''ஈடு செய்ய முடியாத இழப்பு'' - பிபின் ராவத் மறைவுக்கு முதல்வர் மு.க.ஸ்டாலின் இரங்கல்

முப்படைத் தலைமை தளபதி பிபிவின் ராவத் மறைவுக்கு முதலமைச்சர் மு.க.ஸ்டாலின் இரங்கல் தெரிவித்துள்ளார். குன்னூர் அருகே காட்டேரி மலைப்பாதையில் வானில் பறந்துகொண்டிருந்த ராணுவ ஹெலிகாப்டர் கீழே விழுந்து விபத்துக்குள்ளானது. இதில் பயணித்த முப்படைத் தலைமை தளபதி பிபிவின் ராவத், அவரது மனைவி உள்ளிட்ட 13 பேர் உயிரிழந்தனர். இந்நிலையில், வெலிங்கடன் ராணுவ மருத்துவமனைக்குச் சென்ற முதலமைச்சர் மு.க.ஸ்டாலின் சிகிச்சையில் உள்ள விமானப்படை கேப்டனின் உடல்நிலை குறித்து கேட்டறிந்தார். ஹெலிகாப்டர் விபத்து குறித்து ராணுவ அதிகாரிகளிடம் முதலமைச்சர் மு.க.ஸ்டாலின் விசாரித்தார். முன்னதாக அவர் தனது ட்விட்டர் பக்கத்தில் பிபின் ராவத் மறைவுக்கு இரங்கல் தெரிவித்துள்ளார். ''இந்தியாவின் முதல் முப்படைத் தலைமை தளபதி ஜெனரல் பிபின் ராவத், மதுலிகா ராவத் மற்றும் 11 ஆயுதப்படை வீரர்களின் மறைவு மிகுந்த வருத்தத்தை ஏற்படுத்தியுள்ளது. இந்த ஈடுசெய்ய முடியாத இழப்பில் தேசத்துடன் இணைந்து இரங்கல் தெரிவிப்பதோடு, அவர்களை இழந்து வாடும் குடும்பத்தினருக்கு எனது இரங்கலைத் தெரிவித்துக் கொள்கிறேன்'' என தெரிவித்துள்ளார்.
http://dlvr.it/SF1Zn8

Read More

வானூர்தி விபத்தில் உயிரிழந்த பிரபலங்கள் : சஞ்சய் காந்தி முதல் பிபின் ராவத் வரை!

