``யோகிக்கு வாக்களிக்காத துரோகிகளை...!" - பாஜக எம்.எல்.ஏ சர்ச்சைப் பேச்சு

உத்தரப்பிரதேசத்தில் இரண்டுகட்ட வாக்குப்பதிவு நடந்து முடிந்திருக்கிறது. இந்த நிலையில், தெலங்கானா பா.ஜ.க எம்.எல்.ஏ டி.ராஜா சிங் அவரது முகநூல் பக்கத்தில் வெளியான வீடியோ தற்போது சர்ச்சையைக் கிளப்பியிருக்கிறது. கடந்த திங்கள்கிழமை உ.பி-யில் இரண்டாம் கட்ட வாக்குப்பதிவு நடந்தபோது, ராஜா சிங் தனது அதிகாரப்பூர்வ முகநூல் பக்கத்தில் வீடியோ ஒன்றை வெளியிட்டார். அதில், ``பிப்ரவரி 10-ம் தேதி 55 தொகுதிகளில் நடைபெற்ற முதல் கட்ட வாக்குப்பதிவில் 60.17% வாக்குகள் பதிவான நிலையில், யோகி ஆதித்யநாத் உத்தரப்பிரதேசத்தில் யோகி ஆதித்யநாத் மீண்டும் ஆட்சிக்கு வர விரும்பாதவர்கள், மேற்கு உத்தரப்பிரதேசத்தில் அதிக அளவு வாக்களிக்க வந்ததாகக் தகவல்கள் வந்துள்ளன. ஏனென்றால் இரண்டாம் கட்டமாக மேற்கு உத்தரப்பிரதேசத்தில் 55 இடங்களில் நடைபெற்றத் தேர்தலில் 63% வாக்குகள் பதிவாகியுள்ளன. எனவே, இது நமது மாநிலத்தில் ஆட்சியிலிருந்து யோகி ஆதித்யநாத்தை வெளியேற்றும் துரோகிகளின் சதி. இந்தச் சூழலை எதிர்க்க, இந்து சகோதர சகோதரிகளே மீதமுள்ள ஐந்து கட்டங்களில் நடைபெறும் வாக்குப்பதிவில் அதிக எண்ணிக்கையில் வந்து உங்களின் வாக்குரிமையைப் பயன்படுத்துங்கள்.டி.ராஜா சிங் முகநூலில் பேசிய வீடியோ-விலிருந்து யோகி ஆதித்யநாத் ஆட்சிக்கு வர விரும்பாதவர்களுக்காக ஆயிரக்கணக்கான ஜே.சி.பி-க்கள் உ.பி முதல்வர் யோகி ஆதித்யநாத்தால் வாங்கப்பட்டுள்ளன. ஜே.சி.பி-க்கள் மற்றும் புல்டோசர்கள் எதற்காகப் பயன்படுத்தப்படுகின்றன என்பது உங்களுக்குத் தெரியும் என்று நான் நம்புகிறேன். யோகி ஆதித்யநாத் மீண்டும் முதல்வராகத் தேர்ந்தெடுக்கப்படுவதை விரும்பாத துரோகிகள், உ.பி-யில் வாழ வேண்டுமானால் யோகி... யோகி என்று முழக்கமிட வேண்டும் என்பதை தெரிவித்துக் கொள்கிறேன். இல்லை என்றால் உ.பி-யை விட்டு ஓட வேண்டி இருக்கும்" என்று பேசியிருந்தார். பா.ஜ.க எம்.எல்.ஏ-வின் இந்த சர்ச்சைப் பேச்சுக்கு பல்வேறு தரப்பினரும் தங்கள் கண்டனங்களைத் தெரிவித்து வருகின்றனர்.``கடந்த 5 வருடங்களில் கலவரங்கள், பயங்கரவாதங்கள் இல்லாத முதல் மாநிலம் உ.பி!" - யோகி ஆதித்யநாத்
http://dlvr.it/SK6zj9

Read More

”’கோப்ரா‘ பட பட்ஜெட் அதிகரித்தற்கு நான் காரணமா?” - இயக்குநரின் ட்வீட்டால் வெடித்த விவாதம்

