"பெரிய ஸ்கோரை அடிக்க..”- 4 வது போட்டிக்கு முன்னர் கோலியிடம் பேசிய அஸ்வின்! என்ன சொன்னார்?

விராட் கோலி டெஸ்ட்டில் சதத்தை பதிவு செய்ய தடுமாறி வந்த நிலையில், ஆஸ்திரேலியாவிற்கு எதிரான4ஆவது டெஸ்ட் போட்டியில் தன்னுடைய 28ஆவது டெஸ்ட் சதத்தை கொண்டுவந்து அசத்தினார். இந்நிலையில் இந்த போட்டியில் கலந்துகொள்ளும் முன் அஸ்வின் அவருடன் பேசியது தற்போது வைரலாகி வருகிறது. கொரோனா பரவலின் இடைப்பட்ட காலங்களில், கிரிக்கெட் விளையாடாமல் போன நிலையில், தன்னுடைய பேட்டிங் ஃபார்மை இழந்த விராட் கோலி, தொடர்ந்து ஒருநாள், டி20, டெஸ்ட் வடிவங்களில் சதங்களையே பதிவு செய்யாமல் தடுமாறி வந்தார். கிட்டத்தட்ட 3 வருட கடுமையான விமர்சனங்களுக்கு பிறகு, 2022ஆம் ஆண்டு ஆசியகோப்பை டி20 தொடரில் ஆப்கானிஸ்தான் அணிக்கு எதிராக தனது முதல் டி20 சதத்தையும் 71ஆவது சர்வதேச சதத்தையும் எடுத்தார் விராட் கோலி. 71ஆவது சதத்திற்கு பிறகு அடுத்தடுத்த 2 ஒருநாள் தொடர்களில் 72, 73, 74ஆவது சதங்கள் எடுத்து, தான் ஏன் எந்த காலத்திற்கும் சிறந்த பேட்ஸ்மேன் என்பதை நிரூபித்து காட்டினார். இருப்பினும் டெஸ்ட் போட்டிகளில் சொதப்பல் ஆட்டத்தையே வெளிக்காட்டி வந்த விராட் கோலி, விரைவில் டெஸ்ட்டிலும் சதத்தை பதிவுசெய்ய வேண்டும் என்ற ஆசை அனைத்து கிரிக்கெட் ரசிகர்களுக்கும் இடையே ஏற்பட்டது. முதல் 3 டெஸ்ட் போட்டிகளில் சுமாரான ஆட்டத்தை வெளிப்படுத்திய கோலி! இந்நிலையில் ஆஸ்திரேலியாவிற்கு எதிரான டெஸ்ட் தொடரின் முதல் 3 போட்டிகளிலும் சோபிக்க தவறிய விராட் கோலி, மீண்டும் விமர்சனத்திற்குள்ளானார். 2ஆவது டெஸ்ட் போட்டியில் 44 ரன்கள் எடுத்து நல்ல தொடக்கத்தை கொடுத்த போதிலும், ஒரு சர்ச்சைக்குரிய விக்கெட் மூலம் வெளியேறினார் கோலி. ஒருவேளை அந்த போட்டியில் விராட் கோலி அப்படி வெளியேறாமல் இருந்திருந்தால், அவர் சதத்தை எடுத்திருக்கலாம் என விமர்சிக்கப்பட்டது. 3.5 வருடங்களுக்கு பிறகு டெஸ்ட் சதத்தை கொண்டுவந்த விராட் கோலி! இப்படியாக கிட்டத்தட்ட 4 வருடங்களாக டெஸ்ட் போட்டிகளில் சதங்களையே பதிவுசெய்ய முடியாமல் தடுமாறி வந்த விராட் கோலி, அகமதாபாத்தில் நடைபெற்ற 4ஆவது டெஸ்ட் போட்டியில் தன்னுடைய 28ஆவது டெஸ்ட் சதத்தை எடுத்து அசத்தினார். 100, 150 என கடந்து ஆடிய விராட் கோலி, ஸ்ரேயாஸ் ஐயருக்கு ஏற்பட்ட காயத்தின் காரணமாக, இரட்டை சதம் அடிக்கும் வாய்ப்பை தவறவிட்டார். ”நான் இதைத்தான் விராட் கோலியிடம் பேசினேன்”-அஸ்வின் ஆஸ்திரேலியாவிற்கு எதிரான 4ஆவது டெஸ்ட் போட்டி சமன் செய்யப்பட்டு, தொடரை 2-1 என்ற கணக்கில் கைப்பற்றி அசத்தியது இந்திய அணி. 4ஆவது போட்டியின் முடிவுக்கு பிறகு ஸ்டார்ஸ் ஸ்போர்ட்ஸில் பேசியிருந்த ரவிச்சந்திரன் அஸ்வின், 4ஆவது போட்டிக்கு முன்னதாக விராட் கோலியிடம் தான் பேசியதை பகிர்ந்து கொண்டுள்ளார். விராட் கோலி குறித்து பேசிய அஸ்வின், “நான் விராட் கோலி இந்த தொடரில் சிறப்பாக விளையாடியதாகவே உணர்ந்தேன். அவர் களத்தில் நீண்ட நேரம் நிலைத்து நின்று விளையாடுகிறார். ஆனால் 30 ரன்கள், 40 ரன்கள் என நல்ல தொடக்கம் கிடைத்த பிறகும் துரதிஷ்டவசமாக வெளியேறினார். அப்போது நான் விராட் கோலியிடம் பேச நினைத்தேன். நாங்கள் பொதுவாக இப்படி பேசிக்கொண்டதில்லை. ஆனால் இந்த நேரத்தில் அவரிடம் எனக்கு பேச வேண்டும் போல் இருந்தது” என்று கூறியுள்ளார். மேலும், “ஒருவீரர் நன்றாக விளையாடியும் தோற்றுப்போகிறார் என்றால், அவரது தோள்களில் கைவைத்து நீங்கள் சிறப்பாக விளையாடினீர்கள் என்று கூறவேண்டும். இந்த அனுகுமுறை தான் என் வாழ்க்கையில் என்னை எனக்கே சில நேரங்களில் புரியவைத்தது. அதனால் தான் விராட் கோலியிடம், நீங்கள் சிறப்பாக விளையாடினீர்கள், கூடுதலான நேரம் இன்னும் களத்தில் இருக்க பாருங்கள், நிச்சயம் பெரிய ஸ்கோர் அடிக்கும் வாய்ப்பை பெறுவீர்கள்” என்று கூறியதாக தெரிவித்தார். விராட் கோலி மற்றும் புஜாரா இருவரும் இந்தியாவிற்கு கிடைத்த பிளஸ் பாய்ண்டுகள்! மேலும், “பல வருடங்களாக கிரிக்கெட் விளையாடிவரும் எனக்கு, இந்திய அணியை பொறுத்தவரையில் விராட் கோலி மற்றும் புஜாரா இருவரும் சிறப்பாக விளையாடுவது முக்கியமான ஒன்றாகும். அவர்கள் இருவரும் எங்கள் அணியின் சிறந்த வீரர்கள் ஆவர். கோலி மற்றும் புஜாரா இருவரும் இந்தியாவிற்கு கிடைத்த பிளஸ் பாய்ண்டுகள். இந்தியா ஒரு டெஸ்ட் போட்டியில் வெற்றிபெற வேண்டும் என்றால், கோலி மற்றும் புஜாராவின் பேட்டில் இருந்து ரன்கள் வரவேண்டும். அவர்கள் சிறப்பாக விளையாடுவதை அமர்ந்து பார்க்க நான் எதையும் செய்வேன்” என்று அஸ்வின் கூறியுள்ளார்.
http://dlvr.it/SkyxwJ

