கொரோனா: `நாட்டில் 22 மாவட்டங்கள்; அதில் கேரளத்தில் மட்டும் 7’ - அதிகரிக்கும் பரவலால் அதிர்ச்சி

உலகை அச்சுறுத்திக்கொண்டிருக்கும் கொரோனா கொடுந்தொற்று, இந்தியாவில் இரண்டாம் அலையில் பெரும் சேதாரத்தை ஏற்படுத்தியது. பல மாநிலங்களில் கொரோனா குறைந்துவரும் நிலையில், சில மாநிலங்களில் கொரோனா பரவல் கவலை அளிக்கும்விதமாக உள்ளது. தமிழ்நாட்டின் அண்டை மாநிலமான கேரளத்தில் கொரோனாத் தொற்று ஏற்ற இறக்கத்துடன் காணப்படுகிறது. கடந்த 25-ம் தேதி கேரளத்தில் 17,466 பேருக்கு கொரோனா தொற்று ஏற்பட்டது. நேற்று முன் தினம் 11,586 பேருக்கு கொரோனா தொற்று ஏற்பட்டது. இந்த நிலையில் நேற்று இந்த எண்ணிக்கை எதிர்பாராதவிதமாக உயர்ந்துள்ளது. நேற்று மட்டும் 22,129 பேருக்கு கொரோனா தொற்று ஏற்பட்டுள்ளது. இதையடுத்து கேரளத்தில் கொரோனா பாதித்து சிகிச்சையில் இருப்பவர்கள் எண்ணிக்கை 1,45,371 ஆக உயர்ந்துள்ளது. ஒரே நாளில் 156 பேர் மரணம் அடைந்துள்ளனர். மொத்த மரண எண்ணிக்கை 16,326 ஆக உயர்ந்துள்ளது. மாநிலம் முழுவதும் 4,36,387 பேர் தனிமைப்படுத்தப்பட்டுள்ளனர்.கேரளா மாவட்ட வாரியாக கணக்கிடும்போது மலப்புறம் மாவட்டத்தில் 4,037 பேருக்கு நேற்று கொரோனா பாதிப்பு ஏற்பட்டுள்ளது. திருச்சூர் மாவட்டத்தில் 2,623, கோழிக்கோடு 2,397, எர்ணாகுளம் 2,352, பாலக்காடு 2,115, கொல்லம் 1,914, கோட்டயம் 1,136, திருவனந்தபுரம் 1,100, கண்னுர் 1,072, ஆலப்புழா 1,064, காஸ்ர்கோடு 813, வயநாடு 583, பத்தனம்திட்டா 523, இடுக்கி மாவட்டத்தில் 400 பேருக்கும் புதிதாக கொரோனா தொற்று ஏற்பட்டுள்ளது. இந்த நிலையில் இந்தியாவில் 22 மாவட்டங்களில் கொரோனா பரவல் அதிர்ச்சி அளிக்கும் வகையில் அதிகரித்து வருவதாக மத்திய சுகாதாரத்துறை இணைச் செயலர் லவ் அகர்வால் செய்தியாளர்கள் சந்திப்பில் கூறியுள்ளார். அதில் ஏழு மாவட்டங்கள் கேரளமாநிலத்தைச் சேர்ந்தவை. கேரளத்தின் ஆலப்புழா, கோட்டயம், மலப்புறம், திருச்சூர், வயநாடு, எர்ணாகுளம், பத்தனம்திட்டா ஆகிய ஏழு மாவட்டங்களில் கொரோனா பாதிப்புகள் அதிகரிப்பதாக அவர் தெரிவித்துள்ளார்.கொரோனா பாதிப்பு கொரோனா அதிகரித்துவருவதால் மாநில அரசுடன் இதுகுறித்து விவாதித்துள்ளதாகவும், கொரோனா அதிகரித்துவரும் மாவட்டங்களில் எந்த காரணத்கைக் கொண்டும் தளர்வுகள் ஏற்படுத்தக்கூடாது என அறிவுறுத்தியுள்ளதாக அவர் தெரிவித்தார். கேரளத்தில் பத்து மாவட்டங்களில் கொரோனா பாசிட்டிவ் விகிதம் 10 சதவீதமாக உள்ளதாக லவ் அகர்வால் தெரிவித்திருக்கிறார். கேரள மாநிலத்தில் ஓணம் பண்டிகை அடுத்த மாதம் கொண்டாடப்பட உள்ளது. இந்த நிலையில் கொரோனா அதிகரித்து வருவதால் ஓணப்பண்டிகை கடந்த ஆண்டைப்போல கடும் கட்டுப்பாட்டுடன் கொண்டாடும் நிலை ஏற்படும் என கூறப்படுகிறது.
http://dlvr.it/S4Yw3d

