``சின்ன வயசுல படிக்கணும்னு ஆசைப்பட்டேன்" - 104 வயதில் 100 க்கு 89 மதிப்பெண் எடுத்த குட்டியம்மா

`அனைவருக்கும் கல்வி' என்ற திட்டத்தின்படி கேரளாவில் எழுத்தறிவு தேர்வுகள் நடைபெற்று வருகின்றன. கடந்த வாரம் நடந்த எழுத்தறிவுக்கான தேர்வில் 100-க்கு 89 மதிப்பெண் பெற்று மாநிலத்தில் முதலிடம் பிடித்துள்ளார் கோட்டயம் திருவஞ்சியூரைச் சேர்ந்த 104 வயது மூதாட்டி குட்டியம்மா. பொக்கை வாய் திறந்து அ, ஆ, இ, ஈ... என மலையாள அக்‌ஷரங்களை சொல்லிச் சொல்லி சுருக்கம் விழுந்த கைகளால் பதமாக எழுதுகிறார் குடியம்மா. தள்ளாத வயதிலும் தளராமல் படித்து எழுத்தறிவுத் தேர்வு எழுதி சாதித்துள்ளார் மூதாட்டி குட்டியம்மா. எழுத்துத் தேர்வில் மலையாளம் மற்றும் கணக்குப் பாடங்களில் தேர்வு எழுதிய குட்டியம்மா, இனி நான்காம் வகுப்பு தேர்வு எழுதும் தகுதியைப் பெற்றுள்ளார் குட்டியம்மா. இதுபற்றி கேரள கல்வி அமைச்சர் சிவன்குட்டி தனது முகநூல் மற்றும் ட்விட்டர் உள்ளிட்ட சமூக வலைதளங்களில் பதிவிட்டதைத் தொடர்ந்து குட்டியம்மா வலைதளங்களில் வைரலானார்.குடும்பத்தினருடன் 104 வயது குட்டியம்மா இதுபற்றி 104 வயது மூதாட்டி குட்டியம்மா கூறுகையில், "படிக்க வேண்டும் என்ற ஆர்வம் எனக்கு சின்ன வயதிலேயே இருந்தது. ஆனால் அப்போது என்னால் பள்ளிக்குச் படிக்க முடியவில்லை. 104 வயதில் தேர்வு எழுதுவேன் என நான் நினைக்கவில்லை. எனக்கு நான்கு மகன்களும், ஒரு மகளும் உள்ளனர். என் பிள்ளைகள் நீங்கள் படிக்க வேண்டும் எனக் கூறினார்கள். அதனால் நான் இன்னும் ஆர்வமாக படித்தேன். இப்போது கேரளத்தில் முதலிடம் பிடித்திருப்பது மகிழ்ச்சியாக உள்ளது" என்றார். ஆசிரியர் ரெஹனா என்பவர்தான் குட்டியம்மாவுக்கு பாடம் எழுத்துச் சொல்லிக்கொடுத்தவர். ஆசிரியர் ரெஹனா கூறுகையில், "மலையாள செய்தித்தாள்களை வாசிக்கும் அளவுக்கு தெரிந்து வைத்திருந்த குட்டியம்மாவுக்கு எழுதத் தெரியாது. காலை மற்றும் மாலை நேரத்தில் நான் சென்று எழுத்துக்கள் கற்றுக்கொடுத்தேன். அவரும் ஆர்வமாகப் படித்தார். வயதான பெற்றோரை பாரமாக நினைத்து முதியோர் இல்லத்தில் சேர்க்கும் நிலை உள்ளது. இந்த நிலைமையை மாற்ற வயதானவர்கள் நேரத்தை பயனுள்ளதாக மாற்றி சாதிக்கலாம்" என்றார்.எழுத்து கற்றுக்கொடுத்த ஆசிரியர் ரெஹனாவுடன் குட்டியம்மா குட்டியம்மாவுக்கு 16-வது வயதில் கோந்தி என்பவருடன் திருமணம் நடந்தது. கோந்தி ஆயுர்வேத மருந்துக் கடையில் வேலை செய்துவந்தார். குட்டியம்மாவின் கணவர் கோந்தி 2002-ல் மரணம் அடைந்தார். அதன் பிறகு பிள்ளைகள் மற்றும் பேரப்பிள்ளைகளுடன் வாழ்ந்துவரும் குட்டியம்மா இப்போது கேரளத்தை தாண்டி பிரபலம் அடைந்துவிட்டார்.
http://dlvr.it/SCbl9k

