கோவை மாணவியின் அடையாளங்களை வெளிப்படுத்திய 48 யூடியூப் சேனல்கள் மீது வழக்குப் பதிவு

கோவையில் 12ம் வகுப்பு மாணவி தற்கொலை செய்துகொண்ட சம்பவத்தில், மாணவியின் அடையாளங்களை வெளிப்படுத்தியதாக கோவை மாநகர சைபர் கிரைம் காவல் துறையினர் 48 யூடியூப் சேனல்கள் மீது போக்சோ சட்டம் 23(2) கீழ் வழக்கு பதிவு செய்துள்ளனர். இதற்கு முன்னதாக, கோவை ஆர்.எஸ். புரத்தில் உள்ள சின்மயா வித்யாலயா பள்ளியில் 12 ஆம் வகுப்பு படித்து வந்த 17 வயது மாணவி, அங்கு தொடர்ந்து படிக்க விரும்பாமல் மாநகராட்சிப் பள்ளியில் சேர்ந்துள்ளார். இந்நிலையில் அந்த மாணவி, கடந்த 11ஆம் தேதி வீட்டில் தூக்கு போட்டு தற்கொலை செய்து சின்மயா வித்யாலயா பள்ளி ஆசிரியர் மிதுன் சக்கரவர்த்தி உள்ளிட்ட 3 பெயர்கள் மீது நடவடிக்கை எடுக்க வேண்டும் என்று கடிதம் எழுதியுள்ளார். இதையடுத்து மாணவியின் செல்போன் கைப்பற்றப்பட்டு ஆய்வு செய்ததில், அவருக்கு ஆசிரியர் மிதுன் சக்கரவர்த்தி பாலியல் தொல்லை கொடுத்தது கண்டறியப்பட்டது.மாணவர்கள் மற்றும் பெண்கள் அமைப்பினர் நீதி கேட்டு போராட்டத்தில் ஈடுபட்ட நிலையில் ஆசிரியர் மிதுன் சக்கரவர்த்தி போக்ஸோ சட்டத்தில் கைது செய்யப்பட்டு, உடுமலைப்பேட்டை சிறையில் அடைக்கப்பட்டார். இதனிடையே, ஆசிரியரின் பாலியல் தொல்லை பற்றி மாணவி புகார் அளித்தும் எவ்வித நடவடிக்கையும் எடுக்கப்படவில்லை என தெரியவந்தது. இதையடுத்து சின்மயா வித்யாலயா பள்ளியின் முதல்வர் மீரா ஜாக்சனின் பெயரை வழக்கில் சேர்த்த காவல் துறையினர் அவரைத் தேடினர். அவர் தலைமறைவானதோடு செல்போனும் அணைக்கப்பட்டிருந்தது. பின்னர் செல்போன் ஆன் செய்யப்பட்டபோது, மீரா ஜாக்சன் பெங்களூருவில் பதுங்கியிருந்ததைக் கண்டுபிடித்த தனிப்படையினர், அங்கு விரைந்து சென்று அவரை கைது செய்தனர். மாணவிக்கு ஏற்பட்ட பாலியல் தொந்தரவு குறித்து நன்கு அறிந்த பிறகும் பள்ளி முதல்வர் மீரா ஜாக்சன், காவல்துறைக்கு தகவல் தெரிவிக்காததால், போக்சோ சட்டத்தின் கீழ் அவரை கைது செய்ததாக காவல் துறையினர் தெரிவித்தனர். கோவைக்கு கொண்டுவரப்பட்ட பள்ளி முதல்வர் மீரா ஜாக்சனிடம் காவல்துறையினர் 12 மணி நேரம் விசாரணை நடத்தினர். பின்னர் மகளிர் நீதிமன்ற நீதிபதி நந்தினி வீட்டில் ஆஜர்படுத்தப்பட்டார். அவரை வரும் 26 ஆம் தேதி வரை நீதிமன்ற காவலில் அடைக்க நீதிபதி உத்தரவிட்டதை அடுத்து, மீரா ஜாக்சன் கோவை மத்திய சிறையில் அடைக்கப்பட்டார். பள்ளியின் முதல்வர் கைது செய்யப் பட்டதால், மாணவியின் உடலை அவரது உறவினர்கள் பெற்றுக் கொண்டனர்.
http://dlvr.it/SCf4Hb

Read More

"சூர்யாவுக்கு எதுவும் ஆகாது; யாராலும் எதுவும் செய்யமுடியாது''- கோபி நயினார் சிறப்பு பேட்டி