Read More

ஜீன்ஸ் அணிந்ததால் குடும்பத்தினரால் கொலை செய்யப்பட்ட 9-ம் வகுப்பு மாணவி; உ.பி-யில் அதிர்ச்சி சம்பவம்!

உத்தரப்பிரதேசத்தின் டியோரியா மாவட்டத்தில் உள்ள சாவ்ரேஜி கார்க் கிராமத்தைச் சேர்ந்த பதின்வயதுச் சிறுமி நேஹா பாஸ்வான், காவல்துறை அதிகாரியாக வேண்டும் என்று கனவு கொண்டிருந்தார். ஆனால், ஒன்பதாம் வகுப்பு மாணவியான அவர், தனது குடும்பத்தாராலேயே அடித்து கொலை செய்யப்பட்டுள்ள சம்பவம் அனைவரையும் அதிர்ச்சியில் ஆழ்த்தியுள்ளது. நேஹா கொலை செய்யப்பட்டதற்குக் காரணம், அவர் ஜீன்ஸ் அணிந்தது. நேஹாவின் வீட்டில் இருந்து 20 கிலோமீட்டர் தொலைவில் உள்ள பாலத்தில் நேஹாவின் சடலம் தொங்கிய நிலையில் கண்டெடுக்கப்பட்டுள்ளது. ஜீன்ஸ் (மாதிரி படம்) Also Read: `ஆண்கள் அரை டவுசர், பெண்கள் ஜீன்ஸ் - டிஷர்ட் அணியக்கூடாது!' - உ.பி பஞ்சாயத்தில் அறிவிப்பு என்ன நடந்தது? சாவ்ரேஜி கார்க் கிராமத்தைச் சேர்ந்த அமர்நாத் பாஸ்வான் - சகுந்தலா தம்பதிக்கு இரண்டு மகன்கள் மற்றும் இரண்டு மகள்கள். நேஹா, இவர்களின் மூன்றாவது குழந்தை. பாஸ்வான், லூதியானாவில் தினக்கூலி வேலை செய்து வருகிறார். துடிப்பான பெண்ணான நேஹா, தன் படிப்பும், தன் ஆடைகளும் தன் விருப்பம் எனக் கூறுவது வழக்கம் என்று அவர் குடும்பத்தினர் தெரிவிக்கின்றனர். திங்கள் அன்று நாள் முழுக்க விரதம் இருந்த நேஹா, மாலை பூஜைக்குக் குளித்துவிட்டு ஜீன்ஸ் - டாப் அணிந்து வந்து கடவுளை வணங்கிக் கொண்டிருந்துள்ளார். அதற்கு அவரின் தாத்தா, சித்தப்பா உள்ளிட்டவர்கள் அவர் அணிந்திருந்த ஆடை குறித்து கடுமையாக விமர்சனம் செய்துள்ளனர். அதனால் கோபம் அடைந்த நேஹா, ``ஜீன்ஸ் அணிவதற்காகத்தான் தயாரிக்கப்படுகிறது, நான் அணிவேன்" என்று கூறியுள்ளார். இதனால் ஆத்திரம் அடைந்த நேஹாவின் சித்தப்பாவும் உறவினர்களும், நேஹாவை கடுமையாகத் தலையில் தாக்கியுள்ளனர். இதனால் சுயநினைவின்றி மயங்கி விழுந்த நேஹாவை, ஆட்டோவில் மருத்துவமனை அழைத்துச் செல்லக் கிளம்பியுள்ளனர் அவர் உறவினர்கள். நேஹாவின் அம்மா சகுந்தலாவும் உடன் செல்லக் கிளம்பியபோது, அவர்கள் அனுமதிக்க