மயக்க ஊசி செலுத்தியும் T23 புலி தப்பி ஓட்டம்: இரவு 2 மணி வரை தொடர்ந்த தேடுதல் வேட்டை

நீலகிரி மாவட்டம் கூடலூர் அருகே 4 பேரை கொன்ற புலிக்கு மயக்க ஊசி செலுத்தப்பட்ட நிலையிலும், வனத்துறையினரின் பிடியில் சிக்காமல் தப்பியது.   கூடலூர் மற்றும் மசினக்குடி பகுதிகளில் நான்கு நபர்களை கொன்ற புலியை பிடிக்கும் பணி 20 நாட்களைக் கடந்துவிட்டது. நேற்றிரவு மசினக்குடியில் இருந்து தெப்பக்காடு செல்லும் வழியில் பழுதாகி நின்ற வாகனத்தை சரிசெய்து கொண்டிருந்த நபர்களை நோக்கி புலி வந்ததாக கூறப்படுகிறது. இதுகுறித்து தகவல் அறிந்த வனத்துறையினர் அந்தப் பகுதிக்கு விரைந்தனர்.   இரவு 10 மணி அளவில் வனத்துறையின் மருத்துவக் குழுவினர் புலிக்கு மயக்க ஊசி செலுத்தினர். ஒரு ஊசி மட்டுமே செலுத்தப்பட்ட நிலையில், புலி மயங்கி விழாமல் அடந்த காட்டுப் பகுதிக்குள் சென்றுவிட்டது. மசினகுடி பகுதியில் நிறுத்தி வைக்கப்பட்டிருந்த கும்கி யானைகள் ஸ்ரீநிவாசன் மற்றும் உதயன் உதவியுடன் புலி பதுங்கிய வனப்பகுதியில் தேடுதல் வேட்டை நடத்தப்பட்டது. இரவு 2 மணி வரை தேடியும் புலியை கண்டுபிடிக்க இயலாததால், தேடுதல் வேட்டை தற்காலிகமாக நிறுத்தப்பட்டது.   இதனிடையே புலிக்கு மயக்க ஊசி செலுத்தப்பட்டதில் விதிமுறைகள் பின்பற்றப்படவில்லை என குற்றச்சாட்டு எழுந்துள்ளது. தேசிய புலிகள் பாதுகாப்பு ஆணைய வழிகாட்டு நெறிமுறைகள்படி மாலை 6 மணிக்கு மேல் புலிக்கு மயக்க ஊசி செலுத்தக்கூடாது என்ற உத்தரவை மீறி, இரவு 10 மணிக்கு மயக்க ஊசி செலுத்தியது ஏன் என வன உயிரின ஆர்வலர்கள் கேள்வி எழுப்பியுள்ளனர்.   இதையும் படிக்க: T23 புலியை பிடிக்கத் திணறும் வனத்துறை - 20 நாட்களாக போக்கு காட்டும் புலி
http://dlvr.it/S9bbxc

Read More

வங்கதேசத்தில் இந்து கோயில்கள் மீது தாக்குதல்: 4 பேர் பலி, 100 பேர் கைது

வங்கதேசத்தில் இந்து கோயில்கள் அடித்து நொறுக்கப்பட்டு சூறையாடப்பட்டதில் நான்கு பேர் உயிரிழந்துள்ளனர். வன்முறையில் ஈடுபட்டவர்களில் இதுவரை100 பேரை காவல்துறையினர் கைது செய்துள்ளனர். இந்து கோயில்கள் சூறையாடப்பட்டதால், பதற்றம் நிலவும் 22 மாவட்டங்களில் துணை ராணுவப் படையினர் குவிக்கப்பட்டுள்ளனர். வன்முறைக்கு காரணமானவர்கள் மீது கடுமையான நடவடிக்கை எடுக்கப்படும் என வங்கதேச பிரதமர் ஷேக் ஹஸீனா உறுதியளித்துள்ளார். இந்து கோயில்கள் மற்றும் நவராத்திரி விழா நடைபெறும் பகுதிகள் மீது தாக்குதல் நடத்தினால் கடுமையான பின்விளைவுகளை சந்திக்க நேரிடும் என்றும் அவர் எச்சரித்துள்ளார். தலைநகர் டாக்காவில் இருந்து நூறு கிலோ மீட்டர் தொலைவில் உள்ள கமிலா என்ற பகுதியில் நவராத்திரி விழாவுக்கான பந்தலை இந்துக்கள் அமைத்திருந்தனர். இந்நிலையில், அங்கு திடீரென குவிந்த சமூக விரோதிகள், விழா பந்தலை அடித்து நொறுக்கி சேதப்படுத்தினர். மேலும், அண்டை மாவட்டங்களான ஹாஸிகஞ்ச், ஹாத்தியா, பன்ஷ்காளி உள்ளிட்ட பகுதிகளில் இருந்த இந்து கோயில்களும் அடித்து நொறுக்கப்பட்டு சூறையாடப்பட்டன. சமூக ஊடகங்களில் பரவிய தவறான தகவலே மத ரீதியான கலவரம் வெடிக்க காரணம் என முதற்கட்ட விசாரணையில் தெரியவந்துள்ளது. இதற்கிடையே நவராத்திரி விழாவை சீர்குலைக்க வேண்டும் என்ற நோக்கிலேயே இந்த தாக்குதல் நடத்தப்பட்டதாக வங்கதேசத்தில் இருக்கும் இந்து மதத் தலைவர்கள் குற்றம்சாட்டியுள்ளனர்.
http://dlvr.it/S9bbx4