விக்ரமின் ‘கோப்ரா’ படப்பிடிப்பு நிறைவடைந்ததையடுத்து, இயக்குநர் அஜய் ஞானமுத்து நன்றி தெரிவித்து பதிவு செய்த ட்வீட் சர்ச்சையை உருவாக்கியுள்ளது. ‘டிமாண்டி காலனி’, ‘இமைக்கா நொடிகள்’ ஆகிய வெற்றிப்படங்களை இயக்கிய அஜய் ஞானமுத்து இயக்கத்தில், விக்ரம் நடிப்பில் உருவாகி வரும் படம் 'கோப்ரா'. பெரும் பொருட்செலவில் உருவாகி வரும் இந்தப் படத்தில் விக்ரம் பல்வேறு கெட்டப்புகளில் நடித்துள்ளார். இது ஒரு ஸ்ட்ராங்கான சஸ்பென்ஸ், சைக்கலாஜிக்கல் த்ரில்லர். இந்தப் படத்தில் விக்ரமுடன் ‘கேஜிஎஃப்’ ஹீரோயின் ஸ்ரீநிதி ஷெட்டி, கே.எஸ்.ரவிகுமார், முன்னாள் கிரிக்கெட் வீரர் இர்ஃபான் பதான், கனிகா, மியா ஜார்ஜ், மிருணாளினி உள்ளிட்டோர் நடித்துள்ளனர். இந்தப்படத்துக்கு ஏ.ஆர்.ரஹ்மான் இசையமைத்து வருகிறார். இந்தப் படத்தின் படப்பிடிப்பு சுமார் 3 ஆண்டுகளாக நடைபெற்று வந்தது. இதனை ‘மாஸ்டர்’, ‘மகான்’ படங்களை தயாரித்த செவன் ஸ்கிரீன் ஸ்டூடியோ நிறுவனத்தின் லலித் குமார் பெரும் பொருட்செலவில் தயாரித்து வருகிறார். கடந்த 2019-ம் ஆண்டு துவங்கிய இந்தப் படத்தின் படப்பிடிப்பு, சென்னை, கொல்கத்தா, கேரளா, ரஷ்யா போன்ற இடங்களில் நடைபெற்று தற்போது தான் நிறைவடைந்துள்ளது. இந்நிலையில், ‘கோப்ரா’ படத்தின் படப்பிடிப்பு முழுமையாக நிறைவடைந்ததாக இயக்குநர் அஜய் ஞானமுத்து தனது ட்விட்டரில் கடந்த 15-ம் தேதி பதிவொன்றை வெளியிட்டுள்ளார். அதில் விக்ரம் மற்றும் ஒட்டுமொத்த படக்குழுவினருக்கும் நன்றியைத் தெரிவித்துள்ளார். இந்தப் பதிவில் பெரும் முதலீடு செய்துள்ள தயாரிப்பாளர் லலித் குமாருக்கு நன்றி தெரிவிக்கவில்லை என்று சர்ச்சை உருவாகியுள்ளது. இது தொடர்பாக முன்னணி தயாரிப்பாளர் டி.சிவா தனது ட்விட்டர் பதிவில் அஜய் ஞானமுத்துவை டேக் செய்து, “போட்ட பட்ஜெட்டை விட பல மடங்கு செலவை இழுத்து விட்டு, அதைத் தாங்கிக்கொண்டு படத்தை முடித்துக்கொடுத்த தயாரிப்பாளர் லலித்குமாருக்கு ஒரு நன்றி கூட சொல்லாத இயக்குநரை வன்மையாகக் கண்டிக்கிறேன்” என்று குறிப்பிட்டுள்ளார். தனது பதிவு சர்ச்சையாகி நிலையில், இயக்குநர் அஜய் ஞானமுத்து விளக்கம் அளித்து ட்வீட் செய்துள்ளார். தயாரிப்பாளர் டி.சிவாவின் பதிவுக்கு பதிலடிக் கொடுக்கும் வகையில் இயக்குநர் அஜய் ஞானமுத்து, “சார், கோப்ராவின் பட்ஜெட் அதிகமானதற்குக் காரணம் நான் இல்லை என்பதை எப்போது வேண்டுமானாலும், எங்கு வேண்டுமானாலும் என்னால் நிரூபிக்க முடியும். புரளிகளை விட ஆதாரங்கள் தெளிவாக, சத்தமாகப் பேசும். குழு என்றால் அது தயாரிப்பாளரும் சேர்ந்துதான். நான் என்றும் அவரை கைவிடவில்லை” என்று தெரிவித்துள்ளார். இதற்கு டி.சிவா “உங்கள் பதிலுக்கு நன்றி. அது வதந்தியாக இருந்தாலும், இல்லாவிட்டாலும், விவாதித்த பேசி தீர்த்திருக்கலாம். விக்ரமை நீங்கள் குறிப்பிடும்போது, தயாரிப்பாளரையும் நீங்கள் குறிப்பிட்டிருக்க வேண்டும். புரிந்துகொள்வீர்கள் என்று நம்புகிறேன், ஏற்றுக்கொண்டு செய்யுங்கள். அனைவருக்கும் நல்வாழ்த்துக்கள்” என்று ட்வீட்டில் தெரிவித்துள்ளார்.  இதற்கும் பதிலளித்துள்ள அஜய் ஞானமுத்து, “இது வேண்டுமென்றே நான் செய்யவில்லை சார்!! நான் எப்போதும் எனது தயாரிப்பையும் தயாரிப்பாளரையும் உயர்வாக கருதுகிறேன்.. எப்போதும்!!” என்று கூறியுள்ளார்.
http://dlvr.it/SK5Nr2

