தமிழகத்தில் ஒரேநாளில் 1,956 பேருக்கு கொரோனா பாதிப்பு

தமிழகத்தில் ஒரேநாளில் 1,956 பேருக்கு கொரோனா பாதிப்பு உறுதி செய்யப்பட்டுள்ளது. சென்னையில் ஏற்கெனவே 194 பேருக்கு தொற்று உறுதி செய்யப்பட்ட நிலையில், இன்று தொற்று எண்ணிக்கை குறைந்துள்ளது. சென்னையில் ஒரேநாளில் 187 பேருக்கு கொரோனா பாதிப்பு உறுதிசெய்யப்பட்டுள்ளது என அமைச்சர் மா.சுப்பிரமணியன் தெரிவித்தார். மேலும், கொரோனா இன்னும் ஒழியவில்லை எனவும் தனிமனித இடைவெளி கேள்விக்குறியாகி உள்ளது எனவும் அமைச்சர் தெரிவித்தார்.
http://dlvr.it/S5HZdl

Read More

தமிழ்நாடு காங்கிரஸ் கமிட்டியின் முன்னாள் தலைவர் திண்டிவனம் ராமமூர்த்தி காலமானார்

தமிழ்நாடு காங்கிரஸ் கமிட்டியின் முன்னாள் தலைவர் திண்டிவனம் ராமமூர்த்தி உடல்நலக்குறைவால் காலமானார். அவருக்கு வயது 87.   திண்டிவனம் ராமமூர்த்தி 1981 முதல் 1984 வரை தமிழக எதிர்க்கட்சித் தலைவராக இருந்துள்ளார். 1984 முதல் 1990 வரை இந்திய நாடாளுமன்றத்தில் மாநிலங்களவையில் பரிந்துரைக்கப்பட்ட உறுப்பினராக இருந்தார்.   2011 சட்டசபைத் தேர்தலின்போது காங்கிரஸ் கட்சியிலிருந்து விலகி தனிக் கட்சி ஆரம்பித்தார் திண்டிவனம் ராமமூர்த்தி. இதையடுத்து அதிமுக பொதுச் செயலாளர் ஜெயலலிதாவை சந்தித்து தனது ஆதரவைத் தெரிவித்தார். ஆனால் சில மாதத்தி்ல் தனது தனிக் கட்சியை கலைத்துவிட்டு சரத் பவார் தலைமையிலான தேசியவாத காங்கிரஸ் கட்சியில் சேர்ந்தார். அவருக்கு தமிழக பிரிவின் தலைவர் பதவியைத் தந்தார் பவார். அடுத்த சில மாதங்களிலேயே ராமமூர்த்தி தலைமையிலான கமிட்டியே கலைக்கப்பட்டு விட்டதாக அந்த கட்சியின் அகில இந்திய கமிட்டி அறிவித்தது குறிப்பிடத்தக்கது.   இன்று காலமான திண்டிவனம் ராமமூர்த்தியின் உடல் சென்னை கிழக்கு கடற்கரை சாலை இல்லத்தில் அஞ்சலிக்காக வைக்கப்பட்டுள்ளது.
http://dlvr.it/S5G3pq

Read More

காதலி கோபத்தில் சொன்ன வார்த்தை; மும்பை வாலிபர் எடுத்த விபரீத முடிவு!