Read More

அஜித் ரசிகர் பகிர்ந்த விவேக், விஜயகாந்த் காமெடி வீடியோ - ரீட்வீட் செய்து ரஹ்மான் பதிவு

அஜித் ரசிகர் ஒருவர் ‘விஸ்வநாதன் ராமமூர்த்தி’ படத்தில் தமிழ் மொழி பற்றி விஜயகாந்த் - விவேக் பேசும் காமெடி வீடியோவை பகிர்ந்துள்ள நிலையில், அதனை இசையமைப்பாளர் ஏ.ஆர். ரஹ்மான் ரீ-ட்வீட் செய்து விவேக்கை மிஸ் செய்வதாக தெரிவித்துள்ளார். ராமநாரயணண் இயக்கத்தில் கடந்த 2001-ம் ஆண்டு வெளியான திரைப்படம் ‘விஸ்வநாதன் ராமமூர்த்தி’. இந்தப் படத்தில் மறைந்த நடிகர் விவேக், ராம்கி, ரோஜா, விந்தியா, கோவை சரளா, வெண்ணிற ஆடை மூர்த்தி ஆகியோர் முதன்மை கதாபாத்திரத்தில் நடித்திருந்தனர். முழு நகைச்சுவையுடன் உருவாகியிருந்த இந்தப் படத்தில், திரைப்பட இயக்குநராக முயற்சி செய்யும் கதாபாத்திரத்தில் நடித்திருப்பார் விவேக். மேலும், நடிகர் விஜயகாந்தை சந்தித்து கதை சொல்லப்போகும்போது, தமிழ் மொழி பற்றியும், தமிழர்கள் பற்றியும் பெருமை பொங்கும் வகையிலும், இளையதலைமுறையினருக்கு தமிழ் மொழி அவசியம் எனவும் விஜயகாந்த் -விவேக் பேசுவது போன்ற கருத்து நகைச்சுவை அமைக்கப்பட்டிருக்கும். இந்த வீடியோவை 'தல தீபன்' என்ற பெயரில் அஜித் ரசிகர் ஒருவர், ‘தமிழன் என்று சொல்லடா, தலை நிமிர்ந்து நில்லடா, கேப்டன்’ என்று பகிர்ந்திருந்தார். இதனை ரீட்வீட் செய்து இசையமைப்பாளர் ஏ.ஆர்.ரஹ்மான், காமெடி லெஜண்ட் விவேக்கை மிஸ் செய்வதாகவும், அவர் இல்லாதது பெரும் இழப்பு என்றும் கேப்ஷன் இட்டுள்ளார். ஆஸ்கர் விருது நேற்று அறிவிக்கப்பட்ட நிலையில், எதற்காக இதனை ஏ.ஆர். ரஹ்மான் பகிர்ந்தார் என்று தெரியவில்லை என்றாலும், மறைந்த நடிகர் விவேக்கை மிஸ் செய்வதாக ரசிகர்களும் கருத்து பதிவிட்டு வருகின்றனர். Missing comedy legend Vivek ..What a great loss https://t.co/RO4yPIGszB — A.R.Rahman (@arrahman) March 13, 2023
http://dlvr.it/SkvvDT