மறுத்துவிட்டனர். எனவே சகுந்தலா, தன் உறவினர்களை மாவட்ட மருத்துவமனையில் தன் பெண்ணின் நிலை பற்றி அறிய அனுப்பிவைத்தபோது, நேஹாவை அங்கு காணவில்லை. மறுநாள், அந்த கிராமத்தின் வழியே ஓடும் கங்தக் ஆற்றின் பாலத்தில் ஒரு சிறுமியின் சடலம் தொங்குவதாகத் தகவல் வர, அது நேஹா என்று அடையாளம் காணப்பட்டிருக்கிறது. கூலி வேலைக்காக வெளியூர் சென்றிருந்த நேஹாவின் அப்பா பாஸ்வானுக்கு தகவல் சொல்லப்பட, கிராமத்துக்குத் திரும்பிய அவர், ``என் கஷ்டங்களுக்கு எல்லாம் இடையில் என் பிள்ளைகளைப் படிக்கவைத்தேன், நேஹாவுக்கு இப்படி ஆகிவிட்டதே..." என்று அழுதது பலரையும் மனம் கலங்கச் செய்தது. Girl - Representational Image Also Read: `பெண்கள் கிழிந்த ஜீன்ஸ் அணிவது என்ன மாதிரியான செயல்?' - உத்தரகாண்ட் முதல்வர் சர்ச்சை கருத்து நேஹாவின் தம்பி விவேக், ``துணிகள் துவைத்து காயவைக்கும் வேலைகளைச் செய்யச் சொல்லி, தாத்தாவும், சித்தப்பாவும் நேஹா அக்காவை அடிப்பார்கள். அப்படி அடிக்கும்போது, அவள் அணியும் ஆடைகள் பற்றி தகாத வார்த்தைகளில் திட்டுவார்கள். அவளை ஜீன்ஸ் அணியக்கூடாது என்று தொடர்ந்து கூறிக்கொண்டே இருப்பார்கள். அன்றும், அதேபோல்தான் திட்ட ஆரம்பித்தார்கள்" என்று கூறியுள்ளார். ``என் மகள் நேஹா போலீஸ் அதிகாரியாகக் கனவு கண்டாள். அவளுக்கு இப்படி ஆகிவிட்டதே'' என்று செய்தியாளர்களிடம் கலங்கினார் சகுந்தலா. வழக்கை விசாரிக்கும் காவல்துறையினர், கொலை மற்றும் தடயங்களை அழித்தல் பிரிவின் கீழ் நேஹாவின் தாத்தா, சித்தப்பா, சித்திகள், உறவினர்கள், ஆட்டோ ஓட்டுநர் உள்ளிட்ட 10 பேர் மீது வழக்குப் பதிவு செய்துள்ளனர். நான்கு பேர் கைது செய்யப்பட்டுள்ளனர். பிரேதப் பரிசோதனை அறிக்கையின் படி தலையில் ஏற்பட்ட பலத்த காயத்தால் நேஹா உயிர் இழந்துள்ளார் என்று சர்க்கிள் ஆபீஸர் கூறியுள்ளார். பெண்களுக்கு எதிரான வன்முறைகள் வீட்டுக்குள்தான் அதிகம் நடக்கின்றன என்கின்றன புள்ளிவிவரங்கள். இன்னும் எத்தனை உயிர்களை இழக்கப்போகிறோம்? - ஹரிணி ஆனந்தராஜன்
http://dlvr.it/S4XQfD

