சுவாரஸ்யமான ஐடியா மட்டுமே போதுமா நல்ல சினிமாவுக்கு? - `வசந்த முல்லை’ எப்படியிருக்கு?

மன அழுத்தம் நம்மை எந்த எல்லைக்குக் கொண்டு செல்லும் என்பதைச் சொல்கிறது இந்த ‘வசந்த முல்லை’. IT வேலையில் கடுமையான மன அழுத்தத்தில் இருக்கிறார் பாபி சிம்ஹா. கண்ணைக் கட்டி காட்டில் விட்டது போல், தூங்கி எழுந்தால் அலுவலகம் என இருக்கும் சிம்ஹாவிற்கு ப்ராஜெக்ட்டை எப்படியாவது முடித்துவிட வேண்டும் என்பது மட்டுமே மனதில் இருக்கிறது. ஒரு கட்டத்தில் எல்லாம் கை மீறிப்போக, கடும் விளைவுகளுக்கு ஆளாகிறார். தொடர்ச்சியாக அவருக்கு எல்லாம் இருண்மையாகி blackout ஆகிவிடுகிறார். மன அழுத்தத்திலிருந்து விடுபட, துணையுடன் நிம்மதியாய் டூர் செல்ல முடிவெடுக்கும் பாபி சிம்ஹா, வழக்கம் போல மலை உச்சிக்குப் பிளான் செய்கிறார். அங்கும் சிக்கல் தொடர்கிறது. அது என்ன சிக்கல், அதிலிருந்து பாபி சிம்ஹா எப்படி மீண்டார் என்பதுதான் ‘வசந்த முல்லை’யின் மீதிக் கதை. சில ஆண்டுகளுக்குப் பிறகு பாபி சிம்ஹாவிற்கு நல்லதொரு வேடம். என்ன ஒன்று... இன்னும் ரஜினி மாடுலேசனில் அவர் நடிப்பதைத்தான் நிறுத்துவதாய் இல்லை! எமோஷனல் காட்சிகளிலும் ஓக்கேவாக நடித்திருக்கிறார் காஷ்மீரா பர்தேசி. சின்னதொரு கேமியோவில் வருகிறார் ஆர்யா. நூறு நிமிட படத்தில் கதையின் மையக்கருவுக்குச் செல்ல பல நிமிடங்களை எடுத்துக்கொள்கிறார் அறிமுக இயக்குநர் ரமணா புருஷோத்தமன். லூப் கான்செப்டுக்குள் நுழைந்ததும் படம் வேகெமெடுக்கத் தொடங்குகிறது. படத்தின் டிரெய்லர் வெளியானது முதல், இது எந்த படத்தின் தழுவலாக இருக்கும் என நம்மை யோசிக்க வைத்து, அப்படியெல்லாம் இல்லை சுயமாக யோசித்ததுதான் என்பதையும் ஓரளவு நம்பும்படி இயக்கியிருக்கிறார். பாடல்கள் பெரிதாக ஈர்க்கவில்லை என்றாலும், பின்னணி இசையை சிறப்பாகவே கொடுத்திருக்கிறார் ‘பிரேமம்’ புகழ் ராஜேஷ் முருகேசன். ஸ்டன்னர் சாம், ஸ்டன்ட் சில்வா கூட்டணியில் சண்டைக் காட்சிகள் சிறப்பாகவே எடுக்கப்பட்டிருக்கின்றன. வாழ்க்கை என்பதே ஒரு பெரிய லூப் என்பதை நினைவுபடுத்தும் வகையில் அமைக்கப்பட்ட முதல் பாடல் காட்சி அருமை. படத்தில் `அட இந்தப் போர்ஷன் செமயா இருக்குல்ல’ என நாம் கிளாப் தட்ட ஆரம்பிப்பதற்குள் முடிந்துவிடுகிறது லூப் போர்ஷன். `ஏரோ’ மாதிரியான டிசி தொடர்களில் இத்தகைய காட்சி அமைப்புகளைப் பார்த்திருந்தாலும், தமிழுக்கு நல்லதொரு புதுவரவு. ஆனால், அதை இன்னும் கொஞ்சம் எக்ஸ்ப்ளோர் செய்ய எல்லா வாய்ப்புகள் இருந்தும் அதைச் சட்டென முடித்துவிட்டார்கள். சுவாரஸ்யமான ஐடியா மட்டுமே நல்ல சினிமாவாக மாறிவிடாது என்பதற்கு ‘வசந்த முல்லை’யும் உதாரணமாக மாறியிருக்கிறது.
http://dlvr.it/SjFry7

Read More

'காங்கிரஸ் ஆட்சியில் ஜனநாயக படுகொலை' - நாடாளுமன்றத்தில் கொந்தளித்த பிரதமர் மோடி - முழு உரை