தமிழ்நாட்டின் குன்னூரில் இந்திய நாட்டின் முப்படைகளின் தலைமைத் தளபதி பிபின் ராவத் உட்பட 14 பேர் பயணித்த ஹெலிகாப்டர் விபத்தில் சிக்கியது. இந்த விபத்தில் தலைமைத் தளபதி பிபின் ராவத் உயிரிழந்துள்ளார். அவருடன் பயணித்த அவரது மனைவியும் மற்றும் 11 ராணுவ அதிகாரிகளும் இந்த விபத்தில் உயிரிழந்துள்ளனர்.  இந்த நிலையில் கடந்த காலங்களில் வானூர்தி விபத்தில் உயிரிழந்த பிரபலங்களின் துயரம் மிக்க முடிவு குறித்து பார்க்கலாம்.  இந்திய நாட்டின் விடுதலைக்காக போராடிய நேதாஜி சுபாஷ் சந்திர போஸ், கடந்த 1945-இல் தைவானில் வானூர்தி விபத்தில் உயிரிழந்தார். இருப்பினும் அவரது இறப்பு குறித்த சர்ச்சை நிலவி வருகிறது.  ஒய்.எஸ்.ராஜசேகர ரெட்டி! கடந்த 2009-இல் ஆந்திர மாநில முதலமைச்சராக இருந்த ஒய்.எஸ்.ராஜசேகர ரெட்டி பயணம் செய்த ஹெலிகாப்டர் விபத்தில் சிக்கியதால் அவர் மரணம் அடைந்தார். பெல் 430 ரக ஹெலிகாப்டரில் சித்தூர் மாவட்டத்திற்கு பயணித்த போது அவர் விபத்தில் சிக்கினார். காட்டுப் பகுதியில் இந்த விபத்து ஏற்பட்டது. அவரது உடல் சுமார் 27 மணி நேர தேடுதலுக்கு பிறகே அடையாளம் காணப்பட்டது. இவரது மகன் ஜெகன் மோகன் ரெட்டி தற்போது ஆந்திர மாநில முதல்வராக உள்ளார்.  சஞ்சய் காந்தி! முன்னாள் இந்திய பிரதமர் இந்திரா காந்தி, பிரதமராக பதவியில் இருந்த போது அவரது இளைய மகன் சஞ்சய் காந்தி விமான விபத்தில் உயிரிழந்தார். 1980-இல் கிளைடரில் பயணம் செய்த அவர் விபத்தில் சிக்கினார். டெல்லியில் உள்ள  சப்தர்ஜங் விமான நிலையமருகே இந்த விபத்து நடைபெற்றது. கிளைடர் டேக்-ஆஃப் செய்யப்பட்ட நிலையில் இந்த விபத்து நடந்துள்ளது.  மாதவ்ராவ் சிந்தியா! காங்கிரஸ் கட்சியின் மூத்த தலைவர்களில் ஒருவரான மாதவ்ராவ் சிந்தியா கடந்த 2001-இல் தனி விமானத்தில் பயணித்த போது விபத்தில் சிக்கி உயிரிழந்தார். மாதவ்ராவ் சிந்தியா உட்பட அந்த விமானத்தில் பயணித்த 8 பேரும் உயிரிழந்தனர். அதில் 4 பேர் பத்திரிகையாளர்கள், 2 பேர் விமானிகள், ஒருவர் மாதவ்ராவ் சிந்தியாவின் உதவியாளர் என அனைவரும் உயிரிழந்தனர். உத்தரப் பிரதேச மாநிலத்தில் இந்த விபத்து நடைபெற்றது. அவர் பேரணி கூட்டம் ஒன்றில் பங்கேற்க கான்பூர் சென்ற போது விபத்து ஏற்பட்டது.  ஜி.எம்.சி. பாலயோகி! முன்னாள் மக்களவை தலைவரும், தெலுங்கு தேசம் கட்சியை சார்ந்தவருமான ஜி.எம்.சி. பாலயோகி கடந்த 2002-இல் ஆந்திர பிரதேசத்தில் ஹெலிகாப்டரில் பயணித்த போது விபத்தில் சிக்கி உயிரிழந்தார். பெல் 206 ரக ஹெலிகாப்டரில் அவர் பயணம் செய்திருந்தார். இந்த விபத்து ஆந்திராவின் கிருஷ்ணா மாவட்டத்தில் நடைபெற்றது. ஓம் பிரகாஷ் ஜிண்டால்! கடந்த 2005-இல் ஹரியானா மாநில மின்சார துறை அமைச்சராக இருந்த ஓம் பிரகாஷ் ஜிண்டால் மற்றும் அப்போதைய ஹரியானா மாநில விவசாய துறை அமைச்சராக இருந்த சுரேந்திர சிங் ஆகியோர் பயணித்த ஹெலிகாப்டர் தொழில்நுட்ப கோளாறு காரணமாக விபத்தில் சிக்கியது. இந்த விபத்தில் அவர்கள் இருவரும் உயிரிழந்தனர். சுரேந்திரா நாத்!  கடந்த 1994-இல் அப்போதைய பஞ்சாப் மாநில ஆளுநராக பதவியில் இருந்த சுரேந்திரா நாத், தனது குடும்பத்துடன் அரசாங்கத்தின் சூப்பர் கிங் விமானத்தில் பயணித்த போது விபத்தில் சிக்கி உயிரிழந்தார். மோசமான வானிலை காரணமாக இந்த விபத்து ஏற்பட்டுள்ளது. இந்த விபத்து இமாச்சல் பிரதேச மாநிலத்தில் நடைபெற்றுள்ளது. அப்போது அவர் இமாச்சல் மாநிலத்தின் பொறுப்பு ஆளுநராகவும் இருந்தார். இந்த விபத்தில் அவரது குடும்பத்தினர் 9 பேர் உயிரிழந்தனர்.  டோர்சி கண்டு! அருணாச்சல் பிரதேச மாநிலத்தின் முன்னாள் முதல்வர் டோர்சி கண்டு பயணித்த Eurocopter B8 ரக ஹெலிகாப்டர் விபத்தில் சிக்கியது. பல நாட்கள் தேடுதல் வேட்டைக்கு பிறகு அவர் சென்ற விமானம் விபத்தில் சிக்கிய இடம் அடையாளம் காணப்பட்டது. பதவியில் இருந்த போதே அவர் விபத்தில் சிக்கி உயிரிழந்தார். அவர் சென்ற ஹெலிகாப்டர் விபத்தில் சிக்க காரணம் மோசமான வானிலை என சொல்லப்பட்டது. சீன நாட்டின் எல்லை அருகே அவரது உடல் கண்டெடுக்கப்பட்டது. 
http://dlvr.it/SF0QLF