சூர்யா இயக்கி நடித்துள்ள 'ஜெய்பீம்' திரைப்படம் விவாதப் பொருளாகியுள்ளது. படத்தை பலர் பாராட்டி வரும் நிலையில், சிலர் எதிர்த்து வருகின்றனர். ஜெய்பீம் அரசியல் தளத்தில் கவனம் பெற்று வரும் சூழலில், இது குறித்து இயக்குநர் கோபி நயினாரிடம் பேசினோம். 'ஜெய்பீம்' பட விவகாரத்தில் சூர்யாவுக்கு தமிழ் சினிமாவிலிருந்து ஆதரவுக் குரல் ஓங்கி ஒலிக்கவில்லை என்று சொல்லப்படுகிறதே... இங்கே எல்லாமே வர்க்கமாகத்தான் இருக்கிறது. அதை நாம் குற்றப்படுத்தவும் முடியாது. ஏனென்றால் விடுதலை அரசியல் என்பது கடினமான  பாதை. மிகவும் சொற்ப நபர்களால் மட்டுமே இதற்குள் இறங்கி வேலை செய்ய முடியும். ஏனெனில் கலை அரசியல் என்பது  நடைமுறையுடன் தொடர்புடையது. அந்த நடைமுறைக்கான பயிற்சி இல்லாவிட்டால், கலை அரசியலை மக்களுக்கான விடுதலையை நோக்கி கொண்டு செல்ல முடியாது. இந்திய சினிமாவின் மொத்தமும் வணிகமாக மாறியிருக்கிறது. அதிலிருக்கும் ஒவ்வொருவரும் தன்னுடைய வாழ்வை வணிகமாக மாற்றிக்கொண்டிருக்கிறார்கள். அது ஒரு கலை வாழ்வாக மாறவில்லை என்பதை கவனிக்க வேண்டியிருக்கிறது. முற்றிலும் வணிக வாழ்வாக மாறி கார்ப்ரேட்களை நம்பியிருக்கிறது.  அப்படிப்பார்த்தால், நாம் பேசும் கருத்து சூர்யாவுக்கு ஆதரவு தரவேண்டும், தரக்கூடாது என்ற மனநிலையிலிருந்து உருவாவதில்லை. மாறாக, நாம் பேசிவிட்டால், எதிர்காலத்தில் சூர்யாவுக்கு ஏற்படுகின்ற இன்னல்கள் நமக்கும் ஏற்பட்டுவிடுமோ, நம்மை நம்பி முதலீடு செய்கின்ற முதலீட்டாளர்களுக்கு பாதிப்பு ஏற்படுமோ என்ற பயமாக இருக்க கூட இருக்கலாம். அதனால், அவர்கள் சூர்யாவுக்கு ஆதரவு தெரிவிக்காமல் தவிர்த்திருக்கலாம்.ஆனால் அந்த அச்சம் இருக்கும்வரை, நாம் வணிகத்தை ஈட்டும் மெஷினாக இருக்கலாமே தவிர, மனித வாழ்வுக்கு ஆதரவான கலைஞனாக ஒருபோதும் நம்மால் இருக்க முடியாது. அப்படித்தான் இதை நாம் பார்க்கவேண்டியிருக்கிறது. வெளிச்சத்துக்கு வராத மக்களின் வாழ்வை பதிவு செய்யும் கதைகள் படமாக்கப்பட்டு வருகிறது. அவற்றுக்கு அரசியல் ரீதியில் எதிர்ப்புகளும் அழுத்தங்களும் வரும்போது, இந்த கதைக்களத்தை தேர்வு செய்ய எதிர்காலத்தில் இயக்குநர்கள் தயங்க வாய்ப்புள்ளதா? கண்டிப்பாக அப்படி நடக்க வாய்ப்பில்லை. 10 வருடங்களுக்கு முன்பு இதுபோன்ற திரைப்படங்கள் கிடையாது. 10 வருடங்களுக்கு பிறகு இப்படியான படங்கள் வருகிறது என்றால், நம்மை ஒரு கட்டமைப்புக்குள் அடைத்து அழுத்தம்போது, அந்த அழுத்தத்தால் ஒருவேளை நாம் இறந்துவிட்டால், அதற்கு மேல் அழுத்தி எந்த பயனும் இல்லை. ஆனால், அந்த அழுத்தத்தை மீறி வீறு கொண்டு அவர்கள் எழுந்துவிட்டால், இனியும் அழுத்துவதால் உங்களுக்கு எந்த லாபமும் இல்லை. அது உங்களுக்கு ஆபத்து தான். அதனால், இது போன்ற சினிமாக்கள் எதிர்காலத்தில் இன்னும் அதிகரிக்குமே தவிர, குறையாது. ஜெய்பீம் படத்தை பார்த்தவுடன், 'மக்கள் படம் பார்த்துவிட்டு நகர்ந்து சென்றுவிடுவார்கள். சூர்யா என்ற தனிநபரை மிரட்டிவிடலாம்' என அவர்கள் நினைத்தார்கள். ஆனால், விளைவு படத்தை பார்த்தவர்கள் சூர்யாவுக்கு ஆதரவாக களமிறங்கிவிட்டார்கள். அதனால் வீரியம் தான் அதிகரித்துள்ளது. இதன்மூலம் சூர்யாவுக்கான பலம் அதிகரிக்குமே தவிர நீர்த்துப்போகாது. இந்த அச்சுறுத்தல் அச்சுறுத்துபவர்களையும், அவர்களை சார்ந்தவர்களையும் திருப்திபடுத்திவிடுகிறது. எனக்கு கோவம் வந்தால் நான் கெட்டவார்த்தை பேசுகிறேன் என்றால் என்னை நானே திருப்திபடுத்திக்கொள்கிறேன் என அர்த்தம். 'எட்டி உதைத்தால் ஒருலட்சம்' என்பதெல்லாமும் கூட ஒரு வகையில் கெட்ட வார்த்தைதான். அப்படிப்பார்த்தால் அவர்கள் திருப்தி படுத்திக்கொள்ளும் விதமாக பேசுயிருக்கிறார்கள். ஆனால், ஒருபோதும் அவர்களால் எட்டி உதைக்க முடியாது என்பதுதான் உண்மை. இதுபோன்ற படங்களை ஏற்றுக்கொள்ள முடியாத மனநிலையில் வெளிப்பாடாக சில தரப்பினரின் இந்த எதிர்ப்புகளை பார்க்க முடியுமா? தொழிலாளி தன்னுடைய உரிமையை பற்றி பேசக்கூடாது, ஒடுக்கப்பட்டவர் சாதி ஒழிப்பை பற்றி பேசக்கூடாது, பகுத்தறிவாளர் அறிவியலைப்பற்றி பேசக்கூடாது, பெண் தன் மீதான ஆண் வன்கொடுமைக்கு எதிராக பேசக்கூடாது, குழந்தை தொழிலாளர்கள் முதலாளி வன்கொடுமைக்கு எதிராக பேசக்கூடாது, மதச்சிறுப்பான்மையினர் தங்கள் உரிமைகளுக்காக பேசக்கூடாது என்பது தான் இந்த கார்ப்ரேட் உலகத்தின் மிகப்பெரிய அஜெண்டா. இது போன்ற எதிர்ப்பு குரல் அவர்களின் அரசியல் வணிகத்திற்கு பெரும் நஷ்டம். ஆகவே அவர்கள் மிரட்டத்தான் செய்வார்கள்.  அதை நாம் கண்டுக்கொள்ள கூடாது; அதைப்பற்றி நாம் கவலைப்படத்தேவையில்லை. சூர்யா போன்ற கலைஞர்கள், இந்த படத்தை இயக்கிய இயக்குநர் போல இன்னும் நிறைய பேர் வந்துகொண்டேயிருப்பார்கள். இதன் பெரும்பான்மை கூடிக்கொண்டே செல்லும். தடுக்கவே முடியாது. இது இன்னும் பெருகிக் கொண்டேயிருக்கும். அதற்கான வேலைகளை முற்போக்கு அமைப்புகள் செய்யும். இதை மறுக்கவே முடியாது. உதாரணமாக நாம் கம்யூனிஸ்ட் கட்சியில் இல்லை என்றபோதும், என்னுடைய உழைப்பு சுரண்டப்பட்டுகொண்டிருக்கிறது என்றால் நானும் ஒரு கம்யூனிஸ்ட்தான்! காரணம் என்னப்பற்றித்தான் அந்த கம்யூனிச கோட்பாடு பேசுகிறது. என் உழைப்புச் சுரண்டல் குறித்து நான் வேண்டுமானால் கவனிக்காமல் இருக்கலாம். ஆனால் என் அரசியல் களம் கம்யூனிசம்.   என்னை மீட்க ஒருவன் வருவான். அவன் பேசும்போது, அவனுடன் நான் அணித்திரள்வேன். அணித்திரள்வதற்கான எல்லா வாய்ப்புகளையும் இதுபோன்ற திரைப்படங்களும் கலைஞர்களும் உருவாக்குவார்கள். அது நடந்தே தீரும். மறுக்க முடியாது. உங்களால் என்ன செய்ய முடியும்? உலகம் முழுவதும் ஆதிக்க சக்தியினர் மைனாரிட்டி தான்; விடுதலை பேசுபவர்கள் தான் மெஜாரிட்டி. இவர்கள் விடுதலை பேச தயங்குவதாலும், அவர்களிடத்தில் போதியஅறிவை கொண்டு சேர்க்காத காரணத்தினாலும் அவர்கள் மைனாரிட்டியாக உலகத்துக்கு தெரிவார்களே தவிர, அவர்கள் எப்போதும் மெஜாரிட்டி தான். ஒடுக்கப்பட்ட, உழைக்கும் மக்கள் அணித்திரளும்போது எல்லாம் மாறும். சூர்யாவுக்கு எப்போதும் எதுவும் ஆகாது; சூர்யாவுக்கு எதிராக யாராலும் எதையும் செய்ய முடியாது'' என்று தெரிவித்துள்ளார்.
http://dlvr.it/SCblMk