மும்பை தானே பகுதியைச் சேர்ந்த அங்குஷ் பவார் என்ற 27 வயது வாலிபர் 3 ஆண்டுகளாக ஒரு பெண்ணைக் காதலித்து வந்தார். மருத்துவமனை ஒன்றில் வார்டு பாயாக வேலை செய்யும் பவார் தனது காதலியைத் திருமணம் செய்ய நினைத்தார். சித்தரிப்பு படம் ஆனால் அவரது காதலி சில காலம் செல்லட்டும் எனக் கூறியுள்ளார். இது தொடர்பாக அடிக்கடி இருவருக்கும் இடையே தகராறு ஏற்படுவதுண்டு. வழக்கம் போல் மீண்டும் அவர்களுக்குள் தகராறு ஏற்பட்டது. இந்த சண்டையில் ''உன்னை திருமணம் செய்துகொள்ள முடியாது'' என்றும், ''இறந்து போ'' என்றும் காதலி பவாரிடம் தெரிவித்துள்ளதாகச் சொல்லப்படுகிறது. இதனால் மிகவும் மனவேதனை அடைந்த பவார் தற்கொலை செய்துகொள்ள முடிவு செய்தார். தற்கொலைக்கு முன் பேஸ்புக் லைவில் தனது காதலி தன்னை திருமணம் செய்து கொள்ள மறுத்துவிட்டதாகவும், அவரை மூன்று ஆண்டுகளாக காதலித்து வந்ததாகவும் தெரிவித்தார். பின்னர் அவர் அவர் தூக்குப் போட்டு தற்கொலை செய்து கொண்டார். அச்சம்பவம் குறித்து போலீஸார் வழக்கு பதிவு செய்து விசாரித்து வருகின்றனர். காதலி கோபத்தில் சொன்ன வார்த்தையை கேட்டு பவார் தற்கொலை செய்திருப்பது அனைவருக்கும் அதிர்ச்சியை ஏற்படுத்தி இருக்கிறது. Also Read: சாதியால் வாழவிடமாட்டார்கள்; நம்மைப் பிரித்துவிட்டார்கள்!'- காதலன் தற்கொலை, உயிர் தப்பிய காதலி இதே போன்று மும்பையில் வாட்ஸ்ஆப் வீடியோ சாட்டிங்கில் தனது காதலி தன்னை திருமணம் செய்ய மறுத்ததால் 19 வயது வாலிபர் ஒருவர் தற்கொலை செய்து கொண்டார். கல்லூரியில் படிக்கும் ரஞ்சித் என்ற அந்த வாலிபர் கல்லூரியில் இருந்து வரும் போதே தனது காதலியிடம் வீடியோ காலில் சாட்டிங் செய்து கொண்டு வந்தார். அவரது காதலி வீடியோ காலில் அவரை திருமணம் செய்ய முடியாது என்று தெரிவித்துள்ளார். திருமணம் செய்யவில்லை எனில் தற்கொலை செய்து கொள்வேன் என்றும் தெரிவித்தார். அப்படி இருந்தும் அப்பெண் தனது முடிவில் உறுதியாக இருந்தார். இதனால் வீட்டிற்கு வந்த ரஞ்சித் வீட்டில் தூக்கு போட்டு தற்கொலை செய்து கொண்டார். அவரது மொபைலை சோதனை செய்து பார்த்த போதுதான் இந்த விபரம் தெரிய வந்தது.
http://dlvr.it/S5FR2j

Read More

இந்திய தங்க தாகத்தை தணித்த நீரஜ் சோப்ரா: ஒலிம்பிக்கில் புதிய வரலாறு எழுதிய பெருமித தருணம்