Read More

``முதலில் சிறை சாப்பாட்டைச் சாப்பிடுங்கள்!" - மகாராஷ்டிரா முன்னாள் அமைச்சருக்கு கோர்ட் அறிவுரை

மகாராஷ்டிரா முன்னாள் அமைச்சர் அனில் தேஷ்முக்கின் பண மோசடி தொடர்பான வழக்கை அமலாக்கப் பிரிவு அதிகாரிகள் விசாரித்துவந்தனர். விசாரணைக்காக அமலாக்கத்துறையின் ஐந்து சம்மன்களுக்க்கு ஆஜராக மறுத்த அனில் தேஷ்முக், மும்பை உயர் நீதிமன்றம் கைவிட்டதால் கடந்த ஒன்றாம் தேதி விசாரணைக்கு ஆஜரானார். அவரிடம் 12 மணி நேரம் விசாரணை நடத்திய அமலாக்கப் பிரிவு அதிகாரிகள், அனில் தேஷ்முக்கை நள்ளிரவில் கைதுசெய்தனர். அவர், அமலாக்கத்துறையின் காவல் இன்று முடிவடைந்ததைத் தொடர்ந்து, அனில் தேஷ்முக் கோர்ட்டில் ஆஜர்படுத்தப்பட்டார். அனில் தேஷ்முக்கை 14 நாள்கள் நீதிமன்றக் காவலில் அடைக்க நீதிபதி உத்தரவிட்டார். அனில் தேஷ்முக் அப்போது குறுக்கிட்ட அனில் தேஷ்முக், சிறையில் வீட்டுச் சாப்பாடு கொடுக்க அனுமதிக்க வேண்டும் என்று கேட்டுக்கொண்டார். அப்போது நீதிபதி, ``முதலில் சிறைச் சாப்பாட்டை சாப்பிடுங்கள். அதன் பிறகு வீட்டுச் சாப்பாட்டை அனுமதிப்பது குறித்துப் பரிசீலிக்கிறேன்" என்று தெரிவித்தார். அதையடுத்து, மருத்துவக் காரணங்களுக்காகத் தன் உடல்நிலையைக் கருத்தில்கொண்டு சிறையில் படுக்கை வசதி கொடுக்க வேண்டும் என்று அனில் தேஷ்முக் நீதிபதியிடம் கேட்டுக்கொண்டார். அதை நீதிபதி ஏற்றுக்கொண்டார். தேசியவாத காங்கிரஸ் கட்சியைச் சேர்ந்த அனில் தேஷ்முக், மகாராஷ்டிராவில் உள்துறை அமைச்சராக இருந்தவர். தன் பதவிக்காலத்தில், அனில் தேஷ்முக் மும்பையிலுள்ள பீர் பார்கள், ஓட்டல்களில் மாதம் ரூ.100 கோடி மாமூல் வாங்கிக் கொடுக்கும்படி போலீஸ் அதிகாரிகளுக்கு நெருக்கடி கொடுத்தார் என்று மும்பை முன்னாள் போலீஸ் கமிஷனர் பரம்பீர் சிங், முதல்வர் உத்தவ் தாக்கரேவுக்குக் கடிதம் எழுதினார். இது தொடர்பாக மும்பை உயர் நீதிமன்றத்திலும் மனுத்தாக்கல் செய்தார். அதன் அடிப்படையில் அனில் தேஷ்முக் மீதான குற்றச்சாட்டு குறித்து விசாரிக்க சி.பி.ஐ-க்கு நீதிமன்றம் உத்தரவிட்டது. இதனால் அமைச்சர் பதவியிலிருந்து அனில் தேஷ்முக் விலகினார். Also Read: 'மகாராஷ்டிரா: 100 கோடி மாமூல் விவகாரம்! - மாஜி அமைச்சர் அனில் தேஷ்முக் மீது அமலாக்கத்துறை வழக்கு'
http://dlvr.it/SCZRqS

