங்களிலும் தனித்தனி அதிகாரிகள் நியமிக்கப்பட்டுள்ளனர். பெண்கள் மற்றும் குழந்தைகள் நலத்துறை மாவட்ட அலுவலர்கள் மாவட்ட வரதட்சணை தடுப்பு அதிகாரியாக நியமிக்கப்பட்டு சட்டத்திருத்தம் கொண்டுவரப்பட்டுள்ளது. அதுபோல பெண்கள் மற்றும் குழந்தைகள் நலத்துறை இயக்குநர் வரதட்சணை தடுப்பு இயக்குநராக நியமிக்கப்பட்டுள்ளார். வரதட்சணைக்கு எதிராக கடும் நடவடிக்கை எடுப்பதற்காக இந்தச் சட்டத்திருத்தம் கொண்டுவரப்பட்டுள்ளது. மேலும், மாவட்ட ஆலோசனைக் குழு உருவாக்கும் நடவடிக்கைகள் நடந்து வருகின்றன. கல்லூரிகள் மற்றும் மக்கள் மத்தியில் விழிப்புணர்வு ஏற்படுத்தவும் நடவடிக்கை எடுக்கப்பட்டுள்ளது" என்றார்.
http://dlvr.it/S3vrfQ

Read More

`ஆள்மாறாட்டம் மூலம் 24 வருடமாக சம்பளம் வாங்கிய நபர்!’ - மும்பை மாநகராட்சியில் அதிர்ச்சி