Read More

நடிகர் விஜய்க்கு விதிக்கப்பட்ட அபராதத்திற்கு இடைக்காலத் தடை: உயர் நீதிமன்றம்

சொகுசு கார் வழக்கில் நடிகர் விஜய்க்கு தனி நீதிபதி விதித்த அபராதத்திற்கு உயர் நீதிமன்றம் இடைக்காலத் தடை விதித்திருக்கிறது. 2012-ஆம் ஆண்டு இறக்குமதி செய்யப்பட்ட சொகுசு காருக்கு நுழைவு வரியிலிருந்து விலக்குக்கோரி நடிகர் விஜய் தாக்கல் செய்த வழக்கில் ஒரு லட்சம் ரூபாய் அபராதம் விதிக்கப்பட்டது. இதை எதிர்த்து அவர் மேல்முறையீடு செய்திருந்தார். அபராதம் விதித்து நீதிபதி எஸ்.எம். சுப்பிரமணியம் அளித்த தீர்ப்பின் நகல் இல்லாததால், விஜய்யின் மேல்முறையீடு மனு விசாரணைக்கு பட்டியலிடப்படவில்லை. இந்த நிலையில் தனி நீதிபதியின் தீர்ப்பின் நகல் இல்லாமல் வழக்கை பட்டியலிட பதிவுத்துறைக்கு உத்தரவிடக்கோரி விஜய் தரப்பில் கூடுதல் மனு தாக்கல் செய்யப்பட்டது. இந்த கூடுதல் மனு இன்று நீதிபதிகள் எம். துரைசாமி, ஆர். ஹேமலதா அமர்வில் விசாரணைக்கு எடுத்துக்கொள்ளப்பட்டது. மேலும் தீர்ப்பு நகலின்றி விசாரணைக்கு ஏற்க வேண்டும் என்ற கோரிக்கையும் ஏற்றுக்கொள்ளப்பட்டு இன்று அந்த மனு விசாரணைக்கு வந்தது. இன்று விஜய் தரப்பில் ஆஜரான வழக்கறிஞர் தனது வாதங்களை முன்வைத்தார். அதில், ரோல்ஸ் ராய்ஸ் காருக்கு நுழைவு வரி செலுத்தவேண்டும் என்ற உத்தரவை எதிர்க்கவில்லை; மதிக்கிறோம். நீதிமன்றத்தை நாடியதற்காக விதித்த ரூ.1 லட்சம் அபராதம் மற்றும் தனி நீதிபதியின் விமர்சனங்களை ரத்துசெய்யுங்கள் என்ற கோரிக்கை முன்வைக்கப்பட்டது. அப்போது அரசு தரப்பில், விஜய்க்கு அபராதம் விதித்தது மற்றும் விமர்சனங்களை நீக்குவது தொடர்பாக எந்த கருத்தையும் தெரிவிக்கமுடியாது என்றும், அதேசமயம், மீதம் செலுத்தவேண்டிய நுழைவு வரியை கணக்கிட்டுத் தெரிவிக்க தயாராக இருப்பதாகவும் விளக்கமளிக்கப்பட்டது. அதனை பதிவு செய்துகொண்ட நீதிபதிகள், ஏற்கெனவே 20% வரியை விஜய் செலுத்தி இருப்பதால் மீதம் எவ்வளவு வரி செலுத்தவேண்டும் என்பதை ஒரு வாரத்தில் கணக்கிட்டு தெரிவிக்கும்படி உத்தரவிட்டனர். மேலும், தனி நீதிபதி எஸ்.எம். சுப்ரமணியம் விதித்த ரூ.1 லட்சம் அபராதத்திற்கு இடைக்கால தடை விதித்து உத்தரவிட்டிருக்கின்றனர்.
http://dlvr.it/S4WNMS

Read More

கேரளா: குறையாத கொரோனா.. 16 நாளில் 50-ஐ கடந்த ஜிகா வைரஸ் பாதிப்பு!