Read More

சென்னையில் 17, 18ஆம் தேதிகளில் கனமழைக்கு வாய்ப்பு - வானிலை ஆய்வு மையம்

சென்னையில் வரும் 17 மற்றும் 18ம் தேதி கனமழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது. இது தொடர்பாக சென்னை வானிலை ஆய்வு மையம் வெளியிட்டுள்ள அறிவிப்பில், ''தமிழகத்தில் 5 நாட்களுக்கு மழை பெய்யும். தென்கிழக்கு அரபிக்கடலில் இருந்து வட கேரளா, தெற்கு கர்நாடகா மற்றும் வட தமிழகம் வழியாக தென்மேற்கு வங்கக் கடல் வரை (4.5 கிலோ மீட்டர் உயரம் வரை) நிலவும் காற்றின் திசை மாறும் பகுதி காரணமாக 15.11.2021 தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். ஈரோடு, நீலகிரி, கோயம்புத்தூர், திருப்பூர், தேனி, திண்டுக்கல்,கிருஷ்ணகிரி, தர்மபுரி, சேலம், நாமக்கல், திருப்பத்தூர், வேலூர், ராணிப்பேட்டை, திருவண்ணாமலை, திருவள்ளூர், விழுப்புரம், கரூர், திருச்சிராப்பள்ளி, பெரம்பலூர் மற்றும் புதுவை பகுதிகளில் ஓரிரு இடங்களில் இடி மின்னலுடன் கூடிய கன முதல் மிக கன மழை பெய்ய வாய்ப்புள்ளது. 16.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும்., ஈரோடு, நீலகிரி, கோயம்புத்தூர், தேனி, திண்டுக்கல், திருப்பூர், சேலம், தர்மபுரி, நாமக்கல், கள்ளக்குறிச்சி மாவட்டங்களில் ஓரிரு இடங்களில் இடி மின்னலுடன் கூடிய கன மழை பெய்ய வாய்ப்புள்ளது. 17.11.2021,18.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். திருவள்ளூர், சென்னை, காஞ்சிபுரம், செங்கல்பட்டு, ராணிப்பேட்டை, வேலூர், விழுப்புரம், திருவண்ணாமலை, கள்ளக்குறிச்சி, கடலூர், டெல்டா மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி மின்னலுடன் கூடிய கன முதல் மிக கன மழை பெய்ய வாய்ப்புள்ளது. 19.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். வட மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் கன மழை பெய்ய வாய்ப்புள்ளது. சென்னையை பொறுத்தவரை அடுத்த 48 மணி நேரத்திற்கு வானம் பொதுவாக மேகமூட்டத்துடன் மேகமூட்டத்துடன் காணப்படும் நகரின் ஒரு சில இடங்களில் லேசானது அல்லது மிதமான மழை பெய்யக்கூடும். அதிகபட்ச வெப்பநிலை 30 மற்றும் குறைந்தபட்ச வெப்பநிலை 25 டிகிரி செல்சியஸை ஒட்டி இருக்கும். கடந்த 24 மணி நேரத்தில் பதிவான மழை அளவு (சென்டிமீட்டரில்): வளவனூர் (விழுப்புரம்) 12, களியல் (கன்னியாகுமரி), கோலியனூர் (விழுப்புரம்) தலா 