Read More

பிக்னிக் சென்ற இடத்தில் சர்ச்சை; சிக்கலில் மாட்டிக்கொண்ட நடிகை ஷில்பா ஷெட்டி!

நடிகை ஷில்பா ஷெட்டி தனது சகோதரி மற்றும் கணவருடன் மகாராஷ்டிரா மாநிலத்தில் உள்ள அலிபாக் கடற்கரைக்கு சுற்றுலா சென்றார். காதலர் தினத்தை கொண்டாட அவர்கள் குடும்பத்தோடு அங்கு சென்றனர். சென்ற இடத்தில் ஷில்பாஷெட்டியும், அவரின் சகோதரியும் சேர்ந்து ஷில்கல் எனப்படும் கடற்பறவைகளுக்கு சாப்பாடு போட்டார். இது தொடர்பான வீடியோ சமூக வலைதளங்களில் வைரலாகி வருகிறது. இதையடுத்து ஷில்பா ஷெட்டி சகோதரிகளுக்கு எதிராக சுற்றுச்சூழல் ஆர்வலர்கள் போர்க்கொடி தூக்கியுள்ளனர். தானே மாவட்ட சுற்றுச்சூழல் ஆர்வலர் பவன் சர்மா இது தொடர்பாக வனத்துறை கூடுதல் முதன்மை செயலாளர் வீரேந்திர திவாரி மற்றும் அதிகாரிகளுக்கு கடிதம் எழுதியுள்ளார். அந்த கடிதத்தில், "கடற்பறவைகளுக்கு காய்ந்த மற்றும் செயற்கையான உணவுகளை ஷில்பாஷெட்டி சகோதரிகள் போடுவதால் அவற்றின் உடல்நலம் பாதிக்கப்படுவதோடு, செறிமானப்பிரச்னையும் ஏற்படும். கடற்பறவைகள் ஷில்பாஷெட்டி சகோதரிகள் கடற்பறவைகளுக்கு உணவு கொடுப்பது போன்ற வீடியோவை பொதுமக்கள் பார்ப்பதால் மற்றவர்களும் இது போன்ற காரியத்தில் ஈடுபடக்கூடும். எனவே சமூக வலைத்தளத்தில் இடம்பெற்றுள்ள இதுபோன்ற வீடியோக்களை அகற்றுவதோடு ஷில்பாஷெட்டி சகோதரிகள் மீதும் நடவடிக்கை எடுக்கவேண்டும். அவ்வாறு நடவடிக்கை எடுப்பதன் மூலம் மற்றவர்கள் எதிர்காலத்தில் இது போன்ற காரியத்தில் ஈடுபடமாட்டார்கள். கடற்பறவைகள் உணவாக மீன்கள், புழுக்கள் மற்றும் பூச்சிகளை சாப்பிட்டு தேவையான புரதச்சத்தை எடுத்துக்கொள்கிறது என்று தனது மனுவில் குறிப்பிட்டுள்ளார். இதனால் ஷில்பாஷெட்டி சகோதரிகள் மீது நடவடிக்கை எடுக்கப்படும் அபாயம் ஏற்பட்டுள்ளது. ஷில்பாஷெட்டியிடம் இது தொடர்பாக கருத்து கேட்க முயன்ற போது தொடர்பு கொள்ள முடியவில்லை. மும்பையில் மெரைன் டிரைவ், தாதர், மாகிம் கடற்கரையில் காலை நேரத்தில் நடைபயிற்சியில் ஈடுபடுபவர்கள் கடற்பறவைகளுக்கு அரிசி போன்ற உணவு தானியங்களை கொடுப்பது வழக்கமாகும். ஷிகல் எனப்படும் கடற்பறவைகள் வெளிநாடுகளில் இருந்து அக்டோபர் மற்றும் மார்ச் மாதத்தில் இந்தியாவிற்கு வருவது வழக்கமாகும். பொதுமக்கள் போடும் உணவு தானியங்களால் இப்பறவைகளின் உடல்நலம் பாதிக்கப்படுகிறது.
http://dlvr.it/SK4r7n