Read More

கொளத்தூர் பகுதியில் பிரச்னை இல்லையா? தண்ணீர் தேங்கி நிற்க வில்லையா? - குஷ்பு சுந்தர்

கொளத்தூர் பகுதியில் பிரச்னை இல்லையா? தண்ணீர் தேங்கி நிற்க வில்லையா? என குஷ்பு சுந்தர் கேள்வி எழுப்பியுள்ளார்.  சென்னை பட்டினம்பாக்கம் கடற்கரை சாலையில் அமைந்துள்ள டுமீல் குப்பம் பகுதியில் மழையால் பாதிக்கப்பட்ட மக்களுக்கு ஆறுதல் கூறி 500 பேருக்கு ப்ரெட் மற்றும் பால் பாக்கெட்டுகளை, நடிகையும் பாஜக செயற்குழு உறுப்பினருமான குஷ்பு சுந்தர் வழங்கினார். அதன்பின் செய்தியாளரிடம் பேசிய குஷ்பு அவர்களுடைய கேள்விகளுக்கு பதிலளித்தார். அப்போது ’’ தமிழக முதல்வரை தவிர அரசில் வேறுயாரும் இந்த கனமழை பேரிடர் காலத்தில் ஒழுங்காக வேலை செய்யவில்லை; கொளத்தூர் பகுதியில் பிரச்னை இல்லையா? தண்ணீர் தேங்கி நிற்க வில்லையா? அதிமுக காலத்தில் ஏற்பட்ட சூழல், திமுக ஆட்சியில் ஏற்படவில்லையா? திமுகதான் ஊழல் கட்சி’’ என்றார். நடிகர் சூர்யா தொடர்பான சர்ச்சை குறித்து கேட்டபோது, அது குறித்து தனக்கு எதுவும் தெரியாது எனவும், பார்த்துவிட்டு தெரிவிக்கிறேன் எனவும் கூறினார்.  செய்தியாளர்களின் கேள்விக்கு பதிலளித்துக்கொண்டிருக்கும்போதே அங்கு உதவிபெற வந்த பெண்மணி ஒருவர், ’’5 கிலோ அரிசி கொடுத்திருந்தால் கூட பிரயோஜனமாக இருந்திருக்கும் ,தற்போது நீங்கள் கொடுத்திருக்கும் ப்ரெட் மற்றும் பால் ஒருவேளைக்குக்கூட பத்தாது’’ என வேதனையோடு தெரிவித்தார். அதற்கு குஷ்பு, உறுதியாக செய்கிறோம் என்று அவரிடம் கூறினார். மழை சேதங்களை சீரமைக்க ரூ.300 கோடி - முதல்வர் மு.க. ஸ்டாலின் அறிவிப்பு 
http://dlvr.it/SCblL0