ஒலிம்பிக் வரலாற்றில், சுதந்திர இந்தியாவில் இந்தியாவுக்கு தடகள பிரிவில் முதல் பதக்கத்தை வென்று தந்துள்ளார் ஈட்டி எறிதல் வீரர் நீரஜ் சோப்ரா... அதுவும் தங்கப்பதக்கமாக. இந்த அற்புத தருணங்களின் தொகுப்பு இது... ஒலிம்பிக் வரலாற்றில் தடகளப் பிரிவில் சுதந்திரத்துக்குப் பின் இந்தியா பதக்கம் வென்றதே இல்லை. அதை எதிர்பார்த்தப்படியே மாற்றி எழுதியுள்ளார் இந்தியாவின் நீரஜ் சோப்ரா. முதன் முறையாக ஒலிம்பிக் போட்டியில் பங்கேற்ற அவர் ஈட்டி எறிதல் பிரிவில் தகுதி சுற்று போட்டியில் முதல் வாய்ப்பிலேயே, டோக்கியோ ஒலிம்பிக் போட்டியில் தகுதிசுற்றில் யாரும் எதிர்பாராத வகையில், தனது முதல் வாய்ப்பிலேயே 86.65 மீட்டர் தூரம் எறிந்து இறுதி சுற்றுக்கு தகுதிப் பெற்றார். இறுதிப் போட்டியில் முதல் வாய்ப்பிலே 87.03 மீட்டர் தூரம் எறிந்து அசத்தினார். 2-வது வாய்ப்பில் ஈட்டியை எறிந்துவிட்டு திரும்பி பார்க்காமலே கை உயர்த்தி கொண்டாடினார் நீரஜ் சோப்ரா. அதில், அவர் 87.58 மீட்டர் தூரம் எறிந்திருந்தார். தங்கம் வெல்வார் என எதிர்பார்க்கப்பட்ட ஜெர்மனி வீரர் வெட்டர் காயமடைந்து பாதியிலேயே வெளியேறினார். நீரஜ் சோப்ராவுக்கு செக் குடியரசு வீரர்கள் இருவர் சவால் விடுத்தனர். எனினும் அவர்களால், நீரஜ் சோப்ராவின் 87 புள்ளி ஐந்து எட்டு மீட்டர் தூரத்தை தாண்ட முடியவில்லை. இதன் மூலம் ஒலிம்பிக் வரலாற்றில், சுதந்திர இந்தியாவில் இந்தியாவுக்கு தடகள பிரிவில் முதல் பதக்கத்தை வென்று தந்துள்ளார் நீரஜ் சோப்ரா. அதுவும் தங்கப்பதக்கமாக. திருத்தி எழுதிய புதிய சரித்திரம்: தேசத்தின் தங்க தாகத்தை தணித்த நீரஜ் சோப்ரா சுதந்திர இந்தியாவில், ஒலிம்பிக் போட்டியில் தடகள பிரிவில் இந்தியா பதக்கம் வென்றதே இல்லை. இதை திருத்தி புதிய சரித்திரம் எழுதியுள்ளார் ஹரியானாவைச் சேர்ந்த 23 வயது ஈட்டி எறிதல் வீரர் நீரஜ் சோப்ரா. ராணுவ சுபேதாரான நீரஜ் சோப்ரா, ஏற்கெனவே ஆசிய விளையாட்டுப் போட்டி, காமன்வெல்த் போட்டி, ஆசிய சாம்பின்ஷிப் போட்டி, தெற்காசியப் போட்டி, உலக ஜூனியர் சாம்பியன்ஷிப் போட்டி ஆகியவற்றில் தலா ஒரு தங்கம் வென்று சாதித்துள்ளார். டோக்கியோ ஒலிம்பிக்கிற்காக பயிற்சியாள ஊ ஹோன் (UWE HOHN) மேற்பார்வையில் தீவிர பயிற்சி மேற்கொண்டார். ரேம்போ ஸ்டைலுடன் இருக்கும் அவர் ஓடிச் சென்று ஈட்டியை வீசியெறியும் அழகே தனி. சமீபத்தில் ஃபின்லாந்தில் நடைபெற்ற KUORTNE விளையாட்டுப் போட்டியில் நீரஜ் சோப்ரா, வெண்கலப்பதக்கம் வென்றார். அந்தப் போட்டியில் நீரஜ் சோப்ரா அதிகபட்சமாக 86.79 மீட்டர் தூரம் ஈட்டியை வீசியெறிந்தார். 1900 ஆம் ஆண்டு ஒலிம்பிக் போட்டியில், கொல்கத்தாவில் பிறந்த பிரிட்டீஸ் வம்சாவளி நார்மன் பிரிட்சர்ட், இந்தியா சார்பில் பங்கேற்று 200 மீட்டர் ஓட்டம், 200 மீட்டர் தடை ஓட்டம் ஆகியவற்றில் வெள்ளிப் பதக்கம் வென்றார். அதற்கு பிறகு டோக்கியோ ஒலிம்பிக் வரை இந்தியர்கள் யாரும் பதக்கம் வென்றதில்லை என்பது குறிப்பிடத்தக்கது. 