10, ஜமுனாமரத்தூர் (திருவண்ணாமலை), லால்பேட்டை (கடலூர்), புத்தன் அணை (கன்னியாகுமரி) தலா 8, வேப்பூர் (கடலூர்), வெம்பாக்கம் (திருவண்ணாமலை), சுருளக்கோடு (கன்னியாகுமரி) பெருஞ்சாணி அணை (கன்னியாகுமரி), பேச்சிப்பாறை (கன்னியாகுமரி), விழுப்புரம் (விழுப்புரம்), சிவலோகம் (கன்னியாகுமரி) தலா 7, மஞ்சளாறு (தஞ்சாவூர்), சிற்றார் (கன்னியாகுமரி), கே.எம்.கோயில் (கடலூர்), கள்ளக்குறிச்சி தலா 6, ஜெயம்கொண்டம் (அரியலூர்), விராலிமலை (புதுக்கோட்டை), வானூர் (விழுப்புரம்), சோலையார் (கோவை), பாடலூர் (பெரம்பலூர்), தென்பரநாடு (திருச்சி), சத்யபாமா பல்கலை (செங்கல்பட்டு) தலா 5, வம்பன் (புதுக்கோட்டை), சிறுகுமணி (திருச்சி), குழித்துறை (கன்னியாகுமரி), பையூர் (கிருஷ்ணகிரி), வாலாஜா (இராணிப்பேட்டை), நெடுங்கல் (கிருஷ்ணகிரி), பண்ருட்டி (கடலூர்) , இரணியல் (கன்னியாகுமரி), அன்னவாசல் (புதுக்கோட்டை), கொரட்டூர் (திருவள்ளூர்), சின்னக்கல்லார் (கோவை ) தலா 4, மீனவர்களுக்கான எச்சரிக்கை: வங்க கடல் பகுதிகள் குறைந்த காற்றழுத்த தாழ்வு பகுதி மத்திய அந்தமான் கடற்பகுதியில் நிலவுகிறது. 15.11.2021: மன்னார் வளைகுடா பகுதிகளில் பலத்த காற்று மணிக்கு 35 முதல் 45 கிலோ மீட்டர் வேகத்தில் வீசக்கூடும்.மீனவர்கள் இப்பகுதியில் எச்சரிக்கையுடன் செல்லுமாறு அறிவுறுத்தப்படுகிறார்கள். 17.11.2021,19.11.2021: மத்திய மேற்கு மற்றும் அதனை ஒட்டிய தென் மேற்கு வங்க கடல் பகுதிகள், தெற்கு ஆந்திரா மற்றும் வட தமிழக கடலோர பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடைஇடையே 60 கிலோ மீட்டர் வேகத்திலும் வீசக்கூடும்.மீனவர்கள் இப்பகுதிகளுக்கு செல்ல வேண்டாம் என்று அறிவுறுத்தப்படுகிறார்கள் அரபிக்கடல் பகுதிகள் 15.11.2021: கேரளா கடலோரப் பகுதிகளில் பலத்த காற்று மணிக்கு 40 முதல் 50 கிலோ மீட்டர் வேகத்தில் வீசக்கூடும். 16.11.2021,17.11.2021: கேரளா, கர்நாடக கடலோரப் பகுதிகள், மத்திய கிழக்கு மற்றும் தென்கிழக்கு அரபிக்கடல் பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடைஇடையே 60 கிலோ மீட்டர் வேகத்திலும் வீசக்கூடும்.மீனவர்கள் இப்பகுதிகளுக்கு செல்ல வேண்டாம்'' என்று தெரிவிக்கப்பட்டுள்ளது.
http://dlvr.it/SCXKLr

Read More

பொறியியல் மாணவர்களுக்கான செமஸ்டர் தேர்வு முறையில் மாற்றமில்லை - அண்ணா பல்கலைக்கழகம்