Read More

தமிழகத்தில் 10 மாவட்டங்களுக்கு கனமழை எச்சரிக்கை: சென்னை வானிலை மையம்

தமிழகத்தில் 10 மாவட்டங்களில் கன மழைக்கான வாய்ப்பிருப்பதாக சென்னை வானிலை ஆய்வு மையம் தெரிவித்துள்ளது. அந்தவகையில் கள்ளக்குறிச்சி, சேலம், நாமக்கல், ஈரோடு, தர்மபுரி, அரியலூர், தஞ்சை, திருச்சி உள்ளிட்ட 10 மாவட்டங்களில் இடியுடன் கூடிய கனமழை பெய்ய வாய்ப்பிருப்பதாக தெரிவிக்கப்பட்டுள்ளது. போலவே நாளையும் நாளை மறுநாளும் சென்னை, திருவள்ளூர், காஞ்சிபுரம் மாவட்டங்களில் மிக கனமழை பெய்யும் என்றும் தெரிவிக்கப்பட்டுள்ளது. கனமழை இருக்குமென்பதால் தென்கிழக்கு வங்கக் கடல் அதனை ஒட்டிய மத்திய வங்கக் கடல், அந்தமான் கடற்பகுதியில் மத்திய கிழக்கு தென்கிழக்கு அரபிக்கடல், கர்நாடக கடலோர பகுதிகளுக்கு மீனவர்கள் செல்ல வேண்டாம் என அறிவுறுத்தப்பட்டுள்ளது. இதுதொடர்பாக வானிலை ஆய்வு மையம் சார்பில் இயக்குனர் புவியரசன் தெரிவித்துள்ள தகவலில் கூறப்பட்டிருப்பவை: “தென்கிழக்கு மற்றும் மத்திய கிழக்கு வங்கக் கடல் மற்றும் அதனை ஒட்டிய அந்தமான் கடல் பகுதியில் நிலவும் குறைந்த காற்றழுத்த தாழ்வு பகுதி அடுத்த இரண்டு நாட்களில் மேற்கு திசையில் நகர்ந்து வரும் 18ஆம் தேதி தெற்கு ஆந்திரா - வட தமிழக கடற்கரை நோக்கி நகரக்கூடும். இதன் காரணமாக, 16.11.2021 (இன்று) - கள்ளக்குறிச்சி, சேலம், நாமக்கல், ஈரோடு, தர்மபுரி, அரியலூர், பெரம்பலூர், கடலூர், தஞ்சாவூர், திருச்சிராப்பள்ளி, மாவட்டங்களில் ஓரிரு இடங்களில் இடி மின்னலுடன் கூடிய கன மழையும், டெல்டா மாவட்டங்கள் மற்றும் புதுவை, காரைக்கால் பகுதிகளில் அநேக இடங்களில் இடி மின்னலுடன் கூடிய மிதமான மழையும், ஏனைய மாவட்டங்களில் அநேக இடங்களில் லேசானது முதல் மிதமான மழை பெய்யக்கூடும். 17.11.2021: சென்னை, திருவள்ளூர், காஞ்சிபுரம், மாவட்டங்களில் ஓரிரு இடங்களில் இடி மின்னலுடன் கூடிய கன முதல் மிக கன மழையும், ராணிப்பேட்டை, செங்கல்பட்டு, சேலம், அரியலூர், பெரம்பலூர் மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி மின்னலுடன் கூடிய கன மழையும், ஏனைய மாவட்டங்களில் அநேக இடங்களில் லேசானது முதல் மிதமான மழையும் பெய்யக்கூடும். 18.11.2021: திருவள்ளூர், சென்னை, ராணிப்பேட்டை, காஞ்சிபுரம் மாவட்டங்களில் ஒரு சில இடங்களில் இடி மின்னலுடன் கூடிய கன முதல் மிக கன மழையும், ஓரிரு இடங்களில் அதி கன மழையும், செங்கல்பட்டு, திருவண்ணாமலை மாவட்டங்களில் ஓரிரு இடங்களில் இடி மின்னலுடன் கூடிய கன முதல் மிக கன கன மழையும், சேலம், தர்மபுரி, கிருஷ்ணகிரி, ஈரோடு, கள்ளக்குறிச்சி, கடலூர் மற்றும் புதுவை பகுதிகளில் ஓரிரு இடங்களில் இடி மின்னலுடன் கூடிய கன மழையும், டெல்டா மாவட்டங்கள் மற்றும் காரைக்கால் பகுதிகளில் அநேக இடங்களில் மிதமான மழையும், ஏனைய மாவட்டங்களில் லேசானது முதல் மிதமான மழையும் பெய்யக்கூடும். 