Read More

"சேப்பாக்கத்தில் கலைஞர் கருணாநிதி ஸ்டேண்ட்... இதான் காரணம்!”-கிரிக். சங்க தலைவர் விளக்கம்

சென்னை சேப்பாக்கம் கிரிக்கெட் மைதானத்தில் புதிதாக புணரமைக்கப்பட்டுள்ள இரண்டு பெவிலியன் ஸ்டேன்ட்களில், ஒன்றிற்கு தமிழ்நாட்டின் முன்னாள் முதலமைச்சர் கலைஞர் கருணாநிதியின் பெயர் சூட்டப்படவிருக்கிறது என தமிழ்நாடு கிரிக்கெட் சங்க தலைவர் அசோக் சிகாமணி, செய்தியாளர் சந்திப்பில் கூறியுள்ளார். அவர் பேசுகையில், “கிரிக்கெட் மீது ஆர்வம் கொண்டவராக மட்டும் இல்லாமல் முதன் முதலில் மைதானம் கட்ட 15 லட்சம் ரூபாய் நிதி வழங்கியதும் கலைஞர் கருணாநிதி தான்” என்று தெரிவித்துள்ளார். சென்னை சேப்பாக்கத்தில் தமிழ்நாடு கிரிக்கெட் சங்கத்தின் தலைவர் அசோக் சிகாமணி இன்று செய்தியாளர்களை சந்தித்து பேசினார். அப்போது பேசிய அவர், “சென்னை சேப்பாக்கம் மைதானத்தில் கடந்த 2 ஆண்டுகளாக செயல்பட்டுவந்த அண்ணா பெவிலியன் மற்றும் மெட்ராஸ் கிரிக்கெட் கிளப் ஆகிய இரண்டு பெவிலியன்களும் இடிக்கப்பட்டு, புதிதாக கட்டப்பட்டு வருகிறது. அதன் திறப்பு விழா, வருகின்ற 17ஆம் தேதி முதலமைச்சர் மு.க.ஸ்டாலின் தலைமையில் நடைபெறுகிறது. மைதானம் கட்ட தொடங்கிய நேரத்தில் நிதியுதவி அளித்து பெரிதும் பங்காற்றியவர் கலைஞர்! இதில் புதிதாக கட்டப்பட்டுள்ள ஒரு ஸ்டான்ட்டிற்கு மட்டும் முன்னாள் முதலமைச்சர் கருணாநிதி பெயர் சூட்டப்பட உள்ளது. கலைஞர் கருணாநிதி கிரிக்கெட் மீது அதிக ஆர்வம் கொண்டவர் என அனைவருக்கும் தெரியும். ஆனால் அதையும் தாண்டி முதன்முதலில் சேப்பாக்கம் மைதானம் கட்ட துவங்கிய நேரத்தில், 15 லட்சம் நிதியாக வழங்கினார் அவர். எனவே தான் அவர் பெயரை சூட்டியுள்ளோம். தமிழகத்தில் வேகப்பந்துவீச்சாளர்கள் குறைவாக உள்ளனர்! அதற்கான தேர்வு நடைபெற்றுவருகிறது! தமிழ்நாடு கிரிக்கெட் அணி ரஞ்சி கோப்பையில் மிக அருகில் சென்று தோல்வி அடைந்துள்ளது. இதனை மாற்றி தமிழ்நாடு கிரிக்கெட்டை மேலும் முன்னேற்றும் நோக்கில் புதிய பயிற்சியாளரை நியமனம் செய்துள்ளோம். தமிழகத்தில் வேகப்பந்து வீரர்கள் குறைவாக உள்ளதால் அவர்களை கண்டறிவதற்கான தேர்வுகள் அனைத்து இடங்களிலும் நடைபெற்று வருகிறது. ஏராளமான நபர்கள் இதில் பங்கேற்று உள்ளனர். விரைவில் மகளிருக்கான கிரிக்கெட் தொடர்கள் துவங்கப்படும்! தமிழகத்தில் முன்பை விட தற்போது பெரிய அளவில் மகளிர் கிரிக்கெட் விளையாடி வருகின்றனர். சென்னை மட்டுமல்லாமல் பல்வேறு மாவட்டங்களிலும் பெண்கள் கிரிக்கெட் விளையாடி வருகின்றனர். மகளிர் கிரிக்கெட் வீராங்கனைகள் அதிகரித்திருப்பதை ஊக்குவிக்கும் வகையில், நிச்சயம் அவர்களுக்கும் தனியாக கிரிக்கெட் தொடர்கள் துவங்கப்படும். எப்போதும் மக்கள் வந்துசெல்லும் வகையில் மைதானத்தில் அருங்காட்சியகம் இடம்பெறும்! சேப்பாக்கம் மைதானத்தில் புதிதாக இரண்டு அருங்காட்சியகம் அமைக்கவும், மைதானத்தை பொதுமக்கள் வந்து சுற்றி பார்க்கவும் நடவடிக்கை எடுத்து வருகிறோம். மைதானம் என்றால் பெரிதாக மக்கள் நினைத்து வரும் நிலையில், வெளிநாடுகளை போலவே போட்டி நடைபெறாத நேரங்களில் மைதானத்தை சுற்றி பார்க்கும் வசதி, இந்தியாவில் முதன் முதலில் சென்னையில் ஏற்பாடு செய்யப்பட்டு வருகிறது. அதுமட்டுமில்லாமல் மாற்றுத்திறனாளிகளும் போட்டியை நேரில் பார்க்க கூடுதல் வசதிகளும் ஏற்பாடு செய்யப்பட்டு உள்ளது” என தெரிவித்தார்.
http://dlvr.it/Skrqys