Read More

விண்வெளி சுற்றுலா முக்கியமா? பூமி முக்கியமில்லையா? - பிரிட்டன் இளவரசர் வில்லியம் கேள்வி

விண்வெளி சுற்றுலாவில் கவனம் செலுத்துவதை நிறுத்திவிட்டு , பூமியை காப்பதற்கான பணிகளை முன்னெடுக்க வேண்டும் என பிரிட்டன் இளவரசர் வில்லியம் கூறியுள்ளார். அமெரிக்காவை சேர்ந்த பெரும் பணக்காரர்களும் , தொழிலதிபர்களும் விண்வெளி சுற்றுலாவில் கவனம் செலுத்தி வரும் நிலையில் இளவரசர் வில்லியம் இவ்வாறு கூறியுள்ளார். உலகில் மாற்றத்தை ஏற்படுத்த கூடிய திறன் படைத்தவர்கள் , மனித வாழ்வுக்கு மற்றொரு கிரகத்தை தேடாமல் நமது பூமியை மனிதர்கள் வாழ்வதற்கு ஏற்ற வகையில் மாற்றுவதற்கான முயற்சிகளை மேற்கொள்ள வேண்டும் என அவர் கேட்டுக் கொண்டுள்ளார்.
http://dlvr.it/S9bbw0

Read More

கோயில் முதல் கடற்கரை வரை; தமிழகத்தில் எதற்கெல்லாம் புதிய தளர்வுகள் அறிவிப்பு? - முழு தகவல்

தமிழகத்தில் வழிபாட்டுத் தலங்களில் வழிபட வெள்ளி, சனி, ஞாயிற்றுக்கிழமைகளிலும் வழிபட அனுமதி வழங்கப்பட்டுள்ளது. மேலும் ஞாயிற்றுக்கிழமைகளில் கடற்கரைக்கு செல்ல அனுமதி தரப்பட்டிருக்கிறது. தமிழ்நாட்டில், கொரோனா பரவலை கட்டுப்படுத்துவதற்கான ஊரடங்கு நீட்டிப்பானது வரும் 31ம் தேதிவரை அமலிலுள்ள நிலையில், எதிர்வரும் பண்டிகைக்காலத்தை மனதில் வைத்து, இந்த காலத்துக்கான கொரோனா தடுப்பு நடவடிக்கை குறித்தும், அண்டை மாநிலங்களில் கொரோனா தொற்று வேகவாக பரவிவருவதை கருத்தில் கொண்டும் தலைலமச் செயலகத்தில் முதல்வர் தலைமையில் இன்று ஆலோசனைனக் கூட்டம் நடைபெற்றது. அதன்முடிவில்தான் புதிய அறிவிப்புகள் வெளிவந்துள்ளன. கடந்த கட்டுப்பாடு நீட்டிப்பு குறித்த ஆலோசனையின் முடிவின்படி தற்போது தமிழகத்தில் 9 முதல் பிளஸ் 2 வரையிலான வகுப்புகள் தொடங்கி நடைபெற்று வருகின்றன. அப்போதே ஒன்று முதல் எட்டாம் வகுப்புகள் வரையிலான பள்ளிகளை நவம்பர் 1-ஆம் தேதி முதல் திறக்க தமிழக அரசு ஏற்கெனவே அறிவித்திருந்ததும் குறிப்பிடத்தக்கது. பள்ளிகளைத் திறப்பதற்கு முன்பாக பல்வேறு கொரோனா தடுப்பு முன்னெச்சரிக்கை நடவடிக்கைகளை மாநில அரசு எடுத்து வருகிறது. இந்நிலையில் இன்றைய அறிவிப்பில் இவற்றுடன் மழலையர், நர்சரி, அங்கன்வாடி பள்ளிகள் செயல்படவும் அனுமதித்து தமிழக அரசு உத்தரவு பிறப்பித்துள்ளது. தொடர்புடைய செய்தி: ’இனி வார இறுதி நாள்களிலும் கோயில்கள் திறக்கப்பட்டிருக்கும்’ - தமிழக அரசு அறிவிப்பு நர்சரி, காப்பாளர், சமையலர் பள்ளிகள் அனைத்தின் பணியாளர்களும் கட்டாயம் தடுப்பூசி செலுத்தியிருக்க வேண்டும் என தெரிவிக்கப்பட்டுள்ளது. போலவே தனியார் நிறுவனங்கள் நடத்தும் பொருட்காட்சிகளுக்கும் அனுமதி அளிக்கப்பட்டுள்ளது. திருமணம் மற்றும் திருமணம் சார்ந்த நிகழ்வுகளில் 100 பேரும்; இறப்பு சார்ந்த நிகழ்வுகளில் 50 பேரும் பங்கேற்க அனுமதி தரப்பட்டிருக்கிறது. அரசியல் கூட்டங்கள், திருவிழாக்கள், சமுதாய, கலாசார நிகழ்வுகளுக்கான தடை தொடர்கிறது. மற்றொருபக்கம், இரவு 11 மணி வரை உணவகங்களுக்கு அனுமதி அளிக்கப்பட்டுள்ளது.
http://dlvr.it/S9bbvN

