நடிகர் வீட்டுக்கு நேரில் சென்று ரேஷன் பொருள் வழங்கிய உணவுத்துறை அமைச்சர்! - கேரளாவில் சர்ச்சை

கேரள மாநிலத்தின் பாரம்பர்ய விழாவான ஓணம் பண்டிகை இம்மாதம் 21-ம் தேதி கொண்டாடப்படுகிறது. ஓணப் பண்டிகையை முன்னிட்டு கேரள அரசு ரேஷன் கடைகளில் துணிப்பையில் 16 வகையான பொருட்கள் அடங்கிய தொகுப்பை கடந்த 31-ம் தேதி முதல் வழங்கி வருகிறது. ஒருகிலோ சீனி தொடங்கி தேயிலை, உப்பு, நெய் உள்ளிட்டவை அந்த தொகுப்பில் இடம் பெற்றுள்ளன. தமிழ்நாட்டைப் போன்று கேரள மாநிலத்திலும் ரேஷன் கடைகளில் கைவிரல் ரேகை பதிவு செய்து குடும்ப அட்டை விபரங்கள் சரிபார்த்த பிறகே ஓணப்பண்டிகை தொகுப்பு வழங்கப்படுகின்றன. ஆகஸ்ட் மாதம் 3-ம் தேதிக்குள் இந்த தொகுப்பு வழங்கி முடிக்கப்படும் என அறிவிக்கப்பட்டிருந்தது. அந்தியோதயா அன்னயோஜனா பயனாளிகள், வறுமைக்கோட்டுக்கு கீழ் உள்ளவர்கள், ஏழைகள் பயன்படும் வகையில் இந்த தொகுப்பு வழங்கப்படுவதாக அரசு அறிவித்திருந்தது.கேரள உணவுத்துறை அமைச்சர் ஜி.ஆர்.அனில் இந்த நிலையில் சினிமா நடிகரும், இயக்குநருமான மணியன்பிள்ளை ராஜூவின் வீட்டுக்கு கடந்த 3-ம் தேதி காலையில் கேரள உணவுத்துறை அமைச்சர் ஜி.ஆர்.அனில் சென்றுள்ளார். அங்கு நடிகர் மணியன்பிள்ளை ராஜூவிடம் ஓணப்பண்டிகைக்கு அரசு வழங்கும் தொகுப்பை வழங்கியுள்ளார். அமைச்சர் ஜி.ஆர்.அனிலுடன் அரசு அதிகாரிகளும் சென்றுள்ளனர். இதுகுறித்த புகைப்படத்தை அமைச்சருக்கு நெருக்கமானவர்கள் சிலர் சமூக வலைத்தளங்களில் பகிர்ந்துள்ளனர். ரேஷன் கடையில் குடும்ப அட்டைதாரர்களுக்கு வழங்கும் தொகுப்பை தனிப்பட்ட முறையில் நடிகரின் வீட்டுக்கு நேரில் சென்று கொடுத்த உணவுத்துறை அமைச்சரின் செயல் விவாதத்திற்கு உள்ளானது. நான்பிரியாரிட்டி (NPHH) வகை ரேஷன் கார்டு நடிகர் மணியன்பிள்ளை ராஜூவின் மனைவி பெயரில் இருப்பதாகவும், அவர்களுக்கு ரேஷன் கடையில் இப்போது இந்த தொகுப்பு ஒதுக்கீடு செய்யப்படவில்லை எனவும் கூறப்படுகிறது. மேலும் நான்பிரியாரிட்டி வகை வெள்ளை நிற ரேஷன் அட்டைதாரர்களுக்கு வரும் 13-ம் தேதி முதல் ஓணப்பண்டிகை தொகுப்பு வழங்குவதாக அறிவிக்கப்பட்டுள்ளதாகவும் தகவல் வெளியாகியுள்ளது.அதிகாரிகள் சகிதம் நடிகர் வீட்டுக்குச் சென்று ரேஷன் பொருட்கள் வழங்கிய அமைச்சர் ஜி.ஆர்.அனில் இதுகுறித்து உணவுத்துறை அமைச்சருக்கு நெருக்கமானவர்கள் சிலர் கூறும்போது, ``நடிகர் மணியன்பிள்ளை ராஜூ கடந்த லாக்டெளன் காலத்தில் ரேஷன் கடைக்கு நேரில் சென்று அரிசி வாங்கிய நிகழ்வு செய்தியானது. அதுபற்றி கருத்து தெரிவித்த மணியன்பிள்ளை ராஜூ ரேஷன் பொருட்கள் தரமற்றதாக உள்ளதாக சமூக வலைத்தளங்களில் கருத்து வெளியானது. ரேஷன் கடை அரிசியை வீட்டில் கொண்டுவந்து சமைத்தபோது தரமானதாக இருந்தது எனக்கூறியிருந்தார். இதையடுத்து அன்றைய உணவுத்துறை அமைச்சர் பி.திலோத்தமன் நடிகர் ராஜூவின் வீட்டுக்கு நேரில் சென்று நன்றி தெரிவித்திருந்தார். அந்த வகையில்தான் அமைச்சர் ஜி.ஆர்.அனிலும் நடிகர் மணியன்பிள்ளை ராஜூவை சந்தித்தார்" என தெரிவித்துள்ளனர். அனைவரின் வீட்டுக்கும் ரேஷன் பொருட்களை கொண்டு கொடுப்பார்களா என கேரளத்தில் விவாதம் கிளம்பியுள்ளது. Also Read: கேரளா: குறையாத கொரோனா... 16 நாள்களில் 50-ஐ கடந்த ஜிகா வைரஸ் பாதிப்பு!
http://dlvr.it/S50flF