“காங்கிரஸ் அரசு மத்தியில் அதிகாரத்தில் இருந்தபோது கருணாநிதி மற்றும் எம்ஜிஆர் ஆகியோர் தலைமையில் செயல்பட்ட தமிழ்நாடு அரசுகளை கலைத்தது” என பிரதமர் நரேந்திர மோடி மாநிலங்களவையில் பேசியுள்ளார்.  குடியரசு தலைவர் உரைக்கு நன்றி தெரிவிக்கும் தீர்மானம் மீதான விவாதத்தில் பதிலளித்து மோடி பேசியபோது, ஆரம்பம் முதலே காங்கிரஸ் உள்ளிட்ட கட்சிகள் தொடர் முழக்கங்களை எழுப்பி அவருக்கு எதிர்ப்பு தெரிவித்தனர். இந்நிலையில் ஆவேசமாக பேசிய மோடி, “காங்கிரஸ் தலைமையிலான மத்திய அரசு தமிழ்நாட்டில் கருணாநிதியை அரசை கலைத்த போதிலும், திமுக தற்போது காங்கிரஸூக்கு துணை போகிறது” என குறிப்பிட்டார். அதேபோல “இடதுசாரிகள் மற்றும் சரத் பவரின் தேசியவாத காங்கிரஸ் கட்சி, தற்போது காங்கிரஸுடன் கைகோர்த்து நிற்கிறார்கள்” என்றும் விமர்சனம் செய்தார். மேலும் பேசுகையில், “காங்கிரஸ் கட்சி தொடர் ஜனநாயக படுகொலையில் ஈடுபட்டது. 90 முறை மாநில அரசுகளை டிஸ்மிஸ் செய்யும் 356வது சட்டப்பிரிவு, காங். ஆட்சியில் முறைகேடாக பயன்படுத்தப்பட்டது. இந்திரா காந்தி பிரதமராக இருந்தபோது 50 மாநில அரசுகள் கலைக்கப்பட்டன. திருமதி இந்திரா காந்தி அரை சதம் அடித்தார்” என்றார். இதற்கிடையே எதிர்க்கட்சிகள் "அதானி அதானி" என தொடர் முழக்கமிட்ட நிலையில், தான் தன்னந்தனியாக நின்று அத்தனை எதிர்க்கட்சிகளின் தொடர் விமர்சனங்களை எதிர்கொள்வதாக மோடி ஆவேசமாக உரையாற்றினார். உடனே பாரதிய ஜனதா கட்சியின் மாநிலங்களவை உறுப்பினர்கள் "மோடி மோடி" என பதில் முழக்கமிட்டதால், மாநிலங்களவை பரபரப்பானது. இதனால் மோடி, “முழக்கம் எழுப்பக்கூட எதிர்க்கட்சிகள் தனியாகவே நிற்கும். எனக்கு எதிராக கூட்டணி அமைக்க வேண்டி உள்ளது” என அனல் பறக்க குறிப்பிட்டார். பின், “நீங்கள் எவ்வளவு சேற்றை வாரி வீசினாலும் அதில் தாமரை மலரும்” என நம்பிக்கையுடன் பேசினார். தொடர்ந்து "நான் இந்த நாட்டு மக்களுக்காக வாழ்கிறேன். மக்களுக்கு நன்மை செய்ய வேண்டும் என்பதற்காக இங்கு வந்திருக்கிறேன். ஆகவே உங்கள் அனைவரையும் எதிர்கொள்ளும் வைராக்கியம் எனக்கு இருக்கிறது" என குறிப்பிட்ட மோடி, “இந்த நாட்டுக்காகவே எனது வாழ்க்கை அர்ப்பணம். நான் தன்னந்தனியாக நின்று அனைத்து எதிர்கட்சிகளையும் எதிர்கொள்வதை மக்கள் பார்த்துக் கொண்டிருக்கிறார்கள்” என உணர்ச்சிகரமாக பேசினார். மக்களவையைப் போலவே, பிரதமர் நரேந்திர மோடி மாநிலங்களவையிலும் அதானி குழுமம் தொடர்பான குற்றச்சாட்டுகளுக்கு எந்த பதிலையும் அளிக்கவில்லை. மாறாக தனது அரசின் ஆட்சி காலத்தில் சாமானிய மக்களுக்காக என்னவெல்லாம் செய்யப்பட்டு இருக்கிறது என்பதை பட்டியலிட்டு, காங்கிரஸ் ஆட்சிக் காலத்தில் மக்களுக்கு அளிக்கப்படாத சேவைகள் தற்போது அளிக்கப்படுகின்றன என வலியுறுத்தினார். “குடும்ப அரசியல், மக்களுக்கு உதட்டளவில் மட்டுமே சேவை என்கிற மனப்போக்குடன் காங்கிரஸ் அரசுகள் செயல்பட்டன” என மோடி எதிர்கட்சிகளை கடுமையாக சாடினார். “இந்தியாவின் முதல் பிரதமரான ஜவஹர்லால் நேரு பெயரை குடும்ப பெயராக வைக்காமல்,  காந்தி பெயரால் அழைக்கப்படுவது ஏன்?” என ராகுல் காந்தியை குறிப்பிடாமல் மோடி கேள்வி எழுப்பினார். “நேரு பெயரை குடும்பப் பெயராக வைத்துக் கொள்வதால் அவமானம் ஏற்படுமா” என்றும் அவர் அவையில் வினவினார். பின்னர் “பழங்குடியினர், பெண்கள், ஏழை மக்கள் போன்ற சமூகத்தில் பல சிக்கல்களை சந்தித்து கொண்டிருக்கும் பலருக்கும் தேவையான தீர்வுகளை எங்கள் அரசு அளித்து கொண்டிருக்கிறது. நிரந்தர தீர்வுகளை அளிக்க நாங்கள் கடுமையாக உழைத்து வருகிறோம். மின்சார இணைப்புகள் வழங்கியது, ஜன்தன் வங்கி கணக்குகளை தொடங்கியது, குடிநீர் இணைப்புகள் வழங்கியது, சமையல் எரிவாயு இணைப்புகளை அளித்தது, கழிப்பறைகளை உண்டாக்கி கொடுத்தது, பழங்குடி மக்கள் வளர்ச்சிக்கான நடவடிக்கையை எடுத்தது போன்ற பல்வேறு அம்சங்களில் காங்கிரஸ் ஆட்சி காலத்தில் நடைபெற்றதை விட பல மடங்கு முன்னேற்றம் எங்களுடைய ஆட்சி காலத்தில் நடத்திக் காட்டியுள்ளோம்” என மோடி விளக்கினார். “இதற்கு கடினமான உழைப்பு தேவை என எங்களுக்கு தெரியும். எங்களுடைய ஒரே நோக்கமே மக்களின் முன்னேற்றம்தான். இதனால்தான் மக்கள் 'நான் அவர்களுக்காக உழைப்பேன்’ என நம்புகிறார்கள். இந்த நம்பிக்கை கடின உழைப்பால் நாங்கள் பெற்றது. மக்களின் இந்த நம்பிக்கை காரணமாக எதிர்க்கட்சிகளின் உண்மைக்கு புறம்பான குற்றச்சாட்டுகளை யாரும் ஏற்க மாட்டார்கள். எங்கள் ஆட்சியில், ஒரு பெண் குடியரசு தலைவராக தேர்ந்தெடுக்கப்பட்டுள்ள நிலையில், இன்னொரு பெண் நிதி அமைச்சராக பட்ஜெட் தாக்கல் செய்கிறார். மட்டுமன்றி எங்கள் ஆட்சியில் மகளிருக்கு சைனிக் பள்ளிகளின் வாயில்கள் திறந்து விடப்பட்டுள்ளன. பெண்கள் பாதுகாப்பு படைகளில் முக்கிய பொறுப்புகளில் ஜொலிக்கிறார்கள்” என்றார். பிரதமர் தொடர்ந்து தனது ஆட்சி காலத்தின் சாதனைகளை அடுக்கிய நிலையில், அதானியை பற்றி பேச வேண்டும் என எதிர்கட்சிகள் தொடர் முழக்கமிட்டனர். ஆகவே பிரதமர் மோடியின் உரையின் ஆரம்பம் முதல் முடிவு வரை எதிர்க்கட்சிகளின் முழக்கங்கள் தொடர்ந்தன. மாநிலங்களவை தலைவரான குடியரசு துணைத் தலைவர் ஜெகதீஷ், தங்கர் எதிர்க்கட்சி உறுப்பினர்களின் இத்தகைய போக்கு வெட்கப்பட வைப்பதாக வருத்தம் தெரிவித்தார். பலமுறை அமைதி காக்க வேண்டும் என கோரிக்கை வைத்த போதும், எதிர்க்கட்சிகள் அதை ஏற்காமல் முழக்கமிட்டன. - கணபதி சுப்ரமணியம்
http://dlvr.it/SjCFYc