Read More

நியூஸ்ஃபீடை துடைத்தெறியும் 'ஆப்' - ஃபேஸ்புக்கை அலறவிட்டவரை நீக்கியதன் அதிர்ச்சி பின்புலம்!

பயனாளிகளின் ஃபேஸ்புக் அனுபவத்தை மேம்படுத்தும் வகையில் ஒரு செயலியை யாராவது உருவாக்கினால் ஃபேஸ்புக் என்ன செய்யும் தெரியுமா? - அந்த செயலியை தடை செய்வதோடு, அதை உருவாக்கிய நபரையும் ஃபேஸ்புக் தனது மேடையில் இருந்து நிரந்தரமாக தடை செய்துவிடும் என்பது லூயிஸ் பார்க்லேவின் அனுபவத்தில் இருந்து தெரிகிறது. பார்க்லேவின் அனுபவத்தை தெரிந்துகொண்டால் உங்களுக்கு கொஞ்சம் திகிலாகத்தான் இருக்கும். ஏனெனில், பயனாளிகளுக்கு ஃபேஸ்புக் அனுபவம் போதையாக மாறிவிடாமல் இருக்கும் நோக்கத்துடன் அவர் உருவாக்கிய சேவையை ஃபேஸ்புக் நீக்கியதோடு, ஃபேஸ்புக்கில் தடையும் விதித்துள்ளது. அதுமட்டும் அல்ல, எதிர்காலத்தில் ஃபேஸ்புக் சார்ந்த சேவையை உருவாக்கக் கூடாது என்றும் எச்சரித்துள்ளது. ஃபேஸ்புக்கிடம் இருந்து இத்தனை கடுமையான நடவடிக்கையை பெறும் அளவுக்கு பார்க்லே அப்படி என்ன சேவையை உருவாக்கினார் என்பதை அறிந்து கொள்வதில் இப்போது உங்களுக்கு ஆர்வம் ஏற்பட்டிருக்கும். 'அன்ஃபாலோ எவ்ரிதிங்' (Unfollow Everything) என்பதுதான் பார்க்லே உருவாக்கிய சேவை. ஃபேஸ்புக் பயனாளிகளின் பக்கத்தில் தோன்றும் நியூஸ்ஃபீட் (Newsfeed) அம்சத்தையே முற்றிலுமாக நீக்கிவிட வழி செய்யும் வகையில் இந்த சேவையை பார்க்லே உருவாக்கியிருந்தார். நியூஸ்ஃபீட் இல்லாத ஃபேஸ்புக் பக்கம் எப்படி இருக்கும் தெரியுமா? - நிச்சயம் இந்த அனுபவத்தை நீங்கள் பெறுவதற்கான சாத்தியமே இல்லை. ஏனெனில், உங்கள் ஃபேஸ்புக் பக்கத்தில் நியூஸ்ஃபீட் அம்சம் நீங்காமல் இடம் பெற்றிருக்கிறது. அதை நீங்கள் விரும்பினாலும் நீக்க முடியாது. ஃபேஸ்புக் பக்கத்தில் நீங்கள் தவறாமல் பார்க்கும் அம்சம் என்றாலும், நியூஸ்ஃபீட் பற்றி சுருக்கமாக தெரிந்து கொள்வது அவசியம். செய்தி ஊட்டம் என புரிந்து கொள்ளக்கூடிய நியூஸ்ஃபீட் என்றால், இணையதளத்தில் புதிதாக வெளியாகும் அல்லது பதிப்பிக்கப்படும் தகவல் என புரிந்துகொள்ளலாம். ஆனால், இணைய உலகில் இப்போது நியூஸ்ஃபீட் என்றால் பெரும்பாலும் ஃபேஸ்புக் தளத்தில் தகவல்கள் தோன்றும் வசதி என்றே புரிந்து கொள்ளப்படுகிறது. அதாவது, ஃபேஸ்புக் பயனாளிகளின் நட்பு வலைப்பின்னலில் வெளியாகும் புதிய தகவல்கள், பயனர்களின் செயல்பாடுகள், பகிர்வுகள், விருப்பங்கள் ஆகியவை தோன்றும் இடமாக நியூஸ்ஃபீட் அமைகிறது. வலைப்பின்னல் தகவல்கள் மட்டும் அல்ல, விளம்பரங்கள் மற்றும் மூன்றாம் தரப்பு தகவல்களும் இதில் தோன்றுகின்றன. ஃபேஸ்புக்கிற்கு முன்னும் பின்னரும் எத்தனையோ சமூக வலைதளங்கள் தோன்றினாலும், ஃபேஸ்புக்கே ஆகச் சிறந்த சமூக வலைப்பின்னல் தளம் போல ஆதிக்கம் செலுத்துவதற்கான முக்கிய காரணங்களில் ஒன்றாக இந்த நியூஸ்ஃபீட் அம்சம் அமைகிறது. ஃபேஸ்புக்கின் வெற்றிக்கு காரணம் மட்டும் அல்ல, பயனாளிகள் ஃபேஸ்புக்கை மிகவும் விரும்புவதற்கான காரணங்களில் ஒன்றாகவும் நியூஸ்ஃபீட் அமைகிறது. ஏனெனில் பயனாளிகள் எப்போது ஃபேஸ்புக் பக்கத்தை திறந்தாலும், நியூஸ்ஃபீட் பகுதியில் புதிய