19.11.2021: அரியலூர், பெரம்பலூர், திருச்சிராப்பள்ளி, சேலம், விழுப்புரம், கள்ளக்குறிச்சி, கடலூர், டெல்டா மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி மின்னலுடன் கூடிய கன மழையும், ஏனைய மாவட்டங்களில் அநேக இடங்களில் லேசானது முதல் மிதமான மழையும் பெய்யக்கூடும் 20.11.2021 திருவண்ணாமலை, வேலூர், ராணிப்பேட்டை, தர்மபுரி, கிருஷ்ணகிரி, சேலம் மற்றும் கள்ளக்குறிச்சி மாவட்டங்களில் ஓரிரு இடங்களில் இடி மின்னலுடன் கூடிய கன மழையும், ஏனைய மாவட்டங்கள் மற்றும் புதுவை, காரைக்கால் பகுதிகளில் அநேக இடங்களில் லேசானது முதல் மிதமான மழையும் பெய்யக்கூடும். சென்னையை பொறுத்தவரை அடுத்த 24 மணி நேரத்திற்கு நகரின் ஒரு சில இடங்களில் லேசானது / மிதமான மழை பெய்யக்கூடும். அதிகபட்ச வெப்பநிலை 32 மற்றும் குறைந்தபட்ச வெப்பநிலை 25 டிகிரி செல்சியஸை ஒட்டி இருக்கும். அடுத்த 48 மணி நேரத்திற்கு நகரின் ஒரு சில இடங்களில் இடி மின்னலுடன் கூடிய கன முதல் மிக கன மழை பெய்யக்கூடும். தொடர்புடைய செய்தி: சென்னையில் 17, 18ஆம் தேதிகளில் கனமழைக்கு வாய்ப்பு - வானிலை ஆய்வு மையம் கடந்த 24 மணி நேரத்தில் பதிவான மழை அளவு (சென்டிமீட்டரில்): மதுக்கூர் (தஞ்சாவூர்), செட்டிகுளம் (பெரம்பலூர்) தலா 10, திருத்துறைப்பூண்டி (திருவாரூர்), லக்கூர் (கடலூர்) தலா 7, கிராண்ட் அணை (தஞ்சாவூர்), மணலூர்பேட்டை (கள்ளக்குறிச்சி) தலா 6, சிவகங்கை, கல்லிக்குடி (மதுரை), கிருஷ்ணகிரி, தென்பரநாடு (திருச்சி), புதுக்கோட்டை, வீரகனூர் (சேலம்), திருப்புவனம் (சிவகங்கை), சிற்றார் (கன்னியாகுமரி), லால்குடி திருச்சி , திருக்காட்டுப்பள்ளி (தஞ்சாவூர்), மணம்பூண்டி (விழுப்புரம்), சிவலோகம் (கன்னியாகுமரி) தலா 5, மருங்காபுரி (திருச்சி), ஆலங்குடி (புதுக்கோட்டை), விராலிமலை (புதுக்கோட்டை), சங்கராபுரம் (கள்ளக்குறிச்சி), மலையூர் (புதுக்கோட்டை), பேச்சிப்பாறை (கன்னியாகுமரி), திருவையாறு (தஞ்சாவூர்), பெருஞ்சாணி அணை (கன்னியாகுமரி) திருச்சிராப்பள்ளி, வெட்டிக்காடு (தஞ்சாவூர்) தலா 4, வேப்பூர் (கடலூர்), பெருங்களூர் (புதுக்கோட்டை), திண்டுக்கல் (திண்டுக்கல்), காரைக்குடி (சிவகங்கை), திருமானூர் (அரியலூர்), துறையூர் (திருச்சி), காமாட்சிபுரம் (திண்டுக்கல்), பட்டுக்கோட்டை (தஞ்சாவூர்), சேலம், சுருளக்கோடு (கன்னியாகுமரி), ஓமலூர் (சேலம்), சமயபுரம் (திருச்சி), தொழுதூர் (கடலூர்), பாலவிடுதி (கரூர்), பழனி (திண்டுக்கல்), அரிமளம் (புதுக்கோட்டை), மஞ்சளாறு (தஞ்சாவூர்), தலா 3. வங்க கடல் பகுதிக்கு செல்லும் மீனவர்களுக்கான எச்சரிக்கை: 16.11.2021: தென்கிழக்கு வங்க கடல் மற்றும் அதனை ஒட்டிய மத்திய கிழக்கு வங்க கடல் பகுதிகள், அந்தமான் கடல் பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும். 17.11.2021, 18.11.2021: மத்திய மேற்கு, தென்மேற்கு வங்க கடல், தெற்கு ஆந்திரா மற்றும் வட தமிழக கடலோர பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும். மீனவர்கள் இப்பகுதிகளுக்கு செல்ல வேண்டாம் என்று அறிவுறுத்தப்படுகிறார்கள் அரபிக்கடல் பகுதிக்கு செல்லும் மீனவர்களுக்கான எச்சரிக்கை: 16.11.2021: மத்திய கிழக்கு, தென்கிழக்கு அரபிக்கடல் பகுதிகள் மற்றும் கர்நாடக கடலோரப் பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடைஇடையே 60 கிலோ மீட்டர் வேகத்திலும் வீசக்கூடும். மீனவர்கள் இப்பகுதிகளுக்கு செல்ல வேண்டாம் என்று அறிவுறுத்தப்படுகிறார்கள் மேலும் விவரங்களுக்கு, imdchennai.gov.in இணையதளத்தை காணவும்” என்று குறிப்பிடப்பட்டுள்ளது.
http://dlvr.it/SCblG0