பொறியியல் மாணவர்களுக்கான செமஸ்டர் தேர்வு முறையில் மாற்றமில்லை; நேரடி எழுத்துத்தேர்வாகவே நடைபெறும் என அண்ணா பல்கலைக்கழக துணைவேந்தர் வேல்ராஜ் திட்டவட்டமாக தெரிவித்துள்ளார். 'தேர்வுகளை ஆன்லைனில் நடத்த வேண்டும்' என்று தனியார் பொறியியல் கல்லூரிகள் கோரிக்கை விடுத்திருந்தனர். இந்நிலையில் தேர்வுகள் நேரடியாகவே நடத்தப்படும் என அண்ணா பல்கலைகழகம் தெரிவித்துள்ளது. இது தொடர்பாகதுணைவேந்தர் வேல்ராஜ், ''கல்லூரிகள் திறக்கப்பட்டுள்ளதால், தேர்வுகளை நேரடியாக நடத்துவதே உகந்ததாக இருக்கும். ஆன்லைனில் தேர்வுகளை நடத்தினால் மாணவர்களின் திறன் கேள்விக்குறியாகும். B.Arch., கலந்தாய்வில் தேர்வான மாணவர்கள் இன்று முதல் அவரவர் கல்லூரிகளுக்கு சென்று சேர்க்கையை உறுதி செய்து கொள்ளலாம்' என அவர் கூறியுள்ளார்.
http://dlvr.it/SCXKLW

Read More

``பெண் ஆசிரியர்களுக்கு புடவை என்பது கட்டாயமில்லை!" - கேரள உயர்கல்வித் துறை அமைச்சர்

``பெண் ஆசிரியர்கள் புடவைதான் அணிந்து வர வேண்டும் என்ற கட்டாயமில்லை. ஒருவரின் ஆடைத் தேர்வு என்பது அவர்களது தனிப்பட்ட விஷயம், அதில் யாரும் தலையிட முடியாது" என கேரளாவின் உயர்கல்வித் துறை அமைச்சர் ஆர். பிந்து கூறியுள்ளார். பெரும்பாலும் ஆசிரியைகள் என்றால் புடவைதான் அவர்களுக்கான சீருடை என்று இங்கே பதிந்து போயுள்ளது. இந்தியாவில் பெரும்பாலான மாநிலங்களில் ஆசிரியைகள் புடவையையே சீருடையாக உடுத்தி வருகின்றனர். Kerala minister R Bindu கேரளாவிலும் இதே நடைமுறைதான் உள்ளது. பலருக்கு இது அசௌகர்யமாக இருந்தாலும், இந்தப் பழக்கத்தையே பின்பற்றி வருகின்றனர். சில இளம் பெண் ஆசிரியர்கள், இதனை எதிர்த்து தற்போது குரல் எழுப்பி வருகின்றனர். அதைத் தொடர்ந்து, கேரளாவின் உயர்கல்வித் துறை அமைச்சர் ஆர். பிந்து, ``கேரளாவில் பெண் ஆசிரியர்கள் புடவைதான் அணிந்து வர வேண்டும் என்ற கட்டாயம் இல்லை, ஆடை என்பது முழுக்க முழுக்கத் தனிமனிதர்களின் உரிமை. அதில் தலையிடவோ, தங்களின் கருத்தைத் தெரிவிக்கவோ, விமர்சிக்கவோ யாருக்கும் உரிமையில்லை. அப்படிச் செய்வது, கேரளாவில் நிலவும் முற்போக்கு மனநிலைக்கு எதிரானதாக இருக்கும்" என தனது அறிக்கையில் தெரிவித்துள்ளார். மேலும், ``இது தொடர்பாக அரசு ஏற்கெனவே பலமுறை தனது நிலைப்பாட்டை தெளிவுபடுத்தியுள்ளது. கேரளாவில் எந்த வகையான கல்வி நிறுவனங்களில் பணிபுரிந்தாலும் ஆசிரியர்களுக்கு அவர்களின் வசதிக்கேற்ப ஆடை அணிவதற்கு முழு உரிமை உள்ளது. ஆனாலும் கேரளாவில் பல கல்வி நிலையங்கள், ஆசிரியர்கள் மீது புடவையைத் திணிக்கும் நடைமுறை சரியல்ல'' என்றும் தெரிவித்துள்ளார்.School Student (Representational Image) Also Read: ``ஏழைப் பெண்களின் திருமணத்துக்கு புடவை, லெஹெங்கா இலவசம்!'' - உதவும் கேரள மனிதரின் உடை வங்கி பெண் ஆசிரியர்கள் புடவை அணிவது கட்டாயமில்லை என, உயர் கல்வித் துறை கேரள கல்வி நிலையங்களுக்குத் தனது சுற்றறிக்கை மூலமும் அறிவித்துள்ளது. முன்னதாக, திருச்சூரில் உள்ள கேரள வர்மா கல்லூரியில் பேராசிரியையாக இருந்த அமைச்சர் ஆர். பிந்து, தான் கல்லூரிக்குப் பெரும்பாலும் சுடிதார் அணிந்தே சென்றதாகப் பகிர்ந்திருக்கிறார்.
http://dlvr.it/SCXKLN