Read More

திடீரென விசைப்படகில் ஏற்பட்ட தீ விபத்து: தத்தளித்த 14 மீனவர்களை மீட்ட சகமீனவர்கள்

கன்னியாகுமரி மாவட்டம் சின்னமுட்டம் மீன்பிடித் துறைமுகத்தில் இருந்து மீன்பிடிக்கச் சென்று திரும்பிய விசைப்படகில் தீ விபத்து ஏற்பட்டது. விசைப்படகில் இருந்த 14 மீனவர்களும் அதிர்ஷ்டவசமாக உயிர் தப்பினர். கன்னியாகுமரி மாவட்டம் சின்னமுட்டம் மீன்பிடித் துறைமுகத்தில் 300-க்கும் மேற்பட்ட விசைப்படகுகள் உள்ளன. சுமார் 20 கடல் மைல் தொலைவிற்கு மேல் சென்று மீன் பிடித்து வரும் மீனவர்கள், இரவில் கரைதிரும்புவது வழக்கம். இந்நிலையில் நேற்று சகாய அந்தோணி என்பவரது விசைப்படகில் 14 மீனவர்கள் மீன்பிடிக்கச் சென்று கரை திரும்பியுள்ளனர். அப்போது துறைமுகத்தில் இருந்து சுமார் 4 கடல் மைல் தொலைவில் வரும்போது படகு இன்ஜினில் திடீரென தீ பற்றியதாக கூறப்படுகிறது. இதைத் தொடர்ந்து காற்றின் வேகம் அதிகமாக இருந்த காரணத்தால் படகு முழுவதும் தீப்பற்றி எரியத் துவங்கியுள்ளது. இதனையடுத்து எரியும் விசை படகில் தத்தளித்த 14 மீனவர்களை, கரைதிரும்பி கொண்டிருந்த சகமீனவர்கள் மீட்டனர். இதனால் உயிர்சேதம் அதிர்ஷ்டவசமாக தவிர்க்கப்பட்டது. இதில், சுமார் 1 கோடி ரூபாய் மதிப்பிலான விசைப்படகு முற்றிலும் எரிந்து நாசமானது. இவ்விபத்து குறித்து கடலோர பாதுகாப்பு குழும போலீசார் விசாரணை மேற்கொண்டு வருகின்றனர்.
http://dlvr.it/S50GFq

Read More

சொந்த ஊரில் உள்ள 133 ஆண்டுகள் பழைமையான அரசுப் பள்ளி; தத்தெடுத்த கன்னட நடிகர் சுதீப்!