Read More

முப்படைகளின் தலைமைத் தளபதி பிபின் ராவத்தின் வீரக் கதை!

முப்படைகளின் தலைமைத் தளபதி பிபின் ராவத் பயணித்த ஹெலிகாப்டர் விபத்து நீலகிரி மாவட்டம் குன்னூர் அருகே உள்ள அரசுக்கு சொந்தமான எஸ்டேட் பகுதியில் விபத்தில் சிக்கியது. இந்த ஹெலிகாப்டர் தரையிறங்க வெறும் ஐந்து நிமிடங்கள் மட்டுமே எஞ்சியிருக்க விபத்து ஏற்பட்டுள்ளது. இந்த விபத்தினால் ஹெலிகாப்டர் எரிந்து சாம்பலாகி உள்ளது. தலைமைத் தளபதி பிபின் ராவத் உட்பட 14 பேர் இந்த ஹெலிகாப்டரில் பயணித்துள்ளனர்.  இதுவரை 13 பேர் உயிரிழந்துள்ளதாக தகவல் கிடைத்துள்ளது. உயிரிழந்தவர்களில் தலைமைத் தளபதி பிபின் ராவத்தூம் ஒருவர். அவருடன் அவரது மனைவி Madhulika ராவத்தும் பயணம் செய்துள்ளார். இந்த துயரமான சூழலில் தலைமை தளபதி பிபின் ராவத் குறித்து தெரிந்து கொள்வோம்.  உத்தராகண்ட் மண்ணின் மைந்தர்! தலைமை தளபதி பிபின் ராவத், கடந்த 1958 மார்ச், 16 அன்று உத்தராகண்ட் மாநிலத்தில் உள்ள Pauri டவுனில் பிறந்தவர். அவருக்கு வயது 63. தலைமுறை தலைமுறையாக இந்திய ராணுவத்தில் அவரது குடும்பம் சேவையாற்றி வந்துள்ளது. பிபின் ராவத்தின் தந்தையார் லக்ஷ்மண் சிங் ராவத் ராணுவத்தில் லெப்டினன்ட் ஜெனரல் ரேங்க் அதிகாரியாக பணியாற்றியவர். டேராடூன் மற்றும் ஷிம்லாவில் அவர் பள்ளிக் கல்வி பயின்றுள்ளார். பின்னர் தேசிய பாதுகாப்பு அகாடமி மற்றும் இந்திய ராணுவ அகாடமியில் மேற்படிப்பு பயின்றவர். குன்னூரில் உள்ள வெலிங்டனில் இந்தியாவின் முப்படை அதிகாரிகளின் கூட்டுப் பயிற்சி நிறுவனத்தில் பட்டம் பெற்றுள்ளார். கடந்த 2011-இல் முனைவர் பட்டம் பெற்றுள்ளார் அவர். அமெரிக்காவின் ராணுவ கமெண்ட் மற்றும் ஜெனரல் ஸ்டாப் கல்லூரியில் Higher Command கோர்ஸ் முடித்துள்ளார்.  இந்திய ராணுவத்தில் பணி! 