நெருங்கும் உ.பி தேர்தல்; சிலைகள் திறக்க அரசு தீவிரம்... 'வொர்க் அவுட்' ஆகுமா யோகி ஆதித்யநாத் ப்ளான்

உத்தரப் பிரதேச சட்டமன்றத் தேர்தல் 2022- ல் நடைபெறவிருக்கிறது. கொரோனா பெருந்தொற்றைக் கட்டுப்படுத்துவதில் முதல்வர் யோகி ஆதித்யநாத் அரசு தோல்வியடைந்துவிட்டதாக எதிர்க் கட்சிகள் மட்டுமல்லாமல், ஆளும் கட்சியான பா.ஜ.க-வைச் சேர்ந்தவர்களே குற்றம்சாட்டியிருக்கிறார்கள். உரிய சிகிச்சை கிடைக்காததால், பா.ஜ.க-வைச் சேர்ந்த எம்.எல்.ஏ-க்கள் மற்றும் கட்சியின் முக்கிய நிர்வாகிகள் பலர் மரணமடைந்ததாக அவர்களின் உறவினர்கள் கொந்தளித்திருக்கிறார்கள். கங்கையில் மிதந்த சடலங்கள் பிணத்தை எரிப்பதற்கு விறகு வாங்கப் பணம் இல்லாமல், கங்கைக் கரையில் பிணங்களைப் புதைத்ததாக இறந்தவர்களின் உறவினர்கள் கதறினார்கள். கொரோனா பெருந்தொற்றால் இறந்தவர்களின் சடலங்கள் கங்கை ஆற்றில் மிதந்த சம்பவங்கள், சர்வதேச அளவில் இந்தியாவின் நற்பெயருக்கு களங்கத்தை ஏற்படுத்துவதாக அமைந்தன. அந்தச் சூழலில், முதல்வர் மாற்றம் நடக்கப்போகிறது என்கிற செய்திகள்கூட அடிப்பட்டன. அந்த அளவுக்கு நிலைமை அங்கு மோசமாக இருந்தது. உ.பி-யில் சட்டமன்றத் தேர்தல் நெருங்கிக்கொண்டிருக்கிறது என்கிற சூழலில், மாநில அரசு தன் சாதனைகள் எனப் பட்டியலிட்டு பத்திரிகைகளில் பக்கம் பக்கமாக விளம்பரங்களை வெளியிட்டுவருகிறது. கடந்த வாரம் வாரணாசிக்கு சென்ற பிரதமர் நரேந்திர மோடி, ‘'முதல்வர் யோகி ஆதித்யநாத் அரசு, சிறப்பான நடவடிக்கைகள் மூலம் கொரோனாவை வெற்றிகரமாகக் கட்டுப்படுத்தியது’' என்று புகழாரம் சூட்டினார்.பிரியங்கா காந்தி உ.பி அரசைப் புகழ்ந்து மோடி பேசியதற்கு, எதிர்க் கட்சிகள் கடுமையாக எதிர்வினை ஆற்றியுள்ளன. காங்கிரஸ் கட்சியின் பொதுச்செயலாளர் பிரியங்கா காந்தி, “கொரோனா இரண்டாவது அலையின்போது யோகி ஆதித்யநாத் அரசு இழைத்த கொடுமைகள், அலட்சியம், தவறான நிர்வாகம் ஆகியவை தொடர்பான உண்மைகளை மோடியின் நற்சான்றிதழால் மறைத்துவிட முடியாது. எண்ணற்ற துயரங்களை மக்கள் அனுபவித்துள்ளனர். இந்த உண்மையை மோடியும், யோகி ஆதித்யநாத்தும் மறக்கலாம். ஆனால், வேதனையை அனுபவித்த மக்கள் மறக்க மாட்டார்கள்” என்று கூறியிருக்கிறார்.. இந்த அரசியல் போக்குகளுக்கு மத்தியில் வாக்காளர்களைக் கவருவதற்கான வேலைகளில் யோகி ஆதித்யநாத் அரசு இறங்கியிருக்கிறது. அதன் ஒரு பகுதியாக, உத்தரப் பிரதேசம் முழுவதும் சிலைகளைத் திறப்பதற்கான முயற்சியை மேற்கொண்டிருக்கிறது. உ.பி அரசியலில் சிலைகள் ஏற்படுத்திய தாக்கம் அதிகம். 2007 - 2012 காலக்கட்டத்தில் உ.பி-யில் மாயாவதி தலைமையிலான பகுஜன் சமாஜ் கட்சியின் ஆட்சி நடைபெற்றபோது, மிகப்பெரிய சர்ச்சையை சிலை விவகாரம் ஏற்படுத்தியது. பகுஜன் சமாஜ் கட்சியின் நிறுவனர் கன்ஷிராம் சிலைகளையும் கட்சியின் சின்னமான யானை சிலைகளையும் மாநிலத்தின் பல இடங்களில் நிறுவியது மாயாவதி அரசு. அதைவிடக் கொடுமை, தனது சிலைகளையும் பல இடங்களில் மாயாவதி நிறுவினார்.