Read More

முல்லைப் பெரியாறு: 142 அடியை எட்டும் தண்ணீர்; 7 ஆண்டுகளில் 4-வது முறை; இன்றைய நிலவரம் என்ன?

முல்லைப்பெரியாறு அணையின் நீர்பிடிப்புப் பகுதிகளில் கடந்த ஒரு மாதமாக தொடர்மழை பெய்து வருகிறது. இதனால் அணைக்கு நீர்வரத்து அதிகமாக உள்ளது. இதன் காரணமாக, அணையின் நீர்மட்டம் விரைவாக உயர்ந்தது. இதற்கிடையே அணையில் நீர் தேக்குவதற்கு `ரூல் கர்வ்' முறையைப் பின்பற்ற வேண்டும் என்ற உச்சநீதிமன்ற உத்தரவின் அடிப்படையில், நவம்பர் 11-ம் தேதி வரை தண்ணீர் திறக்கப்பட்டது.முல்லைப் பெரியாறு Also Read: முல்லை பெரியாறு விவகாரம்: இந்த உண்மைகளை கேரள அரசியல்வாதிகள் உணர மறுப்பது ஏன்? இதையடுத்து கேரள பகுதிக்கு தண்ணீர் திறப்பு நிறுத்தப்பட்டுள்ளது. இதனால் அணையின் நீர்மட்டம் விரைவாக அதிகரிக்கத் தொடங்கியுள்ளது. நவம்பர் 14-ம் தேதி நிலவரப்படி அணையின் நீர்மட்டம் 140 அடியை எட்டியது. நீர்வரத்து விநாடிக்கு 2880 கனஅடியாகவும், நீர்திறப்பு விநாடிக்கு 1867 கனஅடியாகவும் (தமிழகத்துக்கு) இருந்தது. இதைத்தொடர்ந்து தேனி மாவட்டத்தில் உள்ள முல்லைப்பெரியாற்றின் கரையோரம் வசிக்கும் மக்களுக்கு முதல்கட்ட வெள்ள அபாய எச்சரிக்கை விடப்பட்டுள்ளது. இதேபோல, கேரள மாநிலத்தில் முல்லைப்பெரியாறு முதல் இடுக்கி அணை வரை உள்ள வண்டிப்பெரியாறு, சப்பாத்து உள்ளிட்ட கரையோர பகுதிகளுக்கும் வெள்ள அபாய எச்சரிக்கை விடப்பட்டுள்ளது. மேலும், இன்றைய நிலவரப்படி அணையின் நீர்மட்டம் 140.35 அடியாக உள்ளது. நீர்வரத்து 3378 கனஅடியாகவும், நீர்திறப்பு 2300 கனஅடியாகவும் உள்ளது. எனவே விரைவில் அணைநீர்மட்டம் 142 அடியை எட்டும் நிலை உள்ளது. இதனால் கேரள பகுதிக்கு தண்ணீர் திறக்கவிட வாய்ப்புள்ளதால், இடுக்கி மாவட்டத்தில் தாழ்வான பகுதிகளில் வசிக்கும் மக்களை பாதுகாப்பான இடங்களுக்கும், அரசின் முகாம்களுக்கும் செல்ல இடுக்கி மாவட்ட நிர்வாகம் அறிவித்துள்ளது.கரையோர பகுதி Also Read: முல்லைப் பெரியாறு: பேபி அணையைப் பலப்படுத்த கேரள அரசு பச்சை கொடி... புதிய அணை திட்டம் கைவிடப்படுமா?! கடந்த 2014-ம் ஆண்டு வழங்கப்பட்ட உச்சநீதிமன்ற உத்தரவுக்கு பின், 2014, 2015, 2018 ஆகிய ஆண்டுகளில் அணையில் 142 அடி நீர் தேக்கப்பட்டது. இதையடுத்து 4-வது முறையாக 142 அடியை எட்ட உள்ளதால் தமிழக விவசாயிகள் மிகவும் மகிழ்ச்சியடைந்துள்ளனர். இதன்மூலம் 3 போக சாகுபடியை உறுதி செய்ய முடியும் என்றும், அணையின் உறுதித் தன்மையும் மீண்டும் நிரூபித்துக் காட்டப்படும் என்றும் தேனி மாவட்ட விவசாயிகள் மகிழ்ச்சி தெரிவித்துள்ளனர்.
http://dlvr.it/SCXKLD