Read More

சொந்த வீடு கனவில் இருப்பவரா நீங்கள்? ஷாக் கொடுத்த ரிசர்வ் வங்கி அறிவிப்பு! முழுவிவரம்

மத்திய பட்ஜெட் அறிவிக்கப்பட்டதை அடுத்து ரிசர்வ் வங்கியின் நிதி கொள்கை குறித்த அறிவிப்பை அதன் ஆளுநர் சக்திகாந்த தாஸ் இன்று வெளியிட்டார். அதன்படி ரெப்போ வட்டி விகிதத்தை 0.25 சதவிகிதம் உயர்த்தி 6.50 ஆக நிர்ணயித்திருக்கிறது ஆர்.பி.ஐ. வங்கிகளுக்கான ரெப்போ வட்டி விகிதம் உயர்த்தப்பட்டதால் வங்கிகளில் கடன் வாங்கும் வாடிக்கையாளர்களே இதில் பாதிக்கப்படுவார்கள். இதனால் வீடு, வாகனம், தனிநபர் கடன்களுக்கான வட்டி விகிதமும் இதனூடே அதிகரிக்கப் போகிறது. இதன் மூலம் மாதத் தவணை முறையில் சொந்த வீடு வாங்க வேண்டும் என்ற கனவுடன் உள்ள பல நடுத்தர மக்களின் நிலையே குலைந்துவிடும் அளவுக்கு இருக்கிறது. இந்த நிலையில், Moneycontrol-Liases Foras House Purchase Affordability Index இந்தியாவின் முக்கிய நகரங்களின் சராசரி மாத வாடகையைக் கணக்கில் கொண்டு ஒரு சொந்த வீடு வாங்க எத்தனை மாத வாடகை தேவைப்படுகிறது என்ற பட்டியலை வெளியிட்டிருக்கிறது. 32 நகரங்கள் கொண்ட பட்டியலில் வீட்டு வாடகையை முதன்மையாக கொண்டும், சுற்றுப்புற பகுதிகளில் இருக்கக் கூடிய அடிப்படை வசதிகள், பயண தொலைவுகள் முதலியவற்றை கருத்தில்கொண்டும் இந்த பகுப்பாய்வு நடத்தப்பட்டிருக்கிறது. இதில் most affordable city in India என்ற பட்டியலில் பெங்களூரு மட்டும் தனித்து இருக்கிறது. அதனை தொடர்ந்து இந்தூர், ராஜ்கோட், வதோதரா, கொல்கத்தா ஆகியவை அடுத்தடுத்த இடங்களை பிடித்திருக்கின்றன. ஏனெனில் பெங்களூருவில் 330 மாதங்களுக்கான வாடகையை வைத்து ஒரு வீட்டை வாங்க முடியும். அதாவது மாதத்தவணை முறையில் வீடு வாங்கினால் இருபத்தி ஏழரை வருஷம் எடுக்கும். இதேபோல ஐதராபாத்திற்கு 472 மாதங்கள், சென்னைக்கு 511 மாதங்கள், கோவைக்கு 498, டெல்லிக்கு 449, கொச்சிக்கு 401, கொல்கத்தாவுக்கு 358, திருவனந்தபுரத்திற்கு 494 என பட்டியல் நீள்கிறது. இதனடிப்படையில் கணக்கிட்டால் சென்னையில் ஒரு வீடு வாங்க கிட்டத்தட்ட 42 ஆண்டுகளுக்கு வாடகை கொடுத்தால் மட்டுமே சாத்தியமாகும். தோராயமாக ரூ.50 லட்சம் மதிப்பிலான வீட்டுக்கான கடனை அடைக்க மாதந்தோறும் 25 ஆயிரம் ரூபாயாவது கட்ட நேரிடும். இந்த EMI கட்டணம் வட்டி விகிதங்களுக்கு ஏற்பவும் மாறுபடும். இதில் குறிப்பிடத்தகுந்த விஷயம் என்னவென்றால் பகுப்பாய்வு செய்யப்பட்ட இந்த 32 நகரங்களிலேயே ஆந்திராவின் விசாகப்பட்டினம்தான் மிகவும் கட்டுப்படியே ஆகாத நகரமாக இருக்கின்றன. ஏனெனில் வைசாகில் ஒரு வீடு வாங்க வேண்டுமென்றால் 606 மாதங்களுக்கு வாடகை கட்ட வேண்டி வரும். அதாவது வாழ்க்கையின் பாதி நாட்களான 50 வருஷத்தை செலவிட வேண்டும். இப்படியாக புவனேஷ்வர், ராஞ்சி, பாட்னா, கவுகாத்தி, ஜெய்ப்பூர் ஆகிய நகரங்களின் கணக்கீடுகள் நீள்கின்றன. இதன் மூலம் சொந்த வீடு வாங்க வேண்டும் என எண்ணுவோர் சராசரியாக வாழ்நாளில் ஈட்டக்கூடிய வருமானத்தை வாடகையாகவோ, மாதத் தவணையாகவோ கட்ட வேண்டிய சூழலுக்கே தள்ளப்பட்டிருக்கிறார்கள்.
http://dlvr.it/Sj8XfP

Read More

திடீரென 25% உயர்ந்த அதானி குழும பங்குகள்.. காரணம் என்ன தெரியுமா? குஷியில் முதலீட்டாளர்கள்!