தகவல்கள் தோன்றிக்கொண்டே இருக்கும். நட்பு வட்டத்தில் உள்ளவர்கள் பகிரும் புதிய தகவல்கள் தவிர, அவர்களின் ஃபேஸ்புக் செயல்பாடுகள் தொடர்பான அப்டேட்களையும் இந்தப் பகுதியில் தெரிந்துகொள்ளலாம். நண்பர்கள் லைக் செய்தவை முதல் அவர்கள் பிறந்த நாள் முன்னறிவிப்புகள் வரை எண்ணற்ற தகவல்களை நியூஸ்ஃபீடில் பார்த்துக்கொண்டே இருக்கலாம். ஆக, பயனாளிகள் ஃபேஸ்புக்கில் நுழையும் போதெல்லாம் நியூஸ்ஃபீடில் புதியவற்றை எதிர்பார்க்கின்றனர் அல்லது இந்த தகவல்களை எதிர்பார்த்தே ஃபேஸ்புக்கில் நுழைகின்றனர். ஃபேஸ்புக்கில் பெரும்பாலனோர் தங்களை மறந்து அதிக நேரத்தை செலவிடுவதற்கான காரணமும் இதுதான். நியூஸ்ஃபீட் அடிப்படையில் நல்ல வசதிதான். ஆனால் அதில் எங்கு வில்லங்கம் இருக்கிறகு என்றால், ஃபேஸ்புக் ஒருவரின் நட்பு வட்டத்தில் இருந்து இயற்கையான முறையில் தகவல்களை தோன்றச்செய்யாமல், எந்த வகையான தகவல்கள் தோன்ற வேண்டும் என அல்காரிதம் மூலம் தீர்மானிக்கிறது. எந்த தகவல்கள் அதிக விருப்பங்களை பெறுகிறது, அதிக ஆர்வத்தையும், தொடர்பையும் உண்டாக்குகிறது என்பது போன்ற பல்வேறு அம்சங்களை இந்த அல்காரிதம் கணக்கில் கொண்டு செயல்படுவதாக ஃபேஸ்புக் தெரிவிக்கிறது. ஆனால், விஷயம் என்னவென்றால், உங்கள் ஃபேஸ்புக் பக்கத்தில் என்ன தோன்ற வேண்டும் மற்றும் எவை தோன்றக்கூடாது என்பதை ஃபேஸ்புக் தீர்மானிக்கிறது என்பதுதான். இதில் பயனாளிகளுக்கு எந்த பங்கும் இல்லை என்பதோடு, ஃபேஸ்புக் வர்த்தக நோக்கில் தனக்கு சாதகமான விஷயங்களையே இவ்வாறு முன்னிறுத்துவதாக சொல்லப்படுகிறது. இப்படி ஃபேஸ்புக் நியூஸ்ஃபீடில் முன்னிறுத்தும் விஷயங்கள் (திணிக்கும் என்றும் சொல்லலாம்), அதற்கு விளம்பர வருவாயை அள்ளித்தரும் வகையில் அமைவதோடு, பயனாளிகளின் ஆர்வம் மற்றும் எதிர்வினையை தூண்டும் வகையில் இருப்பதாக தீவிர விமர்சனம் இருக்கிறது. மேலும், பயனாளிகள் ஃபேஸ்புக்கில் அதிக நேரத்தை செலவிடு தூண்டும் வகையில் இந்த அம்சம் அமைவதாகவும் விமர்சிக்கப்படுகிறது. அண்மையில் ஃபேஸ்புக்கிற்கு எதிராக விசில்ப்ளோயர் பிரான்சிஸ் ஹாகன் கூறிய முக்கிய குற்றச்சாட்டுகளில் ஒன்று, ஃபேஸ்புக்கில் பயனாளிகள் செலவிடும் நேரம் அதற்கு வருமானமாக அமைகிறது மற்றும் இந்த நேரத்தை அதிகமாக்குவதிலேயே ஃபேஸ்புக் குறியாக இருக்கிறது என்பதுதான். பெரும்பாலும் ஃபேஸ்புக் எதிர்வினையை அதிகரிக்கச் செய்யும் வகையிலான உள்ளடக்கத்தையே முன்னிறுத்துகிறது என்பதும், இத்தகைய உள்ளடக்கம் பயனாளிகள் மற்றும் சமூகத்திற்கு பாதிப்பு ஏற்படுத்தும் வகையில் அமைந்திருந்தாலும் ஃபேஸ்புக் அதுபற்றி கவலைப்படுவதில்லை என்பதும் அவரது முக்கியக் குற்றச்சாட்டு. | விரிவாக வாசிக்க > 'வெறுப்பரசியலால் லாபம்'- விசில்ப்ளோயர் பெண் அம்பலப்படுத்திய ஃபேஸ்புக்கின் 'உள்ளடி' வேலைகள் | நியூஸ்ஃபீட் வசதி இவ்வாறு பயனாளிகள் மீது ஆதிக்கம் செலுத்த அனுமதிக்காமல், அதை முற்றிலுமாக நீக்கிவிட வழிசெய்யும் ஆப் (App) ஒன்றைத்தான் பிரவுசர் நீட்டிப்பு வசதியாக பார்க்லே உருவாக்கியிருந்தார். ஃபேஸ்புக் முன்னிறுத்தும் வசதி தவிர, பல்வேறு அம்சங்களை