ஒரே பெயரில் இருக்கும் இரண்டு பேர், ஒரே துறையில் இருந்தால் குளறுபடி ஏற்படுவது வழக்கம். அது போன்ற ஒரு குளறுபடியில் மும்பை மாநகராட்சியில் பணியாற்றுவதாக கூறி ஒருவர் 24 வருடங்களாக சம்பளம் வாங்கி ஏமாற்றி இருக்கிறார். சோபன் மாருதி சபாலே என்பவர் 1989ம் ஆண்டு மும்பை மாநகராட்சியின் எப் தெற்கு வார்டில் பில்டிங் சூபர்வைசராக வேலைக்கு சேர்ந்தார். 1993-ம் ஆண்டு அதே பெயரில் ஒருவர் பைகுலாவில் உள்ள தண்ணீர் துறையில் கார்டன் பராமரிப்பாளராக வேலைக்கு சேர்ந்தார். இதில் வேடிக்கை என்னவென்றால் இரண்டு பேருக்கும் ஒரே பெயர், ஒரே பிறந்த தேதி, ஒரே பள்ளி சான்றிதழ் என எல்லாம் ஒன்றாக இருந்தது. இதனால் இரண்டு பேருக்கும் மாநகராட்சி நிர்வாகம் சம்பளம் கொடுத்துக்கொண்டிருந்தது. அதாவது 1989-ம் ஆண்டு சேர்ந்த சோபன் என்று நினைத்து 1993-ம் ஆண்டு வேலைக்கு சேர்ந்தவருக்கு சம்பளம் வழங்கப்பட்டு வந்தது. உண்மையில் 1993-ம் ஆண்டு வேலைக்கு சேர்ந்த சோபனுக்கு குறைவான சம்பளமே கிடைக்கவேண்டும். ஆனால் ஆள்மாறாட்டம் செய்து 1993-ம் ஆண்டு வேலைக்கு சேர்ந்த சோபன் 24 ஆண்டுகளாக சம்பளம் வாங்கிக்கொண்டிருந்தார்.மும்பை மாநகராட்சி கட்டிடம் 2017-ம் ஆண்டுதான் மாநகராட்சி ஊழியர் ஒருவர் இரண்டு பேருக்கும் ஒரே பெயர், பிறந்த தேதி மற்றும் படித்த பள்ளி, பள்ளியில் இருந்து வெளியேறிய வருடம் போன்றவை ஒன்றாக இருந்ததை கண்டுபிடித்தார். இது குறித்து உடனே உயர் அதிகாரிகளுக்கு அவர் தகவல் கொடுத்தார். உடனே இது பற்றி விசாரணைக்கு உத்தரவிடப்பட்டது. உடனே இரண்டு பேருக்கும் நேரில் ஆஜராக சம்மன் அனுப்பப்பட்டது. வேலையில் சேரும் போது தாக்கல் செய்த ஆவணங்களை கொண்டு வரும்படி கேட்டுக்கொள்ளப்பட்டனர். 