அன்ன சத்திரம் ஆயிரம் வைத்தல், ஆலயம் பதினாயிரம் நாட்டல், பின்னருள்ள தருமங்கள் யாவும், பெயர் விளங்கி ஒளிர நிறுத்தல், அன்னயாவினும் புண்ணியம் கோடி ஆங்கோர் ஏழைக்கு எழுத்தறிவித்தல்' - என்றார் மகாகவி பாரதி. அப்படி குழந்தைகளின் கல்விக்காக தனது முழு பங்களிப்பைத் தொடர்ந்து செய்துவருகிறார் இந்த நடிகர். `நான் ஈ' திரைப்படத்தில் மிரட்டல் வில்லனாக நடித்து தமிழ் மக்களின் இதயம் கவர்ந்தவர் கன்னட நடிகர் கிச்சா சுதீப். அரசு பள்ளி - Representational Image Also Read: `டிவியில் பாடம், வாட்ஸ்அப்பில் அசைன்மென்ட், பிறகு பரிசு!' - அரசுப்பள்ளி ஆசிரியர்களின் புது முயற்சி நடிகராக மட்டுமல்லாமல் சமூக அக்கறைக் கொண்ட மனிதராகவும் இவர் அறியப்படுகிறார். குறிப்பாக தனது `கிச்சா சுதீப் சாரிட்டபிள் ட்ரஸ்ட்’ மூலம் எளிய மக்களுக்கும், வறுமையான குடும்பப் பின்னணி கொண்ட குழந்தைகளின் கல்வி சார்ந்த விஷயங்களுக்கும் நிறைய உதவிகளைச் செய்து வருகிறார். இதற்கெல்லாம் முத்தாய்ப்பாக தனது சொந்த ஊரான ஷிவமோகாவில் உள்ள 133 ஆண்டு பழமையான அரசுப் பள்ளி ஒன்றை, சமீபத்தில் இவர் தனது அறக்கட்டளையின் `We for you’ என்கிற திட்டத்தின் கீழ் தத்தெடுத்திருப்பது சமூக ஊடகங்கள் உட்பட அனைத்து இடங்களிலும் பரவலான பாராட்டைப் பெற்றிருக்கிறது. இந்தப் பழமையான பள்ளியைச் சேர்ந்த அதிகாரிகளே சுதீப்பின் இந்தச் செயலால் நெகிழ்ந்து போயிருக்கின்றனர். இந்த அரசுப் பள்ளியின் அடிப்படைக் கட்டமைப்பு வசதிகளைப் புதுப்பிக்கும் பணியில் முதலில் கவனம் செலுத்தப் போவதாகவும், அடுத்தடுத்து கல்வியின் தரத்தை மேம்படுத்தும் நடவடிக்கைகளில் இறங்கப்போவதாகவும் சொல்லும் சுதீப், சரியானச் சூழலே குழந்தைகளைக் கல்வியில் கவனம் செலுத்த வைக்கும் என்றும் கூறுகிறார். இப்படி அரசுப் பள்ளியை கிச்சா சுதீப் தத்தெடுப்பது இது முதன்முறையல்ல. கடந்த ஆண்டு ஜூலை மாதம் கர்நாடகாவின் சித்ரதுர்கா மாவட்டத்தில் உள்ள நான்கு அரசுப் பள்ளிகளைத் தத்தெடுத்து அப்பள்ளிகளுக்குத் தேவையான கட்டமைப்பு வசதிகளை ஏற்படுத்திக் கொடுத்திருக்கிறார் இவர்.சுதீப் Also Read: குழந்தைத் தொழிலாளர்களான பள்ளி மாணவர்கள்; ₹50-க்கும் குறைவான கூலி; அதிர வைக்கும் ஆய்வு முடிவுகள்! போதிய அளவு மாணவர்கள் சேர்க்கை இல்லாததால் இந்தியா முழுவதிலும் உள்ள பல அரசுப் பள்ளிகள் மூடப்படும் நிலைக்குத் தள்ளப்படுகின்றன. இதன் காரணமாக, அரசுப் பள்ளியை மட்டுமே நம்பியிருக்கின்ற எளிய குடும்பத்தைச் சேர்ந்த பிள்ளைகளின் கல்விக் கனவுகள் பாதியிலேயே நின்றுவிடுகின்றன என்பதால், கிச்சா சுதீப்பைப் போல பல கன்னட திரைப் பிரபலங்கள் தங்கள் மாநிலத்தில் உள்ள அரசுப் பள்ளிகளைத் தத்தெடுத்து வருகின்றனர். நடிகை பிரனிதா சுபாஷ் மற்றும் இயக்குநர் ரிஷப் ஷெட்டி போன்றோரும் இதில் அடக்கம் என்பது குறிப்பிடத்தக்கது.
http://dlvr.it/S4y8gg

Read More

22 முறை கேப் ஓட்டுநரை அறைந்த பெண்... இரண்டு நாள்களாக டிரெண்டாகும் #ArrestLucknowGirl - என்ன பிரச்னை?