Read More

கடுமையான எரிபொருள் தட்டுப்பாட்டில் இலங்கை... 40,000 டன் பெட்ரோல், டீசலை கொடுத்த இந்தியா

கடுமையான எரிபொருள் தட்டுப்பாட்டால் தவிக்கும் இலங்கைக்கு 40 ஆயிரம் டன் பெட்ரோல், டீசலை இந்தியா அனுப்பியுள்ளது. இலங்கையில் பொருளாதாரம் வீழ்ச்சியடைந்ததை அடுத்து அங்கு இறக்குமதி கட்டுப்படுத்தப்பட்டதால் அத்தியாவசிய பொருள்களுக்கு கடும் தட்டுப்பாடு ஏற்பட்டுள்ளது. இந்நிலையில் அங்கு நிலவும் எரிபொருள் தட்டுப்பாட்டை சமாளிக்க இந்தியா 40,000 டன் பெட்ரோல், டீசலை விநியோகம் செய்துள்ளது. இந்திய தூதர் கோபால் பாக்லே இந்திய எண்ணெய் கழகம் வழங்கிய 40,000 டன் எரிபொருளை இலங்கை அரசிடம் ஒப்படைத்தார். இலங்கை நிதியமைச்சர் பசில் ராஜபக்சே 15 நாள்களில் இந்தியா வரவுள்ள நிலையில் அந்நாட்டுக்கு எரிபொருள் விநியோகம் செய்யப்பட்டுள்ளது. சமீபத்திய செய்தி: "எல்லா கட்சிக்கும் சென்றுவந்த கரூர் அமைச்சர் தேமுதிகவுக்கு வந்தாலும் வருவார்" - பிரேமலதா
http://dlvr.it/SK4KfP

Read More

"எல்லா கட்சிக்கும் சென்றுவந்த கரூர் அமைச்சர் தேமுதிகவுக்கு வந்தாலும் வருவார்" - பிரேமலதா