1989-ம் ஆண்டு வேலைக்கு சேர்ந்த சோபன் உடனே ஆவணங்களை கொண்டு வந்து தாக்கல் செய்தார். ஆனால் 1993-ம் ஆண்டு வேலைக்கு சேர்ந்த சோபன் விசாரணை நடப்பதை தெரிந்து கொண்டு சான்றிதழ்களை கொண்டு வந்து தாக்கல் செய்யவில்லை. அதோடு கார்டன் பராமரிப்பு வேலைக்கு வருவதையும் நிறுத்திவிட்டார். இதனால் பணியில் சேரும்படி கூறி 1993-ம் ஆண்டு வேலைக்கு சேர்ந்த சோபனுக்கு மும்பை மாநகராட்சி தண்ணீர் துறை சார்பாக நோட்டீஸ் அனுப்பப்பட்டது. ஆனால் அந்த நோட்டீஸ் 1989-ம் ஆண்டு வேலைக்கு சேர்ந்த சோபனுக்கு சென்றது. உடனே அவர் நேரில் சென்று அதிகாரிகளை சந்தித்து விளக்கம் அளித்த போதுதான் 1993-ம் ஆண்டு வேலைக்கு சேர்ந்த சோபன் ஆள் மாறாட்டம் செய்து மோசடி செய்திருப்பது தெரிய வந்தது. கைது 24 வருடத்தில் ரூ.43.31 லட்சம் அளவுக்கு மோசடி செய்து சம்பளமாக வாங்கியுள்ளார். இது குறித்து போலீஸில் புகார் செய்யப்பட்டது. போலீஸார் வழக்கு பதிவு செய்து 1993-ம் ஆண்டு வேலைக்கு சேர்ந்த சோபனை கைது செய்து மேற்கொண்டு விசாரித்து வருகின்றனர். இச்சம்பவத்தில் மாநகராட்சி அதிகாரிகளுக்கு தொடர்பு இருக்கிறதா என்ற கோணத்திலும் விசாரிக்கப்பட்டு வருகிறது. மும்பை மாநகராட்சி துப்புரவு துறையில் பணியாற்றும் ஊழியர்களில் சிலர் வேலைக்கு செல்லாமல் வேறு ஒரு ஊழியரை குறைந்த சம்பளத்திற்கு நியமித்துவிட்டு வீட்டில் இருந்து கொண்டு சம்பளம் வாங்குவதை வாடிக்கையாக கொண்டுள்ளனர். இதற்கு அதிகாரிகளும் துணை போகின்றனர். துப்புரவு துறையில் ஆயிரத்திற்கும் மேற்பட்ட துப்புரவு தொழிலாளர்கள் பணியாற்றி வருகின்றனர். அவர்களில் பாதிப்பேர் ஒப்பந்த தொழிலாளர்களாக பணியாற்றி வருகின்றனர் என்பது குறிப்பிடதக்கது. Also Read: `மும்பை பார்ட்டிகளில் 'போதை கேக்' சப்ளை'- மனோதத்துவ டாக்டர் கைது!
http://dlvr.it/S3vSdx

Read More

86 நாட்களில் 10,000 பேர் மரணம்! - கேரளத்தில் தொடரும் கொரோனா இரண்டாம் அலை பாதிப்பு