உத்தரப்பிரதேச மாநிலம், லக்னோவில் பெண் ஒருவர், டாக்ஸி ஓட்டுநரைக் கன்னத்தில் அறையும் வீடியோ ஒன்று சமூக வலைதளங்களில் வைரலானது. இதையடுத்து சமூக வலைதளங்களில் பல்வேறுவிதமான விவாதங்கள் எழுந்திருக்கின்றன. முதலில் வெளியான வீடியோ! சுமார் இரண்டு நிமிடம் ஓடும் வீடியோ ஒன்று சமூக வலைதளங்களில் நேற்று வெளியானது. வெளியான சில மணி நேரங்களிலேயே இந்தியா முழுவதும் அந்த வீடியோ வேகமாகப் பரவியது. லக்னோவின் ஆவாத் பகுதியிலுள்ள சிக்னல் அருகே எடுக்கப்பட்ட அந்த வீடியோவில், பெண் ஒருவர், டாக்ஸி ஓட்டுநர் ஒருவரைக் கடுமையாகத் தாக்குகிறார். இந்தச் சம்பவத்தைக் கண்ட டிராஃபிக் கான்ஸ்டபிள் அந்தப் பெண்ணை தடுக்க முயல்கிறார். ஆனால், அதையெல்லாம் கண்டுகொள்ளாத அந்தப் பெண், தன்னை அந்த ஓட்டுநர் இடித்துவிட்டதாகக் கூறி 22 முறை அந்த ஓட்டுநரின் கன்னத்தில் எகிறி எகிறி பளார் என்று அறைகிறார். முதலில் அமைதியாக இருந்த ஓட்டுநர், பின்னர் `பெண் போலீஸைக் கூப்பிடுங்கள்’ என்கிறார். இதற்கிடையில் அந்த ஓட்டுநர் தரையில் கிடக்கும் தனது செல்போனைக் கையிலெடுக்கிறார்.#ArrestLucknowGirl Also Read: 9 ஆண்டுகள் டெலிகாம் அனுபவம்; OLX-ல் விற்பனை செய்தவர்களிடம் Paytm மூலம் மோசடி - சிக்கிய உ.பி ஆசாமி! இந்தப் பிரச்னையால் அந்தப் பகுதியில் போக்குவரத்து நெரிசல் ஏற்பட்டிருப்பதும் அந்த வீடியோவில் பதிவாகியிருக்கிறது. வீடியோவின் இரண்டாம் பாதியில், அங்கிருந்த ஒருவர் வந்து அந்தப் பெண்ணைத் தடுக்க முயல்கிறார். அவரிடம் `என் செல்போனை அந்தப் பெண் உடைத்துவிட்டார்' என்கிறார் அந்த ஓட்டுநர். ஆனால், தடுக்க வந்த நபரையும் மீறி அந்த ஓட்டுநரின் தலையில் அடிக்கிறார் அந்தப் பெண். அந்த வீடியோ முடியும் தறுவாயில், ஓட்டுநரைத் தொட வேண்டாம் என தடுக்க வந்த நபர் எச்சரிக்க, அவரையும் தாக்குகிறார் அந்தப் பெண். அதோடு அந்த வீடியோ முடிவடைகிறது. இந்த வீடியோ வைரலானதை அடுத்து, `இவ்வளவு அடியையும் வாங்கிக்கொண்டு அமைதியாக நிற்கிறார் அந்த ஓட்டுநர். ஒருவேளை அவர் அந்தப் பெண்ணை அவர் இடித்திருந்தால்கூட, போலீஸாரிடம் அந்தப் பெண் புகாரளித்திருக்கலாம். எப்படி அவரை நடுரோட்டில்வைத்து அனைவரும் பார்க்கும் வண்ணம் அடிக்கலாம்' என்று சொல்லி அந்தப் பெண்ணுக்கு எதிராகக் கொதித்தெழுந்தனர் நெட்டிசன்கள். இதற்கிடையில் அந்த டாக்ஸி ஓட்டுநர்மீது காவல்துறை வழக்கு பதிவு செய்திருப்பதாகச் செய்திகள் வெளியாக, இன்னும் பெரிதாக மாறியது இந்த விவகாரம். தொடர்ந்து, #ArrestLucknowGirl என்கிற ஹேஷ்டேக்கை பயன்படுத்தி அந்தப் பெண்ணை கைதுசெய்யுமாறு சமூக வலைதளங்களில் கோரிக்கைகள் எழுந்தன. உ.பி-யைச் சேர்ந்த பெண் ஒருவர், ``ஒரு பெண் தான் செய்த குற்றம் நிரூபணமாகும் வரை குற்றமற்றவர். அதே ஒரு ஆண், தான் குற்றமற்றவர் என நிரூபிக்கும் வரை குற்றவாளி. இந்தநிலை எப்போது மாறப்போகிறதோ... இந்தப் பெண் செய்தது தவறு. இது பெண்ணியம் அல்ல'' என்று பதிவிட்டிருக்கிறார்.