Read More

அடுத்தடுத்து 6 முறை மாரடைப்பு! ஆசிரியரை போராடி உயிர்பிழைக்க வைத்த அரசு மருத்துவர்கள்!

அடுத்தடுத்து 6 முறை மாரடைப்பு ஏற்பட்ட நபரை காப்பாற்றி சென்னை ராஜீவ் காந்தி அரசு மருத்துவமனை மருத்துவர்கள் சாதனை படைத்துள்ளனர். மனம் தளராத போராட்டத்தால் தவிர்க்கப்பட்ட மரணம் குறித்து இந்த தொகுப்பில் காணலாம். விழுப்புரம் மாவட்டம் அரும்பட்டு கிராமத்தைச் சேர்ந்தவர் ராஜேஷ். 36 வயதான இவர் சென்னை மடுவங்கரையில் உள்ள சைதாப்பேட்டை மாநகராட்சி பள்ளியில் ஆசிரியராக பணியாற்றி வந்தார். சில நாட்களுக்கு முன் ராஜேஷ் பள்ளிக்கு சென்றபோது , லேசான நெஞ்சுவலி ஏற்பட்டுள்ளது. நொடியும் தாமதிக்காமல் ராஜேஷை சைதாப்பேட்டை அரசு மருத்துவமனைக்கு அழைத்து சென்றபோது, அவருக்கு மாரடைப்பு ஏற்பட்டது உறுதியானது. உடனடியாக 108 ஆம்புலன்ஸ் மூலம் அவர் ராஜீவ் காந்தி அரசு மருத்துவமனைக்கு கொண்டு செல்லப்பட்டார். அங்கு இதயத் துடிப்பு முற்றிலும் நின்று, ராஜேஷ் நிலை குலைந்துள்ளார். அவசர சிகிச்சை பிரிவு மருத்துவர்களும், நெஞ்சுவலி சிகிச்சை மைய மருத்துவர்களும் இணைந்து நோயாளி மீண்டும் உயிர்பெறத் தேவையான சிகிச்சையையும், DEFIBRILLATORS மூலம் சிறிது இடைவெளிகளில் 5 முறை ஷாக்கும் கொடுத்துள்ளனர். இதனிடையே சிபிஆர் சிகிச்சையும் அளிக்கப்பட்டுள்ளது. 6 முறை மாரடைப்பு ஏற்பட்டும் மருத்துவர்கள் மனம் தளராமல் போராடி ராஜேஷின் உயிரை காப்பாற்றியுள்ளனர். இளையோருக்கு மாரடைப்புகள் அதிகரித்து விட்டதால், சிறிது நெஞ்சுவலி ஏற்பட்டால் கூட இதய பரிசோதனைகளை கட்டாயம் மேற்கொள்ள வேண்டும் என்கிறார் ராஜேஷுக்கு சிகிச்சை அளித்த இதயவியல் நிபுணர் பிரதாப்.  புள்ளி விவரங்களின்படி இதுவரை 3 முறை மாரடைப்பு ஏற்பட்டோர் மட்டுமே காப்பாற்றப்பட்டுள்ளனர் என்பதால் ராஜீவ் காந்தி மருத்துவர்கள் செய்ததை புதிய ஆய்வுக் கட்டுரையாக வெளியிடும் முயற்சிகளில் ஈடுபட்டுள்ளதாக முதல்வர் தேரணிராஜன் கூறினார். GOLDEN HOUR என்று சொல்லப்படும் குறிப்பிட்ட நேரத்திற்குள் இதயவியல் நிபுணர்களை அணுகினால் போதும், மாரடைப்பிலிருந்து மீண்டு விடலாம் என்பதே மருத்துவர்கள் சொல்லும் அறிவுரை.
http://dlvr.it/Skns59