இந்தியாவில் முதன்முதலில் கொரோனா பாதித்தது கேரள மாநிலத்தில்தான். கேரள மாநிலத்தில் கொரோனா இரண்டாம் அலை இன்னும் முடிவடையவில்லை. 16.07.2021 அன்று மட்டும் கேரளத்தில் 13,750 பேருக்கு கொரோனா பாதிப்பு ஏற்பட்டுள்ளது. 10,697 பேர் கொரோனாவில் இருந்து மீண்டுவந்துள்ளனர். மொத்தம் 1,21,944 பேர் சிகிச்சையில் உள்ளனர். 29,93,242 பேர் கொரோனா பாதித்து குணமடைந்துள்ளனர். 3,72,317 பேர் தனிமைப்படுத்தலில் உள்ளனர். கேரளத்தில் லாக்டெளனில் குறைந்த அளவு தளர்வுகளே ஏற்படுத்தப்பட்டுள்ளன. இதற்கிடையில் கொசுக்கள் மூலம் பரவும் ஜிகா வைரஸ் கேரளத்தை அச்சுறுத்தி வருகிறது. தமிழக எல்லையான பாறசாலை பகுதியைச் சேர்ந்த கர்ப்பிணிக்கு ஜிகா வைரஸ் பாதிப்பு கண்டறியப்பட்டது. அதன் பிறகு தனியார் மருத்துவமனை ஊழியர்களுக்கு ஜிகா வைரஸ் பாதிப்பு கண்டறியப்பட்டது. நேற்று கூடுதலாக 2 பேருக்கு ஜிகா வைரஸ் பாதிப்பு ஏற்பட்டுள்ளது. திருவனந்தபுரம் மாவட்டத்தை ஜிகா வைரஸ் அதிகமாக பாதித்துள்ளது. இதுவரை 30 பேர் ஜிகா வைரஸ் பாதிப்புக்கு ஆளாகியுள்ளனர். அதில் 20 பேர் குணமடைந்துள்ளனர். தற்சமயம் 10 பேர் சிகிச்சையில் உள்ளனர்.ஜிகா வைரஸ் இந்த நிலையில் கொரோனா இரண்டாம் அலையில் 87 நாட்களில் 10,000 பேர் இறந்துள்ளதாக கேரள சுகாதாரத்துறை புள்ளிவிபரங்கள் தெரிவிக்கின்றன. கொரோனா இரண்டாம் அலை ஏற்பட்ட கடந்த ஏப்ரல் மாதம் 15-ம் தேதி கொரோனா மரணம் 4,407 ஆக இருந்தது. ஏப்ரல் 21-ம் தேதி மரண எண்ணிக்கை ஐந்தாயிரத்தை கடந்தது. ஜூன் 7-ம் தேதி மரண எண்ணிக்கை பத்தாயிரத்தை எட்டியது. அதாவது 47 நாட்களில் ஐந்தாயிரம் பேர் மரணம் அடைந்துள்ளனர். அடுத்த 38 நாட்களில் மரண எண்ணிக்கை 15000 ஆனது. 85 நாட்களில் கொரோனாவால் 10,000 பேர் இறந்துள்ளதாக சுகாதாரத் துறை புள்ளிவிபரங்கள் தெரிவிக்கின்றன. கடந்த ஜூன் மாதத்தில் ஒவ்வொரு நாளும் மரண எண்ணிக்கை 200-க்கும் அதிகமாக இருந்தது. கொரோனா இரண்டாம் அலையில் இதுவரை 15,115 பேர் மரணம் அடைந்துள்ளனர். கொரோனா இரண்டாம் அலையில் இறந்தவர்களில் 70 சதவீதம்பேர் 60 வயதுக்கு மேல் உள்ளவர்கள். மரணித்தவர்களில் 20 சதவீதம் 41 வயது முதல் 59 வயதுக்கு உள்பட்டவர்கள். கொரோனா இரண்டாம் அலையில் 17 வயதுக்கு உட்பட்டவர்கள் 23 பேர் மரணமடைந்துள்ளனர்.கேரள சுகாதாரத்துறை அமைச்சர் வீணா ஜார்ஜ் 2020-ம் ஆண்டு ஏற்பட்ட கொரோனா பாதிப்பில் எர்ணாகுளம் மாவட்டத்தில் அதிக மரணம் ஏற்பட்டது. கொரோனா இரண்டாம் அலையில் திருவனந்தபுரம் மாவட்டத்தில் அதிக மரணம் ஏற்பட்டுள்ளது. திருவனந்தபுரம் மாவட்டத்தில் மட்டும் மூவாயிரத்துக்கும் அதிகமானோர் மரணம் அடைந்துள்ளனர். அதற்கு அடுத்தபடியாக திருச்சூர் மாவட்டத்தில் 1600-க்கும் அதிகமான மரணம் ஏற்பட்டுள்ளது. மற்ற மாவட்டங்களில் ஆயிரத்துக்கும் குறைவான மரணங்களே நிகழ்ந்துள்ளன. மாநிலத்தில் மற்ற மாவட்டங்களை விட இடுக்கி மாவட்டத்தில் மரண எண்ணிக்கை மிகவும் குறைவாக உள்ளது. Also Read: கேரளா: கொரோனாவைத் தொடர்ந்து மிரட்டும் ஜிகா வைரஸ்! - தமிழக எல்லையில் கர்ப்பிணி உட்பட 14 பேர் பாதிப்பு இந்த நிலையில் கொரோனா தடுப்பு நடவடிக்கையாக கேரள மாநில சுகாதாரத்துறை கடந்த 15 மற்றும் 16 ஆகிய தேதிகளில் கோவிட் பரிசோதனை யக்ஞம் நடத்தியுள்ளது. அதில் சுமார் 3.75 லட்சம் பேரின் மாதிரிகள் பரிசோதனை செய்யப்பட்டன. மேலும் மூன்றுபேரில் ஒருவருக்கு முதல் டோஸ் கொரோனா தடுப்பூசி போடப்பட்டுள்ளதாக கேரள சுகாதாரத்துறை அமைச்சர் வீணா ஜார்ஜ் தெரிவித்துள்ளார்
http://dlvr.it/S3trC1