43 ஆண்டுகளுக்கு முன்னர் இதே டிசம்பரில் இந்திய ராணுவத்தில் இணைந்த அவர் அப்போது முதலே நாட்டுக்காக சேவையாற்றுவதை தனது உயிர் மூச்சாக கொண்டிருந்துள்ளார். ராணுவத்தில் அவர் இணைந்த போது அவருக்கு வயது 20. உத்தரப் பிரதேச மாநிலம் லக்னோவில் உள்ள 11-வது கோர்க்கா ரைபிள்ஸ் யூனிட்டில் அவர் சேர்ந்துள்ளார். அதே யூனிட்டில் தான் அவரது தந்தை லக்ஷமண் பணியாற்றி உள்ளார். ராணுவ மேஜராக ஜம்மு காஷ்மீரின் உரி (URI) டவுனில் ஒரு கம்பெனி (80 முதல் 250 வீரர்கள் அடங்கிய குழு) ராணுவத்தை கமெண்ட் செய்துள்ளார். கர்னலாக இந்திய - சீன எல்லையான Line of Actual Control-இல் பணியாற்றி உள்ளார். பிரிகேடியர், மேஜர் ஜெனரல், லெப்டினன்ட் ஜெனரல் என பல்வேறு ராணுவ ரேங்குகளில் அவர் பணியாற்றியுள்ளார். சர்வதேச ராணுவ படைகளுக்கு தலைமை தாங்கியுள்ளார்.   முப்படைகளின் தலைமைத் தளபதி! ராணுவத் தளபதியாக பணியாற்றி வந்த பிபின் ராவத் கடந்த 2019 டிசம்பர், 30 அன்று முப்படைகளின் தலைமைத் தளபதியாக பணியமர்த்தப்பட்டார். இந்திய நாட்டின் முதல் முப்படைகளின் தலைமைத் தளபதி அவர்தான். 1987-இல் ராவத்தின் பட்டாலியன் படையினர் McMahon Line-இல் சீனாவுக்கு எதிராக களமிறக்கப்பட்டனர். 2015-இல் இந்தியா-மியான்மர் எல்லையில் பயங்கரவாதிகள் மீது நடத்தப்பட்ட அதிரடி தாக்குதலை கமெண்ட் செய்ததும் அவர்தான்.  “இந்திய நாட்டுக்கு மிகப்பெரிய பாதுகாப்பு அச்சுறுத்தலாக சீனா மாறியுள்ளது” என சீனா குறித்து கடந்த நவம்பரில் பிபின் ராவத் சொல்லி இருந்தார்.   பரம் விஷிஷ்ட் சேவா பதக்கம், உத்தம் யுத் சேவா பதக்கம், அதி விஷிஷ்ட் சேவா பதக்கம், யுத் சேவா பதக்கம், சேனா பதக்கம், விஷிஷ்ட் சேவா பதக்கம் என பல்வேறு பதக்கங்களை நாட்டுக்காக ராணுவத்தில் சேவையாற்றியதன் மூலம் பெற்றுள்ளார்.  கடந்த 2019-இல் அவர் ராணுவத்தில் இருந்து ஓய்வு பெற வேண்டி இருந்தது. சரியாக ஓய்வு பெறுவதற்கு ஒருநாள் முன்னதாக அவர் முப்படைகளின் தலைமைத் தளபதியாக நியமிக்கப்பட்டார். அதை ஏற்றுக் கொண்டு நாட்டுக்காக சேவையாற்றிய அவர் ராணுவம் சார்ந்த பணியில் இருந்த போதே மரணம் அடைந்துள்ளார்.
http://dlvr.it/SDzt7r

Read More

கேரளாவுக்கு கடத்தப்படும் கனிம வளங்கள்; அதிகாரிகள் மாற்றப்படும் அவலம்; என்ன நடக்கிறது நெல்லையில்?