Read More

``சின்ன வயசுல படிக்கணும்னு ஆசைப்பட்டேன்" - 104 வயதில் 100 க்கு 89 மதிப்பெண் எடுத்த குட்டியம்மா

`அனைவருக்கும் கல்வி' என்ற திட்டத்தின்படி கேரளாவில் எழுத்தறிவு தேர்வுகள் நடைபெற்று வருகின்றன. கடந்த வாரம் நடந்த எழுத்தறிவுக்கான தேர்வில் 100-க்கு 89 மதிப்பெண் பெற்று மாநிலத்தில் முதலிடம் பிடித்துள்ளார் கோட்டயம் திருவஞ்சியூரைச் சேர்ந்த 104 வயது மூதாட்டி குட்டியம்மா. பொக்கை வாய் திறந்து அ, ஆ, இ, ஈ... என மலையாள அக்‌ஷரங்களை சொல்லிச் சொல்லி சுருக்கம் விழுந்த கைகளால் பதமாக எழுதுகிறார் குடியம்மா. தள்ளாத வயதிலும் தளராமல் படித்து எழுத்தறிவுத் தேர்வு எழுதி சாதித்துள்ளார் மூதாட்டி குட்டியம்மா. எழுத்துத் தேர்வில் மலையாளம் மற்றும் கணக்குப் பாடங்களில் தேர்வு எழுதிய குட்டியம்மா, இனி நான்காம் வகுப்பு தேர்வு எழுதும் தகுதியைப் பெற்றுள்ளார் குட்டியம்மா. இதுபற்றி கேரள கல்வி அமைச்சர் சிவன்குட்டி தனது முகநூல் மற்றும் ட்விட்டர் உள்ளிட்ட சமூக வலைதளங்களில் பதிவிட்டதைத் தொடர்ந்து குட்டியம்மா வலைதளங்களில் வைரலானார்.குடும்பத்தினருடன் 104 வயது குட்டியம்மா இதுபற்றி 104 வயது மூதாட்டி குட்டியம்மா கூறுகையில், "படிக்க வேண்டும் என்ற ஆர்வம் எனக்கு சின்ன வயதிலேயே இருந்தது. ஆனால் அப்போது என்னால் பள்ளிக்குச் படிக்க முடியவில்லை. 104 வயதில் தேர்வு எழுதுவேன் என நான் நினைக்கவில்லை. எனக்கு நான்கு மகன்களும், ஒரு மகளும் உள்ளனர். என் பிள்ளைகள் நீங்கள் படிக்க வேண்டும் எனக் கூறினார்கள். அதனால் நான் இன்னும் ஆர்வமாக படித்தேன். இப்போது கேரளத்தில் முதலிடம் பிடித்திருப்பது மகிழ்ச்சியாக உள்ளது" என்றார். ஆசிரியர் ரெஹனா என்பவர்தான் குட்டியம்மாவுக்கு பாடம் எழுத்துச் சொல்லிக்கொடுத்தவர். ஆசிரியர் ரெஹனா கூறுகையில், "மலையாள செய்தித்தாள்களை வாசிக்கும் அளவுக்கு தெரிந்து வைத்திருந்த குட்டியம்மாவுக்கு எழுதத் தெரியாது. காலை மற்றும் மாலை நேரத்தில் நான் சென்று எழுத்துக்கள் கற்றுக்கொடுத்தேன். அவரும் ஆர்வமாகப் படித்தார். வயதான பெற்றோரை பாரமாக நினைத்து முதியோர் இல்லத்தில் சேர்க்கும் நிலை உள்ளது. இந்த நிலைமையை மாற்ற வயதானவர்கள் நேரத்தை பயனுள்ளதாக மாற்றி சாதிக்கலாம்" என்றார்.எழுத்து கற்றுக்கொடுத்த ஆசிரியர் ரெஹனாவுடன் குட்டியம்மா குட்டியம்மாவுக்கு 16-வது வயதில் கோந்தி என்பவருடன் திருமணம் நடந்தது. கோந்தி ஆயுர்வேத மருந்துக் கடையில் வேலை செய்துவந்தார். குட்டியம்மாவின் கணவர் கோந்தி 2002-ல் மரணம் அடைந்தார். அதன் பிறகு பிள்ளைகள் மற்றும் பேரப்பிள்ளைகளுடன் வாழ்ந்துவரும் குட்டியம்மா இப்போது கேரளத்தை தாண்டி பிரபலம் அடைந்துவிட்டார்.
http://dlvr.it/SCbl9k

Read More

``முதலில் சிறை சாப்பாட்டைச் சாப்பிடுங்கள்!" - மகாராஷ்டிரா முன்னாள் அமைச்சருக்கு கோர்ட் அறிவுரை