அதானி குழும பங்குகள், இன்று திடீரென 25% உயர்ந்திருப்பதைக் கண்டு முதலீட்டாளர்கள் நம்பிக்கையடைந்துள்ளனர்.  அதானி குழும பங்குகள் சரிவு அமெரிக்க புலனாய்வு நிறுவனமான ஹிண்டன்பர்க், கடந்த ஜனவரி 24ஆம் தேதி வெளியிட்ட அறிக்கையால், ஆசியாவிலேயே மிகப் பிரபலமான தொழில் நிறுவனமான அதானி குழுமம் கடுமையான சரிவைச் சந்தித்து வருகிறது. மேலும், உலக அளவில், அதானி விவகாரம் நாளுக்கு நாள் பூதாகரமாய் வெடித்து வருகிறது. இந்தியாவில், நாடாளுமன்ற இரு அவைகளும் முடக்கப்பட்டு வருவதுடன், அதானி குறித்து பிரதமர் உரிய விளக்கம் அளிக்க வேண்டும் எனவும் எதிர்க்கட்சிகள் வலியுறுத்தி வருகின்றன. திடீரென 25% விலை உயர்ந்த பங்குகள் இந்த நிலையில், அதானி குழும பங்குகள் இன்று 25 சதவிகிதம் வரையில் ஏற்றம் கண்டுள்ளன. இது அதானி குழும முதலீட்டாளர்களுக்கு ஆறுதலைக் கொடுத்துள்ளது. ஹிண்டர்ன்பர்க் அறிக்கையால், அதானி குழும பங்குகள் தொடர்ந்து சரிவைச் சந்தித்து வந்த வேளையில், இன்று 25 சதவீதம் வரையில் ஏற்றம் கண்டுள்ளது. அதானி எண்டர்பிரைசஸ் நிறுவனத்தின் பங்கு விலையானது 25% அதிகரித்து, 1965.50 ரூபாயாகவும், இதே போர்ட்ஸ் நிறுவனத்தின் பங்கு விலையானது, 9.64% ஏற்றம் கண்டு, 598.70 ரூபாயாகவும், இதே அதானி வில்மர் நிறுவனத்தின் பங்கு விலையானது அப்பர் சர்க்யூட் ஆகி, 399.40 ரூபாயாகவும் அதிகரித்துள்ளது. இதே அதானி டிரான்ஸ்மிஷன் பங்கு விலையானது அப்பர் சர்க்யூட் ஆகி 1324.45 ரூபாயாக உச்சம் தொட்டுள்ளது. திடீர் விலை உயர்வுக்குக் காரணம் ”அதானி வாங்கிய கடன்களில் ஒரு பகுதியை முன்கூட்டியே செலுத்துவதாகத் தெரிவித்திருந்ததே, இந்த விலையேற்றத்துக் காரணம் எனச் சொல்லப்படுகிறது. இது முதலீட்டாளர்களுக்கு புத்துணர்வைத் தருவதாகவும், நம்பிக்கையளிப்பதாகவும் இருக்கிறது” என சந்தை வர்ணனையாளர் ஸ்ரீநாத் ஸ்ரீதரன் ஆங்கில ஊடகம் ஒன்றிடம் தெரிவித்துள்ளார். மேலும், அதானி குழும பத்திரங்கள் தகுதியுடையவைதான் என JP Morgan நிறுவனம் கூறியதும் முக்கியக் காரணமாகப் பார்க்கப்படுகிறது. இதைத் தொடர்ந்துதான் அதானி குழும பங்குகள் இன்று ஏற்றத்தினை கண்டுள்ளன. ”தற்போதைய குறியீட்டு விதிகளின்படி, அதானி குழும நிறுவனங்கள் CEMBI, JACI மற்றும் JESG குறியீடுகளில் சேர்ப்பதற்கு தகுதியுடையதாகவே இருக்கும்” என JP Morgan நிறுவனம் நேற்று கூறியிருந்தது. JP Morgan வெளியிட்ட அறிக்கை மேலும் அது தன்னுடைய அறிக்கையில், “அதானி குழுமம் குறித்த பொதுவில் கிடைக்கும் தகவல் மற்றும் பத்திரங்களின் பணப்புழக்கத்தை நாங்கள் தொடர்ந்து கண்காணித்து வருகிறோம். அதானி குழுமத்தின் முக்கிய வணிகங்களில் துறைமுகங்கள், மின் உற்பத்தி, பரிமாற்றம் மற்றும் புதுப்பிக்கத்தக்க ஆற்றல் ஆகியவை அடங்கும், CEMBI மற்றும் JACI குறியீடுகளில் அதானி குழுமம் மொத்தம் 7.7 பில்லியன் டாலரைக் கொண்டுள்ளது” என JP Morgan நிறுவனம் சுட்டிக்காட்டியிருந்தது குறிப்பிடத்தக்கது. வளர்ந்து வரும் சந்தை நிறுவனங்களால் வழங்கப்பட்ட அமெரிக்க டாலர் மதிப்பிலான கடனை, கார்ப்பரேட் எமர்ஜிங் மார்க்கெட் பாண்ட் இன்டெக்ஸ் சீரிஸும் (CEMBI), ஆசிய நிலையான-விகித டாலர் பத்திரச் சந்தையின் மொத்த வருவாய் செயல்திறனை, JP Morgan ஆசியா கிரெடிட் இண்டெக்ஸும் (JACI) கண்காணிக்கின்றன என்பது குறிப்பிடத்தக்கது. முதலீட்டாளர்கள் எதிர்பார்ப்பு இந்த நிலையில், இன்று 25% உயர்ந்திருக்கும் அதானி குழுமத்தின் பங்குகள் மூலம், இந்த வாரம் அவருடைய நிறுவனங்களின் வருவாயையும் முதலீட்டாளர்கள் உற்றுநோக்குவார்கள் என எதிர்பார்க்கப்படுகிறது. முன்னதாக, முதலீட்டாளர்களின் நலனைக் கருத்தில்கொண்டு, அதன் FPO விற்பனையைத் திரும்பப் பெறுவதாகவும், ஏற்கெனவே அந்தப் பங்குகளை வாங்குவதற்காகச் செலுத்தப்பட்ட ரூ. 20,000 கோடியைத் திரும்பப் பெறுவதாகவும் அதானி குழுமம் அறிவித்திருந்தது. தவிர, 2024க்குள் கட்டவேண்டிய கடனில் ஒரு பகுதியான 1,114 மில்லியன் அமெரிக்க டாலர்களை முன்கூட்டியே செலுத்தப்படும் எனவும் அதானி குழுமம் அறிவித்திருந்தது குறிப்பிடத்தக்கது. அதானி குறித்த முழு விவரங்களையும் படிக்க இங்கே க்ளிக் செய்யவும். - ஜெ.பிரகாஷ்
http://dlvr.it/Sj5p7Q

Read More

``எங்களிடம் உள்ள ஒரே பிரச்னை, செய்வதை மக்களிடம் சொல்வதில்லை” - மதுரையில் அமைச்சர் உதயநிதி