Read More

ரசிகரின் தலையிலேயே ஓங்கி 3 முறை அடித்த பங்களாதேஷ் கிரிக்கெட் வீரர் - மீண்டும் சர்ச்சை!

வங்கதேச அணியின் நட்சத்திர வீரரான ஷாகிப் அல் ஹசன், தன்னுடைய ரசிகர் ஒருவரை தலையிலேயே 3 முறை ஓங்கி அடித்துள்ள சம்பவம் மீண்டும் சர்ச்சையை கிளப்பியுள்ளது. இங்கிலாந்து அணியானது வங்கதேசத்திற்கு சுற்றுப்பயணம் மேற்கொண்டு 3 போட்டிகள் கொண்ட ஒருநாள் தொடர் மற்றும் டி20 தொடர்களில் விளையாடிவருகிறது. 3 போட்டிகள் கொண்ட ஒருநாள் தொடரில் முதல் இரண்டு போட்டிகளில் இங்கிலாந்து அணி வெற்றிபெற்ற நிலையில், கடைசி ஒருநாள் போட்டியை தன்னுடைய அபாரமான பந்துவீச்சின் உதவியால் காப்பாற்றி கொடுத்தார் ஷாகிப் அல் ஹசன். 3ஆவது போட்டியில் 4 விக்கெட்டுகளை கைப்பற்றிய ஷாகிப், வங்கதேச அணி ஒயிட்வாஸ் ஆவதை தடுத்து நிறுத்தி சிறப்பான பங்களிப்பை கொடுத்தார். 6000 ரன்கள்+300 விக்கெட்டுகள் எடுத்து சாதனை! மூன்றாவது ஒருநாள் போட்டியில் 4 விக்கெட்டுகளை கைப்பற்றியதற்கு பிறகு உலக கிரிக்கெட்டில் ஒருநாள் கிரிக்கெட் வடிவத்தில் 6000 ரன்கள் அடித்து, 300 விக்கெட்டுகளை கைப்பற்றிய 3ஆவது சர்வதேச வீரர் மற்றும் முதல் வங்கதேச வீரர் என்ற இமாலய சாதனையை படைத்து அசத்தினார் ஷாகிப். ஷாகித் அப்ரிடி மற்றும் சனத் ஜெயசூர்யா என்ற ஜாம்பவான் வீரர்களுக்கு பிறகு, இந்த மைல்கல்லை எட்டிய 3ஆவது வீரர் ஷகிப் அல் ஹசன் தான். அதே போல் சக கிரிக்கெட் வீரர்களில் இதை எட்டிய ஒரே வீரர் ஷாகிப் தான், 200+ விக்கெட்டுகளுடன் மிட்சல் ஸ்டார்க் அடுத்த இடத்தில் இருக்கிறார். டி20 கேப்டனாக மொஹமதுல்லாவை சமன் செய்த ஷாகிப்! ஒருநாள் தொடருக்கு பிறகு, 3 போட்டிகள் கொண்ட டி20 தொடரின் முதல் போட்டியில் இங்கிலாந்தை எதிர்கொண்டு விளையாடியது வங்கதேச அணி. டி20 அணியின் கேப்டனாக இருக்கும் ஷாகிப் அல் ஹசன், பந்துவீச்சை தேர்வு செய்ய, முதலில் பேட்டிங் செய்த இங்கிலாந்து அணி 156 ரன்கள் மட்டுமே எடுத்தது. 157 ரன்கள் எடுத்தால் வெற்றி என்ற இலக்கோடு களமிறங்கிய வங்கதேச அணி, 6 விக்கெட்டுகள் வித்தியாசத்தில் அபார வெற்றிபெற்றது. இந்த வெற்றிக்கு பிறகு வங்கதேச அணியின் டி20 வெற்றி கேப்டனாக பார்க்கப்படும் மொஹமதுல்லாவின் வெற்றியை சரி செய்துள்ளார் ஷாகிப் அல்ஹசன். கோபத்தின் உச்சியில் ரசிகரின் தலையில் ஓங்கி அடித்த ஷாகிப்! இங்கிலாந்து மற்றும் வங்கதேச அணிக்கு இடையேயான முதல் டி20 போட்டி முடிந்து சுமார் மூன்று மணி நேரம் கழித்து, வங்கதேச