மாயாவதி அந்த விவகாரம் உச்ச நீதிமன்றம் வரை போனது. தனது சிலைகள் மற்றும் நினைவுச்சின்னங்களை அமைத்ததற்கான செலவுத்தொகையை அரசுக்கு மாயாவதி வழங்குவார் என்று உச்ச நீதிமன்றம் கூறியது. அதற்கு, இந்த சிலைகள் சுற்றுலாவை வளர்ப்பதற்கு பயன்படுவதாகவும், இதன் மூலம் அரசுக்கு தொடர்ந்து வருவாய் வந்துகொண்டிருப்பதாகவும் சொல்லி சமாளித்தார் மாயாவதி. மாயாவதி அரசுக்கு சிலை அரசியல் மோசமான எதிர்விளைவுகளை ஏற்படுத்தியது. இன்றைக்கு அதே சிலை அரசியலை கையிலெடுக்கத் தொடங்கியிருக்கிறார் இன்றைய முதல்வர் யோகி ஆதித்யநாத். இந்தியாவிலேயே மிகப்பெரிய சிலை என்ற பெருமையைக் கொண்டிருக்கிறது குஜராத்தில் நிறுவப்பட்டிருக்கும் படேல் சிலை. அந்த சிலையைவிட மிகவும் உயரமான ராமர் சிலையை உ.பி-யில் நிறுவுவதற்கு யோகி ஆதித்யநாத் அரசு முயன்று வருகிறது. ராமர் சிலை அமெரிக்காவின் நியூயார்க்கில் உள்ள புகழ்பெற்ற சுதந்திர தேவி சிலையின் உயரம் 93 மீட்டர். மும்பையில் உள்ள டாக்டர் அம்பேத்கர் சிலையின் உயரம் 137.2 மீட்டர். குஜராத்தில் அமைந்துள்ள படேல் சிலையின் உயரம் 183 மீட்டர். இந்த எல்லா சிலைகளையும்விட மிகவும் உயரமான ராமர் சிலையை யோகி அரசு நிறுவவிருக்கிறது. அந்த ராமர் சிலையின் உயரம் 251 மீட்டராக இருக்குமாம். உலகின் மிகப்பெரிய இந்த வெண்கலச் சிலை, சரயு நதிக்கரையில் அமைக்கப்படும் என்று யோகி அரசு தெரிவித்துள்ளது. Also Read: பெகாசஸ் விவகாரம்: அதிரவைக்கும் உண்மைகளும் ஆட்டம் காணும் பா.ஜ.க அரசும்! தேர்தல் நெருங்குவதையொட்டி, மாநிலம் முழுவதும் சிலைகளை அமைக்க வேண்டும் என்பதில் அதீத ஆர்வமுடன் இருக்கிறது யோகி அரசு. சாமியார்களின் சிலைகள், அரசியல் தலைவர்களின் சிலைகள், சுதந்திரப் போராட்ட வீரர்களின் சிலைகள் நிறுவப்படும் என்று யோகி அரசு அறிவித்துள்ளது. ஆனால், அதில் ஒரு சிக்கல் இருக்கிறது. சிலைகள் அமைப்பதற்கு நீதிமன்றத் தடை இருக்கிறது. குஜராத் மாநிலத்தில் உள்ள நகரங்களில் சாலைகள் உள்ளிட்ட பொது இடங்களை ஆக்கிரமித்து அமைக்கப்பட்டிருந்த மத ரீதியான கட்டமைப்புகளை அகற்றுமாறு 2006-ம் ஆண்டு குஜராத் உயர் நீதிமன்றம் உத்தரவிட்டது. அப்போது ஒரு கும்பல் மாவட்ட நீதிமன்றம் மீது கல் வீசித் தாக்குதல் நடத்தியது. வாகனங்கள் சேதப்படுத்தப்பட்டன. உச்ச நீதிமன்றம் சாலைகள் உள்ளிட்ட பொது இடங்கள் மதத் தலைவர்களின் சிலைகளை வைப்பதற்கு 2013-ம் ஆண்டு உச்ச நீதிமன்றம் தடைவிதித்தது. ஆகவே, அந்தத் தடையை விலக்கி உ.பி-யில் சிலைகள் அமைப்பதற்கு அனுமதி தருமாறு உச்ச நீதிமன்றத்தை யோகி ஆதித்யநாத் அரசு நாடியிருக்கிறது. ‘சிலை வைப்பதால் பொதுமக்களுக்கு எவ்வித இடையூறும் ஏற்படாது. மாறாக, சிலைகள் அமைப்பதன் மூலமாக கலாசாரம் பாதுகாக்கப்படும், சுற்றுலா வளரும் என்று யோகி அரசு நீதிமன்றத்தில் தெரிவித்துள்ளது. சில மாதங்களுக்கு முன்பாக, உ.பி-யில் யோகி அரசுக்கு எதிரான அதிருப்தி அலை வீசுவதாக செய்திகள் வெளியாகின. அதன் பிறகு, கொரோனாவைக் கட்டுப்படுத்த சரியான நடவடிக்கைகளை எடுக்கவில்லை, பெருந்தொற்றுக்கு ஆளான மக்களுக்கு உரிய மருத்துவ சிகிச்சைகளை வழங்கவில்லை என்று பரவலான குற்றச்சாட்டுகள் எழுந்துள்ளன. சிலைகளைத் திறந்தால் அதிருப்தியெல்லாம் நீங்கிவிடுமா, சிலைகளுக்காக மக்கள் வாக்களித்துவிடுவார்களா? என்ற கேள்வி இப்போது அரசியல் வட்டாரங்களில் உலவுகிறது.
http://dlvr.it/S4GKFt