நெல்லை மாவட்டம் ராதாபுரம் பகுதியில் அரசு அனுமதியுடன் கல் குவாரிகள் செயல்பட்டு வருகின்றன. அங்கு சில குவாரிகளில் விதிமுறைகளை மீறி கனிம வளம் வெட்டி எடுக்கப்படுவதுடன், அவை பக்கத்து மாநிலமான கேரளாவுக்குக் கடத்தப்படுவதாகவும் புகார் எழுந்துள்ளது. கேரளாவில் மலைகளை வெட்டி கனிமவளங்களை எடுக்கத் தடை இருப்பதால் தமிழகத்தில் இருந்து கனிம வளங்கள் கடத்தப்படுகின்றன. ஊர் மக்கள் நெல்லை மாவட்டம் ராதாபுரம், கூடங்குளம் பகுதிகளின் சுற்றுவட்டாரங்களில் செயல்படும் குவாரிகளில் அனுமதிக்கப்பட்ட அளவை விடவும் அதிகமாக கனிமங்கள் வெட்டி எடுக்கப்பட்டுள்ளன. கைவிடப்பட்ட குவாரிகளில் இருந்து அனுமதியின்றி முறைகேடாக கனிமங்களை எடுத்து விற்பதாகவும், அதற்காக அவர்கள் அதிக அளவிலான வெடிமருந்துகளைப் பயன்படுத்துவதாகவும் பொதுமக்கள் குற்றம் சாட்டுகிறார்கள். பல கிராமங்களில் வீடுகளில் வெடிப்பு ஏற்படுவதாக பொதுமக்கள் புகார் தெரிவித்தும் உள்ளூர் அதிகாரிகள் எந்த நடவடிக்கையும் எடுப்பதில்லை எனவும் விவசாயிகள் குற்றம் சாட்டுகிறார்கள். குழந்தை பலியான வீடு இந்த நிலையில், குவாரியில் வெடிவைத்தபோது அதில் இருந்து வெளிவந்த கல், அருகில் உள்ள சீலாத்திகுளம் கிராமத்தின் வீட்டில் விழுந்தது. அதனால் கூரை உடைந்து பச்சிளம் குழந்தை பலியானதால் ஆத்திரமடைந்த பொதுமக்கள் முற்றுகைப் போராட்டத்தில் ஈடுபட்டனர். அதன் பின்னரே உயரதிகாரிகள் இந்த விவகாரத்தில் தலையிடத் தொடங்கினார்கள். கனிமவளக் குவாரிகளில் நடக்கும் அத்துமீறல்கள் குறித்து அப்போது சேரன்மகாதேவி சப-கலெக்டராக இருந்த சிவ கிருஷ்ணமூர்த்தி அதிரடி ஆய்வு நடத்தினார். அப்போது சில குவாரிகளில் அளவுக்கு அதிகமாக கனிமங்கள் வெட்டி எடுக்கப்பட்டது கண்டுபிடிக்கப்பட்டது. கனிம வளம் எடுக்கப்பட்ட குவாரி நெல்லை மாவட்டத்தைச் சேர்ந்த தி.மு.க பிரமுகர் ஒருவர் பினாமி பெயரில் நடத்திவரும் குவாரியில் 4,82,640 கன மீட்டர் அளவுக்கு கனிமங்கள் எடுக்க அனுமதி கொடுக்கப்பட்டுள்ளது. ஆனால், அதை விட அதிகமாக 8,86,464 கனமீட்டர் அளவுக்கு கனிமம் வெட்டி எடுக்கப்பட்டது கண்டுபிடிக்கப்பட்டது. முறைகேடாக கனிமங்களை வெட்டி எடுத்த மூன்று குவாரிகளுக்கு சப்-கலெக்டர் சிவ கிருஷ்ணமூர்த்தி 25.72 கோடி அபராதம் விதித்தார். அவரது இந்த அதிரடி நடவடிக்கை காரணமாக அதிருப்தியடைந்த ஆளுங்கட்சிப் பிரமுகர்கள் உடனடியாக அவரை சென்னைக்கு பணியிட மாற்றம் செய்தார்கள். Also Read: `கொள்ளை போகும் கனிம வளம்; கேள்வி கேட்டால் மிரட்டுகிறார்கள்' - குவாரியால் கொதிக்கும் சிவகங்கை மக்கள் லாரிகள் மூலம் ஒரு இடத்தில் இருந்து மற்றொரு இடத்துக்கு கனிம வளம் கொண்டுசெல்ல அரசு அனுமதி பெற்ற நடைச்சீட்டு வைத்திருக்க வேண்டும். ஆனால் ஒரு முறை வாங்கும் நடைச்சீட்டின் எண்ணிலேயே பல சீட்டுகளை போலியாக அச்சிட்டு கனிமங்கள் கடத்தப்படுவதை மாவட்ட எஸ்.பியாக இருந்த மணிவண்ணன் கண்டுபிடித்து அத்தகைய வாகனங்கள் மீது வழக்குப் பதிவு செய்து அபராதம் விதித்தார். குவாரி விவகாரத்தில் அதிரடி காட்டிய சப்-கலெக்டர் சிவ கிருஷ்ணமூர்த்தி ஏற்கெனவே மாற்றப்பட்ட நிலையில், மாவட்ட காவல்துறை கண்காணிப்பாளராக இருந்த மணிவண்ணனும் தற்போது சென்னையில் காவல்துறை பயிற்சிக் கல்லூரிக்கு மாற்றப்பட்டுள்ளார். இந்தப்பணியிட மாறுதல்களுக்கு, கனிம வளம் கடத்தும் அரசியல்வாதிகள் பின்னணியில் இருப்பதாக குற்றச்சாட்டு எழுந்துள்ளது. மாற்றப்பட்ட எஸ்.பி மணிவண்ணன் Also Read: நெல்லை புவியியல் மற்றும் கனிம வளத்துறை அலுவலகத்தில் லஞ்சப் பரிமாற்றமா? - அதிகாரி விளக்கம் அத்துடன், நேர்மையாகச் செயல்படும் நெல்லை மாவட்ட ஆட்சியரான விஷ்ணுவையும் மாற்ற தி.மு.க., பிரமுகர்கள் மேலிடத்திற்கு அழுத்தம் கொடுத்து வருவதாகவும் பேச்சு எழுந்துள்ளது. இது தொடர்பாக அதிகாரிகளிடம் கேட்டதற்கு, ``எல்லா அதிகாரிகளும் அவரவர் வேலையைச் செய்கிறார்கள். பணியிட மாறுதல் என்பது நிர்வாக வசதிக்காகச் செய்யப்படுகிறது. அதைப் பெரிதுபடுத்தத் தேவையில்லை” என்று முடித்துக் கொண்டார்கள்.
http://dlvr.it/SDzKC0