லக்னோ பெண், டாக்ஸி ஓட்டுநர்தொடர்ந்து, இந்தியா முழுவதும் இந்த வீடியோ பரவிய காரணத்தால், #ArrestLucknowGirl என்கிற ஹேஷ்டேக் இந்திய டிரெண்டிங்கில் பல மணி நேரம் முதலிடத்திலேயே இருந்தது. கிட்டத்தட்ட இரண்டு நாள்களாக இந்திய டிரெண்டிங்கிலேயே இருந்தது இந்த ஹேஷ்டேக். இதன் விளைவாக ஓட்டுநரைத் தாக்கிய அந்தப் பெண்ணின் மீதும் முதல் தகவல் அறிக்கை தாக்கல் செய்திருக்கிறது உ.பி காவல்துறை. சிசிடிவி காட்சிகள்! இதற்கிடையில் அந்த சிக்னலில் பொருத்தப்பட்டிருக்கும் சிசிடிவி-யின் காட்சிகள் வெளியாயின. அந்த சிசிடிவி காட்சிகளைப் பார்த்த பின்னர், பெண்ணின் பக்கமும் சில நியாயங்கள் இருக்கின்றன என்பது போன்ற கருத்துகளும் சமூக வலைதளங்களில் பதிவிடப்பட்டுவருகின்றன. அந்த சிசிடிவி காட்சியில், ரெட் சிக்னல் விழுந்த பின்னும் சுமார் 20-க்கும் மேற்பட்ட வாகனங்கள் சிக்னலில் நிற்காமல் சென்று கொண்டிருப்பது பதிவாகியிருக்கிறது. அதன் பிறகு, அந்தப் பெண் ஜீப்ரா கிராஸிங்கில் சாலையைக் கடக்கிறார். அப்போதும் வாகனங்கள் வந்துகொண்டேதான் இருக்கின்றன. முக்கால்வாசி சாலையைக் கடக்கும் தறுவாயில் டாக்ஸி ஒன்று வேகமாக வந்து அந்தப் பெண் அருகே சடாரென்று பிரேக் அடிக்கிறது. அந்த டாக்ஸி பெண்ணின் மீது மோதியதா என்பது அந்த சிசிடிவி காட்சியில் சரியாகத் தெரியவில்லை. ஆனால், அந்தப் பெண் கீழே விழவில்லை என்பது தெரிகிறது. பின்னர் அந்தப் பெண் டாக்ஸியின் கதவைத் திறந்து ஓட்டுநரின் செல்போனை எடுத்து சாலையில் போட்டுடைக்கிறார். தொடர்ந்து அவரைத் தாக்கவும் செய்கிறார். இந்த சிசிடிவி காட்சிகள் வெளியான பிறகு இரண்டு பேரின் மீதும் தவறிருக்கிறது என்பது போன்ற கருத்துகள் சமூக வலைதளங்களில் பதிவிடப்பட்டன. ``ரெட் சிக்னலில் நிற்காமல் வேகமாகச் செல்ல முயன்றது அந்த ஓட்டுநரின் தவறு. அதற்காகச் சட்டத்தை தன் கையிலெடுத்துக்கொண்டு, ஓட்டுநரின் செல்போனை உடைத்து, அவரைப் பலமுறை அந்தப் பெண் தாக்கியதும் தவறு. இருவருமே தண்டிக்கப்பட வேண்டியவர்கள்'' என்று நெட்டிசன்கள் பதிவிட்டு வருகின்றனர். Here's the full video. Ab batao galti kiski hai? Please RT and tag @Uppolice#ArrestLucknowGirl pic.twitter.com/mvLVHMv1kT— Shahcastic - Mota bhai (@shahcastic) August 2, 2021 Also Read: கருணாநிதிக்கு பரிசு; ஜெயலலிதாவுடன் கன்னட உரையாடல்; 13 ஆண்டுகளில் முதல்வர் -யார் இந்த பசவராஜ் பொம்மை?இந்த சிசிடிவி காட்சிகளை ஷேர் செய்த குஜராத்தைச் சேர்ந்த ஆண் ஒருவர், ``அந்தப் பெண் செய்தது சரி என்று சொல்லவில்லை. ஆனால், அந்த ஆண் நபருக்கு இவ்வளவு ஆதரவு கிடைத்ததை ஏற்றுக்கொள்ள முடியாது. ஆம், அவர் காரைச் சரியாக நிறுத்திவிட்டார். ஒருவேளை நிறுத்தத் தவறியிருந்தால் அந்தப் பெண்ணின் கதி? ரெட் சிக்னல் விழுந்த பிறகு அவரும் சரி, மற்றவர்களும் சரி வாகனங்களை நிறுத்தாமல் சென்றுகொண்டிருக்கின்றனர். அங்கிருந்த போக்குவரத்துக் காவலரும் வாகனங்களை நிறுத்த முயலவில்லை. ரெட் சிக்னலை மீறிச் சென்றவர்கள் அனைவரின் மீதும் வழக்கு பதியப்பட வேண்டும்'' என்று ட்விட்டரில் பதிவிட்டிருக்கிறார்.
http://dlvr.it/S4x8xR