Read More

”கொலிஜியத்தின் முடிவை எதிர்ப்பது சரியல்ல”- ஓய்வு பெற்ற நீதிபதி கற்பகவிநாயகம் பேட்டி

ஓய்வு பெற்ற உயர்நீதிமன்ற முன்னாள் தலைமை நீதிபதி கற்பகவிநாயகம், நீதிபதி சஞ்சீவ் பானர்ஜி இடமாற்றம் குறித்து புதிய தலைமுறைக்கு பேட்டியளித்துள்ளார்.  சென்னை உயர்நீதிமன்ற தலைமை நீதிபதி சஞ்சீவ் பானர்ஜியை மேகாலயா உயர்நீதிமன்றத்திற்கு இடமாற்றம் செய்யும் கொலிஜியத்தின் பரிந்துரைக்கு, தமிழகத்தை சேர்ந்த மூத்த வழக்கறிஞர்கள் பலரும் எதிர்ப்பு தெரிவித்து கடிதம் எழுதி உள்ளனர். இந்த விவகாரம் தொடர்பாக ஜார்கண்ட் மாநிலத்தின் முன்னாள் தலைமை நீதிபதி கற்பகவிநாயகம் புதிய தலைமுறைக்கு பேட்டி அளித்தார். அப்போது அவர் கூறுகையில், “நான் சென்னை உயர்நீதிமன்றத்தில் பத்து வருடங்களுக்கு மேலாக பணிபுரிந்து இருக்கிறேன். அதேபோன்று ஜார்க்கண்ட் மாநில உயர் நீதிமன்றத்தின் தலைமை நீதிபதியாகவும் பணியாற்றி உள்ளேன். மேலும் பல்வேறு பொறுப்புகளிலும் இருந்துள்ளேன். சஞ்சீவ் பானர்ஜி இடமாற்றம் விவகாரத்தில் நான் சொல்லும் ஒரே பதில், ஏற்கனவே சென்னை உயர்நீதிமன்ற நீதிபதியாக இருந்த தஹில் ரமணியை மேகாலயா மாநில உயர்நீதிமன்ற தலைமை நீதிபதியாக இடம் மாற்றம் செய்தனர். ஆனால் அவர் உடனே ராஜினாமா செய்தார். ஆனால் அவர் ராஜினாமா செய்த பிறகு அவர் மீதான குற்றச்சாட்டுகள் வெளியே வந்தன. குறிப்பாக விதிமுறைகளை மீறி இடம் வாங்கியதாக புகார் எழுந்து வழக்குப்பதிவு செய்து விசாரணை என்பது நடைபெற்று வருகிறது. இது நீதித்துறைக்கு ஒரு களங்கமும் போன்று உள்ளது. நீதிபதிகளை பணி மாற்றம் செய்ய கொலிஜியத்துக்கு அதிகாரம் உள்ளது. இதுபோன்ற காலகட்டத்தில் கொலிஜியம் சில நீதிபதிகளிடம் கருத்துக்களை மட்டுமே கேட்கும். கொலிஜியம் ஏற்கனவே எடுத்த முடிவுகளை மாற்றுவது சற்று கடினம். தொடர்புடைய செய்தி: பதவியேற்ற 10 மாதங்களில் நீதிபதி சஞ்சிவ்பானர்ஜியின் இடமாற்றமா?