100 ஆண்டுகளுக்கும் மேலாக பதக்கம் வெல்லாத நிலையில், புதிய சரித்திரம் எழுதியுள்ள நீரஜ் சோப்ராவை, தேசமே வாழ்த்துகிறது. வாழ்த்தும் இந்தியா: டோக்யோ ஒலிம்பிக்கில் தங்கப்பதக்கம் வென்று சாதனை படைத்துள்ள நீரஜ் சோப்ராவுக்கு குடியரசுத் தலைவர் ராம்நாத் கோவிந்த் வாழ்த்து தெரிவித்துள்ளார். இளம் வீரரான நீரஜ் சோப்ரா பல தடைகளை தாண்டி தங்கப்பதக்கத்தை வென்றுள்ளார் என்றும், அவரது சாதனை இந்திய இளைஞர்களுக்கு ஊக்கம் தருவதாக இருக்கும் என்றும் குடியரசுத் தலைவர் ராம்நாத் கோவிந்த் தனது பாராட்டுச் செய்தியில் தெரிவித்துள்ளார். நாட்டின் தங்க மகன் நீரஜ் சோப்ராவுக்கு பிரதமர் மோடியும் பாராட்டுகளை தெரிவித்துள்ளார். நீரஜ் சோப்ராவின் சாதனை என்றும் இந்தியர்களின் மனதில் நிலைத்திருக்கும் என பிரதமர் குறிப்பிட்டுள்ளார். ஒலிம்பிக் களத்தில் ஈடு இணையற்ற வகையில் தன் திறமையை நீரஜ் வெளிப்படுத்தினார் என்றும் பிரதமர் தெரிவித்துள்ளார். பாதுகாப்புத்துறை அமைச்சர் ராஜ்நாத் சிங், விளையாட்டுத்துறை அமைச்சர் அனுராக் தாக்கூர், தமிழக ஆளுநர் பன்வாரிலால் புரோஹித் ஆகியோரும் நீரஜ் சோப்ராவுக்கு வாழ்த்து கூறியுள்ளனர். நீரஜ் சோப்ரா உண்மையான தேசிய ஹீரோ என முதல்வர் ஸ்டாலின் புகழாரம் சூட்டியுள்ளார். நீரஜ் சோப்ரா தனது சிறப்பான ஆட்டத்தால் 100 கோடி இந்தியர்களின் இதயத்தை வசப்படுத்தியுள்ளார் என்றும் முதல்வர் குறிப்பிட்டுள்ளார். டெண்டுல்கர், சேவாக், கும்ப்ளே, கம்பீர் என ஏராளமான முன்னாள் இந்திய கிரிக்கெட் வீரர்களும் நீரஜ் சோப்ராவின் சாதனையை பாராட்டியுள்ளனர். உணர்ச்சிப் பெருக்குடன் ராணுவம்: சுபேதார் நீரஜ் சோப்ராவின் சரித்திர சாதனையை இந்திய ராணுவம் உணர்ச்சி பெருக்குடன் கொண்டாடி வருகிறது. ராணுவத்தில் சுபேதாராக உள்ள நீரஜ் சோப்ரா, ஒலிம்பிக்கில் பங்கேற்க டோக்கியோ சென்றது முதலே அவரின் போட்டியை எதிர்ப்பாத்து காத்திருந்தனர் சக ராணுவ வீரர்கள். இந்தநிலையில் நீரஜ் தங்கம் வென்று சாதனை படைத்ததை ஒட்டுமொத்த இந்திய ராணுவமும் கொண்டாடி வருகிறது. ஹரியானாவில் உள்ள நீரஜின் குடும்பத்தினர் உறவினர்கள் உள்ளிட்டோரும் வெற்றியை கொண்டாடி வருகின்றனர். ஹரியானா அமைச்சர் அனில் விஜ் நடனமாடி மகிழ்ச்சியை வெளிப்படுத்தினார். தங்கம் வென்ற நீரஜ்க்கு ஹரியானா மாநில அரசு 6 கோடி ரூபாய் பரிசு அறிவித்துள்ளது. நீரஜின் சாதனையால் இந்தியா ஒளிர்வதாக கிரிக்கெட் ஜாம்பவான் சச்சின் டெண்டுல்கர் உள்ளிட்ட முன்னாள் இந்நாள் விளையாட்டு வீரர்கள் வாழ்த்து தெரிவித்து வருகின்றனர். டவிட்டரில் இந்திய அளவில் நீரஜ் ட்ரெண்டிக்கில் இருக்கிறார்.
http://dlvr.it/S5F8fm