Read More

சென்னை: எம்.எல்.ஏ சீட் வாங்கித் தருவதாக ரூ.50 லட்சம் மோசடி; 4 பேர் மீது வழக்குப்பதிவு

எம்.எல்.ஏ சீட் வாங்கித் தருவதாக ரூ.50 லட்சம் மோசடி செய்ததாக பாஜக பிரமுகர் அளித்த புகாரில், மத்திய அமைச்சரின் முன்னாள் உதவியாளர் உட்பட 4 பேர் மீது போலீசார் வழக்குப்பதிவு செய்துள்ளனர். திருவண்ணாமலை மாவட்டம் ஆரணியை அடுத்த ஜெயலட்சுமி நகரைச் சேர்ந்த புவனேஷ் குமார் (29). இவர், பாஜகவில் ஆரணி நகர தலைவராக செயல்பட்டு வருகிறார். இந்நிலையில் புவனேஷ் குமார் கடந்த 30-ஆம் தேதி பாண்டி பஜார் காவல் நிலையத்தில் பரபரப்பு புகார் ஒன்றை அளித்தார்.அந்த புகாரில், " ஆரணி தொகுதியில் பாஜக சார்பில் எம்எல்ஏ சீட்டு கேட்டு, சென்னை பெரம்பூரை சேர்ந்த அதிமுக பிரமுகர் விஜயராமனை அணுகினேன். விஜயராமன் அப்போதைய பாஜக தமிழக தேர்தல் பொறுப்பாளராக இருந்தவரும், மத்திய அமைச்சருமான கிஷன் ரெட்டியின் நெருங்கிய உதவியாளரான நரோத்தமனிடம் எம்.எல்.ஏ சீட் குறித்து கேட்டுள்ளார். இவர்கள் இருவரும் எம்.எல்.ஏ சீட்டு வாங்கித் தருவதாக உறுதியளித்து 1 கோடி ரூபாய் கேட்டனர். இதனை நம்பி, விஜயராமன் மற்றும் நரோத்தமன் ஆகியோரிடம் முதல் தவணையாக 50 லட்சம் ரூபாயை சென்னை தி.நகரில் உள்ள தனியார் ஹோட்டலில் வைத்து கொடுத்தேன். மேலும் பட்டியலில் பெயர் வந்தவுடன் மீதமுள்ள 50 லட்சம் ரூபாயை தருமாறு நரோத்தமன் கூறினார். ஆனால் பாஜக வேட்பாளர் பட்டியலில் ஆரணி தொகுதி எனக்கு ஒதுக்கப்படவில்லை. இது தொடர்பாக மத்திய அமைச்சர் உதவியாளர் நரோத்தமனிடம் கேட்டபோது, திருவண்ணாமலை தொகுதியில் நிற்குமாறு தெரிவித்தார். இதனையடுத்து திருவண்ணாமலை தொகுதிக்கு எம்.எல்.ஏ சீட்டை எனது சகோதரியான வசந்திக்கு தருமாறு கேட்டேன். ஆனால் வேட்பாளர் பட்டியலில் திருவண்ணாமலை தொகுதியை என் சகோதரியான வசந்திக்கும் ஒதுக்கவில்லை. இருப்பினும் வேட்புமனுத் தாக்கல் செய்யுமாறு நரோதமன் தெரிவித்தார். அதன்படி வேட்புமனுத் தாக்கல் செய்யப்பட்டு சில காரணங்களால் எனது சகோதரி வசந்தியின் மனு நிராகரிக்கப்பட்டது. இதனையடுத்து பணத்தை வாங்கிய நரோத்தமன் மற்றும் அவரது தந்தை சிட்டிபாபு, அதிமுக பிரமுகர் விஜயராமன், அவரது மகன் சிவபாலாஜி ஆகியோரிடம் பணத்தை கேட்டும் தரமறுத்துவிட்டனர்” எனத் தெரிவித்துள்ளார். இதனையடுத்து பாஜகவின் தமிழக தேர்தல் பொறுப்பாளராக இருந்த மத்திய இணை அமைச்சர் கிஷன் ரெட்டியிடம் சென்று முறையிட்டபோது,  மத்திய அமைச்சர் செல்போன் மூலம் தொடர்புகொண்டு நரோத்தமன் மற்றும் அவரது தந்தை சிட்டி பாபுவிடம் பணத்தை திருப்பிக் கொடுக்குமாறு கேட்டுக்கொண்டார். ஆனால் மறுபடியும் பணத்தை கொடுக்க முடியாது எனக் கூறி  அவர்கள் கொலை மிரட்டல் விடுத்ததாக புவனேஷ் குமார் புகாரில் தெரிவித்துள்ளார். இந்த புகார் தொடர்பாக சட்ட ஆலோசனை பெற்று தற்போது பாண்டி பஜார் போலீசார் 4 பிரிவுகளின் கீழ் வழக்குப் பதிவு செய்துள்ளனர். குறிப்பாக மத்திய அமைச்சர் உதவியாளராக இருந்த நரோத்தமன் மற்றும் அவரது தந்தை சிட்டிபாபு, அதிமுக பிரமுகர் விஜயராமன் மற்றும் அவரது மகன் சிவபாலாஜி ஆகிய 4 பேர் மீது வழக்குப்பதிவு செய்யப்பட்டுள்ளது. 294(பி) - ஆபாசமாக திட்டுதல், 406 - நம்பிக்கை மோசடி, 420 - பண மோசடி, 506(1) - கொலை மிரட்டல் ஆகிய பிரிவுகளின் கீழ் பாண்டிபஜார் போலீசார் வழக்குப்பதிவு செய்து 4 பேரையும் தேடி வருகின்றனர்.
http://dlvr.it/S3rdmZ

Read More

ஆக்ஸிஜன் கிடைக்காமல் நான்கு தொழிலாளர்கள் மரணம்; 100 அடி ஆழத்தில் கிணறு வெட்ட இறங்கியபோது பரிதாபம்!