Read More

``இது அப்பட்டமான அரசியல் காழ்ப்புணர்ச்சி" - கர்நாடக அரசின் செயலால் கொந்தளிக்கும் விவசாயிகள்

காவிரி-வைகை-குண்டாறு இணைப்புத் திட்டத்தைத் தடை செய்யக்கோரி உச்ச நீதிமன்றம் சென்றுள்ள கர்நாடகா அரசைக் கண்டித்து புதுக்கோட்டையில் இந்திய விவசாயிகள் சங்கம், காவிரி உபரி நீர்க் குழுவின் சார்பில் கண்டன ஆர்ப்பாட்டம் நடைபெற்றது. விவசாயிகள் கர்நாடகா அரசுக்கு எதிராகக் கண்டன கோஷங்களை எழுப்பினர். ஆர்ப்பாட்டத்தில் இந்திய விவசாயிகள் சங்க பொதுச்செயலாளர் ஜி.எஸ். தனபதி தலைமை வகித்துப் பேசியதாவது, ``விவசாயிகளின் நூறு ஆண்டுக்கால கனவுத் திட்டமான காவிரி-குண்டாறு-வைகை இணைப்புத் திட்டத்தை, கர்நாடகா அரசு கர்நாடகா நீரை மடைமாற்றிச் சேகரிக்கும் வகையில் அமையவுள்ள திட்டம் என்று கூறியுள்ளது. அது தவறானது. காவிரியிலிருந்து 415 டி.எம்.சி தண்ணீர் தமிழகத்திற்குக் கிடைக்கிறது. அதில், கர்நாடகா எல்லையிலிருந்து 177.5 டி.எம்.சி தண்ணீர்தான் வருகிறது.கர்நாடகா அரசைக் கண்டித்து விவசாயிகள் ஆர்ப்பாட்டம் Also Read: மேக்கேதாட்டூ: `ஒன்றிணைவோம் வா எனச் சொன்ன முதல்வர், எங்களை ஒதுக்கியது ஏன்?' - விவசாயிகள் ஆதங்கம் மீதமுள்ள தண்ணீர் பவானி, நொய்யல், அமராவதி, சரபங்கா, மணிமுத்தாறு உள்ளிட்ட நம்முடைய பகுதிகளிலிருந்து வரும் தண்ணீர். இப்படி வெள்ளக்காலங்களில், வெளியேறும் உபரி நீரை வறண்ட மாவட்டங்களின் நீர்ப்பாசனத் தேவையைப் பூர்த்தி செய்யும் வகையில் வரையப்பட்டதுதான் இந்தத் திட்டம். குறிப்பாக, 2008-ல் திட்டம் தயார் செய்யப்பட்டு மாயனூர் கதவணை கட்டப்பட்டு, தற்போது இந்தத் திட்டத்தில் கால்வாய் வெட்டும் பணி துவங்கியது. மேக்கேதாட்டூ விவகாரத்தில் தமிழகத்தின் நலன் பாதிக்கப்படும் என்பதால்தான் தொடர்ந்து குரல் கொடுக்கிறோம். மேக்கேதாட்டூ கட்ட நாம் எதிர்ப்பு தெரிவிப்பதற்காக, தங்களுக்குத் தொடர்பில்லாத காவிரி, குண்டாறு இணைப்புத் திட்டத்திற்கு எதிராகக் கர்நாடகா அரசு வழக்கு தொடர்ந்திருப்பது நியாயமற்றது. கண்டிக்கத்தக்கது" என்றார். கூட்டத்தில், முன்னிலை வகித்துப் பேசிய தமிழக ஆறுகள் வளம் மீட்பு இயக்க ஒருங்கிணைப்பாளர் வழக்கறிஞர் குருசாமி, ``நதி நீர் சட்டத்தைப் பொறுத்தவரை மேலமை பாசன உரிமை, கீழமை பாசன உரிமை என்ற இரண்டு உண்டு. அதில் தமிழகம் கீழமை பாசன உரிமையைப் பெற்றிருக்கிறது. குறிப்பாக, கீழமை பாசன வசதியுள்ள பகுதியானது வறட்சி காலத்தில் வறட்சியைத் தாங்குகிறது, மழைக்காலத்தில் வெள்ளத்தைத் தாங்குகிறது. இப்படி இங்குள்ள மக்கள் தொடர்ந்து பாதிக்கப்படுவதால், இப்பகுதி ஒரு உரிமை பெற்ற பகுதியாகவும், இங்குச் செயல்படுத்தும் திட்டங்களுக்கு முன்னுரிமை கொடுக்க வேண்டும் என்பதுதான் பன்னாட்டுச் சட்டம், இந்திய அரசியலமைச்சட்டத்தில் 262-வது பிரிவும், 263-வது பிரிவும் அதைத்தான் சொல்கிறது. எனவே, கர்நாடகா அரசின் இந்த நடவடிக்கை மேக்கேதாட்டூ அணை கட்டுவதாக இருந்தாலும் சரி, தற்போது காவிரி-குண்டாறு-வைகை இணைப்புத் திட்டத்தை எதிர்த்துத் தொடர்ந்திருக்கும் வழக்காக இருந்தாலும் சரி சட்டத்திற்கு விரோதமானது; கூட்டாட்சித் தத்துவத்துக்கு விரோதமானது. எனவே இதை எதிர்த்து வழக்காடுவது என்று இந்திய விவசாயிகள் சங்கத்தின் பொதுச்செயலாளர் தனபதி அவர்களின் தீர்மானத்தின் படி, உச்ச நீதிமன்றத்தில் மூத்த வழக்கறிஞர் சஞ்சய் பாரீக் மூலமாக இந்த வழக்கிலே தனபதி அவர்கள் இந்திய விவசாயிகள் சங்கத்தின் சார்பில் ஒரு பார்ட்டியாக இணைந்து இந்த வழக்கை நடத்துவது என்று தீர்மானிக்கப்பட்டுள்ளது.குருசாமி இன்னும் குறிப்பாகச் சொல்லப்போனால், இத்திட்டமானது மாநில திட்டம் மட்டும் அல்ல. ஏற்கெனவே மத்திய அரசின் தேசிய நதிகள் இணைப்புத் திட்டத்தின் கீழ் இருக்கும் ஒரு பகுதி, மத்திய அரசு வரைந்து வைத்த திட்டம். தற்போது மாநில அரசு நிதி ஒதுக்கித் திட்டத்தைச் செயல்படுத்துகிறது. அவ்வளவுதான். நாம் இந்தத் திட்டத்திற்காக கர்நாடகாவிடம் இருந்து தண்ணீர் கேட்கவில்லை. கர்நாடகா அரசுக்கும் இந்த குண்டாறு இணைப்புத் திட்டத்துக்கும் எந்தவிதத் தொடர்பும் கிடையாது. கர்நாடகா அரசு தொடர்ந்துள்ள இந்த வழக்கு என்பது குறிப்பாக மத்திய அரசின் திட்டத்திற்கு எதிரானது. இந்த வழக்கை அரசியல் ரீதியான காழ்ப்புணர்ச்சி என்றுதான் சொல்லணும். Also Read: மேக்கேதாட்டு அணை: முனைப்பில் எடியூரப்பா; முறியடிப்பாரா ஸ்டாலின் ?| The Imperfect Show 16/07/2021 இந்த வழக்கு நிச்சயமாக உச்ச நீதிமன்றத்தில் அடிபட்டுப் போகும். அதற்கு தமிழக அரசு எதிர் வழக்காட தயாராக இருக்க வேண்டும். காவிரி வழக்கை காவிரி விவசாயிகள் சங்கம் கையில் எடுத்தது போல, காவிரி-குண்டாறு வழக்கை இந்திய விவசாயிகள் சங்கம் கையில் எடுக்கும். அனைத்து விவசாயிகள் சங்கத்திடமும் ஆதரவு கேட்டிருக்கிறோம்" என்றார்.
http://dlvr.it/S4DMrz