நாட்டில் முதன் முறையாக கொரோனா தொற்று கண்டறியப்பட்டது கேரள மாநிலத்தில்தான். ஆரம்பத்தில் இருந்தே `பிரேக் தி செயின்’ உள்ளிட்ட பல முன்னெச்சரிக்கை நடவடிக்கைகளை கேரள அரசு எடுத்து வந்தது. ஆனாலும் கொரோனா பாதிப்பு நாளுக்கு நாள் அங்கு அதிகரித்து வந்தது. இப்போதும் கேரள மாநிலத்தில் இரண்டாவது அலை முடிந்தபாடில்லை. தினமும் 10,000 முதல் 17,000 வரை ஏற்ற இறக்கத்துடன் கொரோனா பாதிப்பு ஏற்பட்டு வருகிறது. இப்போதைய கொரோனா பாதிப்புகள் இரண்டாவது அலையின் நீட்சியா, அல்லது மூன்றாவது அலை தொடக்கமா என்ற குழப்பம் மருத்துவர்களிடையே இருந்து வருகிறது. தினமும் கொரோனா புதிய நோய்த்தொற்றாளர்கள் எண்ணிக்கை, மருத்துவத்துறைக்கு ஆட்டம் காட்டிவருகிறது.கொரோனா சிகிச்சை நேற்று முன்தினம் (25-ம் தேதி) கேரளத்தில் 17,466 பேருக்கு கொரோனா தொற்று ஏற்பட்டது. 15,247 பேர் தொற்றிலிருந்து குணமடைந்தனர். நேற்று புதிதாக 11,586 பேருக்கு கொரோனா தொற்று ஏற்பட்டது. 14,912 பேர் கொரோனா குணமடைந்து வீடு திரும்பினர். கேரளத்தில் நேற்றைய நிலவரப்படி மொத்தம் 1,36,814 பேர் கொரோனா நோய்த்தொற்றால் பாதிக்கப்பட்டு சிகிச்சையில் உள்ளனர். 4,33,215 பேர் தனிமைப்படுத்தப்பட்டுள்ளனர். இதுவரை 31,29,628 பேர் கொரோனா தொற்றுக்கு ஆளாகி உள்ளனர். மாநிலத்தில் இதுவரை கொரோனா காரணமாக 16,170 பேர் கொரோனாவால் மரணம் அடைந்துள்ளனர். மேலும் கேரள தமிழக எல்லையான பாறசாலை பகுதியில் கடந்த 9-ம் தேதி ஒரு கர்ப்பிணி பெண்ணுக்கு ஜிகா வைரஸ் பாதிப்பு முதலில் கண்டறியப்பட்டது. ஏடிஸ் கொசுக்களால் பரவும் ஜிகா வைரஸ் பாதிப்பு மெல்ல திருவனந்தபுரம் மாவட்டத்தை தொடர்ந்து கொல்லம் மாவட்டத்தில் பரவி வருகிறது. சுமார் 16 தினங்களில் ஜிகா வைரஸ் பாதிப்பு எண்ணிக்கை 50-ஐ தாண்டியுள்ளது. நேற்று மூன்றுபேருக்கு ஜிகா வைரஸ் தொற்று உறுதிசெய்யப்பட்டதை தொடர்ந்து கேரள மாநிலத்தில் மொத்த ஜிகா வைரஸ் பாதிப்பு 51 ஆக உயர்ந்துள்ளதாக கேரள சுகாதாரத்துறை அமைச்சர் வீணா ஜார்ஜ் தெரிவித்தார்.வீணா ஜார்ஜ் கொரோனா மற்றும் ஜிகா வைரஸ் நோய்த்தொற்றுகளால் கேரளம் திணறி வருகிறது. இதுகுறித்து கேரள சுகாதாரத்துறை அமைச்சர் வீணா ஜார்ஜ் கூறுகையில், "கேரளத்திற்கு மத்திய அரசு 1.66 கோடி தடுப்பூசி வழங்கியது. 45 வயதுக்கு மேல் உள்ள 76 சதவீதம் பேருக்கு முதல் டோஸ் வாக்ஸின் போடப்பட்டுள்ளது. 35 சதவீதம்பேருக்கு இரண்டாம் டோஸ் வாக்ஸின் போடப்பட்டுள்ளது. வயநாடு மற்றும் காசர்கோடு மாவட்டங்களில் 45 வயதுக்கு மேல் உள்ள அனைவருக்கும் தடுப்பூசி போடப்பட்டுள்ளது. கொரோனா மற்றும் ஜிகா வைரஸுக்கு எதிராக அனைத்து நடவடிகைகளிலும் ஈடுபட்டுள்ளோம். அடுத்த மாதம் 60 லட்சம் கொரோனா தடுப்பூசி வேண்டும் என மத்திய அரசிடம் கேட்டுள்ளோம்" என்றார். Also Read: கொரோனா பேரிடரில் தடுப்பூசி போட்டுக்கொள்ளாத 2.3 கோடி குழந்தைகள்! - தமிழகத்தின் நிலை என்ன?
http://dlvr.it/S4VLjt