கேரள மாநிலம் கொல்லம் குண்டற, கோயில் முக்கு பகுதியில் ஒரு வீட்டில் கிணறு வெட்டும் பணி நடந்தது. நூறு அடி ஆழம் வரை கிணறு வெட்டப்பட்டது. கிணற்றின் அடிப்பகுதியில் கிடந்த சேற்றை அகற்றி தண்ணீர் ஊற்றெடுக்கிறதா என்பதையும் பார்க்க நேற்று தொழிலாளர்கள் சென்றுள்ளனர். முதலில் இரண்டு தொழிலாளர்கள் கிணற்றில் இறங்கியுள்ளனர். கிணற்றின் ஆழத்தில் இறங்கிய அவர்களுக்கு மூச்சுவிட முடியாத நிலை ஏற்பட்டுள்ளது. உடனே அவர்கள் அதுபற்றி கிணற்றின் மேல் பகுதியில் நின்றுகொண்டிருந்த தொழிலாளர்களுக்கு சிக்னல் கொடுத்துள்ளனர். அவர்களைக் காப்பாற்ற மேலும் இரண்டு தொழிலாளர்கள் கிணற்றில் இறங்கியுள்ளனர். ஆனால் அவர்களும் ஆக்ஸிஜன் கிடைக்காமல் மூச்சுத்திணறலுக்கு ஆளானார்கள். இதையடுத்து கிணற்றில் நான்கு பேர் சிக்கியுள்ளது குறித்து காவல் நிலையத்திற்கும், தீயணைப்பு நிலையத்துக்கும் தகவல் அளிக்கப்பட்டது. குண்டற தீயணைப்பு வீரர்கள் அங்கு சென்று கிணற்றில் இறங்கி நான்குபேரையும் மீட்கும் நடவடிக்கையில் ஈடுபட்டனர்.ஆக்ஸிஜன் சிலிண்டருடன் மீட்புப்பணியில் தீயணைப்பு வீரர் மீட்புப்பணிக்காக கிணற்றில் இறங்கிய தீயணைப்பு வீரர் ஒருவர் ஆக்ஸிஜன் கிடைக்காமல் உடல் தளர்ந்து மயக்க நிலைக்குச் சென்றார். உடனே அவர் மீட்கப்பட்டு மருத்துவமனைக்கு அனுப்பி வைக்கப்பட்டார். அவருக்குத் தொடர்ந்து சிகிச்சை அளிக்கப்பட்டு வருகிறது. பின்னர் ஆக்ஸிஜன் சிலிண்டர் மூலம் செயற்கை சுவாசம் பொருத்திய தீயணைப்பு வீரர்கள் கிணற்றில் இறங்கி சில மணி நேர போராட்டத்திற்குப் பிறகு நான்கு தொழிலாளர்களும் மீட்கப்பட்டனர். அதில் இரண்டு தொழிலாளர்களுக்கு மட்டுமே சுவாசம் இருந்தது. பின்னர் மருத்துவமனைக்கு கொண்டு சென்றபோது நான்கு தொழிலாளர்களும் மரணமடைந்துவிட்டதாக மருத்துவர்கள் தெரிவித்தனர். இதுகுறித்து தீயணைப்புத்துறையினர் கூறுகையில், "கிணறு வெட்டும் தொழிலாளிகளான ராஜன்(35), சோமராஜன்(54), சிவபிரசாத் (24), மனோஜ்(32) ஆகியோர் கிணற்றில் இறங்கியபோது ஆக்ஸிஜன் கிடைக்காமல் இறந்துள்ளனர்.மரணமடைந்த கிணறு வெட்டும் தொழிலாளர்கள் கிணற்றுக்குள் ஆக்ஸிஜன் இல்லாததால் தீயணைப்பு வீரர் ஒருவர் மயக்க நிலைக்குச் சென்றுவிட்டார். அவர் இப்போது நலமாக உள்ளார். கிணற்றுக்குள் விஷ வாயு இருக்கலாம் எனக் கருதுகிறோம். எனவே கிணற்றை மூடுவதற்கு நடவடிக்கை எடுக்கப்பட்டுள்ளது. முதற்கட்டமாக கிணற்றைச் சுற்றி முள் வேலி அமைத்துள்ளோம்" என்றனர். வறுமை காரணமாக தினக்கூலி அடிப்படையில் கிணறு வெட்டச் சென்ற தொழிலாளர்கள் மரணமடைந்த சம்பவம் மக்களிடையே சோகத்தை ஏற்படுத்தியுள்ளது.
http://dlvr.it/S3r43f

Read More