Read More

தொடர்ந்து விலையேறும் பெட்ரோல்: சைக்கிள் மீது கவனம் செலுத்தும் மக்கள்

பெட்ரோல் விலை உயர்வு எதிரொலி காரணமாக சைக்கிள் வாங்க மக்கள் ஆர்வம் காட்டி வருகின்றனர். சைக்கிளுக்கான ஜிஎஸ்டி வரியை 12 சதவீதத்தில் இருந்து 5 சதவீதமாக குறைக்க வேண்டும் எனவும் கோரிக்கை விடுத்துள்ளனர். நாளுக்கு நாள் அதிகரித்து வரும் பெட்ரோல் விலை உயர்வு காரணமாக இருசக்கர வாகன ஓட்டிகள் மிகுந்த அவதிக்கு ஆளாகி உள்ளனர். தினமும் இருசக்கர வாகனங்களில் வேலைக்கு செல்வோர் வாகனத்திற்கு நாளொன்றுக்கு பெட்ரோல் நிரப்ப குறைந்தபட்சம் 100 ரூபாய் செலவிட வேண்டிய சூழ்நிலை ஏற்பட்டுள்ளது. இதன் காரணமாக தற்போது சைக்கிள்கள் விற்பனை அதிகரித்துள்ளது. பெட்ரோல் விலை அதிகரிப்பால் புதிய சைக்கிள்கள் வாங்குவது மற்றும் கிடப்பில் போடப்பட்டுள்ள பழைய சைக்கிள்களை மீண்டும் பழுது பார்த்து பயன்படுத்துவது அதிகரித்துள்ளதால் சத்தியமங்கலம் பகுதியில் உள்ள சைக்கிள் கடைகளில் புதிய சைக்கிள் விற்பனை அதிகரித்துள்ளதோடு பழைய சைக்கிள் பழுது பார்க்கும் பணியும் சூடுபிடித்துள்ளது. சாதாரண வகை சைக்கிள்கள் ரூபாய் நான்காயிரம் முதல் 10 ஆயிரம் வரையிலும் ஸ்போர்ட்ஸ் மாடல் சைக்கிள்கள் ரூபாய் 8000 முதல் 16 ஆயிரம் வரையிலும் விற்பனை செய்யப்படுகிறது. இந்நிலையில் தற்போது சைக்கிளுக்கான ஜிஎஸ்டி வரியை 12 சதவீதத்திலிருந்து 5 சதவீதமாக குறைக்க வேண்டும் என சைக்கிள் விற்பனையாளர்கள் கோரிக்கை விடுத்துள்ளனர். நடுத்தர மக்கள் மட்டுமே சைக்கிள்களை பயன்படுத்தி வந்த நிலையில், தற்போது டாக்டர்கள், என்ஜினியர்கள் உள்ளிட்ட வசதி படைத்தவர்களும் சைக்கிள்களை வாங்கி பயன்படுத்த தொடங்கியுள்ளதாகவும் சைக்கிள் ஓட்டுவதன் மூலம் நல்ல உடற்பயிற்சி என்பதோடு சுற்றுப்புறச் சூழல் பேணி பாதுகாக்கப்படுவதாக சைக்கிள் விற்பனையாளர்கள் தெரிவித்துள்ளனர்
http://dlvr.it/S4CmBs

Read More

குமரி: கேரளாவுக்கு கனிமவளம் கடத்திய 11 லாரிகள் பறிமுதல்! - இரு மடங்கு பாரம்; அதிகாரிகள் அதிர்ச்சி

கட்டுமானப் பணிகளுக்காக பாறைகளை உடைத்து பெறப்படும் கற்கள், ஜல்லி, எம் சாண்ட், பி சாண்ட் என பல்வேறு விதங்களில் பயன்படுத்தப்பட்டு வருகிறது. கன்னியாகுமரி மாவட்டத்தில் உள்ள மலைகளை உடைத்து கேரளாவுக்கு எம் சாண்ட், பி சாண்ட், ஜல்லி என பல விதங்களில் கேரளாவுக்கு கடத்தி வருகின்றனர். கேரளாவில் நடக்கும் தேசிய நெடுஞ்சாலை பணிகள், நான்கு வழிச்சாலை, விழிஞ்ஞம் துறைமுகப் பணிகளுக்காக என தினம்தோறும் 50 டிப்பர் லாரிகளில் ஜல்லி, எம் சாண்ட் போன்றவைகளுக்கு அனுமதி வாங்கியுள்ளனர். ஆனால், தினமும் 700 லாரிகளுக்கும் மேல் கேரளாவுக்கு கனிமவளங்கள் கடத்தப்பட்டு வருகின்றன என்கிறார்கள் விவரம் அறிந்த சிலர். தமிழக - கேரள எல்லை பகுதியான நெட்டா, களியக்காவிளை போன்ற சோதனை சாவடிகள் வழியாக டிப்பர் லாரிகள் அளவுக்கு அதிகமான பாரத்துடன் கனிம வளங்கள் கடத்தப்படுகின்றன.தோட்டியோடு பகுதியில் அழிக்கப்படும் மலைகள் இதுகுறித்து மாவட்ட நிர்வாகத்திற்கு தொடர் புகார்கள் சென்றது. இதையடுத்தி கடந்த இரண்டு மாதங்களில் அதிகபாரம் ஏற்றிச் சென்றதாக இரண்டாயிரம் டிப்பர் லாரிகளுக்கு அபராதம் விதிக்கப்பட்டுள்ளது. அதன்மூலம் 40 லட்சம் ரூபாய் அபராத தொகை வசூலிக்கப்பட்டதாக கூறப்படுகிறது. ஆனாலும், சில அதிகாரிகளின் ஆசியோடு லாரிகளில் அனுமதி இல்லாமல் கனிமவளங்களை கேரளாவுக்கு கடத்துவது அதிக அளவில் நடந்து வருகிறது. அபராதம் விதிப்பது கண்துடைப்புக்காக என சமூக ஆர்வலர்களும் குற்றம்சாட்டினர். Also Read: `ஆன் டூட்டி, ரயில்வே; லாரியில் ஒட்டப்பட்ட ஸ்டிக்கர்!'- கனிமவள அதிகாரிகளைப் பதறவைத்த கும்பல் மேலும் தமிழக மலைகளை உடைத்து கேரளாவுக்கு சட்டவிரோதமாக அதிக அளவு கனிமவளங்கள் கடத்தப்படுவதாகவும், இது தொடர்ந்தால் கன்னியாகுமரி மாவட்டதில் உள்ள மேற்குத்தொடர்ச்சி மலைகள் விரைவில் அழிக்கப்படும் அபாயம் ஏற்பட்டுள்ளதாக சமூக ஆர்வலர்கள் குற்றம்சாட்டியுள்ளனர். மேலும் கனிமவள கடத்தலுக்கு எதிராக சில அரசியல் கட்சியினர் போராட்டம் அறிவித்தன. இதையடுத்து மாவட்ட வருவாய்துறை சார்பில் கேரள எல்லையோரப் பகுதிகளில் இன்று காலை அதிரடி சோதனை நடத்தப்பட்டது.பறிமுதல் செய்யப்பட்ட லாரிகள் அதில் உரிய ஆவணங்கள் இல்லாமலும், முறையான அனுமதியில்லாமலும், அதிகபாரத்தோடு சென்ற 11 டிப்பர் லாரிகளை அதிகாரிகள் பறிமுதல் செய்தனர். பறிமுதல் செய்யப்பட்ட வாகனங்கள் குழித்துறை நகராட்சிக்கு சொந்தமான வி.எல்.சி மைதானத்தில் நிறுத்தி வைக்கப்பட்டுள்ளன. மேலும் அதிகாரிகள் தொடர்ச்சியாக சோதனை நடத்தி வருகின்றனர். இந்த சோதனையில் 15 டன் ஏற்றவேண்டிய டிப்பர் லாரிகளில் 30 டன் கனிம வளங்கள் ஏற்றி செல்லப்பட்டது. 25 டன் ஏற்றவேண்டிய டிப்பர் லாரியில் 50 டன் ஏற்றி செல்வதும் தெரியவந்துள்ளது. லாரிகளில் அனுமதிக்கப்பட்டதை விட இரு மடங்கு அதிக பாரம் ஏற்றிச்செல்வதைக் கண்ட அதிகாரிகளே அதிர்ந்து போயினர்.
http://dlvr.it/S4BpHJ