கேப்டன் ஷாகிப் சில வணிக விளம்பரங்களில் நடிப்பதற்காக சென்றார். அப்போது அங்கு வந்த ஏராளமான ரசிகர்கள் ஷாகிப் அல் ஹசனை சூழ்ந்துகொண்டனர். அந்த கூட்டத்தின் இடையே சிக்கிக்கொண்ட ஷாகிப், பாதுகாப்பு வீரர்களுக்கிடையே இருந்தபோதிலும், ரசிகர்களிடம் நெரிசலில் இருந்து விலகி இருப்பது கடினமாக ஒன்றாகவே இருந்தது. அப்போது அவர் நெரிசலில் இருந்து அவருடைய காருக்குள் ஏறுவதற்கு ஒருவழியாக செல்லும் போது, ரசிகர்களில் ஒருவர் மூத்த ஆல்ரவுண்டரின் தலையில் இருந்த தொப்பியை எடுத்துகொண்டார். அப்போது கோபப்பட்ட ஷாகிப், அந்த தொப்பியை அந்த ரசிகரின் கைகளில் இருந்து பிடிங்கி, அதே தொப்பியால் ஓங்கி மூன்று முறை தலையில் அடித்துவிட்டு கோபத்துடன், காருக்குள் சென்று ஏறினார். ஏற்கனவே பல சர்ச்சைகளில் மாட்டிக்கொள்ளும் ஷாகிப் அல் ஹசன், தற்போது விசயத்தாலும் வைரலாகி உள்ளார். இந்த வீடியோ தற்போது சமூக வலைதளங்களில் பகிரப்பட்டு வருகிறது. Shakib Al Hasan Loses Cool, Hits Fan #shakibalhasan ,#bangladeshi ,#fan, pic.twitter.com/YYrbgbJxgW— Mahranikhan (@Mahrani90809546) March 11, 2023 ஐசிசி பேன் செய்தது முதல், இதுவரை ஷாகிப் சிக்கிய சர்ச்சைகள்! வங்கதேசத்தின் மூத்த வீரரான ஷாகிப் அல் ஹசன், உலகின் நம்பர் 1 ஆல்ரவுண்டராக இடம்பிடித்த சிறந்த வீரர்களில் ஒருவராக இருந்தாலும், மற்றவர்களிடம் அவர் காட்டும் மோசமான அணுகுமுறைக்காக பலமுறை விமர்சனத்திற்கு ஆளாகியுள்ளார். அந்த வகையில் கடந்த இரண்டு வருடங்களாக பல சர்ச்சைகளில் முன்னணியில் இருந்த ஷாகிப், 2023ஆம் ஆண்டின் பங்களாதேஷ் பிரீமியர் லீக்கின் போது, லெக் அம்பயரிடம் ஒயிட் கொடுக்காததிற்காக ஏய் ஏய் என கத்திக்கொண்டே வந்து சண்டையிட்டதற்கு சார்ஜ் செய்யப்பட்டார். அதேபோல் 2021-ல், டாக்கா பிரீமியர் லீக்கின் போது, அவுட் கேட்டு கொடுக்காததால் நடுவர் மீது கோபமடைந்த ஷாகிப், கோபத்தில் ஸ்டம்பை உதைத்து தரையில் அடித்து நொறுக்கினார். அது பலபேரால் பலவிதாமன விமர்சனங்களுக்கு அவரை தள்ளியது. அதற்கும் மேலாக 2019 ஆம் ஆண்டில், தனக்கு வந்த ஊழல் விவகாரத்தை வெளியே சொல்லாததிற்காக, சர்வதேச கிரிக்கெட் கவுன்சிலான ஐசிசி-யின் உத்தரவின் பேரில் சர்வதேச கிரிக்கெட்டிலிருந்து 2 வருட காலம் விளையாடுவதற்கு தடைவிதிக்கப்பட்டார், ஷாகிப் அல் ஹசன்.
http://dlvr.it/Sklq1b

Read More

‘ஜவான்’ படத்திலிருந்து லீக்கானதாக வைரலாகும் அதிரடி ஆக்ஷன் காட்சி - கொண்டாடும் ரசிகர்கள்!