மதுரை மாவட்டத்திலுள்ள மகளிர் சுய உதவிக் குழுக்களுக்கு ரூ.180 கோடியில் நலத்திட்ட உதவி வழங்கும் விழா பாண்டிகோயில் அருகே பிரமாண்டமாக நடைபெற்றது. இதில் கலந்துகொண்டு அமைச்சர் உதயநிதி ஸ்டாலின் பேசும்போது, ``அமைச்சர் மூர்த்திக்கு எதையும் சாதாரணமாகச் செய்யத் தெரியாது, பிரமாண்டமாகத்தான் செய்வார். இதை நான் மட்டும் சொல்லவில்லை. நம் முதலமைச்சரும் சொல்லியிருக்கிறார். மக்களிடம் மனு வாங்கினார் கட்சி நிகழ்ச்சியாக இருந்தாலும் அரசு நிகழ்ச்சியாக இருந்தாலும் பிரமாண்டமாக, மாநாடுபோல நடத்த வேண்டும் என நினைப்பார். அந்தவகையில்தான் இந்த நலத்திட்ட உதவி வழங்கும் நிகழ்ச்சியும் ஒரு மாநாடுபோல நடைபெற்றுக்கொண்டிருக்கிறது. தனக்கு வழங்கப்பட்ட பத்திரப் பதிவுத்துறையிலும் முத்திரைப் பதிக்கும் வகையில் செயல்பட்டு, அரசுக்கு வருவாயை அதிகரித்திருக்கிறார் அண்ணன் மூர்த்தி. வழக்கமாக ஒரு நிகழ்ச்சிக்கு தேதி வாங்குகிறவர்கள் இந்தமாதிரி ஒரு நிகழ்ச்சி என்று சொல்லித்தான் தேதி வாங்குவார்கள். ஆனால் அண்ணன் மூர்த்தியோ, என்ன நிகழ்ச்சி என்று சொல்லமாட்டார். இருபத்தி ஐந்தாயிரம் பேர் வருவாங்க, ஐம்பதாயிரம் பேர், எழுபத்தைந்தாயிரம் பேர் வருவாங்க என்றுதான் தேதி வாங்குவார். 2018-ல் என்னை வைத்து முதன்முதலில் நிகழ்ச்சி நடத்தியதும் அண்ணன் மூர்த்திதான். அதன் பிறகு ஏகப்பட்ட நிகழ்ச்சிகளை நடத்தியிருக்கிறார். கடந்த ஒரு மாதத்தில் மட்டும் மூன்று முறை மதுரைக்கு வந்திருக்கிறேன். தூங்கா நகரம், கூடல் நகர், ஜல்லிக்கட்டு மாவட்டம் இப்படி மதுரை உங்களுக்கு மட்டுமல்ல, நம் அனைவருக்கும் நெருக்கமான, பெருமையான மாவட்டம். கண்ணகி நீதி கேட்ட மண் என்ற பெருமைகொண்ட மதுரைக்கு வந்திருப்பதில் மகிழ்ச்சியடைகிறேன். வெள்ளி செங்கோல் வழங்கிய மூர்த்தி எப்படி கண்ணகி தன் ஒற்றைக் கால் சிலம்பைவைத்து அன்றைய ஆட்சியாளர்களுக்கு எதிராக நீதி கேட்டாரோ, அதேபோல் கடந்த தேர்தல் பிரசாரத்துக்காக மதுரைக்கு வந்திருந்தபோதுதான் எனக்கும் அந்த ஒற்றைச் செங்கல் கிடைத்தது. அதை வைத்துக்கொண்டுதான், தமிழகம் முழுவதும் சுற்றிவந்து தமிழ்நாட்டை வஞ்சித்த மத்திய, மாநில அரசுகளுக்கு எதிராக நீதி கேட்டு, தமிழ்நாட்டின் விடியலை நோக்கி என் பிரசாரத்தை தொடங்கினேன். இதே மதுரையில் கலைஞர் பெயரில் சென்னை அண்ணா நூற்றாண்டு நூலகத்துக்கு இணையாக 114 கோடி ரூபாய் மதிப்பில் மாபெரும் நூலகம் இன்னும் சில மாதங்களில் மக்கள் பயன்பாட்டுக்காகத் திறக்கப்படவிருக்கிறது.மக்களுடன் மதுரைக்கு மட்டுமல்ல, ஒட்டுமொத்த தமிழ்நாட்டுக்குமே கழக அரசு அமைந்த இந்த 21 மாதங்களில் முதலமைச்சர் என்னென்ன திட்டங்களை நிறைவேற்றித் தந்திருக்கிறார் என்பதை நீங்கள் எண்ணிப்பார்க்க வேண்டும். தேர்தல் அறிக்கையில் அவர் அளித்த வாக்குறுதிகளில் 75 சதவிகிதத்துக்கும் மேல் நிறைவேற்றித் தந்திருக்கிறார். எங்களிடம் உள்ள ஒரே பிரச்னை, செய்வதை மக்களிடம் சொல்வதில்லை. ஆனால், எதிர்க்கட்சிகள் பரப்பும் அவதூறுகள் வாட்ஸ்அப் வதந்திகளாக எங்களுக்கு முன்னால் போய்ச் சேர்ந்துவிடுகின்றன. அ.