-237 வழக்கறிஞர்கள் எதிர்ப்பு ஏற்கனவே கடந்த காலங்களில் தமிழகத்தைச் சேர்ந்த நீதிபதி பக்தவச்சலம் என்பவரை மாற்றும் முடிவுக்கு எதிர்ப்பு வந்தபோது அவரை அருகே இருக்கக்கூடிய கர்நாடக மாநில உயர்நீதிமன்றத்தில் நீதிபதியாக மாற்றினர். தொடர்ந்து அவர் கர்நாடக உயர்நீதிமன்றத்தில் பணியாற்றி ஓய்வு பெற்றுவிட்டார். இதனால் சஞ்சீவ் பானர்ஜி இடமாற்றம் விவகாரத்தில் கொலிஜியம் மீண்டும் பரிசீலனை செய்ய வாய்ப்பு இருக்கிறது. அதேநேரம் சஞ்சீவ் பானர்ஜி, தகில் ரமணியை போன்று ராஜினாமா செய்யாமல் கொலிஜியத்தின் முடிவை ஏற்றுக்கொள்ள வேண்டும். என்னைக்கூட ஜெயலலிதா ஆட்சிக் காலத்தில் வேறு மாநிலத்திற்கு மாற்ற முயற்சி மேற்கொள்ளப்பட்டது. ஆனால் அதனை கொலிஜியம் ஏற்றுக்கொள்ளவில்லை. கொலிஜியத்தின் முடிவை எதிர்த்து செல்வது சரியல்ல. அதையும்மீறி ‘ஏன் பணி மாற்றம் செய்ய உள்ளீர்கள்’ என்ற காரணத்தை கேட்டால் அவர்கள் எவ்வளவோ காரணத்தை தெரிவிக்க வாய்ப்பு இருக்கிறது. சஞ்சீவ் பானர்ஜி பணிமாற்றம் செய்யக்கூடாது என இவ்வளவு பேர் தெரிவிக்கும் பொழுது, அவரின் நேர்மை தெளிவாகிறது. ஆனால் அதேநேரம் சஞ்சீவ் பானர்ஜி விவகாரத்தில் பல்வேறு நடைமுறைச் சிக்கல் காரணமாகத் தான் கொலிஜியம் இந்த முடிவை எடுத்திருக்க வாய்ப்பு உள்ளது. 75 நீதிபதிகளை சமாளித்து சென்றவருக்கு சிறந்த வாய்ப்பு வழங்கப்பட்டு பெரிய உயர்நீதிமன்றத்தில் நீதிபதியாக பணியாற்ற வாய்ப்பு வழங்க வேண்டும்” என ஓய்வு பெற்ற உயர்நீதிமன்ற முன்னாள் தலைமை நீதிபதி கற்பகவிநாயகம் தெரிவித்தார்.
http://dlvr.it/SCW4w4

Read More