Read More

"வெற்றிப்பெற முடியவில்லை, மன்னிப்பு கேட்டுக்கொள்கிறேன்" - பவானி தேவி உருக்கம்

வாள்வீச்சுப் போட்டியின் இரண்டாவது சுற்றில் வெற்றிப்பெற முடியவில்லை அதற்காக மன்னிப்பு கேட்டுக்கொள்கிறேன் என்று இந்திய வீராங்கனை பவானி தேவி ட்விட்டர் பக்கத்தில் தெரிவித்துள்ளார். டோக்கியோ ஒலிம்பிக் வாள் ‌சண்டையில் இந்திய வீராங்கனை பவானி தேவி 2ஆவது சுற்றில் தோல்வியடைந்தார். 2-ஆவது சுற்று போட்டியில் உலக தரவரிசையில் 3-ஆவது இடத்தில் உள்ள பிரான்ஸ் வீராங்கனை மனோன் புரூனட்டை பவானிதேவி எதிர்கொண்டார். இதில் மனோன் புரூனட் எளிதில் வெற்றிபெற்றார். முன்னதாக இன்று அதிகாலை நடைபெற்ற முதல் சுற்றுப் போட்டியில் துனிஷிய வீராங்கனை பென் அசிசியை பவானி தேவி எளிதில் வீழ்த்தியிருந்தார். சென்னையைச் சேர்ந்த பவானிதேவி ஒலிம்பிக் வாள் சண்டையில் களமிறங்கிய முதல் இந்தியர் என்ற பெருமையையும் ஏற்கெனவே பெற்றிருந்தார். இந்நிலையில் தன்னுடைய தோல்வி குறித்து ட்விட்டர் பக்கத்தில் உருக்கமாக பதிவிட்டிருந்தார் பவானி தேவி. அதில் "இது மிகப் பெரிய நாள் உற்சாகமாகவும் உணர்வுபூர்வமாகவும் உணர்கிறேன். ஒலிம்பிக் வாள்வீச்சு முதல் போட்டியில் நாடியா அசிசீயை 15/3 என்ற கணக்கில் வென்றேன். இதன் மூலம் ஒலிம்பிக் வாள்வீச்சு போட்டியில் வென்ற முதல் இந்தியா வீராங்கனையானேன்." மேலும் "எனது இரண்டாவது போட்டியில், வாள்வீச்சு போட்டியில் உலக தரவரிசையில் மூன்றாவது இடத்தில் இருக்கும் மனோன் புரூனெட்டிடம் 7/15 என்ற கணக்கில் தோல்வி அடைந்தேன். நான் எனது சிறந்த ஆட்டத்தை அளித்தேன். ஆனால் வெற்றி பெற முடியவில்லை. மன்னிப்பு கேட்டுக் கொள்கிறேன்.எல்லா முடிவுகளுக்கு ஒரு ஆரம்பம் இருக்கிறது. நான் தொடர்ந்து பயிற்சி எடுத்து பிரான்ஸில் நடக்கும் அடுத்த ஒலிம்பிக்கில் பதக்கம் வென்று எனது நாட்டை பெருமையடைய செய்வேன். அடுத்த ஒலிம்பிக்கில் கூடுதல் வலியுடன் வருவேன். எனது பயிற்சியாளர்கள், பெற்றோர்கள், இந்திய மற்றும் தமிழக மக்களுக்கு எனது நன்றியை தெரிவித்து கொள்கிறேன்" என பதிவிட்டிருக்கிறார் பவானி தேவி.
http://dlvr.it/S4Srxr