Read More

"லஞ்சம் கொடுக்க வேண்டாம்" - விளம்பரப் பலகை வைத்து அசத்தும் காவல் ஆய்வாளர்

காவல் நிலையத்திற்கு வரும் யாரும் லஞ்சம் கொடுக்க வேண்டாம் என விளம்பரப்பலகை வைத்து காவல் ஆய்வாளர் அசத்தி வருகிறார். காவல் நிலையங்களுக்கு புகார் அளிக்கச் சென்றால் லஞ்சம் கொடுத்து தான் காரியத்தை சாதிக்க முடியும் என்ற மனோநிலை மக்கள் மத்தியில் உள்ளது. இதற்கு விதி விலக்காக மதுரை மாவட்டத்தில் உள்ள காவல் நிலையம் ஒன்றில் ஆய்வாளர் வைத்துள்ள விளம்பரப் பலகை பொதுமக்கள் மத்தியில் வரவேற்பை பெற்றுள்ளது. மதுரை மாநகர் சைபர் கிரைம் பிரிவில் பணியாற்றிய சரவணன், ஒத்தக்கடை காவல் நிலையத்திற்கு மாற்றப்பட்டு கடந்த 25ஆம் தேதி காவல் ஆய்வாளராக பொறுப்பேற்றார். இதையடுத்து அவர், காவல் நிலையத்தில் வைத்துள்ள விளம்பரப் பலகை தற்போது வைரலாகி வருகிறது. அதில், தான் யாரிடமும் லஞ்சம் வாங்குவதில்லை. தன்னுடைய பெயரை சொல்லி யாருக்கும் லஞ்சம் கொடுக்க வேண்டாம். புகாரை முடித்து தருவதாக கூறி லஞ்சம் யாரிடமும் கொடுக்க வேண்டாம் என விளம்பரப் பலகை வைத்திருப்பது அங்கு வரும் மக்களிடம் நம்பிக்கையை ஏற்படுத்தியிருக்கிறது.
http://dlvr.it/SDyN3Y