Read More

மும்பை விமான நிலையத்தில் நிறுவப்பட்ட அதானியின் பெயர்ப் பலகை; அப்புறப்படுத்திய சிவசேனாவினர்!

மும்பை விமான நிலையத்தை ஜிவிகே நிறுவனம் பராமரித்துவந்தது. ஆனால், அந்த நிறுவனத்திடமிருந்து அதானி நிறுவனம் மும்பை விமான நிலையத்தின் பெரும்பாலான பங்குகளை விலைக்கு வாங்கிவிட்டது. ஆரம்பத்தில் மும்பை விமான நிலையத்தின் பங்குகளை விற்பனை செய்ய ஜிவிகே நிறுவனம் மறுத்தது. பின்னர் நிர்பந்தம் காரணமாக அதானி நிறுவனத்துக்குப் பங்குகளைக் கடந்த சில மாதங்களுக்கு முன்பு விற்பனை செய்துவிட்டது. கடந்த மாத தொடக்கத்தில் அதானி நிறுவனம், மும்பை விமான நிலையத்தைத் தனது கட்டுப்பாட்டில் எடுத்துக்கொண்டது. அதானி நிறுவனம் நாடு முழுவதும் எட்டு விமான நிலையங்களைத் தனது பராமரிப்பில் வைத்திருக்கிறது. மும்பை விமான நிலையத்தைத் தனது கட்டுப்பாட்டில் எடுத்த அதானி நிறுவனம், விமான நிலையத்துக்கு அருகில் மேற்கு எக்ஸ்பிரஸ் நெடுஞ்சாலையிலிருந்த, `சத்ரபதி சிவாஜி விமான நிலையம்’ என்ற பெயர்ப் பலகையை அகற்றிவிட்டு, தனது பெயர்ப் பலகையை வைத்ததாகச் சொல்லப்படுகிறது. Also Read: மகாராஷ்டிரா: `நேரம் வந்தால் சேனா பவனை இடிப்போம்’ -பாஜக உறுப்பினர் கருத்துக்கு உத்தவ் தாக்கரே பதிலடிஅகற்றப்படும் பெயர் அகற்றப்படுகிறது இதனால் ஆத்திரமடைந்த சிவசேனாவினர் அந்தப் பெயர்ப் பலகையை அங்கிருந்து அப்புறப்படுத்தினர். அதோடு ஏற்கெனவே இருந்த, `சத்ரபதி சிவாஜி மகாராஜ் சர்வதேச விமான நிலையம்’ என்ற பெயர்ப் பலகையை வைத்தனர். இது குறித்து கருத்து தெரிவித்துள்ள அதானி ஏர்போர்ட்ஸ் ஹோல்டிங் லிமிடெட், "சத்ரபதி சிவாஜி சர்வதேச விமான நிலையம் என்று இருந்த பெயர்ப் பலகையை மாற்றவில்லை. இதற்கு முன்பு விமான நிலையத்தை நிர்வகித்த நிறுவனத்தின் பெயர்ப் பலகை இருந்தது. அதை அகற்றிவிட்டு அதானி நிறுவனத்தின் பெயர்ப் பலகையை வைத்தோம்" என்று தெரிவித்துள்ளது. ஏற்கெனவே மும்பை சர்வதேச விமான நிலையத்தின் தலைமையகத்தை அதானி நிறுவனம் குஜராத்துக்கு மாற்றப்போவதாகச் செய்தி வெளியானது. அதை அதானி நிறுவனம் மறுத்துள்ளபோதிலும் இந்தச் செய்தியால் சிவசேனாவினர் கொதித்துபோயிருக்கின்றனர். அப்படிப்பட்ட நேரத்தில் அதானி நிறுவனத்தின் பெயர்ப் பலகை விமான நிலையத்துக்கு அருகில் வைக்கப்பட்டதால் மேலும் கொதிப்படைந்துள்ளனர். இதற்கிடையே நவிமும்பையில் புதிய விமான நிலையம் கட்டும் பணி அடுத்த மாதம் தொடங்கும் என்று அதானி நிறுவனம் தெரிவித்துள்ளது.
http://dlvr.it/S4wmJy