கொண்டிருக்கிறது, பயனாளிகள் இவற்றை எல்லாம் தேடிக் கண்டுபிடித்து பயன்படுத்த வேண்டும். இத்தகைய வசதிகளில் ஒன்றுதான், குறிப்பிட்ட நண்பர் அல்லது பயனாளியை அன்ஃபாலோ செய்யும் வசதி. ஒருவரை அன்ஃபாலோ செய்தால் அவரது தகவல்கள் நியூஸ்ஃபீட் பகுதியில் தோன்றாது. பார்க்லே இந்த வசதியை பயன்படுத்தி தனது நண்பர்களை எல்லாம் அன்ஃபாலோ செய்து பார்த்தார். இந்த அனுபவம் அவருக்கு புதுவிதமாக இருந்தது. நியூஸ்ஃபீடில் எதுவும் தோன்றாதது கவனச் சிதறலை குறைத்தது என்றாலும், அவர் எதையும் இழக்கவில்லை. ஏனெனில் நண்பர்கள் நடவடிக்கை பற்றி அறிய வேண்டும் என்றால், அவர்களின் ஃபேஸ்புக் பக்கத்திற்கு சென்றால், அவரால் தகவல்களை தெரிந்துகொள்ள முடியும். ஆக, நியூஸ்ஃபீடில் இருந்து விடுபட்டது அவருக்கு பெரும் சுதந்திரமாக இருந்தது. ஃபேஸ்புக் பயன்பாடு அவரது கட்டுப்பாட்டில் இருப்பதை உணர முடிந்தது. தேவையில்லாமல் ஃபேஸ்புக் பக்கத்தில் உள்ளடக்கத்தைக் காண ஸ்கிரோல் செய்து கொண்டிருக்க வேண்டிய அவசியமும் ஏற்படவில்லை. இந்த வசதி அருமையானது என்பதை உணர்ந்தவர், ஒவ்வொரு முறை அன்ஃபாலோ செய்வதையும் கையால் செய்ய வேண்டியிருப்பதை சிக்கலாக உணர்ந்தார். இந்த வசதியை தானியங்கிமயமாக்கினால் நன்றாக இருக்குமே என நினைத்தார். இந்த வசதி மற்றவர்களுக்கும் பயனுள்ளதாக இருக்கும் என நினைத்தவர், இதற்காக 'அன்ஃபாலோ எவ்ரிதிங்' சேவையை உருவாக்கி பிரவுசர் நீட்டிப்பு வசதியாக அறிமுகம் செய்தார். 2020-ம் ஆண்டு ஜூலை மாதம் குரோம் பிரவுசருக்கான சேவையாக இது அறிமுகமானது. பயனாளிகள் பலரும் இந்த சேவையை விரும்பினர். இதன்மூலம் ஃபேஸ்புக் அடிமைத்தனத்தில் இருந்து விடுபட முடிந்ததாகவும் பலர் தெரிவித்தனர். பயனாளிகள் மத்தியில் இந்த வசதி பிரபலமானதோடு, சுவிட்சர்லாந்தில் உள்ள பல்கலைக்கழக ஆய்வாளர்கள் இந்த வசதியை பயன்படுத்தி ஆய்வு மேற்கொள்ளவும் விருப்பம் தெரிவித்தனர். இதற்கு சில மாதங்கள் கழித்து ஃபேஸ்புக் பார்க்லேவுக்கு நோட்டீஸ் ஒன்றை அனுப்பியது. இந்த சேவையை உடனே நீக்க வேண்டும் என கூறியதோடு, ஃபேஸ்புக்கில் இருந்தும், அவருக்கு தடை விதிப்பதாக தெரிவித்தது. ஃபேஸ்புக் சார்ந்த சேவைகளை இனி உருவாக்க கூடாது என்றும் எச்சரிக்கை விடுத்தது. ஃபேஸ்புக்கின் தாக்கம் தொடர்பாக அண்மையில் வெடித்திருக்கும் சர்ச்சை பின்னணியில் இந்த சம்பவம் பற்றி பார்க்லே விரிவாக கட்டுரை ஒன்றை ஸ்லேட் இணைய இதழில் எழுதியிருக்கிறார். ஃபேஸ்புக் தன் மீதான விமர்சனங்களை பெரும்பாலும் நிராகரித்து, அலட்சியம் செய்தாலும் அதன் மேடையில் உள்ள மோகத்தை கட்டுப்படுத்தும் விதமான செயல்களுக்கு மட்டும் உடனடியாக எதிர்வினை ஆற்றுவதை இதில் இருந்து புரிந்துகொள்ளலாம். அதுமட்டும் அல்ல, நியூஸ்ஃபீட் வசதியின் தாக்கத்தையும், அதை ஏன் ஃபேஸ்புக் தொடர்ந்து முன்னிறுத்துகிறது என்பதையும் இதன் மூலம் புரிந்துகொள்ளலாம். ஆக, பயனாளிகளே நினைத்தாலும் ஃபேஸ்புக் நியூஸ்ஃபீட் ஆதிக்கத்தில் இருந்து விடுபட முடியாது. பார்க்லே எழுதிய கட்டுரை இங்கே > Facebook Banned Me for Life Because I Help People Use It Less
http://dlvr.it/S9WXQr