Read More

கேரளாவின் பிரபல திருநங்கை அனன்யா மரணம்; பாலின மாற்று அறுவை சிகிச்சை பாதிப்புதான் காரணமா?

அனன்யா குமாரி அலெக்ஸ்... கேரளாவில் கடந்த சில ஆண்டுகளாக அதிகம் உச்சரிக்கப்பட்ட திருநங்கையின் பெயர் இது. கொல்லம் மாவட்டத்தைச் சேர்ந்த 28 வயதான அனன்யா குமாரி, கேரள மாநிலத்தின் முதல் ஆர்.ஜே (Radio Jockey) திருநங்கையாவார். திருநங்கைகளின் உரிமைகளுக்காகக் குரல் கொடுத்து வந்த அனன்யா குமாரி அலெக்ஸ், நடந்து முடிந்த கேரள சட்டசபை தேர்தலிலும் களம் கண்டார்.திருநங்கை அனன்யா குமாரி அலெக்ஸ் Also Read: ரேடியோ ஜாக்கி டு எம்.எல்.ஏ வேட்பாளர்... கேரளாவில் கலக்கும் இளம் திருநங்கை அனன்யா! கேரளா தேர்தல் களத்தில் போட்டியிட்ட முதல் திருங்கையும் அனன்யா குமாரிதான். இப்படிப் பல்வேறு சாதனைகளுக்காகப் பேசப்பட்ட அனன்யா, தற்போது அவருடைய மர்மமான மரணத்தின் காரணமாகப் பேசுபொருளாகி இருப்பது வேதனையளிக்கிறது. செவ்வாய்க்கிழமை மாலை அனன்யா குமாரி கொச்சி எடப்பள்ளி பகுதியில் உள்ள தனது அப்பார்ட்மென்ட் வீட்டில் சடலமாக மீட்கப்பட்டுள்ளார். சில மாதங்களுக்கு முன்பு தேர்தலில் போட்டியிட்டபோது, அனன்யா இந்தியா முழுவதும் அறியப்பட்ட நபரானார். நாடு முழுவதும் உள்ள திருநங்கைகளுக்கு முன்மாதிரியாகத் திகழ்ந்து வந்தார். மலப்புரம் மாவட்டம் வெங்கரா தொகுதியில், காங்கிரஸ் கூட்டணியில் இந்திய யூனியன் முஸ்லிம் லீகின் ஸ்டார் வேட்பாளரான பி.கே குன்ஹலிகுட்டியை எதிர்த்து ஜனநாயக சமூக நீதி கட்சி சார்பில் போட்டியிட்டார் அனன்யா.திருநங்கை அனன்யா குமாரி அலெக்ஸ் ஆனால், தனது சொந்தக் கட்சியில் இருந்து வந்த மிரட்டல், துன்புறுத்தல் காரணமாகத் தேர்தல் களத்தில் இருந்து விலகினார். இதுகுறித்து அனன்யா அப்போது, ``காங்கிரஸ் கூட்டணி வேட்பாளர் குன்ஹலிகுட்டி குறித்து மிகவும் தரக்குறைவாகப் பேசக் கூறினர். அதேபோல கம்யூனிஸ்ட் அரசு குறித்தும் கடுமையாக விமர்சிக்கச் சொன்னார்கள். சொந்தக் கட்சிக்காரர்களே என்னை மிரட்டி, துன்புறுத்தி அழுத்தம் கொடுத்தனர். அதில் எனக்கு உடன்பாடு இல்லை என்பதால் விலகுகிறேன்” என்று கூறியிருந்தார். இதையடுத்து, அனன்யா குமாரி ஒரு தனியார் தொலைக்காட்சியில் செய்தி வாசிப்பாளராகவும், ஒப்பனை கலைஞராகவும் பணியாற்றி வந்தார். கடந்தாண்டு அனன்யா ஒரு தனியார் மருத்துவமனையில் பாலின மாற்று அறுவை சிகிச்சை செய்திருந்தார். அந்த அறுவை சிகிச்சைக்குப் பிறகு அன்னயா உடல் உபாதைகளால் சிரமப்பட்டு வந்தார். அறுவை சிகிச்சையில் சில தவறுகள் நடந்திருப்பதாகவும் அவர் குற்றம் சாட்டியிருந்தார். இதனால், வழக்கமான பணிகளைக் கூட செய்ய முடியவில்லை என்றும் கூறியிருந்தார். இந்த விவகாரம் சமூகவலைதளங்களில் மிகப்பெரிய பேசு பொருளாகியிருந்தது.திருநங்கை அனன்யா குமாரி அலெக்ஸ் இந்நிலையில், தனது அப்பார்ட்மென்ட் வீட்டில் உள்ள பெட்ரூமில் அனன்யா தூக்கில் தொங்கிய நிலையில் சடலமாக மீட்கப்பட்டுள்ளார். இதுகுறித்து அனன்யாவின் நண்பர்கள் கூறுகையில், ``பாலின மாற்று அறுவை சிகிச்சைக்குப் பிறகு தன் விருப்பப்படி வாழலாம் என அனன்யா நிறைய கனவுகளை வைத்திருந்தார். அது தோல்வியில் முடிந்ததால் மிகுந்த மன வருத்தத்தில் இருந்தார். நாங்கள் அவருக்கு மறு அறுவை சிகிச்சை செய்ய நிதித் திரட்டி வந்தோம். சில நாள்களுக்கு முன்பு அவரிடம் பேசியபோது கூட நன்றாகதான் இருந்தார். இப்படி ஒரு நிலை ஏற்படும் என நாங்கள் யாருமே எதிர்பார்க்கவில்லை. கேரளாவில் பல தனியார் மருத்துவமனைகள், பாலின மாற்று அறுவை சிகிச்சை செய்வதில் உயர் தொழில்நுட்பத்தைப் பயன்படுத்துவதாக விளம்பரப்படுத்துகின்றனர். ஆனால், இந்த அறுவை சிகிச்சைகள் எப்படி நடக்கின்றன என்பதை யாரும் கண்காணிப்பதில்லை. அனன்யாவின் மரணத்துக்கு நீதி வேண்டும். இதுகுறித்து விசாரித்து நடவடிக்கை எடுக்க வேண்டும் என்று முதல்வர் பினராயி விஜயனிடம் புகார் அளித்துள்ளோம். இதன் பிறகாவது பாலின மாற்று அறுவை சிகிச்சை முறைகளை அரசு கண்காணிக்க வேண்டும்” என்றனர்.திருநங்கை அனன்யா குமாரி அலெக்ஸ் Also Read: ஒலிம்பிக்கில் பங்கேற்கும் முதல் திருநங்கை : சமத்துவம் பேசும் நியூஸிலாந்தில் வலுக்கும் எதிர்ப்புகள்! அப்பார்ட்மென்ட்டில் இருந்து அவரது இணையர் வெளியேறியதால் கூட அனன்யா இப்படியொரு முடிவை எடுத்திருக்கலாம் என்றும் தகவல்கள் வெளியாகியுள்ளன. ``அனன்யாவின் உடலை மீட்டு பிரேத பரிசோதனைக்காக அரசு மருத்துவக் கல்லூரிக்கு அனுப்பியுள்ளோம். பிரேத பரிசோதனை முடிவில்தான் அவர் மரணத்துக்கான காரணங்கள் வெளியில் வரும். இதுதொடர்பாக இயற்கைக்கு மாறான மரணம் என்ற பிரிவில் வழக்குப் பதிவு செய்து விசாரித்து வருகிறோம்” என்று கமலசேரி போலீஸார் கூறியுள்ளனர்.
http://dlvr.it/S48sR8