Read More

`மோடி, அமித்ஷா, ஜே.பி நட்டா ஆகியோருக்கு நன்றி!’ - கர்நாடக முதல்வர் எடியூரப்பா ராஜினாமா

பாஜகவைச் சேர்ந்த கர்நாடக முதலமைச்சர் எடியூரப்பா இன்று தனது முதல்வர் பதவியை ராஜினாமா செய்துள்ளார். பாரதிய ஜனதா கட்சியைப் பொறுத்தவரையில் 75 வயது நிரம்பிய யாரும் முதல்வர் பதவில் தொடரக்கூடாது, கட்டாய ஓய்வு பெறவேண்டும் என்பது விதிமுறை. ஆனால், கர்நாடக முதலமைச்சர் எடியூரப்பாவுக்கு தற்போது வயது 78. இருப்பினும், இரண்டாண்டுகளுக்கு முன்னர், 2019-ல் கர்நாடக முதல்வராக தனது 75-வது வயதில் பொறுப்பேற்றுக்கொண்டார். இந்நிலையில், ஆட்சிப்பொறுப்பேற்று சரியாக இரண்டு ஆண்டுகள் முடிவடைந்த இன்று அவர் தனது பதவியை ராஜினாமா செய்துள்ளார்.எடியூரப்பா - மோடி Also Read: காங்கிரஸ் எம்.எல்.ஏ-க்கள், சுப்பிரமணியன் சாமி ஆதரவு... தப்பிப்பாரா கர்நாடக முதல்வர் எடியூரப்பா? எடியூரப்பா தனது முதல்வர் பதவியை ராஜினாமா செய்வது என்பது புதிதல்ல, ஏற்கனவே வெவ்வேறு காலகட்டங்களில் பல்வேறு காரணங்களுக்காக மூன்றுமுறை ராஜினாமா செய்துள்ளார். குறிப்பாக, 2007-ம் ஆண்டு முதல்முறையாக முதல்வராக பொறுப்பேற்றதும் வெறும் 7 நாட்களில் ராஜினாமா செய்தார். அதன்பின்னர், மீண்டும் 2008 முதல் 2011 வரை மூன்றரை ஆண்டுகள் முதல்வராக தொடர்ந்த எடியூரப்பா மீது ஊழல் புகார் எழுந்து சிறை செல்ல நேரிட்டது. இதனால், பாஜக தலைமை கொடுத்த அழுத்தத்தின் காரணமாக தனது முதல்வர் பதவியை இரண்டாவது முறையாக ராஜினாமா செய்தார். நீண்ட இடைவெளிக்கு பின்னர், கடந்த 2018-ம் ஆண்டு, கர்நாடகா சட்டமன்றத்தில் தனது பெரும்பான்மையை நிரூபிக்கத் தவறியதால், வெறும் 3 நாட்களில் தனது முதல்வர் பதவியை மூன்றாவது முறையாக ராஜினாமா செய்தார். Also Read: காங்கிரஸ் எம்.எல்.ஏ-க்கள், சுப்பிரமணியன் சாமி ஆதரவு... தப்பிப்பாரா கர்நாடக முதல்வர் எடியூரப்பா? கடந்த 2019-ம் ஆண்டு கர்நாடகாவில் குமாரசாமி தலைமையிலான ஆட்சி கவிழ்ந்ததையடுத்து, பாஜக ஆட்சி அமைத்தது. 2019, ஜூலை 26-ம் நாள் நான்காவது முறையாக முதல்வராக பொறுப்பேற்றுக்கொண்டார் எடியூரப்பா. வயது மூப்பின் காரணமாக, இரண்டாண்டுகள் மட்டுமே பதவிவகிக்க வேண்டும் என பாஜக தலைமை அப்போது நிபந்தனை விதித்தது. தற்போது இரண்டாண்டுகள் முடிவடையும் தருவாயில், கடந்த ஜூலை 16-ம் நாள் பிரதமர் மோடி, அமித்ஷா மற்றும் பாஜக தேசிய தலைவர் ஜே.பி. நட்டா ஆகியோருடன் எடியூரப்பா ஆலோசனை மேற்கொண்டார். இந்நிலையில், கர்நாடக முதல்வராக எடியூரப்பா ஆட்சி அமைத்து, இன்று 2021 ஜூலை 26-ம் தேதியுடன் சரியாக இரண்டாண்டுகள் முடிவடைந்த நிலையில் ராஜினாமா செய்துள்ளார்.எடியூரப்பா கர்நாடக ஆளுநர் தவார் சந்த் கெலாட்-டிடம் தனது ராஜினாமா கடிதத்தைக் கொடுத்தபின் பத்திரிகையாளரை சந்தித்த எடியூரப்பா, "முதல்வர் பதவியில் இருந்து நான் விலக வேண்டும் என கட்சி தலைமை எனக்கு எந்த அழுத்தமும் தரவில்லை. இரண்டு ஆண்டுகளில் பதவியை ராஜினாமா செய்வேன் என்று நான் கொடுத்திருந்த வாக்குறுதியை நிறைவேற்றியுள்ளேன். நான் இரண்டாண்டுகள் முதல்வராக பதவி வகிக்க வாய்ப்பளித்ததற்காக பிரதமர் மோடி, அமித் ஷா, ஜே.பி நட்டா ஆகியோருக்கு நன்றியை தெரிவித்துக்கொள்கிறேன்" என்று கூறினார்.
http://dlvr.it/S4Rpxw