Read More

கேரளாவில் பாம்பை விட்டு கடிக்கச்செய்து மனைவி கொலை - கணவனுக்கு ஆயுள் தண்டனை

கேரளாவில் மனைவிமீது பாம்பை கடிக்கச்செய்து கொலைசெய்த வழக்கில் கணவன் சூரஜ்க்கு ஆயுள் தண்டனை வழங்கப்பட்டுள்ளது. கேரள மாநிலம் கொல்லத்தைச் சேர்ந்த உத்ரா என்பவருக்கும், பத்தினம்திட்டாவைச் சேர்ந்த வங்கி அதிகாரியான சூரஜ் என்பவருக்கும் கடந்த 2018ஆம் ஆண்டு திருமணமாகி ஒரு குழந்தை இருக்கிறது. அரூர் பகுதியில் இரண்டாவது மாடியிலுள்ள ஒரு வீட்டில் வசித்துவந்திருக்கின்றனர். கடந்த ஆண்டு ஒருமுறை உத்ராவை பாம்பு கடித்திருக்கிறது. ஆனால் அதிர்ஷ்டவசமாக அவர் காப்பாற்றப்பட்டிருக்கிறார். மீண்டும் இந்த ஆண்டு மே மாதத்தில் உத்ராவை கருநாகபாம்பு கடித்ததில் அவர் உயிரிழந்தார். ஜன்னல், கதவுகள் அடைக்கப்பட்டிருந்த அறையில் பாம்பு உள்ளே நுழைந்து கடித்த சம்பவத்தில் போலீசார் மற்றும் உறவினருக்கு சந்தேகம் எழவே, போலீசார் உத்ராவின் கணவர் சூரஜ்ஜிடம் விசாரணையைத் தொடங்கினர். லக்கிம்பூர் வன்முறை விவகாரத்தில் நடவடிக்கை வேண்டும் - ஜனாதிபதியிடம் ராகுல் வலியுறுத்தல்  விசாரணையில் மனைவியிடம் அதிக வரதட்சணை கேட்டு கொடுக்காததால் தூக்க மாத்திரை கொடுத்து தூங்கவைத்து பாம்பாட்டியிடமிருந்து பாம்பை வாங்கி ஏவிவிட்டு கொலை செய்தது உறுதிபடுத்தப்பட்டது. இதனையடுத்து இரண்டு நாட்களுக்கு முன்பு கொல்லம் கூடுதல் அமர்வு நீதிமன்றத்தில் இவர்மீது 100 பக்க குற்றப்பத்திரிகையை போலீசார் தாக்கல் செய்தனர். மேலும் குற்றவாளி என தீர்ப்பளிக்கப்பட்ட சூரஜ்ஜுக்கு இன்று தண்டனை அறிவிக்கப்படும் என்றும் நீதிமன்றம் தெரிவித்திருந்தது. இந்நிலையில் சூரஜ்ஜுக்கு ஆயுள்தண்டனை வழங்கி நீதிமன்றம் தீர்ப்பளித்திருக்கிறது.
http://dlvr.it/S9WXQW