Read More

மும்பை: பேஸ்புக்கில் மகனின் புகைப்படம்; ஷாருக்கானை சந்திக்கலாமென 17 வயது பெண்ணை அழைத்து வந்தவர் கைது

சமூக வலைத்தளங்கள் மூலம் முகம் தெரியாதவர்களுடன் பழகி ஏமாறும் சம்பவங்கள் அவ்வப்போடு நடக்கின்றன. இப்படி ஒரு சம்பவம் மும்பையில் நடந்துள்ளது. மும்பையைச் சேர்ந்த ஒருவர் கொல்கத்தாவைச் சேர்ந்த மைனர் பெண்ணிடம் நடிகர் ஷாருக்கானை நேரில் பார்க்க வைப்பதாகக்கூறி மும்பை அழைத்து வந்து பிடிபட்டுள்ளார். சுபம் ஷேக்(43) என்பவர் பேஸ்புக்கில் தனது மகனின் புகைப்படத்தை வைத்து அடிக்கடி சாட் செய்து கொண்டிருந்தார். அப்போது மேற்கு வங்க மாநிலம் பலஷிபாராவைச் சேர்ந்த 17 வயது மைனர் பெண்ணுடன் பேஸ்புக் மூலம் அவருக்கு அறிமுகம் ஏற்பட்டது. கைது செய்யப்பட்டவர் இருவரும் அடிக்கடி பேஸ்புக் மூலம் சாட் செய்துள்ளனர். மைனர் பெண்ணிற்கு ஷாருக்கானை நேரில் பார்க்கவேண்டும் என்ற ஆசை இருந்தது. இதை தெரிந்துகொண்ட ஷேக் தான் மும்பையில் ஷாருக்கானை அவரது வீட்டிற்கே அழைத்துச் சென்று காட்டுவதாக அந்த மைனர் பெண்ணிடம் ஆசை வார்த்தை கூறினார். அப்பெண்ணும் அதற்கு சம்மதித்தார். இதையடுத்து அப்பெண்ணை மும்பைக்கு அழைத்து வர திட்டமிட்டார். ஷேக்கிற்கும் மேற்கு வங்கம்தான் சொந்த ஊர் ஆகும். அதேசமயம் மைனர் பெண் முன் நாம் நேரடியாக சென்றால் பழகியது வயதானவர் என்று அப்பெண்ணிற்கு தெரிந்து தன்னுடன் வர மாட்டார் என்று கருதி அப்பெண்ணிடம் ஒரு புதிய கதையைத் தெரிவித்தார். தனக்கு கொரோனா தொற்று ஏற்பட்டு இருப்பதால் தன்னால் வர முடியாது என்றும் எனது அப்பா உன்னை அழைத்து சென்று ஷாருக்கானை காண்பிப்பார் என்றும் ஷேக் தெரிவித்தார். அப்பெண்ணும் அதனை நம்பியுள்ளார். உடனே அப்பெண்ணை டியூசன் சென்டரில் இருந்து அழைத்துக்கொண்டு ஷேக் கொல்கத்தா வந்தார். அவர் அப்பெண்ணுடன் அங்கிருந்து மும்பை செல்லும் ரயிலில் ஏறினார். அப்பெண் வீட்டிற்கு வராதது குறித்து அவரது பெற்றோர் போலீஸில் புகார் செய்தனர். போலீஸார் அனைத்து போலீஸ் நிலையத்திற்கும் தகவல் கொடுத்தனர். கொல்கத்தா ரயில் நிலையத்தில் இருந்த கண்காணிப்பு கேமரா பதிவுகளையும் ஆய்வு செய்தபோது அப்பெண் ரயில் நிலையத்திற்குள் ஷேக்குடன் வருவது தெரிந்தது. அதோடு அவர் மும்பை செல்லும் ரயிலில் ஏறுவதைத் தெரிந்துகொண்டனர். உடனே கொல்கத்தா ரயில்வே போலீஸார் மும்பை ரயில்வே போலீஸாரைத் தொடர்புகொண்டு இது தொடர்பாக தகவல் கொடுத்தனர். உடனே கொல்கத்தாவில் இருந்து வந்த ரயிலை தாதர் ரயில் நிலையத்தில் மும்பை ரயில்வே போலீஸார் கண்காணிக்க ஆரம்பித்தனர். அப்பெண் முக்கவசம் அணிந்து ரயிலில் இருந்து இறங்கினார். அவரது முகக்கவசத்தை அகற்றி பார்த்த போது அப்பெண் அடையாளம் காணப்பட்டு அவர் மீட்கப்பட்டார். அவரை அழைத்து வந்த ஷேக் கைது செய்யப்பட்டார். மைனர் பெண் பெண்கள் காப்பகத்திற்கு அனுப்பி வைக்கப்பட்டார். கொல்கத்தா போலீஸார் அப்பெண்ணை அவரது பெற்றோருடன் வந்து அழைத்து செல்ல மும்பை வந்து கொண்டிருக்கின்றனர். பெண்கள் குறிப்பாக மைனர் பெண்கள் சமூக வலைத்தளத்தில் பழகும் போது மிகவும் எச்சரிக்கையாக இருக்கவேண்டும் என்று போலீஸார் எச்சரித்துள்ளனர்.
http://dlvr.it/S47jvk