எல்லா கட்சிக்கும் சென்று வந்த கரூர் அமைச்சர் விரைவில் தேமுதிகவுக்கு வருவார் என கரூரில் நடைபெற்ற தேர்தல் பரப்புரைக் கூட்டத்தில் பிரேமலதா விஜயகாந்த் பேசி பரபரப்பை ஏற்படுத்தினார். கரூர் மாநகராட்சி, புலியூர் உப்பிடமங்கலம் புஞ்சை தோட்டக்குறிச்சி, அரவக்குறிச்சி உள்ளிட்ட பேரூராட்சிகளில் தேமுதிக சார்பில் போட்டியிடும் வேட்பாளர்களை ஆதரித்து அந்த கட்சியின் பொருளாளர் பிரேமலதா விஜயகாந்த் நேற்றிரவு கரூர் வட்டாட்சியர் அலுவலகம் முன்பு பரப்புரையில் ஈடுபட்டார். அப்போது அவர் பேசுகையில், தேமுதிகவை பொருத்தவரை பொய் வாக்குறுதிகளை கொடுப்பதில்லை; மக்கள் மத்தியில் என்ன செய்வோமோ அதை வாக்குறுதியாக கொடுத்து வருகிறோம். கரூரில் ஆளுங்கட்சிக்கு வேட்பாளர்கள் இல்லையா என்று தெரியவில்லை. மற்றக் கட்சி வேட்பாளர்களை வாபஸ் வாங்கச் சொல்லி மிரட்டுகின்றனர். தமிழகத்தில் எத்தனைக் கட்சி உள்ளது என கரூரில் உள்ள அமைச்சரை கேட்டால் சரியாக சொல்வார். அத்தனைக் கட்சிக்கும் சென்று வந்தவர் தான் இந்த கரூர் அமைச்சர். சொல்ல முடியாது சீக்கிரத்துல தேமுதிகவுக்கு வந்தாலும் வந்துவிடுவார். யாருடைய குறைகளையும் சுட்டிக்காட்டி தேமுதிகவுக்கு ஓட்டு வாங்கும் அவசியம் கிடையாது. ஆனால், நடக்கும் அவலங்களை சொல்ல வேண்டியது கடமையாகும். மக்களை முட்டாளாக நினைத்து அவர்களின் வாக்குகளை வாங்க வேண்டும் என்பதற்காக பொய்யான வாக்குறுதி தருபவர்களுக்கு இந்த தேர்தலில் சரியான பதிலடியை மக்கள் கொடுக்க வேண்டும். ஆட்சி அதிகாரம், பணபலம், அதிகார பலம் இருப்பது என்பதற்காக மக்களை ஏமாற்றிவிடலாம் என கனவு காண்பவர்களுக்கு மக்கள் தக்க பதிலடி கொடுக்க வேண்டும். தேமுதிகவுக்கு ஒரு வாய்ப்பு கொடுத்திருந்தால் தமிழகத்தின் தலை எழுத்தையே கேப்டன் மாற்றி இருப்பார். இன்னும் எங்களுக்கு அந்த வாய்ப்பு உள்ளது. எந்த நோக்கத்திற்காக கட்சி ஆரம்பிக்கப்பட்டதோ அந்த நோக்கத்தை தேமுதிக செய்து முடிக்கும்" என பிரேமலதா விஜயகாந்த் பேசினார்.
http://dlvr.it/SK3tkj

Read More

"ரஷ்யா ஒருபோதும் போரை விரும்புவதில்லை" - அதிபர் புதின் கருத்து

உக்ரைன் எல்லையில் இருந்து ரஷ்ய படைகள் திரும்பி வரும் நிலையில், "ரஷ்யா ஒருபோதும் போரை விரும்புவதில்லை" என்று அந்நாட்டு அதிபர் விளாடிமிர் புதின் அறிவித்திருப்பது அனைவரின் கவனத்தையும் ஈர்த்துள்ளது. ரஷ்யாவுக்கு எதிராக செயல்படும் நேட்டோ கூட்டணியில் உக்ரைன் இணையவுள்ளதாக சில மாதங்களுக்கு முன்பு தகவல் வெளியானது. இதனால் ஆத்திரமடைந்த ரஷ்யா, உக்ரைனை ஆக்கிரமிக்கும் முயற்சியில் அண்மைக்காலமாக ஈடுபட்டு வந்தது. அதன் உச்சக்கட்டமாக, உக்ரைனின் அண்டை நாடான பெலாரஸில் கடந்த வாரம் ஆயிரக்கணக்கான படை வீரர்களை குவித்து போர் பயிற்சியில் ரஷ்யா ஈடுபட்டது. அதுமட்டுமின்றி, உக்ரைன் எல்லையில் லட்சக்கணக்கான ராணுவத் துருப்புகளையும் அந்நாடு நிலை நிறுத்தியது. இதனால் உக்ரைனை எப்போது வேண்டுமானாலும் ரஷ்யா தாக்கும் என்ற சூழல் உருவானது. இந்நிலையில், யாரும் எதிர்பாராத விதமாக, உக்ரைன் எல்லையில் இருந்து ரஷ்ய ராணுவப் படைகள் திடீரென விலக்கப்பட்டு வருகின்றன. இதனால் அங்கு போர் பதற்றம் தணிந்து வருவதாக கூறப்படுகிறது. உக்ரைன் விவகாரத்தில் ரஷ்யாவை அமைதி காக்குமாறு பிரிட்டன், அமெரிக்கா, பிரான்ஸ், ஜெர்மனி உள்ளிட்ட நாடுகளின் தலைவர்கள் மேற்கொண்ட முயற்சியின் காரணமாகவே இந்த படை விலக்கல் முடிவை ரஷ்யா எடுத்திருப்பதாக சர்வதேச அரசியல் பார்வையாளர்கள் தெரிவிக்கின்றனர். இதனிடையே, இந்த விவகாரம் தொடர்பாக மாஸ்கோவில் அதிபர் விளாடிமிர் புதினிடம் நிருபர்கள் கேள்வியெழுப்பினர். இதற்கு பதிலளித்த அவர், "ரஷ்யா நிச்சயமாக போரை விரும்பவில்லை" எனக் கூறினார்.
http://dlvr.it/SK3Y6J