மகாராஷ்டிரா முன்னாள் அமைச்சர் அனில் தேஷ்முக்கின் பண மோசடி தொடர்பான வழக்கை அமலாக்கப் பிரிவு அதிகாரிகள் விசாரித்துவந்தனர். விசாரணைக்காக அமலாக்கத்துறையின் ஐந்து சம்மன்களுக்க்கு ஆஜராக மறுத்த அனில் தேஷ்முக், மும்பை உயர் நீதிமன்றம் கைவிட்டதால் கடந்த ஒன்றாம் தேதி விசாரணைக்கு ஆஜரானார். அவரிடம் 12 மணி நேரம் விசாரணை நடத்திய அமலாக்கப் பிரிவு அதிகாரிகள், அனில் தேஷ்முக்கை நள்ளிரவில் கைதுசெய்தனர். அவர், அமலாக்கத்துறையின் காவல் இன்று முடிவடைந்ததைத் தொடர்ந்து, அனில் தேஷ்முக் கோர்ட்டில் ஆஜர்படுத்தப்பட்டார். அனில் தேஷ்முக்கை 14 நாள்கள் நீதிமன்றக் காவலில் அடைக்க நீதிபதி உத்தரவிட்டார். அனில் தேஷ்முக் அப்போது குறுக்கிட்ட அனில் தேஷ்முக், சிறையில் வீட்டுச் சாப்பாடு கொடுக்க அனுமதிக்க வேண்டும் என்று கேட்டுக்கொண்டார். அப்போது நீதிபதி, ``முதலில் சிறைச் சாப்பாட்டை சாப்பிடுங்கள். அதன் பிறகு வீட்டுச் சாப்பாட்டை அனுமதிப்பது குறித்துப் பரிசீலிக்கிறேன்" என்று தெரிவித்தார். அதையடுத்து, மருத்துவக் காரணங்களுக்காகத் தன் உடல்நிலையைக் கருத்தில்கொண்டு சிறையில் படுக்கை வசதி கொடுக்க வேண்டும் என்று அனில் தேஷ்முக் நீதிபதியிடம் கேட்டுக்கொண்டார். அதை நீதிபதி ஏற்றுக்கொண்டார். தேசியவாத காங்கிரஸ் கட்சியைச் சேர்ந்த அனில் தேஷ்முக், மகாராஷ்டிராவில் உள்துறை அமைச்சராக இருந்தவர். தன் பதவிக்காலத்தில், அனில் தேஷ்முக் மும்பையிலுள்ள பீர் பார்கள், ஓட்டல்களில் மாதம் ரூ.100 கோடி மாமூல் வாங்கிக் கொடுக்கும்படி போலீஸ் அதிகாரிகளுக்கு நெருக்கடி கொடுத்தார் என்று மும்பை முன்னாள் போலீஸ் கமிஷனர் பரம்பீர் சிங், முதல்வர் உத்தவ் தாக்கரேவுக்குக் கடிதம் எழுதினார். இது தொடர்பாக மும்பை உயர் நீதிமன்றத்திலும் மனுத்தாக்கல் செய்தார். அதன் அடிப்படையில் அனில் தேஷ்முக் மீதான குற்றச்சாட்டு குறித்து விசாரிக்க சி.பி.ஐ-க்கு நீதிமன்றம் உத்தரவிட்டது. இதனால் அமைச்சர் பதவியிலிருந்து அனில் தேஷ்முக் விலகினார். Also Read: 'மகாராஷ்டிரா: 100 கோடி மாமூல் விவகாரம்! - மாஜி அமைச்சர் அனில் தேஷ்முக் மீது அமலாக்கத்துறை வழக்கு'
http://dlvr.it/SCZRqS