Read More

மும்பை: பங்குச்சந்தையில் முதலீடு; பெரும் கடன்! - பணியாற்றிய வங்கியில் கொள்ளையடித்த முன்னாள் மேலாளர்

மும்பை அருகிலுள்ள விரார் ஐசிஐசிஐ வங்கியில் கடந்த வாரம் மேலாளரைக் கொலை செய்துவிட்டு கொள்ளையடிக்க முயன்றது தொடர்பாக அனில் துபே என்பவர் கைதுசெய்யப்பட்டார். அவருடைய கூட்டாளி தலைமறைவாக இருக்கிறார். அவரையும் கைதுசெய்ய போலீஸார் தேடிவருகின்றனர். கொள்ளையைத் தடுக்க முயன்ற வங்கி மேலாளர் யோகிதா கழுத்தறுத்து கொலை செய்யப்பட்டார். வங்கியின் கேஷியர் ஸ்ரத்தா படுகாயத்துடன் சிகிச்சை பெற்றுவருகிறார். கைதுசெய்யப்பட்ட அனில் துபே ஆக்ஸிஸ் வங்கியில் மேலாளராகப் பணியாற்றிவந்தார். அதற்கு முன்பு ஐசிஐசிஐசி வங்கியில்தான் மேலாளராக பணியாற்றிவந்தார். தப்பிச் செல்ல நிறுத்தியிருந்த கார் அவரிடம் போலீஸார் விசாரணை நடத்தியபோது பல திடுக்கிடும் தகவல்கள் வெளிவந்தன. துபே ஏராளமானோரிடம் கோடிக்கணக்கில் பணம் கடன் வாங்கி பங்குச்சந்தையில் முதலீடு செய்திருக்கிறார். ஆனால், அந்த பணம் முழுவதும் நஷ்டமடைந்துவிட்டது. இது தவிர வேறு சில தொழில்கள் செய்திருக்கிறார். அவையும் நஷ்டத்தில் முடிந்துள்ளன. இதனால் கடனாளியாக மாறிய துபே அதை எப்படித் திரும்ப அடைப்பது என்று தெரியாமலிருந்தார். இதற்காக, தான் பணியாற்றிய வங்கியிலேயே கொள்ளையடிக்கத் திட்டமிட்டார். ஆனால் அவ்வாறு கொள்ளையடித்தால் தெரிந்துவிடும் என்பதால் அந்தத் திட்டத்தை கைவிட்டுள்ளார். அதன் பிறகுதான் ஒரு மாதமாக ஐசிஐசிஐ வங்கியில் கொள்ளையடிக்க திட்டம் தீட்டிவந்ததாக தெரிவித்தார். அந்த வங்கியில் இரண்டு பெண் ஊழியர்கள் மட்டுமே இருப்பார்கள் என்றும், அவர்களை எளிதில் சமாளித்துவிடலாம் என்றும் கருதியே அந்த வங்கியைக் குறிவைத்து கொள்ளை முயற்சியில் ஈடுபட்டிருக்கிறார். மொபைல் ஆப் மூலம் பங்குச்சந்தையில் முதலீடு செய்ததாகத் தெரிவித்துள்ளார். இதனால் அவரது பணப் பரிவர்த்தனை குறித்து போலீஸார் ஆய்வு செய்துவருகின்றனர். Also Read: அம்பத்தூர்: வங்கி மேலாளரின் அலட்சியம்; ஏமாற்றிய நகை மதிப்பீட்டாளர்? -தொடர் சர்ச்சையில் யூனியன் வங்கி துபேயுடன் பணியாற்றி வந்தவரிடம் இது குறித்துக் கேட்டதற்கு, `பங்குச்சந்தையில் பணத்தை இழந்த பிறகு சற்று பதற்றமாகத்தான் இருந்தார். ஆனால் இது போன்ற ஒரு குற்றச்செயலில் ஈடுபடுவார் என்று நான் நினைத்துக்கூட பார்க்கவில்லை. எப்போதும் முதலீடுகளைப் பற்றியே பேசிக்கொண்டிருப்பார்’ என்று தெரிவித்தார். கொள்ளை முயற்சியில் ஈடுபட்ட தினத்தன்று, தான் பணியாற்றிய வங்கியில் விடுமுறை எடுத்திருந்தார். கொள்ளை நடந்த தினத்தன்று நடந்த சம்பத்தை நேரில் பார்த்த ஒருவர் சம்பவத்தை நினைவுகூர்கையில், சம்பவத்தன்று மாலை வங்கிக்கு வெளியில் ஒருவர் இரண்டு பெட்டிகளுடன் வேகமாக வெளியில் ஓடி வந்தார். அதேநேரம், உடலில் ரத்தக்கறை படிந்த நிலையில், பெண் ஒருவர் வங்கிக்குள்ளிருந்து, `காப்பாற்றுங்கள்’ என்று சத்தம் போட்டுக் கத்தினார். உடனே ஏதோ விபரீதம் நடந்திருப்பதை உணர்ந்த நான் ஓடிச்சென்று இரும்புப்பெட்டியுடன் சென்ற நபரை மடக்கிப்பிடித்தேன். உடனே `நான் வங்கியின் பெரிய அதிகாரி... உடனே போக வேண்டும்’ என்று அந்த நபர் தெரிவித்தார். என்னுடன் வேறு சிலரும் சேர்ந்து அந்த நபரை வங்கிக்கு இழுத்து வந்தோம். வங்கியில் இரண்டு பெண்கள் ரத்த வெள்ளத்தில் கிடந்தனர். Also Read: மும்பை: வங்கியில் கொல்லப்பட்ட பெண் மேலாளர்! - சிக்கிய முன்னாள் மேலாளர் உடனே அந்த நபரை அனைவரும் சேர்ந்து அடித்தனர்” என்றார். அனில் துபேயைப் பிடித்த பக்கத்துக் கடைக்காரர் அனில் துபேயிடமிருந்து பிடுங்கிய இரும்புப் பெட்டியை பத்திரமாக அருகிலுள்ள ஏடிஎம் சென்டர் அருகில் வைத்தார். சம்பவ இடத்தில் நூற்றுக்கணக்கானோர் கூடினர். பொதுமக்கள் அடித்ததில் அவரது மொபைல்போன் காணாமல் போய்விட்டது. அந்த போனை கண்டுபிடித்தால் மேலும் சில முக்கிய ஆதாரங்கள் கிடைக்கும் என்று போலீஸார் கருதுகின்றனர். இது குறித்து டி.ஜி.பி பிரசாந்த் கூறுகையில், ``குற்றவாளி அனில் துபே வாங்கிய கடனை திருப்பிக் கொடுக்க முடியாமல்போனதால் விரக்தியில் இது போன்ற காரியத்தில் ஈடுபட்டிருக்கிறார். உத்தரப்பிரதேசத்தைச் சேர்ந்த அனில் துபே, பத்து ஆண்டுகளுக்கு முன்பு மும்பை வந்து தனியார் வங்கி ஒன்றில் வேலைக்குச் சேர்ந்திருக்கிறார். நாலாசோபாராவில் குடும்பத்துடன் தங்கியிருக்கும் அனில் துபே வீட்டுக்கு போலீஸார் சென்ற பிறகுதான் அவரது குடும்பத்துக்கே இது குறித்து தெரியவந்தது” என்று தெரிவித்தார்.
http://dlvr.it/S4thKg