Read More

``நான் சிறைக்குச் சென்றால் பாஜக தலைவர்களும் என்னுடன் வருவார்கள்!" - சிவசேனா எம்.பி பேட்டி

சிவசேனா செய்தித் தொடர்பாளரும், எம்.பி.யுமான சஞ்சய் ராவுத் மும்பை தாதரில் உள்ள சிவசேனா பவனில் செய்தியாளர்களைச் சந்திப்பதாக முன்னதாக தெரிவித்திருந்தார். அதன்படி இன்று மாலை 4 மணிக்கு பத்திரிகையாளர் சந்திப்பு நடந்தது. இந்தச் சந்திப்பு தொடர்பான அறிவிப்பைத் தொடர்ந்து மும்பை முழுவதும் இருந்து சிவசேனா தொண்டர்கள் சிவசேனா அலுவலகத்திற்கு வெளியில் குவிந்தனர். இதனால் பரபரப்பு ஏற்பட்டது. பின்னர் செய்தியாளர்களைச் சந்தித்துப் பேசிய அவர், ``மத்திய விசாரணை ஏஜென்சிகள் எங்களுக்கு இடையூறு கொடுத்து வருகின்றன. இந்த ஏஜென்சிகளை பயன்படுத்தி எங்களது தலைவர்களுக்கு நெருக்கடி கொடுக்கின்றனர். சில பா.ஜ.க தலைவர்கள் மார்ச் 10-ம் தேதி சிவசேனா கூட்டணி அரசு கவிழும் என்று சொல்கிறார்கள். நான் துணை ஜனாதிபதி வெங்கைய நாயுடுவிற்கு கடிதம் எழுதிய பிறகுதான் இந்த வதந்திகள் பரவ ஆரம்பித்தன. சேனா பவனில் கூடிய தொண்டர்கள் தாக்கரே குடும்பத்திற்கு அலிபாக்கில் 19 பங்களாக்கள் இருப்பதாகச் சொல்கிறார்கள். நான் பத்திரிகையாளர்களை பிக்னிக் அழைத்துச் செல்கிறேன். அங்கு பங்களா இல்லையென்றால் பங்களா இருப்பதாகச் சொன்னவர்கள் (பா.ஜ.க-வினர்) பங்களா இருக்கும் இடத்தை காட்டவேண்டும். மகாராஷ்டிராவில் உள்ள கூட்டணி அரசை கவிழ்க்க நாங்கள் உதவ மறுத்ததால் அமலாக்கத்துறை ரெய்டு நடத்த ஆரம்பித்தது. சிவசேனா கூட்டணி அரசு தனது 5 ஆண்டுகால ஆயுளை பூர்த்தி செய்யும். 2024-ம் ஆண்டு மத்தியில் புதிய அரசு பதவியேற்கும். எப்படி வளைந்து கொடுக்கவேண்டும் என்று பாலாசாஹேப் தாக்கரே எங்களுக்கு கற்றுக்கொடுக்கவில்லை. அமலாக்கப்பிரிவு தேசியப் பாதுகாப்பு தொடர்பாக மும்பையில் ரெய்டு நடத்தினால் அதற்கு மகாராஷ்டிரா அரசு ஒத்துழைப்பு கொடுக்கவேண்டியது அவசியம். குஜராத்தில் நடந்துள்ள மிகப்பெரிய வங்கி மோசடியையும் அமலாக்கப்பிரிவு கவனிக்கவேண்டும். கடந்த இரண்டு ஆண்டுகளாக இந்த மோசடி குறித்து முதல் தகவல் அறிக்கை பதிவு செய்யவிடாமல் யார் தடுத்து நிறுத்தியது ?