Read More

பொறியியல் படிப்பு: இன்று முதல் விண்ணப்பிக்கலாம் - உயர்க் கல்வித்துறை அறிவிப்பு

தமிழகத்தில் பொறியியல் படிப்புகளில் சேர இன்று முதல் விண்ணப்பிக்கலாம் என உயர்க் கல்வித்துறை அறிவித்துள்ளது. 12ஆம் வகுப்பு மாணவர்களுக்கான மதிப்பெண் விவரங்கள் வெளியான நிலையில் உயர்க் கல்விக்கான மாணவர் சேர்க்கை பணிகள் தமிழகத்தில் தொடங்கியுள்ளன. இதன்படி பொறியியல் படிப்புக்கு இன்று முதல் ஆகஸ்ட் 24 ஆம் தேதி வரை www.tneaonline.org என்ற இணையதளத்தில் விண்ணப்பிக்கலாம் எனத் தெரிவிக்கப்பட்டுள்ளது. ரேண்டம் என் ஆகஸ்ட் 25 ஆம் தேதியும், தரவரிசைப் பட்டியல் செப்டம்பர் 4 ஆம் தேதியும் வெளியிடப்படும் என அறிவிக்கப்பட்டுள்ளது. இதைத்தொடர்ந்து செப்டம்பர் 7 ஆம் தேதி முதல் 11 ஆம் தேதி வரை சிறப்பு இடஒதுக்கீடு பிரிவில் இடம் பெற்றுள்ள மாற்றுத் திறனாளிகள், முன்னாள் ராணுவ வீரர்களின் வாரிசுகள் மற்றும் விளையாட்டு வீரர்களுக்கான கலந்தாய்வு நடைபெறுகிறது. பின்னர் பொதுப் பிரிவினருக்கான கலந்தாய்வு செப்டம்பர் 14 ஆம் தேதி முதல் அக்டோபர் 4 ஆம் தேதி வரையிலும் துணை கலந்தாய்வு அக்டோபர் 12 ஆம் தேதி முதல் 16 ஆம் தேதி வரையிலும், ஆதிதிராவிடர் பிரிவு மாணவர்களுக்கான கலந்தாய்வு அக்டோபர் 18 ஆம் தேதி முதல் 20 ஆம் தேதி வரையும் நடைபெறும் எனத் தெரிவிக்கப்பட்டுள்ளது.
http://dlvr.it/S4Qpyj

Read More