Read More

`சட்டத்துக்கு உட்பட்டே கைது!’ - ராஜ் குந்த்ரா மனுவை தள்ளுபடி செய்த மும்பை உயர் நீதிமன்றம்

நடிகை ஷில்பா ஷெட்டியின் கணவர் ராஜ் குந்த்ரா ஆபாச வீடியோ தயாரித்து மொபைல் ஆப்களில் வெளியிட்டு கோடிக்கணக்கில் சம்பாதித்த வழக்கில் மும்பை போலீஸாரால் கைது செய்யப்பட்டுள்ளார். ஆனால் தனது மொபைல் ஆப்களில் இருக்கும் வீடியோக்களைப் போன்ற வீடியோக்கள் அமேஸான் பிரைம், நெட்பிளிக்ஸ் போன்ற ஒடிடி தளங்களில் அதிகமாக காணப்படுவதாகவும், எனவே தன்னை கைது செய்தது சட்டவிரோதமானது என்று கூறி மும்பை உயர் நீதிமன்றத்தில் ராஜ் குந்த்ரா மனுத்தாக்கல் செய்தார். இம்மனு கடந்த சில நாட்களாக நீதிபதி அஜய் கட்கரி முன்னிலையில் விசாரிக்கப்பட்டு வந்தது. இந்நிலையில் மீண்டும் இம்மனு விசாரணைக்கு வந்த போது ராஜ் குந்த்ராவின் மனுவை நீதிபதி தள்ளுபடி செய்ததோடு சட்டத்துக்கு உட்பட்டே ராஜ் குந்த்ரா கைது செய்யப்பட்டு இருப்பதாக தெரிவித்தார். ராஜ்குந்த்ரா அரசு சார்பில் ஆஜரான வழக்கறிஞர் அருணா பாய் போலீஸ் தரப்பில் அறிக்கை தாக்கல் செய்தார். அதில், `போலீஸார் ராஜ் குந்த்ராவின் அலுவலகத்தில் சோதனையிடுவதற்காக சென்ற போது ராஜ் குந்த்ரா தனது வாட்ஸ் ஆப்பில் இருந்த உரையாடல்களை அழித்துக்கொண்டிருந்தார். எனவே சாட்சியங்களை அழித்ததாக மற்றொரு வழக்குப் பதிவு செய்யப்பட்டுள்ளது’ என்று அதில் குறிப்பிடப்பட்டு இருந்தது. `இதற்கு முன்பு கடைசியாக இவ்வழக்கு விசாரணைக்கு வந்த போதும், போலீஸார் சோதனை நடத்தியபோதும் அல்லது போலீஸ் காவலை நீட்டிக்க அனுமதி கேட்ட போதும் போலீஸார் தரப்பில் ஆஜரான வழக்கறிஞர்கள் ராஜ் குந்த்ரா சாட்சிகளை அழிக்க முயன்றது தொடர்பாக எதுவும் தெரிவிக்கவில்லை என்று ராஜ் குந்த்ரா சார்பாக ஆஜரான வழக்கறிஞர்கள் தெரிவித்தனர். Also Read: "அவை ஆபாச வீடியோக்கள் அல்ல!"- கணவர் ராஜ் குந்த்ராவுக்கு ஆதரவாக ஷில்பா ஷெட்டி வாக்குமூலம்! அரசு தரப்பில் ஆஜரான வழக்கறிஞர் அருணா, `ராஜ் குந்த்ராவின் மொபைல் ஆப்களில் இருந்து அதிகப்படியான ஆபாச வீடியோக்கள் பறிமுதல் செய்யப்பட்டது. 41ஏ சட்டப்பிரிவின் கீழ் போலீஸார் ராஜ் குந்த்ரா மற்றும் ரேயான் ஆகியோருக்கு நோட்டீஸ் அனுப்பியுள்ளனர். ரேயான் அதனை ஏற்றுக்கொண்டுள்ளார். ஆனால் ராஜ் குந்த்ரா அதனை ஏற்கவில்லை. அவர் விசாரணைக்கு ஆஜராகாத காரணத்தால்தான் அவர் கைது செய்யப்பட்டுள்ளார் என்று தெரிவித்தார். இம்மனுவை தள்ளுபடி செய்த நீதிபதி 41ஏ சட்டப்பிரிவின் கீழ் அதிகபட்சமாக குற்றவாளிக்கு 7 ஆண்டு சிறை தண்டனை கொடுக்க முடியும் என்று தெரிவித்தார். ராஜ் குந்த்ரா சார்பாக ஏற்கனவே தாக்கல் செய்யப்பட்ட ஜாமீன் மனுவை விசாரணை நீதிமன்றம் தள்ளுபடி செய்துவிட்டது.
http://dlvr.it/S5CfW0