Read More

சென்னையில் 17, 18ஆம் தேதிகளில் கனமழைக்கு வாய்ப்பு - வானிலை ஆய்வு மையம்

சென்னையில் வரும் 17 மற்றும் 18ம் தேதி கனமழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது. இது தொடர்பாக சென்னை வானிலை ஆய்வு மையம் வெளியிட்டுள்ள அறிவிப்பில், ''தமிழகத்தில் 5 நாட்களுக்கு மழை பெய்யும். தென்கிழக்கு அரபிக்கடலில் இருந்து வட கேரளா, தெற்கு கர்நாடகா மற்றும் வட தமிழகம் வழியாக தென்மேற்கு வங்கக் கடல் வரை (4.5 கிலோ மீட்டர் உயரம் வரை) நிலவும் காற்றின் திசை மாறும் பகுதி காரணமாக 15.11.2021 தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். ஈரோடு, நீலகிரி, கோயம்புத்தூர், திருப்பூர், தேனி, திண்டுக்கல்,கிருஷ்ணகிரி, தர்மபுரி, சேலம், நாமக்கல், திருப்பத்தூர், வேலூர், ராணிப்பேட்டை, திருவண்ணாமலை, திருவள்ளூர், விழுப்புரம், கரூர், திருச்சிராப்பள்ளி, பெரம்பலூர் மற்றும் புதுவை பகுதிகளில் ஓரிரு இடங்களில் இடி மின்னலுடன் கூடிய கன முதல் மிக கன மழை பெய்ய வாய்ப்புள்ளது. 16.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும்., ஈரோடு, நீலகிரி, கோயம்புத்தூர், தேனி, திண்டுக்கல், திருப்பூர், சேலம், தர்மபுரி, நாமக்கல், கள்ளக்குறிச்சி மாவட்டங்களில் ஓரிரு இடங்களில் இடி மின்னலுடன் கூடிய கன மழை பெய்ய வாய்ப்புள்ளது. 17.11.2021,18.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். திருவள்ளூர், சென்னை, காஞ்சிபுரம், செங்கல்பட்டு, ராணிப்பேட்டை, வேலூர், விழுப்புரம், திருவண்ணாமலை, கள்ளக்குறிச்சி, கடலூர், டெல்டா மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி மின்னலுடன் கூடிய கன முதல் மிக கன மழை பெய்ய வாய்ப்புள்ளது. 19.11.2021: தமிழ்நாடு மற்றும் புதுவை, காரைக்கால் பகுதிகளில் அனேக இடங்களில் லேசானது முதல் மிதமான மழை பெய்யக்கூடும். வட மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் கன மழை பெய்ய வாய்ப்புள்ளது. சென்னையை பொறுத்தவரை அடுத்த 48 மணி நேரத்திற்கு வானம் பொதுவாக மேகமூட்டத்துடன் மேகமூட்டத்துடன் காணப்படும் நகரின் ஒரு சில இடங்களில் லேசானது அல்லது மிதமான மழை பெய்யக்கூடும். அதிகபட்ச வெப்பநிலை 30 மற்றும் குறைந்தபட்ச வெப்பநிலை 25 டிகிரி செல்சியஸை ஒட்டி இருக்கும். கடந்த 24 மணி நேரத்தில் பதிவான மழை அளவு (சென்டிமீட்டரில்): வளவனூர் (விழுப்புரம்) 12, களியல் (கன்னியாகுமரி), கோலியனூர் (விழுப்புரம்) தலா 10, ஜமுனாமரத்தூர் (திருவண்ணாமலை), லால்பேட்டை (கடலூர்), புத்தன் அணை (கன்னியாகுமரி) தலா 8, வேப்பூர் (கடலூர்), வெம்பாக்கம் (திருவண்ணாமலை), சுருளக்கோடு (கன்னியாகுமரி) பெருஞ்சாணி அணை (கன்னியாகுமரி), பேச்சிப்பாறை (கன்னியாகுமரி), விழுப்புரம் (விழுப்புரம்), சிவலோகம் (கன்னியாகுமரி) தலா 7, மஞ்சளாறு (தஞ்சாவூர்), சிற்றார் (கன்னியாகுமரி), கே.எம்.கோயில் (கடலூர்), கள்ளக்குறிச்சி தலா 6, ஜெயம்கொண்டம் (அரியலூர்), விராலிமலை (புதுக்கோட்டை), வானூர் (விழுப்புரம்), சோலையார் (கோவை), பாடலூர் (பெரம்பலூர்), தென்பரநாடு (திருச்சி), சத்யபாமா பல்கலை (செங்கல்பட்டு) தலா 5, வம்பன் (புதுக்கோட்டை), சிறுகுமணி (திருச்சி), குழித்துறை (கன்னியாகுமரி), பையூர் (கிருஷ்ணகிரி), வாலாஜா (இராணிப்பேட்டை), நெடுங்கல் (கிருஷ்ணகிரி), பண்ருட்டி (கடலூர்) , இரணியல் (கன்னியாகுமரி), அன்னவாசல் (புதுக்கோட்டை), கொரட்டூர் (திருவள்ளூர்), சின்னக்கல்லார் (கோவை ) தலா 4, மீனவர்களுக்கான எச்சரிக்கை: வங்க கடல் பகுதிகள் குறைந்த காற்றழுத்த தாழ்வு பகுதி மத்திய அந்தமான் கடற்பகுதியில் நிலவுகிறது. 15.11.2021: மன்னார் வளைகுடா பகுதிகளில் பலத்த காற்று மணிக்கு 35 முதல் 45 கிலோ மீட்டர் வேகத்தில் வீசக்கூடும்.மீனவர்கள் இப்பகுதியில் எச்சரிக்கையுடன் செல்லுமாறு அறிவுறுத்தப்படுகிறார்கள். 17.11.2021,19.11.2021: மத்திய மேற்கு மற்றும் அதனை ஒட்டிய தென் மேற்கு வங்க கடல் பகுதிகள், தெற்கு ஆந்திரா மற்றும் வட தமிழக கடலோர பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடைஇடையே 60 கிலோ மீட்டர் வேகத்திலும் வீசக்கூடும்.மீனவர்கள் இப்பகுதிகளுக்கு செல்ல வேண்டாம் என்று அறிவுறுத்தப்படுகிறார்கள் அரபிக்கடல் பகுதிகள் 15.11.2021: கேரளா கடலோரப் பகுதிகளில் பலத்த காற்று மணிக்கு 40 முதல் 50 கிலோ மீட்டர் வேகத்தில் வீசக்கூடும். 16.11.2021,17.11.2021: கேரளா, கர்நாடக கடலோரப் பகுதிகள், மத்திய கிழக்கு மற்றும் தென்கிழக்கு அரபிக்கடல் பகுதிகளில் சூறாவளி காற்று மணிக்கு 40 முதல் 50 கிலோ மீட்டர் வேகத்திலும் இடைஇடையே 60 கிலோ மீட்டர் வேகத்திலும் வீசக்கூடும்.மீனவர்கள் இப்பகுதிகளுக்கு செல்ல வேண்டாம்'' என்று தெரிவிக்கப்பட்டுள்ளது.
http://dlvr.it/SCXKLr

Read More