தி.மு.க அரசு இருந்தபோது லட்சக்கணக்கான கோடி கடன்களையும், காலியான கஜானாவையும், அடிமை அரசு என்ற அவப்பெயரையும் மட்டுமே விட்டுச் சென்றது. தடுமாறிக் கிடந்த தமிழ்நாட்டு அரசை தலைநிமிரச் செய்தவர் நம் முதலமைச்சர் முத்துவேல் கருணாநிதி ஸ்டாலின் என்றால் அது மிகையல்ல. கடந்த 21 மாதங்களில் அவர் நிகழ்த்தியிருக்கிற சாதனைகளில் சிலவற்றை மட்டும் உங்களிடம் எடுத்துக்கூற விரும்புகிறேன். மதுரையில் மட்டும் 29,990 விவசாயிகளுக்கு ரூ. 257 கோடி பயிர்க்கடன் தள்ளுபடி, 37,342 பயனாளிகளுக்கு ரூ.171 கோடி மதிப்பில் பொது நகைக்கடன் தள்ளுபடி, 21,220 மகளிர் சுய உதவிக் குழுக்களுக்கு ரூ. 42 கோடி ரூபாய் கடன்கள் தள்ளுபடி செய்யப்பட்டிருக்கிறது. இவை அனைத்தும் கூட்டுறவு வங்கிகளில் மட்டும் பெற்ற கடன்கள். இன்னும் ஏராளமான திட்டங்களை நம் திராவிட மாடல் அரசு செயல்படுத்திவருகிறது. அனைத்தையும் சொல்ல நேரம் போதாது. விழாவுக்கு வந்த குழந்தையைத் தூக்கிய உதயநிதி இந்த மேடையில் மதுரை மாவட்டத்தில் ரூ 8,65,00,000 மதிப்பீட்டில் முடிவுற்ற 30 பணிகளின் பயன்பாட்டைத் தொடங்கிவைத்தும், மாவட்டத்தின் 9,344 சுய உதவிக் குழுக்களைச் சேர்ந்த 72,092 மகளிர் பயனடையும் வகையில் ரூ 173 கோடி கடனுதவிகளை வழங்கியிருக்கிறோம். படிப்பிலும், உழைப்பிலும் ஆண்களைவிட பெண்கள் ஒரு படி மேல் இருக்கிறீர்கள். எதிர்நீச்சல் போட்டு முன்னேற நினைக்கும் உங்களுக்குத் துடுப்பாகத்தான் இந்த கடனுதவிகளைப் பார்க்கிறேன். 2021 தேர்தல் பிரசாரத்தின்போது இங்குள்ள எய்ம்ஸ் வளாகத்தில் செங்கல்லை எடுத்தேன். ஆனால், இன்னும் அதன் கட்டுமானப் பணியை ஒன்றிய அரசு தொடங்கவில்லை. அதன் பிறகு தொடங்கப்பட்ட கலைஞர் நூலகத்தை நாம் விரைவில் திறக்கவிருக்கிறோம். ஒன்றிய அரசின் இந்த பட்ஜெட்டில்கூட நிதி ஒதுக்கவில்லை. 2024 நாடாளுமன்றத் தேர்தல் பிரசாரத்துக்கும் அந்தக் கல்லுடன்தான் செல்ல வேண்டும் என நினைக்கிறேன். மதுரை மக்கள் அனைவரும் கையில் செங்கல்லை எடுப்பதற்குள் எய்ம்ஸ் வேலைகள் தொடங்கிவிடும் என நினைக்கிறேன்.உதயநிதி ஆண்களைவிட பெண்கள் தெளிவாகப் புரிந்துகொள்வீர்கள். நீங்கள் எல்.ஐ.சி-யில் முதலீடு செய்த பணம் காணாமல் போய்க்கொண்டிருக்கிறது. குஜராத்தில் நடந்தது குறித்த ஆவணப்படத்தை வெளியிட முடியலை. உங்க வீட்டு காஸ் கனெக்சனுக்கு மானியம் வருவதில்லை. இதையெல்லாம் கேட்க இங்குள்ள எதிர்க்கட்சி எம்.எல்.ஏ-க்களும் வர்றதில்லை, ஓனர் யார் என்று முடிவெடுப்பதில் அவர்கள் மும்முரமாக இருக்கிறார்கள். நாங்கள் அப்படி கிடையாது. கொரோனாவிலும் உங்களுடன் நின்றோம்" என்று பேசினார்.
http://dlvr.it/Sj31ln