Read More

``அவரையே திருமணம் செய்துகொள்கிறேன்!"- சிறார் வதை செய்த பாதிரியாருக்காக பாதிக்கப்பட்ட பெண் ஜாமின் மனு

கேரள மாநிலம் கண்ணூர் மாவட்டம் கொட்டியூர் சென் செபாஸ்டின் சர்ச் பாதிரியாராக இருந்தவர் ரோபின் வடக்கஞ்சேரி. மானந்தவாடி மறை மாவட்டத்துக்குட்பட்டது இந்த சர்ச். 2016-ம் ஆண்டு, சர்ச்சுக்கு வழக்கமாக வரும் 12-ம் வகுப்பு மாணவி ஒருவரிடம் கம்ப்யூட்டரில் டேட்டா என்ட்ரிக்காக உதவ வேண்டும் எனக்கூறி தனது அறைக்கு அழைத்துள்ளார் பாதிரியார் ரோபின் வடக்கஞ்சேரி. பின்னர் தனது அறையில் மாணவியை சிறார் வதை செய்துள்ளார். இதனால் சிறுமி கர்ப்பம் அடைந்தார். சைல்ட் லைனுக்குக் கிடைத்த ரகசியத் தகவலின் அடிப்படையில் பாதிரியார் ரோபின் வடக்கஞ்சேரியின் மீது போக்ஸோ பிரிவின் கீழ் வழக்குப்பதிவு செய்யப்பட்டது. இதைத் தொடர்ந்து, மாணவியை ரகசிய இடத்தில் மறைத்து வைத்து வழக்கை ஒன்றும் இல்லாமல் ஆக்கும் முயற்சிகள் சபையில் இருந்தும், வேறு சிலர் மூலமாகவும் நடந்தன. இதற்கிடையில் 2017-ம் ஆண்டு பிப்ரவரி மாதம் 7-ம் தேதி தலசேரி தனியார் மருத்துவமனையில் சிறுமி குழந்தை பெற்றெடுத்தார்.sexual harassment Also Read: பாரதமாதா குறித்து சர்ச்சைப் பேச்சு; 7 பிரிவுகளில் வழக்கு! - பாதிரியார் ஜார்ஜ் பொன்னையா கைது சிறுமி பெற்றெடுத்த குழந்தையை, ஒரு கன்னியாஸ்திரி மற்றும் மற்றொரு பாதிரியார் ஆகியோர் மறைத்துவைக்க முயன்ற சம்பவம் அந்நேரத்தில் நடந்தது. இதனால் இந்த விவகாரம் பெரும் சர்ச்சையாக உருவெடுத்தது. இதையடுத்து 2017 பிப்ரவரி 28-ம் தேதி பாதிரியார் ரோபின் வடக்கஞ்சேரி கைதுசெய்யப்பட்டார். மேலும் குழந்தையை மறைத்துவைக்க முயன்ற கன்னியாஸ்திரி, மற்றொரு பாதிரியார் ஆகியோரும் இந்த வழக்கில் சேர்க்கப்பட்டனர். இதற்கிடையில் சிறார் வதை சம்பவத்தில் பாதிரியார் ரோபின் வடக்கஞ்சேரியை காப்பாற்ற சபையில் உள்ளவர்கள் முயற்சி செய்துள்ளனர். பாதிரியார் ரோபின் வடக்கஞ்சேரிக்கு ஆதரவாக சிறுமியின் பெற்றோரும் செயல்பட்டனர். ஒரு கட்டத்தில் பாதிரியாரை காப்பாற்றுவதற்காக, சிறுமியின் தந்தையே அந்தப் பழியை ஏற்க முன்வந்தார். மகளை சிறார் வதை செய்ததாக சிறுமியின் தந்தை கூறினார். அந்தச் சிறுமியையும் மிரட்டி அவ்வாறு கூற வைத்தனர். இதற்கிடையில் காப்பகத்தில் தங்கவைக்கப்பட்ட சிறுமியிடம் அதிகாரிகள் விசாரணை நடத்தினர். அப்போது, தன்னை சிறார் வதை செய்தது தன் அப்பா எனச் சிறுமி கூறினாள். விசாரணை அதிகாரிகளோ, இந்த குற்றத்தை செய்தவர்களுக்கு 20 ஆண்டு சிறைத்தண்டனை கிடைக்கும் எனக் கூறினர். இதையடுத்து தன் குழந்தைக்கு தந்தை பாதிரியார் ரோபின் வடக்கஞ்சேரி என்பதை ஒப்புக்கொண்டார். மேலும் டி.என்.ஏ பரிசோதனையிலும் இது உறுதியானது.பாதிரியார் ரோபின் வடக்காஞ்சேரி இதையடுத்து மானந்தவாடி மறைமாவட்டத்தில் இருந்து பாதிரியார் ரோபின் வடக்கஞ்சேரி நீக்கப்பட்டார். ``விசாரணைக்கு இடையே மாணவிக்கு 18 வயது ஆகிவிட்டது, அவரை நானே திருமணம் செய்துகொள்கிறேன், குழந்தையையும் வளர்க்கிறேன்'' எனக்கூறி தண்டனையில் இருந்து தப்பிக்க முயற்சி செய்தார் பாதிரியார். ஆனால் அதெல்லாம் எடுபடவில்லை. இதையடுத்து பாதிரியாருக்கு 20 ஆண்டுகள் கடுங்காவல் தண்டனை விதித்து தலசேரி போக்ஸோ கோர்ட் தீர்ப்பளித்தது. Also Read: `5 குழந்தைகள் பெற்றால் குடும்ப நலத்திட்ட உதவிகள்!' - கேரள கத்தோலிக்க சபையின் சர்ச்சை அறிவிப்பு இந்நிலையில் மாணவிக்கு 18 வயது கடந்த நிலையில், பாதிரியார் ரோபின் வடக்கஞ்சேரியை திருமணம் செய்ய விரும்புவதாகவும், திருமணத்துக்காக ரோபின் வடக்கஞ்சேரிக்கு ஜாமின் வழங்க வேண்டும் எனவும் பாதிக்கப்பட்ட பெண் சுப்ரீம் கோர்ட்டில் மனுத்தாக்கல் செய்துள்ளார். ஏற்கெனவே கேரள ஐகோர்ட்டில் இந்த மனுவை தாக்கல் செய்தபோது, கோர்ட் மனுவை தள்ளுபடி செய்தது குறிப்பிடத்தக்கது. சிறுமியாக இருக்கும்போது தன்னை சிறார் வதை செய்த பாதிரியாரை திருமணம் செய்ய விரும்புவதாக இளம் பெண் அறிவித்திருப்பது பரபரப்பை கிளப்பியுள்ளது. இந்த நிலையில் பாதிரியார் ரோபின் வடக்கஞ்சேரியும் பாதிக்கப்பட்ட பெண்ணை திருமணம் செய்வதற்காக ஜாமின் வேண்டும் என சுப்ரீம் கோர்ட்டில் மனுதாக்கல் செய்துள்ளார். இந்த வழக்கு இன்று விசாரணைக்கு வர உள்ளது.
http://dlvr.it/S4shTK

Read More