Read More

அமிதாப்பச்சன் வீடு, ரயில் நிலையங்களுக்கு வெடிகுண்டு மிரட்டல்! -குடிபோதையிலிருந்த இருவர் கைது

மும்பையில் கணபதி விழா மற்றும் சுதந்திர தின விழாவையொட்டி போலீஸார் பாதுகாப்பு பணியை தீவிரப்படுத்தியுள்ளனர். இந்த நிலையில் திடீரென நேற்று நள்ளிரவு மர்ம நபர் ஒருவர் மும்பை போலீஸ் கட்டுப்பாட்டு அறைக்கு போன் செய்து சத்ரபதி சிவாஜி ரயில் நிலையம், தாதர், பைகுலா ரயில் நிலையங்கள், நடிகர் அமிதாப்பச்சன் வீட்டில் வெடிகுண்டு வைக்கப்பட்டு இருப்பதாகவும், அவை வெடித்து சிதறும் என்று கூறிவிட்டு போனை வைத்துவிட்டார். உடனே போலீஸார் உஷார் படுத்தப்பட்டனர். மும்பை ரயில் நிலையம் நகர் முழுவதும் பரபரப்பு ஏற்பட்டது. நான்கு இடங்களுக்கும் மோப்ப நாய் மற்றும் வெடிகுண்டு நிபுணர்களுடன் சென்று போலீஸார் தீவிர சோதனையில் ஈடுபட்டனர். தீவிர சோதனை நடத்தியதில் எந்த வித வெடிகுண்டும் கண்டுபிடிக்கப்படவில்லை. இதையடுத்து வந்த செய்தி புரளி என்று தெரிய வந்தது. போன் செய்த நபர் யார் என்பது குறித்து போலீஸார் தீவிர விசாரணை நடத்தினர். இதில் இரண்டு பேர் கைது செய்யப்பட்டுள்ளனர். அவர்களிடம் போலீஸார் தீவிர விசாரணை வருகின்றனர். தானே மாவட்டம் மும்ப்ரா பகுதியை சேர்ந்த அவர்களில் ஒருவர் குடிபோதைக்கு அடிமையானவர். அவர்தான் இந்த வெடிகுண்டு மிரட்டலை விடுத்திருந்தான். அவருடன் இருந்த மற்றொரு நபரும் கைது செய்யப்பட்டுள்ளார். அவர்கள் குடிபோதையில் இது போன்று செய்திருக்கலாம் என்று தெரிகிறது. Also Read: மும்பை: புறநகர் ரயில் விவகாரம்; சிவசேனா அரசு சர்வாதிகாரத்துடன் நடந்து கொள்வதாக பாஜக குற்றச்சாட்டு! கடந்த சில நாட்களுக்கு முன்பு மும்பையில் உள்ள அமெரிக்க தூதரகத்திற்கும் வெடிகுண்டு மிரட்டல் விடுக்கப்பட்டது. இந்த வெடிகுண்டு மிரட்டலும் இரவில்தான் விடுக்கப்பட்டது. இதையடுத்து இந்த வெடிகுண்டு மிரட்டலிலும் தற்போது பிடிபட்டவர்களுக்கு தொடர்பு இருக்கிறதா என்பது குறித்து விசாரணை நடத்தப்பட்டு வருகிறது.
http://dlvr.it/S5ByH1

Read More

தஞ்சாவூர் உண்ணாவிரதப் போராட்டமும்; தமிழக பாஜக துணைத் தலைவரின் விளக்கமும்!