Read More

``இதுதான் எனது கடைசி தேர்தல்!" - கர்நாடக முன்னாள் முதல்வர் சித்தராமையா

கர்நாடகா சட்டமன்றத்தின் பதவிக்காலம் 2023 மே 24-ம் தேதியுடன் முடிவடைகிறது. எனவே, மே மாதத்துக்கு முன்பு சட்டமன்றத் தேர்தல் நடத்தப்படும் என எதிர்பார்க்கப்படுகிறது. அதனால், கர்நாடகாவில் அரசியல் கட்சிகள் பரபரப்பாக தேர்தல் வியூகங்களை அமைத்து தீவிர பிரசாரம் மேற்கொண்டுவருகின்றன. இந்த நிலையில், 'பிரஜா த்வானி யாத்திரை' பொதுக்கூட்டத்தில் பேசிய சட்டப்பேரவை எதிர்க்கட்சித் தலைவரும், கர்நாடக மாநில முன்னாள் முதல்வருமான சித்தராமையா, ``கர்நாடக மக்களின் ஆசியுடன் முதல்வராகும் வாய்ப்பு 2013-2018 வரை கிடைத்தது. தேவ்ராஜ் அர்ஸ்ஸுக்குப் பிறகு முழு ஐந்தாண்டுக்காலம் முதல்வராக இருந்த ஒரே முதல்வர் நான்தான். நாங்கள் ஆட்சிக்கு வந்தால், 10 கிலோ அரிசி, 200 யூனிட் இலவச மின்சாரம், பெண்களுக்கு 2,000 ரூபாய் வழங்குவோம்.சித்தராமையா நீங்கள் எங்களை நம்புகிறீர்கள், இல்லையா... எவ்வளவு சிரமம் வந்தாலும் வாக்குறுதியை நிறைவேற்றுவோம். இதுவே எனக்கு கடைசி தேர்தல். ஆனால், அரசியலிலிருந்து ஓய்வுபெற மாட்டேன். உங்கள் அனைவருக்காகவும் தொடர்ந்து உழைப்பேன்" என்று கூறினார். இதற்கு முன்னர் ஒரு நிகழ்ச்சியில் சித்தராமையா, ``ஆட்சிக்கு வந்த பிறகு மக்களுக்கு அளித்த வாக்குறுதிகளை நிறைவேற்ற முடியாவிட்டால், அரசியலிலிருந்து ஓய்வுபெற்று வீடு திரும்புவேன்" என்று கூறியது குறிப்பிடத்தக்கது.சோனியா காந்திக்கு சென்ற கடிதம்: ``எனக்கும் அதற்கும் எந்த சம்பந்தமும் இல்லை" - சித்தராமையா மறுப்பு
http://dlvr.it/Sj0J18