அட்லீ - ஷாருக்கானின் கூட்டணியில் உருவாகி வரும் ‘ஜவான்’ படத்தின் படப்பிடிப்பு தளத்திலிருந்து எடுக்கப்பட்ட அதிரடி ஆக்ஷன் காட்சி என்று சமூகவலைத்தளத்தில் ஒரு வீடியோ பரவி வரும் நிலையில், பாலிவுட்டின் எல்லா சாதனைகளையும் இந்தப் படம் முறியடிக்கும் என்று ரசிகர்கள் கொண்டாடி வருகின்றனர். ‘ராஜா ராணி’, ‘தெறி’, ‘மெர்சல்’, ‘பிகில்’ ஆகியப் படங்களைத் தொடர்ந்து இயக்குநர் அட்லீ, 5-வது படமாக ‘ஜவான்’ படத்தை இயக்கி வருகிறார். இந்தப் படத்தில் நடிகர் ஷாருக்கான் இரட்டை கதாபாத்திரத்தில் நடித்து வருவதாகக் கூறப்படுகிறது. மேலும் ‘ஜவான்’ படத்தில் நயன்தாரா, ப்ரியாமணி, கௌரவ வேடத்தில் தீபிகா படுகோனே, வில்லனாக விஜய் சேதுபதி, யோகிபாபு, சான்யா மல்ஹோத்ரா, சுனில் குரோவர் உள்ளிட்ட பலர் நடித்து வருகின்றனர். மும்பை, ஹைதரபாத், சென்னை உள்பட பல இடங்களில் படத்தின் படப்பிடிப்பு விறுவிறுப்பாக நடைபெற்று வருகிறது. இந்தப் படம் வரும் ஜூன் 2-ம் தேதி, தமிழ், தெலுங்கு, மலையாளம், கன்னடம், இந்தி ஆகிய 5 மொழிகளில் பான் இந்தியா படமாக வெளியாக உள்ளது. அனிருத் இசையமைக்கும் இந்தப் படத்தை, ஷாருக்கான் மற்றும் அவரது மனைவி கௌரிகான் ஆகியோரின் தயாரிப்பு நிறுவனமான ரெட் சில்லிஸ் எண்டெர்டெயிண்மெண்ட் தயாரிக்கிறது. இந்நிலையில், இந்தப் படத்தில் ஷாருக்கான் அதிரடியாக சண்டையிடும் காட்சிகள் என்று சமூகவலைத்தளத்தில் ஒரு வீடியோ பரவி வருகிறது. நீல நிற உடையில் தோற்றமளிக்கும் ஷாருக்கான் வெள்ளை நிற பெல்ட்டால் எதிரிகளை துவம்சம் செய்வதுபோல் அந்த வீடியோவில் உள்ளது. இதனைப் பார்த்து வரும் அவரது ரசிகர்கள் அதிகளவில் இந்த வீடியோவை ஷேர் செய்வதுடன், பாலிவுட்டில் தரமான சம்பவம் காத்திருக்கிறது என்றும், நிச்சயமாக படம் 2,000 கோடி ரூபாய் வசூலிக்கும் என்றும் ட்விட்டரில் ட்ரெண்டாக்கி வருகின்றனர். #Pathaan was just a teaser... Asli mass action picture toh #Jawan hogi... SRK in an avatar like never before! — Rahul Raut (@Rahulrautwrites) March 10, 2023 What the hell is this man .@Atlee_dir is going to blast the screen on June 2nd.@iamsrk swag and @anirudhofficial BGM #LeoFilm #Jawan @actorvijay pic.twitter.com/mwSYVjGLyy — Aash (@thenameisaash) March 10, 2023 அத்துடன், ‘பதான்’ படத்தை அடுத்து ஷாருக்கானின் ரசிகர்கள் ‘ஜவான்’ படத்தை விளம்படுத்துவதற்காக fake ஆன வீடியோவை எடிட் செய்து இவ்வாறு பதிவிட்டு வருவதாகவும், சிலர் லெஜண்ட் சரவணின் ‘தி லெஜண்ட்’ படத்தில் வரும் அதே அதிரடி காட்சி என்று இரண்டையும் ஒப்பிட்டு காப்பி அடித்துவிட்டதாக கூறிவருகின்றனர். இதனால் ‘ஜவான்’ மற்றும் அட்லீயை ரசிகர்கள் ட்விட்டரில் ட்ரெண்டாக்கி வரும் அதேவேளையில் படத்தின் தயாரிப்பு நிறுவனமான ரெட் சில்லிஸ் எண்டெர்டெயின்மெண்ட் காப்புரிமையின் கீழ், ‘ஜவான்’ படத்திலிருந்து லீக்கான புகைப்படம் மற்றும் வீடியோக்கள் சமூகவலைத்தளத்தில் நீக்கப்பட்டு வருவது குறிப்பிடத்தக்கது. Every Masterpiece has its own cheap copy. 1 : The Legend tamil movie fight scene. 2 : #Jawan Leaked fight scene. pic.twitter.com/ExliPQGAgB —  (@Sallubot) March 10, 2023
http://dlvr.it/SkjlKk

Read More

டெல்லி: சிறைசென்றவர்களுக்கு பதிலாக இரு புதிய அமைச்சர்கள் இன்று பதவியேற்பு...!