Read More

பிரதமர் மோடி, அமித்ஷா, சோனியாகாந்தி: பிரபலங்களின் பெயரில் போலி தடுப்பூசி சான்றிதழ்

உலகம் முழுவதும் கொரோனா அச்சுறுத்தலை ஏற்படுத்தி வருகிறது. டெல்டா, ஒமைக்ரான் என புதுப்புது திரிபு கொரோனா தொற்று அச்சுறுத்தல் ஏற்படுத்தி வருகிறது. அனைவரும் கொரோனா தடுப்பூசி செலுத்திக் கொள்வது அவசியம் என உலக நாடுகளின் அரசுகள் மக்களுக்கு விழிப்புணர்வு கொடுத்து வருகின்றன. சில நாடுகளில் பூஸ்டர் குறித்த பேச்சுகள் எழுந்துள்ளன.  இப்படியாக உலக மக்களை கொரோனா கிலி ஏற்படுத்திக் கொண்டிருக்க அதையே ஜாலியாக எடுத்துக் கொண்ட பீகார் மாநிலத்தை சேர்ந்த சில விஷமிகள். பிரதமர் மோடி, உள்துறை அமைச்சர் அமித்ஷா, காங்கிரஸ் கட்சியின் இடைக்காலத் தலைவர் சோனியா காந்தி, நடிகை பிரியங்கா சோப்ரா, நடிகர் அக்ஷய் குமார் என பிரபலங்களின் பெயரில் போலியாக கொரோனா தடுப்பூசி செலுத்திக் கொண்டார்கள் என்ற தரவுகளை தயாரித்துள்ளனர்.  இந்த சம்பவம் பீகார் மாநிலத்தில் உள்ள அர்வால் மாவட்டத்தில் நடைபெற்றுள்ளது. இது தொடர்பாக மாநில அரசு விசாரணை நடத்தி வருகிறது. அந்த மாவட்டத்தில் உள்ள Karpi பகுதியில் இயங்கி வரும் ஆரம்ப சுகாதார நிலையத்தில்தான் இந்த கூத்து நடந்துள்ளது. அங்கு பணியாற்றி வந்த கம்யூட்டர் ஆப்பிரேட்டர்கள் இந்த போலி தரவுகளை அப்லோட் செய்தது தெரியவந்துள்ளது. அவர்கள் தற்போது பதவி நீக்கம் செய்யப்பட்டுள்ளனராம். தடுப்பூசி செலுத்திய பயனர்கள் மற்றும் RT-PCR சோதனை மேற்கொண்டவர்களின் தரவுகள் போதுமான அளவு இல்லாத காரணத்தினால் மேல் அதிகாரிகளின் அழுத்தம் காரணமாக இதனை செய்ததாக கம்யூட்டர் ஆப்பிரேட்டர்கள் தெரிவித்துள்ளதாக தகவல்.  இருப்பினும் மாநிலத்தின் மற்ற ஆரம்ப சுகாதார நிலையம் மற்றும் மருத்துவமனைகளில் இதே போல முறைகேடு நடந்துள்ளதா என்பதை அறிய மற்ற இடங்களிலும் பயனர் விவரங்களை சரிபார்க்கும் பணியை அந்த மாநில அரசு முன்னெடுத்துள்ளதாம்.  பீகார் மாநிலத்தில் 8,63,52,436 தடுப்பூசி டோஸ்கள் செலுத்தப்பட்டுள்ளன. அதில் 3,09,64,634 இரண்டு டோஸ்களை பெற்றுள்ளனர் என மத்திய சுகாதாரத்துறை அமைச்சகத்தின் தரவுகள் சொல்கின்றன. இதையும் படிக்கலாம் : இந்திய கிரிக்கெட் அணியின் ‌தென்னாப்பிரிக்க சுற்றுப்பயணமும் சில கேள்விகளும்? 
http://dlvr.it/SDy2yS

Read More

நீண்ட நாள் நண்பர்களான தோனி - யுவராஜ் சிங் சந்திப்பு! வீடியோவை பகிர்ந்த யுவராஜ்!