அமலாக்கத்துறையால் கைது செய்யப்பட்ட முன்னாள் உள்துறை அமைச்சர் அனில் தேஷ்முக் விரைவில் ஜாமீனில் வருவார். நான் சிறைக்குச் செல்லத் தயாராக இருக்கிறேன். நான் போகும் போது அவர்களும் (பா.ஜ.க-வினர்) என்னுடன் வருவார்கள். பி.எம்.சி வங்கி மோசடி தொடர்பாக பா.ஜ.க முன்னாள் எம்.பி கிரீத் சோமையா மற்றும் அவர் மகன் கைது செய்யப்படவேண்டும். நிகான் இன்ப்ரா கன்ஸ்ட்ரக்‌ஷன் கம்பெனியில் கிரீத் சோமையாவும், பி.எம்.சி வங்கி மோசடியில் தொடர்புடைய ராகேஷ் வாத்வானும் பங்குதாரர்கள் ஆவர். நான் மத்திய உள்துறை அமைச்சரை தொடர்பு கொண்டு என் குடும்பத்தினரையும், என்னோடு தொடர்புடையவர்களையும் விசாரணை ஏஜென்சிகள் சித்ரவதை செய்வது நல்லது அல்ல என்று சொன்னேன். பாஜக மகாராஷ்டிரா, மேற்கு வங்கம், ஜார்க்கண்ட் மாநிலங்களுக்கு களங்கத்தை ஏற்படுத்த முயற்சி நடக்கிறது. களங்கத்தை ஏற்படுத்தி அமலாக்கப்பிரிவு மற்றும் இதர விசாரணை அமைப்புகளை பயன்படுத்தி ஆட்சியைக் கலைக்க சதி நடக்கிறது. நான் இப்போது தெரிவிக்கும் தகவல்கள் ஒரு சேம்பிள்தான். விரைவில் ஆதாரங்களுடன் மீண்டும் பத்திரிகையாளர்களை சந்திப்பேன். அமலாக்கத்துறை முன்பு நான் பத்திரிக்கையாளர் சந்திப்பை நடத்த தயாராக இருக்கிறேன். ஆனால், அதுவே கடைசி பத்திரிகையாளர் சந்திப்பாக இருக்கும்" என்று தெரிவித்தார். சஞ்சய் ராவுத்தின் இந்தப் பேட்டியால் சிவசேனா மற்றும் பா.ஜ.க இடையிலான கூட்டணியில் மேலும் விரிசல் ஏற்பட்டுள்ளது. கடந்த சட்டமன்றத் தேர்தலுக்கு பிறகு இரு கட்சிகளும் பிரிந்தன. மீண்டும் இரு கட்சிகளும் கூட்டணி அமைக்கும் என்று எதிர்பார்க்கப்பட்ட நிலையில் சிவசேனா பா.ஜ.க-விற்கு எதிராக எடுத்துள்ள நிலைப்பாடு கூட்டணிக்கு மீண்டும் வாய்ப்பு இல்லை என்பதையே காட்டுவதாக உள்ளதாக அரசியல் நோக்கர்கள் கருத்து தெரிவிக்கின்றனர். ``பாஜக-வின் ஏஜென்ட் அன்னா ஹசாரே!'' - என்ன சொல்கிறார்கள் அரசியல் விமர்சகர்கள்?
http://dlvr.it/SK1xv5

Read More