டெல்லியின் இரண்டு புதிய அமைச்சர்களாக சௌரப் பரத்வாஜ் மற்றும் அதிஷி இன்று பதவி ஏற்றுக்கொள்கின்றனர். பல்வேறு குற்றச்சாட்டுகளில் சிறையில் உள்ள ஆம் ஆத்மி அமைச்சர்கள் மணீஷ் சிசோடியா மற்றும் சத்யேந்தர் ஜெயின் ஆகியோரின் ராஜினாமாக்களை டெல்லி அரசு ஏற்றுகொண்டதையடுத்து, அக்கட்சியில் எம்எல்ஏ-க்களாக உள்ள அதிஷி மற்றும் சௌரப் பரத்வாஜ் ஆகியோரை அமைச்சர்களாக நியமிக்க குடியரசு தலைவருக்கு டெல்லி அரசு பரிந்துரைத்தது. அந்தப் பரிந்துரையை ஏற்ற குடியரசுத்தலைவர், இருவரையும் அமைச்சர்களாக நியமனம் செய்தார். குடியரசு தலைவரின் அந்த ஒப்புதலின் அடிப்படியில் இன்று இருவரும் அமைச்சர்களாக பதவி ஏற்றிக்கொள்கின்றனர். இவர்களில் சௌரப் பரத்வாஜ், கடந்த 2013-ம் ஆண்டு முதல் ஆம் ஆத்மி கட்சியின் எம்.எல்.ஏ.வாக இருந்து வருகிறார். மணீஷ் சிசோடியாவின் கல்வி குழுவிலும் முக்கிய உறுப்பினராக இருந்துள்ளார். 2019 மக்களவைத் தேர்தலில் கிழக்கு டெல்லி தொகுதியில் போட்டியிட்ட இவர், பாஜகவின் கெளதம் கம்பீரிடம் தோல்வியடைந்தார். பின் 2020 சட்டமன்ற தேர்தலின்போது கிரேட்டர் கைலாஷ்-ன் எம்.எல்.ஏ-வாக தேர்வானார். கட்சியின் தேசிய செய்தித் தொடர்பாளராகவும் உள்ள சௌரப் பரத்வாஜ், டெல்லி ஜல் போர்டின் துணைத் தலைவராக பணியாற்றியவர். ஆம் ஆத்மி அரசாங்கத்தின் முதல் ஆட்சியின் போது அமைச்சராக இருந்தவர் இவர். அதிஷி மர்லினா, 2020-ம் ஆண்டு முதல் ஆம் ஆத்மி கட்சி எம்.எல்.ஏ.வாக இருந்து வருகிறார். ஆம் ஆத்மி கட்சியின் தொடக்கம் முதலே அக்கட்சியில் இருந்து வருகிறார் இவர். இவர் சிசோடியாவின் கல்வித்துறை ஆலோசராகவும் இருந்து வந்தார். டெல்லி சட்டசபை மார்ச் 17ம் தேதி கூடும் என எதிர்பார்க்கப்படும் நிலையில், இருவரும் இன்று பதவி ஏற்றுக்கொள்கின்றனர். டெல்லி அரசும் இந்த மாதம் பட்ஜெட்டை தாக்கல் செய்யும் என எதிர்பார்க்கப்படுகிறது. ஆளும் கட்சியின் இரு அமைச்சர்கள் சிறை சென்றுள்ளது, பட்ஜெட் தாக்கலின்போது சில சலசலப்புகளுக்கு வழிவகுக்கக்கூடும் என சொல்லப்படுகிறது. தற்போது பதவியேற்கும் இருவருக்கும் எந்த துறைகள் ஒதுக்கப்படும் என்ற எதிர்பார்ப்பு நிலவும் நிலையில், அதிஷிக்கு கல்வி மற்றும் பெண்கள் மற்றும் குழந்தைகள் மேம்பாட்டுத் துறைகள் வழங்கப்படும் என்றும் பரத்வாஜ்க்கு சுகாதார துறை மற்றும் பொதுப்பணித் துறையும் வழங்கப்படலாம் என்றும் கட்சி வட்டாரங்கள் தெரிவிக்கின்றன.
http://dlvr.it/SkfwNn

Read More