Read More

இந்திய மாநிலங்களின் வரலாறு: மொழியால் அடுத்தடுத்து புதிய மாநிலங்களின் தோற்றம்! பகுதி - 4

இந்தியாவில் மாநில மறுச்சீரமைப்பு சட்டம் நிறைவேற்றப்பட்டு மொழிவாரி மாநிலங்கள் உருவாக்கப்பட்ட பின்னும் வெவ்வேறு காலகட்டங்களில் புதிய மாநிலங்களின் தோற்றம் தொடர்ந்துகொண்டுதான் இருந்தன. ஒன்றுபட்ட பம்பாய் மாகாணத்தை மராத்தி பேசும் மக்களுக்கென தனி மாநிலமாகவும், குஜராத்தி பேசும் மக்களுக்கென தனி மாநிலமாகவும் பிரிக்கப்பட வேண்டும் என்ற கோரிக்கை வலுப்பெற்றது. இதன் காரணமாக, 1960-ம் ஆண்டு பம்பாய் மாகாணம் இரண்டாகப் பிரிக்கப்பட்டு குஜராத், மஹாராஷ்டிரா என மேலும் இரண்டு மொழி வழி மாநிலங்கள் உருவாகின.Gujarath map ஒன்றுபட்ட பஞ்சாப் - ஹரியானா மாநிலத்தில் பஞ்சாபி மொழி பேசும் மக்களுக்கென தனிமாநிலக் கோரிக்கை எழுந்தன. இந்த கோரிக்கை பஞ்சாபி சுபா என்ற பெயரில் 1950-களிலிருந்து ஒரு இயக்கமாகவே செயல்படத்தொடங்கியது. 1960-களின் பிற்பகுதியில் ஆந்திராவின் பொட்டி ஶ்ரீராமுலு போலவே பஞ்சாபிலும் சாந்த் ஃபதேஹ் சிங், மாஸ்டர் தாரா சிங் உள்ளிட்டோர் அடுத்தடுத்து சாகும்வரை உண்ணாவிரதப் போராட்டங்களில் நடத்தினர். நிலைமையின் தீவிரத்தை உணர்ந்த மத்திய அரசு பஞ்சாப் மக்களின் கோரிக்கையை ஏற்று 1966-ம் ஆண்டு செப்டம்பர் 30-ல் பஞ்சாபி மொழி பேசும் மக்களுக்கென பஞ்சாப் மாநிலமும், இந்தி மொழி பெரும்பான்மையாக பேசும் மக்களுக்கென ஹரியானா மாநிலமும் எனப் பிரிக்கப்பட்டு இரண்டு மாநிலங்களாக உருப்பெற்றது. இந்திய சுதந்திரத்துக்குப் பிறகு அஸ்ஸாமின் ஒரு பகுதியாக இருந்தது நாகலாந்து. 1957-ம் ஆண்டிலிருந்து யூனியன் பிரதேசமாக அங்கீகரிக்கப்பட்ட இம்மாநிலம் 1963-ம் ஆண்டு டிசம்பர் 1 நாள் புதிய மாநிலமாக பரிணமித்தது. அதேபோல் யூனியன் பிரதேசமாக இருந்துவந்த இமாச்சல பிரதேசமும், மாநில அந்தஸ்தைப் பெற்று 1971-ம் ஆண்டு ஜனவரி 25 அன்று மாநிலமாக உருப்பெற்றது.வடகிழக்கு மாநிலங்களில் மிதமான நிலநடுக்கம் வடகிழக்கு மாநிலங்களைப் பொறுத்தவரை, 1949-ம் ஆண்டு இந்தியாவோடு இணைக்கப்பட்ட திரிபுரா 1972-ம் ஆண்டு ஜனவரி 21 அன்று தனி மாநிலமாக உருவானது. 1957-ம் ஆண்டுவரை யூனியன் பிரதேசமாக இருந்த மணிப்பூர் பகுதியும், 1972-ம் ஆண்டு மாநில அந்தஸ்தைப் பெற்றது. அதே ஆண்டு அஸ்ஸாம் மாநிலத்திலிருந்து பிரிக்கப்பட்டு புதிதாக மேகாலயா மாநிலமும் உருவாக்கப்பட்டது. ஆச்சர்ய ‘மீஸு’... ஹார்ன்பில் திருவிழா..! வடகிழக்கு மாநிலங்களுக்கு ஒரு விசிட் Also Read: இந்திய மாநிலங்களின் வரலாறு: பிரிட்டிஷ் ஆட்சிக் காலத்திலேயே பிரிக்கப்பட்ட மொழிவாரி மாநிலம்?!|பகுதி-3 இந்தியாவின் மக்கள்தொகை அடிப்படையில் மிகச்சிறிய மாநிலமான சிக்கிம், 1975-ம் ஆண்டு மே 16-ம் நாள் உருவாக்கப்பட்டது. 