இந்திய கிரிக்கெட் அணியின் முன்னாள் கேப்டன் தோனி மற்றும் முன்னாள் ஆல்-ரவுண்டர் யுவராஜ் சிங் என இருவரும் சந்தித்துக் கொண்ட வீடியோ படம் சமூக வலைதளத்தில் நெட்டிசன்கள் மத்தியில் வைரலாகி உள்ளது. இருவரும் இணைந்திருக்கும் இந்த வீடியோவை தனது இன்ஸ்டாகிராம் ஸ்டோரி பக்கத்தில் பகிர்ந்துள்ளார் யுவராஜ்.  Yuvraj Singh's latest Instagram story:#Yuvi #MSD pic.twitter.com/FdCWaR2tkF — StumpMic Cricket (@stumpmic_) December 6, 2021 இருவரும் சிறுவயது முதலே எதிரெதிர டொமஸ்டிக் கிரிக்கெட்டில் விளையாடிய வீரர்கள். அது தொடர்பான காட்சி கூட ‘தோனி’ பயோபிக் படத்தில் வந்திருக்கும். தோனி பீகாருக்காகவும், யுவராஜ் பஞ்சாப் அணிக்காகவும் விளையாடி உள்ளார்கள்.  சர்வதேச கிரிக்கெட் களத்தில் இருவரும் கூட்டு சேர்ந்து எதிரணி வீரர்களை போட்டு தாக்கி உள்ளனர். ஆட்டத்தை இருவரும் கூட்டாக சேர்ந்து சிறப்பாக முடித்துக் கொடுப்பவர்கள். நல்ல நண்பர்கள் என இவர்கள் குறித்து சொல்லிக் கொண்டே போகலாம். இந்தியாவின் 2007 டி20 உலகக் கோப்பை, 2011 50 ஓவர் உலகக் கோப்பை என இரண்டு வெற்றிகளிலும் இருவரும் முக்கிய பங்காற்றி இருந்தனர்.  இந்த நிலையில் இருவரும் நீண்ட நாட்களுக்கு பிறகு சந்தித்துக் கொண்ட போது பரஸ்பரம் நட்பு பாராட்டியுள்ளனர். அந்த படம் தான் தற்போது வைரலாகி வருகிறது.  It's that time of the year. Are you ready? Do you have what it takes? Have a big surprise for all you guys! Stay tuned! pic.twitter.com/xR0Zch1HtU — Yuvraj Singh (@YUVSTRONG12) December 7, 2021 யுவராஜ் சிங், தனது ட்விட்டர் பக்கத்தில் ஒரு வீடியோவை வெளியிட்டிருந்தார். அதில் தனது இரண்டாவது இன்னிங்ஸ் தொடங்குவதற்கான நேரம் இது என குறிப்பிட்டுள்ளார். மேலும் அது என்ன? என்பதை அறிந்து கொள்ள காத்திருங்கள் என தெரிவித்துள்ளார் யுவராஜ்.  யுவராஜும், தோனியும் இணைந்து விளையாட்டு சார்ந்த புதிய தொழில் ஏதேனும் தொடங்கலாம் என்ற பேச்சு எழுந்துள்ளது. மொத்தத்தில் இருவரும் இணைந்திருக்கும் இந்த போட்டோ ரசிகர்களின் மனதை வென்றுள்ளது.  இதையும் படிக்கலாம் : இந்திய கிரிக்கெட் அணியின் ‌தென்னாப்பிரிக்க சுற்றுப்பயணமும் சில கேள்விகளும்? 
http://dlvr.it/SDwFQM

Read More