Read More

”பயணத்தின் போது இதெல்லாம் நடக்கும்.. அதனால்..” - நெகிழவைத்த கண்டக்டரின் பேச்சு! வீடியோ

அரசுப் பேருந்தில் பயணிக்கும் பயணிகள் மேற்கொள்ள வேண்டிய வழிமுறைகள் என்னென்ன கட்டண விவரங்கள் என்ன என்பதை நடத்துநர் ஒருவர் விரிவாக விளக்கும் வீடியோ ஒன்று ட்விட்டர் தளத்தில் பகிரப்பட்டு பலரது பாராட்டுகளையும் பெற்று வருகிறது. அந்த வீடியோவில் மதுரையில் இருந்து கோவை செல்லும் தமிழ்நாடு அரசுப் பேருந்தின் நடத்துநரான சிவசண்முகம் என்பவர் பேருந்தில் பயணிக்கும் பயணிகளுக்கு முக்கியமான அறிவுறுத்தல்களை கூறியும், பயணம் வெற்றிகரமாக அமைய வாழ்த்தவும் செய்திருக்கிறார். அதில், “அரசுப் போக்குவரத்து சேவையை தேர்வு செய்து எங்களோடு பயணிக்க வாய்ப்பளித்ததற்கும் மிக்க நன்றி. நல்ல பேருந்து வசதியை அரசு நமக்கெல்லாம் ஏற்படுத்தி கொடுத்திருக்கிறது. அந்த பேருந்தை சுத்தமாகவும், பழுது ஏற்படுத்தாமலும் இருக்கவேண்டிய பொறுப்பு நமக்கு இருக்கிறது. கண்டக்டர் இப்படியெல்லாம் சொல்கிறாரே என வருத்தம் கொள்ளவேண்டாம். சாப்பிட்ட பிறகு தூக்கி எறியும் கழிவு பொருட்களை போடுவதற்கென பேருந்தின் இரு பக்கத்திலும் பைகள் கட்டப்பட்டிருக்கின்றன. அதில் போடுங்கள். மேலும் பயணங்களின் போது சிலருக்கு குமட்டல், வயிறு பிரட்டுவது போன்ற அசவுகரியமான தொந்தரவுகள் வரும். அப்படி ஏதும் வந்தால் உடனே சொல்லுங்கள் புளிப்பு மிட்டாய், கவர்களெல்லாம் இருக்கின்றன. வாங்கி பயன்படுத்திக்கொள்ளுங்கள். ஏனெனில் இது நமது பேருந்து நாமதான் சுத்தமாக வைத்திருக்க வேண்டும். யாரும் சங்கடப்பட்டுக்கொள்ள வேண்டாம். பேருந்து வாடிப்பட்டி வழியாகத்தான் செல்லும். முடிந்தளவுக்கு சில்லறையாக கொடுத்து உதவுமாறு கேட்டுக்கொள்கிறோம். பள்ளி, கல்லூரி, விசேஷங்கள், வேலை நிமித்தம் என பலதரப்பட்ட மக்கள் இந்த பேருந்தில் பயணிப்பதுண்டு. உங்கள் பயணம் இனிதாகவும், வெற்றிகரமாகவும் அமைய அரசுப் போக்குவரத்துக்கழகம் சார்பாகவும், இந்த பேருந்தின் ஓட்டுநர் மகேந்திரன் மற்றும் நடத்துநரான என் சார்பாகவும் வாழ்த்துகிறோம்.” என கனிவாக பேசியிருக்கிறார் அந்த நடத்துநர்.  ஏற்கெனவே இதே நடத்துநர்தான் கொரோனா ஊரடங்கு காலத்தின் போது பேருந்தில் வரும் பயணிகளுக்கென கிருமி நாசினி, முகக்கவசங்களை கொடுத்து நன்மதிப்பை பெற்றிருந்தார் என்பதும் குறிப்பிடத்தக்கது. Those who understand Tamil, pl listen to this responsible request to passengers from a conductor of a Tamil Nadu Government bus from Madurai to Coimbatore. Had everyone be like him, the state can progress further. ⁦@mkstalin⁩ pic.twitter.com/1sHrdapD3b — Ilangovan Rajasekaran (@rinpoet) February 4, 2023
http://dlvr.it/ShyKRG

Read More