1954-ம் ஆண்டுகளில் வடகிழக்கு எல்லைப்புற ஏஜென்சி எனும் பெயரில் செயல்பட்டு வந்த அருணாச்சலப்பிரதேசம் 1972-ம் ஆண்டு யூனியன் பிரதேசமாகவும், பின்னர் 1987-ம் ஆண்டு பிப்ரவரி 20-ம் நாள் மாநிலமாக உருவாக்கம் பெற்றது. அதேபோல யூனியன் பிரதேசமாக இருந்து 1987-ம் ஆண்டில் மீசோ மொழிபேசும் மக்களுக்காக மிசோரம் மாநிலம் உருவாக்கப்பட்டது. இந்தியாவின் நிலப்பரப்பில் மிகச்சிறிய மாநிலமான கோவா, 1961-ம் ஆண்டு இந்தியாவுடன் இணைக்கப்பட்டது. அதன் பின்னர் டாமன் & டையூவுடன் யூனியன் பிரதேசமாக இருந்துவந்த கோவா, 1987-ம் ஆண்டு மே 30-ல் தனி மாநிலமாக உதயமானது. சுதந்திரத்திற்கு முன்பே 1920-ம் ஆண்டிலிருந்து தனி சத்தீஸ்கர் மாநில கோரிக்கை பல்வேறு காலகட்டங்களில் தொடர்ச்சியாக எழுப்பப்பட்டு வந்தன. 1990-களின் பிற்பகுதியில் இந்தப் போராட்டம் தீவிரமடையவே, 2000-ம் ஆண்டு நவம்பர் முதல் நாள் மத்தியப்பிரதேசத்திலிருந்து பிரிந்து சத்தீஸ்கர் மாநிலம் உருவானது.Goa 'தேவபூமி' என்றழைக்கப்படும் உத்தரகாண்ட் மாநிலம், நவம்பர் 9, 2000-ம் ஆண்டு உத்தரப்பிரதேசத்திலிருந்து பிரிக்கப்பட்டு இந்தியாவின் 27-வது மாநிலமாக உருவானது. அதே ஆண்டு நவம்பர் 15-ம் நாள் பீகாரிலிருந்து பிரிக்கப்பட்டு 'காடுகளின் நிலம்' என பொருள் கொள்ளப்படும் ஜார்கண்ட் மாநிலம் புதிதாக உருவாக்கப்பட்டது. சுதந்திர இந்தியாவில் மொழிவாரி மாநிலங்களுக்கெல்லாம் முன்னோடியாக இருந்து, விடாது விசாலா ஆந்திராவுக்காகவும் போராடிய தெலுங்கர்களில் ஹைதராபாத் பகுதியைச் சேர்ந்த பெரும்பாலான மக்கள் பின்னாட்களில் தனித் தெலுங்கானா கோரிக்கையை முன்வைத்தனர். அதற்காக 1969-ம் ஆண்டு முதல் சிறிய அளவில் தொடங்கிய போராட்டம் காலப்போக்கில் தீவிரமடைந்து 600-க்கும் மேற்பட்டோரின் களப்பலியும் கண்டது. 2009-ம் ஆண்டு சந்திரசேகர் ராவின் சாகும்வரை உண்ணாவிரதப் போராட்டமும் மத்திய அரசுக்கு அழுத்தம் கொடுக்க, கிருஷ்ணா கமிட்டி அமைக்கப்பட்டு தனித் தெலங்கானா மாநிலத்திற்கு ஒப்புதல் அளிக்கப்பட்டது. இறுதியில், 2014-ம் ஆன்டு ஜீன் 2-ம் நாள் தெலங்கானா மாநிலம் உருவானது. Also Read: இந்திய மாநிலங்களின் வரலாறு: பிரிட்டிஷ் ஆட்சிக் காலத்திலேயே பிரிக்கப்பட்ட மொழிவாரி மாநிலம்?!|பகுதி-3பாகிஸ்தான் ஆக்கிரமிப்பு காஷ்மீரை காட்டும் வரைபடம் 2019-ம் ஆண்டு மத்திய அரசால் இந்திய அரசியலமைப்பின் சட்டப் பிரிவு 370 நீக்கப்பட்டு, சிறப்பு அந்தஸ்தை இழந்த காஷ்மீர் மாநிலம், இரண்டாக பிரிக்கப்பட்டு லடாக் மற்றும் ஜம்மு காஷ்மீர் என்ற இரு யூனியன் பிரதேசங்களாக உருவாக்கப்பட்டன. மொத்தமாக 28 மாநிலங்கள், 9 யூனியன் பிரதேசங்களைக் கொண்டுள்ள இந்தியாவில், இன்னமும் "தனி மாநிலம்” கேட்டு பல்லாண்டுகாலமாக பல்வேறு மாநில மக்கள் போராடி வருகின்றனர். அந்த மாநிலங்கள் எவை? எதற்காக தனிமாநிலம் கேட்கிறார்கள்? ...........காத்திருங்கள் அடுத்த தொடரில்! முந்தைய பாகங்களைப் படிக்க பகுதி - 1 - இந்தியா: ஒன்றியம் முதல் கொங்குநாடு வரை! -தனிமாநில கோரிக்கைகளும், மாநிலங்கள் உருவான வரலாறும்|பாகம் 1 பகுதி - 2 - இந்திய மாநிலங்களின் வரலாறு: வெடித்தது உண்ணாவிரதப் போராட்டம்! பிறந்தது மொழிவாரி மாநிலங்கள்|பகுதி -2 பகுதி - 3 - இந்திய மாநிலங்களின் வரலாறு: பிரிட்டிஷ் ஆட்சிக் காலத்திலேயே பிரிக்கப்பட்ட மொழிவாரி மாநிலம்?!|பகுதி-3
http://dlvr.it/S46xP0

Read More