Read More

பணம் பண்ண ப்ளான் B - 5: மியூச்சுவல் ஃபண்ட் 'சேஃப்டி'யும் அடிப்படை புரிதல்களும்

மியூச்சுவல் ஃபண்ட் மூலமாக பங்குச்சந்தையில் முதலீடு செய்யலாம் என கடந்த வாரம் முடித்திருந்தோம். மியூச்சுவல் ஃபண்ட் குறித்த அடிப்படையை முதலில் பார்ப்போம். ஒவ்வொரு முதலீட்டுக்கும் ஒரு தன்மை இருக்கிறது. வங்கியில் நீங்கள் முதலீடு செய்தால் வரும் அதே வருமானம்தான் நான் முதலீடு செய்தாலும் எனக்கு வரும். இதேபோல தங்கம் உள்ளிட்ட பெரும்பாலான முதலீட்டு திட்டங்களிலும் அடிப்படை ஒன்றுதான். ஆனால், மியூச்சுவல் ஃபண்ட் என்பது ஒரு டூல். இந்த டூல் மூலமாக அனைத்து வகையான முதலீட்டு திட்டங்களிலும் முதலீடு செய்யலாம். பங்குச்சந்தையில் முதலீடு செய்யலாம், கடன் சந்தையில் முதலீடு செய்யலாம் (புரிதலுக்காக சொல்ல வேண்டும் என்றால் ஃபிக்சட் டெபாசிட் போன்ற ஓரளவுக்கு நிலையான வருமானம் தரும் திட்டங்கள்), தங்கத்தில் முதலீடு செய்யலாம், ரியல் எஸ்டேட்டில் முதலீடு செய்யலாம், வெளிநாட்டு பங்குச்சந்தையில் முதலீடு செய்யலாம் என பல வகையான வாய்ப்புகள் இருக்கின்றன. சிறு முதலீட்டாளர்களாகிய நாம், முதலீடு செய்யும் அந்தப் பணத்தை எந்த நோக்கத்துக்காக முதலீடு செய்தோமோ, அதற்கு ஏற்ப முதலீடு செய்து லாபம் பெறலாம். ஏன் சிறந்தது? - பங்குச்சந்தையில் நுழைய விரும்பும் ஆரம்பகட்ட முதலீட்டாளர்களுக்கு மியூச்சுவல் ஃபண்ட் சிறந்தது. உதாரணத்துக்கு ரூ.10,000-ஐ முதலீடு செய்ய திட்டமிட்டிருக்கிறீர்கள் என வைத்துக்கொள்வோம். இந்த 10,000 ரூபாயில் இரண்டு அல்லது மூன்று பங்குகள் மட்டுமே முதலீடு செய்ய முடியும். அந்த மூன்று பங்குகளும் அதிக ஏற்றத்தை கொடுக்கலாம். ஒருவேளை உங்களின் தேர்வு தவறாக இருக்கும் பட்சத்தில் மூன்று பங்குகளில் செய்துள்ள முதலீடு நஷ்டமடையும் வாய்ப்பு இருக்கிறது. ஆனால், மியூச்சுவல் ஃபண்ட்களில் செய்துள்ள முதலீடும் நஷ்டமடையும் வாய்ப்பு இருக்கிறது என்றாலும், நேரடியாக பங்குச்சந்தையிலும் முதலீடு செய்வதை விட ஒப்பீட்டளவில் நஷ்டம் குறைவு. மியூச்சுவல் ஃபண்டில் நீங்கள் 1,000 ரூபாய் முதலீடு செய்தாலும் அந்தத் தொகை, பல பங்குகளில் முதலீடு செய்யப்படும். பல துறை சார்ந்த பங்குகள் உள்ளன. நிதி, வங்கி, சிமென்ட், சுகர், ஸ்டீல், ஐடி, டெக்னாலஜி, ரியல் எஸ்டேட் எல பல துறைகள் உள்ளன. முதலீடு செய்யப்படும் 1,000 ரூபாயை தேர்ந்தெடுத்த பல துறைகளில் உள்ள பங்குகளில் முதலீடு செய்யப்படும். இத்தனை பங்குகளில் முதலீடு செய்ய வேண்டும் என்னும் கட்டாயம் கிடையாது என்றாலும், தோராயமாக 40-க்கும் மேற்பட்ட பங்குகளில் முதலீடு செய்யப்படும். பல துறை மற்றும் பல பங்குகளில் முதலீடு செய்திருப்பதால் ஒட்டுமொத்த முதலீடும் சரிவதற்கான வாய்ப்பு குறைவு. அதேசமயத்தில் நீண்ட காலத்தில் ஃபிக்ஸட் டெபாசிட்டை விட அதிக வருமானம் கொடுப்பதற்கு பங்குச்சந்தை சார்ந்த மியூச்சுவல் ஃபண்ட்களில் வாய்ப்பு உள்ளது. எந்த