'தமிழக அரசியலில், இனி தி.மு.க - பா.ஜ.க இடையேதான் நேரடி போட்டி!' என்று அண்மையில் அறிவித்திருந்த தமிழக பா.ஜ.க தலைவர் அண்ணாமலை, தஞ்சாவூரில் அதற்கான பிள்ளையார் சுழியைப் போட்டிருக்கிறார்! 'மேகதாது அணை'யைக் கட்ட ஆர்வம் காட்டிவரும் கர்நாடக பா.ஜ.க அரசை எதிர்த்து, தமிழக பா.ஜ.க சார்பில், தஞ்சாவூரில் நேற்றைய தினம் (05-08-2021) உண்ணாவிரதப் போராட்டம் நடைபெற்றது. இந்தக் கூட்டத்தில் கலந்துகொண்டு பேசிய அண்ணாமலை, கர்நாடக பா.ஜ.க அரசை விமர்சிக்காமல், தமிழக அரசியல் கட்சிகளை, குறிப்பாகத் தி.மு.க-வை வார்த்தைகளால் வறுத்தெடுத்தார்.மாட்டுவண்டியில் ஊர்வலமாக அண்ணாமலை 'பா.ஜ.க-வினர் நடத்திய இந்த உண்ணாவிரதப் போராட்டம், ஒரு நாடகம்' என்றொரு பேச்சு ஏற்கெனவே அரசியல் அரங்கில் பேசப்பட்டுவந்த நிலையில், பிரச்னைக்கு சம்பந்தமே இல்லாமல் தமிழக அரசியல் கட்சிகளை அண்ணாமலை விமர்சித்திருப்பது, போராட்ட மேடையில் இருந்தவர்களையே புருவம் நெளிய வைத்தது. 'இது கர்நாடகா அரசுக்கு எதிரான போராட்டம் என்ற உண்மையை இவர் தெரிந்துதான் பேசுகிறாரா, இல்லை தமிழக அரசியலில் தன்னை நிலைநிறுத்திக்கொள்வதற்காக தனி ரூட் போடுகிறாரா' என்ற குழப்பத்தோடு பா.ஜ.க-வினர் ஒருவரையொருவர் பார்த்துக்கொண்டனர். ஏனெனில், கர்நாடகா அரசு மேகதாது அணையைக் கட்டக்கூடாது என தமிழகத்திலுள்ள தி.மு.க தலைமையிலான அரசு முழு வீச்சில் எதிர்ப்பு தெரிவித்து வருகிறது. இந்த விஷயத்தில் அ.தி.மு.க உள்ளிட்ட ஏனைய கட்சிகளும்கூட கர்நாடக அரசுக்கு எதிராக ஒன்றுபட்டு நின்று குரல்கொடுத்து வருகிறது. அதேசமயம், கர்நாடகத்திலோ, மேகதாது அணையைக் கட்டுவதில் ஆர்வம் கொண்ட கட்சி காங்கிரஸா, பா.ஜ.க-வா என்ற அரசியல் போட்டி நடைபெற்று வருகிறது. எனவே, கர்நாடக பா.ஜ.க அரசில், புதிய முதல்வராகப் பொறுப்பேற்றிருக்கும் பசவராஜ் பொம்மை, மேகதாது அணையைக் கட்டுவதில் தீவிர ஈடுபாடு காட்டி வருகிறார். ஆட்சிப் பொறுப்பேற்ற கையோடு செய்தியாளர்களைச் சந்தித்தவர், ''மேகதாது அணைக்கு எதிராக யார் எதிர்ப்பு தெரிவித்தாலும் அணையக் கட்டியே தீருவோம். தமிழக பா.ஜ.க தலைவர் அண்ணாமலை, எங்களுக்கு எதிராக உண்ணாவிரதம் இருந்தாலும் சரி; உண்ணும் விரதம் இருந்தாலும் சரி. அதையெல்லாம் நாங்கள் ஏன் கண்டுகொள்ள வேண்டும்...'' என்று காட்டமாகக் கேட்டிருந்தார்.பசவராஜ் பொம்மை - எடியூரப்பா இந்த நிலையில், கர்நாடக பா.ஜ.க அரசின் அடாவடி பேச்சுகளுக்குப் பதிலடி தரும்வகையில், தமிழக பா.ஜ.க-வின் உண்ணாவிரதப் போராட்டம் இருக்கும் என்ற எதிர்பார்ப்பு தமிழக அரசியல் அரங்கில் ஏற்பட்டது. ஆனால், அனைவரது எதிர்பார்ப்பையும் புஸ்ஸாக்கும் வகையில், அமைந்துவிட்டது அண்ணாமலையின் பேச்சு. அணையைக் கட்டியே தீருவோம் என முரட்டுப் பிடிவாதம் பிடித்துவரும் கர்நாடக பா.ஜ.க அரசுக்கு எதிராகக் கொந்தளிக்க வேண்டியவர், 'வீட்டில் புலி; வெளியே எலி' என்ற கதையாக, தி.மு.க உடனான உள்ளூர் அரசியலையே வீராவேசமாக கிண்டி கிழங்கெடுத்திருப்பது சொந்தக் கட்சியினருக்கே நமட்டுச் சிரிப்பை வரவழைத்துவிட்டது. தஞ்சாவூரில், உண்னாவிரத மேடையேறி மைக் பிடித்த அண்ணாமலை, ''சாராய அமைச்சரை பக்கத்தில் வைத்துக்கொண்டு, விவசாயத்துறை அமைச்சரை தூரமாக வைத்திருக்கிறது தி.மு.க அரசு. டாஸ்மாக் விற்பனையை அதிகரிப்பதற்காக மாதம்தோறும் மீட்டிங் போட்டுக் கொண்டிருக்கிறார்கள். ஆனால், விவசாயிகளின் நலனுக்காக இதுவரை ஒரு மீட்டிங்கூட போடவில்லை. மக்கள் நன்றாக இருக்கவேண்டும் என்பதற்கான கட்சி பா.ஜ.க. ஆனால், தங்கள் குடும்பம் நன்றாக இருக்கவேண்டும் என்பதற்கான கட்சி தி.மு.க.'' என்று ஆரம்பத்திலேயே தி.மு.க-வை ஒரு பிடி பிடித்தவர் அப்படியே காங்கிரஸ் பக்கம் வந்தார். ''தமிழக காங்கிரஸ் கட்சியின் தலைவர் கே.எஸ்.அழகிரி, 'தமிழக பா.ஜ.க-வினருக்கு வயிற்றில் ஏதோ பிரச்னை. அதனால் உண்ணாவிரதம் இருக்கிறார்கள்' என்கிறார். இதைவிடக் கோழைத்தனமாக, கேவலமாக ஓர் அரசியல் தலைவர் பேசுகிறார் என்றால், இந்த அரசியலைவிட்டு அவர் போகவேண்டிய நேரம் வந்துவிட்டது என்று அர்த்தம். மூன்று வருடங்களாக அகில இந்திய காங்கிரஸ் கட்சிக்குத் தலைவரே இல்லை. சைக்கிள் ட்யூபில் பஞ்சர் ஒட்டுவதுபோல், நான்கைந்து பேரைத் தலைவராக வைத்து பஞ்சர் ஒட்டிக் கொண்டிருக்கிறார்கள். இப்படிப்பட்ட காங்கிரஸ் கட்சிக்கு மாநிலத் தலைவராக இருப்பவர் நம்மைப் பார்த்துப் பேசிய வார்த்தைக்காகவே காங்கிரஸ் கட்சியிலிருந்து விலகி, வீட்டுக்குப் போய் இதுநாள்வரை என்ன செய்துகொண்டிருந்தாரோ அதைச் செய்யவேண்டும்'' என்று போட்டுத்தாக்கிவிட்டு, அப்படியே மக்கள் நீதி மய்யம் நோக்கை வண்டியைத் திருப்பினார்.