வகையான ஃபண்ட்? - 300 சதவீத வருமானம் கொடுத்திருக்கும் ஃபண்ட் என செய்திகளிலோ அல்லது சமூக வலைதளங்களிலோ நீங்கள் பார்த்திருக்கக் கூடும். இது உண்மையா என்றால் உண்மைதான். கொரோனா குறித்த செய்தி வெளியான சமயத்தில் கடந்த மார்ச் மாதம் பங்குச்சந்தையில் பெரும் சரிவில் இருந்தன. அப்போது முதல் தற்போது வரை சில மியூச்சுவல் ஃபண்ட்கள் 300 சதவீத வருமானம் கொடுத்துள்ளன. ஆனால், இந்த ஃபண்ட்கள் ஸ்மால்கேப் பிரிவைச் சார்ந்தவை. பங்குச்சந்தை சார்ந்த மியூச்சுவல் ஃபண்ட்களில் மூன்று முக்கிய பிரிவுகள் உள்ளன. லார்ஜ் கேப் ஃபண்ட்கள், மிட்கேப் ஃபண்ட்கள் மற்றும் ஸ்மால்கேப் ஃபண்ட்கள் என உள்ளன. (இது தவர வேறு சிலவும் உள்ளன.) லார்ஜ் கேப் ஃபண்ட் என்பது சந்தை மதிப்பில் அதிகம் உள்ள பங்குகளில் முதலீடு செய்யப்படும். மிட்கேப் என்பது நடுத்தர நிறுவனங்களில் முதலீடு செய்யப்படும். ஸ்மால்கேப் என்பது சிறிய நிறுவன பங்குகளில் முதலீடு செய்யப்படும். சிறிய நிறுவனங்களில் அதாவது ஸ்மால்கேப் ஃபண்ட்களில் வளர்ச்சிக்கான வாய்ப்பும் அதிகமாக இருக்கும். அதேபோல சரிவுக்கான வாய்ப்பும் அதிகமாக இருக்கும். ஆனால், அதிக ரிஸ்க் எடுக்க விரும்பும் முதலீட்டாளர்கள் மட்டுமே ஸ்மால்கேப் ஃபண்ட்களில் முதலீடு செய்யலாம். அதாவது, மிக நீண்ட காலம் என்பதை இலக்காக கொண்டால் ஸ்மால்கேப் ஃபண்ட்களில் முதலீடு செய்யலாம். லார்ஜ் கேப் ஃபண்ட்கள் என்பது அதிக சந்தை மதிப்பை கொண்ட பங்குகளில் முதலீடு செய்யப்படும். இந்த பங்குகளில் வளர்ச்சிக்கான வாய்ப்பும் சீராக இருக்கும், ஏற்றமும் சீராக இருக்கும். அதற்காக இந்த வகை ஃபண்ட்களில் செய்யப்பட்டுள்ள முதலீட்டில் சரிவு ஏற்படாது என சொல்ல முடியாது. பங்குச்சந்தை சார்ந்த எந்த முதலீடாக இருந்தாலும் வாங்கிய விலையில் இருந்து குறைவதற்கான வாய்ப்பு இருக்கிறது என்பதை முதலீட்டாளர்கள் புரிந்துகொள்ள வேண்டும். ஹைபிரிட் மியூச்சுவல் பண்ட்களும் உள்ளன. அதாவது, பங்குச்சந்தை மற்றும் கடன் சந்தை இரண்டிலும் கலந்து செய்யப்படும் முதலீடுகளும் உள்ளன. இதுபோல மியூச்சுவல் ஃபண்ட்களில் பல வகைகள் உள்ளன. முதலீட்டாளர்களின் ரிஸ்க் எடுக்கும் அளவுக்கு ஏற்ப நிதி ஆலோசகர்களின் உதவியுடன் ஃபண்ட்களை தேர்ந்தெடுத்துக் கொள்ளலாம். இன்னும் சில வாரங்களுக்குப் பிறகு மியூச்சுவல் ஃபண்ட் வகைகள் குறித்து மட்டும் பார்க்கலாம். நீச்சல் அடிப்பது குறித்து எவ்வளவுதான் படித்தாலும் கிணற்றில் குதித்தால் மட்டுமே நீச்சல் கற்றுக்கொள்ள முடியும். அதுபோல மியூச்சுவல் ஃபண்ட் குறித்து பலவற்றை படிப்பதை விட ஒரு சிறு தொகையை முதலீடு செய்தால்தான் எளிமையாக புரிந்துகொள்ள முடியும். சில ஃபண்ட்களில் ரூ.100 கூட குறைந்தபட்ச முதலீடு செய்ய முடியும். முயற்சி செய்து பாருங்களேன். முந்தைய அத்தியாயம்: பணம் பண்ண ப்ளான் B - 4: பங்குச்சந்தையில் நுழைய விழைவோருக்கு ஓர் அடிப்படை அலர்ட்!
http://dlvr.it/S9WXNz

Read More