கமல்ஹாசன் - கே.எஸ்.அழகிரி ''நடிப்பின் உச்சக்கட்டம் அரசியல் என்று நம்பி, அரசியலுக்குள் வந்துவிட்டார் கமல்ஹாசன். கடந்த சட்டமன்றத் தேர்தலில் கோவையில் அவர் போட்டியிட்டபோது, ஸ்டார் ஓட்டலில் தங்கியிருந்துதான் தேர்தல் பிரசாரங்களை செய்துவந்தார். பக்கத்து தொகுதிக்குப் போவதென்றால்கூட, ஹெலிகாப்டரில்தான் பயணம் செய்தார். ஆக தேர்தல் பிரசாரத்தையே சினிமாப்பட ஷூட்டிங் மாதிரிதான் செய்தார். அவரது கட்சியின் பெயரில் மட்டும்தான் 'மய்யம்' இருக்கிறது. ஆனால், அவரது பேச்சு எதிலுமே மய்யம் இல்லை. இவர், நம்மைப்பார்த்து தலையாட்டிப் பொம்மைகள் என்கிறார். இதனால்தான், அவரை அரசியலைவிட்டு மக்களே அனுப்பிவிட்டார்கள்'' என்று குட்டு வைத்தவர், மறுபடியும் யூடர்ன் அடித்து தயாநிதி மாறன் பக்கமே வந்து நின்றார். Also Read: மதுசூதனன் மறைவு: அதிமுக அவைத்தலைவர் ஆகிறாரா முன்னாள் அமைச்சர் ஜெயக்குமார்? ''கர்நாடகாவில், கலாநிதிமாறனின் உதயா சேனல்தான் பணம் கொழிக்கும் சேனலாக இருந்துவருகிறது. இவரது தம்பிதான் தயாநிதி மாறன். ஆக, தங்கள் குடும்பத்துக்கு பணம் வந்தால் போதும் என்று மனசாட்சியே இல்லாமல் அரசியல் செய்துகொண்டிருக்கிறார்கள். தமிழக பா.ஜ.க பற்றி தயாநிதிமாறன் இனியொருமுறை கொச்சைப்படுத்திப் பேசினால், அவர்களைப்பற்றிய எல்லா விஷயங்களும் வீதிக்கு வந்துவிடும்.'' என்று தாளித்து முடித்தவர் மறுபடியும் காவிரி பிரச்னை குறித்த வரலாற்றில் தி.மு.க செய்த தவறுகள் எனப் பட்டியலிட்டு வாசித்துமுடித்தவர், இறுதியில் 'போனால் போகிறது' என்று கதையாக கர்நாடகா அரசின் அணை கட்டும் விஷயத்துக்கு வந்து சேர்ந்தார்.காவிரி ஆறு ''கர்நாடக பா.ஜ.க அரசை மட்டுமல்ல... அணை கட்ட ஆதரவு தெரிவிக்கும் அங்குள்ள எதிர்க்கட்சிகளையும் நாங்கள் எதிர்ப்போம். தி.மு.க கார்ப்பரேட்டுகளின் கட்சியாக இருப்பதால், மத்திய அரசின் விவசாய சட்டத்தை எதிர்க்கிறார்கள். தி.மு.க-வினரைப்போல் பிரியாணிக்கோ அல்லது டி-ஷர்ட்டுக்காகவோ எங்கள் தொண்டர்கள் இங்கே வரவில்லை'' என்றெல்லாம் பேசிக்கொண்டே வந்தவர், திடீரென ''இதுநாள்வரையிலான மேம்போக்கான அரசியலாக இல்லாமல், எதிர்க்கட்சியினரின் பிஸினஸ் வரையிலாக அடிப்படையிலேயே நாங்கள் கை வைப்போம்!'' என்று நேரடியாக மிரட்டியவர் நிறைவாக 'தி.மு.க-வின் அதிகார மையங்களைக் குறிப்பிட்டு, 'தி.மு.க-வில் மூன்று முதலமைச்சர்கள் செயல்படுவதாக' பஞ்ச் வைத்து பேச்சை முடித்துக்கொண்டார். Also Read: மும்பை: புறநகர் ரயில் விவகாரம்; சிவசேனா அரசு சர்வாதிகாரத்துடன் நடந்து கொள்வதாக பாஜக குற்றச்சாட்டு! கர்நாடக பா.ஜ.க அரசுக்கு எதிராக முழங்கவேண்டிய போராட்டத்தில், முழுக்க முழுக்க தி.மு.க-வை குறிவைத்து அண்ணாமலை திட்டித் தீர்த்திருப்பது பா.ஜ.க-வினரையே முணுமுணுக்க வைத்துவிட்டது. அதேநேரம், 'தமிழகத்தில் இனி தி.மு.க - பா.ஜ.க இடையேதான் நேரடி போட்டி' என்று தான் ஏற்கெனவே அறிவித்திருந்த அரசியலை கையிலெடுக்கத் தயாராகிவிட்டார் அண்ணாமலை என்றே தெரிகிறது. இதுகுறித்து, தமிழக பா.ஜ.க துணைத்தலைவர் எம்.என்.ராஜாவிடம் பேசியபோது, ''காவிரி பிரச்னையில், கடந்தகாலத்தில் தி.மு.க அரசு செய்யத் தவறிய விஷயங்களைத்தான் தமிழக பா.ஜ.க தலைவர் பட்டியலிட்டுள்ளார். இந்தத் துரோகங்களை எல்லாம் நாட்டு மக்களுக்கு எடுத்துச்சொல்ல வேண்டிய கடமை எங்களுக்கு உள்ளது.எம்.என்.ராஜா தஞ்சையில், தமிழக பா.ஜ.க நடத்தியிருக்கிற இந்த உண்ணாவிரத போராட்டம் என்பது ஏதோ விளையாட்டுக்காக நடத்தப்பட்டது அல்ல... நாங்கள் நாடகம் நடத்தவும் இல்லை. தமிழக விவசாயிகள் மீதான உண்மையான அக்கறையோடு உணர்வுபூர்வமாக இந்தப் போராட்டத்தை நடத்தி முடித்திருக்கிறோம். நீங்கள் எழுதி வைத்துக்கொள்ளுங்கள்... கர்நாடக அரசால், மேகதாது அணையைக் கட்டவே முடியாது. சட்டமும் அதற்கு இடம் கொடுக்காது!'' என்று அடித்துச் சொல்கிறார்.
http://dlvr.it/S5BffK

Read More